CNI News

၂၀၂၅ ခုနှစ်၊ ဧပြီ ၁ 

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်ခဲ့ခြင်း ကြောင့် ထိခိုက်ပျက်စီးဆုံးရှုံးခဲ့ရသော မြို့များထဲတွင် တံတားမြို့လည်း ပါဝင်သည်။

အဆိုပါ တံတားဦးမြို့သည် မန္တလေးမြို့အနီးမှာ တည်ရှိပြီး မန္တလေးကို လေယာဉ်ဖြင့်သွားပါက လေဆိပ်တည် ရှိသော မြို့ဖြစ်သည်။

မတ်လ ၂၈ ရက်က လှုပ်ခတ်ခဲ့သော ငလျင်ကြောင့် တံတားဦးလေဆိပ်(မန္တလေးလေဆိပ်)နှင့် တံတားဦးမြို့တွင် လူနေအိမ်များ အပါအဝင် တခြားသော အဆောက်အအုံများ ပြိုကျပျက်စီးခဲ့သည်။

ထို့နောက် တံတားဦးမြို့သို့ ကူညီကယ်ဆယ်ရေးအဖွဲ့များ လာရောက်ခြင်းမရှိဘဲ မန္တလေး၊ စစ်ကိုင်း၊ နေပြည်တော် စသည့် မြို့များတွင်သာ ပြည်တွင်း/ပြည်ပ ကူညီကယ်ဆယ်ရေးအဖွဲ့များ ရောက်ရှိနေခြင်းဖြစ်သည်။

Phyo Thet Naing ဆိုသာ လူမှုကွန်ရက်ပိုင်ရှင်က “ ယနေ့(ဧပြီ ၁ ရက်) ရောက်ခဲ့သော တံတားဦး။  တံတားဦးရဲ့ မြေအောက်ရေက ရေငန်တဲ့ အနေအထားပါ။ ယခင်ကတည်းက သောက်ဖို့အတွက် အဆင်မပြေပါဘူး။ ဒီနေ့ တံတားဦးကို ၂၀ လီတာ ရေသန့်ဗူးကြီး ၂၁၂ ဗူး ဆိုတော့ကာ ကူညီပြီး လှူဒါန်းပေးကြတဲ့လူတွေ အတော်ပြိုင်းခဲ့ ရတဲ့ အနေအထားပါ။ အလှူရှင်ကတော့ ကူမဲမြို့မှ သိန်းကျော် ရေသန့်စက်ရုံမှ လှူဒါန်းမှုကို ချိတ်ဆက် ဆောင်ရွက်ပေးခဲ့တယ်။ တံတားဦး မြို့ပေါ် အခြေအနေ အတော်ဆိုးပါတယ်”ဟု ရေးသားဖော်ပြထားသည်။

ဆက်လက်ပြီး ၎င်းက “အထူးသဖြင့် ဈေးအနီးအနား ပတ်ဝန်းကျင်မှာ အိမ်ကောင်းသလောက် မရှိအောင် ပျက်ဆီးခဲ့ပြီး သောက်သုံးရေ ရှားပါးနေပါပြီ။ လှူဒါန်းချင်သူများ အနေဖြင့် တံတားဦး‌မြို့လယ်လမ်းနှင့် မြို့တွင်း လမ်းသွယ်များ၊ ဈေးအနီးနားမှ ဘုန်းကြီးကျောင်း၊ တံတားဦးဘောလုံးကွင်း၊ ထွေအုပ်ရုံး အနီးတဝိုက်တွေကို ဦးစားပေး လှူဒါန်းပေးကြပါ။ တစ်ချို့ အိမ်တွေမှာ လူကြီးတွေဘဲ ရှိသဖြင့် အိမ်ထဲအထိ အရောက် သယ်ပေးခြင်း ဖြင့် ကုသိုလ် ပိုယူနိုင်ပါသည်။ တံတားမြို့ ပျက်ဆီးမှု အခြေအနေကိုတော့ လိုင်းအဆင်ပြေမှ တင်ပေးပါ့မယ်”ဟု ၂၀၂၅ ခုနှစ်၊ ဧပြီ ၁ ရက်တွင် ရေးသား ထုတ်လွှင့်ခဲ့သည်။

CNI News

၂၀၂၅ ခုနှစ်၊ ဧပြီ ၁ 

မြန်မာနိုင်ငံတွင် မတ်လ ၂၈ ရက်က ဖြစ်ပေါ်ခဲ့သော ငလျင်လှုပ်ခတ်မှုကြောင့် ထိခိုက်ခံစားခဲ့ရသည့် ပြည်သူများ အတွက် ထိုင်းဘုရင်မင်းမြတ်နှင့် မိဖုရားကြီးတို့က ဧပြီ ၁ ရက်က လူသားချင်းစာနာထောက်ထားမှု အကူအညီများ ပေးအပ်ခဲ့သည်။

ထိုင်းဘုရင်မင်းမြတ်နှင့် မိဖုရားကြီးတို့က မြန်မာနိုင်ငံကို ပေးအပ်သော လူသားချင်းစာနာထောက်ထားမှု အကူအညီများကို ထိုင်းဘုရင့်လေတပ်က ၂၀၂၅ ခုနှစ်၊ ဧပြီ ၁ ရက်နေ့ နံနက် ၁၀ နာရီတွင် နေပြည်တော် လေဆိပ်သို့ ရောက်ရှိ၍ လူမှုဝန်ထမ်း၊ ကယ်ဆယ်ရေးနှင့် ပြန်လည် နေရာချထားရေးဝန်ကြီးဌာန ဒုဝန်ကြီး ဦးစိုးကြည်ထံသို့ မြန်မာနိုင်ငံဆိုင်ရာ ထိုင်းသံအမတ်ကြီးက ပေးအပ်လှူဒန်းခဲ့သည်။

အဆိုပါ လူသားချင်းစာနာထောက်ထားမှု အကူအညီများမှာ ဆေးဝါးအိတ်များ၊ ယာယီတဲများ၊ အသင့်စား ခေါက်ဆွဲ ခြောက်၊ ဆန်ပြုတ်ဘူး၊ ငါးသေတ္တာ၊ ဓာတ်မီး၊ မီးစက်နှင့် အခြား လိုအပ်သော ကယ်ဆယ်ရေးပစ္စည်းများ ပါဝင် သည်။

CNI News

၂၀၂၅ ခုနှစ်၊ ဧပြီ ၁

မြန်မာနိုင်ငံတွင် မတ်လ ၂၈ ရက် လှုပ်ခတ်သွားသည့် ငလျင်ကြောင့် နေပြည်တော်ကောင်စီနယ်မြေ ပျဉ်းမနားမြို့ရှိ လူနေအိမ်များနှင့် ဘာသာရေး အဆောက်အအုံများ ပြိုကျပျက်စီးသွားခဲ့သည်။

သို့သော် ပျဉ်းမနားမြို့သို့ ကူညီကယ်ဆယ်ရေးများ အရောက်အပေါက် နည်းလှသည်ဟု ဒေသခံများက ပြောသည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်ကြီးလှုပ်ခတ်ခဲ့ခြင်းကြောင့် စစ်ကိုင်းတိုင်း၊ မန္တလေးတိုင်း၊ နေပြည်တော်ကောင်စီနယ်မြေ၊ မကွေးတိုင်း၊ ရှမ်းပြည်နယ်အရှေ့‌မြောက်ဒေသများ မှာ လူသေဆုံး ထိခိုက်ဒဏ်ရာရရှိမှုများနှင့် အဆောက်အအုံများ ပြိုကျပျက်စီးမှုများ ဖြစ်ပေါ်ခဲ့သည်။

ထို့နောက် လမ်းတံတားများလည်း ပြိုကျပျက်စီး၍ သွားလာရေး ခက်ခဲပြီး ကူညီကယ်ဆယ်ရေးလုပ်ငန်းများ လုပ်ကိုင်ရန် အခက်အခဲများ ဖြစ်ပေါ်နေသည်။

CNI News

၂၀၂၅ ခုနှစ်၊ ဧပြီ ၁

မြန်မာနိုင်ငံမှာ ကြီးမားသည့် ငလျင်လှုပ်ခတ်မှုကြောင့် ထိခိုက်ခံစားခဲ့ရသော ပြည်သူလူထုများကို ကူညီကယ် ဆယ်ရေးအတွက် အလှူငွေပေးအပ်ပွဲ လုပ်ခဲ့ရာ စုစုပေါင်း ကျပ် ၁၁၆ ဒသမ ၈၄ ဘီလျံ အလှူငွေ ကောက်ခံရရှိခဲ့ ကြောင်း သိရသည်။

၂၀၂၅ ခုနှစ်၊ ဧပြီ ၁ ရက်က ငလျင်ဘေးသင့်ပြည်သူများအတွက် အလှူငွေ ပေးအပ်လှူဒါန်းပွဲ အခမ်းအနားကို နေပြည်တော်မှာ ကျင်းပခဲ့ရာ စီးပွားရေးလုပ်ငန်းရှင်များနှင့် စစ်ဘက်-အရပ်ဘက်ဆိုင်ရာ ခေါင်းဆောင်များ တက်ရောက်ခဲ့ကြသည်။

ထို့နောက် အလှူရှင်များက ငွေသား ကျပ် ၁၀၄ ဒသမ ၄၄ ဘီလျံနှင့် အလှူပစ္စည်း ကျပ် ၁၂ ဒသမ ၄ ဘီလျံ  စုစုပေါင်း ကျပ် ၁၁၆ ဒသမ ၈၄ ဘီလျံအား လှူဒါန်းခဲ့ကြောင်း သိရသည်။

မြန်မာနိုင်ငံတွင် မတ်လ ၂၈ ရက်က ပြင်းအား ၇ ဒသမ ၇ အဆင့်ရှိ ငလျင်လှုပ်ခတ်မှုကြောင့် လူပေါင်း ၂၀၀၀ ကျော် သေဆုံးပြီး ၄၀၀၀ ဝန်းကျင် ထိခိုက်ဒဏ်ရာများ ရရှိခဲ့သည်။

ထို့ပြင် ဟိုတယ်များ၊ လူနေအိမ်များ၊ ဘာသာရေးအဆောက်အအုံများ၊ အစိုးရရုံးများ၊ ဝန်ထမ်းအိမ်ယာများ၊ လမ်းတံတားများ ပြိုကျပျက်စီးခဲ့သည်။

CNI International News

ဘန်ကောက်၊ ဧပြီ ၁

ထိုင်းနိုင်ငံ၊ ဘန်ကောက်မြို့တော်တွင် ငလျင်လှုပ်ခတ်ခဲ့ပြီးနောက် မတ်လ ၃၁ ရက်တွင် အဆောက်အအုံ အများအပြားမှ ရွှေ့ပြောင်းမှုများ ဖြစ်ပေါ်ခဲ့ပြီးနောက် ဝန်ကြီးချုပ် ပေတုန်တန်(Paetongtarn Shinawatra)က ပြည်သူများကို အထိတ်တလန့် မဖြစ်ကြရန် တိုက်တွန်း ပြောကြားခဲ့ကြောင်း The Nation မှ ဖော်ပြခဲ့သည်။

ပေတုန်တန်က ထိုင်းနိုင်ငံတွင် ငလျင်လှုပ်ခတ်မှုများ မရှိတော့ကြောင်း အတည်ပြုထားပြီး မြန်မာနိုင်ငံတွင် နောက်ဆက်တွဲ လှုပ်ခတ်နေသော ငလျင်များသည် ထိုင်းနိုင်ငံအပေါ် သက်ရောက်မှုမရှိတော့ကြောင်း လူမှုမီဒီယာ မှ သတင်းစကားပါးခဲ့သည်။

အက်ကွဲကြောင်းများ ပေါ်ပေါက်ခဲ့သော အဆောက်အအုံများမှ ပိုင်ရှင်များက ဘေးလွတ်ရာ ပြောင်းရွှေ့ရန် ထုတ်ပြန်ထားသော်လည်း ထိုအက်ကွဲကြောင်းများသည် ယခင်ရှိပြီးသား အက်ကွဲကြောင်းများသာဖြစ်ကြောင်း ပေတုန်တန်က ရှင်းပြခဲ့သည်။

အဆောက်အအုံ ပိုင်ရှင်များအနေဖြင့် အက်ကွဲကြောင်းများသည် ယခင်ရှိပြီးသား၊ သို့မဟုတ် ငလျင်ကြောင့် ဖြစ်ပေါ်သော အက်ရာအသစ်များ ဟုတ်/မဟုတ် အတိအကျ သိရှိရန်အတွက် ၎င်းတို့၏ အဆောက်အအုံများကို စစ်ဆေးကြရန် ထုတ်ပြန်ထားသည့် ဘန်ကောက်အစိုးရ၏အမိန့်ကို လိုက်နာသင့်ကြောင်း ပေတုန်တန်က ပြောကြားခဲ့သည်။

ငလျင်ကြောင့် ပြိုကျတဲ့ အဆောက်အအုံကို လာစစ်ဆေးနေတဲ့ ထိုင်းဝန်ကြီးချုပ် ပေတုန်တန်ကို တွေ့ရစဉ်

ဝန်ထမ်းများနှင့် နေထိုင်သူများ၏ ဘေးကင်းမှုရှိရေး သေချာစေရန်အတွက် အဆောက်အအုံများကို ပြန်လည် နေထိုင်ခွင့်မပြုမီ သေချာစစ်ဆေးကြရန် ပေတုန်တန်က အဆောက်အအုံပိုင်ရှင်များကို တိုက်တွန်းခဲ့သည်။

ထိုကဲ့သို့ စစ်ဆေးရာတွင် ပြည်သူ့လုပ်ငန်းနှင့် မြို့ပြစီမံခန့်ခွဲရေးဌာန အပါအဝင် သဘာဝဘေးအန္တရာယ် တားဆီးရေးနှင့် လျော့ပါးသက်သာစေရေးဌာနတို့ဖြင့် တိုင်ပင်လုပ်ဆောင်ကြရန်လည်း တိုက်တွန်းထားသည်။

ထိုစဉ် သဘာဝဘေးအန္တရာယ် တားဆီးရေးနှင့် လျော့ပါးသက်သာစေရေးဌာနကလည်း ပြည်သူများကို အထိတ်တလန့်မဖြစ်ကြရန် တိုက်တွန်းခဲ့ပြီး မြန်မာနိုင်ငံတွင် လှုပ်ခတ်ခဲ့သော ရစ်ချ်တာစကေး ၃ ဒသမ ၇ ပြင်းအားရှိ  နောက်ဆက်တွဲ ငလျင်သည် ထိုင်းနိုင်ငံအပေါ် သက်ရောက်မှုမရှိကြောင်း ပြောကြားခဲ့သည်။

ငလျင်လှုပ်ခတ်ပြီးနောက် ဘန်ကောက်မြို့တော်ရှိ Chaeng Watthana အစိုးရရုံးဝန်း၏ အဆောက်အအုံ A မှ ပြောင်းရွှေ့မှုသည် နောက်ဆက်တွဲ ငလျင်လှုပ်ခတ်မှုကြောင့် မဟုတ်ကြောင်း ယင်းဌာနက အတည်ပြုထားသည်။

အဆောက်အအုံ စောင့်ရှောက်ရေး Dhanarak Assets Development က ထိုအဆောက်အအုံကို စစ်ဆေးခဲ့ပြီး နောက် ဘေးကင်းကြောင်း တွေ့ရှိခဲ့သည့်အတွက် ပြည်သူများအနေဖြင့် အထိတ်တလန့် မဖြစ်ကြရန်နှင့် လက်ရှိ တွင် ယင်းအဆောက်အအုံ၌ ပြန်လည်နေထိုင်နိုင်ပြီဖြစ်ကြောင်း အတည်ပြုထားသည်။

Source:The Nation

CNI News

၂၀၂၅ ခုနှစ်၊ ဧပြီ ၁

နေပြည်တော်၊ ပျဥ်းမနားမြို့ရှိ ငလျင်ဘေးဒဏ်သင့် ပြည်သူများအား ကူညီကယ်ဆယ်ရေး လုပ်ငန်းများ လုပ်ဆောင်ရာတွင် ကယ်ဆယ်ရေးပစ္စည်းများ လိုအပ်နေကြောင်း နေပြည်တော်၊ ပျဥ်းမနားရှိ မိုးစေတနာ ပရဟိတအသင်းမှ အဖွဲ့ဝင် ဦးကောင်းခန့်ဟိန်းက CNI သတင်းဌာနသို့ ပြောသည်။

ထို့ပြင် ကယ်ဆယ်ရေးပစ္စည်းများ မပြည့်စုံမှုများ ရှိနေသည့်အတွက် ကယ်ဆယ်ရေးတွင် နှောင့်နှေးကြန့်ကြာမှုများ ဖြစ်နေကြောင်း ၎င်းက ပြောသည်။

ဦးကောင်းခန့်ဟိန်းက “လက်ရှိ အခက်အခဲဆိုရင်တော့ စက်၊ လက်နက်၊ ပစ္စည်းပေါ့နော်၊ စက်ယန္တရားတွေ အခက်အခဲ ဖြစ်တာတွေပေါ့၊ စက်ယန္တရားတွေ ပေါ‌ပေါများများ မရှိတော့ နည်းနည်း ဒုက္ခရောက်တာပေါ့၊ နောက် ကယ်ဆယ်ရေး ဝင်နေတဲ့ လူတွေအတွက် ရုံးမှာရှိတဲ့ လူတွေအတွက်ကတော့ ကျနော်တို့အတွက် ယူနီဖောင်းတွေ၊ အကာအကွယ် ဦးထုပ်တွေ၊ လက်အိတ်တွေတော့ ရှိတာပေါ့နော်၊ ဒီကယ်ဆယ်ရေးကာလမှာ Volunteer ဝင်ပြီးတော့ လူအင်အား မလောက်လို့ လုပ်တဲ့အဖွဲ့တွေကျတော့ အိမ်က တစ်ဝက်ပြိုတဲ့ဟာတွေ ရှိတယ်၊ အပြည့်ပြိုတဲ့ဟာတွေရှိတယ်၊ အရှင်တွေ ကယ်ထုတ်ရမှာရှိတယ်၊ အသေတွေ ထုတ်ရမှာရှိတယ် အဲ့ကျတော့ သူတို့အတွက် အန္တရာယ် ဖြစ်စေနိုင်တဲ့ အတွက်ကြောင့် ကယ်ဆယ်ရေး ခေါင်းကို အုတ်ခဲတွေ ဘာတွေ လာရိုက်ရင်လည်း ခံနိုင်မယ့် သံချောင်းတွေ လာရိုက်ရင်လည်း ခံနိုင်မယ့် ဦးထုပ်တို့၊ နောက်ပြီးရင် အောက်က အိမ်တွေထဲဝင်ရတာဆိုတော့ သံတွေရှိမယ်၊ ဖန်ကွဲတွေရှိမယ် တက်နင်းခံနိုင်မယ့် ဖိနပ်မျိုးပေါ့နော်၊ သံတွေ ကောက်ဖဲ့ဖို့ လက်အိတ်တို့ အဲဒီလိုမျိုးတွေ မပြည့်စုံမှုတွေ နည်းနည်းရှိတော့ ကယ်ဆယ်ရေးနည်းနည်း ကြန့်ကြာတာပေါ့၊ ခဏလေးနဲ့ ပြီးမယ့်ဟာ နည်းနည်းကြာတာတွေ ရှိမယ်၊ အဓိကကတော့ အဲဒီလိုမပြည့်စုံ တာတွေ ပြီးရင် လူနဲ့မနိုင်ဘဲနဲ့ ကားနဲ့ပဲ ကရိန်းတွေနဲ့ပဲ လုပ်ရမယ့်ကဏ္ဍတွေရှိမယ်၊ အဲဒီလိုတွေမှာ အဲဒီလိုစက်ယန္တရားတွေ ကြန့်ကြာနှောင့်နှေးမှုပေါ့နော်၊ သိပ်ပြီးဒီဖက်မှာမရှိတော့ အဲဒီဟာတွေ လိုအပ်တဲ့အတွက် ကယ်ဆယ်ရေးတော့ နည်းနည်း နောက်ကျတာပေါ့” ဟု ပြောသည်။ 

လက်ရှိတွင် နေပြည်တော်၊ ပျဥ်းမနားမြို့၌ သေဆုံးသူနှင့် ပျောက်ဆုံးသူပေါင်း ၁၃၀ ကျော်ရှိနေပြီး လူနာအနေဖြင့် ၃၀၀ ကျော်ရှိနေကြောင်း ၎င်းက ပြောသည်။

အင်္ဂတေ၊ အုတ်များနှင့် သံချောင်းများ ဖောက်ထုတ် ဖယ်ရှားနေရခြင်းကြောင့် ကယ်ဆယ်ရေးအဖွဲ့များသည် ဦးထုပ်၊ လက်အိတ်၊ မျက်မှန်များ လိုအပ်နေသဖြင့် နိုင်ငံတကာမှ ကူညီပေးရန် နစက သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက ၂၀၂၅ ခုနှစ်၊ မတ်လ ၃၁ ရက်တွင် ပြောကြားခဲ့သည်။

ပျဉ်းမနားမြို့တွင် ငလျင်ကြောင့် ပြိုကျပျက်စီးမှုများကို တွေ့ရစဉ်

မြို့အနေအထားအရ ရေအဓိကလိုအပ်နေပြီး ရေတွင်းများသို့ ရေငန်များ ဝင်ရောက်သွားသဖြင့် ပျက်စီးသွားသောကြောင့် ရေတူးပေးနိုင်မည်ဆိုပါက ပို၍ အဆင်ပြေမည်ဖြစ်ကြောင်း ပျဥ်းမနားမြို့နယ်ရှိ ဒေသခံတစ်ဦးက CNI သတင်းဌာနသို့ ပြောသည်။

၎င်းက “မြို့အနေအထားကတော့ ဒုက္ခရောက်တဲ့လူတွေတော့ များတာပေါ့နော်၊ အဓိကကတော့ ရေဒုက္ခရောက် နေတာပေါ့၊ အခုဒီ ပျဥ်းမနားမြို့က လူတွေကကိုယ့်အချင်းချင်းကို ပြန်ကယ်ဆယ်နေကြပါတယ်၊ အဓိကက ရေပဲ၊ ဘာလို့လဲဆိုတော့ တွင်းတွေက ဘာဖြစ်သွားလဲဆိုတော့ တွင်းတွေက ရေငန်တွေ ဝင်သွားတာဆိုတော့ တွင်းတွေကတော့ အကုန်ပျက်သွားကြတာပေါ့၊ အဲဒီတော့ အမတို့မှာ ရေသန့်မရှိတဲ့အတွက် ဝမ်းရောဂါအတွက် စိုးရိမ်ရတော့ ရေသန့်လိုတယ်၊ ရေကိုထိန်းနိုင်ရင် ကျန်တာ ထိန်းလို့ရတယ်၊ သူ့ဟာနဲ့သူတော့ အကုန်လုံးကတော့ ကိုယ်နိုင်တဲ့ဘက်ကနေပြီးတော့ ကူနေကြတာပဲ၊ ဌာနဆိုင်ရာကလည်း လုပ်ပေးကြတာပဲ၊ နောက်ခါ ရပ်ကွက် တွေကလည်း အကုန်လုံး သူ့ဟာနဲ့သူ ကူညီကြတာ၊ သူ့အဖွဲ့နဲ့သူပေါ့၊ ပျဥ်းမနားမြို့ကြီးက အရမ်းမကြီးတဲ့ အခါကျ‌တော့ စေတနာရှင်အဖွဲ့တွေက သေးတော့ သေးတာပေါ့၊ သေးသေးလေးတွေကလည်း အများကြီး လှုပ်ရှားနေတာတွေ့တယ်၊ ရေပဲ ဘယ်နေရာမှာမဆို ရေ အဓိကဖြစ်နေတာ၊ ရေသန့်စက်တွေပါ ပျက်ထားတော့ မရှိဘူး၊ တကယ်လို့ အဲဒီလို အနယ်နယ် အရပ်ရပ်မှာရှိတဲ့ ရေတူးပေးနိုင်တဲ့ စေတနာရှင်တွေ ဖွဲ့ပြီးတော့ လာတူးပေးမယ်ဆိုရင်တော့ အရမ်းကောင်းမယ်” ဟု ပြောသည်။

နေပြည်တော် ကောင်စီနယ်မြေအတွင်းမှ ငလျင်ဘေးဒဏ်သင့် နိုင်ငံ့ဝန်ထမ်းများနှင့် ပြည်သူများအား ဆေးကုသမှုများ ပေးအပ်နေသည့် အခြေအနေကို နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ၂၀၂၅ ခုနှစ်၊ မတ်လ ၃၀ ရက်က သွားရောက်စစ်ဆေးခဲ့ပြီး ထောက်ပံ့ငွေများ ပေးအပ်ခဲ့သည်။

မြန်မာနိုင်ငံ၊ မန္တလေးမြို့အနီး စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ ငလျင်လှုပ်ခတ် မှုကြောင့် လူပေါင်း ၁၆၄၄ ဦးသေဆုံးပြီး ၃၄၀၀ ကျော် ထိခိုက်ဒဏ်ရာရရှိကာ ၃၉၀ ကျော် ပျောက်ဆုံးနေကြောင်း နစက-က သတင်းထုတ်ပြန်ခဲ့သည်။

ထို့ပြင် လူနေအိမ်နှင့် ဟိုတယ်များ အပါအဝင် အဆောက်အအုံများ ပြိုကျပျက်စီးခဲ့ကြောင်း၊ ပြိုကျနေသော အဆောင်အအုံများအောက်တွင် ပိတ်မိသူများ ရှိနေကြောင်း နစက-က သတင်းထုတ်ပြန်ခဲ့သည်။

CNI News

၂၀၂၅ ခုနှစ်၊ ဧပြီ ၁

မတ်လ ၂၈ ရက်နေ့တွင် အင်အားပြင်းငလျင်လှုပ်ခတ်ပြီး ၉၁ နာရီအကြာ ယနေ့ ဧပြီလ ၁ ရက်နေ့ နံနက် ၉ နာရီ ၁၅ မိနစ်အချိန်တွင် နေပြည်တော် ဇမ္ဗူသီရိမြို့နယ် တိုက်အမှတ် ၃၃၆၉ ၌ ပိတ်မိနေသည့် အသက် ၆၃ နှစ်အရွယ် အမျိုးသမီးတစ်ဦးကို အသင်ရှင်လျက် ရှာဖွေတွေ့ရှိခဲ့ကြောင်း မြန်မာနိုင်ငံမီးသတ်ဦးစီးဌာနမှ သတင်းထုတ်ပြန်ခဲ့သည်။

အဆိုပါ အမျိုးသမီးပိတ်မိနေခြင်းကို ယနေ့ နံနက် ၇ နာရီ ၅၈ မိနစ်အချိန်တွင် မြန်မာနိုင်ငံမီးသတ်ဦးစီးဌာနမှ တာဝန်ရှိသူများက ရှာဖွေတွေ့ရှိခဲ့ခြင်းဖြစ်ပြီး မီးသတ်ဦးစီးဌာန ညွှန်ကြားရေးမှူးချုပ် ဦးမြတ်သူ၏ အနီးကပ် ကြီးကြပ်ကွပ်ကဲမှုဖြင့် ရှာဖွေကယ်ဆယ်ရေးတပ်ဖွဲ့ဝင်များနှင့် သက်ဆိုင်ရာအဖွဲ့အစည်းများ ပူးပေါင်းကာ ကယ်ဆယ်ရေးလုပ်ငန်းများဆောင်ရွက်ခဲ့ခြင်းဖြစ်သည်ဟု သတင်းထုတ်ပြန်ထားသည်။

CNI News

၂၀၂၅ ခုနှစ်၊ ဧပြီ ၁

ဖိလစ်ပိုင်အစိုးရက ငလျင်ဘေးသင့် ပြည်သူများ ကူညီကယ်ဆယ်ရေးအတွက် စစ်တပ်ပါသည့် ကိုယ်စားလှယ် အဖွဲ့ကို မြန်မာနိုင်ငံသို့ ဧပြီ ၁ ရက်က စေလွှတ်ခဲ့သည်။

အဆိုပါ ကူညီကယ်ဆယ်ရေးအဖွဲ့တွင် စုစုပေါင်း ၉၁ ဦးပါကြောင်း၊ ဧပြီ ၁ ရက်တွင် ၅၈ ဦး လိုက်ပါသော ရှေ့ပြေးအဖွဲ့ကို ဖိလစ်ပိုင်လေတပ်က C 130 လေယာဉ် ၂ စီးဖြင့် ပို့ဆောင်ခဲ့သည်။
ထို့နောက် ၃၃ ဦးပါ ကူညီကယ်ဆယ်ရေးအဖွဲ့ကို ဧပြီ ၂ ရက်တွင် စေလွှတ်မည်ဖြစ်သည်။

ဖိလစ်ပိုင်အစိုးရမှ စေလွှတ်သည့် ကူညီကယ်ဆယ်ရေးအဖွဲ့တွင် စစ်တပ်၊ ဖိလစ်ပိုင်လေတပ်၊ မီးဘေးကာကွယ်ရေး ဗျူရို၊ မြို့တော်မနီလာ ဖွံ့ဖြိုးတိုးတက်ရေးအာဏာပိုင်အဖွဲ့နှင့် ပတ်ဝန်းကျင်နှင့် သဘာဝ အရင်းအမြစ်များ/ ပုဂ္ဂလိကကဏ္ဍ (EDC နှင့် APEX သတ္တုတွင်းဌာန) ၊ ကျန်းမာရေးဌာနမှ ဖိလစ်ပိုင် ဆေးဘက်ဆိုင်ရာ အထောက်အကူအဖွဲ့၊ အရပ်ဖက် ကာကွယ်ရေးရုံးညှိနှိုင်းရေးမှူးများ ပါဝင်ကြသည်။

အလားတူ ကူညီကယ်ဆယ်ရေးပစ္စည်းများနှင့် ဆေးပစ္စည်းများလည်း တစ်ပါတည်း သယ်ဆောင်လာမည် ဖြစ်သည်။