CNI News

၂၀၂၂ ခုနှစ်၊ ဇွန် ၂၅

ရခိုင်ပြည်နယ်တွင် တပ်မတော်နှင့် ရက္ခိုင့်တပ်တော် (AA)တို့၏ အုပ်ချုပ်ရေး ယန္တရားနှစ်ခု ထိပ်တိုက်တွေ့၍ ဖမ်းဆီး စစ်ဆေး မှုများ အလွန်များပြားလာနေမှုကို ညှိနှိုင်း အဖြေရှာကြရန် ရခိုင့်ဦးဆောင်ပါတီ(AFP) ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

ပြီးခဲ့သည့် ဇွန်လ ၂၃ ရက်က စစ်တွေမြို့မှာ တပ်မတော်မှ ဗိုလ်ကြီးတစ်ဦးနှင့် စစ်သားတစ်ဦးကို ရက္ခိုင့်တပ်တော် (AA) မှ ဖမ်းဆီးသွားပြီးနောက် စစ်တွေမြို့ပေါ်ရပ်ကွက်မှ ပြည်သူ ၁၅ ဦးခန့်ကို တပ်မတော်မှ ဖမ်းဆီးသွားကြောင်း သိရသည်။

ရခိုင့်ဦးဆောင်ပါတီ (AFP) မှ ဥက္ကဋ္ဌ ဒေါက်တာအေးမောင်က “စစ်တွေမှာ ဖမ်းတယ်ဆီးတယ်ဖြစ်တော့ လူထုကတော့ ကျီးလန့်စာစား ဖြစ်တာပေ့ါဗျာ။ သေနတ်ကို တည့်တည့်ပစ်သလား၊ မိုးပေါ် ထောင်ဖောက် သလားဆိုတော့ မပြောတတ်ဘူး။ ပစ်သံခတ်သံလည်း ကြားရတယ်လို့လည်း ကြားပါတယ်။ အဲဒါတော့ တခြားမြို့တွေနဲ့စာရင် စစ်တွေမှာ ဖြစ်သွားတာပေ့ါဗျာ။ အဲလိုဖြစ်တာက SAC အတွက်လည်း မကောင်းဘူး။ ULA/AA ဖက်ကလည်း သူ့ရဲ့ မဟာဗျူဟာမြောက် ချဉ်းကပ်မှုနဲ့ ကျနော် ထင်ပါတယ် သူတို့ခေါင်းဆောင်တွေ တော်တော်များများရဲ့ ရင်ထဲမှာလည်း လူထုကို အထိအခိုက် အနည်းဆုံးနဲ့ သူတို့လိုချင် တဲ့ ပန်းတိုင်ကို ရောက်အောင် သွားမယ့် ရည်မှန်းချက်ကို ရှာထားပုံပေါက်ပါတယ်။ ဒီကြားထဲမှာ ထိပ်တိုက်တွေ့ကြတဲ့ အခါမှာ တော့ဖြင့် နှစ်ဖက်သည်းခံပြီးမှ ဆွေးနွေးညှိနှိုင်းပြီးမှ အဖြေတစ်ခုကို ထုတ်ကြစေချင်တယ်။ အဲဒါကတော့ ကျနော်တို့ ဆန္ဒပါ” ဟု CNI သတင်းဌာနသို့ ပြောသည်။

တပ်မတော်ဘက်မှ မိမိတို့ တပ်ဖွဲ့ဝင်များကို ဖမ်းဆီးခြင်းကြောင့် တပ်မတော်သားများအား ပြန်ဖမ်းခြင်း ဖြစ်သည်ဟု AA မှ ဦးခိုင်သုခက သတင်းစာ ရှင်းလင်းပွဲတွင် ပြောကြားခဲ့သည်။

စစ်တွေမြို့ကိုတွေ့ရစဉ်

ထို့နောက် AA ၏ ဇွန်လ ၁၄ ရက်နေ့ သတင်းစာ ရှင်းလင်းပွဲ နောက်ပိုင်း အပြန်အလှန် ဖမ်းဆီးမှုများ ပိုမိုများပြားခဲ့ကြောင်း သို့သော်လည်း အရပ်သားပြည်သူများကို ဖမ်းဆီးမှုကို ထိန်းထိန်းသိမ်းသိမ်း လုပ်စေလိုကြောင်း နိုင်ငံရေးအကျဉ်းသားဟောင်း စာရေးဆရာ ဝေဟင်အောင်က ပြောသည်။

စာရေးဆရာ ဝေဟင်အောင်က “စိုးရိမ်မှုကတော့ ပြည်သူတွေအနေနဲ့ကတော့ တကယ်စိုးရိမ်ဖို့ ကောင်းတာပေါ့နော်၊ စစ်သား တွေက စစ်သား အလုပ်လုပ်ကြတာ ကျနော်တို့ ဘာမှပြောစရာ မရှိပေမယ့် ဒီဖက်က ဘာမှ မဆိုင်ဘဲနဲ့ ဘုမသိ၊ ဘမသိ ပြည်သူတွေ ဖက်ကတော့ မယ်မယ်ရရ မသိဘဲနဲ့ ခေါ်ယူစစ်ဆေး၊ မေးမြန်းခံရတာတို့၊ ပြီးတော့ ဖမ်းဆီး ခံရတာတို့ကတော့ သိပ် စိတ်မကောင်း ဖြစ်ရတယ်ပေါ့။ စိုးရိမ်ဖို့လည်း ကောင်းတယ်။ အခု ကျနော်တို့နေတဲ့ စစ်တွေထဲမှာ ဆိုရင်လည်း အဲဒီ အတိုင်းပဲ။ ခါတိုင်း စည်စည်ပင်ပင် ဖြစ်နေတဲ့ စစ်တွေမြို့တောင်မှ တော်တော်လေးကို ခြောက်ခြောက်ကပ်ကပ် ဖြစ်သွား တယ်၊ လမ်းလယ်တောင်မှ လူမရှိသလောက် ဖြစ်သွားတယ်” ဟု CNI သတင်းဌာနသို့ ပြောသည်။

နိုင်ငံရေး သဘောသဘာဝအရ ယခုဖြစ်နေသော ပြဿနာကို စားပွဲဝိုင်းတွင် ဆွေးနွေးကြစေလိုကြောင်း၊ အပြန်အလှန် နားလည်မှု ရယူကာ ဆောင်ရွက်ပါက အကောင်းဆုံး ဖြစ်လိမ့်မည်ဟု ယူဆကြောင်း ၎င်းက ပြောသည်။

ဇွန်လအတွင်း တပ်မတော်မှ ကျောက်တော်၊ ပုဏ္ဏားကျွန်း၊ မြောက်ဦးမြို့တို့မှ ဒေသခံ ၅၀ ခန့်ကို ဖမ်းဆီးထားပြီး AA ဘက်က လည်း တပ်မတော်သားနှင့် ရဲတပ်ဖွဲ့ဝင် ၁၀ ဦး ထက်မနည်းကို ဖမ်းဆီးထားကြောင်း သိရသည်။

လက်ရှိတွင် ရခိုင်ပြည်နယ်အတွင်းမှာ တပ်မတော်နှင့် AA ကြား နားလည်မှုဖြင့် အပစ်အခတ်ရပ်စဲထားသည်။

CNI News

၂၀၂၂ ခုနှစ်၊ ဇွန်လ ၂၄

ဒေါ်အောင်ဆန်းစုကြည်ကို လွတ်ငြိမ်းချမ်းသာခွင့်ပေး၍ တိုင်းပြည်တည်ဆောက်ရေးတွင် ပူးပေါင်းနိုင်ရေး လုပ်ဆောင်သင့် ကြောင်း ရခိုင့်ဦးဆောင်ပါတီ (AFP) မှ ဥက္ကဋ္ဌ ဒေါက်တာ အေးမောင်က CNI သတင်းဌာနသို့ ပြောသည်။

ဒေါ်အောင်ဆန်းစုကြည်သည် မိမိနှင့် မိတ်ဆွေများဖြစ်ပြီး မနေအပ်သည့်နေရာမှာ နေနေရခြင်းအတွက် စိတ်မကောင်းဖြစ် မိကြောင်း၊ ဒေါ်အောင်ဆန်းစုကြည်ကို ပြန်လွှတ်ပေးပြီး တည်ငြိမ်အေးချမ်းရေးနှင့် တိုင်းပြည်ဖွံ့ဖြိုးတိုးတက်ရေးကို ပူးပေါင်း လုပ်ကြစေလိုကြောင်း ၎င်းက ပြောသည်။

ဒေါက်တာအေးမောင်က “ဒေါ်အောင်ဆန်းစုကြည်ကိုလည်း အဲဒီနေရာတွေကနေ တကယ် သူလုပ်ပေးနိုင်တဲ့ မြန်မာနိုင်ငံရဲ့ ငြိမ်းချမ်းရေး၊ ဖွံ့ဖြိုးတိုးတက်ရေးနဲ့ တည်ငြိမ်အေးချမ်းမှုတွေပေါ့ဗျာ၊ အဲဒါကို လုပ်ပေးနိုင်တဲ့ အနေအထားတစ်ခု ရောက် အောင် ဆောင်ရွက်ပေးစေချင်တယ်၊ ဒေါက်တာခင်ရွှေတို့၊ ဦးချစ်ခိုင်တို့ စသဖြင့် ပုဂ္ဂိုလ်တွေ စီးပွားရေးလုပ်ငန်းရှင်ကြီးတွေ နိုင်ငံရေးသမားကြီးတွေ အများကြီးထောင်ထဲမှာ ULA/AA နဲ့ ပတ်သက်တဲ့ ပုဂ္ဂိုလ်တွေ တခြားတော်လှန်ရေး လက်နက်ကိုင် အဖွဲ့အစည်းများနဲ့ပတ်သက်တဲ့ပုဂ္ဂိုလ်တွေ အားလုံးကိုလည်းပဲ ငြိမ်းချမ်းရေးအရ ပြန်လွှတ်စေချင်တဲ့ဆန္ဒ ကျ‌နော်တို့မှာ ရှိပါတယ်။ အဲဒီတော့ ထောင်တွင်းထဲမှာ ဒေါ်အောင်ဆန်းစုကြည်ကို ကမ္ဘာ့ငြိမ်းချမ်းရေးနိုဘယ်ဆုရှင် တစ်ယောက်ကို ဒီလိုပဲ ထားမယ့်အစား အပြင်မှာ ခုနလိုပေါ့ဗျာ လွတ်ငြိမ်းသက်သာခွင့်နဲ့ တိုင်းပြည်တည်ဆောက်ရေး လက်ရှိအနေအထား အကျဉ်း အကျပ်တွေကနေ ရုန်းကန်နိုင်ရေးအတွက် ပူးပေါင်းနိုင်အောင် SAC ဘက်က စဉ်းစားသင့်ပါတယ်”ဟု CNI သို့ ပြောသည်။

အလားတူ ထိပ်တန်းစီးပွားရေးလုပ်ငန်းရှင်များဖြစ်သည့် ဒေါက်တာခင်ရွှေ၊ ဦးချစ်ခိုင်၊ နှင်းဆီပါတီ ဉက္ကဋ္ဌ ဦးကျော်မြင့်တို့ကို ပြန်လွှတ်ပေးကာ တိုင်းပြည်တည်ဆောက်ရေးနှင့် စီးပွားရေးကဏ္ဍများတွင် အသုံးပြုရန် နစကမှ လုပ်ဆောင်သင့်ကြောင်း ၎င်းကပြောသည်။

ဒေါ်အောင်ဆန်းစုကြည်ကို ဇွန်လ ၂၂ ရက်က သက်ဆိုင်ရာ တရားရုံးများမှာ တရားစီရင်ပြီးဖြစ် ၍ ပြစ်မှုဆိုင်ရာ ဥပဒေများအရ အကျဉ်းထောင်သို့ ပြောင်းရွှေ့ခဲ့ပြီးနောက် ၎င်းအား သီးသန့် အဆောက်အဦတွင် ကောင်းမွန်စွာ ထားရှိထားကြောင်း ဗိုလ်ချုပ်ဇော်မင်းထွန်းက မီဒီယာများကို ပြောကြားခဲ့သည်။

ဒေါ်အောင်ဆန်းစုကြည်ကို အကျဉ်းထောင်ပြောင်းသည့်ကိစ္စမှာ လုံခြုံရေးအားဖြင့်သော်လည်းကောင်း၊ မညီမျှ သည့် အကျဉ်းသားမူဝါဒကြောင့်ဖြစ်နိုင်သည်ဟု ဒေါ်တာအေးမောင်က ဆက်ပြောသည်။

“အမှုတော်တော်များများကတော့ ပြီးတယ်လို့ ပြောလို့ရတာပေါ့။ ဦးဇော်မင်းထွန်းတို့ ပြောသလိုပဲ။ အမှုတွေက စိစစ်ပြီးပြီ၊ ကျန်တဲ့အမှုတွေက စိစစ်ဖို့လိုတယ်၊ အဲဒီတော့ ထောင်လည်း ချထားပြီးပြီဆိုတော့ အကျဉ်းသားတစ်ဦး အနေနဲ့ တခြားအကျဉ်းသားတွေနဲ့ တန်းတူ ထားဖို့လိုအပ်တယ်ဆိုတာတွေလည်း နိုင်ငံရေးအားဖြင့် ဖြစ်လာမှာ၊ ၁၉၉၀ ကာလတုန်းက ဦးခွန်ထွန်းဦးတို့ကို နှစ် ၁၀၀ ကျော်ချတယ်လေ။ ဒေါ်အောင်ဆန်းစုကြည်ကိုကြတော့ အိမ်မှာပဲ ထားတာကိုးဗျ။ တိုင်းရင်းသားခေါင်းဆောင်တွေကို ထောင်ချရင် ဗမာအများစုပါတဲ့ အစိုးရမင်းများက မတူကွဲပြားတဲ့ပုံနဲ့ ဆက်ဆံတာပေါ့။ အဲဒါတစ်ခုကလည်း တိုင်းရင်းသားတွေရဲ့ ရင်ထဲမှာ ရှိနိုင်ပါတယ်။ ဦးခွန်ထွန်းဦးတို့၊ ဦးစိုင်းညွန့်လွင်တို့ကို ထောင်ဘယ်လောက်အထိချခဲ့သလဲပေါ့နော်။ ကျနော်တို့ စဝ်ဆေထင်တို့ ဘာတို့လေ။ ပြန်ကြည့်ရင် ဒေါ်အောင်ဆန်းစုကြည်ကြတော့ အိမ်မှာထားတယ်၊ ဟိုပုဂ္ဂိုလ်တွေကြတော့ အလွန်တရာအေးတဲ့နေရာကို ပို့တယ်။ စသဖြင့် မညီမျှတဲ့ အကျဉ်းသားတွေနဲ့ ပတ်သက်တဲ့မူကို မြန်မာအစိုးရ အဆက်ဆက်က ထားခဲ့တာပေါ့ဗျာ” ဟု ပြောသည်။

လက်ရှိတွင် ဒေါ်အောင်ဆန်းစုကြည်ကို နစကမှ ပုဒ်မ ၆ ခုနှင့် ထောင် ၁၁ နှစ် ချမှတ်ထားပြီးဖြစ်ကာ စွဲချက်တင် ခံထားရသည့် အမှုများအတွက် တရားရင်ဆိုင်နေရဆဲ ဖြစ်သည်။

ထို့နောက် ဒေါ်အောင်ဆန်းစုကြည်ကို စွဲဆိုထားသော အမှုများထဲမှ နိုင်ငံတော်လျှို့ ဝှက်အက်နှင့်ပတ်သက်ပြီး စွဲဆိုခံထားရသော အမှုများကိုတော့ နေပြည်တော် အကျဉ်းထောင်ရှိ အထူးတရားရုံးတွင် ဇွန်လ ၂၄ ရက်နေ့မှာ စစ်ဆေးသွားမည်ဖြစ်ကြောင်း သိရသည်။

CNI News

၂၀၂၂ ခုနှစ်၊ ဇွန်လ ၂၄

ရှမ်းပြည်တိုးတက်ရေးပါတီ/ရှမ်းပြည်တပ်မတော်(SSPP/SSA)၏ ပြောရေးဆိုခွင့်ရှိသူ ဗိုလ်မှူးစိုင်းသန်းအောင် ဇွန်လ ၂၂ ရက်နေ့က ကွယ်လွန်သွားခဲ့ပြီး ယနေ့ (ဇွန်လ ၂၄ ရက်)တွင်  သူ၏ ဈာပန အခမ်းအနားကို တွေ့ရသည်။

ဗိုလ်မှူးစိုင်းသန်းအောင်သည် SSPP/SSA ၏ အတွင်းရေးမှူး တစ်ဦးလည်း ဖြစ်သည်။ သူ၏ ရုပ်အလောင်းကို ဇွန်လ ၂၄ ရက်နေ့တွင် သဂြိုလ်မည်ဖြစ်ကြောင်း သိရသည်။

ပြီးခဲ့သည့် မတ်လ ၃၁ ရက်နေ့က အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC)နှင့် SSPP/SSA ကိုယ်စားလှယ်တို့ နေပြည်တော်မှာ တွေ့ဆုံ၍ ငြိမ်းချမ်းရေး ဆွေးနွေးခဲ့စဉ်က ပါဝင် တက်ရောက် ခဲ့သေးသည်။

CNI News

၂၀၂၂ ခုနှစ်၊ ဇွန် ၂၃

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်ကို အကျဉ်းထောင်သို့ ပြောင်းရွှေ့ထားကြောင်း နစက၏ သတင်း ထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက မီဒီယာများကို အတည်ပြောကြားခဲ့သည်။

ဒေါ်အောင်ဆန်းစုကြည်ကို ဇွန်လ ၂၂ ရက်တွင် သက်ဆိုင်ရာ တရားရုံးများက တရားစီရင်ပြီးဖြစ်၍ ပြစ်မှုဆိုင်ရာဥပဒေများ အရ အကျဉ်းထောင်သို့ ပြောင်းရွှေ့ခဲ့သည်ဆိုသည့် သတင်းမှာ မှန်ကန်ကြောင်း အတည်ပြု ပြောကြားခဲ့သည်။

ဒေါ်အောင်ဆန်းစုကြည်အား သီးသန့် အဆောက်အဦတွင် ကောင်းမွန်စွာ ထားရှိထားကြောင်း ဗိုလ်ချုပ်ဇော်မင်းထွန်းက မီဒီယာများကို ပြောကြားခဲ့သည်။

လက်ရှိတွင် ဒေါ်အောင်ဆန်းစုကြည်ကို နစကမှ ပုဒ်မ ၆ ခုနှင့် ထောင် ၁၁ နှစ် ချမှတ်ထားပြီးဖြစ်ကာ ဆွဲချက်တင် ခံထားရ သည့် အမှုများအတွက် တရားရင်ဆိုင်နေရဆဲ ဖြစ်သည်။

၂၀၁၀ ခုနှစ်၊ နိုဝင်ဘာ ၁၃ ရက် နေအိမ်အကျယ်ချုပ်က လွတ်မြောက်စဉ် လူထုနဲ့တွေ့စဉ် (AP)

ထို့နောက် ဒေါ်အောင်ဆန်းစုကြည်ကို စွဲဆိုထားသော အမှုများထဲမှ နိုင်ငံတော်လျှို့ ဝှက်အက်နှင့် ပတ်သက်ပြီး စွဲဆိုခံထား ရသော အမှုများကိုတော့ နေပြည်တော် အကျဉ်းထောင်ရှိ အထူးတရားရုံးမှာ ဇွန်လ ၂၄ ရက်တွင် စစ်ဆေးသွားရန် ရှိကြောင်း သိရသည်။

ဒေါ်အောင်ဆန်းစုကြည်သည် ၁၉၈၈ အရေးတော်ပုံကာလများနှင့် ၁၉၉၀ အထွေထွေရွေးကောက်ပွဲ ကာလများမှစတင်၍ ၂၀၁၀ ခုနှစ်အထိ နေအိမ်အကျယ် ချုပ်ဖြင့် ဖမ်းဆီး ထိန်းသိမ်းမှုများ အကြိမ်ကြိမ် ခံခဲ့ရပြီး အင်းစိန်အကျဉ်းထောင်သို့ ခတ္တ သွားရောက် နေထိုင်ရသည့် အခြေအနေမျိုးသာ ရှိခဲ့သည်။

ယခုလို ပြစ်ဒဏ်ချမှတ်ခံရပြီးနောက် အကျဉ်းထောင်အတွင်းသို့ ရွှေ့ပြောင်းနေထိုင်ခဲ့ရခြင်းမျိုး မရှိခဲ့ကြောင်း ၈၈၈၈ အရေး တော်ပုံအတွင်း ဖြတ်သန်းခဲ့သော နိုင်ငံရေးသမားများက ပြောသည်။

CNI News

၂၀၂၂ ခုနှစ်၊ ဇွန်လ ၂၃

ရှမ်းပြည်တိုးတက်ရေးပါတီ/ရှမ်းပြည်တပ်မတော်(SSPP/SSA)၏ ပြောရေးဆိုခွင့်ရှိသူ ဗိုလ်မှူးစိုင်းသန်းအောင် ဇွန်လ ၂၂ ရက်နေ့က လူကြီးရောဂါဖြင့် ကွယ်လွန်သွားကြောင်း ဗိုလ်မှူးစိုင်းဖုန်းဟန်က CNI သတင်းဌာနသို့ အတည်ပြု ပြောသည်။

ဗိုလ်မှူးစိုင်းသန်းအောင်သည် SSPP/SSA ၏ အတွင်းရေးမှူး တစ်ဦးလည်း ဖြစ်သည်။ သူ၏ ရုပ်အလောင်းကို ဇွန်လ ၂၄ ရက်နေ့တွင် သဂြိုလ်မည်ဖြစ်ကြောင်း သိရသည်။

ပြီးခဲ့သည့် မတ်လ ၃၁ ရက်နေ့က အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ (NSPNC)နှင့် SSPP/SSA ကိုယ်စားလှယ်တို့ နေပြည်တော်မှာ တွေ့ဆုံ၍ ငြိမ်းချမ်းရေး ဆွေးနွေးခဲ့စဉ်က ပါဝင် တက်ရောက် ခဲ့သေးသည်။

CNI News

၂၀၂၂ ခုနှစ်၊ ဇွန်လ ၂၃

ဖက်ဒရယ်ဒီမိုကရေစီပြည်ထောင်စု တည်ဆောက်ရေးတွင် ကရင်အမျိုးသားအစည်းအရုံး (KNU) ပါဝင်လာရေး ကြိုးစား ဆောင်ရွက်သွားမည်ဖြစ်ကြောင်း နစက-က ဒီမိုကရေစီအကျိုးပြု ကရင်တပ်မတော် (DKBA)ကို ရှင်းလင်း ပြောကြားခဲ့သည်။

ဇွန်လ ၁၉ ရက်က နစကနှင့် DKBA ကိုယ်စားလှယ်အဖွဲ့ တွေ့ဆုံစဉ် နစကဘက်က အထက်ပါအတိုင်း ပြောကြားခဲ့ခြင်း ဖြစ်ကြောင်း DKBA မှ စစ်ရေးချုပ် ဗိုလ်မှူးကြီး စောစိန်ဝင်းက CNI သတင်းဌာနသို့ ပြောသည်။

ဗိုလ်မှူးကြီး စောစိန်ဝင်းက “ဖက်ဒရယ် တည်ဆောက်ရေး အကန့်ကတော့ ကျနော်တို့ နဂိုအစဉ်တစိုက် အဆိုပြုခဲ့တယ်၊ အဓိကကတော့ ကျနော်တို့ ကရင် အနေနဲ့ကြတော့ KNU ပါလာရေးက အဓိကကျပါတယ်၊ အဲဒီ အဆိုတော့ အဆိုပြုခဲ့တယ်။ KNU မပါရင် ကျနော်တို့ အဖွဲ့နဲ့လည်း ကိုယ့်ပြည်နယ်ရဲ့ ဖက်ဒရယ်ကိစ္စကို ဆောင်ရွက်လို့ အဆင်မပြေနိုင်ဘူးဆိုတော့ ပြောပြ ခဲ့တယ်။ သူတို့လည်း KNU ပါလာရေးအတွက်လည်း သူတို့ ကြိုးစား ဆောင်ရွက်သွားပါမယ်လို့ အဲလိုပဲ ပြောခဲ့တယ်။ အဲဒီ အထဲက ကျနော်တို့ကို ဘာမှ တာဝန်မပေးဘူး။ အဓိကက ကျနော်တို့ လာတဲ့ အခင်းအကျင်းပေါ်မှာ KNU နဲ့ တာဝန်ရှိတွေနဲ့ တွေ့လို့ မေးမြန်းတာတော့ ရှိတယ်၊ အဲဒီအနေအထားကို ပြန်လည် ပြောပြ ရှင်းလင်းပေးဖို့ ဆိုတာတော့ အဲဒီလောက်ပဲ ရှိပါ တယ်” ဟု ပြောသည်။

ဗိုလ်ချုပ်မှူးကြီးမင်းအောင်လှိုင်နဲ့ DKBA မှ ကိုယ်စားလှယ်အဖွဲ့ကိုတွေ့ရစဉ်

ထို့နောက် အနာဂတ် ငြိမ်းချမ်းရေး ဖော်ဆောင်မည့် အခင်းအကျင်းများကို နှစ်ဖက်အမြင်များ ဆွေးနွေးခဲ့ကြကြောင်း၊ ကရင် ပြည်နယ်အတွင်းရှိ တိုက်ပွဲရှောင်များ နေရပ်ပြန်နိုင်ရေးကို နှစ်ဖက်ပူးပေါင်း လုပ်ဆောင်ရေး ဆွေးနွေးခဲ့ကြောင်း ၎င်းက ပြော သည်။

ဗိုလ်မှူးကြီး စောစိန်ဝင်းက “တိုက်ပွဲတွေနဲ့ ဘာတွေနဲ့ကြတော့ ကျနော်တို့ တိုက်ပွဲ အကြောင်းမပြောဘူး။ အဓိကက စစ်ဘေး ရှောင်တွေ နေရပ်ပြန်ရေးတော့ တိုင်ပင်ဆွေးနွေးခဲ့တယ်၊ အဲဒါနှစ်ဦး၊ နှစ်ဖက် ပူးပေါင်းဆောင်ရွက်မယ်ဆိုတဲ့ သဘောတော့ ရှိတယ် နေရပ်ပြန်နိုင်ရေး။ အဲဒီလိုပဲ လက်ရှိ မြေပြင်အခြေအနေပေါ်မှာ လုပ်ဆောင်သွားမှာပေါ့။ အဓိကက စစ်ဘေးရှောင် ကာယကံရှင်တွေရဲ့ သဘောဆန္ဒအပေါ် မူတည်ပြီးတော့ ကျနော်တို့ အကောင်းဆုံး လုပ်ဆောင်သွားမယ့် သဘောမျိုးပါပဲ” ဟု ပြောသည်။

နစက ဖိတ်ခေါ်သည့် ငြိမ်းချမ်းရေးဆွေးနွေးပွဲကို KNU မှ တက်ရောက်မှာ မဟုတ်ကြောင်း၊ နိုင်ငံရေးကနေ တပ်မတော် ထွက် ခွာမှ တက်ရောက်မည်ဖြစ်ကြောင်း ထုတ်ပြန်ထားသည်။

လက်ရှိမှာလည်း ကရင်ပြည်နယ်မှာ ကရင်အမျိုးသားကာကွယ်ရေးတပ် (KNLA)၊ ဒေသကာကွယ်ရေးတပ် (PDF) ပူးပေါင်းတပ် နှင့် တပ်မတော်အကြား တိုက်ပွဲများ ဖြစ်ပွားလျက်ရှိသည်။

CNI News

၂၀၂၂ ခုနှစ်၊ ဇွန်လ ၂၂

ရခိုင်ပြည်နယ်ရှိ တိုက်ပွဲရှောင်စခန်းများတွင် အမျိုးသမီးများအတွက် လစဉ်သုံးပစ္စည်းနှင့် တခြားသော အဝတ်အထည် အသုံးအဆောင်ပစ္စည်းများ လိုအပ်ချက်ရှိနေပြီး အခက်အခဲ ဖြစ်ပေါ်နေသည်ဟု ရခိုင်ရှိ တိုက်ပွဲရှောင်အမျိုးသမီးများထံမှ သိရသည်။

ယခုကာလသည် မိုးရာသီဖြစ်သည့်အတွက် အမျိုးသမီးများအတွက် အဆိုပါပစ္စည်းများမှာ ပိုမို လိုအပ် ချက် ဖြစ်ပေါ်နေသည်ဟု ကျောက်တော်မြို့နယ်၊ တောင်မင်းကုလားစခန်း၏ အမျိုးသမီးခေါင်းဆောင် မအေးခိုင်က CNI သတင်းဌာနသို့ ပြောသည်။

“လစဉ်သုံးတော့ ဘယ်လိုပြောမလဲ၊ မလုံတော့ မလုံလောက်ဘူးလို့ ခံစားရတယ်။ ဒါပေမယ့် အတွင်းခံ ဘောင်းဘီတွေ အဆင်မပြေဘူး။ ဘရာဇီယာရယ်၊ အခုလောလောဆယ်တော့ အမျိုးသမီး တွေမှာ ဘာလိုအပ်ချက်ရှိလဲဆိုရင် မိုးရာသီဖြစ်နေလို့ ဘောင်းဘီနဲ့ဘရာဇီယာ နှစ်ခုပဲ လိုအပ်တယ်” ဟု ပြောသည်။

ရခိုင်ရှိ တိုက်ပွဲရှောင်စခန်း တချို့တွင် အမျိုးသမီး လစဉ်သုံးပစ္စည်းနှင့် တခြားသော အသုံးအဆောင် ပစ္စည်းများ ရရှိသော်လည်း စခန်းအများအပြားမှာ ထောက်ပံ့မှု မရရှိကြောင်းသိရသည်။

ဒါ့အပြင် တိုက်ပွဲရှောင်စခန်းများတွင် အမျိုးသားဦးရေထက် အမျိုးသမီးဦးရေမှာ ပိုမို များပြားကာ ထက်ဝက်ကျော်ခန့်ရှိပြီး တချို့သော စခန်းများတွင်မူ လူဦးရေ၏ သုံးပုံနှစ်ပုံခန့်မှာ အမျိုးသမီးများ ဖြစ်သည့်အတွက် ပို၍ အခက်အခဲရှိကြောင်း သိရသည်။

ကျောက်တော်မြို့နယ်မှ တိုက်ပွဲရှောင်အမျိုးသမီးတစ်ဦးဖြစ်သူ မဦးမိုးနွယ်က “ကျမတို့ဘက်မှာက လစဉ်သုံးပစ္စည်းတွေကတော့ စခန်းတော်တော်များများ ရတယ်။ မရတဲ့စခန်းကတော့ ကျမတို့ ကျောက်တော်မှာရှိတဲ့ နေပူခံစခန်းတစ်ခုပဲ ရှိတယ်။ အဲဒီစခန်းက တစ်လမှ မရပါဘူး။ ပြီးတော့ အမျိုးသမီးတွေ အခက်အခဲဖြစ်နေတဲ့ အဓိကအချက်တွေကတော့ အမျိုးသမီးတွေမှာကျတော့ အမျိုးသားတွေနဲ့ မတူဘူး။ အဝတ်လှန်းတဲ့နေရာကနေအစ နေရာလိုအပ်တယ်။ ထမီတွေ ဘာတွေ လှန်းတဲ့နေရာတွေ အဲဒီအခက်အခဲတွေရှိတယ်။ ပြီးတော့ တခြားအခက်အခဲတွေကတော့ စားဝတ် နေရေးပဲ ဖြစ်မယ်” ဟု CNI သတင်းဌာနသို့ ပြောသည်။

ရခိုင်ပြည်နယ်ရှိ တိုက်ပွဲရှောင်စခန်းတစ်ခုကို တွေ့ရစဉ်(ဓါတ်ပုံ-CJ)

ရခိုင်တိုက်ပွဲရှောင်စခန်းများသို့ လက်ရှိတွင် ICRC နှင့် WFP အဖွဲ့အစည်းများကသာ လာရောက် ထောက်ပံ့မှုများရှိပြီး ၂၀၂၀ နောက်ပိုင်း တခြားသော အဖွဲ့အစည်းများ၊ လူပုဂ္ဂိုလ်များနှင့် အသင်းအဖွဲ့ များက လာရောက်လှူဒါန်းမှု မရှိတော့ကြောင်း တိုက်ပွဲရှောင်များက ပြောသည်။

လက်ရှိ ထောက်ပံ့နေသည့် ICRC နှင့် WFP အဖွဲ့အစည်းနှစ်ခုတွင် WFP သည် ငွေကြေးကိုသာ အဓိက ထောက်ပံ့ပေးနေပြီး ICRC သည် စားနပ်ရိက္ခာနှင့် အသုံးအဆောင်ပစ္စည်းများကို ထောက်ပံ့ ပေးသည်ဟု သိရသည်။

အမျိုးသမီးများအတွက် လိုအပ်သည့် အသုံးအဆောင်ပစ္စည်းနှင့် တခြားသော အခက်အခဲများ ပြေလည် စေရန်အတွက် ငွေကြေးထောက်ပံ့သည်ထက် အသုံးအဆောင်ပစ္စည်းများကို ထောက်ပံ့သင့်သည်ဟု မြောက်ဦးမြို့နယ်ရှိ တိမ်ညိုစခန်းမှ သတင်းနှင့် ပြန်ကြရေးတာဝန်ခံ ဦးစိုးနိုင်က ပြောသည်။

“ကျနော်ကြားမိသလောက်ကတော့ WFP က ရိက္ခာထောက်ပံ့တာထက်ကို ပိုက်ဆံကို မိသားစုအလိုက် ထောက်ပံ့တာ တခြားစခန်းတွေမှာတော့ ရှိတယ်။ ကျနော်တို့စခန်းမှာတော့ ပိုက်ဆံမဟုတ်ဘူး။ အသုံးအဆောင်ပစ္စည်းတွေ၊ စားနပ်ရိက္ခာတွေ အဲလိုတော့ ICRC က ထောက်ပံ့တာ ရှိတယ်။ ကျနော် ထင်တာကတော့ ရိက္ခာတွေ၊ အသုံးအဆောင်ပစ္စည်းတွေ၊ ထောက်ပံ့တာကတော့ အဆင်ပြေလိမ့်မယ် ထင်တယ်။ ဘာလို့လဲဆိုတော့ ပိုက်ဆံထောက်ပံ့တယ်ဆိုတော့ ပိုက်ဆံဆိုတာ သိတဲ့အတိုင်းပဲ လိုအပ်တဲ့ ပစ္စည်းကိုမရောက်ဘဲ တခြားသုံးလိုက်တာတွေ ရှိတယ်ပေါ့။ အဲဒါကြောင့်မို့ ကျနော်တို့ကတော့ လိုအပ်တဲ့ အသုံးအဆောင်ပစ္စည်းတွေ ထောက်ပံ့တာကတော့ ပိုကောင်းတယ်လို့ ပြောချင်တယ်” ဟု CNI သတင်း ဌာနသို့ ပြောသည်။

လက်ရှိ ရခိုင်ပြည်နယ်ရှိ တိုက်ပွဲရှောင်စခန်းများတွင် အမျိုးသမီးများအတွက် လိုအပ်ချက်များ ရှိသည့် အပြင် သောက်သုံးရေ သန့်ရှင်းမှု မရှိသည့်အတွက် ဝမ်းပျက်ဝမ်းလျှောရောဂါနှင့် ယားနာရောဂါများ လည်း ဖြစ်ပေါ်နေသည်ဟု တိုက်ပွဲရှောင်များထံမှ သိရသည်။

CNI News

၂၀၂၂ ခုနှစ်၊ ဇွန်လ ၂၂

ရခိုင်ပြည်နယ်တွင် ရခိုင်မဟုတ်သော လူမျိုးနှင့် မျိုးနွယ်စုများအကြား သပ်လျှိုဖြိုခွဲသော နည်းလမ်း၊ အချိုသပ် မက်လုံးပေး သော နည်းလမ်းများကို အသုံးပြု၍ လူမျိုးရေးပဋိပက္ခများ ဖန်တီးရန် ကြိုးစားနေသည်ကို သတိထားဆင်ခြင်ရန် ရက္ခိုင့် တပ်တော် (ULA/AA)က ဇွန်လ ၂၁ ရက်တွင် ထုန်ပြန်ခဲ့သည်။

ပြီးခဲ့သည့် ဇွန်လ ၁၆ ရက်က မောင်တောမြို့နယ်၊ သင်္ဘောလှရွာ၊ မူလတန်းလွန်ကျောင်းမှ ကျောင်းအုပ် ဆရာကြီးနှင့် လက် ထောက် ဆရာမ တို့အား ဖမ်းဆီးမှု ဖြစ်စဉ်များ ရှိဖြစ်ပွားခဲ့သလို ပေါက်တော်မြို့နယ်၊ ကြိမ်နီပြင်ရွာမှ မူဆလင်လူငယ် တစ်ယောက်အား ရိုက်နက်ကာ လက်ပြန်ကြိုးတုပ်လျက် ကျောကုန်းကို ကျောက်တုံးဖိ၍ ထားသည့် ဖြစ်စဉ်များ ဖြစ်ပွားခဲ့ ကြောင်း ULA/AA ၏ ထုတ်ပြန်ချက်တွင် ဖော်ပြထားသည်။

အလားတူ ရခိုင်တွင် စပါးရိတ်စက်များ၊ ကောက်လှိုင်းစည်းများအား မီးတိုက်ခြင်း၊ မုဒိမ်းကျင့်ရန် ကြံစည်ခြင်းများ အပါအဝင် လူမျိုးရေး၊ ဘာသာရေး ဖြစ်စေနိုင်သည့် ဖြစ်ရပ်များ ပေါ်ပေါက်ခဲ့ကြောင်း ထုတ်ပြန်ချက်တွင် ဖော်ပြထားသည်။

ULA/AA က “ရန်သူသည် ယင်းလုပ်ရပ်များကို ၎င်းတို့၏ လက်ကိုင်တုတ်၊ ရခိုင်တချို့၊ အမျိုးသား သစ္စာဖောက်တချို့နှင့် ၎င်းတို့၏ အဖွဲ့အစည်းအတွင်းမှ ရခိုင်စကား ပြောတတ်သူများကို အသုံးချ၊ ခိုင်းစေကြောင်း သိရသည်။ ယင်းဖြစ်စဉ်များသည် လူမျိုးရေး၊ ဘာသာရေး ပဋိပက္ခ ဦးတည် စေနိုင်သည့်အတွက် ရခိုင်ပြည်သူပြည်သားများ အနေနှင့် သတိပြု ဆင်ခြင်ရန်နှင့် နောက်ထပ် အလားတူ ဖြစ်စဉ်များ မပေါ်ပေါက်စေရေး ဝိုင်းဝန်း ကာကွယ်စောင့်ထိန်းကြရန် အထူးလိုအပ်သည်”ဟု ထုတ်ပြန် ချက်တွင် ပြောထားသည်။

မောင်တောမြို့နယ်မှာ ဆရာမ ပျောက်ဆုံးမှု လိုက်ရှာနေကြစဉ်

လက်ရှိ ရခိုင်ပြည်နယ်မှာ လူမျိုးရေး၊ ဘာသာရေး ပဋိပက္ခများ မဖြစ်ပွားစေရန် နှစ်ဖက်လူ့အဖွဲ့အစည်းမှ ဝိုင်းဝန်း ထိန်းသိမ်း နေကြောင်း ရခိုင်အမျိုးသားပါတီ (ALP) မှ မူဝါဒရေးရာ ဦးဆောင်ကော်မတီဝင် ဦးထွန်းအောင်ကျော်က CNI သတင်းဌာနသို့ ပြောသည်။

ဦးထွန်းအောင်ကျော်က “အဓိကကတော့ ကျနော်တို့က ၂၀၁၂၊ နောက်တစ်ခုက ၂၀၁၇ အဲဒီလို ခေတ်တွေမှာ ကျနော်တို့ ရခိုင် ပြည်နယ်မှာ မလိုလားအပ်တဲ့ လက်ခံနိုင်စရာ မရှိတဲ့၊ နှစ်ဖက် လူ့အဖွဲ့အစည်းတွေ ကြားထဲမှာ အင်မတန် အရုပ်ဆိုး၊ အကျဉ်း တန်တဲ့ လူမျိုးရေးပဋိပက္ခတွေ ဖြစ်ပွားခဲ့တယ် ဆိုတာကတော့ အားလုံးအသိပါပဲ။ ဒီဒဏ်ရာ၊ ဒဏ်ချက်တွေကလည်း တော် တော်ကြီးကို ပြင်းထန်ပြီးတော့မှ လူ့အသိုင်းအဝိုင်း၊ လူသားတွေ အနေနဲ့ လက်မခံနိုင်တဲ့ ဒဏ်ရာ၊ ဒဏ်ချက်တွေ ဖြစ်တယ်။ အဲဒါကြောင့် ကျနော်တို့ ရခိုင်ပြည်နယ်မှာ အဲဒီလို အရုပ်ဆိုး အကျဉ်းတန်တဲ့ လက်မခံနိုင်တဲ့ အဖြစ်အပျက်တွေနဲ့ အနိဋ္ဌာရုံ တွေ ပြန်မဖြစ်ဖို့အတွက်ကို တာဝန်ရှိတဲ့ ရခိုင်လူ့အဖွဲ့အစည်းနဲ့ တခြား မွတ်ဆလင် အဖွဲ့အစည်းကလည်း ဝိုင်းဝန်း ထိန်းသိမ်း ကြတာကိုလည်း လေးစားဖွယ်ရာ တွေ့ရပါတယ်” ဟု ပြောသည်။

ULA/AA ၏ ထုတ်ပြန် ကြေညာချက်မှာ ကောင်းမွန်ပြီး တရားမျှတသည်ဟု ယူဆကြောင်း ချွန်းဂျာနယ် အယ်ဒီတာချုပ် ကိုကျော်နေမင်းက CNI သတင်းဌာနသို့ ပြောသည်။

ရခိုင်ပြည်နယ်တွင်း နေအိမ်များ မီးလောင်နေစဉ်

ကိုကျော်နေမင်းက “အခုထုတ်တဲ့ ကြေညာချက်ကိုတော့ အကြမ်းဖျဉ်းအားဖြင့်ပေါ့ ကျ‌နော်တို့ကတော့ ဒါအင်မတန် ကောင်း ပြီးတော့လည်း တရားမျှတ တယ်လို့တော့ ကျနော်တို့က ယူဆပါတယ်ဗျ။ ဒါပေမဲ့ ပြဿနာကလေ တကယ်အပေါ်မှာ ရှိတဲ့ လူတွေရဲ့ စိတ်ရင်းစေတနာက တော်တော် အရေးကြီးပါတယ်ဗျ။ ဘာလို့လဲဆိုတော့ သူတို့ရဲ့ အနေအထားကလေ ကာလ သမိုင်းကြောင်းက Sensitive ဖြစ်နိုင်တဲ့ အရမ်းကို Sensitive ဖြစ်တဲ့ အနေအထားတွေဆိုတော့ ဟိုးအရင် ၂၀၁၂၊ ၁၃ ကလိုပေါ့ နော်။ တချို့ သွေးထိုးလှုံ့ဆော်သူတွေပေါ့။ နိုင်ငံရေးသမား ဩဇာရှိတဲ့ လူတချို့ရဲ့ သွေးထိုးလှုံ့ဆော်မှုတွေ မပါလာဖို့တော့ သတိထားရမယ်လို့တော့ ကျ‌နော်တို့ ယူဆတယ်ဗျ” ဟု ပြောသည်။

ရခိုင်ပြည်သူများအနေဖြင့် ရန်သူ၏ ‌ထောင်ချောက်ထဲသို့ မကျရောက်ရစေရန်၊ ရန်သူဖြစ်လိုသော အကွက်ထဲသို့ မသက်ဆင်း လာစေရန် အထူးသတိထားရန် လိုအပ်ကြောင်း၊ လူမှုကွန်ရက် စာမျက်နှာများမှ သတင်းများကို သတိဉာဏ်ဖြင့် ဆင်ခြင် ဖတ်ရှု့ရန် လိုအပ်ကြောင်း၊ ပဋိပက္ခကို ဦးတည်စေသော အရေးအသား၊ လှုံ့ဆော်မှုမျိုး ရေးသားခြင်း၊ ဖြန့်ဝေခြင်း မပြုလုပ်ရန် လိုအပ်ကြောင်း ULA/AA မှ တိုက်တွန်းထားသည်။

၂၀၁၂ ခုနှစ်က ရခိုင်ပြည်နယ်မှာ ရခိုင်လူမျိုးစုများနှင့် မွတ်စလင် ဘာသာဝင်များအကြား အကြမ်းဖက် တိုက်ခိုက်ကြသည့် ဖြစ်ရပ်များ ဖြစ်ပွားခဲ့ပြီး လူသေဆုံးမှုများ၊ လူနေအိမ်နှင့်ဘာသာရေး အဆောက်အအုံ ပျက်စီးမှုများ၊ ဒေသခံပြည်သူ သောင်းချီ အိုးမဲ့အိမ်မဲ့မှုများ ဖြစ်ပွားခဲ့သည်။

CNI News

၂၀၂၂ ခုနှစ်၊ ဇွန်လ ၂၂

စစ်ကိုင်းတိုင်းဒေသကြီးနှင့် မကွေးတိုင်းဒေသကြီး(မြောက်ပိုင်း)တို့ရှိ အဓိက လမ်းမကြီးများ၏ ၉၀ ရာခိုင်နှုန်းနှင့် ကျေးရွာ အများစု၏ ၈၀ ရာခိုင်နှုန်းကို PDF များက စိုးမိုးထိန်းချုပ်ထားနိုင်ပြီဟု အမျိုးသားညီညွတ်ရေးအစိုးရ (NUG) ဇွန်လ ၂၁ ရက် ထုတ်ပြန်ခဲ့သည်။

အဆိုပါ ထုတ်ပြန်ချက်တွင် စတင် ဖွဲ့စည်းမှု တစ်နှစ်ကျော်ကာလ၊ ပြည်သူ့ခုခံတွန်းလှန်စစ် စတင်ပြီး (၉)လကျော် ကာလ အတွင်း ပြည်သူ့ကာကွယ်ရေးတပ်မတော်(PDF)၏ လေ့ကျင့်မှု၊ စုဖွဲ့မှု၊ ကွပ်ကဲမှု၊ တပ်ဆင်မှု၊ ထုတ်လုပ်မှု တို့သည် ပိုမို အား ကောင်းလျက် Professional Army တစ်ရပ်အဖြစ် တဖြည်းဖြည်း ပုံပေါ်လာပြီဖြစ်ကြောင်း၊ ယခုကာလတွင် ပြောက်ကျား စစ်သာမက လိုအပ်လျှင် တပ်ရင်းလိုက် ရင်ဆိုင်တိုက်ပွဲများ ဆင်နွှဲနိုင်သည့် အနေအထားသို့ ရောက်ရှိနေပြီဖြစ်ကြောင်း ဖော်ပြထားသည်။

ထို့နောက် စစ်လက်နက် ပစ္စည်းတပ်ဆင်မှုနှင့်ပတ်သက်၍ ဝယ်ယူတပ်ဆင်ခြင်း၊ ထုတ်လုပ်တပ်ဆင်ခြင်း နည်းလမ်း (၂)ခု ဖြင့် အနိမ့်ဆုံးလိုအပ်ချက် ပြည့်မီရေး ဆောင်ရွက်လျက်ရှိ NUG က ထုတ်ပြန်ခဲ့သည်။

NUG က “ နယ်မြေစိုးမိုးမှုအနေဖြင့် တိုင်းဒေသကြီးများဖြစ်သည့် စစ်ကိုင်းတိုင်းနှင့် မကွေးတိုင်း(မြောက်ပိုင်း)တို့ရှိ အဓိက လမ်းမကြီးများ၏ ၉၀ ရာခိုင်နှုန်းခန့်နှင့် ကျေးရွာအများစု၏ ၈၀ ရာခိုင်နှုန်းကို PDF များက စိုးမိုးထိန်းချုပ်ထားနိုင်ပြီဖြစ် သည်။ တနင်္သာရီတိုင်းနှင့် မန္တလေးတိုင်း(မြောက်ပိုင်း)တို့တွင် PDF တို့၏ လှုပ်ရှားမှုများ ပိုမိုအားကောင်းလာကာ ရန်ကုန် တိုင်း၊ ပဲခူးတိုင်း၊ ဧရာဝတီတိုင်း၊ နေပြည်တော်နှင့် မန္တလေးတိုင်းတို့တွင်လဲ မြို့ပြပြောက်ကျား လှုပ်ရှားမှုများ ဆက်လက် ရှင်သန်လျက်ရှိနေသည်”ဟု ပြောသည်။

 NUG ဝန်ကြီးချုပ် မန်းဝင်းခိုင်သန်း PDF စခန်းတစ်ခုကို သွားရောက်လေ့လာ

အလားတူ ပြည်နယ်များ ဖြစ်သည့် ကချင်ပြည်နယ်၊ ကယား(ကရင်နီ)ပြည်နယ်၊ ကရင်ပြည်နယ်၊ ချင်းပြည်နယ်၊ မွန်ပြည် နယ်(မြောက်ပိုင်း)တို့တွင် မဟာမိတ် EROs များနှင့် PDF တို့၏ စိုးမိုးထိန်းချုပ်နိုင်မှုများ တိုးပွားလျက်ရှိကာ ရခိုင်ပြည်နယ် နှင့် ရှမ်းပြည်နယ်(မြောက်ပိုင်း)တို့တွင်လည်း EROs တို့၏ စစ်ရေးလှုပ်ရှားမှုနှင့် နယ်မြေစိုးမိုးထိန်းချုပ် နိုင်မှုတို့ အားကောင်း လျက်ရှိသည်ဟု NUG ၏ ဇွန်လ ၂၁ ရက်နေ့ ထုတ်ပြန်ချက်မှာ ဖော်ပြထားသည်။

ထို့နောက် ၂၀၂၀ ရွေးကောက်ပွဲရလဒ်အရ ဖွဲ့စည်းပေါ်ပေါက်သော မြန်မာပြည်သူလူထုကို အမှန်တကယ် ကိုယ်စားပြုသည့် ပြည်ထောင်စုလွှတ်တော်ကိုယ်စားပြုကော်မတီ(CRPH)နှင့် အမျိုးသားညီညွတ်ရေးအစိုးရ(NUG)၊ မြန်မာနိုင်ငံရှိ တိုင်းရင်း သား လူမျိုးပေါင်းစုံ ကိုယ်စားပြုပါဝင် ဖွဲ့စည်းထားသော အမျိုးသားညီညွတ်ရေးအတိုင်ပင်ခံကောင်စီ(NUCC) တို့ကို တခဲ နက် ထောက်ခံလျက်ရှိပြီး နစက ပြုလုပ်မည့် အတုအယောင် ရွေးကောက်ပွဲကို မည်သည့် နည်းနှင့်မျှ လက်ခံမည် မဟုတ် သည့် မြန်မာပြည်သူလူထု၏ ဆန္ဒသဘောထားအမှန်ကို ဦးထိပ်ထားလျက် တော်လှန်ရေး အောင်မြင်သည်အထိ ဦးလည် မသုန် ကြိုးပမ်းဆောင်ရွက်သွားမည်ဟု NUG က ထုတ်ပြန်ခဲ့သည်။

လက်ရှိတွင် NUG ၏ လက်အောက်တွင် ပြည်သူ့ကာကွယ်ရေးတပ်ဖွဲ့(PDF) ၂ ဒသမ ၂ သန်းရှိကြောင်း၊ လက်နက်တပ် ဆင်ရန် လိုအပ်ချက်များ ရှိနေသေးကြောင်း NUG ၏ ကျန်းမာရေးနှင့် ပညာရေးဝန်ကြီးဖြစ်သူ ဒေါက်တာဇော်ဝေစိုးက ၂၀၂၂ ခုနှစ်၊ မေလ ၂၉ ရက်တွင် လန်ဒန်ရှိ London Southbank University မှာ မြန်မာများဖြင့် တွေ့ဆုံစဉ် ပြောကြားခဲ့သည်။