CNI News

၂၀၂၅ ခုနှစ်၊ ဧပြီ ၂

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ အလွန်အားပြင်းသော ငလျင်ကြီးတစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့သည်။

အဆိုပါ ငလျင်ကြောင့် စစ်ကိုင်းတိုင်း၊ မန္တလေးတိုင်းနှင့် နေပြည်တော်ကောင်စီနယ်များအတွင်း သေဆုံး၊ ထိခိုက်ဒဏ်ရာရရှိ၊ ပျောက်ဆုံးစာရင်းကို ဧပြီ ၂ ရက် နံနက် ၈ နာရီအထိ နောက်ဆုံးရစာရင်းကို နစက-က ထုတ်ပြန်ခဲ့သည်။

CNI News

၂၀၂၅ ခုနှစ်၊ ဧပြီလ ၂

ငလျင်ဘေးဒဏ်သင့်ဒေသများတွင် ယခုရက်ပိုင်းအတွင်း မိုးရွာသွန်းနိုင်ဖွယ်ရှိသော်လည်း မိုးရေချိန် အများအပြား ရွာသွန်းမည်မဟုတ်ဘဲ အနည်းငယ်သာ ရွာသွန်းနိုင်ကြောင်း မိုးလေဝသနှင့် ဇလဗေဒညွှန်ကြားမှု ဦးစီးဌာနမှ ညွှန်ကြားရေးမှူး ဦးလှထွန်းက CNI သတင်းဌာနသို့ ပြောသည်။

တိုင်းထွာချက်များအရ ဧပြီလ ၅ ရက်၊ ၆ ရက်လောက်တွင် ဘင်္ဂလားပင်လယ်အော်အတွင်း လေဖိအားနည်း ရပ်ဝန်းတစ်ခုဖြစ်ပေါ်လာနိုင်ပြီး မုန်တိုင်းဖြစ်မည့် အနေအထားကိုတော့ လက်ရှိတွင် မတွေ့ရသေးကြောင်း၊ လေဖိအားနည်းရပ်ဝန်းဖြစ်ပေါ်ပြီးမှသာ ခန့်မှန်းရခြင်းဖြစ်ကြောင်း ၎င်းက ပြောသည်။

“အဓိကရွာနိုင်တဲ့နေရာတွေကတော့ တောင်ပိုင်းတို့၊ မြစ်ဝကျွန်းပေါ်ဒေသ၊ ပဲခူး၊ ရန်ကုန်၊ ဧရာ၊ မွန်၊ တနင်္သာရီ၊ ရှမ်းဘက်ရွာနိုင်တယ်။ မြန်မာပြည်အထက်ပိုင်းဆို ကချင်တို့၊ စစ်ကိုင်းတိုင်းဒေသကြီး အထက်ပိုင်းတို့ မိုးရွာသွန်း တာတွေရှိနိုင်တယ်။ ငလျင်ဒဏ်သင့်ဒေသတွေမှာတော့ မိုးကတော့ ရွာနိုင်တယ်လို့တော့ လက်ရှိတွက်ချက်မှုတွေ အရ ပြန်ကျမိုးတွေရွာတာပေါ့။ အပူပြန်တဲ့တိမ်တွေကြောင့် အဲဒါမျိုးတွေ ရှိနိုင်တယ်။ သိပ်ပြီးတော့ များများ စားစား ရွာမယ့်အနေအထားမျိုးတော့ မတွေ့ရဘူး။ တကယ်တမ်း များများစားစား ရွာနိုင်တာက မုန်တိုင်းဝင်ရင် တော့ ရွာနိုင်တယ်။ ဒါပေမယ့် မုန်တိုင်းကလည်း ဖြစ်နိုင်ဖို့လည်း ကြိမ်းသေ ကံသေကံမ ပြောလို့မရပါဘူး။ လောလောဆယ်အရကတော့ မုန်တိုင်းဖြစ်မယ့်အလားအလာလည်း မတွေ့ရဘူး။ အဓိကကတော့ မိုးရွာတဲ့အခါ များများရွာရင် အန္တရာယ်ရှိတာပေါ့။ ပြိုနေတဲ့ အဆောက်အအုံတွေ မိုးရေကြောင့် ပိသွားတာတို့ ဘာတို့ ဒါမျိုး တွေပေါ့။ အောက်ခံမြေသား အိပြီး ပြိုပြီးတော့ ပျက်စီးမှုတွေ ရှိနိုင်တယ်။ လက်ရှိအနေအထားကတော့ ငလျင် ဒဏ်သင့်ဒေသတွေမှာ အဲဒီလောက်ထိတော့ များများစားစား ရွာမယ့် အနေအထားမတွေ့ရဘူး။ ဘာပဲပြောပြော မိုးရွာရင်တော့ အမိုးအကာ လိုတာပေါ့” ဟု ၎င်းက ပြောသည်။

ငလျင်ကြောင့် သေဆုံးခဲ့ရသည့် ရုပ်အလောင်းများကို လမ်းပေါ်တွင် ချထားစဉ်

မြန်မာနိုင်ငံတွင် မတ်လ ၂၈ ရက်နေ့က ပြင်းအား ၇.၇ အဆင့်ရှိသည့် ငလျင်တစ်ခု လှုပ်ခတ်ခဲ့ပြီးနောက် နေအိမ်၊ အဆောက်အအုံအများအပြား ပြိုကျပျက်စီးခဲ့ရသော်လည်း ဧပြီလ ၁ ရက်အနေ့အထိ ငလျင်ငယ်လေးများ ဆက်လက် လှုပ်ခတ်နေဆဲဖြစ်သည်။

ထို့ကြောင့် ဒေသခံပြည်သူလူထုအနေဖြင့် နေအိမ်များတွင် မနေထိုင်ရဲကြသဖြင့် လမ်းမများပေါ်သို့ ထွက်ကာ နေထိုင်အိပ်စက်မှုများပြုလုပ်နေရခြင်းဖြစ်သည်။

ထို့ပြင် ရာသီဥတုပူပြင်းမှုနှင့်အတူ ပြိုကျအဆောက်အအုံများကြား သေဆုံးရုပ်အလောင်းများကိုလည်း အလုံးစုံ မထုတ်နိုင်သေးသည့်အတွက် ပုပ်နံ့များ ထွက်ပေါ်နေကြောင်း ကူညီကယ်ဆယ်ရေး အသင်းများထံက သိရသည်။

အဆောက်အအုံအောက်ခြေ၌ ပိတ်မိနေသူများကို ကယ်ထုတ်နိုင်ရန် ကယ်ဆယ်ရေးများ ကြိုးစားလုပ်ဆောင်နေစဉ်

ထိုအခြေအနေမျိုး၌ မိုးရွာသွန်းမှုများ ဖြစ်ပေါ်လာမည်ဆိုပါက ပြိုကျပျက်စီးသည့် အဆောက်အအုံများအတွက် ပိုအန္တရာယ်ရှိနိုင်သည့်အပြင် ဒေသခံလူထုအနေဖြင့် ကျန်းမာရေးကိုလည်း သတိပြုရမည်ဖြစ်ကြောင်း ပုဂံခရိုင် ပြည်သူ့ကျန်းမာရေးဦးစီးဌာနမှ ကျန်းမာရေးမှူး ဒေါက်တာ တင်မောင်ချိုက CNI သတင်းဌာနသို့ ပြောသည်။

“ရေကောင်းရေသန့် ရရှိဖို့လိုအပ်သလို ပတ်ဝန်းကျင်သန့်ရှင်းရေးကလည်း အရေးကြီးတာကို။ ရေကတော့ ဦးစားပေးပြီး လုပ်ပေးရမှာပေါ့။ ရေက အဓိကပဲလေ။ လူမှာအလိုအပ်ဆုံးက ရေပဲ။ ရေမရှိရင်တော့ အဆင်မပြေ နိုင်ဘူး။ heat stroke တွေ ဖြစ်နိုင်တာပေါ့။ အရေပြားနဲ့ပတ်သက်တဲ့ဟာတွေ Personal Hygiene နည်းတော့ ကြတော့ အဲဒါတွေရှိနိုင်တယ်။ နောက် လူစု လူဝေးနဲ့ နေကြရတော့ လေကောင်းလေသန့် မရရှိဘူးဆိုရင် ဝမ်းလျှော ဝမ်းပျက်တွေ ဖြစ်နိုင်တယ်” ဟု ၎င်းက ပြောသည်။

မြန်မာနိုင်ငံတွင် မတ်လ ၂၈ ရက်နေ့က ပြင်းအား ၇.၇ ရစ်(ခ်)တာစကေးရှိသည့် ငလျင်လှုပ်ခတ်သွားမှုကြောင့် လက်ရှိအချိန်ထိ လူပေါင်း ၂၀၀၀ ကျော် သေဆုံးလျက်ရှိပြီး ထိခိုက်ဒဏ်ရာရရှိသူဦးရေမှာ ၄၀၀၀ ကျော်ရှိပြီ ဖြစ်ကြောင်း နစကမှ ထုတ်ပြန်ထားသည်။

CNI News

၂၀၂၅ ခုနှစ်၊ ဧပြီ ၂

အ‌ဆောက်အဦများ ဆောက်လုပ်ရာတွင် လာဘ်စားမှုများ လျော့နည်းစေရန်နှင့် အရည်အသွေးထိန်းချုပ်မှုအား ဖိဖိစီးစီးလုပ်ဆောင်ရန် လိုအပ်ကြောင်း ပြည်သူ့ပါတီ (PP) မှ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

ထို့ပြင် ချပေးထားသည့် ဘတ်ဂျက်၏ မည်မျှ ရာခိုင်နှုန်းခန့်အား လက်တွေ့မှာ အကောင်အထည်ဖော် လုပ်ဆောင် သလဲဆိုသည့်အပေါ် စစ်‌‌မေးစရာ ရှိလာပြီး အဓိကအသုံးပြုနေသည့် ဘိလပ်မြေ၊ သံချောင်း စသည့်တို့၏ အရည်အသွေးနှင့် Quality control (အရည်အသွေးထိန်းချုပ်မှုအား)ကို ဖိဖိစီးစီး လုပ်ဆောင်ရမည်ဟု ၎င်းက ပြောသည်။

ဦးကိုကိုကြီးက “ကျနော်တို့ အရပ်ထဲမှာကိုက တော်တော်များများ ပြောဆိုနေကြတာတွေ ရှိပါတယ်၊ အဲ့ဒီဟာ ဘာလဲဆိုတော့ လမ်းတံတားတွေမှာလည်း တင်ဒါတစ်ခု ကျဖို့အတွက်ကို အဆင့်လိုက်အဆင့်လိုက်ကို ဂါရဝကြေး ဆိုပြီးတော့ ပေးနေရတဲ့ ကိစ္စတွေက မြေပြင်ပေါ်မှာ တကယ်အလုပ်လုပ်တဲ့ အခါလည်းကျရော ချ‌‌ပေးတဲ့ ဘတ်ဂျက်ရဲ့ ဘယ်လောက်ရာခိုင်နှုန်းလောက်က လက်တွေ့ အလုပ်လုပ်သလဲဆိုတာ စစ်စရာ စစ်‌မေးစရာတွေ ပေါ်လာတာပေါ့။ နောက်တစ်ခုက ကျနော်တို့က နိုင်ငံတကာမှာဆိုရင် Quality control ပေါ့၊ ဒီ Third party ကနေပြီးတော့ စစ်တာပေါ့၊ Third party ကော်မတီတွေက အရည်အသွေးစစ်ပြီးတော့မှ ကျနော်တို့က အတည်ပြုတာ၊ အခု ဒီနိုင်ငံမှာက Third party အယူအဆကို သေသေချာချာ ကျင့်သုံးဖို့လိုတယ်၊ အဲဒီတော့ အင်ဂျင်နီယာတွေ အနေနဲ့ကလည်း တချို့ တော်တော်များများကတော့ ဗိသုကာ ဒီဇိုင်းတွေမှာ ရစ်ချ်တာစကေး ၇ လောက်အထိကို သူတို့ တွက်ချက်ပြီးတော့ ဆောက်ကြတာရှိတယ်၊ အဲဒီတော့ အခုကတော့ ၇ ဒသမ ၇ ဆိုတာ ကျတော့လည်း တော်ရုံတန်ရုံ ခံနိုင်ရည် ရှိဖို့တော့ ခက်တယ်ပေါ့၊ အဓိက ဒီသုံးတဲ့ ဘိလပ်မြေတို့ သံချောင်းတို့ စတဲ့ အရည်အသွေးတွေ၊ ခုနကပြောတဲ့ Quality control လုပ်တဲ့ ကိစ္စကိုတော့ ဖိဖိစီးစီး လုပ်ဖို့ လိုအပ်တယ်လို့ မြင်ပါတယ်” ဟု ပြောသည်။ 

ကယ်ဆယ်ရေးအဖွဲများ ကြည့်ရှုစစ်ဆေးနေစဉ်

ယခုဖြစ်ပေါ်ခဲ့သည့် ငလျင်ဘေးဒဏ်ကြောင့်ထိခိုက်ပျက်စီးခဲ့ရမှုများကို သင်ခန်းစာ ယူ၍ လမ်းတံတားနှင့် အဆောက်အဦများ ဆောက်လုပ်ရာတွင် သဘာဝဘေးအန္တရာယ် ခံနိုင်ရည်စံနှုန်းများကို စနစ်တကျ တွက်ချက်ဆောက်လုပ်စေရေး စစ်ဆေးကြပ်မတ် ဆောင်ရွက်သွားရန်လိုကြောင်း၊ ယခုလှုပ်ခတ်ခဲ့သည့် ငလျင်ဆိုင်ရာ အချက်အလက်နှင့် ဖြစ်ပေါ်မှုများကိုလည်း စနစ်တကျ မှတ်တမ်းပြုစုထားရှိရန်နှင့် ထုတ်ပြန်မှုများ ဆောင်ရွက်ပေးသွားရန်လိုကြောင်း နစကဥက္ကဋ္ဌက ပြောသည်။

အဆောက်အဦများအား စစ်ဆေးရန် နည်းဥပဒေများ၊ အင်ဂျင်နီယာအဖွဲ့များ ရှိသော်လည်း လာဘ်စားမှုများ ရှိနေသောကြောင့် နောက်ဆက်တွဲအကျိုးဆက်များ ခံစားနေရခြင်းဖြစ်ကြောင်း အမျိုးသား ဒီမိုကရေစီ အင်အားစုပါတီ(NDF)မှ ဒုဥက္ကဋ္ဌ ဦးထက်အောင်ကျော်က CNI သတင်းဌာနသို့ ပြောသည်။

၎င်းက “ဒီဟာကြီးကို စစ်ဆေးဖို့အတွက်ကိုက အင်ဂျင်နီယာအဖွဲ့တွေ ဘာတွေညာတွေက ရှိပြီးသား၊ ကျနော်တို့ ဆီမှာ ဥပဒေ၊ နည်းဥပဒေတွေ အကုန်လုံးက ရှိပြီးသားပဲ၊ ဒါပေမယ့် ဒီအပေါ်မှာ လာဘ်စားမှုတွေနဲ့ ဒါလေး မသိချင် ယောင်ဆောင်ပြီးတော့မှ အိတ်ကပ်ထဲ ဘယ်လောက်ထည့်လိုက်ရင် ဘယ်လိုပေးလိုက်ရင် ဘယ်လိုပြီးသွားတယ် ဆိုတဲ့ ဟာတွေကြောင့်မို့လို့ ဒါကိစ္စတွေ ဖြစ်တာကိုး၊ ဒီအတွက်ကြောင့်မို့လို့လည်း ဆောက်တဲ့လူတွေ ကိုယ်တိုင်က လည်း ဒီလိုပေးပြီး လုပ်လို့ရတယ် ဆိုတဲ့အတွက်ကြောင့်မို့လို့ လွယ်လွယ်ကူကူ လျှောက်လုပ်ကြတာ ဖြစ်တဲ့ အတွက်ကြောင့် အခုမလိုလားအပ်တဲ့ အမှန်တကယ်ဆိုရင် ၁၀ ပုံ ၁ ပုံပေါ့၊ ဒီလောက် မြေငလျင်လှုပ်တဲ့အပေါ်မှာ ကျနော်တို့ ခံစားရမယ့် အတိုင်းအတာက ၁၀၀ ဖိုးခံစားရမယ့်ဟာက အခု ၁၀၀၀ ဖိုးလောက်ခံစားရတယ် ဆိုတဲ့ အပိုင်းတွေ ဖြစ်ကုန်တာပေါ့၊ ဘာမှမဖြစ်လောက်ပါဘူး ဒီလိုလည်း ရနေတာပဲ ဆိုတဲ့ ခပ်ပေါ့‌ပေါ့ အတွေးတွေနဲ့ လုပ်ခဲ့တဲ့ဟာတွေရဲ့ နောက်ဆက်တွဲ အကျိုးဆက်တွေပေါ့လေ အခုခံစားရတာ။ ဥပ‌ဒေမရှိတာမဟုတ်ဘူး၊ အဲဒီ ရှိတဲ့ဥပဒေကို သေသေချာချာ မှန်မှန်တိတိကျကျ ကိုင်တွယ် ကျင့်သုံးတာ လျော့နည်းနေတာပေါ့နော်၊ ခုန လာဘ်စားမှုတွေနဲ့ ဘာတွေနဲ့ညာတွေနဲ့ အကုန်လုံး အဲ့ဟာတွေ ဖြစ်နေတာကို၊ ဖြစ်နေတဲ့အတွက်ကြောင့်မို့လို့ ဒါတွေသည် နောက်ဆက်တွဲ အကျိုးဆက်တွေ ဖြစ်လာတာ။ ဒီဟာကို တကယ့်ကို ဖိဖိစီးစီး တိတိကျကျ ကိုင်တွယ် ရမယ်” ဟု ပြောသည်။

ငလျင်ကြောင့် ပြိုကျပျက်စီးနေသည့် အဆောက်အအုံတစ်ခုမြင်ကွင်း

မြန်မာနိုင်ငံတွင် မတ်လ ၂၈ ရက်နေ့က ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်မှုကြောင့် လူပေါင်း ၂၀၀၀ ကျော်(လက်ရှိအချိန်) သေဆုံးပြီး ၄၀၀၀ ဝန်းကျင်(လက်ရှိအချိန်) ထိခိုက်ဒဏ်ရာများ ရရှိခဲ့သည်။

ထို့ပြင် ဟိုတယ်များ၊ လူနေအိမ်များ၊ ဘာသာရေးအဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ လမ်းတံတားများ ပြိုကျပျက်စီးခဲ့သည်။

ငလျင်ဘေးဒဏ်ကြောင့် ထိခိုက်ပျက်စီးခဲ့ရမှုများကို ပြန်လည်ထူထောင်ရေးလုပ်ငန်းများဆောင်ရွက်ရာ၌ ပြိုကျပျက်စီးသွားသော အဆောက်အဦများနှင့် အပျက်အစီးများအား ရှင်းလင်းဖယ်ထုတ်ခြင်းအပိုင်း၊ ပြိုကျပျက်စီးနေဆဲအဆောက်အဦများအား ဘေးအန္တရာယ်မဖြစ်စေရေး စနစ်တကျရှင်းလင်းဖယ်ရှားခြင်း အပိုင်း၊ ပြန်လည်တည်ဆောက်ခြင်းအပိုင်းဟူ၍ အပိုင်း ၃ ပိုင်းဖြင့် ဆောင်ရွက်သွားရမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောကြားထားသည်။

CNI News
၂၀၂၅ ခုနှစ်၊ ဧပြီ ၁

မြန်မာနိုင်ငံတွင် အလွန်အားပြင်းသော ငလျင်ဘေးဒဏ်သင့်ခဲ့သောကြောင့် တရုတ်အစိုးရက လူသားချင်း စာနာထောက်ထားမှု အကူအညီများ ပေးအပ်နိုင်ရေးအတွက် မြန်မာနိုင်ငံကြက်ခြေနီအသင်းသို့ ယွမ်ငွေ ၁ ဒသမ ၅ သန်း ထောက်ပံ့လွှဲပြောင်းပေးအပ်ခဲ့သည်ဟု တရုတ်သံရုံးက ထုတ်ပြန်ခဲ့သည်။

ပြီလ ၁ ရက်နေ့က မြန်မာနိုင်ငံဆိုင်ရာ တရုတ်ကောင်စစ်ဝန်ရုံးမှသံမှူးကြီး Ms. Cao Jing သည် မြန်မာနိုင်ငံ ကြက်ခြေနီအသင်းဥက္ကဋ္ဌ ပါမောက္ခဒေါက်တာဦးမျိုးညွန့်နှင့် တွေ့ဆုံခဲ့ပြီး မြန်မာနိုင်ငံသို့ တရုတ်နိုင်ငံကြက်ခြေနီ အသင်းမှ ထောက်ပံ့ပေးသည့် ယွမ်ငွေ ၁ ဒသမ ၅ သန်းကို လွှဲပြောင်းပေးအပ်ခဲ့သည်။

ထို့နောက် သံမှူးကြီးက “တရုတ်နိုင်ငံသည် အရေးပေါ် လူသားချင်းစာနာထောက်ထားမှု အကူအညီ ယွမ်သန်း ၁၀၀ ပေးအပ်ခဲ့ပြီး အသက်ရှင်ကျန်ရစ်သူ (၆) ဦးကို ကယ်ဆယ်နိုင်ခဲ့သည့် ကယ်ဆယ်ရေးအဖွဲ့များစွာကို စေလွှတ် ခဲ့ပါကြောင်း၊ တရုတ်ကြက်ခြေနီအသင်း၏ ကူညီမှုသည် မြန်မာနိုင်ငံပြည်သူများအတွက် တရုတ်ပြည်သူများ၏ နက်ရှိုင်းသော ချစ်ကြည်ရင်းနှီးမှုကို ဖော်ပြနေကြောင်း” ပြောကြားခဲ့သည်။

ထို့ပြင် တရုတ်နိုင်ငံသည် မြန်မာနိုင်ငံ၏ လိုအပ်ချက်များအပေါ် အခြေခံ၍ ဘေးအန္တရာယ် ကယ်ဆယ်ရေး အထောက်အပံ့များ ဆက်လက် ပံ့ပိုးပေးပြီး အခက်အခဲများ ကျော်လွှားနိုင်အောင် ကူညီသွားရန် ဆန္ဒရှိကြောင်း သူမက ပြောကြားခဲ့သည်။

မတ်လ ၂၈ ရက်က မြန်မာနိုင်ငံ၏ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင် ကြီးတစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့ခြင်းကြောင့် စစ်ကိုင်းတိုင်း၊ မန္တလေးတိုင်း၊ မကွေးတိုင်း၊ ပဲခူးတိုင်း၊ ရှမ်းပြည်နယ်နှင့် နေပြည်တော်ကောင်စီနယ်မြေတို့မှာ လူပေါင်း ၂၇၀၀ ကျော် သေဆုံးပြီး ၄၀၀၀ ကျော် ထိခိုက် ဒဏ်ရာများ ရရှိခဲ့ကြောင်း နစကဥက္ကဋ္ဌက ပြောသည်။

အဆိုပါ စာရင်းသည် ဧပြီ ၁ ရက်နေ့ နံနက်ပိုင်းထိ စာရင်းဖြစ်ကြောင်း၊ ဆက်လက်၍ အရေအတွက် တိုးပွားလာ နိုင်ကြောင်း သိရသည်။

CNI News

၂၀၂၅ ခုနှစ်၊ ဧပြီ ၁ 

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်ခဲ့ခြင်း ကြောင့် ထိခိုက်ပျက်စီးဆုံးရှုံးခဲ့ရသော မြို့များထဲတွင် တံတားမြို့လည်း ပါဝင်သည်။

အဆိုပါ တံတားဦးမြို့သည် မန္တလေးမြို့အနီးမှာ တည်ရှိပြီး မန္တလေးကို လေယာဉ်ဖြင့်သွားပါက လေဆိပ်တည် ရှိသော မြို့ဖြစ်သည်။

မတ်လ ၂၈ ရက်က လှုပ်ခတ်ခဲ့သော ငလျင်ကြောင့် တံတားဦးလေဆိပ်(မန္တလေးလေဆိပ်)နှင့် တံတားဦးမြို့တွင် လူနေအိမ်များ အပါအဝင် တခြားသော အဆောက်အအုံများ ပြိုကျပျက်စီးခဲ့သည်။

ထို့နောက် တံတားဦးမြို့သို့ ကူညီကယ်ဆယ်ရေးအဖွဲ့များ လာရောက်ခြင်းမရှိဘဲ မန္တလေး၊ စစ်ကိုင်း၊ နေပြည်တော် စသည့် မြို့များတွင်သာ ပြည်တွင်း/ပြည်ပ ကူညီကယ်ဆယ်ရေးအဖွဲ့များ ရောက်ရှိနေခြင်းဖြစ်သည်။

Phyo Thet Naing ဆိုသာ လူမှုကွန်ရက်ပိုင်ရှင်က “ ယနေ့(ဧပြီ ၁ ရက်) ရောက်ခဲ့သော တံတားဦး။  တံတားဦးရဲ့ မြေအောက်ရေက ရေငန်တဲ့ အနေအထားပါ။ ယခင်ကတည်းက သောက်ဖို့အတွက် အဆင်မပြေပါဘူး။ ဒီနေ့ တံတားဦးကို ၂၀ လီတာ ရေသန့်ဗူးကြီး ၂၁၂ ဗူး ဆိုတော့ကာ ကူညီပြီး လှူဒါန်းပေးကြတဲ့လူတွေ အတော်ပြိုင်းခဲ့ ရတဲ့ အနေအထားပါ။ အလှူရှင်ကတော့ ကူမဲမြို့မှ သိန်းကျော် ရေသန့်စက်ရုံမှ လှူဒါန်းမှုကို ချိတ်ဆက် ဆောင်ရွက်ပေးခဲ့တယ်။ တံတားဦး မြို့ပေါ် အခြေအနေ အတော်ဆိုးပါတယ်”ဟု ရေးသားဖော်ပြထားသည်။

ဆက်လက်ပြီး ၎င်းက “အထူးသဖြင့် ဈေးအနီးအနား ပတ်ဝန်းကျင်မှာ အိမ်ကောင်းသလောက် မရှိအောင် ပျက်ဆီးခဲ့ပြီး သောက်သုံးရေ ရှားပါးနေပါပြီ။ လှူဒါန်းချင်သူများ အနေဖြင့် တံတားဦး‌မြို့လယ်လမ်းနှင့် မြို့တွင်း လမ်းသွယ်များ၊ ဈေးအနီးနားမှ ဘုန်းကြီးကျောင်း၊ တံတားဦးဘောလုံးကွင်း၊ ထွေအုပ်ရုံး အနီးတဝိုက်တွေကို ဦးစားပေး လှူဒါန်းပေးကြပါ။ တစ်ချို့ အိမ်တွေမှာ လူကြီးတွေဘဲ ရှိသဖြင့် အိမ်ထဲအထိ အရောက် သယ်ပေးခြင်း ဖြင့် ကုသိုလ် ပိုယူနိုင်ပါသည်။ တံတားမြို့ ပျက်ဆီးမှု အခြေအနေကိုတော့ လိုင်းအဆင်ပြေမှ တင်ပေးပါ့မယ်”ဟု ၂၀၂၅ ခုနှစ်၊ ဧပြီ ၁ ရက်တွင် ရေးသား ထုတ်လွှင့်ခဲ့သည်။

CNI News

၂၀၂၅ ခုနှစ်၊ ဧပြီ ၁ 

မြန်မာနိုင်ငံတွင် မတ်လ ၂၈ ရက်က ဖြစ်ပေါ်ခဲ့သော ငလျင်လှုပ်ခတ်မှုကြောင့် ထိခိုက်ခံစားခဲ့ရသည့် ပြည်သူများ အတွက် ထိုင်းဘုရင်မင်းမြတ်နှင့် မိဖုရားကြီးတို့က ဧပြီ ၁ ရက်က လူသားချင်းစာနာထောက်ထားမှု အကူအညီများ ပေးအပ်ခဲ့သည်။

ထိုင်းဘုရင်မင်းမြတ်နှင့် မိဖုရားကြီးတို့က မြန်မာနိုင်ငံကို ပေးအပ်သော လူသားချင်းစာနာထောက်ထားမှု အကူအညီများကို ထိုင်းဘုရင့်လေတပ်က ၂၀၂၅ ခုနှစ်၊ ဧပြီ ၁ ရက်နေ့ နံနက် ၁၀ နာရီတွင် နေပြည်တော် လေဆိပ်သို့ ရောက်ရှိ၍ လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေးဝန်ကြီးဌာန ဒုဝန်ကြီး ဦးစိုးကြည်ထံသို့ မြန်မာနိုင်ငံဆိုင်ရာ ထိုင်းသံအမတ်ကြီးက ပေးအပ်လှူဒန်းခဲ့သည်။

အဆိုပါ လူသားချင်းစာနာထောက်ထားမှု အကူအညီများမှာ ဆေးဝါးအိတ်များ၊ ယာယီတဲများ၊ အသင့်စား ခေါက်ဆွဲ ခြောက်၊ ဆန်ပြုတ်ဘူး၊ ငါးသေတ္တာ၊ ဓာတ်မီး၊ မီးစက်နှင့် အခြား လိုအပ်သော ကယ်ဆယ်ရေးပစ္စည်းများ ပါဝင် သည်။

CNI News

၂၀၂၅ ခုနှစ်၊ ဧပြီ ၁

မြန်မာနိုင်ငံတွင် မတ်လ ၂၈ ရက် လှုပ်ခတ်သွားသည့် ငလျင်ကြောင့် နေပြည်တော်ကောင်စီနယ်မြေ ပျဉ်းမနားမြို့ရှိ လူနေအိမ်များနှင့် ဘာသာရေး အဆောက်အအုံများ ပြိုကျပျက်စီးသွားခဲ့သည်။

သို့သော် ပျဉ်းမနားမြို့သို့ ကူညီကယ်ဆယ်ရေးများ အရောက်အပေါက် နည်းလှသည်ဟု ဒေသခံများက ပြောသည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်ကြီးလှုပ်ခတ်ခဲ့ခြင်းကြောင့် စစ်ကိုင်းတိုင်း၊ မန္တလေးတိုင်း၊ နေပြည်တော်ကောင်စီနယ်မြေ၊ မကွေးတိုင်း၊ ရှမ်းပြည်နယ်အရှေ့‌မြောက်ဒေသများ မှာ လူသေဆုံး ထိခိုက်ဒဏ်ရာရရှိမှုများနှင့် အဆောက်အအုံများ ပြိုကျပျက်စီးမှုများ ဖြစ်ပေါ်ခဲ့သည်။

ထို့နောက် လမ်းတံတားများလည်း ပြိုကျပျက်စီး၍ သွားလာရေး ခက်ခဲပြီး ကူညီကယ်ဆယ်ရေးလုပ်ငန်းများ လုပ်ကိုင်ရန် အခက်အခဲများ ဖြစ်ပေါ်နေသည်။

CNI News

၂၀၂၅ ခုနှစ်၊ ဧပြီ ၁

မြန်မာနိုင်ငံမှာ ကြီးမားသည့် ငလျင်လှုပ်ခတ်မှုကြောင့် ထိခိုက်ခံစားခဲ့ရသော ပြည်သူလူထုများကို ကူညီကယ် ဆယ်ရေးအတွက် အလှူငွေပေးအပ်ပွဲ လုပ်ခဲ့ရာ စုစုပေါင်း ကျပ် ၁၁၆ ဒသမ ၈၄ ဘီလျံ အလှူငွေ ကောက်ခံရရှိခဲ့ ကြောင်း သိရသည်။

၂၀၂၅ ခုနှစ်၊ ဧပြီ ၁ ရက်က ငလျင်ဘေးသင့်ပြည်သူများအတွက် အလှူငွေ ပေးအပ်လှူဒါန်းပွဲ အခမ်းအနားကို နေပြည်တော်မှာ ကျင်းပခဲ့ရာ စီးပွားရေးလုပ်ငန်းရှင်များနှင့် စစ်ဘက်-အရပ်ဘက်ဆိုင်ရာ ခေါင်းဆောင်များ တက်ရောက်ခဲ့ကြသည်။

ထို့နောက် အလှူရှင်များက ငွေသား ကျပ် ၁၀၄ ဒသမ ၄၄ ဘီလျံနှင့် အလှူပစ္စည်း ကျပ် ၁၂ ဒသမ ၄ ဘီလျံ  စုစုပေါင်း ကျပ် ၁၁၆ ဒသမ ၈၄ ဘီလျံအား လှူဒါန်းခဲ့ကြောင်း သိရသည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်မှုကြောင့် လူပေါင်း ၂၀၀၀ ကျော် သေဆုံးပြီး ၄၀၀၀ ဝန်းကျင် ထိခိုက်ဒဏ်ရာများ ရရှိခဲ့သည်။

ထို့ပြင် ဟိုတယ်များ၊ လူနေအိမ်များ၊ ဘာသာရေးအဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ လမ်းတံတားများ ပြိုကျပျက်စီးခဲ့သည်။