CNI International News

ပြုံယမ်း၊ စက်တင်ဘာ ၂၂

ယူကရိန်းစစ်ပွဲအတွင်း ရုရှားနိုင်ငံသို့ မည်သည့်လက်နက်မျှ မိမိတို့ မတင်ပို့ခဲ့ကြောင်း၊ ယင်းသို့ လုပ်ဆောင်ရန် လည် အစီအစဉ်မရှိကြောင်း မြောက်ကိုရီးယားက ပြောကြားခဲ့သည်ဟု အေပီသတင်းဌာနက ရေးသားဖော်ပြသည်။

ထို့နောက် လက်နက်လွှဲပြောင်းရေးဆိုင်ရာ အမေရိကန် ထောက်လှမ်းရေး အစီရင်ခံစာများသည် မိမိတို့ ဂုဏ်သိက္ခာ ကျဆင်းအောင် ကြိုးပမ်းနေခြင်းသာဖြစ်ကြောင်း မြောက်ကိုရီးယားက ဆက်လက် ပြောကြားခဲ့သည်။

စက်တင်ဘာ ၂၂ ရက် (ယနေ့) မြောက်ကိုရီးယား မီဒီယာတစ်ခု၏ သတင်းဖော်ပြချက်ထဲတွင် အမည်မဖော်လိုသူ မြောက်ကိုရီးယား ကာကွယ်ရေး အရာရှိတစ်ဦးက “မဆင်မခြင် ပြောဆိုမှုများ ရပ်တန့်ရန်နှင့် ပါးစပ်ပိတ်ထားကြရန်” အမေရိကန်သို့ တုံ့ပြန် ပြောကြားခဲ့သည်။

ရုရှားသည် မြောက်ကိုရီးယားထံမှ သန်းနှင့်ချီသော အမြောက်ကျည်များနှင့် ဒုံးကျည်များ အပါအဝင် စစ်လက်နက် များ ဝယ်ယူနေကြောင်း အမေရိကန် ထောက်လှမ်းရေး၏ အကဲဖြတ်ချက်ကို ယခုလ အစောပိုင်းတွင် ဘိုင်ဒန် အစိုးရတာဝန်ရှိသူများက အတည်ပြုခဲ့ကြသည်။

မြောက်ကိုရီးယားခေါင်းဆောင်နဲ့ စစ်ဘက်ခေါင်းဆောင်များ(KCNA)

မော်စကိုအစိုးရသည် ယူကရိန်းမြေပေါ်တွင် စစ်ဘက်ထောက်ပံ့ ပို့ဆောင်ရေး အကျပ်ရိုက်ခြင်းမှ ရုန်းထွက်နိုင်အောင် ကြိုးပမ်းနေရချိန်၌ အမေရိကန် ဦးဆောင်သော အနောက်အုပ်စု၏ ရုရှားပို့ကုန်ထိန်းချုပ်မှုနှင့် ပိတ်ဆို့ ဒဏ်ခတ်မှုများကြောင့် အခြေအနေ ပိုဆိုးလာခဲ့သည်။

အမေရိကန် ထောက်လှမ်းရေး အစီရင်ခံစာအရ တွေ့ရှိချက်များသည် သတင်း အတုအယောင်သာဖြစ်ကြောင်း မော်စကိုက ချေပပြီး သီတင်းပတ် အတန်ကြာပြီးနောက် မြောက်ကိုရီးယား၏ ယခုငြင်းဆိုချက် ထွက်ပေါ်လာခဲ့ သည်။

အကယ်၍ ရုရှားထံသို့ မြောက်ကိုရီးယား လက်နက်တင်ပို့သည်ဆိုလျှင် ပြုံယမ်းအစိုးရအပေါ် လက်နက် အရောင်း အဝယ်ကိစ္စ တားမြစ်ထားသည့် ကုလသမဂ္ဂ ဆုံးဖြတ်ချက်ကို ချိုးဖောက်ရာ ရောက်မည်ဖြစ်သည်။

ထိုသို့ ကုလသမဂ္ဂလုံခြုံရေးကောင်စီ (UNSC) ၏ ပိတ်ဆို့ဒဏ်ခတ်မှုကို ပြုံယမ်းအနေဖြင့် တရားမဝင်ဟု မှတ်ယူပြီး အသိအမှတ်မပြုကြောင်း မြောက်ကိုရီးယား အစိုးရအရာရှိတစ်ဦးက ဆက်လက် ပြောကြားခဲ့သည်။

ပိတ်ဆို့ဒဏ်ခတ်ရန် UNSC ၏ ဆုံးဖြတ်ချက်မှာ အမေရိကန်နှင့် ၎င်း၏ဩဇာခံ နိုင်ငံများ ခြယ်လှယ်မှုဖြစ်၍ ဆန့်ကျင်ကြောင်း ၎င်းက ထပ်လောင်း ပြောကြားခဲ့သည်။

စစ်လက်နက်များ တင်ပို့ခြင်းသည် အချုပ်အခြာအာဏာပိုင် နိုင်ငံတစ်နိုင်ငံအတွက် ဥပဒေနှင့်ညီသော အခွင့်အရေး တစ်ခုဖြစ်ကြောင်း မြောက်ကိုရီးယား၏ တရားဝင် ကိုရီးယားဗဟိုသတင်းဌာန (KCNA) ၏ ထုတ်လွှင့်ချက်အရ သိရသည်။

Source: AP

CNI News

၂၀၂၂ ခုနှစ်၊ စက်တင်ဘာ ၂၂

ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ (USDP)ဥက္ကဋ္ဌ တာဝန် လွှဲပြောင်းမှုမှာ ၎င်းတို့ အစိုးရတစ်ရပ် ဖြစ်သည့် အခါ အကြီးဆုံးရာထူးကို လျာထားခြင်း ဖြစ်နိုင်ကြောင်း ပအိုဝ်းအမျိုးသားအဖွဲ့ချုပ်မှ စောခွန်ကျော်ဝင်းက CNI သတင်းဌာနသို့ ပြောသည်။

၎င်းတို့၏ မူဝါဒအတိုင်း အမှုဆောင်အသစ်များ ပြန်လည်ရွေးချယ်ခြင်းလည်း ဖြစ်နိုင်ကြောင်း၊ မိမိ၏ တစ်ဦးတည်း အမြင်အရ အကြီးဆုံးရာထူးကို လျာထားခြင်း ဖြစ်နိုင်ကြောင်း ၎င်းက ပြောသည်။

စောခွန်ကျော်ဝင်းက “အဲဒါကတော့ သူတို့ လာမယ့်‌ရွေးကောက်ပွဲ လုပ်ဖြစ်မယ်ဆိုရင် သူတို့ ဘယ်နိုင်ငံရေးပါတီ မဆို သူတို့ လျာထားတာ ရှိမှာပေါ့နော်၊ ဒါတော့ သူတို့ အတွင်းရေး ကျနော်တို့ လောလောဆယ်တော့ မခန့်မှန်းနိုင် ဘူးပေါ့နော်၊ ဒါပေမဲ့ များသောအားဖြင့် ဘယ်ပါတီ၊ ဘယ်အဖွဲ့အစည်းမဆို ဥက္ကဋ္ဌ ဖြစ်တဲ့လူကတော့ ဒါသူတို့ပေါ့ နော် ဥပမာ အစိုးရတစ်ရပ် ဖြစ်လာတဲ့အခါ ဒီအတွင်းမှာ အကြီးဆုံးရာထူးကို လျာထားတာတော့ များတာပေါ့နော်၊ ဖြစ်နိုင်ချေများတာပေ့ါနော်” ဟု CNI သတင်းဌာနသို့ ပြောသည်။

ပြီးခဲ့သည့် စက်တင်ဘာ ၂၀ ရက်နေ့က ကျင်းပခဲ့သော USDP ပါတီ၏ အစည်းအဝေးအပြီး ဥက္ကဋ္ဌ ဦးသန်းဋ္ဌေးသည် ပါတီဥက္ကဋ္ဌတာဝန်ကို ဒုဥက္ကဋ္ဌ(၂) ဦးခင်ရီထံ လွှဲပြောင်းပေးအပ်ခဲ့ခြင်းဖြစ်ကြောင်း သိရသည်။

ဦးသန်းဋ္ဌေးမှာ ကျန်းမာရေး အခြေအနေများကြောင့် USDP ပါတီဥက္ကဋ္ဌ တာဝန်ကို လွှဲပေးလိုက်ခြင်းဟု ယူဆ ကြောင်း နိုင်ငံရေးလေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

ဦးခင်ရီနဲ့ ဦးသန်းဋ္ဌေးကိုတွေ့ရစဉ် 

၎င်းက “သူတို့ ကြေညာထားတာတော့ ကျန်းမာရေးကြောင့်လို့ ပြောတာပဲ။ လာမယ့် မကြာခင် အောက်တိုဘာလ ထဲလား မသိဘူး။ သူတို့ ပါတီညီလာခံ လုပ်ဖို့ရှိတယ်လေ၊ အဲဒီတော့ ပါတီညီလာခံမှာကြတော့ ခေါင်းဆောင် အသစ်တွေ ပြန်ရွေးရမှာ အဲဒီတော့ ဒီကြားထဲမှာ အဲဒီပါတီညီလာခံ ကျင်းပဖို့ ပြင်ဆင်တာ၊ ဒီခေါင်းဆောင်သစ် ရွေးချယ်မှုအတွက် ပြင်ဆင်တာတွေ လုပ်ဖို့အတွက် နောက် သူ့နဂိုကလည်း ကျန်းမာရေး ခါးခွဲထားရတယ်လို့ ကြားတယ်၊ အဲဒါတွေကြောင့် တာဝန်လွှဲပေးလိုက်တာလို့ အဲဒီလို ယူဆတာပဲ” ဟု ပြောသည်။

ဦးခင်ရီသည် နစက၏ ပြည်ထောင်စုဝန်ကြီးအဖြစ် တာဝန် ယူခဲ့ပြီးနောက် ၂၀၂၂ ခုနှစ်၊ သြဂုတ်လမှာ တာဝန်က အနားယူပြီး ပါတီလုပ်ငန်းတာဝန်များကို ပြန်လည်ရယူခဲ့ခြင်း ဖြစ်သည်။

တချို့ကတော့ ဦးခင်ရီသည် နစက ကျင်းပပေးမည့် ရွေးကောက်ပွဲတွင် USDP အနိုင်ရပါက အစိုးရဖွဲ့စည်းသည့် အခါ သမ္မတ သို့မဟုတ် ဒုသမ္မတအဖြစ် မြင်တွေ့လာရနိုင်ကြောင်း နိုင်ငံရေးသုံးသပ်သူများကြား ထင်ကြေးပေး နေကြသည်။

လက်ရှိ ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP)တွင် ဗဟိုအလုပ်အမှုဆောင် ကော်မတီဝင် ၄၂ ဦး၊ ဗဟိုကော်မတီ ဝင် ၂၇၅ ဦးနှင့် အရံ ဗဟိုကော်မတီဝင် ၇၅ ဦးရှိကြောင်း သိရသည်။

CNI News

၂၀၂၂ ခုနှစ်၊ စက်တင်ဘာ ၂၂

ရခိုင်ပြည်နယ် မြောက်ပိုင်းဒေသများတွင် တပ်မတော်နှင့် ရက္ခိုင့်တပ်တော် ULA/AA တို့အကြား တိုက်ပွဲ ဖြစ်ပွားခြင်းနှင့် စစ်ရေးတင်းမာမှုတို့ကြောင့် ကန့်သတ်ပိတ်ပင်မှု အများအပြားရှိလာသဖြင့် ဒေသခံများမှာ စားဝတ်နေရေးအပါအဝင် ဘက်ပေါင်းစုံ၌ ဒုက္ခကြုံတွေ့နေကြရသည်ဟု ရခိုင်ပြည်သူများထံမှ သိရသည်။

ယခုကဲ့သို့ ကန့်သတ်ပိတ်ပင်ခြင်းများ လုပ်ဆောင်ခြင်းသည် ပြည်သူများ အဆင်ပြေပါက AA အဆင်ပြေသည်ဟု မှတ်ယူပြီး ဒေသခံပြည်သူများအား ပိတ်ပင်ခြင်းဖြစ်သည်ဟု ရခိုင်ပြည်နယ် မြောက်ဦးမြို့ဒေသခံ ကိုဇော်ထွန်းက CNI သတင်းဌာနသို့ ပြောသည်။

“မြောက်ဦးမြို့ကတော့ နေရာပေါင်းစုံမှာ သူတို့အစစ်အဆေးတွေ လုပ်တယ်။ ကားရော၊ ဆိုင်ကယ်ရော၊ လူရော။ စီးပွားရေးကအစ နေထိုင်ရေးကအစ သိပ်ဒုက္ခရောက်တယ် ဒီတလောတော့။ ပြေလည်ဖို့ဆိုတာ သိပ်မရှိတော့ဘူး ကြည့်ရတာလေ။ သူတို့ကလည်း နောက်ဆုတ်မယ့် အခြေအနေမျိုး မရှိဘူး။ သူတို့အချင်းချင်း မလုပ်နိုင်တဲ့အခါ ကျတော့ ဒေါက်တိုင်တွေကို သူတို့ဖြုတ်ချချင်တဲ့ သဘောပေါ့။ ဒီပြည်သူတွေ အဆင်ပြေလို့ AA အဆင်ပြေတယ် ပေါ့လေ။ အဲဒီသဘောနဲ့ ဗျူဟာတစ်ခုနဲ့ အဲဒီလိုဒုက္ခပေးတဲ့ပုံစံမျိုးလို့ ကျနော်နားလည်တယ်။ ပြည်သူကတော့ ဆုံးရှုံးစရာမရှိတဲ့အချိန်ကို ရောက်လာပြီ။ ဘာလို့လဲဆိုရင် ကိုယ့်အလုပ် ကိုယ်မလုပ်နိုင်၊ ကိုယ့်စီးပွား ကိုယ်မလုပ် နိုင်၊ ကိုယ့်အိမ်မှာကိုယ် ပျော်ပျော်ရွှင်ရွှင်နဲ့ မိသားစုနဲ့ မနေနိုင်။ ဒါမျိုးက နေ့စဉ်ရက်ဆက်ဆိုသလို ဖြစ်လာတာကို။ ပြည်သူတွေ အခက်အခဲက လမ်းပန်းဆက်သွယ်ရေးကို သူတို့ စစ်ဆေးတာတွေကို ဘာမှမဆိုင်တဲ့နေရာတွေမှာ ဥပမာ မြို့ပေါ် ရပ်ကွက်တွေမှာ သူတို့လုပ်ချင်တိုင်းလုပ်နေတဲ့ ကိစ္စမျိုးတွေကို သူတို့ရပ်တန့်ဖို့လိုတယ်။ ပြီးရင် ကုန်သွယ်ရေးလမ်းကြောင်းတွေကိုလည်း သူတို့ ပြန်ဖွင့်ပေးဖို့လိုမယ်”ဟု ၎င်းက ပြောသည်။

ထို့အပြင် INGO/NGO အဖွဲ့အစည်းများအား ရခိုင်ပြည်နယ်မြောက်ပိုင်းမှ ၆ မြို့နယ်သို့ ကူညီထောက်ပံ့ခြင်းနှင့် ခရီးသွားလာခြင်းကို ကန့်သတ်ထားသည့်အတွက် စားနပ်ရိက္ခာအခက်အခဲများ ကြုံတွေ့နေရကြောင်း ဝံလက် ဖောင်ဒေးရှင်းမှ ဒါရိုက်တာ ဦးခိုင်ကောင်းစံ က CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ လက်ရှိတိုက်ပွဲရှောင်များ၏အခြေအနေ(ဓါတ်ပုံ-သဘာဝနဒီဆရာတော်)

“ဒီလကုန်ရင်တော့ ဘယ်လိုဖြစ်မယ်ဆိုတာတော့ မသိသေးဘူး။ ပြီးခဲ့တဲ့လက ရရှိထားတဲ့ ရိက္ခာတွေ၊ ထောက်ပံ့ ထားတာတွေနဲ့ပဲ အခုလောလောဆယ် စားသောက်နေကြရတာပေါ့။ ပြည်တွင်း အရပ်ဖက် အဖွဲ့အစည်းတွေ ကလည်း မလှူဒါန်းနိုင်ဘူးပေါ့ တကယ်တမ်းပြောရရင်။ အခိုက်အတန့်အားဖြင့်သာ မြို့ပေါ်ရောက်လာတဲ့ IDP တွေလောက်ပဲ လှူဒါန်းနိုင်ကြတာပေါ့။ လှူဒါန်းတယ်ဆိုတာကလည်း အလှူခံလို့ရတဲ့အခါမှပေါ့။ ဒေသမှာ အလှူခံဖို့ဆိုတာကလည်း အခက်အခဲရှိတယ်။ နောက် အရင်တုန်းကတော့ တချို့အဖွဲ့အစည်းတွေ မြို့ပေါ်မှာ အလှူခံတာရှိတယ်။ အဲဒါကတော့ ဟန့်တားတာတွေလည်း ရှိတာပေါ့။ ပြည်ပရောက်နေတဲ့ တိုင်းရင်းသားတွေရဲ့ လှူဒါန်းမှုဆိုတာကလည်း အရင်က ရခိုင်တစ်ခုတည်းဖြစ်တဲ့အခါကျတော့ အကုန်ဝိုင်းပြီးလှူကြတာပေါ့။ အခုကျတော့ နေရာတိုင်းလိုလို ဖြစ်နေတဲ့အခါကျတော့ ပြည်ပကအလှူရှင်တွေရဲ့ အလှူငွေကလည်း ရေရှည် ရပ်တည်လို့ရတဲ့ဟာမဟုတ်ဘူး။ နိုင်ငံတကာ လူသားချင်းစာနာတဲ့အဖွဲ့အစည်းတွေ၊ အရပ်ဖက်အဖွဲ့အစည်းတွေက စနစ်တကျလုပ်ဆောင်တဲ့ နိုင်ငံတကာအဖွဲ့အစည်းတွေနဲ့ ပူးပေါင်းလုပ်ဆောင်မှသာ အဆင်ပြေမယ့်သဘောမှာ ရှိနေတာပေါ့” ဟု ၎င်းက ပြောသည်။

တိုက်ပွဲရှောင်စခန်းများတွင် ဆေးဝါး၊ အဝတ်အထည်စသည်တို့ကအစ ပြတ်လပ်နေသည့်အတွက် လူသားချင်း စာနာထောက်ပံ့မှု အကူအညီတွေ အရေးပေါ်လိုအပ်နေသည့်အတွက်ကြောင့် INGO/NGO အဖွဲ့အစည်းတွေ၊ အရပ်ဖက် လူမှုအဖွဲ့အစည်းများအနေဖြင့် အဖွဲ့လိုက်ဖြစ်စေ၊ လူပုဂ္ဂိုလ်လိုက်ဖြစ်စေ လာရောက်လှူဒါန်းပေးရန် အထူးအလေးထားတိုက်တွန်းလိုကြောင်း AA ပြောရေးဆိုခွင့်ရှိသူ ဦးခိုင်သုခက စက်တင်ဘာ ၁၉ ရက်နေ့က ပြုလုပ်သည့် သတင်းစာရှင်းလင်းပွဲတွင် ပြောကြားခဲ့သည်။

လက်ရှိတွင် ရခိုင်ပြည်နယ်အတွင်း ကန့်သတ်ပိတ်ပင်ထားမှုများကြောင့် ဒေသတွင်း၌ ကုန်ဈေးနှုန်းများ မြင့်တက် လျက်ရှိပြီး ယခင်ကထက် နှစ်ဆခန့်မြင့်တက်နေကြောင်း ရခိုင်ပြည်သူများက CNI သတင်းဌာနသို့ ပြောသည်။

ရခိုင်ပြည်နယ်အတွင်းရှိ လက်ရှိတိုက်ပွဲရှောင်များ၏အခြေအနေ(ဓါတ်ပုံ-သဘာဝနဒီဆရာတော်)

မောင်တောဒေသခံ ကိုမောင်မောင်ထွန်းက “ကျနော်တို့ မောင်တောမြောက်ပိုင်း၊ တောင်ပိုင်းပြည်သူတွေ ဘယ်မှ သွားလို့မရဘူး။ စားနပ်ရိက္ခာပိုင်းဆိုင်ရာလည်း တော်တော်လေး အခက်အခဲဖြစ်နေတာပေါ့။ ကျနော်တို့ ဒီနေ့နဲ့ ဆိုရင် တစ်လကျော်လောက်ဖြစ်သွားပြီ။ စကစက လမ်းတွေပိတ်ထားတာလေ။ ဆန်တို့ ဆီတို့ စားကုန်တွေ ဘာမှမသယ်ရဘူး။ စစ်ဖြစ်တဲ့နေရာဆိုရင် စစ်ဖြစ်တဲ့နေရာက စစ်ဘေးရှောင်တွေလည်း ဘယ်မှသွားလို့မရဘူး။ အခုဖြေရှင်းနေရတာက ဟိုဘက် ဒီဘက် မရှိတဲ့လူက ရှိတဲ့လူဆီကနေ တောင်းစား ဒီလိုမျိုးဖြစ်နေတာပေါ့။ ဒီကုန်ဈေးနှုန်းအနေအထားမှာဆိုရင်လည်း တော်တော်လေး ဈေးတက်နေတာပေါ့။ အခုရှိတဲ့လူလည်း ပိုက်ဆံ ပေးပြီးတော့ ဝယ်လို့မရတဲ့ဟာတွေ အများကြီးပေါ့။ ကူညီကယ်ဆယ်ရေးတွေကျတော့လည်း ဘယ်မှ မသွားရဘူး အဲဒီလိုဖြစ်နေတာပေါ့။ကျနော်တို့ ပြည်သူလူထုတွေ လမ်းတွေသွားလာရေး၊ စားဝတ်နေရေး အခက်အခဲကြောင့်နဲ့ ဆန်တို့ ဆီတို့ တင်သွင်းရချင်တာပေါ့နော်။ ဒီလိုဖြစ်နေတာကတစ်ပိုင်း။ ကျနော်တို့ ပြည်သူလူထုက အခု ဒီလိုမျိုး နှိပ်စက်ရာကျနေတာပေါ့” ဟု ပြောသည်။

လက်ရှိတွင် ရခိုင်ပြည်နယ်အတွင်းရှိ မောင်တော၊ ဘူးသီးတောင်၊ ရသေ့တောင်၊ ကျောက်တော်၊ မြောက်ဦးနှင့် ချင်းပြည်နယ် ပလက်ဝမြို့နယ်တို့၌ တပ်မတော်နှင့် AA အကြား နှစ်ဖက်တိုက်ပွဲဖြစ်ပွားမှုများရှိနေကြောင်း ရခိုင်ပြည်နယ်အခြေစိုက်သတင်းဌာနများ၏ ရေးသားဖော်ပြချက်များအရ သိရသည်။

၎င်းတိုက်ပွဲများကြောင့် နေရပ်စွန့်ခွာကာ ဘေးလွတ်ရာသို့ ထွက်ပြေးတိမ်းရှောင်လာကြသည့် တိုက်ပွဲရှောင် ဦးရေ မှာလည်း ပိုမိုများပြားလာကာ လက်ရှိအချိန်ထိ တိုက်ပွဲရှောင် တစ်သောင်းကျော်ခန့် ရှိလာကြောင်း အရပ်ဖက် အဖွဲ့အစည်းများ၏ စာရင်းများအရ သိရသည်။

ဒေသခံများ ထွက်ပြေးတိမ်းရှောင်ကြရာတွင် ယခင်ရှိနေသည့် တိုက်ပွဲရှောင်စခန်းများသို့ ထွက်ပြေးတိမ်းရှောင်သူ များ ရှိသကဲ့သို့ အနီးရှိ ဘုန်းကြီးကျောင်းများ၊ စာသင်ကျောင်းများသို့ ထွက်ပြေးတိမ်းရှောင်သူများလည်းရှိကြောင်း အရပ်ဖက်အဖွဲ့အစည်းများထံက သိရသည်။

CNI International News

မော်စကို စက်တင်ဘာ ၂၂

ရုရှားပိုင်နက်ကို ကာကွယ်ရန်အတွက် နျူကလီးယားလက်နက်များ ထုတ်သုံးရန် တွန့်ဆုတ်နေမည် မဟုတ်ကြောင်း ရုရှားသမ္မတ ဗလာဒီမာပူတင်က ပြင်းထန်စွာ သတိပေးလိုက်ကြောင်း အေပီသတင်းတစ်ပုဒ်တွင် တွေ့ရသည်။

ယခုရက်ပိုင်းများအတွင်း ရုရှားထိန်းချုပ်ထားသည့် ယူကရိန်းနယ်မြေအချို့၌ လူထုဆန္ဒခံယူပွဲများ အဆောတလျင် ကျင်းပရန် စီစဉ်ခဲ့ပြီးနောက် ယူကရိန်းအပေါ် မော်စကိုက ယခုကဲ့သို့ နောက်ထပ် သတိပေး ခြိမ်းခြောက်လိုက် ခြင်းလည်း ဖြစ်သည်။

အနောက်နိုင်ငံများအနေဖြင့် ထိုကဲ့သို့ ပူတင်၏ လေသံမျိုးကို ယခင်က ကြားခဲ့ဖူးသော်လည်း ယခု အခြေအနေများ က သိသိသာသာ ကွဲပြားခြားနားနေပြီ ဖြစ်သည်။

ပူတင်ကို ရုရှားနိုင်ငံသားတချို့ ကန့်ကွက် (Reuters)

စက်တင်ဘာ ၂၃ ရက် (မနက်ဖြန်) စတင်ရန် စီစဉ်ထားသော ယူကရိန်းထံမှ ရုရှားသိမ်းပိုက်ထားသည့် နယ်မြေများ အလိုက် လူထုဆန္ဒခံယူပွဲများကို ကရင်မလင် သမ္မတနန်းတော်က ကြိုးကိုင်ရန် အသင့်ပြင်ဆင်ထားသည်။

ထိုလူထုဆန္ဒခံယူပွဲများ ကျင်းပစေခြင်းဖြင့် ဒေသခံပြည်သူလူထုက ရုရှားနိုင်ငံ၏ အစိတ်အပိုင်းဖြစ်လိုခြင်း ရှိ/မရှိ ဆန္ဒထုတ်ဖော်၍ မဲထည့်ကြရမည်ဖြစ်သည်။ ဆိုလိုသည့် သဘောမှာ ထောက်ခံမဲ အများစုသည် ရုရှားအလိုလိုက် အကြိုက်ဆောင် စေရမည်ဖြစ်ပြီး နောက်ထပ် ရက်သတ္တပတ်များတွင် ထိုနယ်မြေများကို ရုရှားက အပြီးအပိုင် ချုပ်ကိုင်ရန် ဟန်ပြင်နေသည်။

သို့ဖြစ်၍ ယူကရိန်းနယ်မြေ အစိတ်အပိုင်းများကို စည်းရုံးသိမ်းသွင်းရန် ကြေညာခြင်းဖြင့် ပူတင်သည် ရသမျှ နည်းလမ်းကို အသုံးချသွားမည်ဟု အတိအလင်း ပြောကြားထားသည်။ ယင်းနည်းလမ်းများတွင် အားလုံး တုန်လှုပ် ခြောက်ခြားစေမည့် နျူကလီယားလက်နက်ကို ယခုအခါ နောက်ထပ်တဖန် ရည်ညွှန်းပြောကြားလာခဲ့သည်။

ဒွန်နက်စ်နဲ့လူ့ဟန်စ်ဒေသက ရုရှားလိုလာသူများကိုတွေ့ရစဉ် 

ယခုလ အစောပိုင်း၌ ယူကရိန်း၏ တန်ပြန်ထိုးစစ် အောင်မြင်ပြီးနောက် လက်ရှိအနေအထားကို လက်ခံနိုင်ရန် နောက်ဆုံး ထွက်ပေါက်အဖြစ် နျူကလီးယား ခြိမ်းခြောက်မှုအသစ်ကို ပူတင်လုပ်ဆောင်လာကြောင်း လေ့လာ သုံးသပ်သူများက ရှုမြင်နေကြသည်။

လူထုဆန္ဒခံယူပွဲကို အလျင်စလို ပူတင် အကောင်အထည်ဖော်စေခြင်းသည် ကရင်မလင်သမ္မတနန်းတော်၏ ဆုံးဖြတ်ချက်ကို လိုက်နာစေဖို့ အကြောင်းပြချက်တစ်ခု ရှာကြံခြင်းဖြစ်ကြောင်း လွတ်လပ်သော နိုင်ငံရေးလေ့လာ သုံးသပ်သူ တာတီယာနာစတန်နိုဗာယာ (Tatiana Stanovaya) က ပြောကြားခဲ့သည်။

Source: AP

CNI News

၂၀၂၂ ခုနှစ်၊ စက်တင်ဘာ ၂၂

စစ်ကိုင်းတိုင်းဒေသကြီးနှင့် ကချင်ပြည်နယ်အတွင်းရှိ ရှမ်းနီဒေသများရှိ ရှမ်းနီလူမျိုးများသည် ကချင်လွတ်လပ် ရေးတပ်မတော်(KIO/KIA)၏ လူမျိုးသုဉ်းသတ်ဖြတ်မည့် ကြိုးပမ်းဆောင်ရွက်နေမှုများဖြင့် ရင်ဆိုင်နေရခြင်း ကြောင့် ပြည်တွင်း/ပြည်ပက လူ့အခွင့်အရေးအဖွဲ့အစည်းများက တားဆီးပေးရန် ရှမ်းနီအမျိုးသားများတပ်မ တော် (SNA)က စက်တင်ဘာ ၂၁ ရက်နေ့စွဲဖြင့် ထုတ်ပြန်ထားသည်။

SNA ထုတ်ပြန်ချက် 

SNA ထုတ်ပြန်ချက်

SNA ထုတ်ပြန်ချက်

CNI News

၂၀၂၂ ခုနှစ်၊ စက်တင်ဘာ ၂၁

ရှမ်းပြည်နယ်တောင်ပိုင်း၊ မိုင်းနောင်၊ မိုင်းရဲအုပ်စု နမ့်တောင်းတံတားအနီးတွင် ရှမ်းပြည်တိုးတက်ရေးပါတီ(SSP P/SSA)နှင့် ရှမ်းပြည်ပြန်လည်ထူထောင်ရေးကောင်စီ(RCSS/SSA)တို့ ယနေ့ (စက်တင်ဘာ ၂၁ ရက်)တွင် တိုက်ပွဲ ဖြစ်ပွားခဲ့ကြသည်။

RCSS သည် လဲချား- မိုင်းနောင် ကားလမ်း၏ အရှေ့ဘက်တွင် လှုပ်ရှားနေပြီး SSPP ကမူ ကားလမ်း၏ အနောက်ဘက်၌ လှုပ်ရှားလျက်ရှိသည်။

SSPP က “ စက်တင်ဘာ ၂၁ ရက်နေ့ နံနက် အစောပိုင်းအချိန်မှာ လဲချား- မိုင်းနောင် ကားလမ်းရဲ့ အရှေ့ဘက် မှာ လှုပ်ရှားနေတဲ့ RCSS တပ်ဖွဲ့သည် SSPP/SSA လှုပ်ရှားနေတဲ့ ကားလမ်းရဲ့ အနောက်ဘက်ထဲထိကို အင်အား ၂၀ ဝန်းကျင်လောက်နဲ့ ဝင်ရောက်လာပြီး RCSS ဘက်က စတင်ပစ်ခတ်လို့ နံနက် ၇ နာရီ ၃၀ မိနစ်က နေ ၇ နာရီ ၄၈ မိနစ်အထိ မိုင်းနောင် မိုင်းရဲအုပ်စု နမ့်တောင်းတံတားအနီးမှာ နှစ်ဖက် ထိတွေ့တိုက်ပွဲဖြစ်ပွားခဲ့ သည်”ဟု ထုတ်ပြန်ခဲ့သည်။

SSPP ဒုဥက္ကဋ္ဌ(၁) စဝ်ခေးတိုင်းနှင့် ဗိုလ်ချုပ်မှူးကြီးမင်းအောင်လှိုင်

ထို့နောက် RCSS သည် မိုင်းနောင်-လဲချား ကားလမ်း၏ အရှေ့ဘက်သို့ ပြန်ဆုတ်သွား၍ တိုက်ပွဲပြန်ငြိမ်သွား ကြောင်း၊ တိုက်ပွဲအတွင်း နှစ်ဖက် ထိခိုက် သေဆုံးမှုမရှိကြောင်း SSPP က ထုတ်ပြန်ခဲ့သည်။

SSPP သည် ရှမ်းပြည်နယ်မြောက်ပိုင်း၊ မိုးမိတ်မြို့နယ်အတွင်းမှာ စက်တင်ဘာ ၁၇ ရက်နှင့် ၂၀ ရက်နေ့များက မြန်မာ့တပ်မတော်နှင့် တိုက်ပွဲဖြစ်ပွားခဲ့သေးပြီး ယနေ့အထိ စစ်ရေးတင်းမာလျက်ရှိကြောင်း သိရသည်။

SSPP သည် နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် ၂၀၂၂ ခုနှစ်၊ သြဂုတ် ၄ ရက်နေ့က နေပြည်တော် မှာ တွေ့ဆုံ၍ ငြိမ်းချမ်းရေးလုပ်ငန်းစဉ်များကို ဆွေးနွေးခဲ့သည်။ ထို့နောက် ဒုတိယအကြိမ်ကို ယခုလထဲမှာ တွေ့ ဆုံ ဆွေးနွေးမည်ဖြစ်သည်။

SSPP သည် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ်(NCA)မထိုးရသေးသည့် ရှမ်းလက် နက်ကိုင် အဖွဲ့ဖြစ်ပြီး RCSS ကမူ NCA ထိုးထားသော ရှမ်းလက်နက်ကိုင်အဖွဲ့ဖြစ်သည်။

CNI International News

နယူးဒေလီ၊ စက်တင်ဘာ ၂၁

အိန္ဒိယနိုင်ငံ၊ မီဇိုရမ်ပြည်နယ်ဝန်ကြီးချုပ် ဇိုရမ်သန်ဂါနှင့် အာသံပြည်နယ်ဝန်ကြီးချုပ် ဟီမန်တာဘီစဝါဆာမာတို့သည် ပြည်နယ်နှစ်ခုကြား နယ်နိမိတ်အငြင်းပွားမှု ဖြေရှင်းရန်အတွက် စက်တင်ဘာ ၂၁ ရက် (ယနေ့) နယူးဒေလီ မြို့တော်၌ တွေ့ဆုံဆွေးနွေးခဲ့ကြကြောင်း ဟိန္ဒူစတန်တိုင်းမ်က ရေးသားဖော်ပြသည်။

အဆိုပါ တွေ့ဆုံမှုကို အစောပိုင်းက စက်တင်ဘာ ၂၆ ရက်နေ့က စီစဉ်ခဲ့သော်လည်း ဘီစဝါဆာမာသည် အာသံ ပြည်နယ်သို့ ပြန်သွားရန် ရှိနေသဖြင့် ယနေ့ တွေ့ဆုံဖို့ အစီအစဉ် ပြောင်းလဲခဲ့ရသည်။

ပြည်နယ်ဝန်ကြီးချုပ် နှစ်ဦးတို့သည် ယမန်နှစ် နိုဝင်ဘာလတွင် နယူးဒေလီသို့ ရောက်ရှိခဲ့ပြီး ပြည်ထဲရေးဝန်ကြီး ဌာန ပြည်ထောင်စုဝန်ကြီး အေမစ်ရှားကို သွားရောက်တွေ့ဆုံ၍ အငြင်းပွားမှုများ ဖြေရှင်းရန်အတွက် သက်ဆိုင်သူ များ ပါဝင်သော အစုအဖွဲ့များ ဖွဲ့စည်းလျက် ဝန်ကြီးချုပ်အဆင့် ဆွေးနွေးသွားရန် သဘောတူလက်ခံခဲ့ကြသည်။

 အာသံနဲ့မီဇိုရမ် ပြည်နယ်ဝန်ကြီးချုပ်နှစ်ဦး ဆွေးနွေးနေစဉ်

လာမည့်လ၌ ဂူဝါဟတီမြို့တွင် ကျင်းပရန်ရှိသည့် ပြည်နယ်နှစ်ခုကြား ဝန်ကြီးအဆင့် ဆွေးနွေးပွဲကို အဆုံးမသတ် သေးကြောင်း မီဇိုရမ်ပြည်နယ်အစိုးရ ပြည်ထဲရေးဌာန တာဝန်ရှိသူတစ်ဦးက ပြောကြားခဲ့သည်။

ကျန်းမာရေး အခြေအနေအရ ခေတ္တအနားယူထားသော မီဇိုရမ်ပြည်ထဲရေးဝန်ကြီး လဲချမ်လီယာနာ တာဝန် ပြန်လည် ထမ်းဆောင်သည့်အခါ အဆိုပါဆွေးနွေးပွဲ ဆက်လက်ပြုလုပ်မည်ဟု ၎င်းက ဆက်လက် ပြောကြားခဲ့ သည်။

လဲချမ်လီယာနာနှင့် အာသံဝန်ကြီး အက်တူဘိုရာတို့သည် အငြင်းပွားမှုများ ဖြေရှင်းရန်အတွက် ယမန်နှစ် ဩဂုတ် လ၌ ပထမအကြိမ် တွေ့ဆုံခဲ့ကြပြီးနောက် တစ်နှစ်အကြာ ၂၀၂၁ ခုနှစ်၊ ဩဂုတ်လ ၉ ရက်၌ အိုင်ဇောလ်မြို့တွင် ထပ်မံတွေ့ဆုံခဲ့ကြသည်။

ပြည်နယ်နှစ်ခု နယ်နိမိတ်မျဉ်းတလျှောက် ငြိမ်းချမ်းရေး ထိန်းသိမ်းရန် သဘောတူခဲ့ကြပြီး လာမည့် အောက်တိုဘာလတွင် ဂူဝါဟတီမြို့တွင် ထပ်မံတွေ့ဆုံကြရန် ရှိသည်။

ထို့အပြင် အွန်လိုင်းအစည်းအဝေး ၃ ကြိမ် ခေါ်ယူ၍လည်း နှစ်ဘက်စလုံးက စေ့စပ်ညှိနှိုင်းခဲ့ကြပြီးဖြစ်သည်။

Source: The Hindustan Times

CNI News

၂၀၂၂ ခုနှစ်၊ စက်တင်ဘာ ၂၁

ရှမ်းပြည်နယ်တောင်ပိုင်းရှိ ကယား(ကရင်နီ)ပြည်နယ်အစပ်က မိုးဗြဲမြို့အတွင်းမှာ ကရင်နီလက်နက်ကိုင်အဖွဲ့များ နှင့် မြန်မာ့တပ်မတော်ကြား တိုက်ပွဲများ ပြင်းထန်စွာဖြစ်ပွားခဲ့ရာ မိုးဗြဲမြို့အတွင်း၌ ဒေသခံ ၅၀၀ နီးပါး ပိတ်မိနေ၍ ကျန်ရှိနေကြောင်း ကရင်နီလူ့အခွင့်အရေးအဖွဲ့မှ ကိုဗညားက CNI သတင်းဌာနသို့ ပြောသည်။

ပြီးခဲ့သည့် စက်တင်ဘာ ၈ ရက်နေ့က စတင်ကာ တပ်မတော်နှင့် ကရင်နီအမျိုးသား ကာကွယ်ရေးတပ်ဖွဲ့ (KNDF)၊ ကရင်နီတပ်မတော်(KA) အပါအဝင် ကယားပြည်နယ်အတွင်းက PDF ပူးပေါင်းတပ်ဖွဲ့ကြား တိုက်ပွဲဖြစ်ပွားခဲ့ကြသည်။

ထို့နောက် မြို့နေလူထုများ နီးစပ်ရာ ဆွေမျိုး အသိုင်းအဝိုင်းများထံသို့ လည်းကောင်း၊ လွိုင်ကော်မြို့ပေါ်သို့ လည်းကောင်း တိမ်းရှောင်ခဲ့ကြသည်။

ကိုဗညားက “ကျ‌‌နော်တို့ တွက်ထားတာလေ၊ အနည်းဆုံး လူထု အပါအဝင် အားလုံးကျန်မယ်ဆိုရင်တော့ ၄၊ ၅ ရာတော့ ကျန်နိုင်ပါသေးတယ်၊ ဘာဖြစ်လို့လဲဆိုတော့ တိုက်ပွဲ ဒီလ ၈ ရက်နေ့ကတည်းကနေ စတဲ့ဟာက ပထမ ပိုင်းက လူတော်တော်လေး စွန့်ခွာခဲ့ရတာကိုနော်၊ ပြီးတော့ ဒုတိယအကြိမ်က ၁၂ နေ့မှာ သူတို့ နားလိုက်တယ်၊ ပြီးတော့မှ ၁၅ ဝန်းကျင်မှာ ပြန်ထိုးလာတယ်ပေါ့နော်၊ ၁၅ ဝန်းကျင်မှာ ပြန်ထိုးတဲ့ အချိန်မှာလည်း တစ်ဖက် တော်လှန်ရေး အင်အားစုတွေက သက်ဆိုင်ရာ လူတွေကို ရွှေ့ခိုင်းဖို့အတွက်ပေါ့နော်၊ ရွာသားတွေ ရွှေ့ခိုင်းဖို့ အတွက် ပြောပါတယ်၊ အစကတည်းက သူတို့ ရွှေ့ထားတာရှိပါတယ်၊ မရှိဘူးဆိုရင်‌တောင် သေချာတာ တစ်ခု ကတော့ ၄၊ ၅ ရာကတော့ မြို့တချို့ရပ်ကွက်မှာ ကျန်နေတာရှိပါတယ်” ဟု ပြောသည်။

မိုးဗြဲတိုက်ပွဲရှောင်များ (ကရင်နီပြည်စစ်ဘေးရှောင်ကူညီစောင့်ရှောက်ရေးကွန်ရက်)

အဆိုပါ တိုက်ပွဲကြောင့် အရပ်သား ထိခိုက်သေဆုံးမှုရှိခဲ့ပြီး မိုးဗြဲမြို့နယ်မှ ဒေသခံ လေးထောင်(၄၀၀၀) ကျော်မှာ ဘေးလွတ်ရာသို့ ထွက်ပြေးတိမ်းရှောင် နေရကြောင်း သိရသည်။

လက်ရှိတွင် လွိုင်ကော်မြို့သို့ ရောက်ရှိလာသော မိုးဗြဲတိုက်ပွဲရှောင်များမှာ ၎င်းတို့၏ နီးစပ်ရာ ဆွေမျိုးများ၊ ဘုန်းတော်ကြီးကျောင်းများတွင် ခိုလှုံနေကြကြောင်း ရွှေလွိုင်ကော် (ကယား) ပရဟိတအသင်း နာယက (၁) ဦးသန်းစိုးက CNI သတင်းဌာနသို့ ပြောသည်။

၎င်းက “တချို့လည်း လွိုင်ကော်ပြောင်း၊ တချို့လည်း ဖယ်ခုံဖက် ပြောင်းပေါ့၊ အဲဒီလို သွားကြတာပေါ့၊ အဲဒီလို ပြောင်းသွားတာရှိတာပေါ့၊ မြို့ထဲမှာတော့ မနေလောက်တော့ဘူး၊ နေလို့ ပိုပြီးတော့ မလုံခြုံလို့ပေါ့၊ တချို့လည်း မိုးဗြဲ၊ တချို့လည်း ဖယ်ခုံ၊ တချို့လည်း လွိုင်ကော်ဖက် ပြောင်းကြတာပေါ့၊ နီးစပ်ရာ၊ နီးစပ်ရာပေါ့လေ၊ သွားကြတာ ပေါ့၊ သူတို့ အမျိုးတွေ၊ ဘာတွေ ရှိတဲ့နေရာ၊ သူတို့ တချို့တွေက လာခေါ်ပေးပါဆိုလို့ရှိရင်လည်း သွားခေါ်ပေးတာ ပေါ့၊ ဘယ်မှာ ရှိနေတယ် သူတို့လာခေါ်ပေးပါဆို သွားခေါ်ပေးတာပေါ့၊ သွားခေါ်ပြီးတော့ သူတို့ လိုချင်တဲ့ နေရာပို့ ပေးတာပေါ့၊ အဲဒီလောက်ကတော့ ရှိပါတယ်” ဟု ပြောသည်။

မိုးဗြဲတိုက်ပွဲရှောင်များ (ကရင်နီပြည်စစ်ဘေးရှောင်ကူညီစောင့်ရှောက်ရေးကွန်ရက်)

မိုးဗြဲမြို့အတွင်း ဖြစ်ပွားသည့် တိုက်ပွဲကြောင်း လူနေအိမ် ၁၀၀ ကျော် ပျက်စီးဆုံးရှုံးခဲ့သလို လက်နက်ကြီး ကျရောက်ပေါက်ကွဲမှုကြောင့် အမျိုးသားနှစ်ဦး၊ ကလေးငယ် ၃ ဦး ထိခိုက်သေဆုံးခဲ့သည်။

ကိုဗညားက “တချိန်တည်းမှာပဲ လူထုတွေအပေါ်မှာ သတ်ဖြတ်မှုတွေလည်း အစိုးရတစ်ရပ်အနေနဲ့ပဲ ပြောပြော စစ်တပ်အနေနဲ့ ရက်ရက်စက်စက် သတ်ဖြတ်တာကတော့ ကမ္ဘာမှာ ကိုယ့်လူထုကို သတ်တာ အများဆုံး စစ်အစိုးရ တစ်ရပ်လို့တောင်မှ ပြောလို့ရတဲ့ အခြေအနေ ရှိလာပါတယ်၊ အဲဒီကိစ္စနဲ့ ပတ်သက်လို့ ကျနော်တို့ကတော့ မျှော်လင့်တာက တချိန်ကြရင်တော့ ဒီကျူးလွန်မှု အားလုံးကို ဒီစစ်ကောင်စီကနေ ပြန်ပြီးတော့မှ ဥပဒေကြောင်း အရ တာဝန်ယူမှု၊ တာဝန်ခံမှု အပြည့်နဲ့ ဖြစ်ကိုဖြစ်ရမယ် အဲဒီအတွက်လည်း အားလုံးကြိုးစားနေကြတာတော့ ရှိပါတယ်” ဟု ပြောသည်။

၂၀၂၁ ခုနှစ်၊ ဖေဖော်ဝါရီ ၁ ရက်တွင် မြန်မာ့တပ်မတော်က အာဏာယူပြီးနောက်ပိုင်း ကယား (ကရင်နီ) ပြည်နယ် တွင် မြန်မာ့တပ်မတော်နှင့် ကရင်နီအမျိုးသားများ ကာကွယ်ရေးတပ် (KNDF)၊ ကရင်နီ တပ်မတော် (KA)၊ မိုးဗြဲ (PDF)၊ ဖယ်ခုံ(PDF)၊ ကရင်နီ တော်လှန်ရေး တပ်ပေါင်းစု (KRU) တို့ကြား တိုက်ပွဲများ ဖြစ်ပွားခဲ့သည်။

အဆိုပါ တိုက်ပွဲများကြောင့် ကယား(ကရင်နီ)ပြည်နယ်တွင် တိုက်ပွဲရှောင် လူဦးရေ ၁၆၃,၆၀၀(သုံးသိန်းကျော်) ရှိပြီး နေအိမ် ပျက်စီးမီးလောင်မှု ၄၃၆ လုံးထက်မနည်း ရှိနေကြောင်း ISP – Myanmar ၏ နောက်ဆုံး ထုတ်ပြန် ချက်အရ သိရသည်။

CNI News

၂၀၂၂ စက်တင်ဘာ ၂၁

ကရင်ပြည်နယ်၊ ကော့ကရိတ်မြို့နယ်အတွင်းရှိ တပ်မတော်၏ ခြေကုတ်စခန်းဖြစ်သည့် ကြိတ်စခန်းကို ကရင်အမျိုးသား လွတ်မြောက်ရေး တပ်မတော် (KNLA)နှင့် ပူးပေါင်းတပ်ဖွဲ့တို့ တိုက်ခိုက် သိမ်းပိုက်နိုင်ခဲ့ကြောင်း ယနေ့ (စက်တင်ဘာ ၂၁ ရက်)တွင် ထုတ်ပြန်ခဲ့သည်။

စက်တင်ဘာ ၂၀ ရက်နေ့ မွန်းလွဲ ၂ နာရီခန့်က စတင်တိုက်ခိုက်ခဲ့ပြီး နာရီဝက်အတွင်း ခမရ- ၅၅၇ စခန်း ကြိတ်စခန်း တစ်ခုလုံးကို သိမ်းပိုက်နိုင်ခဲ့ကြောင်း၊ ၎င်းတိုက်ပွဲတွင် တပ်မတော်ဘက်မှ ၇ ဦး ကျဆုံးပြီး ၂ ဦး ဒဏ်ရာနှင့် ဖမ်းဆီးရမိခဲ့ကြောင်း ထုတ်ပြန်ခဲ့သည်။

ကြိတ်စခန်း သိမ်းပိုက်ပြီးနောက် သိမ်းဆည်းရမိခဲ့သော လက်နက်များနဲ့အတူ KNLA နှင့်ပူးပေါင်းအဖွဲ့ကိုတွေ့ရစဉ် (KNU)

အဆိုပါ တိုက်ပွဲအတွင်း MA ကျည်ဘောက်- 17၊ 9MM-44၊ 16 ကျည်ဘောက်- 4၊ sinper ကျဥ်ဘောက်-3၊ 60MM-12၊ 73MM-11၊ အီနာဂါ-1၊ 40MM-10၊ BA109 လက်ပစ်ဗုံး- 2၊ 73ယမ်းတောင့် -5၊ စက်လက်ကျည်-229၊ AK ကျည် ဘောက်ဝိုင်း- 1၊ စကားပြောစက်- 2၊ ဖုန်း-3၊ ကပစ 5.56- 2223၊ စိန်ပြောင်းချိန်သီး- 1၊ MA5 ကျည်- 2 တို့ သိမ်း ဆည်းခဲ့သလို RPG- 2၊ BA 100 စိန်ပြောင်း-1၊ ငါးကြင်းမြီး စက်လက်- 1၊ ပြောင်းပို-1၊ AK-1၊ MAS sinper- 1၊ MA4.MAK ပူးတွဲ-1၊ MA1-2၊ MA3-2၊ MA5-2၊ MG3-1 လက်နက်များ သိမ်းဆည်းရမိကြောင်း ထုတ်ပြန်ချက်တွင် ဖော်ပြထားသည်။

ထို ကြိတ်စခန်းကို သြဂုတ်လ ၈ ရက်နေ့ကစပြီး ပိတ်ဆို့ကာ ရိက္ခာဖြတ်တောက်ပြီး တိုက်ခိုက်ခဲ့ရာ ယမန်နေ့တွင် စခန်းတစ်ခုလုံးကို သိမ်းပိုက်နိုင်ခဲ့ကြောင်း ဖော်ပြထားသည်။

အဆိုပါ ကြိတ်စခန်း တိုက်ခိုက်သိမ်းပိုက်ခံရသည့် ကိစ္စနှင့် ပတ်သက်၍ နစက ဘက်မှ တစ်စုံတစ်ရာ ထုတ်ပြန်ခြင်း မရှိသေးပေ။

CNI International News

နယူးယောက်၊ စက်တင်ဘာ ၂၁

ဆီးရီးယားမှ ယူကရိန်းအထိ ဖြစ်ပွားနေသည့် နိုင်ငံအချင်းချင်း ပဋိပက္ခများကို ဖြေရှင်းပေးသူအဖြစ် ရပ်တည်ရန် ဆောင်ရွက်မည့် တူရကီ၏ မဟာဗျူဟာများကို တူရကီသမ္မတအာဒိုဂန်က စက်တင်ဘာ ၂၀ ရက်တွင် ကုလသမဂ္ဂ အထွေထွေ ညီလာခံ မိန့်ခွန်း၌ ချပြကာ ကြိုးပမ်းနေကြောင်း သိရသည်။

တူရကီသမ္မတသည် ဒေသတွင်း အငြင်းပွားမှုများ ပတ်ပတ်လည်တွင် ဝိုင်းနေသည့် နိုင်ငံတစ်နိုင်ငံကို ဦးဆောင်နေ ရသူ ဖြစ်သည်။

တူရကီနိုင်ငံ၏ လက်ရှိ ငွေကြေးဖောင်းပွမှုနှုန်းမှာ တရားဝင် ၈၀ ရာခိုင်နှုန်းဖြစ်သော်လည်း ယင်းပမာဏထက် နှစ်ဆပိုများကြောင်း လေ့လာသူများက ထောက်ပြနေချိန်၌ အထက်ပါအတိုင်း သမ္မတအာဒိုဂန်၏ မိန့်ခွန်း ထွက် ပေါ်လာခဲ့ခြင်း ဖြစ်သည်။

အာဒိုဂန်သည် သူ့အစိုးရ၏ စီးပွားရေးမူဝါဒများထက် တကမ္ဘာလုံး အတိုင်းအတာဖြင့် အစားအသောက်နှင့် စွမ်းအင်ဈေးနှုန်း မြင့်မားလာခြင်း၊ ငွေ‌ကြေးဖောင်းပွမှုနှုန်း အဆမတန် ဖြစ်နေခြင်းတို့အပေါ် အပြစ်တင်ခဲ့သည်။
တူရကီသည် ကမ္ဘာ့နိုင်ငံအချင်းချင်း ပဋိပက္ခများ၌ ဖြေရှင်းချက်တိုင်း၏ တစိတ်တပိုင်း ဖြစ်စေရန် ကြိုးစားနေ ကြောင်း ၎င်းက ဆက်လက် ပြောကြားခဲ့သည်။

ကုလ ညီလာခံ (GETTY IMAGES)

အာဒိုဂန်၏ မိန့်ခွန်းထဲတွင် ကမ္ဘာ့ပြဿနာများကို ထိထိမိမိ ချပြသွားခဲ့ရာ အီရတ်တွင် တည်ငြိမ်ရေး လိုအပ်ချက်၊ လစ်ဗျားတွင် တရားမျှတသော ရွေးကောက်ပွဲနှင့် အာဖရိကဦးချိုဒေသ စားနပ်ရိက္ခာဖူလုံရေး၊ ပါလက်စတိုင်း နိုင်ငံတော်အတွက် လိုအပ်ချက်၊ မြန်မာနိုင်ငံမှ ဘင်္ဂါလီ(မူရင်း-ရို)ကိစ္စနှင့် တရုတ်နိုင်ငံမှ ဝီဂါမွတ်ဆလင်ကိစ္စ၊ ကမ္ဘာ တဝန်း မွတ်ဆလင်ဆန့်ကျင်ရေး စိတ်ဓာတ်များ စသည်တို့လည်း ပါဝင်ခဲ့သည်။

၎င်းမှတ်ချက်များတွင် ပဋိပက္ခ အများအပြား၌ တူရကီ၏ အခန်းကဏ္ဍကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ မီးမောင်းထိုးပြခဲ့သည်။

ဆီးရီးယားမြောက်ပိုင်း၌ အမေရိကန် ကျောထောက်နောက်ခံပြု ကာ့ဒ်သူပုန်များကို တိုက်ရိုက်ချေမှုန်းခြင်း၊ ယူကရိန်း၌ အဆင့်မြင့် သံတမန်ဆက်ဆံရေး၊ ထရီပိုလီ အခြေစိုက် အစိုးရကို ထောက်ခံသည့် လက်နက်ကိုင်တွင် လစ်ဗျားတပ်စွဲထားခြင်း၊ ဆိုက်ပရက်စ်နှင့်ဂရိတို့ ကာလအတန်ကြာ တင်းမာနေမှု၊ အဇာဘိုင်ဂျန်နှင့်အာမေးနီးယား ပဋိပက္ခတို့ကိုလည်း အာဒိုဂန်က သုံးသပ်ပြောကြားခဲ့သည်။

“လူသန်းပေါင်းများစွာကို ထိခိုက်စေတဲ့ အဲဒီကပ်ဘေးတွေအားလုံးအတွက် ကုလသမဂ္ဂက ပိုထိရောက်ရမယ်၊ ဩဇာပိုရှိရမယ်” ဟု အာဒိုဂန်က မှတ်ချက်ချခဲ့သည်။

Source: AP