CNI News

၂၀၂၃ ခုနှစ်၊ ဇူလိုင် ၂၆

နစကကို ချေမှုန်းရေးသည် ပြည်သူလူထု၏ အသက်အိုးအိမ်စည်းစိမ်ကို ကာကွယ်ခြင်းနှင့် သက်ဆိုင်နေမှုကြောင့် တော်လှန်ရေးလုပ်ငန်းများကို ချဲ့ထွင်ရန် လိုအပ်ကြောင်း အမျိုးသားညီညွတ်ရေးအစိုးရ (NUG) ၏ ယာယီသမ္မတ ဒူဝါလရှီးလက ပြောသည်။

ဗဟိုဘဏ်မှ ငွေကျပ် ၂ သောင်းတန်ကို ရိုက်နှိပ်မည်ဟု ကြေညာခဲ့ပြီးနောက် လူထုသည် ငွေကြေးဖောင်းပွမှုဒဏ် ကို ခံစားနေရကြောင်း၊ နစကသည် နိုင်ငံခြားငွေ ဖြည့်တင်းရေးကိစ္စကို ရသမျှ နည်းလမ်းဖြင့် ပြုလုပ်နေကြောင်း ၎င်းက ပြောသည်။

ဒူဝါလရှီးလက “တိုင်းပြည်ရဲ့ အတိတ်သမိုင်းကိုကြည့်ရင် စစ်အစိုးရအဆက်ဆက်ဟာ “ကြုံသလို ကြည့်-ကြပ်-လုပ်-ပေါ်လစီမျိုးနဲ့ လူထုအရေးကို လက်လွှတ်စပယ် လုပ်ခဲ့တာမျိုးတွေ အကြိမ်ကြိမ်တွေ့ရပါတယ်၊ အခုလည်း ဘေးထွက်ဆိုးကျိုးကို နားမလည်ဘဲ၊ ကျပ်ငွေ ၂ သောင်းတန် ငွေကြေး ရိုက်နှိပ်တာမျိုးကို လုပ်နေတာ တွေ့နေရ ပါတယ်။ လူထုဟာ နေ့စဉ် စားဝတ်နေရေး စရိတ်စကကြီးမားတဲ့ ဝန်ကို ထမ်းနေရပါတယ်၊ ဒါကြောင့် ကျနော်တို့ အမျိုးသားညီညွတ်ရေးအစိုးရအဖွဲ့ဝင်တွေ အနေနဲ့ ပိုပြီး အမြင်ကျယ်ကျယ်နဲ့ တော်လှန်ရေး လုပ်ငန်းစဉ်တွေကို ချဲ့ထွင်ဖို့ လိုပါတယ်” ဟု ပြောသည်။

ထို့အတူ မြန်မာ့တပ်မတော် အနေဖြင့် စစ်ရေးအသုံးစရိတ် လိုအပ်ချက် အလွန်အမင်း ကြီးမားလာသည်ကို တွေ့ရကြောင်း၊ အဆိုပါ လိုအပ်ချက်အား ဆေးမြှီးတိုနည်းဖြင့် ငွေကြေးရိုက်နှိပ်သည့် နည်းလမ်းမှာ တစ်ခု အပါအဝင် ဖြစ်ကြောင်း ၎င်းက ပြောသည်။\

NUG အဖွဲ့၀င်များကိုတွေ့ရစဉ်

လက်ရှိ နိုင်ငံရေး အကျပ်အတည်းကြားတွင် ပြည်သူလူထုများမှာ နစ်နာဆုံးရှုံးမှုဖြင့် ကြုံတွေ့နေရကြောင်း ပြည်သူ့ လွှတ်တော် ကိုယ်စားလှယ်ဟောင်း ဦးစိန်ဝင်းက CNI သတင်းဌာနသို့ ပြောသည်။

ဦးစိန်ဝင်းက “ကျနော်ကတော့ အမှန်ပြောရရင်‌တော့ ဒီနွေဦးတော်လှန်ရေးဟာ ကြာကြာမထိန်းနိုင်ပါဘူး။ ကြာ ကြာမထိန်းနိုင်ဘူးဆိုတာ နွေဦးတော်လှန်ရေးဟာ ကျနော်အမြင်တော့ မအောင်မြင်နိုင်ပါဘူး။ မ‌အောင်မြင်နိုင်ဘူး။ ဘာလို့ဆို စထွက်ကတည်းက ခင်ဗျားလည်း သိနေတာပဲ၊ ထမိန်တွေလှန်၊ ဘာတွေလှန် မဟုတ်တာတွေ လျှောက် လုပ်နေတာကို။ တော်လှန်ရေးတစ်ခုဆိုတာ ပြည်သူပါဖို့ဆိုရင် ပြည်သူရဲ့ ယုံကြည်မှုကို ရအောင် ယူရမှာ၊ တချို့က လည်း ပြည်သူက သူတို့ဖက်က ပါတယ်၊ ပါတယ်ဆိုတာက တစ်ဖက်က ပါတယ်ဆိုတဲ့ အနေအထားက နှစ်သက်လို့ ပါတာ မဟုတ်ဘူး။ တစ်ဖက်ကလည်း တပ်မတော် အာဏာထိန်းတာကို မကြိုက်ဘူး။ တစ်ဖက်ကကြတော့လည်း နွေဦးတော်လှန်‌ရေးရဲ့ လုပ်ပုံကိုင်ပုံ ဆောင်ရွက်ပုံတွေက အကြိုက်မရှိဘူး။ မရှိ‌တော့ ဒီကိစ္စတွေက နောက်ဆုံး တော့ ပြောချင်တာတော့ ပြည်သူတွေ နာတာပေါ့ဗျာ၊ ပြည်သူတွေနာတယ်၊ တစ်ဖက်ကလည်း သူတို့ကို သူတို့ လေလိုင်းအားကိုးနဲ့ သူတို့ နိုင်မယ်၊ ပြုမယ်၊ ကျနော်ပေးလိုက်ချင်တယ်ဗျာ၊ သူတို့ကို အာဏာ ဘယ်လိုမှ မရဘူး။ ကျနော်က NLD ထဲမှာ လုပ်လာခဲ့တာ သိတာပေါ့၊ NLD ထဲမှာ ဘယ်လောက် ဘယ်လောက် အရည်အချင်းရှိတယ် ကျ‌နော်တို့ ပိုသိတာပေါ့” ဟု ပြောသည်။
ပြီးခဲ့သည့် ၂၀၂၁ ခုနှစ်၊ ဖေဖော်ဝါရီ ၁ ရက်နေ့က တပ်မတော်မှ အမျိုးသားဒီမိုကရေစီအဖွဲ့ချုပ်(NLD) အစိုးရသည် ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟု ဆို ကာ ဖြုတ်ချခဲ့သည်။

မြန်မာ့တပ်မတော် လုံခြုံရေးဆောင်ရွက်နေစဉ်

ထို့နောက် NLD လွှတ်တော်အမတ်များနှင့် ဗဟိုအလုပ်အမှုဆောင်ကော်မတီဝင် တချို့က တခြားသော လက်နက်ကိုင်အဖွဲ့အစည်းများဖြင့် ပူးပေါင်း၍ မြန်မာ့တပ်မတော်ကို ဖြုတ်ချရေး လက်နက်ကိုင်တိုက်ပွဲကို ဖော်ဆောင်နေကြသည်။ 

အဆိုပါ လက်နက်ကိုင်ပဋိပက္ခသည် မြန်မာနိုင်ငံ၏ စစ်ကိုင်းတိုင်းဒေသကြီး၊ ချင်းပြည်နယ်၊ ကယားပြည်နယ်၊ ကရင်ပြည်နယ်တို့တွင် ကျယ်ကျယ်ပြန့်ပြန့် ဖြစ်ပေါ်နေသည်။ 

ထို့နောက် လက်နက်ကိုင် အဆုံးအဖြတ်သည် ၂၀၂၃ ခုနှစ်ကိုလည်း အဆုံးအဖြတ်နှစ်ဖြစ်ကြောင်း NUG ၏ ယာယီသမ္မတက ပြောကြားထားသည်။

CNI News

၂၀၂၃ ခုနှစ်၊ ဇူလိုင် ၂၅

ဆက်သွယ်ရေးလိမ်လည်မှုနှင့် အွန်လိုင်းလောင်းကစားများကို တရုတ်-မြန်မာ ပူးပေါင်း၍ တိုက်ဖျက်နှိမ်နင်းရေး မြန်မာနိုင်ငံဆိုင်ရာ တရုတ်သံအမတ်ကြီး Mr.Chen Hai နှင့် နစက၏ နိုင်ငံခြားရေးဝန်ကြီး ဦးသန်းဆွေတို့ ဇူလိုင် ၂၅ ရက်နေ့က တွေ့ဆုံ ဆွေးနွေးခဲ့ကြသည်။

မြန်မာနိုင်ငံ နယ်စပ်ဒေသတွင် ဆက်သွယ်ရေးလိမ်လည်မှု ရာဇဝတ်မှုများ ပျံ့နှံ့မှုအတွက် တရုတ်-မြန်မာ နှစ်နိုင်ငံ၊ တရုတ်-မြန်မာ-ထိုင်း သုံးနိုင်ငံ ပူးပေါင်းတိုက်ဖျက်နှိမ်နင်းမှုများ ဆောင်ရွက်ခဲ့ရာ ကနဦးအနေဖြင့် ရလဒ်ကောင်း များ ရရှိခဲ့ကြောင်း၊ ထိုသို့ ဆောင်ရွက်လျက်ရှိသော်လည်း မြန်မာနိုင်ငံမြောက်ပိုင်း အပါအဝင် မြန်မာနိုင်ငံနယ်စပ် ဒေသများတွင် ဆက်သွယ်ရေးလိမ်လည်မှုများ ဆက်လက်များပြားနေဆဲဖြစ်ပြီး တရုတ်- မြန်မာ နှစ်နိုင်ငံပြည်သူ များ၏ ကိုယ်ပိုင်အကျိုးစီးပွားများကို ဆိုးရွားစွာထိခိုက်နေကြောင်း သံအမတ်ကြီး Mr. Chen Hai က ပြောကြားခဲ့ ကြောင်း တရုတ်သံရုံးမှ ထုတ်ပြန်ခဲ့သည်။

၎င်းက “ နှစ်ဦးနှစ်ဖက်သည် အားကောင်းသော အစီအမံများကို ဆက်လက်ဆောင်ရွက်၍ အခြားသက်ဆိုင်ရာ အိမ်နီးချင်းနိုင်ငံများနှင့် ပူးပေါင်းဆောင်ရွက်ကာ နောက်တစ်ဆင့် ပူးပေါင်း တိုက်ဖျက်နှိမ်နင်းမှုများ လုပ်ဆောင် သင့်ကြောင်း၊ ဆက်သွယ်ရေးလိမ်လည်မှုများ ခိုအောင်းနေသည့် နေရာများကို အစွမ်းကုန်နှိမ်နင်း၍ ပိတ်မိနေ သော တရုတ်နိုင်ငံသားများကို ကယ်တင်ကာ မြန်မာနိုင်ငံပြည်တွင်းရှိ ဆက်သွယ်ရေးလိမ်လည်မှု၊ အွန်လိုင်း လောင်းကစားမှု အကြွင်းအကျန်များကို အမြစ်ဖြတ်ပစ်ရမည်ဖြစ်ကြောင်း၊ ရာဇဝတ်မှု ကျူးလွန်သော အင်အားစု များနှင့် ၎င်းတို့၏ အဖွဲ့ဝင်များကို ဥပဒေနှင့်အညီ အရေးယူပြီး တရုတ်-မြန်မာ ချစ်ကြည်ရင်းနှီးစွာ ပူးပေါင်း ဆောင် ရွက်မှု အလုံးစုံ အခြေအနေကို ထိန်းသိမ်းကြမည်”ဟု ပြောသည်။

ထို့နောက် ဆက်သွယ်ရေးလိမ်လည်မှုများသည် မြန်မာနိုင်ငံ၏ ပုံရိပ်ကို ထိခိုက်စေပြီး ပြည်တွင်းပြည်ပမှ ပြည်သူ များကို စိုးရိမ်ပူပန်မှုများ ဖြစ်စေကြောင်း၊ မြန်မာနိုင်ငံသည် ဆက်သွယ်ရေးလိမ်လည်မှုများနှင့် လောင်းကစားမှု များကို တိုက်ဖျက်နှိမ်နင်းရေးတွင် ရပ်တည်ချက် ပြတ်သားကြောင်း၊ မြန်မာနိုင်ငံသည် တရုတ်နိုင်ငံ အပါအဝင် သက်ဆိုင်ရာ အိမ်နီးချင်းနိုင်ငံများနှင့်အတူ နောက်ဆက်တွဲ တိုက်ဖျက်နှိမ်နင်းရေးလှုပ်ရှားမှုများ ညှိနှိုင်းဆောင် ရွက်၍ ပုံမှန် ပူးပေါင်း ဆောင်ရွက်ရေး ယန္တရား ထူထောင်ရန် ဆွေးနွေးပြီး မြန်မာနိုင်ငံအတွင်း၌ ဆက်သွယ်ရေး လိမ်လည်မှုများ၊ လောင်းကစားမှုများနှင့် ဆက်စပ်နေသော မသမာသူများကို ကြောက်ရွံ့တုန်လှုပ်စေကာ နှစ်နိုင်ငံ ပြည်သူများ၏ လုံခြုံရေးနှင့်အကျိုးစီးပွားကို ကာကွယ်စောင့်ရှောက်မည်ဟု နစက၏ နိုင်ငံခြားရေးဝန်ကြီး ဦးသန်းဆွေက ပြောကြားခဲ့သည်။

ဆက်သွယ်ရေးလိမ်လည်မှုများနှင့် အွန်လိုင်းလောင်းကစားကို ရှမ်းပြည်နယ်မြောက်ပိုင်း၊ ကိုးကန့်ကိုယ်ပိုင်အုပ် ချုပ်ခွင့်ရဒေသ လောက်ကိုင်မြို့တွင် အဓိက လုပ်ကိုင်နေကြကြောင်း ဒေသခံများက ပြောသည်။

တချို့သော အဖွဲ့အစည်းများသည် ရန်ကုန်မြို့ပြများတွင်လည်း လုပ်ကိုင်နေကြကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၂၅

မြန်မာနိုင်ငံတော်ဗဟိုဘဏ်က ကျပ်ငွေ ၂၀၀၀၀ တန် ငွေကြေးရိုက်နှိပ်ထုတ်ဝေ၍ လူထုပိုမိုကျပ်တည်းအောင် ဆောင်ရွက်ခြင်းကြောင့် အမျိုးသားညီညွတ်ရေးအစိုးရ(NUG) အဖွဲ့ဝင်များအနေဖြင့် ပိုပြီး အမြင်ကျယ်ကျယ်နှင့် တော်လှန်ရေးလုပ်ငန်းစဉ်များကို ချဲ့ထွင်ဖို့လိုသည်ဟု NUG ၏ယာယီသမ္မတ ဒူဝါလရှီးလက ပြောသည်။

NUG ၏ ၂၅ ကြိမ်မြောက် အစည်းအဝေးကို ဇူလိုင် ၂၅ ရက်နေ့ နံနက် ၁၀ နာရီက ကျင်းပခဲ့ရာ ဒူဝါလရှီးလက အထက်ပါအတိုင်း ပြောကြားသွားခဲ့သည်။

ဒူဝါလရှီးလက “တိုင်းပြည်ရဲ့ အတိတ်သမိုင်းကို ကြည့်ရင် စစ်အစိုးရအဆက်ဆက်ဟာ ကြုံသလို ကြည့်-ကြပ်-လုပ် ပေါ်လစီမျိုးနဲ့ လူထုအရေးကို လက်လွှတ်စပယ် လုပ်ခဲ့တာမျိုးတွေ အကြိမ်ကြိမ်တွေ့ရပါတယ်။ အခုလည်း ဘေးထွက် ဆိုးကျိုးကို နားမလည်ဘဲ ကျပ်ငွေ (၂) သောင်းတန် ငွေကြေးရိုက်နှိပ်တာမျိုးကို လုပ်နေတာ တွေ့ရ ပါတယ်။ လူထုဟာ နေ့စဉ် စားဝတ်နေရေး စရိတ်စက ကြီးမားတဲ့ ဝန်ကို ထမ်းနေရပါတယ်။ ဒါ့ကြောင့် ကျနော် တို့ အမျိုးသားညီညွတ်ရေးအစိုးရ အဖွဲ့ဝင်တွေအနေနဲ့ ပိုပြီး အမြင်ကျယ်ကျယ်နဲ့ တော်လှန်ရေးလုပ်ငန်းစဉ်တွေ ကို ချဲ့ထွင်ဖို့ လိုပါတယ်”ဟု ပြောသည်။

ထို့နောက် NUG အနေဖြင့် နွေဦးဖွံ့ဖြိုးရေးဘဏ်ကို တရားဝင်ဖွင့်လှစ်ထားပြီဖြစ်၍ နွေဦးဖွံ့ဖြိုးရေးဘဏ်၏ ဖြစ် တည်မှုသည် မြန်မာကျပ်ငွေ၏ မခိုင်မာမှုကို အစားထိုးပေးနိုင်မည့် လူထုမျှော်လင့်ချက်ဖြစ်သင့်ကြောင်း၊  လူထု သည် ကျပ်ငွေအပေါ်မှာ မှီခိုအားထားနေရကြောင်း၊ ထို့ကြောင့် လူထုလုပ်အားများကို ကျပ်ငွေ မတည်ငြိမ်မှုက ဖျက်စီးလိုက်သလိုမျိုး မဖြစ်အောင် မိမိတို့ဘက်က ခေတ်မှီဘဏ္ဍာရေး မဟာဗျူဟာများနှင့် အကာအကွယ် ပြု ပေးရန် လိုကြောင်း ၎င်းက ပြောသည်။

ဗဟိုဘဏ်က ထုတ်ဝေမည့် ကျပ်ငွေ ၂၀၀၀၀ တန် ငွေစက္ကူဒီဇိုင်းကို တွေ့ရစဉ်

ဒူဝါလရှီးလက “ လူထုရဲ့ လုပ်အားတန်ဖိုးတွေကို လေထဲမှာ အလိုအလျောက် ဆုံးရှုံးတာမျိုး မဖြစ်စေဖို့၊ ကျပ်ငွေအပေါ် အမှီသဟဲ မပြုတဲ့ ဘဏ္ဍာရေးစနစ်မျိုးကို ကျနော်တို့ အနေနဲ့ စနစ်တကျ တည်ဆောက်ပေး ရပါ လိမ့်မယ်။ ဒါမှသာလျှင် စစ်ကောင်စီရဲ့ လက်အောက်ကလွတ်တဲ့ ဘဏ္ဍာရေးရပ်ဝန်းကို ပြည်သူတွေက ခံစားခွင့် ရမှာဖြစ်ပါတယ်”ဟု ပြောသည်။

မြန်မာနိုင်ငံတော်ဗဟိုဘဏ်က မာရဝိဇယ ဗုဒ္ဓရုပ်ပွားတော်မြတ်ကြီး တည်ဆောက် ပြီးစီးမှုနှင့် ရဋ္ဌနန္ဒက ဆင်ဖြူရှင်လေး မွေးဖွားခြင်း တစ်နှစ်ပြည့်အထိမ်းအမှတ်အဖြစ် ၂၀၂၃ ခုနှစ်၊ ဇူလိုင် ၃၁ ရက်နေ့တွင် ကျပ်ငွေ ၂၀၀၀၀ တန် ငွေစက္ကူကို အကန့်အသတ်ဖြင့် ထုတ်ဝေသွားမည်ဟု ဇူလိုင် ၂၃ ရက်က ထုတ်ပြန်ခဲ့သည်။

အဆိုပါ ထုတ်ပြန်ချက်သည် ပြည်သူလူထုအား သေသေချာချာ ရှင်းရှင်းလင်းလင်း မထုတ်ပြန်ခဲ့ခြင်းကြောင့် လူထုအကြား စိုးရိမ်မှုများ မြှင့်တက်လာသလို ကုန်ဈေးနှုန်းများ အပါအဝင် ရွှေနှင့်ဒေါ်လာ ဈေးများလည်း အဆမတန် မြင့်တက်သွားခဲ့သည်။

ဗိုလ်ချုပ်ဇော်မင်းထွန်းကို တွေ့ရစဉ်

နစက၏ ပြောခွင့်ရပုဂ္ဂိုလ် ဗိုလ်ချုပ်ဇော်မင်းထွန်းက “ ငွေစက္ကူအသစ် ၂၀၀၀၀ တန်က အလုံးအရင်းနဲ့ထုတ်တာ မဟုတ်ဘူး။ အထိမ်းအမှတ် အနေနဲ့ထုတ်တာဖြစ်တယ်။ ကျနော်တို့ ၇၅ နှစ်ပြည့် စိန်ရတု လွတ်လပ်ရေးနေ့မှာ ရွှေဒင်္ဂါးပြားကို အထိမ်းအမှတ် အနေနဲ့ထုတ်ခဲ့တာရှိတယ်။ အဲ့တုန်းကလည်း ပိုက်ဆံဘယ်လောက်ရှိရှိ များများ စားစား ဝယ်လို့မရပါဘူး။ ဒီမှာလည်း ဒီလိုပါပဲ ဒီအတိုင်းပါပဲ။ နောက်တစ်ခုက ငွေစက္ကူအဟောင်းတွေကို ဒီငွေ ကြေးနဲ့အညီ ပြန်လဲတဲ့အခါ ငွေစက္ကူ ၂၀၀၀၀ တန်ကို အထိမ်းအမှတ်အနေနဲ့ ပေးမှာဖြစ်တယ်။ ဒီဟာမှာလည်း အကန့်အသတ် ရှိတယ်။ ဘဏ်မှာ သိန်း ၁၀၀ သွားလဲရင် သိန်း ၁၀၀ လုံး ငွေစက္ကူအသစ် (၂၀၀၀၀ တန်) ထုတ် မပေးနိုင်ဘူး။ သုံးရွက်ပဲ ထုတ်ပေးမှာ တစ်ဦးကို သုံးရွက်ပဲ ထုတ်ပေးမှာ”ဟု ပြောသည်။

ထို့နောက် ကျပ်ငွေ ၂၀၀၀၀ တန် ငွေစက္ကူကို အကန့်အသတ်ဖြင့်သာ ထုတ်ဝေခြင်းဖြစ်၍ တခြားသော နိုင်ငံတော်မှ ထုတ်ဝေထားသည် ငွေကြေးများကို ဖျက်သိမ်းရန် အစီအစဉ်မရှိသလို ဖျက်သိမ်း၍လည်း မရ ကြောင်း နစက-က ထုတ်ပြန်ခဲ့သည်။

၂၀၀၈ ဖွဲ့စည်းပုံအခြေခံဥပဒေ ပုဒ်မ ၃၆ (င)တွင် နိုင်ငံတော်သည် တရားဝင်ထုတ်ဝေထားသော ငွေကြေးကို တရားမဝင် ငွေကြေးအဖြစ် သတ်မှတ်ခြင်းမပြုဟု ပြဋ္ဌာန်းထားသည်။

CNI News

၂၀၂၃ ခုနှစ်၊ ဇူလိုင် ၂၅

စစ်ကိုင်းတိုင်းဒေသကြီးနှင့် ချင်းပြည်နယ်တို့ကို ထောက်ပံ့လှုပ်ရှားမှုများအား ထိန်းချုပ်လို၍ ကချင်လွတ်လပ်ရေး တပ်မတော်(KIA)ကို တိုက်ခိုက်ခြင်းဖြစ်နိုင်ကြောင်း သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနသို့ ပြောသည်။

KIA အနေဖြင့် ပြည်တွင်း တည်ငြိမ်မှု အပိုင်းတွင် အနှောင့်အယှက် လုပ်ဆောင်လာကြောင်း၊ ထို့ကြောင့် မြန်မာ့ တပ်မတော်မှ တိုက်ခိုက်ခြင်းဖြစ်ကြောင်း ၎င်းက ပြောသည်။

ဦးသိန်းထွန်းဦးက “စစ်ရေးအရ လှုပ်ရှားမှုတွေ များလာတဲ့အတွက် ဆိုလိုတာက တစ်ခါတစ်လေကြ မြန်မာနိုင်ငံမှာ ဖြစ်တဲ့ လက်နက်ကိုင်ပဋိပက္ခကို မီးထိုးတာတွေ များတဲ့နေရာပေါ့၊ အဲဒီနေရာမျိုးတွေကတော့ စစ်ရေးအရ ဖြေရှင်း တဲ့ အပိုင်းတွေမှာ ပါသွားမှာပဲ၊ ရှင်းရှင်းလေးပါ သိပ်တော့ဆန်းလှတဲ့ ကိစ္စတွေ မဟုတ်ပါဘူး။ အဓိက KIA အနေနဲ့ အထက်ပိုင်း စစ်ကိုင်းဒေသနဲ့ နောက်ပိုင်း ချင်းပြည်နယ်ဖက်တွေမှာ သူတို့ရဲ့ ထောက်ပံ့လှုပ်ရှားမှုတွေ အရမ်းများ နေတယ်၊ ဒါတွေကို ထိန်းချုပ်ဖို့အတွက်က လိုအပ်လာတဲ့ အပိုင်းတွေရှိတယ်၊ နောက်တစ်ချက်က သူတို့ကိုယ်တိုင် လည်း စစ်ရေးပိုင်းဆိုင်ရာ လှုပ်ရှားမှုက ပြောရရင် ပြည်တွင်း တည်ငြိမ်မှုအပိုင်းမှာ သိပ်အနှောင့်အယှက် ဖြစ်လာ တဲ့အခါမှာ ဒါမျိုးက ပြန်လည်ဖြေရှင်းတဲ့ သဘောပါပဲ” ဟု ပြောသည်။

တိုက်ပွဲဖြစ်ပွားနေသည့် နမ်ဆန်ယန် နယ်မြေကိုတွေ့ရစဉ်

စစ်ကိုင်းတိုင်းဒေသကြီးအတွင်းရှိ ပြည်သူ့ကာကွယ်ရေးတပ် (PDF) များထံ KIA သည် လက်နက်ထောက်ပံ့မှု၊ တင်ပို့ရောင်းချမှု အများအပြား ပြုလုပ်နေကြောင်း သုံးသပ်မှုများလည်း ရှိနေသည်။

ပြီးခဲ့သည့် ဇူလိုင် ၁ ရက်နေ့က စတင်၍ မြန်မာ့တပ်မတော်နှင့် KIA တို့ နမ်ဆန်ယန်တွင် တိုက်ပွဲဖြစ်ပွားခဲ့သည်။

လက်ရှိအချိန်ထိ နှစ်ဖက်စစ်ရေး တင်းမာနေသလို ဇူလိုင် ၂၁ ရက်ကလည်း နမ်ဆန်ယန်တွင် ဗုံးကြဲတိုက်ခိုက်မှု များ ရှိခဲ့သည်။

တိုက်ပွဲဖြစ်ပွားမှု အခြေအနေများကို သိရှိနိုင်ရေး KIA မှ ပြန်ကြားရေးတာဝန်ခံ ဗိုလ်မှူးကြီးနော်ဘူကို CNI က ဆက်သွယ်ခဲ့သော်လည်း ဆက်သွယ်၍ မရသေးပေ။

တရုတ်နိုင်ငံနှင့် ကုန်သွယ်မှု ပြုလုပ်ရာတွင် နမ့်ဆန်ယန်သည် အရေးပါသော အနေအထားတွင် တည်ရှိနေခြင်း ကြောင့် မြန်မာ့တပ်မတော်မှ တိုက်ခိုက်ခြင်း ဖြစ်နိုင်ကြောင်း ကချင်နိုင်ငံရေးသမား ဦးကွမ်ဂေါင်အောင်ခမ်းက CNI သတင်းဌာနသို့ ပြောသည်။

KIA အောက်က PDF ကိုတွေ့ရစဉ်

၎င်းက “စစ်မျက်နှာဖွင့်တာက‌တော့ အချက်အလက်တွေ အများကြီး ရှိပါလိမ့်မယ်၊ တစ်ခုက ပထဝီနိုင်ငံရေးအရ ရော နမ်ဆန်ယန်က အရေးကြီးတဲ့ အနေအထားမှာရှိတယ်၊ ဘာဖြစ်လို့လဲဆိုရင် တရုတ်ပြည်နဲ့ ကုန်သွယ်ရေး လုပ်တဲ့နေရာမှာ အနီးစပ်ဆုံးနေရာ တစ်ခုဖြစ်တယ်၊ နမ်ဆန်ယန်နဲ့ လိုင်ဇာလမ်းကြောင်းက ဒီကနေ တရုတ်ပြည်နဲ့ အနီးစပ်ဆုံးနေရာ တစ်ခုလည်း ဖြစ်တာပေါ့၊ ဒါလည်း တစ်ခုဖြစ်ပါလိမ့်မယ်၊ နောက်တစ်ခုက အဲဒီဒေသမှာ KIA Control area (ထိန်းချုပ်ဧရိယာ) ထဲမှာ ဒီမိုကရေစီဘက်တော်သားတွေ အများကြီးရှိတာပေါ့၊ အဲဒီထဲမှာတော့ အစုံပဲ တိုင်းရင်းသားတွေရော၊ ဗမာလူငယ်တွေရော အကုန်လုံးရှိနေတဲ့ အပိုင်းတွေ ဖြစ်တယ်၊ ဒါကြောင့်လည်း ဒီဟာကို မျက်စိစူးတဲ့ဟာမျိုးလည်း ဖြစ်ပါလိမ့်မယ်၊ နောက်တစ်ခုတော့ ဒီဒေသမှာ သူတို့ ဗမာစစ်တပ်ကပဲ၊ သူတို့ ကပဲ နေရာယူချင်တဲ့ အပိုင်းတွေလည်း ဖြစ်ပါလိမ့်မယ်၊ ဘယ်လိုပဲ ဖြစ်နေဖြစ်နေပေါ့၊ ဒီစစ်တိုက်တဲ့ အပိုင်းကြ တော့ KIA ကလည်း အလျော့ပေးမယ့်ဟာမျိုးတော့ မတွေ့ရဘူးပေါ့ဗျာ၊ သူ့ဆီမှာရှိတဲ့ မဟာမိတ် AA ရှိတယ်၊ တခြား PDF တွေရှိတယ်၊ တခြား ဂေါ်ရခါးတပ်တွေ ရှိတယ်၊ KIA စစ်တပ်တွေ ရှိတယ်၊ ဆိုတော့ တပ်သားတွေက ထောင်နဲ့ချီပြီးတော့ အဲဒီပတ်ဝန်းကျင်မှာတော့ ရှိပါတယ်၊ ဒါကြောင့်လည်း သူတို့က ခိုင်ခန့်တဲ့ ဒီဟာမျိုးတော့ ခုခံ နေတဲ့ ကာကွယ်နေတဲ့ အပိုင်းတွေ ဖြစ်တယ်၊ ဒါကြောင့်လည်း ဒီအနီးအနားမှာရှိတဲ့ နမ်ဆန်ယန်ကို ဗုံးကြဲပြီးမှ တိုက်ခိုက်နေတယ်လို့ပဲ ကျနော်က ဒီလိုပဲ မြင်တယ်” ဟု ပြောသည်။

သို့သော်လည်း KIA ဌာနချုပ်တည်ရှိရာ လိုင်ဇာကို ဗုံးကြဲတိုက်ခိုက်ရန်မှာ တရုတ်ပြည် နယ်နိမိတ်ဖြင့် အလွန် နီးကပ်နေသောကြောင့် တိုက်ခိုက်ရန် အခြေအနေမျိုး မတွေ့ရကြောင်း ၎င်းက ပြောသည်။

လက်ရှိ တိုက်ပွဲဖြစ်ပွားနေသော နမ်ဆန်ယန်ကျေးရွာသည် မြစ်ကြီးနား– ဗန်းမော် လမ်းမပေါ်တွင် တည်ရှိပြီး KIA ၏ ဌာနချုပ်နှင့် အနီးဆုံးကျေးရွာဖြစ်ကြောင်း၊ ၁၀ မိုင်ခန့်သာ ကွာဝေးကြောင်း သိရသည်။

CNI News

၂၀၂၃ ခုနှစ်၊ ဇူလိုင် ၂၄

ထိုင်းအစိုးရသစ် ဖွဲ့စည်းရာတွင် ထိုင်းစစ်တပ်ကလွဲ၍ Move Forward နှင့် ဖြူးထိုင်းပါတီ နှစ်ခု၌ မည်သည့်ပါတီ ဖြစ်ဖြစ် အဆင်ပြေကြောင်း မြန်မာရွှေ့ပြောင်းအလုပ်သမားအရေး ကူညီဆောင်ရွက်ပေးနေသူများက CNI သတင်း ဌာနသို့ ပြောသည်။

မြန်မာ အပါအဝင် နိုင်ငံခြားသား ရွှေ့ပြောင်းလုပ်သားများအတွက် ထိုင်းအစိုးရသစ် ဖွဲ့စည်းရာတွင် ထိုင်းစစ်တပ် သာ အာဏာပြန်လည် ရယူသွားမည်ဆိုပါက ရွှေ့ပြောင်း အလုပ်သမားအရေးနှင့်ပတ်သက်ပြီး တစ်စုံတစ်ရာ ပြောင်းလဲ ထူးခြားသွားမည် မဟုတ်ကြောင်း၊ အရပ်သားအစိုးရကိုသာ လိုလားကြောင်း မြန်မာရွှေ့ပြောင်း အလုပ်သမားအရေး ကူညီဆောင်ရွက်ပေးနေသူများက CNI သတင်းဌာနသို့ ပြောသည်။

Arakan Workers Organization မှ ဒါရိုက်တာ ကိုနိုင်အောင်အောင်က “အဓိကကတော့ ရွှေ့ပြောင်း အလုပ် သမားတွေရဲ့ အသံကို နားထောင်တာ အားနည်းသွားမှာပေါ့။ နောက်တစ်ခုက ရွှေ့ပြောင်း အလုပ်သမားတွေရဲ့ ပြဿနာ အခြေခံတရားတွေကို တွေ့ဆုံဆွေးနွေးတာပဲ ဖြစ်ဖြစ် စကားပြောခွင့် ရတာပဲ ဖြစ်ဖြစ် ရွှေ့ပြောင်း အလုပ် သမားတွေအတွက် မူဝါဒ လုပ်ဆောင်တာပဲ ဖြစ်ဖြစ် အဲဒီအကြောင်းအရာမှာ အားနည်းချက်တွေ ဖြစ်ပေါ် လာနိုင်ခြေရှိတာပေါ့။ အကယ်၍ အရပ်သားအစိုးရ ဖြစ်ခဲ့မယ်ဆိုရင် လွှတ်တော်ထဲမှာ ရွှေ့ပြောင်း အလုပ်သမားတွေ၊ အလုပ်သမားသမဂ္ဂတွေနဲ့ မစိမ်းတဲ့ လွှတ်တော်အမတ်တွေ ပါလာတဲ့အခါကြတော့ ဒီအလုပ်သမားတွေရဲ့ ပြဿနာ အခြေခံ တရားတွေကို တွေ့ဆုံဆွေးနွေးတာပဲဖြစ်ဖြစ် အစည်းအဝေး တစ်ခုခုနဲ့ ဆွေးနွေးတာပဲဖြစ်ဖြစ် သူတို့လွယ်ကူ တယ်။ တကယ်လို့ စစ်အစိုးရ တက်လာမယ်ဆိုရင်တော့ ကျနော်တို့ ရွှေ့ပြောင်း အလုပ်သမားတွေ အရေးနဲ့ ပတ်သက်လို့ ဆွေးနွေးတာပဲဖြစ်ဖြစ်၊ အဆုံးအဖြတ်တစ်ခု ထွက်ပေါ်တာပဲဖြစ်ဖြစ် ခက်ခဲမှုတွေက ရှိနိုင်တာပေါ့။ ကုန်ကျစရိတ်တွေကလည်း များနိုင်ခြေရှိတာပေါ့။ အဓိကကတော့ သူတို့လုပ်ဆောင်နေတဲ့ အကြောင်းအရာတစ်ခု အပေါ်မှာ အခြေခံပြီးမှ ကောင်းသည်ဖြစ်စေ၊ ဆိုးသည်ဖြစ်စေ စနစ်တကျ ထောက်ပြဖို့အတွက် အခွင့်အလမ်းတွေ နည်းသွားတာကို” ဟု ပြောသည်။

ရွှေ့ပြောင်းမြန်မာအလုပ်သမားများကိုတွေ့ရစဉ်

ရွေးကောက်ပွဲတွင် နေရာအများစု အနိုင်ရရှိသည့် MFP ပါတီသည် ညွန့်ပေါင်းအစိုးရအတွက် ပါတီ ၈ ခု ပူးပေါင်း ကာ ခေါင်းဆောင်ဖြစ်သူ ပီတာသည် ဝန်ကြီးချုပ်အဖြစ် ရွေးချယ်ခံရာတွင် အရေးနိမ့်ခဲ့သည်။

ထို့ကြောင့် ဒုတိယနေရာ အများဆုံး အနိုင်ရရှိထားသည့် ဖြူးထိုင်းပါတီသည် ဝန်ကြီးချုပ်အဖြစ် ရွေးချယ်ခံရန် ပြင်ဆင်လျက် ရှိနေသည်။

အဆိုပါ ပါတီနှစ်ခုသည် ရွှေ့ပြောင်း အလုပ်သမားများနှင့် ပတ်သက်၍ မဲဆွယ်စည်းရုံးရေး ကာလများတွင် ပြောဆို မှုများ ရှိခဲ့သော်လည်း ရွှေ့ပြောင်းလုပ်သား အများစုအနေဖြင့် MFP ပါတီကိုသာ အစိုးရဖွဲ့စေချင်ကြကြောင်း FED မှ အလုပ်သမားတာဝန်ခံ ဦးမင်းဦးက CNI သတင်းဌာနသို့ ပြောသည်။

“ကျနော်တို့ကတော့ အဝါရောင်ပေါ့လေ Move Forward ပါတီပေါ့။ ပီတာဦးဆောင်တဲ့ ပါတီကို ပိုပြီးတော့ ရွေး ချယ်မယ်ဆိုရင် သူတို့ကို ရွေးချယ်မှာပေါ့။ သူတို့က ဒီရွေးကောက်ပွဲ မတိုင်ခင်ကတည်းကလည်း ရွှေ့ပြောင်း အလုပ်သမားဆိုင်ရာ မူဝါဒနဲ့ ပတ်သက်ပြီးတော့ သူတို့က ဖွေထိုင်း(ဖြူးထိုင်း)ပါတီထက်စာရင် သူတို့က ပိုပြီးတော့ ချပြနိုင်တယ် သူတို့ဘာလုပ်မယ်။ သဘောကတော့ ဟိုဘက်ကလည်း ပြောတယ် အခြေခံလစာ ဘယ်လောက် ရအောင် လုပ်ပေးမယ်ဆိုတာနဲ့ ဘယ်လောက်ရောက်အောင် လုပ်ပေးပြီးတဲ့အခါကြရင် ဘယ်လိုကဏ္ဍတွေမှာ တည်ငြိမ်အောင်လုပ်။ လစာတိုးတယ်ဆိုရင် ကုန်စည်စီးဆင်းမှုတို့ ထုတ်ကုန်တွေ ဒီပြဿနာတွေလည်း တက်လာ နိုင်တယ်။ ဒါတွေကို ရှင်းဖို့ဆို Move Forward ပါတီဟာဆိုရင် သူတို့မှာ အဲဒီပေါ်လစီရှိတယ်။ အဲဒါကို သူတို့က သေချာ ချပြနိုင်တယ်။ နောက်ပြီးတော့လည်း အဲဒီမှာ အများစုပါဝင်တဲ့ လူငယ်တွေအနေနဲ့ကလည်း ရွှေ့ပြောင်း အလုပ်သမားနဲ့ပတ်သက်တဲ့ ကိစ္စကို စိတ်ဝင်စားသလို နားလည်တယ်ပေါ့။ ပြီးတော့ ဒီဟာ ရွှေ့ပြောင်း အလုပ် သမားတွေက သူတို့နိုင်ငံရဲ့ စီးပွားရေးကို မောင်းနှင်တဲ့ အဓိက အချက်တစ်ချက် ဖြစ်တယ်ဆိုတာလည်း သူတို့သိ တယ်။ အများစုကတော့ ပြောလို့ရတာက အဝါရောင်မှာရှိတယ်” ဟု ၎င်းက ပြောသည်။

Move Forward ပါတီထောက်ခံသူများနဲ့ ပီတာကိုတွေ့ရစဉ်

သို့သော် ဖြူးထိုင်းပါတီသည် MFP ပါတီအား ညွှန့်ပေါင်းအစိုးရအဖြစ် ဖွဲ့ထားသည့် (၈)ပါတီမှ ထုတ်ပယ်နိုင်ခြေ ရှိပြီး ထိုင်းဝန်ကြီးချုပ် ပရာယွတ်၏ ကျောထောက်နောက်ခံပါတီဖြစ်သည့် United Thai Nation ပါတီနှင့် ပူးပေါင်းသွားနိုင်ဖွယ်ရှိကြောင်း သုံးသပ်မှုများလည်း ရှိနေသည်။

ထိုသို့ ပူးပေါင်းသွားမည်ဆိုပါက ထိုင်းပြည်သူလူထုသည် ဖြူးထိုင်းပါတီအပေါ် အမြင်သဘောထားများ ပြောင်းလဲ သွားနိုင်ကြောင်းနှင့် ဆူပူမှုများလည်း ဖြစ်ပေါ်လာနိုင်ဖွယ်ရှိကြောင်းလည်း ရွှေ့ပြောင်းအလုပ်သမား အရေး ဆောင်ရွက်သူများက သုံးသပ်ကြသည်။

လာမည့် ဇူလိုင် ၂၇ ရက်နေ့တွင် ကျင်းပမည့် တတိယအကြိမ် ပူးတွဲလွှတ်တော်တွင် MFP က ဖြူးထိုင်းပါတီမှ ဝန်ကြီးချုပ်လောင်း တစ်ယောက်အား အဆိုပြုမည် ဖြစ်သကဲ့သို့ ဖြူးထိုင်းပါတီမှလည်း ၎င်းတို့ ရွေးချယ်ထား သည့် ဝန်ကြီးချုပ်လောင်းအား အဆိုပြုနိုင်ဖွယ် ရှိသည်။

ထိုပါတီတွင် ထိုင်းမြောက်ပိုင်းဘက်ရှိ ပြည်သူလူထုများမှလွဲ၍ အများစုသည် MFP ပါတီနှင့် ခေါင်းဆောင် ပီတာတို့ အား ထောက်ခံကြခြင်း ဖြစ်သည်။

CNI News

၂၀၂၃ ခုနှစ်၊ ဇူလိုင် ၂၄

မြန်မာနိုင်ငံတွင် ဖြစ်ပွားနေသော လက်နက်ကိုင်ပဋိပက္ခနှင့် နိုင်ငံရေး အကျပ်အတည်းများကို ဖြေရှင်းနိုင်ဖို့ အာဆီယံ ဘုံသဘောတူညီချက် ၅ ချက်အား အကောင်အထည်ဖော်နိုင်ရေး နစကနှင့် အာဆီယံတို့ သဘောတူခဲ့ ကြသော်လည်း လက်တွေ့ အကောင်အထည်ဖော်မှုအပေါ် အလုပ်ဖြစ်လား မဖြစ်လား ဆွေးနွေးငြင်းခုံနေကြသည်။

၂၀၂၁ ခုနှစ်၊ ဖေဖော်ဝါရီ ၁ ရက်နေ့က စတင်ဖြစ်ပွားခဲ့သော ထိုအကျပ်အတည်းမှာ လက်ရှိအချိန်ထိ ဖြေရှင်းနိုင် ခြင်း မရှိသေးဘဲ ဖြစ်နေကြောင်း သုံးသပ်မှုများ ရှိနေသည်။

နစကအနေဖြင့် ဘုံသဘောတူညီချက်အတိုင်း အကောင်အထည်ဖော်ရန် လုပ်ဆောင်နေကြောင်း လီဆူအမျိုးသား ဖွံ့ဖြိုးတိုးတက်ရေးပါတီ (ဒူးလေးပါတီ) မှ ဥက္ကဋ္ဌ ဦးလီပေါ်ရဲ့က CNI သတင်းဌာနသို့ ပြောသည်။

 ဗိုလ်ချုပ်မှူးကြီးမင်းအောင်လှိုင် အာဆီယံထိပ်သီးညီလာခံတက်ရောက်စဉ်

၎င်းက “ဘုံသဘောတူညီချက် ၅ ချက်ကတော့ အခုလက်ရှိ ကျနော်တို့ နစက အစိုးရအနေနဲ့ အချိန်အတိုင်းအတာ တစ်ခုအထိ သူတို့က စောင့်ပြီးမှ ဒီဟာကို အကောင်အထည် ဖော်မယ်လို့ ကျနော်ကတော့ မြင်တာပဲလေ” ဟု ပြော သည်။

၂၀၂၁ ခုနှစ်၊ ဧပြီလက ကျင်းပခဲ့သော အာဆီယံထိပ်သီး ခေါင်းဆောင်များ အစည်းအဝေးတွင် သွေးထွက်သံယိုမှု များ ရပ်တန့်ရန်၊ လူသားချင်း စာနာထောက်ထားမှု အကူအညီများ ပေးအပ်ရန်၊ ဖမ်းဆီးခံရသူများ ပြန်လွတ်ပေး ရန်၊ သက်ဆိုင်သူများ တွေ့ဆုံဆွေးနွေး အဖြေရှာကြရန်၊ မြန်မာနိုင်ငံဆိုင်ရာ အာဆီယံအထူးကိုယ်စားလှယ်ကို ခန့်အပ်ခြင်းနှင့် မြန်မာပြည်သွားရောက်ခွင့် ပြုရန် စသည့် ဘုံသဘောတူညီချက် ၅ ချက်ကို ချမှတ်ခဲ့သည်။

နစကနှင့် သဘောတူထားသည့် ငြိမ်းချမ်းရေး အစီအစဉ် ဘုံသဘောတူညီချက် ၅ ချက် အကောင်အထည် ပေါ် လာရေးသည် အာဆီယံအဖွဲ့၏ ဦးစားပေး ကိစ္စရပ်ဖြစ်ကြောင်း အင်ဒိုနီးရှားနိုင်ငံခြားရေးဝန်ကြီး ရတ်နိုမာဆူဒီက ၂၀၂၃ ခုနှစ်၊ ဇူလိုင် ၁၄ ရက်က ပြောကြားခဲ့သည်။

အာဆီယံ ဘုံသဘောတူညီချက်ကို ကြိုးပမ်းရန်အတွက် တိုက်တွန်းမှုများလည်း ရှိနေကြောင်း ရခိုင်ပြည်လွတ် မြောက်ရေးပါတီ (ALP) မှ ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

 အာဆီယံ အလံကို မီးရှို့နေကြစဉ်

၎င်းက “အဲဒါကတော့ ကြိုးပမ်းဖို့အတွက်လည်း တိုက်တွန်းနေကြတာကိုတော့ တွေ့ပါတယ်၊ အာဆီယံ ဘုံသဘော တူညီချက် ၅ ရပ်အရ ဖြစ်ဖို့အတွက်ကို ဘက်ပေါင်းစုံကနေလည်း တိုက်တွန်းနေကြတယ် ဆိုတာကိုတော့ ကျမ နားလည်ပါတယ်၊ အဲဒီလိုမျိုးပဲ လက်ခံထားပါတယ်” ဟု ပြောသည်။

ပြီးခဲ့သည့် မေလ ၇ ရက်နေ့က ရှမ်းပြည်နယ်တောင်ပိုင်း၊ ဆီဆိုင်မြို့နယ်အတွင်း လူသားချင်း စာနာထောက်ထားမှု အကူအညီများ ပေးအပ်ရန် အင်ဒိုနီးရှားနှင့် စင်္ကာပူသံရုံးမှ ကိုယ်စားလှယ်များ လိုက်ပါလာသည့် ယာဉ်တန်း ပစ်ခတ်ခံရသည့် ဖြစ်စဉ်လည်း ဖြစ်ပွားခဲ့သည်။

၂၀၂၁ ခုနှစ်၊ ဖေဖော်ဝါရီ ၁ ရက်နောက်ပိုင်း ပြည်တွင်းမှာ လက်နက်ကိုင်ပဋိပက္ခ ကျယ်ကျယ်ပြန့်ပြန့် ဖြစ်ပေါ်လာ ပြီး အရပ်သားသေဆုံးမှု၊ နေအိမ်ပျက်စီး မီးလောင်မှု၊ ပြည်သူလူထုများ အိုးအိမ်စွန့်ခွာပြီး ဘေးလွတ်ရာသို့ ထွက် ပြေး တိမ်းရှောင်မှုများ ကြုံတွေ့လျက်ရှိနေသည်။

CNI News

၂၀၂၃ ခုနှစ်၊ ဇူလိုင် ၂၂

အမျိုးသားညီညွတ်ရေးအစိုးရ (NUG) မှ ယနေ့ (ဇူလိုင် ၂၂ ရက်)နေ့မှာ နွေဦးဖွံ့ဖြိုးရေးဘဏ်ကို စတင် အသုံးပြုမည် ဖြစ်ကြောင်း ဇူလိုင် ၂၀ ရက်က ပြုလုပ်သည့် သတင်းစာ ရှင်းလင်းပွဲတွင် NUG ၏ စီမံဘဏ္ဍာဝန်ကြီး ဦးတင်ထွန်း နိုင်က ပြောကြားခဲ့သည်။

ပြည်သူများ ပိုင်ဆိုင်သည့် ဘဏ်များတွင် အပ်နှံစုဆောင်းထားသော ငွေများကို နစကမှ ခြိမ်းခြောက်မှုများ လုပ်ဆောင်နေကြောင်း၊ ပြည်သူများ၏ ဘဏ္ဍရေးဆိုင်ရာ လုံခြုံမှု၊ ကိုယ်ရေး အချက်အလက် ပိုင်းဆိုင်ရာ လုံခြုံ မှုများကို ကာကွယ်ရန် တာဝန်ရှိကြောင်း၊ ထို့ကြောင့် နွေဦးဖွံ့ဖြိုးရေးဘဏ်ကို စတင်စဉ်းစားခဲ့ကြောင်း ၎င်းက ပြောသည်။

ဦးတင်ထွန်းနိုင်က “တကယ်က ကျနော်တို့ အနေနဲ့ အာဏာသုံးပါးလုံးကို လွှမ်းခြုံပြီးတော့ ဒီနွေဦးဖွံ့ဖြိုးရေးဘဏ် ကို ထူထောင်တာ ဖြစ်ပါတယ်၊ အာဏာသုံးပါးဆိုတာတော့ ‌တော်လှန်‌ရေးကာလရယ်၊ ပြီးလို့ရှိရင် ကျနော်တို့ အသွင်ကူးပြောင်းရေးကာလပေါ့၊ နောင်အနာဂတ်မှာ ဖက်ဒရယ်တိုင်းပြည်ကို ပြန်လည်ပြီးတော့ ဖက်ဒရယ်စနစ်နဲ့ ပြန်လည်ထူထောင်မယ့် ကာလအထိ ကျနော်တို့က ဒါကို ရည်ရွယ်ပြီးတော့ ထူထောင်တာ ဖြစ်ပါတယ်” ဟုပြောသည်။

ဦးတင်ထွန်းနိုင်ကိုတွေ့ရစဉ်

ဘဏ်သုံးစွဲသူ ပြည်သူလူထုများ၏ လုံခြုံရေးသည် ပထမဖြစ်ကြောင်း၊ သုံးစွဲမှုများ လုံခြုံမှုရှိစေရေးအရ မှတ်ပုံတင် နှင့် အခြားသော အချက်အလက်များကို တောင်းခံခြင်း မရှိကြောင်း ၎င်းက ပြောသည်။

ဘဏ်တစ်ခု ဖွင့်လှစ်ပါက ချေးငွေ၊ ထုတ်ငွေ၊ ငွေသွင်း၊ ရှိရမည်ဖြစ်ကြောင်း၊ ပြည်သူများအနေဖြင့် တိကျမှန်ကန် သည့် လုပ်ငန်းကို လုပ်စေချင်ကြောင်း စီးပွားရေး လေ့လာသုံးသပ်သူ ဦးသက်ဇော်က CNI သတင်းဌာနသို့ ပြော သည်။

၎င်းက “နွေဦးဖွံ့ဖြိုးရေးဘဏ်ဖွင့်၊ သူ့ဟာသူ ဘဏ်ပဲ ဖွင့်ဖွင့်လေ၊ ဘဏ်ဆိုတာက တည်နေရာရှိရမယ်၊ လိပ်စာရှိရ မယ်၊ ဘယ်ဘဏ်လက်အောက်မှာ ဗမာပြည်မှာ မရှိရင်လည်း ဘယ်နိုင်ငံရဲ့ လက်အောက်မှာ ရှိရမယ်ဆိုတာ တိကျ တဲ့ အဖြေတစ်ခုတော့ ပေးရမယ်လေ၊ ဘဏ်ဆိုတာ ပါးစပ်လေးနဲ့ ဘဏ်ဖွင့်၊ အကောင့်တော့ ဖွင့်လို့ရမယ်၊ နွေဦး ဖွံ့ဖြိုးရေးဘဏ် အကောင့်ဆိုပြီးမှပဲ နိုင်ငံခြားဘဏ်မှာ ဖွင့်ခွင့်ရှိမယ်၊ ဘဏ်အနေနဲ့ သွားခွင့်မရှိဘူးလို့ ဆရာတို့ မြင် တယ်၊ အဲဒါကို ဘာမှ သက်သေခိုင်မာမှု မရှိဘဲနဲ့ ကိုယ့်ဟာကိုယ် ဆောင်ရွက်ချင်တဲ့ သူရှိရင်လည်း ကိုယ့်သဘောနဲ့ ကိုယ်ပေါ့နော်၊ ဆရာတို့ကတော့ ခိုင်ခိုင်မာမာ ဖြစ်စေချင်တယ်၊ တိကျမှန်ကန်တဲ့ လုပ်ငန်းကို လုပ်စေချင်တယ်၊ ပြည်သူတွေ အလိမ်မခံစေချင်ဘူးဆိုတဲ့ message တော့ ပေးချင်တယ်” ဟု ပြောသည်။

NUG ၏ စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာနမှ ပြီးခဲ့သည့် ၂၀၂၂ ခုနှစ်၊ ဇွန်လ ၂၆ ရက်က NUG Pay ကို ထုတ်ဝေခဲ့ပြီး လက်ရှိတွင် နွေဦးဖွံ့ဖြိုးရေးဘဏ်ကို ဖွင့်လှစ်ခဲ့ခြင်း ဖြစ်သည်။

CNI News

၂၀၂၃ ခုနှစ်၊ ဇူလိုင် ၂၁

နစကအနေဖြင့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)ကို ကျော်လွန်ကာ ငြိမ်းချမ်းရေးညီလာခံ ကျင်းပလာနိုင်ကြောင်း ရခိုင့်ဦးဆောင်ပါတီ(AFP)ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။

NCA အရ ကျင်းပမည်ဆိုပါက NCA လက်မှတ် မထိုးထားသော တိုင်းရင်းသား လက်နက်ကိုင် အဖွဲ့အစည်းများ ပါဝင်ဆွေးနွေးနိုင်မှာ မဟုတ်ကြောင်း၊ ထို့ကြောင့် NCA ကို ကျော်လွန်ကာ ကျင်းပလာနိုင်ကြောင်း ၎င်း ပြောသည်။ 

ဒေါက်တာအေးမောင်က “အခြေအနေအရတော့ နောက် ၆ လ ထပ်ယူမှာလား၊ အဲဒီ ၆ လယူရင် ခုနက ငြိမ်းချမ်း ရေးညီလာခံဆိုတဲ့ဖက်မှာ လက်နက်ကိုင် တောင်လှန်ရေး အဖွဲ့အစည်းတွေရဲ့ နိုင်ငံရေးရည်မှန်းချက်၊ တပ်မတော် ရဲ့ နိုင်ငံရေးရည်မှန်းချက်ပေါ့ဗျာ၊ အဲဒီနှစ်ခုကို ဆွေးနွေးကြမှာလား NCA ကို ကျော်ရေးဆိုတဲ့ သဘော ပါ NCA အရဆိုရင်တော့ “ဝ”တို့၊ မိုင်းလားတို့က NCA မှာ လက်မှတ်ထိုးရမယ်လေ၊ ဒါမှ ငြိမ်းချမ်းရေးညီလာခံကို တက်ပြီး ဆွေးနွေးခွင့်ရှိတာကိုး မဟုတ်ရင် လေ့လာသူပဲ၊ ပြည်ထောင်စုလွှတ်တော်ကလည်း ရှိရဦးမယ်၊ NCA စာချုပ်အရ ဆိုရင် အဲဒီတော့ ရွေးကောက်ခံ အစိုးရတစ်ရပ်၊ ရွေးကောက်ခံ လွှတ်တော်တစ်ရပ် ရှိမှသာလျှင် ငြိမ်းချမ်းရေး ညီလာခံက ထွက်လာတဲ့အဖြေကို အတည်ပြုပေးပြီးခါမှ National Accord ဖြစ်မှာကိုး။ ပြီးမှ ဖွဲ့စည်းပုံအခြေခံ ဥပဒေကို ပြင်နိုင်မှာကိုး။ အဲဒါကတော့ လုပ်ငန်းစဉ်က ရှည်ကြာပါတယ်။ မြန်မြန်ဖြတ်ချင်လို့ ငြိမ်းချမ်းရေးညီလာခံ ကို တောင်းတာလား အဲဒီမှာ အကြေအလည်ပေါ့ဗျာ၊ အခု NSPNC နဲ့ ၅ ဖွဲ့တို့ ၂ ဖွဲ့တို့ ၃ ဖွဲ့တို့ တွေ့နေသလို အားလုံး ပါဝင်တဲ့ ပုဂ္ဂိုလ်တွေကို ဖိတ်လိုက်ပြီးမှ တပ်မတော် ဦးဆောင်ပြီးမှ ငြိမ်းချမ်းရေး ညီလာခံ တစ်ခု သွားမှာ ဖွဲ့စည်းပုံအခြေခံဥပဒေအသစ် တစ်ခုကို ဦးတည်ကြမှာလား။ အဲဒီဖက်ကို ဦးတည်တယ်ဆိုရင်တော့ဖြင့် ငြိမ်းချမ်း ရေး ညီလာခံသည် အက္ခရာကျလာနိုင်တာပေါ့၊ အဲဒီတော့ ၂၀၀၈ ကို ကျော်ပြီး စဉ်းစားတာ ပေါ့၊ NCA ကို ကျော်ပြီး စဉ်းစားကြရအောင်ဆိုတဲ့ သဘောတောင်းဆိုတာလည်း ဖြစ်ကောင်းဖြစ်နိုင်တာပေါ့ဗျာ” ဟု ပြောသည်။

၂၀၂၃ ခုနှစ်၊ ဇူလိုင် ၂၀ ရက်က UWSA-SSPP-NDAA တို့နှင့် NSPNC တွေ့ဆုံ ဆွေးနွေးနေစဉ်

လက်ရှိတွင် နစကနှင့် တိုင်းရင်းသား လက်နက်ကိုင် အဖွဲ့အစည်းအချို့သည် ငြိမ်းချမ်းရေး တွေ့ဆုံဆွေးနွေးနေ ကြောင်း၊ ထိုဆွေးနွေးမှုများတွင် ပြည်ထောင်စုငြိမ်းချမ်းရေးညီလာခံ ကျင်းပနိုင်ရေးဆိုသော အချက်ကို ထည့်သွင်း ဆွေး‌နွေးကြကြောင်း သိရသည်။

ပြည်ထောင်စုငြိမ်းချမ်းရေးညီလာခံကို ယခင် အရပ်သားအစိုးရ လက်ထက်တွင်လည်း ကျင်းပခဲ့ကြောင်း၊ သို့သော် လည်း အကျိုးသက်ရောက်မှု နည်းပါးခဲ့ကြောင်း နိုင်ငံရေးသမားတစ်ဦးက ပြောသည်။

တိုင်းပြည်အား ငြိမ်းချမ်းစေလိုပါက ငြိမ်းချမ်းနိုင်သမျှ အခြေအနေများကို လုပ်ဆောင်ရမှာဖြစ်ကြောင်း ရခိုင်ပြည် လွတ်‌မြောက်ရေးပါတီ(ALP)မှဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

ပြည်ထောင်စုငြိမ်းချမ်းရေးညီလာခံမှာ ဦးသိန်းစိန် မိန့်ခွန်းပြောနေစဉ်

၎င်းက “ငြိမ်းချမ်းဖို့ဆိုလို့ရှိရင် NCA ထိုးထားတဲ့ အဖွဲ့အစည်းတွေနဲ့ ကြိုးပမ်းနေသလို နိုင်ငံငြိမ်းချမ်းစေဖို့ဆိုလို့ရှိရင် NCA မထိုးထားတဲ့ အဖွဲ့အစည်းတွေနဲ့လည်း စကားပြောတော့ ပြောရမယ်၊ ကျမ မြင်တာက မငြိမ်းချမ်းလို့ပဲ ငြိမ်းချမ်းဖို့အတွက် စကားပြောကြရတာပဲ၊ အဲဒီလိုမျိုးပဲ မြင်ပါတယ်၊ NCA ကို ကျော်လွန်တယ်ဆိုတာကတော့ NCA ဘောင်အတွင်းက ကျမတို့ ကိုယ်၌က NCA အတိုင်းသွားပါမယ်လို့ ဘယ်လောက်ပြောပြော ကျမတို့ တိုင်းရင်း သား လက်နက်ကိုင် တော်လှန်ရေး အဖွဲ့အစည်းတွေထဲမှာလည်း အတွင်းအပြင် အမျိုးမျိုးတွေ ရှိနေကြတယ်၊ ဒီနေ့ ဒီအချိန်မှာလေ မိသားစုအတွင်းမှာလည်း အမြင်မတူကြဘူး။ တိုင်းရင်းသားခေါင်းဆောင်တွေ အချင်းချင်း အကြား မှာလည်း အမြင်မတူကြဘူး။ တစ်ဖွဲ့ချင်းစီထဲမှာလည်း အမြင်ကွဲလွဲမှုတွေက ဒီလိုမျိုး ရှိနေကြတာတွေ ရှိတယ်၊ တကယ့်နိုင်ငံ ငြိမ်းချမ်းစေချင်တယ်ဆိုလို့ရှိရင် ငြိမ်းချမ်းနိုင်သမျှတော့ အခြေအနေတွေကို လုပ်ရမှာပါပဲ၊ ကျမ တော့ အဲဒီလိုမျိုးပဲ တွေးထားတယ်” ဟု ပြောသည်။

ပြည်ထောင်စု ငြိမ်းချမ်းရေး ညီလာခံကို ယခင် သမ္မတဦးသိန်းစိန် အစိုးရလက်ထက် ၂၀၁၆ ခုနှစ်က စတင် ကျင်းပခဲ့ရာ ဒေါ်အောင်ဆန်းစုကြည် အစိုးရလက်ထက် ၂၀၂၀ ခုနှစ်၊ သြဂုတ်လအတွင်းက  နောက်ဆုံးအကြိမ် ကျင်းပခဲ့သည်။

CNI News

၂၀၂၃ ခုနှစ်၊ ဇူလိုင် ၂၁ 

ရှမ်းနီအမျိုးသားများတပ်မတော်(SNA)နှင့် ကချင်လွတ်လပ်ရေးတပ်မတော်(KIA)- ဟုမ္မလင်းမြို့နယ်အတွင်း လှုပ်ရှားနေသည့် PDF ပူးပေါင်းတပ်ဖွဲ့တို့ ၂၀၂၃ ခုနှစ်၊ ဇူလိုင် ၂၁ ရက်နေ့ မနက်ပိုင်းက တိုက်ပွဲဖြစ်ပွားနေ ကြောင်း ဒေသခံများက ပြောသည်။

အဆိုပါ တိုက်ပွဲသည် စစ်ကိုင်းတိုင်းဒေသကြီး၊ ဟုမ္မလင်းမြို့နယ်၊ နောင်ပူအောင်(နောင်ပိုအောင်)စံပြကျေးရွာ အုပ်စု၊ အောင်းပင်ကျေးရွာအနီးမှာ ဖြစ်ကြောင်း ဒေသခံများက ပြောသည်။

အောင်းပင်ကျေးရွာမှ ဒေသခံတစ်ဦးက “ဟုတ်တယ်၊ မနက်ကစပြီး တိုက်ပွဲဖြစ်နေတာ။ SNA နဲ့ KIA-PDF ပူးပေါင်း တပ်ဖွဲ့နဲ့ဖြစ်တာ။ SNA က အောင်းပင်နဲ့ အနီးကပ် လွှာစင်းကုန်းကျေးရွာအဝင်မှာ ရှိနေတာ၊ အဲဒါကို KIA- PDF က လာတိုက်တော့ ဖြစ်ကြတာ။ လွှာစင်းကုန်ကျေးရွာမှာ ရှိတဲ့ SNA ကို တိုက်နိုင်ရင် KIA- PDF က နောင်ပိုအောင်စံပြကျေးရွာတို့ကို ဝင်လို့ရတယ်။ အဲဒီကနေမှ နမ့်တောတို့ ဟုမ္မလင်းမြို့အထိ စစ်ရေးဆက်ပြီး ချဲ့ ထွင်လို့ရတယ်”ဟု ပြောသည်။

ရှမ်းနီအမျိုးသားများတပ်မတော်(SNA)ကို တွေ့ရစဉ်

ထို့နောက် ဗန်းမောက်မြို့နယ်ထဲမှာလည်း SNA နှင့် KIA-PDF ပူးပေါင်းတပ်ဖွဲ့တို့ကြား တိုက်ပွဲများ ဖြစ်ပွားနေ ကြောင်း ဗန်းမောက်မြို့ဒေသခံများက ပြောသည်။

လက်ရှိ စစ်ကိုင်းတိုင်းဒေသကြီးအတွင်းမှာ KIA-PDF ပူးပေါင်းအဖွဲ့သည် စစ်ရေးအရှိန်မြင့်လာသလို ဗန်းမောက် မြို့နယ်၊ ဟုမ္မလင်းမြို့နယ်တို့ကို ထိန်းချုပ်နိုင်ရေး ကြိုးပမ်းလျက်ရှိသည်။ 

အဆိုပါ မြို့နယ် ၂ ခုကို KIA-PDF က ထိန်းချုပ်နိုင်ပါက စစ်ကိုင်းတိုင်းဒေသကြီး အလယ်ပိုင်းနှင့် အောက်ပိုင်း အထိ လက်နက်ခဲယမ်း ထောက်ပံ့ရေး လမ်းကြောင်း အားကောင်းလာမည်ဖြစ်ကြောင်း၊ ထိုမှတဆင့် စစ်ကိုင်း တိုင်းဒေသကြီးကို ထိန်းချုပ်လာနိုင်မည်ဖြစ်ကြောင်း စစ်ကိုင်းတိုင်းဒေသကြီး အတွင်း လှုပ်ရှားနေသော PDF တချို့က ပြောသည်။