CNI News 

၂၀၂၅ ခုနှစ်၊ ဧပြီ ၂၃ ရက်

ငလျင်ဘေး ပြည်လည်ထူထောင်ရေးအတွက် အဆောက်အဦများဆောက်လုပ်ရာတွင် အဂတိ ကင်းရှင်းဖို့ လိုကြောင်း စီးပွားရေးလုပ်ငန်းရှင်တဦးဖြစ်သည့် ဦးအောင်ပြည့်စုံက CNI သတင်းဌာနကို ပြောသည်။

ဒါ့အပြင် ငလျင်အပြီး ပြန်လည်ထူထောင်ရေးအတွက် နေအိမ်အဆောက်အဦများအား စနစ်တကျ စိစစ် ဆောက် လုပ်ရာတွင် အစိုးရဘက်မှလည်း ကြပ်ကြပ်မတ်မတ်ဖြင့်ဆောင်ရွက်ရန်လိုကြောင်း ၎င်းက ပြောသည်။ 

“အဓိကကတော့ ဟိုးအရင်ထဲက Construction Law တွေရှိတယ်။ အရင်ထဲက ပြီးတော့ QC ပေါ့နော် QC Team တွေရှိတယ်။ အဲ့ QC တွေက Third party စစ်စစ်တွေဖြစ်ဖို့လိုတယ်။ QC တွေမှာ ကျနော်တို့  ဆောက်တဲ့ ကုမ္ပဏီတွေနဲ့ QC နဲ့က ကျနော်တို့က ပါတနာတွေဖြစ်နေမယ်။ Third party မဟုတ်ဘူး။ အပေးယူတွေ ရှိနေမယ် ဆိုရင်တော့ ဒါဟာ အဂတိကဖြစ်နေမှာပဲ။ ပြီးတော့ တကယ်ဆောက်တဲ့အချိန်မှာ တန်ဖိုးနဲ့ညီမျှအောင် ငလျင် ဒဏ်ကို ကျနော်တို့ ၈ ထိခံနိုင်တယ်ပေါ့ ငလျင်လှုပ်တဲ့အဆင့်က ၈ ထိကို ခံနိုင်တယ်။ ဒါမှမဟုတ်လို့ရှိရင်လည်း ၉ ထိကို ခံနိုင်တဲ့ အဆောက်အဦ တခုတည်ဆောက်ရင် ဒါ တကယ်ကို ဒီကာလ ဒီအဆောက်အဦးက တကယ်ကို ခံနိုင်တဲ့ အဆောက်အဦးဖြစ်ဖို့လိုအပ်တယ်။ အဲ့လိုမဟုတ်ဘဲနဲ့ ဒီ paper ထဲမှာ စာရွက်ထဲမှာပဲ ခံနိုင်ရည်ရှိပြီးတော့ တကယ်လက်တွေ့မှာ ကျနော်တို့ ခံနိုင်ရည်မရှိတဲ့ အကျိုးဆက်တွေကြောင့် အသက်တွေအများကြီးရင်းရမှာ ဖြစ်ပါ တယ်” ဟု သူက ဆိုသည်။

ငလျင်ဘေးဒဏ်ခံခဲ့ရသည့် စစ်ကိုင်းတံတားကို ကြည့်ရှုစစ်ဆေးနေစဉ်

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က စစ်ကိုင်းတိုင်းဒေသကြီး ပြန်လည်ထူထောင်ရေး လုပ်ငန်းများ အတွက် ကျပ်ဘီလီယံ ၅၀ နှင့် မန္တလေးတိုင်းဒေသကြီး ပြန်လည်ထူထောင်ရေး လုပ်ငန်းများအတွက် ကျပ် ဘီလီယံ ၆၀ ကို ခွဲဝေပေးအပ်ခဲ့သည်။

မန္တလေးမြို့နှင့်စစ်ကိုင်းမြို့များတွင် ထိခိုက်ပျက်စီးထားသည့်အဆောက်အအုံများ ပြန်လည်တည်ဆောက်ရာတွင် ဆောက်လုပ်ရေးလုပ်ငန်းများအတွက် ဘိလပ်မြေ၊ သံ နှင့် သွပ်ပြားများကိုလည်း သင့်လျော်သည့်ဈေးနှုန်းများဖြင့် ရောင်းချပေးသွားမည်ဟုလည်း နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။ 

ထို့ပြင် ပျက်စီးသွားသည့် လူနေအိမ်များကို အမျိုးအစားအလိုက် သင့်လျော်သည့်နှုန်းထားများဖြင့် ငွေကြေး ထောက်ပံ့ပေးသွားမည်ဟု ဆိုသည်။

တာဝန်ရှိသူများနှင့် ဗိုလ်ချုပ်မှူးကြီး မင်းအောင်လှိုင်တွေ့ဆုံစဉ်

အမျိုးသားဒီမိုကရေစီ အင်အားစုပါတီ (NDF) မှ ဒု ဥက္ကဋ္ဌ ဦးထက်အောင်ကျော် “အသစ်ပြန်ဆောက်ရမှာမှန်တယ်။ အသစ်ပြန်ဆောက်နေတဲ့အချိန်ကြားကာလမှာ ဘယ်လို ပုံစံမျိုးနဲ့ထားမလဲပေါ့၊ ကျနော်တို့ဆိုရင်လည်း တရုတ် သံရုံးကိုပဲအကူအညီတောင်းတာပေါ့နော်။ ဒါတွေကို အမြန်ဆန်ဆုံးလုပ်ပေးဖို့ ကူညီပေးဖို့တွေဘာတွေပြောတော့ သူတို့ကတော့ Temporary house ပေါ့၊ အဲ့လိုပုံစံမျိုး ကို ၅၀၀၀ လောက်ကို လုပ်ဖို့ပြင်ဆင်နေတယ်လို့တော့ ပြောတယ်ပေါ့။ အဲဒါတာကတော့ ဟိုရေတိုပေါ့။ ကျနော်တို့ မဆောက်ရခင် ကြားကာလမှာ ဒါတွေလုပ်ဖို့ ဆိုတာ ကတော့တခုပေါ့၊ နောက်တခုကတော့ ကျနော်တို့ ဒီငလျင်ဘေးမှာ ၇.၇ ဆိုတာ အလွန်ကြီးကျယ်တဲ့ ငလျင်တခု ဖြစ်တယ်။ ဒီဟာကလည်းတခုပေါ့၊ နောက်ထပ်ကျတော့ ကျနော်တို့ ဖြစ်တဲ့နေရာတွေကို ကူညီကယ်ဆယ်ရေး သွားရင်းနဲ့ ကြည့်တဲ့အချိန်မှာ တချို့ဟာတွေကကြတော့ ဒီ ကျနော်တို့ရဲ့ တည်ဆောက်ရေးတွေက ညံ့ဖျင်းခဲ့တဲ့ ဟာပေါ့၊ ညံ့ဖျင်းခဲ့တဲ့ဟာဆိုတာ စည်ပင်ကလည်း စစ်ဆေးမှု အားနည်းတယ်၊ ဆောက်တဲ့ပြည်လူထု ကိုယ်တိုင် ကလည်း သက်သက်သာသာနဲ့ ရပါတယ်ဆိုပြီးတော့မှ လုပ်ခဲ့တဲ့ကိစ္စတွေပေါ့” ဟု ပြောသည်။

လက်ရှိတွင် မြန်မာငလျင်ဘေးသင့် ပြည်သူများ ကူညီရေးအတွက် အမေရိကန်က ဒေါ်လာ ၉ သန်း၊ Quad ( အမေရိကန်-အိန္ဒိယ-ဂျပန်-ဩစတြေးလျ)က ဒေါ်လာ သန်း ၂၀၊ ကုလသမဂ္ဂက ဒေါ်လာ ၉၃ သန်း၊ တရုတ်က ယွမ်ငွေ ၁ ဘီလီယံကျော်၊ ဩစတြေးလျက ဒေါ်လာ ၂ သန်း၊ ဥရောပသမဂ္ဂက ဒေါ်လာ ယူရို ၁၃ သန်း စသဖြင့် ထောက်ပံ့ရန် ကတိပြုထားသည်။

အလားတူ ပြည်တွင်းရှိ စီးပွားရေးလုပ်ငန်းရှင်များနှင့် ခရိုနီ သူဋ္ဌေးကြီးများကလည်း ငလျင်ဘေးအတွက် ဧပြီ ၁ ရက်နေ့က လှူဒါန်းကြရာတွင် ကျပ်ငွေ ၁၁၆ ဒသမ ၈၄ ဘီလျံရရှိကြောင်း နစကဥက္ကဋ္ဌက ပြောကြားခဲ့သည်။

CNI News
၂၀၂၅ ခုနှစ်၊ ဧပြီ ၁၈

နေပြည်တော်၏ မြို့အကွက်ချမှုပုံစံကို ပြန်လည်တွက်ချက်ရေးဆွဲသွားရန် စီစဉ်နေကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ၂၀၂၅ ခုနှစ်၊ ဧပြီ ၁၈ ရက်တွင် ပြည်ထောင်စုအစိုးရအဖွဲ့ လုပ်ငန်းညှိနှိုင်း အစည်းအဝေးမှာ ပြောကြားခဲ့သည်။

၂၀၂၅ ခုနှစ်၊ မတ်လ ၂၈ ရက်က မန္တလေးမြို့အနီး စစ်ကိုင်းမြို့ကို ဗဟိုပြု၍ ငလျင်လှုတ်ခတ်ခဲ့ခြင်းကြောင့် မန္တလေး တိုင်းဒေသကြီး၊ နေပြည်တော်ကောင်စီနယ်မြေ၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ မကွေးတိုင်းဒေသ ကြီးတို့ကို အရေးပေါ် အခြေအနေ ကြေညာခဲ့ရသည်။

အဆိုပါ ငလျင်ကြောင့် နစက ရုံးထိုင်လျက်ရှိသည့် နေပြည်တော်ကောင်စီ နယ်မြေအတွင်းရှိ ဝန်ထမ်းအိမ်ယာများ၊ ဝန်ကြီးဌာနများနှင့် အစိုးရရုံးခန်းများ ထိခိုက်ပျက်စီးခဲ့သလို လွှတ်တော်အဆောက်အအုံများလည်း ထိခိုက်ပျက်စီး ခဲ့သည်။

အစိုးရရုံးဌာနနှင့် ပတ်သက်၍ နေပြည်တော်ကောင်စီနယ်မြေရှိ ထိခိုက်မှုဖြစ်ပေါ်ခဲ့သည့် အဆောက်အဉီများအနက် ဖို့မြေပေါ်တွင် တည်ဆောက်ထားသည့် အဆောက်အဦများမှာ ပိုမို ထိခိုက်ပျက်စီးသည်ကို တွေ့ရကြောင်း၊ ထို့ ကြောင့် ရုံးအဆောက်အဦများ ပြန်လည် တည်ဆောက်ရာတွင် မြေစမ်းသပ်မှု(Soil Test)များ ဆောင်ရွက်ပြီးမှသာ အသစ် တည်ဆောက်ခြင်းနှင့် ပြုပြင်ခြင်း လုပ်ငန်းများကို ဆောင်ရွက်သွားရမည်ဟု နစကဥက္ကဋ္ဌက ပြောသည်။

၎င်းက “ တွက်ချက်၍ရသည့် ငလျင်ကြောပေါ်တွင် တည်ရှိနေသည့် အဆောက်အဦများကို ပြောင်းရွှေ့နေရာချ ထားရေးအတွက် ဆောင်ရွက်သွားရန်လိုကြောင်း၊ နေပြည်တော်၏ မြို့အကွက်ချမှုပုံစံကိုလည်း ပြန်လည် တွက် ချက် ရေးဆွဲသွားရန်စီစဉ်နေကြောင်း၊ ငလျင်မကြာခဏ လှုပ်ခတ်လျက်ရှိသည့် နိုင်ငံများမှ အဆောက်အဦများ တည်ဆောက်ထားရှိမှုများကို နမူနာယူ၍ တည်ဆောက်မှုများ ဆောင်ရွက်သွားရန်လိုကြောင်း” ပြောသည်။

မိမိတို့ နိုင်ငံတွင်လှုပ်ခတ်ခဲ့သည့် ငလျင်ကြောနေရာများကို စနစ်တကျ သုတေသနပြုလုပ်သွားရန်လိုကြောင်း၊ ပြန်လည် တည်ဆောက်မည့် အဆောက်အဦများသည် ငလျင်ဒဏ်ကိုခံနိုင်သည့် အဆောက်အဦများ ဖြစ်ရန်လို ကြောင်း၊ အဆောက်အဦများ တည်ဆောက်ရာတွင် အင်ဂျင်နီယာရှုထောင့်မှ ကြည့်၍ အင်ဂျင်နီယာဆိုင်ရာ သတ်မှတ်ချက်များနှင့်အညီ တည်ဆောက်ပြီး ငလျင်ဒဏ်ခံနိုင်အောင် ဆောင်ရွက်သွားရန်လိုကြောင်း နစကဥက္ကဋ္ဌ က ပြောသည်။

မတ်လ ၂၈ ရက်က လှုပ်ခတ်ခဲ့သော ငလျင်ကြောင့် လူပေါင်း ၄၀၀၀ ဝန်းကျင် သေဆုံးပြီး ၅၀၀၀ ကျော် ထိခိုက် ဒဏ်ရာရရှိခဲ့သလို လူပေါင်း ၁၀၀ ကျော် ပျောက်ဆုံးလျက်ရှိသည်။

ထို့နောက် လူနေအိမ်များ၊ ဘာသာရေး အဆောက်အအုံများ၊ စာသင်ကျောင်းများ၊ ဆေးရုံများ၊ ဟိုတယ်များ၊ လမ်းတံတားများ ပြိုကျပျက်စီးခဲ့သည်။

ထို့ကြောင့် ငလျင်ဘေးသင့် ပြည်သူများ ကူညီကယ်ဆယ်ရေးနှင့် ပြန်လည် ထူထောင်ရေး လုပ်ငန်းများ လုပ်ဆောင်ရန် လိုအပ်လျက်ရှိသည်။

CNI News

၂၀၂၅ ခုနှစ်၊ ဧပြီ ၇

ဥရောပသမဂ္ဂသည် မြန်မာနိုင်ငံအတွက် ကနဦး အရေးပေါ် အကူအညီအဖြစ် ယူရို ၂.၅ သန်း ကူညီထောက်ပံ့ ပေးရန် ဆုံးဖြတ်လိုက်သည်ဟု ဥရောပသမဂ္ဂ(EU)က ထုတ်ပြန်ခဲ့သည်။

ဥရောပသမဂ္ဂက “ ယခုထောက်ပံ့လိုက်သော လူသားချင်း စာနာထောက်ထားမှုဆိုင်ရာ ခွဲဝေချထားပေးမှုသည် မြန်မာနိုင်ငံရှိ အထိခိုက် လွယ်ဆုံးသူများ၏ အရေးပေါ် လိုအပ်ချက်များကို ဖြည့်ဆည်းပေးရန်နှင့် အသက်များကို ကယ်တင်ရန်အတွက် အထောက်အကူဖြစ်စေမည်”ဟု ထုတ်ပြန် ပြောကြားခဲ့သည်။

ထို့နောက် ဥရောပသမဂ္ဂသည် နောက်ထပ် အကူအညီများ ပေးအပ်ပံ့ပိုးနိုင်ရန်အတွက် မြေပြင်အခြေအနေနှင့် လိုအပ်ချက်များကို အကဲဖြတ်လျက်ရှိကြောင်း၊ ယခုခွဲဝေချထားပေးမှုသည် ၂၀၂၅ ခုနှစ်အတွင်း မြန်မာနိုင်ငံ အတွက် ထောက်ပံ့ပေးသော ဥရောပသမဂ္ဂ၏ လူသားချင်းစာနာထောက်ထားမှုဆိုင်ရာ အကူအညီ စုစုပေါင်း ယူရို ၃၅ သန်းအထိ ရောက်ရှိသွားပြီဟု ထုတ်ပြန်ခဲ့သည်။

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ၂၀၂၅ ခုနှစ်၊ မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်ကြီးနှင့် နောက်ဆက်တွဲ ငလျင်ငယ်များ လှုပ်ခတ်ခဲ့သည်။

အဆိုပါ ငလျင်ကြောင့် စစ်ကိုင်းတိုင်း၊ ပဲခူးတိုင်း၊ မန္တလေးတိုင်း၊ မကွေးတိုင်း၊ နေပြည်တော်ကောင်စီနယ်မြေ၊ ရှမ်းပြည်နယ်တို့မှာ လူပေါင်း ၃၀၀၀ ကျော်သေဆုံးပြီး ၄၀၀၀ ကျော် ထိခိုက်ဒဏ်ရာရရှိခဲ့ကာ ၄၀၀ ဝန်းကျင် ပျောက်ဆုံးလျက်ရှိသည်။

အလားတူ လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေးအဆောက်အအုံများ ပြိုကျပျက်စီးဆုံးရှုံးခဲ့ သည်။

ထို့ကြောင့် မြန်မာနိုင်ငံတွင် ငလျင်ဘေးသင့် ပြည်သူများ ပြန်လည်ထူထောင်ရေးအတွက် နိုင်ငံတကာ၏ ထောက်ပံ့ကူညီမှုများ လိုအပ်လျက်ရှိသည်။

CNI News

၂၀၂၅ ခုနှစ်၊ ဧပြီ ၄ 

ရှမ်းပြည်နယ်တောင်ပိုင်း၊ ‌ညောင်ရွှေမြို့နယ်အတွင်းရှိ ကျေးရွာ ၃ ရွာမှ ငလျင်ဘေးဒဏ်သင့် ပြည်သူလူထုများကို ရှမ်းပြည်ပူးပေါင်းဆောင်ရွက်ရေးကော်မတီ(SSJAC)က လူသားချင်းစာနာထောက်ထားမှု အကူအညီများ ထောက် ပံ့ပေးအပ်ခဲ့သည်။

SSJAC သည် ညောင်ရွှေမြို့နယ်အတွင်းက မြောင်းဝကြီးကျေးရွာ၊ အိုင်ထောင့်ကြီးကျေးရွာ၊ မိုင်းသောက်ကျေးရွာမှ ငလျင်ဘေးဒဏ်သင့် ပြည်သူများကို ဧပြီ ၄ ရက်က စားနပ်ရိက္ခာများ ထောက်ပံ့ပေးခဲ့သည်။

SSJAC က ထောက်ပံ့ပေးသော စားနပ်ရိက္ခာများမှာ ဆန်အိတ် ၂၅၃ အိတ်၊ စားဆီ တစ်လီတာဗူး ၅၀၀ ဗူး၊ ကြက်ဥ အလုံး ၃၆၀ ပါ ၃၁ ဖာ တို့ဖြစ်သည်။ ထိုစားနပ်ရိက္ခာများ၏ တန်ဖိုးမှာ ၃၂,၂၅၀,၀၀၀ (သိန်း ၃၀၀ ကျော်) ရှိသည်။

SSJAC ကို ရှမ်းလက်နက်ကိုင်များနှင့် ရှမ်းနိုင်ငံရေးပါတီ၊ ရှမ်းအရပ်ဖက် အဖွဲ့အစည်းများ စုပေါင်း၍ ဖွဲ့စည်းထား ကြောင်း သိရသည်။

CNI News

၂၀၂၅ ခုနှစ်၊ ဧပြီ ၄

မြန်မာနိုင်ငံက ငလျင်ဘေးသင့် ပြည်သူများ ကူညီကယ်ဆယ်ရေးအတွက် ‌ဟောင်ကောင်အစိုးရက ဟောင်ကောင် ဒေါ်လာ ၂.၁ သန်းကျော် တန်ဖိုးရှိ လူသားချင်းစာနာထောက်ထားမှု အကူအညီများ ပေးပို့ထောက်ပံ့ခဲ့ကြောင်း သိရသည်။

ဟောင်ကောင်ကိုယ်ပိုင်အုပ်ချုပ်ခွင့်ရ အထူးဒေသအစိုးရက ဟောင်ကောင်မြို့ရှိ မြန်မာကောင်စစ်ဝန်ချုပ်ရုံးမှ တဆင့် မြန်မာနိုင်ငံရှိ ငလျင်ဒဏ်သင့် ဒေသများအား လှူဒါန်းခဲ့ခြင်းဖြစ်သည်။

ဟောင်ကောင်က လှူဒါန်းသည့် ကူညီထောက်ပံ့ရေး ပစ္စည်းများမှာ တစ်ကိုယ်ရည်သန့်ရှင်းရေးသုံး ပစ္စည်းများ၊ ဆိုလာမီးအိမ်များ၊ စောင်များ၊ ဆေးဝါးများ၊ အသင့်စား အစားအစာများနှင့် ရွက်ဖျင်တဲများ ပါဝင်သည့် အရေးပေါ် ပစ္စည်းများ (စုစုပေါင်း တန်ချိန် ၂၇ တန်)ဖြစ်သည်။

အဆိုပါ ထောက်ပံ့ရေးပစ္စည်းများ တင်ဆောင်လာသော ဟောင်ကောင်လေကြောင်းလိုင်းမှ Cathay Pacific Cargo Flight သည် ဟောင်ကောင် အပြည်ပြည်ဆိုင်ရာလေဆိပ်မှ ရန်ကုန်အပြည်ပြည်ဆိုင်ရာ လေဆိပ်သို့ ဧပြီ ၃ ရက်က ရောက်ရှိလာပြီး တာဝန်ရှိသူများထံ လွှဲပြောင်းပေးအပ်ခဲ့သည်။

အလားတူ တရုတ်နိုင်ငံကလည်း စားသောက်ဖွယ်ရာများ၊ ရွက်ဖျင်မိုးကာတဲနှင့် သောက်ရေသန့်ဗူး စုစုပေါင်း (၆၆၈၀)ထုပ်ကို ငလျင်ဘေးသင့် ပြည်သူများကို ထောက်ပံ့ပေးခဲ့သည်။

CNI International News

ဘန်ကောက်၊ ဧပြီ ၃

၂၀၂၅ ခုနှစ်၊ ဧပြီ ၂ ရက်အထိ ကောက်ခံထားသည့် စာရင်းများအရ ထိုင်းနိုင်ငံသည် ငလျင်လှုပ်ခတ်မှု အများဆုံး နိုင်ငံ ၁၀၀ စာရင်းတွင် အဆင့် ၅၉ နေရာ၌ ရှိနေကြောင်း The Nation မှ ဖော်ပြခဲ့သည်။

ထိုင်းနိုင်ငံတွင် ရစ်ချ်တာစကေး ပြင်းအားအမြင့်ဆုံး ၄ ဒသမ ၉ ရှိခဲ့သည့် ငလျင်နှင့်အတူ ငလျင်ပေါင်း ၅၉ ကြိမ် လှုပ်ခဲ့သည်။

ငလျင်လှုပ်ခတ်မှု အများဆုံးနိုင်ငံများ၏ အဆင့်သတ်မှတ်ချက်သည် နေ့စဉ် နောက်ဆုံးရ အချက်အလက်များ၊ အမေရိကန်ဘူမိဗေဒ လေ့လာရေးအဖွဲ့ (USGS) နှင့် ဥရောပ-မြေထဲပင်လယ် ငလျင်စင်တာ (European-Mediterranean Seismological Centre) တို့မှ ထုတ်ပြန်သည့် အချက်အလက်များအပေါ် အခြေခံပြီး အဆင့် ခွဲခြား သတ်မှတ်ခြင်းဖြစ်ကြောင်း Earthquakelist.org ဝက်ဘ်ဆိုက်က ဖော်ပြခဲ့သည်။

နိုင်ငံတစ်နိုင်ငံ၏ ကီလိုမီတာ ၃၀၀ အကွာအဝေး အတွင်းရှိပြီး ရစ်ချ်တာစကေး ၄ နှင့် ၄ အထက် ပြင်းအားရှိသည့် ငလျင်များကို စာရင်းတွင် ထည့်သွင်းကောက်ခံခဲ့ခြင်းဖြစ်သည်။

ငလျင်လှုပ်၍ အဆောက်အအုံ ပြိုကျမှုကို ထိုင်းက ဖယ်ရှားနေစဉ်

ယခုနှစ်အတွင်း ငလျင်လှုပ်ခတ်မှု အများဆုံး ၁၀ နိုင်ငံစာရင်းမှာ အောက်ပါအတိုင်း ဖြစ်သည်။

အင်ဒိုနီးရှား - ၅၁၇ ကြိမ်၊ ပြင်းအားအများဆုံး ရစ်ချ်တာစကေး ၆ ဒသမ ၁။

မက္ကဆီကို - ၄၈၃ ကြိမ်၊ ပြင်းအားအများ ဆုံး ရစ်ချ်တာစကေး ၆ ဒသမ ၂။

ဂရိ - ၄၁၃ ကြိမ်၊ ပြင်းအားအများဆုံး ရစ်ချ်တာစကေး ၅ ဒသမ ၃။

တူရကီ - ၄၀၃ ကြိမ်၊ ပြင်းအားအများဆုံး ရစ်ချ်တာစကေး ၅ ဒသမ ၃။

တရုတ် - ၃၂၄ ကြိမ်၊ ပြင်းအားအများဆုံး ရစ်ချ်တာစကေး ၇ ဒသမ ၁။

အီသီယိုပီးယား - ၂၄၁ ကြိမ်၊ ပြင်းအားအများဆုံး ရစ်ချ်တာစကေး ၅ ဒသမ ၉။

ချီလီ - ၂၂၅ ကြိမ်၊ ပြင်းအားအများဆုံး ရစ်ချ်တာစကေး ၆ ဒသမ ၁။

ဂျပန် - ၂၂၂ ကြိမ်၊ ပြင်းအားအများဆုံး ရစ်ချ်တာစကေး ၆ ဒသမ ၈။

အိန္ဒိယ - ၁၉၇ ကြိမ်၊ ပြင်းအားအများဆုံး ရစ်ချ်တာစကေး ၇ ဒသမ ၁။

ဖိလစ်ပိုင် - ၁၉၆ ကြိမ်၊ ပြင်းအားအများဆုံး ရစ်ချ်တာစကေး ၅ ဒသမ ၇။

အထက်ဖော်ပြပါ နိုင်ငံများသည် ရွှေ့လျားနေသည့် မြေအောက် ကျောက်ထုလွှာများ၏ အစွန်းများပေါ်တွင် တည်ရှိ နေသဖြင့် ငလျင်များ အများဆုံး လှုပ်ခတ်ခဲ့ခြင်းဖြစ်ကြောင်း Krungthep Turakij သတင်းစာက ဖော်ပြခဲ့သည်။

အင်ဒိုနီးရှား – ပစိဖိတ်မီးကွင်း ( Pacific Ring of Fire) အမည်ရှိ ငလျင်ကြောပေါ်တွင် တည်ရှိပြီး၊ အင်ဒို-သြစတြေးလျ၊ ယူရေးရှားနှင့် ပစိဖိတ် မြေအောက် ကျောက်ထုလွှာများ၏ ရွေ့လျားမှု၊ ပွတ်တိုက်မှုများကြောင့် ငလျင်များ မကြာခဏ လှုပ်ခတ်လေ့ရှိသည်။

ထိုင်းဝန်ကြီးချုပ် ပေတုန်တန် ငလျင်ဒဏ်ခံစားရသော ပြည်သူများကိုတွေ့ဆုံစဉ်

မက္ကဆီကို – ကိုကို့စ်နှင့် မြောက်အမေရိက မြေအောက်ကျောက်ထုလွှာ (Cocos and North American plates) များ တွေ့ဆုံသည့် နေရာအနီးတွင် တည်ရှိပြီး ငလျင်လှုပ်ခတ်နိုင်ခြေ မြင့်မားသည်။

ဂျပန် - ပစိဖိတ်မီးကွင်း ( Pacific Ring of Fire) အမည်ရှိ ငလျင်ကြောပေါ်တွင် တည်ရှိပြီး ပစိဖိတ်၊ ဖိလစ်ပိုင်နှင့် ယူရေးရှား မြေအောက်ကျောက်ထုလွှာများ ရွေ့လျားမှုကြောင့် မကြာခဏနှင့် တစ်ခါတစ်ရံတွင် ပြင်းထန်သော ငလျင်များ လှုပ်ခတ်လေ့ရှိသည်။

တူရကီ(Türkiye)- North Anatolian ပြတ်ရွေ့ကြောပေါ်တွင် တည်ရှိပြီး  ကြီးမားသော ငလျင်များ လှုပ်ခတ်လေ့ ရှိသည်။

တရုတ်နိုင်ငံ - ဟိမဝန္တာ ငလျင် ခါးပတ်ကွင်း (Himalayan Seismic Belt) အပါအဝင် အဓိက ပြတ်ရွေ့ကြောများ တည်ရှိသဖြင့် ငလျင်များ မကြာခဏ လှုပ်ခတ်လေ့ရှိသည်။

ချီလီ - Nazca နှင့် တောင်အမေရိက ကျောက်ထုလွှာများ တွေ့ဆုံသည့် နေရာတွင် ကမ္ဘာပေါ်၌ ငလျင်လှုပ်ခတ်မှု အရှိဆုံးနိုင်ငံများထဲမှာ ပါဝင်သည်။

ဖိလစ်ပိုင် -  ပစိဖိတ်မီးကွင်း ( Pacific Ring of Fire) အမည်ရှိ ငလျင်ကြောပေါ်တွင် တည်ရှိပြီး ဖိလစ်ပိုင်နှင့် ယူရေးရှား မြေအောက်ကျောက်ထုလွှာများ ရွေ့လျားမှုကြောင့် မကြာခဏ ငလျင်များ လှုပ်ခတ်လေ့ရှိသည်။

Source: The Nation

CNI News

၂၀၂၅ ခုနှစ်၊ ဧပြီ ၃

မြန်မာနိုင်ငံ ငလျင်ဘေးသင့် ပြည်သူများ ပြန်လည်ထူထောင်ရေးလုပ်ငန်းများ လုပ်ဆောင်နိုင်ရန် အမေရိကန် အစိုးရက ထိန်းသိမ်းထားသည့် ဒေါ်လာ ၁ ဘီလီယံအား ပြန်လည်ထုတ်ပေးရန် အမေရိကန်သံရုံးအား စာပေး ပို့ထားကြောင်း FUA အဖွဲ့ဝင် အမျိုးသားဒီမိုကရေစီအင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

၂၀၂၁ ခုနှစ်တွင် ဖြစ်ပွားခဲ့သည့် မြန်မာ့နိုင်ငံရေး ပြဿနာကြောင့် အမေရိကန်အစိုးရမှ ထိန်းသိမ်းထားသည့်  မြန်မာနိုင်ငံအစိုးရပိုင် အမေရိကန်ဒေါ်လာ ၁ ဘီလီယံအား မြန်မာပြည်သူလူထု၏ ပြည်လည်ထူထောင်ရေး လုပ်ငန်းများတွင် သုံးစွဲနိုင်ရန်အတွက် ပြန်လည်ထုတ်ပေးပါရန် ၂၀၂၅ ခုနှစ်၊ ဧပြီ ၂ ရက်တွင် ဖက်ဒရယ် ပြည်ထောင်စုမဟာမိတ် (FUA)အဖွဲ့က ကြေညာချက် ထုတ်ပြန်ခဲ့သည်။

ပြည်သူလူထု လိုအပ်နေသည့် အချိန်ဖြစ်၍ တောင်းဆိုရန် ဆုံးဖြတ်လိုက်ခြင်းဖြစ်ကြောင်း၊ အမေရိကန် အစိုးရ အနေဖြင့်လည်း လူသားချင်းစာနာသည့် တောင်းဆိုမှု ဖြစ်သည့်အတွက် မငြင်းလောက်ကြောင်း FUA အဖွဲ့ဝင် အမျိုးသား ဒီမိုကရေစီ အင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

 FUA ၏ ထုတ်ပြန်ချက်ကို တွေ့ရစဉ်

၎င်းက “NLD အစိုးရလက်ထပ်မှာ အမေရိကန်ကို ပို့ထားတယ်လို့ ပြောတာပေါ့၊ ဘယ်အတွက်ကြောင့် ပို့ထားလဲ၊ ကျနော်တို့ တိုင်းပြည်ရဲ့ ရန်ပုံငွေသဘောနဲ့ ထားတာလား ဘာလားတော့ တိတိကျကျတော့ မသိဘူးပေါ့၊ NUG ကလည်း အဲဒီဟာကို ထုတ်ခွင့်ရဖို့အတွက် တောင်းဆိုတာတွေဘာတွေ ရှိတယ်ဆိုတော့ အဲအချိန်ကျမှ ကျနော် တို့လည်း သိရတာကိုး၊ ဒီဟာ ၁ ဘီလီယံ ဒီမှာရောက်နေပါလားဆိုတဲ့ဟာ သိရတယ်၊ ဒါပေမယ့် အမေရိကန်အစိုးရ ကလည်း ဘယ်သူ့ကိုမှ မပေးပဲနဲ့ အကုန်လုံး Freeze လုပ်ထားတယ်ဆိုတော့ ဒီဟာ ဒီအချိန်ဆိုရင်တော့ လူထု လည်း တအားလိုအပ်နေတဲ့ အချိန်ဆိုတော့လေ၊ တောင်းဆိုရင်တော့ ကောင်းမှာပဲဆိုပြီးတော့မှ အဲလိုလေး ဆုံးဖြတ်ချက်ချပြီး လုပ်လိုက်တာပါ။ အမေရိကန် အနေနဲ့လည်း ဒါမျိုးဆိုတဲ့ အခါကျတော့ လူသားချင်းစာနာတဲ့ ဟာမျိုး ဆိုတဲ့ခါကျတော့ သူလည်း မငြင်းလောက်ဘူး ထင်တယ်ပေါ့၊ အဲဒီအတွက်ကြောင့်မို့လို့ ဒီဟာလေး ထုတ်ပြန် ထုတ်ပြန်ပြီးတော့မှ အမေရိကန် သံရုံးကိုလည်း ပို့ပေါ့” ဟု ပြောသည်။

ဖက်ဒရယ်ပြည်ထောင်စု မဟာမိတ်အဖွဲ့ (FUA) အား အနာဂတ်မြန်မာနိုင်ငံအတွက် ဒီမိုကရေစီနှင့် ဖက်ဒရယ်စနစ် ကို အခြေခံသည့် ပြည်ထောင်စုနိုင်ငံ ပေါ်ထွန်းလာရေးအတွက် ရည်ရွယ်၍ ၂၀၂၄ ခုနှစ်၊ ဒီဇင်ဘာလ ၇ ရက်နေ့တွင် နိုင်ငံရေးပါတီ ၅ ပါတီဖြင့် စတင်ဖွဲ့စည်းခဲ့သည်။

ထိုအဖွဲ့တွင် အမျိုးသားဒီမိုကရေစီအင်အားစုပါတီ (NDF)၊ တိုင်းလိုင်(ရှမ်းနီ) အမျိုးသားဖွံ့ဖြိုးတိုးတက်ရေးပါတီ (TNDP)၊ နာဂအမျိုးသားပါတီ (NNP)၊ ကရင်ပြည်သူ့ပါတီ (KPP)နှင့် ကချင်ပြည်နယ် ပြည်သူ့ပါတီ (KSPP) တို့ဖြင့် ဖွဲ့စည်းထားသည်။

ထိုအဖွဲ့တွင် အမျိုးသားဒီမိုကရေစီအင်အားစုပါတီ (NDF)၊ တိုင်းလိုင်(ရှမ်းနီ) အမျိုးသားဖွံ့ဖြိုးတိုးတက်ရေး ပါတီ (TNDP)၊ နာဂအမျိုးသားပါတီ (NNP)၊ ကရင်ပြည်သူ့ပါတီ (KPP)နှင့် ကချင်ပြည်နယ် ပြည်သူ့ပါတီ (KSPP) တို့ဖြင့် ဖွဲ့စည်းထားသည်။

နိုင်ငံပိုင်သည့် ပိုက်ဆံဖြစ်သောကြောင့် ပြည်သူအနေဖြင့် လက်ခံသင့်ကြောင်း တိုင်းလိုင် (ရှမ်းနီ) အမျိုးသားဖွံ့ဖြိုး တိုးတက်ရေးပါတီ (TNDP) မှ ဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။

ငလျင်ကြောင့် ပြိုကျပျက်စီးနေမှုကို တွေ့ရစဉ်

၎င်းက “ဒါကနိုင်ငံပိုင်တဲ့ ပိုက်ဆံပဲ အချိန်မရွေး ထုတ်ပေးတဲ့ဥစ္စာကို လက်ခံရပါမယ်၊ အခုလိုဆိုရင် ပိုပြီးတော့ လက်ခံသင့်တယ်လို့ ကျနော်တို့ မြင်တာပေါ့နော်၊ ပြန်လည်တည်ထောင်ရေးကိစ္စ ဘယ်လောက် ကုန်ကျဦးမယ် တော့ မပြောတတ်ဘူး၊ အဲဒါကြောင့်မို့လို့ ကျနော်တို့ နိုင်ငံပိုင်တဲ့ ပိုက်ဆံတွေ ဖြစ်ပါတယ်၊ ဒါက နိုင်ငံပိုင်တဲ့ ငွေတွေ ဖြစ်တဲ့အတွက်ကြောင့်မို့လို့ ထုတ်ပေးဖို့ပဲ လိုအပ်တာပါ။ ပြည်သူအနေနဲ့ လက်ခံသင့်ပါတယ် ဒီကိစ္စကလေ၊ ဘာလို့ ဆိုတော့ ဟိုတုန်းကလည်း လက်မခံတာ မဟုတ်ပါဘူး၊ ပြည်သူအနေနဲ့ လက်ခံတယ်၊ ဒါပေမယ့် မထုတ်ပေးဖို့ တားတဲ့လူတွေ ရှိထားလို့ ဟိုဖက်ကလည်း မထုတ်ပေးခဲ့တာ ဖြစ်ပါတယ်” ဟု ပြောသည်။
ထို့ပြင် ထိန်းသိမ်းထားသည့် ငွေအား ပြန်လည်ထုတ်ပေးမည်ဆိုပါက ပြည်သူလူထုထံ ရောက်/မရောက်ကို လက်ရှိအစိုးရသည် တာဝန်ခံရမည်ဖြစ်ကြောင်း ဦးစိုင်းဋ္ဌေးအောင်က ဆက်ပြောသည်။

၎င်းက “ဒါက လက်ရှိအစိုးရ တာဝန်ခံရမယ်လေ၊ ဒါကနိုင်ငံတော်နဲ့ ဆိုင်တဲ့ကိစ္စကိုး၊ ပြည်သူတွေထဲ မရောက်ပါဘူး ပြောရအောင်က အမေရိကန် ထုတ်ပေးတယ်ဆိုတဲ့ အကြောင်းကိုတော့ သူတို့က ကြေညာပေးခဲ့ရင်တော့ ပြည်သူ လည်း သိရတာပေါ့နော်၊ ဒီဖက်ကလည်း လက်ခံရရှိတဲ့ အကြောင်းကိုတော့ ပြည်သူကို ပြောရမှာပေါ့၊ ဒါကတော့ နိုင်ငံပိုင်တဲ့ ငွေရေးကြေးရေး စီးဆင်းမှု သူ့ဥပဒေတိုင်းကိုသူ ဆောင်ရွက်သွားကြရမယ်လို့ ကျနော့်အနေနဲ့ မြင်တာ ပေါ့နော်” ဟု ပြောသည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ အလွန်အားပြင်းသော ငလျင်ကြီး တစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့သည်။

အဆိုပါ ငလျင်ကြောင့် စစ်ကိုင်းတိုင်း၊ မန္တလေးတိုင်းနှင့် နေပြည်တော်ကောင်စီနယ်များအတွင်း လူပေါင်း ၃၀၈၅ ဦးသေဆုံးပြီး ၄၇၁၅ ဦးထိခိုက်ဒဏ်ရာရရှိခဲ့ကာ ၃၄၁ ဦးပျောက်ဆုံးနေကြောင်း ဧပြီ ၃ ရက် နံနက် ၈ နာရီအထိ နောက်ဆုံးရစာရင်းကို နစက-က ထုတ်ပြန်ခဲ့သည်။

CNI News

၂၀၂၅ ခုနှစ်၊ ဧပြီ ၃

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ အလွန်အားပြင်းသော ငလျင်ကြီးတစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့သည်။

အဆိုပါ ငလျင်ကြောင့် စစ်ကိုင်းတိုင်း၊ မန္တလေးတိုင်းနှင့် နေပြည်တော်ကောင်စီနယ်များအတွင်း သေဆုံး၊ ထိခိုက်ဒဏ်ရာရရှိ၊ ပျောက်ဆုံးစာရင်းကို ဧပြီ ၃ ရက် နံနက် ၈ နာရီအထိ နောက်ဆုံးရစာရင်းကို နစက-က ထုတ်ပြန်ခဲ့သည်။