CNI International News

ဝါရှင်တန်၊ ဇူလိုင် ၂

အမေရိကန်နိုင်ငံသား ၂၉ ရာခိုင်နှုန်းကသာ သမ္မတဂျိုးဘိုင်ဒန်ကို ၂၀၂၄ ရွေးကောက်ပွဲ၌ ပြန်လည် ရွေးချယ်ခံရစေလိုကြောင်း ဝါရှင်တန်ဒီစီအခြေစိုက် The Hill မီဒီယာက ဇူလိုင် ၁ ရက်၌ ဖော်ပြခဲ့သော စစ်တမ်းတစ်စောင်ကို အာရ်တီသတင်းဌာနက ရေးသား ဖော်ပြခဲ့သည်။

တစ်ချိန်တည်းမှာပင် အဆိုပါစစ်တမ်း ဝင်ရောက်ဖြေဆိုသူ ၇၁ ရာခိုင်နှုန်းတို့သည် အိမ်ဖြူတော်၌ ဘိုင်ဒန်၏ ဒုတိယ သက်တမ်းအတွက် မလိုလားကြကြောင်း တွေ့ရှိရသည်ဟု သိရသည်။

ဒီမိုကရက်တစ်ပါတီမှ သမ္မတဖြစ်လာသူ အသက် ၇၉ နှစ်ရှိ ဂျိုးဘိုင်ဒန်ကို ၎င်းစစ်တမ်းတွင် ဝင်ရောက်ဖြေဆိုသူ အားလုံး၏ ၃၈ ရာခိုင်နှုန်းကသာ ထောက်ခံခဲ့သည်။

ဟားဘတ် CAPS-ဟားရစ် အမည်ရှိ ၎င်းစစ်တမ်းကို အမေရိကန်ပြည်သူ ၁,၃၀၈ ဦးအား ဇွန်လ ၂၈ ရက်နှင့် ၂၉ ရက်တွင် ဝင်ရောက်ဖြေဆိုစေပြီး ကောက်ယူပြုစုခဲ့ခြင်းဖြစ်ကြောင်း The Hill က ဖော်ပြခဲ့သည်။

ဘိုင်ဒန်ကို ပြန်လည် အရွေးမခံသင့်ကြောင်း သဘောထား မှတ်ချက် ပေးသူများအနက် ၄၅ ရာခိုင်နှုန်းက သမ္မတ၏ လုပ်ရပ် များ မကောင်း၍ဖြစ်ကြောင်း ပြောကြားခဲ့ကြသည်။

စစ်တမ်းဖြေဆိုသူ လေးပုံသုံးပုံတို့က သမ္မတသည် အသက်ကြီးလွန်သည်ဟု ပြောကြပြီး ကျန်လေးပုံ တစ်ပုံတို့ကတော့ ထိပ်ဆုံးမှ အပြောင်းအလဲအတွက် အချိန်တန်ပြီဟု မှတ်ချက်ချကြသည်။

“သမ္မတ ဘိုင်ဒန်က ပြန်အရွေးခံချင်ပေမယ့် ဒုတိယသက်တမ်းအတွက် မဲဆန္ဒရှင်တွေက မလိုလားကြဘူး။ သူ သမ္မတလုပ်နေ တာကို ပျစ်ပျစ်နှစ်နှစ် ဝေဖန်ကြတာ ရှိတယ်” ဟု ဟားဘတ် CAPS- ဟားရစ်စစ်တမ်းကောက်ယူသည့်အဖွဲ့မှ တွဲဖက် ဒါရိုက်တာဖြစ်သူ မာ့ခ်ပင်း (Mark Penn) က ပြောကြားခဲ့သည်။

ဘိုင်ဒန်နဲ့ ဒေါ်နယ်ထရမ့်ကိုတွေ့ရစဉ်(GETTY IMAGES)

“ဒီမိုကရက်တစ်ပါတီ ထဲမှာလည်း ၃၀ ရာခိုင်နှုန်းလောက်ပဲ သမ္မတလောင်း နေရာအတွက် သူ့ကို မဲပေးကြမှာ” ဟု မာ့ခ်ပင်းက ဆက်လက် ပြောကြားခဲ့သည်။

ဘိုင်ဒန်ကို ထောက်ခံသူ ၃၈ ရာခိုင်နှုန်းသာရှိသော အဆိုပါစစ်တမ်းတွင် ဘိုင်ဒန်လက်ထက် အမေရိကန်၏ စီးပွားရေးသည် ၃၂ ရာခိုင်နှုန်းသာ တိုးတက်မှုပြီး ငွေကြေးဖောင်းပွမှုမှာ ၂၈ ရာခိုင်နှုန်းအထိ ဖြစ်လာ၍ ပိုမိုဆိုးရွားလာကြောင်း ပြသခဲ့ကြသည်။

သို့သော် ဘိုင်ဒန်သည် အလုပ်အကိုင် ဖန်တီးရေးအတွက် ၄၃ ရာခိုင်နှုန်း ထောက်ခံမှုရခဲ့ပြီး ကပ်ရောဂါ ကိုင်တွယ် ဖြေရှင်းနိုင် စွမ်းအတွက် ၅၀ ရာခိုင်နှုန်း ထောက်ခံမှု ရခဲ့သည်။

ဘိုင်ဒန်နှင့် ထရမ့်တို့အကြား ရွေးချယ်စရာ ဖြစ်လာသည့်အခါ ယခုစစ်တမ်းတွင် ဖြေဆိုသူ ၆၀ ရာခိုင်နှုန်းက ၎င်းတို့နှစ်ဦး အစား အလယ်အလတ်ကျပြီး လွတ်လပ်သော ကိုယ်စားလှယ်လောင်းကို ဦးစားပေး စဉ်းစားမည်ဟု ပြောကြားခဲ့ကြသည်။

အဆိုပါ ရပ်တည်ချက် သဘောထားကို ဒီမိုကရက်တစ် ၆၄ ရာခိုင်နှုန်းနှင့် ရီပက်ဘလစ်ကန် ၅၃ ရာခိုင်နှုန်းတို့ကို စစ်တမ်း ကောက်ယူရာတွင် ပြောကြားခဲ့ကြခြင်းဖြစ်သည်။

ဟားဘတ်တက္ကသိုလ်ရှိ အမေရိကန်နိုင်ငံရေး လေ့လာမှုစင်တာနှင့် ဟားရစ်သုတေသနအဖွဲ့တို့က ယခုစစ်တမ်း ရလဒ် အပြည့် အစုံကို ထုတ်ပြန်ခြင်း မရှိသေးသော်လည် တစိတ်တပိုင်းအားဖြင့် The Hill က ရေးသားဖော်ပြခဲ့ခြင်းဖြစ်ကြောင်း သိရသည်။

Source: အာရ်တီသတင်းဌာန

CNI International News

မော်စကို၊ ဇူလိုင် ၂

ရုရှားသမ္မတ ဗလာဒီမာပူတင်သည် အိန္ဒိယဝန်ကြီးချုပ် နရိန္ဒရာမိုဒီထံသို့ ဇူလိုင်လ ၁ ရက်၌ တယ်လီဖုန်းဖြင့် ဆက်သွယ်၍ ကမ္ဘာ့စားနပ်ရိက္ခာပြဿနာများ ဖြစ်ပေါ်စေခဲ့သော နိုင်ငံအများအပြား၏လုပ်ရပ်များအကြောင်း ဆွေးနွေးပြောကြားခဲ့သည် ဟု ကရင်မလင်သမ္မတနန်းတော်က သတင်းထုတ်ပြန်ခဲ့သည်။

“နိုင်ငံအတော်များများမှာ စားသောက်ကုန်တွေ လွတ်လွတ်လပ်လပ် ကုန်သွယ်တာအနှောင့်အယှက်ဖြစ်စေတဲ့အတွက် ဈေးနှုန်းတွေ သိသိသာသာ တက်ခဲ့တာကို ပူတင်က ပြောခဲ့ပါတယ်။ ရုရှားနိုင်ငံအပေါ် ဥပဒေမဲ့ ပိတ်ဆို့အရေးယူမှုတွေက အခြေအနေတွေကို ပိုဆိုးစေခဲ့တယ်လို့လည်း ပြောခဲ့ပါတယ်” ဟု ကရင်မလင်ထုတ်ပြန်ချက်ကို ကိုးကားလျက် တာ့စ်သတင်းဌာနက ရေးသားဖော်ပြသည်။

တစ်ချိန်တည်းမှာပင် ရုရှားသည် ယုံကြည်စိတ်ချရသော စပါး၊ ဓာတ်မြေဩဇာနှင့် စွမ်းအင်များ ထုတ်လုပ်သူအဖြစ် ဆက်လက် တည်ရှိနေကြောင်း ပူတင်က အလေးပေး ပြောကြားခဲ့သည်။

ကမ္ဘာ့စားနပ်ရိက္ခာ ဈေးကွက် (GETTY IMAGES)

“ရုရှားဟာ အိန္ဒိယ မိတ်ဖက် အပါအဝင် စပါး၊ ဓာတ်မြေဩဇာနဲ့ စွမ်းအင်ကဏ္ဍမှာ ယုံကြည်စိတ်ချရတဲ့ ထုတ်လုပ်သူနဲ့ ပံ့ပိုးသူ အဖြစ် ဆက်ရှိနေတဲ့အကြောင်း ပူတင် အလေးထား ပြောကြားခဲ့ပါတယ်” ဟု ကရင်မလင် ထုတ်ပြန်ချက်ထဲတွင် ဆက်လက် ဖော်ပြထားသည်။

ခေါင်းဆောင်နှစ်ဦးတို့သည် ပုဂ္ဂိုလ်ရေးအရ အဆက်အသွယ်အပြင် အခြားသော အဆင့်များ၌ အပြန်အလှန်ဆက်ဆံရေး စဉ်ဆက်မပြတ် ထားရှိသွားကြရန် သဘောတူ လက်ခံခဲ့ကြကြောင်း သိရသည်။

Source: တာ့စ်သတင်းဌာန

CNI International News

ကွီတို၊ ဇူလိုင် ၁

သီတင်းနှစ်ပတ်ကျော်ကြာ ဆန္ဒပြမှုများ အဆုံးသတ်ရန်အတွက် အီကွေဒေါအစိုးရနှင့် ဌာနေတိုင်းရင်းသားအဖွဲ့များ သဘောတူ ညီမှု ရရှိသွားပြီဖြစ်ကြောင်း တိုင်းရင်းသားခေါင်းဆောင်များက ပြောကြားသည်ဟု ရိုက်တာက ရေးသားခဲ့သည်။

သမ္မတ ဂွါလာမိုလက်ဇို၏ လူမှုရေးနှင့် စီးပွားရေး မူဝါဒကို မကျေနပ်သဖြင့် ဆန္ဒပြမှုများ အီကွေဒေါပြည်တွင်း၌ ဖြစ်ပွားခဲ့ရာ လူ ၈ ဦးထက်မနည်း သေဆုံးခဲ့ရသည်။

ဌာနေတိုင်းရင်းသား လူမျိုးစုဖက်ဒရယ်ကောင်စီ (CONAIE) က စီစဉ်သည့် ဆန္ဒပြပွဲများသည် ဇွန်လ ၁၃ ရက်မှ စတင်၍ အီကွေဒေါနိုင်ငံ အနှံ့အပြား ကူးစက်ဖြစ်ပွားခဲ့ပြီး လောင်စာဆီဈေးနှုန်း လျှော့ပေါ့ရေး၊ သတ္တုတွင်းနှင့်ရေနံလုပ်ငန်း ထပ်မံ တိုးချဲ့မှုအပေါ် ကန့်သတ်ချက်များ ပယ်ဖျက်ရေးတို့ကို ဆန္ဒပြသူများက တောင်းဆိုခဲ့ကြသည်။

ဆန္ဒပြမှု ဖြစ်ပွားခြင်းနှင့်အတူ အီကွေဒေါနိုင်ငံတွင် အစားအသောက်နှင့် ဆေးဝါး ပြတ်လပ်မှုများရှိနေခဲ့ပြီး အဓိက ရေနံ လုပ်ငန်းများ ဆိုးရွားစွာ ထိခိုက်နေခဲ့ရာ ဒေါ်လာ ၂၁၃ သန်းအထိ ဆုံးရှုံးခဲ့ရကြောင်း အစိုးရစွမ်းအင်ဝန်ကြီးဌာန၏ ထုတ်ပြန် ချက်အရ သိရသည်။

“ကျနော်တို့အားလုံး လိုလားတောင့်တဲ့ အမြင့်ဆုံး တန်ဖိုးတစ်ခု ရခဲ့ပါပြီ။ ငြိမ်းချမ်းရေးရပါပြီ” ဟု သမ္မတ လက်ဇိုက ဆန္ဒပြပွဲ များ အဆုံးသတ်သွားခြင်းကို ဂုဏ်ပြုရေးသားထားသည့် တွတ်စ်တာပို့စ်တွင် ပြောကြားခဲ့သည်။

ရရှိလာသော သဘောတူညီချက်၏ တစိတ်တပိုင်းအားဖြင့် အစိုးရက ယခင်ဓာတ်ဆီဈေးက တစ်ဂါလံလျှင် ၁၀ ဆင့်အထိ လျှော့ချပေးခဲ့ပြီး ဒီဇယ်ကိုလည်း တစ်ဂါလံ ၅ ဆင့် လျှော့ရောင်းပေးဖို့ သဘောတူခဲ့သည်။

အီကွေဒေါဆန္ဒပြမှုများ (Reuters)

ဓာတ်ဆီနှင့်ဒီဇယ် နှစ်မျိုးစလုံးအတွက် စုစုပေါင်း ဈေးနှုန်း ၁၅ ဆင့် လျှော့ရောင်းပေးနိုင်ရန်အတွက် တစ်နှစ်လျှင် ဒေါ်လာ သန်း ၃၄၀ ခန့် စိုက်ထုတ်ရမည်ဖြစ်ကြောင်း ဘဏ္ဍာရေးဝန်ကြီးဌာနက ပြောသည်။

ယခု သဘောတူညီချက်အရ အစိုးရပိုင် ပက်ထရို အီကွေဒေါ ကုမ္ပဏီ၏ Oriente ရေနံစိမ်း တင်ပို့မှုအတွက် ဇူလိုင် ၇ ရက် နောက်ဆုံးထား၍ အင်အားသုံးစွဲမည့် ကြေညာချက်ကို ရုပ်သိမ်းနိုင်မည်ဖြစ်ကြောင်း ကုမ္ပဏီအမှုဆောင် တာဝန်ရှိသူတစ်ဦးက ရိုက်တာ သတင်းဌာနသို့ ရှင်းပြသည်။

ဆန္ဒပြမှုများ ဖြစ်ပေါ်နေစဉ်အတွင်း နေ့စဉ် ရေနံထုတ်လုပ်မှု ယခင်ကာလများထက် ထက်ဝက်ကျော် လျော့ကျခဲ့ရသည်။

တစ်ချိန်တည်းမှာပင် ဓာတ်အားပေး စက်ရုံတစ်ရုံလည်း ပြန်လည် လည်ပတ်နေပြီဟု စွမ်းအင်ဝန်ကြီးဌာနက ပြောကြားခဲ့ သည်။ အဆိုပါ စက်ရုံ လည်ပတ်နိုင်ခြင်းမှာ ဆန္ဒပြမှုများကြောင့် ၉ ရက်ကြာ ဆိုင်းငံ့ခဲ့ရသော စွမ်းအင်ဝန်ဆောင်မှုအတွက် နောက်ထပ် ခြေလှမ်းတစ်ရပ် ဖြစ်သည်။

သမ္မတလက်ဇိုက ရေနံစီမံကိန်းများအတွက် ယခင်အမိန့်ကို ဖျက်သိမ်းခဲ့ပြီး သတ္တုတွင်း စီမံကိန်းများအတွက် အလားတူပုံစံ ပြုပြင်ပြောင်းလဲရန် ကမ်းလှမ်းခဲ့သည်။ ထိုပြုပြင်ပြောင်းလဲမှုအတွက် ရပ်ရွာလူထုကိုလည်း အသိပေး ဆွေးနွေးတိုင်ပင်ခွင့် လည်း ပေးအပ်မည်ဖြစ်သည်။

အစိုးရနှင့် ဆန္ဒပြ ခေါင်းဆောင်များသည် ကက်သလစ်ဘုရားကျောင်းမှ ကြားဝင် ဖျန်ဖြေပေးမှုအရ ဆွေးနွေးပွဲများ စတင် နိုင်ခဲ့ခြင်း ဖြစ်သည်။

Source: Reuters

CNI International News

တိုင်ပေ၊ ဇူလိုင် ၁

တရုတ်နိုင်ငံက အနှစ် ၅၀ အထိ အပြောင်းအလဲမရှိဘဲ ရှေ့ဆက်သွားမည်ဟု ကတိပျက်ကွက်ခဲ့သဖြင့် ဟောင်ကောင်၏ လွတ်လပ်မှု ဆိတ်သုဉ်းခဲ့ကြောင်း ထိုင်ဝမ်ဝန်ကြီးချုပ် ဆူဆန်ချန် (Su Tseng-chang) က ယနေ့ (ဇူလိုင် ၁ ရက်) ပြောကြား ခဲ့သည်ဟု ရိုက်တာက ရေးသားဖော်ပြသည်။

ထိုင်ဝမ်ဝန်ကြီးချုပ်သည် ဟောင်ကောင်ကျွန်းကို တရုတ်လက်သို့ လွှဲပြောင်းရောက်ရှိခြင်း ၂၅ နှစ်ပြည့်၌ အထက်ပါ အတိုင်း ပြောကြားခဲ့ခြင်း ဖြစ်သည်။

တရုတ်သမ္မတ ရှီကျင့်ဖျင်သည် ဟောင်ကောင် ခေါင်းဆောင်သစ်ဖြစ်သူ (ယခင် လုံခြုံရေး အကြီးအကဲဟောင်း) ဂျွန်လီနှင့် အတူ ကျမ်းသစ္စာကျိန်ဆိုရန် ဟောင်ကောင်မြို့တော်သို့ ရောက်ရှိနေသည်။ ဂျွန်လီကို အမျိုးသားလုံခြုံရေးဥပဒေနှင့် ပတ်သက် ၍ အမေရိကန်က ဒဏ်ခတ်ပိတ်ဆို့ထားသည်။

တရုတ်က ၎င်း၏ပိုင်နက်ဟု ပြောကြားထားသော ထိုင်ဝမ်ကျွန်းပေါ်ရှိ ပြည်သူအများစုသည် ဘေဂျင်း၏ အုပ်ချုပ်ရေးကို စိတ်မဝင်စားကြောင်း၊ ဟောင်ကောင်နှင့် မကာအိုကျွန်းများကဲ့သို့ ထိုင်ဝမ်ကိုလည်း အုပ်ချုပ်ရန် ဘေဂျင်း၏ “တစ်နိုင်ငံ၊ စနစ်နှစ် မျိုး” ကမ်းလှမ်းချက်ကို ထိုင်ဝမ်အာဏာပိုင်များက အကြိမ်ကြိမ် ပယ်ချခဲ့ကြောင်း ရိုက်တာက ဆက်လက် ရေးသားသည်။

ထိုင်ဝမ်ဝန်ကြီးချုပ် ဆူဆန်ချန်

လွှဲပြောင်းမှု မရှိခဲ့လျှင် ဟောင်ကောင်၏ဘဝသည် ပုံမှန်အတိုင်း လည်ပတ်နိုင်ဦးဖြစ်ကြောင်း တိုင်ပေမြို့တော်၌ သတင်း ထောက်များနှင့် တွေ့ဆုံရာ၌ ဆူဆန်ချန်က မှတ်ချက်ချခဲ့သည်။

“အခု ၂၅ နှစ်ပဲ ရှိသေးတယ်။ အရင်ကတော့ အနှစ် ၅၀ အထိ အပြောင်းအလဲမရှိ အုပ်ချုပ်သွားမယ်လို့ သူတို့ ကတိပေးခဲ့တယ်။ အခုတော့ လွတ်လပ်မှုနဲ့ ဒီမိုကရေစီက ဟောင်ကောင်မှာ ပျောက်သွားပြီလေ” ဟု ၎င်းက ဟောင်ကောင်ကို ရည်ညွှန်းလျက် ထပ်လောင်း ပြောကြားခဲ့သည်။

“ထိုင်ဝမ်ရဲ့ အချုပ်အခြာအာဏာ၊ လွတ်လပ်မှုနဲ့ ဒီမိုကရေစီကို ဘယ်လို ကိုင်စွဲထားရမယ်ဆိုတာ ကျနော်တို့ သိပါတယ်။ တစ် နိုင်ငံ၊ စနစ်နှစ်မျိုးလို့ နာမည်ခံထားတဲ့ တရုတ်ဟာ ဒီစမ်းသပ်မှုကို မခံမရပ်နိုင် ဖြစ်နေပါတယ်” ဟု ဆူဆန်ချန်က ဖြည့်စွက် ပြောကြားခဲ့သည်။

ဟောင်ကောင်တွင် အစိုးရဆန့်ကျင်ရေး ဆန္ဒပြပွဲများ ဖြိုခွင်းခံရပြီးနောက် ပြင်းထန်သည့် အမျိုးသားလုံခြုံရေးဥပဒေကို ပြဋ္ဌာန်းခဲ့ရာ ဒီမိုကရေစီနည်းကျ အုပ်ချုပ်နေသည့် ထိုင်ဝမ်နိုင်ငံတွင် ယင်းလုပ်ရပ်ကို ကျယ်ပြန့်စွာ ရှုတ်ချခဲ့ကြသည်။

ဟောင်ကောင် အုပ်ချုပ်ရေးမှူးနဲ့ ရှီကျင့်ဖျင် (AP)

မြို့တော် တည်ငြိမ်ရေးအတွက် ပြန်လည် ထိန်းကျောင်းရန် ထိုဥပဒေ လိုအပ်ကြောင်း ဘေဂျင်းနှင့်ဟောင်ကောင် အစိုးရတို့ ကတော့ အခိုင်အမာ ပြောကြားနေခဲ့သည်။

ဗြိတိန်သည် ဟောင်ကောင်ကျွန်းကို ၁၉၉၇ ခုနှစ်၊ ဇူလိုင်လ ၁ ရက်တွင် တရုတ်လက်သို့ ပြန်လည်လွှဲပြောင်းခဲ့ရာ ဟောင်ကောင်၏ ကိုယ်ပိုင်အုပ်ချုပ်ခွင့်နှင့် လွတ်လပ်စွာ တရားစီရင်ရေးတို့မှာ တရုတ်ပြည်မကြီး၏ တစ်နိုင်ငံ၊ စနစ်နှစ်မျိုး မူဝါဒအောက်သို့ ကျရောက်သွားခဲ့သည်။

အဆိုပါ လွတ်လပ်ခွင့်များကို ဘေဂျင်းနှင့်ဟောင်ကောင် အာဏာပိုင်များ နင်းချေခဲ့ကြကြောင်း အနောက်အုပ်စု အပါအဝင် တရုတ်အစိုးရကို ဝေဖန်သူများက စွပ်စွဲခဲ့ကြသည်။

တရုတ်သည် ထိုင်ဝမ်ကို ၎င်း၏ အချုပ်အခြာအာဏာကို လက်ခံရန်အတွက် စစ်ရေးနှင့်နိုင်ငံရေး ဖိအားပေး တိုးမြှင့် လုပ် ဆောင်နေသည်။ ထိုင်ဝမ်အစိုးရကတော့ ကျွန်းပေါ်ရှိ ထိုင်ဝမ်သားများကပဲ ၎င်းတို့အနာဂတ် ဆုံးဖြတ်နိုင်သည်ဟု ပြောကြား ထားသည်။

Source: Reuters

CNI International News

နယူးဒေလီ၊ ဇူလိုင် ၁

သီရိလင်္ကာ စီးပွားရေး အကျပ်အတည်းဖြင့် ရင်ဆိုင်နေရခြင်းကြောင့် ဒေသတွင်း အင်အားကြီး နိုင်ငံများဖြစ်သည့် တရုတ်ကို ယှဉ်ပြိုင်နိုင်ရန် အိန္ဒိယအတွက် အခွင့်အရေး ရလာကြောင်း အေပီက ရေးသားဖော်ပြခဲ့သည်။

သီရိလင်္ကာ၏ မဟာဗျူဟာကျ‌သော တည်နေရာသည် ဒေသတွင်း အင်အားကြီး နိုင်ငံများဖြစ်ကြသော တရုတ်နှင့်အိန္ဒိယတို့ကို ဆယ်စုနှစ် တစ်ခုကျော်ကြာ ဆွဲဆောင်ခဲ့ရာ ဘေဂျင်းက သီရိလင်္ကာအပေါ် ချေးငွေစီးဆင်းမှုနှင့် ရင်းနှီးမြှုပ်နှံမှုများဖြင့် ဩဇာ လွှမ်းမိုးလျက် အသာစီးယူခဲ့ကြောင်း ရှုမြင်သုံးသပ်ကြသည်။

သို့သော် သီရိလင်္ကာ စီးပွားရေးပြိုလဲမှုသည် အင်အားကြီး အိန္ဒိယအတွက် နောက်ပြန်လှည့်ကြည့်ရန် အခွင့်အရေး ပေးလာခဲ့ သဖြင့် နယူးဒေလီ(အိန္ဒိယ)အစိုးရက သီရိလင်္ကာထံသို့ ငွေကြေးနှင့်ပစ္စည်းများ ထောက်ပံ့ခဲ့သည်။

“နိုင်ငံတကာ နိုင်ငံရေးက ပရဟိတ ထောက်ပံ့တာမျိုးနဲ့ မတူဘူးပေါ့။ အဓိကရည်ရွယ်တာက အိန္ဒိယရဲ့ နောက်ဖေးပေါက် ကနေ တရုတ်ကို ထွက်ခွာစေပြီး နယူးဒေလီရဲ့ ဟန်ချက်ညီတဲ့ လုပ်ဆောင်ချက် ပြန်သွားဖို့ ရည်ရွယ်ပါတယ်” ဟု အိန္ဒိယနိုင်ငံ၊ ဆိုနီပက်မြို့ (Sonipat) ရှိ အိုပီဂျင်ဒယ် (O.P. Jindal) တက္ကသိုလ်မှ နိုင်ငံတကာလေ့လာရေးဌာန အကြီးအကဲ စရီရမ် ချူလီ ယာ (Sreeram Chaulia) က ပြောကြားခဲ့သည်။

လူဦးရေ ၂၂ သန်းရှိသော သီရိလင်္ကာနိုင်ငံသည် အိန္ဒိယသမုဒ္ဒရာ၏ တောင်ဘက် ကမ်းရိုးတန်းအနီး တည်ရှိခြင်းကြောင့် တရုတ်၏ အရှေ့အလယ်ပိုင်းမှ တင်သွင်းလာသော ရေနံသင်္ဘောများ ဖြတ်သန်းရာ လမ်းကြောင်း ဖြစ်နေသည်။

တရုတ်သမ္မတ ရှီကျင့်ဖျင်၏ ခါးပတ်တစ်ကွင်း၊ လမ်းတစ်စင်း (BRI) အစပျိုးမှုအရ အာရှနှင့် အာဖရိကက အခြေခံ ဆောက်အဦ စီမံကိန်းများတွင် ငွေကြေးသုံးစွဲခဲ့ရာ၌ သီရိလင်္ကာ ဝန်ကြီးချုပ်ဟောင်း မဟိန္ဒာရာဂျာပက်ဆာက တရုတ် ချေးငွေ အမြောက်အမြား ရယူမိခဲ့သည်။

သီရိလင်္ကာဝန်ကြီးချုပ်ဟောင်းမဟိန္ဒာရာဂျာပက်ဆာနဲ့ တရုတ် သမ္မတ ရှီကျင့်ဖျင်ကိုတွေ့ရစဉ် (AP)

ထိုသို့ ချေးငွေယူခြင်းကို ကျွမ်းကျင်သူများက ပယ်ချခဲ့သော်လည်း ဝန်ကြီးချုပ်ဟောင်းက ၎င်း၏ဇာတိ ဟမ်ဘန်တိုတာ (Hambantota) ဒေသတွင် ရေနက်ဆိပ်ကမ်းတစ်ခု တည်ဆောက်ရန်အတွက် ၁ ဒသမ ၁ ဘီလီယံ အပါအဝင် ချေးငွေများ လက်ခံခဲ့သည်။

အဆိုပါ ရေနက်ဆိပ်ကမ်းအတွက် တရုတ်ကို ပြန်ဆပ်ရန် လုံလောက်သည့် နိုင်ငံခြားဝင်ငွေ မရသည့်အခါ ၂၀၁၇ ခုနှစ်တွင် သီရိလင်္ကာက စက်ရုံ၊ အလုပ်ရုံအချို့နှင့် မြေဧက ထောင်ပေါင်းများစွာ ဘေဂျင်း(တရုတ်)လက်ထဲသို့ ၉၉ နှစ်ကြာ ထိုးအပ် လိုက်ရသည်။

ထို့နောက် ဒေသတွင်း ပြိုင်ဘက် အိန္ဒိယနှင့် အနီးကပ်ဆုံးနေရာ၌ တရုတ်သည် ခြေကုပ်စခန်း တစ်နေရာ ရလာခဲ့သည်။

အထူးသဖြင့် သီရိလင်္ကာ၊ နီပေါနှင့် မော်လဒိုက် ကဲ့သို့ နိုင်ငံငယ်များ အပါအဝင် တောင်အာရှဒေသ၌ တရုတ်၏ လွှမ်းမိုးမှု ကြီးထွားလာသဖြင့် အိန္ဒိယအတွက် စိုးရိမ်ပူပန်စရာ ဖြစ်လာစေခဲ့သည်။

နှစ်နိုင်ငံ အငြင်းပွားနေကျဖြစ်သည့် ဟိမဝန္တာ၊ လာဒက် (Ladakh) နယ်စပ်တွင်လည်း အိန္ဒိယနှင့် တရုတ်စစ်သားများ အသေ အပျောက်ရှိခဲ့သော တိုက်ပွဲများကြောင့် ၂၀၂၀ ပြည့်နှစ်တွင် တရုတ်၏ ဒေသတွင်း အားကောင်းလာမှုကို အိန္ဒိယ၏ စိုးရိမ်ပူပန် မှု ပိုမိုနက်ရှိုင်းလာခဲ့သည်။

ရေကြောင်း ချဉ်းကပ်မှု အနေဖြင့် ဘေဂျင်း(တရုတ်)၏ စစ်ရေးအာရုံစိုက်မှုသည် လက်ရှိ တောင်တရုတ်ပင်လယ်နှင့် ပစိဖိတ် သမုဒ္ဒရာဘက်သို့ ရောက်နေသော်လည်း သီရိလင်္ကာနှင့် အိန္ဒိယသမုဒ္ဒရာကို တရုတ်၏ စီးပွားရေးအမြင်မှာ ပိုမို စေ့ဆော်လျက် ရှိကြောင်း လန်ဒန်အခြေစိုက် နိုင်ငံတကာမဟာဗျူဟာလေ့လာရေးသိပ္ပံမှ သုတေသီ ရာဟူးလ်ရွိုင်ချောင်ဒရီ (Rahul Roy-Chaudhury) က ပြောကြားခဲ့သည်။

Source: AP

CNI International News

ကင်ရှာဆာ၊ ဇွန်လ ၃၀

ကွန်ဂိုနိုင်ငံအတွင်းရှိ M23 သူပုန်အဖွဲ့သည် နိုင်ငံ၏ အရှေ့ဘက်ခြမ်းတွင် စစ်ရေးတိုးမြှင့်နေပြီး အစိုးရတပ် အသွင်ယူ လုပ် ဆောင် နေမှုများကြောင့် အရပ်သားများကို အကာအကွယ် ပေးနေသည့် ကုလသမဂ္ဂ (UN) တပ်များအပေါ် ခြိမ်းခြောက်မှု ရှိလာနိုင်ကြောင်း ကွန်ဂိုဆိုင်ရာ UN အထူးသံတမန်က ဇွန်လ ၂၉ ရက်တွင် သတိပေးခဲ့သည်။

M23 သူပုန်များ အပါအဝင် အခြား လက်နက်ကိုင်များနှင့်ပတ်သက်၍ ကွန်ဂိုနှင့်ရဝမ်ဒါ အိမ်နီးချင်းများအကြား စစ်မက်ဖြစ်ပွား လာမည်ကို စိုးရိမ်မှု တိုးနေချိန်၌ ဒေသတွင်း တင်းမာနေမှုများကို ဖြေရှင်းရန် UN သံတမန် ဘင်ဒူးကီတာ (Bintou Keita) က UN လုံခြုံရေးကောင်စီသို့ တိုက်တွန်းခဲ့သည်။

အင်ဂိုလာနိုင်ငံ၏မြို့တော် လွမ်ဒါတွင် အင်ဂိုလာသမ္မတ ဂျိုအာလွမ်ရန်ကိုမှ အိမ်ရှင်အဖြစ် လက်ခံကျင်းပမည့် ထိပ်သီး အစည်းအဝေးတွင် ကွန်ဂိုနှင့် ရဝမ်ဒါတို့၏ သဘောထား ကွဲလွဲမှုများမှုကို ဖြေရှင်းဖို့ အခွင့်အရေးအား အမိအရ ဆုတ်ကိုင်ကြ ရန် ဘင်ဒူးကီတာက ဆက်လက် တိုက်တွန်း ပြောကြားခဲ့သည်။

ရဝမ်ဒါနှင့် နယ်နိမိတ်ချင်း ထိစပ်နေသော ကွန်ဂိုနိုင်ငံ အရှေ့ခြမ်းသည် ဒေသတွင်း သယံဇာတတွင်းထွက် ကြွယ်ဝလှသဖြင့် လက်နက်ကိုင်အဖွဲ့ ဆယ်ဂဏန်းမျှ၏ နေ့စဉ်ခြိမ်းခြောက်မှု ခံနေရသည်။ ယင်းဒေသတွင် လျှပ်စစ် မော်တော်ယာဉ်များ၊ အိတ် ဆောင် ကွန်ပျူတာ (Laptop) နှင့် မိုဘိုင်းလ်ဖုန်းများအတွက် အဓိကလိုအပ်သော သတ္တုပစ္စည်းများကို ထုတ်ယူ၍ ကမ္ဘာသို့ တင်ပို့ရောင်းချနိုင်သည်။

M23 သူပုန်တပ်ဖွဲ့ကိုတွေ့ရစဉ်(AP)

နာမည်ဆိုးဖြင့် ကျော်ကြားသည့် သူပုန်အဖွဲ့များထဲမှ တစ်ဖွဲ့ဖြစ်သော M23 သည် ၂၀၂၂ ခုနှစ်အတွင်း စတင်လှုပ်ရှားနေခဲ့ပြီး ကွန်ဂို အရှေ့ခြမ်းရှိ အရေးပါသော ကုန်သွယ်ရေးမြို့တစ်မြို့ကို ယခုဇွန်လအတွင်း သိမ်းယူခဲ့သည်။
M23 သူပုန်အဖွဲ့ကို ရဝမ်ဒါ ထောက်ခံနေသည်ဟု ကွန်ဂိုအစိုးရက စွပ်စွဲထားပြီး ရဝမ်ဒါကလည်း ထိုစွပ်စွဲချက်ကို ပယ်ချခဲ့ သည်မှာ ကြာပြီဖြစ်သည်။ အဆိုပါ တစ်နိုင်ငံချင်းစီကလည်း မကြာသေးမီက လက်နက်ကိုင်တပ်များ ကျူးကျော် ဝင်ရောက် မှုများနှင့် ပတ်သက်၍ အပြန်အလှန် ပုတ်ခတ်နေခဲ့ကြသည်။

ထို့နောက် ဇွန်လ ၂၀ ရက်က ကင်ညာနိုင်ငံ၏မြို့တော် နိုင်ရိုဘီတွင် အာဖရိကခေါင်းဆောင်များ အစည်းအဝေး ကျင်းပခဲ့ရာ ကွန်ဂိုအရှေ့ခြမ်း ဒေသဆိုင်ရာ တပ်ဖွဲ့အသစ်တစ်ခု ဖြန့်ချ၍ ချက်ချင်း အပစ်အခတ်ရပ်စဲရန် အမိန့်ထုတ်ပြန်ခြင်းအားဖြင့် စစ်ရေးအရ ခြိမ်းခြောက်မှုများကို တုံ့ပြန်ရန် ဆွေးနွေးခဲ့ကြသေးသည်။

“လတ်တလော ပစ်ခတ်တိုက်ခိုက်မှုများအတွင်း M23 အဖွဲ့သည် သမရိုးကျ လက်နက်ကိုင် တပ်ဖွဲ့များထက် အစိုးရတပ် အသွင်ယူ၍ တိုးမြှင့်လှုပ်ရှားနေကြောင်း” လုံခြုံရေးကောင်စီထံသို့ UN အထူးသံတမန် ဘင်ဒူးကီတာက တင်ပြခဲ့သည်။

Source: AP

CNI International News

မနီလာ၊ ဇွန်လ ၃၀

ဖြုတ်ချခံခဲ့ရသည့် အာဏာရှင်ဟောင်း၏ သားဖြစ်သူ ဖာဒီနန်မားကို့စ် ဂျူနီယာသည် မကြာသေးမီက သမိုင်း တလျှောက် အကြီးကျယ်ဆုံးသော နိုင်ငံရေးတကျော့ပြန်မှု အနေဖြင့် ဖိလစ်ပိုင်သမ္မတသစ်အဖြစ် ဇွန်လ ၃၀ ရက် (ယနေ့)တွင် ကျမ်းသစ္စာ ကျိန်ဆိုခဲ့သည်။ သို့သော် ၎င်းမိသားစု၏ ပုံရိပ်ကို အဖြူရောင်ဖြစ်အောင် ဆေးကြော၍ မရတော့ဟု အတိုက်အခံများက ဝေဖန်ခဲ့ကြောင်း အေပီ သတင်းဌာနက ရေးသားဖော်ပြသည်။

စစ်တပ် ကျောထောက် နောက်ခံဖြင့် “ပြည်သူ့အာဏာ” အုံကြွမှုအပြီး ၃၆ နှစ်အကြာတွင် အာဏာရှင်ဟောင်း မားကို့စ် မိသားစု အာဏာ ပြန်ရလာခြင်းသည် ဖခင်ဖြစ်သူ၏ ကမ္ဘာသိ နာမည်ဆိုးကို တွန်းလှန်ခဲ့ခြင်းဖြစ်ကြောင်း၊ အာဏာရှင်ဟောင်း ဖခင် မားကို့စ်လက်ထက် ရက်စက်ကြမ်းကြုတ်စွာ အုပ်ချုပ်ခဲ့မှုကို အမှတ်ရစေခြင်းတို့သည် အာရှတိုက်ရှိ ဒီမိုကရေစီနိုင်ငံ တစ်နိုင်ငံဖြစ်သော ဖိလစ်ပိုင်အတွက် နိုင်ငံရေးအရ တွန်းအားဖြစ်စေခဲ့ကြောင်း သိရသည်။

ဖိလစ်ပိုင်နိုင်ငံတွင် ဖခင်မားကို့စ်လက်ထက် ရက်စက်ကြမ်းကြုတ်မှုများကို အမှတ်ရစေရန်အတွက် အများပြည်သူ အားလပ်ရက်သတ်မှတ်ခြင်း၊ အထိမ်းအမှတ်ပြုလုပ်ခြင်းနှင့် ဖိလစ်ပိုင်ဖွဲ့စည်းပုံအခြေခံပြင်ဆင်ချက်တို့ကို ယခင် အစိုးရများလက်ထက်၌ ထားရှိခဲ့သည်။

ယခုအခါတွင်လည်း ဖခင်လက်ထက် ဆိုးဝါးသောပုံရိပ်များက ထင်ဟပ်နေဆဲဖြစ်၍ မားကို့စ်ဂျူနီယာ၏ သမ္မတ အဖြစ် ကျမ်းသစ္စာကျိန်ဆိုမှုကို ကန့်ကွက်ဆန္ဒပြခြင်းများ ပေါ်ပေါက်လာခဲ့ရာ မနီလာမြို့တော်ရှိ အမျိုးသားပြတိုက် လှေကားထစ်တွင် နေ့လယ်ပိုင်း၌ သပိတ်မှောက်ပွဲ ကျင်းပခဲ့ကြသည်။

ဖိလစ်ပိုင်နိုင်ငံ မနီလာမြို့တွင် ကျင်းပသည့် ရွေးကောက်ခံသမ္မတ၏ ကျမ်းသစ္စာကျိန်ဆိုပွဲသို့ ဆန့်ကျင်လှုပ်ရှားသူများက ဆိုင်းဘုတ်မှာကိုင်ဆောင်ကာ ချီတက်ဆန္ဒပြနေကြစဉ်(ဓါတ်ပုံ-အေပီ)

အာဏာပိုင်များက အဓိကရုဏ်းနှိမ်နင်းရေးလက်နက်ကိုင်တပ်ဖွဲ့များ၊ SWAT ကွန်မင်ဒိုများနှင့် လက်ဖြောင့် (စနိုက်ပါ)သမားများအပါအဝင် ထောင်နှင့်ချီသော လုံခြုံရေးများကို ခရီးသွားလုပ်ငန်းထွန်းကားရာ ကမ်းခြေ ခရိုင်တွင် တင်းကြပ်စွာ ချထားခဲ့ရသည်။

ကျမ်းသစ္စာကျိန်ဆိုသည့်အခမ်းအနားသို့ တရုတ် ဒုတိယသမ္မတ ဝမ်ချီရှန်းနှင့် အမေရိကန်ဒုတိယသမ္မတ ကာမယ် လာဟားရစ်၏ခင်ပွန်း ဒေါက်ကလပ်စ်အမ်ဟော့ဖ် (Doug. Emhoff) တို့လည်း နိုင်ငံတကာဂုဏ်သရေရှိ ဧည့်သည့်တော်များနှင့်အတူ တက်ရောက်ခဲ့ကြသည်။
“ဝိုးးး … ဒါက တကယ်ဖြစ်နေတာလားဗျာ။ ကျနော့်လို စစ်အုပ်ချုပ်ရေးရဲ့ ရာဇဝတ်မှု ကျူးလွန်ခံရတဲ့သူတွေ အတွက် အခုဖြစ်နေပုံတွေက အိပ်မက်ဆိုးတစ်ခုပါပဲ” ဟု အသက် ၇၀ အရွယ်ရှိ တက်ကြွလှုပ်ရှားသူ ဘိုနီဖာစီယို အီလာဂန်က မေးခွန်းထုတ်ခဲ့သည်။ ၎င်းသည် ဖခင်မားကို့စ်အစိုးရလက်ထက်က သောင်းကျန်းသူ နှိမ်နင်းရေး တပ်ဖွဲ့၏ ဖမ်းဆီးခြင်းခံရပြီး ရက်ရက်စက်စက် ညှင်းပန်းနှိပ်စက်ခံခဲ့ရသူဖြစ်သည်။

ယင်းသို့ သမိုင်းဒဏ်ရာဟောင်းများနှင့် ဆန့်ကျင်ဘက်ဝါဒများက ၆ နှစ်တာ သမ္မတကာလအတွင်း ရင်ဆိုင်ရမည့် ဆိုးရွားသောအကျပ်အတည်းများအဖြစ် မားကို့စ်ဂျူနီယာကို ဆီးကြိုလို့နေပြီဖြစ်သည်။

ဖိလစ်ပိုင်သည် ပြီးခဲ့သော နှစ်နှစ်အတွင်း ကိုရိုနာဗိုင်းရပ်စ် ကူးစက်မှု အပြင်းအထန်ခံစားခဲ့ရပြီး သေဆုံးသူ ၆ သိန်း ကျော်ရှိခဲ့ကာ lock down ချခဲ့ရခြင်းကြောင့် ဒုတိယကမ္ဘစစ်နောက်ပိုင်း အနိမ့်ဆုံးစီးပွားရေးကျဆင်းမှု၊ ဆင်းရဲ မွဲတေမှု၊ အလုပ်လက်မဲ့နှင့် ငတ်မွတ်ခေါင်းပါးမှုတို့ ဖြစ်ပေါ်လျက်ရှိသည်။

ယခုနှစ်အစောပိုင်းတွင် ကူးစက်ရောဂါ သက်သာလာခဲ့သော်လည်း ယူကရိန်းသို့ ရုရှားကျူးကျော်စစ်ကြောင့် ကမ္ဘာလုံးဆိုင်ရာငွေကြေးဖောင်းပွမှု တိုးလာခဲ့ပြီး စားနပ်ရိက္ခာပြတ်လပ်လာနိုင်ခြေကို စိုးရွံနေခဲ့ရသည်။

Source: AP

CNI International News

ဒိုဟာ၊ ဇွန်လ ၃၀

ကာတာနိုင်ငံတွင် ပြုလုပ်သည့် အီရန်နှင့် အမေရိကန်ကြားက နျူကလီးယား သဘောတူညီချက် ဆွေးနွေးပွဲသည် တိုးတက် အောင်မြင်မှု မရဘဲ အဆုံးသတ်ခဲ့ကြောင်း သံတမန်များ၏ ပြောကြားချက်ကို ကိုးကားလျက် အေပီက ဇွန်လ ၃၀ ရက်တွင် ရေးသားဖော်ပြသည်။

ကာတာနိုင်ငံ၊ ဒိုဟာမြို့တော်တွင် ကျင်းပပြုလုပ်ခဲ့သည့် ဆွေးနွေးပွဲသည် အောင်မြင်မည့် အရိပ်အယောင် မတွေ့ရဘဲ နှစ်ရက် အကြာတွင် ပျက်ပြားခဲ့သွားကြောင်း၊ ယခုဆွေးနွေးပွဲသည် ဗီယင်နာမြို့ ဆွေးနွေးမှုအပြီးတွင် သဘောတူညီချက် ရရှိရေး ပါဝင် ဆွေးနွေးသည့် အစိတ်အပိုင်းများ ယာယီဆိုင်းငံ့ထားမှုအပေါ် ဆက်လက် ဆွေးနွေးကြခြင်းဖြစ်ကြောင်း အေပီက သတင်း ရေး သားထားသည်။

ဩစတြီးယားနိုင်ငံ၊ ဗီယင်နာမြို့ ဆွေးနွေးပွဲနောက်ပိုင်း အီရန်သည် နိုင်ငံတကာ အဏုမြူ စစ်ဆေးရေးမှူးများ၏ စောင့်ကြည့် ကင်မရာကို ပိတ်ထားခဲ့ကြောင်း၊ ယခုဆက်လက် လုပ်ဆောင်မည်ဆိုလျှင် အနည်းဆုံး နျူကလီးယားဗုံး တစ်လုံးအထိ ထုတ် လုပ်နိုင်သော စွမ်းရည်မြင့် သန့်စင်ပြီး ယူရေနီယံ အလုံအလောက် ရှိနေပြီ ဖြစ်သည်။

ယခု ဆွေးနွေးပွဲ ပျက်ပြားသွားခြင်းအပေါ် အီရန်နှင့် အမေရိကန်တို့က တစ်ယောက်နှင့်တစ်ယောက် အပြန်အလှန် အပြစ်တင် နေကြသဖြင့် နောက်တစ်ကြိမ် ဆွေးနွေးပွဲ မည်သည့်ကာလ ဖြစ်ပေါ်လာမည် (သို့မဟုတ်) ဆက်လက် ဆွေးနွေးရန် ရှိ/မရှိတို့ ကို ရှင်းရှင်းလင်းလင်း မသိရသေးပေ။

ဥရောပသမဂ္ဂ (EU) ကြားဝင်ဖျန်ဖြေသူ အင်ရစ်ကီမော်ရာ(GETTY IMAGES)

ဥရောပသမဂ္ဂ (EU) ကြားဝင်ဖျန်ဖြေသူ အင်ရစ်ကီမော်ရာ (Enrique Mora) က ဒိုဟာမြို့တွင် နှစ်ရက်ကြာ ဆွေးနွေးမှုများမှာ အပြင်းအထန် ဂယက်ထခဲ့သည်ဟု တွစ်တာလူမှုကွန်ရက်တွင် ရေးသားခဲ့သည်။

“ကံမကောင်း အကြောင်းမလှတော့ EU အဖွဲ့ရဲ့ ညှိနှိုင်းရေးမှူး တစ်ယောက်အနေနဲ့ မျှော်လင့်ထားတာထက် တိုးတက်မှု မရခဲ့ ပါဘူး။ နျူကလီးယား မပြန့်ပွားရေးနဲ့ ဒေသတွင်း တည်ငြိမ်ရေးတို့အတွက် အရေးပါတဲ့ သဘောတူညီချက် တစ်ရပ်ရဖို့ လမ်း ကြောင်းမှန်ပေါ်ကို ပြန်တက်နိုင်အောင် ပိုပြီးအာရုံစိုက် လုပ်ဆောင်သွားမှာပါ” ဟု ၎င်းက တွစ်တာ၌ ရေးသားလွှင့်တင် ခဲ့ သည်။

ဆွေးနွေးပွဲအကြောင်း တက်စနင် (Tasnim) သတင်းဌာနမှ တရားဝင် ထုတ်လွှင့်ပြီးနောက် နာရီအပိုင်းအကြာတွင် မော်ရာ၏ သဘောထား မှတ်ချက်များ ထွက်ပေါ်လာခဲ့ခြင်း ဖြစ်သည်။ တက်စနင်သည် အီရန်နိုင်ငံမှ သဘောထား တင်းမာသော တော်လှန်ရေး အစောင့်တပ်ဖွဲ့နှင့် နီးစပ်သော သတင်းဌာနဟု ယူဆရသည်။

အမေရိကန်၏ ရပ်တည်ချက်တွင် မျှော်လင့်ထားသော သဘောတူညီချက်ထံမှ စီးပွားရေးအရ အီရန်အကျိုးရှိစေမည့် အာမခံ ချက် မပါဝင်ကြောင်း အမည်မဖော်လိုသူ သတင်းရင်းမြစ်များကို ကိုးကားလျက် တက်စနင် သတင်းဌာနက ထုတ်လွှင့်ခဲ့သည်။

“ကျနော်တို့နိုင်ငံအတွက် စီးပွားရေးအရ အကျိုးမရှိဘဲ အီရန်ကို ကန့်သတ်ချုပ်ချယ်ဖို့ ဝါရှင်တန်က ယခုသဘောတူညီချက်ကို ပြန်အသက်သွင်းရေး ကြိုးစားနေပါတယ်” ဟု တက်စနင်သတင်းတွင် ဖော်ပြထားသည်။

ဆွေးနွေးမှု ရှေ့ဆက်မတိုးနိုင်သည့် အဓိက အတားအဆီး တစ်ရပ်မှာ အီရန်တော်လှန်ရေး အစောင့်တပ်ဖွဲ့ကို အမေရိကန် ပိတ်ဆို့ အရေးယူမှုဖြစ်ကြောင်း သိရသည်။

Source: AP

CNI International News

မော်စကို၊ ဇွန်လ ၃၀

မြောက်အတ္တလန္တိတ် စစ်စာချုပ်အဖွဲ့(နေတိုး) အနေဖြင့် ဖင်လန်နှင့်ဆွီဒင်တွင် စစ်ရေးအခြေခံ အဆောက်အဦများ လုပ်ဆောင် မည်ဆိုလျှင် ရုရှားအနေဖြင့် လက်တုံ့ပြန်သွားမည်ဖြစ်ကြောင်း သမ္မတ ဗလာဒီမာပူတင်က ဇွန်လ ၂၉ ရက်၌ ပြောကြားခဲ့သည် ဟု ရိုက်တာသတင်းတစ်ပုဒ်တွင် တွေ့ရသည်။

“ဆွီဒင်နဲ့ဖင်လန်တို့မှာ ကျနော်တို့ အခု ယူကရိန်း ကြုံနေတဲ့ပြဿနာမျိုး မရှိပါဘူး။ သူတို့က နေတိုးထဲ ပါချင်တယ်။ ရှေ့ဆက် တိုးချင်နေတယ်” ဟု အာရှအလယ်ပိုင်းရှိ ဆိုဗီယက်ပြည်ထောင်စုဝင်ဟောင်း တာ့ခ်မင်နစ္စတန်နိုင်ငံတွင် ဒေသတွင်း ခေါင်းဆောင်များနှင့် ဆွေးနွေးပြီးနောက် ရုရှားသမ္မတ ပူတင်က အစိုးရရုပ်သံလိုင်းမှ ပြောကြားခဲ့သည်။

“ဒါပေမယ့် အရင်ကတော့ ဒါမျိုး ခြိမ်းခြောက်မှု မရှိဘူးဆိုတာ သူတို့ နားလည်ထားရမှာ ဖြစ်သလို အခုအချိန်မှာတော့ စစ်တပ် နဲ့ အခြေခံ အဆောက်အဦတွေ အဲဒီ(ဆွီဒင်နဲ့ဖင်လန်)မှာ ဖြန့်ကြက်လာရင်တော့ ကျနော်တို့ကို ခြိမ်းခြောက်မှု ဖန်တီးတဲ့ နယ်မြေတွေ အဖြစ်နဲ့ ပါးပါးနပ်နပ် တုံ့ပြန်သွားမှာ ဖြစ်ပါတယ်” ဟု ပူတင်က ပြောကြားခဲ့သည်။

“ကျနော်တို့ကြားမှာ အားလုံးအဆင်ပြေတယ်။ ဒါပေမယ့် အခုလောလောဆယ် တင်းမာမှုတော့ ရှိလာနိုင်တာ သေချာပါတယ်။ ကျနော်တို့အပေါ်မှာ ခြိမ်းခြောက်မှု ရှိလာရင်တော့ ရှောင်လွှဲလို့ မရဘူးပေါ့” ဟု ၎င်းက ဆက်လက် ပြောကြားခဲ့သည်။

 နေတိုး အဖွဲ့ဝင်ရေး တူရကီ ကန့်ကွက်မှု ပြန်ရုပ်သိမ်းနေစဉ် (Reuters)

ဖင်လန်နှင့်ဆွီဒင်တို့ နေတိုးထဲဝင်ရေး ကိစ္စနှင့်ပတ်သက်၍ နေတိုးအဖွဲ့ဝင်ဟောင်း တူရကီက ၎င်း၏ ဗီတိုအာဏာကို ရုပ်သိမ်း ပြီးနောက် တစ်ရက်အကြာ ပူတင်၏ အထက်ပါ သဘောထားမှတ်ချက် ထွက်ပေါ်လာခဲ့သည်။

၎င်းနိုင်ငံသည် နေတိုး အဖွဲ့ဝင် ဖြစ်ရေးအတွက် လျှောက်လွှာများ ကိုယ်စီကိုင်ရင်း ဆက်လက် လုပ်ဆောင်သွားမည်ဖြစ်၍ ဆယ်စုနှစ် များစွာအတွင်း ဥရောပလုံခြုံရေးအတွက် အကြီးမားဆုံး အပြောင်းအလဲဟု မှတ်ယူနိုင်သည်။

ယူကရိန်းတွင် အထူးစစ်ဆင်ရေးဟု မော်စကို ပြောဆိုနေသည့် ရည်ရွယ်ချက်မှာ မပြောင်းလဲသေးကြောင်း၊ ယူကရိန်း အရှေ့ ပိုင်း ဒွန်ဘတ်စ်ဒေသကို လွတ်မြောက်ရေးနှင့် ရုရှားလုံခြုံရေး အခြေအနေများ သေချာစွာဖန်တီးရေးတို့ လုပ်ဆောင်သွားမည် ဖြစ်ကြောင်း ပူတင်က ထပ်လောင်း ပြောကြားခဲ့သည်။

ယူကရိန်းသို့ ရုရှားတပ်များ တိုးမြှင့်ချထားပြီး စစ်ရေးအရ စွက်ဖက်မှု အစီအစဉ်အတိုင်း တသွေမတိမ်း ဆက်လုပ်နေကြောင်း၊ ထိုစစ်ဆင်ရေးအတွက် နောက်ဆုံးရက် သတ်မှတ်စရာမလိုကြောင်း ၎င်းက ဖြည့်စွက်ပြောကြားခဲ့သည်။

Source: Reuters