CNI Sport Article 

၂၀၂၃ ခုနှစ်၊ အောက်တိုဘာ ၁၅

မြန်မာအသင်းဟာ ပြီးခဲ့တဲ့ရက်ပိုင်းက ၂၀၂၆ ကမ္ဘာ့ဖလားခြေစစ်ပွဲ အာရှဇုန် ပထမအဆင့်(ပထမအကျော့)အဖြစ် မကာအိုအသင်းနဲ့ ကစားခဲ့တာမှာ ၅ ဂိုး- ၁ ဂိုးနဲ့ ဂိုးပြတ် အနိုင်ရခဲ့ပါတယ်။ 

မြန်မာအသင်း ပရိသတ်တွေ အတွက်တော့ မမြင်တွေ့ရတာ နှစ်ပေါင်းများစွာ ကြာပြီဖြစ်တဲ့ ဒီလို ဂိုးပြတ်နိုင်ပွဲကို အိမ်ကွင်းမှာ မျက်ဝါးထင်ထင်ပြန်ပြီး ခံစားခဲ့ရတာ ဖြစ်ပါတယ်။

၂၀၂၁ ခုနှစ်ကနေစပြီး ကြည့်ရမယ်ဆိုရင် ဒီနိုင်ပွဲဟာ မြန်မာအသင်းအတွက် ၄ ပွဲမြောက် နိုင်ပွဲဖြစ်ပြီး သုဝဏ္ဏကွင်း ကြီးထဲမှာ ရယူနိုင်ခဲ့တဲ့ ဒုတိယမြောက် နိုင်ပွဲဖြစ်ပါတယ်။ 

နည်းပြ မိုက်ကယ်ကို တွေ့ရစဉ်

အခုနောက်ပိုင်း နှစ်တွေမှာ စွမ်းဆောင်ရည်ပိုင်းတွေ ကျဆင်းခဲ့ပြီး ပရိသတ်တွေရဲ့ ဝေဖန်မှုတွေ ခံခဲ့ရတဲ့ မြန်မာ အသင်းကို နည်းပြ မိုက်ကယ်ရဲ့ လက်ထက်မှာ အသွင်သစ်တစ်မျိုးနဲ့ ပြန်ပြီး မြင်တွေ့ခဲ့ရတာ ဖြစ်ပါတယ်။

နည်းပြမိုက်ကယ်ရဲ့ လက်ထက်မှာ မြန်မာအသင်းဟာ မကာအိုအသင်းနဲ့ ပထမအကျော့ပွဲ အပါအဝင် ၇ ပွဲ ကစား ထားပြီး ၃ ပွဲနိုင်၊ ၂ ပွဲသရေနဲ့ ၂ ပွဲရှုံးရလဒ် ထွက်ပေါ်ခဲ့တာပါ။

နည်းပြ မိုက်ကယ်ဟာ မြန်မာအသင်း လူစာရင်းကို လူကြီး၊ လူငယ် အချိုးကျ ပေါင်းစပ်နေတာဖြစ်ပြီး လူငယ် ကစားသမားတွေကို ပွဲထွက်လူစာရင်းမှာ အသုံးပြုပြီး အသင်းရဲ့ ကစားကွက်ပုံစံတွေကို ပြောင်းလဲနေခဲ့တာ ဖြစ်ပါ တယ်။

မကာအိုအသင်းနဲ့ ပွဲမှာဆိုရင် နည်းပြ မိုက်ကယ်ဟာ လူငယ်ကစားသမားတွေဖြစ်တဲ့ ဟိန်းဇေယျာလင်း၊ နေမိုးနိုင်နဲ့ သက်ဟိန်းစိုး တို့ကို ပွဲထွက်လူစာရင်းမှာ အတွေ့အကြုံရှိတဲ့ ကစားသမားတွေနဲ့ တွဲဖက်ပြီး ကစားသွားခဲ့တာ တွေ့ ရပါတယ်။ 

ဦးဇော်ဇော်နဲ့ မြန်မာအသင်းသားတွေကို တွေ့ရစဉ်

လူငယ်ကစားသမားတွေဟာ ငယ်ရွယ်တာကြောင့် ကစားအားကို မခိုမကပ်နဲ့ ကစားနိုင်ပြီး အတွေ့အကြုံရှိ ကစား သမားတွေဆီကနေ သင်ယူမှုတွေကြောင့် သူတို့ရဲ့ ပိုမိုကောင်းမွန်တဲ့ ကစားပုံကို မြင်တွေ့ခဲ့ရတာပါ။ 

ဒါတွေဟာ မြန်မာအသင်းအတွက် အများကြီး အထောက်အကူဖြစ်ခဲ့တာ ဖြစ်ပါတယ်။ မြန်မာအသင်းနည်းပြ မိုက်ကယ်ဟာ မကာအိုကို ဂိုးပြတ် အနိုင်ရခဲ့တဲ့ပွဲမှာ သူတို့ကို ပိတ်ပြီး တန်ပြန်တိုက်စစ်နဲ့ ကစားမယ့် ပြိုင်ဘက် အသင်းကို တည်ကန်ဘောတွေ၊ ဖြတ်တင်ဘောတွေနဲ့ ဒုက္ခပေးဖို့ ကြိုးစားခဲ့တာက အလုပ်ဖြစ်ခဲ့တာပါ။ 

မြန်မာအသင်း သွင်းယူခဲ့တဲ့ ၃ ဂိုးမှာ ၂ ဂိုးက တည်ကန်ဘောတွေကနေ ရခဲ့တာဖြစ်ပြီး နောက် ၁ ဂိုးကတော့ ဖြတ်တင်ဘောကို ခေါင်းတိုက်အဆုံးသတ်ခဲ့ကာ နောက်ထပ် ၂ ဂိုးကိုတော့ ဂိုးဧရိယာအပြင်ဘက်ကနေ ကန်သွင်း ယူခဲ့တာ ဖြစ်ပါတယ်။ 

ဂျာမန်လူမျိုးနည်းပြ မိုက်ကယ်ရဲ့ လူစားလဲမှုတွေကလည်း ဒီပွဲမှာ အလုပ်ဖြစ်ခဲ့ပြီး အောင်ကောင်းမာန်၊ ဝင်းနိုင်ထွန်းနဲ့ ဇော်ဝင်းသိန်းတို့ဟာ ဝင်ရောက်လာပြီးကတည်းက တွန်းတွန်းတိုက်တိုက်နဲ့ ကစားကာ ပြိုင်ဘက် အသင်းရဲ့ ခံစစ်ကြောင်းကို အလုပ်ရှုပ်စေခဲ့တဲ့အတွက် မြန်မာအသင်းဟာ ပွဲပြီးဆုံးဖို့ နီးကပ်ချိန်မှာ သွင်းဂိုး အများအပြား ရယူနိုင်ခဲ့တာပါ။

မြန်မာအသင်း ကစားသမားတွေ အောင်ပွဲခံနေကြစဉ်

မြန်မာအသင်းရဲ့ ကစားပုံဟာ ဒီပွဲမှာ လိုအပ်ချက်တွေ ရှိနေသေးပေမယ့် အိမ်ကွင်းမှာတော့ ပရိသတ်တွေနဲ့ ဘောလုံးအဖွဲ့ချုပ်က လိုချင်တဲ့ ဂိုးရလဒ်မျိုး စွမ်းဆောင်ပေးနိုင်ခဲ့တယ်ဆိုရင် မမှားပါဘူး။ 

ဒုတိယအကျော့ကို မကာအိုအသင်း အိမ်ကွင်းမှာ ကစားရမှာဖြစ်လို့ ပထမအဆင့်အတွက် ပွဲမပြီးသေးပေမယ့် မြန်မာအသင်းအတွက်တော့ ဒုတိယအဆင့်ကို သေချာပေါက် တက်ရောက်သွားပြီလို့ သတ်မှတ်ရမှာ ဖြစ်ပါတယ်။ 

မြန်မာအသင်းအနေနဲ့ ဒုတိယအကျော့ပွဲမှာလည်း ပထမအကျော့တုန်းကထက် ပိုကောင်းတဲ့ စွမ်းဆောင်ရည်နဲ့ ကစားပြီး ဒုတိယအဆင့်မှာ ကစားရမယ့် ပွဲတွေအတွက် ကြိုတင်ပြင်ဆင်ထားနိုင်ဖို့ လိုအပ်နေတာပါ။

ဒုတိယအဆင့်မှာတော့ မြန်မာအသင်းကို ဂျပန်၊ မြောက်ကိုရီးယားနဲ့ ဆီးရီးယားအသင်းတို့က စောင့်ကြိုနေတာ ဖြစ်ပြီး ကမ္ဘာ့ဖလား ခြေစစ်ပွဲအတွက် မလွယ်ကူနိုင်ဘူးဆိုတာ သိသာပေမယ့် မြန်မာအသင်းအတွက် အဓိက ရည်မှန်းချက်က အာရှဖလားပြိုင်ပွဲမှာ ခြေစစ်ပွဲအောင်မြင်ဖို့ ဖြစ်ပါတယ်။

အဲ့ဒါကြောင့် နည်းပြမိုက်ကယ် အနေနဲ့ အခုကတည်းက အသင်းရဲ့ အကောင်းဆုံး လူစာရင်းကို ရွေးထုတ်ပြီး ပရိသတ်တွေရဲ့ မျှော်လင့်ချက်တွေကို ဖြည့်ဆည်းပေးနိုင်မလားဆိုတာ စောင့်ကြည့်ရမှာလည်း ဖြစ်ပါတယ်။

CNI Article

၂၀၂၃ ခုနှစ် အောက်တိုဘာ ၈

တရုတ်နိုင်ငံတွင် သူလျှိုထားမှုဆိုင်ရာ ဥပဒေများကို တင်းကျပ်ခဲ့ပြီးနောက် မကြာသေးမီက ကာကွယ်ရေးဝန်ကြီး တစ်ဦး အပါအဝင် ထိပ်သီး အရာရှိများသည် ပြည်သူ့မြင်ကွင်းမှ ပျောက်ကွယ်သွားခဲ့သည်။

ထိုအချိန် အတောအတွင်း တရုတ်၏ ပြည်သူ့လွတ်မြောက်ရေး တပ်မတော် (PLA) သည် ဒေသတွင်း ၎င်း၏ သြဇာ သက်ရောက်မှုကို မြှင့်တင်နေသည်။

တရုတ်ကွန်မြူနစ်ပါတီ အကြောင်းကို လေ့လာရမည်ဆိုပါက အရာအားလုံးသည် အာဏာအတွက်သာဖြစ်ပြီး တရုတ်ကွန်မြူနစ်ပါတီ (CCP) ၏ ထိန်းချုပ်မှုများကိုသာ တွေ့ရမည်ဖြစ်သည်။

တရုတ်သမ္မတ ရှီကျင့်ဖျင်သည် CCP ကို ထိန်းချုပ်ထားပြီး ထိုကဲ့သို့ ထိန်းချုပ်မှုသည် အလုပ်ဖြစ်နေဆဲ ဖြစ်သည်ကို မြင်တွေ့ရမည် ဖြစ်သည်။

တရုတ်၏ ကာကွယ်ရေးဝန်ကြီးနှင့် ထိပ်သီးအရာရှိများ ပျောက်ကွယ်သွားခဲ့သည့် ဖြစ်စဉ်များနှင့်ပတ်သက်ပြီး အမေရိကန်၏ စီအိုင်အေနှင့် ဒေါ်လာ ၈၀ ဘီလျံ အသုံးစရိတ်ရှိသော ထောက်လှမ်းရေး အသိုင်းအဝိုင်းက အဖြေ တစ်ခုကို သိရှိလိမ့်မည်ဖြစ်သော်လည်း သာမန်လူများအတွက်မူ အကြောင်းရင်းကို တိတိကျကျ သိရှိရန် ခက်ခဲ လှပေသည်။

သို့သော် အချို့ အချက်အလက်များကို လေ့လာကြည့်မည်ဆိုပါက အောက်ပါအတိုင်း တွေ့ရမည်ဖြစ်သည်။

ပြည်သူ့မြင်ကွင်းမှ ပျောက်ကွယ်သွားခဲ့သည့် တရုတ်၏ ထိပ်သီးအရာရှိများ၏ ရာထူးဂုဏ်ဒြပ်နှင့် အနေအထားအရ အကျင့်ပျက် ခြစားမှုများဖြင့် ပြစ်မှုထင်ရှား တွေ့ရှိရန် ဖြစ်နိုင်မည် မထင်ပေ။

ထို့ကြောင့် တရုတ်ကာကွယ်ရေးဝန်ကြီးသည် အကျင့်ပျက်ခြစားမှုကြောင့် ဖမ်းဆီးခံရခြင်းဖြစ်နိုင်ဖွယ်မရှိပေ။

အကျင့်ပျက် ခြစားမှုဆိုသည့် အသုံးအနှုံးသည် မော်ဝါဒီခေတ်က "တန်ပြန်တော်လှန်ရေး လှုပ်ရှားမှုများ" ဟူသည့် ခေတ်သစ်မူဝါဒတစ်ရပ် ဖြစ်နိုင်ခြေရှိသည်။

ရာထူးက ထုတ်ပယ်ခံရသော တရုတ်ကာကွယ်ရေး၀န်ကြီး

ရှီအနေဖြင့် အဘယ်ကြောင့် ယခုလို လုပ်ဆောင်ရ သနည်းဆိုသည့် မေးခွန်းကို ဖြေဆိုရန် ဖြစ်နိုင်ခြေရှိသည့် အချက်များကို ထည့်သွင်း စဉ်းစားရမည် ဖြစ်သည်။

ပျောက်ကွယ်သွားခဲ့သည့် အရာရှိများ၏ အလုပ်တာဝန် စွမ်းဆောင်ရည်များ ညံ့ဖျင်းခြင်းကြောင့်လည်း ဖြစ်နိုင် သည်။ PLA ၏ လုပ်ဆောင်မှုအချို့သည် ကောင်းမွန်ခဲ့ခြင်းမရှိဘဲ အချို့ လုပ်ဆောင်မှုများသည် အလွန်အမင်း ညံ့ဖျင်းခဲ့သည်ကို တွေ့ရသည်။

သို့မဟုတ် လျာထားချက်နှင့် ပြည့်မီမှုမရှိသည့် စွမ်းဆောင်ရည်များကြောင့်လည်း ဖြစ်နိုင်သည်။

PLA ၏ စွမ်းဆောင်ရည်များသည် နှစ်ပေါင်းများစွာကြာ ပြဿနာများနှင့် ရင်ဆိုင်ခဲ့ရပြီး တရုတ်အစိုးရကလည်း ထိုအရေးကိစ္စကို တစ်ချိန်လုံး စောဒကတက်ခဲ့သည်။

အထူးသဖြင့် လွန်ခဲ့သည့် နှစ်ပေါင်း ၃၀ အတွင်း တိုက်ပွဲများ မဖြစ်ပွားခဲ့သဖြင့် တရုတ်စစ်သားများ၏ တိုက်ပွဲဝင်မှု အတွေ့အကြုံ နည်းပါးနေမှုနှင့် အခြား စစ်ဘက်ဆိုင်ရာ အားနည်းချက်များအပေါ် တရုတ်ခေါင်းဆောင်များက အားမလိုအားမရ ဖြစ်ခဲ့သည်။

ထိုအကြောင်းအရာနှင့် ပတ်သက်ပြီး ရှီသည် စိုးရိမ်ခဲ့ပုံပေါ်သည်။ သူသည် စစ်တန်းလျားများအတွင်း အတိုက်အခံ အင်အားစု ဖွဲ့စည်းမည့် အခြေအနေကို သိရှိခဲ့ပုံပေါ်သည်။

မကြာသေးမီနှစ်များအတွင်း ပြိုင်ဘက်များကို ဖြုတ်ထုတ်သတ် လုပ်ငန်းစဉ်များကြောင့် သူ့တွင် ရန်သူများစွာ ရှိလာခဲ့သည်ကို ရှီက သိရှိခဲ့ပုံပေါ်သည်။

ထိုအခြေအနေများသည် အာဏာရှင်များ ကြုံတွေ့ရလေ့ရှိသည့် သဘောသဘာဝ တစ်ခုဖြစ်သည်။ ထို့ကြောင့် အတိုက်အခံများအားလုံးကို အမြစ်ဖြတ် ချေမှုန်းခြင်းသည် ကြိုတင်လက်ဦးမှု ရယူသည့်် သဘောမျိုးဖြစ်သည်။

ထို့ကြောင့် အာဏာရှင်ကို ဖြုတ်ချဖွယ်ရှိသည့် လူတိုင်းကို အကြောက်တရားများ ရိုက်သွင်းခြင်းသည် မထူးဆန်း သည့် သီအိုရီတစ်ခုဖြစ်သည်။ ထိုသီအိုရီသည် လက်တွေ့တွင်လည်း အလုပ်ဖြစ်နေဆဲ ဖြစ်သည်။

တရုတ်ကွန်မြူနစ်ပါတီ ညီလာခံကျင်းပနေစဉ်

သို့သော် ပြည်ပကုမ္ပဏီများကို နှောင့်ယှက်နေခြင်းသည် တရုတ်အနေဖြင့် ကိုယ့််ကိုယ်ကို ထိခိုက်နစ်နာစေရန် လုပ်ဆောင်နေခြင်း ဖြစ်သည်။

ထို့ကြောင့် ရှီသည် တရုတ်နိုင်ငံတွင် စီးပွားရေးလုပ်ပြီး ငွေရှာနိုင်မည်ဟု ထင်နေသည့် ပြည်ပစီးပွားရေးလုပ်ငန်း ရှင်များကို ဖိအားများ တိုးမြှင့်နေခြင်း ဖြစ်သည်။  

ထိုသို့ လုပ်ဆောင်ခြင်းအားဖြင့် ရှီသည် စီးပွားရေးအရ မည်သည့် ဖိအားကိုမဆို တောင့်ခံထားနိုင်မည်ဟု ယုံကြည်ချက် ရှိနေပုံပေါ်သည်။

လက်ရှိတွင် တရုတ်၏ စစ်ရေး စွမ်းဆောင်ရည်များ၊ စီးပွားရေးအင်အားနှင့် ဒေသတွင်း အခြေအနေများအပြင် တရုတ်၏ ပြည်ပ သြဇာသက်ရောက်မှု အခြေအနေများကြောင့် ၎င်း၏ လုပ်ဆောင်မှုများသည် အချိန်ကိုက် ဖြစ်သည်ဟု ရှီက ယူဆထားခြင်းလည်း ဖြစ်နိုင်သည်။

သတင်းအချက်အလက်များအရ အမေရိကန်သည် တရုတ်၏ ခြိမ်းခြောက်မှုကို သတိထားပြီး စောင့်ကြည့်နေကာ ဥရောပနိုင်ငံများနှင့် အခြားနိုင်ငံ အများအပြားသည် တရုတ်နှင့် လက်တွဲလိုသည့် ဆန္ဒများကို ထုတ်ဖော် ပြသလာ ခဲ့ကြသည်။

လက်တင်အမေရိကန်နှင့် အာဖရိကနိုင်ငံများသည်လည်း တရုတ်နှင့် လက်တွဲလိုသည့် ဆန္ဒများကို ပြသခဲ့ကြ သည်။ ထို့ပြင် အရှေ့တောင်အာရှနှင့် ပစိဖိတ်ကျွန်းနိုင်ငံများ အချို့သည်လည်း တရုတ်ဘက်သို့ ယိမ်းလာကြသည်။

ထိုမျှမက ပါရှန်းပင်လယ်ကွေ့နှင့် အရှေ့အလယ်ပိုင်းဒေသများမှ နိုင်ငံများသည်လည်း မကြာသေးမီက တရုတ်၏ လွှမ်းမိုးမှုအောက်သို့ ရောက်ရှိခဲ့သည်။

တရုတ်နှင့် ထိပ်တိုက်တွေ့ရမည့် အရေးကိစ္စများတွင်မူ ထိုင်ဝမ်အရေးနှင့် တောင်တရုတ် ပင်လယ်အရေးတို့သည် ထိပ်ဆုံးနေရာမှ ပါဝင်နေသည်။

တရုတ်သည် ထိုင်ဝမ်၊ ဖိလစ်ပိုင်နှင့် ဂျပန်နိုင်ငံတို့ အနီးတွင် စစ်ရေးလှုပ်ရှားမှုများကို တိုးမြှင့်နေသည်။ တရုတ် ပြည်သူ့ လွတ်မြောက်ရေး တပ်မတော်သည်လည်း တစ်ခါတစ်ရံတွင် ၎င်း၏ မဟာမိတ် ရုရှားနှင့်အတူ ပူးတွဲ စစ်ရေး လေ့ကျင့်မှုများကို လုပ်ဆောင်ခဲ့သည်။

ထို့ပြင် တောင်တရုတ် ပင်လယ်အတွင်းရှိ တရုတ်နှင့် ဖိလစ်ပိုင်အကြား ပိုင်ဆိုင်မှု အငြင်းပွားနေသည့် Second Thomas သောင်ခုံအရေးနှင့် ပတ်သက်ပြီး ထိပ်တိုက် တွေ့မှုများသည် အနှေးနှင့်အမြန် ဖြစ်ပွားလာနိုင်သည်။

ထိုကဲ့သို့ ပဋိပက္ခ ဖြစ်ပွားလာမည်ဆိုပါက အမေရိကန်အနေနှင့် ဖိလစ်ပိုင်ဘက်မှ ရပ်တည်ကာ တိုက်ရိုက် ပါဝင် ပတ်သက်မည်လော သို့မဟုတ် ဖိလစ်ပိုင်ကို ပစ်ထားမည်လော ဆိုခြင်းကို စောင့်ကြည့်ရမည်ဖြစ်သည်။

လက်ရှိအချိန်တွင် ဘိုင်ဒန်အစိုးရအဖွဲ့သည် တရုတ်နှင့် ဆွေးနွေးညှိနှိုင်းမှုများကိုသာ ဦးစားပေးကိစ္စအဖြစ် သတ်မှတ်ဖွယ်ရှိသည်။

ထို့ကြောင့် လက်ရှိဖြစ်ပွားနေသည့် အခြေအနေ အရပ်ရပ်ကို သုံးသပ်ရမည်ဆိုပါက တရုတ်သမ္မတ ရှီကျင့်ဖျင်သည် အနိုင်ဖဲတစ်ချပ်ကို အာဏာဖြင့် ကိုင်စွဲထားသည်ဟု သုံးသပ်ရမည်ဆိုပါက မှားမည်မဟုတ်ပေ။

Source: Asia Times

CNI Soprt Article 

၂၀၂၃ ခုနှစ်၊ အောက်တိုဘာ ၆

VAR နည်းပညာဟာ ဘောလုံးကွင်းထဲမှာ ဖြစ်ပျက်နေတဲ့ အရာတွေကို ပြေလည်အောင် ဖြေရှင်းဖို့ လုပ်ဆောင်ခဲ့ တာ ဖြစ်ပေမယ့် ဒီနည်းပညာကို အသုံးပြုပြီး ကတည်းက ပြဿနာဖြစ်နေတဲ့ အရာတွေဟာ ပိုပြီးများနေခဲ့တာ ဖြစ်ပါတယ်။ 

ကမ္ဘာ့အကောင်းဆုံးလိဂ်လို့ သတ်မှတ်ခြင်း ခံထားရတဲ့ ပရီးမီးယားလိဂ်ဟာ VAR ကို စတင်ပြီး အသုံးပြုတဲ့ နေ့ကတည်းက အသင်းတွေနဲ့ ပရိသတ်တွေအတွက် စိတ်ပျက်စရာတွေကို ကြုံတွေ့ခဲ့ရတာပါ။

ဒိုင်လူကြီးတွေရဲ့ အရည်အသွေးတွေဟာလည်း VAR အသုံးပြုပြီးကတည်းက မေးခွန်း ထုတ်စရာတွေဖြစ်ခဲ့ပြီး ဒိုင်လူကြီးတွေဟာ သူတို့ရဲ့ ဆုံးဖြတ်ချက်ထက် VAR ကို ပိုပြီးအားကိုး လာတာကို မြင်တွေ့နေခဲ့ရတာ ဖြစ်ပါတယ်။ 

လီဗာပူးလ်နဲ့ စပါး ယှဉ်ပြိုင်နေစဉ်

အဲ့ဒါကြောင့် ဒိုင်လူကြီးတွေဟာ သူတို့မှန်နေရင်တောင် ဆုံးဖြတ်ချက်တွေကို ရဲရဲတင်းတင်း ချမှတ်နိုင်ခြင်း မရှိခဲ့ပါ ဘူး။ 

VAR ရဲ့ ဆုံးဖြတ်ချက်တွေ မှားယွင်းနေတာဟာ ပရီးမီးယားလိဂ်မှာ သာမက တခြားလိဂ်တွေမှာလည်း ဖြစ်နေခဲ့ပေမယ့် ပရီးမီးယားလိဂ်ဟာ လူအများ စောင့်ကြည့်တဲ့ လိဂ်ဖြစ်လို့ ဒီအမှားအယွင်းတွေကို အပတ်တိုင်းလိုလို ကြုံတွေ့နေရတာပါ။

အခုနှစ် ပရီးမီးယားလိဂ် ရာသီစတင် ကတည်းက VAR ဟာ အမှားအယွင်းတွေ လုပ်ခဲ့ပြီး ပြန်လည် တောင်းပန် မှုတွေ ပြုလုပ်ခဲ့ပေမယ့် စပါးအသင်းနဲ့ လီဗာပူးလ် အသင်းပွဲစဉ်က အဖြစ်အပျက်ဟာ ခေါင်းကြီးပိုင်း သတင်းအဖြစ် နေ့တိုင်းလိုလို ပါဝင်နေခဲ့ပါတယ်။ 

စပါးအသင်းက ၂ ဂိုး- ၁ ဂိုးနဲ့ အနိုင်ရခဲ့တဲ့ ဒီပွဲစဉ်မှာ လီဗာပူးလ်အသင်း တောင်ပံကစားသမား လူးဝစ်ဒီယက်ဇ်ရဲ့ သွင်းဂိုးကို VAR က လူကျွံဘောအဖြစ် သတ်မှတ်ခဲ့တာပါ။ 

VAR စနစ်ကြောင့် လီဗာပူးလ် သွင်းဂိုးတစ်ဂိုး နစ်နာခဲ့စဉ်

ဒီဖြစ်ရပ်ဟာ ဒိုင်လူကြီးတွေ မဟုတ်တဲ့ သာမန်သူတွေတောင် လူမကျွံဘူးဆိုတာကို သိနေတဲ့ အချိန်မှာ VAR ရဲ့ ဆုံးဖြတ်ချက်ဟာ မေးခွန်းထုတ်ချင်စရာတွေ ဖြစ်ခဲ့ပါတယ်။

ဒီပွဲအပြီးမှာ အင်္ဂလန်ပရော်ဖက်ရှင်နယ် ဒိုင်လူကြီးများအဖွဲ့ချုပ်(PGMOL)က VAR ဟာ လူးဝစ်ဒီယက်ဇ်ရဲ့ သွင်းဂိုး ကို လူကျွံဘောအဖြစ် မှားယွင်း သတ်မှတ်ခဲ့ပြီး သိသာထင်ရှားတဲ့ လူသားအမှား ဖြစ်တယ်လို့ ပြောခဲ့ပါတယ်။

လီဗာပူးလ် အသင်းအတွက်တော့ PGMOL ရဲ့ ပြောဆိုမှုဟာ ဒေါသထွက်ချင်စရာ ဖြစ်ခဲ့ပြီး လူးဝစ်ဒီယက်ဇ်ရဲ့ သွင်းဂိုးကိုသာ ခွင့်ပြုခဲ့မယ်ဆိုရင် ကစားသမား လျော့နေတဲ့ လီဗာပူးလ် အသင်းအတွက် ရလဒ်တွေဟာ တစ်မျိုးတစ်ဖုံ ပြောင်းလဲသွားနိုင်တာ ဖြစ်ပါတယ်။

လီဗာပူးလ်အသင်းက PGMOL ရဲ့ ထုတ်ပြန်ချက်ဟာ လက်ခံနိုင်စရာမရှိဘဲ နောက်ထပ် ဖြေရှင်းချက်ပေးဖို့ တောင်းဆိုခဲ့သလို နောက်ပိုင်းမှာ လူးဝစ်ဒီယက်ဇ်ရဲ့ သွင်းဂိုးနဲ့ ပတ်သက်ပြီး ကွင်းလယ်ဒိုင်လူကြီးနဲ့ VAR ဒိုင်လူကြီးတို့ အကြား ဆွေးနွေးမှုတွေ ပြုလုပ်ခဲ့တဲ့ အသံဖိုင်ကို တောင်းဆိုခဲ့ပါတယ်။

VAR နဲ့ ပရီးမီးယားလိဂ် ပြိုင်ပွဲကိုတွေ့ရစဉ်

PGMOL ကလည်း ဒီအသံဖိုင်ကို လီဗာပူးလ်အသင်းထံ ပေးခဲ့သလို လူသိရှင်ကြားပါ ချပြပေးခဲ့တာ ဖြစ်ပါတယ်။

လီဗာပူးလ်အသင်းနည်းပြ ကလော့ပ်ကတော့ ဒီအသံဖိုင်ဟာ ဘာမှပြောင်းလဲသွားမှာ မဟုတ်ဘဲ ဒီပွဲကို ပြန်ကစား စေချင်တယ်လို့ ပြောခဲ့အထိ ဖြစ်ခဲ့ပါတယ်။

VAR ရဲ့ အမှားအယွင်းကြောင့် ပွဲကို ပြန်ကစားစေဖို့ဟာ ဖြစ်နိုင်ဖွယ် အလွန်နည်းနေပေမယ့် VAR ရဲ့ ဆုံးဖြတ်ချက် တွေနဲ့ ပတ်သက်ပြီး လာမယ့် ပွဲစဉ်တွေကစပြီး အားလုံးရဲ့ သတိထားစောင့်ကြည့်ခြင်း ခံရဖို့ ရှိလာပြီ ဖြစ်ပါတယ်။

ပရီးမီးယားလိဂ် ကလပ်အသင်းတွေဟာ VAR ရဲ့ ဆုံးဖြတ်ချက်တွေကို စိတ်ပျက်နေတာ ကြာပြီဖြစ်ပြီး အသင်းတွေ ဘက်က စောဒကတတ်ရင် ဒဏ်ကြေးငွေ ချမှတ်ပြီး အရေးယူတာတွေ ရှိပေမယ့် ကွင်းလယ်ဒိုင်လူကြီးနဲ့ VAR တို့ အမှားအယွင်း ပြုလုပ်ခဲ့ရင် တောင်းပန်ကြောင်း ကြေညာချက်ထုတ်တာနဲ့ အနီးစပ်ဆုံးပွဲကို မကိုင်တွယ်ဖို့ အရေး ယူတာတွေ လောက်သာ ရှိပါတယ်။

ဒါပေမယ့် လီဗာပူးလ်အသင်းရဲ့ မီးမောင်းထိုးပြမှုတွေကြောင့် VAR အနေနဲ့ သူတို့ ဆုံးဖြတ်ချက်ကို အမှားအယွင်း မဖြစ်အောင် သေသေချာချာ ပြင်ဆင်လာဖို့ ရှိနေပါတယ်။ ဒီလိုမှ မဟုတ်ရင်တော့ ပရီးမီးယားလိဂ်နဲ့ VAR ရဲ့ အငြင်းပွားမှု အဖြစ်အပျက်တွေဟာ ဒီထက်ပိုပြီး ကြီးထွားလာဖို့ ရှိနေတာကြောင့် စောင့်ကြည့်ရဖို့ ရှိနေပါတယ်။

CNI Sport Article 

၂၀၂၃ ခုနှစ်၊ စက်တင်ဘာ ၂၉

ဥရောပဘောလုံးအဖွဲ့ချုပ်(UEFA) ဟာ ပြီးခဲ့တဲ့ရက်ပိုင်းက ရုရှား ယူ-၁၇ အသင်းတွေကို ဥရောပပြိုင်ပွဲတွေမှာ ဝင်ရောက်ယှဉ်ပြိုင်ဖို့ ခွင့်ပြုကြောင်း အတည်ပြု ကြေညာခဲ့လို့ အားလုံးက အံ့အားသင့်ခဲ့ကြပါတယ်။ 

UEFA ဟာ ယူကရိန်းကို ဝင်ရောက် ကျူးကျော်တိုက်ခိုက်ခဲ့တဲ့ ၂၀၂၂ ခုနှစ်၊ ဖေဖော်ဝါရီလက စတင်ပြီး ရုရှားနဲ့ ပတ်သက်တဲ့ ကလပ်အသင်း၊ နိုင်ငံအသင်းတွေကို သူတို့လက်အောက်မှာ ကျင်းပမယ့် ပြိုင်ပွဲတွေမှာ ဝင်ရောက် ယှဉ်ပြိုင်ခွင့် ဆိုင်းငံ့ခဲ့တာပါ။ 

ဒါပေမယ့် အရွယ်ရောက်ပြီးသား လူတွေရဲ့ လုပ်ရပ်ကြောင့် ကလေးတွေကို အပြစ်မပေးသင့်ဘူးဆိုပြီး ဥရောပ ယူ-၁၇ ပြိုင်ပွဲတွေမှာ ရုရှား ယူ-၁၇ အသင်းတွေကို ယှဉ်ပြိုင်ခွင့်ပေးဖို့ UEFA က ဆုံးဖြတ်ချက်ချခဲ့တာ ဖြစ်ပါတယ်။

ဥရောပဘောလုံးအဖွဲ့ချုပ်က ကလေးတွေရဲ့ အနာဂတ် တောက်ပဖို့အတွက် သူတို့ဘက်က ပြိုင်ပွဲ ပြန်လည် ယှဉ်ပြိုင်ခွင့် ပေးခဲ့တာလို့ ပြောခဲ့တာမှာ ယူကရိန်းနဲ့ ထိပ်တိုက်တွေ့ဆုံဖို့ ဖြစ်လာခဲ့တာပါ။

ယူကရိန်းအသင်း ပရိသတ်တွေက စစ်ပွဲရပ်ဖို့ တောင်းဆိုနေကြစဉ်

ယူကရိန်းဘောလုံးအဖွဲ့ချုပ်ကတော့ UEFA အနေနဲ့ သူတို့ရဲ့ ဆုံးဖြတ်ချက်ကို ပြန်လည် သုံးသပ်ဖို့နဲ့ ဒီလိုမှ မဟုတ် ရင် ရုရှားအသင်းတွေ ပါဝင်တဲ့ ပြိုင်ပွဲတွေမှာ သူတို့ဘက်က ပါဝင်သွားမှာ မဟုတ်ဘဲ သပိတ်မှောက်သွားမယ်လို့ ပြတ်ပြတ်သားသား ပြောခဲ့ပါတယ်။ 

ဒါ့အပြင် အခြားနိုင်ငံတွေကိုလည်း ရုရှားအသင်းတွေနဲ့ မကစားဖို့ တိုက်တွန်းမှုတွေ ပြုလုပ်သွားမယ်လို့ ပြောခဲ့ပြီး UEFA ရဲ့ ဆုံးဖြတ်ချက်တွေကို ယူကရိန်းဘောလုံးအဖွဲ့ချုပ်က ပြင်းပြင်းထန်ထန် ရှုတ်ချခဲ့တာ ဖြစ်ပါတယ်။

UEFA ဟာ ဒီဆုံးဖြတ်ချက် မချခင်က ရုရှားနဲ့ ပတ်သက်ပြီး ချန်ပီယံလိဂ်အိမ်ရှင်အဖြစ် ကျင်းပခွင့်နဲ့ ဥရောပ စူပါဖလား အိမ်ရှင်အဖြစ် ကျင်းပခွင့်တွေကို ရုပ်သိမ်းကာ ပြင်းထန်တဲ့ တုံ့ပြန်မှုတွေ ပြသခဲ့ပြီး ယူကရိန်းဘက်မှာ ရှိနေကြောင်း ပြသခဲ့တာပါ။ 

ဒါပေမယ့် ရုရှား ယူ-၁၇ အသင်းတွေကို ပြိုင်ပွဲပြန်လည် ယှဉ်ပြိုင်ခွင့် ပေးခဲ့တာမှာတော့ ယူကရိန်းနဲ့ UEFA ကြား သဘောထား တင်းမာမှုတွေ ဖြစ်လာနိုင်စရာရှိနေပြီး ထိပ်တိုက်တွေ့ဆုံမှုတွေတောင် ဖြစ်လာနိုင်ပါတယ်။

UEFA ကို တွေ့ရစဉ်

ယူကရိန်းဘောလုံးအဖွဲ့ချုပ်ဟာ အခြား ဥရောပ ဘောလုံးအဖွဲ့ချုပ်တွေ အားလုံးကို ရုရှားအသင်းနဲ့ မကစားဖို့ စာရေးသားပေးပို့ပြီး တောင်းဆိုမှု ပြုလုပ်ခဲ့တာ ဖြစ်ပါတယ်။ 

အဲ့ဒါကြောင့်လည်း အင်္ဂလန်ဘောလုံးအဖွဲ့ချုပ်နဲ့ ပိုလန်ဘောလုံးအဖွဲ့ချုပ်တွေကလည်း UEFA ရဲ့ဆုံးဖြတ်ချက်ကို ကန့်ကွက်ပြီး ယူကရိန်းနဲ့ တစ်သားတည်းရှိကြောင်း ပြသခဲ့တာပါ။ 

အင်္ဂလန်နဲ့ ပိုလန်ဘောလုံးအဖွဲ့ချုပ်တို့ဟာ ရုရှားအသင်းနဲ့ သူတို့ ကစားသွားမှာ မဟုတ်ဘူးလို့ ကြေညာချက် ထုတ်ပြန်ခဲ့တာ ဖြစ်ပါတယ်။ 

အင်္ဂလန်နဲ့ ပိုလန် ဘောလုံးအဖွဲ့ချုပ်တို့အပြင် နောက်ထပ် ဘောလုံးအဖွဲ့ချုပ်တွေကလည်း ရုရှားနဲ့ ပတ်သက်တဲ့ UEFA ရဲ့ ဆုံးဖြတ်ချက်ကို ကန့်ကွက်သွားဖို့ ရှိနေတာပါ။

ဒီလိုကန့်ကွက်တဲ့ နိုင်ငံတွေများလာရင် UEFA အနေနဲ့ သူတို့ရဲ့ ဆုံးဖြတ်ချက်ကို ပြန်ပြောင်းဖို့ သုံးသပ်မှုတွေ ရှိလာနိုင်တာ ဖြစ်ပါတယ်။ 

ယူကရိန်းစစ်ပွဲကို တွေ့ရစဉ်

ယူကရိန်းဟာ ရုရှားနိုင်ငံက အားကစားအသင်းအဖွဲ့တွေကို နိုင်ငံတကာ အားကစားပြိုင်ပွဲတွေကနေ ပိတ်ပင်ဖို့ အကြိမ်ကြိမ် တောင်းဆိုထားသလို ရုရှားနဲ့ ဘယ်လာရုစ်နိုင်ငံက အားကစားသမားတွေ ပါဝင်ရင် ၂၀၂၄ ပဲရစ် အိုလံပစ်ပြိုင်ပွဲကို သပိတ်မှောက်မယ်လို့ ခြိမ်းခြောက်မှုတွေ ပြုလုပ်ထားတာပါ။

လက်ရှိအချိန်မှာ တင်းနစ် အပါအဝင် အချို့ အားကစားနည်းတွေဟာ ရုရှားအားကစားသမားတွေကို နိုင်ငံ ကိုယ်စားပြု မဟုတ်ဘဲ ကြားနေအဖြစ် ပြိုင်ပွဲကို ပြန်လည်ယှဉ်ပြိုင်ခွင့် ပြုထားတာ ဖြစ်ပါတယ်။ 

ရုရှားနဲ့ ယူကရိန်း အားကစားသမားတွေ ပြိုင်ဘက်အဖြစ် တွေ့ဆုံခဲ့တဲ့ ဒီလို အားကစားနည်းတွေမှာ တစ်ဦးနဲ့ တစ်ဦး လက်ဆွဲနှုတ်ဆက်ခြင်း မရှိကြသလို ပြိုင်ဆိုင်မှုကလည်း ပြင်းထန်ခဲ့တာကို မြင်တွေ့ခဲ့ရတာပါ။

အခုအချိန်မှာတော့ UEFA အနေနဲ့ ယူကရိန်းရဲ့ ပြန်လည်သုံးသပ်မှုကို လက်ခံပြီး ရုရှား ယူ-၁၇ အသင်းတွေကို ပြိုင်ပွဲဝင်ခွင့် ပြန်ပိတ်ပင်မလား ယူကရိန်းကို ဆန့်ကျင်ပြီး သူတို့ရဲ့ ဆုံးဖြတ်ချက်အတိုင်း သွားမလားဆိုတာ စိတ်ဝင်စားဖို့ ကောင်းနေတာ ဖြစ်လို့ ဘာတွေဆက်ဖြစ်လာမလဲ ဆိုတာကိုတော့ ဆက်လက် စောင့်ကြည့်ရပါ တော့မယ်။

CNI Article

၂၀၂၃ ခုနှစ်၊ စက်တင်ဘာ ၂၉

နှစ်ပေါင်း ၃၀ အတွင်း တတိယအကြိမ်မြောက်အဖြစ် နိုင်ငံတကာ အသိုင်းအဝိုင်းသည် အဇာဘိုင်ဂျန်နှင့် နာဂေါ်နို-ကာရာဘက်ဒေသတွင် နေထိုင်သည့် အာမေးနီးယား လူမျိုးစုများအကြား ဖြစ်ပွားခဲ့သည့်် ပဋိပက္ခကို တားဆီးရန် ပျက်ကွက်ခဲ့သည်။

စက်တင်ဘာ ၁၉ ရက်က အဇာဘိုင်ဂျန် တပ်ဖွဲ့များသည် ကာရာဘက်ဒေသရှိ ခွဲထွက်ရေးဝါဒီ အာမေးနီးယား လက်နက်ကိုင်များကို အကြီးစား စစ်ဆင်ရေး ပြုလုပ်ခဲ့ပြီး ထိုဒေသကို ပြန်လည်ထိန်းချုပ်ခဲ့သည်။ 

၂၄ နာရီကြာမြင့်ခဲ့သည့် ထိုစစ်ဆင်ရေးအတွင်း  နာဂေါ်နို-ကာရာဘက် သမ္မတနိုင်ငံ (NKR) ဟု တစ်ဖက်သတ် ကြေညာထားသည့် ဒေသခံခေါင်းဆောင်များသည် လက်နက်ချရန် သဘောတူခဲ့ပြီး အဇာဘိုင်ဂျန်က အောင်ပွဲ ကြေညာခဲ့သည်။

သုံးရက်အကြာတွင် အဇာဘိုင်ဂျန် တပ်ဖွဲ့များက နာဂေါ်နို-ကာရာဘက်ဒေသအနှံ့ရှိ မဟာဗျူဟာမြောက် ကုန်းပြင် မြင့်များ၊ သတ္တုတွင်းများ၊ ကျေးရွာများကို ထိန်းချုပ်ခဲ့ပြီး အာမေးနီးယားလူမျိုးများ နေထိုင်သည့် နေရာများ၏ အပြင်ဘက်တွင် စခန်းချခဲ့ကာ NKR က ၎င်း၏ တပ်ဖွဲ့ကို ဖျက်သိမ်းမည်ဟု သဘောတူခဲ့သည်။

အဇာဘိုင်ဂျန်စစ်တပ်ရဲ့ တိုက်ခိုက်မှုကြောင့် ဘုရားကျောင်း ပျက်စီးသွားစဉ်

လက်နက်ဖြုတ်သိမ်းရေး လုပ်ငန်းစဉ်သည် ရက်အနည်းငယ်သာ ကြာမြင့်နိုင်ဖွယ်ရှိသော်လည်း တိုက်ပွဲအတွင်း ထိခိုက်သေဆုံးမှုများ၊ အိမ်မဲ့ရာမဲ့ဖြစ်မှုများနှင့် ဝရုန်းသုန်းကား အခြေအနေများသည် ဒေသတစ်ခုလုံးကို ရိုက်ခတ် ခဲ့ပြီး လူသားချင်းစာနာထောက်ထားမှုဆိုင်ရာ အကျပ်အတည်းတစ်ခု ထပ်မံပေါ်ပေါက်လာဖွယ်ရှိသည်။

နာဂေါ်နို-ကာရာဘက်ဒေသတွင် အာမေးနီးယားလူမျိုး ၁၂၀,၀၀၀ ခန့်နေထိုင်သည်။ ထိုဒေသကို အောင်မြင်စွာ သိမ်းယူနိုင်ခဲ့ကြောင်း ကြေညာခဲ့သည့် အဇာဘိုင်ဂျန်သမ္မတ အီလ်ဟမ် အလီယက်ဗ် (Ilham Aliyev) က သူသည် အာမေးနီးယားလူမျိုးများကို အဇာဘိုင်ဂျန် လူ့အသိုင်းအဝိုင်းအတွင်း ပေါင်းစည်းရန် ဆန္ဒရှိကြောင်း ပြောကြားခဲ့ သည်။

သို့သော် အာမေးနီးယားလူမျိုးများနှင့် အဇာဘိုင်ဂျန်အကြား ဆယ်စုနှစ်များစွာကြာ ဖြစ်ပွားခဲ့သည့် ပဋိပက္ခများနှင့် ရက်စက်ကြမ်းကြုတ်မှုတို့ကြောင့် တစ်ဖက်နှင့် တစ်ဖက် ယုံကြည်စိတ်ချခြင်းမရှိခဲ့ပေ။ 

ထို့ကြောင့် နာဂေါ်နို-ကာရာဘက်ဒေသတွင် နေထိုင်ခဲ့သည့် အာမေးနီးယားလူမျိုးများသည် အာမေးနီးယားနိုင်ငံသို့ အစုလိုက် အပြုံလိုက် ထွက်ခွာလျက်ရှိသည်။ NKR ခေါင်းဆောင်များက နာဂေါ်နို-ကာရာဘက်တွင် နေထိုင်သည့် အာမေးနီးယား ဒေသခံအားလုံးနီးပါးသည် ထိုဒေသကို စွန့်ခွာကာ အာမေးနီးယားသို့ ပြောင်းရွှေ့ဖွယ်ရှိကြောင်း ပြောကြားခဲ့သည်။

ထိုသို့ လူအစုလိုက်အပြုံလိုက် ထွက်ခွာမှုသည် ဒေသတွင်း မတည်ငြိမ်မှုများနှင့် ပဋိပက္ခများကို ပိုမိုဖြစ်ပွားစေ သည့် အခြေအနေကို ဖြစ်စေနိုင်သည်ဟု ခန့်မှန်းမှုများ ထွက်ပေါ်ခဲ့သည်။
နိုင်ငံတကာအသိုင်းအဝိုင်း၏ လျစ်လျူရှုထားမှုကလည်း ထိုအခြေအနေကို ပိုမိုဆိုးရွားစေရန် လမ်းဖွင့်ပေးသကဲ့သို့ ဖြစ်နေသည်။

အဇာဘိုင်ဂျန်စစ်တပ်ရဲ့ တိုက်ခိုက်မှုကြောင့် ပျက်စီးနေသော အာမေးနီးယား လူမျိုးများ နေထိုင်တဲ့ အဆောက်အအုံများကိုတွေ့ရစဉ်

ဆိုဗီယက်ယူနီယံ ပြိုကွဲပြီးနောက်ပိုင်း ဖွဲ့စည်းခဲ့သည့် စုပေါင်း လုံခြုံရေးစာချုပ်အဖွဲ့ (Collective Security Treaty Organisation- CSTO) အရ ရုရှားသည် အာမေးနီးယား၏ လုံခြုံရေးကို အာမခံပေးထားသည့် နိုင်ငံဖြစ်သည်။

ထို့ကြောင့် ရုရှားသည် နာဂေါ်နို-ကာရာဘက်ဒေသရှိ အာမေးနီးယားလူမျိုးများ၏ အကျိုးစီးပွားများကို ပိုမို ကာကွယ်ပေးသင့်ပြီး အပစ်အခတ်ရပ်စဲရေးကို ခိုင်မာစွာ ကြားဝင်ဆောင်ရွက်ပေးရမည်ဖြစ်သည်။

သို့သော် ရုရှားသည် အဇာဘိုင်ဂျန်နှင့်လည်း ရန်ဘက်ဖြစ်လိုသည့် ဆန္ဒမရှိခဲ့ဘဲ အာမေးနီးယားနှင့် အဇာဘိုင်ဂျန် အကြား တင်းမာမှုများကို ကြားဝင်ဖြေရှင်းပေးခဲ့ခြင်း မရှိပေ။

အဇာဘိုင်ဂျန်-အာမေးနီးယား ပဋိပက္ခကို မျက်ကွယ်ပြုပြီး ကျောခိုင်းခဲ့သည်မှာ ရုရှား တစ်နိုင်ငံတည်းသာ မဟုတ် ဘဲ ဥရောပသမဂ္ဂနှင့် အမေရိကန်တို့လည်း ပါဝင်နေသည်။

ဆိုဗီယက်ယူနီယံ ပြိုကွဲပြီးနောက် ဆိုဗီယက်အဖွဲ့ဝင်ဟောင်း နိုင်ငံများကို ဒီမိုကရေစီစနစ် ပိုမိုခိုင်မာစေရန် လုပ်ဆောင်ပေးမည်ဟု ကတိပြုခဲ့သည့် အနောက်နိုင်ငံများသည် ပြီးခဲ့သည့် ဆယ်စုနှစ် သုံးစုအတွင်းက ဖြစ်ပွားခဲ့ သော အဇာဘိုင်ဂျန်-အာမေးနီးယား ပဋိပက္ခကို အနည်းငယ်သာ စိတ်ဝင်စားကြောင်း ပြသခဲ့သည်။ 

၁၉၉၄ ခုနှစ်က ဖြစ်ပွားခဲ့သည့် ပထမအကြိမ် နာဂေါ်နို-ကာရာဘက် စစ်ပွဲတွင် အာမေးနီးယား တပ်ဖွဲ့များ အနိုင်ရခဲ့ ပြီးနောက် ထိုဒေသ၌ နေထိုင်သည့် အဇာဘိုင်ဂျန်လူမျိုးများ ဒုက္ခရောက်ခဲ့ရချိန်ကလည်း နိုင်ငံတကာ အသိုင်းအဝိုင်းသည် မသိကျိုးကျွန်ပြုခဲ့သည်။ 

အကူအညီပေးရမည့်အစား ဥရောပသမဂ္ဂနှင့် အမေရိကန်တို့သည် ပဋိပက္ခကို မျက်ကွယ်ပြုခဲ့ရုံသာမက နောက်ထပ် ဖြစ်ပွားမည့် စစ်ပွဲအတွက် ကြိုတင်ပြင်ဆင်နေသည့် အဇာဘိုင်ဂျန်ကို လက်နက်များ ရောင်းချခြင်းဖြင့် အမြတ်ထုတ်ခဲ့ကြသည်။

အာမေးနီးယားလူမျိုးစု တပ်ဖွဲ့က လက်နက်ချစဉ်

အစ္စရေးနှင့် တူရကီတို့သည်လည်း အဇာဘိုင်ဂျန်၏ စစ်အသုံးစရိတ် တိုးမြှင့်မှုကို အခွင့်ကောင်းယူကာ လက်နက် များ ရောင်းချခဲ့ပြီး အမြတ်ထုတ်ခဲ့သည်။

ရုရှားကလည်း အဇာဘိုင်ဂျန်နှင့် အာမေးနီးယား နှစ်နိုင်ငံစလုံးကို လက်နက်များ ရောင်းချခဲ့သည်။ 

အနောက်နိုင်ငံများထံမှ လက်နက် ဝယ်ယူမှုများနှင့် နည်းပညာ အသာစီးရမှုတို့ကြောင့် ၂၀၂၀ ပြည့်နှစ်က ဖြစ်ပွားခဲ့ သည့် စစ်ပွဲတွင် အဇာဘိုင်ဂျန်က အနိုင်ရခဲ့ချိန်တွင်လည်း အင်အားကြီးနိုင်ငံများသည့် အဇာဘိုင်ဂျန်-အာမေးနီး ယား ငြိမ်းချမ်းရေးကို တွန်းအားပေး လုပ်ဆောင်ရန် စိတ်မဝင်စားခဲ့ပေ။

၂၀၂၂ ခုနှစ်က အဇာဘိုင်ဂျန်သည် နာဂေါ်နို-ကာရာဘက်ဒေသနှင့် အာမေးနီးယားဒေသကို ဆက်သွယ်ထားသည့် လာချင် စင်္ကြန်ကို ပိတ်ဆို့ခဲ့ချိန်ကလည်း နိုင်ငံတကာ၏ ကြားဝင်စေ့စပ်မှုများသည် ထိရောက်ခဲ့ခြင်းမရှိပေ။

ထိုပိတ်ဆို့မှုသည် ရက်ပေါင်း ၂၅၀ ကျော် ကြာမြင့်ခဲ့ပြီး နာဂေါ်နို-ကာရာဘက် ဒေသအတွင်းသို့ နိုင်ငံတကာ ကြက်ခြေနီ ကော်မတီ (ICRC) ပင်လျင် ဝင်ခွင့် မရခဲ့ပေ။ 

ထို့ကြောင့် နာဂေါ်နို-ကာရာဘက်ဒေသတွင် ဖြစ်ပွားခဲ့သည့် ပဋိပက္ခမှတ်တမ်းများကို ပြန်လည်သုံးသပ် မည်ဆို ပါက နိုင်ငံတကာ အသိုင်းအဝိုင်း၏ မသိကျိုးကျွန်ပြုမှုသည် ရှက်ဖွယ်လိလိဖြစ်သည်။ 

နိုင်ငံတကာအသိုင်းအဝိုင်းသည် နာဂေါ်နို-ကာရာဘက် ဒေသနှင့်ပတ်သက်ပြီး အဇာဘိုင်ဂျန်နှင့် အာမေးနီးယား အကြား ဖြစ်ပွားခဲ့သည့် စစ်ပွဲသုံးခုကို အချိန်မီ ဟန့်တားရန်နှင့် အဓိပ္ပာယ်ပြည့်ဝသည့် ကြားဝင် ဖြေရှင်းမှုများ ပြုလုပ်ရန် ပျက်ကွက်ခဲ့သဖြင့် သွေးစွန်းမှုများစွာ ဖြစ်ပွားခဲ့သည်။

ထို့ကြောင့် ၂၀၂၃ ခုနှစ်တွင် ဖြစ်ပွားခဲ့သည့် စစ်ပွဲသည် အဇာဘိုင်ဂျန်နှင့် အာမေးနီးယားအကြား နောက်ဆုံးစစ်ပွဲ ဖြစ်စေရန် နိုင်ငံတကာ အသိုင်းအဝိုင်းအနေဖြင့် ပြည့်စုံကျယ်ပြန့်သည့် ကမ္ဘာ့အခင်းအကျင်း တစ်ခုကို ဆောင်ကျဉ်း ပေးရန် တာဝန်ရှိနေသည်ဟု ယူဆပါက မှားမည်မထင်ချေ။

Source: အယ်လ်ဂျာဇီးယား

CNI Sport Article 

၂၀၂၃ ခုနှစ်၊ စက်တင်ဘာ ၂၂

ပြီးခဲ့တဲ့ နွေရာသီ အပြောင်းအရွှေ့မှာ အင်တာမီလန်အသင်းကနေ ပြောင်းရွှေ့လာခဲ့တဲ့ ဂိုးသမား အိုနာနာကတော့ ယူနိုက်တက် ကစားသမားဘဝ အစစ်အမှန်ဖြစ်တဲ့ ဝေဖန်မှု၊ ဖိအားတွေကို စတင်ရင်ဆိုင် နေရပြီ ဖြစ်ပါတယ်။

ပြီးခဲ့တဲ့ ဘောလုံးရာသီက အင်တာမီလန်အသင်းကို ချန်ပီယံလိဂ် ဗိုလ်လုပွဲ ရောက်အောင် ပို့ဆောင်ပေးနိုင်ခဲ့တဲ့ စွမ်းဆောင်မှုတွေကြောင့်လည်း အိုနာနာရဲ့ ယူနိုက်တက် ကစားသမားဘဝ အစကို စောင့်ကြည့်တဲ့သူတွေ များနေခဲ့တာပါ။

ယူနိုက်တက်အသင်းမှာ နှစ်ပေါင်းများစွာကြာကစားပြီး ထွက်ခွာခဲ့တဲ့ ဂိုးသမား ဒီဂီယာနေရာမှာ အစားထိုး ဝင်ရောက်ခဲ့တဲ့ အိုနာနာအတွက်တော့ မန်ချက်စတာကလပ် ကစားသမားဘဝဟာ မချောမွေ့ခဲ့ဘဲ အဆင်မပြေ မှုတွေနဲ့သာ စတင်ခဲ့တာပါ။ 

အိုနာနာဟာ ပြီးခဲ့တဲ့ ချန်ပီယံလိဂ် ပွဲစဉ်ဖြစ်တဲ့ ဘိုင်ယန်မြူးနစ်အသင်းနဲ့ ပွဲမှာ ဆာနေးရဲ့ ကန်ချက်ကို ဖမ်းတာမှာ သေသပ်မှု မရှိခဲ့တာကြောင့် ဂိုးပေးခဲ့ရပြီးနောက် မနှစ်ကရာသီက ဘရန်ဖို့ဒ်၊ ဝက်စ်ဟမ်းနဲ့ ပွဲမှာ အမှားပြုလုပ်ခဲ့တဲ့ ဒီဂီယာနဲ့ ပုံစံချင်းသွားတူနေတယ်ဆိုပြီး ဝေဖန်မှုတွေခံခဲ့ရပါတယ်။

ဂိုးပေးလိုက်ရတဲ့ အိုနာနာ

ယူနိုက်တက်အသင်းဟာ ဒီဂီယာရဲ့ အမှားအယွင်းတွေကြောင့် အိုနာနာကို ပေါင် ၄၇ သန်း အသုံးပြုပြီး အင်တာမီလန် အသင်းကနေ ခေါ်ယူခဲ့တာပါ။

အိုနာနာရဲ့ အရည်အချင်း အများအပြားဟာ ဒီဂီယာထက် သာနေတာကြောင့် ယူနိုက်တက်အသင်း ခေါ်ယူချိန်မှာ အများကြီး မျှော်လင့်ခဲ့ကြပေမယ့် အခုအချိန်မှာတော့ ဒီအကြောင်းကို ဘယ်သူကမှ မပြောတော့ပါဘူး။ 

အိုနာနာရဲ့ ယူနိုက်တက် ကစားသမားဘဝ ပထမဆုံး ၆ ပွဲမှာ ပေးဂိုး ၁၄ ဂိုး ပေးခဲ့ရပြီးနောက် အားလုံးက ဒီလို ပေးဂိုး အများအပြား ခွင့်ပြုခဲ့ရတာကို မီးမောင်းထိုးပြ ခဲ့ကြတာပါ။

ယူနိုက်တက်အသင်းရဲ့အဓိက ကစားသမား အများအပြားဟာ ဒဏ်ရာတွေ ရနေတာကြောင့်လည်း အိုနာနာ အတွက် စိတ်ပျက်စရာတွေကို ကြုံတွေ့နေရတာ ဖြစ်ပါတယ်။ 

အိုနာနာဟာ ဘိုင်ယန်မြူးနစ်အသင်းနဲ့ပွဲမှာ သူ့ရဲ့အမှားယွင်းကြောင့် သွင်းဂိုးခွင့်ပြုခဲ့ရပေမယ့် ဒုတိယပိုင်းမှာ ဂျာမန်ကလပ်ရဲ့ အပိုင်အခွင့်အရေး အများအပြားကို ကာကွယ်နိုင်ခဲ့တာပါ။  

ယူနိုက်တက်အသင်းကိုတွေ့ရစဉ်

ကင်မရွန်းဂိုးသမားဟာ ယူနိုက်တက်အသင်းအတွက် ပထမပွဲ ၆ ပွဲမှာ ဂိုးရနိုင်မယ့် အခွင့်အရေး ၂၅ ကြိမ်ကို ကာကွယ်ထားတယ်လို့ အချက်အလက်တွေအရ သိရပါတယ်။

ပြီးခဲ့တဲ့ရာသီက ဒီဂီယာရဲ့ အချက်အလက်တွေနဲ့ နှိုင်းယှဉ်ရရင် စပိန်ဂိုးသမားဟောင်းဟာ ရာသီရဲ့ပထမ ၆ ပွဲမှာ ကာကွယ်မှု ၁၈ ကြိမ် ပြုလုပ်နိုင်ခဲ့ပြီး နောက်ဆုံး ၆ ပွဲမှာ ကာကွယ်မှု ၁၆ ကြိမ် ပြုလုပ်ထားနိုင်တာဖြစ်လို့ အိုနာနာ ရဲ့ စွမ်းဆောင်ရည်က ပိုပြီးကောင်းမွန်နေတာကို မြင်တွေခဲ့ရပါတယ်။ 
အိုနာနာဟာ သွင်းဂိုးတွေ အများအပြားကို ခွင့်ပြုထားရပေမယ့် သူဟာ ပိုကောင်းအောင် လုပ်နိုင်တဲ့ အခိုက်အတန့် အချို့လည်း ရှိနေတာပါ။ 

လက်ရှိအချိန်မှာ ပွဲစဉ်တွေဟာ နည်းပါးနေသေးတာကြောင့် အိုနာနာရဲ့ စွမ်းဆောင်ရည်တွေအပေါ် အကဲဖြတ်ဖို့ စောသေးတယ်လို့လည်း သုံးသပ်မှုတွေ ရှိနေကြပါတယ်။ 

ဒီဂီယာရဲ့ ယူနိုက်တက် ကစားသမားဘဝ အစောပိုင်းမှာလည်း လက်စွမ်း မတည်ငြိမ်မှုတွေကြောင့် ဝေဖန်မှုတွေ အများအပြား ခံခဲ့ရပေမယ့် နှစ်တွေ ကြာလာပြီးတဲ့အချိန်မှာ သူဟာ ကမ္ဘာ့အကောင်းဆုံး ဂိုးသမားတွေထဲက တစ်ဦး အဖြစ် သတ်မှတ်ခံခဲ့ရတာပါ။ 

ဒီဂီယာဟာ ယူနိုက်တက်အသင်းရဲ့ တစ်ရာသီ အကောင်းဆုံး ကစားသမားအဖြစ် အကြိမ်ကြိမ် ရွေးချယ်ခြင်း ခံခဲ့ရတာ ဖြစ်ပါတယ်။

အိုနာနာ အဝေးဘော ကန်နေစဉ်

အိုနာနာဟာ ဘိုင်ယန်မြူးနစ်အသင်းနဲ့ ပွဲစဉ်မှာဆိုရင် သူ့ရဲ့အမှားကို သိတဲ့အတွက် ပွဲအပြီး အင်တာဗျူးမှာ ဒီရှုံးပွဲ အတွက် သူ့မှာ တာဝန်အပြည့်အဝ ရှိတယ်လို့ ပြောခဲ့တာပါ။

အိုနာနာကတော့ သူ့ရဲ့ ယူနိုက်တက်ကစားသမား ဘဝအစဟာ သူလိုချင်သလို မဖြစ်ခဲ့တဲ့အတွက် လေ့လာ သင်ယူမှုတွေ ပြုလုပ်သွားမှာဖြစ်ပြီး သူ့မှာ သက်သေပြသစရာတွေ အများကြီး ကျန်သေးတယ်လို့ ပြောခဲ့တာ ဖြစ်ပါတယ်။ 

အိုနာနာဟာ ယူနိုက်တက်အသင်းမှာ သွင်းဂိုးခွင့်ပြုတာတွေ များနေပေမယ့် သူဟာ ပထမ ၆ ပွဲမှာ ဘောလုံးပေးပို့မှု အကြိမ် ၂၀၀ ကျော် ပြုလုပ်ခဲ့တာမှာ ၇၆ ကြိမ် တိကျခဲ့ပြီး ၃၁.၅ ရာခိုင်နှုန်းကိုသာ အဝေးကိုကန်ခဲ့တာပါ။ 

ဒီအချက်အလက်တွေဟာ ယူနိုက်တက်အသင်းမှာ နည်းပြ အဲရစ်တန်ဟတ် လိုချင်နေတဲ့ အရာတွေဖြစ်ပြီး အဲ့ဒါကြောင့်လည်း အိုနာနာကို ခေါ်ယူခဲ့တာ ဖြစ်ပါတယ်။ 

ဘောလုံးကို အချိန်အကြာကြီး ကိုင်ထားနိုင်ပြီး ပြိုင်ဘက် ကစားသမားတွေကို ကြောက်ရွံ့ခြင်းမရှိတဲ့ အိုနာနာ အနေနဲ့ ယူနိုက်တက် အသင်းဖော်တွေနဲ့ အသားကျဖို့ အချိန်အနည်းငယ်ယူရဖို့ လိုအပ်နေတာကြောင့် သွင်းဂိုးတွေ ကတော့ ထပ်ပြီးပေးနေရဦးမှာပါ။ 

အိုနာနာဟာ လာမယ့်ပွဲတွေမှာ သူ့အပေါ် ဝေဖန်နေတာတွေကို အသံတိတ်အောင် စွမ်းဆောင်ပြီး ယူနိုက်တက် အသင်းရဲ့ ရလဒ်ဆိုးတွေကို အဆုံးသတ် ပေးနိုင်မလားဆိုတာ စောင့်ကြည့်ရမှာ ဖြစ်ပါတယ်။

Source: Daily Mail