CNI International News

ဘေဂျင်း၊ ဧပြီ ၁၉

G-7 အဖွဲ့ဝင် နိုင်ငံများ၏ ဂျပန်ဆွေးနွေးပွဲအပြီး တရုတ်နိုင်ငံ၏ မူဝါဒများအပေါ် ဝေဖန်မှုသည် တရုတ်နိုင်ငံအား မလိုမုန်းတီး၍ သွားပုတ်လေလွင့်ပြောကာ အရှက်ခွဲမှုဖြစ်ကြောင်း တရုတ်နိုင်ငံက အင်္ဂါနေ့တွင် တုံ့ပြန် ပြောကြား ခဲ့သည်ဟု CNA သတင်းတွင် ဖော်ပြသည်။

G-7 နိုင်ငံခြားရေးဝန်ကြီးများ၏ အစည်းအဝေးသည် တရုတ်နိုင်ငံ၏ တည်ကြည်၍ ဂုဏ်သိက္ခာရှိသော ရပ်တည် မှုနှင့် မှန်ကန်သော အရှိတရားအပေါ် အလေးမထားမှုဖြစ်ကြောင်း၊ တရုတ်၏ ပြည်တွင်းရေးကို ရုန်းရင်း ကြမ်းတမ်းစွာ ဝင်ရောက်စွက်ဖက်ကာ သွားပုတ်လေလွင့် ပြောဆို အရှက်ခွဲမှုသာဖြစ်ကြောင်း တရုတ်နိုင်ငံခြား ရေးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin) က သတင်းထောက်များကို ပြောခဲ့သည်။

G-7 သံတမန်များမှ ပူးတွဲ ထုတ်ပြန်ချက်ပါ ထိုင်ဝမ်၊ အရှေ့တရုတ်ပင်လယ်၊ တောင်တရုတ်ပင်လယ်၊ ရှင်ကျန်း ဒေသနှင့် တိဗက်ဒေသတို့အပေါ် စိုးရိမ်ကြောင်း ပြောဆိုမှုများနှင့် ပတ်သက်၍ မေးမြန်းခဲ့ရာတွင် ဝမ်က အိမ်ရှင် ဂျပန်နိုင်ငံအား ထောက်ပြကာ ထုတ်ပြန်ချက်ကို ရှုတ်ချခဲ့သည်။

အဆိုပါ ထုတ်ပြန်ချက်သည် တရုတ်အား ဆန့်ကျင်၊ ဖိနှိပ်ရန်အတွက် အထက်စီးဆန် ဘက်လိုက်၍ မကောင်းသော ရည်ရွယ်ချက် ရှိနေသည်ဟု ဝမ်က ပြောသည်။

G-7 အဖွဲ့ကိုတွေ့ရစဉ်

တရုတ်အစိုးရအနေဖြင့် ထိုထုတ်ပြန်ချက်နှင့် ပတ်သက်သည့် မကျေနပ်မှု၊ ပြင်းပြင်းထန်ထန် ကန့်ကွက်မှု တို့ကို လည်း ဂျပန်ကိုယ်စားလှယ်ထံသို့ ဖော်ပြခဲ့ပြီး ဖြစ်သည်ဟုလည်း ၎င်းက ပြောသည်။

တရုတ်၏ ထိုင်ဝမ်အနီး သုံးရက်ကြာ စစ်ရေးလေ့ကျင့်မှုသည် မကြာသေးခင်က အဆုံးသတ်ခဲ့သည်။ ထိုလုပ်ရပ်က ထိုင်ဝမ်အား သိမ်းပိုက်ရန် ကြိုတင်ပြင်ဆင်မှု တစ်ခုအဖြစ် မှတ်ယူထားသည်။

တရုတ်နှင့် ထိုင်ဝမ်တို့သည် လွန်ခဲ့သော နှစ် ၇၀ ကျော်ခန့်မှ သီးခြားရပ်တည်နေသည့် နိုင်ငံများ ဖြစ်သော်လည်း တရုတ်အစိုးရသည် ထိုင်ဝမ်အား ၎င်းတို့ပိုင်အဖြစ် သတ်မှတ်ထားကာ လိုအပ်ပါက ထိုင်ဝမ်အား အင်အားသုံး သိမ်းပိုက်သွားမည်ဟုလည်း ထုတ်ဖော်ပြောဆိုထားသည်။

ထိုင်ဝမ်သည် ငြင်းဆို၍မရသော တရုတ်ပိုင်နက် တစ်ခုဖြစ်ကာ တရုတ်တစ်နိုင်ငံတည်း မူဝါဒသာလျှင် ထိုင်ဝမ် ရေလက်ကြား၏ တည်ငြိမ်ရေးနှင့် ငြိမ်းချမ်းရေးတို့အတွက် အားထားရာဖြစ်ကြောင်း၊ ငြိမ်းချမ်းရေးကို အမှန်တ ကယ် ထိန်းသိမ်းရန်အတွက် ထိုင်ဝမ်လွှတ်လပ်ရေးဆီသို့ ဦးတည်သော လုပ်ဆောင်မှုတိုင်းကို ဆန့်ကျင်၊ အဆုံး သတ်ရမည်ဖြစ်ကြောင်း ဝမ်က ပြောသည်။

Taiwan ကိုတွေ့ရစဉ်

ဟောင်ကောင်၊ ရှင်ကျန်း၊ တိဗက်ဒေသတို့နှင့် ပတ်သက်၍လည်း ထိုအကြောင်းအရာများသည် တရုတ်၏ ပြည် တွင်းရေးနှင့် လုံးဝသက်ဆိုင်သည့် အကြောင်းအရာများသာ ဖြစ်ကြောင်း၊ တရုတ်အစိုးရအနေဖြင့် ပြည်တွင်းရေး အပေါ် ဝင်ရောက်စွက်ဖက်မှု ပုံစံတိုင်းကို လုံးဝ လက်ခံသွားမည် မဟုတ်ကြောင်းလည်း ဝမ်က ပြောသည်။

အရှေ့နှင့်တောင်တရုတ် ပင်လယ်တို့မှ အခြေအနေများသည်လည်း လုံးဝ တည်ငြိမ်နေသည့် အနေအထားတွင် ရှိနေသည်ဟု ၎င်းက ထပ်လောင်း ပြောဆိုသည်။

Source: CNA

CNI International News

မော်စကို၊ ဧပြီ ၁၉

ရုရှားသမ္မတ ဗလာဒီမာပူတင် (Vladimir Putin) သည် ၎င်းတို့ကျူးကျော်ထားသော ယူကရိန်းရှိဒေသနှစ်ခုမှ ရုရှားတပ်မှူးများနှင့် သွားရောက်တွေ့ဆုံခဲ့သည်ဟု ရိုက်တာသတင်းတွင် ဖော်ပြသည်။

တဖက်တွင်လည်း ယူကရိန်းသမ္မတ ဗိုလိုဒီမီယာ ဇာလန်းစကီး (Volodymyr Zelenskiy) သည် နိုင်ငံအရှေ့ပိုင်းရှိ ယူကရိန်းတပ်ဖွဲ့ဝင်များနှင့် သွားရောက်တွေ့ဆုံခဲ့ကာ တိုက်ပွဲအခြေအနေများနှင့် ပတ်သက်၍ အကျဉ်းရုံး ပြောဆို ခဲ့သည်ဟု ယူကရိန်းသမ္မတရုံးမှ ထုတ်ပြန်သည်။

ရုရှားသမ္မတရုံးမှ ထုတ်ပြန်ချက်တွင် ပူတင်သည် တနင်္လာနေ့က ယူကရိန်းတောင်ပိုင်း ခါဆွန် (Kherson) ဒေသမှ စစ်ဘက်ညွှန်ကြားရေးအစည်းအဝေးတစ်ခုသို့ တက်ရောက်ခဲ့ကာ အရှေ့ပိုင်း လူဟန့်ခ် (Luhansk)ဒေသရှိ အမျိုးသားအစောင့်တပ်ဖွဲ့ရုံးချုပ်သို့လည်း သွားရောက်ခဲ့သည်ဟု သိရသည်။ ပူတင်သည် တောင်ပိုင်းရှိ ခါဆွန်နှင့် ဇာပိုရေးဇီးယား (Zaporizhzhia) တို့ရှိ အခြေအနေများနှင့်ပတ်သက်၍ ရုရှားတပ်မှူးများ၏ အစီရင်ခံမှုများကို နားထောင်ခဲ့သည်။

လုံခြုံရေးအရ ကြိုတင်ပြင်ဆင်မှုများအဖြစ် ယခုခရီးစဉ်သို့ ရုရှားကာကွယ်ရေးဝန်ကြီးနှင့် စစ်ဦးစီးချုပ်တို့ လိုက်ပါ ခဲ့ခြင်းမရှိကြောင်းလည်း ကရင်မလင်၏ ထုတ်ပြန်ချက်တွင်ဖော်ပြထားသည်။ ပူတင်၏ခရီးစဉ်အပေါ် ယူကရိန်း သမ္မတအကြံပေးတစ်ဦးဖြစ်သူက နောက်လိုက်များ၏ ရာဇဝတ်မှုများကို ကြည့်ရှုခံစားရန်အတွက် အစုလိုက် အပြုံ လိုက် လူသတ်မှုတရားခံ၏ သိမ်းပိုက်ခံထားရသော၊ ပျက်စီးနေသောဒေသများသို့ နောက်ဆုံးအထူးခရီးစဉ် ဟု တွစ်တာတွင် ရေးသားလှောင်ပြောင်ခဲ့သည်။

ရုရှားထိန်းချုပ်ထားသော ယူကရိန်းနိုင်ငံ Kherson ဒေသရှိ "Dnieper" တပ်ဌာနချုပ်သို့ သွားရောက် လည်ပတ်  စဉ် Dnieper တပ်ဖွဲ့၏တပ်မှူးမှ ရုရှားသမ္မတ ပူတင်အား အလေးပြုနှုတ်ဆက်စဉ်(ဓါတ်ပုံ-ရိုက်တာ)

ရုရှားတပ်များသည် ၎င်းတို့သိမ်းပိုက်ထားရာ ယူကရိန်းနယ်မြေများတွင် စစ်ရာဇဝတ်မှုများ ကျူးလွန်နေသည်ဟု ယူကရိန်းနှင့်အနောက်အုပ်စုတို့က စွပ်စွဲထားသော်လည်း ရုရှားဘက်က ငြင်းဆိုသည်။ ခါဆွန်၊ ဇာပိုရေးဇီးယား၊ လူဟန့်ခ် နှင့် ဒွန်းနက်ခ်ဒေသတို့သည် ပြီးခဲ့သည့် စက်တင်ဘာလ လူထူဆန္ဒခံယူပွဲပြီးနောက် ရုရှားတို့ သိမ်းပိုက်ခဲ့ သည့်ဒေသလေးခုဖြစ်ပြီး ထို ဆန္ဒခံယူပွဲကိုအတုအယောင်ဟု ယူကရိန်းဘက်က ပြောသည်။ ယင်းဒေသများတွင် ရုရှားတပ်များသည် အပြည့်အဝထိန်းချုပ်ထားနိုင်ခြင်းလည်း မရှိသေးပေ။

ရုရှားတပ်ဖွဲ့များသည် ခါဆွန်မြို့မှ ပြီးခဲ့သည့်နိုဝင်ဘာလတွင် ဆုတ်ခွာခဲ့ရပြီး ယူကရိန်း၏ နွေဦးထိုးစစ်ဆင်မှုများ အပေါ် ကြိုတင်ပြင်ဆင်ထားမှုအနေဖြင့် တစ်ဖက်ရှိ ဒီနီပရို (Dnipro) မြစ်ကမ်းတွင် အင်အားဖြည့်တင်းမှုများ လုပ်ဆောင်ထားသည်။

ယူကရိန်းကျူးကျော်စစ်ဖြစ်ပွားပြီး ၁၄ လကြာချိန်တွင် အနောက်အုပ်စုခေါင်းဆောင်များစွာက ကိယက်ဗ်(Kyiv) သို့ လာကာ ဇာလန်းစကီးနှင့်တွေ့ဆုံခဲ့သော်လည်း ပူတင်အနေဖြင့် ရုရှားတို့ ထိန်းချုပ်ထားသော ယူကရိန်း နယ်မြေများသို့ သွားရောက်မှုနည်းပါးခဲ့သည်။ ပြီးခဲ့သည့်လတွင် ပူတင်သည် ခရိုင်းမီးယား (Crimea) နှင့် ဒွန်းနက်ခ် (Donetsk) ဒေသရှိ မာရီယူပေါလ် (Mariupol) မြို့သို့ သွားရောက်လည်ပတ်ခဲ့သည်။

Source:Reuters

CNI International News

ခါတွမ်၊ ဧပြီ ၁၉

ဆူဒန်နိုင်ငံအတွင်းမှာ ဗိုလ်ချုပ်ကြီး နှစ်ဦးကြား သဘောထားကွဲလွဲမှုကနေ ဖြစ်ပေါ်လာသော တိုက်ပွဲများကြောင့် သေဆုံးသူ ၂၀၀ ကျော်ရှိလာခဲ့ပြီးဖြစ်သလို အပစ်အခတ်ရပ်စဲရေး အခြေအနေမှာလည်း မျှော်လင့်ချက် နည်းပါးနေ ကြောင်း သိရသည်။

အပြင်းအထန် ပစ်ခတ်တိုက်ခတ်မှုများ၊ စစ်လေယာဉ်များ၏ အသံများက မကြာမီ စတင်တော့မည့် ဆူဒန်နိုင်ငံ၏ အပစ်အခတ်ရပ်စဲရေး အစီအစဉ်နှင့် ပတ်သက်သည့် မျှော်လင့်ချက်များကို ပျက်စီးစေလျက်ရှိသည်ဟု ဘီဘီစီ အင်္ဂလိပ်သတင်းတွင် ဖော်ပြသည်။

ဆူဒန်မြို့တော် ခါတွမ် (Khartoum) မြို့ လေဆိပ်အနီး စစ်ဌာနချုပ်များ တစ်ဝိုက်တွင် တိုက်ပွဲများ ဆက်လက် ပြင်းထန်နေဆဲ ဖြစ်သည်။

ထိုနေရာ၏ ပတ်ပတ်လည်တွင် လူနေဧရိယာများ ရှိသည်။ ရန်ဘက် ဗိုလ်ချုပ်ကြီးနှစ်ဦး၏ တိုင်းပြည်အား ထိန်းချုပ်ရန် အားပြိုင်မှုကြောင့် စနေနေ့တွင် တိုက်ပွဲများ စတင် ပေါ်ပေါက်လာခဲ့ခြင်း ဖြစ်သည်။

လူနေထူထပ်သော ဧရိယာများ၌ ဖြစ်ပွားလျက်ရှိသော တိုက်ပွဲများတွင် တင့်ကားများ၊ အမြောက်များအပြင် တခြား သော လက်နက်ကြီးများကို အသုံးပြုလျက်ရှိပြီး စစ်လေယာဉ်များနှင့် လေယာဉ်ပစ် အမြောက်များပါ ပါဝင်မှု ကြောင့် သုံးရက်အတွင်း သေဆုံးသူ အရေအတွက်မှာ ၂၀၀ ကျော်ခဲ့ပြီလည်း ဖြစ်သည်။

ဆူဒန်နိုင်ငံအတွင်း တိုက်ပွဲများ ဖြစ်ပွားနေစဉ်

မြို့တော်နှင့် တခြားသော ဒေသများရှိ လမ်းမများပေါ်မှ တိုက်ပွဲများကြောင့် ပြည်သူများစွာသည် ၎င်းတို့နေအိမ် သို့မဟုတ် ပုန်းခိုရာဒေသများတွင် ပိတ်မိလျက်ရှိပြီး လူသားချင်း စာနာထောက်ထားမှုဆိုင်ရာ အကူအညီပေးရေး အတွက် ၂၄ နာရီကြာ အပစ်အခတ်ရပ်စဲရန် ဗိုလ်ချုပ်ကြီး နှစ်ဦးအကြား သဘောတူညီချက် ရရှိခဲ့သည်ဟုလည်း သိရသည်။

ဆူဒန်စစ်တပ်နှင့် RSF လက်နက်ကိုင် အဖွဲ့တို့အကြား တိုက်ပွဲများကြောင့် ဒေသခံများစွာသည် အစားအစာ၊ ရေပြတ်လပ်မှုနှင့် ရင်ဆိုင်နေရသည်။

ခါတွမ်နှင့် တခြားသော နေရာများ အပါအဝင် ဆူဒန်ရှိ တိုက်ပွဲများသည် ဆက်လက် ဖြစ်ပွားနေကာ တိုက်ခိုက်မှု များ ရပ်တန့်သွားမည့် အရိပ်အယောင် မမြင်တွေ့ရဟု ကုလသမဂ္ဂအထွေထွေအတွင်းရေးမှူးချုပ် အန်တိုနီယို ဂူတာရတ်စ် (Antonio Guterres) ၏ ပြောခွင့်ရပုဂ္ဂိုလ်က အင်္ဂါနေ့တွင် ပြောသည်။

နောက်လာမည့် ၂၄ နာရီအတွင်း တိုက်ခိုက်မှုများ ရပ်တန့်သွားလျှင်ပင် ယင်းက အကူအညီ လိုအပ်နေသော အရပ် သားများကို ကူညီပေးရေးအတွက် လုံလောက်မှု ရှိနိုင်ဖွယ် မရှိပေ။

တိုက်ပွဲများကြောင့် နိုင်ငံ၏ ကျန်းမာရေး စောင့်ရှောက်မှု စနစ်များသည်လည်း ပြိုလဲတော့မည့် အခြေအနေတွင် ရှိနေသည်ဟု ကြက်ခြေနီအဖွဲ့က ပြောသည်။ ဒေသခံ ၁၀ သန်းခန့်ရှိသော ခါတွမ်မြို့ရှိ နေအိမ်များတွင် ပိတ်မိနေ သူများထံမှ အကူအညီ တောင်းခံမှုများစွာ ရရှိထားသည်ဟု အကူအညီပေးရေးအဖွဲ့များက ပြောသည်။

ဆူဒန် စစ်ဗိုလ်ချုပ်ကြီး နှစ်ဦးကိုတွေ့ရစဉ်

ထို့နောက် ဒေသခံအများစု အနေဖြင့် လျှပ်စစ်မီး မရှိသော အခြေအနေကို ခက်ခဲစွာ ရင်ဆိုင်နေရသည်။

ဒါဖာဒေသ (Darfur) အပါအဝင် တစ်နိုင်ငံလုံးနီးပါးတွင် ဖြစ်ပွားနေသော တိုက်ခိုက်မှုများ၌ လူသားချင်း စာနာမှု ဆိုင်ရာ ဝန်ထမ်များပါ အကြမ်းဖက် တိုက်ခိုက်မှု၊ လိင်ပိုင်းဆိုင်ရာ တိုက်ခိုက်မှုများနှင့် ရင်ဆိုင်နေရသည်ဟု သိရသည်။

ထိုသတင်းများနှင့် ပတ်သက်၍ ကုလသမဂ္ဂအဖွဲ့မှ သတိပေးမှု ထုတ်ပြန်ထားသည်။ တိုက်ခိုက်မှုများသည် ဆူဒန် ခေါင်းဆောင် ဗိုလ်ချုပ်ကြီး အဗ္ဗဒဲလ် ဖာတက်ရှ် အယ်လ်ဘာဟာ (Abdel Fattah al-Burhan)ကို သစ္စာခံသော တပ်ဖွဲ့များနှင့် ဆူဒန်ဒုတိယခေါင်းဆောင် ဗိုလ်ချုပ်ကြီး မိုဟာမက် ဟမ်ဒန်ဒါဂါလို (Mohamed Hamdan Dagalo) တို့၏ နာမည်ဆိုးဖြင့် ကျော်ကြားသော RSF အဖွဲ့တို့အကြား ဖြစ်ပွားနေခြင်းဖြစ်သည်။

Source: BBC

CNI International News

ကာရိုင်ဇာဝါ၊ ဧပြီ ၁၈

တရုတ်၊ မြောက်ကိုရီးယားနှင့် ရုရှားတို့၏ ရန်လိုမှုများကို G-7 ကိုယ်စားလှယ်များက ပြင်းပြင်းထန်ထန် ကန့်ကွက် ရှုတ်ချခဲ့ကြသည်။

တရုတ်၏ ထိုင်ဝမ်အပေါ် ခြိမ်းခြောက်မှု၊ မြောက်ကိုရီးယား၏ တာဝေးပစ် ဒုံးကျည်များ စမ်းသပ်မှုတို့ အပေါ် ပြင်းထန်စွာ တုံ့ပြန်ရန်၊ ယူကရိန်းအတွက် ကူညီမှုများကို မြှင့်တင် ဆောင်ရွက်သွားရန်၊ ရုရှား၏ ကျူးကျော်မှု အတွက် အပြစ်ပေးရန် G-7 ကိုယ်စားလှယ်များက ကတိပြုခဲ့ကြသည်ဟု အေပီက ရေးသားဖော်ပြခဲ့သည်။

ဂျပန်နိုင်ငံ အားလပ်ရက် အပန်းဖြေ စခန်းမြို့တွင် ကျင်းပခဲ့သော တနင်္လာနေ့ အစည်းအဝေးကို ရုရှား၏ ယူကရိန်း ကျူးကျော်စစ် အကြောင်းအရာများက အဓိက စိုးမိုးထားခဲ့သည်။

ထိုအခြေအနေက လာမည့် ဟီရိုရှီးမား (Hiroshima) မြို့တွင် ကျင်းပမည့် G-7 ခေါင်းဆောင်များ အစည်းအဝေး အတွက် လုပ်ငန်းစဉ်များကိုလည်း လမ်းပွင့်စေခဲ့သည်။

ယူကရိန်းအရေးကြောင့် ကမ္ဘာကြီးသည် အလှည့်အပြောင်း ကာလတစ်ခုသို့ ရောက်နေကြောင်း၊ စစ်အင်အား အ သုံးပြုမှု၊ ရုရှား၏ ယူကရိန်းအပေါ် ရန်လိုမှုများနှင့် နျူကလီးယား လက်နက်သုံးရန် ခြိမ်းခြောက်မှုများကို ပြင်းပြင်း ထန်ထန် ကန့်ကွက်ကြောင်း ဂျပန်နိုင်ငံခြားရေးဝန်ကြီး ယိုရှီမာဆာ ဟာယာရှီ (Yoshimasa Hayashi) ပြောခဲ့ ကြောင်း ဂျပန်ဘက်က ထုတ်ပြန်ချက် တစ်စောင်တွင် ဖော်ပြထားသည်။

ရှီကျင့်ဖျင်နဲ့ ပူတင်ကိုတွေ့ရစဉ်

အမေရိကန် ကိုယ်စားလှယ်အဖွဲ့အတွက် ယခု အစည်းအဝေးသည် ယူကရိန်းအပေါ် ရုရှား၏ ကျူးကျော်မှုအား တုံ့ပြန်ရန်နှင့် တရုတ်နှင့် ကူးလူး ဆက်ဆံရန် အရေးပါသည့် အချိန်အခါတွင် ပေါ်ပေါက်လာခြင်း ဖြစ်သည်။

ထိုအကြောင်းအရာ နှစ်ခုကို ဂျပန်၊ အမေရိကန်၊ ဗြိတိန်၊ ပြင်သစ်၊ ကနေဒါ၊ ဂျာမနီနှင့်အီတလီ စသော G-7 အဖွဲ့ဝင် ၇ နိုင်ငံမှ ဝန်ကြီးများက ဒုတိယကမ္ဘာစစ် ပြီးနောက်ပိုင်း စည်းမျဉ်း၊ စည်းကမ်းကို အခြေခံသည့် နိုင်ငံတကာ သမ္မာစဉ်အား ခြိမ်းခြောက်မှု နှစ်ခုအဖြစ်လည်း သတ်မှတ်ထားသည်။

ယခု အစည်းအဝေးနှင့် ပတ်သက်၍ အမေရိကန် အစိုးရ၏ ရည်ရွယ်ချက်မှာ ယူကရိန်းအား ကူညီထောက်ပံ့မှုများ ဆက်လက် လုပ်ဆောင်သွားရန်၊ ယူကရိန်းသို့ စစ်ရေး အကူအညီများ ဆက်ပေးသွားရန် ဖြစ်သည်ဟု အစည်း အဝေးသို့ အမေရိကန် နိုင်ငံခြားရေးဝန်ကြီးနှင့် အတူ တက်ရောက်ခဲ့သည့် အရာရှိတစ်ဦးက ပြောသည်။

ရုရှားသို့ စီးပွားရေး၊ ဘဏ္ဍာရေး စသော ပိတ်ဆို့ အရေးယူမှုများဖြင့် ပြစ်ဒဏ် ပေးရေးသည်လည်း အမေရိကန် အစိုးရဘက်မှ ဦးစားပေး လုပ်ဆောင်သွားမည့် အရာဖြစ်သည်။

ရှီကျင့်ဖျင်နဲ့ ကင်မ်ကိုတွေ့ရစဉ်

ဂျပန်သည် G-7 အဖွဲ့၏ တစ်ခုတည်းသော အာရှအဖွဲ့ဝင်နိုင်ငံဖြစ်ပြီး ယခုနှစ် အစည်းအဝေး၏ ဥက္ကဋ္ဌအဖြစ် ဆောင်ရွက်ကာ တရုတ်နှင့် ပူးပေါင်း ဆောင်ရွက်ရေးနှင့် သက်ဆိုင်သည့် အကြောင်းအရာများကို ဆွေးနွေးရန် ထောက်ပံ့ပေးခဲ့သည်။

အဖွဲ့ဝင် ခေါင်းဆောင်များနှင့် နိုင်ငံခြားရေးဝန်ကြီးများသည် ယူကရိန်း၊ မြောက်ကိုရီးယားနှင့် ထိုင်ဝမ်အရေးတို့ အပါအဝင် အကြောင်းအရာ များစွာတွင် တရုတ်၏ ရပ်တည်ချက်နှင့်ပတ်သက်၍ ဆွေးနွေးသွားမည်ဟုလည်း ခန့်မှန်းရသည်။

တနင်္ဂနွေနေ့ညတွင် ပြုလုပ်ခဲ့သော သီးသန့် ညစာစားပွဲ တစ်ခု၌ တရုတ်၏ ပါဝင်မှုက အရေးကြီးသည်ဟု သတ်မှတ်၍ရသော ကမ္ဘာလုံးဆိုင်ရာ စိန်ခေါ်မှုများတွင် တရုတ်နှင့် ဆွေးနွေးမှုများကို ဆက်လက် လုပ်ဆောင် သွားရန် ဟာယာရှီက တိုက်တွန်းခဲ့သည်ဟုလည်း သိရသည်။

Source: AP

CNI International News

တိုင်ပေ၊ ဧပြီ ၁၈

အမေရိကန်စစ်သင်္ဘော USS Milius သည် တနင်္ဂနွေနေ့တွင် ထိုင်ဝမ်ရေလက်ကြားမှ ဖြတ်သန်းခုတ် မောင်း သွားခဲ့သည်ဟု ရိုက်တာ သတင်းတွင် ဖော်ပြသည်။

ထိုသို့ ဖြတ်သန်းခြင်းသည် အမေရိကန်ဘက်က ပုံမှန်ပြုလုပ်နေကြ အကူးအပြောင်း သွားလာမှုဟု ပြောသည်။

အဆိုပါဖြစ်စဉ်သည် တရုတ်၏ ထိုင်ဝမ်ကျွန်းအနီး နောက်ဆုံး စစ်ရေးလေ့ကျင့်မှုများ ပြုလုပ်ပြီး ရက်အနည်းငယ် အကြာတွင် ပေါ်ပေါက်ခဲ့ခြင်း ဖြစ်သည်။

တရုတ်သည် ထိုင်ဝမ်အား ၎င်းတို့ပိုင်အဖြစ် ရှုမြင်ထားသည်။ တရုတ်သည် ထိုင်ဝမ်အနီး သုံးရက်ကြာ စစ်ရေး လေ့ကျင့်မှုကို တနင်္လာနေ့တွင် တရားဝင် အဆုံးသတ်ခဲ့သည်။

အဆိုပါ စစ်ရေးလေ့ကျင့်မှုတွင် ကျွန်းအား တိုက်ခိုက်ခြင်းနှင့် ပိတ်ဆို့ခြင်းတို့ လုပ်ဆောင်ရန် လေ့ကျင့်ခဲ့သည်။

တရုတ်သည် ထိုင်ဝမ်သမ္မတ ဆိုင်အင်ဝမ် (Tsai Ing-wen) က အမေရိကန်လွှတ်တော်ဥက္ကဋ္ဌ ကီဗင် မက္ကာသီ (Kevin McCarthy) နှင့် တွေ့ဆုံခဲ့မှုအပေါ် ဒေါသထွက်ကြောင်း ပြသမှုအဖြစ် စစ်ရေးလေ့ကျင့်မှုများ လုပ်ဆောင် ခဲ့ခြင်း ဖြစ်သည်။

ထိုင်ဝမ်သမ္မတ ဆိုင်အင်ဝမ်က အမေရိကန်လွှတ်တော်ဥက္ကဋ္ဌ ကီဗင်မက္ကာသီကို တွေ့ရစဉ်

ထိုသို့ တွေ့ဆုံမှုက တရုတ်၏ ပြည်တွင်းရေးကို ဝင်ရောက်စွက်ဖက်ခြင်းနှင့် အမေရိကန်အနေဖြင့် ထိုင်ဝမ်၏ တရုတ်ပြည်မှ ခွဲထွက်ရေးကို ထောက်ခံခြင်းအဖြစ် ရှုမြင်ထားခြင်းကြောင့် ဖြစ်သည်။

USS Milius သင်္ဘောသည် လွတ်လပ်စွာ သွားလာခွင့်ရှိသော ရေပြင်တွင် နိုင်ငံတကာ ဥပဒေများနှင့်အညီ ထိုင်ဝမ် ရေလက်ကြားသို့ ပုံမှန်ကူးပြောင်း သွားလာမှု လုပ်ဆောင်ခဲ့ခြင်း ဖြစ်သည်ဟု အမေရိကန်၏ အမှတ် ၇ ရေတပ် သင်္ဘော အုပ်စုက ပြောသည်။

ထိုသို့ သွားလာမှုက အမေရိကန်၏ လွတ်လပ်၍ ပွင့်လင်းသော အင်ဒို-ပစိဖိတ် ဒေသဆိုင်ရာ ပေးထားသော ကတိကို အကောင်အထည်ဖော် ဆောင်ရွက်ခြင်း ဖြစ်သည်ဟုလည်း ပြောသည်။

အမေရိကန် ဖျက်သင်္ဘော၏ သွားလာရေး လမ်းကြောင်း တစ်လျှောက် စောင့်ကြည့်လိုက်ပါရန် တပ်ဖွဲ့များကို စုစည်း စေလွှတ်ခဲ့သည်ဟု တရုတ်၏ အရှေ့ဘက် စစ်ဌာနချုပ်က တနင်္လာနေ့တွင် လူမှုကွန်ယက်၌ ရေးသား ဖော်ပြခဲ့သည်။

ဖျက်သင်္ဘောသည် ရေလက်ကြား တစ်လျှောက် မြောက်စူးစူးသို့ ဦးတည် ခုတ်မောင်းခဲ့ကာ ယင်းက ပုံမှန် သွားလာ နေကြ အခြေအနေ တစ်ရပ် ဖြစ်သည်ဟုလည်း ထိုင်ဝမ် ကာကွယ်ရေးဌာနက ပြောသည်။

အမေရိကန် ရေတပ်သင်္ဘောများသည် ထိုင်ဝမ်ရေလက်ကြားသို့ တစ်လတစ်ခါ ဖြတ်သန်း သွားလာလေ့ရှိကာ အငြင်းပွားနေသော တောင်တရုတ် ပင်လယ်ပြင်တွင်လည်း ထိုသို့သော လွတ်လပ်စွာ သွားလာခွင့်ကို ပုံမှန်ကျင့်သုံး လေ့ရှိသည်။

ထိုင်ဝမ်လက်နက်ကိုင်တပ်ကိုတွေ့ရစဉ်

ပြီးခဲ့သည့် သီတင်းပတ်တွင် USS Milius သင်္ဘောသည် တောင်တရုတ် ပင်လယ်အတွင်းရှိ အရေးပါဆုံး လူလုပ် ကျွန်းနှင့် တရုတ်ဘက်မှ ထိန်းချုပ်ထားသော ကျွန်းများမှ တစ်ခုဖြစ်သော Mischief ကျောက်တန်းအနီးသို့ ခုတ်မောင်းခဲ့သည်။

ထိုဖြတ်သန်းမှုသည် တရားမဝင် လုပ်ရပ်ဟု တရုတ်ဘက်က ပြောသည်။ တရုတ်သည် စစ်ရေး လေ့ကျင့်မှု အဆုံးသတ် သွားသည့်တိုင် ထိုင်ဝမ်အနီးတွင် အသေးစား စစ်ရေးလှုပ်ရှားမှုများ လုပ်ဆောင်လျက် ရှိသည်။

ပြီးခဲ့သည့် ၂၄ နာရီကြာ ကာလအတွင်း ထိုင်ဝမ်ကျွန်းအနီးတွင် တရုတ်စစ်လေယာဉ် ၁၈ စင်းနှင့် စစ်သင်္ဘော လေးစင်း သွားလာနေမှုကို တွေ့ရှိခဲ့သည်ဟုလည်း ထိုင်ဝမ်ကာကွယ်ရေးဌာနက တနင်္လာနေ့ မနက်တွင် ထုတ်ပြန် သည်။

Source: ရိုက်တာ

CNI International News

စတော့ဟုမ်း၊ ဧပြီ ၁၈

၂၅ နှစ်တာကာလအတွင်း အကြီးမားဆုံးဖြစ်သော Aurora-23 နိုင်ငံတကာ စစ်ရေးလေ့ကျင့်မှုကို ဆွီဒင်နိုင်ငံ၌ တနင်္လာနေ့တွင် စတင်ခဲ့သည်ဟု တာ့စ်သတင်းတွင် ဖော်ပြသည်။

လေ့ကျင့်မှုသည် မေလ ၁၁ ရက်နေ့အထိ ပြုလုပ်သွားမည်ဖြစ်ကာ ယင်းတွင် အမေရိကန်၊ ဗြိတိန်၊ ဖင်လန်၊ ပိုလန်၊ နော်ဝေး၊ အက်စ်တိုးနီးယား၊ လတ်ဗီးယား၊ လစ်သူယေးနီးယား၊ ယူကရိန်း၊ ဒိန်းမတ်၊ သြစတြီးယား၊ ဂျာမနီနှင့် ပြင်သစ်နိုင်ငံတို့ ပါဝင်မည်ဟု ဆွီဒင်ကာကွယ်ရေးဌာနက ပြောသည်။ စစ်ရေးလေ့ကျင့်မှု၏ ရည်ရွယ်ချက်မှာ ဆွီဒင် နိုင်ငံအား တိုက်ခိုက်မှုတစ်စုံတစ်ရာ ပေါ်ပေါက်လာချိန်တွင် လက်နက်ကိုင်တပ်ဖွဲ့များ၏ တိုက်ခိုက်ရန် အဆင်သင့် ဖြစ်နေမှုကို မြှင့်တင်သွားရန်ဖြစ်သည်။

ယခုလေ့ကျင့်မှုသည် တိုက်ခိုက်ရန်အဆင်သင့် ဖြစ်နေမှုအား မြှင့်တင်ရန်၊ စမ်းသပ်ရန်၊ သရုပ်ပြရန်အတွက် အရေးပါသောအရာများမှ တစ်ခုဖြစ်သည်ဟု ဆွီဒင်ဝန်ကြီးဌာနက ပြောသည်။ မိတ်ဖက်နိုင်ငံများမှ တပ်ဖွဲ့များနှင့် ပူးပေါင်းကာ ဆွီဒင်၏ တိုက်ခိုက်ရေးစွမ်းရည်ကို မြှင့်တင်ခြင်းဖြင့် လုံခြုံရေးကို တိုးမြှင့်နိုင်သည်ဟုလည်း ပြောသည်။

 Aurora-23 နိုင်ငံတကာ စစ်ရေးလေ့ကျင့်မှု သတင်းစာရှင်းလင်းပွဲကို တွေ့ရစဉ်(ဓါတ်ပုံ-Pontus Lundahl/TT/picture alliance)

စစ်ရေးလေ့ကျင့်မှုကို ကြည်း၊ရေ၊လေ သုံးမျိုးစလုံးဖြင့် ပြုလုပ်သွားမည်ဖြစ်ကာ နိုင်ငံပေါင်းစုံမှ တပ်ဖွဲ့ဝင် ၂၆၀၀၀ ခန့်က ဆွီဒင်တောင်ပိုင်းနှင့် ဂေါ့လန်း (Gotland) ကျွန်းတို့တွင် လေ့ကျင့်မှုများကို လုပ်ဆောင်သွားမည်ဖြစ်သည်။ တိုက်လေယာဉ်များ၊ ရဟတ်ယာဉ်များ၊ သယ်ယူပို့ဆောင်ရေး ရဟတ်ယာဉ်များနှင့် တခြားသော လေယာဉ်များ သည် စစ်စခန်းများနှင့် အရပ်ဘက်လေဆိပ်များမှ ပျံသန်းထွက်ခွာကာ လေ့ကျင့်မှုတွင် ပါဝင်မည်ဖြစ်သည်။ ဆွီဒင် တောင်ပိုင်း-အလယ်ပိုင်းရှိ လေကြောင်းလေ့ကျင့်ရေးစခန်းကို ဧပြီ ၂၄ မှ မေ ၁၁ ရက်နေ့အထိ အသုံးပြုသွားမည် လည်းဖြစ်သည်။

လေ့ကျင့်မှု၏ အဓိကအစိတ်အပိုင်းများမှတစ်ခုမှာ ဆွီဒင်အား ကူညီရေးနှင့် နိုင်ငံခြားတပ်ဖွဲ့များ၏ ထောက်ပံ့ ပေးနိုင်မှုတို့အတွက်ဖြစ်သည်ဟုလည်း ဆွီဒင် Skaraborg တပ်ရင်းမှ အရာရှိတစ်ဦးက ဆွီဒင်ရေဒီယို အင်တာဗျူး တစ်ခုတွင် ရှင်းပြခဲ့သည်။

Source: တာ့စ်သတင်းဌာန

CNI International News

ဂျကာတာ၊ ဧပြီ ၈

အင်ဒိုနီးရှားနိုင်ငံသည် အာဆီယံအလှည့်ကျဥက္ကဋ္ဌ ရာထူးကို ရယူပြီးချိန်မှစ၍ လက်ရှိ မြန်မာ့နိုင်ငံရေး ပဋိပက္ခ အတွက် လူသားချင်း စာနာမှု အကူအညီများ ထောက်ပံ့ပေးရေးကိစ္စတွင် တိုးတက်မှုတချို့ ဆောင်ရွက်နိုင်ခဲ့သည် ဟု အင်ဒိုနီးရှားနိုင်ငံခြားရေးဝန်ကြီး ရတ်နိုမာဆူဒီက ပြောသည်ဟု CNA သတင်းမှာ ဖော်ပြထားသည်။

အင်ဒိုအစိုးရသည် သွေးထွက်သံယိုမှုများနှင့် အင်အား အသုံးပြုမှုများကို အဆုံးသတ်ရေး ဆက်လက် တောင်းဆို ထားကာ အရပ်သား သေဆုံးမှု များပြားလာခြင်း အတွက်လည်း စိုးရိမ်ကြောင်း ထုတ်ဖော် ပြောဆိုထားသည်ဟု သူမက သတင်းစာ ရှင်းလင်းပွဲ တစ်ခုတွင် ပြောသည်။

အာဆီယံအဖွဲ့ ခေါင်းဆောင် ရာထူးကို ရရှိခဲ့ပြီးနောက် အင်ဒိုနီးရှားသည် ပြီးခဲ့သည့် သုံးလတာ ကာလပတ်လုံး မြန်မာသို့ လူသားချင်း စာနာမှု အကူအညီများ ပေးရေးအတွက် ပဋိပက္ခတွင် ပါဝင်ပတ်သက်နေသူ အားလုံးနှင့် ဆက်သွယ်ရေးများ ပြန်လည် ဖွင့်လှစ်နိုင်ရန်၊ ဆွေးနွေးမှုများ လုပ်ဆောင်နိုင်ရေးတို့တွင် ပါဝင်ကူညီခဲ့သည်ဟု မာဆူဒီက ပြောသည်။

၎င်းက အာဆီယံ၏ သဘာဝဘေးအန္တရာယ် စီမံခန့်ခွဲမှုဆိုင်ရာ လူသားချင်း စာနာထောက်ထားမှု အကူအညီပေး ရေး ညှိနှိုင်းဆောင်ရွက်မှုစင်တာ (AHA Centre) အတွက် လူမျိုးရေး၊ ဘာသာရေး သို့မဟုတ် နိုင်ငံရေး ခံယူချက်တို့ နှင့် မသက်ဆိုင်ဘဲ မြန်မာနိုင်ငံတွင်းရှိ လိုအပ်နေသူများထံ အကူအညီများ ထောက်ပံ့ပေးနိုင်ရန် ဖြစ်စေခဲ့သည်။

အင်ဒိုနီးရှား၊ ထိုင်း နိုင်ငံခြားရေးဝန်ကြီးတို့နဲ့ ဦးဝဏ္ဏမောင်လွင်ကိုတွေ့ရစဉ်

AHA Centre မှတစ်ဆင့် အကူအညီများ ပေးအပ်ခြင်းသည် ဘုံသဘောတူညီချက် ၅ ချက်ပါ ငြိမ်းချမ်းရေး အစီအစဉ်ထဲက တစ်ခု ဖြစ်သည်။

ထိုသို့သော တိုးတက်မှုများသည် အခက်အခဲမှ ကျော်လွှားနိုင်ခြင်း ဖြစ်သည်ဟု မာဆူဒီက ပြောသည်။

အင်ဒိုနီးရှား၏ ပါဝင်ကူညီမှုဖြင့် AHA Centre သည် ယခင်က မတွေ့ဆုံခဲ့ဖူးသည့် ပါဝင် ပတ်သက် နေသူများနှင့် တွေ့ဆုံဆွေးနွေးမှုများ အောင်မြင်စွာ လုပ်ဆောင်နိုင်ခဲ့ကြောင်း အင်ဒိုနိုင်ငံခြားရေးဝန်ကြီးက ပြောသော်လည်း ပါဝင် နေသူများသည် မည်သူမည်ဝါ ဖြစ်သူကတော့ ထုတ်ဖော်ပြောဆိုခဲ့ခြင်း မရှိပေ။

အင်ဒိုနီးရှားသည် ယခုနှစ် အစောပိုင်း အာဆီယံခေါင်းဆောင် နေရာအား ကမ္ဘောဒီယားထံမှ လွှဲပြောင်းရယူပြီးချိန် မှ စတင်ကာ မြန်မာ့နိုင်ငံရေးပဋိ့ပက္ခအား ဖြေရှင်းပေးရန် ဦးစီး ဆောင်ရွက်ခဲ့သည်။

အင်ဒိုသည် ထိုကိစ္စတွင် ကမ္ဘောဒီယားထက် ပိုမို အောင်မြင်စွာ ဆောင်ရွက်နိုင်မည်ဟုလည်း လေ့လာသူများက သုံးသပ်ထားသည်။

၂၀၂၁ ခုနှစ်၊ ဖေဖော်ဝါရီလက စတင်ခဲ့သည့် မြန်မာ့နိုင်ငံရေး ပဋိပက္ခကြောင့် လူပေါင်း ၁ ဒသမ ၄ သန်းကျော် နေ ရပ် စွန့်ခွာခဲ့ရပြီး မြန်မာ့လူဦးရေ ၅၅ သန်း၏ ၄၀ ရာခိုင်နှုန်းနီးပါးသည် ဆင်းရဲမွဲတေမှုလိုင်းအောက် ရောက်ရှိနေ သည်ဟု ကမ္ဘာ့ဘဏ်က ခန့်မှန်းထားသည်။
ဒုက္ခသည် ရာပေါင်းများစွာသည်လည်း အိမ်နီးချင်း အာဆီယံ နိုင်ငံများသို့ ထွက်ပြေးလာခဲ့ပြီး ဖြစ်သည်။

အာဆီယံကိုတွေ့ရစဉ်

အင်ဒိုနီးရှားသည် ဘုံသဘောတူညီချက် ၅ ချက်ပါ ငြိမ်းချမ်းရေး အစီအစဉ်ကို အကောင်အထည် ဖော်ဆောင်ရွက် နိုင်ရန် မြန်မာနိုင်ငံနှင့် ပူးပေါင်း ဆောင်ရွက်နေကြောင်း မာဆူဒီက ပြောသည်။

ထို ၅ ချက်တွင် အကြမ်းဖက်မှုများ ရပ်တန့်ရေး၊ ငြိမ်းချမ်းစွာ ဖြေရှင်းနည်းကို ရှာဖွေရေး အပြုသဘောဆောင် သည့် ဆွေးနွေးမှုများ ပြုလုပ်ရန်၊ လူသားချင်း စာနာမှု အကူအညီများ ထောက်ပံ့ရန်တို့ ပါဝင်သည်။

အင်ဒိုအစိုးရသည် မြန်မာနှင့် ပတ်သက်သည့် တိုးတက်မှုများကိုလည်း ပြီးခဲ့သည့်လ ကုလသမဂ္ဂ လုံခြုံရေး ကောင်စီတွင် မျှဝေခဲ့ပြီးလည်း ဖြစ်သည်။

Source: CNA

CNI International News

လန်ဒန်၊ ဧပြီ ၈

သီတင်းပတ်ကုန်ပိုင်း အီစတာအားလပ်ရက်တွင် အကြမ်းဖက် တိုက်ခိုက်မှုများ လုပ်ဆောင်ရန် လက်နက်ကိုင် အတိုက်အခံ အုပ်စုများက စီစဉ်နေသည်ဟု မြောက်အိုင်ယာလန်ရဲတပ်ဖွဲ့က သတိပေးလိုက်ကြောင်း အေပီ သတင်းမှာ ဖော်ပြထားသည်။

၁၉၉၈ ခုနှစ်၊ ဧပြီ ၁၀ ရက်တွင် Good Friday သဘောတူညီချက် ရရှိခဲ့ခြင်း၏ ၂၅ နှစ်ပြည့် အထိမ်းအမှတ် အခမ်းအနားကို မြောက်အိုင်ယာလန်တွင် ကျင်းပရန် စီစဉ်ထားပြီး အမေရိကန်သမ္မတ ဂျိုးဘိုင်ဒန် (Joe Biden) လည်း လာမည့်သီတင်းပတ်၌ ဘဲလ်ဖတ် (Belfast) သို့ သွားရောက်ရန် စီစဉ်ထားသည်။

အမေရိကန်မှ ဦးဆောင် ပြုလုပ်ပေးခဲ့သော သဘောတူညီချက်ကြောင့် အိုင်းရစ် ရီပတ်ပလီကန်များနှင့် ဗြိတိန် သစ္စာခံ လက်နက်ကိုင်အဖွဲ့များအကြား လက်နက်စွန့်ကာ မြောက်အိုင်ယာလန်အတွက် အစိုးရအာဏာ ခွဲဝေရေး ကို ဖြစ်စေခဲ့သည်။

ထိုငြိမ်းချမ်းရေး သဘောတူညီချက်သည် the Troubles ဟုခေါ်သော နှစ် ၃၀ ကြာ အကြမ်းဖက်မှုများကို အများစု ချုပ်ငြိမ်းစေခဲ့သော်လည်း ဆန့်ကျင့်သူ အုပ်စုများကတော့ လုံခြုံရေးတပ်ဖွဲ့များကို ဗုံးခွဲမှု၊ ပစ်ခတ်မှုများ လုပ်ဆောင်လျက် ရှိသေးသည်။

အကြမ်းဖက်ရန် လုပ်ဆောင်နေသည့် ပန်းချီကိုတွေ့ရစဉ်

(Londonderry) မြို့ရှိ ဒုတိယမြောက် အီစတာနေ့ အခမ်းအနား (Easter Monday) ချီတက်ပွဲတွင် အကြမ်းဖက်မှု များ ပြုလုပ်ရန် စီစဉ်နေသည့် သတင်း ရရှိထားသည်ဟု မြောက်အိုင်ယာလန်ရဲတပ်ဖွဲ့ ဒုတိယအကြီးအကဲ ဘော်ဘီ စင်ဂဲလ်တန် (Bobby Singleton) က ပြောသည်။

အတိုက်အခံများ၏ ခြိမ်းခြောက်မှုကြောင့် ဗြိတိန်အာဏာပိုင်များသည် ပြီးခဲ့သည့်လတွင် မြောက်အိုင်ယာလန်၏ အကြမ်းဖက် ခြိမ်းခြောက်မှုအဆင့်ကို ပြင်းထန်သည့် အခြေအနေသို့ တိုးမြှင့်ခဲ့သည်။

တိုက်ခိုက်မှုများ ဖြစ်ပွားနိုင်ရန် အလားအလာ အမြင့်ဆုံးတွင် ရှိနေသည့် သဘော ဖြစ်သည်။

ဖော်ဝါရီလတွင် ရဲအရာရှိတစ်ဦးကို မျက်နှာဖုံးစွပ် သေနတ်သမားနှစ်ဦးက ပစ်သတ်မှု ဖြစ်ပွားခဲ့သည်။

ဘိုင်ဒန်ကိုတွေ့ရစဉ် 

ရဲတပ်ဖွဲ့ဝင်များ၊ စစ်သားများနှင့် ထောင်ဝန်ထမ်းများ၊ ၎င်းတို့၏ မိသားစုများသည် အကြမ်းဖက်သမားများ၏ အဓိက ပစ်မှတ်ဖြစ်သည်ဟု ရဲချုပ် ဆိုင်မွန် ဘာနီ (Simon Byrne)က ပြောသည်။

Good Friday သဘောတူညီချက်ကို မြောက်အိုင်ယာလန်တွင် ကောင်းမွန်စွာ ကျင့်သုံးနိုင်လျက်ရှိသော်လည်း နိုင်ငံရေးဘက်တွင်တော့ ပဋိပက္ခများစွာ ပေါ်ပေါက်လျက်ရှိသည်။

Brexit အလွန် မြောက်အိုင်ယာလန်၏ ကုန်သွယ်ရေး သတ်မှတ်ချက်များကို ဆန့်ကျင့်ဆန္ဒပြသည့် ပင်မ သမဂ္ဂ အဖွဲ့တစ်ခုက အစိုးရအဖွဲ့မှ ထွက်ခွာသွား ခဲ့ပြီးနောက် မြောက်အိုင်ယာလန် လွှတ်တော်ကို မကျင်းပနိုင်သည်မှာ တစ်နှစ်ကျော်ကြာခဲ့ပြီ ဖြစ်သည်။

Source: AP

CNI International News

ဝါရှင်တန်၊ ဧပြီ ၈

ထရမ့်၏ အာဖဂန်မှ အမေရိကန်တပ်များ ဝရုန်းသုန်းကား ထွက်ခွာခဲ့ရသည့် အစီအစဉ်ကို အမေရိကန်သမ္မတ ဂျိုးဘိုင်ဒန် (Joe Biden) အစိုးရက အပြစ်တင်ထားသည့် အစီအရင်ခံစာ တစ်စောင်ကို ကြာသပတေးနေ့က ထုတ်ပြန်ခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden) အစိုးရသည် ကြာသပတေးနေ့တွင် အစီရင်ခံစာများကို စုပေါင်း၍ အကျဉ်းချုပ် မှတ်တမ်းတစ်စောင် ထုတ်ပြန်ခဲ့ရာမှာ တာလီဘန်များနှင့် ရရှိခဲ့သော သဘောတူညီချက်အတိုင်း အမေရိကန်တပ်များကို အာဖဂန်မှ ဆုတ်ခွာရန် အောင်မြင်စွာ ဆောင်ရွက်နိုင်ခဲ့ခြင်းမရှိသည့် သမ္မတဟောင်း ထရမ့်၏ အစိုးရကို အများစု အပြစ်တင်ထားသည်ဟု The Straits Times သတင်းတွင် ဖော်ပြထားသည်။

ဒီမိုကရက်တစ် အစိုးရ၏ အကျဉ်းချုပ်မှတ်တမ်းကို ရီပတ်ပလီကန် လွှတ်တော်အမတ်များက ဒေါသတကြီး တုံ့ပြန်ခဲ့ပြီး ၂၀၂၁ ခုနှစ်၊ သြဂုတ်လက အမေရိကန်တပ်ဖွဲ့များ ထွက်ခွာမှုနှင့် ပတ်သက်သည့် မှတ်တမ်းများအား ၎င်းတို့ကို ကြည့်ရှုခွင့်ပေးရန်လည်း တောင်းဆိုခဲ့သည်။

ရီပတ်ပလီကန် တစ်ဦးဖြစ်သည့် အမေရိကန်အောက်လွှတ်တော် ကြီးကြပ်ရေးကော်မတီဥက္ကဋ္ဌ ဂျိမ်းစ် ကိုမာ (James Comer) ကလည်း ဘိုင်ဒန်အစိုးရ၏ ထုတ်ပြန်ချက်သည် အလောတကြီး အာဖဂန်မှ အမေရိကန်တပ်များ ဆုတ်ခွာခဲ့မှုအတွက် အကြောင်းပြချက်တစ်ခုသာ ဖြစ်သည်ဟုပြောသည်။

 ထရမ့်၊ အမေရိကန်စစ်တပ်နဲ့ ပြည်ပြေး အာဖဂန် သမ္မတကိုတွေ့ရစဉ်

သမ္မတဘိုင်ဒန်၏ အာဖဂန်မှ အမေရိကန်တပ်များ ဆုတ်ခွာရန် ရွေးချယ်မှုသည် ယခင်အစိုးရဟောင်းမှ ဖန်တီးခဲ့သည့် အခြေအနေများကြောင့်များစွာ အနှောင့်အယှက် ဖြစ်ခဲ့ရသည်ဟု အကျဉ်းချုပ်မှတ်တမ်းတွင် ဖော်ပြထားသည်။

အစိုးရဟောင်းသည် တပ်များ နောက်ဆုံးဆုတ်ခွာမှု သို့မဟုတ် အမေရိကန်နှင့် ယင်း၏ မဟာမိတ်များကို ကယ်ထုတ်မှုစသည်တို့နှင့်ပတ်သက်၍ မည်သည့် အစီအစဉ်မှ ထောက်ပံ့ပေးခဲ့ခြင်း မရှိဟုလည်း ထိုအစီအရင်ခံစာတွင် ဖော်ပြထားသည်။

အမေရိကန်၏ အရှည်ကြာဆုံး ဖြစ်သော အာဖဂန်စစ်ပွဲမှ တပ်များ ဆုတ်ခွာမှုသည် တာလီဘန်များ ပြန်လည် အာဏာရရှိရန် ဖြစ်စေခြင်းကြောင့် အာဖဂန်ပြည်သူ ထောင်ပေါင်းများစွာသည် နိုင်ငံတွင်းမှ ထွက်ပြေးရန် ကြိုးစားခဲ့ကာ ကဘူးလ် အပြည်ပြည်ဆိုင်ရာ လေဆိပ်တွင်လည်း ဝရုန်းသုန်းကား အခြေအနေများကို ဖြစ်စေခဲ့သည်။

တချို့ အာဖဂန်များသည် ၎င်းတို့၏ သားသမီးများကို အမေရိကန်တပ်ဖွဲ့များထံပေးခြင်း သို့မဟုတ် ထွက်လာသော လေယာဉ်ပေါ်တွင် ခိုး၍ လိုက်ခြင်းတို့အထိ အခြေအနေ ဆိုးရွားခဲ့သည်။

ထရမ့်အစိုးရသည် အမေရိကန် အစိုးရအတွက် အလုပ်လုပ်ပေးခဲ့ခြင်းကြောင့် အာဖဂန်မှ ထွက်ခွာလိုနေသည့် အာဖဂန်ပြည်သူ ထောင်ပေါင်းများစွာအတွက် ဒုက္ခသည် ထောက်ပံ့မှုများ၊ အထူးလူဝင်မှု ဗီဇာများ ထုတ်ပေးခြင်းကို ရပ်တန့်လိုက်ခြင်းကြောင့် လုပ်ဆောင်ရန် အလုပ်အကြွေးများစွာကို ဖြစ်စေခဲ့သည်ဟုလည်း အကျဉ်းချုပ် မှတ်တမ်းတွင် ဖော်ပြသည်။

အမေရိကန်တပ်များ အာဖဂန်မှဆုတ်ခွာနေစဉ်

၁၂ မျက်နှာပါ မှတ်တမ်းတွင် အာဖဂန်မှ ကသောင်းကနင်း အခြေအနေများအတွက် အမေရိကန် ထောက်လှမ်းရေး နှင့် စစ်တပ်တို့၏ မှားယွင်းသော ကြိုတင်ခန့်မှန်းမှုများကိုလည်း တစ်စိတ်တစ်ပိုင်း အပြစ်တင်ထားသည်။

စစ်တပ်သည် တာလီဘန်များ လျင်မြန်စွာ အာဏာလွှဲပြောင်း ရယူနိုင်မှုကို ကြိုတင်ခန့်မှန်းနိုင်ခြင်း မရှိခဲ့ကာ မြို့တော် ကဘူးလ်ကို အာဖဂန်လုံခြုံရေး တပ်ဖွဲ့များ ထိန်းချုပ်နိုင်မည်ဟု မှားယွင်းစွာ သုံးသပ်ခဲ့ကြောင်းလည်း အစီအရင်ခံစာတွင် ဖော်ပြထားသည်။

အမေရိကန်တပ်များ ထွက်ခွာပြီးနောက် ၂၀၂၁ ခုနှစ် နှောင်းပိုင်းအထိ ကဘူးလ်မြို့သည် ပြင်းထန်သော ဖိအားများ အောက် ရောက်ရှိနိုင်ခြင်း မရှိနိုင်ဟု ခန့်မှန်းခဲ့ကြောင်း ၎င်း အစီအရင်ခံစာတွင် ရေးသားထားသည်။

Source: Straits Times