CNI News

၂၀၂၅ ခုနှစ်၊ မတ်လ ၂၈

စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ နေပြည်တော် ကောင်စီနယ်မြေ၊ ရှမ်းပြည်နယ်အရှေ့မြောက်ဒေသတို့ရှိ ငလျင်ဒဏ်သင့်သည့် နေရာများကို အရေးပေါ် အခြေအနေအဖြစ် အမျိုးသားသဘာဝဘေးအန္တရာယ်ဆိုင်ရာ စီမံခန့်ခွဲမှုကော်မတီမှ ကြေညာလိုက်သည်။

၂၀၂၅ ခုနှစ်၊ မတ်လ ၂၈ ရက်နေ့ မွန်းလွဲ ၁၂ နာရီ ၅၁ မိနစ်က မန္တလေးမြို့၏ အရှေ့မြောက်ဘက် ၂၀ ကီလိုမီတာ ခန့်အကွာ၊ မြောက်လတ္တီတွဒ် ၂၂ ဒသမ ၀၉ ဒီဂရီ၊ အရှေ့လောင်ဂျီတွဒ် ၉၆ ဒသမ ၂၃ ဒီဂရီ၊ အနက် ၁၀ ကီလိုမီတာ ကို ဗဟိုပြု၍ အင်အားရစ်(ခ်)တာစကေး ၇ ဒသမ ၇ အဆင့်ရှိ အင်အားအလွန်ပြင်းထန်သော မြေငလျင်တစ်ခု လှုပ်ရှားသွားခဲ့သည်။

 ၂၀၂၅ ခုနှစ်၊ မတ်လ ၂၈ ရက်က ငလျင်လှုပ်ခတ်မှုကြောင့် ပျက်စီးနေမှုကိုတွေ့ရစဉ် 

နောက်ဆက်တွဲ ငလျင်ငယ် ၃ ခုခန့် လှုပ်ရှားခဲ့သေးသည်။

ထို့ကြောင့် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ မန္တလေးတိုင်းဒေသကြီး၊ ပဲခူးတိုင်းဒေသကြီး၊ နေပြည်တော် ကောင်စီနယ်မြေ၊ ရှမ်းပြည်နယ်အရှေ့မြောက်ဒေသတို့ရှိ ငလျင်ဒဏ်သင့်သည့် နေရာများကို အရေးပေါ် အခြေအနေအဖြစ် နစက,က ကြေညာလိုက်ခြင်း ဖြစ်သည်။

CNI News

၂၀၂၅ ခုနှစ်၊ မတ်လ ၂၈

မြန်မာနိုင်ငံ စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရှိ အင်အားပြင်း ငလျင်တစ်ခု ၂၀၂၅ ခုနှစ်၊ မတ်လ ၂၈ ရက်က နေ့လယ် ၁ နာရီဝန်းကျင်က လှုပ်ခတ်သွားခဲ့သည်။

အဆိုပါ ငလျင်လှုပ်ခတ်မှုသည် ရှမ်းပြည်နယ်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်းတို့မှာလည်း ရိုက်ခတ်ခဲ့ခြင်းကြောင့် အောင်ပန်းမြို့မှာ ဟိုတယ်နှင့် လူနေအိမ်များ ပြိုကျပျက်စီးမှုများ ရှိကြောင်း ဒေသခံများက ပြောသည်။

CNI International News

ဘန်ကောက်၊ ဇန်နဝါရီ ၂၅

ထိုင်းနိုင်ငံ၊ ဘန်ကောက်မြို့တော်တွင် ဆိုးရွားသည့် လေထုညစ်ညမ်းမှုကို တိုက်ဖျက်ရန်အတွက် အစိုးရက ဘတ် သန်း ၁၀၀ ကျော် တန်ကြေးရှိသော အခမဲ့ ပြည်သူ့သယ်ယူပို့ဆောင်ရေး အစီအစဉ် လုပ်ဆောင်ပေးမည် ဖြစ်ကြောင်း ဘန်ကောက်ပို့စ်မှ ဖော်ပြခဲ့သည်။

ဘန်ကောက်မြို့တော်တွင် လေထုအတွင်း PM2.5 ညစ်ညမ်းပစ္စည်း အမှုံအမွှားများ အလွန်များပြားနေမှုကို စိုးရိမ်နေသည့် ဝန်ကြီးချုပ် ပေတုန်တန် (Paetongtarn Shinawatra) ၏ ညွှန်ကြားချက်ဖြင့် ထိုအစီအစဉ်ကို ဇန်နဝါရီ ၂၅ ရက်မှစပြီး ၇ ရက်ကြာ လုပ်ဆောင်သွားမည်ဖြစ်ကြောင်း သယ်ယူပို့ဆောင်ရေးဝန်ကြီး သူရိယ ဂျူအန်ရွန်ရွန်ကစ် (Suriya Juangroongruangkit) က ပြောကြားခဲ့သည်။

ရထားကုမ္ပဏီများဖြစ်သည့် BTS နှင့် BEM ကုမ္ပဏီများကလည်း လျှပ်စစ်ရထား အားလုံးကို အခမဲ့ စီးနင်းခွင့်ပြုရန် သဘောတူညီခဲ့ပြီး BMTA ဘတ်စ်ကားကုမ္ပဏီကလည်း ဇန်နဝါရီ ၂၅ ရက်မှ ဇန်နဝါရီ ၃၀ ရက်အထိ အခမဲ့ ပြေးဆွဲပေးရန် သဘောတူခဲ့သည်။

သယ်ယူပို့ဆောင်ရေးဝန်ကြီး သူရိယကို တွေ့ရစဉ် 

ထိုင်းအစိုးရအဖွဲ့က ထိုကုမ္ပဏီများအတွက် ၇ ရက်ကြာ ကာလအတွင်း ၎င်းတို့၏ ပျမ်းမျှဝင်ငွေအပေါ် အခြေခံပြီး ဘတ်သန်း ၁၄၀ ကို ထောက်ပံ့ပေးသွားမည်ဖြစ်ကြောင်း သူရိယက ပြောကြားခဲ့သည်။

ထိုရန်ပုံငွေကို နိုင်ငံတော်ဘတ်ဂျက်မှ အသုံးပြုမည်ဖြစ်ပြီး ဝန်ကြီးချုပ်၏ အမိန့်ညွှန်ကြားချက်ကို အစိုးရအဖွဲ့အား တင်သွင်းသွားမည်ဟု ၎င်းက ဆိုသည်။

ထိုအစီအစဉ်အရ ခရီးသွားပြည်သူများအကြား အများပြည်သူသုံး သယ်ယူပို့ဆောင်ရေးစနစ်အပေါ် ၂၀ ရာခိုင်နှုန်းမှ ၃၀ ရာခိုင်နှုန်းအထိ ပိုမိုမှီခိုလာလိမ့်မည်ဖြစ်ပြီး လေထုညစ်ညမ်းမှု အဆင့်ကို အကဲဖြတ် ချင့်တွက်သွားမည် ဖြစ်သည်။

လေထုညစ်ညမ်းမှု အဆင့်သည် သိသိသာသာ လျော့ကျသွားခဲ့မည်ပါက အခမဲ့ သယ်ယူပို့ဆောင်ရေး အစီအစဉ်ကို သက်တမ်း တိုးသင့်/မသင့် စဉ်းစားသွားမည်ဖြစ်သည်။

ထို့ပြင် သယ်ယူပို့ဆောင်ရေးဝန်ကြီးဌာနက ဘန်ကောက်မြို့တော်တွင် မော်တော်ယာဉ်များ၏ ဓာတ်ငွေ့ ထုတ်လွှတ်မှုကို လေ့လာစစ်ဆေးရန် နေရာ ၈ ခု၌ စစ်ဆေးရေးစခန်းများ တည်ဆောက်ထားကြောင်း သူရိယက ပြောကြားခဲ့သည်။

Source: The Nation

CNI International News

ဘန်ကောက်၊ ဇန်နဝါရီ ၉

ယခုနှစ်အတွင်း ထိုင်းနိုင်ငံတွင် လေထုအတွင်းရှိ PM2.5 ညစ်ညမ်းပစ္စည်းများကို ပြီးခဲ့သည့် နှစ်ကထက် ပိုမို နည်းပါးစေရန် လုပ်ဆောင်ရေးအတွက် ဝန်ကြီးချုပ် ပေတုန်တန်(Paetongtarn Shinawatra) က အစိုးရအဖွဲ့ကို ညွှန်ကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

လေထုအတွင်းရှိ  PM2.5 ညစ်ညမ်း ပစ္စည်းများဆိုသည်မှာ လူ့ခန္ဓာကိုယ်၏ သွေးကြောများထဲအထိ ဝင်ရောက်နိုင် သည့် အမှုန်အမွှားများဖြစ်ပြီး ကျန်းမာရေးကို ထိခိုက်စေနိုင်သည်။

ပေတုန်တန်သည် ဇန်နဝါရီ ၇ ရက်က အပတ်စဉ် အစိုးရအဖွဲ့ အစည်းအဝေးအပြီးတွင် အစိုးရအိမ်တော်၌ ပြုလုပ် သည့် သတင်းစာ ရှင်းလင်းပွဲမှာ ထိုကဲ့သို့ ပြောကြားခဲ့ခြင်းဖြစ်သည်။

အစိုးရအဖွဲ့အနေဖြင့် PM2.5 အမှုန်အမွှားများ ပြဿနာကို အာရုံစိုက် ဖြေရှင်းနေကြောင်း၊ ဂြိုဟ်တုဓာတ်ပုံများအရ ထိုင်းနိုင်ငံ၏ ပြည်နယ်အချို့တွင် အမှုအမွှားများ ထူထပ်သိပ်သည်းမှု မြင့်တက်နေသည်ကို မြင်တွေ့ရကြောင်း ပေတုန်တန်က ပြောကြားခဲ့သည်။

သက်ဆိုင်သည့် ဝန်ကြီးဌာနများနှင့် စိုက်ခင်းများ မီးရှို့ရှင်းလင်းသည့် ကြံစိုက်တောင်သူများ အနေဖြင့် လေထု သန့်စင်ရေး စီမံချက်များတွင် ပူးပေါင်းပါဝင်ကြရန်လည်း ပေတုန်တန်က တိုက်တွန်းခဲ့သည်။

ဘန်ကောက်စ်မြို့ လေထုအခြေအနေကို တွေ့ရစဉ်

ပြီးခဲ့သည့်နှစ်က လေထုညစ်ညမ်းမှု၏ ၇၀ ရာခိုင်နှုန်းသည် စိုက်ခင်းများ မီးရှို့ရှင်းလင်းမှုမှ ထွက်လာသည့် မီးခိုး များကြောင့်ဖြစ်သည်။

ယခုနှစ်တွင်မူ စိုက်ခင်းမီးရှို့မှုများကို လျှော့ချနေသည့် စိုက်ပျိုးရေးဝန်ကြီးဌာနက ဦးဆောင်သော အစီအစဉ်များ တွင် တောင်သူများက ပူးပေါင်းပါဝင်ခဲ့သဖြင့် လေထုညစ်ညမ်းမှုသည် ၃၀ ရာခိုင်နှုန်းမှ ၃၅ ရာခိုင်နှုန်းအကြား ကျဆင်းခဲ့သည်။

အစိုးရအဖွဲ့ အနေဖြင့် ဓာတ်ငွေ့ ထုတ်လွှတ်မှုများကို ထိန်းချုပ်ရန်လည်း ညွှန်ကြားခံထားရပြီး သယ်ယူ ပို့ဆောင်ရေးဝန်ကြီးဌာနက အိတ်ဇောပိုက်များမှ မီးခိုးများ အများအပြား ထွက်တတ်သည့် မော်တော်ယာဉ် အကြီးစားများကို အနီးကပ် စောင့်ကြည့်ပြီး စည်းကမ်းတင်းကျပ်မှုများ ပြုလုပ်လျက်ရှိသည်။

ပြည်ထဲရေးဝန်ကြီးဌာနသည်လည်း ဘေးအန္တရာယ် တားဆီးရေးနှင့် လျှော့ချရေးဌာန (DDPM)၊ ပြည်နယ် အုပ်ချုပ်ရေးမှူးများ၊ ဒေသန္တရအုပ်ချုပ်ရေး အဖွဲ့များနှင့်ပူးပေါင်းပြီး လေထုညစ်ညမ်းမှုကို တိုက်ဖျက်ရန် ပေတုန်တန်က ညွှန်ကြားခဲ့သည်။

ဇန်နဝါရီ ၇ ရက် နံနက်ပိုင်းက ဘန်ကောက်မြို့တော်တွင် လေထုညစ်ညမ်းမှုအဆင့် အဆိုးရွားဆုံး အခြေအနေသို့ ရောက်ရှိခဲ့ပြီး ကျန်းမာရေးအတွက် အနီရောင်အဆင့် စိုးရိမ်စရာ အခြေအနေသို့ ရောက်ရှိခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ အောက်တိုဘာ ၄

ထိုင်းဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra)က ဘန်ကောက်မြို့တော်သည် ရေကြီးရေလျှံမှုအန္တရာယ်မှ ကင်းလွတ်လိမ့်မည်ဟု ပြည်သူများကို ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ပေတုန်တန်သည် နွန်သာဘူရီပြည်နယ်(Nonthaburi)၊ ပက်ခရတ်ဒေသ(Pak Kret)ရှိ တော်ဝင်ဆည်မြောင်းစနစ် ဌာနသို့ အောက်တိုဘာ ၂ ရက်က သွားရောက်၍ ရေအခြေအနေကို စစ်ဆေးခဲ့သည်။

၂၀၁၁ ခုနှစ်က ထိုင်းနိုင်ငံသည် ယခုနှစ်နှင့် နှိုင်းယှဉ်လျှင် မုန်တိုင်း ၅ ခုကို ကြုံတွေ့ခဲ့ရပြီး ယခုနှစ်တွင်မူ မုန်တိုင်း ၁ ခုသာ ကြုံတွေ့ခဲ့သည်ဟု ပေတုန်တန်က ပြောကြားခဲ့သည်။

ထို့ပြင် ၂၀၁၁ ခုနှစ်တွင် မိုးရေချိန်သည် ပုံမှန်ထက် ၂၅ ရာခိုင်နှုန်းကျော် ပိုများခဲ့ပြီး ယခုနှစ်တွင် ပျမ်းမျှမိုးရေချိန် အောက် ၂ ရာခိုင်နှုန်းသာ ပိုများသည်ကို မြင်တွေ့ခဲ့ရသည်။

အဓိက ရေကာတာကြီးများသည်လည်း ၂၀၁၁ ခုနှစ်နှင့်မတူဘဲ ယခုနှစ်တွင် ရေများကို ပိုမိုထိန်းထားနိုင်သေးသည်။ 

ဘန်ကောက်မြို့အလှကို တွေ့ရစဉ်

၂၀၁၁ ခုနှစ်တွင် ရေသိုလှောင်နိုင်စွမ်းထက် ပိုများသောကြောင့် ရေပိုများကို ထုတ်လွှတ်ခဲ့ရသည်ဟုပြောသည်။

" ဘန်ကောက်မှာ ရေကြီးမယ့်အရေး စိုးရိမ်ပူပန်နေသူတွေအနေနဲ့ မစိုးရိမ်ကြပါနဲ့။ ဘန်ကောက်မှာ ရေကြီးရေလျှံ တာမျိုး မကြုံရပါဘူး" ဟု ပေတုန်တန်က ပြောကြားခဲ့သည်။

အောက်တိုဘာ ၂ ရက်က မြောက်ပိုင်းဒေသများတွင် မိုးရွာသွန်းမှုများကြောင့် ရေသည် ပင်း(Ping)၊ ဝမ်(Wang)၊ ယွန်(Yom)နှင့် နမ်(Nan) မြစ်များမှ နာခွန်းဆာဝမ်(Nakhon Sawan)ရှိ ကျောက်ဖရား(Chao Phraya)မြစ် အတွင်း သို့ စီးဝင်သွားသည်။

ထို့ကြောင့် ချိုင်းနတ်ရှိ(Chai Nat) ကျောက်ဖရား ရေကာတာ၏ ရေအမှတ်သည် မြင့်တက်ခဲ့ကာ တစ်စက္ကန့်လျှင် ရေ ၁၈၉၉ ကုဗမီတာနှုန်း ထုတ်လွှတ်ခဲ့ရသည်ဟု ဆိုသည်။

ရေအရင်းအမြစ်ဌာနက ရေထုတ်လွှတ်မှုသည် တစ်စက္ကန့်လျှင် ၃၀၀၀ ကုဗမီတာထက် မကျော်လွန်စေရန် စောင့်ကြည့်မှုများ လုပ်ဆောင်လျက်ရှိသည်ဟု ဆိုသည်။

ဘန်ကောက်နှင့် အနီးအနားရှိ ပြည်နယ်များ အပါအဝင် ကျောက်ဖရားမြစ် အောက်ဘက်ခြမ်းရှိ အာဏာပိုင်များက မြောက်ဘက်မှ စီးဆင်းလာသော ရေများကို စီမံခန့်ခွဲရန် ပြင်ဆင်မှုများ လုပ်ဆောင်နေသည်ဟု သတင်း အရင်းအမြစ်တစ်ဦးက ပြောကြားခဲ့သည်။

Source: ဘန်ကောက်ပို့စ်

CNI International News

တိုင်ပေ၊ အောက်တိုဘာ ၃

ထိုင်ဝမ်တွင် တိုင်ဖွန်းခရာထုံ (Typhoon Krathon) မဝင်ရောက်မီ ရုံးများနှင့်ကျောင်းများကိုပိတ်ကာ ထောင်နှင့် ချီသည့် ဒေသခံများအား ဘေးလွတ်ရာ ရွှေ့ပြောင်းပေးခြင်း၊ လေကြောင်းခရီးစဉ်များနှင့် ကူးတို့သင်္ဘော ပြေးဆွဲမှု များကို ဆိုင်းငံ့ခြင်းတို့ ပြုလုပ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

တည်ငြိမ်သည့် လေတိုက်နှုန်း တစ်နာရီလျှင် ၁၇၃ ကီလိုမီတာ (၁၀၇ မိုင်) နှင့် ရုတ်တရက် လေပြင်းတိုက်ခတ်မှု နှုန်း တစ်နာရီလျင် ၂၀၉ ကီလိုမီတာ (မိုင် ၁၃၀) ရှိသည့် ခရာထုံမုန်တိုင်းသည် အောက်တိုဘာ ၃ ရက် နံနက် အစောပိုင်းတွင် နိုင်ငံအနောက်တောင်ဘက် ကောင်ရှောင် (Kaohsiung) ဆိပ်ကိမ်းမြို့ကို ဝင်ရောက်မည်ဖြစ်သည်။

ထိုမုန်တိုင်း မဝင်ခင်ကတည်းက မိုးသည်းထန်စွာ ရွာသွန်းမှုများနှင့် လေပြင်းတိုက်ခိုက်မှုများ ဖြစ်ပွားနေသည်။

အဆိုပါ မုန်တိုင်းသည် အောက်တိုဘာ ၂ ရက် ဒေသစံတော်ချိန် နံနက် ၇ နာရီခန့်က ကောင်ရှောင်မြို့ အနောက်တောင်ဘက် ၁၆၀ ကီလိုမီတာ (၉၉ မိုင်) အကွာသို့ ရောက်ရှိနေကြောင်း ဗဟိုမိုးလေဝသ အုပ်ချုပ်ရေး အဖွဲ့က ပြောကြားခဲ့သည်။

ကောင်ရှောင်မြို့တော်ဝန် ချန်းချီမိုင် (Chen Chi-mai) က မြို့အတွင်းနေထိုင်သည့် မြို့ခံ ၂ ဒသမ ၇ သန်းခန့်ကို နေအိမ်များအတွင်း၌သာ နေထိုင်ရန်၊ မလိုအပ်ဘဲ ရေကြီး၊ မြေပြိုသည့် နေရာများဖြစ်သော မြစ်များ၊ ပင်လယ်များ နှင့် တောင်တန်းများသို့ သွားရောက်ခြင်းမပြုရန် တိုက်တွန်းထားသည်။

ကုန်တိုက်မှာ အစားအစာများ ၀ယ်ယူနေစဉ်

တောင်ထူထပ်သည့် ဒေသများတွင် မိုးရေချိန်လက်မ ၃၁ လက်အထိ ရှိနိုင်ကြောင်း မိုးလေဝသဌာနက ခန့်မှန်းထား သည်။

ခရာထုံမုန်တိုင်းသည် လူပေါင်း ၃၇ ဦးသေဆုံးပြီး ၂၉၈ ဦး ဒဏ်ရာရခဲ့သည့် ၁၉၇၇ ခုနှစ်က တိုက်ခတ်ခဲ့သည့် တိုင်ဖွန်း သယ်လ်မာ (Typhoon Thelma) ထက် အင်အားမပျော့ကြောင်း ချန်က သတိပေးထားသည်။

တိုင်ဖွန်းမုန်တိုင်းများသည် ပုံမှန်အားဖြင့် ပစိဖိတ်သမုဒ္ဒရာကို မျက်နှာမူထားသည့် ထိုင်ဝမ်အရှေ့ဘက် တောင်တန်းဒေသများကိုသာ တိုက်ခတ်လေ့ရှိခဲ့ပြီး လူနေထူထပ်သည့် အနောက်ဘက် ကမ်းရိုးတန်းဒေသများကို ဝင်ရောက်တိုက်ခတ်မှုမှာ ရှားပါးဖြစ်စဉ်ဖြစ်သည်။

ထိုင်ဝမ်တွင် ဇူလိုင်လအတွင်းက တိုင်ဖွန်း ဂယ်မီ (Typhoon Gaem) ဝင်ရောက် တိုက်ခတ်မှုကြောင့် ရေလွှမ်းမိုး မှုများနှင့် မြေပြိုမှုများ ဖြစ်ပွားခဲ့ကာ လူ ၁၁ ဦးထက်မနည်း သေဆုံးခဲ့သည်။

ပြည်ထဲရေးဝန်ကြီးဌာနကတော့ မုန်တိုင်းကြောင့် အန္တရာယ်များသည့် ဒေသများတွင် နေထိုင်သော လူပေါင်း ၁၀,၀၀၀ နီးပါးကို ဘေးလွတ်ရာ ရွှေ့ပြောင်းပေးထားကြောင်း ထုတ်ပြန်ခဲ့သည်။

Source: အယ်လ်ဂျာဇီးယား

CNI International News

ထိုင်ဝမ်၊ အောက်တိုဘာ ၂

ထိုင်ဝမ်ကျွန်း၏ လူနေထူထပ်သည့် အနောက်တောင်ဘက် ကမ်းရိုးတန်းဒေသသို့ အင်အားပြင်းထန်သည့် တိုင်ဖွန်းမုန်တိုင်း ခရာထုံ (Krathon) ချဉ်းကပ်လာသဖြင့် ကယ်ဆယ်ရေးလုပ်ငန်းများ လုပ်ဆောင်ရန် အောက်တိုဘာ ၁ ရက်တွင် စစ်သား ၄၀,၀၀၀ နီးပါးကို ဖြန့်ကြက်ချထားခဲ့သည်ဟု ရိုက်တာမှ ဖော်ပြခဲ့သည်။

တိုင်ဖွန်းမုန်တိုင်း ချဉ်းကပ်လာချိန်တွင် ပင်လယ်အတွင်းရှိ သင်္ဘောပေါ်မှ သင်္ဘောသား ၁၉ ဦးကို ရဟတ်ယာဉ်များဖြင့် ကယ်တင်ခဲ့သည်။

အဓိကဆိပ်ကမ်းမြို့ဖြစ်သည့် ကောင်းရှောင် (Kaohsiung) မြို့တွင် လေကြောင်းလိုင်းများကို ဖျက်သိမ်းပြီး ရထားခရီးစဉ်များကို ဆိုင်းငံ့ခဲ့သလို ဆိုင်များနှင့် စားသောက်ဆိုင်များကို ပိတ်ထားသဖြင့် လမ်းများပေါ်တွင် လူသူအသွားအလာမရှိဘဲ ခြောက်ကပ်နေသည်။

ထိုင်ဝမ်သည် တိုင်ဖွန်းမုန်တိုင်း တိုက်ခတ်မှုများကို မကြာခဏ ခံစားရလေ့ရှိပြီး မုန်တိုင်းများသည် တောင်တန်းဒေသများကိုသာ တိုက်ခတ်လေ့ရှိသော်လည်း ယခုမုန်တိုင်းသည် ထိုင်ဝမ်၏ အနောက်ဘက် မြေပြန့်ဒေသကို ဝင်ရောက်မည်ဖြစ်သည်။

ထိုင်ဝမ်စစ်သားများကိုတွေ့ရစဉ်

ခရာထုံမုန်တိုင်းသည် အောက်တိုဘာ ၂ ရက်တွင် ကောင်းရှောင်မြို့ကို ဝင်ရောက်မည်ဖြစ်ပြီး ထိုင်ဝမ် အလယ်ပိုင်းကိုဖြတ်၍ အရှေ့မြောက်ပိုင်းကို ဦးတည်ရွေ့လျားမည်ဖြစ်ကြောင်း၊ ထို့နောက် အရှေ့တရုတ်ပင်လယ်အတွင်းသို့ ရောက်ရှိသွားလိမ့်မည်ဟု ထိုင်ဝမ်ဗဟိုမိုးလေဝသ အုပ်ချုပ်ရေးအဖွဲ့ (CWA) က ထုတ်ပြန်ခဲ့သည်။

လူဦးရေ  ၂ ဒသမ ၇ သန်း နေထိုင်သည့် ကောင်းရှောင်မြို့တွင် ခရာထုံမုန်တိုင်း တိုက်ခတ်ချိန်အတွင်း ဒေသခံများကို နေအိမ်အတွင်း၌သာ နေထိုင်ရန် တိုက်တွန်းထားပြီး အစိုးရရုံးပိတ်ရက်အဖြစ် ကြေညာခဲ့သည်။

အမေရိကန်ရေတပ်၏ တိုင်ဖွန်းမုန်တိုင်း ပူးတွဲသတိပေးချက် ထုတ်ပြန်မှုစင်တာကတော့ ခရာထုံမုန်တိုင်းကို စူပါတိုင်ဖွန်းမုန်တိုင်းအဖြစ် သတ်မှတ်ဖော်ပြခဲ့သည်။

ထိုင်ဝမ်သားများ ရိက္ခာများစုဆောင်းနေစဉ်

ထိုမုန်တိုင်းသည် ထိုင်ဝမ်အနောက်တောင်ဘက် ကမ်းရိုးတန်းသို့ ရောက်ရှိချိန်တွင် လေတိုက်နှုန်း တစ်နာရီလျှင် ကီလိုမီတာ ၁၅၀ (၉၃ မိုင်) နှုန်းဖြင့် တိုက်ခတ်ပြီးနောက် အားလျော့သွားနိုင်ကြောင်း ထိုင်ဝမ်ဗဟိုမိုးလေဝသအုပ်ချုပ်ရေးအဖွဲ့မှ မိုးလေဝသပညာရှင် လီမန်ဆန်း (Li Meng-hsiang) က ပြောကြားခဲ့သည်။

ခရာထုံမုန်တိုင်း၏ ပြင်းအားသည် ကောင်းရှောင်မြို့တွင် လူ ၃၇ ဦး သေဆုံးခဲ့သည့် ၁၉၇၇ ခုနှစ်က တိုက်ခတ်ခဲ့သည့် တိုင်ဖွန်း သယ်လ်မာ (Typhoon Thelma) မုန်တိုင်းနှင့် ပြင်းအားခြင်းတူညီကြောင်း ကောင်းရှောင်မြို့တော်ဝန် ချန်ချီမိုင် (Chen Chi-mai) က ပြောကြားခဲ့သည်။

Source: ရိုက်တာ

CNI International News

ဘန်ကောက်၊ အောက်တိုဘာ ၁

ထိုင်းနိုင်ငံ၊ ချင်းရိုင် (Chiang Rai) ပြည်နယ်တွင် စက်တင်ဘာလ အစောပိုင်းက ဆယ်စုနှစ် ၃ စုကျော်အတွင်း အဆိုးရွားဆုံး ရေလွှမ်းမိုးမှုဖြစ်ပွားခဲ့ချိန်က တာဝန်ဝတ္တရား ပျက်ကွက်မှုနှင့်ပတ်သက်ပြီး စွပ်စွဲခံထားရသည့် ချင်းရိုင်အုပ်ချုပ်ရေးမှူး  ပွတ်တီပွန် သီရိမတ် (Puttipong Sirimat) သည် စုံစမ်းစစ်ဆေးခံနေရကြောင်း Thai PBS World မှ ဖော်ပြခဲ့သည်။

ချင်းရိုင်ပြည်နယ်အတွင်းရှိ မယ်ဆိုင် (Mae Sai)၊ မရန်း (Mueang) နှင့် ဝင်ပေါင် (Wiang Pao) ခရိုင်များတွင် ရေလွှမ်းမိုးမှုများ ဖြစ်ပွားချိန်က ပွတ်တီပွန်သည် တာဝန်ဝတ္တရား လစ်ဟင်းခဲ့သည်ဟု စွပ်စွဲခံထားရသည်။

ထိုဖြစ်စဉ်ကို စုံစမ်းစစ်ဆေးရန် အမိန့်ထုတ်ပြန်ခဲ့သည်ဟု ထိုင်းပြည်ထဲရေးဝန်ကြီး အနူတင် ချန်ဗီရာကူလ် (Anutin Charnvirakul) က ပြောကြားခဲ့သည်။

ပြည်နယ်အတွင်းရှိ ကယ်ဆယ်ရေးအေဂျင်စီများက ရေဘေးသင့် ပြည်သူများကို ကူညီပေးနေချိန်တွင် ပြည်နယ် အုပ်ချုပ်ရေးမှူး ပွတ်တီပွန်သည် ကယ်ဆယ်ရေးလုပ်ငန်းများကို ကြီးကြပ်ဆောင်ရွက်ခဲ့ခြင်း မရှိကြောင်း အနူတင် က ပြောသည်။

ထိုင်းပြည်ထဲရေး၀န်ကြီး ရေဘေးသင့်ဒေသကို စစ်ဆေးနေစဉ်

ပြီးခဲ့သည့် သီတင်းပတ်အတွင်းက ဝန်ကြီးချုပ် ပေတုန်တန် ရှင်နာဝပ် (Paetongtarn Shinawatra) သည် ချင်းရိုင် ပြည်နယ်ရှိ ရေဘေးအခြေအနေကို သွားရောက်ကြည့်ရှုချိန်တွင် ပွတ်တီပွန်သည် ဝန်ကြီးချုပ်နှင့် ကိုယ်စားလှယ် အဖွဲ့ကို ကယ်ဆယ်ရေး အခြေအနေများနှင့်ပတ်သက်ပြီး တင်ပြခဲ့သည်။

သို့သော်လည်း ဝန်ကြီးချုပ်နှင့် တွေ့ဆုံပြီးနောက် သူသည် ဘန်ကောက်မြို့တော်ရှိ ပြည်ထဲရေးဝန်ကြီးဌာန၏ အရာရှိများ အငြိမ်းစားယူသည့် အခမ်းအနားကို တက်ရောက်ရန် ဘန်ကောက်မြို့တော်သို့ ထွက်ခွာသွားခဲ့သည်ဟု အနူတင်က ပြောသည်။

ပြည်နယ်အုပ်ချုပ်ရေးမှူး တစ်ဦးအနေဖြင့် ပြည်နယ်အတွင်းရှိ ရေဘေးဒုက္ခကို တာဝန်ယူဖြေရှင်းရမည် ဖြစ်သော် လည်း ပွတ်တီပွန်သည် တာဝန်ဝတ္တရားများကို လစ်လျူရှုကာ ဘန်ကောက်သို့သွားပြီး ပွဲအခမ်းအနား တက်ရောက် နေသဖြင့် ဝေဖန်မှုများ ထွက်ပေါ်လာခဲ့ခြင်း ဖြစ်သည်။

ထိုင်းရေဘေးကို တွေ့ရစဉ်

ထို့ပြင် ရေလွှမ်းမိုးမှုများ ဖြစ်ပွားနေချိန်အတွင်း ဒုတိယပြည်နယ်အုပ်ချုပ်ရေးမှူး နှစ်ဦးသည်လည်း တာဝန် လစ်ဟင်းခဲ့ပြီး ဘန်ကောက်မြို့ရှိ ကာကွယ်ရေးကောလိပ်တွင် တက်ရောက် ပညာသင်ကြားနေကြောင်း အနူတင်က ပြောကြားခဲ့သည်။

ထိုဒုတိယအုပ်ချုပ်ရေးမှူး ၂  ဦးအ နေဖြင့် ရေဘေးသင့်ပြည်သူများကို ဦးစားပေး ကယ်ဆယ်ပြီးမှ ကောလိပ်ကို တက်သင့်သည်ဟုလည်း အနူတင်က ပြောသည်။

ဒုတိယပြည်နယ်အုပ်ချုပ်ရေးမှူး ၃ ဦးရှိသည့်အနက် ပရာဆက် ချစ်ပလီချိပ် ( Prasert Chitpleecheep) တစ်ဦး သာ ရေဘေးကယ်ဆယ်ရေးနှင့်ပတ်သက်ပြီး တာဝန်ယူ ဆောင်ရွက်ခဲ့သည်ဟု အနူတင်က ပြောကြားခဲ့သည်။

အောက်တိုဘာ ၁ ရက်မှစပြီး ပြည်ထဲရေးဝန်ကြီးဌာနသည် ရေဘေးကယ်ဆယ်ရေးနှင့်ပတ်သက်ပြီး ထိရောက် ကောင်းမွန်စွာ အရှိန်အဟုန် မြှင့်လုပ်ဆောင်သွားမည်ဟုလည်း အနူတင်က ကတိပြုခဲ့သည်။

Source: Thai PBS World