CNI International News

မော်စကို၊ အောက်တိုဘာ ၁၅

ယူကရိန်းကို နိုင်ငံတစ်နိုင်ငံအဖြစ် ရပ်တည်နေခြင်းမှ ဖျက်ဆီးလိုသည့်ဆန္ဒမရှိကြောင်း ရုရှားသမ္မတ ဗလာဒီမာ ပူတင်က အောက်တိုဘာ ၁၄ တွင် သတင်းထောက်များနှင့်တွေ့ဆုံစဉ် ပြောကြားခဲ့ကြောင်း တာ့စ်သတင်းဌာနက ရေးသားဖော်ပြသည်။

ယူကရိန်းသည် နိုင်ငံတစ်နိုင်ငံအဖြစ် ဆက်လက်တည်ရှိနေမှာလား ဆိုသည့်မေးခွန်းကို ပူတင်က “ကျနော်တို့ ရည်မှန်းချက်ထဲမှာ ယူကရိန်းတနိုင်ငံလုံးကို ဖျက်ဆီးဖို့ မဟုတ်ပါဘူး။ သူတို့ဟာ လူဦးရေ ၂ ဒသမ ၄ သန်းလောက် နေတဲ့ ခရိုင်းမီးယားဒေသကို တစ်ချိန်က သောက်သုံးရေဖြတ်တောက်ခဲ့တာ ရှိပါတယ်။ ကျနော်တို့တပ်တွေက ခရိုင်းမီးယားထဲ ဝင်ပြီးတော့ ရေပေးဝေရေး ပြန်လုပ်ရပါတယ်။ ဒါမျိုးကို ယူကရိန်းမလုပ်ခဲ့ရင် ကျနော်တို့ဘက်ကလည်း အခုလို လက်တုံ့ပြန်တာမျိုး ဖြစ်လာမှာ မဟုတ်ပါဘူး” ဟု ဖြေကြားခဲ့သည်။

ခရိုင်းမီးယားကို ဗုံးကြဲတိုက်ခိုက်ခြင်းသည် ခရိုင်းမီးယားနှင့် မြေဧရိယာချင်းချိတ်ဆက်ရန်အတွက် အရေးကြီး ကြောင်း ပူတင်က ဆက်လက်ပြောကြားခဲ့သည်။

Source: တာ့စ်သတင်းဌာန

CNI International News

မော်စကို၊ အောက်တိုဘာ ၁၄

အကယ်၍ အမေရိကန်ဦးဆောင်သော မြောက်အတ္တလန္တိတ်စစ်စာချုပ်(နေတိုး)အဖွဲ့ထဲသို့ ယူကရိန်းကို ဝင်ခွင့်ပြုခဲ့လျှင် လက်ရှိစစ်ရေးပဋိပက္ခသည် တတိယကမ္ဘာစစ်ဖြစ်ဖို့ အလားအလာရှိကြောင်း ရုရှားလုံခြုံရေးကောင်စီမှ တာဝန်ရှိသူတစ်ဦးက အောက်တိုဘာ ၁၃ ရက်တွင် ပြောကြားခဲ့ကြောင်း ရိုက်တာသတင်းတစ်ပုဒ်တွင် တွေ့ရသည်။

ပြီးခဲ့သည့် စက်တင်ဘာ ၃၀ ရက်တွင် ယူကရိန်းနယ်မြေ ၁၈ ရာခိုင်နှုန်း သိမ်းယူကြောင်း ရုရှားသမ္မတ ဗလာဒီမာ ပူတင် တရားဝင်ကြေညာပြီး နာရီပိုင်းအကြာ ယူကရိန်းသမ္မတ ဗိုလိုဒီမီယာဇာလန်းစကီးက နေတိုးအဖွဲ့ထဲသို့ အဖွဲ့ဝင်ရန် အဆိုပြု ကမ်းလှမ်းချက်ကို တုံ့ပြန်ကြေညာခဲ့သည်။

နေတိုးအဖွဲ့ဝင် အပြည့်အဝဖြစ်ရေးမှာ အဆိုပါမဟာမိတ် အဖွဲ့ဝင် နိုင်ငံအားလုံး၏ သဘောတူညီချက် ရယူရန် လိုအပ်သဖြင့် ယူကရိန်းအတွက် လတ်တလော အလှမ်းဝေးသေးသည်။

“ဒီခြေလှမ်းဟာ တတိယကမ္ဘာစစ်ဖြစ်ဖို့ နီးလာပြီဆိုတာ ကိယက်ဗ်အစိုးရ ကောင်းကောင်းသိပါတယ်” ဟု ရုရှား လုံခြုံရေးကောင်စီ၊ လက်ထောက်အတွင်းဝန် အလက်ဇန္ဒားဗီနီဒစ်တော့ဗ် (Alexander Venediktov) က ပြောကြားကြောင်း တာ့စ်သတင်းဌာနက ဖော်ပြခဲ့သည်။

ယူကရိန်း ခေါင်းဆောင်များကိုတွေ့ရစဉ် 

နေတိုးထဲ ဝင်ရေးအတွက် ယူကရိန်းအဆိုပြုချက်၏ နောက်ဆက်တွဲ အကျိုးဆက်များကို အနောက်အုပ်စုနိုင်ငံများ နားလည်သောကြောင့် ယခုကဲ့သို့ အဆိုပြုကမ်းလှမ်းခြင်းမှာ ဝါဒဖြန့်ချိရေးအဖြစ်သာ မိမိခံစားရကြောင်း ရုရှား လုံခြုံရေး ကောင်စီ၊ အတွင်းရေးမှူး နီကိုလပ်ပက်ထရူရှက်ဗ် (Nikolai Patrushev) ၏ လက်ထောက်ဖြစ်သူ ဗီနီဒစ်တော့ဗ်က ပြောကြားခဲ့သည်။

နီကိုလပ်ပက်ထရူရှက်ဗ်သည် ပူတင်နှင့်နီးစပ်သော မဟာမိတ်တစ်ဦးလည်း ဖြစ်သည်။

“အဲဒီလို ကိုယ့်ကိုယ်ကို ပြန်သတ်သေမယ့် ခြေလှမ်းရဲ့သဘောသဘာဝကို နေတိုးအဖွဲ့ဝင်နိုင်ငံတွေ နားလည်ပြီး သားပါ” ဟု ၎င်းက ဆက်လက် ပြောကြားခဲ့သည်။

နေတိုးကို အရှေ့ဘက်သို့ အမေရိကန် ချဲ့ထွင်နေခြင်းအား သမ္မတ ဗလာဒီမာပူတင်က အကြိမ်ကြိမ် အပြစ်တင် ရှုတ်ချခဲ့ပြီး ဖြစ်သည်။ အထူးသဖြင့် ဆိုဗီယက်ပြည်ထောင်စုဝင် နိုင်ငံဟောင်းများ ဖြစ်ကြသည့် ယူကရိန်းနှင့် ဂျော်ဂျီယာ ကဲ့သို့နိုင်ငံများကို ရုရှားက ၎င်း၏ကိုယ်ပိုင် ဩဇာလွှမ်းမိုးရာ အစိတ်အပိုင်းများအဖြစ် မှတ်ယူထားသည်။

ရုရှားနိုင်ငံကို ကာကွယ်ရန်အတွက် နျူကလီးယား လက်နက်ထုတ်သုံးရန် အဆင်သင့် ဖြစ်နေပြီဟု အနောက် အုပ်စုနိုင်ငံများအား ပူတင်က စက်တင်ဘာ ၂၁ ရက်တွင် သတိပေးခဲ့သည်။

သို့ဖြစ်၍ ၁၉၆၂ ခုနှစ်၊ ကျူးဘားဒုံးကျည် အကျပ်အတည်း နောက်ပိုင်း အကြီးမားဆုံး နျူကလီးယား အန္တရာယ်နှင့် ရင်ဆိုင်နေရပြီဖြစ်ကြောင်း အမေရိကန်သမ္မတ ဂျိုးဘိုင်ဒန်က ပြောကြားခဲ့သည်။

လာမည့် သီတင်းပတ်တွင် နေတိုးသည် “တည်ကြည်မွန်းတည့်နေ (Steadfast Noon)” ဟု အမည်ပေးထားသည့် နျူကလီးယား ကြိုတင်ပြင်ဆင်ရေး စစ်ရေး လေ့ကျင့်မှုကို စတင်မည်ဖြစ်သည်။ အဆိုပါလေ့ကျင့်မှုသည် နှစ်စဉ် ပြုလုပ်နေကျ ဖြစ်သည်။

ယူကရိန်း စစ်မြေပြင်ကိုတွေ့ရစဉ်

လက်ရှိ ကာလအထိ ရုရှားနှင့်အမေရိကန်တို့သည် အကြီးမားဆုံး အဏုမြူ အင်အား ပိုင်ဆိုင်ကြသူများဖြစ်ပြီး တကမ္ဘာလုံး စုစုပေါင်း နျူကလီးယား ထိပ်ဖူးများ၏ ၉၀ ရာခိုင်နှုန်းအထိ ထိန်းချုပ်ထားကြသည်။

ရုရှားအပေါ် ကြိုတင်ကာကွယ်ရေး တိုက်ခိုက်ရန် ဇာလန်းစကီး၏ တောင်းဆိုချက်သည် အန္တရာယ်များလှပြီး နျူကလီးယားစစ်ပွဲကြောင့် ကမ္ဘာ့ကြီး ဆိုးရွားသော အကျိုးဆက်များဖြစ်လာနိုင်ကြောင်း ဗီနီဒစ်တော့ဗ်က ထောက်ပြခဲ့သည်။

“ကျနော်တို့ သတိထားရမယ့် အချက်ဟာ နျူကလီးယား ပဋိက္ခဆိုတာ ရုရှားနဲ့အနောက်အုပ်စုတင် မကဘဲ ကမ္ဘာ့နိုင်ငံတိုင်းအတွက် သက်ရောက်မှု ရှိမှာ ဖြစ်ပါတယ်။ ဒီအကျိုးဆက်တွေက လူသားအားလုံးအတွက် ဆိုးရွားစေလိမ့်မယ်” ဟု ၎င်းက ထပ်လောင်း ပြောကြားခဲ့သည်။

Source: Reuters

CNI International News

ဝါရှင်တန်၊ အောက်တိုဘာ ၁၂

ယူကရိန်းမြို့ကြီးများကို ရုရှား အင်အားအလုံးအရင်းဖြင့် တိုက်ခိုက်နေချိန်၌ မိမိတို့ မော်စကို အစိုးရအနေဖြင့် ယူကရိန်းစစ်ရေး အနောက်အုပ်စုများနှင့် ဆွေးနွေးရန် လမ်းဖွင့်ထားကြောင်း ရုရှားနိုင်ငံခြားရေးဝန်ကြီး ဆာဂျေ လာဗရော့ဗ်က စက်တင်ဘာ ၁၁ ရက်တွင် ပြောကြားခဲ့သည်။

ရုရှားသည် စစ်ပွဲ အဆုံးသတ်နိုင်ရေးအတွက် အမေရိကန် (သို့မဟုတ်) တူရကီနှင့် ထိတွေ့ဆက်ဆံရန် ဆန္ဒရှိ ကြောင်း၊ ၈ လတာ ကာလအတွင်း စေ့စပ်ညှိနှိုင်းရေးအတွက် လေးနက်သည့် အဆိုပြုချက် မိမိတို့ မရရှိသေး ကြောင်း ရုရှားအစိုးရပိုင် ရုပ်သံလိုင်းတစ်ခုနှင့် အင်တာဗျူးတွင် လာဗရော့ဗ်က ပြောကြားခဲ့သည်။

ပြီးခဲ့သည့် စက်တင်ဘာလ အစောပိုင်းကတည်းက စစ်ရေးပဋိပက္ခတွင် ယူကရိန်း အသာစီးရလာခဲ့ပြီး အရှုံးများနှင့် ရုရှား ဆက်တိုက် ရင်ဆိုင်လာရသဖြင့် တွေ့ဆုံဆွေးနွေးရေးကို လာဗရော့ဗ်က အထက်ပါအတိုင်း အလေးပေး ပြော ကြားလာခဲ့သည်။

ယူကရိန်းစစ်မြေပြင် အခြေအနေကိုတွေ့ရစဉ် (GETTY IMAGES)

အိမ်ဖြူတော် အမျိုးသားလုံခြုံရေး ပြောရေးဆိုခွင့်ရှိသူ ဂျွန်ကာဘီ အပါအဝင် အမေရိကန်အစိုးရ တာဝန်ရှိသူများ က တွေ့ဆုံဆွေးနွေးရေး လမ်းဖွင့်ထားကြောင်း ပြောကြားချက်မှာ ရုရှားလက်သင့်ခံနိုင်စရာ မရှိကြောင်း လာဗရော့ဗ်က ပြောကြားခဲ့သည်။

“ဒါဟာ လိမ်ညာမှုတစ်ခုပါ။ အဆက်အသွယ်လုပ်ဖို့ ကြီးကြီးမားမား ကမ်းလှမ်းချက်မျိုးကို ကျနော်တို့ မရခဲ့ပါဘူး” ဟု လာဗရော့ဗ်က ဆက်လက် ပြောကြားခဲ့သည်။

ယူကရိန်းမှာ အရပ်သားများ သေဆုံးခဲ့ရသည့် ရုရှားဒုံးကျည် ပစ်ခတ်မှုအပြီး နာရီပိုင်းအတွင်း လာဗရော့ဗ်၏ သဘောထား မှတ်ချက် ထွက်ပေါ်လာသဖြင့် ရုရှားဘက်က တွေ့ဆုံဆွေးနွေးရေး တရားဝင် ကမ်းလှမ်းလာမှု ပြုလာကြောင်း အမေရိကန်နိုင်ငံခြားရေးဝန်ကြီးဌာန ပြောခွင့်ရသူ နက်ပရိုက်စ် (Ned Price) ပြောကြားခဲ့သည်။

“ဒါကို ဟန်ဆောင်မှုလို့ ကျနော်တို့ မြင်ပါတယ်။ တွေ့ဆုံဆွေးနွေးရေးနဲ့ သံခင်းတမန်ခင်း ပါဝင်ဖို့ အပြုသဘော ဆောင်တဲ့ တရားဝင် ကမ်းလှမ်းမှုကို မမြင်ဘူးခင်ဗျ။ ဒီလို ရက်စက်ကြမ်းကြုတ်ပြီး ရန်ပြုတဲ့စစ်ပွဲ အဆုံးသတ် ဖို့ ကတော့ လုံးဝလိုအပ်ပါတယ်” ဟု နက်ပရိုက်စ်က ပုံမှန်သတင်းစာ ရှင်းလင်းပွဲ၌ ပြောကြားခဲ့သည်။

စစ်ပွဲ အဆုံးသတ်ရေးအတွက် ဆွေးနွေးပွဲများသည် ယူကရိန်းနှင့် ရုရှားတို့အကြား နောက်ဆုံးတွင် ပေါ်ပေါက်လာဖို့ အမှန်တကယ် လိုအပ်ပါကြောင်း ၎င်းက ဆက်လက် ပြောကြားခဲ့သည်။

“ရုရှားဘက်က တွေ့ဆုံဆွေးနွေးရေးနဲ့ သံခင်းတမန်ခင်း အလေးအနက်ထားတယ်ဆိုတာ ပြသချင်တယ်ဆိုရင် ရက်စက်ကြမ်းကြုတ်တဲ့ ချေမှုန်းမှုမျိုးကို ရပ်တန်ဖို့ ပထမခြေလှမ်း ဖြစ်ကောင်းဖြစ်နိုင်ပါတယ်။ အဲဒီနေရာမှာ အချည်းနှီး ဖြစ်စေတဲ့ စကားလုံးတွေထက် ဘာမှမပိုဘူးလို့လည်း ထင်ရပါတယ်” ဟု နက်ပရိုက်စ်က ထပ်လောင်း ပြောကြားခဲ့သည်။

ယူကရိန်းစစ်မြေပြင် အခြေအနေကိုတွေ့ရစဉ် (GETTY IMAGES)

ရုရှားသမ္မတ ဗလာဒီမာပူတင်နှင့် အမေရိကန်သမ္မတ ဂျိုးဘိုင်ဒန်တို့အကြား ဆွေးနွေးမှုကို ရုရှားက ပယ်ချမည် မဟုတ်ကြောင်းနှင့် ဆွေးနွေးရန် အဆိုပြုချက်ကို မိမိတို့ ထည့်သွင်းစဉ်းစားမည်ဖြစ်ကြောင်း လာဗရော့ဗ်က ပြောကြားခဲ့သည်။

“တွေ့ဆုံဆွေးနွေးရေးကို ဘယ်တော့မှ မငြင်းတဲ့အကြောင်း ကျနော်တို့ အကြိမ်ကြိမ် ပြောပြီးပါပြီ။ ဆွေးနွေးဖို့ ကမ်းလှမ်းချက်တစ်ခု ရလာရင်တော့ ကျနော်တို့ စဉ်းစားမှာ ဖြစ်ပါတယ” ဟု လာဗရော့ဗ်က ဖြည့်စွက် ပြောကြား ခဲ့သည်။

ရုရှားနှင့် အနောက်အုပ်စုတို့အကြား ဆွေးနွေးပွဲများကို တူရကီနိုင်ငံတွင် လက်ခံကျင်းပသည့် အလားအလာနှင့် ပတ်သက်၍ သဘောထား မှတ်ချက်ပေးရာတွင် လာဗရော့ဗ်က “မော်စကိုအနေဖြင့် မည်သည့် အကြံပြုချက်မဆို နားထောင်လိုကြောင်း” ပြောကြားခဲ့သော်လည်း ထိုသို့ရလဒ်ဖြစ်ပေါ်လာရေး ကြိုမပြောနိုင်သေးဟု မှတ်ချက်ချ ခဲ့သည်။

တူရကီသမ္မတ တေယစ်အာဒိုဂန်သည် ယခုသီတင်းပတ်အတွက် ကာဇက်စတန်နိုင်ငံသို့ လာရောက်လည်ပတ် သည့်အခါ ရုရှားသမ္မတ ဗလာဒီမာပူတင်ထံသို့ အဆိုပြုချက်တစ်ရပ် ပေးပို့ရန် အခွင့်အရေး ရှိမည်ဖြစ်ကြောင်း လာဗရော့ဗ်က ထပ်လောင်း ပြောကြားခဲ့သည်။

ရုရှားနှင့်ယူကရိန်းတို့ တိုက်ရိုက် ဆွေးနွေးနေမှုသည် ပြီးခဲ့သည့် မတ်လအကုန်ပိုင်းတွင် ပျက်ပြယ်သွားခဲ့ကြောင်း ၎င်းက ရှင်းပြခဲ့သည်။

ယူကရိန်းသမ္မတ ဗိုလိုဒီမီယာဇာလန်းစကီသည် ရုရှားသိမ်းပိုက်ထားသော ယူကရိန်းနယ်မြေ ၄ ခုကို ပြီးခဲ့လ၌ ပြန်လည်သိမ်းပိုက်ကြောင်း ကြေညာခဲ့ပြီးနောက် ပူတင်နှင့် စကားပြောဆိုရန် ငြင်းဆန်ခဲ့သည်။

Source: Reuters

CNI International News

ကိယက်ဗ်၊ အောက်တိုဘာ ၁၁

လပေါင်းများစွာအတွင်း ယူကရိန်းသို့ အပြင်းထန်ဆုံး တိုက်ခိုက်မှုအနေဖြင့် အရေးပါသည့် တံတားတစ်စင်းကို အောက်တိုဘာ ၁၀ ရက်တွင် ရုရှားက ဖောက်ခွဲဖျက်ဆီးခဲ့သည်။ အရပ်သားပစ်မှတ်များကို ရုရှားက တိုက်ခိုက်ခဲ့ရာ လျှပ်စစ်ဓာတ်အားပေးစနစ်နှင့် သောက်သုံးရေပိုက်လိုင်းများ၊ အဆောက်အအုံများ ထိခိုက်ပျက်စီးခဲ့ပြီး အနည်းဆုံး လူ ၁၄ ဦး သေဆုံးခဲ့သည်။

ရုရှားဘက်မှ အင်အားအလုံးအရင်းသုံး၍ လေကြောင်း၊ ပင်လယ်ရေကြောင်းနှင့် ကြည်းတပ်အင်အားများဖြင့် ယူကရိန်းဒေသအနည်းဆုံး ၁၄ ခုကို နံနက်ပိုင်း ဝင်ရောက်တိုက်ခိုက်ခဲ့ရာ လူ ၁၀၀ နီးပါး ဒဏ်ရာရရှိသွားခဲ့ကြောင်း ယူကရိန်းအရေးပေါ်ဌာနက ပြောကြားခဲ့သည်။

နိုင်ငံ၏အနောက်ပိုင်းရှိ လာဗစ်မြို့မှ အရှေ့ပိုင်းရှိ ခါကိဗ်မြို့တို့အထိ တိုက်ခိုက်ခံခဲ့ရပြီး ထိခိုက်ပျက်စီးခဲ့သော နေရာအများအပြားမှာ ယခင်က စစ်ပွဲ၏ရှေ့တန်းနှင့် အလှမ်းကွာဝေးသော နေရာများဖြစ်ကြသည်။

ယူကရိန်းနိုင်ငံ ကိယက်ဗ်မြို့တွင် ဖြစ်ပွားခဲ့သည့် ပေါက်ကွဲမှုကြောင့် ပျက်ဆီးနေသည့် မော်တော်ကားကို တွေ့ရစဉ်(ဓါတ်ပုံ-အေပီ)

၎င်းတို့ဘက်မှ ပစ်လွှတ်ခဲ့သော ဒုံးကျည်များမှာ ယူကရိန်းစစ်ဘက်နှင့်စွမ်းအင်ဆိုင်ရာအဆောက်အအုံကို ပစ်မှတ် ထားသည်ဟု ရုရှားက ပြောကြားခဲ့သော်လည်း ဒုံးကျည်အချို့ကတော့ အများပြည်သူလုပ်ငန်းခွင်နှင့် စာသင် ကျောင်းများ၊ သွားလာနေကျ အရပ်သားဧရိယာများကို ထိမှန်ခဲ့သည်။

ဒုံးကျည်တစ်စင်းက ကိယက်ဗ်မြို့လယ်ရှိ အားကစားကွင်းအတွင်းသို့ ကျရောက်ပေါက်ကွဲခဲ့ပြီး အခြားတစ်စင်းမှာ တက္ကသိုလ်ကျောင်းဝင်းထဲ ထိမှန်ခဲ့သည်။

အဆက်မပြတ်တိုက်ခိုက်မှုများကြောင့် အောက်တိုဘာ ၁၀ ရက်၊ ညပိုင်းအထိ နိုင်ငံတဝန်း လျှပ်စစ်မီး ပြတ် တောက်ခဲ့သည်။ အောက်တိုဘာ ၁၁ ရက် (ယနေ့)မှစ၍ ဥရောပနိုင်ငံအချို့ထံသို့ လျှပ်စစ်ဓာတ်အား ရောင်းချမှု များကို ရပ်ဆိုင်းသွားမည်ဟု ယူကရိန်းအာဏာပိုင်များက ကြေညာခဲ့သည်။

ယူကရိန်းနိုင်ငံ Dnipro တွင် ရုရှားတိုက်ခိုက်မှုကြောင့် ပေါက်ကွဲမီးလောင်ကာ ပျက်ဆီးခဲ့သည်များကို မီးသတ်သမားများက ရှင်းလင်းနေစဉ်(ဓါတ်ပုံ-အေပီ)

လျှပ်စစ်မီးပြတ်တောက်မှု နောက်ဆက်တွဲအဖြစ် သောက်သုံးရေပြတ်လပ်မှုများကိုလည်း ယူကရိန်းဒေသခံများ ရင်ဆိုင်နေရသည်။

ယခုတိုက်ခိုက်ခံရခြင်းများသည် လက်တွေ့ကျသော စစ်ရေးသဘောမျိုး မရှိကြောင်းနှင့် ရုရှား၏ရည်မှန်းချက်မှာ လူသားချင်းစာနာမှုဆိုင်ရာ ကပ်ဘေးဆိုက်ရောက်စေဖို့ဖြစ်ကြောင်း သမ္မတဗိုလိုဒီမီယာဇာလန်းစကီး၏ အကြီး တန်းအကြံပေး အင်ဒရီးယာမက် (Andriy Yermak) က ပြောကြားခဲ့သည်။

နောက်ထပ် ယူကရိန်းသို့ တိုက်ခိုက်မှုများသည် ရုရှား၏လုံခြုံရေးကို ခြိမ်းခြောက်မှုရှိလာသဖြင့် ပြင်းထန်စွာ တုံ့ပြန်ခြင်းဖြစ်ကြောင်း သမ္မတ ဗလာဒီမာပူတင်က ပြောကြားခဲ့သည်။

“ဒါနဲ့ပတ်သက်ပြီး ဘယ်သူမှ ယုံမှားသံသယမဖြစ်သင့်ပါဘူး” ဟု ပူတင်က ရုရှားလုံခြုံရေးကောင်စီသို့ ဗီဒီယို မိန့်ခွန်းပြောကြားခဲ့သည်။

Source: AP

CNI International News

ဝါရှင်တန်၊ အောက်တိုဘာ ၄

ရုရှားနှင့်ဖြစ်ပွားနေသော စစ်ပွဲတွင် အရှိန်အဟုန်မြင့်တက်လာစေရန် အထောက်အကူပြုမည့် အဆင့်မြင့် ဒုံးကျည် စနစ် ၄ ခုကို ယူကရိန်းထံသို့ အမေရိကန် ပေးပို့တော့မည်ဖြစ်ကြောင်း အေပီသတင်းဌာနက ရေးသားဖော်ပြသည်။

ဟိုင်းမာ့စ် (HIMARS) ဟု ထင်ရှားသည့် အဆင့်မြင့်နည်းပညာသုံး ပစ်ခတ်နိုင်သည့် အမြောက်ဒုံးကျည်စနစ် (High Mobility Artillery Rocket Systems) ကို အောက်တိုဘာ ၄ ရက်တွင် အမေရိကန်စစ်ဘက်က ကြေညာမည်ဟု မျှော်လင့်ရကြောင်း၊ အဆိုပါ ပေးအပ်မည့် အစီအစဉ်သည် ယူကရိန်းသို့ အမေရိကန်၏ စစ်ရေးအကူအညီ တစိတ် တပိုင်းအဖြစ် ဒေါ်လာ ၆၂၅ သန်း တန်ဖိုးရှိမည်ဖြစ်ကြောင်း အမေရိကန်အစိုးရအရာရှိများထံမှ သိရသည်။

ပြီးခဲ့သည့် ဇူလိုင်လ နှောင်းပိုင်းမှစ၍ ယူကရိန်းသို့ HIMARS စနစ်များ အမေရိကန်က ပထမဆုံးအကြိမ် ပေးပို့ခဲ့ပြီး ယခုအချိန် ပေးပို့ထားသည့် အရေအတွက်မှာ ၂၀ ရှိလာမည်ဖြစ်သည်။

ထိုစနစ်သုံး၍ ရုရှားတပ်ဖွဲ့များ၏ ထောက်ပံ့ပို့ဆောင်ရေး လမ်းကြောင်းများကို ယူကရိန်းက ထိရောက်စွာ ဖြတ်တောက် နိုင်ခဲ့ပြီး ရုရှားထိန်းချုပ်ထားသည့် နယ်မြေများသို့ ယူကရိန်းတပ်များ တန်ပြန် ထိုးဖောက် ဝင်ရောက် နိုင်စေခဲ့သည်။

ယူကရိန်းစစ်မြေပြင်ကိုတွေ့ရစဉ် (AFP)

မကြာသေးမီ ရက်သတ္တပတ်များအတွင်း အမေရိကန်သည် သီးခြားအစီအစဉ်အဖြစ် ယူကရိန်းထံသို့ လုံခြုံရေး အကူအညီပေးရာ၌ ထောက်ပံ့ငွေများအပြင် နောက်ထပ် HIMARS စနစ် ၁၈ ခုကို ရေရှည်စာချုပ်ဖြင့် ဝယ်ယူခွင့် ပြုခဲ့သည်။

USAI ထောက်ပံ့ကြေး ရန်ပုံငွေများကို အမေရိကန်၏ ကြိုးပမ်းမှုဖြင့် ရုရှား-ယူကရိန်းစစ်တွင် တစိတ်တပိုင်း အသုံးပြုလျက်ရှိသည်။

လာမည့် နှစ်များတွင် ယူကရိန်းတပ်ဖွဲ့များကို ကာကွယ်ရေးလေ့ကျင့်မှု သင်ခန်းစာများ ပို့ချပေးသွားရန်ရှိကြောင်း အနောက်အုပ်စု မဟာမိတ်နိုင်ငံများက ပြောကြားခဲ့ကြသည်။ သို့ရာတွင် ယင်းအစီအစဉ်များအတွက် သဘောတူ စာချုပ်များမှာ နှစ်နှင့်ချီ၍ ကြာမြင့်လိမ့်ဦးမည်ဖြစ်သည်။

ယခုနောက်ဆုံး ထောက်ပံ့ကူညီမှုတွင် ယူကရိန်းတပ်များအတွက် အခြားခဲယမ်းမီးကျောက်များ၊ လက်နက် ကိရိယာများ ပါဝင်မည်ဟု မျှော်လင့်ရသည်။

တရားဝင် ကြေညာချက် မထုတ်မီ အကူအညီ အသေးစိတ်ကို ပြောကြားရန် အမည်မဖော်လိုသူ အမေရိကန်အစိုးရ တာဝန်ရှိသူများက ငြင်းဆိုခဲ့ကြသည်။

ယခု စစ်ရေး အကူအညီသည် အောက်တိုဘာ ၁ ရက်မှ စတင်သည့် ဘဏ္ဍာရေးနှစ်သစ်အတွက် အမေရိကန်၏ ပထမဆုံး ထောက်ပံ့ကူညီသည့် အစီအစဉ်လည်း ဖြစ်ကြောင်း သိရသည်။

Source: AP

CNI International News

မော်စကို၊ အောက်တိုဘာ ၄

ရုရှားသမ္မတ ဗလာဒီမာပူတင်၏ အနီးကပ်မဟာမိတ်ဖြစ်သော ချေချင်းညှာခေါင်း‌ဆောင် ရမ်ဇန်ကဒီရော့ဗ် (Ramzan Kadyrov) က ၎င်း၏ဆယ်ကျော်သက်အရွယ် သား ၃ ယောက်ကို ယူကရိန်းရှေ့တန်း စစ်မြေပြင်သို့ စေလွှတ်မည်ဖြစ်ကြောင်း ပြောကြားခဲ့သည်။

စစ်မြေပြင်တွင် ဆက်တိုက်ရှုံးနိမ့်ခဲ့သော မော်စကိုဘက်မှ စစ်ခေါင်းဆောင်များကိုလည်း ယခင်လ၌ ၎င်းက အပြစ်တင် ဝေဖန်ခဲ့သည်။

ယူကရိန်းသို့ တိုက်ခိုက်နေသည့် ၎င်း၏ကိုယ်ပိုင်တပ်ဖွဲ့ကို တစ်ချိန်တည်းတွင် ရမ်ဇန်ကဒီရော့ဗ်က စီမံကွပ်ကဲ လျက်ရှိသည်။ ယူကရိန်းအရှေ့ပိုင်းရှိ ရုရှားတပ်များ၏ တပ်မှူးထံသို့ ဆုတံဆိပ်များ ဖယ်ရှားပြီး တိုက်ပွဲဝင်ရန် အတွက် ရှေ့တန်းစေလွှတ်ရေးကိုလည်း ကဒီရော့ဗ်က အစောပိုင်းတွင် တောင်းဆိုခဲ့သေးသည်။

ရုရှားတပ်မှူးတစ်ဦးဖြစ်သူ ဗိုလ်မှူးချုပ်အလက်ဇန္ဒားလာပင် (Alexksandr Lapin) သည် သာမန်အဆင့်သာ ရှိသူဟု ကဒီရော့ဗ်က ဝေဖန်ခဲ့သည်။

ယူကရိန်းစစ်မြေပြင်က ရုရှားစစ်သားများ (GETTY IMAGES)

ယူကရိန်းအရှေ့ပိုင်း စစ်ဗျူဟာအရ အရေးပါသော လေမန် (Lyman) မြို့မှ ရုရှားတပ်များ ဆုတ်ခွာခဲ့ရပြီးနောက် ချေချင်းညှာခေါင်းဆောင် ကဒီရော့ဗ်က ရုရှားတပ်ဖွဲ့ ခေါင်းဆောင်ပိုင်းကို ပြင်းပြင်းထန်ထန် အပြစ်တင်ခဲ့သည်။

တယ်လီဂရမ်ချန်နယ်တွင် ကဒီရော့ဗ်က စစ်မြေပြင်သို့ စေလွှတ်မည့် ၎င်း၏သားများဖြစ်ကြသော အသက် ၁၆ နှစ်ရှိ အက်ခမက် (Akhmat) ၊ အသက် ၁၅ နှစ်ရှိ အီလီ (Eli) နှင့် အသက် ၁၄ နှစ်ရှိ အဒမ်တို့၏ ဗွီဒီယိုဖိုင်များကို လွှင့်တင်ခဲ့သည်။

အဆိုပါသားများသည် နောက်ပိုင်းတွင် ဆက်သွယ်ရန် ခက်ခဲသည့်နေရာများသို့ ရောက်ရှိသွားတော့ မည်ဖြစ် ကြောင်း ကဒီရော့ဗ်က တယ်လီဂရမ်ချန်နယ်တွင် ရေးသားဖော်ပြခဲ့သည်။

၎င်းဆယ်ကျော်သက် ၃ ဦးသည် ငယ်ရွယ်စဉ်ကတည်းက တိုက်ခိုက်ရေးအတွက် လေ့ကျင့်သင်ကြားပြီးသူများ ဖြစ်ကြောင်း၊ အပြောင်အပြက်သဘောမျိုး ပြောဆိုခြင်း မဟုတ်ကြောင်း ၎င်းက ဆက်လက် ပြောကြားခဲ့သည်။

ရမ်ဇန်ကဒီရော့ဗ်ရဲ့သားများကို တွေ့ရစဉ် (GETTY IMAGES)

“တကယ့်ကို တိုက်ပွဲတွေမှာ သူတို့အစွမ်းသတ္တိတွေ သက်သေပြဖို့ အချိန်တန်ပါပြီ။ ဒီလိုတိုက်ပွဲဝင်ချင်တဲ့ သူတို့ လေးတွေရဲ့ဆန္ဒကို ကျနော် ကြိုဆိုဖို့ပဲ ရှိပါတယ်” ဟု ကဒီရော့ဗ်က မှတ်ချက်ချခဲ့သည်။

၎င်းလွှင့်တင်သည် ဗွီဒီယိုဖိုင်ထဲတွင် အမျိုးသားငယ် ၃ ဦးတို့သည် စစ်ဝတ်စုံအပြည့် ဝတ်ဆင်ထားပြီး မျက်မှန် အညိုများ တပ်ဆင်ထားသည်။ ခါးတွင် သေနတ်ချိတ်၍ ဒုံးပစ်လောင်ချာများ၊ စစ်လက်နက်များ ကိုင်ဆောင်နေပုံ ကို ရိုက်ကူးထားကြောင်း တွေ့ရသည်။

တချို့ဗွီဒီယိုဖိုင်များတွင် ဆယ်ကျော်သက် အမျိုးသားငယ်များသည် လက်မထောင်ပြသည့် အမူအရာဖြင့် ပြုံးပြနေ သည်ကို တွေ့ရှိရသည်။

ကဒီရော့ဗ်သည် ယူကရိန်းသို့ ရုရှားကျူးကျော်ခဲ့မှုကို ပြတ်ပြတ်သားသား ထောက်ခံခဲ့သူများထဲမှ တစ်ဦးဖြစ်သည်။

ရုရှားသည် ဗျူဟာမြောက် အသေးစား နျူကလီးယား လက်နက်များ ထုတ်သုံးရန် စဉ်းစားသင့်ကြောင်းလည်း ၎င်းက အကြံပြုခဲ့သေးသည်။

Source: Aljazeera

CNI International News

ကိယက်ဗ်၊ အောက်တိုဘာ ၁

ရုရှားသမ္မတ ဗလာဒီမာပူတင်သည် ၎င်း၏ကျူးကျော်စစ်ကို အရှိန်မြှင့်လာချိန်၌ သိမ်းပိုက်ထားသော ယူကရိန်း နယ်မြေများကို တရားမဝင် အပြီးအပိုင် ချုပ်ကိုင်ရန်အတွက် စက်တင်ဘာ ၃၀ အတည်ပြု စာချုပ်စာတမ်းများကို လက်မှတ်ရေးထိုးခဲ့သည်။

ယူကရိန်းသမ္မတကလည်း မြောက်အတ္တလန္တိတ်စစ်စာချုပ်အဖွဲ့(နေတိုး)ထဲသို့ ပါဝင်ရန်အတွက် အံ့အားသင့်စရာ လျှောက်လွှာတင်ခြင်းဖြင့် ပူတင်လုပ်ရပ်ကို တုံ့ပြန်ခဲ့သည်။

ထိုသို့ ပူတင်၏ နယ်မြေသိမ်းပိုက်မှုနှင့် ယူကရိန်း သမ္မတ ဗိုလိုဒီမီယာဇာလန်းစကီး၏ နေတိုးဝင်ခွင့် လျှောက်လွှာ တို့သည် ခေါင်းဆောင်နှစ်ဦး ထိပ်တိုက်တွေ့ဆုံမှုဖြင့် ပိုမိုဇာတ်ရှိန် မြင့်လာခဲ့သည်။

အဆိုပါ အခြေအနေများကြောင့် ရုရှားနှင့်အနောက်အုပ်စုတို့အကြား အပြည့်အဝ ပဋိပက္ခ ဖြစ်ပွားမည့် အရေးလည်း စိုးရိမ်မှုများ တိုးလာခဲ့သည်။

ဇာလန်းစကီး နေတိုးအဖွဲ့ဝင်အဖြစ် တရားဝင် လျှောက်ထားမှု လက်မှတ်ထိုးနေစဉ် 

ကရင်မလင်နန်းတော်တွင် ယူကရိန်းနယ်မြေသိမ်း လက်မှတ်ရေးထိုးပွဲ အခမ်းအနား၌ ရုရှားသမ္မတ ပူတင်က ၎င်း၏ နျူကလီးယား ကျောထောက်နောက်ခံပြု ခြိမ်းခြောက်မှုအသစ်ဖြင့် ယူကရိန်းထံမှ သိမ်းပိုက်နယ်မြေများကို တတ်နိုင်သမျှ နည်းလမ်းများဖြင့် ကာကွယ်သွားမည်ဟု အခိုင်အမာ ပြောကြားခဲ့သည်။

အမေရိကန်နှင့် ၎င်း၏ မဟာမိတ်များသည် ရုရှားကို ဖျက်လိုဖျက်ဆီး ကြိုးပမ်းနေကြကြောင်း ပူတင်က စွပ်စွဲခဲ့သည်။

တစ်ချိန်တည်းမှာပင် ကိယက်ဗ်မြို့တွင် လက်မှတ်ရေးထိုးပွဲ အခမ်းအနားတစ်ခု ကျင်းပခဲ့ပြီး ဇာလန်းစကီးက နေတိုး အဖွဲ့ဝင်အဖြစ် တရားဝင် လျှောက်ထားသည့် စာရွက်စာတမ်းများပေါ်သို့ လက်မှတ်ရေးထိုးနေသည့် ဗွီဒီယိုဖိုင်ကို လွှင့်တင်လာခဲ့သည်။

ပူတင်နဲ့ ယူကရိန်းဒေသထဲက ခွဲထွက်ရေးခေါင်းဆောင်များ (AP)

ယူကရိန်းသည် နေတိုးစစ်စာချုပ် မဟာမိတ်အဖွဲ့ဝင်ထဲသို့ ပါဝင်မည့် အလားအလာသည် ၎င်း၏အနီရောင် မျဉ်းထဲ မှ တစ်ခုဖြစ်ကြောင်း ပူတင်က ယခင်ကတည်းက ထပ်တလဲလဲ ပြောကြားခဲ့ပြီး ဖြစ်သည်။ ထို့ပြင် ပူတင်သည် ၎င်း၏ ကျူးကျော်စစ်ကို မျှတမှုတစ်ခုအဖြစ် ပြောကြားခဲ့ရာ ထိုစစ်သည် ဥရောပမြေပေါ်၌ ဒုတိယကမ္ဘာစစ် နောက်ပိုင်း အကြီးဆုံး စစ်ရေးပဋိပက္ခအဖြစ် ၈ လတိုင်ခဲ့ပြီဟု သိရသည်။

၎င်း၏မိန့်ခွန်းထဲတွင် ပူတင်က ယူကရိန်းကို ငြိမ်းချမ်းရေးဆွေးနွေးမှုစားပွဲသို့ ထိုင်ရန် တိုက်တွန်းခဲ့သော်လည်း မိမိ သိမ်းပိုက်ပြီးဖြစ်သည့် နယ်မြေများ ပြန်လည်ပေးအပ်ရေး ဆွေးနွေးမည်မဟုတ်ဟု အခိုင်အမာ ပြောကြားခဲ့သည်။

အလားတူ ဇာလန်းစကီးကလည်း ပူတင်နှင့် စေ့စပ်ညှိနှိုင်းမှု ပြုလုပ်မည်မဟုတ်ဟု တုံ့ပြန်ပြောကြားခဲ့သည်။

“ရုရှားနဲ့ တွေ့ဆုံဆွေးနွေးဖို့ ကျနော်တို့ အဆင်သင့် ဖြစ်နေပါပြီ။ ဒါပေမယ့် ရုရှားရဲ့ နောက်ထပ် တခြား သမ္မတ တစ်ယောက်နဲ့ ဆွေးနွေးမှာဖြစ်ပါတယ်” ဟု ဇာလန်းစကီးက ပြောကြားခဲ့သည်။

Source: AP

CNI International News

နယူးယောက်၊ အောက်တိုဘာ ၁

ယူကရိန်းနယ်မြေ အစိတ်အပိုင်းများကို မော်စကို သိမ်းပိုက်ကြောင်း ကြွေးကြော်ခြင်းအပေါ် အမေရိကန်နှင့် အယ်လ်ဘေးနီးယားတို့၏ ကုလသမဂ္ဂ (UN) လုံခြုံရေးကောင်စီ ဆုံးဖြတ်ချက်တစ်ရပ် ထွက်ပေါ်ရေး တင်သွင်းမှုကို ကောင်စီအမြဲတမ်းအဖွဲ့ဝင် ရုရှားက ဗီတိုအာဏာဖြင့် စက်တင်ဘာ ၃၀ ရက်၌ ပယ်ချခဲ့သည်။

အခြား အမြဲတမ်း အဖွဲ့ဝင် တစ်ဦးဖြစ်သည့် တရုတ်ကတော့ မဲမပေးဘဲ နေခဲ့သည်။ တရုတ်သည် ရုရှား၏ မဟာ ဗျူဟာမြောက် မိတ်ဖက်ဖြစ်သည်။

အစောပိုင်းတွင် ရုရှားသမ္မတ ဗလာဒီမာပူတင်က ယူကရိန်းပိုင်နက် ၁၅ ရာခိုင်နှုန်းဖြစ်သည့် နယ်မြေ ၄ ခုကို ရုရှား က အုပ်ချုပ်ပြီဖြစ်ကြောင်း ကြေညာခဲ့သည်။ ယင်းသိမ်းပိုက်မှုသည် ဒုတိယကမ္ဘာစစ်နောက်ပိုင်း ဥရောပတွင် အကြီးမားဆုံး နယ်မြေသိမ်းပိုက်မှု ဖြစ်သည်။

ရုရှား၏ အဆိုပါလုပ်ရပ်ကို အနောက်အုပ်စု နိုင်ငံများနှင့် ရုရှား၏ရင်းနှီးသော မဟာမိတ်နိုင်ငံများကပင် ဆန့်ကျင်ခဲ့ ကြသည်။

ကုလလုံခြုံရေးကောင်စီ အစည်းအဝေးကျင်းပနေစဉ် (AP)

ထိုသို့ ဆန့်ကျင်ကန့်ကွက်မှုကို ကုလသမဂ္ဂဆိုင်ရာ အမေရိကန်သံအမတ် လင်ဒါသောမတ်ဂရင်းဖီးလ် (Linda Thomas-Greenfield) က တင်ပြခဲ့ပြီး ယူကရိန်း၏ နယ်နိမိတ် အပြောင်းအလဲ အခြေအနေကို အသိအမှတ် မပြုကြရန်နှင့် ရုရှားတပ်များ ပြန်လည် ရုပ်သိမ်းရန် ကုလသမဂ္ဂအဖွဲ့ဝင်နိုင်ငံများကို တောင်းဆိုခဲ့သည်။

အချုပ်အခြာ အာဏာပိုင် နိုင်ငံတစ်နိုင်ငံ၏ နယ်မြေကို သိမ်းပိုက်ရန် ကြိုးပမ်းမှုသည် ကုလသမဂ္ဂ၏ အခြေခံမူများ နှင့် ဆန့်ကျင်ကြောင်း ကုလသမဂ္ဂလုံခြုံရေးကောင်စီအတွင်း သံအမတ်လင်ဒါက ဆန့်ကျင်ကန့်ကွက်ခဲ့သည်။

အဆိုပါ သိမ်းပိုက်မှုကို ပူတင်က စက်တင်ဘာ ၃၀ ရက်တွင် ကြေညာခဲ့ရာ ယင်းကြေညာမှုသည် နိုင်ငံတကာ ဥပဒေ စည်းမျဉ်းစည်းကမ်းများကို အတိအလင်း ချိုးဖောက်ခြင်းဖြစ်ကြောင်း ၎င်းက ဆက်လက် ပြောကြားခဲ့ သည်။

အမေရိကန်၏အဆိုကို နိုင်ငံပေါင်း ၁၀ နိုင်ငံက ထောက်ခံခဲ့ကြသော်လည်း တရုတ်၊ ဂါဘွန်၊ အိန္ဒိယနှင့် ဘရာဇီးတို့ က ကြားနေခဲ့ကြသည်။

ယူကရိန်းခွဲထွက်ခေါင်းဆောင်များနှင့် ပူတင်ကိုတွေ့ရစဉ် (AP)

ရုရှား၏ လုပ်ရပ်များကို ရှုတ်ချရန် ဝါရှင်တန်သည် အဖွဲ့ဝင် ၁၉၃ နိုင်ငံပါဝင်သော ကုလသမဂ္ဂ အထွေထွေ ညီလာခံ သို့ ဆက်လက် တင်ပြသွားမည်ဖြစ်ကြောင်း သံအမတ် လင်ဒါက ဆက်လက် ပြောကြားခဲ့သည်။
“အထွေထွေညီလာခံမှာ ကမ္ဘာ့နိုင်ငံတွေ ကျယ်ကျယ်လောင်လောင်နဲ့ ဒီကိစ္စဆွေးနွေး ကြပါလိမ့်မယ်။ တခြားနိုင်ငံ တွေရဲ့နယ်နိမိတ်တွေကို အင်အားသုံးပြီး မြေပုံပြန်ဆွဲဖို့ ကြိုးပမ်းတာဟာ တရားမဝင်ပါဘူး။ လက်မခံနိုင်ပါဘူး” ဟု လင်ဒါသောမတ်ဂရင်းဖီးလ်က ထပ်လောင်းက ပြောကြားခဲ့သည်။

ရုရှားသည် ပြီးခဲ့သည့် ဖေဖော်ဝါရီ ၂၄ ရက်တွင် အိမ်နီးချင်း ယူကရိန်းကို ကျူးကျော်ဝင်ရောက်ခဲ့ပြီး ရက်သတ္တ တစ်ပတ်အကြာ ကုလသမဂ္ဂ အထွေထွေညီလာခံ၏ လေးပုံတစ်ပုံနီးပါးက ထိုအရေးကိစ္စကို မဲခွဲဆုံးဖြတ်ခဲ့ကြ သည်။

ထို့နောက် အမေရိကန် ဦးဆောင်သော အနောက်အုပ်စုက ရုရှားကို နိုင်ငံတကာအသိုင်းအဝိုင်းတွင် အထီးကျန် ဖြစ်စေရန် ကြိုးပမ်းခဲ့ကြသည်။

Source: Reuters

CNI International News

ဆိုဖီယာ၊ စက်တင်ဘာ ၃၀

ယူကရိန်းစစ်ပွဲဂယက်ကြောင့် နှစ်နှစ်အတွင်း စွမ်းအင်ကုန်ကျစရိတ်များ ကြီးလာခြင်းနှင့် ငွေကြေးဖောင်းပွမှုနှုန်း တိုးလာခြင်းတို့ရှိနေစဉ်အတွင်းမှာပဲ ဘူလ်ဂေးရီးယားနိုင်ငံသားများသည် စတုတ္ထအကြိမ်မြောက် ကျင်းပတော့မည့် ရွေးကောက်ပွဲသို့ သွားရောက်မဲပေးကြရမည်ဖြစ်ကြောင်း အေပီသတင်းဌာနက ရေးသားဖော်ပြသည်။

လက်ရှိ နိုင်ငံရေးစနစ်အပေါ် မကျေနပ်မှုများနှင့် စိတ်ပျက်မှုများရှိနေသဖြင့် ယင်းရွေးကောက်ပွဲသို့ သွားရောက် မဲပေးသူနည်းပါးမည်ဖြစ်ပြီး အစိတ်စိတ်အမွှာမွှာ ကွဲပြားနေသည့် လွှတ်တော်သာ ပေါ်ပေါက်လာမည်ဟု ဘူလ် ဂေးရီးယား မဲဆန္ဒရှင်များက ယုံကြည်ထားကြသည်။လွှတ်တော်ထဲတွင် လူကြိုက်များ ရေပန်စားပြီး ရုရှား လိုလား သောအုပ်စုများက ၎င်းတို့၏ကိုယ်စားပြုမှုကို နေရာတိုးချဲ့ယူနိုင်သည့် အလားအလာရှိနေကြောင်း အေပီက ဆက်လက်ရေးသားထားသည်။

အနောက်အုပ်စုလိုလားသော ဝန်ကြီးချုပ် ကီရယ်ပက်ကော့ဗ် ဦးဆောင်သော ညွန့်ပေါင်းအဖွဲ့သည် ပြီးခဲ့သည့် ဇွန်လတွင် အယုံအကြည်မရှိကြောင်း မဲအဆုံးအဖြတ်ဖြင့် ရှုံးနိမ့်ခဲ့ပြီးနောက် ယခုရွေးကောက်ပွဲကျင်းပရန် ဖြစ်ပေါ် လာခဲ့သည်။

မော်စကိုသည် မိမိ၏အစိုးရကို နှိမ့်ချရန်အတွက် ပေါင်းစပ်စစ်ပွဲနည်းပရိယာယ်ကို အသုံးပြုခဲ့ကြောင်း ကီရယ် ပက်ကော့ဗ်က ပြောကြားခဲ့သည်။ ၎င်းအစိုးရသည် ဓာတ်ငွေ့နှင့်လောင်စာစရိတ်ကို ရူဘယ်ငွေကြေးဖြင့် ပေးချေ ရန် ငြင်းဆိုခဲ့ပြီး ရုရှားသံတမန်ဝန်ထမ်း ၇၀ ကို ဘူလ်ဂေးရီးယားပြည်တွင်းမှ နှင်ထုတ်ရန် အမိန့်ပေးခဲ့သည်။

လာမည့်အောက်တိုဘာ ၂ ရက်တွင် ကျင်းပမည့် လွှတ်တော်ရွေးကောက်ပွဲတွင် ဝင်ရောက်ယှဉ်ပြိုင်ရန် ပါတီ ၇ ပါတီအထိ ၄ ရာခိုင်နှုန်း သတ်မှတ်ချက်ကို ကျော်လွန်သွားနိုင်ကြောင်း နောက်ဆုံးကောက်ယူခဲ့သော လူထု သဘောထားစစ်တမ်းများအရ သိရသည်။

၂၀၂၁ ခုနှစ် နိုဝင်ဘာလ ၁၄ ရက်နေ့တွင် ဘူလ်ဂေးရီးယားနိုင်ငံ ပါလီမန်နှင့် သမ္မတရွေးကောက်ပွဲများအတွင်း လူတစ်ဦးသည် မဲရုံတစ်ခုတွင် မဲပေးနေစဉ်(ဓါတ်ပုံ-ရိုက်တာ)

ယခင်ရွေးကောက်ပွဲများတွင် ဝန်ကြီးချုပ်ဟောင်း ဘွိုင်ကိုဘောရစ်ဆော့ဗ်၏ GERB ပါတီကို ထောက်ခံမှု ကျဆင်းခဲ့သော်လည်း ယခုပွဲတွင် ရှေ့တန်းရောက်လာနိုင်စရာလည်း ရှိနေသည်။

အကျပ်အတည်းကာလတွင် အပြောင်းအလဲတစ်ရပ်ကို လက်ခံရန် မဲဆန္ဒရှင်များ တုံ့ဆိုင်းနေကြသော်လည်း ၎င်းတို့နှင့် ရင်းနှီးကျွမ်းဝင်သော ပါတီများကို ဦးစားပေးရွေးချယ်ရန် အလားအလာကောင်းနေသဖြင့် အပြောင်း အလဲဖြစ်နိုင်ခြေများကြောင်း လေ့လာသုံးသပ်သူများက ပြောကြသည်။

ယူကရိန်းစစ်ပွဲသည် ယခုလာမည့်ဘူလ်ဂေးရီးယားရွေးကောက်ပွဲအပေါ် အထူးသက်ရောက်မှုရှိနေကြောင်း ဆိုဖီယာမြို့တော်အခြေစိုက် Gallup နိုင်ငံတကာအဖွဲ့မှ နိုင်ငံရေးလေ့လာသုံးသပ်သူ ပါဗန်စီမီယိုနော့ဗ်က ပြောကြားခဲ့သည်။

“အရင်ရွေးကောက်ပွဲတွေတုန်းကတော့ GERB ပါတီနဲ့ ဘွိုင်ကိုဘောရစ်ဆော့ဗ်တို့ ပုံဖော်ထားတဲ့ ပြီးခဲ့တဲ့ ၁၀ နှစ်အုပ်ချုပ်ရေးပုံစံ ထပ်ဟပ်မှုရှိပေမယ့်လည်း အခုပွဲမှာတော့ အဓိကရင်ဆိုင်နေရတဲ့ပြဿနာတွေက တည်ငြိမ် ရေး၊ ဈေးနှုန်းကျဆင်းရေးနဲ့ စစ်ပွဲအကျိုးဆက်များ ကိုင်တွယ်ဖြေရှင်းရေးတို့ ဖြစ်ပါတယ်” ဟု ၎င်းက ရှင်းပြသည်။

“တိုင်းပြည်ရဲ့အဓိကပိုင်းခြားမှုက လက်ရှိအနေအထားမှာ အပြောင်းအလဲတစ်ခုဆိုတာထက် နိုင်ငံရေးမြေပုံအရ အရှေ့နဲ့အနောက် ကွာဟချက်ပဲဖြစ်တယ်” ဟု ၎င်းက ထပ်လောင်းပြောကြားခဲ့သည်။

သို့သော် ဘွိုင်ကိုဘောရစ်ဆော့ဗ်၏ပါတီသည် တစ်ပါတီတည်းဖြင့် အစိုးရအဖွဲ့ရန် ကြိုတင်ခန့်မှန်းတွက်ချက် မှုများအရ ရာခိုင်နှုန်းမလုံလောက်နိုင်ပေ။ ၎င်း၏ GERB ပါတီဦးဆောင်သော ညွန့်ပေါင်းအဖွဲ့သည် အခြား ပြိုင်ဘက်အားလုံး၏ အကျင့်ပျက်ခြစားမှုအပြစ်တင်ခံနေရသဖြင့် ရွေးကောက်ပွဲအောင်နိုင်ခြေ နည်းပါးနေသည်။

Source: AP