CNI International Article

၂၀၂၃ ခုနှစ်၊ ဖေဖော်ဝါရီ ၂၆

ရုရှားကျူးကျော်စစ် တစ်နှစ်ပြည့်သည့်တိုင် ယူကရိန်းသည် ကြံ့ကြံ့ခိုင် ရပ်တည်နိုင်နေဆဲ ဖြစ်သည်။

ယူကရိန်းသားတို့သည်လည်း တိုင်းပြည် ကာကွယ်ရေးတွင် ၎င်းတို့၏ အသိအမှတ်ပြုဖွယ် ခုခံမှုနှင့် သတ္တိတို့ကို ပြသထားနိုင်သည်။

ရုရှားသမ္မတ ပူတင်၏ အချိန်တိုအတွင်း ယူကရိန်းကို သိမ်းပိုက်မည့် အစီအစဉ်ကို ရိုက်ချိုးနိုင်ခဲ့သည့်အပြင် နိုင်ငံအရှေ့ပိုင်းနှင့် တောင်ပိုင်းတွင် တန်ပြန်ထိုးစစ်ဆင်မှုကို အောင်မြင်အောင် လုပ်ဆောင်နိုင်ခဲ့သည့် ယူကရိန်းသားတို့၏ သွေးသည် ချီးကျူးမှုနှင့် ထိုက်တန်ကြောင်း သက်သေခံနေသည်။

ထိုအချက်ကြောင့်ပင် ပူတင်၏ ရုရှားသည် အခုချိန်အထိ ယူကရိန်းနယ်မြေများကို သိသိသာသာ သိမ်းပိုက်နိုင်ခြင်း မရှိသည့်အပြင် ဆုံးရှုံးမှုများနှင့်ပါ ရင်ဆိုင်ရလျက် ရှိသည်။

ယူကရိန်းစစ်ပွဲ ရှေ့တန်းကိုတွေ့ရစဉ်

တစ်ဖက်တွင် ရုရှားစစ်တပ်၏ စွမ်းဆောင်ရည် ကောင်းမွန်မှု မရှိသည့်တိုင် ပူတင်သည် ယူကရိန်းစစ်ပွဲကို အဆုံးသတ်မည့် အလားအလာမရှိပေ။

ဖေဖော်ဝါရီ ၂၁ ရက် နိုင်ငံတော်မိန့်ခွန်းတွင် ပူတင်က ယူကရိန်းအရေးကို စစ်ပွဲဟု သုံးနှုန်းခဲ့သည်။ ယခင်အသုံး ပြုခဲ့သော အထူးစစ်ဆင်ရေးမှ ပြောင်းလဲ ခေါ်ဆိုခဲ့ခြင်း ဖြစ်သည်။

နယ်စပ်မှ အန္တရာယ်များကို တွန်းလှန်ရေးအတွက် ယူကရိန်းနိုင်ငံတွင်းသို့ ထိုးစစ်ဆင်မှုများ ဆက်လုပ်သွားမည်ဟု လည်း ၎င်းက ပြောခဲ့သည်။ တစ်နှစ်ပြည့်ချိန်အထိ အနောက်အုပ်စုသည် ယူကရိန်းဘက်တွင် ရှိနေကြောင်း အကောင်းဆုံး ပြသထားနိုင်သည်။

အမေရိကန်သမ္မတ ဘိုင်ဒန်သည်ပင် ဖေဖော်ဝါရီ ၂၀ ရက်တွင် ယူကရိန်းမြို့တော်သို့ ရုတ်တရက် သွားရောက်ခဲ့ကာ စစ်ပွဲမပြီးမချင်း ယူကရိန်းကို ထောက်ပံ့နေမည်ဟု ယူကရိန်းသမ္မတကို ကတိပေးခဲ့သည်။

ဘိုင်ဒန်နှင့် တစ်နေ့တည်းမှာပင် အီတလီဝန်ကြီးချုပ် မယ်လိုနီသည်လည်း ကိယက်ဗ်မြို့(ယူကရိန်း)သို့ ရောက်လာခဲ့ပြီး ဇာလန်းစကီးနှင့် တွေ့ခဲ့သည်။

ယူကရိန်းကို ဆက်လက်ထောက်ပံ့နေဦးမည်ဆိုသည်နှင့် Spada၊ Skyguard ကဲ့သို့ လေကြောင်း ကာကွယ်ရေး စနစ်များကိုပါ ထပ်မံပေးအပ်ဦးမည်ဟု ကတိပေးခဲ့သည်။

ယူကရိန်းကို ထောက်ပံ့ပေးရန် ကတိအပြင် လက်ရှိ လက်နက် ထောက်ပံ့မှုများသည် လိုအပ်သည်ထက် ပို၍ နှေးနေသည်ကို လက်ခံကြောင်း ဥရောပခေါင်းဆောင်များက မြူးနစ်လုံခြုံရေး ညီလာခံတွင် ဝန်ခံခဲ့ကြသည်။

ရုရှားကျူးကျော်မှုကို တွန်းလှန်ရေးအတွက် ယူကရိန်းကို တင့်ကားများ ပို့ပေးရန် ဂျာမန်ဝန်ကြီးချုပ်က တောင်းဆို ခဲ့သည့်အပြင် ဗြိတိန်ဝန်ကြီးချုပ်ကလည်း ယူကရိန်းသို့ တိုက်ခိုက်ရေး ရဟတ်ယာဉ်များ ထောက်ပံ့ရန်၊ ယူကရိန်း လေယာဉ်မှူးများကို လေ့ကျင့်ပေးရန် ကျန်ခေါင်းဆောင်များကို တိုက်တွန်းခဲ့သည်။

ဘိုင်ဒန်နဲ့ ဇာလန်းစကီးကိုတွေ့ရစဉ်

စစ်လက်နက် ထောက်ပံ့မှုအပြင် ရုရှားကို အရေးယူ ပိတ်ဆို့မှုများ လုပ်ဆောင်ရေးတွင်လည်း အနောက်အုပ်စုသည် ပြောဆိုခဲ့သည်နှင့် တစ်ထပ်တည်း ဖြစ်အောင်သက်သေပြထားနိုင်သည်။ ရုရှားရေနံများ ပိတ်ပင်ခြင်းနှင့်ပတ်သက်သည့် အရေးယူမှုသည် ဖေဖော်ဝါရီ ၅ ရက်တွင် စတင် အသက်ဝင်လာခဲ့ပြီး ၂၄ ရက် G-7 အစည်းအဝေးတွင်လည်း အရေးယူမှု အသစ်များ ချမှတ်ရန် ဆွေးနွေးခဲ့ကြသည်။

သို့သော် တစ်ဖက်တွင် ကြည့်မည်ဆိုလျှင် ယူကရိန်းအတွက် အနောက်အုပ်စု၏ ထောက်ပံ့မှုများမှာ လေးစားမှု ကင်းမဲ့နေသည်။

အနောက်အုပ်စုအနေဖြင့် ယူကရိန်း၏ ကြွေးမြီများကို လျှော်ပစ်ရေးလုပ်ဆောင်ခြင်း မရှိသလို ရုရှားဗဟိုဘဏ်နှင့် အမည်ပျက်စာရင်းသွင်းထားသော ရုရှားအစိုးရအဖွဲ့ဝင်များထံ ရရှိထားသည့် ငွေကြေးများကို စစ်လျော်ကြေး အဖြစ် ယူကရိန်းသို့ပေးရန် အဆိုပြုချက်သည်လည်း တိုးတက်မှု ရှိမလာခဲ့ပေ။

ယူကရိန်းအရေးနှင့် ပတ်သက်၍ အနောက်အုပ်စု၏ မူဝဒါသည် တိုးတက်မှု၊ စနစ်ကျမှု မရှိသည်ကိုလည်း တွေ့ရသည်။ ခြိမ်းခြောက်မှုများနှင့် တိုက်ခိုက်မှုအသစ်များကို တွန်းလှန်ရေး ထောက်ပံ့ကူညီမှုများသည် အရေးပါသကဲ့သို့ ယင်းကို ကာလရှည် ထိန်းသိမ်းနိုင်ရန်လည်း အရေးကြီးသည်။

အနောက်အုပ်စုနှင့် ယူကရိန်းတို့ကြား တရားဝင်ပူးပေါင်းမှု မရှိခြင်းကို မဖြစ်မနေ အဖြေရှာရန် လိုအပ်နေသည်။

ယူကရိန်းပဋိပက္ခသည် ဆုတ်ယုတ်လာသော စစ်ပွဲအဖြစ် ပြောင်းလဲလာချိန်တွင် ပူတင် အနေဖြင့် အနောက်အုပ်စု ၏ ယူကရိန်းအား ထောက်ပံ့မှုများ နည်းပါးလာချိန်ကို စောင့်ဆိုင်းကာ ကာလရှည် စစ်မြေပြင်တွင် အောင်မြင်မှုရယူရန် မျှော်လင့်နေသည်မှာ ပို၍ ရှင်းလင်းလာသည်။

ကနဦး ကျူးကျော်စစ် စတင်ပြီးချိန် အနောက်အုပ်စု၏ စည်းလုံးညီညွတ်မှုသည် အံ့သြဖွယ်တချို့ ဖြစ်ခဲ့သည့်တိုင် ပူတင် အနေဖြင့် စစ်ပွဲကြာလေ ယူကရိန်းကာကွယ်ရေးနှင့် ပြန်လည်တည်ဆောက်ရေးလုပ်ငန်းများအတွက် အနောက်အုပ်စု၏ ကုန်ကျစရိတ်ပို၍ များပြားလာလေ ဆိုသည်ကို သဘောပေါက် နားလည်ထားသည်။

အီးယူကိုယ်စားလှယ်နဲ့ ဇာလန်းစကီးကိုတွေ့ရစဉ်

စစ်ပွဲကုန်ကျစရိတ်သည် လာမည့်နှစ်များတွင် အနောက်နိုင်ငံများ၌ ပို၍ သဘောထားပျော့ပြောင်းသော ခေါင်းဆောင်များ ထွက်ပေါ်လာစေရေး အထောက်အကူ ဖြစ်စေမည်ဟုလည်း ရှုမြင်ထားပုံရသည်။

ထိုထဲတွင် အမေရိကန်သမ္မတဟောင်း ဒေါ်နယ်ထရမ့်လည်း ပါဝင်သည်။ သူသာ ပြန်လည် အရွေးချယ်ခံရလျှင် ပူတင်နှင့် ငြိမ်းချမ်းရေး သဘောတူညီချက် ရရှိစေရမည်ဟု ထရမ့်က ပြောခဲ့သည်။

၎င်း၏ အကြံပေးဟောင်း တစ်ဦးဖြစ်သူ ရူဒီ ဂူလီယာနီကလည်း ယူကရိန်းကို ထောက်ပံ့ ကူညီနေမှုများက ၎င်းတို့ ၏ ကိုယ့်ကိုယ်ကို ကာကွယ်နိုင်မှု အရည်အသွေးကို ကျဆင်းစေသည်ဟု ပြောသည်။

ဥရောပတွင်လည်း ပူတင်ဘက်မှ ရပ်တည်လိုသည့် ထင်ရှားသော နိုင်ငံရေသမားများ ရှိနေသည်။ အီးယူ၏ ရံပုံငွေ ကို မှီခိုနေရသည့်တိုင် ဟန်ဂေရီ ဝန်ကြီးချုပ်သည် ရုရှားလိုလားသော သဘောထားကို ဆက်လက်ထိန်းသိမ်းထားဆဲ ဖြစ်သည်။

နောက်တစ်ဦးမှာ အီတလီဝန်ကြီးချုပ် မယ်လိုနီ၏ ညွှန့်ပေါင်းမဟာမိတ် ဘာလူစကိုနီ ဖြစ်သည်။

ပြင်သစ်သမ္မတလောင်း မာရိုင်း လီပန်းသည်လည်း ရုရှားသို့ ပျော့ပြောင်းစွာ ချည်းကပ်မှုအတွက် ထင်ရှားသည်။

သူမ၏ ပါတီခေါင်းဆောင်အသစ်သည်ပင် ရုရှားအပေါ် စွမ်းအင်ဆိုင်ရာ အရေးယူပိတ်ဆို့မှုများကို ဖယ်ရှားပေးရန် တောင်းဆိုထားသည်။

ပြင်သစ်အထွေထွေရွေးကောက်ပွဲသည် ၂၀၂၇ ခုနှစ်မှ ကျင်းပမည် ဖြစ်သောကြောင့် ပြင်သစ်တွင် ရုရှားလိုလား သော ခေါင်းဆောင်သစ်တစ်ဦး အချိန်တိုအတွင်း ပေါ်လာနိုင်ရန် အလားမလာ မရှိသော်လည်း ပူတင်အတွက် လမ်းပွင့်နေဆဲပင် ဖြစ်သည်။

ဆလိုဗေးနီးယားက အကောင်းဆုံး ဥပမာဖြစ်သည်။ အစိုးရသည် အယုံအကြည်မရှိ မဲခွဲမှုတွင် ရှုံးနိမ့်ခဲ့ခြင်းကြောင့် စက်တင်ဘာ ၃၀ ရက်တွင် ရွေးကောက်ပွဲကျင်းပရန် လွှတ်တော်က အတည်ပြုပေးခဲ့သည်။

ထိုရွေးကောက်ပွဲတွင် ရုရှားလိုလားသည့် ဝန်ကြီးချုပ်ဟောင်း ရောဘတ်ဖီကို အနိုင်ရရန် အလားအလာကောင်းနေ ပြီး လက်ရှိအစိုးရထက် ရုရှားနှင့် ပိုနီးကပ်သော ညွှန့်ပေါင်းအစိုးရသစ်တစ်ရပ် ပေါ်ပေါက်လာနိုင်ဖွယ် ရှိသည်။

ယူကရိန်းကို ထောက်ပံ့ရေးနှင့်ပတ်သက်၍ မဟာမိတ်များအကြား သဘောထားကွဲလွဲမှု ပေါ်ပေါက်လာခြင်းကို တားဆီးရန်အတွက် အနောက်အုပ်စုအနေဖြင့် ၎င်းတို့၏ မဟာဗျူဟာအတွင်း ကာလရှည် အစီအစဉ်များ ထည့်သွင်းရန် စတင်စဉ်းစားသင့်နေပြီ ဖြစ်သည်။

အမေရိကန်၊ အီးယူနှင့် ဗြိတိန်တို့သာ ထိုသို့ လုပ်ဆောင်နိုင်မည်ဆိုလျှင် ယင်းက ပူတင်၏ လက်ရှိ စစ်မဟာဗျူဟာ ၏ ရှုံးနိမ့်မှုဖြစ်ရုံမက ယူကရိန်းအား ကာလရှည် ဆက်လက် ထောက်ပံ့နိုင်ရေး အထောက်အကူ ဖြစ်စေလိမ့်မည်။

ယူကရိန်း၏ အီးယူနှင့် နေတိုးမဟာမိတ်ဖြစ်ရေး ကြိုးစားမှုသည် ထိုသို့သော ပူးပေါင်းမှုကို ရရှိရန် ကြိုးစားမှု အစိတ်အပိုင်း တစ်ရပ်ဖြစ်သည်။

သို့သော် ယူကရိန်းမြေပေါ်တွင် ရုရှားတပ်များ အလုံးအရင်းနှင့် ရှိနေခြင်းက အဖွဲ့ဝင်ဖြစ်ရေး ကိစ္စများကို ကြီးမားသော အဟန့်အတား ဖြစ်စေသည်။

ပြီးခဲ့သည့် နှစ်တွင် အီးယူအဖွဲ့ဝင်ဖြစ်ရေး လျှောက်ထားမှုကို အတည်ပြုမှု ရရှိခဲ့သည့်တိုင် အဖွဲ့တွင်းသို့ ဝင်ရောက်ရန် ကာလရှည်စောင့်ဆိုင်းရပေဦးမည်။ ယင်းကြောင့် ယူကရိန်းနှင့် အနောက်အုပ်စုတို့အကြား သီးခြားဖြစ်သော တရားဝင်ပူးပေါင်းမှုတစ်ခု လိုအပ်နေခြင်း ဖြစ်သည်။

 ယူကရိန်းစစ်ပွဲ ရှေ့တန်းတစ်နေရာကိုတွေ့ရစဉ်

ယူကရိန်း၏ အီးယူနှင့် နေတိုးအဖွဲ့ဝင် ဖြစ်ရေးအတွက် မထိခိုက်စေဘဲ အနောက်အုပ်စုအား ကြားဝင် ဆောင်ရွက် ရန် ခွင့်ပြုသည့် လုံခြုံရေး အာမခံချက် မဖြစ်ရန် လိုအပ်သည်။

သို့သော် ထိုပူးပေါင်းမှုသည် ယူကရိန်းနှင့် အနောက်အုပ်စုတို့သည် အပြန်အလှန် မဟာမိတ်များ ဖြစ်သည်ဆိုသည့် လက်ရှိ အရှိတရားအား ခိုင်မာစေရေး တရားဝင် အခြေခံအချက်များ ပါဝင်မှုရှိရန်တော့ လိုအပ်သည်။

ထိုသို့သော ပူးပေါင်းမှုများက ပြီးခဲ့သည့်နှစ် မေလ ဗြိတိန်၊ ဆွီဒင်နှင့်ဖင်လန်တို့ကြား လက်မှတ်ရေးထိုးခဲ့သော လုံခြုံရေးနှင့်ကာကွယ်ရေးဆိုင်ရာ ပူးပေါင်းဆောင်ရွက်မှု ကြေညာချက်များကို ဖြစ်စေမည်။

ယင်းသဘောတူညီချက်များတွင် အဖွဲ့ဝင်နိုင်ငံ တစ်ခု တိုက်ခိုက်ခံရပါက ကူညီပေးရန် ကတိပြုထားသော်လည်း တိုက်ရိုက် ပါဝင်ပတ်သက်ရန် ခွင့်မပြုထားပေ။

ကုန်လွန်ခဲ့သော တစ်နှစ်တာ ကာလတွင် ပူတင်အနေဖြင့် စစ်ပွဲကို အနိုင်မရရှိခဲ့သလို ယူကရိန်းအနေဖြင့်လည်း အနောက်အုပ်စုကသာ စွန့်ပစ်လိုက်လျှင် ရှုံးနိမ့်သွားမည်ဆိုသည့် သဘောတရားကို မြင်တွေ့ခဲ့ရသည်။

ထို့ကြောင့် အနောက်အုပ်စု၏ ထောက်ပံ့မှုများ ဆက်ရှိနေမည်ဆိုသည့် အာမခံမှုကသာလျှင် ရုရှားသမ္မတကို ငြိမ်းချမ်းရေးစကားဝိုင်းသို့ ပို့ဆောင်နိုင်မည့် တစ်ခုတည်းသော နည်းလမ်းဖြစ်သည်။

Source: Aljazeera

CNI Sport Article

၂၀၂၃ ခုနှစ်၊ ဖေဖော်ဝါရီ ၂၆

ယူနိုက်တက်အသင်းဟာ ဖေဖော်ဝါရီ ၂၆ ရက်နေ့တွင် နယူးကာဆယ်အသင်းနဲ့ ကာရာဘောင်းဖလား ဗိုလ်လုပွဲ အဖြစ် ဝင်ဘာလေကွင်းမှာ ယှဉ်ပြိုင်မှာဖြစ်ပြီး အသင်းအနေနဲ့ ၆ နှစ်အတွင်း ပထမဆုံး ဆုဖလားကို ရယူနိုင်ဖို့ မျှော်လင့်နေတာ ဖြစ်ပါတယ်။

ဒါက ဒီရာသီ အိုးထရက်ဖို့ဒ်မှာ တိုးတက်နေတဲ့ အသင်းအတွက် နောက်တစ်ဆင့် ဖြစ်ပါတယ်။

ယူနိုက်တက်အသင်းဟာ ဘရိုက်တန်၊ ဘရန်ဖို့ဒ်အသင်းတို့နဲ့ ပရီးမီးယားလိဂ် အဖွင့်ပွဲ ၂ ပွဲမှာ မရှုံးနိမ့်ခဲ့ဘူးဆိုရင် ချန်ပီယံဆုအတွက် ယှဉ်ပြိုင်ဘက်အဖြစ် သေချာပေါက် သတ်မှတ်ခံရမှာပါ။

ယူနိုက်တက်လက်ထဲမှာ အက်ဖ်အေဖလားလည်း ရှိနေသေးပြီး မကြာသေးခင်က ပွဲစဉ်မှာ ဥရောပထိပ်တန်း အသင်း ဘာစီလိုနာကို အနိုင်ယူကာ ယူရိုပါလိဂ်မှာ နောက်တစ်ဆင့် တက်နိုင်ခဲ့တာ ဖြစ်ပါတယ်။ ပရိသတ်တွေ ဟာ ပြီးခဲ့တဲ့နှစ်က အသင်းဖြစ်ပေါ်ခဲ့တဲ့ အခြေအနေတွေနဲ့ အခုအချိန်မှာ ခံစားချက်တွေဟာ ပြောင်းပြန် သဖွယ် ဖြစ်နေခဲ့တာပါ။

အဲရစ်တန်ဟတ်ကို တွေ့ရစဉ်

ယူနိုက်တက်အသင်းဟာ ဖာဂူဆန် ကိုင်တွယ်ခဲ့တဲ့ ၂၆ နှစ်ကြာ ကာလအတွင်းမှာ ပရီးမီးယားလိဂ်ဖလား ၁၃ ကြိမ်၊ ချန်ပီယံလိဂ်ဖလား ၂ ကြိမ်၊ အက်ဖ်အေဖလား ၅ ကြိမ်နဲ့ လိဂ်ဖလား ၄ ကြိမ် အပါအဝင် ဆုဖလား ၃၈ ခုကို ရယူ နိုင်ခဲ့တာ ဖြစ်ပါတယ်။

၂၀၁၃ မှာ ဖာဂူဆန် ထွက်ခွာသွားပြီးနောက် ဗန်ဟားလ်လက်ထက်မှာ အက်ဖ်အေဖလား ၁ ကြိမ်နဲ့ မော်ရင်ဟို လက်အောက်မှာ လိဂ်ဖလား၊ ယူရိုပါလိဂ်နဲ့ ကွန်မြူနတီဒိုင်းတို့ကို ရယူနိုင်ပြီးနောက် ဆုဖလားတွေနဲ့ ဝေးကွာခဲ့တာ ပါ။

အခု အဲရစ်တန်ဟတ် ကိုင်တွယ်ချိန်မှာတော့ ဆုဖလား ပြန်လည်ရယူနိုင်ဖို့ မျှော်လင့်ချက်တွေ ပြန်လည် ရှင်သန် လာခဲ့တာ ဖြစ်ပါတယ်။

အဲရစ်တန်ဟတ်ဟာ ပြီးခဲ့တဲ့နွေရာသီက ယူနိုက်တက်အသင်း နည်းပြအဖြစ် ခန့်အပ်ရပြီးနောက် အထင်ကြီးစရာ ကောင်းတာတွေကို လုပ်ပြနိုင်ခဲ့ပြီး ဖာဂူဆန်နောက်ပိုင်း အောင်မြင်မှုတွေကို ပြန်လည် ဖန်တီးနိုင်ဖို့ ကြိုးစားနေတဲ့ ၆ ဦးမြောက် နည်းပြဖြစ်လာခဲ့တာပါ။

အဲရစ်တန်ဟတ်ဟာ အေဂျတ်စ်အသင်းကို ကိုင်တွယ်နေချိန် အားလပ်ရက်မှာ ယူနိုက်တက်အသင်း တာဝန်ရှိသူ တွေနဲ့ စကားပြောခဲ့ပြီး လုပ်စရာရှိတာတွေကို စတင်လုပ်ဆောင်ခဲ့ပါတယ်။ အဲရစ်တန်ဟတ်ဟာ အေဂျတ်ဇ်အသင်း နဲ့ နောက်ဆုံးပွဲ ပြီးပြီးချင်းမှာ လန်ဒန်ကို လာရောက်ပြီး အသင်းရဲ့ဝန်ထမ်းတွေနဲ့ တွေ့ဆုံပြီးနောက် ပဲလေ့စ်နဲ့ပွဲကို တက်ရောက် ကြည့်ရှုခဲ့ပါတယ်။

အဲရစ်တန်ဟတ်နဲ့ လုပ်ခ်ရှောကိုတွေ့ရစဉ်

လုပ်ခ်ရှောက "အသင်းအတွင်း ကြီးမားတဲ့အရာက သူထိန်းချုပ်နိုင်မှုဖြစ်ပြီး သူချမှတ်ထားတဲ့ စည်းမျဉ်းစည်းကမ်း တွေပါ။ လူတိုင်းက သူ့ရဲ့ လုပ်ဆောင်မှု နောက်ကို လိုက်ရပါမယ်။ သူလိုချင်တဲ့ အရာကို မလုပ်နိုင်ရင် ခင်ဗျား ဘာသာ ဘယ်သူပဲဖြစ်နေပါစေ အရေးမကြီးပါဘူး"လို့ ပြောခဲ့တာပါ။

ဩစတြေးလျရာသီကြို ခရီးစဉ်အတွင်းမှာ လူငယ်ကစားသမား ဂါနာချိုဟာ အသင်းအစည်းအဝေးကို နောက်ကျခဲ့ ပါတယ်။ ဒီခရီးစဉ်ရဲ့ လက်ကျန်ပွဲတွေမှာ သူပါဝင်ကစားခွင့် မရခဲ့ပါဘူး။

ဒါအပြင် အဲရစ်တန်ဟတ်ဟာ ဝုလ်ဗ်စ်အသင်းနဲ့ ပွဲမှာ ရက်ရှ်ဖို့ဒ်ကို စည်းကမ်းပိုင်းဆိုင်ရာကြောင့် ပွဲထွက် လူစာရင်း ကနေ ချန်ခဲ့တာက ခေါင်းကြီးပိုင်းအဖြစ် ရှိခဲ့တာပါ။ ရက်ရှ်ဖို့ဒ်ဟာ လူစားဝင်ရောက်ပြီး အသင်းအတွက် အဖိုးတန် အနိုင်ဂိုးကို သွင်းယူပေးခဲ့ပါတယ်။

ရက်ရှ်ဖို့ဒ်က ပွဲအပြီးမှာ နည်းပြရဲ့ ဆုံးဖြတ်ချက်ကို သူနားလည်ကြောင်း ပြောခဲ့ပါတယ်။ ဂါနာချိုနဲ့ ရက်ရှ်ဖို့ဒ်တို့ရဲ့ အလယ်မှာ ရော်နယ်ဒိုရဲ့ အကြောင်းက ကြီးကြီးမားမား ရှိခဲ့ပါတယ်။

ရာသီကြို ဗယ်လက်ကာနိုနဲ့ ပွဲစဉ်ရဲ့ ပထမပိုင်းအပြီး အိုးထရက်ဖို့ဒ်ကနေ ထွက်ခွာခဲ့တဲ့ ရော်နယ်ဒိုကို အဲရစ်တန်ဟတ်က ပထမဆုံးအကြိမ် ဝေဖန်ခဲ့ပါတယ်။

ရော်နယ်ဒိုဟာ စပါးအသင်းနဲ့ပွဲမှာ လူစားလဲဝင်ရောက်ဖို့ ငြင်းဆန်ပြီး ဥမင်ထဲဝင်ခဲ့တာကြောင့် အဲရစ်တန်ဟတ်ဟာ သူ့ကို ချယ်လ်ဆီးနဲ့ပွဲအတွက် ပွဲထွက် လူစာရင်းကနေ ချန်ခဲ့တာပါ။ ယူနိုက်တက်အသင်းဟာ အရင်က နည်းပြတွေ နဲ့ ကစားသမားတွေ အဆင်မပြေဖြစ်တဲ့ အချိန်မှာ ကစားသမားဘက်ကနေ ရပ်တည်ခဲ့တာ ဖြစ်ပါတယ်။

အဲရစ်တန်ဟတ်နဲ့ ရက်ရှ်ဖို့ဒ်ကိုတွေ့ရစဉ်

အခု တန်ဟတ် လက်ထက်မှာတော့ ဒတ်ချ်လူမျိုးနည်းပြက အသင်းတွင်း ကိစ္စတွေကို သူကိုယ်တိုင် ရာနှုန်းပြည့် ဖြေရှင်းလို့ ရတာပါ။

ရော်နယ်ဒိုဟာ ပီယာမော်ဂန်နဲ့ ပြုလုပ်ခဲ့တဲ့ အင်တာဗျူးမှာ အဲရစ်တန်ဟတ်ကို ဝေဖန်ခဲ့ပြီးနောက် ရက်ပိုင်းအကြာ မှာ ကလပ်အသင်းဟာ ပေါ်တူဂီ ကစားသမားနဲ့ နှစ်ဦးသဘောတူ စာချုပ်ဖျက်သိမ်းခဲ့တာ ဖြစ်ပါတယ်။

ဒီအခြေအနေတွေကြောင့် အဲရစ်တန်ဟတ်ဟာ ဖာဂူဆန်ခေတ်ကို ကျောခိုင်းခဲ့တာပါ။ အဲရစ်တန်ဟတ်ဟာ မော်ဒန် နည်းပြပီပီ အသင်းကို အကောင်းဆုံး တည်ဆောက်နေပြီး ရဲရင့်တဲ့ ဆုံးဖြတ်ချက်တွေကိုလည်း ချမှတ်ခဲ့တာ ဖြစ် ပါတယ်။

အဲဒီထဲက တစ်ခုက အငှားနဲ့ခေါ်ယူထားတဲ့ တိုက်စစ်မှူး ဝက်ဂ်ဟော့စ်ကို နံပါတ် ၁၀ နေရာမှာ ပြောင်းလဲ အသုံး ပြုပြီး ပြိုင်ဘက် ဂိုးပေါက်ကို ရက်ရှ်ဖို့ဒ် လွတ်လွတ်လပ်လပ်နဲ့ ပိုမို ခြိမ်းခြောက်နိုင်ဖို့ ပြုလုပ်ခဲ့ပါတယ်။
နောက်တစ်ခုကတော့ ဘယ်နောက်ခံလူ လုပ်ခ်ရှောကို ဗဟိုနောက်ခံလူအဖြစ် အသုံးပြုခဲ့တာပါ။ အဲရစ်တန်ဟတ် ဟာ ရေတိုထက် ရေရှည်စီမံကိန်းကို အကောင်အထည် ဖော်လုပ်ဆောင်နေတာ ဖြစ်ပါတယ်။

ယူနိုက်တက် ကစားသမားတွေဟာ အဝတ်လဲခန်းက အဖြစ်အပျက်တွေကို ဆိုရှယ်မီဒီယာမှာ တင်ခြင်းမရှိသလို လာမယ့် ပွဲအပေါ်ကိုပဲ အာရုံစူးစိုက်မှု အပြည့်ထားနေကြတာပါ။

ယူနိုက်တက်အသင်း အနေနဲ့ နယူးကာဆယ်ကို အနိုင်ရတာပဲဖြစ်ဖြစ် ရှုံးနိမ့်တာပဲဖြစ်ဖြစ် အသင်းဟာ အရင်က မြင်တွေ့ရခြင်းမရှိတဲ့ ပုံစံအတိုင်း အရှေ့ကိုသွားနေတဲ့ အသင်းတစ်သင်းလို ဖြစ်နေတာ ဖြစ်ပါတယ်။ ဒါပေမယ့် အသင်း တစ်သင်း တိုးတက်တယ်ဆိုတာကို အတည်ပြုဖို့အတွက် ဆုဖလားတစ်ခုတော့ ရယူနိုင်ဖို့ လိုအပ်နေတာ ပါ။

လုပ်ခ်ရှောက "ကျနော်တို့ ဆုဖလားတွေ မရခဲ့တာ အချိန်တော်တော်ကြာပါပြီ။ လူတွေကတော့ ဒါဟာ ကာရာဘောင်းဖလားလို့ ပြောကြပါလိမ့်မယ်။ ဒါပေမယ့် ကျနော်တို့အတွက်တော့ ဒါဟာ ကြီးမားပါတယ်။ ဒါက ကျနော်တို့ အချိန်တော်တော်ကြာ ရည်မှန်းနေတဲ့အရာပါ။ အခုလို အောင်ပွဲခံတဲ့ ခံစားချက်တွေ၊ ဆုဖလားတွေ ရယူမယ့် ခံစားချက်တွေကို ပြန်လည်ရရှိဖို့ပါ"လို့ ပြောခဲ့ပါတယ်။

အဲရစ်တန်ဟတ်ဟာ ယူနိုက်တက်အသင်းကို ၃၉ ပွဲ ကိုင်တွယ်ထားတာမှာ နိုင်ပွဲ ၂၈ ပွဲ၊ သရေ ၅ ပွဲ၊ ရှုံးပွဲ ၆ ပွဲနဲ့ အနိုင်ရာခိုင်နှုန်း ၇၁ ရာခိုင်နှုန်းအထိ ရှိနေတာ ဖြစ်ပါတယ်။

Source: BBC

CNI Sport Article

၂၀၂၃ ခုနှစ်၊ ဖေဖော်ဝါရီ ၁၉

ဘာစီလိုနာ အသင်းနည်းပြ ဇာဗီက သူတို့နဲ့ ယူရိုပါလိဂ် ပထမအကျော့ မကစားခင်မှာ ယူနိုက်တက် တိုက်စစ်မှူး ရက်ရှ်ဖို့ဒ်ဟာ ဥရောပရဲ့ အန္တရာယ်အရှိဆုံး ကစားသမားတွေထဲက တစ်ဦးလို့ ပြောခဲ့ပါတယ်။

ရက်ရှ်ဖို့ဒ်ဟာ ဇာဗီပြောခဲ့သလိုပဲ ဘာစီလိုနာအသင်းကို ပထမအကျော့မှာ ဒုက္ခပေးနိုင်တယ်ဆိုတာ အားလုံး မြင်တွေ့ခဲ့ရပါတယ်။ ဒီရာသီမှာ ဂိုးသွင်းရခက်တဲ့ ဘာစီလိုနာကို ၁ ဂိုးသွင်းပြီး နောက်တစ်ဂိုး ရခဲ့တာမှာလည်း ပါဝင် ပတ်သက်အောင် လုပ်နိုင်ခဲ့တာပါ။

ရက်ရှ်ဖို့ဒ်ဟာ ကမ္ဘာ့ဖလားပြိုင်ပွဲကနေ ပြန်လာပြီးကတည်းက ယူနိုက်တက်အတွက် ပွဲတိုင်းလိုလို ပါဝင်ပြီး ခြေစွမ်းပြ ဂိုးတွေ သွင်းယူနိုင်ခဲ့တာ ဖြစ်ပါတယ်။

အချက်အလက်တွေအရ ပြောရမယ်ဆိုရင် ရက်ရှ်ဖို့ဒ်ဟာ ကမ္ဘာ့ဖလားအပြီး ကစားခဲ့တဲ့ ၁၆ ပွဲမှာ ၁၃ ဂိုး သွင်းယူခဲ့ တာဖြစ်ပြီး ဒါဟာ ဥရောပထိပ်တန်း ၅ လိဂ်မှာရှိတဲ့ ဘယ်ကစားသမား ထက်မဆို သာလွန်နေတဲ့ စွမ်းဆောင်ရည် ဖြစ်ပါတယ်။

ရက်ရှ်ဖို့ဒ် ခေါင်းတိုက်သွင်းနေစဉ်

ရက်ရှ်ဖို့ဒ် ပါဝင်ပြီဆိုရင် ယူနိုက်တက်အသင်းဟာ သေချာပေါက် ဂိုးရနေပြီလို့ နည်းပြ၊ ပရိသတ်တွေနဲ့ ပြိုင်ဘက် နည်းပြတွေကပါ ရိပ်မိနေလောက်ပါပြီ။ ရက်ရှ်ဖို့ဒ်ဟာ အခုဆိုရင် ခြေထောက် နှစ်ဖက်စလုံးနဲ့ အပြင် ခေါင်းတိုက် ပြီးပါ ဂိုးသွင်းလာနိုင်တဲ့အထိ ကြိုးစားအားထုတ်မှုတွေ ရှိလာခဲ့တာပါ။

အင်္ဂလန်တိုက်စစ်မှူးဟာ အခုဆိုရင် ဒီရာသီမှာ ပြိုင်ပွဲစုံသွင်းဂိုး ၂၂ ဂိုး သွင်းယူထားပြီး သူ့ရဲ့အကောင်းဆုံး ရာသီ ဖြစ်တဲ့ ၂၀၁၉-၂၀ ရာသီက သွင်းဂိုး အရေအတွက်ကို လိုက်မှီသွားပြီ ဖြစ်ပါတယ်။

အဲဒါကြောင့် ရက်ရှ်ဖို့ဒ် အနေနဲ့ နောက်ထပ် သွင်းဂိုး ၁ ဂိုးကို ရယူနိုင်ခဲ့မယ်ဆိုရင် ဒီရာသီဟာ သူ့ရဲ့ အကောင်းဆုံး ရာသီအဖြစ် သတ်မှတ်လို့ ရသွားပြီ ဖြစ်ပါတယ်။ ရက်ရှ်ဖို့ဒ်ဟာ အခုလို ခြေစွမ်းတွေ ပြန်ရနေတာက နည်းပြ အဲရစ်တန်ဟတ်ကြောင့်လို့ အများကြီး ပြောလို့ရပါတယ်။

အဲရစ်တန်ဟတ်ရဲ့ ယုံကြည်မှုနဲ့ သူ့ရဲ့ ကြိုးစားအားထုတ်မှုကို ပေါင်းစပ်လိုက်တဲ့ အချိန်မှာ အခုလိုမျိုး ရလဒ်ကို ရယူနိုင်ခဲ့တာ ဖြစ်ပါတယ်။ ရက်ရှ်ဖို့ဒ်ဟာ ပြီးခဲ့တဲ့နှစ် ရာသီက ပြိုင်ပွဲစုံ ၅ ဂိုးသာ သွင်းယူခဲ့တာ ဖြစ်ပါတယ်။

အဲရစ်တန်ဟတ်နဲ့ ရက်ရှ်ဖို့ဒ်ကိုတွေ့ရစဉ်

ဒါဟာ သူ့အတွက် အဆိုးရွားဆုံးရာသီ ဖြစ်ခဲ့ပြီး ပရိသတ်တွေရဲ့ ဆိုက်ပိနေတယ်ဆိုပြီး ဝေဖန်မှုတွေ အများအပြား ခံရကာ ယူနိုက်တက်ကနေ ထွက်ခွာဖို့အထိ ရှိခဲ့တာပါ။ ဒါပေမယ့် အဲရစ်တန်ဟတ် ရောက်လာအပြီးမှာ ရက်ရှ်ဖို့ဒ် ကို ဦးစားပေးအဖြစ် သတ်မှတ်ပြီး ကစားသမား ပုံမှန်ခြေစွမ်း ပြန်ရလာအောင် စိတ်ပိုင်းဆိုင်ရာ မြှင့်တင်ပေးခဲ့တာ ဖြစ်ပါတယ်။

ကစားသမားကို ယုံကြည်မှု အများကြီး ပေးခဲ့တာကြောင့်လည်း ရက်ရှ်ဖို့ဒ် ဆီကနေ အခုလို ခြေစွမ်းပြ သွင်းဂိုးတွေ ကို မြင်တွေ့လာခဲ့ရတာပါ။

အဲရစ်တန်ဟတ်ကတော့ ပွဲတိုင်းလိုလို သူ့ရဲ့ ကစားသမားကို ချီးကျူးမှု ပြုလုပ်ခဲ့ပြီး ဒီမှာပဲ ရပ်မနေဘဲ ဆက်ပြီး ကြိုးစားနေဖို့ အမြဲတမ်း တိုက်တွန်းခဲ့သလို စာချုပ်သစ် ချုပ်ဖို့ကိုလည်း ပြောထားတာပါ။

အဲရစ်တန်ဟတ်ဟာ ရက်ရှ်ဖို့ဒ်ကို ဦးစားပေးအဖြစ် သတ်မှတ် ထားတယ်ဆိုပေမယ့် ကစားသမားကို စည်းကမ်း ပိုင်းဆိုင်ရာ ကောင်းမွန်အောင်လည်း အပြစ်ပေး အရေးယူတာ မျိုးတွေရှိခဲ့တယ်။ အဲ့ဒါကြောင့်လည်း ရက်ရှ်ဖို့ဒ်ဟာ အဲရစ်တန်ဟတ် လက်အောက်မှာ အရာရာ ဂရုစိုက်ပြီး သူ့ကိုယ်သူ ဒီထက်ပိုပြီး တိုးတက်အောင် လုပ်ဆောင် နေ တာ ဖြစ်ပါတယ်။

ရက်ရှ်ဖို့ဒ် ဂိုးသွင်းနေစဉ်

ရက်ရှ်ဖို့ဒ်ဟာ တစ်ဦးချင်း ကျော်ဖြတ်တာမှာလည်း ကောင်းမွန်လာသလို ဂိုးသမားနဲ့ တစ်ဦးချင်းတွေ့တဲ့ အချိန်မှာ လည်း အဆုံးသတ်ပိုင်း ကောင်းမွန်လာခဲ့တာ ဖြစ်ပါတယ်။

လက်ရှိအချိန်မှာ ရက်ရှ်ဖို့ဒ်ဟာ ယူနိုက်တက်အသင်းကို ဆုဖလားတွေနဲ့ ဝေးကွာနေတာကို အဆုံးသတ်ဖို့အတွက် ကာရာဘောင်းဖလား ဗိုလ်လုပွဲရောက်အောင် ပို့ဆောင်ထားသလို ပရီးမီးယားလိဂ်မှာလည်း အဆင့် ၃ နေရာ ရပ်တည်ကာ ချန်ပီယံလိဂ် ဝင်ခွင့်ရဖို့ အခြေအနေကောင်းတွေ ပိုင်ဆိုင်နေခဲ့တာ ဖြစ်ပါတယ်။

အဲရစ်တန်ဟတ် ကတော့ ကျေနပ်တယ်ဆိုတာ ပျင်းရိနိုင်တာကြောင့် ရက်ရှ်ဖို့ဒ်ကို ဆက်ကြိုးစားဖို့ ပြောထားတာ ကြောင့် ကစားသမားအနေနဲ့ လက်ရှိ ကစားသမားဘဝကို နောက်တစ်ဆင့် တက်အောင် ဘယ်လောက်ထိ ဆက် ပြီး လုပ်ဆောင်သွားမလဲဆိုတာ စိတ်ဝင်စားဖို့ ကောင်းနေတာပါ။

ဒါ့အပြင် သူ့ရဲ့ အကောင်းဆုံးပုံစံ ရရှိနေတာကို ဘယ်သူက ရပ်တန့်အောင် လုပ်နိုင်မလဲဆိုတာကို စောင့်ကြည့်ချင် စရာ ကောင်းနေတာလည်း ဖြစ်ပါတယ်။

ယူနိုက်တက် အကယ်ဒမီထွက် ရက်ရှ်ဖို့ဒ်ဟာ အသင်းအတွက် ၃၃၈ ပွဲ ပါဝင်ကစားထားပြီး ၁၁၅ ဂိုး သွင်းယူထား နိုင်ခဲ့သလို အင်္ဂလန်လက်ရွေးစင် အသင်းအတွက် ၅၁ ပွဲ ပါဝင်ကစားထားကာ ၁၅ ဂိုး သွင်းယူထားပါတယ်။

CNI International Article

၂၀၂၃ ခုနှစ်၊ ဖေဖော်ဝါရီ ၁၉

လာဂို့စ်မြို့တွင် နေထိုင်သည့် အသက် ၂၃ နှစ်အရွယ် ကျောင်းသား ဖိလစ် အိုယီဝိုလီသည် ပြီးခဲ့သည့်နှစ် နိုဝင်ဘာလမှ စတင်ကာ ဖေဖော်ဝါရီ ၂၅ ရက်တွင် ကျင်းပမည့် နိုင်ဂျီးရီးယား သမ္မတရွေးကောက်ပွဲနှင့် ပတ်သက် သည့် သတင်းများကို သူ၏လူမှုကွန်ယက်တွင် အစဉ်တစိုက် စောင့်ကြည့်ခဲ့သည်။

သို့သော် ရွေးကောက်ပွဲ ကျင်းပရန် ရက်နီးလာလေလေ မည်သည့်ပို့စ်က မှန်၍ မည်သည့်ပို့စ်က မှားသည်လည်း ဝေခွဲရ ခက်လေလေ ဖြစ်လာသည်နှင့် ရင်ဆိုင်လာရသည်။

တချို့သော ပို့စ်များသည် လေဘာပါတီ၏ ကိုယ်စားလှယ်လောင်း ပီတာ အိုဘီကို ပစ်မှတ်ထားသည်။ အိုဘီသည် ဖိုရမ်များတွင် စကားပြောခွင့်ရရန် ခရစ်ယာန် အသင်းတော်များကို ပိုက်ဆံပေးခဲ့သည်။

၎င်းသည် ခွဲထွက်ရေးအဖွဲ့တစ်ခု၏ အဖွဲ့ဝင်ဖြစ်သည် စသည်ဖြင့် အပြိုင်အဆိုင် ရေးသားဖော်ပြကြသည်။

နိုင်ဂျီးရီးယား နိုင်ငံသားတစ်ဦး လူမှုကွန်ယက်သုံးစွဲနေစဉ်

ထို့နောက် တချို့ ပြိုင်ဘက် ပါတီ၏ ကိုယ်စားလှယ် ကွမ်ကွာဆိုကိုလည်း ပစ်မှတ်ထား လာကြသည်။ ၎င်းသည် ဖော်ပြထားသကဲ့သို့ အမှန်တကယ် ဘွဲ့ရခဲ့ခြင်း မရှိဆိုသလိုမျိုး ရေးသားကြသည်။

“တကယ့်ကို ရူးကြောင်ကြောင် ဖြစ်ကြောင်း၊ ကြည့်ရင်းနှင့် ရယ်ချင်လာကြောင်း၊ သူတို့လူတွေကို စိတ်ကုန်အောင် လုပ်နေကြကြေင်း” အိုယီဝိုလီက ပြောသည်။

ရွေးကောက်ပွဲ မတိုင်မှီတွင် သတင်းမှားများသည် ပေါက်ကွဲမှု တစ်ခုသဖွယ် လူမှုကွန်ယက် စာမျက်နှာ အသီးသီး တွင် ပျံ့နှံ့လာသည်။ ဘာသာရေးနှင့် လူမျိုးရေး ကဲ့သို့သော သွေးကွဲစေသည့် အကြောင်းအရာ များစွာသည်လည်း Facebook၊ Twitter၊ Tik Tok နှင့် WhatsApp တို့တွင် အရှိန်အဟုန်ဖြင့် ပျံ့နှံ့လာလျက်ရှိသည်။

လူမှုကွန်ယက်သည် နိုင်ဂျီးရီးယား ပြည်သူများအတွက် သတင်း အချက်များကို အချိန်နှင့်တစ်ပြေးညီ သိရှိအောင် ဆောင်ရွက် ပေးနိုင်စွမ်း ရှိသော်လည်း တစ်ဖက်တွင် ယင်းသည် နိုင်ငံရေးဗျူဟာအတွက် လက်နက်တစ်ခုသဖွယ် အသုံးချ ခံနေရသည်ဟု ပညာရှင်များက ပြောသည်။

ဖေ့စ်ဘွတ်ခ်တည်ထောင်သူနဲ့ နိုင်ဂျီးရီးယားခေါင်းဆောင်ကိုတွေ့ရစဉ်

နိုင်ငံရေးသမားများ ကိုယ်တိုင်က ရည်ရွယ်ချက် ရှိရှိဖြင့် သတင်းမှား၊ သတင်းတုများကို ဖန်တီးနေသည်ဟု အဘူဂျာ အခြေစိုက် ဒီမိုကရေစီနှင့် ဖွံ့ဖြိုးတိုးတက်မှုစင်တာ (CDD) မှ ပညာရှင် အီဒါယတ် ဟက်ဆန်က ထောက်ပြသည်။

ဇန်နဝါရီလက ဘီဘီစီမှ ထုတ်လွှင့်သော သတင်းတစ်ခုတွင် နိုင်ဂျီးရီးယား နိုင်ငံရေးသမားများသည် လူမှုကွန်ယက် မှ နာမည်ကြီးသူများကို ပိုက်ဆံ သို့မဟုတ် ရာထူးနှင့် လုပ်ပိုင်ခွင့်များ ကမ်းလှမ်းကာ ပြိုင်ဘက်များနှင့် ပတ်သက် သည့် သတင်းမှား၊ သတင်းတုများ ပျံ့နှံ့ဖန်တီးစေလျက်ရှိသည်ဟု ဖော်ပြသည်။

လူမှုကွန်ယက်အပေါ် နိုင်ငံရေးသမားများ၏ တလွဲအသုံးချလာမှုအပေါ် နိုင်ဂျီးရီးယား ရွေးကောက်ပွဲ ကော်မရှင် ကပင် သတိပေးမှု လုပ်ဆောင်ခဲ့ရသည်အထိ နိုင်ဂျီးရီးယားတွင် အခြေအနေ ဆိုးရွားနေသည်။

သို့သော် သတင်းမှား၊ သတင်းတု ဖန်တီးခြင်းသည် နိုင်ဂျီးရီးယား နိုင်ငံရေးလောကနှင့် စိမ်းလှသော အရာတော့ မဟုတ်ပေ။ ၂၀၁၉ ရွေးကောက်ပွဲ မတိုင်ခင် သမ္မတ ဘူဟာရီ သေဆုံးသွားခဲ့ပြီ ဖြစ်ကြောင်း၊ လက်ရှိသမ္မတမှာ လူစားထိုးထားခြင်းဖြစ်ကြောင်း သတင်းမှားတစ်ခု ထွက်ပေါ်လာခဲ့ပြီး တစ်နိုင်ငံလုံးကို ပျံ့နှံ့သွားခဲ့သည်။

ယင်းကို ယုံကြည်သူများကလည်း ယုံကြည်ခဲ့ကြသည်။ သို့သော် လက်ရှိ နိုင်ငံရေး အခင်းအကျင်းတွင်တော့ လူမှုကွန်ယက်ကို အသုံးချမှုသည် ပိုမိုအဆင့်မြင့်မားသော အခြေအနေသို့ ရောက်ရှိနေပြီဖြစ်ကြောင်း လေ့လာသူ အများစုက ထောက်ပြသည်။

နိုင်ဂျီးရီးယားခေါင်းဆောင်နဲ့ ပြည်သူလူထုကိုတွေ့ရစဉ်

ပြည်သူ့ထံ သတင်းအမှန်ကို ပြန်ကြားပေးရသော တရားဝင် မီဒီယာများသည်ပင် သတင်းအတုများ၏ လှည့်ဖျားမှု နှင့် ကြုံတွေ့ နေရသောကြောင့် ပြန်လည်ရှင်းလင်းမှုများ လုပ်ဆောင်နေရပြီ ဖြစ်သည်။

ထိုအခြေအနေသည် ၂၀၂၂ ခုနှစ် ကင်ညာရွေးကောက်ပွဲ မတိုင်ခင် ဖြစ်စဉ်များနှင့် အလားသဏ္ဍာန်တူကာ အာဖရိကရှိ ဒီမိုကရေစီ နိုင်ငံများတွင် ရေပန်းစားနေပြီဟု Mozilla Foundation မှ ရွေးကောက်ပွဲ စောင့်ကြည့် လေ့လာရေးဆိုင်ရာ ထိပ်တန်း အရာရှိတစ်ဦးက ပြောသည်။

ထိုအခြေအနေက မဲပေးရန် ဆုံးဖြတ်ပြီဖြစ်သော မဲဆန္ဒရှင်များကို လမ်းလွဲသွား စေရုံမက၊ နိုင်ငံရေးအပေါ် အယုံအကြည် မရှိသည့် မျိုးစေ့ကို အမြစ်တွယ်စေခြင်း သို့မဟုတ် ရွေးကောက်ပွဲ မတိုင်ခင်၊ ကျင်းပနေစဉ်နှင့် ကျင်းပပြီး အကြမ်းဖက်မှုများ ဖြစ်လာမည်ကို စိုးရိမ်မှုများလည်း ရှိလာစေသည်။

နိုင်ဂျီးရီးယားတွင် လူဦးရေ တစ်ဝက်ကျော်သည် အလုပ်လက်မဲ့ ဖြစ်သော်လည်း လူဦးရေး သုံးပုံ နှစ်ပုံသည် အင်တာနက် အသုံးပြုနိုင်သည်။

ထို့ကြောင့် ငွေပေး၍ သတင်းမှား၊ သတင်းတု ပို့စ်တင်ခိုင်းခြင်းက တော်တော် များများအတွက် ငွေရှာသော နည်းလမ်းတစ်ခု ဖြစ်လာသည်။ ထို့အပြင် နိုင်ငံ၏ နိုင်ငံရေး အခင်းအကျင်းကို ပြောင်းလဲရန် စိတ်အား ထက်သန် နေသည့် လူငယ်မျိုးဆက်များကလည်း သတင်းမှားများ ပျံ့နှံ့မှုကို တစ်ဖက်တစ်လမ်းမှ မြင့်တက်လာ စေလျက် ရှိသည်။

မဲပေးနိုင်သူ ၉၃ ဒသမ ၅ သန်း၏ တစ်ဝက်မှာ လူငယ်များဖြစ်ကြပြီး ပြောင်းလဲရန် တာဆူနေခြင်းကြောင့် ၎င်းတို့၏ လုပ်ဆောင်မှုများသည် မရည်ရွယ်ဘဲ သတင်းမှားများပျံ့နှံ့စေရန်ပို၍ အဆင်ချောစေ လျက်ရှိသည်။

သတင်းမှားများ ပျံ့နှံ့မှုကြောင့် ထိခိုက်နစ်နာရမှုများကို ပြန်လည်ကာမိစေရေးအတွက် တက်ကြွလှုပ်ရှား သူများနှင့် သတင်း အမှန်စိစစ်ရေး အဖွဲ့များသည် လူမှုကွန်ယက်ပေါ်တွင် သတင်းမှန် ဖော်ထုတ်ရေးနှင့် သတင်းမှား ပျံ့နှံ့မှုကို ထိန်းချုပ်ရေး စသည်တို့ကို လုပ်ဆောင်လျက်ရှိသည်။

သတင်းမှားများသည် ကူးစက်ရောဂါ ကဲ့သို့ ပျံ့နှံ့လျက်ရှိပြီး ယင်းတို့က ရွေးကောက်ပွဲ လုပ်ငန်းစဉ်များကို မထိ ခိုက်ရေး သေချာစေရန် ကြိုစားဆောင်ရွက်နေကြောင်း ရွေးကောက်ပွဲဆိုင်ရာ သတင်းအမှန် စိစစ်ရေး အဖွဲ့ကို တည်ထောင်သူက ပြောသည်။
၎င်းတို့သည် နိုင်ဂျီးရီးယား၏ ပြည်နယ်ပေါင်း ၃၆ ခုတွင် လေ့ကျင့်ပေးထားသော စေတနာ့ဝန်ထမ်းပေါင်း ၅၀ ဖြင့် သတင်းမှန် စိစစ်ရေးကို လုပ်ဆောင်လျက်ရှိသည်။

ဟက်ဆန်၏ CDD အဖွဲ့သည်လည်း မြို့တော် အဘူဂျာ အပါအဝင် မြို့ကြီးများတွင် သတင်းမှား ပျံ့နှံ့မှု နှိမ်နင်းရေး အတွက် သတင်းသမားများ၊ ဘလော့ဂါများ၊ အုပ်ချုပ်ရေးမှူးများနှင့် ရွေးကောက်ပွဲကော်မရှင် စသည်တို့ကို အလုပ် ရုံ ဆွေးနွေးပွဲများ ကျင်းပပေးလျက်ရှိသည်။

ယင်းသည် လူမှုကွန်ယက် စစ်ပွဲအခန်းကို ဖန်တီးကာ သတင်းမှားများကို ပျံ့စေသော အကောင့်များကို report လုပ်ခြင်း နှင့် လူမှုကွန်ယက်များ၏ တုန့်ပြန်မှုများ ကိုစောင့်ကြည့်ခြင်းတို့လုပ်ဆောင်လျက်ရှိသည်။

နိုင်ဂျီးရီးယားတွင် လူသုံး အများဆုံးဖြစ်သော Facebook နှင့် WhatsApp တို့ကို ပိုင်ဆိုင်ထားသည့် Meta သည် သတင်းမှား ပျံ့နှံ့မှုများကို တားဆီးရေး လုံလောက်စွာ ဆောင်ရွက်နိုင်ခဲ့ခြင်း မရှိမှုအတွက် အတိတ်တွင် ပြင်းပြင်း ထန်ထန် ဝေဖန်ခံခဲ့ရသည်။

ဖေ့စ်ဘွတ်ခ် ကုမ္ပဏီကိုတွေ့ရစဉ်

Facebook နှင့်ယှဉ်လျှင် WhatsApp သည် သတင်းမှား ဖြန့်ချီရေးအတွက် ပို၍ အသုံးပြုသော လူမှုကွန်ယက် တစ်ခု ဖြစ်သည်။ အထူးသဖြင့် သက်ကြီးမဲဆန္ဒရှင်များသည် ယင်းတွင် သတင်းမှားများကို ရရှိကာ သေချာစိစစ် ခြင်း မရှိဘဲ မိသားစုနှင့် မိတ်ဆွေများကို ပြန်လည် ဝေမျှလေ့ရှိသည်။

ထို့ကြောင့် ရွေးကောက်ပွဲနှင့် ပတ်သက်သည့် သတင်းမှားများ ဖန်တီးခြင်း၊ ဖြန့်ဝေခြင်းတို့အပြင် အကြမ်းဖက်မှုများ နှင့် ပတ်သက်သည့် အကြောင်းအရာများကို ဖယ်ရှားနိုင်ရေး သတင်းမှန် စိစစ်ရေးအဖွဲ့များအပြင် လွတ်လပ်သော ရွေးကောက်ပွဲ ကော်မရှင်တို့နှင့် ပူးပေါင်းဆောင်ရွက်လျက်ရှိသည်ဟု Meta ၏ အနောက် အာဖရိကဒေသ ဆိုင်ရာ အကြီးအကဲက ပြောသည်။

Meta ကုမ္ပဏီသည် နိုင်ငံရေးနှင့်ပတ်သက်သည့် ကြော်ငြာများကို ပို၍ ပွင့်လင်းမြင်သာမှု ရှိလာစေရန် သာမက ဖြစ်နိုင်ဖွယ် ခြိမ်းခြောက်မှုများကို အချိန်နှင့်တစ်ပြေးညီ ဖော်ထုတ်နိုင်ရေးအတွက် ရွေးကောက်ပွဲဆိုင်ရာ စင်တာ တစ်ခုကိုပါ ဖွင့်လှစ်ထားသည်ဟုလည်း သူမက ပြောသည်။

မည်သို့ပင်ဆိုစေကာမူ နိုင်ဂျီးရီးယား ပြည်သူများ စိတ်ထဲတွင် ရွေးကောက်ပွဲနှင့် ပတ်သက်သည့် မရေရာ သေချာမှုများ များပြားလာကာ ရွေးကောက်ပွဲ ကျင်းပရန် နီးကပ်လာသည်နှင့်အမျှ ၎င်းတို့ ရင်ဆိုင်နေရသည့် နှောင့်နှေးမှု အခြေအနေသည်လည်း ပိုမိုမြင့်တက်လာလျက်ရှိသည်။

“အရင်တုန်းက မည်သူ့ကို မဲပေးမည်ကို အပြီးသတ် ဆုံးဖြတ်ထားပြီးဖြစ်ကြောင်း၊ သို့သော် သတင်းအမှားများ၏ ရိုက်ခတ်မှုကြောင့် ဇဝေဇဝါဖြစ်ခဲ့ရကြောင်း၊ ရွေးကောက်ပွဲနေ့တွင် မှန်ကန်သော ဆုံးဖြတ်ချက် ချနိုင်ရန် မျှော်လင့် ကြောင်း” အိုယီဝိုလီက ပြောသည်။

Source: AL JAZEERA

CNI Sport Article

၂၀၂၃ ခုနှစ်၊ ဖေဖော်ဝါရီ ၁၂

ရော်နယ်ဒိုဟာ ပေါ်တူဂီ ပရော်ဖက်ရှင်နယ် ဘောလုံးသမားဖြစ်ပြီး အခု ပေါ်တူဂီ လက်ရွေးစင်နဲ့ အယ်လ်နာဆာ အသင်းမှာ ကစားနေတာ ဖြစ်ပါတယ်။

၁၉၈၅ ခုနှစ်၊ ဖေဖော်ဝါရီ ၅ ရက်မှာ မွေးဖွားခဲ့တဲ့ ရော်နယ်ဒိုဟာ ပေါ်တူဂီကလပ် စပို့တင်းလစ္စဘွန်း အသင်းမှာ ပရော်ဖက်ရှင်နယ် ကစားသမားဘဝကို စတင်ခဲ့တာဖြစ်ပြီး ၂၀၀၃ ခုနှစ်မှာ မန်ချက်စတာ ယူနိုက်တက် အသင်းထံ ရောက်ရှိလာခဲ့တာ ဖြစ်ပါတယ်။

၂၀၀၉ ခုနှစ်မှာ ရီးရယ်လ်မက်ဒရစ် အသင်းထံ ပြောင်းရွှေ့ခဲ့ပြီး ကမ္ဘာ့အကောင်းဆုံး ကစားသမားတွေထဲက တစ်ဦး ဖြစ်လာခဲ့တာပါ။ ၂၀၁၈ ခုနှစ်မှာ ဂျူဗင်တပ်စ် အသင်းထံ ပြောင်းခဲ့ကာ စီးရီးအေဖလား ၂ ကြိမ် ရယူနိုင်ခဲ့ပြီးနောက် ၂၀၂၁ ခုနှစ်မှာ အသင်းဟောင်း မန်ချက်စတာယူနိုက်တက် အသင်းထံ ပြန်လည် ရောက်လာခဲ့ပါတယ်။

ရော်နယ်ဒိုဟာ ပေါ်တူဂီ လက်ရွေးစင် အသင်းနဲ့ ယူရိုချန်ပီယံဆု၊ နေးရှင်းလိဂ် ဖလားတို့ကို ရယူခဲ့ပြီး အောင်မြင်တဲ့ ကစားသမားဘဝကို ပိုင်ဆိုင်ခဲ့တာ ဖြစ်ပါတယ်။

ကမ္ဘာ့အကောင်းဆုံး ကစားသမားတွေထဲက တစ်ဦးအဖြစ် သတ်မှတ်ခံထားရတဲ့ ရော်နယ်ဒိုဟာ ကမ္ဘာတစ်ဝှမ်းက ပရိသတ်တွေရဲ့ အားပေးမှုကိုလည်း အများအပြား ရရှိထားတာပါ။ သူရဲ့ထူးခြားတဲ့ လိမ်ခေါက်၊ ဖြတ်ကျော်မှု စွမ်း ရည်၊ မယုံနိုင်လောက်တဲ့ မြန်နှုန်းတွေနဲ့ ထူးခြားတဲ့ ဂိုးသွင်း စွမ်းရည်တွေကြောင့် လူသိများလာခဲ့တာ ဖြစ်ပါတယ်။

ဒါပေမယ့် ရော်နယ်ဒိုနဲ့ ပတ်သက်ပြီး သိထားသင့်တဲ့ အချက် ၁၃ ချက်က ဘာတွေလဲဆိုတာကို ဖော်ပြပေးသွားမှာ ဖြစ်ပါတယ်။

ရော်နယ်ဒိုနဲ့ သူ့ရဲ့ မိဘနှစ်ဦးကိုတွေ့ရစဉ်

အမေရိကန်သမ္မတ နာမည်ပေးထားခြင်း
******************************************
ခရစ္စတီယာနို ရော်နယ်ဒိုကို အမေရိကန်သမ္မတဟောင်း ရော်နယ်ရေဂင်နဲ့ တူညီတဲ့ နာမည်ပေးထားခဲ့တာ ဖြစ်ပါ တယ်။ သရုပ်ဆောင်- နိုင်ငံရေးသမား ရေဂင်ဟာ အိမ်ဖြူတော်မှာ ဒုတိယသက်တမ်းအတွက် ကျမ်းသစ္စာ ကျိန်ဆို ပြီးနောက် တစ်လအကြာမှာ ရော်နယ်ဒိုကို မွေးဖွားခဲ့တာပါ။

ရော်နယ်ဒိုရဲ့ မိခင်ဖြစ်သူဟာ ရော်နယ်ရေဂင်ရဲ့ အမာခံပရိသတ် ဖြစ်တယ်လို့ ယုံကြည်ရတာ ဖြစ်ပါတယ်။

ရော်နယ်ဒိုရဲ့ ပထမဆုံးအသင်းမှာ ဖခင်ဖြစ်သူဟာ ဝတ်စုံစီစဉ်တဲ့သူဖြစ်ခဲ့
******************************************************************
ရော်နယ်ဒိုရဲ့ ဖခင်ဖြစ်သူ ဟိုဆေးဒီနစ်အေဗီရိုဟာ သူ့ရဲ့သား ၈ နှစ်အရွယ်မှာ ဘောလုံးစတင်ကစားတဲ့ အန်ဒိုရီဟာ အသင်းရဲ့ ဝတ်စုံစီစဉ်တဲ့သူ ဖြစ်ခဲ့ပါတယ်။

ရော်နယ်ဒိုဟာ သဘာဝစွမ်းဆောင်ရည်တွေကို လျင်မြန်စွာ ပြသခဲ့ပြီး မကြာခင်မှာ စပို့တင်းလစ္စဘွန်း လူငယ် အကယ်ဒမီရဲ့ ကင်းထောက်ခြင်းကို ခံခဲ့ရတာပါ။

အသက် ၁၂ နှစ်အရွယ်မှာ အကယ်ဒမီထံ ပူးပေါင်းဖို့အတွက် ပြည်မကြီးဆီကို ပြောင်းရွှ့ခဲ့ပြီး ပရော်ဖက်ရှင်နယ် ကစားသမား တစ်ဦးအဖြစ် သူ့ရဲ့ အရည်အချင်းတွေ တိုးတက်လာစေခဲ့တာ ဖြစ်ပါတယ်။

ရီးရယ်လ်အသင်းက ရော်နယ်ဒိုအတွက် ကမ္ဘာ့စံချိန်တင် ပြောင်းရွှေ့ကြေး ပေးချေခဲ့
*******************************************************************************
၂၀၀၉ ခုနှစ်က ရော်နယ်ဒိုဟာ အဲ့ဒီအချိန်က ကမ္ဘာ့စံချိန်တင် ပြောင်းရွှေ့ကြေးဖြစ်တဲ့ ပေါင်သန်း ၈၀ နဲ့ ရီးရယ်လ် အသင်းထံ ပြောင်းရွှေ့ခဲ့တာ ဖြစ်ပါတယ်။

သူဟာ ရီးရယ်လ်အသင်းမှာ ၉ ရာသီကြာ ကုန်ဆုံးခဲ့ပြီး အချိန်တိုင်းရဲ့ အကောင်းဆုံး ကစားသမားတွေထဲက တစ်ဦးအဖြစ်နဲ့ သူ့ရဲ့အဆင့်အတန်းကို ပိုပြီးတော့ ခိုင်မာစေခဲ့တာ ဖြစ်ပါတယ်။ ရီးရယ်လ်အသင်းမှာ ကစားခဲ့တဲ့ အချိန်အတွင်း ဘောလွန်းဒီအော ၄ ကြိမ် ၊ ချန်ပီယံလိဂ်ဖလား ၄ ကြိမ်၊ လာလီဂါဖလား ၂ ကြိမ်နဲ့ ဆုဖလား အောင်မြင်မှုတွေ အများအပြား ရယူနိုင်ခဲ့ပါတယ်။

ဘောလွန်းဒီအောဆုတွေနဲ့တွေ့ရတဲ့ ရော်နယ်ဒို

နိုင်ငံတကာ ဂိုးသွင်းအများဆုံး အမျိုးသား ဘောလုံးသမား
*****************************************************
ရော်နယ်ဒိုဟာ ပေါ်တူဂီအတွက် ၁၁၈ ဂိုး သွင်းယူထားပြီး ကစားနေတဲ့ အမျိုးသား ဘောလုံးသမားတွေထဲမှာ နိုင်ငံတကာဂိုးသွင်း အများဆုံး ကစားသမားအဖြစ် ရှိနေတာ ဖြစ်ပါတယ်။

အောင်မြင်တဲ့ စီးပွားရေးသမား
*****************************
ရော်နယ်ဒိုဟာ သူ့ရဲ့ဘောလုံးနယ်ပယ်မှာ အောင်မြင်မှုတွေ အများအပြား ရယူနိုင်ခဲ့သလို အဝတ်အစား၊ ဖိနပ်၊ အမွှေးအကြိုင်တွေ ပါဝင်တဲ့ CR7 အမှတ်တံဆိပ် ထုတ်ကုန်တွေနဲ့အတူ အောင်မြင်တဲ့ စီးပွားရေး သမားတစ်ဦး လည်း ဖြစ်ပါတယ်။

သူ့မှာ ဟိုတယ်တစ်ခု၊ ပြတိုက်တစ်ခုနဲ့ ပေါ်တူဂီနိုင်ငံ မဒီရာမှာ စားသောက်ဆိုင် အများအပြားရှိတာ ဖြစ်ပါတယ်။

ရော်နယ်ဒိုအတွက် ရည်ညွှန်းထားတဲ့ ပြတိုက်
*****************************************
The Museu CR7 ဟာ ပေါ်တူဂီဘောလုံးသမား ရော်နယ်ဒိုရဲ့ ဘဝနဲ့ အသက်မွေးဝမ်းကြောင်းအတွက် ရည်ညွှန်း ထားတဲ့ ပြတိုက်ဖြစ်ပါတယ်။ အဆိုပါပြတိုက်မှာ ရော်နယ်ဒိုရဲ့ ငယ်ဘဝ၊ ကျော်ကြားမှုတွေ၊ ဘောလုံးသမားအဖြစ် အောင်မြင်မှုတွေ အပါအဝင် ကိုယ်ရေးကိုယ်တာ အမှတ်တရတွေ၊ အနုပညာပစ္စည်းတွေကို ပြသထားတာ ဖြစ်ပါတယ်။

ပြတိုက်လာရောက် ကြည့်ရှုတဲ့ သူတွေဟာ ဘောလွန်းဒီအောဆုတွေ၊ ပေါ်တူဂီ လက်ရွေးစင် ဂျာစီတို့လို ရော်နယ်ဒို ပိုင်ဆိုင်တဲ့ အရာတွေကို မြင်တွေ့ရမှာပါ။ အဆိုပါ ပြတိုက်ဟာ အချိန်တိုင်းရဲ့ အကောင်းဆုံး ကစားသမားတစ်ဦးကို ဂုဏ်ပြုတဲ့ အထိမ်းအမှတ် တစ်ခုလည်း ဖြစ်ပါတယ်။

ပေါ်တူဂီလက်ရွေးစင်အသင်းအတွက် ကစားနေတဲ့ ရော်နယ်ဒိုကိုတွေ့ရစဉ်

ရော်နယ်ဒို နာမည်ပေးထားတဲ့ နဂါးငွေ့တန်း
******************************************
၂၀၁၅ ခုနှစ်က Lancaster တက္ကသိုလ်က နက္ခတ္တဗေဒဆိုင်ရာ ပညာရှင်တွေဟာ ဥရောပတောင်ပိုင်းမှာရှိတဲ့ အလွန် ကြီးမားတဲ့ မှန်ပြောင်း (VLT) ကို အသုံးပြုခဲ့ပါတယ်။

W M Keck နက္ခတ်ရဲ့ အကူအညီနဲ့ Sabaru မှန်ပြောင်း NASA / ESA Hubble အာကာသ ကြည့်မှန်ပြောင်းတို့နဲ့ ရှာဖွေတွေ့ရှိမှုတွေ ပြုလုပ်ခဲ့ပါတယ်။

ဒီသုတေသနအဖွဲ့မှာ နာမည်ကြီး တက္ကသိုလ်တွေ အများအပြား ပါဝင်ခဲ့တာပါ။ အဲ့ဒါကနေ ရော်နယ်ဒိုရဲ့ နာမည်ကို အစွဲပြုပြီး Cosmos Redshift 7 နဂါးငွေ့တန်း ဒါမှမဟုတ် CR7 နဂါးငွေ့တန်းဆိုပြီး ခေါ်ဆိုခဲ့ကြတာ ဖြစ်ပါတယ်။

လေဆိပ်ကို ရော်နယ်ဒိုနာမည် ပေးထားခြင်း
*****************************************
ခရစ္စတီယာနို အပြည်ပြည်ဆိုင်ရာလေဆိပ်လို့ လူသိများတဲ့ မဒီရာလေဆိပ်ဟာ ပေါ်တူဂီနိုင်ငံ မဒီရာကျွန်းပေါ်မှာ ရှိတဲ့ အပြည်ပြည်ဆိုင်ရာ လေဆိပ် ဖြစ်ပါတယ်။

ကမ္ဘာ့အကောင်းဆုံး ဘောလုံးသမားအဖြစ် သတ်မှတ်ခံရပြီးနောက် ၂၀၁၇ က မဒီရာဖွား ဘောလုံးသမားဖြစ်တဲ့ ရော်နယ်ဒိုကို ဂုဏ်ပြုတဲ့အနေနဲ့ အခုလို နာမည်ပြောင်းလဲခဲ့တာ ဖြစ်ပါတယ်။ ဒီလေဆိပ်ဟာ နိုင်ငံတကာ လေကြောင်းလိုင်း များစွာအတွက် အချက်အချာကျပါတယ်။

ဒါကြောင့် မဒီရာလေဆိပ်ကို ဥရောပနဲ့ အတ္တလတန်တိတ် ခရီးစဉ်တွေနဲ့ ချိတ်ဆက်ခဲ့တာ ဖြစ်ပါတယ်။

Darke ရဲ့သီချင်းထဲမှာ နာမည်အသုံးပြုခံရခြင်း
*******************************************
၂၀၁၈ ခုနှစ်က နာမည်ကျော် ကနေဒါဂီတပညာရှင် Darke ဟာ Scorpion အမည်ရှိ တေးသီချင်း အယ်လ်ဘမ်ကို ထုတ်ခဲ့ပါတယ်။ အဆိုပါ အယ်လ်ဘမ်ထဲက Blue Tint ဆိုတဲ့ သီချင်းမှာ ရော်နယ်ဒိုရဲ့ နာမည်ကို ဖော်ပြထားတာ ဖြစ်ပါတယ်။

ဇိမ်ခံကား အစီး၂၀ ပိုင်ဆိုင်ထား
********************************
ရော်နယ်ဒိုဟာ သူ့ရဲ့ အသင်းဖော်တွေလိုပဲ ကားတွေကို ချစ်မြတ်နိုးတာဖြစ်ပြီး ဇိမ်ခံကားအစီး ၂၀ ကို ပိုင်ဆိုင်ထား တာ ဖြစ်ပါတယ်။ ဒီံထဲက Bugatti Chiron, Ferrari 599 GTO နဲ့ Rolls-Royce Phantom ကားတွေက အကျော် ကြားဆုံး ကားတွေ ဖြစ်ပါတယ်။

မဒီရာလေဆိပ်ကို ရော်နယ်ဒိုနာမည်ပြောင်းလဲ ဂုဏ်ပြု

ပွတ်စ်ကတ်စ်ဆုကို ပထမဆုံး လက်ခံရရှိတဲ့သူဖြစ်လာ
***************************************************
ပြက္ခဒိန် တစ်နှစ်အတွင်း အကောင်းဆုံး သွင်းဂိုးဆုကိုပေးတဲ့ ပွတ်စ်ကတ်ဆုကို ၂၀၀၉ ခုနှစ်မှာ စတင်ပေးခဲ့တာ ဖြစ်ပြီး ရော်နယ်ဒိုက ဒီဆုကိုရရှိတဲ့ ပထမဆုံး ကစားသမား ဖြစ်လာခဲ့ပါတယ်။

ရော်နယ်ဒိုဟာ ၂၀၀၈-၀၉ ရာသီက ပေါ်တိုအသင်းနဲ့ ကစားခဲ့တဲ့ ချန်ပီယံလိဂ်ပွဲစဉ်မှာ ယူနိုက်တက်အသင်းအတွက် သွင်းယူခဲ့တဲ့ တာဝေးကန်သွင်းဂိုးနဲ့ ရရှိခဲ့တာ ဖြစ်ပါတယ်။

တက္ကသိုလ်တစ်ခုမှာ သင်ကြားခံရတဲ့ ဘာသာရပ်တစ်ခု ဖြစ်လာ
***********************************************************
စိတ်ဝင်စားဖို့ကောင်းတဲ့ အရာကတော့ ရော်နယ်ဒိုဟာ ကနေဒါမှာရှိတဲ့ British Columbia Okanagan တက္ကသိုလ် မှာ ဘာသာရပ်တစ်ခု အနေနဲ့ ရှိခဲ့တာ ဖြစ်ပါတယ်။

လူမှုဗေဒတက္ကသိုလ် ကျောင်းသား၊ ကျောင်းသူတွေဟာ စူပါစတားရဲ့ ဘဝနဲ့ ကစားသမားဘဝကို သင်တန်း ဘာသာရပ်အဖြစ် လေ့လာဖို့အတွက် ရွေးချယ်ခွင့်ရှိတာ ဖြစ်ပါတယ်။

ပရဟိတ လုပ်ဆောင်တဲ့သူ
***************************
ရော်နယ်ဒိုဟာ ကွင်းပြင်ပမှာ သူ့ရဲ့ ပရဟိတ အလုပ်တွေကြောင့် နာမည်ကြီးတဲ့သူ ဖြစ်ပါတယ်။ ၂၀၁၅ ခုနှစ်မှာ လိုအပ်နေတဲ့ ကလေေးတွေကို ကူညီဖို့အတွက် ရော်နယ်ဒို ဖောင်ဒေးရှင်းကို တည်ထောင်ခဲ့ပြီး နောက်ပိုင်းမှာ လည်း အခြားသော ပရဟိတလုပ်ငန်းများစွာမှာ ပါဝင်ခဲ့တာ ဖြစ်ပါတယ်။

Source: Goal

CNI International Article

၂၀၂၃ ခုနှစ်၊ ဖေဖော်ဝါရီ ၁၂

မြောက်ကိုရီးယား တပ်မတော်ကို တည်ထောင်ခြင်း ၇၅ နှစ်ပြည့် အထိမ်းအမှတ်အဖြစ် ဗုဒ္ဓဟူးနေ့ည မြို့တော် ပြုံယမ်းတွင် စစ်ရေးပြပွဲကြီးတစ်ခု ကျင်းပခဲ့သည်။

ထိုပြပွဲတွင် မြောက်ကိုရီးယားအစိုးရက အကြီးစား ဒုံးကျည်များ အပါအဝင် ၎င်းတို့၏ စစ်ဘက်ဆိုင်ရာ လက်နက် ကြီးများကို ထုတ်ဖော်ပြခဲ့သည်။ သို့သော် ယင်းက ကင်မ်ဂျုံအန်းအတွက် လက်နက်များကို ခင်းကျင်းပြသရုံ သက်သက် ပွဲတစ်ခု မဟုတ်ခဲ့ပေ။

သူ၏ သမီးဖြစ်သူကို ပွဲထုတ်ခြင်း အခမ်းအနားလည်း ဖြစ်ခဲ့သည်။

စစ်ရေးပြ အခမ်းအနားသို့ ကင်သည် အနက်ရောင် ဝတ်စုံဝတ်ထားသည့် ကလေးမလေး တစ်ဦးနှင့်အတူ တက် ရောက်ခဲ့သည်။

အသက် ၁၀ နှစ် ဝန်းကျင်အရွယ်ဟု ခန့်မှန်းရသော ထိုကလေးမလေးသည် ကင်မ်ဂျူအေစ်ဆိုသူ ဖြစ်သည်။

သူမသည် ကင်မ်ဂျုံအန်း၏ ဒုတိယအကြီးဆုံး ကလေးလည်း ဖြစ်သည်။ ဗုဒ္ဓဟူးနေ့ အခမ်းအနားသည် သူမ၏ ငါးကြိမ်မြောက် လူမြင်ကွင်းသို့ ထွက်ပေါ်လာခြင်းဖြစ်ကာ ထိုငါးကြိမ်စလုံးသည် သုံးလဟူသော အချိန်အတွင်း ဖြစ်ပျက်ခဲ့သည်။

စစ်သည်များ ကြိုဆိုခြင်းအခမ်းအနားနဲ့ကြိုဆိုခံရသော ကင်မ်ဂျူအေစ်ကိုတွေ့ရစဉ်

ထိုသုံးလဟူသော အချိန်အတွင်းမှာပင် ကင်မ်ဂျူအေစ်၏ အနေအထားသည် သိသိသာသာ ပြောင်းလဲသွားသည်။

ထို့ကြောင့် သူမသည် လာမည့် အနာဂတ်တွင် မြောက်ကိုရီးယားနိုင်ငံ၏ ခေါင်းဆောင်သစ်အဖြစ် လျာထားခံရသူ ဖြစ်နိုင်သည်ဆိုသည့် ခန့်မှန်းမှုများကို ပိုမိုအားကောင်းလာစေခဲ့သည်။

ကင်ဂျူအေစ်သည် ပြီးခဲ့သည့်နှစ် နိုဝင်ဘာလတွင် လူမြင်ကွင်းသို့ ပထမဆုံးအကြိမ် ထွက်ပေါ်လာခဲ့သည်။

တိုက်ချင်းပစ် ပဲ့ထိန်းဒုံးကျည် (ICBM) များ ပစ်လွှတ်ခြင်းကို လာရောက် ကြည့်ရှုခဲ့ခြင်း ဖြစ်သည်။ ထိုအချိန်မှ စ တင်ကာ မေးခွန်းတစ်ခုရှိလာသည်။

တစ်နေ့နေ့ တစ်ချိန်ချိန်တွင် ထိုကလေးမလေးသည် ကမ္ဘာ့အလျှို့ဝှက်ဆုံး နိုင်ငံကို ဦးဆောင်သူ ဖြစ်လာမလား ဆိုခြင်းပင်။

သို့သော် ပထမဆုံးအကြိမ် လူမြင်ကွင်းသို့ ထွက်ပေါ်လာသည့် ကလေးငယ် တစ်ဦးနှင့် ပတ်သက်၍ ထိုသို့ မေးခွန်း မျိုး ရှိမနေသင့်ဟု ထိုအချိန်တုန်းက မှတ်ယူခဲ့ကြသည်။ အဖြူရောင် ဂျက်ကတ်၊ အနီရောင်ဖိနပ်၊ ပိုနီတေး ဆံပင် ပုံစံတို့နှင့်အတူ ဖခင်၏ လက်ကို ကိုင်ထားသော ကင်မ်ဂျူအေစ်၏ ပုံစံမှာ ကလေးတစ်ဦးမျှသာ ဖြစ်သည်။

ထိုသို့သော အခမ်းအနားမျိုးဆီသို့ ကလေးကို ခေါ်လာခြင်းက ဖခင် ကောင်းတစ်ဦးအဖြစ် ကင်မ်ဂျုံအန်က မိမိကို မိမိ ပုံဖော်ခြင်း သို့မဟုတ် ၎င်း၏မိသားစုသည်ပင် လက်နက်များနှင့် အတူတကွ ရှိသည်ဆိုသည့် သဘောကို ဖော်ညွှန်း ခြင်းဟု ရှုမြင်ခဲ့ကြသည်။

ကင်မ်ဂျုံအန်းကိုတွေ့ရစဉ်(AP)

သို့သော် လူမြင်ကွင်းသို့ တစ်ခါပေါ်လာချိန်တိုင်း ကင်မ်ဂျူအေစ်မှာ အသက် မကြီးလာသည့်တိုင် သူမ၏ ဂုဏ်မှာ ပို၍ ကြီးထွားလာသည်ဟု ထင်လာရသည်။

စစ်ရေးပြပွဲ မလုပ်ခင် အင်္ဂါနေ့ညတွင် သူမသည် မြောက်ကိုရီးယားထိပ်တန်း စစ်ဗိုလ်ချုပ်ကြီးများအတွက် ကျင်းပ သော စားသောက်ပွဲကို တက်ရောက်ခဲ့သည်။

အင်္ဂါနေ့ပွဲကို သူမသည် အဖြူ၊ အနက်ဝတ်စုံ၊ နောက်လှန်ဖီးထားသော ဆံပင်ပုံစံနှင့် တက်ရောက်ခဲ့ခြင်း ဖြစ်သည်။

ယင်းနှင့် ပတ်သက်၍ ထွက်ပေါ်လာသော ပုံများသည်လည်း မြောက်ကိုရီးယားအရေး လေ့လာသူများအတွက် စိတ်ဝင်စားစရာ ဖြစ်ခဲ့သည်။ ပုံတိုင်းတွင် ကင်မ်ဂျူအေစ်သည် အလယ်တည့်တည့်တွင် ရှိနေပြီး သူမ၏ နောက် တွင် နိုင်ငံ၏ရာထူးကြီး ဗိုလ်ချုပ်များ ခြံရံထားကာ အဖေနှင့်အမေဖြစ်သူတို့က သူမအား ဘေးတွင် ဝိုင်းရံထား သည်။

ငယ်ရွယ်သော ကင်မ်ဂျူအေစ်နှင့် ပတ်သက်၍ မသိမသာ တိုးတက်ပြောင်းလဲလာမှု နောက်တစ်ခုမှာ သူမအပေါ် သုံးနှုန်းလာသည့် စကားလုံး အသုံးအနှုန်း ဖြစ်သည်။ မြောက်ကိုရီးယားနိုင်ငံပိုင် ရုပ်သံတွင် ကင်မ်ဂျူအေစ်ကို ချစ်စရာ ကောင်းသော သမီးလေးအဖြစ် ပထမဆုံးဖော်ပြခဲ့သည်။

သို့သော် အင်္ဂါနေ့ စားသောက်ပွဲ အခမ်းအနား တက်ရောက်မှုတွင် သူမအား လေးစားခံရသော သမီးငယ်အဖြစ် ပြောင်းလဲ သတ်မှတ်သုံးနှုန်းခဲ့သည်။ ယင်းက အရေးပါသော၊ လူရိုသေ ရှင်ရိုသေရှိသော လူတစ်ချို့တွင်သာ တွေ့ရသည့် နာမဝိသေသန ပြောင်းလဲသတ်မှတ်မှုလည်းဖြစ်သည်။

သူမ၏ ဖခင် ကိုယ်တိုင်ကိုပင် အနာဂတ် ခေါင်းဆောင်သစ်အဖြစ် သတ်မှတ်ကြောင်း သေချာပြီးချိန်မှသာ လေးစားခံရသော ရဲဘော်ဟု ခေါ်ဝေါ်ဖော်ညွှန်းခြင်း ခံခဲ့ရသည်။

နိုင်ငံ စတင်တည်ထောင်ချိန်မှစ၍ မြောက်ကိုရီးယားကို ကင်မ်မျိုးဆက် သုံးခုက အစဉ်တစိုက် အုပ်ချုပ်ခဲ့သည်။

ကင်မ် မိသားစုသည် မြင့်မြတ်သော မျိုးရိုးမှ ဆင်းသက်လာခြင်း ဖြစ်သည်ဟု မြောက်ကိုရီးယား နိုင်ငံသားများ၏ အတွေးတွင် ရိုက်သွင်းထားသည်။ မြောက်ကိုရီးယားနိုင်ငံကို ကင်မိသားစုကသာ အုပ်ချုပ်နိုင်သည်ဆိုသည့် အဓိပ္ပါယ်မျိုး ဖြစ်သည်။

ထို့ကြောင့် ကင်မ်ဂျုံအန်အနေဖြင့် ခေါင်းဆောင်ရာထူးကို ၎င်းတို့၏ စတုတ္တမြောက် မျိုးဆက်ထံသို့ လွဲပြောင်း ပေးရန် ကြိုးစားသွားမည့် သဘောဖြစ်သည်။

သို့သော် ကင်မ်ဂျူအေစ်ကို ရာထူးဆက်ခံသူအဖြစ် လျာထားသည် ဆိုသည့်တိုင် သူမကို အဘယ့်ကြောင့် အသက် ငယ်ငယ်ရွယ်ရွယ်တွင် သုံးလအတွင်း ငါးကြိမ်တိတိ လျင်လျင်မြန်မြန် လူမြင်ကွင်းသို့ ပွဲထုတ်ရပါလဲ မေးစရာ ရှိလာသည်။

ကင်မ်ဂျုံအန်သည်ပင် အသက် ၃၉ နှစ် ၄၀ မပြည့်သေးသည့်အရွယ်၊ သူမအသက် ၁၀ နှစ် အရွယ်တွင်ပင် ထိုသို့ လုပ်ဆောင်ခဲ့ခြင်းက စိတ်ဝင်စားစရာ ကောင်းသည်။ ကင်မ်ဂျုံအန်ကို အနာဂတ် ခေါင်းဆောင်အဖြစ် သူ၏ ဖခင် ဖြစ်သူ ကင်မ်ဂျုံအီက အသက် ၈ နှစ်အရွယ်တွင် ထုတ်ဖော် ပြောကြားခဲ့သည်။

သို့သော် ကင်မ်ဂျူအေစ် ကဲ့သို့ လူသိရှင်ကြား သဘောမျိုး မဟုတ်ဘဲ စစ်ဘက် ခေါင်းဆောင်များကိုသာလျှင် သီးသန့် အသိ ပေးခဲ့ခြင်းဖြစ်သည်။

ကင်မ်ဂျုံအန်ကို ခေါင်းဆောင်သစ်အဖြစ် လူသိရှင်ကြား အသိပေးကြေညာခြင်းသည် သူ့ဖခင် မကွယ်လွန်မီ တစ်နှစ်အလိုကမှ ဖြစ်သည်။ ထိုသို့ လုပ်ဆောင်ခဲ့ခြင်းကြောင့် ကင်မ်သည် ခေါင်းဆောင်ရာထူးကို ရရှိချိန်တွင် သူ၏ အာဏာကို စုစည်းရေးအတွက် ခက်ခဲသော စိန်ခေါ်မှုများနှင့် ကြုံတွေ့ခဲ့ရသည်။

ကင်မ်ဂျုံအန်းနဲ့ သမီးဖြစ်သူ ကင်မ်ဂျူအေစ်ကိုတွေ့ရစဉ်(AP)

ထိုသို့သော သမိုင်း မှတ်တမ်းများကြောင့် ကင်မ်သည် သမီးဖြစ်သူကို ကြိုတင် ပွဲထုတ်လာခြင်း ဖြစ်နိုင်သည်။ သူမ အမှန်တကယ် ရာထူးအာဏာကို ရရှိချိန်အတွက် ကြိုတင်ပြင်ဆင် ထားပေးခြင်းလည်း ဖြစ်သည်။ ကင်မ်ဂျုံအန်၏ ကျန်းမာရေး အခြေအနေ မကောင်းဘဲ ရာထူးအာဏာကို စောစောစီးစီး စွန့်ခွာရမည့် အခြေအနေတွင် ရှိနေခြင်း ကြောင့်ဟု ထောက်ပြနိုင်သော်လည်း ထိုသို့ ဖြစ်သည် ဟုတ်မဟုတ်ကို သိရှိရန် မဖြစ်နိုင်ပေ။

နောက်ထပ် အကြောင်းပြချက် တစ်ခုမှာ အမျိုးသားကြီးစိုးမှု နက်ရှိုင်းစွာ စွဲဝင်နေသော လူ့အဖွဲ့အစည်းအတွင်းမှ တစ်ဖက်ပိတ် ယုံကြည်မှုကို ပြောင်းလဲပစ်ရန် ဖြစ်သည်။ မြောက်ကိုရီးယားနိုင်ငံတွင် အမျိုးသမီးတစ်ချို့ ရာထူးကြီး ပိုင်းတွင် တာဝန်ထမ်းဆောင် ခဲ့ဖူးသည်ကလွဲ၍ အမျိုးသမီးခေါင်ဆောင် မရှိခဲ့ပေ။

ကင်မ်ဂျုံအန်၏ ညီမဖြစ်သူ ကင်မ်ယိုဂျောင်သည် အထင်ရှားဆုံး ဥပမာဖြစ်သည်။ ထိုအချက်သည် ကျော်လွှား၍ မရသော အရာမဟုတ်ဟု ထင်ကြောင်း မြောက်ကိုရီးအရေးကို စောင့်ကြည့်နေသည့် NK News မှ ဂျိမ်းစ်ဖရတ်ဝဲလ် က ပြောသည်။

မြောက်ကိုရီးယားဟာ အမျိုးသားကြီးစိုးသည့် နိုင်ငံဖြစ်သည့်တိုင် တစ်ဖက်တွင်လည်း ကင်မ်မိသားစု ကြီးစိုးရာ နေရာ ဖြစ်သည်ဟု ၎င်းက ဘီဘီစီကို ပြောသည်။ တခြားအရာများထက် ပို၍ အရေးကြီးသည်က ကင်မ်၏ သွေးသားသည် ခေါင်းဆောင်ရာထူးကို ရရှိနိုင်ဖွယ် ရှိသူဆိုခြင်းပင် ဖြစ်သည်။

ထို့ကြောင့် အမျိုးသားဖြစ်စေ၊ အမျိုးသမီးဖြစ် မြောက်ကိုရီးယား၏ ခေါင်းဆောင်သစ်သည် အုပ်ချုပ်သူ ကင်မ် မိသားစု၏ အပြင်ဘက်မှ ဖြစ်နေခြင်းက ပို၍ အံ့အားသင့်စရာ ဖြစ်လာလိမ့်မည်ဟုလည်း ၎င်းက မှတ်ချက်ပြုသည်။

ထိုအခြေအနေများအရ မြောက်ကိုရီးယား ခေါင်းဆောင်သစ် နေရာကို အမျိုးသမီးတစ်ဦး တင်မြှောက်မည်ဆိုလျှင် သူမသည် ပြည်သူများ၊ စစ်တပ်နှင့် အထက်တန်းလွှာများ၏ လက်ခံမှုကို သေချာပေါက် လိုအပ်မည် ဖြစ်သည်။

အသက် ၁၀ နှစ်ဝန်းကျင်သာ ရှိသေးသော ကင်မ်ဂျူအေစ်ကို မြောက်ကိုရီးယား ခေါင်းဆောင်လောင်း လျာအဖြစ် ရှုမြင်ရန်မှာ အတန်အသင့် ခက်ခဲမည်ဖြစ်သော်လည်း သူမနှင့် ပတ်သက်၍ မြောက်ကိုရီးယားနိုင်ငံအတွင်း ပြောင်းလဲလာသော အခြေအနေများအရ ထိုကိစ္စသည် လုံးဝ ဖြစ်လာမည် မဟုတ်ဟု တစ်ထစ်ချ သတ်မှတ်ရန်မှာ လည်း လွယ်ကူမည် မဟုတ်ပေ။

Source: BBC