CNI News
၂၀၂၃ ခုနှစ်၊ ဇွန်လ ၁

ကမ္ဘောဒီးယားနိုင်ငံမှာ မေလက ကျင်းပခဲ့သည့် (၃၂)ကြိမ်မြောက် အရှေ့တောင်အာရှအားကစားပြိုင်ပွဲ (ဆီးဂိမ်း)တွင် ဆုတံဆိပ်များ ရရှိခဲ့သည့် ကစားသမားများကို နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ငွေကျပ် စုစုပေါင်း ၃၃၃၃ သန်းနှင့် အမေရိကန် ဒေါ်လာ ၇ သောင်း ဆုချီးမြှင့်ခဲ့သည်။

အဆိုပါ ဂုဏ်ပြုချီးမြှင့်ငွေ ပေးအပ်ပွဲ အခမ်းအနားကို ၂၀၂၃ ခုနှစ်၊ ဇွန်လ ၁ ရက်က နေပြည်တော်ရှိ ဝဏ္ဏသိဒ္ဓိ အားကစားရုံ(B)တွင် ကျင်းပခဲ့သည်။

ကမ္ဘောဒီးယား ဆီးဂိမ်းသို့ မြန်မာနိုင်ငံသည် အားကစားနည်း ၁၉ နည်း၊ အားကစားသမား ၃၄၁ ဦး၊ အုပ်ချုပ်သူ/ နည်းပြ ၁၀၄ ဦး၊ စုစုပေါင်း ၄၄၅ ဦးဖြင့် ဝင်ရောက် ယှဉ်ပြိုင်ခဲ့ရာ ရွှေတံဆိပ် ၂၁ ခု၊ ငွေတံဆိပ် ၂၅ ခု၊ ကြေးတံ ဆိပ် ၆၈ ခု စုစုပေါင်း ဆုတံဆိပ် ၁၁၄ ခု ရရှိခဲ့သည်။

ထို့နောက် ရွှေတံဆိပ်ရရှိခဲ့သူများကို ကျပ်သိန်း ၃၀၀၊ ငွေတံဆိပ်ရရှိခဲ့သူများကို ကျပ်သိန်း ၂၀၀၊ ကြေးတံဆိပ် ရရှိခဲ့သူများကို ကျပ်သိန်း ၁၀၀ စသဖြင့် ချီးမြှင့်ခဲ့သည်။

အလားတူ အသင်းလိုက်ပြိုင်ပွဲများ၌ ရွှေတံဆိပ်ရရှိခဲ့ကြသည့် အသင်းသား တစ်ဦးလျှင် ကျပ်သိန်း ၁၀၀၊ ငွေတံဆိပ်ရရှိခဲ့ကြသည့် အသင်းသားတစ်ဦးလျှင် ကျပ်သိန်း ၇၀၊ ကြေးတံဆိပ်ရရှိခဲ့ကြသည့် အသင်းသား တစ်ဦးလျှင် ကျပ် ၃၅ သိန်းနှင့် အားကစားနည်းအလိုက် တာဝန်ယူ ဆောင်ရွက်ခဲ့ကြသည့် နည်းပြများနှင့် အုပ်ချုပ်သူများအား မိမိတို့ အားကစားနည်းမှ ရွှေတံဆိပ် ရရှိခဲ့ပါက တစ်ဦးလျှင် ကျပ်သိန်း ၁၀၀၊ ငွေတံဆိပ် ရရှိခဲ့ပါက ကျပ်သိန်း ၅၀၊ ကြေးတံဆိပ်ရရှိခဲ့ပါက ကျပ်သိန်း ၃၀ စီပေးအပ် ချီးမြှင့်ခဲ့သည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် ဗိုလ်လုပွဲသို့ တက်ရောက်ခဲ့သည့် အမျိုးသမီး ဘောလုံးအသင်းကို အမေရိကန် ဒေါ်လာ ၅၀၀၀၀ နှင့် အကြိုဗိုလ်လုပွဲသို့ တက်ရောက်ခဲ့သော အမျိုးသား ဘောလုံးအသင်းအား အမေရိကန် ဒေါ်လာ ၂၀၀၀၀ ချီးမြှင့်ခဲ့သည်။

ထို့ကြောင့် ငွေကျပ် စုစုပေါင်း ၃၃၃၃ သန်းနှင့် အမေရိကန် ဒေါ်လာ ၇၀၀၀၀ ချီးမြှင့်ခဲ့သည်။

လာမည့် ၂၀၂၅ ခုနှစ်၊ ထိုင်းနိုင်ငံတွင် ကျင်းပမည့် (၃၃)ကြိမ်မြောက် ဆီးဂိမ်းပြိုင်ပွဲတွင် မြန်မာနိုင်ငံ အနေဖြင့် အဆင့်မီမီ ယှဉ်ပြိုင်နိုင်မည့် အားကစားနည်း အရေအတွက်ရော၊ အားကစားသမား အရေအတွက်ပါ တိုးမြှင့် ယှဉ်ပြိုင်နိုင်ရေးနှင့် ယခုထက် ပိုမို အောင်မြင်မှု ရရှိစေရေး ကြိုတင်ပြင်ဆင်စီမံဆောင်ရွက်သွားကြရန် ဝန်ကြီးဌာနနှင့် အားကစားအဖွဲ့ချုပ်များကို ကြိုတင် အသိပေးမှာကြားလိုသည်ဟု နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသွားခဲ့သည်။

CNI Sport News

၂၀၂၃ ခုနှစ်၊ မေလ ၁၃

ထိုင်းအသင်းကို အနိုင်ရပြီး ဆီးဂိမ်းစ်အမျိုးသမီးဘောလုံးပြိုင်ပွဲရဲ့ ဗိုလ်လုပွဲတက်နိုင်ခဲ့တာက ကစားသမား တွေကြောင့်လို့ မြန်မာအမျိုးသမီးအသင်းနည်းပြ ယူကီတက်ဆူရိုက ချီးကျူးလိုက်ပါတယ်။

ယူကီတက်ဆူရိုက “ထိုင်းအသင်းက အသင်းကောင်းတစ်သင်းဖြစ်ပြီး သူတို့ရဲ့ ကောင်းမွန်တဲ့ ကစားဟန်ကြောင့် ဒီပွဲက တကယ့်ကို စိတ်လှုပ်ရှားစရာကောင်းတဲ့ ပွဲတစ်ပွဲဖြစ်ခဲ့ပါတယ်။နိုင်ပွဲရအောင် ကြိုးစားခဲ့တဲ့ ကစားသမား တွေရဲ့ စွမ်းဆောင်ရည်က တကယ်ကို အံ့မခန်းပါ။ကျနော့်အနေနဲ့ အသင်းကိုကိုင်တွယ်တာ အရမ်းကို တိုတောင်း လွန်းတာမို့ ဒီနိုင်ပွဲက ကစားသမားတွေ ရယူသွားတဲ့နိုင်ပွဲဖြစ်ပါတယ်။ဒီကစားသမားတွေက သူတို့လုပ်ချင်တာ ဘာမဆိုရအောင်လုပ်နိုင်တဲ့ ကစားသမားတွေဆိုတာ ဒီနေ့တွေ့ခဲ့ရပါပြီ။အားလုံးလည်း ကျနော်တို့အသင်းက ဘယ်လိုအသင်းလဲဆိုတာ အမြဲအမှတ်ရနေမယ်ဆိုတာ ယုံကြည်ပါတယ်" လို့ ပြောခဲ့ပါတယ်။

ဆီမီးဖိုင်နယ်အဖြစ်ကစားခဲ့တဲ့ ဒီပွဲမှာ မြန်မာအသင်းဟာ ပွဲချိန် ၁၈ မိနစ်မှာတင် ထိုင်းအသင်းကို ဦးဆောင်ဂိုး ၂ ဂိုး ခွင့်ပြုခဲ့ရပေမယ့် ရူပါခိုင်နဲ့ ဝင်းသိင်္ဂီထွန်းတို့က ချေပဂိုးတွေ ပြန်သွင်းပြီး၊ စန်းသော်သော်နဲ့ မြတ်နိုးခင်တို့က အနိုင် ဂိုးတွေသွင်းယူပေးခဲ့တာကြောင့် ထိုင်းအသင်းကို ၄ ဂိုး- ၂ ဂိုးနဲ့ အနိုင်ရပြီး ဗိုလ်လုပွဲတက်နိုင်ခဲ့တာပါ။

မြန်မာအသင်းဟာ ဆီးဂိမ်းစ်ပြိုင်ပွဲရဲ့ဗိုလ်လုပွဲကို ၂၀၀၅ နောက်ပိုင်း နှစ်ပေါင်း ၁၈ နှစ်အကြာမှ ပထမဆုံးအကြိမ် ပြန်လည်တက်နိုင်ခဲ့တာဖြစ်ပါတယ်။

မြန်မာအသင်းခေါင်းဆောင် ခင်မာလာထွန်းကတော့ အနိုင်ရအောင်လုပ်ဆောင်မယ်ဆိုတဲ့ စိတ်နဲ့အတူတူ ကြိုးစား ခဲ့လို့ ဗိုလ်လုပွဲတက်နိုင်ခဲ့တာဖြစ်ပြီး ဗိုလ်လုပွဲမှာလည်း အကောင်းဆုံးဖြစ်အောင်ကြိုစားမယ်လို့ ကတိပေးခဲ့တာပါ။

ခင်မာလာထွန်းက “ကျနော်တို့ ပထမပိုင်းမှာ ကစားပုံဆိုးရွားခဲ့ပါတယ်။ဒါပေမယ့် စိတ်ပျက်နေတာမျိုးမရှိဘဲ ဒီပွဲကို ငါတို့နိုင်အောင် ချမယ်ဆိုတဲ့ စိတ်နဲ့အတူတူ ကြိုးစားခဲ့ကြလို့ အနိုင်ရခဲ့တာပါ။ပထမပိုင်းအပြီးမှာ နည်းပြတွေအနေ နဲ့ ကစားသမားတွေကို ယုံကြည်ပေးပြီး ယုံကြည်မှု ပိုရှိလာအောင်လုပ်ပေးလို့လည်း တကယ့်ကို ကျေးဇူးတင်ပါ တယ်။ အဓိက ကတော့ လာရောက်အားပေးတဲ့ ပရိသတ်တွေနဲ့ မြန်မာနိုင်ငံမှာ အားပေးနေကြတဲ့ ပရိသတ်တွေပါ။ ဒီအားတွေနဲ့ပဲ ကျနော်တို့ အကောင်းဆုံးဆက်ကြိုးစားနေရတာပါ” လို့ ပြောခဲ့ပါတယ်။

မြန်မာအသင်းဟာ ဗိုလ်လုပွဲအဖြစ် အုပ်စုတွင်းမှာတွေ့ဆုံခဲ့တုန်းက အရေးနိမ့်ခဲ့တဲ့ ဗီယက်နမ်အသင်းနဲ့ မေလ ၁၅ ရက် မြန်မာစံတော်ချိန် ည ၇ နာရီအချိန်မှာ ယှဉ်ပြိုင်ကစားသွားမယ်လို့ သိရပါတယ်။

CNI Sport News
၂၀၂၃ ခုနှစ်၊ မေလ ၁၀

ကမ္ဘောဒီးယားနိုင်ငံမှာ ကျင်းပနေတဲ့ ဆီးဂိမ်းစ်အမျိုးသား ဘောလုံးပြိုင်ပွဲရဲ့ အုပ်စုနောက်ဆုံး ပွဲစဉ်တွေထဲက တစ်ပွဲဖြစ်တဲ့ မြန်မာအသင်းနဲ့ ဖိလစ်ပိုင်အသင်းတို့ပွဲမှာ မြန်မာအသင်းက ၁ ဂိုး- ဂိုးမရှိနဲ့ အနိုင်ရရှိခဲ့ပါတယ်။

ဒီပွဲရဲ့ ပထမပိုင်းမှာ ဖိလစ်ပိုင်အသင်းက မြန်မာအသင်းကို အနည်းငယ် ဖိပြီး ကစားနိုင်ခဲ့ပေမယ့် ထိရောက်တဲ့ ဂိုးပေါက် ကန်သွင်းမှုတွေ မရှိတဲ့အတွက် ဂိုးမရှိ သရေနဲ့ ပြီးဆုံးခဲ့ပါတယ်။

ဒုတိယပိုင်းမှာ မြန်မာအသင်းက အနိုင်ဂိုး ရယူနိုင်ဖို့ တိုက်စစ်ဆင် ကစားခဲ့တာကြောင့် ပွဲချိန် ၅၅ မိနစ်မှာ သွင်းဂိုး ရရှိခဲ့ပါတယ်။

ဟိန်းထက်အောင်ရဲ့ ပြစ်ဒဏ်ဘော ကန်ချက်ကနေ ပြန်ထွက်လာတဲ့ ဘောလုံးကို ဂိုးဧရိယာထဲမှာ အသင့်ရှိနေတဲ့ သက်ဟိန်းစိုးက အမှားအယွင်းမရှိ အဆုံးသတ်ခဲ့တာပါ။

သွင်းဂိုးရပြီးချိန်မှာ မြန်မာအသင်းဟာ ထိန်းကစားနေတာကြောင့် ဖိလစ်ပိုင်အသင်းရဲ့ တိုက်စစ်ဆင်မှုတွေကို ဖျက်ထုတ်နေရပါတယ်။

ပွဲချိန် ၈၂ မိနစ်မှာ ဖိလစ်ပိုင်အသင်း တိုက်စစ်ဆင်မှုကို ဖျက်ထုတ်ရင်း မြန်မာကစားသမား အနီကတ်နဲ့ ထုတ်ပယ်ခံ ခဲ့ရပါတယ်။

မြန်မာအသင်းဟာ တစ်ယောက်လျော့နဲ့ ဂိုး ပြန်မပေးရအောင် ကစားခဲ့လို့ ၁ ဂိုး- ဂိုးမရှိနဲ့ အနိုင်ရပြီး အုပ်စုဒုတိယနဲ့ ဆီမီးဖိုင်နယ်ကို တက်နိုင်ခဲ့ပါတယ်။

အုပ်စုတွင်း နောက်ပွဲမှာတော့ အင်ဒိုနီးရှားအသင်းက ကမ္ဘောဒီးယားအသင်းကို ၂ ဂိုး- ၁ ဂိုးနဲ့ အနိုင်ရပြီး အုပ်စု ပထမနဲ့ ဆီမီးဖိုင်နယ် တက်နိုင်ခဲ့ပါတယ်။

CNI Sport News

၂၀၂၃ ခုနှစ်၊ မေလ ၁၆

ဆီးဂိမ်းစ် အမျိုးသား ဘောလုံးပြိုင်ပွဲ တတိယနေရာလုပွဲအဖြစ် ယှဉ်ပြိုင်ခဲ့တဲ့ ဗီယက်နမ်နဲ့ မြန်မာအသင်းတို့ပွဲမှာ ဗီယက်နမ်အသင်းက ၃ ဂိုး- ၁ ဂိုးနဲ့ အနိုင်ရရှိသွားခဲ့ပါတယ်။

ပထမပိုင်းမှာ ဗီယက်နမ်အသင်းဟာ မြန်မာအသင်းကို အသာစီးနဲ့ ကစားနိုင်ခဲ့ပြီး ပွဲချိန် ၉ မိနစ်နဲ့ ၃၅ မိနစ်မှာ ဦးဆောင်ဂိုးတွေ သွင်းယူနိုင်ခဲ့ပါတယ်။

မြန်မာအသင်းဟာ ဂိုးကန်သွင်းခွင့်တွေ ရခဲ့ပေမယ့် ကန်သွင်းချက်တွေဟာ ထိရောက်မှုမရှိလို့ ပထမပိုင်းမှာ ဗီယက်နမ်အသင်းက မြန်မာအသင်းကို ၂ ဂိုး- ဂိုးမရှိနဲ့ ဦးဆောင်နိုင်ခဲ့တာ ဖြစ်ပါတယ်။

ဒုတိယပိုင်းမှာလည်း ဗီယက်နမ်အသင်းက ကစားကွက် အသာစီးနဲ့ မြန်မာအသင်းကို ကစားနိုင်ခဲ့ပြီး ပွဲချိန် ၅၇ မိနစ်မှာ တတိယဂိုးကို လူကျွံထောင်ချောက်ကို ကျော်ဖြတ်ကာ သွင်းယူသွားပါတယ်။

ဗီယက်နမ်အသင်းဟာ တတိယဂိုး ရပြီးနောက်ပိုင်းမှာ ဘောလုံးပိုင်ဆိုင်မှုအသာနဲ့ ကစားခဲ့လို့ မြန်မာအသင်းက ချေပဂိုးသွင်းနိုင်ဖို့ တိုက်စစ်ဆင်မှုတွေ ပြုလုပ်လာခဲ့ပါတယ်။

အဲဒါကြောင့် ပွဲချိန် ၈၈ မိနစ်မှာ မြန်မာအသင်း ထောင့်ကန်ဘောကနေ ခေါင်းတိုက်ပြီး ချေပဂိုးသွင်းယူခဲ့ပါတယ်။

ဗီယက်နမ်အသင်းဟာ နောက်ထပ် သွင်းဂိုးရနိုင်မယ့် အခွင့်အရေးကို အသုံးမချနိုင်ခဲ့တာကြောင့် ပွဲအပြီးမှာ ၃ ဂိုး- ၁ ဂိုးနဲ့ အနိုင်ရပြီး ကြေးတံဆိပ် ရရှိသွားခဲ့ပါတယ်။

#မြန်မာအသင်း #အမျိုးသား #ဗီယက်နမ်အသင်း #အားကစား #CNImyanmar #cninews

CNI International News

၂၀၂၃ ခုနှစ်၊ မေလ ၁၂

ဆီးဂိမ်းစ်အမျိုးသမီး‌ ဘောလုံးပြိုင်ပွဲရဲ့ ဆီမီးဖိုင်နယ် ပွဲစဉ်တစ်ပွဲဖြစ်တဲ့ ထိုင်းနဲ့ မြန်မာအသင်းတို့ပွဲမှာ မြန်မာ အသင်းက ၄ ဂိုး- ၂ ဂိုးနဲ့ အနိုင်ရပြီး ဗိုလ်လုပွဲ တက်နိုင်ခဲ့ပါတယ်။

ပွဲအစပိုင်းမှာ ထိုင်းအသင်းက လျင်လျင်မြန်မြန်နဲ့ ထိုးဖောက်ခဲ့ပြီး မြန်မာအသင်းက အမှားအယွင်းတွေ ပြုလုပ် ခဲ့တာကြောင့် ၁၀ မိနစ်နဲ့ ၁၈ မိနစ်မှာ ၂ ဂိုးဆက်တိုက် ပေးခဲ့ရပါတယ်။

အဲဒီနောက်ပိုင်းမှာ မြန်မာအသင်းက အကောင်းဆုံး ပြန်ကစားနိုင်ခဲ့လို့ ပွဲချိန် ၄၃ မိနစ်မှာ ချေပဂိုး တစ်ဂိုး ပြန်ရခဲ့ ပါတယ်။