CNI News
၂၀၂၅ ခုနှစ်၊ ဧပြီ ၄
မြန်မာနိုင်ငံက ငလျင်ဘေးသင့် ပြည်သူများ ကူညီကယ်ဆယ်ရေးအတွက် ဟောင်ကောင်အစိုးရက ဟောင်ကောင် ဒေါ်လာ ၂.၁ သန်းကျော် တန်ဖိုးရှိ လူသားချင်းစာနာထောက်ထားမှု အကူအညီများ ပေးပို့ထောက်ပံ့ခဲ့ကြောင်း သိရသည်။
ဟောင်ကောင်ကိုယ်ပိုင်အုပ်ချုပ်ခွင့်ရ အထူးဒေသအစိုးရက ဟောင်ကောင်မြို့ရှိ မြန်မာကောင်စစ်ဝန်ချုပ်ရုံးမှ တဆင့် မြန်မာနိုင်ငံရှိ ငလျင်ဒဏ်သင့် ဒေသများအား လှူဒါန်းခဲ့ခြင်းဖြစ်သည်။
ဟောင်ကောင်က လှူဒါန်းသည့် ကူညီထောက်ပံ့ရေး ပစ္စည်းများမှာ တစ်ကိုယ်ရည်သန့်ရှင်းရေးသုံး ပစ္စည်းများ၊ ဆိုလာမီးအိမ်များ၊ စောင်များ၊ ဆေးဝါးများ၊ အသင့်စား အစားအစာများနှင့် ရွက်ဖျင်တဲများ ပါဝင်သည့် အရေးပေါ် ပစ္စည်းများ (စုစုပေါင်း တန်ချိန် ၂၇ တန်)ဖြစ်သည်။
အဆိုပါ ထောက်ပံ့ရေးပစ္စည်းများ တင်ဆောင်လာသော ဟောင်ကောင်လေကြောင်းလိုင်းမှ Cathay Pacific Cargo Flight သည် ဟောင်ကောင် အပြည်ပြည်ဆိုင်ရာလေဆိပ်မှ ရန်ကုန်အပြည်ပြည်ဆိုင်ရာ လေဆိပ်သို့ ဧပြီ ၃ ရက်က ရောက်ရှိလာပြီး တာဝန်ရှိသူများထံ လွှဲပြောင်းပေးအပ်ခဲ့သည်။
အလားတူ တရုတ်နိုင်ငံကလည်း စားသောက်ဖွယ်ရာများ၊ ရွက်ဖျင်မိုးကာတဲနှင့် သောက်ရေသန့်ဗူး စုစုပေါင်း (၆၆၈၀)ထုပ်ကို ငလျင်ဘေးသင့် ပြည်သူများကို ထောက်ပံ့ပေးခဲ့သည်။
