CNI International News

မက်ဒရစ်၊ ဇွန်လ ၂၉

ဆွီဒင်နှင့်ဖင်လန်တို့ မြောက်အတ္တလန္တိတ် စစ်စာချုပ်အဖွဲ့(နေတိုး)ထဲသို့ ပါဝင်ရေး၌ တူရကီက အတိုက်အခံလုပ်၍ ကန့်ကွက် နေခြင်းအား ပြန်လည် ရုပ်သိမ်းကြောင်း ဇွန်လ ၂၈ ရက်တွင် သဘောတူ လက်ခံခဲ့သည်။

ယူကရိန်းစစ်ပွဲကြောင့် ဆယ်စုနှစ် များစွာအတွင်း ဥရောပ၏ အဆိုးရွားဆုံး လုံခြုံရေး အကျပ်အတည်းကြား၌ နေတိုး ခေါင်းဆောင်များ၏ ထိပ်သီး အစည်းအဝေး ဖွင့်ပွဲကို စပိန်နိုင်ငံ၊ မက်ဒရစ်မြို့တွင် ကျင်းပခဲ့ရာမှာ တူရကီက ၎င်း၏ ကန့်ကွက်နေခြင်းကို ပြန်လည် ရုပ်သိမ်းပေးခဲ့ခြင်း ဖြစ်သည်။

သုံးနိုင်ငံ ခေါင်းဆောင်များနှင့် အရေးတကြီး ဆွေးနွေးကြပြီးနောက် နေတိုးမဟာမိတ်အဖွဲ့၏ အထွေထွေအတွင်းရေးမှူးချုပ် ဂျန့်စ်စတိုလန်ဘတ် (Jens Stolenberg) က “ ကျနော်တို့ဟာ ဖင်လန်နဲ့ဆွီဒင်တို့ကို နေတိုးထဲ ပူးပေါင်းပါဝင်ဖို့ လမ်းခင်းပေး မယ့် သဘောတူညီချက် တစ်ရပ် ရပါပြီ။ ဒါဟာ သမိုင်းဝင် ဆုံးဖြတ်ချက်လို့ ပြောရမှာပါ” ဟု ကြေညာခဲ့သည်။

သမ္မတ ဗလာဒီမာပူတင်၏ ယူကရိန်းနိုင်ငံထဲသို့ ကျူးကျော် ဝင်ရောက်မှုကြောင့် ဆွီဒင်နှင့် ဖင်လန်တို့သည် ၎င်းတို့၏ ကာလ ရှည်ကြာ ရပ်တည်ချက်ကို စွန့်လွှတ်ခဲ့ပြီး မှန်းဆ၍ မရနိုင်သည့် ရုရှားခြိမ်းခြောက်မှုကို စိုးရိမ်ကာ နေတိုးအဖွဲ့ဝင်အဖြစ်သို့ လျှောက်ထားခဲ့ကြသည်။ ရုရှားသည် ဖင်လန်နိုင်ငံနှင့် နယ်နိမိတ်ချင်း ရှည်လျားစွာ ထိစပ်လျက် တည်ရှိနေသည်။

နေတိုး မဟာမိတ် စာချုပ်များအရ ၎င်းတို့၏ အဖွဲ့ဝင် တစ်နိုင်ငံအား ထိခိုက်ပါက နေတိုးအဖွဲ့ဝင် အားလုံးကို တိုက်ခိုက်ခြင်းဟု ယူဆပြီး တစ်ဖွဲ့လုံး၏ စစ်ရေးတုံ့ပြန်မှု ဖြစ်ပေါ်စေမည် ဖြစ်သည်။

တူရကီသမ္မတ အာဒိုဂန်နဲ့ နေတိုးအထွေထွေအတွင်းရေးမှူး ဂျန့်စ်စတိုလန်ဘတ် (AP)

နေတိုးအဖွဲ့သည် အများသဘောဆန္ဒဖြင့် လုပ်ဆောင်လျက်ရှိရာ တူရကီသမ္မတ အာဒိုဂန်က နော်ဒစ် နှစ်နိုင်ငံကို နေတိုးထဲ ဝင်ရေးအတွက် ယခင်က ကန့်ကွက်ခဲ့ပြီး အကြမ်းဖက်သမားဟု ယူဆသော ကာ့ဒ်သူပုန်အုပ်စုများအပေါ် ထောက်ခံနေသော ဆွီဒင်နှင့် ဖင်လန် တို့၏ ရပ်တည်ချက် ပြောင်းလဲရန် တောင်းဆိုနေခဲ့သည်။

သံတမန်ရေးအရ ရက်သတ္တပတ်များစွာ ညှိနှိုင်းခဲ့သလို ဇွန်လ ၂၈ ရက်တွင် အပြီးသတ် နာရီအတန်ကြာအောင် ဆွေးနွေးခဲ့ ကြရာ တူရကီ၊ ဆွီဒင်နှင့် ဖင်လန် စသည့် သုံးနိုင်ငံ ခေါင်းဆောင်များသည် လိပ်ခဲတည်းလည်း ဖြစ်နေသည့် အခြေအနေ တစ်ရပ်အား အောင်မြင်စွာ ကျော်လွှားနိုင်ခဲ့ကြောင်း၊ ပူးတွဲ သဘောတူညီချက်ကို လက်မှတ်ရေးထိုးနိုင်ခဲ့ကြောင်း ဖင်လန် သမ္မတ ဆောင်လီနီနီစတာ့ (Sauli Niinistö) က ပြောကြားခဲ့သည်။

ကာ့ဒ်သူပုန် အဖွဲ့များကို တိုက်ခိုက်နှိမ်နင်းရာတွင် ပူးပေါင်းဆောင်ရွက်မှု အပြည့်အဝနှင့် မိမိတို့ လိုလားသည့် အချက်များ ရရှိပြီဖြစ်ကြောင်း တူရကီအစိုးရကလည်း တစ်ချိန်တည်းတွင် ကြေညာခဲ့သည်။

ထပ်မံ ပူးပေါင်းလာသော အဖွဲ့ဝင်သစ် နှစ်နိုင်ငံနှင့်ပတ်သက်၍ နိုင်ငံပေါင်း ၃၀ ပါ နေတိုးမဟာမိတ်အဖွဲ့ ခေါင်းဆောင်များ သည် တရားဝင် ကြေညာချက်တစ်စောင် ထုတ်ပြန်သွားရန် ရှိကြောင်း စတိုလန်ဘတ်က ပြောကြားခဲ့သည်။

ထိုသို့ ထုတ်ပြန်နိုင်ရေးအတွက် ဆုံးဖြတ်ချက်ကို အဖွဲ့ဝင်အားလုံးက အတည်ပြု ပေးရမည်ဖြစ်ကြောင်း၊ ဖင်လန်နှင့် ဆွီဒင်တို့ အဖွဲ့ဝင် ဖြစ်လာရေး လုံးဝ ယုံကြည်ပါကြောင်းနှင့် လပိုင်းအတွင်း အကောင်အထည် ပေါ်လာမည်ဖြစ်ကြောင်း ၎င်းက ဆက်လက် ပြောကြားခဲ့သည်။

Source: AP

CNI International News

ဒမတ်စကတ်၊ ဇွန်လ ၂၉

ဆီးရီးယားနိုင်ငံတွင်း ပဋိပက္ခကြောင့် ပထမ ၁၀ နှစ်အတွင်းမှာပင် အရပ်သား ၃ သိန်းကျော် သေဆုံးခဲ့သည်ဟု ကုလသမဂ္ဂ (UN) က ထုတ်ပြန်ခဲ့သည်။

ယင်းသို့ထုတ်ပြန်သည့်နေ့မှာပင် ဆီးရီးယားစခန်းတစ်ခု၌ ထိန်းသိမ်းခံထားရသူ ၁၀၀ ကျော် သေဆုံးခဲ့သေး ကြောင်း အစီရင်ခံစာတစ်စောင်ကို ကိုးကားလျက် အယ်လ်ဂျာဇီးယား သတင်းဌာနက ရေးသားဖော်ပြသည်။

ကုလသမဂ္ဂ လူ့အခွင့်အရေးရုံးက ဇွန်လ ၂၈ ရက် ရက်စွဲထုတ်ပြန်သည့် ဆီးရီးယားအရပ်သားသေဆုံးမှု အစီရင်ခံစာ ထဲတွင် သေဆုံးရသည့်အချက်အလက်စာရင်းဇယားများကို တင်းကြပ်စွာ အကဲဖြတ်ထားပြီး ကိန်းဂဏန်း ရလဒ် များကို အထူးစိစစ်ထားကြောင်း သိရသည်။

ဆီးရီးယားနိုင်ငံတဝန်း ၂၀၁၁ ခုနှစ်၊ မတ်လ ၁ ရက်မှ ၂၀၂၁ ခုနှစ်၊ မတ်လ ၃၁ ရက်ကြား ပဋိပက္ခများကြောင့် အရပ်သား ၃၀၆,၈၈၇(သုံးသိန်းခြောက်ထောင်ရှစ်ရာရှစ်ဆယ့်ခွန်) ဦးသေဆုံးခဲ့သည်ဟု ကုလသမဂ္ဂက ခန့်မှန်း ထားသည်။

“ဒီအစီရင်ခံစာမှာပါတဲ့အတိုင်း ပဋိပက္ခနဲ့ ဆက်စပ်ပြီး သေဆုံးသူအရေအတွက်ဟာ စိတ်မှန်းနဲ့ လျှောက်တွက် ထားတာမဟုတ်ဘဲ လူတစ်ဦးချင်းစီကို ကိုယ်စားပြုတွက်ထားတာဖြစ်ပါတယ်” ဟု UN လူ့အခွင့်အရေးဆိုင်ရာ မဟာမင်းကြီး မီရှဲဘက်ချလက် (Michelle Bachelet) က ပြောကြားခဲ့သည်။
“အဲဒီ အရပ်သားပေါင်း ၃၀၆,၈၈၇ ဦးကို သတ်ဖြတ်တဲ့အတွက် သက်ရောက်မှုကတော့ သူတို့ရဲ့မိသားစုတွေနဲ့ အသိုင်းအဝိုင်းအပေါ်မှာ အလေးအနက် ထိတ်လန့်တုန်လှုပ်စရာ ဖြစ်ပါတယ်” ဟု ၎င်းက ဆက်လက်ပြောကြား ခဲ့သည်။

သေဆုံးနေသည့် အလောင်းပုံများကိုတွေ့ရစဉ်

UN က ယခုထုတ်ပြန်သည့်အရေအတွက်တွင် ဆီးရီးယားပဋိပက္ခအတွင်း သေဆုံးခဲ့ရသည့် စစ်သားများနှင့် အခြား တိုက်ခိုက်ရေးသမားများ မပါဝင်ပေ။ အဆိုပါလက်နက်ကိုင်အဖွဲ့များ၏အရေအတွက်မှာလည်း သောင်းနှင့်ချီ၍ ရှိမည်ဟု ယုံကြည်ရသည်။

အာဏာပိုင်များကို အကြောင်းမကြားဘဲ သေဆုံးသူမိသားစုများ၏ဆန္ဒအလျောက် မြှုပ်နှံသင်္ဂြိုဟ်သည့် အရေ အတွက်များလည်း ယခုထုတ်ပြန်သည့်စာရင်း၌ မဖော်ပြပေ။

UN လူ့အခွင့်အရေးကောင်စီအနေဖြင့် ထုတ်ပြန်သော အစီရင်ခံစာထဲ၌ သေဆုံးသူများ၏ အမည်အပြည့်အစုံ၊ ရက်စွဲနှင့် သေဆုံးသည့်နေရာဌာန အပါအဝင် ၎င်းတို့ဇာစ်မြစ်အလိုက် တစ်ဦးချင်းမှတ်တမ်းတင်ထားသူ ၁၄၃,၃၅၀(တစ်သိန်းလေးသောင်းသုံးထောင့်သုံးရာငါးဆယ်)ကို ကိုးကားရေးသားထားသည်။

ယင်းအစီရင်ခံသည် ဒမတ်စကက် လူ့အခွင့်အရေးစင်တာ၊ ဆီရီးယားစာရင်းအင်းနှင့်သုတေသနစင်တာ၊ ဆီးရီးယား လူ့အခွင့်အရေးကွန်ရက်၊ ဆီးရီးယားလူ့အခွင့်အရေးစောင့်ကြည့်အဖွဲ့နှင့် လူ့အခွင့်အရေးချိုးဖောက်မှု မှတ်တမ်း တင်ရေးတို့အပါအဝင် အချက်အလက်ဆိုင်ရာ ရင်းမြစ် ၈ ခုအပေါ် အခြေခံ၍ ပြုစုထားကြောင်း သိရသည်။

အီဂျစ်၊ တူနီရှား၊ ယီမင်၊ လစ်ဗျားနှင့် ဘာရိန်းစသည့်နိုင်ငံများတွင် ဒီမိုကရေစီပြုပြင်ပြောင်းလဲ‌ရေးအတွက် အာရပ် နွေဦးအုံကြွမှုနောက်ပိုင်း ၂၀၁၁ ခုနှစ်၊ မတ်လတွင် ဆီးရီးယားနိုင်ငံအနှံ့အပြားတွင် အစိုးရဆန့်ကျင်ရေး ဆန္ဒပြပွဲ များ စတင်ခဲ့ရာ ပြည်တွင်းလက်နက်ကိုင်ပဋိပက္ခမှာ ဆယ်စုနှစ်တစ်ခုကျော် ကြာမြင့်ခဲ့သည်။

Source: Aljazeera

CNI International News

ပြုံယမ်း၊ဇွန်လ ၂၉

အမေရိကန်၊ တောင်ကိုရီးယားနှင့် ဂျပန်တို့၏ ပူးတွဲစစ်ရေးလေ့ကျင့်မှုသည် မြောက်ကိုရီးယားကို ဦးတည်လျက် ဆိုးယုတ်သောရည်ရွယ်ချက်ရှိရှိဖြင့် အာရှနေတိုးဖြစ်လာအောင် ဖန်တီးနေခြင်းဖြစ်ကာ အန္တရာယ်များသော ရှေ့ပြေးလုပ်ဆောင်ခြင်း အစိတ်အပိုင်းဖြစ်ကြောင်း မြောက်ကိုရီးယားအစိုးရပိုင် KCNA သတင်းဌာနက ထုတ်လွှင့် ခဲ့သည်။

စပိန်နိုင်ငံ၊ မက်ဒရစ်မြို့၌ ဇွန်လ ၂၉ ရက်(ယနေ့)ကျင်းပနေသည့် မြောက်အတ္တလန္တိတ်စစ်စာချုပ်အဖွဲ့(နေတိုး) နှစ်ပတ်လည်အစည်းအဝေးသို့ တောင်ကိုရီးယားနှင့် ဂျပန်ခေါင်းဆောင်များ တက်ရောက်ကြရန် နာရီပိုင်းအလို တွင် KCNA သတင်းဌာနက အထက်ပါအတိုင်း သတင်းထုတ်လွှင့်ခဲ့ခြင်းဖြစ်သည်။

အဆိုပါထိပ်သီးအစည်းအဝေးတွင် ဆိုးလ်နှင့်တိုကျိုတို့မှ အစိုးရတာဝန်ရှိသူများသည် အမေရိကန်သမ္မတ ဂျိုးဘိုင်ဒန်နှင့် တွေ့ဆုံကြရန် စီစဉ်ထားရာ ၂၀၁၇ ခုနှစ်နောက်ပိုင်း ပထမဆုံး သုံးပွင့်ဆိုင်ထိပ်သီးဆွေးနွေးပွဲ အသွင်ဖြင့် မြောက်ကိုရီးယားအရေးကို ပြောဆိုကြမည်ဟု သိရသည်။

၎င်းသုံးနိုင်ငံသည် လာမည့် ဩဂုတ်လတွင် ဟာဝိုင်အီကျွန်းအနီး ပစိဖိတ်နဂါး (Pacific Dragon) ဟုခေါ်သည့် ဒုံးကျည်ထောက်လှမ်းခြင်းနှင့် ခြေရာခံခြင်း စစ်ရေးသင်ခန်းစာ လေ့ကျင့်ကြမည်ဖြစ်သည်။

“အမေရိကန်သည် အာရှ-ပစိဖိတ်နိုင်ငံများ၏ အဓိကလုံခြုံရေးတောင်းဆိုမှုနှင့် စိုးရိမ်ပူပန်မှုကို ဂရုမစိုက်ဘဲ ၎င်း၏လက်တိုင်တုတ်များဖြင့် စစ်ရေးပူးပေါင်းခြင်းဖြင့် ငရဲတွင်းသို့ ဆွဲသွင်းနေသည်” ဟု KCNA သတင်းတွင် ဖော်ပြထားသည်။

မြောက်ကိုရီးယားခေါင်းဆောင် ကင်မ်ဂျုံအန်းသည် မြောက်ကိုရီးယားနိုင်ငံ ပြုံယမ်းတွင် အဋ္ဌမအကြိမ်မြောက် ဗဟိုစစ်ကော်မရှင်အစည်းအဝေးကျင်းပနေစဉ်(ဓါတ်ပုံ-KCNA)

“အမေရိကန်-ဂျပန်-တောင်ကိုရီးယား စစ်ရေးမဟာမိတ်ဖွဲ့စည်းရေး အစီအစဉ်ဟာ အာရှအတွက် နေတိုးဗားရှင်း ဖန်တီးတာဖြစ်လို့ အန္တရာယ်များတဲ့ ရှေ့ပြေးနိမိတ်ဖြစ်တယ်ဆိုတာ ထင်ရှားပါတယ်” ဟု KCNA သတင်းတွင် ဆက်လက်ဖော်ပြထားပြီး စစ်အေးခေတ်ကို ဝါရှင်တန် ဖော်ဆောင်နေသည်ဟု စွပ်စွဲထားသည်။

ယခုထုတ်လွှင့်သည့်သတင်း၌ KCNA က မြောက်ကိုရီးယား၏ နိုင်ငံတကာနိုင်ငံရေးသုတေသနအဖွဲ့မှ ပညာရှင် ကင်မ်ဟိုမြောင် (Kim Hyo-myung) ၏ သီးခြားသဘောထားမှတ်ချက်တစ်ခုကို ထည့်သွင်းဖော်ပြခဲ့သည်။

“နေတိုး ဟာ အမေရိကန်ဖော်ညွှန်းတဲ့ မဟာဗျူဟာနဲ့ ဒေသတွင်းရန်လိုမှုရဲ့ကိရိယာတစ်ခုဖြစ်တယ်” ဟု ကင်မ်ဟိုမြောင်က ဝေဖန်သုံးသပ်ထားသည်။

ယခင်သီတင်းပတ်အကုန်ပိုင်းက အလားတူကြေညာချက်တစ်စောင်တွင်လည်း “တောင်ကိုရီးယားနှင့်ဂျပန်တို့ ပူးတွဲစစ်ရေးလေ့ကျင့်မှုတွင် အမေရိကန်သည် သံတမန်ရေးအရာ စေ့စပ်ညှိနှိုင်းမှုနှင့် ဆွေးနွေးမှုအခြေအနေမရှိဘဲ အရေခြုံထားကြောင်း” မြောက်ကိုရီးယားနိုင်ငံခြားရေးဝန်ကြီးဌာနက ထောက်ပြခဲ့သည်။

မြောက်ကိုရီးယားသည် ၎င်း၏အကြီးမားဆုံး တိုက်ချင်းပစ်ဒုံးကျည်အပါအဝင် ယခုနှစ်အတွင်း စံချိန်တင်အောင် ဒုံးကျည်စမ်းသပ်မှု အကြိမ်ကြိမ်ပြုလုပ်ခဲ့ရာ ၂၀၁၇ ခုနှစ်နောက်ပိုင်း ပထမဆုံး နျူကလီးယားလက်နက် စမ်းသပ် လာမည့်အရေး စိုးရိမ်ပူပန်နေမှုများ ရှိနေသည်။

တောင်ကိုရီးယားနှင့် ဂျပန်တို့သည် အမေရိကန်၏မဟာမိတ်များဖြစ်ကြသော်လည်း ၎င်းနှစ်နိုင်ငံ၏ဆက်ဆံရေးမှာ ၁၉၁၀ ပြည့်နှစ်မှ ၁၉၄၅ ခုနှစ်အတွင်း ကိုရီးယားကျွန်းဆွယ်ကို ဂျပန်တို့သိမ်းပိုက်ခဲ့ခြင်းနှင့်စပ်လျဉ်း၍ သမိုင်းဝင် တင်းမာမှုများလည်း ရှိနေဆဲဖြစ်သည်။

Source: Aljazeera

CNI International News

ဘေဂျင်း၊ ဇွန်လ ၂၉

စက်မှုထိပ်သီး (G-7) နိုင်ငံများနှင့်‌ မြောက်အတ္တလန္တိတ် စစ်စာချုပ်အဖွဲ့(နေတိုး)ခေါင်းဆောင်များ အဆင့်မြင့် အစည်းအဝေး ကျင်းပနေချိန်၌ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကျောက်လိကျန်း (Zhao Lijian) က ဇွန်လ ၂၈ ရက်တွင် တွစ်တာပေါ်သို့ ပုံတစ်ပုံတင်၍ လှောင်ပြောင်ခဲ့သည်ဟု အာရ်တီသတင်းဌာနက ရေးသားဖော်ပြသည်။

အဆိုပါ ပုံမှာ G-7 က ၎င်းတို့ကိုယ်ကို “နိုင်ငံတကာလူ့အဖွဲ့အစည်း” ဟု ခေါ်ဆိုထားသော်လည်း G-7 နိုင်ငံများထံတွင် အမှန် တကယ် ကမ္ဘာ့လူဦးရေ၏ အနည်းငယ်မျှသာ ပါဝင်ကြောင်း ထေ့ငေါ့ လှောင်ပြောင် သရုပ်ဖော်ထားသည့် ပုံဖြစ်နေခဲ့သည်ဟု အာရ်တီသတင်းဌာနက ဆက်လက် ရေးသားဖော်ပြသည်။
ပုံထဲတွင် BRICS (ဘရစ်ခ်စ်) နိုင်ငံခေါင်းဆောင်များနှင့်အတူ G-7 နိုင်ငံများမှ ခေါင်းဆောင်များကို ဖော်ပြထားပြီး G-7 နိုင်ငံများ ၌ လူဦးရေပမာဏ ၇၇၇ သန်းရှိကြောင်း၊ BRICS နိုင်ငံများတွင်တော့ လူဦးရေ ၃ ဒသမ ၂ ဘီလီယံ နေထိုင်ကြောင်း နှိုင်းယှဉ်ပြ ထားသည်။

“ဒါဆိုရင် သူတို့က နိုင်ငံတကာ လူ့အဖွဲ့အစည်းဆိုတဲ့ အသုံးအနှုန်းကို နောက်တစ်ခါ ထပ်သုံးရင် သူတို့က ဘာကို ဆိုလိုနေလဲ သိလား” ဟု ကျောက်လိကျန်းက ပို့စ်တင်၍ မေးခွန်း ထုတ်ထားသည်။

ယခင် သီတင်းပတ် အကုန်ပိုင်း ဂျာမနီနိုင်ငံ၌ ကျင်းပသည့် ထိပ်သီး အစည်းအဝေးအပြီးတွင် G-7 ခေါင်းဆောင်များသည် အမေရိကန် ဦးဆောင်သည့် နေတိုးမဟာမိတ်အဖွဲ့၏ မဟာဗျူဟာ အယူအဆသစ် ရေးဆွဲဖို့ နောက်ထပ် အစည်းအဝေး တက်ရန်အတွက် စပိန်နိုင်ငံ၊ မက်ဒရစ်မြို့ကို ဆက်လက်ထွက်ခွာခဲ့ကြသည်။

အဆိုပါ နေတိုး အစည်းအဝေးတွင် နေတိုးအဖွဲ့ဝင် မဟုတ်သည့် နိုင်ငံများအပေါ် ၎င်းတို့ ရပ်တည်ချက်နှင့် တာဝန်များကို အလေးပေး ဖော်ပြသော စာတမ်းတစ်စောင်ကို ဆွေးနွေးကြရန် စီစဉ်ထားသည်။

G-7 ခေါင်းဆောင်များကို တွေ့ရစဉ်

၂၀၁၀ ခုနှစ်နောက်ပိုင်း ပထမဆုံး ပြင်ဆင်ဖြည့်စွက်မည့် အဆိုပါစာတမ်းတွင် တရုတ်နိုင်ငံအား စိန်ခေါ်မှု တစ်ရပ်အဖြစ် မှတ်ယူ ဆွေးနွေးမည်ဖြစ်ကြောင်း နေတိုး အထွေထွေအတွင်းရေးမှူးချုပ် ဂျန့်စ်စတိုလန်ဘတ် (Jens Stolenberg) ၏ အဆိုအရ သိရသည်။

“မိမိတို့ မဟာမိတ်များသည် ရုရှားအပေါ် လုံခြုံရေးအတွက် အထူးခြားဆုံးနှင့် တိုက်ရိုက် ခြိမ်းခြောက်မှု ရှိနေသည်ဟု သတ်မှတ်ကြောင်း အတိအလင်း ဖော်ပြမည်” ဟု ဂျန့်စ်စတိုဘတ်က ပြောကြားခဲ့သည်။

G-7 ထိပ်သီး အစည်းအဝေး မတိုင်မီ ရက်ပိုင်းအလို ရုရှားသမ္မတ ဗလာဒီမာပူတင်၊ တရုတ်သမ္မတ ရှီကျင့်ဖျင် အပါအဝင် ဘရာဇီး၊ အိန္ဒိယ၊ တောင်အာဖရိက ခေါင်းဆောင်များသည် BRICS အဖွဲ့ ထိပ်သီးအစည်းအဝေး ကျင်းပခဲ့၍ တွေ့ဆုံ ညှိနှိုင်းခဲ့ ကြပြီးဖြစ်သည်။

အဆိုပါ ၅ နိုင်ငံ၏ ထိပ်ဆုံးအမည် အင်္ဂလိပ် အက္ခရာများကို စုစည်းလျက် BRICS ဟု အတိုကောက် ခေါ်ဝေါ်ထားပြီး ကမ္ဘာ့ ထိပ်တန်း စီးပွားရေး ၁၀ နိုင်ငံအနက် ၄ နိုင်ငံအထိ ပါဝင်နေပြီး ကမ္ဘာ့လူဦးရေး၏ ၄၀ ရာခိုင်နှုန်းနှင့် GDP ၃၀ ရာခိုင်နှုန်းကို ကိုယ်စားပြုထားသည်။

BRICS အဖွဲ့သည် စစ်ရေး (သို့မဟုတ်) စီးပွားရေးအရ တရားဝင် မဟာမိတ်အဖွဲ့အစည်း မဟုတ်သော်လည်း ပါဝင်သည့် ၅ နိုင်ငံ စလုံးသည် အနောက်အုပ်စု သဘောဆန္ဒကို ဆန့်ကျင်ကန့်ကွက်သည့် အလေ့အထ ရှိကြသည်။

ယခင်သီတင်းပတ် ဇွန်လ ၂၂ ရက် BRICS ထိပ်သီး အစည်းအဝေးအတွင်း “မိမိတို့ ၅ နိုင်ငံပါ အဖွဲ့၏ ငွေကြေးအင်အားကို အခြေခံ၍ ကမ္ဘာလုံးဆိုင်ရာ အရန်ငွေကြေး အသစ်တစ်ရပ် ထူထောင်ရန် ကြိုးစားလုပ်ဆောင်နေကြောင်း” ရုရှားသမ္မတ ဗလာဒီမာပူတင်က ပြောကြားခဲ့သည်။

Source: အာရ်တီသတင်းဌာန

CNI International News

ကွီတို၊ ဇွန်လ ၂၈

တောင်အမေရိကတိုက်ရှိ အီကွေဒေါနိုင်ငံတွင် ယခင်သီတင်းပတ် နှစ်ပတ်အတွင်း အင်အားကြီးမားသော ဆန္ဒပြမှုများဖြင့် အီကွေဒေါအစိုးရ ကြုံတွေ့ခဲ့ရပြီးနောက် အစိုးရဘက်က စေ့စပ်ညှိနှိုင်းရန် ကမ်းလှမ်းလာမှုအား ဆန္ဒပြမှုများကို ဦးဆောင်နေ သည့် ဌာနေတိုင်းရင်းသား အဖွဲ့အစည်းမှ ခေါင်းဆောင်များက လက်ခံလိုက်ကြောင်း အယ်ဂျာဇီးယားသတင်းအရ သိရသည်။

ဇွန်လ ၂၇ ရက်က အီကွေဒေါ ဌာနတိုင်းရင်းသား လူမျိုးစုများ ဖက်ဒရယ်ကောင်စီ (CONAIE) သည် သမ္မတ ဂွီလာမိုလက်ဇို၏ အရာရှိများနှင့် တွေ့ဆုံရန် မျှော်လင့်ထားကြောင်း ကြေညာချက် ထုတ်ပြန်ခဲ့သည်။
မြို့တော် ကွီတိုနှင့် အခြားနေရာ အနှံ့အပြား၌ လောင်စာဆီနှင့် စားနပ်ရိက္ခာ အခက်အခဲများကြောင့် လူထုအတွင်း မကျေနပ်မှု တိုးပွားလာခဲ့ရာ ဇွန်လ ၁၃ ရက်၌ စတင်ခဲ့သော အစိုးရဆန့်ကျင်ရေး ဆန္ဒပြပွဲများကို ယခု တွေ့ဆုံဆွေးနွေးရေးက ရပ်တန့် စေလိုက်ပြီ ဖြစ်သည်။

နိုင်ငံတဝန်း မငြိမ်မသက်မှုများကို ဖြေရှင်းရန်အတွက် လောင်စာဆီနှင့် ဒီဇယ်ကို တစ်ဂါလံလျှင် ၁၀ ရာခိုင်နှုန်း လျှော့ပေါ့ ရောင်းချပေးမည်ဟု ဇွန်လ ၂၆ ရက်နှောင်းပိုင်းတွင် သမ္မတလက်ဇိုက ကြေညာခဲ့ပြီးဖြစ်သည်။
သို့သော် ဈေးနှုန်း လျှော့ပေါ့ခြင်းဖြင့် လက်ရှိ ဆန္ဒပြ သပိတ်မှောက်မှုများ အဆုံးသတ်ရန် မလုံလောက်ကြောင်း၊ သန်းနှင့်ချီ သော အိမ်ထောင်စုများ၏ အခက်အခဲဖြေရှင်းရန် ထိရောက်မည် မဟုတ်ကြောင်း ဇွန်လ ၂၇ ရက်၌ စီစဉ်ထားသော အစည်း အဝေး မကျင်းပမီ CONAIE ကောင်စီက ထုတ်ပြန်ခဲ့သည်။

အီကွေဒေါ သမ္မတ ဂွီလာမိုလက်ဇို (Reuters)

ဓာတ်ဆီ အပိုဝယ်ယူမှုအတွက် တစ်ဂါလံလျှင် ၂ ဒသမ ၅၅ ဒေါ်လာမှ ၂ ဒသမ ၁၀ ဒေါ်လာအထိနှင့် ဒီဇယ်ဆီကို တစ်ဂါလံ လျှင် ၁ ဒသမ ၉၀ ဒေါ်လာမှ ၁ ဒသမ ၅၀ အထိ လျှော့ချပေးရေး အပါအဝင် CONAIE ကောင်စီက တောင်းဆိုထားသည့် အချက် ၁၀ ချက်ကို လိုက်လျောပေးရန် ကြေညာချက်တွင် ရေးသားထားသည်။

“လောင်စာဆီ ဈေးနှုန်းသည် ပဋိပက္ခ ဆက်ဖြစ်နေအောင် အခြေခံ အကြောင်းတရားအဖြစ် ရှိနေဆဲဖြစ်ကြောင်း” သမ္မတ လက်ဇိုက ဇွန်လ ၂၇ ရက်၌ အစိုးရရုပ်သံလိုင်းမှနေ၍ မိန့်ခွန်းပြောကြားခဲ့သည်။
“တွေ့ဆုံ ဆွေးနွေးရေး ကြိုးပမ်းတဲ့ အီကွေဒေါ နိုင်ငံသားတွေက လက်ကမ်းပေးပြီးတော့ အစိုးရနဲ့ တွေ့ရမယ်။ မငြိမ်မသက် ဖြစ်အောင်၊ အကြမ်းဖက်အောင် ကြိုးစားတဲ့ သူတွေကတော့ ဥပဒေစွမ်းအား အပြည့်အဝနဲ့ ရင်ဆိုင်ရမှာ ဖြစ်တယ်” ဟု ၎င်းက ဆက်လက် ပြောကြားခဲ့သည်။

ဆန္ဒပြ သပိတ်မှောက်မှုများ ဖြစ်ပွားနေစဉ်အတွင်း လက်ဇိုကို သမ္မတရာထူးမှ ဖယ်ရှားနိုင်ရေး အီကွေဒေါ လွှတ်တော်အမတ် များက ကြိုးစားလာကြသဖြင့် လက်ဇိုက ပြည်နယ် ၆ ခုတွင် အရေးပေါ် အခြေအနေ ထုတ်ပြန်ထားခြင်းအား ပြန်လည် ရုပ်သိမ်း ပေးခဲ့ရသည်။

လောင်စာဆီဈေးတက်မှုကြောင့် အီကွေဒေါဆန္ဒပြမှုများဖြစ်(AP)

CONAIE ဖက်ဒရယ်ကောင်စီက အစိုးရနှင့် ဆွေးနွေးပွဲများ စတင်နိုင်ရန်အတွက် ကြိုတင်လိုအပ်ချက်အဖြစ် အရေးပေါ် အခြေအနေ ရုပ်သိမ်းရန်လည်း တောင်းဆိုခဲ့ပြီး ဖြစ်သည်။

ဒေသခံ ဆန္ဒပြသူများက ဓာတ်ဆီဈေး ကျဆင်းရေး၊ လယ်ယာထွက်ကုန်များအပေါ် ဈေးနှုန်းချုပ်ကိုင်မှု လျှော့ပေးရေး၊ ပညာ ရေး၊ ကျန်းမာရေး စောင့်ရှောက်မှုနှင့် အလုပ်အကိုင် အခွင့်အလမ်း ဖန်တီးပေးရေး၊ ပိုမိုခိုင်မာသော ရင်းနှီးမြှုပ်နှံမှုများ ပေါ်ထွန်းရေးတို့ကို အစိုးရအား တောင်းဆိုခဲ့ကြသည်။

ထိုသို့ လှုပ်ရှားမှုများသည် အာဏာသိမ်းရန်အတွက် အုတ်မြစ်ချ ကြိုးပမ်းကြခြင်းဖြစ်ကြောင်း ယခင်သီတင်းပတ်၌ လက်ဇိုက စွပ်စွဲ အပြစ်တင်ခဲ့သည်။

Source: Aljazeera

CNI International News

ကရာကက်စ်၊ ဇွန်လ ၂၈

အမေရိကန်အစိုးရ အဆင့်မြင့် အရာရှိများသည် ကြိုတင် သတင်းထုတ်ပြန်ခြင်းမရှိဘဲ ဗင်နီဇွဲလားနိုင်ငံ၊ ကရာကတ်စ်မြို့တော် သို့ တိတ်တဆိတ် ရောက်ရှိလာခဲ့ပြီး ဖမ်းဆီးခံထားရသော အမေရိကန်နိုင်ငံသားများကို ပြန်လည်ခေါ်ဆောင်လာခြင်း၊ ဗင်နီဇွဲလား ရေနံကုမ္ပဏီကြီးနှင့် ဆက်ဆံရေးပြန်လည်ထူထောင်ရန် နောက်ဆုံးကြိုးပမ်းခြင်းများ ဆောင်ရွက်ခဲ့ကြောင်း အေပီသတင်းအရ သိရသည်။
ယူကရိန်းစစ်ရေး အရှိန်မြင့်တက်လာချိန်၌ အမေရိကန်သည် အခြားနိုင်ငံများနှင့် နိုင်ငံခြားရေးမူဝါဒ ရည်မှန်းချက်များကို ပြန်လည်ချိန်ညှိရန် အလေးပေး လုပ်ဆောင်နေကြောင်း တွေ့ရသည်။

ထို့နောက် အမေရိကန်အစိုးရ အရာရှိများ၏ ခရီးစဉ်သည် ကရာကက်စ်မြို့တွင် ထိန်းသိမ်းခံထားရသော အမေရိကန်နိုင်ငံသား များ ဘေးကင်း လွတ်မြောက်စေရေး အလေးထားသည့် ခရီးစဉ်ဖြစ်ကြောင်း အမေရိကန် နိုင်ငံခြားရေးဝန်ကြီးဌာန ပြောရေး ဆိုခွင့်ရှိသူက ပြောကြားခဲ့သည်။

ထိန်းသိမ်းခံထားရသော နိုင်ငံသားများအနက် ဟူစတန်မြို့အခြေစိုက် ဆစ်ဂို (Citgo) ရေနံကုမ္ပဏီမှ အမှုဆောင် လူတစ်စု လည်း ပါဝင်ပြီး ၎င်းတို့ကို ပြီးခဲ့သည့် ၄ နှစ်တွင် ဗင်နီဇွဲလား အာဏာပိုင်များက ဖမ်းဆီးထိန်းသိမ်းခဲ့သည်။

အမေရိကန် အဆင့်မြင့် အရာရှိများ၏ ဗင်နီဇွဲလား ခရီးစဉ်တွင် ဓားစာခံ ဖမ်းဆီးခံရမှု အရေးဆိုင်ရာ အမေရိကန် အထူး သံတမန် ရော်ဂျာကာစတန် (Roger Carstens) နှင့် ကိုလံဘီယာပြင်ပ အိမ်နီးချင်းနိုင်ငံများ၊ ဗင်နီဇွဲလားရေးရာ အမေရိကန် အစိုးရ၏ သံအမတ် ဂျိမ်းစ်စတိုရီ (James Story) တို့ ဦးဆောင် လိုက်ပါလာကြသည်။

၎င်းတို့၏ ခရီးစဉ်ကို ဗင်နီဇွဲလားသမ္မတ နီကိုးလပ်မာဒူရိုက ရုပ်သံလိုင်း မိန့်ခွန်းမှတစ်ဆင့် အတည်ပြု ပြောကြားခဲ့ပြီး အဆိုပါ ကိုယ်စားလှယ်အဖွဲ့သည် ယုံကြည်စိတ်ချရသော မဟာမိတ်တစ်ဦးနှင့် လာရောက် တွေ့ဆုံခြင်းဖြစ်ကြောင်း မှတ်ချက်ချခဲ့ သည်။

“အမေရိကန် အစိုးရနှင့် ဗင်နီဇွဲလား အစိုးရတို့အကြား အပြန်အလှန် လုပ်ငန်းစဉ်များ ဆက်လက် ဆောင်ရွက် သွားမည်ဖြစ် ကြောင်း ဗင်နီဇွဲလား အမျိုးသားလွှတ်တော်(အောက်လွှတ်တော်)ဥက္ကဋ္ဌ ဟောဟေးရိုဒရီဂက်ဇ် (Jorge Rodríguez) က ပြော ကြားခဲ့သည်။
ယခုခရီးစဉ်သည် ပြီးခဲ့သည့် မတ်လ အမေရိကန် အရာရှိနှစ်ဦးနှင့် အနောက်ကမ္ဘာခြမ်းဆိုင်ရာ အမေရိကန် အမျိုးသား လုံခြုံရေးကောင်စီ ညွှန်ကြားရေးမှူး ဟွမ်ဂွန်ဇာလက်စ် (Juan Gonzalez) တို့၏ ခရီးစဉ်နောက်ပိုင်း အမေရိကန်အစိုးရ၏ အံ့အားသင့်စရာ ခရီးစဉ်လည်း ဖြစ်သည်။

ထို့ပြင် ဆယ်စုနှစ် နှစ်ခုကျော် ကာလအတွင်း ဗင်နီဇွဲလားနိုင်ငံသို့ အိမ်ဖြူတော်မှ စေလွှတ်သည့် ပထမဆုံး ခရီးစဉ်လည်း ဖြစ် ကြောင်း အေပီက ရေးသားထားသည်။

Source: AP

CNI International News

မော်စကို၊ ဇွန်လ ၂၈

ခရိုင်းမီးယားကျွန်းဆွယ်ကို မြောက်အတ္တလန္တိတ်စစ်စာချုပ်အဖွဲ့(နေတိုး)အဖွဲ့ဝင်နိုင်ငံတစ်နိုင်ငံက ကျူးကျော် ဝင်ရောက်ခဲ့ ပါလျှင် တတိယကမ္ဘာစစ်ဆီသို့ ဦးတည်သွားမည်ဟု ရုရှားသမ္မတဟောင်း ဒီမီထရီမက်ဗီဒက်က ပြောကြားခဲ့ကြောင်း ရိုက်တာ သတင်းတစ်ပုဒ်တွင် တွေ့ရသည်။

“ခရိုင်းမီးယားဟာ ရုရှားရဲ့ အစိတ်အပိုင်း တစ်ခုဖြစ်ပါတယ်။ ဒါက အမြဲတမ်း အစိတ်အပိုင်းလို့ ဆိုလိုတာပါ။ ခရိုင်းမီးယားကို ကျူးကျော်ဖို့ ကြိုးစားမှုတိုင်းဟာ ကျနော်တို့နိုင်ငံကို စစ်ကြေညာတာပဲ ဖြစ်ပါတယ်” ဟု မက်ဗီဒက်က အာဂူမန်တီအိုင်ဖက်ခ် တီ (Argumenty i Fakty) သတင်းဝက်ဘ်ဆိုက်သို့ ပြောကြားခဲ့သည်။

“ဒီလို ဝင်ရောက်တာမျိုးကို နေတိုးအဖွဲ့ဝင် တစ်နိုင်ငံက လုပ်တယ်ဆိုရင် နေတိုးတစ်ဖွဲ့လုံးနဲ့ ပဋိပက္ခဖြစ်ပြီး တတိယကမ္ဘာစစ် ဖြစ်တော့မှာ။ ကပ်ဆိုးဘေးဆိုး အပြည့်အဝ ဖြစ်ပြီပေါ့ဗျာ” ဟု ၎င်းက ဆက်လက် ပြောကြားခဲ့သည်။

 နေတိုး အင်အားစုကိုတွေ့ရစဉ်(GETTY IMAGES)

ဖင်လန်နှင့် ဆွီဒင်တို့ နေတိုး အဖွဲ့ဝင်အဖြစ် ပါဝင်လာမည်ဆိုပါက ရုရှားသည် မိမိ နယ်နိမိတ်များကို အခိုင်အခံ့ စီမံထား ကြောင်း၊ လက်တုံ့ပြန်ရေး ခြေလှမ်းများအတွက် အဆင်သင့် ပြင်ဆင်ထားမည်ဖြစ်ကြောင်း၊ ထိုအစီအမံများတွင် Iskander အသံထက်မြန်သော ဒုံးကျည်များကို ရုရှားနိုင်ငံ၏ တံခါးပေါက်တွင် တပ်ဆင်မည့် အလားအလာလည်း ပါဝင်ကြောင်း မက်ဗီဒက်က ထပ်လောင်း ပြောကြားခဲ့သည်။

ရုရှားသမ္မတဟောင်း မက်ဗီဒက်သည် ယခုအခါ ရုရှားလုံခြုံရေးကောင်စီ၏ ဒုတိယဥက္ကဋ္ဌအဖြစ် တာဝန်ယူနေသည်။

၎င်းသည် ရုရှားသမ္မတ ရာထူးကို ၂၀၀၈ ခုနှစ်မှ ၂၀၁၂ ခုနှစ်အထိ ထမ်းဆောင်ခဲ့သူ ဖြစ်သည်။

Source: Reuters

CNI International News

ဘန်ကောက်၊ ဇွန်လ ၂၇

နောင်လာမည့် ထိုင်းဝန်ကြီးချုပ် နေရာအတွက် လူထု သဘောထား စစ်တမ်းကောက်ယူမှုတစ်ခု၌ ဝန်ကြီးချုပ်ဟောင်း သက်ဆင်၏ သမီးအငယ်ဆုံးဖြစ်သူ ပေးတုန်တန် အန်အင် ရှင်နာဝပ်ထရာ (Paetongtarn "Ung Ing" Shinawatra) သည် အခြား ပြိုင်ဘက်များထက် အလားအလာ ကောင်းပြီး ထိပ်ဆုံးမှ ရေပန်းစားလျက်ရှိကြောင်း ဇွန်လ ၂၇ ရက်က ဘန်ကောက်ပို့ စ်က ရေးသား ဖော်ပြထားသည်။

ထိုင်းအုပ်ချုပ်ရေးဖွံ့ဖြိုးမှု အမျိုးသားသိပ္ပံ (NIDA) က ထုတ်ပြန်ခဲ့သည့် စစ်တမ်းတစ်ခုတွင် ပေးတုန်တန်က ထိပ်ဆုံးမှ ရေပန်း စားနေခြင်း ဖြစ်သည်။ ပေးတုန်တန်သည် သက်ဆင်၏ သမီးအငယ်ဆုံး ဖြစ်သည်။

အဆိုပါ စစ်တမ်းကို ထိုင်းနိုင်ငံတဝန်းရှိ အသက် ၁၈ နှစ်နှင့်အထက် အရွယ်ရောက်ပြီးသူ ၂၅၀၀ တို့ကို ယခုဇွန်လ ၂၀ ရက်မှ ၂၃ ရက်အထိ NIDA က ကောက်ယူ စုဆောင်းခဲ့ခြင်းဖြစ်ကြောင်း ဘန်ကောက်ပို့စ်က ဆက်လက် ရေးသားဖော်ပြသည်။

လာမည့် ဝန်ကြီးချုပ် ရာထူးအတွက် ကြိုက်နှစ်သက်ရာ လူပုဂ္ဂိုလ်ကို အဆိုပါ စစ်တမ်း ဝင်ရောက် ဖြေဆိုသူများအား ရွေးချယ် စေခဲ့ရာ ထိပ်ဆုံးမှ တစ်ပြေးခဲ့သူမှာ မစ္စ ပေးတုန်တန် ဖြစ်ကြောင်း တွေ့ရှိခဲ့ရသည်။

သက်ဆင်နဲ့ သမီးဖြစ်သူ ပေးတုန်တန်

သူမသည် ဖူထိုင်းပါတီ၏ ပေါင်းစည်းမှုနှင့်တီထွင်ဆန်းသစ်မှုဆိုင်ရာ အကြံပေးကော်မတီ၏ အကြီးအကဲအဖြစ် တာဝန်ယူထား သည်။ စစ်တမ်းဖြေဆိုသူ (၂၅ ဒသမ ၂၈ ရာခိုင်နှုန်း) က ၎င်းကို ရွေးချယ်ပေးခဲ့ကြခြင်း ဖြစ်သည်။

ဖြေဆိုသူများဘက်မှ အကြောင်းပြချက်မှာ မျိုးဆက်သစ် ဝန်ကြီးချုပ်တစ်ဦးကို တာဝန်ယူစေလိုကြောင်း၊ ဖူထိုင်းပါတီ၏ မူဝါဒ များကို လေးစားပြီး ရှင်နာဝပ်ထရာ မိသားစု ဆင်းသက်လာ၍ အနှစ်သက်ဆုံးအဖြစ် ဖြေဆိုခဲ့ခြင်းဖြစ်ကြောင်း သိရသည်။

အခြားဖြေဆိုသူ ၁၈ ဒသမ ၆၈ ရာခိုင်နှုန်းကတော့ လက်ရှိကာလတွင် မည်သူမျှ ဝန်ကြီးချုပ် ဖြစ်လာစေဖို့ မသင့်လျော် ကြောင်း ထင်မြင်ချက် ပေးခဲ့ကြသည်။
နောက်ထပ် ဒုတိယအနှစ်သက်ဆုံး လူပုဂ္ဂိုလ်မှာ ရှေ့သို့ဦးတည်(Move Forwad)ပါတီ၏ ခေါင်းဆောင် ပီတာလင်ဂျာရိုရန်ရက် (Pita Limjaroentat) ဖြစ်ပြီး စစ်တမ်း ပါဝင်ဖြေဆိုသူ ၁၃ ဒသမ ၂၄ ရာခိုင်နှုန်းက ရွေးချယ်ပေးခဲ့ခြင်းဖြစ်သည်။

အဆိုပါ ပါတီ၏ မူဝါဒများကို သဘောကျကြောင်း၊ ဝန်ကြီးချုပ် ရာထူးအတွက် အရည်အချင်း ပြည့်မီသည့် မျိုးဆက်သစ် နိုင်ငံရေးသမားတစ်ဦးဟု ယူဆကြောင်း ဖြေဆိုသူများက ပြောကြားခဲ့ကြသည်။

ပီတာလင်ဂျာရိုရန်ရက်ကို တွေ့ရစဉ်

လက်ရှိ ဝန်ကြီးချုပ်ဖြစ်သူ ဗိုလ်ချုပ်ကြီး ပရာယွက် ချန်အိုချာကတော့ ယခုစစ်တမ်းတွင် ပါဝင်ဖြေဆိုသူ ၁၁ ဒသမ ၆၈ ရာခိုင်နှုန်း၏ လိုလားမှု ရရှိခဲ့သည်။ ၎င်းသည် လက်ရှိ အာဏာရသူဖြစ်ပြီး ရိုးသားသူဟု ၎င်းတို့ယူဆကြောင်း အဆိုပါ ဖြေဆိုသူ ရာခိုင်နှုန်းက အကြောင်းပြခဲ့သည်။

ဖြေဆိုသူ ရာခိုင်နှုန်း အနည်းဆုံးရရှိခဲ့သူမှာ ထိုင်းဆမ်ထိုင်း (Thai Sang Thai) ပါတီမှ အမျိုးသမီး ခေါင်း‌ဆောင် ခွန်ယင်းစူဒါ ရက်ကေးယူရာဖန် ဖြစ်ပြီး ယခုစစ်တမ်း၏ ၆ ဒသမ ၈ ရာခိုင်နှုန်းသာ ရခဲ့သည်။ ၎င်းသည် ရိုးသား၍ အတွေ့အကြုံရှိသည့် အမျိုးသမီးကို ဝန်ကြီးချုပ် ရာထူးပေးသင့်သည်ဟု ၎င်းကို လိုလားထောက်ခံသူများက ပြောကြသည်။

ယခု ထွက်ပေါ်လာသော ရလဒ်များသည် စစ်တမ်းမျှသာ ဖြစ်သဖြင့် မိမိတို့အစိုးရအနေဖြင့် ထူးထူးခြားခြား မခံစားရကြောင်း ထိုင်းအစိုးရအဖွဲ့၏ ဒုတိယပြောရေးဆိုခွင့်ရှိသူ ရာချာဒါဒါနာဒီရစ်က သဘောထား မှတ်ချက်ပေးခဲ့သည်။

လက်ရှိ ဝန်ကြီးချုပ်ဖြစ်သူ ဗိုလ်ချုပ်ကြီး ပရာယွက် ချန်အိုချာ

“ကျမတို့ အစိုးရအနေနဲ့ ဒီကိစ္စကို ဘာမှ မခံစားမိဘူးရှင့်။ ပြည်သူတွေရဲ့ ပြဿနာတွေကိုပဲ ဖြေရှင်းပေးဖို့ ကျမတို့မှာ တာဝန်ရှိ ပါတယ်။ အတော်များများ ဖြေရှင်းပြီးပါပြီ” ဟု ၎င်းက ပြောကြားခဲ့သည်။

ထိုင်းနိုင်ငံ၏ လာမည့် အထွေထွေရွေးကောက်ပွဲသည် အလှမ်းဝေးနေသေးသဖြင့် ရွေးကောက်ပွဲ ကိစ္စနှင့်စပ်လျဉ်း၍ အထူးတ လည် စိုးရိမ်ပူပန်မှုမရှိကြောင်း လက်ရှိအာဏာရ ပလန်ပရာချာရတ်ပါတီမှ လွှတ်တော်အမတ် နီရိုတေးဆွန်သေးလေခက ပြောကြားခဲ့သည်။

Source: Bangkok Post

CNI International News

အင်ကာရာ၊ ဇွန်လ ၂၇

ယူကရိန်း အကျပ်အတည်းကို အကြောင်းပြု၍ အနောက်အုပ်စုနိုင်ငံများ ရုရှားအပေါ် ဆန့်ကျင်ပိတ်ဆို့ရေး ချမှတ်ကြရာတွင် မိမိတို့နိုင်ငံ ပူးပေါင်းပါဝင်မည် မဟုတ်ကြောင်း တူရကီသမ္မတရုံးမှ ပြောရေးဆိုခွင့်ရှိသူ အီဘရာဟင်ကလင်းက ဇွန်လ ၂၆ ရက်တွင် ပြောကြားခဲ့သည်ဟု တာ့စ်သတင်းဌာနက ရေးသားဖော်ပြသည်။

“ရုရှားနဲ့ပတ်သက်ပြီး မျှတတဲ့မူဝါဒကို ကျနော်တို့ လုပ်နေပါတယ်။ ကျနော်တို့က ဒဏ်ခတ်ပိတ်ဆို့ဖို့ လှုံ့ဆော်ပေးနေတဲ့ သူတွေနဲ့ မပူးပေါင်းပါဘူး။ ကျနော်တို့ရဲ့ ကိုယ်ပိုင်အကျိုးစီးပွား အတွက်ပဲ လိုက်နာသွားမှာပါ။ လူတိုင်းက ကိုယ့်အပေါ် ထိခိုက် မှု ရှိရင်တော့ ဘယ်သူက ရုရှားနဲ့ သွားစကားပြောတော့မှာလဲဗျာ။ ရုရှားနဲ့ကျနော်တို့ စီးပွားရေးအရ ဆက်ဆံမှုမှာ ရုရှားအကျိုး ထက် ကျနော်တို့ တူရကီအကျိုး ပိုထိခိုက်မယ့် အနေအထား ရှိနေပါတယ်။ အဲဒီတော့ ကျနော်တို့ ရပ်တည်ချက်က ရှင်းပါ တယ်။ အနောက်အုပ်စု သဘောထားအတိုင်း လက်မခံပါဘူး” ဟု ၎င်းက Haberturk ရုပ်သံလိုင်းနှင့် တွေ့ဆုံမေးမြန်းခန်းတွင် ပြောကြားသွားခဲ့သည်။

ရုရှားရဲ့ ရေနံထိန်းချုပ်ရေး ဆွေးနွေးခဲ့ကြတဲ့ G7 ခေါင်းဆောင်များ (AP)

ရုရှားသည် ယူကရိန်းကို ဖေဖော်ဝါရီလက ကျူးကျော်စစ်ကို စတင်ခဲ့ခြင်းကြောင့် ဉရောပနှင့် အနောက်နိုင်ငံများက စီးပွားရေး ပိတ်ဆို့ အရေးယူမှုများ ချမှတ်လျက်ရှိသလို ပိုမို ပြင်းထန်သည့် ပိတ်ဆို့မှုများ ပြုလုပ်နိုင်ရေး ဆွေးနွေးလျက်ရှိနေကြသည်။

ထို့နောက် အထူးသဖြင့် ရေနံနှင့်သဘာဝဓာတ်ငွေ့ရနေ ရရှိနေသော အကျိုးအမြတ်များကို ထိန်းချုပ်နိုင်ရန်အတွက် G-7 ခေါင်းဆောင်များ ဆွေးနွေးခဲ့ကြသည်။

Source: တာ့စ်သတင်းဌာန