CNI Sport News

၂၀၂၂ ခုနှစ်၊ နိုဝင်ဘာ ၁၀

ရော်နယ်ဒိုဟာ ယူနိုက်တက်အသင်းထံ ပေါင် ၁၂ သန်းနဲ့ ၂၀၀၃ က မပြောင်းရွှေ့ခင်မှာ ဘောလုံးလောကကနေ ထွက်ခွာလုနီးပါး ဖြစ်ခဲ့တယ်လို့ သိရပါတယ်။

အဲဒီ အချိန်တုန်းက ရော်နယ်ဒိုဟာ စပို့တင်းလစ္စဘွန်း အသင်းရဲ့ ဆယ်ကျော်သက် ကစားသမားတစ်ဦးဖြစ်ပြီး အနိုင်ကျင့်ခံရတာကြောင့် ဘောလုံးလောကကနေ ထွက်ခွာချင်ခဲ့တာလို့ သတင်းတွေမှာ ဖော်ပြထားတာပါ။

စပို့တင်းမှာ အကယ်ဒမီ ကစားသမားအဖြစ် ရှိနေချိန်အတွင်း သူ့ရဲ့ စကားပြောဆိုမှု လေယူလေသိမ်းကို တခြား ကောင်လေးတွေက ဝိုင်းဝန်း လှောင်ပြောင်ခဲ့ကြတာ ဖြစ်ပါတယ်။ သူဟာ မိသားစုကို လွမ်းနေတာကြောင့်လည်း နေ့တိုင်းငိုခဲ့ရတယ်လို့ The Sun က ဖော်ပြခဲ့ပါတယ်။

နောက်ဆုံးမှာတော့ ရော်နယ်ဒိုဟာ ကျောင်းကနေ ထွက်ခဲ့ပြီး ဘောလုံးကိုသာ အာရုံစိုက်ခဲ့လို့ စပို့တင်း ပထမ အသင်းကြီးဆီ ခေါ်ယူခြင်း ခံခဲ့ရပါတယ်။ ပေါ်တူဂီ ကစားသမားဟာ စပို့တင်းမှာ ရှိတဲ့အချိန် အတွင်းမှာ သူ လိုချင်တဲ့ အချိန်တိုင်း အားကစားခန်းမကို အသုံးပြုလို့ မရတာကြောင့် မပျော်မရွှင် ဖြစ်ခဲ့ရပါသေးတယ်။

အားကစားခန်းမကို အသုံးပြုတဲ့ ကလေးတွေနဲ့ ပက်သက်ပြီး ကလပ်အသင်းက တင်းကျပ်တဲ့ မူဝါဒတွေကို ချမှတ်ထားတာ ဖြစ်ပါတယ်။

ရော်နယ်ဒို ယူနိုက်တက်နဲ့ စပို့တင်းလစ္စဘွန်း အသင်းတို့မှာ ကစားစဉ် (Ronaldo)

ကလပ် အကယ်ဒမီ အမှုဆောင် အော်ရယ်လီယိုပါရဲရားက “ ကျနော်တို့ဟာ ကလေးတွေကို အားကစားရုံမှာ ဘယ်တုန်းကမှ မထားခဲ့ပါဘူး။ ဒါဟာ ကျနော်တို့ ကစားသမားတွေရဲ့ ရှည်ကြာတဲ့ ကစားသမားဘဝ နောက် ကွယ်က လျှို့ဝှက်ချက်ပါပဲ။ သဘာဝအတိုင်း ကြီးထွားဖွံ့ဖြိုးလာဖို့က ပိုပြီးအရေးကြီးပါတယ်”လို့ ပြောပါတယ်။

ရော်နယ်ဒိုဟာ အလေးမ လေ့ကျင့်ခန်းတွေ ပြုလုပ်ဖို့ ညဘက်တွေမှာ ထွက်လာခဲ့ပြီး သူ့ရဲ့ လုပ်ဆောင်မှုတွေကို သိရှိခဲ့လို့ အပြစ်ပေးတဲ့ အနေနဲ့ ထိန်းသိမ်းထားခဲ့တာ ဖြစ်ပါတယ်။

ရော်နယ်ဒို အနေနဲ့ ဒီလိုမျိုး လုပ်ဆောင်မှာကို တားဆီးတဲ့ အနေနဲ့ အားကစားခန်းမရဲ့ တံခါးတွေကို သော့ခ လောက်နဲ့ သော့ခတ်ခဲ့ပါတယ်။

ဒါပေမယ့် ရော်နယ်ဒို ကတော့ ရပ်တန့်သွားခြင်းမရှိပဲ ပိုမိုသန်မာလာစေဖို့ အရာအားလုံးကို ကြိုးစား လုပ်ဆောင်ခဲ့ ပါတယ်။ ရော်နယ်ဒိုဟာ ဒီလိုလုပ်ဆောင်မှုတွေကြောင့် သူ့ရဲ့ ခန္ဓာကိုယ် အချိုးအစားကို အခုအချိန်ထိ ထိန်းသိမ်း ထားနိုင်ခဲ့တာပါ။

ပေါ်တူဂီ ကစားသမားဟာ အသက် ၃၈ နှစ်ပြည့်ဖို့ နီးစပ်နေပေမယ့် အခုအချိန်ထိ ထိပ်တန်းအဆင့်မှာ ကစား နိုင်သေးတယ်ဆိုတာကို အကောင်းဆုံး ကြိုးစားပြီး သက်သေပြနေပါတယ်။

Source: Sportbible

CNI Sport News

၂၀၂၂ ခုနှစ်၊ နိုဝင်ဘာ ၁၀

ရိုးမားအသင်းနည်းပြ မော်ရင်ဟိုက ဆက်ဆူအိုလိုအသင်းနဲ့ ၁ ဂိုးစီ သရေကျတဲ့ ပွဲအပြီးမှာ ပရော်ဖက်ရှင်နယ် မပီသတဲ့ အသင်း ကစားသမားတစ်ဦးကို ထွက်ခွာဖို့ ပြောလိုက်ပါတယ်။

မော်ရင်ဟိုက “ ကျနော်တို့ဟာ ခက်ခဲတဲ့ ပြိုင်ဘက်ကို အနိုင်ယူချင်တဲ့ အသင်းပါ။ ပရော်ဖက်ရှင်နယ် မဆန်တဲ့ ကစားသမားတစ်ဦးရဲ့ စိတ်နေ သဘောထားကြောင့် အသင်းရဲ့ ကြိုးစားအားထုတ်မှုကို သစ္စာဖောက်သလို ဖြစ်ရလို့ ကျနော် ဝမ်းနည်းမိပါတယ်။ သူ့ရဲ့ ပရော်ဖက်ရှင်နယ် မဆန်တဲ့ စိတ်နေသဘောထားက အသင်းဖော်တွေအတွက် မျှတမှု မရှိပါဘူး။ ဒါက ကျနော့်ကို စိတ်ပျက်စေပါတယ်”လို့ DAZN ကို ပြောခဲ့ပါတယ်။

ဒီပွဲမှာ အေဘရာဟမ်က ပွဲချိန်မိနစ် ၈၀ မှာ ရိုးမားအတွက် ဦးဆောင်ဂိုး စတင်သွင်းယူပေးခဲ့ပြီး ဒီဂိုးဟာ စက်တင်ဘာလ နောက်ပိုင်း သူ့ရဲ့ ပထမဆုံး လိဂ်ဂိုးလည်း ဖြစ်ခဲ့ပါတယ်။

ဒါပေမယ့် ပွဲချိန် ၈၅ မိနစ်မှာ ပီနာမွန်တီက ဆက်ဆူအိုလိုအတွက် ချေပဂိုး သွင်းပေးခဲ့လို့ သရေရလဒ်နဲ့ ပြီးဆုံးခဲ့ပါ တယ်။ ပရော်ဖက်ရှင်နယ် မပီသတဲ့ ကစားသမားရဲ့ အမည်ကိုတော့ မော်ရင်ဟိုက ထုတ်ဖော်ပြောဖို့ ငြင်းဆန် ခဲ့ပါတယ်။

 ရိုးမားကစားသမား တစ်ဦးကိုတွေ့ရစဉ် (Sports)

မော်ရင်ဟိုက “ ကျနော် ခင်ဗျားတို့ကို ပြောမှာ မဟုတ်ပါဘူး။ ကျနော့်ရဲ့ ကစားသမား ၁၆ ဦးအထိ ရှိခဲ့ပြီး ဒီထဲက ၁၅ ဦးရဲ့ စိတ်နေ သဘောထားကို ကျနော် သဘောကျပါတယ်။ ဇန်နဝါရီ ကျရင်တော့ အဆိုပါ ကစားသမားအနေ နဲ့ အခြားကလပ် တစ်သင်းကို ရှာဖွေဖို့ လိုအပ်ပါတယ်”လို့ ပြောခဲ့တာပါ။

မော်ရင်ဟိုဟာ ဘယ်ကစားသမားကို ပြောနေတယ်ဆိုတာ ရှင်းရှင်းလင်းလင်း မသိရပေမယ့် ဇန်နဝါရီ အပြောင်း အရွှေ့ မတိုင်ခင်မှာ သူ့ခံစားချက်တွေကို ချပြခဲ့တာ ဖြစ်ပါတယ်။ ရိုးမားအသင်းဟာ ပြီးခဲ့တဲ့ စီးရီးအေပွဲမှာ လာဇီယို အသင်းကို အရေးနိမ့်ခဲ့ပြီး ဒီပွဲမှာ သရေကျခဲ့တာကြောင့် ၂ ပွဲဆက်တိုက် ရမှတ်တွေ လျော့ကျခဲ့တာပါ။

ရိုးမားအသင်းဟာ ဒီပွဲရလဒ်ကြောင့် စီးရီးအေ အမှတ်ပေးဇယား အဆင့် ၆ နေရာမှာ ရပ်တည်နေတာ ဖြစ်ပါတယ်။

ရိုးမားအသင်းဟာ ကမ္ဘာ့ဖလားပြိုင်ပွဲ မတိုင်ခင် စီးရီးအေ နောက်ဆုံးပွဲစဉ်အဖြစ် တိုရီနိုအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ နိုဝင်ဘာ ၉

ကမ္ဘာ့ဖလားပြိုင်ပွဲ ကျင်းပဖို့ ရက်ပိုင်းသာ လိုအပ်တော့ချိန်မှာ EA Sports က အာဂျင်တီးနားဟာ ဒီပြိုင်ပွဲမှာ ချန်ပီယံဆုကို ရရှိသွားလိမ့်မယ်လို့ ခန့်မှန်းလိုက်ပါတယ်။

ဖီဖာဘောလုံးဂိမ်းတွေကို ထုတ်လုပ်တဲ့ EA Sports ဟာ ကမ္ဘာ့ဖလားပြိုင်ပွဲ တစ်ခုလုံးကို တုပပြီး ခန့်မှန်းမှု ပြုလုပ် သွားခဲ့တာပါ။ EA Sports ဟာ ကမ္ဘာ့ဖလား ချန်ပီယံဆုအတွက် ခန့်မှန်းတာနဲ့ ပက်သက်ပြီး အထင်ကြီးစရာ ကောင်းတဲ့ မှတ်တမ်းတွေ ရှိနေတာလည်း ဖြစ်ပါတယ်။

၂၀၁၀ ကမ္ဘာ့ဖလားမှာ စပိန်၊ ၂၀၁၄ ကမ္ဘာ့ဖလားမှာ ဂျာမနီနဲ့ ၂၀၁၈ ကမ္ဘာ့ဖလားပြိုင်ပွဲမှာ ပြင်သစ်အသင်း ချန်ပီယံဆု ရယူနိုင်မယ်လို့ ခန့်မှန်းတာမှာ မှန်ကန်ခဲ့ပါတယ်။

EA Sports က အာဂျင်တီးနား အသင်းဟာ ၂၀၂၂ ကမ္ဘာ့ဖလားဗိုလ်လုပွဲမှာ ဘရာဇီးလ်အသင်းနဲ့ တွေ့ဆုံမှာ ဖြစ်ပြီး ၁ ဂိုး- ဂိုးမရှိနဲ့ အနိုင်ရကာ ချန်ပီယံဆုကို ရယူမယ်လို့ ခန့်မှန်းခဲ့တာ ဖြစ်ပါတယ်။

၂၀၂၂ ကမ္ဘာ့ဖလား အကောင်းဆုံးရလာနိုင်မယ့် စာရင်းကို EA Sports ကထုတ်ပြန်ထား

တတိယနေရာကိုတော့ ပြင်သစ်အသင်းက ပေါ်တူဂီအသင်းကို ၄ ဂိုး- ၂ ဂိုးနဲ့ အနိုင်ယူပြီး ရရှိမယ်လို့ ခန့်မှန်းထား တာပါ။ နာမည်ကြီး အင်္ဂလန်ဟာ ၁၆ သင်းအဆင့်မှာ နယ်သာလန်ကို ၃ ဂိုး- ၁ ဂိုးနဲ့ အရေးနိမ့်ပြီး ထွက်ခွာရမယ်လို့ သူတို့ရဲ့ ခန့်မှန်းမှုမှာ ဖော်ပြထားတာ ဖြစ်ပါတယ်။

မက်ဆီဟာ ဒီပြိုင်ပွဲမှာ ၇ ပွဲ ကစားတာမှာ ၈ ဂိုးသွင်းပြီး ဂိုးသွင်းဘုရင်ဆုနဲ့ ပြိုင်ပွဲရဲ့ အကောင်းဆုံး ကစားသမားဆု ကို ရရှိမယ်လို့လည်း EA Sports က ခန့်မှန်းထားတာပါ။

ဒီပြိုင်ပွဲရဲ့ အကောင်းဆုံးအသင်းမှာ မာတီးနတ်စ်၊ ကန်ဆယ်လို၊ ဗာရန်း၊ မာကွင်ဟိုစ်၊ အကူနာ၊ ပါရီဒက်စ်၊ ဒီပေါလ်၊ ဗီနီစီးယက်စ်၊ မက်ဆီ၊ ဘတ်ပီနဲ့ ရစ်ချာလီဆန် တို့ ပါဝင်မယ်လို့ ခန့်မှန်းထားတာ ဖြစ်ပါတယ်။

၂၀၂၂ ကမ္ဘာ့ဖလား ပြိုင်ပွဲကိုတော့ နိုဝင်ဘာလ ၂၀ ရက်ကနေ ဒီဇင်ဘာလ ၁၈ ရက်အထိ ကျင်းပမှာဖြစ်ပါတယ်။

Source: Sportbible

CNI Sport News

၂၀၂၂ ခုနှစ်၊ နိုဝင်ဘာ ၉

အီကွေဒေါ အသင်းနည်းပြ အယ်လ်ဖာရိုက အိမ်ရှင်ကာတာနဲ့ သူ့အသင်း ကစားမယ့် ကမ္ဘာ့ဖလားပြိုင်ပွဲ အဖွင့်ပွဲစဉ် ကို ရက်ပြောင်းလဲ ကျင်းပတဲ့ ဆုံးဖြတ်ချက်အပေါ် ဝေဖန်လိုက်ပါတယ်။

အယ်လ်ဖာရိုက “ကျနော်တို့ ပြင်ဆင်ချိန် တစ်ရက် လျော့နည်းသွားပါတယ်။ ဒီလို ရက်ပြောင်းလဲ ကျင်းပတာနဲ့ ပက်သက်ပြီး အကောင်အထည် ဖော်တာမှာ ပြဿနာတစ်စုံတစ်ရာ ရှိ၊မရှိ ဆိုတာကိုလည်း ကျနော်တို့နဲ့ ဆွေးနွေး တိုင်ပင်မှု မရှိခဲ့ဘူး”လို့ အင်္ဂါနေ့က ပြုလုပ်တဲ့ သတင်းစာ ရှင်းလင်းပွဲမှာ ပြောပါတယ်။

ကမ္ဘာ့ဖလားပြိုင်ပွဲကို မူလက နိုဝင်ဘာလ ၂၁ ရက်မှာ ကျင်းပဖို့ စီစဉ်ခဲ့တာဖြစ်ပေမယ့် ပြိုင်ပွဲစီစဉ်သူတွေက အိမ်ရှင်အသင်းနဲ့ ပြိုင်ပွဲစတင်တာ ပိုကောင်းတယ်လို့ ဆုံးဖြတ်ခဲ့တာ ဖြစ်ပါတယ်။

အဲ့ဒါကြောင့် ကာတာနဲ့ အီကွေဒေါ အသင်းရဲ့ ပွဲကို ရှေ့တစ်ရက်တိုးပြီး နိုဝင်ဘာလ ၂၀ ရက်မှာ ကျင်းပဖို့ ပြုလုပ်ခဲ့ တာပါ။ အီကွေဒေါအသင်းဟာ တောင်အမေရိကဇုန် ခြေစစ်ပွဲမှာ ဘရာဇီးလ်၊ အာဂျင်တီးနား၊ ဥရုဂွေးတို့ရဲ့ နောက် စတုတ္တနေရာရကာ ကမ္ဘာ့ဖလား ခြေစစ်ပွဲ အောင်မြင်ခဲ့တာပါ။

အီကွေဒေါအသင်းသားများကိုတွေ့ရစဉ်(FIFA)

အီကွေဒေါအသင်းဟာ အသုံးပြုလို့မရတဲ့ ကစားသမား ကတ်စတီလိုကို အသုံးပြုခဲ့လို့ ကမ္ဘာ့ဖလားပြိုင်ပွဲကနေ ထုတ်ပယ်ဖို့ တောင်းဆိုမှုတွေနဲ့လည်း ရင်ဆိုင်ခဲ့ ရပါသေးတယ်။

ဒါပေမယ့် အားကစားခုံရုံးက ကတ်စတီလိုဟာ အီကွေဒေါနိုင်ငံသား ဖြစ်တယ်လို့ ပြောခဲ့တာကြောင့် လက်ရွေးစင် အသင်းဟာ ကမ္ဘာ့ဖလား ယှဉ်ပြိုင်ခွင့်ရဖို့ သေချာသွားခဲ့တာ ဖြစ်ပါတယ်။ အီကွေဒေါအသင်းဟာ အခုတစ်ကြိမ်နဲ့ ဆို ကမ္ဘာ့ဖလားပြိုင်ပွဲကို ၄ ကြိမ်မြောက်အဖြစ် ဝင်ရောက်ယှဉ်ပြိုင်မှာပါ။

၂၀၀၆ က ဂျာမနီမှာကျင်းပခဲ့စဉ်က ၁၆ သင်းအဆင့် တက်နိုင်တာကလွဲပြီး အီကွေဒေါအသင်းဟာ ကျန်တဲ့ ၂ ကြိမ် စလုံး အုပ်စုအဆင့်ကနေ ထွက်ခွာခဲ့ရတာ ဖြစ်ပါတယ်။ အီကွေဒေါအသင်းဟာ အခုနှစ် ကမ္ဘာ့ဖလားပြိုင်ပွဲရဲ့ အုပ်စု A မှာ အိမ်ရှင်ကာတာ၊ ဆီနီဂေါ၊ နယ်သာလန်တို့နဲ့ တစ်အုပ်စုတည်း ကျရောက်နေပြီး နောက်တစ်ဆင့် တက်ဖို့ ကြိုးစားရမှာ ဖြစ်ပါတယ်။

Source:CNA

CNI Sport News

၂၀၂၂ ခုနှစ်၊ နိုဝင်ဘာ ၈

သြစတြေးလျအသင်းဟာ ၂၀၂၂ ကမ္ဘာ့ဖလားပြိုင်ပွဲဝင်မယ့် ကစားသမား ၂၆ ဦးစာရင်းကို ထုတ်ပြန်ခဲ့တာမှာ နယူးကာဆယ် ကစားသမားသစ် ကူရိုလ် ပါဝင်လာခဲ့တာ ဖြစ်ပါတယ်။

နယူးကာဆယ်အသင်းဟာ အသက် ၁၈ နှစ်အရွယ်ရှိ ကစားသမားကို စင်ထရယ်လ် ကို့စ်မာရီနာ အသင်းကနေ ခေါ်ယူဖို့ သဘောတူညီမှု ရရှိထားတာဖြစ်ပြီး ဇန်နဝါရီမှာ အသင်းနဲ့ ပူးပေါင်းမှာ ဖြစ်ပါတယ်။

ကူရိုလ်ဟာ ဒီရာသီမှာ သြစတြေးလျ ကလပ်အတွက် အေလိဂ်ပြိုင်ပွဲမှာ ၃ ပွဲ ပါဝင်ကစားထားပြီး လက်ရွေးစင် အသင်းအတွက် စက်တင်ဘာလက နယူးဇီလန်နဲ့ ခြေစမ်းပွဲမှာ ၁ ပွဲသာ ပါဝင် ကစားထားတာ ဖြစ်ပါတယ်။

သြစတြေးလျနည်းပြ ဂရေဟမ်အာနိုးလ်က “ဒီကောင်လေးဟာ သူ့ကိုယ်သူ အကောင်းဆုံး ဖြစ်နေရပါမယ်။ သူဟာ ပွဲတစ်ပွဲကို ပြောင်းလဲအောင် ဘယ်လို လုပ်ဆောင်ရမလဲဆိုတာကို ပြသထားပါတယ်။ သူဟာ ကြောက်ရွံခြင်း လုံးဝ မရှိသလို ပွဲကို ဖျော်ဖြေမှု ပေးချင်တဲ့သူပါ”လို့ လူစာရင်း ထုတ်ပြန် အပြီးမှာ ပြောခဲ့တာပါ။

သြစတြေးလျအသင်း ကစားသမား ကူရိုလ်ကို တွေ့ရစဉ်

သြစတြေးလျအသင်း လူစာရင်းမှာ ဝက်စ်ဘရွန်းနဲ့ ဆဲလ်တစ် ကွင်းလယ်လူဟောင်း တွမ်ရိုဂျစ်၊ ဗဟိုနောက်ခံလူ စိန့်ဘူရီ၊ နာဂိုရာဂိုးသမား လန်ဂီရတ်ခ်တို့ ချန်လှပ်ခံခဲ့ရပါတယ်။

ဂရေဟမ်အာနိုးလ်က “စိန့်ဘူရီဟာ ရက်သတ္တပတ် ပေါင်းများစွာ ပွဲမကစားခဲ့ရပါဘူး။ ကျနော်ဟာ အလုပ်ကို ကောင်းမွန်စွာ လုပ်ဆောင်နေတဲ့ ဆူတာ၊ ရိုဝယ်လ်စ်စတဲ့ ကစားသမားတွေကို ရွေးချယ်ခဲ့ပါတယ်။ ခက်ခဲတဲ့ ဆုံးဖြတ်ချက်တွေကို ချမှတ်ခဲ့ရတာပါ”လို့ ပြောခဲ့တာပါ။

သြစတြေးလျအသင်း လူစာရင်းမှာ သြစတြေးလျ အခြေစိုက် ကစားသမား ၇ ဦးအထိ ပါဝင်နေတာ ဖြစ်ပါတယ်။
ကမ္ဘာ့ဖလားပြိုင်ပွဲရဲ့ အုပ်စု D မှာ ပြင်သစ်၊ တူနီးရှား၊ ဒိန်းမတ်တို့နဲ့ တစ်အုပ်စုတည်း ကျရောက်နေတဲ့ သြစတြေးလျ အသင်းဟာ အဖွင့်ပွဲစဉ်အဖြစ် နိုဝင်ဘာလ ၂၂ ရက်မှာ လက်ရှိချန်ပီယံ ပြင်သစ်အသင်းနဲ့ ယှဉ်ပြိုင်ရမှာပါ။

ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲမှာ အုပ်စုအဆင့်ကနေ လှည့်ပြန်ခဲ့ရတဲ့ သြစတြေးလျအသင်းဟာ ဒီပြိုင်ပွဲမှာ အမြင့်ဆုံး အောင်မြင်မှုအဖြစ် ၁၆ သင်း အဆင့်ထိသာ တက်လှမ်းနိုင်ခဲ့တာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ နိုဝင်ဘာ ၈

မန်စီးတီးနောက်ခံလူ မန်ဒီက သူဟာ ဘရက်ပစ် မဟုတ်ပေမယ့် အမျိုးသမီးတွေနဲ့ လိင်ဆက်ဆံတာမှာ အလွန် လွယ်ကူတယ်လို့ မုဒိမ်းမှုနဲ့ ပက်သက်ပြီး ရုံးတင် စစ်ဆေးတာမှာ ပြောလိုက်ပါတယ်။

မန်ဒီဟာ အမျိုးသမီးငယ် ၆ ဦးကို မုဒိမ်းမှု ၇ မှု၊ မုဒိမ်းကျင့်ရန် ကြိုးပမ်းမှု ၁ မှု၊ လိင်ပိုင်းဆိုင်ရာ စော်ကားမှု ၁ မှုတို့ နဲ့ စွဲချက်တင် ခံထားရပါတယ်။

အသက် ၂၈ နှစ်အရွယ်ရှိ မန်ဒီဟာ Chester Crown တရားရုံးမှာ ပြုလုပ်တဲ့ ရုံးချိန်းမှာ ပထမဆုံးအကြိမ် သက်သေ တွေရဲ့ ရှေ့မှောက်မှာ ထွက်ဆိုခဲ့တာ ဖြစ်ပါတယ်။

မန်ဒီက “သူဟာ ဘရက်ပစ် မဟုတ်ပေမယ့် ရိုးရိုးသားသား ပြောရရင် အမျိုးသမီးတွေနဲ့ တွေ့ဆုံတာ၊ လိင် ဆက်ဆံ တာက အလွန်လွယ်ကူတယ်”လို့ တရားရုံးကို ထွက်ဆိုခဲ့တာပါ။

မန်စီးတီးအသင်းမှာ ကစားချိန် အမျိုးသမီးတွေက သူ့အပေါ်မှာ အာရုံစူးစိုက်မှု ၁၀ ဆကျော်သွားတယ်လို့လည်း ပြင်သစ်ကစားသမားက ပြောခဲ့ပါတယ်။

 မန်စီးတီးအသင်းမှာ မန်ဒီကစားစဉ်

မန်ဒီက “ မန်စီးတီးက ဥရောပရဲ့ အကောင်းဆုံးတွေထဲက တစ်သင်းပါ။ သူတို့တွေ ကျနော့်ဆီကို ရောက်လာခဲ့ တာက ကျနော့်ကြောင့် မဟုတ်ပါဘူး။ ဘောလုံးကြောင့်ပါ။ သူတို့အာရုံစူးစိုက်တာက ကျနော့်အတွက် ဆိုးတယ်လို့ ပြောလို့ မရပါဘူး”လို့ ပြောခဲ့တာပါ။

မန်စီးတီးနောက်ခံလူဟာ အမျိုးသမီးအများစုက သူ့ကို ချဉ်းကပ်မှုတွေ ပြုလုပ်ခဲ့ကြပြီး လိင်မဆက်ဆံချင်ဘူးဆိုရင် ရပ်တန့်လိုက်တယ်လို့လည်း ပြောခဲ့တာ ဖြစ်ပါတယ်။

မန်ဒီဟာ တစ်ညတည်းမှာပဲ အမျိုးသမီး အများအပြားနဲ့ မကြာခဏဆိုသလို အိပ်လေ့ရှိတယ်လို့လည်း တရား သူကြီးတွေကို ပြောခဲ့တာပါ။ မန်ဒီဟာ ချက်ရှိုင်းယားရှိ သူ့ရဲ့ နေအိမ်မှာ ပါတီပွဲတွေ ပြုလုပ်ရင်း အမျိုးသမီးတွေကို မုဒိမ်းကျင့်တယ်လို့ စွပ်စွဲခံနေရတာ ဖြစ်ပါတယ်။

မန်ဒီဟာ မန်စီးတီးအသင်းမှာ ကစားခွင့် ဆိုင်းငံ့ခံထားရပေမယ့် တစ်နှစ်လုပ်ခ ပေါင် ၄.၇ သန်း ရရှိနေတာပါ။ မန်ဒီဟာ တွဲဖက်တရားခံ မက်တူရီနဲ့အတူ တရားရင်ဆိုင် နေရတာ ဖြစ်ပါတယ်။

နှစ်ဦးစလုံးကတော့ မုဒိမ်းမှုနဲ့ ပက်သက်ပြီး ငြင်းဆိုထားကြပြီး ရုံးချိန်းကတော့ ဆက်လက် ပြုလုပ်နေတာပါ။

ပြင်သစ်လက်ရွေးစင်နဲ့ ၂၀၁၈ ကမ္ဘာ့ဖလား ရရှိခဲ့တဲ့ မန်ဒီဟာ မန်စီးတီးအသင်းအတွက် ပြီးခဲ့တဲ့ရာသီက ပရီးမီးယားလိဂ် ၁ ပွဲသာ ပါဝင်ကစားခဲ့ရပြီး မုဒိမ်းမှုကြောင့် စွဲချက်တင် ခံထားရတာ ဖြစ်ပါတယ်။

Source:The Sun

CNI Sport Article

၂၀၂၂ ခုနှစ်၊ နိုဝင်ဘာ ၆

နာပိုလီအသင်းဟာ အလွန်ကောင်းမွန်တဲ့ တိုက်စစ်ကစားသမားတွေ အမြဲတမ်း ထွက်ပေါပြီး ပရိသတ်တွေကို ဆွဲဆောင်မှုရှိတဲ့ အသင်းဖြစ်ပါတယ်။ မကြာသေးခင် နှစ်တွေမှာ မာတန်စ်၊ အင်ဆစ်ဂနီတို့လို တိုက်စစ်မှူးတွေ ရှိခဲ့သလို လွန်ခဲ့တဲ့ နှစ်တွေကဆိုရင် ဟမ်ဆစ်ခ်၊ လာဗတ်ဇီနဲ့ ကာဗာနီတို့လည်း ရှိခဲ့တာပါ။

ဒါပေမယ့် ဘယ်သူကမှ မာရာဒိုနာကိုကျော်ပြီး ချစ်ခင်နှစ်သက်မှုတွေ၊ ပိုပြီး ကျော်ကြားမှုတွေတော့ မရှိခဲ့ပါဘူး။

မာရာဒိုနာဟာဆိုရင် နာပိုလီအသင်းရဲ့ အမွေအနှစ် တစ်ခုလို ဖြစ်ခဲ့ပြီး ဆုဖလားအောင်မြင်မှု အများအပြားကို ရယူနိုင်ခဲ့တာ ဖြစ်ပါတယ်။ သူကွယ်လွန်သွားပြီချိန်မှာ အသင်းဟာ အားကစားကွင်းရဲ့ အမည်ကို သူ့ရဲ့ နာမည် ပြောင်းပေးခဲ့တာပါ။

နာပိုလီအသင်းမှာ ကစားနေတဲ့ ကာဗရာကိုတွေ့ရစဉ်

မာရာဒိုနာ မရှိတော့တဲ့ အချိန်မှာတောင် အသင်းမှာ အခန်းကဏ္ဍဟာ အလွန်ကြီးမားတဲ့ အရေးပါမှုအဖြစ် ရှိနေခဲ့တာ ဖြစ်ပါတယ်။ ကစားသမားအများစုဟာ မာရာဒိုနာ လက်သစ်လို့ နှိုင်းယှဉ်ခံရပြီး အသင်းထံ ရောက်လာခဲ့ ပေမယ့် အသင်းအတွက် တတိယမြောက် စကူဒတ်တိုဆုဖလား ရယူပေးနိုင်ဖို့ ခက်ခဲခဲ့ကြတာပါ။

ပြီးခဲ့တဲ့ ဇူလိုင်လက နာပိုလီအသင်းထံ ရောက်ရှိလာတဲ့ ဂျော်ဂျီယာ ကစားသမားဟာ အခုဆိုရင် အသင်းအတွက် ပြသနေတဲ့ ခြေစွမ်းကြောင့် မာရာဒိုနာနဲ့ နှိုင်းယှဉ်ခံနေရပြီ ဖြစ်ပါတယ်။ သူ့ကို ကာဗရာဒိုနာလို့လည်း ခေါ်ဝေါ်နေ ကြတာပါ။

ဂျော်ဂျီယာက ဘောလုံးသတင်းထောက် ဘာဒါလတ်ချ်ဗေလ်ဆိုသူဟာ စက်တင်ဘာလက နေပယ်လ်ကို လာရောက်ပြီး လီဗာပူးလ်နဲ့ ကစားခဲ့တဲ့ ချန်ပီယံလိဂ်ပွဲမှာ ကာဗရာကို လာရောက် ကြည့်ရှုခဲ့တာ ဖြစ်ပါတယ်။ လီဗာပူးလ် ကစားသမားတွေ ထိန်းချုပ်ရ ခက်ခဲခဲ့တဲ့ ကာဗရာရဲ့ ခြေစွမ်းကို အားလုံးမြင်တွေ့ခဲ့ရတာပါ။

ဘာဒါလတ်ချ်ဗေလ်က “မာရာဒိုနာမြို့မှာ လူတိုင်းက ကာဗရာကို ချစ်မြတ်နိုးကြပါတယ်။ လူတိုင်းက သူ့တီရှပ်တွေ ကို ဝတ်ဆင်ခဲ့ကြပါတယ်။ ကျနော် ဂျော်ဂျီယာက ဖြစ်တယ်ဆိုတာကို သူတို့သိတဲ့အချိန်မှာ လူတိုင်းက ကျနော့်ကို ကောင်းကောင်းမွန်မွန် လက်ခံပြီး ဓါတ်ပုံတွေ ရိုက်ကြကာ ကာဗီချာ၊ ကာဗီချာဆိုပြီး သီကြွေးခဲ့ကြပါတယ်။ သူ့ရဲ့ နာမည်ကို မှန်ကန်အောင်ပြောဖို့က သူတို့အတွက် ခက်ခဲတယ်ဆိုတာ မှန်ပါတယ်။ အချိန်တိုအတွင်းမှာ ကာဗရာ က ဘယ်လိုမျိုး လုပ်ဆောင်လိုက်လဲဆိုတာ ကျနော်မသိပါဘူး။ နာပိုလီမှာ အားလုံးက သူ့ကိုချစ်နေကြပြီဆိုတာကို ကျနော်ယုံကြည်သွားပါတယ်။ လီဗာပူးလ်နဲ့ပွဲမှာ ဆိုရင်လည်း သူတို့ဟာ ကာဗရာရဲ့နာမည်ကို အကျယ်ကြီး အော် ဟစ် ခဲ့ကြတာပါ”လို့ CNN Sport ကို ပြောခဲ့ပါတယ်။

ကာဗရာကို နာပိုလီပရိသတ်တွေက အားပေးနေစဉ်

နာပိုလီအသင်းဟာ မာတန်စ်နဲ့ အင်ဆစ်ဂနီတို့ ထွက်သွားပြီးနောက် အစားထိုးရမယ့် ကစားသမားကို ရှာဖွေခဲ့ပြီး ဥရောပဘောလုံး ပရိသတ်တွေနဲ့ ရင်းနှီးကျွမ်းဝင်မှုမရှိတဲ့ ဂျော်ဂျီယာကစားသမား ကာဗရာကို ယူရို ၁၅ သန်းဝန်းကျင်နဲ့ ဒိုင်နမိုဘာတူမီကနေ ခေါ်ယူခဲ့တာ ဖြစ်ပါတယ်။

အသင်းက ထွက်ခွာသွားတဲ့ အဓိကကစားသမား ၂ ဦးနေရာမှာ ဂျော်ဂျီယာ ကစားသမားကို ခေါ်ခဲ့လို့ အသင်း အတွက် လုံလောက်ပြီလားဆိုပြီး နာပိုလီအသင်း အားကစားဒါရိုက်တာတွေဟာ မေးခွန်း ထုတ်ခံခဲ့ရတာပါ။

နာပိုလီအသင်းမှာ ကျောနံပတ် ၇၇ ဝတ်ဆင်ခဲ့တဲ့ ကာဗရာဟာ အားလုံး မထင်မှတ်ထားတာထက် အများကြီးတောင် ပိုပြီး လုပ်ပြသွားခဲ့တာ ဖြစ်ပါတယ်။

ကာဗရာရဲ့ သွင်းဂိုးတွေ၊ ဖန်တီးမှုတွေကြောင့် နာပိုလီအသင်းဟာ စီးရီးအေနဲ့ ချန်ပီယံလိဂ်ပြိုင်ပွဲမှာ ရလဒ်ပိုင်း ကောင်းမွန်ခဲ့ပြီး ဥရောပရဲ့ စိတ်လှုပ်ရှားစရာ အကောင်းဆုံး အသင်းတွေထဲက တစ်သင်း ဖြစ်လာခဲ့တာပါ။ သူ့ရဲ့ ပံ့ပိုးပေးမှုတွေကြောင့် နာပိုလီအသင်းဟာ စီးရီးအေပြိုင်ပွဲမှာ ရှုံးပွဲမရှိသလို ချန်ပီယံလိဂ် ပြိုင်ပွဲမှာလည်း လီဗာပူးလ် အသင်းနဲ့ ဒုတိယအကျော့ ပွဲစဉ် မတွေ့ဆုံခင်အချိန်ထိ အရှုံးဆိုတာ မရှိခဲ့ပါဘူး။

ကာဗရာဟာ ဒီရာသီ နာပိုလီ အသင်းအတွက် ကစားခဲ့တဲ့ ၁၇ ပွဲမှာ ၈ ဂိုး သွင်းယူပြီး ၁၀ ဂိုး ဖန်တီးထားတာ ဖြစ်ပါတယ်။

ပြိုင်ဘက်အသင်းကို ကာဗရာ ဂိုးသွင်းနေစဉ်

အီတလီဘောလုံးဂျာနယ်လစ် အူအန်ဘန်းစ်က “ကျနော်ကတော့ ကာဗရာကို တောင်ပံကစားသမားတစ်ဦးလို ခံစားရပါတယ်။ သူဟာ အရပ်မရှည်ပေမယ့် ခေါင်းတိုက်မှုကနေ အနိမ့်ဆုံး ၁ ဂိုးတော့ သွင်းယူထားပါတယ်။ သူ ဟာ ဘောလုံးရှိတဲ့ အချိန်ရော မရှိတဲ့အချိန်ရော ကြောက်စရာ ကောင်းလောက်အောင် မြန်မြန်ဆန်ဆန်လုပ် ဆောင်နိုင်ပါတယ်။

သူ့မှာ မယုံနိုင်စရာကောင်းတဲ့ ခြေထောက်တွေရှိပြီး သန်လည်းသန်မာပါတယ်”လို့ ပြောခဲ့ပါတယ်။

ဂျော်ဂျီယာဘောလုံး သတင်းထောက် ဘာဒါလတ်ချ်ဗေလ်က” သူဟာ ဂိုးသွင်းပြီးချိန်မှာ အသင်းတံဆိပ်ကို နမ်း တာက နာပိုလီက ပထမဆုံးပါပဲ။ ဂိုးသွင်းပြီးချိန်မှာ အသင်းတံဆိပ်ကို နမ်းတယ်ဆိုတာ ကျနော်တို့အတွက် အဓိပ္ပါယ်အများကြီးကို ဆိုလိုပါတယ်။ ဒီထဲမှာဆိုရင် အဖြေတွေ အများကြီး ပါသွားပါပြီ။ သူဟာ နာပိုလီကို ချစ်မြတ်နိုးသလို နာပိုလီကိုလည်း ကျေးဇူးတင်ပြီး နာပိုလီကလည်း သူ့ကို ချစ်မြတ်နိုးပါတယ်။ ကာဗရာက နောက် လာမယ့် ဂန္တဝင်လို့ ပြောလို့ရပါတယ်။ သူ့ရဲ့ မျိုးရိုးအမည်က ကာဗရာဒိုနာ ဖြစ်နေပါပြီ။ နာပိုလီ ပရိသတ်တွေက သူ့ကို ကာဗရာဒိုနာလို့ အမည်ပြောင် ပေးထားပါတယ်။ သူတို့ဟာ ကာဗရာကို တွေ့တဲ့အချိန်မှာ မာရာဒိုနာကို တွေ့တယ်လို့ ပြောခဲ့ကြကြောင်း”ပြောခဲ့တာပါ။

ကာဗရာဟာ ရုရှားကလပ်တွေမှာ ကစားခဲ့ချိန် ရုရှားဟာ ယူကရိန်းကို ကျူးကျော်ခဲ့တာကြောင့် နိုင်ငံခြား ကစား သမားတွေဟာ သူတို့စာချုပ်ကို ဆိုင်းငံ့ပြီး ထွက်ခွာနိုင်တယ်လို့ ဖီဖာက ကြေညာချက် ထုတ်ပြန်ခဲ့ပါတယ်။

အဲ့ဒါကြောင့် ကာဗရာဟာ ရုရှားကလပ်ကနေ ထွက်ခွာပြီး ဂျော်ဂျီယာကလပ် ဒိုင်နမိုဘာတူမီ အသင်းကို ပြောင်းရွှေ့ခဲ့တာ ဖြစ်ပါတယ်။ ဒါပေမယ့် လအနည်းငယ် အကြာမှာ ကာဗရာဟာ ကစားသမားဘဝ ထင်ပေါ် ကျော်ကြားလာတဲ့ နာပိုလီအသင်းထံ ပြောင်းရွှေ့ခဲ့ပါတယ်။

ဂျော်ဂျီယာ လက်ရွေးစင်အသင်းမှာ ကာဗရာကစားနေစဉ်

ကာဗရာရဲ့ လက်ရွေးစင် အသင်းဖော် မာမာဒက်ရှ်ဗေလ်ကတော့ စပိန်ကလပ် ဗလင်စီယာအသင်းထံ ပြောင်းရွှေ့ခဲ့ ပါတယ်။

ဘာဒါလတ်ချ်ဗေလ်က “အရင်က ဂျော်ဂျီယာ ဘောလုံးသမားတွေကို ပိတ်ထားတဲ့ တံခါးတွေ ဖွင့်သွားပြီလို့ ယုံကြည်ခဲ့တာပါ။ ကျနော်တို့ ကစားသမားတွေက ဥရောပကို မသွားနိုင်ခဲ့ကြပါဘူး။ ကာဗရာနဲ့ မာမာဒက်ရှ်ဗေလ် တို့ တင်မဟုတ်ဘဲ အရည်အချင်းရှိတဲ့ ကစားသမားတွေ အမျာကြီး လိုအပ်ပါတယ်။ ကျနော်တို့မှာ တခြား ကစား သမားတွေ ရှိပေမယ့် သူတို့က ဥရောပကို မသွားကြပါဘူး။ ကာဗရာ၊ မာမာဒက်ရှ်ဗေလ်တို့နဲ့အတူ မျှော်လင့်ချက် တွေ ယူဆောင်လာလို့ ရပါတယ်”လို့ သူက ပြောခဲ့ပါတယ်။

ကာဗရာဟာ ဂျော်ဂျီယာ လက်ရွေးစင်အတွက် ၂၀၁၉ မှာ စတင် ပွဲထွက်ခွင့်ရခဲ့ပြီး ၁၉ ပွဲ ပါဝင်ကစားကာ ၁၀ ဂိုး သွင်းယူနိုင်ခဲ့ပါတယ်။ ဂျော်ဂျီယာမှာ ဘောလုံးပွဲ မကြိုက်တဲ့ သူတွေတောင် ကာဗရာပါဝင်တဲ့ နာပိုလီပွဲတွေကို ကြည့်ခဲ့ကြတယ်လို့ ဘာဒါလတ်ချ်ဗေလ်က ပြောပါတယ်။

ဘာဒ်လတ်ချ်ဗေလ်က “ ဂျော်ဂျီယာလက်ရွေးစင်က ရှုံးပွဲမရှိတာ ၁၁ ပွဲရှိပါပြီ။ လူတွေကလည်း ယူရို ၂၀၂၄ နဲ့ ကမ္ဘာ့ဖလား ခြေစစ်ပွဲ အောင်မြင်ဖို့ မျှော်လင့်ချက်အသစ်တွေ ရှိလာပါတယ်။ ဒီနေ့အချိန်မှာ ဂျော်ဂျီယာက ဘောလုံးနဲ့အတူ ရှင်သန်နေပြီး ကျနော်တို့ကလည်း ဘောလုံးနိုင်ငံတစ်ခုလို ဖြစ်နေပါပြီ။ ကျနော်တို့ မြို့ကို ရောက်တဲ့အချိန်မှာ ဒါကို တွေ့ရပါလိမ့်မယ်။ ကာဗရာက ဂျော်ဂျီယာကို ပြောင်းလဲလိုက်ပါပြီ”လို့ ပြောပြ လာပါတယ်။

Source: CNN

CNI Sport News

၂၀၂၂ ခုနှစ်၊ နိုဝင်ဘာ ၄

ချယ်လ်ဆီးအသင်း တိုက်စစ်မှူး အူဘာမီယန်းက အသင်းဟောင်း အာဆင်နယ်နဲ့ ရင်ဆိုင်ဖို့ အဆင်သင့်ပဲလို့ ပြောပြီး သတိပေး လိုက်ပါတယ်။

အူဘာမီယန်းက “အဆင်နယ်ရေ ပုဂ္ဂိုလ်ရေး ခံစားချက် ဘာမှမရှိတော့ပါဘူး။ အပြာရောင် ကစားသမားအဖြစ်နဲ့ ကျနော် ပြန်လာပါပြီ။ ရင်ဆိုင်ဖို့ ကျနော် အဆင်သင့်ပါပဲ”လို့ BT Sport ရဲ့ ပရိုးမိုးရှင်း ဗွီဒီယိုမှာ ပြောခဲ့တာပါ။

အူဘာမီယန်းဟာ အာဆင်နယ်အသင်းအတွက် ၁၆၃ ပွဲ ပါဝင်ကစားခဲ့ပြီး ၉၂ ဂိုး သွင်းယူကာ အခုနှစ် ဇန်နဝါရီ အပြောင်းအရွှေ့မှာ အသင်းနဲ့ နှစ်ဦးသဘောတူ စာချုပ် ဖျက်သိမ်းကာ ဘာစီလိုနာအသင်းထံ ပြောင်းရွှေ့သွားခဲ့တာ ဖြစ်ပါတယ်။

အသက် ၃၂ နှစ်အရွယ်ရှိ အူဘာမီယန်းဟာ အာဆင်နယ်အသင်းမှာ ၄ နှစ်ကြာ ကစားခဲ့ပေမယ့် စည်းကမ်းပိုင်း ဆိုင်ရာ ဖောက်ဖျက်မှုတွေကြောင့် နည်းပြ အာတီတာ လက်ထက်မှာ အသင်းခေါင်းဆောင် ရာထူးက ဖယ်ရှား ခံခဲ့ရတာပါ။

အဲ့ဒီနောက်မှာ အာတီတာနဲ့ အဆင်မပြေမှုတွေ ရှိတာကြောင့် အာဆင်နယ်ကနေ ထွက်ခွာခဲ့ပြီး စပိန်ကလပ် ဘာစီလိုနာ အသင်းမှာ သွားရောက် ကစားခဲ့တာ ဖြစ်ပါတယ်။

အာဆင်နယ်အသင်းမှာ အူဘာမီယန်း ကစားခဲ့စဉ် (Metro)

ဘာစီလိုနာအသင်းမှာ ၆ လကြာရှိပြီးနောက် အူဘာမီယန်းဟာ အာဆင်နယ်အသင်းရဲ့ လန်ဒန်မြို့ခံပြိုင်ဘက် ချယ်လ်ဆီးအသင်းထံ ပြီးခဲ့တဲ့ နွေရာသီ အပြောင်းအရွှေ့မှာ ၂ နှစ်စာချုပ်နဲ့ ပြောင်းရွှေ့လာခဲ့တာပါ။ ဂါဘွန် လက်ရွေးစင်ဟောင်းဟာ ချယ်လ်ဆီးအသင်းအတွက် ၁၁ ပွဲ ပါဝင်ကစားထားပြီး ၃ ဂိုး သွင်းယူထားတာ ဖြစ်ပါတယ်။

အူဘာမီယန်းဟာ ဒီတစ်ပတ် ပရီးမီးယားလိဂ် ပွဲစဉ်မှာ အသင်းဟောင်း အာဆင်နယ်အသင်းနဲ့ ပြန်လည် ရင်ဆိုင် ရမှာ ဖြစ်ပါတယ်။ ချယ်လ်ဆီးအသင်းဟာ ပြီးခဲ့တဲ့ အပတ်က ပရီးမီးယားလိဂ်ပွဲမှာ ဘရိုက်တန် အသင်းကို ၄ ဂိုး- ၁ ဂိုးနဲ့ အရေးနိမ့်ပြီး နည်းပြ ဂရေဟမ်ပေါ်တာ လက်ထက် ပထမဆုံး ရှုံးပွဲကြုံတွေ့ခဲ့ရတာလည်း ဖြစ်ပါတယ်။

ဒါပေမယ့် ချန်ပီယံလိဂ်မှာတော့ ဒိုင်နမိုဇာဂရက် အသင်းကို ၂ ဂိုး- ၁ ဂိုးနဲ့ နိုင်ပွဲ ပြန်လည် ရယူနိုင်ခဲ့တာ ဖြစ်ပါ တယ်။

အာဆင်နယ်ကတော့ ဒီရာသီမှာ အကောင်းဆုံးပုံစံ ပြသနေပြီး ပရီးမီးယားလိဂ် အမှတ်ပေးဇယား ထိပ်ဆုံး နေရာမှာ ဦးဆောင်နေသလို ယူရိုပါလိဂ်ပြိုင်ပွဲမှာလည်း ၁၆ သင်းအဆင့်ကို တက်ရောက်နိုင်ခဲ့ပြီ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ နိုဝင်ဘာ ၄

ဘာစီလိုနာအသင်း ဝါရင့်နောက်ခံလူ ပီကေးဟာ စနေနေ့ နူးကမ့်ပ်မှာ ကစားမယ့် အယ်လ်မာရီးယားနဲ့ ပွဲအပြီးမှာ ကစားသမားဘဝကနေ အနားယူမယ်လို့ ကြေညာလိုက်ပါတယ်။

ပီကေးက “ဘောလုံးက ကျနော့်ကို အရာအားလုံးပေးခဲ့သလို ဘာကာကလည်း အရာအားလုံးပေးခဲ့ပါတယ်။ ဘာကာ ပရိသတ်တွေကလည်း အရာအားလုံး ပေးခဲ့တာပါပဲ။ ကျနော့်ရဲ့ ကလေးဘဝ အိမ်မက်ကလည်း အမှန် တကယ် ဖြစ်ခဲ့ပြီးပြီဆိုတော့ ဒီခရီးကို အဆုံးသတ်ဖို့ အချိန်ရောက်ပါပြီ။ ဘာကာမှာ ကစားပြီးရင် တခြားအသင်း တွေ ရှိမှာမဟုတ်ဘူးဆိုတာ အမြဲတမ်း ပြောခဲ့ဖူးပါတယ်”လို့ ပြောခဲ့တာပါ။

လာမာစီယာ အကယ်ဒမီထွက် ပီကေးဟာ ၂၀၀၄ က ယူနိုက်တက်အသင်းမှာ ကစားခဲ့ပြီး ပရီးမီးယားလိဂ်နဲ့ ချန်ပီယံလိဂ်ဖလား ရယူကာ ၂၀၀၈ မှာ ဘာစီလိုနာအသင်းထံ ပြန်လည် ပြောင်းရွှေ့ခဲ့တာ ဖြစ်ပါတယ်။

ပီကေးဟာ ဘာစီလိုနာအသင်းအတွက် ပွဲပေါင်း ၆၀၀ ကျော် ပါဝင်ကစားခဲ့ပြီး လာလီဂါဖလား ၈ ကြိမ်၊ ချန်ပီယံ လိဂ် ၃ ကြိမ်နဲ့ ကိုပါဒယ်ရေးဖလား ၇ ကြိမ် အပါအဝင် ဆုဖလားပေါင်း ၃၀ ရယူနိုင်ခဲ့ပါတယ်။

ပီကေးက “ ကျနော် သိပ်မကြာခင် ဒီကိုပြန်လာမယ်ဆိုတာ ခင်ဗျားတို့ သိပါတယ်။ နူးကမ့်ပ်မှာ ကျနော်တို့ ပြန်တွေ့ကြမယ်”လို့လည်း ပြောခဲ့ပါတယ်။

ဘာစီလိုနာအသင်း ချန်ပီယံလိဂ်ဖလား ရရှိခဲ့စဉ်က ပီကေးကိုတွေ့ရစဉ် (Stadium Astro)

ပီကေးဟာ နည်းပြအဖြစ် ကိုင်တွယ်နေတဲ့ အသင်းဖော်ဟောင်း ဇာဗီလက်ထက် ဒီရာသီမှာ ပုံမှန်ပွဲကစားခွင့်ရဖို့ ရုန်းကန်နေရတာဖြစ်ပြီး ပြိုင်ပွဲစုံ ၉ ပွဲသာ ပါဝင်ကစားခွင့် ရခဲ့တာပါ။ ပီကေးဟာ အသင်းဘဏ္ဍာရေး အခက်အခဲ ကြုံတွေ့နေရချိန်မှာ လုပ်ခလစာ လျှော့ယူခဲ့တဲ့ ကစားသမားတွေထဲက တစ်ဦးလည်း ဖြစ်ပါတယ်။

ပီကေးဟာ စပိန်လက်ရွေးစင် အသင်းကနေလည်း ၂၀၁၈ မှာ အနားယူခဲ့ပြီး ပွဲပေါင်း ၁၀၂ ပွဲ ပါဝင်ကစားကာ ၂၀၁၀ ကမ္ဘာ့ဖလားနဲ့ ၂၀၁၂ ယူရိုချန်ပီယံဆုတွေကို ရယူနိုင်ခဲ့တာပါ။

အခုဆိုရင် ပီကေးဟာ စပိန်ဒုတိယတန်းကလပ် အန်ဒိုရာအသင်းကို ပိုင်ဆိုင်ထားပြီး ကော့စ်မို့စ် တင်းနစ်ရဲ့ တည်ထောင်သူနဲ့ ဥက္ကဋ္ဌလည်း ဖြစ်ပါတယ်။ စပိန်နောက်ခံလူဟောင်းဟာ ပြီးခဲ့တဲ့ ဇွန်လက လက်တွဲဖော် အဆိုတော် ရှာကီရာနဲ့ လမ်းခွဲထားတာလည်း ဖြစ်ပါတယ်။

ပီကေးရဲ့ ဘာစီလိုနာအသင်းဟာ ဒီရာသီ ချန်ပီယံလိဂ် ပြိုင်ပွဲကနေ ထွက်ခွာထားရပြီး လာလီဂါပြိုင်ပွဲမှာ ထိပ်ဆုံးက ဦးဆောင်နေတဲ့ ရီးရယ်လ်အသင်းနဲ့ ၁ မှတ်အကွာ ဒုတိယနေရာမှာ ရပ်တည်နေတာ ဖြစ်ပါတယ်။

Source: BBC