CNI News

၂၀၂၂ ခုနှစ်၊ စက်တင်ဘာ ၁၅

ရှမ်းပြည်နယ်အတွင်းက ပအိုဝ်းကိုယ်ပိုင်အုပ်ချုပ်ခွင့်ရဒေသကို စစ်တလင်း မဖြစ်စေချင်ကြောင်း ပအိုဝ်းအမျိုးသား အဖွဲ့ချုပ်(PNO)မှ ဗဟိုအလုပ်အမှုဆောင် စောခွန်ကျော်ဝင်းက CNI သတင်းဌာနသို့ ပြောသည်။

PNO အနေဖြင့် စစ်တလင်းမဖြစ်အောင် ကာကွယ်မည်ဆိုသည့် မူကိုချထားကြောင်း၊ မိမိ၏ တစ်ဦးတည်းအမြင် အရ စစ်ဖြစ်ပါက ပြည်သူလူထုသည် ဓါးစာခံဖြစ်မှာဖြစ်ကြောင်း ၎င်းက ပြောသည်။

စောခွန်ကျော်ဝင်းက “ကျနော်အမြင်ကတော့ PNO ရဲ့ မူကတော့ ဆရာတို့ သိပြီးသားပေါ့နော်၊ သိပြီးသားဆို ကျနော်တို့ ပအိုဝ်းဒေသပေါ့၊ အရင်တုန်းက ငြိမ်းချမ်းရေးယူတုန်းက အထူးဒေသ ၆ ပေါ့နော်၊ သတ်မှတ်ထားတဲ့ နယ်မြေရှိတယ်၊ အဲဒီနယ်မြေမှာ အစိုးရနဲ့ သဘောတူထားတာရှိတယ်၊ ဒီတိုင်းရင်းသား လက်နက်ကိုင် အဖွဲ့အစည်း ပေါ့၊ ဥပမာ တောင်ဖက်ရော၊ အရှေ့ဖက်ရော အားလုံးက သူ့နယ်မြေ၊ ကိုယ့်နယ်မြေ ရှိပြီးသားပေါ့၊ ခြံစည်းရိုးက ရှိပြီးသားပေါ့၊ ဒီလိုသတ်မှတ်ထားတာ ရှိပြီးသားပေါ့နော်၊ အဓိကတော့ ဒီဖက်မှ နစက အာဏာ စယူတဲ့အချိန် ကစ ပြီး‌တော့ အဓိက ကျနော်တို့ နယ်မြေမှာ စစ်တလင်း မဖြစ်ချင်ဘူးပေါ့နော်၊ စစ်တလင်း မဖြစ်ချင်ဘူး။ စစ်ဖြစ်မယ် ဆိုရင် ကျနော်တို့ ဒီလက်နက်ကိုင်တဲ့ အဖွဲ့အစည်းမှန်သမျှ ပြဿနာမရှိဘူး။ ကိုယ့်ဟာကိုယ် ကာကွယ်လို့ရတယ်၊ ရိက္ခာတွေအားလုံး ပြည်သူလူထုနဲ့ ယူလို့ရတယ်၊ ဘယ်နည်းနဲ့ ဖြစ်ဖြစ်ပေါ့နော်၊ ဒါပေမဲ့ အဓိက ဓါးစာခံဖြစ်မှာ ပြည်သူလူထုက ဓါးစာခံဖြစ်မယ်၊ ဒုက္ခရောက်မှာ လူထုပဲ ဒုက္ခရောက်မှာ။ ဒါကြောင့် ဒီနယ်မြေကတော့ အတတ် နိုင်ဆုံး စစ်တလင်း မဖြစ်အောင် ကာကွယ်မယ်ဆိုတဲ့ မူကိုတော့ ချထားတယ်” ဟု CNI သတင်းဌာနသို့ ပြောသည်။

ပအိုဝ်းပြည်သူ့စစ်အဖွဲ့(PNO)

ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ဆီဆိုင်မြို့နယ်၊ နောင်ထောင်ဒေသရှိ မြန်မာ့တပ်မတော်၏ စခန်း (၂) ခုကို ညီညွတ်သောရှမ်းတောင် ဖက်ဒရယ် တပ်ပေါင်းစုမှ စက်တင်ဘာ ၁၂ ရက်က ပထမဆုံးအကြိမ် ထိုးစစ်ဆင် တိုက်ခိုက်နိုင်ခဲ့ ကြောင်း ထုတ်ပြန်ခဲ့သည်။

ထိုတိုက်ခိုက်မှုကြောင့် တပ်မတော်ဘက်မှ ၂၀ ဦးထက်မနည်း သေဆုံးကြောင်း ထုတ်ပြန်ချက်တွင် ဖော်ပြထားသည်။

အဆိုပါ ကိစ္စရပ်များနှင့် ပတ်သက်၍ နစကဘက်မှ တစ်စုံတစ်ရာ ထုတ်ပြန်ခြင်း မရှိပေ။

ပအိုဝ်းကိုယ်ပိုင်အုပ်ချုပ်ခွင့်ရဒေသတွင် ဖြစ်ပွားခဲ့သော တိုက်ပွဲနှင့် ပတ်သက်၍ မှတ်ချက်ပေးစရာမရှိကြောင်း ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) မှ တွဲဖက်အထွေထွေအတွင်းရေးမှူး (၁) ဗိုလ်မှူး ခွန်မင်းသိမ်းက CNI သတင်းဌာနသို့ ပြောသည်။

ပအိုဝ်းအမျိုးသားကာကွယ်ရေးတပ်(PNDF)

၎င်းက “မှတ်ချက်ပေးစရာမရှိပါဘူး အဲဒါကတော့၊ တိုက်ပွဲဖြစ်တယ်ဆိုကတည်းက တိုက်ပွဲကတော့ ထုံးစံအတိုင်းပေါ့နော်၊ သေကြေ၊ ထိခိုက်၊ နစ်နာမှုတွေတော့ ရှိတတ်ပါတယ်” ဟု ပြောသည်။

ဆီဆိုင်မြို့နယ်၊ နောင်ထောင်ဒေသသည် PNLO လှုပ်ရှားဒေသ မဟုတ်ကြောင်း သို့သော်လည်း ဖြတ်သန်း သွားလာမှုရှိကြောင်း PNLO မှ ဗိုလ်မှူးခွန်မင်းသိမ်းက ပြောသည်။

တခြားတစ်ဖက်မှာတော့ ရှမ်းပြည်နယ်တောင်ပိုင်း၊ ပင်လောင်းမြို့နယ်၊ ပင်မွန်းကျေးရွာအုပ်စု၊ ဝါးပြုံးကျေးရွာ တွင် PNLO/PNLA တပ်ဖွဲ့ဝင် ၅ ဦးကို ၂၀၂၂ ခုနှစ်၊ စက်တင်ဘာ ၁၄ ရက်နေ့က PNO/PNA ပြည်သူ့စစ်အဖွဲ့က ဖမ်းဆီးခေါ်ဆောင် သတ်ဖြတ်ခဲ့ခြင်းကို ရှုံ့ချကြောင်း PNLO/PNLA က စက်တင်ဘာ ၁၅ ရက်တွင် ထုတ်ပြန်ခဲ့ သည်။

PNLO ၏ ထုတ်ပြန်ချက်

စက်တင်ဘာ ၁၂ ရက်နေ့က ဖြစ်ပွားခဲ့သော ဖြစ်စဉ်သည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် တပ်မတော်က အာဏာယူပြီးနောက်ပိုင်း ဖြစ်ပွားသည့် ဆန့်ကျင်တော်လှန်တိုက်ပွဲများတွင် ပအိုဝ်းဒေသ၌ ပထမဆုံး ဖြစ်ပွား သော တိုက်ပွဲဖြစ်သည်။

PNO ဆိုသည်မှာ ပြည်သူ့စစ် လက်နက်ကိုင်အဖွဲ့နှင့် နိုင်ငံရေးပါတီဆိုကာရှိသည်။ သို့သော် ထိုနှစ်ဖွဲ့သည် ခွန်အောင်ခမ်းထီး၏ ဦးဆောင်မှုကနေ ပအိုဝ်းအမျိုးသားရေးကို ဆောင်ရွက်နေကြခြင်းဖြစ်သည်။

CNI News

၂၀၂၂ ခုနှစ်၊ စက်တင်ဘာ ၁၅

ရခိုင်ပြည်နယ်တွင် မြန်မာ့တပ်မတော်နှင့် ရက္ခိုင့်တပ်တော်(AA)တို့ကြား တိုက်ပွဲများ ပြင်းထန်စွာဖြစ်ပွားနေခြင်း ကြောင့် ရေလမ်းကြောင်း သွားလာရေးခရီးစဉ်များကို ကန့်သတ်မှုများ ရှိလာခြင်းကြောင့် စားဝတ်နေရေး ခက်ခဲ လာနိုင်သည်ဟု ဒေသခံများနှင့် စီးပွားရေးလုပ်ငန်းရှင်များက ပြောသည်။

ရခိုင်ပြည်နယ်တွင် မြန်မာ့တပ်မတော်က ကြည်း၊ ရေ၊ လေ လမ်းကြောင်းများကနေ စစ်အင်အား ပို့ဆောင် ဖြည့် တင်းနေခြင်းကြောင့် ရေလမ်းကြောင်းများတွင် အရေးပေါ် စစ်ဆေးမှုများ ပြုလုပ်သွားမည်ဖြစ်ကြောင်း AA က စက်တင်ဘာ ၁၄ ရက်တွင် ထုတ်ပြန်ခဲ့သည်။

ရခိုင်ပြည်နယ် ရသေ့တောင်မြို့နယ်တွင် လွန်ခဲ့သော သုံးလက ကုန်းလမ်းပို့ဆောင်ရေး လုပ်ငန်းများ ပိတ်ထား ခြင်းကြောင့် ရေလမ်းကြောင်းကို အဓိက မှီခိုအားထားနေရကြောင်း၊ ထို့ကြောင့် ရေလမ်းကြောင်းများပါ ပိတ်လိုက် ခြင်းကြောင့် အခြေခံလူတန်းစားများအတွက် စားဝတ်နေရေး အခက်အခဲများ ကြုံလာနိုင်ကြောင်း ရသေ့တောင်မှ ဒေသခံ ဦးကျော်မင်းခိုင်က CNI သတင်းဌာနသို့ ပြောသည်။

၎င်းက “ကျနော်တို့ ဒီမှာက ရေလမ်းတစ်ခုတည်းကို မှီပြီးတော့ ကုန်သွယ်ရေးကို လုပ်နေရတာ၊ သယ်ယူပို့ဆောင် ရေးတွေ အားကိုးနေရတာ အဓိကက ရေလမ်းတစ်ခုပဲ ရှိတော့တာ ၊ အဲ့ရေလမ်းပါ ထပ်ပိတ်လိုက်တယ်ဆိုတော့ မြို့နယ်တွေက လူတွေက လုံးဝ ပိတ်မိသွားတဲ့ အနေအထား ဖြစ်သွားပြီဗျ။ ထိတာကတော့ လူတန်းစား သုံးခုလုံး ကို ထိတာပါပဲ။ ဒါပေမယ့် လူတန်းစားသုံး ခုလုံးကို ထိတယ်ဆိုပေမယ့် အဓိက အခြေအနေ ဆိုးဆိုးရွားရွား ဖြစ်သွားတာက အခြေခံလူတန်းစားပေါ့ဗျာ၊ ကျန်တဲ့ လူတန်းစား နှစ်ရပ်ကျတော့ စားဖို့သောက်ဖို့ကို ပူစရာ မလို ဘူးပေါ့ဗျာ၊ အ‌ခြေခံ လူတန်းစားကြတော့ နေ့စဉ်နဲ့အမျှ ရုန်းကန်နေရတာလေ ၊ အလုပ်လုပ်ရတာက အဆင်မပြေ ဘူး ကုန်ဈေးနှုန်းတွေက တက်ဆိုတော့ စားဝတ်နေရေးကအစ တော်တော်လေး အခက်အခဲ ဖြစ်သွားလိမ့်မယ်” ဟု ပြောသည်။

ရခိုင်ပြည်နယ်အတွင်း ပြေးဆွဲနေသော ရေယာဉ်တစ်စီးကိုတွေ့ရစဉ် (MOI)

ရက္ခိုင့်တပ်တော်အနေဖြင့် မြန်မာ့တပ်မတော် သွားလာနေသည့် လမ်းကြောင်းများမှာ ပြေးဆွဲနေကြသော ကုန်း လမ်း၊ ရေလမ်း ယာဉ်အားလုံးကို စစ်ရေး အခြေအနေအရ ရပ်တန့်စစ်ဆေးသွားမှာဖြစ်ကြောင်း စက်တင်ဘာ ၁၄ ရက်က ထုတ်ပြန်ခဲ့သည်။

လက်ရှိတွင် ရခိုင်ပြည်နယ်အတွင်း ပြေးဆွဲနေသော ရေယာဉ်လိုင်းများက ရေကြောင်းပို့ဆောင်ရေး လုပ်ငန်းများကို ခေတ္တ ရပ်နားထားပြီး ဘယ်အချိန်ထိ ရပ်နားထားမလဲ ဆိုသည်ကိုတော့ အတိအကျ မသိရသေးကြောင်း ဒေသခံ များထံမှ သိရသည်။

ထို့နောက် ရေကြောင်း ရပ်နားလိုက်ခြင်းကြောင့် ကုန်ဈေးနှုန်းများ ဈေးတက်လာပြီး စားဝတ်နေရေး ထိခိုက်လာ နိုင်ကြောင်း ရခိုင်ပြည်နယ် ကုန်သည်များနှင့်စက်မှုလုပ်မှု လုပ်ငန်းရှင်များအသင်း၏ အတွင်းရေးမှူး ကိုအောင်အောင်က CNI သတင်းဌာနသို့ ပြောသည်။

AA ထုတ်ပြန်ချက်ကိုတွေ့ရစဉ်

၎င်းက “အဓိကကတော့ စားဝတ်နေရေးပေါ့ဗျာ၊ လူတွေမှာ ကုန်စည်စီးဆင်းမှု အဆင်ပြေတယ်ဆိုရင် ကုန်ပစ္စည်း က ဈေးလည်း မတက်ဘူး၊ သွားလာတဲ့ အလုပ်အကိုင်တွေကလည်း အဆင်ပြေကြတယ်၊ နည်းနည်း ပါးပါးပေါ့။ အများကြီး မဟုတ်ရင်တောင် နည်းနည်းပါးပါး အဆင်ပြေကြတယ်ပေါ့၊ ဘူးသီးတောင်တို့ ဆိုတာကလည်း သယ်ယူ ပို့ဆောင်ရေး လုပ်ငန်းကို မှီခိုပြီးတော့ စားသုံးနေတဲ့ လူတွေရှိတယ်၊ မောင်တောတို့ဆိုလည်း နဂိုထဲက ဈေးကြီးနေ တဲ့အခါမှာ ဒီလိုမျိုး တင်ပို့မှုတွေ ကန့်သတ်လိုက်တဲ့ အခါကြတော့ ကုန်ဈေးနှုန်း တက်တာတွေဘာတွေ ဖြစ်နိုင်တာ ပေါ့နော်၊ သူများနိုင်ငံကလည်း သွင်းလို့မရဘူး။ ဒီဘက်ကလည်း ပို့လို့မရဘူးဆိုတဲ့ အခါကြတော့ တော်တော်လေး တော့ အခက်အခဲ တွေ့ပါတယ်၊ ဘာတွေ ဆက်ဖြစ်မလဲဆိုတာတော့ ကျနော်တို့လည်း စောင့်ကြည့်နေပါတယ်” ဟု ပြောသည်။

ရခိုင်ပြည်နယ်၊ စစ်တွေမြို့တွင် ရေလမ်းကြောင်းကို လောလောဆယ် ရပ်နားထားခြင်း မရှိကြောင်း၊ ယနေ့ (စက်တင်ဘာ ၁၅ ရက်)အထိ ပြေးဆွဲနေကြောင်း ကိုအောင်အောင်က ပြောသည်။

ယခုလို ကုန်ဈေးနှုန်းများ တက်လာခြင်းကြောင့် မြန်မာနိုင်ငံအတွင်းရှိ ဒေသများတွင် စားဝတ်နေရေး ကြပ်တည်း မှုများအပြင် လုယက်မှုများပါ ပေါများလာနေကြောင်း သိရသည်။

CNI News

၂၀၂၂ ခုနှစ်၊ စက်တင်ဘာ ၁၅

ဒီမိုကရေစီလိုလားတောင့်တနေကြသည့် ပြည်သူများ၏ ဆန္ဒကို လေးစားရန် မြန်မာ့တပ်မတော်ကို မိမိတို့ တောင်းဆိုပါသည်ဟု မြန်မာနိုင်ငံဆိုင်ရာ အမေရိကန်သံရုံးက စက်တင်ဘာ ၁၅ ရက်နေ့တွင် ထုတ်ပြန်ခဲ့သည်။

၂၀၂၂ ခုနှစ်၊ စက်တင်ဘာ ၁၅ ရက်နေ့တွင် ကျရောက်သည့် အပြည်ပြည်ဆိုင်ရာ ဒီမိုကရေစီနေ့ အထိမ်းအမှတ် ထုတ်ပြန်ချက်၌ ဖော်ပြထားသည်။

အမေရိကန်သံရုံးက “ ပြည်သူတွေအတွက် ပြည်သူတွေက ရွေးကောက်တင်မြှောက်ထားတဲ့ ပြည်သူ့အစိုးရ ရှိတာဟာ ဒီမိုကရေစီဖြစ်ပြီး ငြိမ်းချမ်းရေး၊ သာယာဝပြောရေးနဲ့ လုံခြုံရေးကို တိုးတက်အောင် ဆောင်ရွက်ဖို့ အတွက် လူ့လောကရဲ့ အဓွန့်ရှည် တည်တံ့ဆုံး နည်းလမ်းဖြစ်တယ်ဆိုတဲ့ အခြေခံ အမှန်တရားတစ်ရပ်ကို အခု လို အပြည်ပြည်ဆိုင်ရာ ဒီမိုကရေစီနေ့မှာ မိမိတို့ ထပ်လောင်း အတည်ပြုပါတယ်။ လွတ်လပ်မှုနဲ့ ဒီမိုကရေစီ အရေးအတွက် ကြိုးပမ်းအား ထုတ်နေကြတဲ့ မြန်မာပြည်သူတွေနဲ့အတူ မိမိတို့ရပ်တည်ပြီး စစ်အာဏာရှင်စနစ် ဆိုးအောက်မှာ တစ်ရက်မျှ မနေထိုင်ချင်ဘဲ ဒီမိုကရေစီလိုလား တောင့်တနေကြတဲ့ ပြည်သူတွေရဲ့ဆန္ဒကို လေးစားဖို့ စစ်အာဏာရှင်ကို မိမိတို့ တောင်းဆိုပါတယ်”ဟု ပြောသည်။

မြန်မာနိုင်ငံဆိုင်ရာ အမေရိကန်သံရုံးရဲ့ ဒီမိုကရေစီနေ့ ထုတ်ပြန်ချက်
မြန်မာနိုင်ငံသည် ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က အမျိုးသားဒီမိုကရေစီအဖွဲ့ချုပ် (NLD)အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုကို မဖြေရှင်းဘဲ အစိုးရဖွဲ့စည်းရေး ကြိုး ပမ်းသည်ဟုဆိုကာ နိုင်ငံတော်အာဏာကို ရယူလိုက်ပြီး အရေးပေါ် အခြေအနေကြေညာခဲ့သည်။

ထို့နောက် တပ်မတော်ဆန့်ကျင်ရေးနှင့် ဒီမိုကရေစီ ပြန်လည်ထူထောင်ရေး လူထုဆန္ဒပြပွဲများ နိုင်ငံတစ်ဝှမ်း ဖြစ် ပေါ်ခဲ့သလို နွေဦးတော်လှန်ရေးဆိုသော လက်နက်ကိုင် တော်လှန်ရေးလည်း ပေါ်ပေါက်လာခဲ့သည်။

လက်ရှိတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ရခိုင်ပြည်နယ်၊ ချင်းပြည်နယ်၊ ကရင်ပြည်နယ်၊ ကယားပြည်နယ်တို့တွင် လက်နက်ကိုင် ပဋိပက္ခများ ဖြစ်ပွားနေသလို မန္တလေးတိုင်းဒေသကြီး၊ ရန်ကုန်တိုင်း ဒေသကြီး၊ မွန်ပြည်နယ်၊ ရှမ်းပြည်နယ်၊ ပဲခူးတိုင်းဒေသကြီးများတွင်လည်း လူသေဆုံးမှုများနှင့် ပေါက်ကွဲမှုများ ဖြစ်ကာ တရားဥပဒေစိုးမိုးမှု အားနည်းနေသည်။

ဒီမိုကရေစီအရေး တောင်းဆိုနေကြစဉ် (ဖရွန်းတီးယားမြန်မာ)

မြန်မာ့တပ်မတော် ခေါင်းဆောင် ဗိုလ်ချုပ်မှူးကြီးမင်းအောင်လှိုင် ဦးဆောင်သည့် နစက ကတော့ ၂၀၂၃ ခုနှစ် တွင် အထွေထွေရွေးကောက်ပွဲလုပ်ကာ အနိုင်ရသော ပါတီကို အာဏာလွှဲပေးသွားမည်ဟု ပြောသည်။

သို့သော် ဒီမိုကရေစီအရေး တောင်းဆိုတိုက်ပွဲဝင်နေကြသော အင်အားစုများကလည်း နစက ကျင်းပမည့် ရွေး ကောက်ပွဲသည် အတုအယောင်ဖြစ်သလို ၎င်းတို့ အာဏာဆက်လက် ရယူနိုင်ရေးအတွက် အသုံးချမှုတစ်ခုသာ ဖြစ်သည်ဟု ပြောကြသည်။

CNI News

၂၀၂၂ ခုနှစ်၊ စက်တင်ဘာ ၁၄

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ၍ ငြိမ်းချမ်းရေး လုပ်ငန်းစဉ်များ ဆွေးနွေးရန် ကရင် လက်နက်ကိုင် ၂ ဖွဲ့ဖြစ်သည့် KNU/KNLA-PC နှင့် DKBA တို့မှ ခေါင်းဆောင်များသည် နေပြည်တော်သို့ ၂၀၂၂ ခုနှစ်၊ စက်တင်ဘာ ၁၄ ရက်နေ့တွင် ရောက်ရှိလာခဲ့သည်။

ကရင်အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA -PC)ကို ဒုဥက္ကဋ္ဌ ဒေါက်တာနော်ကပေါ်ထူး ဦးဆောင်ခဲ့ခြင်းဖြစ်ပြီး ဒီမိုကရေစီအကျိုးပြုကရင်တပ်မတော်(DKBA )ကိုတော့ စစ်ဦးစီးချုပ် ဗိုလ်ချုပ်ကြီးစောစတီး ဦးဆောင်ခဲ့ခြင်း ဖြစ်ကြောင်း သိရသည်။

ထို့နောက် စက်တင်ဘာ ၁၅ ရက်နေ့တွင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ကရင်လက်နက်ကိုင် ၂ ဖွဲ့ ပူးတွဲ၍ တွေ့ဆုံ ဆွေးနွေးကြမည်ဖြစ်သည်။

KNU/KNLA-PC ဒုဥက္ကဋ္ဌ ဒေါက်တာနော်ကပေါ်ထူးနှင့် ကိုယ်စားလှယ်အဖွဲ့ကိုတွေ့ရစဉ်

နောက်ရက်များတွင် ဒုဗိုလ်ချုပ်ကြီး ရာပြည့် ဦးဆောင်သည့် ငြိမ်းချမ်းရေးဆွေးနွေးရေးအဖွဲ့နှင့် ကရင်လက်နက် ကိုင် ၂ မှ ခေါင်းဆောင်များ ငြိမ်းချမ်းရေးလုပ်ငန်းစဉ် အသေးစိတ်များကို ဆက်လက် ဆွေးနွေးကြမည် ဖြစ် သည်။

KNU/KNLA-PC သည် ၂၀၂၂ ခုနှစ်၊ မေလ ၂၆ ရက်မှ ၂၈ ရက်အထိ နစကနှင့် တွေ့ဆုံ၍ ငြိမ်းချမ်းရေး လုပ်ငန်း စဉ်များကို ဆွေးနွေးခဲ့ပြီးဖြစ်ရာ ယခုအခါမှာတော့ ဒုတိယအကြိမ် တွေ့ဆုံ ဆွေးနွေးကြမည် ဖြစ်သည်။

အလားတူ DKBA သည်လည်း ၂၀၂၂ ခုနှစ်၊ ဇွန်လ ၁၉ ရက်မှ ၂၁ ရက်အထိ နစကနှင့် တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့ပြီးဖြစ်ရာ ယခုအခါမှာတော့ ဒုတိယအကြိမ် တွေ့ဆုံ ဆွေးနွေးကြမည် ဖြစ်သည်။

KNU/KNLA-PC နှင့် DKBA တို့သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA) ထိုးထားသည့် တိုင်းရင်းသားလက်နက်ကိုင်များ ဖြစ်သည်။

CNI News

၂၀၂၂ ခုနှစ်၊ စက်တင်ဘာ ၁၄

မြန်မာ့တပ်မတော်သည် ရခိုင်ပြည်နယ်အနှံ့ ၎င်းတို့၏ တပ်စခန်းများသို့ စစ်အင်အား၊ လက်နက်ခဲယမ်းများကို စစ်သင်္ဘော၊ စစ်ကား၊ စစ်ရဟတ်ယာဉ် အပါအဝင် အရပ်ဖက်သုံး ခရီးသည်တင် လေယာဉ်၊ ကား၊ မော်တော် ဘုတ်၊ အမြန်ရေယာဉ်များဖြင့် အင်အားဖြည့်တင်းနေခြင်းကြောင့် စစ်ဆေးမှုများ ပြုလုပ်သွားမည်ဟု ရက္ခိုင့်တပ် တော်(AA)က စက်တင်ဘာ ၁၄ ရက်တွင် အရေးပေါ် ထုတ်ပြန်ကြေညာခဲ့သည်။

အဆိုပါ ထုတ်ပြန်ချက်တွင် မိမိတို့ ရက္ခိုင့်တပ်တော်အနေဖြင့် ၎င်းတို့သွားလာနေကြသည့် လမ်းကြောင်းများတွင် ပြေးဆွဲနေကြသော ကုန်းလမ်း၊ ရေလမ်း ယာဉ်များအားလုံးကို စစ်ရေးအခြေအနေ လိုအပ်ချက်အရ ရပ်တန့်ခိုင်း ၍ စစ်ဆေးမှုများ ပြုလုပ်သွားမည်ဟု ဖော်ပြထားသည်။

AA က “ စစ်ကောင်စီသည် ယခင်ရက်သတ္တပတ်များအတွင်း ၎င်းတို့ဆုံးရှုံးခဲ့ရပြီး မိမိတို့ တပ်စွဲစခန်းချထားသော နေရာများဖြစ်သည့် ရခိုင်-ဘင်္ဂလားနယ်စပ်အနီး မိုင်တိုင်အမှတ် ၄၀ စခန်းနှင့် ခမရ ၃၅၂ တပ်ရင်း စခန်းကုန်း များအပြင် ပလက်ဝဒေသ အပါအဝင် အခြားသော နေရာအချို့ကိုလည်း ဂျက်တိုက်လေယာဉ်၊ လက်နက်ကြီး ပစ်ကူ အမြောက်အမြားဖြင့် ပြန်လည်ထိုးစစ်ဆင် တိုက်ခိုက်နေသည့် ကာလလည်းဖြစ်သည်။ ရခိုင်နှင့် ပလက်ဝ ဒေသအတွင်း စစ်ရေးတင်းမာမှု၊ တိုက်ပွဲဖြစ်ပွားမှုများ ပြင်းထန်လာခြင်းနှင့်အတူ နောက်ထပ် တိုက်ပွဲများ နေရာ အနှံ့ကြီးကြီးမားမား ဖြစ်ပေါ်လာနိုင်သောကြောင့် မိမိတို့အနေဖြင့် ယခုကဲ့သို့ ကုန်းလမ်း၊ ရေလမ်း၊ ခရီးသွား လာမှုများကို ကန့်သတ် စစ်ဆေးရခြင်းဖြစ်သည်”ဟု ထုတ်ပြန်ချက်တွင် ပြောထားသည်။

AA ၏ အရေးပေါ် ကြေညာချက်ကိုတွေ့ရစဉ်

ထို့ကြောင့် ကုန်းလမ်း၊ ရေလမ်း သယ်ယူပို့ဆောင်ရေးကို ပြုလုပ်နေကြသော ယာဉ်ပိုင်ရှင်များ အနေဖြင့် ရခိုင် ပြည်သူ့အစိုးရ၏ ဒေသဆိုင်ရာ နိုင်ငံရေးရုံး၊ အုပ်ချုပ်ရေးရုံး၊ နယ်မြေရုံးများတွင် သတင်းပို့၍ သွားလာကြရန်နှင့် စစ်ဆေးမှုများကို ကြည်ဖြူစွာခံယူကြရန် အသိပေးအပ်ပါသည်ဟု AA က ထုတ်ပြန်ခဲ့သည်။

မိမိတို့ထံ သတင်းမပို့ဘဲ သွားလာခြင်း မပြုလုပ်ကြရန်နှင့် သတင်းမပို့ဘဲ သွားလာ၍ တစ်စုံတစ်ရာ ပြဿနာဖြစ် ပေါ်ပါက ၎င်းသွားလာကြသူများ၏ တာဝန်သာ ဖြစ်ပါကြောင်း၊ လက်ရှိ စစ်ရေးတင်းမာနေမှုအပေါ် အခြေခံ၍ အရေးပေါ် ထုတ်ပြန်ကြေညာသည်ဟု AA ကပြောသည်။

AA သည် ရခိုင်-ဘင်္ဂလားဒေ့နယ်စပ် မှတ်တိုင် ၄၀ စခန်းကို ၂၀၂၂ ခုနှစ်၊ သြဂုတ် ၃၁ ရက်နေ့က လည်း ကောင်း၊ မောင်တောမြို့နယ်ထဲရှိ ခမရ ၃၅၂ စခန်းကို ၂၀၂၂ ခုနှစ်၊ စက်တင်ဘာ ၁၀ ရက်နေ့က လည်းကောင်း သိမ်းပိုက်ခဲ့ သည်။

ထို့နောက် မြန်မာ့တပ်မတော် တပ်စခန်းများ ပြန်လည် ရရှိရေးအတွက် ကြည်း၊ ရေ၊ လေ ထိုးစစ်ဆင် တိုက်ခိုက် လျက်ရှိရာ နှစ်ဖက် တိုက်ပွဲများ ဖြစ်ပွားနေသည်။

CNI News

၂၀၂၂ ခုနှစ်၊ စက်တင်ဘာ ၁၄

ကယား(ကရင်နီ)ပြည်နယ်၊ မိုးဗြဲမြို့ပေါ်တွင် ကရင်နီ အမျိုးသားကာကွယ်ရေးတပ်ဖွဲ့(KNDF)၊ ကရင်နီ လက်နက် ကိုင်များ ပူးပေါင်းအဖွဲ့နှင့် မြန်မာ့တပ်မတော်ကြား ဖြစ်ပွားသည့် တိုက်ပွဲကြောင့် တိုက်ပွဲရှောင် ၄ ထောင်ကျော်ရှိ လာပြီး လက်ရှိအချိန်ထိ စစ်ရေးတင်းမာနေဆဲဖြစ်ကြောင်း ကရင်နီပြည်နယ် လူ့ အခွင့်အရေးအဖွဲ့မှ ကိုဗညား က CNI သတင်းဌာနသို့ ပြောသည်။

ပြီးခဲ့သည့် စက်တင်ဘာ ၈ ရက်နေ့က စတင် ဖြစ်ပွားခဲ့သော တိုက်ပွဲသည် ယနေ့ (စက်တင်ဘာ ၁၄ ရက်)အထိ နှစ်ဖက် ထိတွေ့တိုက်ပွဲများ ရှိနေသေးကြောင်း ၎င်းက ပြောသည်။

ကိုဗညားက “လောလောဆယ် ကျနော်တို့ Update ပေါ့နော်၊ နောက်ဆုံး ရတာကတော့ ထိခိုက်ဒဏ်ရာ ရတာက ၆ ယောက် ဖြစ်သွားတယ်၊ အရပ်သားပေါ့နော် ၆ ယောက်၊ နောက်ပြီးတော့မှ ၇ နှစ်အရွယ် သားလေး တစ်ယောက် ကတော့ ဆုံးသွားတာပေါ့။ ဒါကတော့ လူထိခိုက်မှုပုံစံ ဖြစ်တာပေါ့နော်၊ နောက်ပြီးတော့မှ အခုလက်ရှိချိန်ထိ မြေပြင်ရှိနေတဲ့ တချို့ Volunteer (စေတနာ့ဝန်ထမ်း) တချို့၊ မိတ်ဆွေတွေရဲ့ အသံကနေ တဆင့်ပေါ့၊ သူတို့ ပြော ကြားချက်အရ ပြန်ကြည့်မယ်ဆိုရင်တော့ လူဦးရေတော့ ၅၀၀၀ ဝန်းကျင်တော့ ပြေးလိမ့်မယ်လို့ သူတို့က ခန့်မှန်း တယ်၊ ဒါပေမဲ့ နည်းနည်းပြောရခက်တာက မိုးဗြဲမှာ အခုချိန်ထိလည်း နည်းနည်းလေး စစ်ရေးတင်းမာမှုတွေ ရှိသေး တာပေါ့၊ တချို့ပစ္စည်းတွေ ရွှေ့ခိုင်းတာ ကျနော်တို့ အသံတွေ ကြားတယ်၊ စစ်ရေးဘယ်လိုလာမလဲ မသိသေးဘူး ပေါ့နော်၊ အဲဒီတစ်ခုရှိတော့ အကယ်၍ ဒီအတိုင်း ဆက်ဖြစ်မယ်ဆိုရင်တော့ လူဦးရေ သောင်းဂဏန်း ဖြစ်သွားနိုင် တာပေါ့၊ အခုတောင်မှ ကျနော်တို့ မြို့ပေါ်ရပ်ကွက် နီးပါးဖြစ်တာပေါ့နော်၊ မြို့အပြင်လေးနားမှာပေါ့နော်၊ ရပ်ကွက် ပေါ့၊ အဲဒီလိုမျိုးဖြစ်တော့ လောလောဆယ်တော့ ကျနော်တို့ အဲဒီလောက်အထိပဲ Confirm လို့ ရပါသေးတယ် ခင်ဗျ” ဟု CNI သတင်းဌာနသို့ ပြောသည်။

ကရင်နီတိုက်ပွဲရှောင်များ နေဖို့ ဆောက်လုပ်နေစဉ်(ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်)

အဆိုပါ တိုက်ပွဲရှောင်များမှာ လွိုင်ကော်မြို့နှင့် အခြား နီးစပ်ရာများသို့ တိမ်းရှောင်နေရကြောင်း၊ စားနပ်ရိက္ခာနှင့် နေရာ အခက်အခဲ ရှိနေကြောင်း ၎င်းက ပြောသည်။

မိုးဗြဲမြို့တွင် တိုက်ပွဲပြင်းထန်ခဲ့ခြင်းကြောင့် ဒေသခံများသည် မိမိတို့၏ လယ်ယာများနှင့် လုပ်ငန်းခွင်များမှ ရုတ်တရက် ထွက်ပြေးခဲ့ရကြကြောင်း၊ တိုက်ပွဲမှာ ရက်ဆက် ဖြစ်နေသည့်အတွက် မိမိတို့ နေအိမ်ကို ပြန်ဝင်၍ မရဘဲ စားဝတ်နေရေးပိုင်း အခက်အခဲရှိနေကြောင်း လွိုင်ကော်မြို့သို့ တိုက်ပွဲရှောင်လာသူ တစ်ဦးက CNI သတင်းဌာနသို့ ပြောသည်။

၎င်းက “ပြည်သူတွေလည်း ခက်ခဲကြတယ်ပေါ့။ တချို့တွေက တချို့ အဖွဲ့အစည်းတွေက ဘယ်လောက်ပဲ စစ်ရှောင်တွေကို ဦးတည်ပြီးတော့ သွားတယ်ပြောပြော အကုန်လုံးလက်လှမ်းမမီနိုင်ဘူးလေ၊ အကုန်လုံး ကာဗာ မိအောင် မသွားနိုင်တဲ့ အနေအထား ရှိတယ်ပေါ့နော်၊ ပြောစရာတော့ မရှိပေမယ့် လုပ်နိုင်တဲ့ အဖွဲ့အစည်းတွေ ရှိရင်တော့ ကျမတို့ ကရင်နီပြည်မှာရှိတဲ့ စစ်ရှောင်တွေကို နည်းနည်းဖြစ်ဖြစ်၊ များများဖြစ်ဖြစ် ဆိုင်ရာဆိုင်ရာ အဖွဲ့အစည်းတွေနဲ့ ချိတ်ပြီးတော့ စစ်ရှောင်တွေအတွက် Support ပေးတာတွေပေါ့နော်၊ ထောက်ပံ့ရေး သွားတာ တွေ စားနပ်ရိက္ခာ လုပ်တာတွေ အဲဒါတွေကို လုပ်ပေးစေချင်တယ်လေ၊ ဘာလို့လဲဆို ကျမတို့က အကုန်လုံးကို လက်လှမ်းမီနိုင်တဲ့ အနေအထားတွေ တချို့အဖွဲ့အစည်းတွေက ရှိမနေဘူး။ တချို့က လုပ်တော့ လုပ်နေပေမယ့် လည်း ကျန်တဲ့သူတွေလည်း ကျန်တဲ့ အနေအထားတွေ ရှိတယ်လေ၊ ကျမတို့က အချင်းချင်း အကုန်လုံးကို ပြန်ပြီး တော့ ကာဗာမိအောင် သွားဖို့ဆိုတာ နည်းနည်းခက်ခဲတဲ့ အနေအထားတွေ ရှိလို့ပေါ့နော်၊ တစ်ခုလေးတော့ အလှူ ရှင်တွေ ရှိတယ်ဆိုရင်လည်း စစ်ရှောင်တွေကို နည်းနည်း ရိက္ခာနဲ့ ပတ်သက်တာတွေ များများဝင်ပေးဖို့အတွက် တောင်းဆိုချင်တယ်” ဟု ပြောသည်။

မိုးဗြဲတိုက်ပွဲရှောင်များကိုတွေ့ရစဉ် (ကရင်နီပြည် စစ်ဘေးရှောင် ကူညီစောင့်ရှောက်ရေးကွန်ရက်)

၂၀၂၁ ခုနှစ်၊ ဖေဖော်ဝါရီ ၁ ရက် မြန်မာ့တပ်မတော်က အာဏာယူပြီးနောက်ပိုင်း ကယား (ကရင်နီ) ပြည်နယ်တွင် မြန်မာ့တပ်မတော်နှင့် ကရင်နီအမျိုးသားများ ကာကွယ်ရေးတပ် (KNDF)၊ ကရင်နီ တပ်မတော် (KA)၊ မိုးဗြဲ (PDF)၊ ဖယ်ခုံ(PDF)၊ ကရင်နီ တော်လှန်ရေး တပ်ပေါင်းစု (KRU) တို့ကြား တိုက်ပွဲများ ဖြစ်ပွားခဲ့သည်။

အဆိုပါ တိုက်ပွဲများကြောင့် ကယား(ကရင်နီ)ပြည်နယ်တွင် တိုက်ပွဲရှောင် လူဦးရေ ၂ သိန်းနီးပါးရှိနေပြီး အရပ်သား သေဆုံးမှု ၃၀၀ ကျော်ရှိနေကြောင်း ကရင်နီပြည်နယ်လူအခွင့်အရေးအဖွဲ့မှ ကိုဗညားက ပြောသည်။

CNI News

၂၀၂၂ ခုနှစ်၊ စက်တင်ဘာ ၁၃

ယခုနှစ်တွင် ပြီးခဲ့သည့် နှစ်ထက် စစ်ရှိန်ပိုမြှင့်သွားမည်ဟု အမျိုးသားညီညွတ်ရေးအစိုးရ(NUG)၏ ပြည်ထဲရေးဝန်ကြီး ဦးလွင်ကိုလတ်က စက်တင်ဘာ ၁၃ ရက်နေ့တွင် သူ၏ လူမှုကွန်ရက်စာမျက်နှာမှာ ရေးသား ထုတ်လွှင့်ခဲ့သည်။

ဦးလွင်ကိုလတ်က “ ဒီနှစ်မှာ ပြီးခဲ့တဲ့ နှစ်ထက် စစ်ရှိန်ပိုမြှင့်ပါမယ်။ ပြည်သူ့ကာကွယ်ရေး ရဲဘော်တွေဆီမှာ တိုက်စွမ်းအားဖြစ်တဲ့ လက်နက်တွေက အရင်နှစ်က တပ်ဆင်ထားတာနဲ့ ဒီနှစ်ထပ်တပ်ဆင်ပေးနေတာနဲ့ပေါင်း ရင် တိုက်စွမ်းအားက တိုးနေပါတယ်။ တိုက်စွမ်းရည်နဲ့ စိတ်ဓာတ်မှာလည်း စကစ ဘက်မှာ ရှေ့တန်းသွားရတာ များလို့ ပင်ပန်းလို့ တပ်တွင်း မငြိမ်မသတ်မှုတွေဖြစ်ပြီး ပြည်သူ့ရင်ခွင့် ခိုလုံတဲ့သူတွေ တစ်နေ့တခြား တိုးလာပြီး တိုက်ပွဲဝင် စိတ်ဓာတ်ထိုးကျနေချိန် PDF ရဲဘော်တွေက မတိုက်ရလို့ စိတ်မရှည်ဖြစ်ပြီး မနည်းထိန်းထားရတယ် ဒါပေမယ့် မကြာစေရပါဘူး။ ရဲဘော်တို့ရဲ့ တိုက်ပွဲဝင်စိတ်ဓာတ်တွေနဲ့အတူ ပြည်တော်ဝင်ကြမယ်လို့ ပြောထားတယ်” ဟု သူ၏ လူမှုကွန်ရက်စာမျက်နှာတွင် ရေးသား၍ ပြောထားသည်။

ထို့နောက် ပြည်သူလူထု၏ ထောက်ခံမှုကလည်း စီမံဘဏ္ဍာဝန်ကြီး ရောင်းသမျှ အကုန်ဝယ်နေကြခြင်းကို ကြည့်ပါက ပြည်သူတွင် အောင်စိတ်က အခိုင်အမာ ရှိနေကြောင်း၊ ပြီးခဲ့သည့်နှစ် သမ္မတကြီး ဒူဝါလရှီးလ အရေး ပေါ် အခြေအနေ ကြေညာခဲ့ပြီး တစ်နှစ်အတွင်းမှာ ပြည်သူ့ကာကွယ်ရေးတပ်ဖွဲ့(PDF)များ မြို့ပြပျောက်ကြား များ ဆင်နွဲခဲ့သည့် ခုခံစစ်သည် မြို့ပြ ကျေးလက်နှင့် တောတောင်ကြားမှာ ထိတွေ့တိုက်ပွဲမျိုးစုံနှင့် စစ်မျက်နှာစုံ ဖွင့်နိုင်ခဲ့ကြကြောင်း ၎င်းက ဆက်ပြောထားသည်။

ဦးလွင်ကိုလတ်က “ ဒီနှစ် (---) ကြေညာပြီးရင်တော့ အားလုံး အသင့်အနေအထား ဖြစ်အောင် ပြင်ထားကြပေ တော့”ဟု ပြောသည်။

အမျိုးသားညီညွတ်ရေးအစိုးရ(NUG)၏ ယာယီသမ္မတ ဒူဝါလရှီးလသည် ၂၀၂၁ ခုနှစ်၊ စက်တင်ဘာ ၇ ရက်နေ့ က ပြည်သူ့ခုခံတော်လှန်စစ်(D-Day)ကို ကြေညာခဲ့ရာ ၂၀၂၂ ခုနှစ်၊ စက်တင်ဘာ ၇ ရက် တစ်နှစ်တာကာလ အတွင်း မြန်မာ့တပ်မတော်ဘက်မှ သေဆုံးသူ ၂၅၁၀၇ ဦးရှိပြီး ထိခိုက်သူ ၈၀၂၃ ဦး ရှီကြောင်း NUG ၏ ပြည်ထဲ ရေးဝန်ကြီး ဦးလွင်ကိုလတ်က ရေးသားထုတ်လွှင့်ထားသည်။

လာမည့်နှစ် (၂၀၂၃ ခုနှစ်)တွင် တပ်မတော်ကို အမြစ်ပြတ်သုတ်သင်ပေးမည့် အဆုံးသတ်တိုက်ပွဲရောက်လာ မည်ဟု NUG ၏ ပြည်သူ့ခုခံတော်လှန်စစ် ကြေညာခဲ့သော တစ်နှစ်ပြည့်သွားသည့် ၂၀၂၂ ခုနှစ်၊ စက်တင်ဘာ ၇ ရက်တွင် ယာယီသမ္မတ ဒူဝါလရှီးလက နိုင်င်ငံတော်အခြေပြ မိန့်ခွန်းတွင် ထည့်သွင်း ပြောကြားခဲ့သွားသည်။

NUG ၏ ယာယီသမ္မတ ဒူဝါလရှီးလနဲ့ ကချင်ဒေသက PDF တပ်ဖွဲ့

NUG ၏ ယာယီသမ္မတ ဒူဝါလရှီးလက “လာမယ့် တစ်နှစ်အတွင်းမှာ ယခုထက် ပိုမိုကျယ်ပြန့်တဲ့ နိုင်ငံရေး၊ စစ် ရေး၊ နိုင်ငံတကာအရေး ရလဒ်တွေ ထွက်ရှိဖို့ အရှိန်အဟုန်မြှင့် အားသွန်ကြိုးပမ်းနေကြပါတယ်။ စစ်အာဏာရှင် ဟာ အဖက်ဖက်က မှေးမိန်ချည်းနဲ့လာနေပါပြီ။ ဖက်ဆစ်သန္ဓေကို အမြစ်ပြတ် သုတ်သင်ပေးမယ့် အဆုံးသတ် တိုက်ပွဲ ဟာ အနှေးနဲ့အမြန် ရောက်လာလိမ့်မယ်၊ အဲဒီအခါ အကြမ်းဖက် အုပ်စုအနေနဲ့ လူထုတရားစီရင်ရေးကို ခံယူနိုင်ဖို့ ရင်ဆိုင်နိုင်စွမ်းရှိအောင် ခုကတည်းကနေ ကိုယ့်ကိုယ်ကို အသင့်ပြင်ထားကြဖို့ ဒီကနေ အသိပေးလိုက် ချင်ပါတယ်” ဟု ပြောသည်။

လက်ရှိတွင် တစ်နိုင်ငံလုံးတွင် PDF တပ်ရင်းပေါင်း ၃၀၀ ကျော် ဖွဲ့စည်းနိုင်ခဲ့ကြောင်း၊ ထို့အပြင် တစ်နိုင်ငံလုံး တွင် မြို့နယ်ပေါင်း ၃၃၀ ရှိသည့်အနက် မြို့နယ်ပေါင်း ၂၅၀ ကျော်တွင် PDF တပ်ဖွဲ့များ ဖွဲ့စည်းလည်ပတ်နေေ ကြာင်း NUG ယာယီသမ္မတက ပြောသည်။

ထို့နောက် EAO နှင့် PDF တို့၏ ပူးပေါင်း ခုခံစစ်မှာ စစ်ရေး၊ အုပ်ချုပ်ရေးအရ ပိုင်ပိုင်နိုင်နိုင် စိုးမိုးထားသည့် ဒေသများစွာ ရှိလာပြီဖြစ်ပြီး နယ်မြေစိုးမိုးထားသည့် မြို့နယ်ပေါင်း ၂၄ ခုတွင် တရားသူကြီးအဖွဲ့များ စုဖွဲ့ပြီး တရားစီရင်ရေး လုပ်ငန်းများ စတင်အကောင်အထည်ဖော်နေပြီ ဖြစ်ကြောင်း NUG ယာယီသမ္မတက ပြောသည်။

CNI News

၂၀၂၂ ခုနှစ်၊ စက်တင်ဘာ ၁၃

ဖားကန့်မြို့နယ် ရှဒူးဇွပ်ကျေးရွာအနီးက ဆုံးရှုံးသွားသည့် စခန်းနှစ်ခုကို ကချင်လွတ်မြောက်ရေးတပ်မတော် (KIA)မှ ပြန်ယူမှာဖြစ်ကြောင်း ဖားကန့်ဒေသခံတစ်ဦးက CNI သတင်းဌာနကို ပြောသည်။

၎င်းက “အမှန်တော့ ကိုယ်တွေ ငယ်ကတည်းနဲ့ တစ်သက်လုံး မြင်တွေ့ရတာကတော့ စစ်တပ်က KIA စခန်းတွေ သိမ်း တယ်၊ သိမ်းပြီးရင် စစ်စခန်းထိုင်တာမှ မဟုတ်တာ၊ သူတို့က သိမ်းပြီးတော့ ပြန်ထွက်သွားတာချည်း။ ပြန် ထွက်သွားရင် KIA ပြန်ထိုင်တာပဲလေ။ အခုလည်း အဲဒီလိုပဲ နေမှာပါ စစ်တပ်က အဲဒီနေရာမှာ သွားမထိုင် နိုင်ပါ ဘူး။ မထိုင်နိုင်တော့ သူတို့တိုက်တယ်၊ တိုက်ပြီး ပြန်ဆုတ်သွားမှာပဲ၊ ပြန်ဆုတ်သွားရင် KIA က နေရာပြန်ယူမယ် ဒါပါပဲ” ဟု ပြောသည်။

ပြီးခဲ့သည့် စက်တင်ဘာ ၁၂ ရက်နေ့ နံနက်ပိုင်းတွင် KIA ၏ စခန်းနှစ်ခုကို တပ်မတော်နှင့် ပြည်သူ့စစ်များက ခြေလျင်ထိုးစစ်ဆင်ကာ လေကြောင်းပစ်ကူဖြင့် တိုက်ခိုက်သိမ်းယူခဲ့ခြင်း ဖြစ်ကြောင်း သိရသည်။

ပြည်သူ့စစ်အဖွဲ့ကိုတွေ့ရစဉ်

အဆိုပါ တိုက်ပွဲဖြစ်ပွားခဲ့သည့် ဟူးကောင်းဒေသတွင် ရွှေနှင့် ပယင်းများ ထွက်ရှိပြီး စီးပွားရေးအရ အချက်အချာ ကျသော ဒေသဖြစ်ကြောင်း သိရသည်။

တိုက်ပွဲဖြစ်ပွားပြီး တပ်စခန်းသိမ်းခံရခြင်းနှင့် ပတ်သက်၍ KIA မှ ပြောရေးဆိုခွင့်ရှိသူ ဗိုလ်မှူးကြီးနော်ဘူထံ ဖုန်း ဆက်သွယ် မေးမြန်းခဲ့သော်လည်း အပြင်ရောက်ရှိနေသည့်အတွက် လက်ခံဖြေကြားနိုင်ခဲ့ခြင်း မရှိကြောင်း ပြော သည်။
ပြည်သူ့စစ်များ အနေဖြင့် တပ်မတော်နှင့် ပူးပေါင်းနေ၍ တိုက်ခိုက်ရခြင်း ဖြစ်ကြောင်း KIA က ပြောသလို KIA သည်လည်း ရပ်ရွာကို ဒုက္ခပေးနေ၍ ပြည်သူ့စစ်များက ခုခံတိုက်ခိုက်ရခြင်းဖြစ်ကြောင်း အပြန်အလှန် ပြောဆိုနေ ကြောင်း ဖားကန့်ဒေသခံများက ပြောသည်။

၂၀၂၂ ခုနှစ်၊ စက်တင်ဘာ ၁၂ ရက်နေ့က KIA ရဲ့ ဒွန်ဘန်တိုက်နယ် စခန်းတစ်ခုကို တပ်မတော်နဲ့ ပြည်သူ့စစ်အဖွဲ့က သိမ်းခဲ့စဉ်

ဖားကန့်ဒေသခံတစ်ဦးက “ ဒါငါ့နယ်မြေ၊ သူ့နယ်မြေ၊ ဒါဟာ ငါ့စားကျက်၊ သူ့စားကျက် ဒီလိုတွေနဲ့ပဲ သွားနေကြ ဦးမယ်ဆိုရင် ဒို့နိုင်ငံကြီးကတော့ ငြိမ်းချမ်းရေးလည်း အလှမ်းဝေးနေဦးမှာပဲ၊ ဒေသကြီး ဖွံ့ဖြိုးတိုးတက်ဖို့ကလည်း ဝေးနေဦးမှာပဲ။ မေတ္တာရပ်ခံချင်တာက‌တော့ ပြည်သူတွေ ဒုက္ခမရောက်အောင် အေးအေးချမ်းချမ်းလေး၊ ငြိမ်းငြိမ်း ချမ်းချမ်းနေကြမယ်၊ သူ့စည်းကိုယ့်စည်းပေါ့။ သူ့စည်းကိုယ့်စည်း စောင့်ပြီးနေကြမယ်ဆိုရင်တော့ ပြဿနာတွေက ဖြစ်လာစရာ အကြောင်းမရှိပါဘူး။ အခုက စည်းတွေ မစောင့်ကြဘူး။ ခုနပြောသလိုပေါ့ သူ့နယ်မြေ ကိုယ့်နယ်မြေ သူ့ဒေသ ကိုယ့်ဒေသ ခုနပြောတဲ့ ရလိုမှုတွေ ရလိုမှုနောက်မှာ လက်နက်ကိုင်တဲ့ လမ်းစဉ်တွေ ပေါ်လာတယ်၊ အဲဒီ လက်နက်ကိုင်တဲ့ လမ်းစဉ်တွေ ပေါ်လာတော့ သေနတ်က ကျည်ဆံပဲ ထွက်တယ်၊ ပန်းမထွက်တော့ သေကြ၊ ကြေကြ သွေးစွန်းကြတာပေါ့။ အဲဒါမျိုးတွေကတော့ ကိုယ်တို့ ဒေသမှာကတော့ အရင်ငယ်ကတည်းက မြင်ဖူးနေရ တာ ဘယ်အချိန် နိဂုံးချုပ်ကြမလဲဆိုတာပဲ မျှော်လင့်နေရတာပေါ့လေ” ဟု ပြောသည်။

ဟူးကောင်းဒေသတွင် ရှဒူးဇွပ်ပြည်သူ့စစ်နှင့် KIA တို့အကြား မကြာခဏ စစ်ရေးတင်းမာမှုရှိခဲ့ပြီးနောက် စက်တင်ဘာ ၁၂ ရက်နေ့က တိုက်ပွဲဖြစ်ပွားခဲ့ခြင်းဖြစ်ကြောင်း ဒေသခံများက ပြောသည်။

ထို့နောက် ကချင်ပြည်နယ်အတွင်းရှိ ကျောက်စိမ်းထွက်ရှိသော ဖားကန့်ဒေသနှင့် ရွှေ၊ ပယင်းများ ထွက်ရှိသည့် တနိုင်းဒေသများတွင် KIA နှင့် ပြည်သူ့စစ်တို့အကြား တိုက်ပွဲများ မကြာခဏ ဖြစ်ပွားလေ့ရှိကြောင်း သိရသည်။

CNI News

၂၀၂၂ ခုနှစ်၊ စက်တင်ဘာ ၁၃

အမေရိကန်နိုင်ငံသည် စစ်လက်နက်ပစ္စည်း ထုတ်လုပ်ရောင်းချခြင်းကို စီးပွားရေး တစ်ခုအနေဖြင့် ဆောင်ရွက်နေ ခြင်းကြောင့် ပြဿနာများဖန်တီးပြီး လက်နက်ရောင်းချသည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

ရုရှားနိုင်ငံ RIA သတင်းဌာနနှင့် တွေ့ဆုံမေးမြန်းမှုတွင် ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။

ဗိုလ်ချုပ်မှူးကြီးမင်းအောင်လှိုင်က “အမေရိကန်နိုင်ငံက ထိုင်ဝမ်ကို စစ်လက်နက်ပစ္စည်း ထောက်ပံ့ပေးတာတွေ၊ ရောင်းချပေးတာတွေ ကျနော်တို့ တွေ့ပါတယ်။ အမေရိကန်ရဲ့ အဓိကစီးပွားရေး လုပ်ငန်းထဲမှာ စစ်လက်နက် ပစ္စည်း ထုတ်လုပ်ရောင်းချတဲ့ စီးပွားရေး လုပ်ငန်းတစ်ခုလည်း ပါပါတယ်။ ပြီးခဲ့တဲ့ ယူကရိန်းဖြစ်စဉ်တွေကို ပြန် ကြည့်မယ်ဆိုလို့ရှိရင်လည်း အလားတူစွာပဲ ကျနော်တို့ တွေ့ရတယ်။ ပြဿနာကိုပဲ နယ်နယ်ရရ ဖန်တီးတတ် တယ်။ ပြီးတော့မှ လက်နက်ခဲယမ်း မီးကျောက်တွေ ထောက်ပံ့တယ်။ အရန်ထားရှိတဲ့ လက်နက်ခဲယမ်း မီး ကျောက်တွေ ထောက်ပံ့ပေးခြင်းအားဖြင့် တိုက်ပွဲရဲ့ စစ်ပွဲရဲ့ ပုံသဏ္ဌာန်ကို ပြောင်းလဲအောင် ဖန်တီးလာတယ်။ သူတို့နိုင်ငံရဲ့ အဓိကစီးပွားရေး လုပ်ငန်းထဲမှာ လက်နက်ခဲယမ်းမီးကျောက် ထုတ်လုပ်တဲ့ လုပ်ငန်းဟာလည်း ပါ တယ်။ အဲ့ဒီတော့ အရန်ထုတ်လိုက်ပြီဆိုကတည်းက ပစ္စည်းတွေထပ်ပြီး အသစ်ပြန်ထုတ်ရတယ်။ ဒါစစ်ပွဲကို နားလည်တဲ့သူတိုင်း သဘောပေါက်ပါတယ်”ဟု ပြောသည်။

RIA သတင်းဌာနနဲ့ ဗိုလ်ချုပ်မှူးကြီးမင်းအောင်လှိုင် အင်တာဗျူးလုပ်နေစဉ်

မြန်မာ့တပ်မတော်သည် တရုတ်နှင့် ရုရှား လက်နက်များ ဝယ်ယူအသုံးပြုကာ ဖိနှိပ်မှုများ ပြုလုပ်နေသည်ဟု စွပ်စွဲ ချက်ကို အကာအကွယ်လုပ်ရန် အမေရိကန် လက်နက်ရောင်းချသည့်အပေါ် ပြန်လည် တုန့်ပြန်ခြင်းဖြစ်နိုင်သည်ဟု နိုင်ငံရေးလေ့လာသူ ဦးသန်းစိုးနိုင်က ပြောသည်။

ဦးသန်းစိုးနိုင်က “စကစ ကိုလည်း ကမ္ဘာက စွပ်စွဲနေတာပေါ့ဗျာ၊ ပြည်တွင်းမှာ ကျနော်တို့ အကြမ်းဖက်လုပ်ရပ်တွေ လုပ်ဖို့အတွက် ကျနော်တို့ ရုရှားနဲ့တရုတ် လက်နက်တွေကို ဝယ်ယူအသုံးချနေတယ် ဆိုတဲ့အခါမှာ သူတင်လုပ်တာ မဟုတ်ဘူး ဒီမိုကရေစီနိုင်ငံလို့ ပြောတဲ့ ဒီအမေရိကန်ကလည်းပဲ တရုတ်ရဲ့ ထိုင်ဝမ်ကို လက်နက်တွေ ရောင်းချနေ တာ ရှိတာပေါ့။ အဲ့တော့ ကိုယ် လိုလားတဲ့စနစ်နဲ့ ကိုယ် လိုလားတဲ့တိုင်းပြည် ကာကွယ်ဖို့အတွက် နိုင်ငံကြီးတွေက တော့ ဒီလို လက်နက်ရောင်းချဖို့ ကြိုးစား‌နေတာပဲ။ သူ့ရဲ့ ရုရှား၊ တရုတ်ကို မှီခိုပြီးတော့ စစ်လက်နက် ဝယ်ယူမှု အပေါ်မှာ ဒါက အကြောင်းပြချက် တစ်ခုအနေနဲ့ ထုတ်ဖော်ပြောဆိုလာတာလို့ မြင်ပါတယ်”ဟု CNI သတင်းဌာန သို့ ပြောသည်။

၂၀၂၂ ခုနှစ်၊ စက်တင်ဘာ ၇ ရက်နေ့က ဗိုလ်ချုပ်မှူးကြီးမင်းအောင်လှိုင်နဲ့ ရုရှားသမ္မတ ပူတင် တွေ့ဆုံစဉ် 

တရုတ်သည် မြန်မာနှင့် ဆက်ဆံရေးတွင် ကင်းကွာစွာ ရပ်တည်လာခြင်းကြောင့် မြန်မာ့တပ်မတော်သည် ရုရှားကို တစ်ဆင့်တိုး၍ ဆက်ဆံရေးမြှင့်တင်ရန် ကြိုးစားနေခြင်း ဖြစ်နိုင်သည်ဟု ၎င်းက ဆက်ပြောသည်။

လက်ရှိ မြန်မာနိုင်ငံတွင် နိုင်ငံရေး အကျပ်အတည်းဖြစ်ပေါ်နေကာ နစက၏ အုပ်ချုပ်မှုအပေါ် အမေရိကန် နှင့် ဥရောပ နိုင်ငံများက အသိအမှတ်ပြုရေး မျက်ကွယ်ပြုထားသလို စီးပွားရေးပိတ်ဆို့မှုများ ပြုလုပ်ကာ ဖိအားပေး လျက်ရှိနေသည်။