CNI Sport News

၂၀၂၂ ခုနှစ်၊ ဧပြီ ၁၃

ရီးရယ်လ် အသင်းရဲ့ ကွင်းလယ်ဖန်တီးရှင် မိုဒရစ်က‌တော့ ချယ်လ်ဆီးကို ရှုံးခဲ့ပေမယ့် ချန်ပီယံလိဂ်အကြို ဗိုလ်လုပွဲ တက်ခဲ့ ပြီးနောက် ဒါဟာ အလွန်ချိုမြိန်တဲ့ ရှုံးနိမ့်မှုဖြစ်တယ်လို့ ပြောလိုက်ပါတယ်။

ချယ်လ်ဆီးနဲ့ ရီးရယ်လ် အသင်းတို့ဟာ ဧပြီ ၁၃ ရက် မနက်ပိုင်းက ချန်ပီယံလိဂ် ကွာတားဖိုင်နယ် ဒုတိယအကျော့ ပွဲစဉ်အဖြစ် ကစားခဲ့တာ ဖြစ်ပါတယ်။ ဒီပွဲမှာ ချယ်လ်ဆီး အသင်းက ၃ ဂိုး- ၁ ဂိုးနဲ့ အနိုင်ရခဲ့တာပါ။ ပထမအကျော့အဖြစ် ကစားခဲ့တုန်းက ရီးရယ်လ် အသင်းက ၃ ဂိုး-၁ ဂိုးနဲ့ အနိုင်ရခဲ့တာ ဖြစ်ပါတယ်။

အဲ့ဒါကြောင့် အချိန်ပို ဆက်ကစားခဲ့ရပြီး ဘန်ဇီမာက ရီးရယ်လ်အတွက် နောက်ထပ် သွင်းယူခဲ့တာပါ။ ချယ်လ်ဆီး အသင်းက နောက်ထပ် သွင်းဂိုးတွေ ထပ်မံရယူဖို့ ကြိုးစားခဲ့ပေမယ့် မသွင်းနိုင်တော့တဲ့အတွက် ရီးရယ်လ် အသင်းက နှစ်ကျော့ပေါင်း ရလဒ် ၅ ဂိုး- ၄ ဂိုးနဲ့ အကြိုဗိုလ်လုပွဲ တက်နိုင်ခဲ့တာ ဖြစ်ပါတယ်။

မိုဒရစ်က "နည်းပြ အန်ဆယ်လော့တီက ကောင်းမွန်တဲ့ အပြောင်းအလဲတွေ လုပ်ခဲ့ပြီး သူ့ရဲ့ လူစားလဲမှုတွေက တကယ်ကို ကောင်းမွန်ခဲ့တာပါ။ သူတို့ဟာ ပွဲ‌အပေါ်မှာ ကြီးမားတဲ့ အကျိုးသက်ရောက်မှုတွေ ရှိခဲ့တယ်လို့ ကျနော်ထင်ပါတယ်။ ဒီပွဲဟာ အလွန်ချိုမြိန်တဲ့ ရှုံးနိမ့်မှုပါ"လို့ ပြောခဲ့တာပါ။

မိုဒရစ်ဟာ ချယ်လ်ဆီး အသင်းကိုလည်း ချီးကျုးသွားခဲ့ပြီး သူတို့ဟာ ရင်ဆိုင်ရခက်ခဲတဲ့အသင်း ဖြစ်တယ်လို့ ပြောခဲ့ပါတယ်။

"ချယ်လ်ဆီး အသင်းဖြစ်တဲ့ အတွက် ပထမပွဲပြီးကတည်းက ခက်ခဲမယ်ဆိုတာကို သိပါတယ်။ သူတို့ဟာ ကျနော်ရင်ဆိုင်ခဲ့ရတဲ့ အသင်းတွေမှာ အခက်အခဲဆုံး အသင်းပါ။ သူတို့ကစားပုံက မာကျောပြီး ကြံ့ခိုင်မှုကောင်းသလို ကျစ်လစ်မှုရှိတဲ့ အသင်းပါ။ ဒါကြောင့် ခက်ခဲမှုရှိမယ်ဆိုတာကို သိပါတယ်"လို့ ပြောခဲ့တာ ဖြစ်ပါတယ်။

ချယ်လ်ဆီး အသင်းဟာ ချန်ပီယံလိဂ်ပြိုင်ပွဲရဲ့ လက်ရှိ ချန်ပီယံဖြစ်ပေမယ့် ချန်ပီယံဆုကို မကာကွယ်နိုင်တော့ဘဲ ကွာတားဖိုင် နယ်ကနေပဲ လှည့်ပြန်ခဲ့ရတာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ ဧပြီ ၉

ပီအက်စ်ဂျီ အသင်းဟာ ဘတ်ပီကို လက်မှတ်ထိုးကြေး ပေါင်သန်း ၁၅၀ အထိပေးပြီး အသင်းမှာ နောက်ထပ် ၂ ရာသီ ဆက်ထိန်းသိမ်းဖို့ ပြင်ဆင်နေတယ်လို့ စပိန်ဘောလုံးကျွမ်းကျင်သူ ဂူလမ်က ပြောလိုက်ပါတယ်။

အသက် ၂၃ နှစ်အရွယ်ရှိ ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ်ဟာ ဒီရာသီအကုန်မှာ ကုန်ဆုံးတော့မှာပါ။ ဘတ်ပီဟာ ရီးရယ်လ်အသင်းကို ပြောင်းရွှေ့ဖို့ အကြိုသဘောတူညီမှု ရရှိထားတယ်လို့ သတင်းတွေ ထွက်နေတာ ဖြစ်ပါတယ်။

ပီအက်စ်ဂျီ အသင်းကတော့ ဘတ်ပီကို ဆက်ထိန်းသိမ်းနိုင်ဖို့ စိတ်အားထက်သန်နေပြီး တစ်နှစ်ကို အသားတင် လစာငွေ ပေါင် ၂၁ သန်းနဲ့ ကမ်းလှမ်းသွားဖို့လည်း ရှိနေတာပါ။

ဒီလို မက်မောလောက်စရာ ကမ်းလှမ်းမှုတွေ ရှိနေပေမယ့် ဘတ်ပီဟာ ရီးရယ်လ် အသင်းကိုပဲ ဦးစားပေး ရွေးချယ်မှုအဖြစ် သတ်မှတ်ထားတာ ဖြစ်ပါတယ်။

လော်ရီးယန့် အသင်းကို အနိုင်ရတဲ့ ပွဲအပြီးမှာ ဘတ်ပီက “ကျနော် ဘာဆုံးဖြတ်ချက်ကိုမှ မချရသေးပါဘူး။ ထည့်သွင်း စဉ်းစား ဖို့ အချက်အသစ်တွေ ရှိပါတယ်။ ဘယ်အချက်အသစ်လဲ ဆိုရင်တော့ အသစ်အဆန်းတွေပါပဲ”လို့ ပြောခဲ့တာပါ။

ဘတ်ပီကိုတွေ့ရစဉ်(Sports Mole)

ကာတာပိုင်ဆိုင်တဲ့ ပီအက်စ်ဂျီ အသင်းဟာ ဘတ်ပီကို စာချုပ်အသစ် ချုပ်ဆိုဖို့ ဖိအားပေး နေတယ်လို့လည်း သတင်းတွေမှာ ဖော်ပြထားပါတယ်။

သူတို့ဟာ လတ်မှတ်ထိုးကြေး ပေါင် ၁၂၅ သန်းနဲ့ ဘတ်ပီကို စာချုပ်သစ် ချုပ်ဆိုဖို့ ကမ်းလှမ်းထားပြီး ဖြစ်ပေမယ့် အခု အချိန် မှာတော့ နောက်ထပ် ပေါင် ၂၅ သန်း ထပ်ပေးဖို့ ပြင်ဆင်နေတာပါ။ ဘတ်ပီရဲ့ နောက်ထပ် ပြောင်းရွှေ့မယ့် အခြေအနေတွေနဲ့ ပတ်သက်ပြီး သူ့ရဲ့ မိဘတွေက ကိုယ်စားလှယ်အဖြစ် တာဝန်ယူထားပေမယ့် ကစားသမားကသာ နောက်ဆုံး ဆုံးဖြတ်ပေးရ မှာ ဖြစ်ပါတယ်။

တကယ်လို့ ဘတ်ပီသာ ပီအက်စ်ဂျီ အသင်းမှာ ဆက်နေမယ်ဆိုရင် သူ့ရဲ့ အကြံပေးတွေဟာ ဝန်ဆောင်ခအဖြစ် ပြင်သစ် ကလပ်ကနေ ပေါင် ၄၂ သန်း ရရှိမှာပါ။ ရီးရယ်လ် အသင်းကတော့ ဘတ်ပီကို ခေါ်ယူနိုင်မယ်လို့ ယုံကြည်ထားတာကြောင့် ဟာလန်းအပေါ် စိတ်ဝင်စားမှု လျော့နည်းသွားတာ ဖြစ်တယ်လို့ သိရပါတယ်။

ဘတ်ပီဟာ ဒီရာသီမှာ ပီအက်စ်ဂျီ အသင်းရဲ့ ထိပ်တန်း ဂိုးသွင်းရှင်အဖြစ် ခြေစွမ်း ပြသနေတာဖြစ်ပြီး ပွဲပေါင်း ၃၈ ပွဲ ပါဝင် ကစားထားကာ ၂၈ ဂိုး သွင်းယူထားတာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ ဧပြီ ၉

ဖီနာဘာချီ အသင်းဟာ ပထမအသင်းလူစာရင်းကနေ ထုတ်ပယ်ထားတဲ့ အိုဇေးလ် ကို စာချုပ်ဖျက်သိမ်းဖို့ စီစဉ်နေတယ်လို့ သိရပါတယ်။

အိုဇေးလ် ဟာ ကွန်ယာစပေါ် အသင်းနဲ့ ကစားခဲ့တဲ့ တူရကီစူပါလိဂ်ပွဲစဉ်မှာ ယာယီနည်းပြဖြစ်သူ အစ္စမေးလ် ကာတယ်လ်နဲ့ အချင်းများခဲ့ပြီးနောက် ပြီးခဲ့တဲ့လကတည်းက ဖီနာဘာချီ အသင်းက အသင်းလူစာရင်းကနေ ထုတ်ပယ်ခဲ့တာပါ။ အခုအချိန်မှာတော့ တူရကီကလပ်ဟာ အိုဇေးလ်ကို စာချုပ်ဖျက်သိမ်းဖို့ လုပ်ဆောင်နေတာ ဖြစ်ပါတယ်။ အိုဇေးလ် ဟာ ပြီးခဲ့တဲ့ (၂၀၂၁)ကမှ အာဆင်နယ် အသင်းကနေ ထွက်ခွာပြီး ဖီနာဘာချီ အသင်းကို ရောက်ရှိလာခဲ့တာပါ။

အိုဇေးလ် ကို ပထမအသင်းလူစာရင်းမှာ ပြန်လည်ထည့်သွင်းမယ့် အစီအစဉ်နဲ့ပတ်သက်ပြီး မေးခဲ့တာမှာ ဖီနာဘာချီ အသင်းဥက္ကဌ အလီကော့စ် က “အခုလက်ရှိ ကျနော်တို့မှာ ဒီအစီအစဉ်မရှိသေးပါဘူး။ ဒီဆုံးဖြတ်ချက် က ကလေးကစားသလိုလုပ်တာမဟုတ်ပါဘူး။ အရေးကြီးဆုံးအရာက ဖီနာဘာချီ ပါ”လို့ ပြောခဲ့တာ ဖြစ်ပါတယ်။ အိုဇေးလ်နဲ့ ဖီနာဘာချီ အသင်းတို့ ချုပ်ဆိုထားတဲ့ စာချုပ်ဟာ (၂၀၂၄)နွေရာသီမှာ ကုန်ဆုံးမှာပါ။

အိုဇေးလ် ကို ခေါ်ယူဖို့ ချန်ပီယံရှစ်ကလပ် ဟူးလ်စီးတီးနဲ့ ဒေးဗစ်ဘက်ခမ်းပိုင်ဆိုင်တဲ့ မေဂျာလိဂ်ကလပ် အင်တာ မိုင်ယာမီ အသင်းတို့က စိတ်ဝင်စားနေတာဖြစ်ပါတယ်။ ဒါပေမယ့် အိုဇေးလ် ရဲ့ အေးဂျင့်ဖြစ်သူ ဆိုဂတ် ကတော့ အိုဇေးလ် ဟာ အစ္စတန်ဘူလ်ကနေ ထွက်ခွာဖို့ အစီအစဉ်မရှိဘူးလို့ ပြောထားတာပါ။ ဂျာမန် ကစားသမားဟောင်း ဟာ ဒီရာသီမှာ ဖီနာဘာချီ အသင်းရဲ့အသင်းခေါင်းဆောင်အဖြစ် တာဝန်ယူခဲ့ပြီး ပွဲပေါင်း (၂၆)ပွဲကစားကာ (၉)ဂိုး သွင်းယူထားတာဖြစ်ပါတယ်။

အိုဇေးလ်ရဲ့ အေးဂျင့်ဖြစ်သူ ဆိုဂတ် က “နှစ်ဖက်လုံးအတွက် မနှစ်မြို့စရာကောင်းတဲ့ လုပ်ငန်းစဉ်တစ်ခုကို စတင် နေပါပြီ။ အရေးကြီးတာက တည်ငြိမ်နေဖို့နဲ့ နောက်ဆုံး ဆုံးဖြတ်ချက်ကို စောင့်မျှော်နေဖို့ပါ။ မီဆွတ်က ဒီက ထွက်ခွာဖို့အစီအစဉ်မရှိပါဘူး။ သူဟာ စာချုပ်ကုန်ဆုံးတဲ့အချိန်အထိ ဖီနာဘာချီ ကစားသမားအဖြစ် ဆက်ရှိမှာပါ။ သူဟာ ဖီနာဘာချီ အသင်းနဲ့ (၃)နှစ်ခွဲ စာချုပ်ချုပ်ခဲ့ပြီး (၆)လ အခကြေးငွေမယူဘဲ ကစားပေးခဲ့တာပါ”လို့ ပြောခဲ့ပါတယ်။

Source:TheSun

CNI Sport News

၂၀၂၂ ခုနှစ်၊ ဧပြီ ၉

ချယ်လ်ဆီး အသင်းဟာ ဘရန်ဖိုဒ့်၊ရီးရယ်လ် အသင်းတို့နဲ့ အိမ်ကွင်းနှစ်ပွဲဆက် အရေးနိမ့်ပြီးနောက် နည်းပြဖြစ်သူ တူချယ်လ် ဟာ ကစားသမားတွေနဲ့ ပွင့်ပွင့်လင်းလင်း အစည်းအဝေး ပြုလုပ်သွားခဲ့ပါတယ်။

ချယ်လ်ဆီး အသင်းဟာ အိမ်ကွင်းမှာ ကစားခဲ့တဲ့ ပရီးမီးယားလိဂ်ပွဲစဉ်မှာ ဘရန်ဖိုဒ့် အသင်းကို ၄ ဂိုး-၁ ဂိုးနဲ့ ဂိုးပြတ်အရေးနိမ့်ခဲ့ပြီး ကြားရက်မှာကစားခဲ့တဲ့ ချန်ပီယံလိဂ်ပွဲမှာလည်း အိမ်ကွင်းမှာပဲ ရီးရယ်လ် အသင်းကို ၃ ဂိုး-၁ ဂိုးနဲ့ ထပ်မံအရေးနိမ့်ခဲ့တာပါ။ အဲဒါကြောင့် နည်းပြ တူချယ်လ် ဟာ ကစားသမားတွေနဲ့တွေ့ဆုံခဲ့ပြီး ညံဖျင်းတဲ့ စွမ်းဆောင်ရည်တွေအတွက် သူတစ်ဦးတည်းသာ စကားပြောခဲ့တာဖြစ်ပါတယ်။

ဒီနှစ်ပွဲလုံးမှာ သူ့အသင်းဟာ စည်းကမ်းပိုင်းဆိုင်ရာမှာ အားနည်းခဲ့တယ်လို့ တူချယ်လ် က ဝန်ခံခဲ့တာပါ။ “မနေ့က ပြုလုပ်ခဲ့တာဟာ ဆွေးနွေးတဲ့ အစည်းအဝေးမဟုတ်ပါဘူး။ ကျနော့်အမြင်ကို ပေးခဲ့တာက ပိုပြီးများပါတယ်။ ဒါကလည်း တစ်ခါတစ်လေမှာ လိုအပ်ပါတယ်။ ကစားသမားတွေရဲ့ အမြင်ကို အလေးအနက်ထားပြီး မကြာခဏ စဉ်းစားပေမယ့် နောက်ဆုံးနှစ်ပွဲအပြီးမှာတော့ ကျနော့်အမြင်ကို ပေးဖို့ လိုအပ်တယ်လို့ထင်ပါတယ်။ ကျနော်က လက်ညိုးမထိုးပြတတ်သလို အပြစ်ရှိတဲ့သူတွေကိုလည်း မရှာပါဘူး”လို့ ပြောပါတယ်။

ဒါ့အပြင် တူချယ်လ် က “ကျနော်တို့ ဒီထဲမှာ အတူတူရှိနေတာပါ။ ပိုကောင်းအောင်လုပ်နိုင်တဲ့ နေရာတွေကို ထောက်ပြဖို့လိုပါတယ်။နောက်ဆုံးပွဲတွေမှာ ကျနော်တို့ရဲ့ဖွဲ့စည်းပုံတွေဟာ ကင်းမဲ့နေပါတယ်။ အသေးစိတ် အချက်အလက်တွေတော့ ကျနော်တို့ ရှာဖွေတွေ့ရှိခဲ့ပါတယ်။ ဒါဟာ ကစားသမားတွေကို ယုံကြည်ဖို့ပဲ ဖြစ်ပါတယ်။ကျနော်ဟာ ကစားသမားတွေကို ချစ်မြတ်နိုးသလို အစုအဖွဲ့မှာ ပါဝင်ရတာကိုလည်း နှစ်သက်ပါတယ်။ ကျနော်တို့အတူလက်တွဲပြီး ပိုကောင်းအောင်လုပ်နိုင်ပါတယ်”လို့ သတင်းထောက်တွေကို ပြောခဲ့တာပါ။

ချယ်လ်ဆီး အသင်းဟာ ချန်ပီယံလိဂ်ပြိုင်ပွဲရဲ့ လက်ရှိချန်ပီယံဖြစ်ပေမယ့် ရီးရယ်လ် ကို အရေးနိမ့်ပြီးနောက် သူတို့ရဲ့ ဒီရာသီချန်ပီယံလိဂ်ပြိုင်ပွဲဟာ ပြီးဆုံးပြီလို့ နည်းပြဖြစ်သူက ပြောထားတာဖြစ်ပါတယ်။ ချယ်လ်ဆီး အသင်းဟာ ဒီရာသီမှာ ရယူနိုင်စရာဆုဖလားအဖြစ် အက်ဖ်အေဖလားသာ ရှိတော့တာဖြစ်ပြီး အကြိုဗိုလ်လုပွဲ အဖြစ် ပဲလေစ့်အသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ ဧပြီ ၉

ရော်နယ်ဒိုဟာ ဝတ်စားဆင်ယင်မှုနဲ့ပတ်သက်ပြီး ဝေဖန်ခံနေရတဲ့ သားဖြစ်သူဘက်ကနေ ကာကွယ်မှု ပြုလုပ် သွားခဲ့ပါတယ်။

ရော်နယ်ဒိုရဲ့ မိခင်ဖြစ်သူ ဒိုလာရတ်စ် ဟာ မြေးဖြစ်သူ ဂျုနီယာနဲ့ အတူတွဲရိုက်ထားတဲ့ပုံကို အင်စတာဂရမ်မှာ တင်ခဲ့တာပါ။ ဒီအချိန်မှာ ရော်နယ်ဒိုရဲ့ အကြီးဆုံးသားဖြစ်သူ ဂျုနီယာ ဟာ Adidas နဲ့ Nike တံဆိပ်ပါ အဝတ် အစားတွေကို ဝတ်ဆင်ထားခဲ့တာဖြစ်ပါတယ်။ ရော်နယ်ဒို ဟာ Nike နဲ့ ကြီးမားတဲ့ စပွန်ဆာ စာချုပ်ချုပ်ဆို ထားသူလည်း ဖြစ်ပါတယ်။ အဲဒါကြောင့် အမှတ်တံဆိပ်(၂)ခုကို ရောနှောဝတ်ဆင်ခဲ့တဲ့ ဂျုနီယာ ကို ဝေဖန်မှုတွေ ရှိလာခဲ့တာ ဖြစ်ပါတယ်။

မန်ချက်စတာယူနိုက်တက် ကစားသမားကတော့ ဒီအချိန်မှာ သားဖြစ်သူဘက်ကနေ ကာကွယ်တဲ့ မှတ်ချက် စကားကို ရေးသားလာခဲ့တာပါ။ ရော်နယ်ဒို ဟာ သူ့သားအပေါ်ဝေဖန်တဲ့ မှတ်ချက်တွေကြောင့် မပျော်မရွှင် ဖြစ်နေခဲ့တာလည်းဖြစ်ပါတယ်။ ရော်နယ်ဒို က “သူကြိုက်တာသူဝတ်မှာပေါ့၊ ခင်ဗျားတို့ ဝတ်ချင်တဲ့အရာတွေကို သူလိုက်ဝတ်နေရမှာလား”လို့ တုံ့ပြန်ခဲ့တာဖြစ်ပါတယ်။

ရော်နယ်ဒို ဟာ စပို့တင်းလစ္စဘွန်း ကနေ မန်ချက်စတာယူနိုက်တက် ကို ရောက်ရှိတဲ့ ပထမနှစ် (၂၀၀၃)မှာပဲ Nike နဲ့ စပွန်ဆာ စာချုပ်ချုပ်ဆိုခဲ့တာပါ။ ဘောလွန်းဒီအောဆု(၅)ကြိမ် ရရှိထားတဲ့ ရော်နယ်ဒို ဟာ အဲ့ဒီကတည်းက အဆိုပါကုမ္ပဏီရဲ့မျက်နှာစာ ဖြစ်လာခဲ့ပြီး (၂၀၁၆)မှာ ကာလကြာရှည် စာချုပ်တစ်ရပ် ချုပ်ဆိုခဲ့တာဖြစ်ပါတယ်။ ဒီစာချုပ်ဟာ တစ်သက်တာ သဘောတူညီမှုအဖြစ် သတ်မှတ်ခံထားရတာဖြစ်ပြီး စုစုပေါင်း ပေါင်သန်း(၇၈၀) တန် ကြေးရှိတယ်လို့ သိရပါတယ်။

ရော်နယ်ဒို ဟာ မကြာသေးခင်ကလည်း အသင်းဖော်ဟောင်း ဝိန်းရွန်နီ နဲ့ အပြန်အလှန်တုံ့ပြန်မှုတွေရှိခဲ့တာပါ။ ပြီးခဲ့တဲ့ နွေရာသီကမှ မန်ချက်စတာယူနိုက်တက်ကို ရောက်ရှိလာတဲ့ ရော်နယ်ဒို ဟာ အသင်းအတွက် (၃၂)ပွဲပါဝင် ကစားထားပြီး (၁၈)ဂိုးသွင်းယူထားတာဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ ဧပြီ ၈

လေလံတင် ရောင်းချတာကနေ ပေါင် ၄ သန်း ရရှိဖို့ မျှော်လင့်နေတဲ့ မာရာဒိုနာရဲ့ ဂျာစီဟာ Hand of God ဂိုးအတွက် သူဝတ်ဆင်ထားတဲ့ ဂျာစီ မဟုတ်ဘူးလို့ သမီးဖြစ်သူက ပြောလိုက်ပါတယ်။

အင်္ဂလန် ကစားသမားဟောင်း စတိဗ်ဟော့ချ်က အာဂျင်တီးနား အသင်းကို မာရာဒိုနာရဲ့ ဘုရားပေးတဲ့ လက်တစ်စုံလို့ နာမည်ကျော်ကြားခဲ့တဲ့ သွင်းဂိုးကြောင့် အရေးနိမ့်ခဲ့တဲ့ ၁၉၈၆ ကမ္ဘာ့ဖလားပွဲအပြီးမှာ သူနဲ့ ဂျာစီချင်း လဲလှယ်ခဲ့တာပါ။

ဒါပေမယ့် စတိဗ်ဟော့ချ် လဲလှယ်ခဲ့တဲ့ ဂျာစီဟာ သူ့အဖေ ပထမပိုင်းမှာ ဝတ်ဆင်ခဲ့တဲ့ ဂျာစီဖြစ်တယ်လို့ ပြောခဲ့တာ ဖြစ်ပါ တယ်။ ဒုတိယပိုင်းမှာ သူမရဲ့အဖေ ဝတ်ဆင်ခဲ့တဲ့ ဂျာစီဟာ တခြားပိုင်ရှင်တွေ လက်ထဲမှာ ရှိနေပေမယ့် နာမည်ဖော်ပြဖို့တော့ မာရာဒိုနာရဲ့ သမီးအကြီးဖြစ်သူက ငြင်းဆန်ခဲ့တာပါ။

မာရာဒိုနာဟာ ကွာတားဖိုင်နယ်အဖြစ် ကစားခဲ့တဲ့ ဒီပွဲမှာ အင်္ဂလန် အသင်းဘက်ကို ဒုတိယပိုင်းမှာပဲ ၂ ဂိုးလုံး သွင်းယူခဲ့တာ ဖြစ်ပါတယ်။

ဒယ်လ်မာက “ဒီကစားသမားဟောင်းက သူ့မှာ အဖေရဲ့ ဒုတိယပိုင်းဂျာစီ ရှိတယ်လို့ ထင်နေပေမယ့် ဒါဟာ ရှုပ်ထွေးပါတယ်။ သူ့မှာ ပထမပိုင်းက ဂျာစီပဲရှိတာပါ။ ဝယ်ချင်တဲ့သူတိုင်းကို အမှန်တရားကို သိချင်တဲ့အတွက် ဒါကို ရှင်းပြတာပါ။ ဒုတိယပိုင်း ဂျာစီ ဘယ်သူ့မှာ ရှိလဲသိပေမယ့် မပြောတော့ပါဘူး။ ပြောပြချင်တာကတော့ လေလံတင် ရောင်းချနေတဲ့ ဂျာစီဟာ ကျမအဖေ ဂိုးသွင်းတဲ့ ဂျာစီ မဟုတ်ပါဘူး”လို့ ပြောခဲ့တာ ဖြစ်ပါတယ်။

လေလံတင်ထားတဲ့ မာရာဒိုနာဂျာစီ(Sports)

ဒါပေမယ့် မာရာဒိုနာရဲ့ ဂျာစီကို လေလံတင်ရောင်းချမယ့် Sotheby ကတော့ ဒါဟာ မှန်ကန်ကြောင်း သက်သေပြဖို့ ကျွမ်းကျင်သူတွေကို ငှားရမ်းထားကြောင်းလည်း ပြောထားတာပါ။

ပြောရေးဆိုခွင့်ရှိသူက “ဒီဂျာစီကို မရောင်းချခင်မှာ မာရာဒိုနာ ဝတ်ဆင်ခဲ့တဲ့ ဂျာစီဖြစ်တယ်ဆိုတာကို ကျယ်ကျယ်ပြန့်ပြန့် သိရှိနိုင်ဖို့ လုံ့လစိုက်ထုတ်ထားပြီး သိပ္ပံနည်းကျ သုတေသန ပြုလုပ်ခဲ့တယ်”လို့ ပြောထားခဲ့တာပါ။

မာရာဒိုနာရဲ့ ဂျာစီကို လေလံတင် ရောင်းချမယ့် ရက်ကို ဧပြီ ၂၀ ရက်ကနေ မေလ ၄ ရက်အထိ သတ်မှတ်ထားတာ ဖြစ်ပါ တယ်။ အာဂျင်တီးနား ဂန္တဝင်ကစားသမားကြီး မာရာဒိုနာကတော့ ၂၀၂၀ နိုဝင်ဘာလက ကွယ်လွန်ခဲ့တာဖြစ်ပြီး ကွယ်လွန် ချိန်မှာ အသက် ၆၀ အရွယ် ရှိပြီလည်း ဖြစ်ပါတယ်။

Source: The Sun

CNI Sport News

၂၀၂၂ ခုနှစ်၊ ဧပြီ ၈

နာမည်ကျော် လက်ဝှေ့ကစားသမား မေဝယ်သာဟာ သူ့ရဲ့ လေ့ကျင့်ဖော်ဟောင်းဖြစ်တဲ့ ဒွန်မိုးနဲ့ ဒူဘိုင်း ဟိုတယ်ပေါ်ရှိ လေယာဉ် ရပ်နားတဲ့နေရာမှာ သရုပ်ပြပွဲအဖြစ် ထိုးသတ်သွားမှာ ဖြစ်ပါတယ်။

(၈)ချီ ထိုးသတ်မယ့် ဒီသရုပ်ပြပွဲကို မေလ ၁၄ ရက်ကျရင် Burj Al Arab ဟိုတယ်မှာ ကျင်းပသွားမှာပါ။ မေဝယ်သာဟာ အသက် ၂၀ အရွယ်ရှိသူ Youtube ကြယ်ပွင့်တစ်ဦးနဲ့ ဒီနေရာမှာ ထိုးသတ်ဖို့ စီစဉ်ခဲ့ပေမယ့် ဆွေးနွေးမှုတွေဟာ ပျက် ပြယ်သွားခဲ့တာ ဖြစ်ပါတယ်။

ဒါပေမယ့် ပရော်ဖက်ရှင်နယ် လက်ဝှေ့ ကစားသမားဘဝမှာ ရှုံးပွဲမရှိတဲ့ မေဝယ်သာဟာ ပင်လယ်ရေမျက်နှာပြင်ထက် ပေ ၇၀၀ မြင့်တဲ့ နေရာမှာ ထိုးသတ်မယ့်ပွဲကို ကြေညာခဲ့တာပါ။

အသက် ၄၅ နှစ်အရွယ်ရှိ မေဝယ်သာနဲ့ အသက် ၄၂ နှစ်အရွယ်ရှိ ဒွန်မိုးတို့ဟာ စိမ်းတဲ့သူတွေ မဟုတ်ကျဘဲ မေဝယ်သာ ဦးလေးလက်အောက်မှာ အတူတွဲဖက် သင်ကြားမှုတွေ ပြုလုပ်ခဲ့ရတာ ဖြစ်ပါတယ်။ သူတို့ ၂ ဦးဟာ လတ်စ်ဗီးဂတ်စ်ရှိ မေဝယ်သာ ဘောက်ဆင်ကလပ်မှာ လေ့ကျင့်ဖော်တွေအဖြစ် အကြိမ်ပေါင်းများစွာ ထိုးသတ်မှုတွေကို မျှဝေခဲ့ကြတာ ပါ။

ဒွန်မိုးဟာ ၂၀၁၆ ကတည်းက ထိုးသတ်ခြင်း မရှိတော့ပါဘူး။ ထိုးသတ်ခဲ့တဲ့ ၁၉ ပွဲမှာ ၁၈ ပွဲနိုင်ပြီး ၁ ပွဲသာ သရေကျခဲ့တာ ဖြစ်ပါတယ်။

မေဝယ်သာနဲ့ ဒွန်မိုး ထိုးသတ်မယ့် ပွဲစဉ်(The Sun)

မေဝယ်သာ ကတော့ ၂၀၁၇ UFC ကြယ်ပွင့် မက်ဂရီဂေါကို အနိုင်ထိုးသတ်ခဲ့ပြီး ကစားသမားဘဝ ထိုးသတ်ခဲ့တဲ့ ပွဲပေါင်း ၅၀ လုံး အနိုင်ယူကာ ကစားသမားဘဝကနေ တရားဝင် အနားယူခဲ့တာပါ။ ဒါပေမယ့် မေဝယ်သာဟာ အနားယူပြီးနောက် ၂ ကြိမ် တိုင်တိုင် လက်ဝှေ့ကြိုးဝိုင်းထဲကို ပြန်ရောက်လာခဲ့ပြီး ကစ်ဘောက်ဆာ နာဆူကာဝါနဲ့ Youtuber လိုဂန်ပေါလ်တို့နဲ့ သရုပ်ပြပွဲ ထိုးသတ်ခဲ့တာ ဖြစ်ပါတယ်။

မေဝယ်သာဟာ Monkey Kicks လို့ နာမည်ပြောင်ရထားတဲ့ ဘယ်လ်ဟာဆာနဲ့ ဆွေးနွေးမှုတွေ ပြုလုပ်ပြီး ဒူဘိုင်းပွဲမှာ ထိုးသတ်ဖို့ စဉ်းစားခဲ့တာပါ။
The Global Titans Fight Series လို့ နာမည်ပေးထားတဲ့ ဒီပွဲမှာ UFC နာမည်ကျော် အန်ဒါဆန်ဆေးလ်ဗားနဲ့ ဘရာဇီးလ် MMA ဖိုက်တာ ဘရူနိုမာချာဒိုတို့ရဲ့ ပွဲစဉ်လည်း ပါဝင်မှာ ဖြစ်တယ်လို့ သိရပါတယ်။

Source: The Sun

CNI Sport News

၂၀၂၂ ခုနှစ်၊ ဧပြီ ၈

ရိုးမားအသင်းဟာ ယူရိုပါကွန်းဖရန့်စ်လိဂ် ကွာတားဖိုင်နယ် ပထမအကျော့ပွဲစဉ်မှာ အရေးနိမ့်ခဲ့ပေမယ့် သူတို့ပဲ အကြိုဗိုလ်လုပွဲ တက်ဖို့ ရေပန်းစားနေတာလို့ မော်ရင်ဟိုက ပြောလိုက်ပါတယ်။

ရိုးမားအသင်းဟာ ကွာတားဖိုင်နယ် ပထမအကျော့ပွဲစဉ်အဖြစ် နော်ဝေကလပ် ဘိုဒိုဂီလင့်မ် အသင်းနဲ့ ကစားခဲ့တာမှာ ၂ ဂိုး-၁ ဂိုးနဲ့ အရေးနိမ့်ခဲ့တာပါ။ ရိုးမားအသင်းဟာ ဒီပြိုင်ပွဲရဲ့ အုပ်စုအဆင့်မှာလည်း ဘိုဒိုဂီလင့်မ်နဲ့ တွေ့ဆုံခဲ့ဖူးပြီး အဲ့ဒီတုန်းက နော်ဝေကွင်းမှာ ၆ ဂိုး-၁ ဂိုးနဲ့ ဂိုးပြတ် အရေးနိမ့်ခဲ့တာ ဖြစ်ပါတယ်။

ရိုးမား အသင်းဟာ အိမ်ကွင်းမှာ ပြန်ကစားခဲ့တဲ့ပွဲမှာလည်း ၂ ဂိုးစီ သရေကျခဲ့တာပါ။ အဲ့ဒါကြောင့် အီတလီ ကလပ်ဟာ ဒီရာသီ ဘိုဒိုဂီလင့်မ် အသင်းနဲ့ ၃ ပွဲ ကစားပြီးရာ ၁ ပွဲမှ အနိုင်မရရှိခဲ့တာလည်း ဖြစ်ပါတယ်။

ရိုးမား အသင်းဟာ ကွာတားဖိုင်နယ် ဒုတိယအကျော့ပွဲစဉ်ကို အိမ်ကွင်းမှာ ကစားရမှာဖြစ်ပြီး နောက်တစ်ဆင့် တက်ဖို့ဆိုရင် ၂ ဂိုးပြတ်နဲ့ အနိုင်ရဖို့ လိုအပ်နေတာပါ။

မော်ရင်ဟိုက “ပေးခဲ့ရတဲ့ ၂ ဂိုးက တည်ကန်ဘောနဲ့ လမ်းကြောင်း လွဲခဲ့တာတွေကြောင့်ပါ။ ကျနော်တို့လည်း တည်ကန်ဘော ကနေ ဂိုးတွေအများကြီး ရခဲ့ပေမယ့် ဂိုးသွင်းနိုင်ရင် ကောင်းသလို ပေးရရင်တော့ ဆိုးပါတယ်။ ပထမအကျော့မှာ ရှုံးနေပေမယ့် ဒုတိယအကျော့ကတော့ အိမ်ကွင်း ပရိသတ်တွေရှေ့မှာ ကစားရမှာပါ။ အကြိုဗိုလ်လုပွဲတက်ဖို့ ရေပန်းစားနေတယ်ဆိုတာကို အခုအချိန်မှာ ပြောရတာ ပြဿနာမရှိပါဘူး”လို့ ပြောခဲ့ပါတယ်။

ရိုးမားအသင်း(LaRoma)

ဒါ့အပြင် မော်ရင်ဟိုက နော်ဝေကလပ်ရဲ့ ပလပ်စတစ် မြက်ခင်းပြင်ကိုလည်း ပြစ်တင်သွားခဲ့ပြီး အဆိုပါ ကွင်းကြောင့် မန်ချီနီ ဒဏ်ရာ ရသွားခဲ့တာလို့ ပြောခဲ့တာပါ။

“ရိုးရိုးသားသားပြောရရင် ကျနော့်အတွက် အစိုးရိမ်ရဆုံးက မန်ချီနီရဲ့ ဒဏ်ရာပါ။ ဒါက စိုးရိမ်စရာ ကောင်းပါတယ်။ ပလပ်စ တစ် မြက်ခင်းပြင်ပေါ်မှာ ကစားလို့ ဖြစ်ပေါ်လာတဲ့ အရာပါပဲ”လို့ ပြောခဲ့တာ ဖြစ်ပါတယ်။

မန်ချီနီဟာ ဒူးဒဏ်ရာ ရသွားခဲ့တာဖြစ်ပြီး စကန်ဖတ် စစ်ဆေးဖို့ လိုအပ်နေတာပါ။ ရိုးမားအသင်းဟာ ဒီရာသီမှာ ရယူနိုင်စရာ ဆုဖလားအဖြစ် ယူရိုပါကွန်းဖရန့်စ်လိဂ် တစ်ခုတည်းသာ ရှိတော့တာ ဖြစ်ပါတယ်။

အဲ့ဒါကြောင့် နည်းပြ မော်ရင်ဟိုဟာ ဒီဆုဖလားကို ရယူနိုင်ဖို့ ပစ်မှတ်ထားနေတာပါ။ အီတလီကလပ်ဟာ ဒီရာသီ စီးရီးအေ ပြိုင်ပွဲမှာ အမှတ်ပေးဇယား အဆင့်(၅)နေရာမှာ ရပ်တည်နေပြီး ကိုပါအီတာလီယာဖလား ပြိုင်ပွဲမှာတော့ ကွာတားဖိုင်နယ် အဆင့်ကနေ ထွက်ခွာခဲ့ရတာ ဖြစ်ပါတယ်။

CNI Sport News

၂၀၂၂ ခုနှစ်၊ ဧပြီ ၈

ဝိန်းရွန်နီ က သူ့ကို မနာလိုဖြစ်နေတယ်ဆိုပြီး ရော်နယ်ဒို က ပြောခဲ့တဲ့ မှတ်ချက်စကားကို အင်္ဂလန်အသင်း ခေါင်းဆောင်ဟောင်းက ပြန်လည်တုံ့ပြန်သွားခဲ့ပါတယ်။

ဝိန်းရွန်နီ က ရော်နယ်ဒို ကို လက်ရှိကစားနေတဲ့ ကစားသမားတိုင်းက မနာလိုဖြစ်နေကြတယ်လို့ ဝန်ခံခဲ့ပါတယ်။ “ရော်နယ်ဒို ပြောခဲ့တဲ့ မှတ်ချက်ကို ဒီမနက်မှ ကျနော်တွေ့ခဲ့ရပါတယ်။ ကျနော် ပြောချင်တာက ရော်နယ်ဒို ကို မနာလိုမဖြစ်ဘူးဆိုတဲ့ ကစားသမားတိုင်း ဒီကမ္ဘာပေါ်မှာမရှိပါဘူး။ သူ့ရဲ့ ကစားသမားဘဝမှ သူရရှိခဲ့တဲ့ ဆုဖလားတွေ၊သူရရှိခဲ့တဲ့ ဝင်ငွေတွေ၊ သူ့ရဲ့ Six pack အစရှိသဖြင့်ပေါ့။ မက်ဆီ ကလွဲပြီး အားလုံးက ရော်နယ်ဒိုကို မနာလိုဖြစ်ကြပါတယ်”လို့ ပြောခဲ့တာဖြစ်ပါတယ်။

ရော်နယ်ဒို ကို ခေါ်ယူခဲ့တာဟာ မန်ချက်စတာယူနိုက်တက် အသင်းအတွက် အလုပ်မဖြစ်ဘူးလို့ ဝိန်းရွန်နီ က ပြီးခဲ့တဲ့အပတ်က ပြောခဲ့တာပါ။ ရော်နယ်ဒို ဟာ ဒီရာသီမှာ မန်ချက်စတာကလပ်ရဲ့ ထိပ်တန်းဂိုးသွင်းရှင် အဖြစ် ရပ်တည်နေတာလည်းဖြစ်ပါတယ်။ ဝိန်းရွန်နီ ပြောတဲ့စကားနဲ့ပတ်သက်ပြီး ရော်နယ်ဒို က “မင်းငါ့ကို မနာလို ဖြစ်နေတာလား”ဆိုပြီး မှတ်ချက်ရေးသားခဲ့တာပါ။

ရော်နယ်ဒို ဟာ ပြီးခဲ့တဲ့ နွေရာသီ အပြောင်းအရွှေ့ကမှ ဂျုဗင်တပ်စ်ကနေ အသင်းဟောင်း မန်ချက်စတာ ယူနိုက်တက် ကို ပြန်လည်ရောက်ရှိလာခဲ့တာပါ။ အသက်(၃၇)နှစ်အရွယ်ရှိ ရော်နယ်ဒို ဟာ မန်ချက်စတာ ယူနိုက်တက် အသင်းအတွက် ပရီးမီးယားလိဂ်ပြိုင်ပွဲမှာ (၁၂)ဂိုးသွင်းယူထားပြီး (၃)ဂိုးဖန်တီးထားပါတယ်။ ချန်ပီယံလိဂ်ပြိုင်ပွဲမှာတော့ (၆)ဂိုးသွင်းယူထားတာပါ။

ဝိန်းရွန်နီ ဟာ မန်ချက်စတာယူနိုက်တက် အသင်းအနေနဲ့ ရော်နယ်ဒို ကို ထွက်ခွာခွင့်ပြုပြီး လူငယ်တွေ၊ အောင်မြင်မှုကို ဆာလောင်နေတဲ့ ကစားသမားတွေနဲ့ အသင်းကို ပြောင်းလဲမှုတွေ ပြုလုပ်ဖို့ တိုက်တွန်း ထားတာဖြစ်ပါတယ်။ မန်ချက်စတာယူနိုက်တက် အသင်းဟာ ဆုဖလားလက်မဲ့အဖြစ် ဒီရာသီကို အဆုံး သတ်ရမှာဖြစ်ပြီး ချန်ပီယံလိဂ်ဝင်ခွင့်ရဖို့တောင် ရုန်းကန်နေရတာပါ။

မန်ချက်စတာယူနိုက်တက် အသင်းဟာ ဒီတစ်ပတ်မှာတော့ ပရီးမီးယားလိဂ်ပွဲစဉ်အဖြစ် တန်းမဆင်းရဖို့ ကြိုးစားနေတဲ့ အဲဗာတန် အသင်းနဲ့ အဝေးကွင်းမှာ ယှဉ်ပြိုင်ရမှာဖြစ်ပါတယ်။

Source:Goal