CNI Sport News

၂၀၂၂ ခုနှစ်၊ အောက်တိုဘာ ၁၉

ပေါ့ဘာရဲ့ အေးဂျင့်အသစ်ဖြစ်သူ ရာဖေလာပီမန်တာက ယူနိုက်တက်အသင်းမှာ ကုန်ဆုံးခဲ့တဲ့ ပေါ့ဘာရဲ့ အချိန် တွေကို ကာကွယ်လိုက်ပြီး အသင်းဟောင်း အနေနဲ့ ပူးပေါင်းတာဝန်ယူဖို့ လိုတယ်လို့ ပြောပါတယ်။

ပီမန်တာက “ပေါလ်ဟာ ၂၀၁၆ မှာ ယူနိုက်တက်ကို အမှန်တကယ် ပြန်သွားချင်တဲ့ သူ့ရဲ့ နှလုံးသားအတိုင်း ရွေးချယ်ခဲ့ပါတယ်။ သူပြန်သွားချင်တဲ့ ပျော်ရွှင်မှုက အိမ်လိုခံစားခဲ့ရပါတယ်။ အဲ့ဒါကြောင့် မှန်ကန်တဲ့ ရွေးချယ်မှု ဖြစ်မယ်ဆိုတာ သေချာခဲ့ပါတယ်။ ဆုဖလားနဲ့ နောက်ထပ် အောင်မြင်မှုတွေအတွက် မျှော်လင့်ချက် ရှိလားဆိုတော့ ရှိခဲ့ပါတယ်။ ဒါပေမယ့် ဒါတွေက ဖြစ်မလာခဲ့ပါဘူး။ အဆင်မပြေတဲ့ အချိန်မှာ ပူးပေါင်းတာဝန်ယူတာက အကောင်း ဆုံးပဲလို့ ထင်ပါတယ်။ ဒါကို အသိအမှတ် ပြုရပါမယ်”လို့ The Telegraph ကို ပြောခဲ့ပါတယ်။

ပေါ့ဘာဟာ ၂၀၁၆ မှာ ဂျူဗင်တပ်စ် အသင်းကနေ ကလပ်စံချိန်တင် ပြောင်းရွှေ့ကြေးနဲ့ ယူနိုက်တက်အသင်းထံ ပြန်ရောက်လာခဲ့ပေမယ့် ခြေစွမ်းပြသနိုင်ဖို့နဲ့ ကြံ့ခိုင်မှုပိုင်းတွေမှာ ရုန်းကန်ခဲ့ရတာ ဖြစ်ပါတယ်။

ဂျူဗင်တပ်စ်အသင်းမှာ ပေါ့ဘာ လေ့ကျင့်ခန်း ဆင်းနေစဉ်(FotMob)

ပေါ့ဘာဟာ ယူနိုက်တက်အသင်းကို ၂၀၁၆-၁၇ ရာသီမှာ ကာရာဘောင်းဖလားနဲ့ ယူရိုပါလိဂ် ဆုဖလား ရရှိအောင် ကူညီပေးနိုင်ခဲ့ပေမယ့် အဲ့ဒီနောက်ပိုင်းမှာ အသင်းဟာ ဆုဖလားလက်မဲ့ ရာသီတွေကိုသာ ဖြတ်သန်းခဲ့ရတာပါ။ ပေါ့ဘာဟာလည်း အသင်းပရိသတ်တွေရဲ့ ဝေဖန်မှုတွေနဲ့ ရင်ဆိုင်ခဲ့ရပါတယ်။

ပေါ့ဘာဟာ ယူနိုက်တက်အတွက် ၆ ရာသီကြာ ကစားအပြီး မနှစ်က ရာသီအကုန်မှာ အသင်းဟောင်း ဂျူဗင်တပ်စ် အသင်းထံ အလွတ်နဲ့ ပြန်လည် ရောက်ရှိသွားခဲ့တာပါ။

ပြင်သစ် လက်ရွေးစင်ဟာ ဂျူဗင်တပ်စ်အတွက် တစ်ပွဲမှ မကစားရသေးဘဲ ဒူးဒဏ်ရာကြောင့် အနားယူနေခဲ့ရပြီး မကြာသေးခင် ရက်ပိုင်းကမှ အသင်းနဲ့အတူ လေ့ကျင့်မှုတွေ ပြန်လည် ပြုလုပ်နိုင်ခဲ့တာ ဖြစ်ပါတယ်။ ပေါ့ဘာဟာ ကမ္ဘာ့ဖလားပြိုင်ပွဲ မတိုင်ခင် ဂျူဗင်တပ်စ်အတွက် ပွဲထွက်နိုင်ဖို့ မျှော်လင့်နေပါတယ်။

ပေါ့ဘာဟာ ပြင်သစ် လက်ရွေးစင်အသင်းနဲ့ ၂၀၂၂ ကမ္ဘာ့ဖလားပြိုင်ပွဲမှာ ပါဝင်ယှဉ်ပြိုင် ချင်တာကြောင့် ကြံ့ခိုင်မှုပိုင်း ပိုမိုတိုးတက်မှု ရရှိနိုင်ဖို့ ကြိုးစား လုပ်ဆောင်နေပါတယ်။

Source: Goal

CNI Sport News

၂၀၂၂ ခုနှစ်၊ အောက်တိုဘာ ၁၉

အာဂျင်တီးနား အသင်းခေါင်းဆောင် မက်ဆီက လက်ရှိချန်ပီယံ ပြင်သစ်နဲ့ ဘရာဇီးလ် အသင်းတို့ဟာ လာမယ့် ကာတာကမ္ဘာ့ဖလားပြိုင်ပွဲမှာ ဗိုလ်စွဲဖို့ ရေပန်းအစားဆုံး အသင်းတွေ ဖြစ်တယ်လို့ ပြောပါတယ်။

မက်ဆီက “ကျနော်ရွေးချယ် ရမယ်ဆိုရင် ဘရာဇီးလ်နဲ့ ပြင်သစ်တို့က ကမ္ဘာ့ဖလားချန်ပီယံဆုကို ရယူနိုင်ဖို့ ရေပန်းအစားဆုံး ၂ သင်းပါ။ သူတို့မှာ တူညီတဲ့ ကစားသမားတွေ ရှိနေတာ ကာလကြာရှည်ရှိနေပြီဖြစ်ပြီး ကောင်းမွန်စွာလည်း အလုပ်လုပ်နိုင်ပါတယ်။ ပြင်သစ်ဆိုရင် ပြီးခဲ့တဲ့ ယူရိုပြိုင်ပွဲမှာ ၁၆ သင်းအဆင့်က ထွက်ခဲ့ ရတာသာ ဆိုးရွားခဲ့တာဖြစ်ပြီး သူတို့မှာ အထင်ကြီး စရာကောင်းတဲ့ ကစားသမားတွေ ရှိပါတယ်။ သူတို့ရဲ့ အတွေးအခေါ်တွေက အလွန်ရှင်းလင်းပြီး တူညီတဲ့ နည်းပြတွေရဲ့ လက်အောက်မှာ လုပ်ဆောင်နေတာပါ”လို့ DIRECTV Sports ကို ပြောခဲ့တာပါ။

မက်ဆီဟာ ဗိုလ်စွဲဖို့ ရေပန်းစားတဲ့အထဲမှာ သူ့နိုင်ငံ အာဂျင်တီးနားကိုတော့ ထည့်သွင်းပြီး ပြောမသွားခဲ့တာ ဖြစ်ပါတယ်။ အာဂျင်တီးနားအသင်းဟာ လက်ရှိအချိန်မှာ ပြိုင်ပွဲစုံ ၃၅ ပွဲ ဆက်တိုက် ရှုံးပွဲမရှိသလို ပြီးခဲ့တဲ့နှစ်က ဘရာဇီးလ်ကို အနိုင်ရပြီး ကိုပါအမေရိကဖလားပြိုင်ပွဲမှာ ချန်ပီယံဆုကို ရယူနိုင်ခဲ့တာပါ။

ကမ္ဘာ့ဖလား လက်ရှိ ချန်ပီယံ ပြင်သစ် အသင်းကိုတွေ့ရစဉ် (Goal)

အဲ့ဒါကြောင့် အာဂျင်တီးနားအသင်းကို ဒီပြိုင်ပွဲမှာ ဗိုလ်စွဲဖို့ ရေပန်းစားတဲ့ အသင်းတွေထဲက တစ်သင်းအဖြစ် သတ်မှတ်ထားကြတာ ဖြစ်ပါတယ်။

မက်ဆီ ကိုယ်တိုင်ကလည်း သူ့ရဲ့ နောက်ဆုံး ကမ္ဘာ့ဖလားဖြစ်တဲ့ ဒီပြိုင်ပွဲမှာ ချန်ပီယံဆု ရယူနိုင်ဖို့ ပစ်မှတ်ထား နေတာပါ။ မက်ဆီဟာ ကစားသမားဘဝမှာ ကလပ်အသင်းနဲ့ ဆုဖလားတွေ အများကြီး ရယူထားသလို နိုင်ငံ အသင်းနဲ့လည်း ဆုဖလားရယူခဲ့ပြီးဖြစ်ကာ တစ်ဦးချင်း ဆုတံဆိပ်တွေလည်း အများအပြား ရရှိထားတာ ဖြစ်ပါတယ်။

ဒါပေမယ့် မက်ဆီဟာ ကမ္ဘာ့ဖလား မရရှိသေးတာကြောင့် ဒီဆုဖလားကို ရယူနိုင်ခဲ့မယ်ဆိုရင် သူ့ရဲ့ ကစားသမား ဘဝဟာ ပြီးပြည့်စုံသွားပြီ ဖြစ်ပါတယ်။

အာဂျင်တီးနားအသင်းဟာ ကမ္ဘာ့ဖလားပြိုင်ပွဲ မတိုင်ခင်မှာ နောက်ဆုံး ခြေစမ်းပွဲအဖြစ် ယူအေအီး အသင်းနဲ့ နိုဝင်ဘာလ ၁၆ ရက်တွင် ယှဉ်ပြိုင်မှာဖြစ်ပါတယ်။

ဒီပွဲပြီးရင်တော့ ကမ္ဘာ့ဖလားပြိုင်ပွဲ အုပ်စုပွဲစဉ်အဖြစ် ဆော်ဒီအသင်းနဲ့ နိုဝင်ဘာလ ၂၂ ရက်မှာ ယှဉ်ပြိုင်မှာပါ။ အာဂျင်တီးနား အသင်းဟာ ကမ္ဘာ့ဖလားပြိုင်ပွဲမှာ ချန်ပီယံဆုကို ၂ ကြိမ် ရယူထားနိုင်ခဲ့ပြီး နောက်ဆုံး ရယူခဲ့တာက ၁၉၈၆ ခုနှစ်က ဖြစ်ပါတယ်။

Source: ESPN

CNI International News

၂၀၂၂ ခုနှစ်၊ အောက်တိုဘာ ၁၈

ဖီဖာအကြီးအကဲ အင်ဖန်တီနိုနဲ့ အင်ဒိုနီးရှားသမ္မတ ဂျိူကိုဝီဒိုဒိုတို့ဟာ နိုင်ငံတစ်ဝှမ်းရှိ အားကစားကွင်းတွေမှာ လုံခြုံရေး အစီအမံတွေကို ပြန်လည်သုံးသပ်ဖို့ အောက်တိုဘာလ ၁၈ ရက်နေ့က သဘောတူညီခဲ့ကြပါတယ်။

အခုလအတွင်း အင်ဒိုနီးရှားနိုင်ငံက ပွဲစဉ်တစ်ပွဲမှာ လူအုပ်ပြိုကျမှု ဖြစ်ပွားခဲ့တာကနေ လူပေါင်း ၁၃၀ ကျော် သေဆုံးခဲ့ပါတယ်။ ဒီနောက် အခုလို လုံခြုံရေး အစီအမံတွေကို ပြန်လည်သုံးသပ်ဖို့ ဖြစ်လာခဲ့တာပါ။

အားကစားကွင်း ဖြစ်ရပ်ဆိုးကြောင့် အင်ဒိုနီးရှားနဲ့ ဖီဖာတို့ ပူးပေါင်းအဖွဲ့ ဖွဲ့စည်းဖို့ သဘောတူညီခဲ့ပြီးနောက် အင်ဖန်တီနိုနဲ့ ဂျိူကိုဝီဒိုဒို တို့ဟာ ဂျကာတာမှာ တွေ့ဆုံခဲ့ကြတာ ဖြစ်ပါတယ်။ အင်ဒိုနီးရှားနိုင်ငံဟာ လာမယ့်နှစ်မှာ ကျင်းပမယ့် ဖီဖာယူ-၂၀ ကမ္ဘာ့ဖလားပြိုင်ပွဲကို အိမ်ရှင်အဖြစ် ကျင်းပဖို့ ပြင်ဆင်နေတာပါ။

အင်ဒိုနီးရှားလိဂ်ဝမ်း လူပြိုမှု ဖြစ်ပွားစဉ် (GETTY IMAGES)

အင်ဖန်တီနိုက အင်ဒိုနီးရှားရဲ့ ပထမဦးစားပေးမှာ နိုင်ငံရဲ့ ဘောလုံးပွဲတွေကို ပြုပြင်ပြောင်းလဲဖို့နဲ့ အသွင်ပြောင်းဖို့ ဖြစ်ပြီး ပရိသတ်တွေ ဘေးကင်းအောင်နဲ့ လုံခြုံရေးအတွက် အကြွေးတင်နေတယ်လို့ ပြောခဲ့ပါတယ်။

အောက်တိုဘာလ ၁ ရက်က ဖြစ်ခဲ့တဲ့ ဒီအဖြစ်အပျက်မှာ ရဲတွေဟာ လူစုလူဝေးကို ထိန်းချုပ်နိုင်ဖို့အတွက် ကွင်းထဲကို မျက်ရည်ယိုဗုံးတွေနဲ့ ပစ်ခဲ့တာဖြစ်ပြီး ဒီလိုလုပ်ဆောင်မှုကို ဖီဖာက အပြစ်တင်ခဲ့တာပါ။

အင်ဒိုနီးရှားမှာဖြစ်ခဲ့တဲ့ ဖြစ်ရပ်ဆိုးအတွက် ပရီးမီးယားလိဂ်နဲ့ စပိန်လာလီဂါ ကလပ်အသင်းတွေဟာ ပွဲမစခင် ၁ မိနစ် ငြိမ်သက်ခြင်းနဲ့ အနက်ရောင် လက်ပတ် ဝတ်ဆင်တာတွေကို ပြုလုပ်ခဲ့ပါတယ်။ အင်ဒိုနီးရှားလိဂ်ဟာ ဒီ အဖြစ်အပျက် ဖြစ်ပျက်ပြီးကတည်းက ပွဲတွေကိုကစားဖို့ ရွှေ့ဆိုင်းထားပြီး အခုလာမယ့် အပတ်မှာ ပြန်လည် ကစားဖို့ ရှိနေတယ်လို့လည်း သိရပါတယ်။

အင်ဒိုနီးရှားလိဂ် ဝမ်းဟာ အခုနှစ်ရာသီ ပွဲစဉ် ၁၁ ပွဲအထိ ကစားပြီးထားပြီး ဘော်နီရိုအသင်းက မဒူရာအသင်းနဲ့ ရမှတ်တူ ဂိုးကွာခြားချက်ကြောင့် အမှတ်ပေးဇယားကို ဦးဆောင်နေတာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ အောက်တိုဘာ ၁၈

အာဂျင်တီးနား တိုက်စစ်မှူးဟောင်း ဟီဂူအင်ဟာ ကစားသမားဘဝ နောက်ဆုံးပွဲစဉ်အဖြစ် ပါဝင်ကစားခဲ့ အပြီးမှာ ငိုကြွေးနေခဲ့ပါတယ်။

အသက် ၃၄ နှစ်အရွယ်ရှိ ဟီဂူအင်ဟာ မေဂျာလိဂ် ရာသီအကုန်မှာ ကစားသမားဘဝက အနားယူတော့မယ်လို့ အခုလ အစောပိုင်းက ကြေညာခဲ့ပါတယ်။

ဟီဂူအင်ရဲ့ အင်တာမိုင်ယာမီ အသင်းဟာ မေဂျာလိဂ် ပလေးအော့ဖ် ပွဲစဉ်မှာ နယူးယော့ခ်စီးတီး အသင်းကို ၃ ဂိုး- ဂိုးမရှိနဲ့ အရေးနိမ့်ပြီးနောက် အာဂျင်တီးနား ကစားသမားရဲ့ ၁၇ နှစ်ကြာ ပရော်ဖက်ရှင်နယ် ကစားသမားဘဝဟာ အဆုံးသတ်သွားခဲ့တာ ဖြစ်ပါတယ်။

ဟီဂူအင်ဟာ ပွဲအပြီး ကွင်းအတွင်းကနေ ထွက်ခွာချိန်မှာ ငိုကြွေးနေခဲ့တာ ဖြစ်ပါတယ်။

ဟီဂူအင်က “ အလုပ်တစ်ခုအနေနဲ့ ကျနော်အနှစ်သက်ဆုံး အရာက အဆုံးသတ်သွားပြီလို့ ခံစားခဲ့ရပါတယ်။ ကျနော့် ကစားသမားဘဝ ၁၇ နှစ်ခွဲဆိုတာ ကျနော့်ဘဝရဲ့ တစ်ဝက်ပါပဲ။ ကျနော့် ကစားသမားဘဝ တစ်ခုလုံးရဲ့ ပုံရိပ်တွေဟာ ကျနော့်စိတ်ထဲမှာ ပေါ်လာခဲ့ပါတယ်။ ကျနော်နေခဲ့တဲ့ နေရာတွေ၊ အလုပ်လုပ်ခဲ့တဲ့ နေရာတွေနဲ့ တွေ့ကြုံခဲ့ရတဲ့ အရာတွေကို ဒီနေ့အထိ ပေးခဲ့ပြီးပြီဖြစ်လို့ ကျနော်အလွန်ပျော်ပါတယ်။ ဒါက အရေးကြီးဆုံး အရာပါ။ အခုအိမ်မက်က ပြီးသွားပြီဆိုတော့ နောက်တစ်ခုအတွက် ပြန်စတင်ရတော့မယ်”လို့ ပွဲအပြီး အင်တာဗျူး မှာ ပြောသွားခဲ့ပါတယ်။

ဟီဂူအင် နောက်ဆုံး ကစားခဲ့စဉ် (The Star)

ဟီဂူအင်ဟာ ဥရောပထိပ်သီး အသင်းတွေဖြစ်တဲ့ ရီးရယ်လ်၊ နာပိုလီ၊ ဂျူဗင်တပ်စ်၊ အေစီမီလန်နဲ့ ချယ်လ်ဆီး အသင်းတွေမှာလည်း ကစားခဲ့တာပါ။

အာဂျင်တီးနား ကစားသမားဟာ ရီးရယ်လ်အသင်းနဲ့ လာလီဂါဆုဖလား ၃ ကြိမ်၊ နာပိုလီအသင်းနဲ့ ကိုပါအီတာလီ ယာဖလား၊ ဂျူဗင်တပ်စ်အသင်းနဲ့ စီးရီးအေဖလား ၃ ကြိမ် ရယူနိုင်ခဲ့ပါတယ်။ အေစီမီလန်နဲ့ ချယ်လ်ဆီးအသင်းမှာ တော့ အငှားနဲ့ ကာလတိုသာ ကစားခဲ့တာပါ။

အင်တာမိုင်ယာမီ အသင်းအတွက် ကစားပေးခဲ့အပြီးမှာ ဟီဂူအင်ဟာ ကလပ်ကစားသမားဘဝ ပွဲပေါင်း ၇၁၁ ပွဲ ကစားခဲ့ပြီး ၃၃၅ ဂိုး သွင်းယူနိုင်ခဲ့တာ ဖြစ်ပါတယ်။

ဟီဂူအင်ဟာ အာဂျင်တီးနား လက်ရွေးစင်အတွက် ၇၅ ပွဲ ပါဝင်ကစားခဲ့ပြီး ၃၁ ဂိုး သွင်းယူကာ ၂၀၁၄ ကမ္ဘာ့ ဖလား၊၂၀၁၅ နဲ့ ၂၀၁၆ ကိုပါအမေရိကဖလား ပြိုင်ပွဲတွေမှာ ဒုတိယနဲ့သာ ကျေနပ်ခဲ့ရတာပါ။ ဟီဂူအင်ဟာ ကစားသမားဘဝ အနားယူပြီးချိန်မှာ မျိုးဆက်သစ် လူငယ်လေးတွေကို အကူအညီ ပေးသွားမယ်လို့ ပြောထားခဲ့ ပါတယ်။

CNI Sport News

၂၀၂၂ ခုနှစ်၊ အောက်တိုဘာ ၁၈

ဘိုင်ယန်မြူးနစ် အသင်းရဲ့တိုက်စစ်မှူး မာနေးဟာ လူသားချင်းစာနာမှုဆိုင်ရာ အလုပ်တွေအတွက် အသိအမှတ်ပြု ခံခဲ့ရပြီး ဆိုကရေးတီးစ်ဆုကို ရရှိသွားခဲ့ပါတယ်။

ပဲရစ်မှာ ကျင်းပခဲ့တဲ့ ဘောလွန်းဒီအောဆုပေးပွဲမှာ ဆီနီဂေါ လက်ရွေးစင် မာနေးဟာ ပထမဆုံးအကြိမ် ချီးမြှင့်တဲ့ ဆိုကရေးတီးစ်ဆုကို ရရှိခဲ့ခြင်း ဖြစ်ပါတယ်။

ဒီဆုဟာ ၁၉၈၀ ပြည့်လွန်နှစ်တွေက ဘရာဇီးလ်မှာ အာဏာရ စစ်အစိုးရကို ဆန့်ကျင်ပြီး ကိုရင်သီယန် ဒီမိုကရေစီ လှုပ်ရှားမှုကို ပူးတွဲတည်ထောင်ခဲ့တဲ့ ဘရာဇီးလ် ဘောလုံးအိုင်ကွန် ဆိုကရေးတီးစ်ရဲ့ အမည်ကို ပေးခဲ့တာ ဖြစ်ပါတယ်။

မာနေးဟာ ကွင်းအတွင်း အချိန်ဇယားတွေ များပြားနေပေမယ့် ဆီနီဂေါအတွက် ဆက်လက်ရှင်သန်နေခဲ့တာပါ။

 မာနေး ပရဟိတအနေဖြင့် လှူဒါန်းမှုများ (GETTY IMAGES)

မာနေးဟာ ပြီးခဲ့တဲ့နှစ်က သူ့ရဲ့ ဇာတိ ဘမ်ဘာလီကျေးရွာမှာ ပြည်သူ့ဆေးရုံ တည်ဆောက်ပေးခဲ့ပြီး မိသားစုတွေနဲ့ ကျောင်းတွေကိုလည်း ငွေကြေးတွေ ထောက်ပံ့ပေးခဲ့တာ ဖြစ်ပါတယ်။ ဒါ့အပြင် ကိုဗစ်ကပ်ရောဂါကို တိုက်ဖျက်နိုင် ဖို့အတွက် ဆီနီဂေါ အမျိုးသားကော်မတီကိုလည်း လှူဒါန်းမှုတွေ ပြုလုပ်ခဲ့ပါတယ်။

မာနေးက “ ဒီနေ့ည ဧည့်သည်အဖြစ်လာရတာ အလွန်ပျော်ရွှင်ပါတယ်။ တစ်ခါတစ်လေမှာ အနည်းငယ်တော့ ရှက်မိပေမယ့် ကိုယ့်လူမျိုးတွေအတွက် ပိုကောင်းအောင် လုပ်ပေးရတာကို ကျနော်အလွန်ပျော်ပါတယ်”လို့ ဆုလက်ခံရယူအပြီးမှာ ပြောခဲ့ပါတယ်။

မာနေးဟာ ပြီးခဲ့တဲ့ရာသီက လီဗာပူးလ်နဲ့ ဆီနီဂေါ လက်ရွေးစင်အတွက် ခြေစွမ်းပြသနိုင်ခဲ့တာကြောင့် အခုနှစ် ဘောလွန်းဒီအောဆုပေးပွဲမှာ ဘန်ဇီမာရဲ့ နောက် ဒုတိယနေရာမှာ ရပ်တည်နိုင်ခဲ့တာပါ။

နွေရာသီက ဘိုင်ယန်မြူးနစ်ကို ရောက်ရှိလာခဲ့တဲ့ မာနေးဟာ ဂျာမန်ကလပ်အတွက် ၁၆ ပွဲ ပါဝင်ကစားထားပြီး ၉ ဂိုး သွင်းယူထားနိုင်ခဲ့ပါတယ်။

မာနေးရဲ့ ဘိုင်ယန်မြူးနစ် အသင်းဟာ အောက်တိုဘာလ ၁၉ ရက်မှာ ပိုကယ်လ်ဖလား ဒုတိယအဆင့် ပွဲစဉ်အဖြစ် အော့စ်ဘတ်၊ ၂၂ ရက်မှာ ဘွန်ဒစ်လီဂါပွဲစဉ်အဖြစ် ဟော်ဖန်ဟိမ်းအသင်းနဲ့ ယှဉ်ပြိုင်ရမှာ ဖြစ်ပါတယ်။

CNI Sport News

၂၀၂၂ ခုနှစ်၊ အောက်တိုဘာ ၁၈

ရီးရယ်လ်နဲ့ ပြင်သစ်လက်ရွေးစင်တိုက်စစ်မှူး ဘန်ဇီမာဟာ ၂၀၂၂ ခုနှစ်အတွက် ဘောလွန်းဒီအောဆုကို ကစားသမားဘ၀ ပထမဆုံးအကြိမ်အဖြစ် ရယူနိုင်ခဲ့ပြီဖြစ်ပါတယ်။

တနင်္လာနေ့ညက ပဲရစ်မှာကျင်းပခဲ့တဲ့ ဘောလွန်းဒီအောဆုပေးပွဲမှာ ဘန်ဇီမာဟာ ဘောလုံးလောကရဲ့ ဂုဏ်သိက္ခာ အရှိဆုံးဆုဖြစ်တဲ့ ဒီဆုကို ဘိုင်ယန်မြူးနစ်တိုက်စစ်မှူး မာနေး၊ မန်စီးတီးကွင်းလယ်လူ ဒီဘရိုင်းတို့ကို အသာရပြီး ရရှိခဲ့တာပါ။အသက် ၃၄ နှစ်အရွယ်ရှိ ဘန်ဇီမာဟာ ပြီးခဲ့တဲ့ရာသီက ရီးရယ်လ်အသင်းအတွက် ၄၆ ပွဲပါဝင်ကစားပြီး ၄၄ ဂိုးသွင်းယူကာ အသင်းကို လာလီဂါနဲ့ ချန်ပီယံလိဂ်ဖလားရရှိအောင် ဦးဆောင်နိုင်ခဲ့တာကြောင့် အခုလို ဘောလွန်းဒီအောဆုကို ပိုင်ဆိုင်နိုင်ခဲ့တာဖြစ်ပါတယ်။

ဘန်ဇီမာက “ဒီဆုကို ကျနော့်ရှေ့မှာ မြင်တွေ့ရတာ တကယ်ဂုဏ်ယူမိပါတယ်။ဒါဟာ ကျနော့်ရဲ့ငယ်ဘ၀ အိပ်မက်တစ်ခုဖြစ်ပြီး ကျနော်လုပ်ခဲ့တဲ့အလုပ်တွေအားလုံးကို ဘယ်တော့မှ အရှုံးမပေးခဲ့ပါဘူး။ဘာမဆို ဖြစ်နိုင် တယ်လို့ပဲ စိတ်ထဲမှာ အမြဲတမ်းတွေးထားပါတယ်။ပြင်သစ်အသင်းမှာ ပါဝင်ခွင့်မရတဲ့အချိန်မှာလည်း အလုပ် ကြိုးစားမှုကို ဘယ်တော့မှမရပ်တန့်ခဲ့ပါဘူး။ဒီကိုရောက်လာခဲ့တဲ့ ခရီးအတွက် တကယ်ဂုဏ်ယူမိပါတယ်။ဒါဟာ မလွယ်ကူခဲ့ပါဘူး။ကျနော်နဲ့ ကျနော့်မိသားစုအတွက် ခက်ခဲခဲ့ပါတယ်” လို့ ဆုယူအပြီးမှာ ပြောခဲ့တာပါ။

ဘန်ဇီမာဟာ ဘောလွန်းဒီအောဆုကို ရယူနိုင်ခဲ့တဲ့ ၅ ဦးမြောက် ပြင်သစ်ကစားသမား ဖြစ်လာခဲ့ပါတယ်။ဘန်ဇီမာ၊ မာနေးနဲ့ ဒီဘရိုင်းတို့အပြင် ထိပ်ဆုံး ၁၀ ဦးထဲဝင်ခဲ့တဲ့ ကစားသမားတွေကတော့ ဟာလန်း၊ မိုဒရစ်၊ ဗီနီစီးယက်စ်၊ ကော့တွိုက်စ်၊ ဘတ်ပီ၊ ဆာလတ်နဲ့ လီဝန်ဒေါစကီးတို့ ဖြစ်တာပါ။ဘောလွန်းဒီအော ၅ ဆုရှင် ရော်နယ်ဒိုက နံပတ် ၂၀ နေရာမှာ ရပ်တည်ခဲ့ပြီး သူ့အတွက် နှစ်ပေါင်း ၁၇ နှစ်အတွင်း အဆိုးရွားဆုံးအဆင့်သတ်မှတ်ချက်ဖြစ်ခဲ့ပါတယ်။

ဒီဆုပေးပွဲရဲ့ အခြားဆုတွေဖြစ်တဲ့ အမျိုးသမီးဘောလွန်းဒီအောဆုကို ဘာစီလိုနာအသင်းက ပူတယ်လ်လက်စ်က ရရှိသွားခဲ့တာပါ။ပူတယ်လ်လက်စ်ဟာ ပြီးခဲ့တဲ့နှစ်ကလည်း ရရှိခဲ့တာကြောင့် ဒီဆုကို ၂ နှစ်ဆက်တိုက် ရရှိတဲ့ ပထမဆုံးအမျိုးသမီးကစားသမားဖြစ်ခဲ့ပါတယ်။အကောင်းဆုံး ဂိုးသမားဆုဖြစ်တဲ့ ယာရှင်ဆုကို ကော့တွိုက်စ်က ရရှိခဲ့ပြီး၊ အကောင်းဆုံးလူငယ်ကစားသမားဆုဖြစ်တဲ့ ကိုပါဆုကို ဂါဗီက ရရှိခဲ့တာပါ။

ဘာစီလိုနာတိုက်စစ်မှူး လီဝန်ဒေါစကီးက အကောင်းဆုံးတိုက်စစ်မှူးဆုဖြစ်တဲ့ ဂတ်မူလာဆုကို ရရှိခဲ့ပြီး ဘိုင်ယန် မြူးနစ်တိုက်စစ်မှူး မာနေးက ဆိုကရေးတီးဆုနဲ့ မန်စီးတီးအသင်းက တစ်နှစ်တာအကောင်းဆုံး ကလပ်အသင်းဆု ကို ရရှိသွားခဲ့ပါတယ်။

Source:DailyMail

CNI Sport News

၂၀၂၂ ခုနှစ်၊ အောက်တိုဘာ ၁၇

ကာတာနိုင်ငံဟာ မူလအိမ်ရှင်ဖြစ်တဲ့ တရုတ်နိုင်ငံရဲ့နေရာမှာ အစားထိုး ဝင်ရောက်ပြီး ၂၀၂၃ အာရှဖလားပြိုင်ပွဲကို အိမ်ရှင်အဖြစ် ကျင်းပမယ်လို့ အာရှဘောလုံးအဖွဲ့ချုပ်က အောက်တိုဘာလ ၁၇ ရက်နေ့မှာ ထုတ်ပြန်လိုက်ပါတယ်။

တရုတ်နိုင်ငံဟာ ဒီပြိုင်ပွဲကို အိမ်ရှင်အဖြစ် ပြုလုပ်ဖို့ ၂၀၁၉ ကတည်းက သတ်မှတ်ခြင်း ခံခဲ့ရပေမယ့် နိုင်ငံအတွင်း ကိုဗစ် မူဝါဒတွေကြောင့် အခုနှစ် အစောပိုင်းမှာ အိမ်ရှင်အဖြစ်ကနေ နုတ်ထွက်ခဲ့တာပါ။

အဲ့ဒါကြောင့် အာရှဘောလုံးအဖွဲ့ချုပ် အမှုဆောင်ကော်မတီက ကာတာကို ၂၀၂၃ အာရှဖလား အိမ်ရှင်အဖြစ် သတ်မှတ်ခဲ့တာ ဖြစ်ပါတယ်။ ကာတာနဲ့အတူ အင်ဒိုနီးရှား၊ တောင်ကိုရီးယား တို့ကလည်း ဒီပြိုင်ပွဲကို အိမ်ရှင် အဖြစ် ပြုလုပ်ဖို့ လျှောက်ထားခဲ့ပေမယ့် နောက်ဆုံးမှာ ကမ္ဘာ့ဖလားပြိုင်ပွဲ အိမ်ရှင်ကိုသာ ရွေးချယ်ခဲ့တာပါ။

အာရှဘောလုံးအဖွဲ့ချုပ်ဥက္ကဋ္ဌ ရှိတ်ဆယ်လ်မန်က “ အာရှဘောလုံးအဖွဲ့ချုပ်နဲ့ အာရှဘောလုံး မိသားစုကိုယ်စား လာမယ့် အာရှဖလားပြိုင်ပွဲကို အိမ်ရှင်အဖြစ် ကျင်းပခွင့်ရခဲ့တဲ့ ကာတာဘောလုံးအဖွဲ့ချုပ်ကို ဂုဏ်ပြုချင်ပါတယ်။ ပြိုင်ပွဲ ကျင်းပဖို့ လျှောက်ထားခဲ့တဲ့ အင်ဒိုနီးရှားနဲ့ တောင်ကိုရီးယား တို့ကိုလည်း ကျေးဇူးတင်ပါတယ်။ ကာတာရဲ့ စွမ်းဆောင်ရည်တွေ၊ နိုင်ငံတကာ အားကစားပွဲကြီးတွေ လက်ခံကျင်းပတဲ့ မှတ်တမ်းနဲ့ သူတို့ရဲ့ စေ့စေ့စပ်စပ် လုပ် ဆောင်မှုကို တစ်ကမ္ဘာလုံးက သဘောကျကြပါတယ်။ ကာတာနိုင်ငံ အနေနဲ့ ဂုဏ်သိက္ခာနဲ့ လိုက်ဖက်ပြီး ထိုက်တန် တဲ့ မြင်ကွင်းတွေကို ပြသနိုင်မယ်ဆိုတာ ကျနော်တို့ ယုံကြည်ပါတယ်”လို့ ပြောခဲ့ပါတယ်။

အာရှဖလားပြိုင်ပွဲ ဆုဖလားနဲ့ ကမ္ဘာ့ဖလားပြိုင်ပွဲ ဆုဖလားကိုတွေ့ရစဉ်

ကာတာနိုင်ငံဟာ လာမယ့် ကမ္ဘာ့ဖလားပြိုင်ပွဲမှာ အသုံးပြုမယ့် အခြေခံ အဆောက်အဦတွေကို အာရှဖလား ပြိုင်ပွဲ မှာလည်း အသုံးပြုဖို့ စီစဉ်ထားတာပါ။ ကာတာဟာ ၁၉၈၈ နဲ့ ၂၀၁၁ မှာလည်း အာရှဖလားပြိုင်ပွဲကို အိမ်ရှင်အဖြစ် ကျင်းပခဲ့တာကြောင့် အာရှဖလားကို အိမ်ရှင်အဖြစ် ၃ ကြိမ်မြောက် ကျင်းပတဲ့ ပထမဆုံးနိုင်ငံလည်း ဖြစ်ပါတယ်။

ကာတာဟာ အာရှဖလားပြိုင်ပွဲရဲ့ လက်ရှိ ချန်ပီယံလည်း ဖြစ်ပါတယ်။

ကာတာဟာဆိုရင် လာမယ့် အာရှဖလားပြိုင်ပွဲကို အိမ်ရှင်အဖြစ် ပြုလုပ်ရမှာဖြစ်လို့ ၂၀၂၇ အာရှဖလားပြိုင်ပွဲကို အိမ်ရှင်ဖြစ်ခွင့် လျှောက်ထားမှုကနေ နုတ်ထွက်လိုက်ပြီ ဖြစ်ပါတယ်။ ဒါကြောင့် ၂၀၂၇ ပြိုင်ပွဲကို အိမ်ရှင်အဖြစ် ပြုလုပ်ဖို့ အိန္ဒိယနဲ့ ဆော်ဒီတို့ ၂ နိုင်ငံသာ ရှိတော့တာပါ။

၂၀၂၃ အာရှဖလားပြိုင်ပွဲကို ဇွန်လ ၁၆ ရက်ကနေ ဇူလိုင်လ ၁၆ ရက်အထိ အသင်းပေါင်း ၂၄ သင်းနဲ့ ကျင်းပ သွားမှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ အောက်တိုဘာ ၁၇

ဇန်နဝါရီလ အပြောင်းအရွှေ့မှာ ပီအက်စ်ဂျီကနေ ထွက်ခွာခွင့်ပေးဖို့ တောင်းဆိုထားတယ်ဆိုတဲ့ သတင်းတွေက လုံးဝ အမှားတွေ ဖြစ်တယ်လို့ ဘတ်ပီက ပြောလိုက်ပါတယ်။

ဘတ်ပီက “ ဇန်နဝါရီမှာ ထွက်ခွာခွင့်ပေးဖို့ ကျနော် မတောင်းဆိုခဲ့ပါဘူး။ ဒီသတင်းတွေကြောင့် တခြားသူတွေလိုပဲ ကျနော်လည်း အံ့သြမိပါတယ်။ လူတွေက ဒီမှာ ကျနော် ပါဝင်နေတယ်လို့ ထင်နိုင်ပေမယ့် လုံးဝမပါဝင်ဘူး။ ဒီလို သတင်းတွေကို ကြားလိုက်ရတဲ့အချိန်မှာ ကျနော်တို့ အားလုံးလည်း အံ့သြသွားခဲ့ ကြပါတယ်။ ဒါပေမယ့် ကျနော် တို့ ဒါကို ကိုင်တွယ်ဖြေရှင်းခဲ့ပြီး ပွဲတစ်ပွဲ ကစားခဲ့ပါတယ်။ ဒီသတင်းတွေက လုံးဝအမှားတွေလို့ပဲ ကျနော် ပြောချင် ပါတယ်။ ဒီမှာ ကျနော် အလွန်ပျော်ရွှင် နေပါတယ်”လို့ မာဆေးလ်နဲ့ ပွဲအပြီး သတင်းထောက်တွေကို ပြောခဲ့တာပါ။

ဘတ်ပီဟာ ပြီးခဲ့တဲ့ မေလကမှ ပြင်သစ်ချန်ပီယံ ပီအက်စ်ဂျီအသင်းနဲ့ ၃ နှစ် စာချုပ်ချူပ်ဆိုခဲ့တာ ဖြစ်ပေမယ့် အသင်းနဲ့ ကွင်းအတွင်းမှာရော ကွင်းပြင်ပမှာပါ ဆက်ဆံရေး အဆင်မပြေတာကြောင့် ထွက်ခွာချင်နေတယ်ဆိုပြီး သတင်းတွေ ထွက်ခဲ့တာ ဖြစ်ပါတယ်။

ဘတ်ပီနဲ့ နေမာကိုတွေ့ရစဉ် (Get French Football)

ဒါ့အပြင် ဘတ်ပီနဲ့ နေမာတို့ရဲ့ ဆက်ဆံရေး အပေါ်မှာလည်း မီဒီယာတွေက အမြဲတစေ မေးခွန်းထုတ်ခဲ့ကြပြီး ဘတ်ပီက နေမာကို အသင်းက ထွက်ခွာ စေချင်နေတယ်လို့ ဖော်ပြခဲ့ကြတာပါ။ ဘတ်ပီဟာ ဒီသတင်းတွေ အပေါ်မှာလည်း ငြင်းဆန်မှုတွေ ပြုလုပ်ထားပါတယ်။

မာဆေးလ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ လီဂူးဝမ်းပွဲမှာဆိုရင် နေမာ သွင်းယူခဲ့တဲ့ ဂိုးကို ဘတ်ပီက ဖန်တီးပေးခဲ့တာပါ။ ပြင်သစ်လက်ရွေးစင် တိုက်စစ်မှူးဟာ ဒီရာသီမှာ ပီအက်စ်ဂျီ အသင်းအတွက် ၁၄ ပွဲ ပါဝင် ကစားထားပြီး ၁၂ ဂိုးသွင်းယူကာ ၁ ဂိုး ဖန်တီးထားတာ ဖြစ်ပါတယ်။

ပီအက်စ်ဂျီအသင်းဟာ မာဆေးလ်အသင်းကို အနိုင်ရခဲ့တဲ့အတွက် ဒုတိယနေရာက လော်ရီးယန့်အသင်းကို ၃ မှတ်ဖြတ်ပြီး လီဂူးဝမ်းအမှတ်ပေးဇယား ထိပ်ဆုံးနေရာမှာ ဆက်လက် ရပ်တည်နေပါတယ်။

ပီအက်စ်ဂျီအသင်းဟာ အခုလ ၂၁ ရက်မှာ လီဂူးဝမ်း ပွဲစဉ်အဖြစ် အေဂျက်ဆီယို၊ ၂၅ ရက်မှာ ချန်ပီယံလိဂ် ပွဲစဉ် အဖြစ် မက္ကာဘီဟိုင်ဖာ အသင်းတို့နဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ အောက်တိုဘာ ၁၇

ဘာစီလိုနာအသင်း ဥက္ကဋ္ဌ လာပေါ်တာဟာ အယ်လ်ကလက်ဆီကိုပွဲစဉ်မှာ ရီးရယ်လ်အသင်းကို အရေးနိမ့်ပြီးနောက် ဒီပွဲကိုကိုင်တွယ်ခဲ့တဲ့ ဒိုင်လူကြီးတွေနဲ့ သူတို့ရဲ့ အဝတ်လဲခန်းမှာ ထိပ်တိုက်တွေ့ ခဲ့တယ်လို့ သိရပါတယ်။

ဒီရာသီရဲ့ ပထမဆုံး အယ်လ်ကလက်ဆီကိုပွဲစဉ်အဖြစ် ဘာနေဗျူးမှာ ကစားခဲ့တဲ့ ဒီပွဲမှာ ရီးရယ်လ် အသင်း က ၃ ဂိုး- ၁ ဂိုးနဲ့ အနိုင်ရရှိခဲ့တာပါ။ဒီပွဲအနိုင်ကြောင့် ရီးရယ်လ်အသင်းဟာ လာလီဂါအမှတ်ပေး ဇယားကို ၃ မှတ်အသာနဲ့ ဦးဆောင်နိုင်ခဲ့တာဖြစ်ပါတယ်။ဘာစီလိုနာအသင်း ဥက္ကဋ္ဌ လာပေါ်တာက ဒီပွဲမှာ ကိုင်တွယ်ခဲ့တဲ့ ဒိုင်လူကြီးတွေရဲ့ စွမ်းဆောင်ရည်ကို အလွန်စိတ်ပျက်နေတာကြောင့် ပွဲအပြီးမှာ သူတို့ဆီသွားပြီး တိုက်ရိုက်တွေ့ဆုံခဲ့တာလည်း ဖြစ်ပါတယ်။

ဒိုင်လူကြီးတွေရဲ့ ပွဲအပြီးအစီရင်ခံစာမှာ လာပေါ်တာဟာ သူတို့ရဲ့ အဝတ်လဲခန်းထဲကို ရောက်ရှိလာခဲ့ပြီး “ပွဲစဉ်အတွင်း အခြေအနေတချို့နဲ့ ပတ်သက်လို့ ဖြေရှင်းချက်ပေးဖို့ ထပ်ခါတလဲလဲတောင်းဆိုခဲ့တယ်” လို့ ဖော်ပြခဲ့ပါတယ်။ဒီပွဲမှာ ဘာစီလိုနာအသင်းက ကစားသမားနှစ်ဦးနဲ့ နည်းပြအဖွဲ့ဝင်တစ်ဦး အဝါကတ် ပြသခံခဲ့ရတာပါ။အင်တာမီလန်ကို အရေးနိမ့်ခဲ့တဲ့ ပွဲစဉ်ကတည်းက ဒိုင်လူကြီးတွေရဲ့ ဆုံးဖြတ်ချက်တွေ ကို ထောက်ပြခဲ့တဲ့ ဘာစီလိုနာနည်းပြ ဇာဗီဟာ ဒီတစ်ကြိမ်မှာတော့ မှတ်ချက်ပေးခြင်းမရှိခဲ့ပါဘူး။

ဇာဗီက “တစ်ခါတစ်ရံ ဆိုးရွားတဲ့ လမ်းကြောင်းပေါ်မှာ ကိုယ့်ကိုကိုယ်တွေ့ရပေမယ့် ကံကောင်းတာက ဒါက ၃ မှတ်ပါပဲ။ကျနော်တို့ ကြိုးစားခဲ့သလို ယုံကြည်မှုကိုလည်း ပြသခဲ့ပါတယ်။လာလီဂါပြိုင်ပွဲရဲ့ ထိပ်ဆုံးနေရာမှာ ဆက်ရှိဖို့ အခွင့်အရေးကောင်းတစ်ခုက ဖြစ်မလာခဲ့ပါဘူး။ကျနော်တို့ ထိပ်ဆုံးရောက် နေတဲ့အချိန်မှာ ဒါကို အခွင့်အရေးမယူနိုင်ခဲ့ပါဘူး။မက်ဒရစ်ရဲ့ ခံစစ်ပိုင်းကကောင်းမွန်ခဲ့ပြီး ကျနော်တို့က ဘာမှမလုပ်နိုင်ခဲ့ဘူး”လို့ ပြောခဲ့ပါတယ်။

ဘာစီလိုနာအသင်းဟာ လာမယ့်ရက်ပိုင်းတွေအတွင်းမှာ လာလီဂါပွဲစဉ်အဖြစ် ဗီလာရီးရယ်လ်၊ ဘီလ်ဘာအိုတို့နဲ့ ယှဉ်ပြိုင်ရမှာဖြစ်ပြီး အောက်တိုဘာ ၂၆ ရက်မှာတော့ ချန်ပီယံလိဂ်အရေးကြီး ပွဲစဉ် အဖြစ် ဘိုင်ယန်မြူးနစ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ အောက်တိုဘာ ၁၇

ဘရော်နီကာဟာ အောက်တိုဘာလ ၁၆ ရက်နေ့က ထိုးသတ်ခဲ့တဲ့ပွဲမှာ ဘရာဇီးလ်နိုင်ငံသူ မာရီယာနာ ဘာနန်ဒက်စ်ကို အနိုင်ယူပြီး Thai Fight မှာ ၆ ပွဲဆက်နိုင်ပွဲကို ရယူနိုင်ခဲ့တာဖြစ်ပါတယ်။

ဘရော်နီကာဟာ ဒီပွဲရဲ့ ဒုတိယအချီမှာ အလဲထိုးနဲ့ အနိုင်ရရှိခဲ့တာပါ။မြန်မာ့လက်ဝှေ့မယ်ဟာ ပထမ အချီမှာကတည်းက မာရီယာနာဘာနန်ဒက်စ်ကို အလဲထိုးနိုင်ဖို့ ကြိုးစားခဲ့ပေမယ့် ပြိုင်ဘက် ကစားသမားက အရှုံးမပေးခဲ့တာကြောင့် ဒုတိယအချီထိဆက်သွားခဲ့ရတာပါ။

ဒုတိယအချီမှာတော့ ဘရော်နီကာရဲ့ ဝမ်းဗိုက်ထိုးချက်ကြောင့် မာရီယာဘာနက်ဒက်စ်လဲကျပြီး အရှုံးပေးခဲ့ရကာ Thai Fight မှာ အလဲထိုးဘုရင်မဆိုတဲ့ ဂုဏ်ပုဒ်ကို ဆက်ထိန်းနိုင်ခဲ့တာပါ။

ဘရော်နီကာဟာ ဒီနိုင်ပွဲနဲ့အတူ ကမ္ဘာ့မွေထိုင်းအဖွဲ့အစည်းရဲ့ bantamweight အဆင့်သတ်မှတ်ချက် အဆင့် ၁ နေရာကိုလည်း ဆက်လက်ထိန်းသိမ်းထားနိုင်ခဲ့ပါတယ်။ဘရော်နီကာဟာ အနာဂတ်မှာ ONE Championship နဲ့ UFC ပြိုင်ပွဲတွေအထိ ထိုးသတ်ဖို့ ရည်မှန်းထားတာပါ။ပြီးခဲ့တဲ့ ဇူလိုင်လက ဘရော်နီကာကို ONE Championship က စာချုပ်ချုပ်ဆိုဖို့ သူ့ရဲ့ကလပ်ဖြစ်တဲ့ တိုက်ဂါးမွေထိုင်းကနေ တဆင့် ကမ်းလှမ်းမှုပြုလုပ်ခဲ့တယ်လို့ သိရပါတယ်။

ဒါပေမယ့် ဘရော်နီကာဟာ Thai Fight နဲ့ စာချုပ်ရှိသေးတာကြောင့် ဒီကမ်းလှမ်းမှုကို လက်ခံလို့ မရသေးပဲ ဒီမှာပဲ ဆက်ပြီး ကြိုးစားကာ ပြိုင်ပွဲဝင်ရဦးမှာဖြစ်တယ်လို့ တိုက်ဂါးမွေထိုင်းသူဋ္ဌေးဖြစ်သူက ပြောခဲ့တာပါ။ဘရော်နီကာနဲ့ Thai Fight တို့ဟာ ၃ နှစ်စာချုပ်ချုပ်ဆိုခဲ့တာဖြစ်ပြီး လက်ရှိ Thai Fight ရဲ့ ဘုရင်မလို့ တင်စားခြင်းခံနေရတာလည်း ဖြစ်ပါတယ်။

ကယန်းတိုင်းရင်းသူ ဘရော်နီကာဟာ မြန်မာနိုင်ငံရဲ့ ပထမဆုံးအမျိုးသမီး ရွှေခါးပတ်ဆုရှင်အဖြစ်လည်း မှတ်တမ်းတင်ထားသူပါ။သူမဟာ ၂၀၁၅ က ကျင်းပခဲ့တဲ့ ဆီးဂိမ်းစ်ပြိုင်ပွဲမှာလည်း နိုင်ငံအတွက် ကြေး တံဆိပ် ရယူပေးနိုင်ခဲ့သူလည်း ဖြစ်ပါတယ်။

CNI Sport Article

၂၀၂၂ ခုနှစ်၊ အောက်တိုဘာ ၁၆

၂၀၂၂ အတွက် ဘောလွန်းဒီအော ဆုပေးပွဲကို အောက်တိုဘာ ၁၇ ရက်နေ့မှာ အခမ်းအနား ပြုလုပ်ပြီး ချီးမြှင့်တော့ မှာ ဖြစ်ပါတယ်။ ပြင်သစ်ဘောလုံးက စီစဉ်တဲ့ ဒီဆုပေးပွဲဟာ ကမ္ဘာ့ဘောလုံးလောကရဲ့ အကြီးမားဆုံး ဆုဖြစ်ပြီး ကစားသမားတိုင်းက လိုချင်မက်မောတဲ့ ဆုလည်း ဖြစ်ပါတယ်။

အခုနှစ်အတွက် ပေးအပ်မယ့်ဆုဟာ အရင်နှစ်တွေကလို ပြက္ခဒိန်တစ်နှစ်လုံးရဲ့ စွမ်းဆောင်ရည်အစား ရာသီရဲ့ ရလဒ်တွေအပေါ် အခြေခံပြီး ပထမဆုံးအကြိမ် ပေးမှာလည်း ဖြစ်ပါတယ်။

ဒီဆုပေးပွဲမှာဆိုရင် အမျိုးသား ဘောလွန်းဒီအောဆု၊ အမျိုးသမီး ဘောလွန်းဒီအောဆု၊ အကောင်းဆုံး လူငယ် ကစားသမား၊ အကောင်းဆုံး ဂိုးသမားဆုတွေ ချီးမြှင့်သွားမှာ ဖြစ်ပါတယ်။ ဒီထဲမှာ အားလုံးစိတ်ဝင် အစားဆုံး ကတော့ အမျိုးသား ဘောလွန်းဒီအောဆု ဖြစ်ပါတယ်။

ဒီဆုအတွက် ဆန်ကာတင် ၃၀ ဦး စာရင်းလည်း ထုတ်ပြန်ခဲ့ပြီးပါပြီ။ ဒီထဲမှာ အံ့အားသင့်စရာကတော့ ဘောလွန်း ဒီအောဆုကို စံချိန်တင် ရရှိထားတဲ့ မက်ဆီဟာ ဒီစာရင်းထဲမှာ မပါဝင်ခဲ့တာပါ။ လက်ရှိ ဘောလွန်းဒီအောဆု ပိုင်ရှင် မက်ဆီအတွက်တော့ ၂၀၀၅ နောက်ပိုင်း ပထမဆုံးအကြိမ် ဘောလွန်းဒီအော ဆန်ကာတင်မှာ မပါဝင်ခဲ့တာ တွေ့ရပါတယ်။

ရီးရယ်လ် တိုက်စစ်မှူး ဘန်ဇီမာကိုတွေ့ရစဉ်(The Real Champs)

ဘောလွန်းဒီအောဆု ရခဲ့တာကို ပြန်ကြည့်ရမယ်ဆိုရင် ၂၀၀၈ နောက်ပိုင်း ဒီဆုကို ရော်နယ်ဒိုနဲ့ မက်ဆီတို့ကသာ ကြီးစိုးခဲ့တာဖြစ်ပြီး ၂၀၁၈ မှာ မိုဒရစ်ရရှိခဲ့တဲ့ တစ်ကြိမ်တည်းသာ သူတို့ နှစ်ဦးထဲက တစ်ဦး မရခဲ့တာပါ။

ဒီနှစ်မှာတော့ မက်ဆီ မပါဝင်သလို ရော်နယ်ဒိုကလည်း ဆန်ကာတင် စာရင်းမှာ ပါဝင်ပေမယ့် ဆုရဖို့ မဖြစ်နိုင်တာ ကြောင့် ဘောလွန်းဒီအောဆု ပိုင်ရှင်သစ် ထွက်ပေါ်လာတော့မှာ ဖြစ်ပါတယ်။ ဒီနှစ်အတွက် ဆုရဖို့ ရေပန်းစားနေ တဲ့ သူကတော့ ရီးရယ်လ်နဲ့ ပြင်သစ်လက်ရွေးစင် တိုက်စစ်မှူး ဘန်ဇီမာပဲ ဖြစ်ပါတယ်။

ဘန်ဇီမာဟာ ရေပန်းစားနေတာထက် တကယ်ကို ဆုရဖို့ ထိုက်တန်နေတာလည်း ဖြစ်ပါတယ်။ ဘာဖြစ်လို့လဲဆို ရင် ဘန်ဇီမာဟာ ပြီးခဲ့တဲ့ရာသီက ရီးရယ်လ်အသင်း လာလီဂါနဲ့ ချန်ပီယံလိဂ်ဖလား ရယူခဲ့တာမှာ ဒီကစားသမားရဲ့ စွမ်းဆောင်ရည်က အဓိကကျခဲ့တာ ဖြစ်ပါတယ်။

ဘန်ဇီမာဟာ မနှစ်က ရာသီက ရီးရယ်လ်အသင်းအတွက် ၄၆ ပွဲကစားခဲ့ပြီး ၄၄ ဂိုးအထိ သွင်းယူနိုင်ခဲ့တာပါ။ ဘန်ဇီမာဟာ လာလီဂါပြိုင်ပွဲနဲ့ ချန်ပီယံလိဂ်ပြိုင်ပွဲ ၂ ခုစလုံးမှာ ဂိုးသွင်း ရွှေဖိနပ်ဆုနဲ့ အကောင်းဆုံး ကစားသမား ဆုတွေကို သိမ်းပိုက်နိုင်ခဲ့ပါတယ်။

ဘောလွန်းဒီအောဆုကို တွေ့ရစဉ် (BALLON D'OR)

ရီးရယ်လ်အသင်း ချန်ပီယံလိဂ်မှာ ချန်ပီယံဖြစ်ခဲ့တဲ့ လမ်းကြောင်းတစ်လျှောက် အရေးကြီးတဲ့ ပွဲတွေဖြစ်တဲ့ ပီအက်စ်ဂျီ၊ ချယ်လ်ဆီးနဲ့ မန်စီးတီး တို့ပွဲတွေမှာ ဘန်ဇီမာရဲ့ ဂိုးတွေက စပိန်ကလပ်အတွက် အရေးပါခဲ့တာပါ။

ဒါကြောင့်လည်း ပြီးခဲ့တဲ့ ရာသီကတည်းက ဘန်ဇီမာဟာ ၂၀၂၂ အတွက် ဘောလွန်းဒီအောဆုကို ရယူနိုင်ပြီးသား ဖြစ်နေပြီလို့ ပြောနေကြတာ ဖြစ်ပါတယ်။ မက်ဆီ၊ မာနေးတို့ အပါအဝင် အဓိက ကစားသမားတွေ ကလည်း ဘန်ဇီမာကိုသာ အခုနှစ်အတွက် ဘောလွန်းဒီအောဆုရှင်အဖြစ် မှတ်ယူထားကြပါတယ်။

ဘောလုံးသုံးသပ်သူတွေရော၊ ဘောလုံး ပရိသတ်တွေကလည်း ဘန်ဇီမာမှ ဘန်ဇီမာဆိုပြီး ပြောခဲ့ကြသလို ဘာစီလိုနာ တိုက်စစ်မှူး လီဝန်ဒေါစကီးက ဆုပေးပွဲသာ မဖျက်ဘူးဆိုရင် ဘန်ဇီမာပဲ ရမှာလို့ ပြောခဲ့ကြတာ ဖြစ်ပါတယ်။

ဘန်ဇီမာ ကိုယ်တိုင်ကလည်း ဒီဆုကို ရယူနိုင်မယ်လို့ ယုံကြည်မှု အပြည့်ရှိနေတာပါ။ ပြီးခဲ့တဲ့ ရက်ပိုင်းကလည်း ဘောလွန်းဒီအောဆု ရတဲ့စာရင်း ပေါက်ကြားမှုတွေ ရှိလာပြီး အားလုံးက ထင်ထားတဲ့အတိုင်းပဲ ဘန်ဇီမာက ထိပ်ဆုံးနေရာမှာ ရပ်တည်ခဲ့တာ ဖြစ်ပါတယ်။

ရီးရယ်လ်အသင်း ချန်ပီယံလိဂ်ဖလား ရရှိခဲ့စဉ် (Eurosport)

ပြင်သစ်တိုက်စစ်မှူးဟာ ဘောလွန်းဒီအောဆု မတိုင်ခင် ယူအီးအက်ဖ်အေ အမျိုးသားတစ်နှစ်တာ အကောင်းဆုံး ကစားသမားဆုကိုလည်း ပထမဆုံးအကြိမ် ရယူထားနိုင်ခဲ့တာပါ။ ဘန်ဇီမာဟာ အခုနှစ်အတွင်းမှာ ပီချီချီဆု၊ ဒီစတိဖာနိုဆု အပါအဝင် တစ်ဦးချင်း ဆုတံဆိပ် အများအပြားကို ရယူနိုင်ခဲ့တာ ဖြစ်ပါတယ်။

အသက် ၃၄ နှစ်အရွယ်ရှိ ဘန်ဇီမာ အတွက်တော့ ဘောလွန်းဒီအောဆုကို သိမ်းပိုက်နိုင်မယ်ဆိုရင် သူ့ရဲ့ ကစား သမားဘဝအတွက် တစ်ဦးချင်း ဆုတံဆိပ်တွေဟာ ပြီးပြည့်စုံသွားခဲ့ပြီ ဖြစ်ပါတယ်။

ဘန်ဇီမာဟာ ဒီရာသီမှာတော့ ဒဏ်ရာတွေကြောင့် ရီးရယ်လ်အသင်းအတွက် ပွဲအနည်းငယ် မပါဝင်ခဲ့ပေမယ့် ပါဝင် ကစားခဲ့တဲ့ ၉ ပွဲမှာ ၄ ဂိုးအထိ သွင်းယူထားတာ ဖြစ်ပါတယ်။ ဘာတွေပဲဖြစ်ဖြစ် တနင်္လာနေ့မှာတော့ ဘန်ဇီမာ တစ်ယောက် ဘောလွန်းဒီအောဆုနဲ့ အောင်ပွဲခံပြီး ပြုံးပျော်ရွှင်နေတဲ့ ပုံရိပ်တွေကို မြင်တွေ့ရတော့မှာလည်း ဖြစ်ပါတယ်။