CNI International News

အင်ဖာ၊ ဇွန်လ ၂၃

မကြာသေးမီ ကာလများ၌ အိန္ဒိယဗဟိုအစိုးရ၏ မူဝါဒများသည် နိုင်ငံသားများအပေါ် ခွဲခြားဆက်ဆံစေခြင်းသို့ ဦးတည်စေ ကြောင်း၊ အချို့လူမှု အသိုင်းအဝိုင်းများကို ဆက်ဆံရာတွင် တရားမျှတမှုမရှိကြောင်း ကူကီးကျောင်းသားများအဖွဲ့ (Kuki Students' Organisation -KSO) မှ ချူရာချန်ပူရ်က ဇွန်လ ၂၁ ရက်၌ ဝေဖန်ခဲ့သည်ဟု The Frontier Manipur သတင်း ဝက်ဘ်ဆိုက်တွင် ရေးသားဖော်ပြထားသည်။

“မျှတမှုမရှိသော ကုစားမှုများသည် မဏိပူရ်ပြည်နယ်အတွင်း မတူညီသော အသိုင်းအဝိုင်းများအကြား စိတ်ပိုင်းဆိုင်ရာ သိမ်ငယ်စေပြီး သဘောထားကွဲလွဲမှုများ တိုးပွားလာစေကြောင်း ၎င်းက ထပ်လောင်း ပြောကြားခဲ့သည်။

ယခုနှစ် အစောပိုင်း၌ ဒေသခံများ၏ ဒုတိယအကြိမ် ရွေးကောက်တင်မြှောက်ခြင်းခံရသူ အင်န်ဘီရမ်ဆင်း (N Biren Singh) ဦးဆောင်သော မဏိပူရ်ပြည်နယ်အစိုးရသည် ပြည်နယ်အတွင်း ခွဲခြားဆက်ဆံနေကြောင်း ကူကီးကျောင်းသားများအဖွဲ့က ဝေဖန်လာခဲ့ခြင်း ဖြစ်သည်။

မဏိပူရ်ပြည်နယ်သည် နယ်မြေအတွင်း လူမျိုးပေါင်းစုံ အတူတကွ နေထိုင်ကြသော အိန္ဒိယနိုင်ငံ အသေးစားဖြစ်ပြီး ဗြိတိသျှ ကိုလိုနီဘဝက နိုင့်ထက်စီးနင်း ပိုင်းခြား သတ်မှတ်ခြင်း ခံခဲ့ရကြောင်း၊ အိန္ဒိယအစိုးရ အဆက်ဆက်၏ အလွန်မြတ်နိုး တန်ဖိုး ထားသော မတူကွဲပြားမှုအောက်၌ စည်းလုံးညီညွတ်သည့် အစဉ်အလာအတိုင်း ပြည်နယ်သူ၊ ပြည်နယ်သူများ အတူယှဉ်တွဲ နေထိုင်ခဲ့ကြောင်း KSO အဖွဲ့က ပြောကြားခဲ့သည်။

အမေရိကန်နိုင်ငံသာ လူ့အခွင့်အရေး တက်ကြွလှုပ်ရှားသူ မာယာအိန်ဂယ်လု၏ ပြောကြားချက်ဖြစ်သော “မတူကွဲပြားမှု၌ အလှတရားနှင့် ခွန်အားရှိသည်” ဟူသော အယူအဆကို KSO ကျောင်းသားအဖွဲ့က ကိုးကားထောက်ပြခဲ့ကြသည်။

မဏိပူရ်ပြည်နယ်၊ အင်ဖာမြို့က  တက္ကသိုလ်တစ်ခု

နိုင်ငံအတွင်း မတူကွဲပြားမှုကို ထိန်းသိမ်း လုပ်ဆောင်နိုင်ခြင်းကြောင့် လူ့အဖွဲ့အစည်းနှင့် စီးပွားရေးကဏ္ဍ အသီးသီး ဖွံ့ဖြိုး တိုးတက်လာပြီး မိမိတို့၏ ခြားနားသော ဘဝအလွှာပေါင်းစုံကို ရှေ့သို့ တွန်းပို့ပေးခဲ့ကြောင်း KSO က ယုံကြည်ထားသည်။

“ဘယ်လိုပဲဖြစ်ဖြစ် ကျနော်တို့နိုင်ငံရဲ့ သမိုင်းက မတူကွဲပြားမှုတွေကို တရားမျှတစွာနဲ့ အားလုံး ပါဝင်နိုင်တဲ့ နည်းလမ်း (the most inclusive way) သုံးပြီး ဂရုတစိုက် စီမံခန့်ခွဲရမယ်ဆိုတာ ကျနော်တို့ကို သင်ကြားပေးခဲ့ပါတယ်” ဟု KSO အဖွဲ့က ထပ် လောင်း ပြောကြားခဲ့သည်။

မဏိပူရ်ပြည်နယ် အာဏာပိုင်များသည် ရှုပ်ထွေးပွေလီလှသော ဌာနေတိုင်းရင်းသားများ ဆက်ဆံရေးကို ထိန်းသိမ်းရမည့် အစား ဗဟိုအစိုးရဘက်မှ ရပ်တည်ရန် ရွေးချယ်ခဲ့ကြောင်း၊ ပြည်နယ်အတွင်း အမုန်းစကားများနှင့် ပတ်သက်၍ ကိုင်တွယ်ပုံကို ကြည့်ပြီး အာဏာပိုင်များ၏ သဘောထားကို ထင်ရှားစွာ တွေ့နိုင်ကြောင်း ၎င်းအဖွဲ့က ဝေဖန်ခဲ့သည်။

ထို့ပြင် အချို့သော အသိုင်းအဝိုင်းများမှ ဒုစရိုက်မှုကျူးလွန်သူများကို ပြည်နယ်ရဲတပ်ဖွဲ့သို့ တိုင်ကြားမှု အများအပြား ရှိသော် လည်း အကြိမ်ကြိမ် ပြစ်ဒဏ်မှ လွတ်ငြိမ်းသာခွင့် ပေးလျက်ရှိသည်။

မဏိပူရ်ပြည်နယ်၊ အင်ဖာမြို့တွင်းတစ်နေရာ

အခြားတဖက်တွင်မူ တောင်ပေါ်သားများ အထူးသဖြင့် ကူကီးလူမျိုးများ ကျူးလွန်သည့် ပြစ်မှုမျိုးဆိုလျှင် ပါဝင် ပတ်သက် သူများက တောင်းဆိုခြင်း မရှိသော်လည်း အာဏာပိုင်များ လိုလားသည့်အတိုင်း တရားစွဲဆို အရေးယူနေကြသည်။

ထိုသို့ မမျှတသော စွဲချက်များဖြင့် ဖမ်းဆီးထောင်ချခြင်းကို စိတ်ပျက်မိကြောင်း KSO ကျောင်းသားများအဖွဲ့က ကြေညာချက် တစ်စောင် ထုတ်ပြန်ခဲ့သည်။

“တိုင်းရင်းသားတွေရဲ့ စိတ်ဓာတ်တွေကို တည်ငြိမ်အောင်လုပ်ဖို့ ခြေလှမ်းတွေ ပြည်နယ်အစိုးရက မလှမ်းဘူးဆိုရင် လူမျိုးရေး ပဋိပက္ခတွေ ဖြစ်ဦးမှာပဲ” ဟု အဆိုပါ ကြေညာချက်တွင် သတိပေးထားသည်။

Source: The Frontier Manipur

CNI International News

မနီလာ၊ ဇွန်လ ၂၃

ဖိလစ်ပိုင်နိုင်ငံ၊ ကွီဇွန်ပြည်နယ်၊ လိုပက်ဇ်ဒေသရှိ အမှတ် ၈၅ ခြေမြန်တပ်ရင်းထံသို့ ပြည်သူ့တပ်မတော်သစ် (NPA) အမည်ရှိ ကွန်မြူနစ်သူပုန်အဖွဲ့ဝင် ၃ ဦး လက်နက်ချခဲ့ကြောင်း ဖိလစ်ပိုင်တပ်မတော် (AFP) က ဇွန်လ ၂၁ တွင် ကြေညာခဲ့သည်ဟု ဖိလစ်ပိုင်သတင်းဌာန (PNA) က သတင်းဖော်ပြခဲ့သည်။

အဆိုပါ NPA သူပုန် ၃ ဦးသည် M-14 မောင်းပြန်ရိုင်ဖယ်တစ်လက်၊ ကာဘိုင်တစ်လက်နှင့် ခဲယမ်းမီးကျောက်များ ကို မိမိတို့ထံ အပ်နှံခဲ့ကြောင်း ဖိလစ်ပိုင်တပ် (AFP) ပြည်သူ့ရေးရာရုံးအဖွဲ့မှူး ဗိုလ်မှူးကြီးဂျော်ရီဘက္ကလာက ကြေညာချက်တစ်စောင်တွင် ပြောကြားခဲ့သည်။

“သူတို့ကို အမှတ် ၈၅ ခြေမြန်တပ်ရင်းနဲ့ လိုပက်ဇ်စည်ပင်သာယာရဲစခန်းကို တရားဝင်လွှဲပေးခဲ့ပါတယ်။ စည်ပင် ကနေ မြို့တော်ဝန်ဆီကို ဆက်ပို့ရမှာပါ။ မြို့တော်ဝန်က လက်ရှိမှာ ပြည်တွင်းကွန်မြူနစ် လက်နက်ကိုင် ပဋိပက္ခ ချုပ်ငြိမ်းရေး စည်ပင်အလုပ်အဖွဲ့ရဲ့ဥက္ကဋ္ဌ တာဝန်လည်းယူထားပါတယ်” ဟု ဂျော်ရီဘက္ကလာက ရှင်းပြခဲ့သည်။
စည်ပင်ရုံးသည် လက်နက်ချလာသူများကို ကနဦးငွေကြေးအထောက်အပံ့နှင့် လယ်ယာသုံးပစ္စည်းများ၊ စက် ကိရိယာများ ပေးအပ်ခဲ့ကြောင်း ၎င်းက ဆက်လက်ပြောကြားခဲ့သည်။

ဖိလစ်ပိုင်ကွန်မြူနစ်ပါတီ၏ ပြည်သူ့တပ်မတော်သစ် (CPP-NPA) တပ်ဖွဲ့ဝင်များအား တွေ့ရစဉ်(ဓါတ်ပုံ-AFP)

စည်ပင်မြို့တော်ဝန်သည် ယခင်ကလည်း အလားတူလက်နက်ချလာသူများကို အခမဲ့ပညာရေး၊ အသက်မွေး ဝမ်းကျောင်းနှင့် အိမ်ရာအကူအညီများ ပေးခဲ့သည်။

ယခုအခါ ဖိလစ်ပိုင်အစိုးရဌာနများသည် ပိုမိုကောင်းမွန်သော ဘက်စုံဒေသဆိုင်ရာပေါင်းစည်ရေးအစီအစဉ် (E-CLIP) အောက်တွင် အကျိုးခံစားခွင့်ရှိသူများစာရင်းထဲသို့ ယခင်လက်နက်ချသူပုန်များလည်း ပါဝင်နိုင်အောင် လိုအပ်သောစာရွက်စာတမ်းများ ပြုလုပ်ပေးနေသည်။

ဖိလစ်ပိုင်နိုင်ငံရှိ လက်နက်ကိုင်သူပုန်အဖွဲ့ဖြစ်သော ဖိလစ်ပိုင်ကွန်မြူနစ်ပါတီ၏ ပြည်သူ့တပ်မတော်သစ် (CPP-NPA) ကို အမေရိကန်၊ ဥရောပသမဂ္ဂ (EU)၊ ဗြိတိန်၊ ဩစတြေးလျ၊ ကနေဒါ၊ နယူးဇီလန်နှင့် ဖိလစ်ပိုင်အစိုးရတို့က အကြမ်းဖက်အဖွဲ့စာရင်းထဲသို့ သွင်းထားကြသည်။

အစိုးရ၏ အကြမ်းဖက်မှုတိုက်ဖျက်ရေးကောင်စီသည် အမျိုးသားဒီမိုကရေစီတပ်ဦး (NDF) ကိုလည်း အကြမ်းဖက် အဖွဲ့အဖြစ် ၂၀၂၁ ခုနှစ်၊ ဇွန်လ ၂၃ ရက်တွင် တရားဝင်သတ်မှတ်ခဲ့သည်။ ထို့ပြင် ၁၉၇၃ ခုနှစ်၊ ဧပြီလတွင် စတင် တည်ထောင်ခဲ့သော CPP-NPA ၏စိုးမိုးနယ်မြေများကိုလည်း “ဖိလစ်ပိုင်၏လုံးဝခွဲထွက်၍ မရသောအစိတ်အပိုင်း များ”အဖြစ် အဆိုပါကောင်စီက ကြေညာခဲ့သည်။

Source: Philippine News Agency

CNI International News

အတ္တလန္တာ၊ ဇွန်လ ၂၂

အမေရိကန်နိုင်ငံ၊ ဂျော်ဂျီယာပြည်နယ်၊ ဒီမိုကရက်တစ် ပါတီဝင်များသည် ပြည်နယ် လွှတ်တော်အမတ် ဘီးငုယင် (Bee Nguyen) ကို ၎င်းတို့ပြည်နယ်၏ နိုင်ငံခြားရေးဝန်ကြီးအဖြစ် ရွေးချယ်လျာထားခဲ့ကြောင်း အေပီသတင်းအရ သိရသည်။

ဂျော်ဂျီယာ၏ ၂၀၂၀ ပြည့်နှစ် ရွေးကောက်ပွဲ ရလဒ်အပေါ် လိမ်လည် လှည့်ဖြားမှုများ ရှိခဲ့သည်ဟု မဲဆန္ဒရှင်များ တိုင်ကြားကြ ကြောင်း သမ္မတဟောင်း ဒေါ်နယ်ထရမ့်က ဝေဖန်ခဲ့ပြီးနောက် ယခုကဲ့သို့ ဘီးငုယင်အတွက် အရေးပါသည့် ရာထူးရွေးချယ်မှု ပေါ်ပေါက်လာခဲ့သည်။

ငုယင်သည် ပြည်နယ်လွှတ်တော် အမတ်ဟောင်း ဒီးဒေါ်ကင်စ်ဟိုဂလာ (Dee Dawkins Haigler) နှင့် ဇွန်လ ၂၁ ရက်က ယှဉ်ပြိုင် အရွေးချယ်ခံခဲ့ရာ အနည်းအငယ် အသာစီးဖြင့် အနိုင်ရသွားခဲ့သည်။ ၎င်းသည် ရီပတ်ဘလစ်ကန်မှ လက်ရှိ နိုင်ငံခြား ရေးဝန်ကြီး ဘရတ်ရာဖင်စပါဂါ (Brad Raffensperger) ကို လာမည့် နိုဝင်ဘာလ အထွေထွေရွေးကောက်ပွဲတွင် ထပ်မံ စိန်ခေါ်ရန် ပြင်ဆင်ထားသည်။

“ကျမတို့ ပြည်နယ်ရဲ့သမိုင်းမှာ ပထမဆုံးအနေနဲ့ အာရှနွယ်ဖွား အမေရိကန် နိုင်ငံသူတစ်ဦးဟာ ပြည်နယ်တဝန်းအတွက် လျာထားခံရတော့မှာ ဖြစ်ပါတယ်” ဟု ဗီယက်နမ်မှ အမေရိကန်သို့ ပြောင်းရွှေ့ နေထိုင်သူတစ်ဦး၏ သမီးဖြစ်သူ ငုယင်က သူမအား ထောက်ခံသူများကို ဇွန်လ ၂၁ ရက်၊ ညပိုင်းတွင် ပြောကြားခဲ့သည်။

အမတ်ဟောင်း ဒီးဒေါ်ကင်စ်ဟိုဂလာနဲ့ ငုယင်ကိုတွေ့ရစဉ်

“ဒီမဲဆွယ်တဲ့ လမ်းကြောင်းကို ၁၄ လကြာအောင် လျှောက်လှမ်းဖို့ မေးခွန်းကတော့ အာရှနွယ်ဖွား ကိုယ်စားလှယ်လောင်းကို ဂျော်ဂျီယာသူ၊ ဂျော်ဂျီသားတွေ မဲပေးကြမှာလားဆိုတာပါ။ အဖြေကတော့ ဟုတ်ပါတယ်ပေါ့။ ဂျော်ဂျီယာပြည်နယ်သူ၊ ပြည်နယ်သားတွေ တကယ်ပဲ မဲပေးကြတော့မှာပါ” ဟု ၎င်းက ဆက်လက် ပြောကြားခဲ့သည်။

တစ်ချိန်တည်းမှာပင် ရီပတ်ဘလီကန် အမတ်များသည် ပြည်နယ်တစ်ခုလုံး အတိုင်းအတာဖြင့် ယှဉ်ပြိုင်ခြင်း မရှိသော်လည်း ကွန်ဂရက်(ပြည်နယ်လွှတ်တော်) ၄ နေရာ၌ ဝင်ရောက်ယှဉ်ပြိုင်ခဲ့ကြသည်။

ထရမ့်သည် ထိုသို့ ယှဉ်ပြိုင်မှု နှစ်ကြိမ်စလုံးအတွက် ၎င်း၏ ကိုယ်စားလှယ်လောင်းများကို ထောက်ခံခဲ့သော်လည်း ၎င်းတို့ နှစ်ဦးမှာ ရှုံးနိမ့်သွားခဲ့သည်။

အတ္တလန္တာမြို့၏ အရှေ့ဘက်ရှိ လွှတ်တော်ခရိုင် မဲဆန္ဒနယ်တွင် ၁၀ ကြိမ်မြောက် ယှဉ်ပြိုင်မှု ပြုလုပ်ခဲ့ရာတွင်တော့ ကုန်တင် ယာဉ် ကုမ္ပဏီပိုင်ရှင် မိုက်ကော်လင်းက ဒီမိုကရက်တစ် အမတ်ဟောင်း ဗာနွန်ဂျုံးစ်ကို အနိုင်ခဲ့သည်။ မိုက်ကော်လင်းသည် ရီပတ်ဘလစ်ကန် အမတ်များထဲမှ ဆန်ခါတင် အရွေးချယ်ခံရရန် တကျော့ပြန် ယှဉ်ပြိုင်ရာ၌ ထရမ့်က ထောက်ခံ အားပေးခဲ့ သူ ဖြစ်သည်။

လက်ရှိ နိုင်ငံခြား ရေးဝန်ကြီး ဘရတ်ရာဖင်စပါဂါကို တွေ့ရစဉ်

ထရမ့်နှင့် ၎င်း၏မဟာမိတ်များက ဂျော်ဂျီယာပြည်နယ်တွင် မဲကိစ္စ လိမ်လည်မှုဆိုင်ရာ တောင်းဆိုမှုများအတွက် တွန်းအား ပေး နေခဲ့ကြသော်လည်း ငုယင်က လွှတ်တော်အမတ် စုံညီအစည်းအဝေး၌ မှားယွင်းသော ဇာတ်ကြောင်း ဖန်တီးမှုများကို ချေဖျက်ရန်နှင့် မဲပေးခွင့်အတွက် ရပ်တည်ရန် သူမ၏ လုပ်ဆောင်ချက်များကို မီးမောင်းထိုးပြခဲ့သည်။

“ဘရတ်ရာဖင်စပါဂါဟာ ကျမတို့ မိတ်ဆွေ မဟုတ်တဲ့ အကြောင်းနဲ့ ကျမကပဲ ဒီနေရာ ထိုက်တန်တဲ့အကြောင်း ဂျော်ဂျီယာသူ၊ ဂျော်ဂျီသားတွေကို ကျမတို့က သတိပေးသွားမှာ ဖြစ်ပါတယ်” ဟု ငုယင်က ၎င်းအားထောက်ခံသူများကို ပြောကြားခဲ့သည်။

ငုယင်သည် အတ္တလန္တာမြို့၏ အစိတ်အပိုင်းဖြစ်သော ခရိုင်တစ်ခု၏ ၂၀၁၇ ခုနှစ် သီးခြား ရွေးကောက်ပွဲတွင် ပြိုင်ဘက်ဖြစ်သူ စတာဆေးအေဘရမ်စ် (Stacey Abrams) ကို အနိုင်ရရှိခဲ့ပြီးနောက် ဂျော်ဂျီယာပြည်နယ် အောက်လွှတ်တော်တွင် တာဝန် ထမ်းဆောင်ခဲ့သည်။ ထို့နောက် ပြည်နယ်၏ ဒီမိုကရက်တစ်ပါတီတွင် ဒုတိယဥက္ကဋ္ဌ ဖြစ်လာခဲ့သည်။

Source: AP

CNI International News

ဝါရှင်တန်၊ ဇွန်လ ၂၂

အမေရိကန်နိုင်ငံတွင် စံချိန်တင်ဓာတ်ငွေ့ဈေးတက်ခြင်းအတွက် အမေရိကန်လူမျိုး ၁၁ ရာခိုင်နှုန်းကသာ ပူတင်ကို အပြစ်တင်ကြောင်း ရာစမုဆက်တက္ကသိုလ် (Rasmussen) က ကောက်ယူပြီး ဇွန်လ ၂၁ ရက်တွင် ထုတ်ပြန်သော စစ်တမ်းတစ်စောင်အရ သိရသည်။

ယခင်သီတင်းပတ်၌ ကောက်ယူခဲ့သော ရာစမုဆက်စစ်တမ်းတွင် ပါဝင်ဖြေဆိုသူ ထက်ဝက်ကျော်ဖြစ်သည့် ၅၂ ရာခိုင်နှုန်းက ဘိုင်ဒန်၏စွမ်းအင်မူဝါဒ ညံ့ဖျင်းမှုကို ထောက်ပြခဲ့ကြကြောင်း အာရ်တီသတင်းဌာနက ရေးသား ဖော်ပြသည်။ အမေရိကန်ပြည်တွင်း၌ ဓာတ်ငွေ့ဈေးတက်ခြင်းမှာ ရုရှားသမ္မတ ပူတင်ကြောင့်ဟု ဘိုင်ဒန်အစိုးရ၏ အကြောင်းပြချက်သည် လူထုကို ဖမ်းစားနိုင်ပုံ မရပေ။

ဘိုင်ဒန်ကိုရော ပူတင်ကိုပါ အပြစ်မတင်သူများကတော့ ရေနံကုမ္ပဏီများကို လက်ညိုးထိုးခဲ့ကြပြီး အဆိုပါ ကုမ္ပဏီလုပ်ငန်းရှင်များသည် လက်ရှိပထဝီဝင်နိုင်ငံရေးမတည်ငြိမ်မှုကို ၎င်းတို့ဈေးကစားရန်အတွက် အသုံးချ နေကြကြောင်း စစ်တမ်းဖြေဆိုသူ ၂၉ ရာခိုင်နှုန်းက ထောက်ပြခဲ့သည်။

ရေနံနှင့်သဘာဝဓာတ်ငွေ့ကုမ္ပဏီများ၏ မီးလောင်ရာလေပင့် ဈေးတက်ကြခြင်းအတွက် “လုပ်ငန်းရှင်များသည် နတ်ဘုရားထက် ငွေပိုဖန်တီးနိုင်ကြကြောင်း” အမေရိကန်သမ္မတ ဘိုင်ဒန်ကလည်း စွပ်စွဲခဲ့သည်။

ရေနံကုမ္ပဏီများသည် တူးဖော်ရရှိနေလျက်နှင့်ပင် တမင်တကာ ဈေးကိုင်နေကြကြောင်း၊ အကြောင်းမှာ လောင်စာ ဆီ များများမထုတ်ဘဲ ပိုက်ဆံပိုလိုချင်နေကြ၍ဖြစ်ကြောင်း သမ္မတဘိုင်ဒန်က အခိုင်အမာပြောကြားခဲ့သည်။

ရုရှား၏ ရေနံနှင့်သဘာဝဓာတ်ငွေ့ တင်သွင်းမှုကို ပြီးခဲ့သည့် မတ်လမှစတင်၍ အမေရိကန်က တားမြစ်ခဲ့သော် လည်း မော်စကိုသည် ထိုကာလမတိုင်မီကပင် ၎င်း၏ရေနံ ၂ ရာခိုင်နှုန်းကိုသာ တင်သွင်းခဲ့သည်။

အမေရိကန်သည် သာ အသားတင်ဓာတ်ငွေ့တင်ပို့သူဖြစ်နေခဲ့သည်။ သို့ဖြစ်၍ ယခုလောင်စာဆီစရိတ် ဈေးတက်ခြင်းအတွက် ရုရှားတွင် တာဝန်ရှိသည်ဟူသော အဆိုပြုချက်ကို ထောက်ခံသူမှာ အနည်းငယ်သာ မြင်တွေ့ရသည်။

ဓာတ်ငွေ့ဈေးနှုန်းသည် အရေးကြီးပြဿနာတစ်ရပ်ဆီသို့ ဦးတည်နေကြောင်း ကျယ်ကျယ်ပြန့်ပြန့် ရှုမြင်ကြပြီး ဇွန်လ ၂၁ ရက် ထုတ်ပြန်သော ယခုစစ်တမ်းအရ ပါဝင်ဖြေဆိုသူ ၉၂ ရာခိုင်နှုန်းက ဓာတ်ငွေ့နှင့်လောင်စာဆီ ဈေးတက်ခြင်းသည် သက်ရောက်မှုပြင်းထန်ကြောင်း ပြသခဲ့ကြသည်။ အခြား ၆၈ ရာခိုင်နှုန်းကတော့ အဆိုပါ ပြဿနာမှာ အလွန်ဆိုးရွားလာပြီဟု ကောက်ချက်ချခဲ့ကြသည်။

လာမည့်နိုဝင်ဘာတွင် ကျင်းပမည့် ရွေးကောက်ပွဲနှင့်အတူ စီးပွားရေး အလှည့်အပြောင်း မလုပ်ပြနိုင်လျှင် ဒီမိုကရက်တစ်ပါတီသည် မဲဆန္ဒရှင်များ၏ စီးပွားရေးမပြေလည်မှုအတွက် အပြစ်တင်ခံနိုင်ရပြီး ကွန်ဂရက် (လွှတ်တော်) နှစ်ရပ်စလုံးသည် ရီပတ်ဘလစ်ကန်တို့၏ ထိန်းချုပ်မှုအောက်သို့ ကျရောက်သွားနိုင်စရာ များနေသည်။

Source: အာရ်တီသတင်းဌာန

CNI International News

ကိယက်ဗ်၊ ဇွန်လ ၂၂

ဂျာမနီအစိုးရ၏လက်နက်ကြီးကူညီရန် ကတိအတိုင်း ဂျာမနီလုပ် မောင်းသူမဲ့ဟောင်ဝစ်ဇာများ မိမိတို့နိုင်ငံထဲသို့ ပထမဆုံးရောက်ရှိလာပြီဟု ယူကရိန်းကာကွယ်ရေးဝန်ကြီးက ဇွန်လ ၂၁ ရက်တွင် ပြောကြားခဲ့ကြောင်း ရိုက်တာ သတင်းဌာနက ရေးသားဖော်ပြသည်။

ရုရှားနှင့် ရင်ဆိုင်နေချိန်အတွင်း ပြည်တွင်းလက်ကျန် ဆိုဗီယက်ခေတ် လက်နက်ခဲယမ်းမီးကျောက်များ ပြတ်လပ် တော့မည်ဖြစ်သဖြင့် ယူကရိန်းက အနောက်အုပ်စုနိုင်ငံများထံသို့ ပိုမိုကောင်းမွန်သည့်အမြောက်များ ပေးပို့ကြပါရန် ပန်ကြားထားသည်။

“ကျနော်တို့ အင်အားဖြည့်တာ လုပ်နေပါတယ်။ လေ့ကျင့်သင်ကြားပြီးဖြစ်တဲ့ ယူကရိန်းစစ်မှုထမ်းတွေနဲ့အတူ ဂျာမန်လုပ် (ပန်ဇာဟောင်ဘစ်ဇာ) Panzerhaubitze 2000 ဟာ ယူကရိန်း အမြောက်တပ်မိသားစုနဲ့ ပူးပေါင်းမိ ပါပြီ” ဟု ယူကရိန်းကာကွယ်ရေးဝန်ကြီး အိုလက်စီရက်နီကော့ဗ်က လူမှုကွန်ရက်မီဒီယာတွင် ပြောကြားခဲ့သည်။

Panzerhaubitze 2000 သည် ဘွန်ဒက်စပီယာ (Bundeswehr) ဟု ခေါ်သည့် ဂျာမနီလက်နက်ကိုင်တပ်များရှိ အစွမ်းထက်ဆုံး အမြောက်လက်နက်များထဲမှ တစ်ခုဖြစ်ပြီး ကီလိုမီတာ ၄၀ (၂၅ မိုင်) အကွာအဝေးရှိ ပစ်မှတ် များကို တိကျစွာ ထိမှန်နိုင်သည်။

ဂျာမနီသည် ကိယက်ဗ်အစိုးရအတွက် ဟောင်ဝစ်ဇာ ၇ စင်းပေးအပ်ရန် ပြီးခဲ့သည့်မေလ၌ ကတိပြုခဲ့သည်။ အလားတူ နယ်သာလန်ကလည်း အဆိုပါအမြောက်စနစ် ၅ မျိုး ကို ကိယက်ဗ်အတွက် ထပ်လောင်းကတိပြု ခဲ့သည်။

ဂျီပက် (Gepard) တင့်ကား အစီး ၃၀ နှင့် မာ့စ်တူး (MARS II) ဒုံးပစ်လောင်ချာ ၃ ခုနှင့် ပခုံးထမ်းပစ် စတင်ဂါ (Stinger) ဒုံးကျည် ၅၀၀ အပါအဝင် ဂျာမနီ၏ကတိပြုထားသည့် လက်နက်စာရင်းတို့ကို ယူကရိန်းသမ္မတရုံး အကြီးအကဲ အန်ဒရေးယာမက် (Andriy Yermak) က ထုတ်ပြန်ကြေညာခဲ့သည်။

ရုရှားတပ်များကို ခုခံချေမှုန်းရန်အတွက် အခြားလက်နက်ကြီးများအပါအဝင် ဟောင်ဝစ်ဇာ ၁၀၀၀၊ တင့်ကား အစီးရေ ၅၀၀ နှင့် ဒရုန်းအစင်းရေ ၁၀၀၀ လိုအပ်ကြောင်း ကိယက်ဗ်အစိုးရက ယခင်ကတည်းက ပြောကြားခဲ့ပြီး ဖြစ်သည်။ ရုရှားသည် ယူကရိန်းပိုင်နက်ထဲသို့ ဖေဖော်ဝါရီ ၂၄ ရက်မှ စတင်၍ ကျူးကျော် တိုက်ခိုက်နေခဲ့ပြီး နယ်မြေ ၂၀ ရာခိုင်နှုန်းကို သိမ်းယူခဲ့သည်။

ယူကရိန်းနိုင်ငံသို့ တွဲဆွဲ ဟောင်ဝစ်ဇာအမြောက်များ ထောက်ပံ့သော အခြားနိုင်ငံများကတော့ အမေရိကန်၊ ဗြိတိန်၊ ပြင်သစ်၊ နော်ဝေနှင့် ပိုလန်တို့ ဖြစ်ကြသည်။

Source: Reuters

CNI International News

ဘိုဂိုတာ၊ ဇွန်လ ၂၁

ကိုလံဘီယာသမ္မတသစ် ဂူတာစတာဘိုပီထရိုကို စစ်ရေး၊ စီးပွားရေး ဈေးကွက်၊ လက်နက်ကိုင် သူပုန်များနှင့် ဆယ်စုနှစ်များ စွာကြာ ဖြစ်ပွားနေခဲ့သည့် ပဋိပက္ခများ ချုပ်ငြိမ်းရေး၊ လွှတ်တော်(ကွန်ဂရက်)ထဲတွင် လုံလောက်စွာ ထောက်ခံမှု ရရှိရေး စသည့် စိန်ခေါ်မှုများက အသင့်စောင့်ဆိုင်းနေသည်။

ထိုအရေးကိစ္စတို့မှာ အသက် ၆၂ နှစ်အရွယ်ရှိ ပြောက်ကျား လက်နက်ကိုင်ဟောင်းဖြစ်ခဲ့သူ သမ္မတသစ်အတွက် အဓိက ကိုင်တွယ် ဖြေရှင်းရမည့် ပြဿနာများ ဖြစ်ကြကြောင်း အေအက်ဖ်ပီ သတင်းဌာနက ဇွန်လ ၂၀ ရက်တွင် ရေးသားဖော်ပြ သည်။

ပီထရို၏ သမ္မတ ကျမ်းသစ္စာ ကျိန်ဆိုပွဲ ကျင်းပသည့်အခါ လက်ရှိ စစ်ဦးစီးချုပ်က နိုင်ငံတစ်နိုင်ငံရှိ ပြောက်ကျားဟောင်း တစ်ဦးအပေါ် သစ္စာစောင့်သိပါမည်ဟု ပါဝင် ကတိပြု ပေးရမည် ဖြစ်သည်။ ကိုလံဘီယာ စစ်တပ်သည် လက်ဝဲ သူပုန် ပြောက်ကျားများကို ဆယ်စုနှစ် ၆ ခု ကြာ တိုက်ခိုက်နှိမ်နင်းခဲ့သည်။

ထို့ပြင် ပြီးခဲ့သည့် ဧပြီလကလည်း စစ်တပ် ထိပ်ပိုင်း ခေါင်းဆောင်များသည် ကိုလံဘီယာ၏ အကြီးဆုံး မူးယစ်ဂိုဏ်းဖြစ်သော Gulf Clan နှင့် မဟာမိတ်ဖွဲ့ထားကြောင်း ပီထရိုက စွပ်စွဲခဲ့သည်။

ထိုစွပ်စွဲချက်နှင့် ပတ်သက်၍ စစ်တပ် ဗိုလ်ချုပ်ကြီး အဂွါဒိုဇာပစ်ထရိုက “နိုင်ငံရေးသမား၏လေလုံး” သာဖြစ်ကြောင်း တုံ့ပြန်ခဲ့သည်။

 ကိုလံဘီယာသမ္မတသစ် ဂူတာစတာဘိုပီထရို ကိုတွေ့ရစဉ် (AP)

ထိုသို့ တုံ့ပြန် ပြောဆိုခြင်းသည် လုံခြုံရေးသာ တာဝန်ယူရသော လက်နက်ကိုင် တပ်ဖွဲ့ဝင်များအတွက် နိုင်ငံရေး ဆွေးနွေး ငြင်းခုံခြင်း (သို့မဟုတ်) မဲပေးခြင်းတို့တွင် မပါဝင်ရန် တားမြစ်ထားသော ဖွဲ့စည်းပုံအခြေခံဥပဒေပါ စည်းမျဉ်းကို ချိုးဖောက်ရာ ရောက်ခဲ့သည်။

“အခု သမ္မတသစ်နဲ့ စစ်တပ်အကြား အယုံအကြည် မရှိကြတဲ့ ပြဿနာဟာ ထင်ရှားပါတယ်။ စစ်တပ်က လေးစားမှုရှိပြီး ကွပ်ကဲရေးအပိုင်း ယုံကြည်စိတ်ချရတဲ့ သူတစ်ဦးဦးကို ပီထရိုကနေ ကာကွယ်ရေးဝန်ကြီးအဖြစ် ခန့်ပေးမှာပါ။ အဲဒီလိုမှ မဟုတ်ရင် အသွင်ကူးပြောင်းရေး ကာလမှာ ရှုပ်ထွေးသွားနိုင်တယ်” ဟု ကိုလံဘီယာ စွန့်စားမှုဆိုင်ရာ ဆန်းစစ် အတိုင်ပင်ခံ လုပ်ငန်း၏ ဥက္ကဋ္ဌ ဆာဂျီယိုဂက်ဇ်မန်းက ပြောကြားခဲ့သည်။

သမ္မတသစ် တက်လာသည့်အခါ စစ်တပ်ထိပ်ပိုင်း၏ အမိန့်များကို ရှင်းလင်းသုတ်သင်ရမည်မှာ ပုံမှန် လုပ်ဆောင်ချက်သာ ဖြစ်ကြောင်း လော့အင်ဂျလိစ်တက္ကသိုလ်မှ နိုင်ငံရေးသိပ္ပံပါမောက္ခ ဖဲလစ်ဘိုတာရိုက မှတ်ချက်ချခဲ့သည်။

သို့သော် ပီထရိုအနေဖြင့် သိမ်မွေ့စွာ ကိုင်တွယ်ဖို့ လိုကြောင်း ၎င်းက ဖြည့်စွက်ပြောကြားခဲ့သည်။

ကာကွယ်ရေးဝန်ကြီးကို သမ္မတသစ်က ရွေးချယ်ပေးရမည့်ကိစ္စမှာ အထူးတလည် စိစစ်ရမည်ဖြစ်သည်။

  ကိုလံဘီယာ နိုင်ငံအတွင်းက ရွေးကောက်ပွဲ စည်းရုံးမှုတစ်ခု

ပြောက်ကျားဟောင်း တစ်ဦးဖြစ်ခဲ့သော ပီထရို ကိုယ်နှိုက်မှာလည်း သံသယစိတ်နှင့် အမုန်းတရား နောက်ခံ အခြင်းအရာများ ကို ရင်ဆိုင်နေရပြီ ဖြစ်သည်။ ရွေးကောက်ပွဲအကြို မဲဆွယ်သည့် ကာလကပင် ပီထရိုသည် လူပေါင်း မြောက်မြားစွာကို ကိုယ် တိုင် သတ်ဖြတ်ခဲ့ခြင်းဖြစ်ကြောင်း အခိုင်အမာ စွပ်စွဲချက်များ အပါအဝင် လွဲချော်သည့် ထိုးနှက်များစွာကို ရင်ဆိုင်ခဲ့ရသည်။

ပီထရိုကတော့ M-19 ပြောက်ကျားသူပုန်အဖွဲ့တွင် မိမိရှိခဲ့စဉ်က စည်းရုံးရေးမှူးတာဝန်သာ ယူခဲ့ကြောင်း ချေပပြောဆိုခဲ့သည်။

“ဒါဟာ လိမ်ညာမှုတွေနဲ့ အကြောက်တရားဖြစ်အောင် လှုံ့ဆော်မှုတစ်ခုပဲဗျ” ဟု ပီထရိုက ပြောခဲ့သည်။

သူသည် အာဏာရလာသည့်အခါ ကိုလံဘီယာ၏ နောက်ဆုံးကျန်နေသော သူပုန်အဖွဲ့ဖြစ်သော အမျိုးသား လွတ်မြောက်ရေး တပ် (ELN) နှင့် ငြိမ်းချမ်းရေးဆွေးနွေးဖို့ လမ်းဖွင့်သွားမည်ဟု ရွေးကောက်ပွဲ မတိုင်မီက ကတိပြုခဲ့သည်။

Source: AFP, Bangkok Post

CNI International News

ဘန်ကောက်၊ ဇွန်လ ၂၁

ထိုင်းနိုင်ငံတွင် ကန့်သတ်ချက်များ ဆက်လက် ဖြေလျှော့ပေးနေသော်လည်း အထူးဥပဒေအရ စိုးရိမ်မှုရှိသေးသဖြင့် အရေးပေါ် အမိန့်ကို မရုပ်သိမ်းသေးကြောင်း ဇွန်လ ၂၀ ရက်တွင် ဝန်ကြီးချုပ် ပရာယွတ်ချန်အိုချာက ပြောကြားခဲ့သည်ဟု ဘန်ကောက်ပို့စ်သတင်းအရ သိရသည်။

Covid-19 ဖြစ်ပွားမှု ကျဆင်းလာခဲ့၍ ကန့်သတ်ချက်များ ဖြေလျှော့ပေးခဲ့သော်လည်း ရှေ့သို့ဦးတည်ပါတီ (Move Forward Party) မှ လွှတ်တော်အမတ် ရန်စီမန်ရွမ်း (Rangsiman Rome) က အရေးပေါ်အမိန့်ကို ထပ်မံ သက်တမ်း မတိုးရန် တိုက်တွန်းခဲ့ပြီးနောက် ဗိုလ်ချုပ်ကြီး ပရာယွတ်၏ အထက်ပါ သဘောထား မှတ်ချက် ထွက်ပေါ်လာခဲ့ခြင်း ဖြစ်သည်။

အစိုးရ၏ အရေးပေါ်အမိန့်သည် နှစ်နှစ်တာ ကာလအတွင်း ၁၈ ကြိမ်အထိ သက်တမ်း အလီလီ တိုးခဲ့သည်။

ရောဂါပြန့်ပွားမှုကို ထိန်းချုပ်မည့်အစား အစိုးရဆန့်ကျင် ဆန္ဒပြသူများကို အရေးယူရန် အသုံးချနေသည့် အထူးဥပဒေကို ရုပ်သိမ်းပေးရန် အစိုးရကို လွှတ်တော်အမတ် ရန်စီမန်ရွမ်းက ဇွန်လ ၂၀ ရက်တွင် တိုက်တွန်းတောင်းဆိုခဲ့သည်။

Covid-19 ပြန်ပွားမှု တားဆီးရာ၌ အစိုးရ၏ လုပ်ဆောင်ချက်များ အဆင်ပြေ ချောမွေ့စေရန် အရေးပေါ်အမိန့်ကို ထုတ်ပြန်ခဲ့ ရကြောင်း၊ အထူးဥပဒေသည် မိမိတို့ လိုရာပစ်မှတ် ရောက်အောင် အထောက်အကူပြု ကိရိယာတစ်ခုဖြစ်ကြောင်း ဝန်ကြီးချုပ် က ဆက်လက် ပြောကြားခဲ့သည်။

ထိုင်းလူထုဆန့်ကျင်မှုကိုတွေ့ရစဉ်(GETTY IMAGES)

ပြန့်ပွားမှု အခြေအနေကို စစ်ဆေးပြီးမှ အရေးပေါ်အမိန့် လိုအပ်သေး သလားဆိုတာကို ဆုံးဖြတ်ရလိမ့်မည်ဖြစ်ကြောင်း၊ အရေးပေါ်အမိန့် ရုပ်သိမ်းမည်ဆိုလျှင် ပြည်သူ့ကျန်းမာရေးဥပဒေ ပြဋ္ဌာန်းချက်များသာ အစိုးရအနေဖြင့် ထားရှိမည်ဖြစ် ကြောင်း ၎င်းက ထပ်လောင်း ပြောကြားခဲ့သည်။

ပြည်သူများ လေဟာပြင်နှင့် အများသူငှါ ဝင်ထွက်သွားလာသည့် နေရာများ၌ နှာခေါင်းစည်း၊ မျက်နှာဖုံး ချွတ်ခွင့်ပြုခြင်း အပါအဝင် ကပ်ရောဂါ ကန့်သတ်ချက်များကို ဖြေလျှော့ပေးခဲ့ပြီဖြစ်ရာ အရေးပေါ်အမိန့်ကို ဆက်ထားရန် မလိုတော့ကြောင်း ရန်စီမန်ရွမ်းက စောဒကတက်ခဲ့သည်။

ကပ်ရောဂါ ထိန်းချုပ်ရန်အတွက် ၂၀၂၀ ပြည့်နှစ်၊ မတ်လ ၂၆ ရက်တွင် အရေးပေါ်အမိန့် ထုတ်ပြန်ခဲ့ပြီး ယင်းအမိန့်အရ ဝန်ကြီး ချုပ် ပရာယွတ်ကို Covid-19 အခြေအနေ စီမံခန့်ခွဲရေး ဗဟိုဌာန၏ အကြီးအကဲအဖြစ် တားဆီးနှိမ်နင်းရေး အစီအမံများ ဆိုင်ရာ လုပ်ပိုင်ခွင့်ကို အပ်နှင်းထားခဲ့သည်။

ယခုအခါ နိုင်ငံခြား ခရီးသွား ဧည့်သည့် အရေအတွက် တိုးလာခြင်းကြောင့် ကန့်သတ်ချက်များ ပြန်လည် ဖယ်ရှားပေး ပြီး နောက် စီးပွားရေး ဦးမော့လာစေရန် အလားအလာ ကောင်းနေကြောင်း ပရာယွတ်က မှတ်ချက်ချခဲ့သည်။

Source: Bangkok Post

CNI International News

နယူးယောက်၊ ဇွန်လ ၂၁

စစ်ဘေးဒဏ်ခံခဲ့ရသည့် ယူကရိန်းကလေးသူငယ်များအတွက် ရုရှားသတင်းစာဆရာ ဒီမီထရီမူရာတော့ဗ် (Dmitry Muratov) က ၎င်း၏ နိုဗယ်ငြိမ်းချမ်းရေးဆုကို ဇွန်လ ၂၀ ရက် ညပိုင်းက ဒေါ်လာ ၁၀၃ ဒသမ ၅ သန်းဖြင့် လေလံ တင်ရောင်းချလိုက်ခြင်းဖြင့် နိုဗယ်ဆုရှင်တစ်ဦးအနေဖြင့် ယခင်စံချိန်ဟောင်းကို ချိုးခဲ့ကြောင်း အေပီသတင်းဌာန က ရေးသားဖော်ပြသည်။

အဆိုပါရောင်းချမှုကို တာဝန်ယူခဲ့သည့် ယဉ်ကျေးမှုအမွေအနှစ်လေလံလုပ်ငန်း (Heritage Auctions) က ယခု နိုဗယ်ဆုကို ဝယ်ယူသွားသူ၏အထောက်အထားကို အတည်ပြုပြောကြားခြင်းမရှိသော်လည်း အနိုင်ရသော လေလံ ကို တစ်ဆင့်ခံ (proxy) ပြုလုပ်ကြောင်း ထုတ်ဖော်ကြေညာခဲ့သည်။

ဒေါ်လာ ၁၀၃ ဒသမ ၅ သန်းရောင်းရငွေသည် တစ်နည်းအားဖြင့် ဆွစ်ငွေကြေး (Swiss francs) ဖရန့်ဒေါ်လာသန်း ၁၀၀ ဟု ဆိုနိုင်ကြောင်း ပြောကြားပြီး လေလံအောင်၍ ဝယ်ယူသူမှာ နိုင်ငံရပ်ခြားမှဖြစ်ကြောင်း အရိပ်အမြွက် ပြသခဲ့သည်။

“စည်းလုံးမှု ပမာဏကြီးမားလာမယ်လို့ ကျနော်မျှော်လင့်ပါတယ်။ ဒါပေမယ့် ဒီလောက်ကြီးမားတဲ့ ပမာဏ ဖြစ်လာမယ်လို့တော့ မမျှော်လင့်မိဘူး” ဟု မူရာတော့ဗ်က အင်တာဗျူးတစ်ခုတွင် ပြောကြားခဲ့သည်။

၎င်းလေလံတင်ရောင်းချမှုသည် ရက်သတ္တ ၃ ပတ် ကြာမြင့်ခဲ့ပြီး ကမ္ဘာ့ဒုက္ခသည်များနေ့တွင် အပြီးသတ်ခဲ့သည်။

ယခင်က နိုဗယ်ဆုတံဆိပ်အတွက် အများဆုံးနှုန်းထားမှာ ၂၀၁၄ ခုနှစ်က ဒေါ်လာ ၄ ဒသမ ၇၆ သန်းဖြစ်သည်။ ဆဲလ်မျိုးဗီဇပစ္စည်းများ DNA ဖွဲ့စည်းတည်ဆောက်ပုံကို ပူးတွဲရှာဖွေတွေ့ရှိခဲ့သူ ပညာရှင် ဂျိမ်းစ်ဝပ်ဆင်သည် ၁၉၆၂ ခုနှစ်တွင် ၎င်းရရှိခဲ့သော နိုဗယ်ဆုကို အထက်ပါနှုန်းထားဖြင့် ရောင်းချခဲ့သည်။

နောက် ၃ နှစ်ကြာပြီးနောက် DNA အကြောင်း ပူးတွဲနိုဗယ်ဆုရှင် ဖရန်စစ်ခရက်ခ်၏ မိသားစုက ၎င်းဆုကို Heritage Auctions လုပ်ငန်းဖြင့်ပင် လေလံတင်ခဲ့ရာ ဒေါ်လာ ၂ ဒသမ ၂၇ သန်း ရရှိခဲ့သည်။

ယခုနိုဗယ်ဆုရောင်းချလိုက်သူ မူရာတော့ဗ်သည် နိုဗာယာဂေဇက် (Novaya Gazeta) က လွတ်လပ်သော ရုရှား သတင်းစာ တည်ထောင်ရာတွင် ပံ့ပိုးခဲ့သဖြင့် ၂၀၂၁ ခုနှစ်၊ အောက်တိုဘာလတွင် ရွှေတံဆိပ်ချီးမြှင့်ခံခဲ့ရသည်။ ကရင်မလင်(ရုရှားအာဏာပိုင်များ)၏ သတင်းသမားများအပေါ် ကန့်သတ်ချုပ်ချယ်မှုများရှိနေစဉ်အတွင်း ပြီးခဲ့သည့်မတ်လ၌ အဆိုပါသတင်းစာပိတ်သိမ်းချိန်အထိ မူရာတော့ဗ်သည် အယ်ဒီတာချုပ်အဖြစ် တာဝန်ယူခဲ့ပြီး ရုရှားက ယူကရိန်းကို ကျူးကျော်မှုအတွက် လူထုသဘောထားနှင့် ကွဲလွဲနေမှုများကို ရေးသားတင်ဆက်ခဲ့သည်။

မူရာတော့ဗ်သည် ၎င်း၏ဆုတံဆိပ်ကို လေလံတင်ရောင်းချရန် စိတ်ကူးခဲ့ပြီး ပူးတွဲရရှိသည့် ငွေကြေး ဒေါ်လာ ၅ သိန်းကို ပရဟိတလုပ်ငန်းများသို့ လှူဒါန်းရန် ကြေညာခဲ့သည်။

ယူကရိန်းစစ်ပွဲကြောင့် အိုးမဲ့အိမ်မဲ့ဖြစ်ခဲ့ရသည့် ကလေးသူငယ်များကို ထောက်ပံ့ပေးနိုင်ရန် ကုလသမဂ္ဂ ကလေးများရန်ပုံငွေအဖွဲ့(ယူနီဆက်ဖ်)ထံသို့ တိုက်ရိုက်ပေးအပ်လှူဒါန်းသွားမည်ဟု ၎င်းက ပြောကြားခဲ့သည်။

လေလံဆွဲပြီး မိနစ်ပိုင်းအကြာတွင် ၎င်းလှူဒါန်းသော ရန်ပုံငွေများရရှိပြီးဖြစ်ကြောင်း ယူနီဆက်ဖ်က လေလံ လုပ်ငန်းသို့ အကြောင်းပြန်ခဲ့သည်။
နိုင်ငံတကာကလေးများနေ့အထိမ်းအမှတ်အဖြစ် ယခု ဇွန်လ ၁ ရက်၌ အွန်လိုင်းမှ လေလံများ စတင်ခဲ့သည်။

Source: AP

CNI International News

ဘာမာကို၊ ဇွန်လ ၂၀

ရုရှားနှင့်အနောက်အုပ်စုတို့အကြား တင်းမာမှုများကြောင့် မာလီနိုင်ငံအတွက် ကုလသမဂ္ဂ (UN) ၏ အကြီးမား ဆုံးနှင့်အန္တရာယ်အများဆုံး ငြိမ်းချမ်းရေးထိန်းသိမ်းမှုလုပ်ငန်းစဉ်တစ်ခု၏ အနာဂတ်အရေး ဆွေးနွေးမှုများ ပိုမို ဆိုးရွားလာခဲ့ကြောင်း၊ ဆယ်စုနှစ်များစွာ အစ္စလာမ္မစ်အစွန်းရောက်များ ထကြွသောင်းကျန်နေသည့် မာလီနိုင်ငံသို့ UN တပ်များ စေလွှတ်ရေးမှာ အခြေအတင်ဖြစ်နေခဲ့ကြောင်း အေပီသတင်းဌာနက ဇွန်လ ၁၉ ရက်တွင် ဖော်ပြခဲ့ သည်။

အနောက်အာဖရိဒေသရှိ မာလီနိုင်ငံတွင် အစွန်းရောက်လက်နက်ကိုင်များ တိုက်ခိုက်မှုပြင်းထန်လာ၍ မငြိမ် မသက်ဖြစ်နေခဲ့ရာ UN ၏ ငြိမ်းချမ်းမှုမစ်ရှင်ကို ယခုလအတွင်း သက်တမ်းတိုးရန် ပြင်ဆင်နေသည်။ လက်ရှိကာလ ဇွန်လတစ်လတည်းမှာပင် မာလီရောက် UN ငြိမ်းချမ်းရေးတပ်ဖွဲ့ဝင် ၃ ဦး သေဆုံးခဲ့သည်။

မာလီစစ်အာဏာရှင်များ ရွေးကောက်ပွဲကျင်းပမည့်ကတိကို ရွှေ့ဆိုင်းလိုက်ပြီး အိမ်နီးချင်းနိုင်ငံများက ဒဏ်ခတ် ပိတ်ဆို့မှုများ ချမှတ်ခဲ့ရာ တိုင်းပြည်၏စီးပွားရေးအခြေအနေမှာ ယိုယွင်းလာခဲ့သည်။

မာလီစစ်အာဏာရှင်များနှင့် ပြင်သစ်၊ ဥရောပသမဂ္ဂ (EU) တို့ ဆက်ဆံရေးတင်းမာလာခြင်းကြောင့် ပြင်သစ်နှင့် EU တို့၏ စစ်ဆင်ရေးမှာလည်း ပြည်တွင်း၌ ရပ်ဆိုင်းသွားပြီဖြစ်သည်။

UN လုံခြုံရေးကောင်စီအဖွဲ့ဝင်များ ဆွေးနွေးမှု၌ MINUSMA ဟု ထင်ရှားသည့် မာလီနိုင်ငံအတွက် ငြိမ်းချမ်းရေး ထိန်းသိမ်းမှုမစ်ရှင်ကို ဆက်လက်လုပ်ဆောင်ရန် လိုအပ်ကြောင်း သဘောတူခဲ့ကြသည်။ သို့သော် ယခုသီတင်းပတ် ကောင်စီအတွင်း ဆွေးနွေးငြင်းခုံမှုများ၌ မာလီပြည်တွင်းမှာ ပြင်သစ်၏အနာဂတ်အခန်းကဏ္ဍနှင့် ရုရှားစစ်ရေး ကန်ထရိုက်တာများ ရှိနေခြင်းအပေါ် သဘောထားကွဲလွဲမှုများ ရှိနေခဲ့သည်။

“ညိနှိုင်းနေစဉ်အတွင်း အခြေအနေ ပိုရှုပ်ထွေးလာတယ်။ နိုင်ငံတကာအခန်းကဏ္ဍမှာ မာလီဟာ ရုရှားကစားကွက် ရဲ့ တစိတ်တပိုင်းပါ” ဟု ဝါရှင်တန်အခြေစိုက် အတ္တလန္တိတ်ကောင်စီ၊ အာဖရိကရေးရာဌာနမှ အကြီးတန်း ဒါရိုက်တာ ရာမာယက်က ပြောကြားခဲ့သည်။

မာလီနိုင်ငံမြောက်ပိုင်းရှိ မြို့ကြီးများကို သိမ်းပိုက်ထားသော အစွန်းရောက်သူပုန်များကို ရှင်းလင်းရန် ပြင်သစ်က စစ်ရေးအရ ဝင်ရောက်စွက်ဖက်ခဲ့ပြီးနောက် ၂၀၁၃ ခုနှစ်တွင် UN ငြိမ်းချမ်းရေးထိန်းသိမ်းမှုမစ်ရှင်ကို စတင်ခဲ့သည်။

အဆိုပါမစ်ရှင်တွင် တပ်ဖွဲ့ဝင်အင်အား ၁၂,၀၀၀ ခန့်၊ ရဲနှင့် အခြားစစ်ရေးအရာရှိ ၂,၀၀၀ ခန့် ပါဝင်ထားကြသည်။ မစ်ရှင်၏လှုပ်ရှားမှုများအတွင်း မာလီနိုင်ငံတွင် UN ငြိမ်းချမ်းရေးတပ်ဖွဲ့ဝင် ၂၇၀ ကျော်အထိ သေဆုံးခဲ့သည်။

ယခုအခါ ပြင်သစ်သည် UN မစ်ရှင်၏လုပ်ပိုင်ခွင့်ကို သက်တမ်းတိုးနိုင်ရန် စေ့စပ်ညှိနှိုင်းရေး ဦးဆောင်ပေးနေပြီး ပြင်သစ်၏လေကြောင်းအထောက်အပံ့များ ဆက်လက်ပေးအပ်ရန် အဆိုပြုလာခဲ့သည်။

သို့သော် ပြင်သစ်လေကြောင်းအစီအစဉ်ကို မာလီက အပြင်းအထန် ကန့်ကွက်ခဲ့သည်။

Source: AP