- By CNI
- Category: အားကစား
- Hits: 847
CNI Sport News
၂၀၂၂ ခုနှစ်၊ အောက်တိုဘာ ၂၆
ဒေါ့မွန်အသင်း တိုက်စစ်မှူး ဟော်လာဟာ ဝှေးစေ့အကျိတ်ကနေ ပြန်လည်ကောင်းမွန်လာပြီးနောက် အသင်းဟောင်း အေဂျတ်စ်အသင်းနဲ့ လေ့ကျင့်မှုတွေ ပြုလုပ်ခဲ့တယ်လို့ သိရပါတယ်။
ဟော်လာဟာ ပြီးခဲ့တဲ့ရာသီက အေဂျတ်စ်အသင်းအတွက် ခြေစွမ်းပြသနိုင်ခဲ့ပြီး ပြိုင်ပွဲစုံ ၃၄ ဂိုး သွင်းယူနိုင်ခဲ့ တာကြောင့် နွေရာသီအပြောင်းအရွှေ့မှာ ဒေါ့မွန်အသင်းက ပေါင် ၃၁ သန်းနဲ့ ခေါ်ယူခဲ့တာပါ။
အိုင်ဗရီကို့စ် တိုက်စစ်မှူးဟာ ဒေါ့မွန်အသင်းကို ရောက်ပြီး မကြာခင်မှာ ရောဂါရှာဖွေ တွေ့ရှိခဲ့တာ ဖြစ်ပါတယ်။ သူဟာ ဒေါ့မွန်အသင်းရဲ့ ရာသီကြို ဆွစ်ဇာလန်ခရီးစဉ်မှာ နာမကျန်းမှုဖြစ်ပြီးနောက် ဆေးစစ်မှု ခံယူခဲ့တာမှာ ကင်ဆာအကျိတ် တွေ့ရှိခဲ့တာပါ။
ဟော်လာဟာ ဓါတုကုထုံးကို ခံယူခဲ့ရပြီး ပြန်လည် ကောင်းမွန်လာမှု ခြေလှမ်းအဖြစ် လေ့ကျင့်ရေးကွင်းကို ပြန်လည် ရောက်ရှိလာခဲ့တာ ဖြစ်ပါတယ်။
အေဂျတ်စ်အသင်းနည်းပြ ရှရူဒါက ဟော်လာအသင်းထံ ပြန်လာကြောင်း အတည်ပြုခဲ့ပါတယ်။
ဒေါ့မွန်အသင်းမှာ တွေ့ရတဲ့ ဟော်လာ (Stadium Astro)
ရှရူဒါက “သူဟာ ဒီမှာ ပြန်လည်ထူထောင်ရေး လုပ်ငန်းစဉ်တွေကို လုပ်နေတာကြောင့် ဒီမှာလာပြီး လေ့ကျင့်လို့ ရမလားဆိုပြီး မေးခဲ့ပါတယ်။ သူပြန်ကောင်းလာဖို့ အကူအညီပေးတဲ့ အနေနဲ့ တခြားကွင်းမှာ လေ့ကျင့် နိုင်ခဲ့ တယ်”လို့ ပြောခဲ့ပါတယ်။
ဟော်လာဟာ ဒေါ့မွန်အသင်းအတွက် ပွဲဦးထွက် မကစားရသေးဘဲ ကုသမှုခံယူခဲ့ရတဲ့ အကြောင်းကို အရင်က ဖွင့်ဟပြောခဲ့ပါ သေးတယ်။
ဟော်လာရဲ့ လက်ရှိ အခြေအနေကြောင့် လပေါင်းများစွာ အနားယူနိုင်တယ်လို့ မျှော်လင့်ထားပေမယ့် ကစားသမားကတော့ ကွင်းထဲပြန်လာနိုင်မယ့် အချိန် အတိုင်းအတာကို စိတ်ထဲမှာ ရှိနေတာ ဖြစ်ပါတယ်။
ဟော်လာက “ကျနော်ဟာ ရုပ်ပိုင်းဆိုင်ရာအရ အလုပ်လုပ်နိုင်ပါတယ်။ စိတ်ပိုင်းဆိုင်ရာရော ရုပ်ပိုင်းဆိုင်ရာ ရှုထောင့်ကနေ ကြည့်မယ်ဆိုရင် ဒီရောဂါကို တိုက်ဖျက်တာမှာ အထောက်အကူ ဖြစ်စေပါတယ်။ ကျနော့်စိတ်ထဲ မှာ ပြန်လာနိုင်ဖို့ အချိန်အတိုင်းအတာ တစ်ခုရှိပါတယ်”လို့ ပြောခဲ့တာပါ။
ဟော်လာရဲ့ ဒေ့ါမွန်အသင်းဟာ မန်စီးတီးအသင်းနဲ့ ကစားခဲ့တဲ့ ချန်ပီယံလိဂ်ပွဲမှာ ဂိုးမရှိ သရေကျပြီးနောက် ၁၆ သင်း အဆင့် တက်ရောက်သွားပြီ ဖြစ်ပါတယ်။
Source: Daily Mail
- By CNI
- Category: အားကစား
- Hits: 845
CNI Sport News
၂၀၂၂ ခုနှစ်၊ အောက်တိုဘာ ၂၅
အမေရိကန် ဘတ်စကတ်ဘောကြယ်ပွင့် ဘရစ်တနီဂရိုင်နာဟာ ထောင်ဒဏ် ၉ နှစ် ချမှတ်တာနဲ့ ပတ်သက်ပြီး အယူခံ ကြားနာမှုမှာ အံ့သြဖွယ်အရာတွေကို မမျှော်လင့်ထားဘူးလို့ သူမရဲ့ ရှေ့နေတွေက ပြောပါတယ်။
ဘရစ်တနီဂရိုင်နာဟာ ခရီးဆောင်အိတ်အတွင်း ရုရှားနိုင်ငံက တားမြစ်ပိတ်ပင်ထားတဲ့ ဆေးခြောက်ဆီ သယ် ဆောင် လာခဲ့လို့ အခုလို ထောင်ဒဏ် ချမှတ်ခံထားရတာပါ။
အိုလံပစ် ရွှေတံဆိပ်ဆု ၂ ဆုရှင် ဘရစ်တနီဂရိုင်နာဟာ ဖေဖော်ဝါရီ ၁၇ ရက်က မော်စကိုလေဆိပ်မှာ ဖမ်းဆီးခံ ခဲ့ရတာဖြစ်ပြီး မူးယစ်ဆေးဝါး လက်ဝယ် မှောင်ခို သယ်ဆောင်မှုနဲ့ သြဂုတ်လ ၄ ရက်က ထောင်ဒဏ် ၉ နှစ် ချမှတ် ခံရတာ ဖြစ်ပါတယ်။
ဂရိုင်နာရဲ့ ရှေ့နေတွေကတော့ သူမဟာ ထိန်းသိမ်းခံထားရတဲ့ နေရာကနေ အင်္ဂါနေ့မှာ ပြုလုပ်မယ့် ကြားနာမှုမှာ ဗွီဒီယိုလင့်ခ် ကနေတစ်ဆင့် ပါဝင်မှာဖြစ်ပြီး အဆိုပါနေ့မှာ စီရင်ချက်ချမယ်လို့ မျှော်လင့်ကြောင်း ပြောခဲ့ပါတယ်။
ရှေ့နေတွေက “သူမဟာ အယူခံဝင်ဖို့ ကြားနာတာကို စောင့်နေရတာ အလွန်စိတ်လှုပ်ရှား နေပါတယ်။ ဘရစ်တနီ ကတော့ အံ့သြဖွယ်အရာတွေ ဖြစ်လာဖို့ မမျှော်လင့်ထားပါဘူး။ ဒါပေမယ့် အယူခံ တရားရုံးက ခုခံချေပချက်တွေ ကို ကြားနာပြီး အခုချမှတ်ထားတဲ့ ထောင်ဒဏ်ကို လျှော့ပေးဖို့ မျှော်လင့်တယ်”လို့ ပြောပါတယ်။
ဘရစ်တနီဂရိုင်နာနဲ့ တရားရုံး(MSN)
ဂရိုင်နာဟာ တရားခွင်မှာ အပြစ်ရှိကြောင်း ဝန်ခံခဲ့ပေမယ့် သူမဟာ ရိုးသားတဲ့ အမှားကိုသာ ကျူးလွန်ခဲ့တာ ဖြစ်ပြီး ဥပဒေချိုးဖောက်ဖို့ကို မရည်ရွယ်ခဲ့ဘူးလို ပြောထားပါတယ်။
ဂရိုင်နာဟာ မတရားဖမ်းဆီး ခံထားရတာဖြစ်ပြီး အမေရိကန်မှာ ထောင်ဒဏ် ၂၅ နှစ် ကျခံနေရတဲ့ ရုရှားလက်နက် ရောင်းဝယ်သူနဲ့ လဲလှယ်မှု ပြုလုပ်ဖို့ ကမ်းလှမ်းထားတယ်လို့ ဝါရှင်တန်က ပြောပါတယ်။ မော်စကို ဘက်ကလည်း အကျဉ်းသား လဲလှယ်မှု ပြုလုပ်နိုင်ဖို့ လမ်းဖွင့်ပေးထားပါတယ်။
စက်တင်ဘာလက မော်စကိုထံ သွားရောက်ခဲ့တဲ့ ကုလသမဂ္ဂဆိုင်ရာ အမေရိကန်သံအမတ်ဟောင်း ဘီလ်ရစ်ချတ်ဆန်က ဂရိုင်နာနဲ့ အမေရိကန် မရိန်းတပ်သားဟောင်း ဝီလန်တို့ ၂ ဦးကို အခုနှစ်ကုန်ပိုင်းမှာ လွှတ်ပေးနိုင်မယ်လို့ ယုံကြည်နေတာပါ။
အမေရိကန်ကောင်စစ်ဝင် အရာရှိကလည်း ပြီးခဲ့တဲ့ ရက်သတ္တပတ်က အကျဉ်းသား ၂ ဦးနဲ့ ဖုန်းစကား ပြောခဲ့တယ် လို့ သိရပါတယ်။
အမေရိကန်နိုင်ငံခြားရေးဌာန ပြောရေးဆိုခွင့်ရှိသူ နက်ဒ်ပရိုက်စ်က ဝါရှင်တန်ဟာ ဂရိုင်နာနဲ့ ဝီလန်တို့ ၂ ဦး လွတ်မြောက်နိုင်ဖို့အတွက် လုပ်ဆောင်ပေးနေတယ်လို့ သတင်းစာ ရှင်းလင်းပွဲမှာ ပြောခဲ့ပါတယ်။
Source: CNA
- By CNI
- Category: Watch TV
- Hits: 327
- By CNI
- Category: အားကစား
- Hits: 630
CNI Sport News
၂၀၂၂ ခုနှစ်၊ အောက်တိုဘာ ၂၅
အာဂျင်တီးနား နံရံဆေးရေးပန်းချီရေးဆွဲသူ ပညာရှင်တစ်ဦးဟာ ကွယ်လွန်သွားခဲ့ပြီဖြစ်တဲ့ ဂန္တဝင်မာရာဒိုနာရဲ့ ကြီးမားတဲ့ နံရံဆေးရေးပန်းချီကို အာဂျင်တီးနားနိုင်ငံ ဗျူနိုအေရိစ်မြို့မှာ ရေးဆွဲလိုက်ပါတယ်။
ဒါက အောက်တိုဘာလအကုန်မှာ အသက် ၆၂ နှစ်ပြည့်မယ့် မာရာဒိုနာရဲ့ မွေးနေ့အမှတ်တရအနေနဲ့ ဂုဏ်ပြုခဲ့တာလို့ သိရတာပါ။မာတင်ရွန်လို့ အမည်ရတဲ့ ၎င်းပညာရှင်ဟာ မာရာဒိုနာရဲ့ပုံကို မြို့လယ် ၁,၆၀၀ စတုရန်း မီတာရှိ နံရံပေါ်မှာ ရေးဆွဲခဲ့တာဖြစ်ပါတယ်။ဂျာမနီအသင်းနဲ့ ယှဉ်ပြိုင်ခဲ့တဲ့ ၁၉၉၀ ကမ္ဘာ့ဖလားဗိုလ်လုပွဲကပုံကို အခြေခံပြီး ရေးဆွဲ ခဲ့တာဖြစ်ပြီး ဒီပွဲမှာ အာဂျင်တီးနားအသင်းက အရေးနိမ့်ခဲ့တာပါ။
အသက် ၄၁ နှစ်အရွယ်ရှိ မာတင်ရွန်က “သူဟာ ကမ္ဘာ့အကောင်းဆုံးကစားသမားဆိုတာ ကျနော်တို့ သိထားပြီး သားပါ။ဒါပေမယ့် သူက ဘယ်လို ပုဂ္ဂိုလ်မျိုးလဲဆိုရင် သူက စစ်သည်တော်တစ်ဦးပါ။သူဟာ ဒုက္ခမှန်သမျှကိုလည်း ရင်ဆိုင်နိုင်ပါတယ်။သူ့ဆီရောက်လာတဲ့ အရာတိုင်းကိုလည်း ရင်ဆိုင်ကျော်ဖြတ်နိုင်ပါတယ်” လို့ ရိုက်တာ သတင်းဌာနကို ပြောခဲ့ပါတယ်။
မာရာဒိုနာဟာ နှလုံးသွေးကြောပိတ်ရောဂါကြောင့် ၂၀၂၀ နိုဝင်ဘာလမှာ ကွယ်လွန်သွားခဲ့တာပါ။မာတင်ရွန်နဲ့ အတူ ၇ ဦးပါဝင်တဲ့အဖွဲ့ဟာ မာရာဒိုနာရဲ့ နံရံဆေးရေးပန်းချီကို အပြီးသတ်နိုင်အောင် လုပ်ဆောင်နေကြတာ ဖြစ်ပါတယ်။ဒီနံရံဆေးရေးပန်းချီဟာ အမြင့် ၄၅ မီတာ ဝန်းကျင်ရှိပြီး နယူးယော့ခ်မှာရှိတဲ့ လေဘာတီရုပ်တု အမြင့် နဲ့ ဆင်တူတယ်လို့ မာတင်ရွန်က ပြောခဲ့တာပါ။အာဂျင်တီးနားအသင်းဟာ ကမ္ဘာ့ဖလားပြိုင်ပွဲမှာ ချန်ပီယံဆု ၂ ကြိမ်သာ ရယူထားပေမယ့် မာတင်ရွန်က ကြယ် ၃ ခုထည့်ခဲ့တာဖြစ်ပါတယ်။
သူ့အနေနဲ့ ကာတာကမ္ဘာ့ဖလားမှာ အာဂျင်တီးနားအသင်း ချန်ပီယံဖြစ်နိုင်ဖို့ မျှော်လင့်နေတဲ့အတွက် နောက်ထပ် ကြယ် ၁ ခု ထပ်ထည့်တာဖြစ်နိုင်တယ်လို့ သတင်းမှာ ဖော်ပြထားတာပါ။မာရာဒိုနာဟာ အာဂျင်တီးနား လက်ရွေးစင်အတွက် ပွဲပေါင်း ၉၁ ပွဲပါဝင်ကစားခဲ့ပြီး ၃၄ ဂိုးသွင်းယူကာ ၁၉၈၆ ကမ္ဘာ့ဖလားချန်ပီယံဆုကို ရယူနိုင်ခဲ့တာဖြစ်ပါတယ်။
Source:Reuters
- By CNI
- Category: Watch TV
- Hits: 349
- By CNI
- Category: အားကစား
- Hits: 1158
CNI Sport News
၂၀၂၂ ခုနှစ်၊ အောက်တိုဘာ ၂၄
ဘရာဇီးလ်ဂန္တဝင် ရော်နယ်ဒိုကတော့ ကာတာမှာ ကျင်းပမယ့် ကမ္ဘာ့ဖလားပြိုင်ပွဲမှာ မက်ဆီ ကမ္ဘာ့ဖလား ချန်ပီယံဆု ကိုင်မြှောက်တာကို မြင်တွေ့လိုခြင်းမရှိဘူးလို့ ဝန်ခံလိုက်ပါတယ်။
ရော်နယ်ဒိုက “သူသာ စပိန်နိုင်ငံသားဆိုရင်ပေါ့။ဒါပေမယ့် ဘရာဇီးလ်နဲ့ အာဂျင်တီးနားဆိုတာ ပြိုင်ဆိုင်မှု ကြီးမားပါတယ်။လေးစားမှုတွေနဲ့အတူ မယုံနိုင်စရာကောင်းတဲ့ ပြိုင်ဆိုင်မှုတွေရှိခဲ့ပြီး ဒါဟာ ဘောလုံးလောကရဲ့ ချစ်စရာအကောင်းဆုံးအရာပါ။ဒါပေမယ့် အာဂျင်တီးနားကမ္ဘာ့ဖလားရယူဖို့တော့ မစဉ်းစားပါဘူး။မက်ဆီနဲ့ ထိုက်တန်လားဆိုရင်တော့ ထိုက်တန်ပါတယ်။ဒါပေမယ့် သူ့ကို ကျနော် ပံ့ပိုးပေးမှာမဟုတ်ပါဘူး။ ကျနော်သူ့ကို ချစ်ပေမယ့် သူဆိုရင်လည်း ဒီလိုပဲခံစားရမှာမို့ ဒါကို သူနားလည်မှာပါ” လို့ မက်ဆီ ကမ္ဘာ့ဖလားရတာကို မြင်တွေ့ ချင်လားဆိုတဲ့ မေးခွန်းနဲ့ပတ်သက်ပြီး The Guardian ကို ဖြေခဲ့တာပါ။
ရော်နယ်ဒိုဟာ ဘရာဇီးလ်လက်ရွေးစင်အတွက် ပွဲပေါင်း ၉၈ ပွဲ ပါဝင်ကစားခဲ့ပြီး ၁၉၉၄ နဲ့ ၂၀၀၂ ကမ္ဘာ့ဖလား ပြိုင်ပွဲတွေမှာ ချန်ပီယံဆုကို ရယူနိုင်ခဲ့တာဖြစ်ပါတယ်။သူဟာ ၁၉၉၄ ပြိုင်ပွဲမှာ မကစားခဲ့ရပေမယ့် ၂၀၀၂ ပြိုင်ပွဲ မှာတော့ ၈ ဂိုးသွင်းယူကာ ရွှေဖိနပ်နဲ့အတူ ကမ္ဘာ့ဖလားချန်ပီယံဆုကိုပါ ဘရာဇီးလ်ဆီ သယ်ဆောင်လာနိုင် ခဲ့တာပါ။မက်ဆီကလည်း သူ့ရဲ့ကစားသမားဘဝမှ ပထမဆုံးကမ္ဘာ့ဖလားကို ရယူနိုင်ဖို့ ရည်မှန်းနေတာ ဖြစ်ပါတယ်။
မက်ဆီဟာ ၂၀၁၄ က ကမ္ဘာ့ဖလားဆုဖလားကို ကိုင်မြှောက်ခွင့်ရဖို့ နီးစပ်ခဲ့ပေမယ့် ဒုတိယနဲ့သာ ကျေနပ်ခဲ့ ရတာပါ။မက်ဆီအတွက်တော့ အခုကျင်းပမယ့် ကမ္ဘာ့ဖလားပြိုင်ပွဲဟာ သူ့ရဲ့နောက်ဆုံး ကမ္ဘာ့ဖလားပြိုင်ပွဲ ဖြစ်တယ်လို့ အတည်ပြုထားပါတယ်။အဲဒါကြောင့်လည်း အာဂျင်တီးနားအသင်း ခေါင်းဆောင်ဟာ နောက်ဆုံး ပြိုင်ပွဲမှာ ကမ္ဘာ့ဖလားချန်ပီယံဆုကို အရယူဖို့ ပစ်မှတ်ထားနေပြီး ဒါမှလည်း သူ့ရဲ့ ကစားသမားဘဝဟာ ပြီးပြည့်စုံ သွားမှာပါ။
မက်ဆီဟာ မကြာသေးခင်က ပြုလုပ်ခဲ့တဲ့ အင်တာဗျူးတစ်ခုမှာ ကမ္ဘာ့ဖလားပြိုင်ပွဲမှာ အာဂျင်တီးနားကြောက်တဲ့ အသင်းမရှိဘူးလို့ ဖြေထားပါတယ်။
မက်ဆီက “ကျနော်တို့ ကောင်းမွန်စွာ လုပ်ဆောင်နေကြပြီး လူတွေက ဆုဖလားနဲ့အတူ ပြန်လာမယ်လို့ ပြောနေကြပေမယ့် ဒီလိုမျိုး မဟုတ်ပါဘူး။ ကမ္ဘာ့ဖလားက အလွန်ခက်ခဲပါတယ်။ကျနော်တို့ဟာ ဒီပြိုင်ပွဲအတွက် စိတ်အားထက်သန်နေပြီး အတူတူတိုက်ပွဲဝင်ကြမယ်၊ ဘယ်အသင်းကိုမှ ကြောက်စရာ မရှိပါဘူး။ ကျနော်တို့ဟာ ဘယ်အသင်းနဲ့မဆို ယှဉ်ပြိုင်ကစားဖို့ အဆင်သင့်ပါပဲ။ စိတ်အေးအေးချမ်းချမ်းနဲ့ပေါ့” လို့ Directv Sports ရုပ်သံ လိုင်းကို ပြောခဲ့တာပါ။
အာဂျင်တီးနားအသင်းဟာ လက်ရှိအချိန်မှာ ပြိုင်ပွဲစုံ ၃၅ ပွဲဆက် ရှုံးပွဲမရှိဖြတ်သန်းနေပြီး ကိုပါအမေရိကပြိုင်ပွဲမှာ ချန်ပီယံဆုကို ရယူထားနိုင်တာဖြစ်ပါတယ်။
Source:Sportbible
- By CNI
- Category: အားကစား
- Hits: 495
CNI Sport News
၂၀၂၂ ခုနှစ်၊ အောက်တိုဘာ ၂၄
အီတလီနောက်ခံလူဟောင်း ကင်နာဗားရိုးဟာ ဘီနီဗန်တိုအသင်းကို ၄ ပွဲသာ ကိုင်တွယ်ထားရသေးပေမယ့် နည်းပြရာထူးကနေ နုတ်ထွက်ဖို့ ကြိုးစားခဲ့တယ်လို့ ဒေးလီးမေးလ် သတင်းဌာနက ဖော်ပြလိုက်ပါတယ်။
ဘီနီဗန်တိုအသင်းဟာ ကင်နာဗားရိုး ကိုင်တွယ်ခဲ့တဲ့ ၄ ပွဲမှာ ၂ မှတ်သာ ရရှိခဲ့တာပါ။ ကင်နာဗားရိုးဟာ အာရှမှာ နည်းပြဘဝ အောင်မြင်မှု ရခဲ့ပေမယ့် စီးရီးဘီပွဲစဉ်မှာ ဘီနီဗန်တိုအသင်းက ကိုမိုအသင်းကို အရေးနိမ့်ပြီးနောက် ရာထူးကနေ နုတ်ထွက်ဖို့ ကြိုးစားခဲ့တာ ဖြစ်ပါတယ်။
ကင်နာဗားရိုးရဲ့ တောင်းဆိုမှုကို ဘီနီဗန်တိုအသင်းဥက္ကဋ္ဌ ဗီဂိုရီတိုက ပြင်းပြင်းထန်ထန်ကို ပယ်ချခဲ့တာလို့ သိရပါ တယ်။ ကင်နာဗားရိုးဟာ ရလဒ်ဆိုးတွေကြောင့် ရုန်းကန်နေရတဲ့ ကာဆာတာရဲ့ နေရာမှာ အစားထိုး ဝင်ရောက်ပြီး ဘီနီဗန်တိုအသင်းကို ကိုင်တွယ်ခဲ့တာပါ။
၂၀၀၆ ကမ္ဘာ့ဖလားပြိုင်ပွဲမှာ အီတလီအသင်းနဲ့ ချန်ပီယံဖြစ်ခဲ့တဲ့ ကင်နာဗားရိုးက နုတ်ထွက်ဖို့ ကြိုးပမ်းခဲ့တယ်လို့ အတည်ပြု ခဲ့ပါတယ်။
နည်းပြ ကင်နာဗားရိုးကိုတွေ့ရစဉ် (Getty Images)
ကင်နာဗားရိုးက “ ကျနော်နုတ်ထွက်စာ တင်ခဲ့တာက မှန်ကန်တဲ့ လုပ်ရပ်လို့ ယူဆတာကြောင့်ပါ။ ဘာဖြစ်လို့လဲ ဆိုရင် ဖော်ဂီယာက အားကစားဒါရိုက်တာ ဖြစ်သလို သူငယ်ချင်းလည်းဖြစ်လို့ပါ။ ဒါပေမယ့် ကျနော် နုတ်ထွက်မှာ ကို သူတို့ဘက်က ငြင်းပယ်ခဲ့ပါတယ်”လို့ AS သတင်းဌာနကို ပြောခဲ့တာ ဖြစ်ပါတယ်။
၂၀၀၆ ဘောလွန်းဒီအောဆုရှင်ဟာ လက်ရှိ အခြေအနေကို ပြောဖို့အတွက် ရက်အနည်းငယ် အတွင်းမှာ အသင်း ဥက္ကဋ္ဌနဲ့ တွေ့ဆုံသွားဖို့ မျှော်လင့်ထားပါတယ်။
ကင်နာဗားရိုးဟာ ၂၀၁၁ မှာ ကစားသမားဘဝက အနားယူပြီးနောက် တရုတ်လက်ရွေးစင်အသင်း အပါအဝင် ကလပ်အသင်း ၅ သင်းကို ကိုင်တွယ်ခဲ့ပြီး အောင်မြင်မှုတွေ ရယူနိုင်ခဲ့တာ ဖြစ်ပါတယ်။ ကင်နာဗားရိုးဟာ ဥရောပ မှာ နည်းပြလုပ်ဖို့ အဆင်သင့် ဖြစ်နေတာကြောင့် ပထမဆုံးအသင်းအဖြစ် ဘီနီဗန်တိုအသင်းကို ကိုင်တွယ်ခဲ့တာပါ။
ကင်နာဗားရိုးက “ ကစားသမားတွေက ကျနော့်စကား နားထောင်ကြပေမယ့် အမှားတွေ အများကြီး ပြုလုပ်ကြပါ တယ်။ ကစားတာနဲ့ အနိုင်ရတာရဲ့ ကွာခြားချက်ကို နားလည်အောင် လုပ်ရပါမယ်”လို့ ပြောခဲ့ပါတယ်။
ဘီနီဗန်တို အသင်းဟာ ရလဒ်ဆိုးတွေကြောင့် စီးရီးဘီ အမှတ်ပေးဇယား အဆင့် ၁၆ နေရာမှာ ရပ်တည်နေတာ ဖြစ်ပါတယ်။
Source: Daily Mail
- By CNI
- Category: အားကစား
- Hits: 678
CNI Sport News
၂၀၂၂ ခုနှစ်၊ အောက်တိုဘာ ၂၄
ယူနိုက်တက်အသင်း ကစားသမား ဗာရန်းဟာ ချယ်လ်ဆီး အသင်းနဲ့ပွဲမှာ ရရှိခဲ့တဲ့ ဒဏ်ရာကြောင့် ကမ္ဘာ့ဖလားပြိုင်ပွဲ မတိုင်ခင် ကစားမယ့် ယူနိုက်တက်အသင်းရဲ့ ပွဲစဉ်တွေမှာ ပါဝင်ကစားပေးနိုင်ဖွယ် မရှိဘူးလို့ နိုင်ငံတကာ သတင်းတွေက ဖော်ပြနေကြပါတယ်။
ချယ်လ်ဆီး အသင်းနဲ့ပွဲမှာ ရခဲ့တဲ့ ဒဏ်ရာကို MRI စကန်ဖတ် စစ်ဆေးမှုတွေ ပြုလုပ်အပြီးမှာ ဗာရန်းဟာ တံကောက်ကြောဒဏ်ရာ ရခဲ့တာဖြစ်ပြီး ၃ ပတ်ကနေ ၄ ပတ်အထိ အနားယူရတော့မှာပါ။ ဗာရန်းရဲ့ ဒဏ်ရာ အခြေအနေ မပြင်းထန်တာကြောင့် ကမ္ဘာ့ဖလားပြိုင်ပွဲမှာ ပါဝင်ကစားချင်တဲ့ သူ့ရဲ့ မျှော်လင့်ချက်တွေကို ထိခိုက် နိုင်ဖွယ် မရှိပါဘူး။
ရီးရယ်လ် နောက်ခံလူဟောင်းဟာ ကြံ့ခိုင်မှုပိုင်းကြောင့် ပြင်သစ်အသင်းရဲ့ ကမ္ဘာ့ဖလားပြိုင်ပွဲ အဖွင့်ပွဲမှာတော့ ပါဝင်နိုင်ဖို့ မသေချာဘူးလို့ ပြင်သစ်သတင်းဌာနတွေက ဖော်ပြထားပါတယ်။
ကမ္ဘာ့ဖလားပြိုင်ပွဲဝင်မယ့် ပြင်သစ်အသင်း လူစာရင်းကို နိုဝင်ဘာလ ၉ ရက်မှာ ထုတ်ပြန်မှာ ဖြစ်ပေမယ့် ပြိုင်ပွဲ ဝင်မယ့် နိုင်ငံတွေဟာ ပထမပွဲ မကစားခင် တစ်ရက်အလိုထိ ဒဏ်ရာရ ကစားသမားတွေ နေရာမှာ အစားထိုး နိုင်ပါတယ်။
ဗာရန်း ဒဏ်ရာကြောင့် ပွဲအတွင်းက ထွက်သွားနေစဉ် (Sport)
ဗာရန်းရဲ့ ဒဏ်ရာ အခြေအနေဟာ ယူနိုက်တက်နဲ့ နည်းပြ အဲရစ်တန်ဟတ် အတွက်တော့ ကြီးမားတဲ့ ထိုးနှက်ချက် ဖြစ်ခဲ့ပါတယ်။ ပြင်သစ်လက်ရွေးစင်ဟာ ဒီရာသီ ယူနိုက်တက်အသင်းရဲ့ ခံစစ်ပိုင်းမှာ မာတီးနတ်စ်နဲ့ အတွဲညီကာ ခြေစွမ်းပြသနေပါတယ်။
ယူနိုက်တက်အသင်းဟာ ကမ္ဘာ့ဖလားပြိုင်ပွဲ မတိုင်ခင်မှာ ယူရိုပါလိဂ် ၂ ပွဲ၊ ပရီးမီးယားလိဂ် ၃ ပွဲနဲ့ ကာရာဘောင်း ဖလား ၁ ပွဲ ယှဉ်ပြိုင်ရမှာဖြစ်ပြီး ဒီပွဲတွေကို ဗာရန်း ပါဝင်နိုင်တော့မှာ မဟုတ်ပါဘူး။ ဗာရန်းဟာ ယူနိုက်တက် အသင်းကို ရောက်ရှိလာကတည်းက ဒဏ်ရာတွေကြောင့် မကြာခဏ ဆိုသလို အနားယူနေရတာပါ။
လက်ရှိအချိန် ယူနိုက်တက်အသင်း ဗဟိုခံစစ်ပိုင်းမှာ လင်ဒီလော့ဖ် ရှိနေသလို အသင်းခေါင်းဆောင် မက်ဂွဲယား ကလည်း ဒဏ်ရာကနေ ပြန်လည် သက်သာလာပြီ ဖြစ်ပါတယ်။
ပရီးမီးယားလိဂ် အမှတ်ပေးဇယား အဆင့် ၆ နေရာမှာ ရပ်တည်နေတဲ့ ယူနိုက်တက်အသင်းဟာ ကြားရက်မှာ ယူရိုပါလိဂ် ပွဲစဉ်အဖြစ် ရှရစ်ဖ်အသင်းနဲ့ ယှဉ်ပြိုင်ရမှာဖြစ်ပြီး ပရီးမီးယားလိဂ် ပွဲစဉ်အဖြစ် ဝက်စ်ဟမ်းအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
- By CNI
- Category: ဆောင်းပါး
- Hits: 1285
CNI Sport Article
၂၀၂၂ ခုနှစ်၊ အောက်တိုဘာ ၂၃
၂၀၂၂ ကမ္ဘာ့ဖလား ပြိုင်ပွဲကျင်းပဖို့ တစ်လတောင် မလိုတော့တဲ့ အချိန်မှာ ကစားသမားတွေကတော့ ဒီပြိုင်ပွဲကြီးမှာ မပါဝင်ရမှာကို စိုးရိမ်မှုတွေ ရှိလာကြပြီ ဖြစ်ပါတယ်။
ဒီကမ္ဘာ့ဖလားပြိုင်ပွဲဟာ ပုံမှန်ကျင်းပနေကျ နွေရာသီမှာ မဟုတ်ဘဲ ဆောင်းရာသီမှာ ကျင်းပမယ့် ပွဲဖြစ်ပါတယ်။ ကာတာနိုင်ငံရဲ့ ပူပြင်းမှုကြောင့် ဆောင်းရာသီမှာ ပြောင်းလဲ ကျင်းပတာဟာ ကစားသမားတွေအတွက် ကောင်းကျိုးတွေလည်း ရှိသလို ဆိုးကျိုးတွေလည်း ရှိပါတယ်။
နွေရာသီမှာ ကျင်းပတဲ့ ကမ္ဘာ့ဖလားပြိုင်ပွဲမှာဆိုရင် ကစားသမားတွေဟာ ဥရောပလိဂ်တွေ ပြီးဆုံးပြီးမှ နိုင်ငံအသင်းတွေနဲ့ ပူးပေါင်းပြီး ယှဉ်ပြိုင်ရတာပါ။ အခုပြိုင်ပွဲမှာတော့ ကစားသမားတွေဟာ ဒီပြိုင်ပွဲ မတိုင်ခင် လိဂ်ပြိုင် ပွဲတွေမှာ အားထုတ်ပြီး ကစားနေရသလို ပြိုင်ပွဲအပြီးမှာလည်း အရှိန်တက်လာနေတဲ့ လိဂ်ပြိုင်ပွဲတွေကို ပိုပြီး အားစိုက်လာရတော့မှာ ဖြစ်ပါတယ်။
ဘောလုံးကစားသမားများ ကာတွန်းရုပ်ပုံကိုတွေ့ရစဉ် (GETTY IMAGES)
အခုအချိန်မှာတော့ ကစားသမားတွေဟာ သက်ဆိုင်ရာ အသင်းတွေအတွက် စိတ်နှစ်ပြီး ကစားနေတာကြောင့် ထိခိုက်ဒဏ်ရာရမှုတွေ ရှိလာခဲ့ပြီ ဖြစ်ပါတယ်။
ဒဏ်ရာကြောင့် ကမ္ဘာ့ဖလားပြိုင်ပွဲမှာ ပါဝင်ကစားဖို့ သံသယရှိနေပြီ၊ မပါဝင်နိုင်တော့ဘူးဆိုတဲ့ သတင်းတွေဟာ ဒီရက်ပိုင်းမှာ ပိုပြီး ကြားနေရပါတယ်။
ဘာဖြစ်လို့လဲဆိုရင် ကမ္ဘာ့ဖလားပြိုင်ပွဲက နီးကပ်လာတာကြောင့်ပါ။ ပြင်းထန်တဲ့ ဒဏ်ရာ မဟုတ်ဘဲ အသေးစား ဒဏ်ရာ ရခဲ့မယ်ဆိုရင်တောင် ပြန်ပြီး ကောင်းမွန်ဖို့က အချိန်ယူရတော့မှာ ဖြစ်ပါတယ်။ အဲ့ဒါဆိုရင် ၄ နှစ်ကြာ စောင့်ဆိုင်းခဲ့ရတဲ့ သူတို့ရဲ့ အိမ်မက်တွေကို လွှင့်ပစ်ရဖို့ ရှိနေတာပါ။
ကမ္ဘာ့ဖလားပြိုင်ပွဲမှာ ပါဝင်ကစားနိုင်ဖို့က ကစားသမားတိုင်းရဲ့ အိမ်မက်တစ်ခု ဖြစ်ပါတယ်။
ခြေစစ်ပွဲ မအောင်လို့ မပါဝင်ရတာက ဘာမှမဖြစ်ပေမယ့် ခြေစစ်ပွဲအောင်ပြီး ဒဏ်ရာကြောင့် မပါဝင်နိုင်တာက သူတို့အတွက် ထိခိုက်မှုကြီးမားတယ်လို့ ဆိုရမှာပါ။ လက်ရှိ ခြေစစ်ပွဲ အောင်ထားတဲ့ အသင်းတွေက ကစားသမား တွေဆိုရင် နောက်ဆုံးအဆင့် ပြိုင်ပွဲမှာ ပါဝင်နိုင်ဖို့အတွက် နှစ်ပေါင်းများစွာ ကြိုးစားခဲ့ရတာ ဖြစ်ပါတယ်။
ဒဏ်ရာရသွားသော ကန်တီကို တွေ့ရစဉ်
နောက်တစ်ကြိမ် စောင့်ရမယ့် ၄ နှစ်ဆိုတာ ဘယ်ကစားသမားအတွက်မှ မသေချာတာကြောင့် ဒီလိုပွဲမျိုးကို လက်လွှတ်ဖို့က သူတို့အတွက် မဖြစ်နိုင်တဲ့အရာပါ။
ဒါဆိုရင် ကမ္ဘာ့ဖလားပြိုင်ပွဲမှာ ပါဝင်နိုင်အောင် ကလပ်အသင်းအတွက် ကစားတဲ့နေရာမှာ ဒဏ်ရာမရအောင် ရှောင်ပြီး ကစားဖို့ဆိုတာကလည်း ကစားသမားတွေအတွက် လက်တွေ့မှာ မလွယ်ကူပါဘူး။ ကွင်းထဲရောက်ပြီ ဆိုတာနဲ့ ဘယ်ကစားသမားမဆို နိုင်လိုစိတ် ပြင်းထန်တာကြောင့် ဒဏ်ရာရတာတွေကို အသာထားပြီး အသင်း နိုင်ပွဲရဖို့ကိုသာ ဦးတည်လာခဲ့တာပါ။
ပွဲပြီးမှသာ ဒဏ်ရာရလို့ ကမ္ဘာ့ဖလားလွဲနိုင်မယ့် အခြေအနေကြောင့် ငိုကြွေးတာတွေ ရှိခဲ့တာ ဖြစ်ပါတယ်။
လက်ရှိအချိန်မှာ ဒဏ်ရာတွေကြောင့် ကမ္ဘာ့ဖလားပြိုင်ပွဲကို မပါဝင်နိုင်မယ့် ကစားသမားတွေလည်း အများကြီး ရှိနေပါတယ်။ အခုဆိုရင် ပြင်သစ်ကွင်းလယ်လူ ကန်တီ၊ ပေါ်တူဂီတိုက်စစ်မှူး ဂျိုတာ၊ နယ်သာလန် ကွင်းလယ်လူ ဝစ်ချ်နယ်လ်ဒန်းနဲ့ အင်္ဂလန်နောက်ခံလူ ရီစီဂျိမ်းစ်တို့ကတော့ ဒီပြိုင်ပွဲကို ပါဝင်နိုင်ဖို့ မရှိတော့ပါဘူး။
ဒိုင်ဘားလား၊ ပေါ့ဘာ၊ ဒီမာရီယာနဲ့ ဝေါ်လ်ကာတို့ကတော့ ပြိုင်ပွဲပါဝင်နိုင်ဖို့ မျှော်လင့်ချက် ရှိနေကြသေးတာ ဖြစ်ပါတယ်။
မျှော်လင့်ချက် ရှိကြတယ်ဆိုပေမယ့် ကြံ့ခိုင်မှုပိုင်း ပြန်ကောင်းအောင် အရင်ဦးစားပေး လုပ်ဆောင်ကြရမှာဖြစ်ပြီး လက်ရွေးစင်အသင်း နည်းပြတွေကလည်း သူတို့ကို ရွေးချယ်ဖို့ တော်တော်လေးကို စဉ်းစား ဆုံးဖြတ်ကြရမှာ ဖြစ်ပါတယ်။
ပေါ့ဘာကိုတွေ့ရစဉ်
ကမ္ဘာ့ဖလားလို ပြိုင်ပွဲမျိုးမှာ ရာနှုန်းပြည့် ဒေါင်ဒေါင်မြည် ကောင်းမွန်တဲ့ ကစားသမားတွေသာ နည်းပြတွေက အသင်းလူစာရင်းထဲ ခေါ်ဆောင်သွားချင်ကြတာပါ။ ဒါမှလည်း ပွဲတွေကစားတဲ့အချိန် သူတို့ရဲ့ အကောင်းဆုံး စွမ်းဆောင်ရည်ကို အသုံးချနိုင်မှာ ဖြစ်ပါတယ်။
လက်ရှိအချိန်မှာ လိဂ်ပွဲတွေ၊ ဥရောပပွဲတွေကလည်း ဆက်နေတာကြောင့် နည်းပြတွေကတော့ သူတို့အားကိုး ရမယ့် ကစားသမားတွေ ဒဏ်ရာမရဖို့ မျှော်လင့်နေကြသလို ကစားသမားတွေ ဘက်ကလည်း ဒဏ်ရာကို ရှောင်လွှားနိုင်ဖို့ လုပ်ဆောင်ကြမှာ အသေအချာပါပဲ။
ပရိသတ်တွေကလည်း သူတို့အားပေးတဲ့ ကစားသမားတွေ ကမ္ဘာ့ဖလားပြိုင်ပွဲမှာ ပါဝင်မှာကို စောင့်ကြည့်ပြီး အားပေးဖို့ အဆင်သင့် ဖြစ်နေကြပါတယ်။
အဲ့ဒါကြောင့်လည်း ကာတာကမ္ဘာ့ဖလားပြိုင်ပွဲမှာ ဒဏ်ရာရနေတဲ့ ကစားသမားတွေ အမြန်သက်သာပြီး တခြား ကစားသမားတွေလည်း ဒဏ်ရာကင်းကင်းနဲ့ သူတို့ အိမ်မက်ကို အကောင်အထည် ဖော်နိုင်ဖို့ ဆန္ဒပြုလိုက် ရပါတယ်။
- By CNI
- Category: Watch TV
- Hits: 328
- By CNI
- Category: Watch TV
- Hits: 334
- By CNI
- Category: အားကစား
- Hits: 788
CNI Sport News
၂၀၂၂ ခုနှစ်၊ အောက်တိုဘာ ၂၂
အာဂျင်တီးနားအသင်းဟာ ကမ္ဘာ့ဖလားပြိုင်ပွဲမှာ ဘယ်အသင်းကိုမှ မကြောက်ဘူးလို့ အသင်းခေါင်းဆောင် မက်ဆီက ပြောလိုက်ပါတယ်။
မက်ဆီက “ ကျနော်တို့ ကောင်းမွန်စွာ လုပ်ဆောင်နေကြပြီး လူတွေက ဆုဖလားနဲ့အတူ ပြန်လာမယ်လို့ ပြောနေ ကြပေမယ့် ဒီလိုမျိုး မဟုတ်ပါဘူး။ ကမ္ဘာ့ဖလားက အလွန်ခက်ခဲပါတယ်။ ကျနော်တို့ဟာ ဒီပြိုင်ပွဲအတွက် စိတ်အား ထက်သန်နေပြီး အတူတူတိုက်ပွဲဝင်ကြမယ်၊ ဘယ်အသင်းကိုမှ ကြောက်စရာ မရှိပါဘူး။ ကျနော်တို့ဟာ ဘယ် အသင်းနဲ့မဆို ယှဉ်ပြိုင်ကစားဖို့ အဆင်သင့်ပါပဲ။ စိတ်အေးအေးချမ်းချမ်းနဲ့ပေါ့”လို့ Directv Sports ရုပ်သံလိုင်းကို ပြောခဲ့တာပါ။
ကိုပါအမေရိက ချန်ပီယံ အာဂျင်တီးနားအသင်းဟာ ၂၀၁၉ ကတည်းက လက်ရှိအချိန်ထိ ၃၅ ပွဲဆက်တိုက် ရှုံးပွဲ မရှိဘဲ အကောင်းဆုံးပုံစံ ရရှိနေတာ ဖြစ်ပါတယ်။ အာဂျင်တီးနားအသင်းဟာ ၂၀၂၂ ကမ္ဘာ့ဖလားပြိုင်ပွဲမှာ ဆော်ဒီ၊ ပိုလန်၊ မက္ကဆီတို့နဲ့ တစ်အုပ်စုတည်း ကျရောက်နေပြီး ၁၉၈၆ နောက်ပိုင်း ပထမဆုံး ကမ္ဘာ့ဖလား ချန်ပီယံဆုကို ရယူနိုင်ဖို့ ပစ်မှတ်ထား နေတာပါ။
အာဂျင်တီးနား အသင်းဟာ ၂၀၁၈ ပြိုင်ပွဲမှာ လက်ရှိ ချန်ပီယံကို အရေးနိမ့်ပြီး ၁၆ သင်းအဆင့်က လှည့်ပြန်ခဲ့ရတာ ဖြစ်ပါတယ်။
ဥရုဂွေးနဲ့ အာဂျင်တီးနားအသင်း ယှဉ်ပြိုင်နေစဉ် (Reuters)
မက်ဆီကတော့ အဖွင့်ပွဲစဉ်အဖြစ် ကစားမယ့် ဆော်ဒီအသင်းနဲ့ ပွဲစဉ်ဟာ အာဂျင်တီးနားအသင်းရဲ့ အခွင့်အရေး အတွက် အဓိက အချက်ဖြစ်တယ်လို့ တွေးမြင်နေတာပါ။
မက်ဆီက “ ပထမပွဲရဲ့ ပထမမိနစ်မှာ စိုးရိမ်မှုတွေက ထိန်းချုပ်ရ ခက်ပါတယ်။ နိုင်ပွဲနဲ့ စတင်မှသာ စိတ်ငြိမ်သက် မှုကို ပေးတာကြောင့် ပထမပွဲက အလွန်အရေးကြီးတယ်လို့ ထင်ပါတယ်။ ပြီးခဲ့တဲ့ ကမ္ဘာ့ဖလားမှာဆို ကျနော်တို့ သရေနဲ့သာ စတင်နိုင်ခဲ့တာပါ”လို့ ပြောခဲ့ပါတယ်။
အာဂျင်တီးနား အသင်းဟာ ကမ္ဘာ့ဖလားပြိုင်ပွဲ မတိုင်ခင် နောက်ဆုံး ခြေစမ်းပွဲအဖြစ် နိုဝင်ဘာလ ၁၆ ရက်မှာ ယူအေအီးအသင်းနဲ့ ယှဉ်ပြိုင်မှာ ဖြစ်ပါတယ်။
Source: CNA
Page 31 of 80
Connect with us
