CNI International Article

၂၀၂၃ ခုနှစ်၊ မေလ ၂၈

ဇူလိုင်လတွင် ကျင်းပရန် စီစဉ်ထားသော ရွေးကောက်ပွဲများတွင် ကမ္ဘောဒီးယားနိုင်ငံ၏ ပင်မအတိုက်အခံ ပါတီ အား ဝင်ရောက် ယှဉ်ပြိုင်ခွင့် ပိတ်ပင်ခြင်းကို နိုင်ငံ၏ ဖွဲ့စည်းပုံအခြေခံဥပဒေကောင်စီက အတည်ပြုလိုက်ပြီ ဖြစ်သည်။

ရွေးကောက်ပွဲ ဝင်ရောက်ရန် လိုအပ်သော စာရွက်စာတမ်းများနှင့် ပတ်သက်၍ ရွေးကောက်ပွဲကော်မရှင်က ချမှတ် ထားသော အမိန့်ကို ဖွဲ့စည်းပုံကောင်စီက ပြင်ဆင်ရန် ငြင်းဆန်ခဲ့ခြင်းကြောင့် ဖြစ်သည်။

အတိုက်အခံ Candlelight ပါတီသည် လာမည့် ရွေးကောက်ပွဲများတွင် လက်ရှိအာဏာရ Cambodian People’s Party အား ယှဉ်ပြိုင်နိုင်သည့် တစ်ခုတည်းသော ပါတီဖြစ်သည်။

သို့သော် ပါတီ၏ အယူခံသည် ဥပဒေနှင့်မညီခြင်းကြောင့် ယင်း၏ စောဒကတက်မှုကို ပယ်ချလိုက်သည်ဟု ကောင်စီက ထုတ်ပြန်သော ကြေညာချက် တစ်စောင်တွင် ဖော်ပြသည်။

ထိုဆုံးဖြတ်ချက် အတည်ဖြစ်ပါက အယူခံဝင်၍လည်း ရမည်မဟုတ်ပေ။ ထိုဆုံးဖြတ်ချက်ကြောင့် ကမ္ဘောဒီးယား၏ တရားရုံးများသည် လက်ရှိဝန်ကြီးချုပ် ဟွန်ဆန်နှင့် သူ၏ Cambodian People’s ပါတီ၏ လွှမ်းမိုးမှုအောက် ရောက်ရှိနေသည်ဆိုသော ဝေဖန်သံများပို၍ ကျယ်လောင်လာသည်။

Candlelight ပါတီကို တွေ့ရစဉ်

ကမ္ဘောဒီးယား၏ ရွေးကောက်ပွဲကော်မရှင်က Candlelight ပါတီ၏ မှတ်ပုံတင်ခြင်း ကိစ္စကို မေလ ၁၆ ရက်တွင် ပယ်ချခဲ့သည်။ လိုအပ်သော စာရွက်စာတမ်းများ မပြည့်စုံခြင်းကြောင့်ဟု ဆိုသည်။

ထို့နောက် ပါတီဘက်က ရွေးကောက်ပွဲကော်မရှင်၏ ဆုံးဖြတ်ချက်ကို ပယ်ဖျက်ပေးရန် ဖွဲ့စည်းပုံအခြေခံဥပဒေ ဆိုင်ရာ ကောင်စီအား လူသိရှင်ကြား တိုင်ချက်ဖွင့်ခဲ့သည်။

မည်သို့ပင်ဆိုစေကာမူ ကောင်စီက ပယ်ချလိုက်ပြီ ဖြစ်သည်။ Candlelight ပါတီကို ထောက်ခံသူများ အနေဖြင့် ၎င်းတို့ သဘောကျ နှစ်သက်သော ကိုယ်စားလှယ် လောင်းများကို မဲပေးခွင့် ဆုံးရှုံးခဲ့ရပြီ ဖြစ်သည့်အတွက် ကောင်စီ၏ ဆုံးဖြတ်ချက်နှင့်ပတ်သက်၍ ဝမ်းနည်းမိသည်ဟု Candlelight ပါတီ၏ ပြောခွင့်ရပုဂ္ဂိုလ် ကင်ဆိုးလ် ပီရစ်က ပြောသည်။

ရွေးကောက်ပွဲတွင် Candlelight ပါတီ မပါဝင်ခြင်းက ပြည်သူများ၏အသံကို ငြင်းဆန်သည့် သဘောဖြစ်ကာ ဒီမိုကရေစီ စစ်မှန်သော နိုင်ငံများတွင် ထိုကဲ့သို့သော ကိစ္စမျိုး မဖြစ်သင့်ဟုလည်း ၎င်းက ပြောသည်။

ဖွဲ့စည်းပုံအခြေခံဥပဒေကောင်စီ၏ ဆုံးဖြတ်ချက်သည် ပြည်တွင်းပြည်ပတို့မှ ဝေဖန်မှုများနှင့် ရင်ဆိုင်နေရပြီး ထိုကိစ္စကြောင့် ရွေးကောက်ပွဲများအတွက် တရားဝင် စောင့်ကြည့် လေ့လာသူများကို စေလွှတ်တော့မည် မဟုတ် ဟု အမေရိကန်နိုင်ငံခြားရေးဌာနက ပြောသည်။

ဟွန်ဆန်၏ သားဖြစ်သူ ဟွန်မာနတ်ကိုတွေ့ရစဉ်

Candlelight ပါတီအား ရွေးကောက်ပွဲဝင်ခွင့် ပိတ်ပင်သည့် ဆုံးဖြတ်ချက်အပေါ် စိတ်ပျက်မိသည်ဟုလည်း ယင်းက ပြောသည်။

အတိုက်အခံ ပါတီများ၊ လွှတ်လပ်သော မီဒီယာများနှင့် လူ့အဖွဲ့အစည်းအပေါ် ပစ်မှတ်ထားသော ဖိနှိပ်မှုများသည် ကမ္ဘောဒီးယား၏ ပါတီစုံဒီမိုကရေစီစနစ် ဖြစ်ပေါ်ရေး နိုင်ငံတကာ ကတိကဝတ်ကို ထိခိုက်စေသည်ဟုလည်း နိုင်ငံခြားရေးဌာန၏ ထုတ်ပြန်ချက်တွင် ဖော်ပြထားသည်။

လွတ်လပ်သော ပါတီစုံဒီမိုကရေစီစနစ်တွင် နိုင်ငံသားများအားလုံး ပါဝင်နိုင်သည်ကို သေချာစေရန် ပြန်လည် သုံးသပ်မှု လုပ်ဆောင်ရန်လည်း ကမ္ဘောဒီးယား အာဏာပိုင်များကို တိုက်တွန်းသည်။

လာမည့် ဇူလိုင် ၂၃ ရက်တွင် ကျင်းပရန် စီစဉ်ထားသည့် ကမ္ဘောဒီးယား၏ ၁၂၅ နေရာပါ အမျိုးသားလွှတ်တော် ရွေးကောက်ပွဲတွင် ကမ္ဘောဒီးယားပြည်သူ ၉ ဒသမ ၇ သန်းက ပါဝင် မဲပေးရန် စာရင်းပေးထားသည်။

ယင်းတွင် ဝင်ရောက်ယှဉ်ပြိုင်ရန် နိုင်ငံရေးပါတီ ၁၈ ခုက စာရင်းပေးထားကာ ရွေးကောက်ပွဲ ကော်မရှင်က ခွင့်ပြု ချက် ပေးထားသည်။

သို့သော် Candlelight ပါတီ ပါဝင်ခြင်း မရှိမှုက ဟွန်ဆန်၏ ပါတီ၊ ယင်း၏ မဟာမိတ်များနှင့် ရွေးကောက်ပွဲ အတွက် ထောက်ခံမှု လုံလုံလောက်လောက် မရှိထားသော ပါတီငယ်များကိုသာ ယှဉ်ပြိုင်မှုအတွင်း ကျန်ရစ်စေ သည်။

ထို့ကြောင့် ရွေးကောက်ပွဲ၏ ရလဒ်မှာ တစ်ဖက်သတ်ဖြစ်ရန် သေချာသလောက် ရှိနေပြီလည်း ဖြစ်သည်။

ဝန်ကြီးချုပ် ဟွန်ဆန်၏ Cambodian People ပါတီသည် တိုင်းပြည်၏ အာဏာကို ဆယ်စုနှစ်များစွာ ဆုပ်ကိုင် ထားရုံမက အစိုးရ၏ အဆင့်အသီးသီးတိုင်းကို ချုပ်ကိုင်ထားသည်။ အာဏာရှင်ဟု သတ်မှတ်ခံထားရသော အသက် ၇၀ အရွယ် ဟွန်ဆန်၏ ရာထူးကို ဆုပ်ကိုင်ထားမှုသည်ပင် ၃၈ နှစ်ရှိနေပြီ ဖြစ်သည်။

 ကမ္ဘောဒီးယားနိုင်ငံတွင်း တစ်နေရာကို တွေ့ရစဉ်

ဟွန်ဆန်နှင့် သူ၏ပါတီသည် ခေတ်အဆက်ဆက် ရွေးကောက်ပွဲများ မတိုင်ခင်တွင် ၎င်းတို့၏ အာဏာ၊ ရာထူး များကို အသုံးချလေ့ရှိသည်။

ယင်းတို့သည် နိုင်ငံရေးဆိုင်ရာ အဖွဲ့အစည်းများ၊ လူပုဂ္ဂိုလ်များ၊ ဘဏ္ဍာရေးအပြင် မီဒီယာကဏ္ဍ အထိပါ လွှမ်းမိုး ချုပ်ကိုင်ထားခြင်းကြောင့် ဖြစ်သည်။ ဟွန်ဆန်၏ အကြီးဆုံးသားဖြစ်သူ ဟွန်မာနတ်သည် လက်ရှိတွင် ကမ္ဘောဒီးယားနိုင်ငံ၏ စစ်ဦးစီးချုပ်ရာထူးကို ရယူထားသည်။

၎င်းသည် ယခု ရွေးကောက်ပွဲ ပြီးချိန်တွင် ဝန်ကြီးချုပ်ရာထူးကို ရယူကာ ဖခင်၏နေရာကို အစားဝင်မည်ဟုလည်း ယူဆရသည်။

ထိုသို့သော အားသားချက်များစွာကို လူသိရှင်ကြား ရယူထားသည်တိုင် ဟွန်ဆန်နှင့် ယင်း၏အာဏာရပါတီတို့ သည် ရွေးကောက်ပွဲတိုင်းတွင် အတိုက်အခံပါတီများကို ဖိနှိပ်၊ နှိပ်ကွက် မှုများစွာ လုပ်ဆောင်လေ့ရှိသည်။

၂၀၁၈ ခုနှစ် ရွေးကောက်ပွဲ မတိုင်ခင်တွင် ဟွန်ဆန်၏ ပါတီအား ပြင်းပြင်းထန်ထန် စိန်ခေါ်မှု လုပ်ဆောင်နိုင်သည့် ပါတီတစ်ခု ရှိခဲ့ဖူးသည်။ Cambodia National Rescue ပါတီဖြစ်သည်။

ရွေးကောက်ပွဲ ဝင်ရောက်ခွင့် ပိတ်ပင်ခံ ခဲ့ရသော Candlelight ပါတီသည် Combodia National Rescue ပါတီ အား တရားဝင် မဟုတ်သော်လည်း ဆက်ခံရေး ရှိသည့် ပါတီဖြစ်သည်။

သို့သော် ထိုပါတီသည် ရွေးကောက်ပွဲမတိုင်ခင် တစ်လအလိုတွင် ဖျက်သိမ်းခြင်း ခံခဲ့ရသည်။ Cambodia National Rescue ပါတီသည် အစိုးရကို ဖြုတ်ချရန် တရားမဝင် ကြံစည်ခဲ့သည်ဟူသော စွဲချက်အောက်တွင် အငြင်းပွားဖွယ် တရားရုံး ဆုံးဖြတ်ချက်ဖြင့် ဖျက်သိမ်းခံခဲ့ရခြင်း ဖြစ်သည်။

Cambodia National Rescue အား ဖျက်သိမ်းခြင်းကြောင့် အစိုးရအနေဖြင့် အမျိုးသားလွှတ်တော်တွင် နေရာ အားလုံးကို အနိုင်ရရှိခဲ့သည်။

ထို့ကြောင့် အနောက်အုပ်စု နိုင်ငံများက ထိုရွေးကောက်ပွဲကို လွတ်လပ်၍ တရားမျှတမှုမရှိဟု ကြေညာကာ ကမ္ဘောဒီးယားနိုင်ငံအား စီးပွားရေးဆိုင်ရာ ပိတ်ဆို့ အရေးယူမှုများ တုံ့ပြန် ချမှတ်ခဲ့သည်။

ထို့အပြင် နိုင်ငံအတွင်းရှိ ထင်ရှားသော အတိုက်အခံများသည်လည်း တရားမျှတမှုမရှိသော စွပ်စွဲချက်များဖြင့် အရေးယူ ထောင်ချခြင်းကို ရှောင်ရှားရန်အတွက် တခြားနိုင်ငံများသို့ ထွက်ပြေး တိမ်းရှောင်ခဲ့ရသည်။

Source: AP

CNI Sport Article

၂၀၂၃ ခုနှစ်၊ မေလ ၂၈

ပြီးခဲ့တဲ့ ရက်ပိုင်းက ရီးရယ်လ်ကစားသမား ဗီနီစီးယက်စ်ဟာ ဗလင်စီယာအသင်းနဲ့ ကစားခဲ့တဲ့ လာလီဂါပြိုင်ပွဲမှာ ပြိုင်ဘက် ပရိသတ်တွေရဲ့ လူမျိုးရေးခွဲခြားမှု ခံခဲ့ရပါတယ်။

အဲဒီ ဖြစ်ရပ်ဟာ အားကစားသတင်းတွေရဲ့ ခေါင်းကြီးပိုင်း သတင်းတွေအဖြစ် နေရာယူထားခဲ့ပါတယ်။ လာလီဂါလို့ လူသိများတဲ့ စပိန်ထိပ်တန်း ဘောလုံးလိဂ်မှာ လူမျိုးရေးခွဲခြားမှုက ပထမဆုံးဖြစ်ပွားခဲ့တာ မဟုတ်ဘဲ ဒီအဖြစ်အပျက်တွေကနေ ဆိုးရွားတဲ့ အမှတ်တရတွေကို ပြန်ပြီး သတိရ သွားစေခဲ့ပါတယ်။

လွန်ခဲ့တဲ့ နှစ်ပေါင်း ၄၀ အတွင်းမှာ ကစားသမားတွေ၊ အသားအရောင် မည်းတဲ့သူတွေနဲ့ အာဖရိက ကစားသမား တွေဟာ ပရိသတ်တွေရဲ့ လူမျိုးရေး ခွဲခြားမှုတွေကို ခံခဲ့ရတာပါ။

ကင်မရွန်းနိုင်ငံက ကြယ်ပွင့်တစ်ဦးဖြစ်တဲ့ အန်ကိုနိုဟာ ၁၉၈၂ က အက်စပန်ညိုကို ရောက်ရှိလာတဲ့ အချိန် ဘာစီလိုနာအသင်းနဲ့ နူးကမ့်ပ်ကွင်းကြီးထဲမှာ ကစားချိန် လူမျိုးရေး ခွဲခြားမှုတွေကို ခံခဲ့ရတာ ဖြစ်ပါတယ်။

ပရိသတ်အချို့က လူမျိုးရေးခွဲခြားတဲ့ သီချင်းတွေကို သီဆိုခဲ့ကြသလို ငှက်ပျောသီးတွေကို ကွင်းထဲ ပစ်ချတာတွေ လည်း ရှိခဲ့ပါတယ်။

အန်ကိုနိုနဲ့ ကင်မရွန်း နိုင်ငံသားချင်းတူညီခဲ့တဲ့ ကာမီနီကလည်း အက်စ်ပန်ညိုအသင်းမှာ ကစားချိန် ၂၀၀၄ တုန်း က ဇာရာဂိုဇာအသင်း ပရိသတ်တွေရဲ့ လူမျိုးရေး ခွဲခြားတဲ့ သီဆိုမှုတွေကို ခံစားခဲ့ရပါတယ်။

လူမျိုးရေးခွဲခြားလို့ ပွဲမကစားပဲ ထွက်ဖို့လုပ်နေတဲ့ အီတူးကို ဖျောင်းဖျနေကြစဉ်

ကာမီနီက “ကျနော်တို့ ၁ ဂိုး- ဂိုးမရှိနဲ့ အနိုင်ရနေတဲ့ အချိန်မှာ သူတို့တွေက ကျနော့်ကို နာမည်တွေပေးခဲ့ကြတာပါ။ ဒိုင်လူကြီးကတော့ ကျနော့်ကို ဆက်ကစားဖို့ လုံလောက်တယ်လို့ ခံစားရလားဆိုပြီး မေးခဲ့ပါတယ်။ ဒါပေမယ့် ကျနော်ကတော့ ဆက်ကစားနိုင်ဖို့အတွက် ခွန်အားတွေကို ရှာတွေ့ခဲ့ပါတယ်”လို့ ကာဒီနာဆား ရေဒီယိုကို ၂၀၁၇ က ပြောခဲ့ပါတယ်။

၂၀၀၅ က ကစားခဲ့တဲ့ ပွဲစဉ်တစ်ပွဲမှာ ကာမီနီအပေါ် မာလာဂါရှိ ပရိသတ်တွေရဲ့ လူမျိုးရေးခွဲခြားမှုတွေ ပြင်းထန် တာကြောင့် အယ်လ်ဖွန်ဆိုပီရတ်ဇ် ဆိုတဲ့ ကွင်းလယ်ဒိုင်လူကြီးဟာ ပွဲကို ရပ်တန့်ခဲ့ပါတယ်။

ကာမီနီဟာ ငှက်ပျောသီးတွေနဲ့ ပစ်ပေါက်တာတွေလည်း ခံခဲ့ရဖူးပါတယ်။ လူတစ်ယောက် အနေနဲ့ ဒီလိုမျိုး ကြုံတွေ့ရပြီး အိမ်ပြန်တဲ့အချိန်မှာ ကိုယ့်ကိုယ်ကို သတ်သေသွားနိုင်တယ်လို့ သူ့ရဲ့ ခံစားချက်ကို ထုတ်ပြော ခဲ့ပါတယ်။

နာမည်ကြီး ဘောလုံးသမား အီတူးဆိုရင်လည်း ဘာစီလိုနာအသင်းမှာ ကစားခဲ့တဲ့ ၂၀၀၄ ကနေ ၂၀၀၉ အထိ ၅ နှစ် တာ ကာလအတွင်းမှာ လူမျိုးရေး ခွဲခြားမှုတွေ အများအပြား ခံခဲ့ရပါတယ်။

အဖြစ်အပျက် တစ်ခုမှာဆိုရင် အီတူးဟာ ပွဲကြည့်စင်က မျောက်အော်သံတွေကြောင့် ဂီတာဖေးအသင်း ပရိသတ် တွေကို ဘောလုံးနဲ့ ကန်ခဲ့တဲ့အထိ ပေါက်ကွဲခဲ့ဖူးပါတယ်။

အဲဒါကြောင့် အီတူးဟာ အဝါကတ် ပြသခံခဲ့ရပါတယ်။ အီတူးဟာ အဲဒီနောက်ပိုင်း ပွဲစဉ်တွေမှာလည်း လူမျိုးရေး ခွဲခြားမှုတွေ ထပ်ပြီး ခံခဲ့ရပါတယ်။

ဘီလ်ဘာအိုအသင်း တိုက်စစ်မှူး အင်ယာကီဝီလျံ လူမျိုးရေးခွဲခြားခံရတဲ့ သတင်းကိုဖော်ပြထားစဉ်

အီတူးက “လူတစ်ဦးက ကျနော့်ကို မျောက်အော်သံ ပြုလုပ်ချင်လို့ လက်မှတ်ဖိုး ပေးပြီးဝယ်ရင် ကျနော်ကလည်း မျောက်တစ်ကောင်လိုပဲ ပြုမူသွားပါလိမ့်မယ်”လို့ ပြောပါတယ်။

အီတူးဟာ ၂၀၀၆ ခုနှစ်က ဇာရာဂိုဇာနဲ့ ကစားခဲ့တဲ့ပွဲစဉ်မှာ နောက်ထပ် လူမျိုးရေး ခွဲခြားခံခဲ့ရပြီး ဒီတစ်ကြိမ်မှာ တော့ ကင်မရွန်းကစားသမားဟာ ကွင်းထဲကနေ ထွက်ခွာဖို့ ပြုလုပ်ခဲ့ပါတယ်။ အဲဒီအချိန်မှာ အသင်းဖော်တွေ၊ ဇာရာဂိုဇာ ကစားသမားတွေနဲ့ ဒိုင်လူကြီးတွေက သူ့ကို အသင်းမှာ ဆက်နေအောင် စည်းရုံးဖို့ ကြိုးစားခဲ့ကြပါတယ်။

အီတူးဟာ ဒါကို မကျေမနပ် ဖြစ်ခဲ့ပေမယ့် ပွဲကို ဆက်ကစားခဲ့ ပါတယ်။ ရက်အနည်းငယ် အကြာမှာ စပိန်ဘောလုံး အဖွဲ့ချုပ်က ဇာရာဂိုဇာအသင်းကို ယူရို ၉,၀၀၀ ဒဏ်ရိုက်ခဲ့ပါတယ်။

၂၀၂၀ မှာတော့ ဘီလ်ဘာအိုအသင်း တိုက်စစ်မှူး အင်ယာကီဝီလျံဟာ လူစားလဲ ခံရချိန်မှာ လူမျိုးရေး ခွဲခြားခံခဲ့ရ တာဖြစ်ပြီး ဂါနာလက်ရွေးစင် ကစားသမားဟာ ၂၀၁၆ က ဂီဂျွန်အသင်းမှာ ကစားခဲ့တုန်းကလည်း လူမျိုးရေး ခွဲခြားမှု ခံခဲ့ရပါတယ်။

ဒီဖြစ်ရပ်တွေကြောင့် ဒိုင်လူကြီးဟာ ပွဲကို မိနစ်အနည်းငယ်ကြာ ရပ်နားခဲ့ရပါတယ်။ စပိန်ဝန်ကြီးချုပ် ကိုယ်တိုင်က လူမျိုးရေး ခွဲခြားမှုကို ရှုတ်ချခဲ့ပြီး နိုင်ငံရဲ့ သတင်းစာဖြစ်တဲ့ မာကာမှာ ခေါင်းကြီးပိုင်းအဖြစ် ဖော်ပြဖို့ ရွေးချယ်ခဲ့ပါတယ်။

ဒန်နီအဲလ်ဗတ်စ် ငှက်ပျောသီးကို ကောက်စားနေစဉ်

ခေါင်းကြီးပိုင်းမှာ “ကျနော်တို့ အားလုံးဟာ ဝီလျံတွေ ဖြစ်ကြပါတယ်၊ လူမျိုးရေးခွဲခြားမှုက လုံလောက်ပါပြီ”လို့ ဖော်ပြခဲ့တာ ဖြစ်ပါတယ်။

ဘာစီလိုနာအသင်း နောက်ခံလူ ဒန်နီအဲလ်ဗတ်စ်ဆိုရင် ပရိသတ်တွေက သူ့ကို လူမျိုးရေး ခွဲခြားတဲ့အနေနဲ့ ကွင်းထဲ ကို ငှက်ပျောသီး ပစ်ချခဲ့ပါတယ်။ ဒါပေမယ့် ဒန်နီအဲလ်ဗတ်စ်က ပစ်ချခဲ့တဲ့ ငှက်ပျောသီးကို ကောက်ယူကာ စားခဲ့ ပါတယ်။

နီကိုဝီလျံ၊ ဒီယာခီဘီ၊ ကိုနာတေး၊ ယာယာတိုရေးနဲ့ အခြားအာဖရိက ကစားသမား အများအပြားလည်း လူမျိုးရေး ခွဲခြားမှုတွေ အများကြီး ခံခဲ့ရပါတယ်။

လာလီဂါကတော့ လက်ရှိအချိန်မှာ လူမျိုးရေး ခွဲခြားမှု ဖြစ်ရပ်တွေကို လာမယ့် ၆ လ ဒါမှမဟုတ် ၇ လအတွင်းမှာ လျှော့ချနိုင်ဖို့ လုပ်ဆောင်နေတယ်လို့ လာလီဂါအကြီးအကဲ တီဘတ်စ်က ထုတ်ပြောထားပါတယ်။

လက်ရှိအချိန်မှာ အသင်းသားတွေနဲ့ တာဝန်ရှိသူတွေကလည်း လူမျိုးရေးခွဲခြားမှုကို တိုက်ဖျက်ဖို့ ပွဲမစခင်မှာ လူမျိုးရေးခွဲခြားမှုကို ဆန့်ကျင်တဲ့ စာတန်းတွေ ကိုင်ဆောင်ကာ ဖော်ထုတ်ခဲ့ကြပါတယ်။

Source: Africa News

CNI International Article

၂၀၂၃ ခုနှစ်၊ မေလ ၂၁

ပြီးခဲ့သည့် သီတင်းပတ်တွင် ထိုင်းနိုင်ငံ၏ အထွေထွေရွေးကောက်ပွဲကို အောင်မြင်စွာ ကျင်းပနိုင်ခဲ့သည်။

ရွေးကောက်ပွဲ ရလဒ်နှင့်ပတ်သက်၍ တရားဝင် ထုတ်ပြန်ကြေညာခြင်း မရှိသေးသော်လည်း ထွက်ပေါ်လာသော အချက်အလက်များအရ Move Forward Party(MFP)ပါတီက လွှတ်တော်နေရာ အများစုကို အနိုင်ရရှိခဲ့ သည်မှာ ထင်ရှားသည်။

တခြားပါတီ ၅ ခုနှင့် ပူးပေါင်းမည်ဟု MFP ဘက်က ထုတ်ပြန် ကြေညာထားသောကြောင့် ၎င်းတို့အနေဖြင့် နေရာ ၅၀၀ ရှိသော အောက်လွှတ်တော်တွင် ၃၀၉ နေရာအထိ စုစည်းနိုင်မည်လည်း ဖြစ်သည်။

ရွေးကောက်ပွဲတွင် MFP ပါတီက နေရာအများစုကို အနိုင်ရယူခြင်းဖြင့် အားလုံးအတွက် အံ့သြသင့်ဖွယ် ဖန်တီး နိုင်ခဲ့သော်လည်း ပါတီခေါင်းဆောင် ပီတာလင်ဂျာရိုရန်ရတ်အား ဝန်ကြီးချုပ်အဖြစ် ခန့်အပ်ရေးကတော့ လွယ်ကူ မည့် အနေအထားမျိုးတွင် ရှိမနေချေ။

ဘုရင်စနစ်ကို ထောက်ခံသော၊ စစ်တပ်ကို လိုလားသော ခန့်အပ်ခံ အထက်လွှတ်တော်နေရာ ၂၅၀ နှင့် အောက် လွှတ်တော်တို့က ဝန်ကြီးချုပ်သစ် မည်သူမည်ဝါ ဖြစ်လာမည်လဲ ဆိုသည်ကို ရွေးချယ်ခွင့် ရှိနေခြင်းကြောင့် ဖြစ် သည်။

စိတ်ဝင်စားဖွယ် ကောင်းလာသော ထိုင်းနိုင်ငံရေးလောက၏ ရွေးကောက်ပွဲလွန်ကာလ ဖြစ်လာနိုင်ဖွယ်ရှိသည့် အခြေအနေများကို လေ့လာကြည့်မယ်ဆိုလျှင် အောက်ပါအတိုင်း မြင်တွေ့ရနိုင်သည်။

ဘုရင် မိသားစုကို တွေ့ရစဉ်

ပီတာ ဝန်ကြီးချုပ်ဖြစ်လာခြင်း
**********************

ဝန်ကြီးချုပ်သစ် ခန့်အပ်ရန်အတွက် နေရာပေါင်း ၇၅၀ ရှိသော ထိုင်းအမျိုးသားလွှတ်တော်မှ ထောက်ခံမဲ အနည်း ဆုံး ၃၇၆ လိုအပ်မည် ဖြစ်သည်။

ထိုအခြေအနေတွင် MFP အနေဖြင့် ပီတာအား ဝန်ကြီးချုပ် အသစ်အဖြစ် တင်မြောက်ရန်အတွက် နောက်ထပ် ထောက်ခံမှု အနည်းဆုံး ၆၇ ဦးကို ရရှိရန် မဖြစ်မနေ ဆောင်ရွက်ရမည် ဖြစ်သည်။

ယင်းမှသာ အာဏာရညွှန့်ပေါင်း အဖွဲ့အနေဖြင့် မစ္စတာပီတာ ဦးဆောင်သော အများစုအစိုးရ တစ်ရပ်ကို ဖွဲ့စည်း နိုင်မည်ဖြစ်သည်။

ပရာယွတ် ဝန်ကြီးချုပ်အဖြစ် ဆက်ရှိနေခြင်း
*********************************

တော်ဝင်မိသားစုနှင့် ပတ်သက်သော ဥပဒေကို ပြင်ဆင်သွားမည်ဟု MFP က ကတိပြုထားသည်။

ထိုဥပဒေ၌ ဘုရင်၊ မိဘုရား၊ တော်ဝင်မိသားစုနှင့် ဆက်စပ်နေသည်များကို စော်ကားမော်ကား ပြောဆို လုပ်ဆောင် ခြင်းကို ရာဇဝတ်မှုအဖြစ် ပြဋ္ဌာန်းထားပြီး ထောင်ဒဏ် အများဆုံး ၁၅ နှစ်အထိ အပြစ်ပေးရန် သတ်မှတ်ထားသည်။

MFP ၏ ကတိစကားသည် တော်ဝင်မိသားစုနှင့် ပတ်သက်၍ ခိုင်မာသော သဘောထားရှိသည့် လွှတ်တော်အမတ် များနှင့် ကိုက်ညီမှု ရှိမနေပေ။

ထို့ကြောင့် လွှတ်တော်အမတ်များ အနေဖြင့် လက်ရှိအချိန်တွင် အိမ်စောင့်အစိုးရ ဝန်ကြီးချုပ်အဖြစ် တာဝန်ယူ ထားသော ဝန်ကြီးချုပ် ပရာယွတ် ချန်အိုချာအား ဝန်ကြီးချုပ် အသစ်အဖြစ် ထပ်မံတင်မြှောက်ရေး ရွေးချယ် လာဖွယ် ရှိနေသည်။

ထိုင်းစစ်တပ် အကြီးအကဲဟောင်းဖြစ်သူ ပရာယွတ်သည် အရပ်သား အစိုးရကို ဖြုတ်ချရေး အာဏာသိမ်းမှုကို ဦးဆောင်ခဲ့သူဖြစ်ပြီး ထိုအချိန်ကတည်းက ထိုင်းနိုင်ငံကို ဦးဆောင်ခဲ့သူ ဖြစ်သည်။

ထို့အပြင် ၎င်းသည် United Thai Nation (UTN) ပါတီ၏ ဝန်ကြီးချုပ်လောင်းအဖြစ် ရွေးကောက်ပွဲကို ဝင်ရောက် ယှဉ်ပြိုင်ခဲ့သူလည်း ဖြစ်သည်။

အစောပိုင်း ရလဒ်များအရ UTN သည် မဲဆန္ဒနယ် ၂၃ ခု အပါအဝင် နေရာ ၃၆ ခုကို အနိုင်ရရှိခဲ့သည်။

ထို့ကြောင့် UNT ပါတီအနေဖြင့် အောက်လွှတ်တော်တွင် အနည်းဆုံးနေရာ ၉၀ ခန့်ရှိနိုင်မည့် ၎င်းတို့နှင့် တူညီသော သဘောထားရှိသည့် တခြားပါတီများကို ဆွဲဆောင်နိုင်မည်ဆိုလျှင် လွှတ်တော်၏ ထောက်ပံ့မှုနှင့်အတူ ပရာယွတ် အား ဝန်ကြီးချုပ်အဖြစ် တင်မြှောက်နိုင်မည့် အလားအလာ ရှိနေသည်။

ထိုသို့ဆိုလျှင်ပင် ပရာယွတ်အနေဖြင့် တခြားပါတီများ၏ စုစုပေါင်း အမတ် အရေအတွက်ထက် အမတ်ဦးရေ ပိုနည်းသော အစိုးရကိုသာ ဖွဲ့စည်းနိုင်မည်ဖြစ်သည်။

ထိုသို့သော လူနည်းစုအစိုးရသည် ရေရှည်တွင် တည်ငြိမ်မှု ထိန်းသိမ်းနိုင်ရန် ခက်ခဲမှုများနှင့် ရင်ဆိုင်ရနိုင်သည်။

ဥပဒေများပြဋ္ဌာန်းရေးတွင် အစိုးရအနေဖြင့် လုပ်နိုင်စွမ်းမရှိခြင်း သို့မဟုတ် တစ်စုံတစ်ခုကို အတည်ပြုရန်အတွက် တခြားသူများနှင့် ရှုပ်ထွေးသော ဆွေးနွေးညှိနှိုင်းမှုများကို မှီခိုနေရခြင်းကြောင့် ဖြစ်သည်။

ညွန့်ပေါင်းအစိုးရ ဖွဲ့ဖို့ သဘောတူထားသည့် ပါတီများကိုတွေ့ရစဉ်

ပီတာအား လွှတ်တော်အမတ်ဖြစ်ရန် မသင့်တော်ဟု ဆုံးဖြတ်ခြင်း
***********************************************

ပီတာသည် ယခုတွင် ပျောက်ကွယ်သွားပြီဖြစ်သော မီဒီယာကုမ္ပဏီတစ်ခုတွင် ရှယ်ယာများကို တရားမဝင် ပိုင်ဆိုင် ထားသည်ဟု Palang Pracharath ပါတီမှ ကွန်ဆာဗေးတစ် နိုင်ငံရေးသမား တစ်ဦးဖြစ်သူ ရန်ကရိုင် လီကွစ်ဝတ် တာနာက စွပ်စွဲထားသည်။

ရှယ်ယာများကို ကွယ်လွန်သွားခဲ့ပြီဖြစ်သော ဖခင်ဖြစ်သူ၏ သဘောဆန္ဒအတိုင်း သေတမ်းစာအရသာ ပိုင်ဆိုင် ထားခြင်း ဖြစ်သည်ဟု ပီတာက ပြန်လည် ရှင်းပြထားသည်။

ထိုင်းနိုင်ငံ၏ ရွေးကောက်ပွဲကော်မရှင်သည် ထိုရှယ်ယာကိစ္စအပြင် တနင်္ဂနွေနေ့ ရွေးကောက်ပွဲ မတိုင်ခင် ၎င်းတို့ ရရှိထားသော တခြားတိုင်ကြားမှုများကို စုံစမ်းစစ်ဆေးမှု လုပ်ဆောင်သွားရန် တာဝန်ရှိသည်။

ထိုစုံစမ်းစစ်ဆေးမှုများသည် နှစ်လနီးပါး ကြာမြင့်နိုင်သည်ဟု ခန့်မှန်းရပြီး စစ်ဆေးမှုများအတွင်း အမှန်တကယ် ပြစ်မှုထင်ရှားကြောင်း တွေ့ရှိခဲ့မည်ဆိုလျှင် ပီတာအနေဖြင့် လွှတ်တော်အမတ်အဖြစ် ဆောင်ရွက်ရန် အရည် အချင်း မပြည့်မီဟု သတ်မှတ်ခံရမည် ဖြစ်သည်။

ထိုသို့ဖြစ်လျှင် ယင်းနှင့်ပတ်သက်၍ MFP ပါတီအား မည်သို့မည်ပုံ သက်ရောက်မှု ရှိလာမည်တော့ ကွဲကွဲပြားပြား မသိရသေးပေ။

ပရာယွတ်ကို တွေ့ရစဉ်

Move Forward ပါတီအား ဖျက်သိမ်းခြင်း
*******************************

ရွေးကောက်ပွဲတွင် နေရာအများစုကို အနိုင်ရရှိခဲ့သည့် Move Forward ပါတီအား ဖျက်သိမ်းရန်ကိစ္စမှာ ဖြစ်လာ နိုင်မည်မဟုတ်ဟု ယူဆ၍ရသော်လည်း ထိုင်း၏ နိုင်ငံရေး သမိုင်းကြောင်းအရ ယင်းကိုပင် ယတိပြတ် ငြင်းဆို၍ မရနိုင်သေးပေ။

သမိုင်းကြောင်းအရ လက်ရှိ ဖြူးထိုင်းပါတီ၏ ပါတီဟောင်းနှစ်ခုဖြစ်သော ထိုင်းရတ်ထိုင်း(Thai Rak Thai)ပါတီနှင့် ပြည်သူ့အင်အား(People’s Power)ပါတီတို့သည် ရွေးကောက်ပွဲတွင် အနိုင်ရရှိခဲ့ပြီးနောက် မဲသမာမှု လုပ်ဆောင်ခဲ့ သည်ဆိုသော စွပ်စွဲချက်များဖြင့် ဖျက်သိမ်းခြင်း ခံခဲ့ရသည်။

MFP ပါတီ၏ ပါတီဟောင်းဖြစ်သော Future Forward ပါတီသည်ပင် ချေးငွေကိစ္စတစ်ခုကြောင့် ၂၀၂၀ ခုနှစ်တွင် ဖျက်သိမ်းခြင်း ခံခဲ့ရသည်။

ပါတီခေါင်းဆောင်ဖြစ်သူက ပါတီထံ ပေးခဲ့သော ချေးငွေသည် တရားမဝင် လှူဒါန်းမှု ဖြစ်သည်ဟု ဖွဲ့စည်းပုံ အခြေခံ ဥပဒေဆိုင်ရာ တရားရုံးက ဆုံးဖြတ်ခဲ့ခြင်းကြောင့် ဖြစ်သည်။

လက်ရှိ အချိန်အထိ MFP ပါတီအား ဖျက်သိမ်းရသည်အထိ ဖြစ်စေနိုင်သော တိကျသေချာသည့် စွပ်စွဲချက်မျိုး ရှိမနေသည့်တိုင် ထိုင်းနိုင်ငံရေး အစဉ်အလာအရ ပါတီဖျက်သိမ်းခံရမည့်ကိစ္စကို လုံးဝမေ့ထား၍ မရသေးဟု လေ့လာသူများက သုံးသပ်သည်။

မည်သို့ပင်ဆိုစေကာမူ ပါတီတစ်ခုအား ဖျက်သိမ်းခဲ့မည်ဆိုလျှင် ယင်းက Future Forward ပါတီ ဖျက်သိမ်း ခံခဲ့ရသည့် ၂၀၂၀ ခုနှစ်တွင်ကဲ့သို့ ပြည်သူများ၏ လမ်းပေါ်ထွက် ဆန္ဒပြပွဲများကို ပေါ်ပေါက်လာစေလိမ့်မည် ဟုလည်း ယူဆရမည် ဖြစ်သည်။

Source: Straits Times

CNI Sport Article

၂၀၂၃ ခုနှစ်၊ မေလ ၂၁

ရိုးမားအသင်းဟာ ပြီးခဲ့တဲ့ရက်ပိုင်းက ကစားခဲ့တဲ့ ယူရိုပါလိဂ် ဆီမီးဖိုင်နယ် ဒုတိယအကျော့ ပွဲစဉ်မှာ လေဗာကူ ဆင် အသင်းနဲ့ ဂိုးမရှိ သရေကစားပြီး နှစ်ကျော့ပေါင်း ရလဒ် ၁ ဂိုး- ဂိုးမရှိနဲ့ အနိုင်ရကာ ယူရိုပါလိဂ် ဗိုလ်လုပွဲကို တက်လှမ်းသွားခဲ့ပါတယ်။

ဒါဟာ မော်ရင်ဟိုရဲ့ လက်အောက်မှာ ရိုးမားအသင်း ဥရောပပြိုင်ပွဲတွေရဲ့ ဗိုလ်လုပွဲကို ၂ နှစ် ဆက်တိုက် တက်နိုင် ခဲ့တာပဲ ဖြစ်ပါတယ်။

စပါယ်ရှယ်ဝမ်းလို့ လူသိများတဲ့ မော်ရင်ဟိုဟာ ရိုးမားအသင်းကို ပထမဆုံး ကိုင်တွယ်တဲ့ ရာသီမှာ ယူရိုပါ ကွန်းဖရန့်စ်လိဂ် ချန်ပီယံဆုကို ရယူပေးနိုင်ခဲ့တာ ဖြစ်ပါတယ်။

ရိုးမားအသင်းဟာ ဒီပြိုင်ပွဲရဲ့ ပထမဆုံး ချန်ပီယံအသင်း အဖြစ်လည်း မှတ်တမ်း တင်နိုင်ခဲ့တာပါ။ မော်ရင်ဟို ရိုးမား အသင်းကို မရောက်ခင်တုန်းက ဥရောပဖလားပြိုင်ပွဲတွေရဲ့ ဗိုလ်လုပွဲနဲ့ နှစ်ပေါင်း ၃၀ ကျော်ကြာ ဝေးကွာခဲ့ပြီး ဆု ဖလား ရခဲ့တာကတော့ ၁၉၆၀-၆၁ ရာသီက ဖြစ်ပါတယ်။

အခုတော့ ရိုးမားအသင်းဟာ ဥရောပပြိုင်ပွဲတွေရဲ့ ဗိုလ်လုပွဲကို ၂ နှစ်ဆက်တောင် တက်ရောက်နိုင်ခဲ့ပြီ ဖြစ်ပါ တယ်။

ဒါဟာ မော်ရင်ဟိုရဲ့ သက်ရောက်မှုဖြစ်ပြီး ပေါ်တူဂီ လူမျိုးနည်းပြဟာ သူကိုင်တွယ်ခဲ့တဲ့ အသင်းတွေက တချို့ကို ဥရောပပြိုင်ပွဲတွေမှာ အောင်မြင်မှုရအောင် ကိုင်တွယ်နိုင်ခဲ့တဲ့ ဂုဏ်ပုဒ်မျိုးကို ရိုးမားအသင်းမှာ ဆက်ပြီး လုပ်ပြ နေခဲ့တာပါ။

ရိုးမားအသင်း အောင်ပွဲခံနေကြစဉ်

ဒါတောင် မော်ရင်ဟိုဟာ ကစားသမားတွေ ဝယ်ယူဖို့ ရိုးမားအသင်းက ဘတ်ဂျတ် အလုံအလောက် ချပေးခြင်းကို မခံခဲ့ရဘဲ စွမ်းဆောင် ပြနေခြင်း ဖြစ်ပါတယ်။

ဒါပေမယ့် မော်ရင်ဟိုဟာ နာမည်ကြီး ကစားသမားတွေကို အလွတ်နဲ့ အသင်းဆီ လာရောက်အောင် ဆွဲဆောင်နိုင် ခဲ့တာပါ။

ဒါကတော့ ဒိုင်ဘားလား၊ မာတစ်၊ ဘယ်လော့တီတို့ဖြစ်ပြီး ပီအက်စ်ဂျီ ကွင်းလယ်ကစားသမား ဝစ်ချ်နယ်လ်ဒန်း ကိုလည်း အသင်းမှာ အငှားနဲ့ လာရောက်ကစားအောင် ခေါ်ယူနိုင်ခဲ့ပါတယ်။ မော်ရင်ဟိုဟာ ရှိတဲ့အသင်း လူ အင်အားကို လူငယ် ကစားသမားတွေနဲ့ ပေါင်းစပ်ပြီး အောင်မြင်မှု လမ်းကြောင်းပေါ် ရောက်အောင် တည်ဆောက် ပေးနေခဲ့တာပါ။

လက်ရှိ ရိုးမားအသင်းမှာ ရှိနေတဲ့ ကစားသမားတွေဟာ မော်ရင်ဟို အတွက်ဆို အသေခံပြီး တိုက်ပွဲဝင်မယ့် သူတွေ လည်း ဖြစ်ပါတယ်။

အခြား သူကိုင်တွယ်ခဲ့တဲ့ အသင်းတွေမှာလည်း မော်ရင်ဟိုအတွက် နေရာပြောင်းပြီးတောင် ကစားပေးတဲ့ သူတွေ အများကြီး ရှိခဲ့တာပါ။

ဒါတွေက နည်းပြလောကမှာ မော်ရင်ဟို အောင်မြင်ခဲ့တဲ့ အကြောင်းအရာတွေဖြစ်ပြီး သူကလည်း ကစားသမား တွေ သူ့အတွက် ကစားပေးချင်စိတ်ရှိအောင် ပြုလုပ်တတ်တာ ဖြစ်ပါတယ်။

ပြီးခဲ့တဲ့ လေဗာကူဆင်နဲ့ပွဲမှာ မော်ရင်ဟိုဟာ အသင်းအတွက် အနစ်နာခံပြီး ကစားပေးခဲ့တဲ့ ကစားသမားတွေကို ချီးကျူးမှု ပြုလုပ်သွားခဲ့တာပါ။

ရိုမားအသင်းသားတွေနဲ့ မော်ရင်ဟိုကို တွေ့ရစဉ်

ရိုးမားအသင်းဟာ အရင်က တော့တီတို့ လက်ထက်မှာ နာမည်ကျော်ခဲ့ပေမယ့် နောက်ပိုင်းမှာ အောင်မြင်မှုတွေ လည်း မရတော့လို့ အသင်းပုံရိပ်တွေဟာ ကျဆင်းလာခဲ့ပြီး ဥရောပမှာလည်း ဘာမှမဟုတ်တော့တာ ဖြစ်ပါတယ်။

ဒါပေမယ့် မော်ရင်ဟို ရောက်လာပြီးချိန်မှာ သူ့ရဲ့ပုံရိပ်နဲ့အတူ ရိုးမားအသင်းရဲ့ ပုံရိပ်ကလည်း တဟုန်ထိုး တိုးတက် လာတော့တာပါ။

မော်ရင်ဟိုဟာ စပါးအသင်းက လွဲပြီး သူကိုင်တွယ်တဲ့ အသင်းတိုင်းမှာ ဆုဖလားရအောင် ကိုင်တွယ်တက်တဲ့ အစဉ်အလာကို ရိုးမားအသင်းမှာလည်း ဆက်ထိန်းခဲ့ပြီး ဥရောပမှာလည်း ၂ နှစ်ဆက်တိုက် ချန်ပီယံဆု ရရှိအောင် ကိုင်တွယ်ပေးဖို့ လက်တစ်လှမ်းအကွာကို ရောက်ရှိလာခဲ့ပါတယ်။

ပေါ်တူဂီလူမျိုး အနေနဲ့ ရိုးမားအသင်းအတွက် ယူရိုပါလိဂ်ဖလားသာ ရယူပေးနိုင်ခဲ့မယ်ဆိုရင် အီတလီကလပ်ရဲ့ ဂန္တဝင်အဖြစ် သတ်မှတ်ခံရနိုင်ပေမယ့် သူကတော့ ဒီအရာထက် အသင်းကို အောင်မြင်မှုနဲ့ ပရိသတ်တွေကို ဆု ဖလားနဲ့အတူ ပျော်ရွှင်စေချင်တဲ့ ခံစားချက်တွေသာ ရရှိစေလိုတယ်လို့ ယူရိုပါလိဂ် ဗိုလ်လုပွဲ တက်အပြီးမှာ ပြော ထားပါတယ်။

မော်ရင်ဟိုကို တွေ့ရစဉ်

မော်ရင်ဟိုဟာ ပြီးခဲ့တဲ့နှစ်က ယူရိုပါကွန်းဖရန့်စ်လိဂ် ရယူပြီးချိန်မှာ မျက်ရည်ကျခဲ့သလို၊ အခုလည်း ယူရိုပါလိဂ် ဗိုလ်လုပွဲအပြီးမှာ မျက်ရည် ကျနေခဲ့တာက ရိုးမားအသင်းကို အောင်မြင်မှု ဘယ်လောက်အထိ ရစေချင်လဲဆိုတာ ကို ပေါ်လွင်စေတာပါ။

ဒါပေမယ့် ရိုးမားအသင်းရဲ့ ဘတ်ဂျက် သုံးစွဲမှုအပေါ် မော်ရင်ဟိုက ဝေဖန်မှုတွေ မကြာခဏ ဆိုသလို ပြောနေသလို လက်ရွေးစင်အသင်းတွေနဲ့ ပီအက်စ်ဂျီအသင်းတို့ရဲ့ ချိတ်ဆက်မှုတွေကြောင့် အီတလီကလပ်ကို စွန့်ခွာသွားနိုင်တဲ့ အရိပ် အယောင်တွေလည်း ရှိနေတာ ဖြစ်ပါတယ်။

မော်ရင်ဟိုကတော့ ဒီသတင်းတွေကို ငြင်းဆန်ထားပေမယ့် သူရှိနေတဲ့ အချိန်မှာ ရိုးမားအသင်းကို ဥရောပရဲ့ အသင်းကြီး တစ်သင်းဖြစ်အောင် တည်ဆောက်ပေးနေပြီး ရောမမြို့အထက်မှာ ဥရောပဆုဖလားကြီးနဲ့ နောက် တစ်ကြိမ်ထပ်ပြီး အောင်ပွဲခံနိုင်အောင် နည်းဗျူဟာတွေ ချမှတ်နေပြီလည်း ဖြစ်ပါတယ်။

CNI International Article

၂၀၂၃ ခုနှစ်၊ မေလ ၁၄

ပါကစ္စတန် တာဝန်ရှိသူများက ယခုသီတင်းပတ် အစောပိုင်းတွင် အကျင့်ပျက် ခြစားမှု စွပ်စွဲချက်ဖြင့် ဝန်ကြီးချုပ်ဟောင်း အီမရန်ခမ်းအား ဖမ်းဆီးထိန်းသိမ်း လိုက်သည်။

ထိုထိန်းသိမ်းမှုပြီးနောက် ပါကစ္စတန်နိုင်ငံ တစ်ဝန်းတွင် လမ်းပေါ်ထွက် အကြမ်းဖက် ဆန္ဒပြမှုများစွာ ပေါ်ပေါက်ခဲ့ ပြီး ထိုဖြစ်ရပ်များက အခြေအနေတစ်ခု၌ ခမ်းအား ထောက်ခံသူများ အနေဖြင့် အင်အားကြီးမားသော လူစုလူဝေး တစ်ခု ဖြစ်ပေါ်လာစေရန် မည်သို့စုစည်း ဆောင်ရွက်နိုင်သည်ကို ဖော်ပြနေသည်။

ဝန်ကြီးချုပ်အား ထိန်းသိမ်းပြီး နာရီပိုင်း အကြာတွင်ပင် ၎င်းအား ထောက်ခံသူများသည် မော်တော်ယာဉ်များ၊ အဆောက်အဦများကို မီးရှို့ခြင်း၊ ရဲတပ်ဖွဲ့နှင့် စစ်တပ် အဆောက်အဦများကို တိုက်ခိုက်ခြင်းတို့ဖြင့် အသက် ၇၀ အရွယ် ဝန်ကြီးချုပ်ဟောင်းအပေါ် တာဝန်ရှိသူများ၏ ဆက်ဆံပုံနှင့် ပတ်သက်သည့် ၎င်းတို့၏ ဒေါသကို ဖော်ပြ ခဲ့ကြသည်။

ခမ်းအား ထောက်ခံသူများသည် ကြီးမားသော အင်အားတစ်ရပ်အဖြစ် ပေါ်ထွက်လာခဲ့ကာ အစိုးရနှင့် စစ်တပ် အာဏာပိုင်များအတွက် စိန်ခေါ်မှုတစ်ခု ဖြစ်စေခဲ့သည်။

ထို့အပြင် ၎င်းတို့သည် ဖိအားပေးခြင်းဖြင့် နိုင်ငံရေး အခြေအနေကို ပြောင်းလဲနိုင်စွမ်းရှိသည် ဆိုခြင်းကိုလည်း ပြသခဲ့ကြသည်။

အီမရန်ခမ်း ဖမ်းခံရလို့ ထောက်ခံသူများက အကြမ်းဖက် ဆန္ဒပြကြစဉ်

လက်ရှိ အချိန်တွင် ခမ်းအား ထိန်းသိမ်းထားရာမှ ပြန်လွှတ်ပေးခဲ့ပြီ ဖြစ်သော်လည်း ခမ်းအား ထောက်ခံသူများ အနေဖြင့် လမ်းမများပေါ်တွင် ဆက်ရှိကာ အစိုးရကို ကန့်ကွက်မှုများ ဆက်လုပ် နေဦးမည် ဆိုသည်မှာလည်း သေချာနေသည်။

ထို့ကြောင့် ၎င်းတို့အနေဖြင့် မည်သူများ ဖြစ်သည်နှင့် မည်သည့် အရာက ၎င်းတို့အား အားကောင်း၍ စိန်ခေါ်နိုင် စွမ်းရှိသော အင်အားတစ်ရပ် ဖြစ်စေသည်ဆိုခြင်းက စိတ်ဝင်စားဖွယ် ကောင်းနေသည်။

ခမ်းသည် ပါကစ္စတန်နိုင်ငံအတွက် စူပါစတားတစ်ဦး ဖြစ်သည်။ အားကစားသမားတစ်ဦး အနေဖြင့် ၎င်းသည် ပါကစ္စတန်အား ၁၉၉၂ ခုနှစ် ခရစ်ကတ် ကမ္ဘာ့ဖလားပြိုင်ပွဲတွင် အောင်ပွဲရရှိစေရန် ဦးဆောင်မှု ပေးခဲ့သူ ဖြစ်သည်။

ခရစ်ကတ်သည် ပါကစ္စတန်တွင် လူကြီးလူငယ်မရွေး ကြိုက်ကြသည့် အားကစားနည်း တစ်မျိုးဖြစ်သောကြောင့် ကမ္ဘာ့ဖလား အောင်မြင်မှုသည် ခမ်းအတွက် နိုင်ငံရေးလောကအတွင်းသို့ မဝင်ရောက်ခင်ကပင် လူသန်းပေါင်းများ စွာအတွက် သူရဲကောင်းအဖြစ် ရှိနေစေခဲ့သည်။

ခမ်းသည် ပါကစ္စတန်၏ ပထမဆုံးသော ကင်ဆာဆေးရုံကို တည်ထောင်ခဲ့ကာ သူ၏ အမေနာမည်အား အစွဲပြုစေခဲ့သည်။

၎င်းသည် ပရဟိတ လုပ်ငန်းများ လုပ်ဆောင်ခြင်းအတွက်လည်း အထူးထင်ရှားသည်။ အကျင့်ပျက် ခြစားမှုများဖြင့် ကာလရှည် ရင်ဆိုင်ခဲ့ရသော ပါကစ္စတန်ပြည်သူများအတွက် ခမ်း၏ အကျင့်ပျက်ခြစားမှု တိုက်ဖြတ်ရေး သဘော ထားမှာ သည်းခြေကြိုက် ဖြစ်စေခဲ့သည်။

ခမ်းအား ပြည်သူများအပေါ် ယုံကြည်ကိုးစားမှုသည် ၎င်း၏ အနောက်နိုင်ငံများအပေါ် ထားရှိသည့် သဘောထား နှင့်လည်း သက်ဆိုင်နေသည်။ ခမ်းက ၎င်းသည်သာလျှင် အနောက်အုပ်စုကို ယှဉ်ပြိုင်နိုင်သည့် တစ်ဦးတည်းသော ခေါင်းဆောင် ဖြစ်သည်ဟု ပြောခဲ့ဖူးသည်။

အမေရိကန်ကို ရည်ညွှန်းခြင်း ဖြစ်သည်။ ပြည်တွင်းရေး အကြောင်းအရာများတွင် နိုင်ငံခြားမှ ကြားဝင်စွက်ဖက်မှု များပြားရာ ပါကစ္စတန်တွင် ခမ်း၏ ပြောစကားသည် အထူးလူကြိုက်များသည့် အကြောင်းအရာ တစ်ခုလည်း ဖြစ်သည်။

ထိုအကြောင်းအရာများကြောင့် ခမ်းသည် လူတန်းစား အလွှာအသီးသီးကို လွှမ်းမိုးထားနိုင်သူ ဖြစ်သည်။

အီမရန်ခမ်း ခရစ်ကတ် ကစားသမားဖြစ်ခဲ့စဉ်က ဆုဖလားရအောင်လုပ်ပေးခဲ့စဉ်

၎င်းအား ထောက်ခံသူများတွင် ပါကစ္စတန်၏ ပင်မနိုင်ငံရေး အင်အားစုနှစ်ခုဖြစ်သော ရှရစ်ဖ်၊ ဘူတို စသည်တို့နှင့် လုံးဝ ပတ်သက်မှုမရှိသော ပညာတတ် ပါကစ္စတန် လူငယ်များလည်း ပါဝင်သည်။

ထိုမျှမက ခမ်း၏ လွှမ်းမိုးမှုသည် လူမှုကွန်ယက် သို့မဟုတ် အင်တာနက် အသုံးပြုနိုင်ခြင်း မရှိသည့် ကျေးလက် ဒေသများမှ ပညာမတတ်သူများနှင့် ရွှေ့ပြောင်း နေထိုင်သူများ အပေါ်တွင်လည်း လွှမ်းခြုံမှု ရှိသည်။

နိုင်ငံတွင်းရှိ အထက်တန်းလွှာများနှင့် မထူးမခြားနား အခြေအနေအပေါ် စိန်ခေါ်သည့် ခမ်း၏ ပြောစကားများက ထိုလူတန်းစားများကို ညီညွတ်စေခဲ့သည်။

၎င်းသည် ထောက်ခံသူများ၏ စိတ်ကိုလည်း လှုံ့ဆော်မှု ပေးနိုင်ခဲ့သူဖြစ်ကာ ခမ်း၏ လူထုစုဝေးပွဲတိုင်းကို ကျား/မ၊ လူကြီး၊ လူငယ်မရွေးတို့က မိုင်ချီသွားရောက်ရလျှင်ပင် တက်ရောက်လေ့ ရှိကြသည်။

အသက် ၂၀ နှင့် ၃၀ အရွယ် လူငယ်များက ၎င်းအပေါ် ထောက်ခံခြင်းသည် ခမ်း၏ PTI ပါတီ လူမှုကွန်ယက် အပေါ် လွှမ်းမိုးမှုကြောင့် ဖြစ်သည်။ အထူးသဖြင့် တွစ်တာတွင် ဖြစ်သည်။ အီမရန်ခမ်း၏ ထောက်ခံသူ အများစုမှာ ပန်ဂျပ် နှင့် ခါဘာပတ်ရှ်တွန်ခွာ ပြည်နယ်များမှ ဖြစ်သည်။

ခမ်းအား ဖမ်းဆီးမှုကြောင့် ဖြစ်ပွားခဲ့သော အကြမ်းဖက် ဆန္ဒပြမှုများတွင် ပါကစ္စတန် အာဏာပိုင်များက တက်ကြွ လှုပ်ရှားသူများစွာနှင့် ခမ်း၏ PTI ပါတီတို့မှ ခေါင်းဆောင်များစွာကို ဖမ်းဆီးထိန်းသိမ်းခဲ့သည်။

ထိုသို့ ဖမ်းဆီး ထိန်းသိမ်းမှုများရှိသည့် တိုင်ယင်းက ခမ်းအား ထောက်ခံသူများအတွက် အဟန့်အတား မဖြစ်ခဲ့ပေ။

၎င်းတို့အနေဖြင့် ပါတီခေါင်းဆောင် ခမ်းအား ထိခိုက်စေမည့် အရာများကို ခွင့်မပြုကြောင်းပြောကာ ၎င်းအား ဖမ်း ဆီးသည့် ကိစ္စတွင် ၎င်းတို့ သတ်မှတ်ထားသည့် နောက်ဆုံးစည်းကို ကျော်လွန်သည့် မည်သူ့ကိုမဆို လက်တုံ့ပြန် သွားမည်ဟု ကြိမ်းဝါးထားသည်။

ယခုသီတင်းပတ်တွင် ပေါ်ပေါက်ခဲ့သော အကြမ်းဖက် ဆန္ဒပြမှုများသည် ၂၀၀၇ ခုနှစ် နောက်ပိုင်း ပထမဆုံးဖြစ်သည်။

အမေရိကန် သမ္မတဟောင်း ဒေါ်နယ်ထရမ့်နဲ့ အီမရန်ခမ်းကိုတွေ့ရစဉ်

၂၀၀၇ ခုနှစ် ထိုစဉ်က ဝန်ကြီးချုပ် ဘနာဇီယာဘူတို လုပ်ကြံ သတ်ဖြတ် ခံခဲ့ရပြီးနောက် သူမကို ထောက်ခံသူများ က ယခုကဲ့သို့ အကြမ်းဖက်မှုများကို ရက်အတန်ကြာ လုပ်ဆောင်ခဲ့သည်။

လက်ရှိအချိန်တွင် လူမှုကွန်ယက်နှင့် မိုဘိုင်း အင်တာနက် အသုံးပြုမှုတို့ကို ပါကစ္စတန် အာဏာပိုင်များဘက်က ကန့်သတ်ထားသော်လည်း ယင်းက ခမ်းအား ထောက်ခံသူများ အချိန်တိုအတွင်း ရာထောင်ချီ စုစည်းနိုင်မှုကိုတော့ မတားဆီးနိုင်ခဲ့ပေ။

ခမ်းအား ဖမ်းဆီးရာမှ စတင်ခဲ့သည့် နိုင်ငံရေး မတင်မကျ အခြေသည် ပါကစ္စတန်အစိုးရကို သာမက လုံခြုံရေး တပ်ဖွဲ့များနှင့် တရားစီရင်ရေ စနစ်တို့ကိုပါ ခက်ခဲသော အခြေအနေသို့ ရောက်ရှိစေခဲ့သည်။

လက်ရှိအချိန်ထိ ခမ်းအား ထောက်ခံသူများက ပါကစ္စတန်အား ရပ်တန့်သွားသည်အထိ လုပ်ဆောင်ခြင်း မရှိသေး သော်လည်း ၎င်းတို့က နေ့စဉ်ဘဝများကို ထိခိုက်စေလျက်ရှိသည်။

ပညာရေး အဖွဲ့အစည်းများ ယာယီ ပိတ်ထားရခြင်းနှင့် အပြင်မထွက်ရခြင်းကြောင့် စားသုံးသူများ၏ သုံးစွဲမှုများ လည်း ကျဆင်းလာသည်။

အုပ်ချုပ်ရေးသည်လည်း ရပ်တန့်သွားခဲ့ကာ စက်မှုလုပ်ငန်းများ နှေးကွေးလာခြင်းအပြင် မိုဘိုင်း အင်တာနက်များ ကို ပိတ်ထားရခြင်းကြောင့် အစားအစာ ပို့ဆောင်ခြင်းနှင့် သယ်ယူပို့ဆောင်ရေးဆိုင်ရာ အဲပလီကေးရှင်းများ အတွက် အကျိုးသက်ရောက်မှုများစွာ ဖြစ်စေခဲ့သည်။

ခမ်းအား ဖမ်းဆီးခြင်းနှင့် ၎င်းအပေါ် အစိုးရဘက်က နှိပ်ကွပ်ရန် ကြံစည်ခြင်းတို့က ဝန်ကြီးချုပ်ဟောင်းအား ထောက်ခံ သူများကို ဆွပေးသကဲ့သို့ ဖြစ်စေကာ ၎င်းတို့အနေဖြင့် ခမ်းအား ကာကွယ်ရန်အတွက် ဘာမဆို လုပ်ဆောင်သွားရန် အသင့်ပြင်ဆင်ထားသည်ဟု ကြွေးကြော်ထားသည်။

Source: AP

CNI Sport Article

၂၀၂၃ ခုနှစ်၊ မေလ ၁၄

မြန်မာအမျိုးသမီး အသင်းကတော့ ကမ္ဘောဒီးယားမှာ ကျင်းပနေတဲ့ ဆီးဂိမ်းစ်ပြိုင်ပွဲမှာပဲ ထိုင်းအမျိုးသမီးအသင်း ကို ဆီမီးဖိုင်နယ်မှာ အနိုင်ရပြီး ဗိုလ်လုပွဲ တက်လှမ်းသွားခဲ့ပါပြီး။

ထိုင်းအသင်းကို ၂ ဂိုး- ဂိုးမရှိနဲ့ အရေးနိမ့်နေတာကနေ ၄ ဂိုး ပြန်သွင်းပြီး အရှုံးမပေးတဲ့ စိတ်ဓါတ်တွေ ပြသကာ ပြန်လာနိုင်ခဲ့တာလည်း ဖြစ်ပါတယ်။

တကယ်တော့ မြန်မာအမျိုးသမီး အသင်းကို ဒီအဆင့်ထိ ရောက်လာမယ်လို့ကို ဘယ်သူကမှ မျှော်လင့်ထားခြင်း မရှိပါဘူး။ ဒါက အုပ်စုတွင်း မဲခွဲမှုနဲ့ နောက်ဆုံး ကစားခဲ့တဲ့ ပွဲရလဒ်တွေကြောင့် မြန်မာအသင်းဟာ အုပ်စုတွင်းမှာ ဆို ကမ္ဘာ့ဖလားပြိုင်ပွဲဝင်မယ့် ဗီယက်နမ်၊ ဖိလစ်ပိုင်တို့နဲ့ တစ်အုပ်စုတည်း ကျနေတာကြောင့် အုပ်စုကနေ လှည့် ပြန် လာရမှာပဲလို့ တွေးထင်ခဲ့ကြတာပါ။

ပြီးတော့ ဒီပွဲမတိုင်ခင် ကစားခဲ့တဲ့ အိုလံပစ်ခြေစစ်ပွဲမှာ ကိုယ့်ထက် အဆင့်နိမ့်တဲ့ အီရန်အသင်းကို အိမ်ကွင်းမှာ တင် အရေးနိမ့်ခဲ့တာ ဖြစ်ပါတယ်။

ဒီအချက်တွေကြောင့် မြန်မာအမျိုးသမီးအသင်းကို ဆီးဂိမ်းစ်ပြိုင်ပွဲမှာ အိမ်ဖြည့် အဆင့်အနေနဲ့ သတ်မှတ်ခဲ့ကြ တာပါ။ အဲဒီအချိန်မှာ မြန်မာနိုင်ငံ ဘောလုံးအဖွဲ့ချုပ်က အလှည့်အပြောင်း တစ်ခုကို မြန်မြန် ပြုလုပ်ခဲ့ပါတယ်။

ဒါကတော့ ပြိုင်ပွဲယှဉ်ပြိုင်ဖို့ ရက်ပိုင်း နီးလာတဲ့ အချိန်မှာ မြန်မာအမျိုးသမီးအသင်း နည်းပြချုပ်အဖြစ် ဂျပန် လူမျိုးနည်းပြ တက်ဆူရိုကို ခန့်အပ်လိုက်တာပါ။

မြန်မာနဲ့ထိုင်း ယှဉ်ပြိုင်နေစဉ်

ဂျပန်လူမျိုးနည်းပြဟာ အသင်းကို အချက် ၂ ချက်သာ ပြင်ဆင်ဖို့ အချိန်ရခဲ့တယ်လို့ အုပ်စုပွဲ မတိုင်ခင် ပွဲကြို သတင်းစာ ရှင်းလင်းပွဲမှာ ပြောခဲ့ပါတယ်။

ဒါကတော့ အသင်းသားတွေ ကိုယ့်ကိုယ်ကို ယုံကြည်မှု ပြန်ရလာဖို့နဲ့ အသင်းရဲ့ အားသာချက်တွေကို ကောင်းမွန် စွာ အသုံးချနိုင်ဖို့လို့ ပြောခဲ့တာဖြစ်ပြီး ပွဲဦးထွက်ဖြစ်တဲ့ ဖိလစ်ပိုင်နဲ့ပွဲမှာတင် သူပြောခဲ့တဲ့ စကားကို အကောင် အထည် ဖော်နိုင်ခဲ့တာပါ။

ကိုယ့်ထက် အရပ်အမောင်းနဲ့ ကိုယ်ခန္ဓာကြီးမားတဲ့ ဖိလစ်ပိုင်အသင်းကို အကောင်းဆုံး ကစားသွားပြီး ပွဲပြီး ဆုံးချိန်မှာ သွင်းယူတဲ့ ပင်နယ်တီဂိုးနဲ့ အနိုင်ယူပြီး အုပ်စုအဖွင့် လှခဲ့တာ ဖြစ်ပါတယ်။ အစောပိုင်းက မြန်မာ အမျိုးသမီးအသင်းကို မယုံကြည်ခဲ့တဲ့ သူတွေကတောင် အသင်းကို ချီးကျူးမှုတွေ ပြုလုပ်ခဲ့ကြပါတယ်။

ဒုတိယပွဲမှာတော့ ဆီးဂိမ်းစ် လက်ရှိချန်ပီယံ ဗီယက်နမ်ကို အရေးနိမ့်ခဲ့ပါတယ်။

မြန်မာအမျိုးသမီး အသင်းနည်းပြဟာ အားလုံးကို တောင်းပန်ခဲ့ပြီး နောက်ပွဲအတွက် အာရုံစူးစိုက်မှု အပြည့်နဲ့ ပြင်ဆင်ခဲ့တာကြောင့် မလေးရှားအသင်းကို ဂိုးပြတ်အနိုင်ရပြီး ဆီမီးဖိုင်နယ်ကို တက်နိုင်ခဲ့ပါတယ်။ ဆီမီးဖိုင်နယ် မှာ ဆီးဂိမ်းစ်ပြိုင်ပွဲရဲ့ ဒုတိယ အအောင်မြင်ဆုံး အသင်းဖြစ်တဲ့ ထိုင်းအသင်းနဲ့ တွေ့ဆုံခဲ့ပါတယ်။

မြန်မာအမျိုးသမီး ကစားသမားများကို တွေ့ရစဉ်

မြန်မာအသင်းဟာ ထိုင်းအသင်းနဲ့ တွေ့ဆုံတိုင်း အရေးနိမ့်နေကြဖြစ်တဲ့အတွက် ကြေးတံဆိပ်သာ လုရတော့မယ် လို့ မှတ်ချက်ပေးသူတွေ အများကြီး ရှိခဲ့ပါတယ်။ မြန်မာအမျိုးသမီး အသင်းနည်းပြကတော့ စကားကို အပိုအလို မပြောဘဲ အကောင်းဆုံး ပြင်ဆင်ပြီး ယှဉ်ပြိုင်မယ်လို့ ပြောခဲ့ပါတယ်။

ထိုင်းအသင်းဟာ ပွဲအစပိုင်းမှာတင် မြန်မာအသင်းရဲ့ အမှားအယွင်းတွေကို အခွင့်ကောင်းယူပြီး စောစောစီးစီး ၂ ဂိုး သွင်းယူနိုင်ခဲ့တာကြောင့် အားလုံးထင်မှတ်ထားသလို ဖြစ်သွားပြီလားလို့တောင် တွေးခဲ့မိပါတယ်။

ဒါပေမယ့် မြန်မာအသင်းဟာ ဂျပန်နည်းပြ လက်ထက်မှာ ပုံသွင်းထားတဲ့အတိုင်း လုံးဝအရှုံးမပေးဘဲ တိုက်ပွဲဝင် စိတ်ဓါတ် အပြည့်နဲ့ ကစားခဲ့တာကြောင့် ဒုတိယပိုင်းအစ ၁၀ မိနစ်အတွင်းမှာ ထိုင်းအသင်းကို ပြန်ပြီး ဦးဆောင် နိုင်ခဲ့တာပါ။

မြန်မာအသင်း အတွက်တော့ နာကျင်အချိန်ပိုမှာ နောက်ထပ် တစ်ဂိုး သွင်းယူပြီး ထိုင်းအသင်း ပြန်မလာနိုင်အောင် ပါ လုပ်ခဲ့တာ ဖြစ်ပါတယ်။

ပြိုင်ပွဲ မစတင်ချိန်မှာ အုပ်စုက လှည့်ပြန်မယ်လို့ အားလုံးက ထင်ထားတဲ့ မြန်မာအမျိုးသမီး အသင်းကတော့ ဆီးဂိမ်းစ် ရွှေတံဆိပ်ဆုကို ရယူနိုင်ဖို့ အနီးဆုံး အနေအထားထိ ရောက်ရှိလာခဲ့တာပါ။

မြန်မာအမျိုးသမီးအသင်းဟာ ဆီးဂိမ်းစ်ပြိုင်ပွဲမှာ နောက်ဆုံး ဗိုလ်လုပွဲ တက်နိုင်ခဲ့တာက ၂၀၀၅ က နောက်ဆုံး ဖြစ်ပြီး ၁၈ နှစ်အကြာမှ ပထမဆုံးအကြိမ် ပြန်လည် တက်လှမ်းနိုင်ခဲ့တာ ဖြစ်ပါတယ်။

 မြန်မာအမျိုးသမီးအသင်းကိုတွေ့ရစဉ်

ဆီးဂိမ်းစ်ပြိုင်ပွဲမှာ အမြင့်ဆုံး ငွေတံဆိပ်သာ ရဖူးတဲ့ အမျိုးသမီးအသင်း အတွက်တော့ ပထမဆုံးအကြိမ် ရွှေတံဆိပ်ဆုရနိုင်ဖို့ မျှော်လင့်ချက် ရှိလာခဲ့တာဖြစ်ပြီး ဗိုလ်လုပွဲမှာတော့ အုပ်စုတွင်းမှာ တွေ့ခဲ့တဲ့ ဗီယက်နမ်နဲ့ တွေ့ရတော့မှာပါ။

မြန်မာအသင်း အနေနဲ့ ရွှေတံဆိပ်ဆုကို ရနိုင်မယ်ဆိုရင် ဗီယက်နမ်ကို အနိုင်ရပြီး ရှုံးကြွေးပါ ပြန်ဆပ်နိုင်မယ့် တစ်ချက်ခုတ် နှစ်ချက်ပြတ် အခွင့်အရေးကို ရယူနိုင်မှာ ဖြစ်ပါတယ်။

တကယ်လို့ ဗီယက်နမ်နဲ့ ပွဲမှာ ခြေချော်လက်ချော် ဖြစ်ခဲ့မယ်ဆိုရင်လည်း မြန်မာအသင်းရဲ့ စွမ်းဆောင်ရည်ကို အားလုံးက အသိအမှတ် ပြုနိုင်လိမ့်မယ်လို့ ထင်မြင်မိပါတယ်။

မေလ ၁၅ ရက်မှာ ကစားမယ့် ဗိုလ်လုပွဲမှာ ဗီယက်နမ်ကပဲ လက်ရှိ ဆီးဂိမ်းစ် ချန်ပီယံဘွဲ့ကို ဆက်ထိန်းမှာလား ဒါမှမဟုတ် မြန်မာက ပထမဆုံးအကြိမ် ရွှေတံဆိပ်ဆု ရယူပြီး အမိမြေကို ပြန်လာနိုင်မလားဆိုတာ စောင့်ကြည့်ရ တော့မှာ ဖြစ်ပါတယ်။