CNI News

၂၀၂၂ ခုနှစ်၊ နိုဝင်ဘာ ၂၁

အိန္ဒိယနိုင်ငံ၊ နိုင်ငံခြားရေးအတွင်းဝန် Shri vinay Mohan Kwatra သည် မြန်မာနိုင်ငံသို့ နိုဝင်ဘာ ၂၀ ရက်မှ ၂၁ ရက်အထိ အလုပ်သဘော လာရောက်၍ နှစ်နိုင်ငံ နယ်စပ်လုံခြုံရေးကိစ္စများကို ဆွေးနွေးခဲ့ကြောင်း မြန်မာနိုင်ငံဆိုင်ရာ အိန္ဒိယသံရုံးက ယနေ့ သတင်းထုတ်ပြန်ခဲ့သည်။

အဆိုပါ ခရီးစဉ်အတွင်း နှစ်နိုင်ငံနယ်စပ် စီမံခန့်ခွဲမှု၊ လုံခြုံရေးနှင့် ဆက်လက် ဆောင်ရွက်ဆဲ နှစ်နိုင်ငံအကြား ပူးပေါင်းဆောင်ရွက်မှုဆိုင်ရာ စီမံကိန်းများနှင့် မြန်မာနိုင်ငံ ဒီမိုကရေစီ အသွင်ကူးပြောင်းရေးတွင် အိန္ဒိယ၏ ပံ့ပိုး ကူညီမှုဆိုင်ရာ အရေးကြီးသော နှစ်နိုင်ငံ ကိစ္စရပ်များကို ဆွေးနွေးခဲ့ကြသည်ဟု အိန္ဒိယသံရုံးက ထုတ်ပြန်ခဲ့သည်။

ဦးဝဏ္ဏမောင်လွင်နဲ့ အိန္ဒိယနိုင်ငံ၊ နိုင်ငံခြားရေးအတွင်းဝန် Shri vinay Mohan Kwatra တို့တွေ့ဆုံစဉ်

အိန္ဒိယနိုင်ငံ၊ နိုင်ငံခြားရေးအတွင်းဝန် Shri vinay Mohan Kwatra သည် မြန်မာနိုင်ငံခရီးစဉ်အတွင်း နစက၏ နိုင်ငံခြားရေးဝန်ကြီး ဦးဝဏ္ဏမောင်လွင်၊ အမျိုးသားစည်းလုံးညီညွတ်ရေးနှင့်ငြိမ်းချမ်းရေး ဖော်ဆောင်ရေးညှိနှိုင်းမှု ကော်မတီ (NSPNC) ဥက္ကဋ္ဌလည်းဖြစ် နစက အဖွဲ့ဝင်လည်းဖြစ်သူ ဒုတိယဗိုလ်ချုပ်ကြီး ရာပြည့်တို့နှင့် တွေ့ဆုံ ဆွေးနွေးခဲ့သည်။

ပြီးခဲ့သည့် ၂၀၂၁ ခုနှစ်၊ ဒီဇင်ဘာလတုန်းကလည်း အိန္ဒိယနိုင်ငံခြားရေးအတွင်းဝန် Harsh Vardhan Shringla မြန်မာနိုင်ငံသို့ လာရောက်ခဲ့ပြီး နစက တာဝန်ရှိသူများနှင့် တွေ့ဆုံ ဆွေးနွေးခဲ့သေးသည်။

လက်ရှိတွင် အိန္ဒိယ-မြန်မာ နှစ်နိုင်ငံ နယ်စပ်၌ အိန္ဒိယကို တော်လှန်တိုက်ခိုက်နေသော ကသည်း၊ နာဂ သူပုန်များ ရှိနေသလို မြန်မာ့တပ်မတော်ကို တော်လှန်တိုက်ခိုက်နေသော နွေဦးတော်လှန်ရေး လက်နက်ကိုင် အဖွဲ့များ လှုပ်ရှားလျက်ရှိနေသည်။

CNI News
၂၀၂၂ ခုနှစ်၊ နိုဝင်ဘာ ၁၈

တိုင်းရင်းသားစည်းလုံးညီညွတ်ရေးနှင့် ပြည်တွင်း ငြိမ်းချမ်းရေးကို ရှေးရှုသောအားဖြင့် အကျဉ်းထောင်များတွင် ပြစ်ဒဏ် ကျခံလျက်ရှိသော AA၊ KIA၊ RCSS၊ KNU/KNLA-PC တို့မှ အဖွဲ့ဝင်များကို လွတ်ငြိမ်းချမ်းသာခွင့်ပေး လိုက်ကြောင်း နိုဝင်ဘာ ၁၈ ရက်တွင် နစက-က သတင်းထုတ်ပြန်ခဲ့သည်။

အဆိုပါ လွတ်ငြိမ်းချမ်းသာခွင့်တွင် ရက္ခိုင့်တပ်တော်(AA)မှ အဖွဲ့ဝင် ၁၇ ဦး၊ ကချင်လွတ်လပ်ရေးတပ်မတော်(KI A)မှ အဖွဲ့ဝင် ၁၇ ဦး၊ ရှမ်းပြည်ပြန်လည်ထူထောင်ရေးကောင်စီ(RCSS/SSA)မှ အဖွဲ့ဝင် ၅ ဦး၊ ကရင်အမျိုးသား အစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC)မှ အဖွဲ့ဝင် ၂ ဦးတို့ဖြစ်သည်။

လက်ရှိတွင် AA၊ KIA တို့နှင့် မြန်မာ့တပ်မတော်ကြား တိုက်ပွဲများ ဖြစ်ပွားလျက်ရှိသည်။ ထို ၂ ဖွဲ့သည် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)မထိုးရသေးသော အဖွဲ့များဖြစ်သလို နစက ကမ်းလှမ်း သည် ငြိမ်းချမ်းရေးဆွေးနွေးပွဲသို့ မတက်ရောက်နိုင်ကြောင်း ထုတ်ပြန်ထားသော အဖွဲ့တို့ဖြစ်သည်။

RCSS နှင့် KNU/KNLA-PC သည် NCA ထိုးထားသော လက်နက်ကိုင်များဖြစ်ပြီး နစက ကမ်းလှမ်းသည့် ငြိမ်းချမ်းရေး ဆွေးနွေးပွဲသို့ တက်ရောက် ဆွေးနွေးလျက်ရှိသော အဖွဲ့များဖြစ်သည်။

CNI News

၂၀၂၂ ခုနှစ်၊ နိုဝင်ဘာ ၁၈

၂၀၂၁ ခုနှစ်၊ ဖေဖော်ဝါရီ ၁၂ ရက်မှ ၂၀၂၂ ခုနှစ်၊ နိုဝင်ဘာ ၁၇ ရက်အထိ အကျဉ်းသား/သူ ၅၉၆၂၉ ဦးကို လွတ်ငြိမ်းချမ်းသာခွင့် ပေးခဲ့ကြောင်း နစက၏ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ယနေ့ (နိုဝင်ဘာ ၁၈ ရက်)တွင် ၂၁ ကြိမ်မြောက် သတင်းစာ ရှင်းလင်းပွဲမှာ ပြောကြားခဲ့သည်။

၂၀၂၁ ခုနှစ်၊ ဖေဖော်ဝါရီ ၁၂ ရက်(ပြည်ထောင်စုနေ့)က အကျဉ်းသား/သူ ၂၃၃၆၉ ဦး(နိုင်ငံခြားသား ၅၅ ဦး၊ ပြည်တွင်း ၂၃၃၁၄ ဦး)၊ ၂၀၂၁ ခုနှစ်၊ ဧပြီ ၁၇ ရက်(မြန်မာနှစ်သက်ကူးနေ့)တွင် အကျဉ်းသား/သူ ၂၃၁၈၄ ဦး (နိုင်ငံခြားသား ၁၃၇ ဦး၊ ပြည်တွင်း ၂၃၀၄၇ ဦး)၊ ၂၀၂၁ ခုနှစ်၊ အောက်တိုဘာ ၁၈ ရက်(သီတင်းကျွတ်အခါသမ ယ)၌ အကျဉ်းသား/သူ ၅၆၇၀ ဦး(ပြည်တွင်း ၅၆၇၉ ဦး) တို့ကို လွတ်ငြိမ်းချမ်းသာခွင့်ပေးခဲ့သည်။

 နစက-က လွတ်ငြိမ်းချမ်းသာခွင့်ပေးခဲ့တဲ့ စာရင်းကိုတွေ့ရစဉ်

ထို့နောက် ၂၀၂၂ ခုနှစ်၊ မတ်လ ၂ ရက်တွင် အကျဉ်းသား/သူ ၇ ဦး(နိုင်ငံခြားသား ၁ ဦး၊ ပြည်တွင်း ၆ ဦး)၊ ၂၀၂၂ ခုနှစ်၊ ဧပြီ ၁၇ ရက်(မြန်မာနှစ်သစ်ကူးနေ့)၌ ၁၆၉၁ ဦး (နိုင်ငံခြားသား ၄၂ ဦး၊ ပြည်တွင်း ၁၅၇၇ ဦး)၊ ၂၀၂၂ ခုနှစ်၊ အောက်တိုဘာ ၂၀ ရက်မှာ အကျဉ်းသား ၆ ဦး (ပြည်တွင်း ၆ ဦး)၊ ၂၀၂၂ ခုနှစ်၊ နိုဝင်ဘာ ၁၇ ရက် (အမျိုးသားနေ့)မှာတော့ အကျဉ်းသား ၅၇၇၄ ဦး(နိုင်ငံခြားသား ၄ ဦး၊ ပြည်တွင်း ၅၇၇၀ ဦး)တို့ကို နစက-က လွတ်ငြိမ်းချမ်းသာခွင့် ပေးခဲ့သည်။

ထို့နောက် နစကသည် ၂၀၂၁ ခုနှစ်မှ ၂၀၂၂ ခုနှစ်၊ နိုဝင်ဘာ ၁၇ ရက်အတွင်း နိုင်ငံခြားသား ၂၃၉ ဦး၊ ပြည်တွင်း အကျဉ်းသား/သူ ၅၉၃၉၀ ဦး စုစုပေါင်း ၅၉၆၂၉ ဦးကို လွတ်ငြိမ်းချမ်းသာခွင့် ပေးထားကြောင်း ဗိုလ်ချုပ်ဇော်မင်းထွန်းက ပြောသည်။

CNI News

၂၀၂၂ ခုနှစ်၊ နိုဝင်ဘာ ၂၁

တပ်မတော်ကို မြန်မာ့နိုင်ငံရေးကနေ ဆုတ်ခွာဖို့ တောင်းဆိုမှုများ ရှိနေသော်လည်း နိုင်ငံရေးအရ သဘောတူညီ ချက်များ အရင်ရအောင် ယူထားနိုင်မှသာ လက်တွေ့အကောင်အထည် ဖော်နိုင်မည် ဖြစ်သည့်အတွက် မည်သည့် သဘောတူညီချက်များ ရယူထားသင့်လဲဆိုသည့်အပေါ် မြန်မာ့နိုင်ငံရေးသမားများကြားတွင် ဆွေးနွေးငြင်းခုံ လျက်ရှိ နေသည်။

တပ်မ‌တော်နှင့် အရပ်ဖက် ဆက်ဆံရေး ပုံမှန်အခြေအနေဖြစ်ရန် ကြိုးစားပြီး တပ်မတော်ကို နိုင်ငံရေးမှ ဆုတ်ခွာ ရန် ကြိုးစားရမည်ဖြစ်ကြောင်း၊ တပ်မတော်အနေဖြင့် မြန်မာ့နိုင်ငံရေးတွင် ၁၉၆၂ ကတည်းက ပါဝင်ခဲ့ကြောင်း၊ လတ်တလော အနေအထားအရ ဖယ်ရှားရန် မဖြစ်နိုင်ကြောင်း ပြည်သူ့ပါတီ (PP) ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းက “အဓိကကတော့ စစ်တပ်က နိုင်ငံရေးမှာ ပါဝင်နေတာက ပုံမှန်အခြေအနေမှ မဟုတ်ဘဲ၊ တချိန်ချိန်မှာ ကျနော်တို့က တကယ့်ကို စစ်မှန်တဲ့ ဒီမိုကရေစီ ဖြစ်ပေါ်လာဖို့ဆိုရင် ရွေးကောက်ခံ ကိုယ်စားလှယ်များနဲ့သာ ဖွဲ့စည်းတဲ့ လွှတ်တော် ဖြစ်ရမယ်၊ ဒါက ကျနော်တို့ နိုင်ငံရေး ရည်မှန်းချက်၊ သို့သော်လည်း ကျနော်တို့ နိုင်ငံရဲ့ ထူးခြားတဲ့ အခြေအနေအရ ပြောရရင် ၁၉၆၂ ကတည်းက စစ်တပ်က နိုင်ငံ‌ရေးမှာ ပါဝင်ရုံတင် မကဘဲနဲ့ သူက လွှမ်းမိုးတဲ့ အခြေအနေမှာ တောက်လျှောက်ဖြစ်လာတဲ့ အခါကြတော့ လတ်တလော ဖယ်ရှားဖို့ ဆိုတာကတော့ မဖြစ်နိုင်ဘူး။ သို့သော် တဖြည်းဖြည်းနဲ့ နိုင်ငံရေး တည်ငြိမ် ရင့်ကျက်လာတာနဲ့အမျှ ‌နောက်တစ်ခါ စစ်တပ်နဲ့ အရပ် ဖက်၊ စစ်ဖက် ဆက် ဆံရေးကို ပုံမှန်အခြေအနေ ဖြစ်အောင် ကြိုးစားနိုင်တာနဲ့အမျှ တဖြည်းဖြည်းသာ စစ်တပ်ကို ပြန်ပြီးတော့ ဆုတ်ခွာဖို့ ကျနော်တို့ ကြိုးစားကြရမယ်လို့ မြင်ပါတယ်” ဟု ပြောသည်။

ဗိုလ်ချုပ်ကြီးယွက်စစ်နဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်

လက်ရှိ မြန်မာ့နိုင်ငံရေးတွင် တပ်မ‌တော် ဆုတ်ခွာမှ ငြိမ်းချမ်းရေးဆွေးနွေးမည်ဟု တိုင်းရင်းသား လက်နက်ကိုင် အဖွဲ့အစည်းများမှ ပြောဆိုမှုများလည်း ရှိနေသည်။

ရခိုင်ပြည်လွတ်မြောက်ရေးပါတီ (ALP) မှ ဒုဥက္ကဋ္ဌ ဒေါ်စောမြရာဇာလင်းက “အဓိကက‌တော့ ဖွဲ့စည်းပုံလို့ ပြောလို့ ရပါတယ်။ ဒီလို ပြောလိုက်လို့ ရှိရင်လည်း ဖွဲ့စည်းပုံဆိုတာ စာအုပ်တစ်အုပ်ပဲ ဖြစ်တယ်၊ ဒီဖွဲ့စည်းပုံကို လိုက်နာ ကျင့်ကြံဖို့ ဆိုလို့ရှိရင် လူသားတွေကပဲ လိုက်နာကျင့်ကြံရတာ ဖြစ်ပါတယ်။ လိုက်နာကျင့်ကြံဖို့ပဲ အဓိက ကြိုးပမ်း ရတာ ဖြစ်ပါတယ်။ အာဏာခွဲဝေမှုပါပဲ။ ဖွဲ့စည်းပုံဆိုတာ ပြည်ထောင်စုနဲ့ ပြည်နယ်ကြားမှာ ဘယ်လို အာဏာခွဲဝေ မလဲ၊ တနည်းအာဖြင့် ပြောရမယ်ဆိုလို့ရှိရင် တိုင်းရင်းသား လက်နက်ကိုင် တော်လှန်ရေး အဖွဲ့အစည်းများ အသီး သီး ကိုယ့်ဒေသကို အုပ်ချုပ်လိုတယ်၊ ကိုယ့်ဒေသ ဖွံ့ဖြိုးတိုးတက်ရေးကို ကိုယ်တိုင် လုပ်ချင်ကြတယ်ဆိုတဲ့ ရည် မှန်းချက်နဲ့ပဲ အလုပ်လုပ်ခဲ့ကြတာ ဖြစ်ပါတယ်။ အဲဒီအတွက်ကြောင့် ဒီအာဏာခွဲဝေရေးကို ကျမတို့ ဘယ်လို ညှိနှိုင်းလို့ ရမလဲဆိုတာက‌တော့ အရေးကြီးဆုံးပဲ ဖြစ်ပါတယ်” ဟု CNI သတင်းဌာနသို့ ပြောသည်။

အမျိုးသား စည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်ရေးကော်မတီ(NSPNC)နှင့် ပြည်ထောင်စု ငြိမ်းချမ်းရေး ဆွေးနွေးမှု ပူးတွဲကော်မတီ(UPDJC) နိုင်ငံရေးပါတီများ အစုအဖွဲ့တို့ တွေ့ဆုံမှုတွင်လည်း နိုင်ငံရေး ပါတီများမှ မြန်မာ့နိုင်ငံရေး‌တွင် တပ်မတော် နောက်ဆုတ်ရန် တင်ပြတောင်းဆိုမှုများ ရှိသည်။

မြန်မာ့တပ်မတော် ဆန့်ကျင်ကြောင်း ဆန္ဒပြနေစဉ် (ဖရွန်တီးယားမြန်မာ)

ရခိုင်အမျိုးသားပါတီ (ANP)မှ ဥက္ကဋ္ဌ ဦးသာထွန်းလှက “မြန်မာ့နိုင်ငံရေးမှာ တပ်မတော် နောက်ဆုတ်ဖို့ဆိုတာ တပ်မတော်ကတော့ အဲဒီ သဘောထား ပေးလိမ့်မယ် မထင်ဘူး။ အဲဒါကြောင့် မြန်မာနိုင်ငံမှာက ပါဝင်ပတ်သက်တဲ့ လူတွေ တကယ်လို့များ မြန်မာနိုင်ငံကို ဖက်ဒရယ်ပြည်ထောင်စု တည်ဆောက်ရေးဆိုတဲ့ မူအပေါ်မှာ ခိုင်ခိုင်မာမာ နိုင်ငံရေး သဘောတူညီချက်တွေ ရယူဖို့ လိုလိမ့်မယ်၊ နိုင်ငံ‌ရေး သဘောတူညီချက် ရယူပြီးမှ ဒီဖက်ဒရယ် ပြည်ထောင်စု တည်ဆောက်ရေး လုပ်ငန်းစဉ်ကို အမြန်ဆုံး အကောင်အထည်ဖော်ဖို့ လိုလိမ့်မယ်ထင်တယ်၊ အမြန် ဆုံး အကောင်အထည်ဖော်နိုင်မှ ဒီမြန်မာနိုင်ငံမှာ ဖြစ်ပျက်နေတဲ့ နိုင်ငံရေးပြဿနာက ပြီးပြတ်မှု ဖြစ်သွားလိမ့်မယ်၊ အဲဒီလို အဖွဲ့တစ်ဖွဲ့ရဲ့ သဘောထားကို လိုက်ပြီး အကောင်အထည်ဖော်တဲ့ ပုံစံမျိုးဆိုရင်တော့က မြန်မာနိုင်ငံ နိုင်ငံ ရေး ပြဿနာက ဖြေရှင်းလို့ရနိုင်မယ့် အခြေအနေမျိုးမှာ ဖြေရှင်းဖို့အတွက် ရနိုင်မယ်လို့က မမြင်ဘူး။ အဲဒါကြောင့် အဓိက အရေးကြီးတာက တွေ့ဆုံသင့်၊ တွေ့ဆုံထိုက်တဲ့ သူတွေ တွေ့ဆုံပြီးရင် နိုင်ငံရေးသဘောတူချက် တစ်ရပ် ရယူပြီးမှ အဲဒီသဘောတူညီချက်ကို အမြန်ဆုံး လက်တွေ့ အကောင်အထည်ဖော်တဲ့ အစီအစဉ်တွေနဲ့ လုပ်ကိုင် ဆောင်ရွက်မှသာ မြန်မာနိုင်ငံ နိုင်ငံရေးပြဿနာ ပြီးပြတ်မယ်လို့ မြင်တယ်၊ ဒါက‌တော့ ကျနော့်အမြင်ပါ”ဟု CNI သတင်းဌာနသို့ ပြောသည်။

လက်ရှိတွင် မြန်မာ့တပ်မတော်သည် ၂၀၀၈ ဖွဲ့စည်းပုံအခြေခံဉပဒေအရ လွှတ်တော်၌ ရွေးကောက်ခံစရာ မလိုဘဲ တပ်မတော်သား ၂၅ ရာခိုင်နှုန်းကို ကိုယ်စားလှယ်ခန့်အပ်ခွင့် ရရှိထားသည်။

အလားတူ ၂၀၀၈ ဖွဲ့စည်းပုံအခြေခံဉပဒေ ပုဒ်မ ၆ (စ)တွင် နိုင်ငံတော်၏ အမျိုးသားနိုင်ငံရေးဦးဆောင်မှု အခန်း ကဏ္ဍတွင် တပ်မတော်က ပါဝင်ထမ်းဆောင်နိုင်ရေးတို့ကို အစဉ်တစိုက် ဦးတည်သည်ဟု ပြဋ္ဌာန်းထားသည်။

တချို့သော နိုင်ငံရေးလေ့လာသုံးသပ်သူများကတော့ မြန်မာ့တပ်မတော်ကို နိုင်ငံရေးက ဆုတ်ခွာဖို့ တောင်းဆို နေသော်လည်း လက်နက်ကိုင်အဖွဲ့များကလည်း နိုင်ငံရေးက ဆုတ်ခွာဖို့လိုအပ်ကြောင်း၊ သို့မဟုတ်ပါက တပ် မတော်ကို နိုင်ငံရေးက ဆုတ်ခွာဖို့ ကြိုးပမ်းချက်မှာ အကောင်အထည် ပေါ်လာဖို့ အားနည်းနိုင်ကြောင်း သုံးသပ် ကြသည်။

CNI News

၂၀၂၂ ခုနှစ်၊ နိုဝင်ဘာ ၁၈

ထိုင်းနိုင်ငံရှိ မြန်မာရွှေ့ပြောင်းလုပ်သားများသည် လက်ရှိတွင် ဗီဇာသက်တမ်းတိုးလုပ်ဆောင်ခြင်းနှင့် နိုင်ငံကူး လက်မှတ်အသစ် ပြုလုပ်ရာတို့တွင် အခက်အခဲများရှိနေကြကြောင်း ထိုင်းရှိ အလုပ်သမားအရေး ဆောင်ရွက် နေသူများက CNI သတင်းဌာနသို့ ပြောသည်။

ကိုဗစ်ကာလများကြောင့် ရွှေ့ပြောင်းလုပ်သားများအား ထိုင်းမှ ဗီဇာသက်တမ်းကို ၂၀၂၃ ခုနှစ် ဖေဖော်ဝါရီ ၁၃ ရက်အထိ တိုးပေးထားခြင်းဖြစ်ကာ မကြာခင်တွင် သက်တမ်းကုန်တော့မည့် ရွှေ့ပြောင်းလုပ်သားများအနေဖြင့် အခက်အခဲများရှိနေကြောင်း ထိုင်းရှိ အလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။

MWRNမှ အကြံပေး ဦးအောင်ကျော်က “တော်တော့်ကို ခေါင်းကိုက်စရာ ကောင်းလောက်အောင် အရှုပ်အထွေး တွေ ဖြစ်နေတယ်။ တချို့ကျတော့လည်း ထိုင်းနိုင်ငံအတွင်းမှာရှိတဲ့ ဒေသအာဏာပိုင်တွေကနေ နေထိုင်ခွင့် အလုပ်လုပ်ခွင့်ထုတ်ပေးတဲ့ ပန်းရောင်ကတ် ဆိုတာမျိုး ရိုက်တဲ့ဟာနေရာကို ပြောင်းသွားတဲ့သူတွေကလည်း ပြောင်းသွား။ တစ်ချို့စက်ရုံတွေကလည်း လမ်းပန်းဆက်သွယ်ရေး အခြေအနေတွေလည်း ရောဂါတွေကလည်း လျော့ပါးသွားပြီဖြစ်တဲ့အတွက်ကြောင့် တချို့စက်ရုံတွေလည်း စီစဉ်နေပြီဆိုတာက မြန်မာနိုင်ငံကို သူ့လုပ်သား တွေကို ပြန်ပို့မယ်။ ပို့ပြီးမှ ပြန်ပြီးမှ တရားဝင်စာချုပ်ချုပ်ပြီး ပြန်တက်မယ်။ လမ်းကြောင်းတွေ အမျိုးမျိုး သွားနေကြတယ်။ စက်ရုံတွေမှာ လျာထားနေကြတာ။ တချို့လည်း အလုပ်သမားတွေကို ဆွေးနွေးပွဲတွေမှာ ခေါ်ပြီး အသိပေးနေပြီ။ နေရပ်ကို ပြန်ပို့မယ်၊ စာချုပ်ချုပ်ပြီး ပြန်တက်မယ်။ တချို့ အလုပ်သမားတွေ ကြတော့လည်း နေရပ်ရေး မပြန်လိုပါဘူး။ ကျမတို့မှာ နေစရာအိမ်လည်းမရှိတော့ဘူး။ ကျမတို့ဒေသတွေမှာ စစ်မက်တွေ ဖြစ်ပွား နေပါတယ်။ ဒါတွေလည်း ကျနော်တို့ကို လာရင်ဖွင့်တာတွေ အများကြီးဆိုတော့ ကျနော်တို့လည်း ဘယ်လို လုပ်ပေးလို့ပေးရမှန်းမသိ ဖြစ်နေတာ။ တော်တော်လေးကို အခက်အခဲတွေရှိနေပါတယ်”ဟု ပြောသည်။

ထိုင်းနိုင်ငံတွင် ဗီဇာသက်တမ်းတိုးဆောင်ရွက်နေကြသည့် နိုင်ငံခြားသားများ

ရွှေ့ပြောင်းလုပ်သားများနှင့်ပတ်သက်၍ ထိုင်း-မြန်မာ နှစ်နိုင်ငံ MOU ရေးထိုးထားရာတွင် တစ်ဦးလျှင် ၄ နှစ်သက်တမ်းရှိပြီး ထိုင်းတွင် ဗီဇာသက်တမ်းတိုးရာတွင်လည်း ၂ နှစ်တစ်ကြိမ်ဖြင့် စုစုပေါင်း ၂ ကြိမ် သက်တမ်း တိုးရကြောင်းနှင့် ၄ နှစ်ပြည့်သည့်အခါ နေရပ်သို့ပြန်ရပြီး စာချုပ်ထပ်မံချုပ်ဆိုပြီးမှ ထိုင်းသို့တစ်ခါ ပြန်ဝင်ရခြင်း ဖြစ်ကြောင်း သိရသည်။

ပွဲစားများဖြင့် ၂၀၂၃ ခုနှစ် ဖေဖော်ဝါရီ ၁၃ ရက်နေ့အထိ ဗီဇာသက်တမ်းတိုးခြင်းလုပ်ဆောင်ထားသည့် အချို့ မြန်မာရွှေ့ပြောင်းလုပ်သားများသည် ယခုလက်ရှိအထိ စာအုပ်ပြန်လည်မရရှိသေးသူများလည်း ရှိကြောင်း ထိုင်းရှိ အလုပ်သမားအရေးဆောင်ရွက်နေသူများထံက သိရသည်။

လက်ရှိတွင် ထိုင်းနိုင်ငံ၌ PJ (passport for job) နိုင်ငံကူးလက်မှတ် သက်တမ်းကုန်မည့် မြန်မာရွှေ့ပြောင်း လုပ်သားများ နိုင်ငံကူးလက်မှတ်စာအုပ်အသစ်ပြုလုပ်သည့်အခါတွင် မြန်မာသံရုံး လုပ်ဆောင်နေပုံတချို့ကြောင့် အခက်အခဲများနှင့် ကြုံတွေ့နေရကြောင်း ရွှေ့ပြောင်းအလုပ်သမားအရေး ကူညီဆောင်ရွက် ပေးနေသည့် ကိုသားကြီးက CNI သတင်းဌာနသို့ ပြောသည်။

“နိုင်ငံကူးလက်မှတ်ဆိုတဲ့ အနီရောင်စာအုပ်တစ်အုပ် ထုတ်လို့ရှိရင် တိုကင်လက်မှတ်ဝယ်ရတာက ရုပ်အဆိုးဆုံးပဲ။ ဒါဟာ နိုင်ငံရဲ့ image အတွက်လည်း မကောင်းဘူးပေါ့။ ဒီနေရာမှာ ဒီ စီနီယာနံပါတ်တွေရမှ ပတ်စပို့လျှောက်ရန် အတွက် ပတ်စပို့ဝင်ရိုက်ရမှာကို။ အဲဒီတော့ ဒီနံပါတ်တွေ ဒီကတ်ပြားတွေရဖို့အတွက် လူတစ်ယောက်ကို ဘတ် ၄၀၀၀ ကနေ ၆၀၀၀ အထိ ပေးဝယ်နေရတယ်။ အဲဒီတော့ စာအုပ်လုပ်တာ ၈၀၀၊ ၁၀၀၀၊ ၁၅၀၀ နဲ့ဆိုရင် လူတစ်ယောက်အတွက် ပတ်စပို့တစ်အုပ်က ဘတ် ၄၊ ၅ ၊ ၆၀၀၀၊ ၇၀၀၀ ကုန်တယ်။ ဒါကြောင့်မို့လို့ သက်ဆိုင်ရာသံရုံးမှာ တာဝန်ရှိတဲ့ ပုဂ္ဂိုလ်တွေကလည်း ဒီမြန်မာနိုင်ငံသားတွေအပေါ်မှာ ကုန်ကြမ်းပမာ အကျိုးစီးပွားတစ်ခုအဖြစ်နဲ့ လုပ်စားနေတာကို ကျနော်တို့ တွေ့ခဲ့ရတယ်။ လက်ရှိ တိုင်းပြည်ရဲ့ အခြေအနေနဲ့ ဘယ်သူ့ကို အပြစ်ပြောရမလဲလည်း မသိပါဘူး။ အဲဒီတော့ ကြားထဲက မြေစာပင်ဖြစ်တာကတော့ မြန်မာ ရွှေ့ပြောင်းအလုပ်သမားတွေပဲပေါ့”ဟု ၎င်းက ပြောသည်။

ကိုဗစ်ကာလ ထိုင်းတွင် ဗီဇာသက်တမ်းတိုးဆောင်ရွက်နေကြသည့် အခြေအနေ

ထို့အပြင် နိုင်ငံကူးလက်မှတ်အသစ်ပြုလုပ်ရန်အတွက် မြန်မာသံရုံးမှ ထုတ်ပေးသည့် ရက်ချိန်းအတိုင်း လာရောက် သော်လည်း ရုံးပိတ်ရက်များဖြစ်နေသဖြင့် သံရုံးမှာမဖွင့်လှစ်သောကြောင့် မြန်မာရွှေ့ပြောင်း လုပ်သားများအတွက် နစ်နာမှုများရှိကြောင်း သိရသည်။

ကိုသားကြီးက “အဲဒါကပိုဆိုးတယ်။ အဲဒါကအများကြီးပဲ။ အစောကြီးကတည်းက ထိုင်းနိုင်ငံဆိုင်ရာ မြန်မာသံရုံးက ပတ်စပို့ထုတ်ပေးတဲ့ စခန်းတွေမှာ တာဝန်ယူတဲ့ပုဂ္ဂိုလ်တွေက ရွှေ့ပြောင်းလုပ်သားတွေကို ချိန်းလိုက်တဲ့ ဒိတ်မှာ ရုံးပိတ်ရက် ဟုတ်၊ မဟုတ်ဆိုတာကို သူတို့သိဖို့လိုအပ်တယ်။ အဲဒီတော့ ချိန်းလိုက်တဲ့ရက်က ရုံးပိတ်ရက်ကြီး မကြည့်ဘဲနဲ့ ရက်ချိန်းကို ဖြစ်သလိုပေးလိုက်တယ်။ အလွယ်တကူ လုပ်လိုက်တယ်။ တချို့ နယ်မြေက အဝေးက ရွှေ့ပြောင်းလုပ်သားတွေဆို ခဲရာခဲဆစ် အလုပ်ကနေ ခွင့်ယူရတယ်။ ရက်လွန်သွားရင်လည်း အလုပ်ဖြုတ်ခံရမှာ ကြောက်ရတယ်။ ဒီလိုအလုပ်သမားတွေအတွက် အရမ်း ဂယက်ရိုက်စေတယ်။ အရမ်း ဒုက္ခရောက်စေတယ်။ အားလုံးဟာ စီမံခန့်ခွဲမှုတွေ ညံ့ဖျင်းတယ်လို့ ပြောချင်တယ်” ဟု ပြောသည်။

ထိုင်းနိုင်ငံရှိ မြန်မာသံရုံးမှ PJ (passport for job) နိုင်ငံကူးလက်မှတ် စာအုပ်အသစ်ပြုလုပ်ခြင်းအား နိုဝင်ဘာ ၇ ရက်နေ့တွင် စတင်ပြုလုပ်၍ ရကြောင်းနှင့် ကုန်ကျစရိတ်အနေဖြင့် ဘတ် ၈၀၀ ဖြစ်ကြောင်း ထုတ်ပြန် ကြေညာ ထားခြင်းဖြစ်သည်။
သို့သော် လက်ရှိတွင် မြန်မာရွှေ့ပြောင်းလုပ်သားများအနေဖြင့် ဗီဇာနှင့်ပတ်သက်၍ သော်လည်းကောင်း၊ နိုင်ငံကူးလက်မှတ်နှင့်ပတ်သက်၍သော်လည်းကောင်း ပွဲစားများဖြင့် ပြုလုပ်သည့်အခါတွင်လည်း ငွေကြေး လိမ်လည်ခံရမှုများပါ ကြုံတွေ့နေရကြောင်း သိရသည်။

CNI News

၂၀၂၂ ခုနှစ်၊ နိုဝင်ဘာ ၁၇

၂၀၂၀ ရွေးကောက်ပွဲပြဿနာကို ဦးတည်၍ ဖြေရှင်းခြင်းသည် အရင်းခံနိုင်ငံရေး ပြဿနာအား ဖြေရှင်းခြင်း မဟုတ်သဖြင့် လက်ရှိ နိုင်ငံရေး အကျပ်အတည်းများကို ဖြေရှင်းနိုင်မည်မဟုတ်ဟု ရှမ်းပြည်ပြန်လည်ထူထောင် ရေးကောင်စီ(RCSS)က ယနေ့(နိုဝင်ဘာ ၁၇ ရက်)တွင် ထုတ်ပြန်ခဲ့သည်။

အကြိမ် ၄၀ နှင့် ၄၁ ကြိမ်မြောက် အာဆီယံ ထိပ်သီး အစည်းအဝေး၏ ဆုံးဖြတ်ချက်များအား ကြိုဆိုခြင်းနှင့် ပတ်သက်သည့် ထုတ်ပြန်ချက်တွင် အထက်ပါအတိုင်း ပြောကြားထားခြင်း ဖြစ်သည်။

RCSS က “၁၉၄၇ ပင်လုံစာချုပ်ကို အကောင်အထည်ဖော်နိုင်မှ နိုင်ငံရေးပြဿနာများကို ဖြေရှင်းနိုင်မည်၊ ၂၀၂၀ ရွေးကောက်ပွဲပြဿနာကို ဦးတည်၍ ဖြေရှင်းခြင်းသည် အရင်းခံနိုင်ငံရေး ပြဿနာအား ဖြေရှင်းခြင်း မဟုတ် သဖြင့် လက်ရှိ နိုင်ငံရေး အကျပ်အတည်းများကို ဖြေရှင်းနိုင်မည်မဟုတ်”ဟု ပြောသည်။

ထို့နောက် အာဆီယံ အနေဖြင့် တွေ့ဆုံ ဆွေးနွေးမည်ဆိုလျှင် တိုင်းရင်းသား လက်နက်ကိုင် တော်လှန်ရေး အဖွဲ့ အစည်းများ(EAO)၊ နစက (SAC)၊ နိုင်ငံရေးပါတီများ၊ တတ်သိပညာရှင်များ၊ ဘာသာရေးခေါင်းဆောင်များ အပါ အဝင် Stakeholders များ အားလုံးနှင့် တွေ့ဆုံ ဆွေးနွေး၍ ဝိုင်းဝန်းကြိုးပမ်း နည်းလမ်းရှာနိုင်မှသာ လက်ရှိ နိုင်ငံရေး အကျပ်အတည်းကို ဖြေရှင်းနိုင်မည်ဟု RCSS က ထုတ်ပြန်ခဲ့သည်။