CNI News

၂၀၂၂ ခုနှစ်၊ စက်တင်ဘာ ၂၇

နစကက ကျင်းပရန် ကြံစည်နေသော ရွေးကောက်ပွဲ အပါအဝင် လုပ်ငန်းစဉ်အားလုံးကို မည်သည့်နည်းနှင့်မျှ (အသိအမှတ်မပြု) လက်ခံနိုင်မည် မဟုတ်ကြောင်း အမျိုးသားဒီမိုကရေစီအဖွဲ့ချုပ်(NLD)ပါတီက ယနေ့ (စက်တင်ဘာ ၂၇ ရက်)တွင် ထုတ်ပြန် ပြောကြားခဲ့သည်။

အမျိုးသားဒီမိုကရေစီအဖွဲ့ချုပ်(NLD)ကို ၁၉၈၈ ခုနှစ်၊ စက်တင်ဘာ ၂၇ ရက်တွင် စတင် တည်ထောင်ခဲ့ရာ ယနေ့တွင် ၃၄ နှစ်ပြည့် အထိမ်းအမှတ်အနေဖြင့် ထုတ်ပြန်ခဲ့သော ကြေညာချက်တွင် အထက်ပါအတိုင်း ပြော ထားခြင်း ဖြစ်သည်။

NLD ပါတီသည် ၁၉၉၀ အထွေထွေရွေးကောက်ပွဲ၊ ၂၀၁၂ ကြားဖြတ်ရွေးကောက်ပွဲ၊ ၂၀၁၅ အထွေထွေရွေး ကောက်ပွဲ၊ ၂၀၁၇ နှင့် ၂၀၁၈ ကြားဖြတ်ရွေးကောက်ပွဲ၊ ၂၀၂၀ အထွေထွေရွေးကောက်ပွဲတို့တွင် အနိုင်ရရှိခဲ့ သည်။

သို့သော် ၂၀၂၁ ခုနှစ်၊ ဖေဖော်ဝါရီ ၁ ရက်နေ့တွင် မြန်မာ့တပ်မတော်က NLD အစိုးရကို ၂၀၂၀ အထွေထွေရွေး ကောက်ပွဲ မဲစာရင်းအငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ ဖြုတ်ချခဲ့သည့်အ တွက် မြန်မာ့နိုင်ငံ အကျပ်အတည်းဖြင့် ရင်ဆိုင်နေရသည်။

 NLD ပါတီ၏ ၃၄ နှစ်ပြည့် ထုတ်ပြန်ချက်

ထို့နောက် ဗိုလ်ချုပ်မှူးကြီးမင်းအောင်လှိုင်က ၂၀၂၃ ခုနှစ်၊ သြဂုတ်လတွင် ရွေးကောက်ပွဲ ပြန်လည် ကျင်းပပေး မည်ဖြစ် ကြောင်း၊ အနိုင်ရရှိသည့် ပါတီကို နိုင်ငံတော်အာဏာလွှဲပြောင်းပေးမည်ဖြစ်ကြောင်း ပြောကြားခဲ့သည်။

NLD ပါတီက “အမျိုးသားဒီမိုကရေစီအဖွဲ့ချုပ် အနေဖြင့် မြန်မာနိုင်ငံတွင် ပြည်သူ့ဆန္ဒနှင့်အညီ စစ်မှန်သော ဒီမိုကရေစီ စနစ်အောက်မှ ကျင်းပမည့် လွတ်လပ်၍ တရားမျှတသည့် နောက်ထပ် ရွေးကောက်ပွဲရလဒ်တစ်ခု ပေါ်ထွက်မလာမီ အချိန်ထိ လက်ရှိ ၂၀၂၀ ရွေးကောက်ပွဲရလဒ် ပြည်သူ့ဆင့်လွှဲအာဏာကို နိုင်ငံလွှဲအပ် ကိုယ် စားပြု အာဏာအဖြစ် ကျင့်သုံးမည်ဖြစ်သည်။ ထို့ကြောင့် ဥပဒေကို ကိုယ်တိုင်ချိုးဖောက်ထားသော တရားမဝင် အာဏာသိမ်း စစ်ကောင်စီနှင့် ယင်းက ဖွဲ့စည်းထားသော အဖွဲ့အစည်းများ၊ ကျင်းပရန် ကြံစည်နေသော ရွေး ကောက်ပွဲ အပါအဝင် လုပ်ငန်းစဉ် အားလုံးကို မည်သည့် နည်းနှင့်မျှ(အသိအမှတ်မပြု) လက်ခံနိုင်မည် မဟုတ် ပါ”ဟု ထုတ်ပြန်ချက်မှာ ပြောထားသည်။

NLD ပါတီ၏ ၃၄ နှစ်ပြည့် ပါတီတည်ထောင်ခြင်း နှစ်ပတ်လည် အထိမ်းအမှတ် ထုတ်ပြန်ချက်၏ နံပါတ် ၉ တွင် ဖော်ပြထားချက်သည် ၂၀၂၀ အထွေထွေရွေးကောက်ပွဲရလဒ်အပေါ်ကို မျှော်လင့်နေသေးသည့် အသွင်ဆောင် နေကြောင်း နိုင်ငံရေးလေ့လာသုံးသပ်သူ တစ်ဦးက ပြောသည်။

NLD ပါတီရုံးကို လုံခြုံရေးယူပေးထားသော ရဲတပ်ဖွဲ့(GETTY IMAGES)

၎င်းက “အာဏာသိမ်းထားလို့ ၂၀၀၈ ဖွဲ့စည်းပုံအခြေခံဥပဒေကို NUG က ဖျက်သိမ်း လိုက်ပြီးလို့ ကြေညာထား သည့်တိုင်အောင် အခု NLD ရဲ့ ထုတ်ပြန်ချက် နံပါတ် ၉ က ၂၀၂၀ ရွေးကောက်ပွဲရလဒ်ကိုပဲ သူက ဆုပ်ကိုင် ထားဆဲဖြစ်တော့ NUG နဲ့ NLD လမ်းကြောင်းက မရှင်းမရှင်းဖြစ်နေတယ်။ စကစ ဘက်က ရွေးကောက်ပွဲ လုပ် မယ် ဒါကို အသိအမှတ်မပြုဘူးဆိုတာကလည်း ရွေးကောက်ပွဲဖြစ်သွားရင် သူဘာမှမတက်နိုင်ဘူးလေ။ ဒါပေ မယ့် ရွေးကောက်ပွဲကို မဖြစ်အောင်လည်း တခြား အင်အားစုတွေက ဟန့်တားမှုတွေ လုပ်လာမှာတော့ သေချာ တယ်။ အဲတော့ ရွေးကောက်ပွဲ ဖြစ်မဖြစ်က ပြည်တွင်း တည်ငြိမ် အေးချမ်းရေးနဲ့ နိုင်ငံတကာက အသိအမှတ်ပြု ခြင်း မပြုခြင်းအပေါ်မှာ မူတည်တယ်။ အသေအချာတော့ ဒီအချိန်မှာ မပြောနိုင်သေးဘူး”ဟု ပြောသည်။

နစကသည် ပါတီ ထိပ်ပိုင်း ခေါင်းဆောင်များကို ဖမ်းဆီးထားခြင်း၊ ပါတီဝင်များနှင့် လွှတ်တော် ကိုယ်စားလှယ် များကို ဥပဒေမဲ့လိုက်လံဖမ်းဆီးခြင်း၊ ယင်းတို့၏ နေအိမ်များနှင့် ပိုင်ဆိုင်မှုများအား ချိတ်ပိတ်သိမ်းဆည်းခြင်း၊ ဖမ်းမိသူ တချို့ကို စစ်ကြောရေးစခန်းများတွင် ညှင်းပင်းနှိပ်စက်ကာ သတ်ဖြတ်ခြင်း၊ ပါတီရုံးများကို ဝင်ရောက် ၍ ပါတီပိုင် ပစ္စည်းများကိုသိမ်းဆည်းခြင်း၊ မီးရှို့ဖျက်ဆီးခြင်းတို့ကို ဆက်တိုက်လုပ်ဆောင်ကာ အမျိုးသား ဒီမိုကရေစီအဖွဲ့ချုပ်ပါတီအား အလုံးစုံဖျက်ဆီးရန် အားထုတ်နေသည်ဟု NLD က ထုတ်ပြန်ခဲ့သည်။

CNI News

၂၀၂၂ ခုနှစ်၊ စက်တင်ဘာ ၂၇

မြန်မာ့တပ်မတော်ကို ဖြုတ်ချပြီးမှ ဗမာပြည်နယ် ဖွဲ့စည်းရေးကိစ္စများအရေး ဆွေးနွေးလုပ်ဆောင်သင့်ဟု မြန်မာ့ အရေး လေ့လာသုံးသပ်သူလည်းဖြစ် တရုတ်နိုင်ငံအရေးကျွမ်းကျင်သူလည်း ဖြစ်သူ ဒေါက်တာလှကျော်ဇောက CNI သတင်းဌာနသို့ ပြောသည်။

လက်ရှိတွင် အားလုံး၏ ဘုံရည်မှန်းချက်ဖြစ်သည့် စစ်အာဏာရှင်စနစ် ဖြုတ်ချရေးကို လုပ်ဆောင်သင့်ကြောင်း၊ ထို့နောက် ပြည်နယ်သစ် ပေါ်ထွန်းရေး ကိစ္စများကို ဆွေးနွေးတိုင်ပင်သင့်ကြောင်း ၎င်းက ပြောသည်။

ဒေါက်တာလှကျော်ဇောက “အဲဒီကိစ္စတွေက ကျမသိပ်တော့ နားမလည်ဘူးဗျ၊ ဘာဖြစ်လို့လဲဆိုရင် ကျမတို့ရဲ့ ရည်မှန်းချက်က တစ်ခုတည်းပဲရှိတယ်၊ ဒီစစ်ကောင်စီကို ဖယ်ရှားဖို့ပဲ၊ အဲဒါပြီးမှဘဲ ဒီဟာတွေကို စနစ်တကျ ဆွေးနွေးတိုင်ပင်ကြတာ ပိုကောင်းမယ်ထင်တယ်၊ အခုလောလောဆယ် လုပ်ငန်းအရက‌တော့ ကျမတို့အားလုံး စစ်အာဏာရှင်စနစ်ကို မကြိုက်တဲ့သူတွေ အားလုံး တစ်စုတစ်စည်းတည်း စုပြီးတော့ ကျမတို့ ဒီစစ်တပ်ကို နိုင်အောင်တိုက်ဖို့ပဲဗျ၊ ကျန်တာတွေကတော့ ကျမတို့ ဖြည်းဖြည်းလုပ်လို့ ရပါတယ် ထင်ပါတယ်။ ဒီဟာတွေက လောလောဆယ်လည်း သိပ်မလိုအပ်သေးပါဘူး။ အခုကျမတို့ ဗမာပြည်မှာ တကယ့်ကို အလောတကြီး လိုအပ်နေ တာက ဒီစစ်ကောင်စီကို ဖယ်ပြီး တိုင်းပြည် တည်ငြိမ်အေးချမ်းအောင် လုပ်ဖို့က ပိုအရေးကြီးတယ် ထင်ပါတယ်၊ စစ်ကောင်စီ ရှိနေသ၍ ဗမာပြည်နယ်ပေးပေး၊ ဘာပေးပေး ဘယ်သူမှ ဘာမှ မရနိုင်ပါဘူး။ ဒီစစ်ကောင်စီ မရှိမှ ရနိုင်မှာ ဖြစ်တဲ့အတွက် ဒီစစ်ကောင်စီတွေကို အမြစ်ပြတ်ဆိုသလို ပြတ်ပြတ်သားသား အောင်ပွဲရပြီးမှသာလျှင် တခြားဟာတွေကို လုပ်နိုင်မယ်ထင်တယ်” ဟု CNI သတင်းဌာနသို့ ပြောသည်။

၂၀၁၆ ခုနှစ်၊ ဇူလိုင်လက မိုင်ဂျာယန်မြို့မှာ တွေ့ရသော လူမျိုးစုလူငယ်များ

လက်ရှိ မြန်မာနိုင်ငံသည် ၂၀၂၁ ခုနှစ်၊ ဖေဖော်ဝါရီ ၁ ရက်က အမျိုးသားဒီမိုကရေစီအဖွဲ့ချုပ်(NLD) အစိုးရကို ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှု မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော်မှ ဖြုတ်ချ၍ နိုင်ငံတော်အား အရေးပေါ် ကြေညာထားသည်။

ထို့နောက် တော်လှန်ရေး အင်အားစုများနှင့် တိုင်းရင်းသားလက်နက်ကိုင် အဖွဲ့အစည်းတချို့ ၏ ပူးပေါင်းအဖွဲ့များ နှင့် တပ်မတော်ကြား တိုက်ပွဲများ ဖြစ်ပွားလျက်ရှိသည်။

ပြည်နယ်ဖွဲ့စည်းရေးကိစ္စနှင့် ပတ်သက်၍ ပြီးခဲ့သည့် ပြည်ထောင်စု သဘောတူစာချုပ်တွင် သဘောတူထားသည့် အချက်အလက်များရှိကြောင်း ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) မှ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။

၎င်းက “အဲဒီ ပြည်ထောင်စုသဘောတူစာချုပ် အစိတ်အပိုင်း (၁) မှာဆိုရင် ဒီမိုကရေစီနဲ့ဖက်ဒရယ်စနစ်ကို အခြေ ခံတဲ့ ပြည်ထောင်စုကို တိုင်းဒေသကြီး မျဉ်းစောင်း ပြည်နယ်အဖြစ် ဖွဲ့စည်းရမည်။ အဲဒီလိုမျိုး ကျနော်တို့ သဘော တူ ထားတာရှိတယ်၊ တိုင်းဒေသကြီး မျဉ်းစောင်း ပြည်နယ်ဆိုတဲ့ အဓိပ္ပာယ်ကတော့ တိုင်းဒေသကြီး ခေါ်မလား ပြည်နယ်ခေါ်မလား ဆိုတာကလေးလည်း ကျနော်တို့ ဆက်လက်ပြီးတော့ ညှိနှိုင်းဆွေးနွေးရမယ့် အခင်းအကျင်း လို့ နားလည်တယ်၊ အဲဒီအောက်မှာလည်းပဲ မှတ်ချက် တစ်ဆက်ထဲပေါ့လေ၊ တိုင်းဒေသကြီး မျဉ်းစောင်း ပြည်နယ် များက တန်းတူရည်တူရှိတယ်၊ အမည်နာမ သတ်မှတ်ချက်နဲ့ ပတ်သက်ပြီးတော့ နောင်ဆိုရင် ဆက်လက် ဆွေးနွေး ဖို့ သဘောတူတယ်ဆိုတဲ့ အချက်အလက်တွေ အပေါ်မှာကိုလည်းပဲ ဆရာတို့ ပြန်ပြီးတော့ အဲဒါကို သုံးသပ်ကြည့် မယ်ဆိုရင်တော့ ခုနက ပြောတဲ့ ကိစ္စရပ်တွေကတော့ ကျနော်တို့ ဆက်လက် ညှိနှိုင်းဆောင်ရွက်ဖို့ အချိန်လို အပ် တယ်၊ ကြိုးပမ်းဖို့ လိုအပ်ဦးမယ်ဆိုတာကို‌တော့ ကျနော့်အနေနဲ့ အဲဒီလို နားလည်းထားပါတယ်” ဟု ပြောသည်။

ပြည်ထောင်စု ငြိမ်းချမ်းရေး ညီလာခံကျင်းပနေသည်ကိုတွေ့ရစဉ်

(၈) ပြည်နယ်မူသည် တန်းတူ အခွင့်အရေးကို တောင်းဆိုခြင်းဖြစ်ကြောင်း၊ ကျန်သည့် လူမျိုးစုတွင် ပြည်နယ်ရှိပြီး ဖြစ်သည့်အတွက် ဗမာလူမျိုးစုတွင်လည်း အမျိုးသားပြည်နယ် တစ်ရပ်လိုသည်ဟုဆိုကာ တင်ပြတောင်းဆိုခြင်း ဖြစ်ကြောင်း သိရ သည်။

လက်ရှိ မြန်မာနိုင်ငံတွင် ၂၀၀၈ ဖွဲ့စည်းပုံအခြေခံဉပဒေအရ တိုင်းဒေသကြီး ၇ ခု၊ ပြည်နယ် ၇ ခု၊ ကိုယ်ပိုင်အုပ်ချုပ် ခွင့်ရတိုင်း ၁ ခု၊ ကိုယ်ပိုင်အုပ်ချုပ်ခွင့်ရဒေသ ၅ ခု၊ နေပြည်တော်ကောင်စီနယ်မြေ ၁ ခု စသဖြင့် စုစည်း သတ်မှတ် ပြဋ္ဌာန်းထားသည်။

ထို့နောက် ရှမ်းနီ၊ တအာင်း(ပလောင်)၊ “ဝ”၊ ပအိုဝ်း တို့က ပြည်နယ် သတ်မှတ်ပေးရန် တောင်းဆိုလျက်ရှိသလို မိုင်းလား (အထူးဒေသ ၄)ကလည်း ကိုယ်ပိုင်အုပ်ချုပ်ခွင့်ရဒေသ သတ်မှတ်ပေးရန် တောင်းဆိုလျက်ရှိသည်။

CNI News

၂၀၂၂ ခုနှစ် ၊ စက်တင်ဘာ ၂၆

"ဝ"ပြည်သွေးစည်းညီညွတ်ရေးတပ်မတော်(UWSA)၊ အမျိုးသားဒီမိုကရေစီမဟာမိတ်တပ်မတော် (NDAA)၊ ရှမ်းပြည်တိုးတက်ရေးပါတီ(SSPP)မှ ခေါင်းဆောင်များနှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ စက်တင်ဘာ ၂၆ ရက်နေ့က တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့ကြသည်။

အဆိုပါ တွေ့ဆုံ ဆွေးနွေးပွဲသို့ UWSA ဘက်က ဒုဥက္ကဋ္ဌ ဦးလော့ယာကု၊ NDAA က ဒုဥက္ကဋ္ဌ ဦးစန်ပေ့၊ SSPP မှ ဒုဥက္ကဋ္ဌ(၂) စဝ်ခွန်ဆိုင်တို့ တက်ရောက်ရှိသည်။

ထို့နောက် နစက၏ ငြိမ်းချမ်းရေးဆွေးနွေးရေးအဖွဲ့နှင့် UWSA၊ NDAA၊ SSPP ကိုယ်စားလှယ်များ ဆက်လက် ဆွေးနွေးကြမည်ဖြစ်သည်။ ယနေ့တွေ့ဆုံမှုတွင် မည်သည့် အကြောင်းအရာများကို ဆွေးနွေးကြကြောင်းကိုတော့ နှစ်ဖက်စလုံးက သတင်းထုတ်ပြန်ခြင်းမရှိ သေးပေ။

UWSA၊ NDAA၊ SSPP ခေါင်းဆောင်များနှင့် ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

UWSA ၊ NDAA ၊ SSPP တို့သည် နစကနှင့် ငြိမ်းချမ်းရေး ဆွေးနွေးမှုကို ယခုအခါသည် ဒုတိယအကြိမ် တွေ့ဆုံ ခြင်း ဖြစ်သည်။

ပထမ အချိန်ကတော့ UWSA နှင့် နစကသည် ၂၀၂၂ ခုနှစ်၊ မေလ ၂၉ ရက်နေ့ တွေ့ဆုံ ဆွေးနွေးထားသလို NDAA နှင့် နစကလည်း ၂၀၂၂ ခုနှစ်၊ ဇွန်လ ၄ ရက်က တွေ့ဆုံ ဆွေးနွေးထားသည်။ ထို့နောက် SSPP နှင့် နစကသည် ၂၀၂၂ ခုနှစ်၊ သြဂုတ် ၄ ရက်က တွေ့ဆုံ ဆွေးနွေးထားသည်။

အဆိုပါ တိုင်းရင်းသား လက်နက်ကိုင် ၃ ဖွဲ့သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်မထိုးရသေးသော အဖွဲ့များသည်။

CNI News

၂၀၂၂ ခုနှစ်၊ စက်တင်ဘာ ၂၆

ရှမ်းပြည်မြောက်ပိုင်းရှိ တိုက်ပွဲရှောင်စခန်းများ ရွှေ့ခိုင်းထားမှုကို ကလေးများ ကျောင်းပြီးမှ ရွေ့ဆိုင်းပေးရန် အသနားခံစာ တင်ထားကြောင်း နမ္မတူမြို့နယ်မှ တိုက်ပွဲရှောင်ပြည်သူများ ကူညီထောက်ပံ့ရေးကော်မတီမှ တာဝန်ရှိသူ တစ်ဦးက CNI သတင်းဌာနသို့ ပြောသည်။

ယခုနှစ် အောက်တိုဘာလကုန် နောက်ဆုံးထား၍ ပိတ်သိမ်းရန် ဌာနဆိုင်ရာများမှ စက်တင်ဘာလ အစောပိုင်းက ညွှန်ကြားထားကြောင်း သိရသည်။

နမ္မတူမြို့နယ်မှ တိုက်ပွဲရှောင်ပြည်သူများ ကူညီထောက်ပံ့ရေးကော်မတီမှ တာဝန်ရှိသူက “ကျနော်တို့ကတော့ လောလောဆယ်ကတော့ သူတို့ရဲ့ သားသမီးတွေ ကျောင်းတက်နေတဲ့ အတွက်ကြောင့် နောက်နှစ် ဧပြီလမှာ ရွှေ့ခိုင်းဖို့ အသနားခံစာ ကျ‌နော်တို့ တင်ထားတယ်၊ အဲဒါ အကြောင်းတော့ ပြန်မလာသေးဘူးဗျ။ အဲဒါလေး အောင်မြင်လို့ ရှိရင်‌တော့ ၄ လပိုင်းအထိတော့ သူတို့ ကလေးတွေ ကျောင်းတက်ဖို့ အဆင်ပြေသွားမှာပေါ့” ဟု ပြောသည်။

နမ္မတူမြို့နယ်တွင် ရှမ်း၊ လီဆူ၊ ကချင် တိုက်ပွဲရှောင်စခန်းများရှိပြီး အိမ်ထောင်စု ၁၀၀ ကျော်ရှိကာ တိုက်ပွဲရှောင် ဦးရေ ၅၀၀ ကျော်ရှိကြောင်း ၎င်းက ပြောသည်။

နမ္မတူမြို့နယ်အတွင်း တစ်နေရာကိုတွေ့ရစဉ် (GETTY IMAGES) 

လက်ရှိတွင် ကျောက်မဲမြို့နယ်အတွင်း တိုက်ပွဲမရှိသေးသည့်အတွက် တိုက်ပွဲရှောင်များကို နေရပ်ပြန်ခိုင်းသည့် သဘောဟု ကျောက်မဲမြို့နယ်မှ ဇီဝိတဒါန လူမှုကူညီရေးအသင်းဥက္ကဋ္ဌ ဦးတင်မောင်သိန်းက CNI သတင်းဌာနသို့ ပြောသည်။

၎င်းက “ဒီမှာ အရင်တုန်းက ဖြစ်ခဲ့ကြတာ ကျနော်တို့ ဖက်ဆိုရင် RC ရှိတယ်၊ RC နဲ ထိပ်တိုက် တွေ့ခဲ့ကြတယ် ပေါ့နော်၊ SSA နဲ့ RC နဲ့ ထိပ်တိုက်တွေ့ကြတယ်‌၊ နောက်တစ်ခါ TNLA ပါကြတယ်၊ သူတို့ မဟာမိတ်အဖွဲ့တွေ‌ပေါ့၊ အဲဒီလိုနဲ့ စစ်ဖြစ်ခဲ့တယ်၊ အခုက မရှိတော့တဲ့အတွက် စစ်ပွဲမရှိတော့လို့ ပြန်ခိုင်းတဲ့ သဘောပေါ့” ဟု ပြောသည်။

ရှမ်းပြည်နယ်မြောက်ပိုင်းတွင် ရှမ်းပြည်ပြန်လည် ထူထောင်ရေးကောင်စီ (RCSS)၊ ရှမ်းပြည်တိုးတက်ရေးပါတီ (SSPP)၊ တအောင်း အမျိုးသား လွတ်မြောက်ရေး တပ်မတော် (TNLA)၊ ကချင်လွတ်လပ်ရေး တပ်မတော်(KIA)၊ မြန်မာနိုင်ငံအမျိုးသားဒီမိုကရေစီ မဟာမိတ်တပ်မတော် (MNDAA)နှင့် တပ်မတော်အကြားလည်းကောင်း၊ တိုင်းရင်းသား လက်နက်ကိုင်တပ် အချင်းချင်း အကြားလည်းကောင်း တိုက်ပွဲများ ဖြစ်ပွားခဲ့သည်။

နမ္မတူတိုက်ပွဲရှောင်များကိုတွေ့ရစဉ်(AFP

နမ္မတူမြို့နယ်မှ တိုက်ပွဲရှောင်ပြည်သူများ ကူညီထောက်ပံ့ရေးကော်မတီမှ တာဝန်ရှိသူတစ်ဦးက “တိုက်ပွဲတွေ ကတော့ မရှိတော့ဘူးပေါ့။ ဒါပေမယ့် ဝင်ထွက်သွားလာမှုတော့ ရှိကောင်းရှိမှာပေါ့။ သူတို့ တချို့တွေပေါ့၊ တချို့ တွေကတော့ ဒီမှာပဲ မြေကွက်ဝယ်ပြီးမှ မြေကွက်ကို ပေါင်းဝယ်ပြီးမှ အိမ်ဆောက်နေမယ်‌ပေါ့၊ တချို့က ကြတော့ လည်း ရွာမှာ ပြန်တော့မယ်ပေါ့၊ တချို့ကကြတော့လည်း အခန်းတွေ ငှားပြီးမှ နေမယ်‌ပေါ့၊ အဲဒီလိုမျိုးတော့ အစီအစဉ် ဆွဲထားတယ်” ဟု CNI သတင်းဌာနသို့ ပြောသည်။

ရှမ်းပြည်နယ်မြောက်ပိုင်း ကွတ်ခိုင်၊ နမ့်ခမ်း၊ နမ္မတူ၊ မန်တုံ၊ လားရှိုးနှင့် သိန္နီ စသည့်မြို့နယ်များအတွင်း တိုက်ပွဲ ရှောင်စခန်း (၂၆)ခုရှိပြီး တိုက်ပွဲရှောင် လူဦးရေ တစ်သောင်းခွဲ(၁၅၀၀၀)ဝန်းကျင် ရှိနေကြောင်း ရွှေဖီမြေ သတင်းဌာန၏ ဖော်ပြချက်အရ သိရသည်။

CNI News

၂၀၂၂ ခုနှစ်၊ စက်တင်ဘာ ၂၅

“ဝ”ပြည်သွေးစည်းညီညွတ်ရေးတပ်မတော်(UWSA)၊ အမျိုးသားဒီမိုကရေစီမဟာမိတ်တပ်မတော်(NDAA)၊ ရှမ်းပြည်တိုးတက်ရေးပါတီ(SSPP)မှ ခေါင်းဆောင်များသည် နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ၍ ငြိမ်းချမ်းရေး လုပ်ငန်းစဉ်များ တွေ့ဆုံ ဆွေးနွေးရန် ယနေ့ (စက်တင်ဘာ ၂၅ ရက်)တွင် နေပြည်တော် သို့ ရောက်ရှိလာခဲ့သည်။

UWSA ကိုယ်စားလှယ်အဖွဲ့ကို ဒုဥက္ကဋ္ဌ ဦးလော့ယာကုက လည်းကောင်း၊ NDAA ကိုယ်စားလှယ်အဖွဲ့အား ဒုဥက္ကဋ္ဌ ဦးစန်ပေ့က လည်းကောင်း၊ SSPP ကိုယ်စားလှယ်အဖွဲ့ကို ဒုဥက္ကဋ္ဌ(၂) စဝ်ခွန်ဆိုင်က လည်းကောင်း အသီးသီး ဦးဆောင်လာခဲ့ကြောင်း သိရသည်။

UWSA  ဒုဥက္ကဋ္ဌ ဦးလော့ယာကု ဦးဆောင်သော ကိုယ်စားလှယ်အဖွဲ့ ၂၀၂၂ ခုနှစ်၊ စက်တင်ဘာ ၂၅ ရက် နေပြည်တော်ရောက်လာစဉ် 

ထို့နောက် စက်တင်ဘာ ၂၆ ရက်နေ့တွင် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် အဆိုပါ ပူးတွဲ သုံးဖွဲ့မှ ကိုယ်စားလှယ်များ တွေ့ဆုံ ဆွေးနွေးကြမည်ဖြစ်သည်။ ဆက်လက်၍ နစက၏ ငြိမ်းချမ်းရေးဆွေးနွေးရေးအဖွဲ့နှင့် UWSA၊ NDAA၊ SSPP ပူးတွဲကိုယ်စားလှယ်များ အသေးစိတ်ကို ဆွေးနွေးကြမည်ဖြစ်သည်။

UWSA ၊ NDAA ၊ SSPP တို့သည် နစကနှင့် ငြိမ်းချမ်းရေး ဆွေးနွေးမှုကို ယခုအခါသည် ဒုတိယအကြိမ် တွေ့ဆုံ ခြင်း ဖြစ်သည်။

SSPP ဒုဥက္ကဋ္ဌ(၂) စဝ်ခွန်ဆိုင် ဉီးဆောင်သော ကိုယ်စားလှယ်အဖွဲ့ ၂၀၂၂ ခုနှစ်၊ စက်တင်ဘာ ၂၅ ရက်က နေပြည်တော်ရောက်လာစဉ်

ပထမ အချိန်ကတော့ UWSA နှင့် နစကသည် ၂၀၂၂ ခုနှစ်၊ မေလ ၂၉ ရက်နေ့ တွေ့ဆုံ ဆွေးနွေးထားသလို NDAA နှင့် နစကလည်း ၂၀၂၂ ခုနှစ်၊ ဇွန်လ ၄ ရက်က တွေ့ဆုံ ဆွေးနွေးထားသည်။ ထို့နောက် SSPP နှင့် နစကသည် ၂၀၂၂ ခုနှစ်၊ သြဂုတ် ၄ ရက်က တွေ့ဆုံ ဆွေးနွေးထားသည်။

အဆိုပါ တိုင်းရင်းသား လက်နက်ကိုင် ၃ ဖွဲ့သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) လက်မှတ်မထိုးရသေးသော အဖွဲ့များသည်။

CNI News

၂၀၂၂ ခုနှစ်၊ စက်တင်ဘာ ၂၄

နွေဦးတော်လှန်ရေး ပေါ်ပေါက်လာရခြင်းမှာ မိမိတို့ မျိုးဆက်များ၏ အနာဂတ်အတွက်ကြောင့်ဟု အမျိုးသား ညီညွတ်ရေးအစိုးရ (NUG) ၏ ပညာရေးဝန်ကြီး ဒေါက်တာဇော်ဝေစိုးက ပြောသည်။

ယနေ့ (စက်တင်ဘာ ၂၄ ရက်) တွင် ဖွင့်လှစ်သည့် ပအိုဝ်းအမျိုးသားဖက်ဒရယ်ကောင်စီ (PNFC) ၏ ကြားကာလ အခြေခံပညာ အခမဲ့ အွန်လိုင်း စာသင်ကျောင်းဖွင့်ပွဲ အခမ်းအနားတွင် ပြောကြားခဲ့ခြင်း ဖြစ်သည်။

ဒေါက်တာဇော်ဝေစိုးက “ပညာရေးဟာ တကယ်ကို လိုအပ်တယ်၊ ပညာရေးမရှိလို့ မဖြစ်ဘူးဆိုတဲ့စိတ်နဲ့ ခေါင်း ဆောင်တွေ‌ရော၊ ပါဝင်နေတဲ့ သူတွေ အားလုံးရော စောစောက မိဘတွေ၊ ကျောင်းသားတွေ အားလုံး အခုလို မျိုး ပါဝင်နေကြတာဟာ တကယ် တော့ အနာဂတ်အတွက် ဖြစ်ပါတယ်၊ ကျ‌နော်တို့ တိုင်းပြည်ရဲ့ အနာဂတ်၊ ပအိုဝ်း အမျိုးသားတွေရဲ့ အနာဂတ် အတွက် ဖြစ်တယ်လို့ ကျနော်တော့ ယုံကြည်ပါတယ်၊ ဒီနေ့ တော်လှန်ရေး လုပ်နေ ရခြင်းက ဒါပါပဲ၊ ကျ‌နော်တို့ ဒီနေ့ နွေဦးတော်လှန်ရေး ပေါ်ပေါက်လာရခြင်းဟာ နွေဦးတော်လှန်‌ရေးမှာ ကျနော်တို့ တတွေ ပါဝင်နေကြခြင်း ဟာ၊ နွေဦးတော်လှန်ရေးမှာ CDM ဆရာတွေ၊ ဆရာမတွေ CDM ကျောင်းသားတွေ ပါဝင် နေကြခြင်းဟာ နိုင်ငံ့ရဲ့ အနာဂတ်အတွက် ကျနော်တို့ မျိုးဆက်တွေရဲ့ အနာဂတ်အတွက် ဖြစ်ပါတယ်၊ ဒီအနာဂတ် ဘယ်လိုနည်းနဲ့မှ စစ်အာဏာရှင်နဲ့ မကောင်းနိုင်ဘူးဆိုတာ ကျ‌နော်တို့တတွေ သိကြပြီးသား၊ ကြုံခဲ့ကြ ပြီးသား ဖြစ် ပါတယ်၊ နှစ်ပေါင်း များစွာလည်း ကြုံခဲ့ပြီးသား ဖြစ်ပါတယ်” ဟု ပြောသည်။

 ဒီမိုကရေစီအရေးတောင်းဆိုကြသူများနဲ့လုံခြုံရေးတပ်ဖွဲ့ ထိပ်တိုက်တွေ့ကြစဉ် (ဖရွန်းတီးယားမြန်မာ)

အဆိုပါ PNFC ၏ ကြားကာလအခြေခံပညာ အခမဲ့ အွန်လိုင်း စာသင်ကျောင်းဖွင့်ပွဲကို PNFC ဥက္ကဋ္ဌ ခွန်မြင့်ထွန်း၊ NUG ၏ ပညာရေးဝန်ကြီး ဒေါက်တာဇော်ဝေစိုး၊ NUG ၏ ပညာရေးဝန်ကြီးဌာန ဒုဝန်ကြီး ဒေါက်တာစိုင်းခိုင်မျိုး ထွန်း၊ NUG ၏ ပညာရေးဝန်ကြီးဌာနမှ ဆရာမ Ja Htoi Pan တို့ တက်ရောက်ခဲ့သည်။

လက်ရှိ မြန်မာနိုင်ငံသားများအားလုံး အစဉ်အဆက် ခေါင်းမမော်နိုင်သည့် ပညာမတတ်သည့် သူများဖြစ်မှာ စိုးရိမ်သည့်အတွက် ယနေ့ တော်လှန်ရေးကို လုပ်ဆောင်နေခြင်းဖြစ်ကြောင်း ဒေါက်တာ ဇော်ဝေစိုးက ပြောသည်။

PNFC ၏ ကြားကာလ အွန်လိုင်း ပညာသင်ကြားရေးမိတ်ဆက်

၎င်းက “အားလုံးသိတဲ့ အတိုင်းပဲ ကျနော်တို့ နိုင်ငံ၊ ကျနော်တို့ နိုင်ငံအတွင်းမှာ မှီတင်းနေထိုင်ကြတဲ့ ပအိုဝ်း အမျိုးသားတွေ အပါအဝင် ကျနော်တို့တတွေ ကမ္ဘာနဲ့ ယှဉ်ရင် သိပ်ကို နောက်ကျနေခဲ့ကြရတယ်၊ အောက်ကျ နောက်ကျဖြစ်ခဲ့ရတယ်။ အဲဒါဟာ ဒီစစ်အာဏာရှင် အဆက်ဆက်ကြောင့်ပဲ ဖြစ်တယ်။ အခုထပ်ပြီး ဒီလိုမျိုး အောက်ကျ နောက်ကျ အဖြစ်မခံနိုင်တော့ဘူး။ ကျနော်တို့တတွေက ဒီဟာကို ဒီအချိန်မှာ မတော်လှန်ခဲ့ရင် ကျနော်တို့တတွေရဲ့ သားစဉ်မြေးဆက်၊ ကျနော်တို့ ပအိုဝ်းအမျိုးသားတွေ အပါအဝင် ဒီမှာမှီတင်းနေထိုင်ကြတဲ့ မြန်မာနိုင်ငံသားတွေ အားလုံး အစဉ်အဆက် ခေါင်းမမော်နိုင်တဲ့ ပညာမတတ်တဲ့ လူတွေ ဖြစ်ကုန်မှာကို စိုးရိမ်တဲ့ အတွက် အဖြစ်မခံနိုင်လို့ ဒီနေ့ တော်လှန်ရေး ကျနော်တို့ လုပ်နေတာ ဖြစ်ပါတယ်။ အားလုံးသိတဲ့ အတိုင်းပဲ ကျနော်တို့ဟာ ကမ္ဘာမှာ အဆင့်အနိမ့်ဆုံးနိုင်ငံ ၁၀ နိုင်ငံထဲကို ရောက်ရခြင်းဟာ ဒါကြောင့်ပဲ ဖြစ်ပါတယ်” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက် တပ်မ‌တော်က အာဏာယူပြီးနောက် ဆန့်ကျင်ဆန္ဒပြမှုနှင့်အတူ လက်နက်ကိုင် တော်လှန်ရေးကို ဆင်နွှဲခဲ့ကြသည်။

ပအိုဝ်းအမျိုးသား ဖက်ဒရယ်ကောင်စီ(PNFC) သည် ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO) တွင် ဥက္ကဋ္ဌနှင့် ဒုဥက္ကဋ္ဌများအဖြစ် တာဝန် ထမ်းဆောင်ခဲ့သော ခွန်မြင့်ထွန်းက ဥက္ကဋ္ဌအဖြစ် တာဝန်ယူ ဖွဲ့စည်းထားသည့် အရပ်ဖက်အင်အားစု တစ်ရပ် ဖြစ်သည်။

CNI News

၂၀၂၂ ခုနှစ်၊ စက်တင်ဘာ ၂၃

ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO/PNLA)၏ တပ်ဖွဲ့ဝင်များကို ပအိုဝ်းပြည်သူ့စစ်အဖွဲ့ (PNO/ PNA) မှ ဖမ်းဆီးသတ်ဖြတ်ခဲ့သည့်ကိစ္စ ဖြေရှင်းပြီးပြီဟု PNO မှ ဒုတိယကွပ်ကဲရေးမှူး ဒုဗိုလ်မှူးကြီး ခွန်ထွန်းရွှေ က CNI သတင်းဌာနသို့ ပြောသည်။

ရှမ်းပြည်နယ်(တောင်ပိုင်း)၊ ပအိုဝ်းကိုယ်ပိုင်အုပ်ချုပ်ခွင့်ရဒေသ၊ ပင်လောင်းမြို့နယ်၊ ပင်မွန်းကျေးရွာအုပ်စု၊ ဝါးပြုံး ကျေးရွာတွင် PNLO/PNLA တပ်ဖွဲ့ဝင် ၅ ဦးကို PNO/PNA မှ ဖမ်းဆီးခေါ်ဆောင်၍ သတ်ဖြတ်ခဲ့ခြင်း ဖြစ်သည်။

ဒုတိယဗိုလ်မှူးကြီး ခွန်ထွန်းရွှေက “အားလုံး အဆင်ပြေသွားပါပြီဗျ၊ လိုအပ်တာတွေလည်း ကျနော်တို့ လုပ်ပေး လိုက်ပါပြီဗျ၊ သူတို့ ကျေနပ်တဲ့ဟာတွေပေါ့၊ နှစ်ဦးနှစ်ဖက်ကျေနပ်တဲ့ ကျနော်တို့ စစ်ရေးကိစ္စရော၊ လူမှုရေးကိစ္စ ရောပေါ့၊ အားလုံး ကျနော်တို့ နှစ်ဦးနှစ်ဖက် ညှိနှိုင်းပြီး ပြေလည်သွားပါပြီခင်ဗျ” ဟု CNI သတင်းဌာနသို့ ပြောသည်။

အဆိုပါကိစ္စမျိုး နောက်နောင် မဖြစ်စေရေး ပိုမိုကျစ်လစ်သည့် ဆက်ဆံရေးဌာနမှတဆင့် တာဝန်ယူမှု၊ တာဝန်ခံမှုရှိရန် နှစ်ဖက်အဖွဲ့အစည်းက တာဝန်ယူထားကြောင်း ၎င်းက ပြောသည်။

မိမိတို့ ပအိုဝ်းဒေသကို စစ်ဘေးစစ်ဒဏ် မခံရစေရေး အဖွဲ့အစည်းများ အားလုံးနှင့် ငြိမ်းငြိမ်းချမ်းချမ်းဖြစ်ရန် ကြိုးစားနေကြောင်း ဒုဗိုလ်မှူးကြီး ခွန်ထွန်းရွှေက ပြောသည်။

PNLO/PNLA စစ်သားတစ်ဦးကိုတွေ့ရစဉ် 

၎င်းက “ကျနော်တို့ကတော့ ငြိမ်းငြိမ်းချမ်းချမ်း အေးအေးချမ်းချမ်းပဲနေပြီး ကျနော်တို့ ဒေသတည်ငြိမ်အေးချမ်း အောင် ကျနော်တို့ နယ်မြေလူထုတွေ မခံရအောင်ပေါ့၊ ကျနော်တို့ကတော့ တတ်နိုင်တဲ့ဘက်ကနေပြီး အဖွဲ့အစည်း တွေ အားလုံးကို ငြိမ်းငြိမ်းချမ်းချမ်း ဖြစ်အောင်တော့ ကျနော်တို့ ကြိုးစားနေတယ်ပေါ့နော်၊ ကြိုးစားတယ်၊ ဖြစ် အောင်လည်း ကျနော်တို့ ညှိနှိုင်းတယ်ပေါ့နော်၊ ဘယ်လိုပဲ ဖြစ်ဖြစ်ပေါ့နော်၊ ကျနော်တို့ ဒေသ၊ ကျနော်တို့ မိဘ ပြည်သူတွေ စစ်ဘေးစစ်ဒဏ် မဖြစ်အောင်တော့ ကျနော်တို့ ကြိုးစားနေပါတယ်” ဟု ပြောသည်။

PNLO/PNLA သည် တစ်နိုင်ငံလုံး အပစ်အခတ်ရပ်စဲရေး သဘောတူစာချုပ် (NCA) လက်မှတ်ရေးထိုးထားသော ပအိုဝ်းလက်နက်ကိုင် အဖွဲ့ဖြစ်ပြီး ရှမ်းပြည်နယ်(တောင်ပိုင်း) ဆီဆိုင်၊ ဟိုပုန်း၊ မောက်မယ် ဒေသများတွင် လှုပ်ရှား လျက်ရှိသည်။

PNO/PNA သည် ၁၉၉၁ ခုနှစ်က တပ်မတော်နှင့် ငြိမ်းချမ်းရေး ရယူခဲ့ပြီးနောက် ပအိုဝ်းဒေသကို အထူးဒေသ ၆ အဖြစ် သတ်မှတ်ပေးကာ ကိုယ်ပိုင်အုပ်ချုပ်ခဲ့သည်။

ထို့နောက် ၂၀၁၀ ခုနှစ်တွင် ပအိုဝ်းပြည်သူ့စစ်အဖွဲ့/ပအိုဝ်းအမျိုးသားတပ်မတော်(PNO/PNA)အဖြစ် ပြောင်းလဲခဲ့ သလို ပြည်ထောင်စုရွေးကောက်ပွဲကော်မရှင်မှာလည်း ပအိုဝ်းအမျိုးသားအဖွဲ့ချုပ်(PNO)နာမည်ဖြင့် နိုင်ငံရေးပါတီ အနေနှင့် မှတ်ပုံတင်ခဲ့သည်။

CNI News

၂၀၂၂ ခုနှစ်၊ စက်တင်ဘာ ၂၂

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP)ဥက္ကဋ္ဌ တာဝန် လွှဲပြောင်းမှုမှာ ၎င်းတို့ အစိုးရတစ်ရပ် ဖြစ်သည့် အခါ အကြီးဆုံးရာထူးကို လျာထားခြင်း ဖြစ်နိုင်ကြောင်း ပအိုဝ်းအမျိုးသားအဖွဲ့ချုပ်မှ စောခွန်ကျော်ဝင်းက CNI သတင်းဌာနသို့ ပြောသည်။

၎င်းတို့၏ မူဝါဒအတိုင်း အမှုဆောင်အသစ်များ ပြန်လည်ရွေးချယ်ခြင်းလည်း ဖြစ်နိုင်ကြောင်း၊ မိမိ၏ တစ်ဦးတည်း အမြင်အရ အကြီးဆုံးရာထူးကို လျာထားခြင်း ဖြစ်နိုင်ကြောင်း ၎င်းက ပြောသည်။

စောခွန်ကျော်ဝင်းက “အဲဒါကတော့ သူတို့ လာမယ့်‌ရွေးကောက်ပွဲ လုပ်ဖြစ်မယ်ဆိုရင် သူတို့ ဘယ်နိုင်ငံရေးပါတီ မဆို သူတို့ လျာထားတာ ရှိမှာပေါ့နော်၊ ဒါတော့ သူတို့ အတွင်းရေး ကျနော်တို့ လောလောဆယ်တော့ မခန့်မှန်းနိုင် ဘူးပေါ့နော်၊ ဒါပေမဲ့ များသောအားဖြင့် ဘယ်ပါတီ၊ ဘယ်အဖွဲ့အစည်းမဆို ဥက္ကဋ္ဌ ဖြစ်တဲ့လူကတော့ ဒါသူတို့ပေါ့ နော် ဥပမာ အစိုးရတစ်ရပ် ဖြစ်လာတဲ့အခါ ဒီအတွင်းမှာ အကြီးဆုံးရာထူးကို လျာထားတာတော့ များတာပေါ့နော်၊ ဖြစ်နိုင်ချေများတာပေ့ါနော်” ဟု CNI သတင်းဌာနသို့ ပြောသည်။

ပြီးခဲ့သည့် စက်တင်ဘာ ၂၀ ရက်နေ့က ကျင်းပခဲ့သော USDP ပါတီ၏ အစည်းအဝေးအပြီး ဥက္ကဋ္ဌ ဦးသန်းဋ္ဌေးသည် ပါတီဥက္ကဋ္ဌတာဝန်ကို ဒုဥက္ကဋ္ဌ(၂) ဦးခင်ရီထံ လွှဲပြောင်းပေးအပ်ခဲ့ခြင်းဖြစ်ကြောင်း သိရသည်။

ဦးသန်းဋ္ဌေးမှာ ကျန်းမာရေး အခြေအနေများကြောင့် USDP ပါတီဥက္ကဋ္ဌ တာဝန်ကို လွှဲပေးလိုက်ခြင်းဟု ယူဆ ကြောင်း နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

ဦးခင်ရီနဲ့ ဦးသန်းဋ္ဌေးကိုတွေ့ရစဉ် 

၎င်းက “သူတို့ ကြေညာထားတာတော့ ကျန်းမာရေးကြောင့်လို့ ပြောတာပဲ။ လာမယ့် မကြာခင် အောက်တိုဘာလ ထဲလား မသိဘူး။ သူတို့ ပါတီညီလာခံ လုပ်ဖို့ရှိတယ်လေ၊ အဲဒီတော့ ပါတီညီလာခံမှာကြတော့ ခေါင်းဆောင် အသစ်တွေ ပြန်ရွေးရမှာ အဲဒီတော့ ဒီကြားထဲမှာ အဲဒီပါတီညီလာခံ ကျင်းပဖို့ ပြင်ဆင်တာ၊ ဒီခေါင်းဆောင်သစ် ရွေးချယ်မှုအတွက် ပြင်ဆင်တာတွေ လုပ်ဖို့အတွက် နောက် သူ့နဂိုကလည်း ကျန်းမာရေး ခါးခွဲထားရတယ်လို့ ကြားတယ်၊ အဲဒါတွေကြောင့် တာဝန်လွှဲပေးလိုက်တာလို့ အဲဒီလို ယူဆတာပဲ” ဟု ပြောသည်။

ဦးခင်ရီသည် နစက၏ ပြည်ထောင်စုဝန်ကြီးအဖြစ် တာဝန် ယူခဲ့ပြီးနောက် ၂၀၂၂ ခုနှစ်၊ သြဂုတ်လမှာ တာဝန်က အနားယူပြီး ပါတီလုပ်ငန်းတာဝန်များကို ပြန်လည်ရယူခဲ့ခြင်း ဖြစ်သည်။

တချို့ကတော့ ဦးခင်ရီသည် နစက ကျင်းပပေးမည့် ရွေးကောက်ပွဲတွင် USDP အနိုင်ရပါက အစိုးရဖွဲ့စည်းသည့် အခါ သမ္မတ သို့မဟုတ် ဒုသမ္မတအဖြစ် မြင်တွေ့လာရနိုင်ကြောင်း နိုင်ငံရေးသုံးသပ်သူများကြား ထင်ကြေးပေး နေကြသည်။

လက်ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)တွင် ဗဟိုအလုပ်အမှုဆောင် ကော်မတီဝင် ၄၂ ဦး၊ ဗဟိုကော်မတီ ဝင် ၂၇၅ ဦးနှင့် အရံ ဗဟိုကော်မတီဝင် ၇၅ ဦးရှိကြောင်း သိရသည်။

CNI News

၂၀၂၂ ခုနှစ်၊ စက်တင်ဘာ ၂၂

ရခိုင်ပြည်နယ် မြောက်ပိုင်းဒေသများတွင် တပ်မတော်နှင့် ရက္ခိုင့်တပ်တော် ULA/AA တို့အကြား တိုက်ပွဲ ဖြစ်ပွားခြင်းနှင့် စစ်ရေးတင်းမာမှုတို့ကြောင့် ကန့်သတ်ပိတ်ပင်မှု အများအပြားရှိလာသဖြင့် ဒေသခံများမှာ စားဝတ်နေရေးအပါအဝင် ဘက်ပေါင်းစုံ၌ ဒုက္ခကြုံတွေ့နေကြရသည်ဟု ရခိုင်ပြည်သူများထံမှ သိရသည်။

ယခုကဲ့သို့ ကန့်သတ်ပိတ်ပင်ခြင်းများ လုပ်ဆောင်ခြင်းသည် ပြည်သူများ အဆင်ပြေပါက AA အဆင်ပြေသည်ဟု မှတ်ယူပြီး ဒေသခံပြည်သူများအား ပိတ်ပင်ခြင်းဖြစ်သည်ဟု ရခိုင်ပြည်နယ် မြောက်ဦးမြို့ဒေသခံ ကိုဇော်ထွန်းက CNI သတင်းဌာနသို့ ပြောသည်။

“မြောက်ဦးမြို့ကတော့ နေရာပေါင်းစုံမှာ သူတို့အစစ်အဆေးတွေ လုပ်တယ်။ ကားရော၊ ဆိုင်ကယ်ရော၊ လူရော။ စီးပွားရေးကအစ နေထိုင်ရေးကအစ သိပ်ဒုက္ခရောက်တယ် ဒီတလောတော့။ ပြေလည်ဖို့ဆိုတာ သိပ်မရှိတော့ဘူး ကြည့်ရတာလေ။ သူတို့ကလည်း နောက်ဆုတ်မယ့် အခြေအနေမျိုး မရှိဘူး။ သူတို့အချင်းချင်း မလုပ်နိုင်တဲ့အခါ ကျတော့ ဒေါက်တိုင်တွေကို သူတို့ဖြုတ်ချချင်တဲ့ သဘောပေါ့။ ဒီပြည်သူတွေ အဆင်ပြေလို့ AA အဆင်ပြေတယ် ပေါ့လေ။ အဲဒီသဘောနဲ့ ဗျူဟာတစ်ခုနဲ့ အဲဒီလိုဒုက္ခပေးတဲ့ပုံစံမျိုးလို့ ကျနော်နားလည်တယ်။ ပြည်သူကတော့ ဆုံးရှုံးစရာမရှိတဲ့အချိန်ကို ရောက်လာပြီ။ ဘာလို့လဲဆိုရင် ကိုယ့်အလုပ် ကိုယ်မလုပ်နိုင်၊ ကိုယ့်စီးပွား ကိုယ်မလုပ် နိုင်၊ ကိုယ့်အိမ်မှာကိုယ် ပျော်ပျော်ရွှင်ရွှင်နဲ့ မိသားစုနဲ့ မနေနိုင်။ ဒါမျိုးက နေ့စဉ်ရက်ဆက်ဆိုသလို ဖြစ်လာတာကို။ ပြည်သူတွေ အခက်အခဲက လမ်းပန်းဆက်သွယ်ရေးကို သူတို့ စစ်ဆေးတာတွေကို ဘာမှမဆိုင်တဲ့နေရာတွေမှာ ဥပမာ မြို့ပေါ် ရပ်ကွက်တွေမှာ သူတို့လုပ်ချင်တိုင်းလုပ်နေတဲ့ ကိစ္စမျိုးတွေကို သူတို့ရပ်တန့်ဖို့လိုတယ်။ ပြီးရင် ကုန်သွယ်ရေးလမ်းကြောင်းတွေကိုလည်း သူတို့ ပြန်ဖွင့်ပေးဖို့လိုမယ်”ဟု ၎င်းက ပြောသည်။

ထို့အပြင် INGO/NGO အဖွဲ့အစည်းများအား ရခိုင်ပြည်နယ်မြောက်ပိုင်းမှ ၆ မြို့နယ်သို့ ကူညီထောက်ပံ့ခြင်းနှင့် ခရီးသွားလာခြင်းကို ကန့်သတ်ထားသည့်အတွက် စားနပ်ရိက္ခာအခက်အခဲများ ကြုံတွေ့နေရကြောင်း ဝံလက် ဖောင်ဒေးရှင်းမှ ဒါရိုက်တာ ဦးခိုင်ကောင်းစံ က CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ လက်ရှိတိုက်ပွဲရှောင်များ၏အခြေအနေ(ဓါတ်ပုံ-သဘာဝနဒီဆရာတော်)

“ဒီလကုန်ရင်တော့ ဘယ်လိုဖြစ်မယ်ဆိုတာတော့ မသိသေးဘူး။ ပြီးခဲ့တဲ့လက ရရှိထားတဲ့ ရိက္ခာတွေ၊ ထောက်ပံ့ ထားတာတွေနဲ့ပဲ အခုလောလောဆယ် စားသောက်နေကြရတာပေါ့။ ပြည်တွင်း အရပ်ဖက် အဖွဲ့အစည်းတွေ ကလည်း မလှူဒါန်းနိုင်ဘူးပေါ့ တကယ်တမ်းပြောရရင်။ အခိုက်အတန့်အားဖြင့်သာ မြို့ပေါ်ရောက်လာတဲ့ IDP တွေလောက်ပဲ လှူဒါန်းနိုင်ကြတာပေါ့။ လှူဒါန်းတယ်ဆိုတာကလည်း အလှူခံလို့ရတဲ့အခါမှပေါ့။ ဒေသမှာ အလှူခံဖို့ဆိုတာကလည်း အခက်အခဲရှိတယ်။ နောက် အရင်တုန်းကတော့ တချို့အဖွဲ့အစည်းတွေ မြို့ပေါ်မှာ အလှူခံတာရှိတယ်။ အဲဒါကတော့ ဟန့်တားတာတွေလည်း ရှိတာပေါ့။ ပြည်ပရောက်နေတဲ့ တိုင်းရင်းသားတွေရဲ့ လှူဒါန်းမှုဆိုတာကလည်း အရင်က ရခိုင်တစ်ခုတည်းဖြစ်တဲ့အခါကျတော့ အကုန်ဝိုင်းပြီးလှူကြတာပေါ့။ အခုကျတော့ နေရာတိုင်းလိုလို ဖြစ်နေတဲ့အခါကျတော့ ပြည်ပကအလှူရှင်တွေရဲ့ အလှူငွေကလည်း ရေရှည် ရပ်တည်လို့ရတဲ့ဟာမဟုတ်ဘူး။ နိုင်ငံတကာ လူသားချင်းစာနာတဲ့အဖွဲ့အစည်းတွေ၊ အရပ်ဖက်အဖွဲ့အစည်းတွေက စနစ်တကျလုပ်ဆောင်တဲ့ နိုင်ငံတကာအဖွဲ့အစည်းတွေနဲ့ ပူးပေါင်းလုပ်ဆောင်မှသာ အဆင်ပြေမယ့်သဘောမှာ ရှိနေတာပေါ့” ဟု ၎င်းက ပြောသည်။

တိုက်ပွဲရှောင်စခန်းများတွင် ဆေးဝါး၊ အဝတ်အထည်စသည်တို့ကအစ ပြတ်လပ်နေသည့်အတွက် လူသားချင်း စာနာထောက်ပံ့မှု အကူအညီတွေ အရေးပေါ်လိုအပ်နေသည့်အတွက်ကြောင့် INGO/NGO အဖွဲ့အစည်းတွေ၊ အရပ်ဖက် လူမှုအဖွဲ့အစည်းများအနေဖြင့် အဖွဲ့လိုက်ဖြစ်စေ၊ လူပုဂ္ဂိုလ်လိုက်ဖြစ်စေ လာရောက်လှူဒါန်းပေးရန် အထူးအလေးထားတိုက်တွန်းလိုကြောင်း AA ပြောရေးဆိုခွင့်ရှိသူ ဦးခိုင်သုခက စက်တင်ဘာ ၁၉ ရက်နေ့က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

လက်ရှိတွင် ရခိုင်ပြည်နယ်အတွင်း ကန့်သတ်ပိတ်ပင်ထားမှုများကြောင့် ဒေသတွင်း၌ ကုန်ဈေးနှုန်းများ မြင့်တက် လျက်ရှိပြီး ယခင်ကထက် နှစ်ဆခန့်မြင့်တက်နေကြောင်း ရခိုင်ပြည်သူများက CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ လက်ရှိတိုက်ပွဲရှောင်များ၏အခြေအနေ(ဓါတ်ပုံ-သဘာဝနဒီဆရာတော်)

မောင်တောဒေသခံ ကိုမောင်မောင်ထွန်းက “ကျနော်တို့ မောင်တောမြောက်ပိုင်း၊ တောင်ပိုင်းပြည်သူတွေ ဘယ်မှ သွားလို့မရဘူး။ စားနပ်ရိက္ခာပိုင်းဆိုင်ရာလည်း တော်တော်လေး အခက်အခဲဖြစ်နေတာပေါ့။ ကျနော်တို့ ဒီနေ့နဲ့ ဆိုရင် တစ်လကျော်လောက်ဖြစ်သွားပြီ။ စကစက လမ်းတွေပိတ်ထားတာလေ။ ဆန်တို့ ဆီတို့ စားကုန်တွေ ဘာမှမသယ်ရဘူး။ စစ်ဖြစ်တဲ့နေရာဆိုရင် စစ်ဖြစ်တဲ့နေရာက စစ်ဘေးရှောင်တွေလည်း ဘယ်မှသွားလို့မရဘူး။ အခုဖြေရှင်းနေရတာက ဟိုဘက် ဒီဘက် မရှိတဲ့လူက ရှိတဲ့လူဆီကနေ တောင်းစား ဒီလိုမျိုးဖြစ်နေတာပေါ့။ ဒီကုန်ဈေးနှုန်းအနေအထားမှာဆိုရင်လည်း တော်တော်လေး ဈေးတက်နေတာပေါ့။ အခုရှိတဲ့လူလည်း ပိုက်ဆံ ပေးပြီးတော့ ဝယ်လို့မရတဲ့ဟာတွေ အများကြီးပေါ့။ ကူညီကယ်ဆယ်ရေးတွေကျတော့လည်း ဘယ်မှ မသွားရဘူး အဲဒီလိုဖြစ်နေတာပေါ့။ကျနော်တို့ ပြည်သူလူထုတွေ လမ်းတွေသွားလာရေး၊ စားဝတ်နေရေး အခက်အခဲကြောင့်နဲ့ ဆန်တို့ ဆီတို့ တင်သွင်းရချင်တာပေါ့နော်။ ဒီလိုဖြစ်နေတာကတစ်ပိုင်း။ ကျနော်တို့ ပြည်သူလူထုက အခု ဒီလိုမျိုး နှိပ်စက်ရာကျနေတာပေါ့” ဟု ပြောသည်။

လက်ရှိတွင် ရခိုင်ပြည်နယ်အတွင်းရှိ မောင်တော၊ ဘူးသီးတောင်၊ ရသေ့တောင်၊ ကျောက်တော်၊ မြောက်ဦးနှင့် ချင်းပြည်နယ် ပလက်ဝမြို့နယ်တို့၌ တပ်မတော်နှင့် AA အကြား နှစ်ဖက်တိုက်ပွဲဖြစ်ပွားမှုများရှိနေကြောင်း ရခိုင်ပြည်နယ်အခြေစိုက်သတင်းဌာနများ၏ ရေးသားဖော်ပြချက်များအရ သိရသည်။

၎င်းတိုက်ပွဲများကြောင့် နေရပ်စွန့်ခွာကာ ဘေးလွတ်ရာသို့ ထွက်ပြေးတိမ်းရှောင်လာကြသည့် တိုက်ပွဲရှောင် ဦးရေ မှာလည်း ပိုမိုများပြားလာကာ လက်ရှိအချိန်ထိ တိုက်ပွဲရှောင် တစ်သောင်းကျော်ခန့် ရှိလာကြောင်း အရပ်ဖက် အဖွဲ့အစည်းများ၏ စာရင်းများအရ သိရသည်။

ဒေသခံများ ထွက်ပြေးတိမ်းရှောင်ကြရာတွင် ယခင်ရှိနေသည့် တိုက်ပွဲရှောင်စခန်းများသို့ ထွက်ပြေးတိမ်းရှောင်သူ များ ရှိသကဲ့သို့ အနီးရှိ ဘုန်းကြီးကျောင်းများ၊ စာသင်ကျောင်းများသို့ ထွက်ပြေးတိမ်းရှောင်သူများလည်းရှိကြောင်း အရပ်ဖက်အဖွဲ့အစည်းများထံက သိရသည်။