CNI News 

၂၀၂၄ ခုနှစ်၊ ဇူလိုင် ၉

စစ်ကိုင်းတိုင်းဒေသကြီး၊ ကလေးဝမြို့တွင် ချင်းတွင်းမြစ်‌ရေ မြင့်တက်လာမှုကြောင့် ရေဘေးသင့်ပြည်သူများအား ရေဘေးကယ်ဆယ်ရေး စခန်းများသို့ ဇူလိုင် ၈ ရက်နေ့က ပြောင်းရွှေ့ပေးခဲ့သည်ဟု ပြန်ကြားရေးဝန်ကြီးဌာနမှ ထုတ်ပြန်ခဲ့သည်။

ကလေးဝမြို့၏ ချင်းတွင်းမြစ်‌ စိုးရိမ်ရေအမှတ်မှာ ၁၅၅၀ စင်တီမီတာရှိရာ ယခုအခါမှာတော့ ၁၇၃၁ စင်တီမီတာသို့ ရောက်ရှိနေသည်။

ရေဘေးကူညီကယ်ဆယ်‌ရေး ဆောင်ရွက်နေစဥ်

ထို့ကြောင့် မြို့ပေါ်ရှိ မြေနိမ့်ပိုင်း ဒေသများဖြစ်သည့် ရပ်ကွက်(၁)၊ ရပ်ကွက်(၂) အပါအဝင် ကျော်ဇင်၊ ယောစု၊ ကိုင်း၊ တုန်နန်း၊ ရွာသာ၊ နန်းဇလိန်၊ မစိန်ကျေးရွာများမှ ရေဘေးသင့်‌ ပြည်သူများကို ရေဘေးကယ်ဆယ်ရေး စခန်းများသို့ မြို့နယ်စီမံအုပ်ချုပ်ရေးအဖွဲ့ဥက္ကဋ္ဌ ဦးဇော်မိုးအောင်၏ ဦးဆောင်မှုဖြင့် မြို့နယ်မီးသတ်ဦးစီးဌာန‌၊ မြို့နယ်အဆင့် ဌာနဆိုင်ရာ တာဝန်ရှိ အကြီးအကဲများက ရွှေ့ပြောင်းပေးခဲ့သည်။

လက်ရှိတွင် ကလေးဝမြို့၌ ရေဘေးကယ်ဆယ်ရေးစခန်း ၁၀ ခု ဖွင့်လှစ်ထားပြီး အိမ်ထောင်စု ၃၇ စု၊ လူဦးရေ ၁၅၄ ဦးအား ပြောင်းရွှေ့ နေရာချထားပေးထားကြောင်း သိရသည်။

CNI News

၂၀၂၄ ခုနှစ်၊ ဇူလိုင် ၃

ကချင်ပြည်နယ်တွင် မိုးသည်းထန်စွာ ရွာသွန်းမှုနှင့်အတူ ဧရာဝတီမြစ်၊ မေခမြစ်နှင့် ချောင်းအချို့ ရေကြီးရေလျှံမှု ကြောင့် ကူညီကယ်ဆယ်ရေး လုပ်ငန်းများ ဆောင်ရွက်ရာ၌ အခက်အခဲများရှိနေကြောင်း လူမှုကူညီကယ်ဆယ် ရေး အသင်းအဖွဲ့များမှ CNI သတင်းဌာနသို့  ပြောသည်။

လက်ရှိတွင် အချို့နေရာများမှာ ရေကျသွားပြီဖြစ်သော်လည်း အချို့နေရာများမှာမူ ရေများရှိနေသေးသဖြင့် ရေဘေးဒုက္ခသည်များအတွက် အရေးပေါ် ကယ်ဆယ်ရေး လုပ်ငန်းများ လိုအပ်နေဆဲဖြစ်သလို ကူညီရေးလုပ်ငန်း ဆောင်ရွက်ရန် လှေနှင့်စက်သုံးဆီများ လိုအပ်နေကြောင်း လူမှုကူညီရေး ရွှေမေတ္တာ ရွှေစက်မှ တာဝန်ရှိသူ တစ်ဦးက CNI သတင်းဌာနသို့ ပြောသည်။

၎င်းက “မြစ်ကြီးနားမှာ အဲဒါအခက်တွေ့နေတာ စက်သုံးဆီက။ လမ်းဘေးဆိုင်တွေက ရေကြီးတဲ့ ဧရိယာတွေမှာ ပါသွား ကြတာလေ။ အဲဒါကြောင့် မရောင်းကြတာ။ ပန့်ဆိုင်တွေကလည်း လိုသလောက်မရဘူး။ သူတို့ဆိုင်ကို မဝင်ပေမယ့်လည်း သူတို့ဆိုင်ရဲ့ အဝင်အထွက် လမ်းကြောင်းတွေမှာ ရေကျော်သွားတယ်ဆိုတော့ သူတို့လည်း ဆိုင်တွေ ပိတ်ထားရတာပေါ့။ လိုသလောက်မရဘူး စက်သုံးဆီ။ အခုတချို့ဆိုရင် ၁ လီတာတောင် ၁ သောင်း ကျော်လောက် ဝယ်နေရတယ် ပြောကြတယ်။ ဒါတောင်မှ မရမက လိုက်ရှာ။ တချို့ဆို ၁ သောင်းခွဲတဲ့ အဲဒီလို ဖြစ်တယ်။ ကယ်ဆယ်ရေးအတွက်လည်း အဲဒီစက်သုံးဆီက အခက်အခဲဖြစ်တယ်။ ကားသွားလို့မရတဲ့ နေရာတွေ ကြတော့ လှေတွေဘာတွေ၊ စက်သုံးဆီတွေ လိုတာပေါ့။ လှေတွေရှိရင်လည်း စက်သုံးဆီ လိုအပ်တာပေါ့။ တချို့ တွေကြ ကိုယ်ထူကိုယ်ထလေးတွေနဲ့ ကော်ပုံးလေးတွေကို ဖောင်ဖွဲ့ပြီးမှ လုပ်ကြတာ အဲဒီလိုမျိုးလေးတွေတော့ ရှိတာပေါ့” ဟု ပြောသည်။
ရေကြီးရေလျှံမှုများ နေအိမ်အများအပြား ရေနစ်မြှုပ်သွားသဖြင့် တစ်မြို့နယ်လျှင် လူဦးရေ ထောင်ကျော်  ပြောင်း ရွှေ့ပေးထားရသဖြင့် ကချင်တစ်ပြည်နယ်လုံး အတိုင်းအတာအရ လူဦးရေ ၁၀၀,၀၀၀ (တစ်သောင်း)ကျော်အား ဘေးလွတ်ရာ ကုန်းအမြင့်တွင်ရှိသည့် ဘုန်းကြီးကျောင်းများနှင့် လူစုလူဝေးဖြင့် နေထိုင်နိုင်သော အဆောက်အအုံ များသို့ ပြောင်းရွှေ့ပေးထားရကြောင်း သိရသည်။

 မြစ်ကြီးနားမြို့ပေါ် ရေကြီးရေလျှံမှု ကူညီကယ်ဆယ်နေကြစဉ်

လက်ရှိတွင် ရေဘေးသင့်ပြည်သူများမှာ စားနပ်ရိက္ခာနှင့် အဝတ်အစားများ လိုအပ်နေပြီး အချို့မှာ ရေစီးဖြင့် အိမ်များမျောပါသွား၍ အိုးမဲ့အိမ်မဲ့ဖြစ်သွားကြကြောင်း လူမှုကူညီကယ်ဆယ်ရေးအသင်းအဖွဲ့များထံက သိရသည်။

လွန်ခဲ့သည့် ၂၀၀၄ ခုနှစ်တွင် မြစ်ကြီးနားနှင့် ဝိုင်းမော်မြို့နယ်များတွင် ရေကြီးရေလျှံမှုများ ကြုံတွေ့ခဲ့ဖူး သော်လည်း ယခုနှစ် ရေကြီးရေလျှံမှုမှာ ပို၍များပြားကြောင်း မြန်မာနိုင်ငံလူမှုကယ်ဆယ်ရေးအဖွဲ့ ကချင်ပြည်နယ် ရုံးမှ တာဝန်ရှိသူတစ်ဦးက CNI သတင်းဌာနသို့ ပြောသည်။

၎င်းက “၂၀၀၄ ကထက်စာရင်တော့ များတာပေါ့။ ကျနော်တို့ကကြတော့ လုံးဝရေကြီးရေလျှံမှုဆိုတော့ ရပ်ကွက် အလိုက် လိုက်ပြီး ကူညီကယ်ဆယ်ရေး လုပ်ဆောင်တဲ့အခါမှာ လှေမလောက်တာပေါ့။ လှေမလောက်တာရယ် ပြီးတော့ ဆီမရတာရယ်ပေါ့ အဲဒါအခက်အခဲပေါ့။ အခုလက်ရှိ မြန်မာနိုင်ငံ လူမှုကယ်ဆယ်ရေးအဖွဲ့ မန္တလေး တိုင်းရုံးကို ခေါ်ထားတယ်။ ပြီးတော့ ကချင်ပြည်နယ်မှာရှိတဲ့ မိုးညှင်း၊ မိုးကောင်း၊ နမ္မတီးအသင်းအဖွဲ့ အကုန်လုံး စုပြီးမှ လုပ်ဆောင်နေတာ။ အခုမန္တလေးကနေ ၄ စီးပြန်မှာထားတာ အဲဒါကတော့ ဒီနေ့ ညနေပိုင်းလောက် ရောက် မယ်။ လိုတာကတော့ လိုတာပေါ့။ ပြန်လို့တော့ မရသေးဘူး။ ရေကျတယ်ဆိုပေမယ့် လုံးဝ ကျသွားတာ မဟုတ် ဘူး။ ခါးလောက်ကျတဲ့ နေရာရှိတယ်။ ရင်ဘတ်လောက်ရှိတဲ့ နေရာရှိတယ်။ ကြက်ပေါင်ခြံတို့ဆိုလည်း ရေက လုံးဝ မကျသေးဘူး။ အဲဒီဘက် ကူညီကယ်ဆယ်ရေးတွေ ဆက်လုပ်ဆောင် နေရတယ်။ ကျောင်းတွေကတော့ ဖွင့်လို့ အဆင်မပြေသေးဘူး ဒီတစ်ပတ်၊ နှစ်ပတ်လောက်ကတော့။ လုံးဝရေနစ်ထားတာဆိုတော့” ဟု ပြောသည်။

မြစ်ကြီးနားမြို့ပေါ်က ရေဘေး ဒုက္ခကြုံတွေ့ကြ ရသူများကို တွေ့ရစဉ်

ဧရာဝတီမြစ်ရေသည် ဇွန်လ ၃၀ ရက်နေ့ နံနက်ပိုင်းမှ စတင်ပြီး မြင့်တက်လာခဲ့ရာ ဇူလိုင် ၁ ရက်နေ့တွင် မြစ်ကြီးနားမြို့၏ စိုးရိမ်ရေမှတ် ၁၂၀၀ စင်တီမီတာရှိသည့်အနက် မြစ်ရေသည် ညအချိန် တိုင်းတာချက်အရ ၁၄၀၆ စင်တီမီတာအထိ အမြင့်ဆုံး မြင့်တက်ခဲ့ခြင်းဖြစ်သည်။

ထို့ကြောင့် ဇွန်လ ၃၀ ရက်နေ့မှ စတင်ကာ ကချင်ပြည်နယ် မြစ်ကြီးနား၊ ဝိုင်းမော်၊ ချီဖွေ၊ တနိုင်း၊ ဖားကန့် စသည့် အနိမ့်နေရာများတွင် ရေကြီးရေလျှံမှုများ ဖြစ်ပွားခဲ့ပြီး ပြန်လည်ထူထောင်ရေး လုပ်ငန်းစဉ်များအား ဆောင်ရွက် ရာတွင် အချိန်ကြန့်ကြာမှုများ ရှိနိုင်ကြောင်း လူမှုကူညီကယ်ဆယ်ရေး အသင်းအဖွဲ့များက သုံးသပ်သည်။

CNI International News

၂၀၂၄ ခုနှစ်၊ မေလ ၃

ဗီယက်နမ်နိုင်ငံမှာ အပူရှိန်မြင့်မားသည့်အတွက် ငါးများ သောင်းချီ သေဆုံးမှုများ ယခုရက်ပိုင်းအတွင်း ဖြစ်ပေါ်ခဲ့သည်။

အာရှတိုက်သည် အပူရှိန်မြင့်မားစွာ ခံနေရကြောင်းလည်း ကုလသမဂ္ဂ၏ ကမ္ဘာ့မိုးလေဝသအဖွဲ့ (WMO)က ပြောကြားထားသည်။

WMO ၏ ဧပြီ ၂၃ ရက်က ထုတ်ပြန်ချက်တွင် ၂၀၂၃ ခုနှစ်အတွင်း အာရှဒေသ၌ ရေနှင့်ဆက်စပ်သည့် မိုးလေဝသ ဖြစ်စဉ်ကြောင့် ဘေးအန္တရာယ် ၇၉ ခုရှိခဲ့ကြောင်း၊ ထိုဘေးအန္တရာယ် စုစုပေါင်း၏ ၈၀ ရာခိုင်နှုန်းကျော်သည် ရေလွှမ်းမိုးမှုများနှင့် မုန်တိုင်းများကြောင့်ဖြစ်ပြီး သေဆုံးသူ ၂၀၀၀ ကျော်ရှိခဲ့ကြောင်း ဖော်ပြခဲ့သည်။

အာရှဒေသသည် ကမ္ဘာလုံးဆိုင်ရာ ပျမ်းမျှ အခြေအနေအရ လျင်မြန်စွာ ပူနွေးလာကြောင်း၊ ပြီးခဲ့သည့်နှစ်က တရုတ်နိုင်ငံအရှေ့ပိုင်းနှင့် ဂျပန်တို့အပြင် ဆိုက်ဘေးရီးယား (Siberia) အနောက်ပိုင်းမှ ဗဟိုအာရှဒေသ တစ် လျှောက် အပူချိန်များ စံချိန်တင် မြင့်တက်ခဲ့ကြောင်း WMO က ထုတ်ပြန်ခဲ့သည်။

အာရှတိုက်၏ မြင့်မားသည့် တောင်းတန်းဒေသတွင်ရှိသည့် ရေခဲမြစ်အများစုသည် စံချိန်တင် ပူပြင်းခြောက်သွေ့ သည့် အခြေအနေများကြောင့် အရည်ပျော်ခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။

CNI International News

ဂျီနီဗာ၊ ဧပြီ ၂၄

အာရှတိုက်သည် ပြီးခဲ့သည့်နှစ်က ရာသီဥတုနှင့်ဆက်နွှယ်သည့် ဘေးအန္တရာယ်များ အများဆုံး ဖြစ်ပွားခဲ့သည့် ဒေသတစ်ခု ဖြစ်ခဲ့သည်ဟု ကုလသမဂ္ဂ၏ ကမ္ဘာ့မိုးလေဝသအဖွဲ့ (WMO) က ပြောကြားခဲ့ကြောင်း ဘန်ကောက်ပို့စ် မှ ဖော်ပြခဲ့သည်။

ပြီးခဲ့သည့်နှစ်က အာရှတိုက်သည် ရေလွှမ်းမိုးမှုများနှင့် မုန်တိုင်းများကြောင့် လူသေဆုံးမှု အများဆုံး ဒေသအဖြစ် မှတ်တမ်းဝင်ခဲ့သည်။

WMO ၏ ဧပြီ ၂၃ ရက်က ထုတ်ပြန်ချက်တွင် ၂၀၂၃ ခုနှစ်အတွင်း အာရှဒေသ၌ ရေနှင့်ဆက်စပ်သည့် မိုးလေဝသ ဖြစ်စဉ်ကြောင့် ဘေးအန္တရာယ် ၇၉ ခုရှိခဲ့ကြောင်း၊ ထိုဘေးအန္တရာယ် စုစုပေါင်း၏ ၈၀ ရာခိုင်နှုန်းကျော်သည် ရေလွှမ်းမိုးမှုများနှင့် မုန်တိုင်းများကြောင့်ဖြစ်ပြီး သေဆုံးသူ ၂၀၀၀ ကျော်ရှိခဲ့ကြောင်း ဖော်ပြခဲ့သည်။

မိုခါမုန်တိုင်းကြောင့် ရခိုင်ဒေသ ပျက်စီးမှုကို ဗိုလ်ချုပ်မှူးကြီးမင်းအောင်လှိုင် စစ်ဆေးနေစဉ်

“၂၀၂၃ ခုနှစ်အတွင်း အာရှဒေသက နိုင်ငံအများစုဟာ စံချိန်တင် အပူဆုံးနှစ်ကို ကြုံတွေ့ခဲ့ရပါတယ်။ မိုးခေါင်းမှု တွေ၊ အပူလှိုင်း ကျရောက်မှုတွေ၊ ရေလွှမ်းမိုးမှုတွေနဲ့ မုန်တိုင်းတွေလိုမျိုး ဆိုးရွားပြင်းထန်တဲ့ အခြေအနေတွေကို ကြုံတွေ့ခဲ့ရပါတယ်” ဟု WMO အတွင်းရေးမှူးချုပ် ဆယ်လက်စတီ ဆော်လို (Celeste Saulo) က ပြောကြားခဲ့ သည်။

ထို့ပြင် ရာသီဥတု ဖောက်ပြန် ပြောင်းလဲမှုကြောင့် ထိုကဲ့သို့ မိုးလေဝသဖြစ်စဉ်များ ပိုမိုဆိုးရွားပြီး မကြာခဏ ဖြစ်ပွားလာခဲ့ခြင်း ဖြစ်သည်ဟုလည်း ၎င်းက ပြောသည်။

အာရှဒေသသည် ကမ္ဘာလုံးဆိုင်ရာ ပျမ်းမျှ အခြေအနေအရ လျင်မြန်စွာ ပူနွေးလာကြောင်း၊ ပြီးခဲ့သည့်နှစ်က တရုတ်နိုင်ငံအရှေ့ပိုင်းနှင့် ဂျပန်တို့အပြင် ဆိုက်ဘေးရီးယား (Siberia) အနောက်ပိုင်းမှ ဗဟိုအာရှဒေသ တစ် လျှောက် အပူချိန်များ စံချိန်တင် မြင့်တက်ခဲ့ကြောင်း WMO က ထုတ်ပြန်ခဲ့သည်။

အာရှတိုက်၏ မြင့်မားသည့် တောင်းတန်းဒေသတွင်ရှိသည့် ရေခဲမြစ်အများစုသည် စံချိန်တင် ပူပြင်းခြောက်သွေ့ သည့် အခြေအနေများကြောင့် အရည်ပျော်ခဲ့သည်ဟုလည်း ထုတ်ပြန်ချက်တွင် ဖော်ပြခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ ဧပြီ ၁၀

ထိုင်းနိုင်ငံ၏ ချင်းမိုင် (Chaing Mai) မြို့သည် ဧပြီ ၉ ရက်တွင် ကမ္ဘာ့လေထု အညစ်ညမ်းဆုံးမြို့အဖြစ် နောက်တစ်ကြိမ် မှတ်တမ်းဝင်ခဲ့ကြောင်း Thai PBS World မှ ဖော်ပြခဲ့သည်။

လေထုအတွင်း PM2.5 ပါဝင်မှုနှုန်း အလွန်မြင့်မားနေသဖြင့် ပြည်နယ်အုပ်ချုပ်ရေးအဖွဲ့က ဧပြီ ၁၀ ရက်အထိ အစိုးရဝန်ထမ်းများနှင့် ပုဂ္ဂလိက ဝန်ထမ်းများကို နေအိမ်မှ အလုပ်လုပ်သည့် work from home စနစ်ဖြင့် အလုပ်လုပ်ကြရန်၊ ခရီးသွားများကိုလည်း အပြင်မထွက်ကြရန် တိုက်တွန်းခဲ့သည်။

ဒေသခံများနှင့် ခရီးသွားများ၏ ကျန်းမာရေးအတွက် ထိုကဲ့သို့ ကြေညာချက် ထုတ်ပြန်ခဲ့ခြင်းဖြစ်ကြောင်း ချင်းမိုင်အုပ်ချုပ်ရေးမှူး နီရတ် ပွန်စစ်သီသာဗွန် (Nirat Pongsitthithavorn)က ပြောကြားခဲ့သည်။

ထို့နောက် တောမီးလောင်ကျွမ်းမှုများကြောင့် PM2.5 ပြဿနာနှင့်ပတ်သက်ပြီး အာဏာပိုင်များနှင့် ပြည်သူများ အကြား ဆက်သွယ်ရေး ကွာဟချက်ရှိနေဆဲဖြစ်ကြောင်း ၎င်းက ထောက်ပြခဲ့သည်။

PM2.5 ဆိုသည်မှာ သွေးကြောမျှင်များထဲသို့ ဝင်ရောက်နိုင်လောက်အောင် သေးငယ်သည့် ညစ်ညမ်းပစ္စည်း အမှုန်အမွှားများဖြစ်ပြီး ကျန်းမာရေးကို ဆိုးရွားစွာ ထိခိုက်စေသည်။

တောမီးလောင်ကျွမ်းမှုများနှင့် စိုက်ခင်းများ မီးရှို့မှုအား တားဆီးရန် လိုအပ်သည့် အစီအစဉ်များအားလုံးကို အရာရှိများက ကြိုးပမ်းနေသည်။

 လေထုညစ်ညမ်းနေတဲ့ ချင်းမိုင်မြို့ကို တွေ့ရစဉ်

ထိုအစီအစဉ်များထဲတွင် မီးရှို့သူများကို ဖမ်းဆီးနိုင်ရန်အတွက် သတင်းပေး တိုင်ကြားသူများအား ဆုငွေများ ချီးမြင့်မည့် အစီအစဉ်လည်း ပါဝင်သည်ဟု နီရတ်က ပြောသည်။

သို့သော်လည်း စိုက်ခင်းများ မီးရှို့ရှင်းလင်းမှုများသည် လျော့ကျမသွားခဲ့ကြောင်း ၎င်းက ဆိုသည်။

ထိုင်းနိုင်ငံတွင် ဧပြီလ အစပိုင်းကတည်းက စိုက်ခင်းမီးရှို့ ရှင်းလင်းသည့် နေရာ ၅၀၀ ကျော်ကို ထောက်လှမ်း တွေ့ရှိခဲ့ပြီး အိမ်နီးချင်းနိုင်ငံများတွင် စိုက်ခင်းများ မီးရှို့သော နေရာပေါင်း ၆၀၀၀ ကျော်ကို တွေ့ရှိခဲ့ကြောင်း နီရတ်က ပြောကြားခဲ့သည်။

တောမီးလောင်မှုများနှင့် စိုက်ခင်းမီးရှို့မှုများမှ ထွက်ပေါ်လာသည့် မီးခိုးများ၏ အခြေအနေမှာ ဆိုးရွားလာသဖြင့် ဧပြီ ၄ ရက်ကတည်းက ချင်းမိုင်၏ ဖန်း (Fang)နှင့် ပရာအို (Prao) ဒေသများကို အများပြည်သူဆိုင်ရာ ဘေးအန္တရာယ်ဇုန်များအဖြစ် ကြေညာထားခဲ့သည်။

စားသောက်ဆိုင်များနှင့် အခြား ဖျော်ဖြေရေး နေရာများတွင်လည်း လာရောက်သည့် ဖောက်သည်များအတွက် လေအေးပေးစက်များ ဖွင့်ထားသော အခန်းများအတွင်း ဝန်ဆောင်မှုပေးရန် အာဏာပိုင်များက ညွှန်ကြားထား သည်။

Source: Thai PBS World

CNI International News

တိုကျို၊ ဖေဖော်ဝါရီ ၇

ဂျပန်နိုင်ငံ အရှေ့ပိုင်းတွင် ဖေဖော်ဝါရီ ၆ ရက်နေ့က ဆီးနှင်းများ ထူထပ်သိပ်သည်းစွာ ကျဆင်းခဲ့သဖြင့် လမ်းပေါ်၌ လူပေါင်းများစွာ ချော်လဲမှုများ ဖြစ်ပွားခဲ့ပြီးနောက် တိုကျိုမြို့တော်ရှိ ဆေးရုံမှာ လူပေါင်း ၁၀၉ ဦးခန့်  ဆေးဝါး ကုသမှု ခံယူနေရကြောင်း တိုကျိုမီးသတ်ဌာနက ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ဒေသစံတော်ချိန် နံနက် ၁၀ နာရီအထိ ဆေးရုံသို့ ပို့ဆောင်ခဲ့ရသည့် ဒဏ်ရာရရှိသူများထဲတွင် အသက် ၄ နှစ် အရွယ်ရှိသည့် ကလေးသူငယ်များမှအစ အသက် ၉၂ နှစ်အရွယ် သက်ကြီးရွယ်အိုများအထိ ပါဝင်ပြီး အသက် အန္တရာယ် စိုးရိမ်ရသူမရှိကြောင်း တာဝန်ရှိသူများက ပြောကြားခဲ့သည်။

အိမ်နီးချင်း ကာနာဂါဝါ (Kanagawa) စီရင်စုနယ် လူ ၅ ဦး ပြင်းထန်စွာ ဒဏ်ရာရရှိခဲ့ပြီး လူ ၃၄ ဦး အသေးစား ဒဏ်ရာရရှိခဲ့ကာ ဆိုင်တားမား (Saitama) စီရင်စုနယ်တွင်လည်း ၁၂ ဦး အသေးစား ဒဏ်ရာရရှိခဲ့သည်။

ဂျပန်နိုင်ငံမှာ ဆီးနှင်းများ ကျနေစဉ်

ဂျပန်မိုးလေဝသအေဂျင်စီက စီရင်စုနယ် ၉ ခုနှစ် ဆီးနှင်းများ ထူထပ်သိပ်သည်းစွာ ကျရောက်မည့် သတိပေးချက် များကို ရုပ်သိမ်းခဲ့သော်လည်း ဖေဖော်ဝါရီ ၆ ရက် နံနက်ပိုင်းအထိ နေရာဒေသအချို့တွင် ဆီးနှင်းများနှင့် နှင်းမိုး များ သည်းထန်စွာ ရွာသွန်းခဲ့သည်။

East Japan Railway မီးရထားကုမ္ပဏီ၏ ချူအို (Chuo) လမ်းကြောင်းနှင့် အိုမီ (Ome) လမ်းကြောင်းများတွင် ရထားပြေးဆွဲမှုများလည်း ယာယီ ရပ်နားခဲ့ရသည်။ 

Tokaido Shinkansen ကျည်ဆန် ရထားများသည်လည်း တိုကျိုမြို့တော်၏ ရှင်နာဂါဝါ (Shinagawa) ဘူတာရုံ နှင့် ကာနာဂါဝါ စီရင်စုနယ်ရှိ အိုဒါဝါရာ (Odawara) ဘူတာရုံအကြား ပြေးဆွဲမှုများကို အရှိန်လျှော့ပြီး ပြေးဆွဲခဲ့ရ သည်။

ထို့ပြင် All Nippon Airways နှင့် Japan Airlines လေကြောင်းလိုင်းများသည်လည်း ပြည်တွင်းလေကြောင်း ခရီးစဉ် ၃၀ ခန့်ကို ဖျက်သိမ်းခဲ့ရသည်။

Source: ဘန်ကောက်ပို့စ်

CNI International News

ဝါဂျီးမား၊ ဇန်နဝါရီ ၁၈

ဂျပန်နိုင်ငံ၊ အီရှီကာဝါ (Ishikawa) စီရင်စုနယ်တွင် ဇန်နဝါရီ ၁ ရက်က အင်အားပြင်းငလျင် လှုပ်ခတ်ခဲ့ပြီးနောက် ထိုစီရင်စုနယ်အတွင်းရှိ ဝါဂျီးမား (Wajima) မြို့တွင် နေထိုင်သည့် အထက်တန်းကျောင်းသား ၂၅၀ ခန့်သည် ၎င်းတို့၏ မိသားစုများနှင့်ခွဲခွာပြီး အခြားမြို့၌ ကျောင်းဆက်တက်နေရသည်ဟု Japan Times မှ ဖော်ပြခဲ့သည်။

ထိုကျောင်းသားများသည် ဝါဂျီးမားမြို့နှင့် ကီလိုမီတာ ၁၀၀ ကွာဝေးသည့် ဟာကူဆန် (Hakusan) မြို့ရှိ ယာယီ အဆောင်များတွင် နှစ်လကြာ နေထိုင်ရမည်ဖြစ်ပြီး ကျောင်းသင်ခန်းစာများကို ဆက်လက် သင်ယူရမည်ဖြစ်သည်။

ငလျင်လှုပ်ခတ်ခဲ့ပြီးနောက် ဝါဂျီးမားမြို့ရှိ အထက်တန်းကျောင်း ၃ ကျောင်းစလုံးကို ငလျင်ဒဏ်သင့် မြို့ခံများ အတွက် ယာယီကယ်ဆယ်ရေး စခန်းများအဖြစ် အသုံးပြုနေရသဖြင့် ကျောင်းသားများကို အခြားမြို့သို့ ပြောင်းရွှေ့ ပြီး ပညာသင်ကြားပေးရန် စီစဉ်ခဲ့ခြင်းဖြစ်သည်ဟု ဝါဂျီးမား ပညာရေးဘုတ်အဖွဲ့က ပြောကြားခဲ့သည်။

ဂျပန်ငလျင်ဒဏ်ခံထားရစဉ်

ထို့ပြင် ငလျင်လှုပ်ခတ်မှုကြောင့် ဝါဂျီးမားမြို့ရှိ စာသင်ကျောင်းများတွင် ထိခိုက်ပျက်စီးခဲ့သဖြင့် ကလေးများကို ပညာသင်ကြားပေးရန် မဖြစ်နိုင်ကြောင်း တာဝန်ရှိသူများက ပြောသည်။

အာဏာပိုင်များအနေဖြင့် မူလသင်ရိုးညွှန်းတမ်းအတိုင်း ဆက်လက် သင်ကြားပေးရန် ရည်ရွယ်ထားကြောင်း ဝါဂျီးမားအရာရှိတစ်ဦးက ပြောကြားခဲ့သော်လည်း ကလေးများကို သင်ကြားပေးမည့် ဆရာများ၏ သင်ကြား ပြသမှု အစီအစဉ်များကိုမူ အသေးစိတ် ထုတ်ပြန်ခဲ့ခြင်းမရှိပေ။

ဝါဂျီးမားမြို့ရှိ အထက်တန်းကျောင်းသား စုစုပေါင်း ၄၀၀ ရှိသည့်အနက် ၂၅၀ ကို ဟာကူဆန်မြို့သို့ ပို့ဆောင် မည်ဖြစ်သော်လည်း ကျန်ကျောင်းသား ၁၅၀ အတွက် ပညာသင်ကြားမှု အစီအစဉ်များကိုမူ ရှင်းလင်းစွာ မသိရ သေးပေ။

ဂျပန်ကလေးငယ်များနဲ့ မိသားစုများ နှုတ်ဆက်နေစဉ်

ကျောင်းသားအားလုံးသည် ပညာသင်ကြားနိုင်မည့် အခွင့်အလမ်းများ လိုအပ်ကြောင်းနှင့် ဟာကူဆန်မြို့မှ မိမိနေအိမ်သို့ စောစီးစွာ ပြန်လာချင်သည့် ကျောင်းသားများကိုလည်း ပြန်လာခွင့်ပေးမည်ဟု မြို့အာဏာပိုင်မျာက ပြောကြားခဲ့သည်။ 

အီရှီကာဝါစီရင်စုနယ်ရှိ မူလတန်းကျောင်းများနှင့် အထက်တန်းကျောင်း စုစုပေါင်း ၂၈၁ ကျောင်းသည် ငလျင် လှုပ်ခတ်မှုကြောင့် ထိခိုက်ပျက်စီးခဲ့သဖြင့် စာသင်ကျောင်းများကို ဇန်နဝါရီ ၁၇ ရက်အထိ ပြန်လည် ဖွင့်လှစ်နိုင် ခြင်းမရှိသေးကြောင်း အီရှီကာဝါ စီရင်စုနယ် ပညာရေးဘုတ်အဖွဲ့က ပြောကြားခဲ့သည်။

Source: Japan Times

CNI International News

ဝါဂျီးမား၊ ဇန်နဝါရီ ၉

ဂျပန်နိုင်ငံတွင် ဇန်နဝါရီ ၁ ရက်က လှုပ်ခတ်ခဲ့သည့် အင်အားပြင်း ငလျင်ကြောင့် လူ ၁၆၈ ဦးထက်မနည်း သေဆုံး ကာ လူအများအပြား ပျောက်ဆုံးခဲ့ပြီး လူပေါင်းထောင်ချီ အိုးမဲ့အိမ်မဲ့ ဖြစ်ခဲ့ရသည်ဟု အေပီမှ ဖော်ပြခဲ့သည်။ 

ဇန်နဝါရီ ၁ ရက်က ရစ်ချ်တာစကေး ၇ ဒသမ ၆ ပြင်းအားရှိ ငလျင်လှုပ်ခတ်ခဲ့ပြီးနောက် ထောင်နှင့်ချီသည့် စစ်သား များ၊ မီးသတ်သမားများနှင့် ရဲတပ်ဖွဲ့သည် အပျက်အစီးများအောက်တွင် ပိတ်မိနေသည့်သူများကို ကယ်တင်ရန် မျှော်လင့်ချက်နှင့် ရှာဖွေကယ်ဆယ်ရေးများ ပြုလုပ်လျက်ရှိသည်။ 

အာဏာပိုင်များကလည်း ငလျင်ဗဟိုချက်ဖြစ်သည့် အီရှီကာဝါ (Ishikawa) စီရင်စုနယ်ရှိ နိုတိုကျွန်းဆွယ် (Noto Peninsula) ပေါ်တွင် နှင်းများထူထပ်စွာ ကျဆင်းနေသဖြင့် မြေပြိုမှုအန္တရာယ်များ ပိုမိုဆိုးရွားနိုင်ကြောင်း သတိပေးချက် ထုတ်ပြန်ခဲ့သည်။

ဂျပန်ငလျင်ဒဏ်ကြောင့် ပျက်စီးနေမှုကိုတွေ့ရစဉ်

ထိုငလျင် လှုပ်ခတ်မှုကြောင့်် သေဆုံးသူ ၁၆၈ ဦးအနက် ၇၀ ခန့်သည် ဝါဂျီးမား (Wajima) မြို့မှဖြစ်ပြီး ကျန် သေဆုံးသူ ၇၀ သည် ဆူဇူး (Suzu) မြို့မှဖြစ်သည်။

ထို့နောက် သေဆုံးသူ ၁၈ ဦးမှာ အနူမီဇူ (Anamizu) မြို့မှ ဖြစ်သည်။ ကျန်သေဆုံးသူများမှာ အခြားမြို့ ၄ မြို့မှ ဖြစ်သည်။

လက်ရှိအချိန်အထိ ပျောက်ဆုံးသူ ၃၂၃ ဦးထက်မနည်းရှိပြီး  ဒဏ်ရာရသူ ၅၆၅ ဦးရှိခဲ့ကာ လူနေအိမ်ပေါင်း ၁၃၉၀ ထက်မနည်း ထိခိုက်ပျက်စီးသွားခဲ့ကြောင်း ဒေသခံ အာဏာပိုင်များက ပြောကြားခဲ့သည်။ 

ဇန်နဝါရီ ၁ ရက်က ထိုအင်အားပြင်း ငလျင်လှုပ်ခတ်ခဲ့ပြီးနောက် မီတာအနည်းငယ်မြင့်သည့် ဆူနာမီလှိုင်းများ ရိုက်ခတ်ခဲ့ကာ နောက်ဆက်တွဲ ငလျင်များသည် နေ့စဉ် လှုပ်ခတ်ခဲ့သည်ဟု တာဝန်ရှိသူများက ပြောကြားခဲ့သည်။ 

ဂျပန်ငလျင်ဒဏ်ကြောင့် ပျက်စီးနေမှုကိုတွေ့ရစဉ်

ထိုကဲ့သို့ နောက်ဆက်တွဲ ငလျင်များသည် နောက်ထပ်တစ်လကြာ ဆက်လက်လှုပ်ခတ်နိုင်ကြောင်း ဂျပန် မိုးလေဝသ အရာရှိများက သတိပေးခဲ့သည်။

ထိုနောက်ဆက်တွဲ ငလျင်များ၏ ပြင်းအားသည် လျော့နည်းသော်လည်း ပြီးခဲ့သည့် သီတင်းတစ်ပတ်အတွင်း နောက်ဆက်တွဲ ငလျင်ပေါင်း ၁၀၀၀ ကျော် လှုပ်ခတ်ခဲ့သည်ဟု ဆိုသည်။

ထို့ကြောင့် ဒေသခံများသည် ပြန်လည်ထူထောင်ရေး လုပ်ငန်းများကို ပြန်လည်လုပ်ဆောင်နိုင်ခြင်း မရှိသေးဘဲ လူအများအပြားသည် ယာယီကယ်ဆယ်ရေးစခန်းများတွင် ခိုလှုံနေထိုင်နေရပြီး အကူအညီ အထောက်အပံ့များကို လိုအပ်နေသည်ဟု တာဝန်ရှိသူများက ပြောကြားခဲ့သည်။

Source: အေပီ