CNI International News

ကိယက်ဗ်၊ ဇန်နဝါရီ ၂

နှစ်သစ်ကူးအပြီး မိနစ်ပိုင်းအကြာတွင် ယူကရိန်းမြို့တော် ကိယက်ဗ်၌ ပေါက်ကွဲမှုပေါင်းများစွာ ဖြစ်ပွားခဲ့သည်ဟု အယ်လ်ဂျာဇီးယားသတင်းတွင် ဖော်ပြသည်။

အဆိုပါဖြစ်ရပ်များ မတိုင်ခင်ကလည်း ယူကရိန်းနိုင်ငံတစ်ဝန်းလုံးရှိ ပစ်မှတ်များသို့ ရုရှားဘက်က ခရုစ်ဒုံးကျည် အနည်ဆုံး ၂၀ ခန့် ပစ်ခတ်ခဲ့ကြောင်း ယူကရိန်းအရာရှိများက ပြောကြားကာ ၎င်းသည် နှစ်သစ်ကူးချိန်တွင် အကြမ်းဖက်မှုလုပ်ဆောင်ခြင်းဟုလည်း ခေါင်းစဉ်တပ်ခဲ့သည်။

ပထမဆုံးတိုက်ခိုက်မှုများသည် တနင်္ဂနွေနေ့ည ၁၂ နာရီထိုးအပြီး နာရီဝက်အကြာတွင် ဖြစ်ပွားခဲ့ကာ ခရိုင်နှစ်ခုသို့ ထိမှန်ကာ သေဆုံးဒဏ်ရာရမှုစာရင်းကို မသိရသေးဟု ကိယက်ဗ်မြို့တော်ဝန် ဗီတာလီ ကလစ်ရှ်ကို (Vitali Klitschko) က ပြောသည်။ ရုရှားဘက်မှ လေကြောင်းတိုက်ခိုက်မှု ၂၃ ခုကိုလည်း ပစ်ချနိုင်ခဲ့သည်ဟု သိရသည်။

တနင်္ဂနွေနေ့ညနေပိုင်းတွင် ယူကရိန်းအနေဖြင့် အောင်ပွဲရသည်အထိ တိုက်ခိုက်မှုများကို လုပ်ဆောင်သွားမည်ဟု သမ္မတ ဇာလန်းစကီးက ပြောသည်။ ယူကရိန်းစစ်ပွဲသည် ၁၁ လတွင်းသို့ ရောက်ရှိလာပြီလည်း ဖြစ်သည်။

နှစ်သစ်ကူးနေ့အပြီး ကိယက်ဗ်မြို့ရှိ ပေါက်ကွဲပျက်စီးမှုများ(ဓါတ်ပုံ-ရိုက်တာ)

အစောပိုင်းတိုက်ခိုက်မှုများတွင် ကိယက်ဗ်မြို့ရှိ ဟိုတယ်တစ်ခုနှင့် လူနေအဆောက်အဦတစ်ခု ပျက်စီးသွားခဲ့ပြီး အနည်းဆုံးလူ ၁ ဦးသေဆုံးကာ များစွာဒဏ်ရာရခဲ့သည်ဟု မြို့တော်ဝန်က ပြောသည်။ ဒဏ်ရာရသူများတွင် ဂျပန် သတင်းထောက်တစ်ဦး ပါဝင်နေပြီး ၎င်းကို ဆေးရုံတင်ထားရသည်ဟုလည်း သိရသည်။

ထို့အပြင် ရုရှားတပ်များသည် နိုင်ငံတောင်ပိုင်းရှိ မီကိုလစ်ဗ် (Mykolaiv) မြို့တွင် ဝင်ရောက်စီးနင်းမှုများ လုပ်ဆောင်ခဲ့သည်ဟုလည်း ဒေသဆိုင်ရာအာဏာပိုင်များက ပြောသည်။ လူခုနှစ်ဦးဒဏ်ရာရရှိခဲ့သည်ဟုလည်း သိရသည်။ လက်ရှိအချိန်တွင် ရုရှားတပ်များသည် အရပ်သားများကို ပစ်မှတ်ထားသည့် စီးနင်မှုများကိုပါ လုပ် ဆောင်လာပြီဟု မြို့တော်ဝန် ဗီတာလီကင် (Vitaliy Kim) က ပြောသည်။ ရုရှားအစိုးရသည် စီးနင်းမှုများ မလုပ်ဆောင်ဟု ယခင်က ငြင်းဆိုခဲ့ဖူးသည်။ ရုရှားတပ်များသည် အရေးပါသည့် အခြေခံအဆောက်အဦများပင် မဟုတ်ဘဲ လူနေဧရိယာများ၊ ဟိုတယ်များ၊ ဂိုထောင်များနှင့် လမ်းများကိုပါ ပစ်မှတ်ထားတိုက်ခိုက်လာပြီဟုလည်း ၎င်းက တယ်လီဂရမ်တွင် ပြောဆိုခဲ့သည်။

ရုရှား၏ တိုက်ခိုက်မှုများအတွင်း ယခုတစ်ကြိမ်တိုက်ခိုက်မှုများသည် လူသေဆုံးမှုများစွာဖြစ်စေခဲ့သည်ဟုလည်း ယူကရိန်းနိုင်ငံခြားရေးဝန်ကြီး ဒီမီထရို ကူလီဘာ (Dmytro Kuleba) က ပြောသည်။ ယခုတစ်ကြိမ်တွင် ရုရှား၏ ဒုံးတိုက်ခိုက်မှုများသည် အခြေခံအဆောက်အဦများအပြင် လူနေဧရိယာများကိုပင် ပစ်မှတ်ထားလာသည်ဟု ၎င်းက ပြောသည်။

စစ်ရာဇဝတ်သားပူတင်သည် နှစ်သစ်ကို လူသတ်၍ ကြိုဆိုလိုက်ကြောင်း၊ ယင်းကြောင့် ရုရှားကို ကုလသမဂ္ဂ လုံခြုံရေးကောင်စီမှ ထုတ်ပယ်ရန်တောင်းဆိုကြောင်းလည်း ကူလီဘာက ထပ်လောင်းပြောကြားခဲ့သည်။

Source:Aljazeera

CNI International News

ကိယတ်ဗ်၊ ဒီဇင်ဘာ ၂၈

ယူကရိန်းအနေဖြင့် ကိုယ်တိုင်လက်နက်ချလျှင်ချ မချပါက လက်နက်ချအောင်လုပ်မည်ဟု ရုရှားနိုင်ငံခြားရေး ဝန်ကြီး ဆာဂျီလာဗရော့ဗ် (Sergey Lavrov)က အင်္ဂါနေ့တွင် သတိပေးခဲ့သည်ဟု အေပီသတင်းတွင် ဖော်ပြထားသည်။

ယူကရိန်းအနေဖြင့် စစ်ရေးလှုပ်ရှားမှုများ မလုပ်ဆောင်ရန်၊ နာဇီဝါဒကို ဖယ်ရှားရန်နှင့် ရုရှား၏ တောင်းဆိုမှု များကို လိုက်လျောရန် လိုအပ်ကြောင်း ၎င်းက ပြောသည်။

ထို့နောက် ရုရှားကိုစစ်ဘက်ဆိုင်ရာ ခြိမ်းခြောက်မှုများ မလုပ်ဆောင်ရန်လည်း လိုအပ်သည်ဟု ရုရှားနိုင်ငံခြားရေး ဝန်ကြီး ဆာဂျီ လာဗရော့ဗ် (Sergey Lavrov)က ပြောသည်။

လာဗရော့ဗ်က ရုရှားကို အားနည်းစေရေးအတွက် အနောက်အုပ်စုမှ ယူကရိန်းစစ်ပွဲကို လောင်စာ ဖြည့်ပေးနေကြောင်း စွပ်စွဲခဲ့ကာ လက်ရှိပဋိပက္ခကို မည်မျှကြာစေမည်လဲဆိုသည်မှာ ယူကရိန်းနှင့် အမေရိကန်နိုင်ငံတို့ပေါ် တွင်သာ မူတည်သည်ဟုလည်း ပြောကြားခဲ့သည်။

ဇာလန်းစကီးနဲ့ ဘိုင်ဒန်ကိုတွေ့ရစဉ် (GETTY IMAGES)

ပဋိပက္ခကြာမြင့်ချိန် အခြေအနေသည် ယူကရိန်းအစိုးရနှင့် ၎င်းတို့ကို နောက်ကွယ်မှ ထောက်ပံ့နေသော အမေရိကန်တို့ ပေါ်တွင်သာ မူတည်ကြောင်းနှင့် အဓိပ္ပါယ်မရှိသော ခုခံမှုများကို ယူကရိန်းအနေဖြင့် အချိန်မရွေး ရပ်တန့်နိုင် ကြောင်း လာဗရော့ဗ်က ရုရှားသတင်းဌာန တစ်ခုဖြစ်သော Tass သတင်းအေဂျင်စီကို ပြောကြားခဲ့သည်။

အဆိုပါ လာဗရော့ဗ်၏ ပြောဆိုမှုများအပေါ် တုန့်ပြန်ရာတွင် ယူကရိန်းသမ္မတ အကြံပေး မီခိုင်လို ပိုဒေါ်ယတ် (Mykhailo Podoyak) က ရုရှားအနေဖြင့် အခြေအနေအမှန်ကို လက်ခံရန်လိုအပ်သည်ဟု တွစ်တာတွင် ရေးသားခဲ့သည်။

လုံးဝ တပ်ဖျက်သိမ်းခြင်း၊ လက်နက်များကို ထိပ်လန့်တကြား ရှာဖွေခြင်း၊ အီရန်နှင့်လျှို့ဝှက်စာချုပ်များ ချုပ်ဆို ခြင်းအပြင် လာဗရော့ဗ်၏ ခြိမ်းခြောက်မှုများက အလုပ်ဖြစ်မှာ မဟုတ်ကြောင်း၊ ယူကရိန်းအနေဖြင့် သိမ်းပိုက်ခံ ထားရသော နယ်မြေများမှ ကျူးကျော်သူများကို အပြီးသတ် မောင်းထုတ်ပြီးမှသာလျှင် လက်နက်ချမည်ဖြစ်ကြောင်း၊ အဆုံးသတ်ကို တိတ်တဆိတ် စောင့်ကြည့်ဖို့ လိုအပ်ကြောင်း ပိုဒေါ်ယတ်က ပြောသည်။

အစောပိုင်း အေပီသတင်းဌာနနှင့် အင်တာဗျူးရာတွင် ယူကရိန်းနိုင်ငံခြားရေးဝန်ကြီး ဒီမီထရို ကူလီဘာ (Dmytro Kuleba)က ယူကရိန်းအစိုးရအနေဖြင့် စစ်ပွဲကို အဆုံးသတ်ရေး ညီလာခံတစ်ခု ကျင်းပလိုကြောင်း သို့သော် ထိုညီလာခံတွင် ရုရှားပါဝင်မည်ဟု မမျှော်လင့်ကြောင်း ပြောခဲ့သည်။

ကုသမဂ္ဂ၏ အထွေထွေအတွင်းရေးမှူးချုပ် အန်တိုနီယို ဂူတာရတ်စ်ကိုတွေ့ရစဉ် (GETTY IMAGES)

ကူလီဘာ၏ ပြောဆိုမှုတွင် ယူကရိန်းအနေဖြင့် ကုသမဂ္ဂ၏ အထွေထွေအတွင်းရေးမှူးချုပ် အန်တိုနီယို ဂူတာရတ်စ် ( Antonio Guterres)ကို ဖျန်ဖြေပေးသူအဖြစ် ခန့်အပ်ကာ နှစ်လအတွင်း ငြိမ်းချမ်းရေး ဆွေးနွေးပွဲ ကျင်းပလိုသည်ဟု ပါဝင်သည်။

သို့သော် ရုရှားနှင့်တိုက်ရိုက် ဆွေးနွေးမှုများ မလုပ်ဆောင်ခင် ရုရှားအနေဖြင့် စစ်ရာဇဝတ်မှုခုံရုံးတွင် တရား ရင်ဆိုင်ရမည်ဟုလည်း ၎င်းက ပြောသည်။

ထိုအခြေအနေများက ယူကရိန်းစစ်ပွဲကို ရပ်တန့်ရေးအတွက် မည်မျှရှုပ်ထွေး၊ ခက်ခဲနေသည်ကို ဖော်ပြနေသည်။

ရုရှားတပ်ဖွဲ့များ မရုပ်သိမ်းမချင်း ဆွေးနွေးမှုများ လုပ်ဆောင်မည် မဟုတ်ဟု ယူကရိန်းဘက်က ပြောဆိုထားပြီး စစ်ရေးအရ အသာစီး ရရှိမှုများနှင့် ခရိုင်းမီးယား ကျူးကျော်ထားမှုအပေါ် လျစ်လျူမရှုသင့်ဟု ရုရှားက ပြောဆို ထားသည်။

Source: AP

CNI International News

ကိယတ်ဗ်၊ ဒီဇင်ဘာ ၁၇

ယူကရိန်းစစ်ပွဲကာလ ၁၀ လအတွင်းသို့ ရောက်ရှိလာချိန်တွင် နှစ်ဖက်စလုံးသည် အင်အားကျဆင်းလာသော ရှေ့ မတိုးသာ နောက်မဆုတ်သာ အခြေအနေသို့ ရောက်ရှိလာခြင်းကြောင့် တိုက်ပွဲများ ပြန်လည် ပြင်းထန်လာနိုင် ကြောင်း နိုင်ငံရေးလေ့လာသုံးသပ်သူများက ခန့်မှန်းသည်ဟု အေပီသတင်းတွင် ဖော်ပြထားသည်။

လက်ရှိ မတင်မကျ အနေအထားမှာ ယူကရိန်းအတွက် ပိုမိုအကျိုးအမြတ် ရှိစေနိုင်သည်ဟု လေ့လာသူများက ပြောသည်။ အနောက်အုပ်စုမှ ထောက်ပံ့သော လက်နက်များကို လက်ခံခြင်းနှင့် တန်ပြန် ထိုးစစ်အသစ်များ အတွက် ကြိုတင်ပြင်ဆင်မှုတို့ကို လုပ်ဆောင်နိုင်ခြင်းတို့ကြောင့် ဖြစ်သည်။

သို့သော် ရုရှားတွင် သမ္မတပူတင်၏ ချီတုံချတုံဖြစ်မှုနှင့် မဟာဗျူဟာအရ ရှင်းလင်းပြတ်သားမှု မရှိခြင်းတို့ အပေါ် စိတ်ပျက်မှုများ ပိုတိုးလာသည်။

စစ်မြေပြင်တွင် အေးခဲမှုများ ရှိလာသည်နှင့်အမျှ တိုက်ပွဲများ ပြန်လည် ပြင်းထန်လာကာ ရုရှားတို့ သိမ်းပိုက်ထား ရာ ယူကရိန်းတောင်ပိုင်း ဧရိယာများသည် ယူကရိန်းတပ်များ၏ နောက်ထပ် စစ်ရေး ပစ်မှတ်များ ဖြစ်လာနိုင်သည် ဟု စစ်ဘက်ဆိုင်ရာ ကျွမ်းကျင်သူများက ပြောသည်။

ပူတင်နဲ့ ရုရှားစစ်သားများကိုတွေ့ရစဉ် (AP)

အေးခဲနေသော ရာသီဥတု အခြေအနေတွင် စစ်ဆင်ရေးများ လုပ်ဆောင်ရန် ခက်ခဲသော်လည်း စစ်ရေး လေ့ကျင့်မှု များ ပိုမိုလုပ်ဆောင်နိုင်သည်ဟု လုံခြုံရေးကုမ္ပဏီ အကြီးအကဲဖြစ်သူ ဗြိတိန်တင့်ကား အရာရှိဟောင်း ဂျက်စတင် ခရမ့် (Justin Crump) ကပြောသည်။

ယူကရိန်းတပ်များသည် ဇာပေါ်ရဇ်ဇီယာ (Zaporizhzhia) ဒေသ တောင်ပိုင်းရှိ ဒေသများကို ပြန်လည် သိမ်းပိုက် ရန်နှင့် အဇော့ပင်လယ် (Sea of Azov) ရှိ မာရီပိုလ် (Mariupol) ဆိပ်ကမ်းသို့ ထိုးစစ်ဆင်ရန် ကြိုးပမ်းနိုင်သည်ဟု လည်း ခရမ့်ကပြောသည်။

ထိုသို့ ပြုလုပ်ခြင်းဖြင့် ယူကရိန်းတပ်များသည် ရုရှား၏ ခရိုင်းမီးယားသို့ သွားရာလမ်းကြောင်းများကို ဖြတ်တောက် နိုင်မည်လည်း ဖြစ်သည်။

ဇာပေါ်ရဇ်ဇီယာသည် ယူကရိန်းတပ်များ ထိုးစစ်ဆင်မည့် ဒေသဟုလည်း ယူကရိန်းနိုင်ငံသား လေ့လာ သုံးသပ်သူ အိုလက် ဇာဒါနော့ဗ် (Oleh Zhdanov)က ပြောသည်။

ပြီးခဲ့သည့် နှစ်များအတွင်း ရုရှားသည် စစ်ဘက်ဆိုင်ရာ အရေးနိမ့်မှုများနှင့် ရင်ဆိုင်ခဲ့ရခြင်းကြောင့် စွန့်လွှတ်လိုက်ရ သော ဒေသများကို ပြန်သိမ်းရန် အရန်တပ်ဖွဲ့ဝင် ၃၀၀၀၀၀ ကို ခေါ်ခဲ့ရသည်။

ထိုသူများမှ တစ်ဝက်ခန့်မှာ လေ့ကျင့်ရေး ကာလတွင်သာ ရှိနေဆဲဟု ပူတင်က ပြောသည်။ ၎င်းက ရုရှားသည် ကြုံရာတပ်ဖွဲ့များကို စစ်မြေပြင်သို့ စေလွှတ်ခြင်းကြောင့် စွမ်းရည် ပိုကောင်းသော တပ်ဖွဲ့ဝင်များ ဖြည့်တင်းနိုင်ရန် အားထုတ်မှုဟု ခရမ့်က ပြောသည်။

Source: AP

CNI International News

ကိဗ်ယက်၊ ဒီဇင်ဘာ ၁၆

အမေရိကန်အနေဖြင့် နောက်ဆုံးပေါ် လေကြောင်းကာကွယ်ရေး ဒုံးကျည်များကို ယူကရိန်းသို့ပေးပို့မည်ဆိုပါက ၎င်းမှာ နောက်ထပ်ရန်စမှုတစ်ခုဖြစ်ကာ ရုရှား၏ တုန့်ပြန်မှုများနှင့် ရင်ဆိုင်သွားရမည်ဟု ရုရှား နိုင်ငံခြားရေးဌာန က ကြာသပတေးနေ့တွင် သတိပေးခဲ့ကြောင်း AP သတင်းတွင်ဖော်ပြသည်။

အမေရိကန်သည် မြေပြင်မှ ဝေဟင်ပစ် Patriot ဒုံးကျည်များကို ယူကရိန်းသို့ ထောက်ပံ့ပေးသွားမည်ဟု သတင်း များတွင် ဖော်ပြခဲ့ပြီးနောက် ယင်းသည် ယူကရိန်းစစ်ပွဲတွင် သိသိသာသာပါဝင်လာခဲ့ပြီဟု ရုရှားနိုင်ငံခြားရေးဌာန က ပြောခွင့်ရပုဂ္ဂိုလ် မာရီယာ ဇတ်ဟာရိုဗာ(Maria Zakharova) က ပြောသည်။

အဆိုပါ လက်နက်များအပြင် ယူကရိန်းစစ်ပွဲအတွင်း အမေရိကန်၏စစ်ဘက်ဆိုင်ရာကူညီထောက်ပံ့မှုများ များပြားလာခြင်းသည် ရန်လိုမှုတစ်မျိုးဖြစ်ကာ အကျိုးဆက်များရှိလာနိုင်သည်ဟုလည်း ဇတ်ဟာရိုဗာက ပြောသည်။ သို့သော်မည်သို့သောတုန့်ပြန်မှု အကျိုးဆက်ဖြစ်လာမည်ဆိုသည်ကိုတော့ ရှင်းလင်းခဲ့ခြင်းမရှိပေ။

ဒွန်နက်ဆက်ဒေသ၏ မြို့တော် ဒွန်နက်ဆက်တွင် ကျည်ကျရောက်ပေါက်ကွဲမှုကြောင့် ဘုရားကျောင်း၏ အမိုးတွင် ကျည်ပေါက်ရာကျန်ခဲ့သည်ကို ဒီဇင်ဘာ ၁၅ ရက်နေ့က တွေ့ရစဉ်(ဓါတ်ပုံ-အေပီ)

ယူကရိန်းကို Patriot ဒုံးလက်နက်များ အမှန်တကယ်ပေးပို့သွားရန် အတည်ပြုမှုစောင့်ဆိုင်းနေသည်ဟု အမေရိကန်တာဝန်ရှိသူများက အင်္ဂါနေ့တွင် ပြောခဲ့သည်။ ယင်းက ပိုမိုခေတ်မီသောလက်နက်များ ထောက်ပံ့ ပေးရန် ယူကရိန်းဘက်က တောင်းဆိုမှုကို ဖြည့်ဆည်းခဲ့ခြင်းဖြစ်ကာ မကြာခင်အတွင်း တရားဝင်ထုတ်ပြန် ကြေညာမည်ဟု ယူဆရသည်။

Patriot ဒုံးလက်နက်များကို စီမံရန်နှင့်ထိန်းသိမ်းရန်အတွက် တပ်ဖွဲ့ဝင် ၉၀ ခန့်လိုအပ်သည်။ ထို့ကြောင့် ယူကရိန်းသို့ အဆိုပါလက်နက်များထောက်ပံ့မည်ဆိုပါက တပ်သားများကိုပါ စေလွှတ်ရမည်ဖြစ်သောကြောင့် အမေရိကန်ဘက်က ယင်းသို့ပြုလုပ်ရန် လပေါင်းများစွာ တုံ့ဆိုင်းနေခြင်းဖြစ်သည်။

သမ္မတဂျိုးဘိုင်ဒန်အစိုးရ၏ ယူကရိန်းစစ်ပွဲအတွင်း တပ်သားများ မစေလွှတ်ရေးစနစ်ကြောင့် ဖြစ်သည်။ ဒုံး လက်နက်များနှင့်ပတ်သက်၍ ယူကရိန်းသို့ အမေရိကန်တပ်သားများ မစေလွှတ်သည့်တိုင် အဆိုပါလက်နက်များ ပေးပို့ခြင်းက ရုရှားကို ဆွပေးသလိုဖြစ်ကာ ၎င်းတို့သာ ရုရှားနိုင်ငံတွင်းသို့ ရောက်ရှိသွားပါက ပဋိပက္ခအခြေအနေ များ ပို၍ ဆိုးရွားလာမည်ကို စိုးရိမ်မှုများလည်း ရှိနေသည်။

ဒွန်နက်ဆက်ဒေသရှိ ဒွန်နက်ဆက်တွင် မီးလောင်ပေါက်ကွဲထားသော ကားတစ်စီးကို မီးသတ်သမားတစ်ဦးက ကြည့်နေစဉ်(ဓါတ်ပုံ-အေပီ)

အဆိုပါ သတင်းများမတိုင်ခင်ကတည်းက သမ္မတ ပူတင် ဦးဆောင်သည့် ရုရှားလုံခြုံရေးကောင်စီ ဒုတိယခေါင်း ဆောင် ဒီမီထရီ မက်ဗီဒက်ဗ် (Dmitry Medvedev) က ယူကရိန်းသို့ Patriots လက်နက်များနှင့် နေတိုးတပ် ဖွဲ့ဝင်များရောက်ရှိလာလျှင် ယင်းတို့သည် ရုရှားလက်နက်ကိုင်များအတွက် ပစ်မှတ်များဖြစ်လာလိမ့်မည်ဟု ပြောဆိုခဲ့ဖူးသည်။

ကာကွယ်ရေးဌာနကဘက်က ပြောဆိုခြိမ်းခြောက်မှုများအပေါ် ရုရှားအစိုးရဘက်မှ သဘောတူမှု ရှိမရှိနှင့် ပတ်သက်၍ သတင်းထောက်များ၏ မေးမြန်းမှုကို အစိုးရအဖွဲ့ပြောခွင့်ရပုဂ္ဂိုလ်က သဘောတူကြောင်း ပြန်လည်ဖြေကြားခဲ့သော်လည်း အမေရိကန်ဘက်မှ ဒုံးလက်နက်များကို အမှန်တကယ်မပို့မချင်း ၎င်းတို့ဘက် မှလည်း ထိုကိစ္စနှင့်ပတ်သက်သည့် ပြောဆိုမှတ်ချက်ပေးမှုများကို ရှောင်ရှားသွားမည်ဟု ဆိုသည်။

Source:AP

CNI International News

ကိဗ်ယက်၊ ဒီဇင်ဘာ ၁၅

ဗုဒ္ဓဟူးနေ့မနက်အစောပိုင်း မြို့တော် ကိဗ်ယက်သို့ ရုရှားတိုက်ခိုက်မှုတစ်ခုအတွင်း ဒရုန်းတစ်ဒါဇင်ကျော်ကို ပစ်ချနိုင်ခဲ့သည်ဟု ယူကရိန်းအရာရှိများက ပြောကြောင်း BBC သတင်းတွင်ဖော်ပြသည်။ လေကြောင်း အချက် ပေးသံများအပြီးတွင် ကျယ်လောင်သော ပေါက်ကွဲသံများကို ကြားခဲ့ရသည်ဟုလည်း အခင်းဖြစ်ရာနေရာတွင် ရှိနေသော BBC သတင်းထောက်များက ပြောသည်။

အီရန်လုပ် Shahed ဒရုန်းများဟု ယူဆရသည့် ဒရုန်းများကို လေကြောင်းကာကွယ်ရေးစနစ်များက ပစ်ချနိုင်ခဲ့ ပြီးနောက် မြို့လယ်ရှိ ရှက်ချင်ကိဗ်စကီ(Shevchenkivskyi)ခရိုင်တွင် ပေါက်ကွဲသံများ ဖုံးလွှမ်းသွားခဲ့သည်။ ရုရှားသည် အောက်တိုဘာလမှ စတင်ကာ ယူကရိန်း၏ စွမ်းအင်ကဏ္ဍနှင့်ပတ်သက်သော အခြေခံအဆောက်အဦ များကို ဒရုန်းများ၊ဒုံးကျည်များဖြင့် ပစ်မှတ်ထားတိုက်ခိုက်ခဲ့သည်။

ဇာပိုရစ်ဇီးယားမြို့ရှိ အပျက်အစီးများထဲမှ လုံခြုံရေးရဲဝန်ထမ်းတစ်ဦး(ဓါတ်ပုံ-NewYork Times)

ကိဗ်ယက်အုပ်ချုပ်ရေးမှူးက ရုရှား၏နောက်ဆုံးပေါ် ဒရုန်းများဖြင့် တိုက်ခိုက်မှုသည် စွမ်းအင်ကဏ္ဍ အခြေခံ အဆောက်အဦအပေါ် ခြိမ်းခြောက်မှုများရှိနေသည်ဟု စွပ်စွဲပြောဆိုခဲ့သော်လည်း ယူကရိန်း အမျိုးသားစွမ်းအင် လိုင်း မန်နေဂျာ ယူရကီနာဂို (Ukrenergo) က ဗုဒ္ဓဟူးနေ့ တိုက်ခိုက်မှုများတွင် မည်သည့်စွမ်းအင်စက်ရုံမှ ထိခိုက်မှု မရှိခဲ့ကြောင်းပြောကာ လေကြောင်းကာကွယ်ရေးစနစ်များ၏ စွမ်းရည်ကိုလည်း ချီးကျူးခဲ့သည်။

Shahed ဒရုန်း ၁၃ စီးကိုပစ်ချနိုင်ခဲ့သည်ဟု ယူကရိန်းသမ္မတ ဗိုလိုဒီမီယာ ဇာလန်းစကီး(Volodymyr Zelensky) က ပြောဆိုခဲ့ပြီး ထိုအရေအတွက်သည် ဗုဒ္ဓဟူးနေ့တွင် ရုရှားဘက်မှ လွှတ်တင်ခဲ့သော ဒရုန်းအရေအတွက်အတိုင်း ပင်ဖြစ်သည်ဟုလည်း ဆိုသည်။ ဒရုန်းအပိုင်းအစတစ်ခုမှာ အုပ်ချုပ်ရေးရုံးတစ်ခုနှင့် လူနေအိမ်လေးလုံးကို ထိခိုက် ပျက်စီးစေခဲ့သည်ဟု ကိဗ်ယက် အုပ်ချုပ်ရေးမှူး ကူလီဘာ (Kuleba) က ပြောခဲ့သော်လည်း ထိုဖြစ်ရပ်များ အတွင်း လူသေဆုံးမှုတစ်စုံတစ်ရာ မရှိခဲ့ကြောင်း ယူကရိန်းမီဒီယာက ထုတ်ပြန်သည်။

ယူကရိန်းနိုင်ငံ ဒီနီပရိုမြို့လယ်ခေါင်တွေရှိ အပျက်အစီးများ မြင်ကွင်း(ဓါတ်ပုံ-Getty Images)

ရုရှား၏ ဒရုန်းတိုက်ခိုက်မှုများသည် ဗုဒ္ဓဟူးနေ့ မနက်ပိုင်း ဒေသစံတော်ချိန် ၆ နာရီခွဲအချိန်တွင် ဖြစ်ပွားခဲ့ကာ ကုလသမဂ္ဂ လူသားခြင်းစာနာမှုဆိုင်ရာ အကြီးအကဲ မာတင် ဂရစ်ဖစ်(Martin Griffiths)သည် ကိဗ်ယက်မြို့သို့ ရောက်ရှိနေချိန်နှင့်လည်း တိုက်ဆိုင်နေသည်။ ဗုဒ္ဓဟူးနေ့ဖြစ်ရပ်များသည် ရှေ့တန်းစစ်မြေပြင်တွင် မဟုတ်ဘဲ ယူကရိန်းတစ်နိုင်ငံလုံး အတိုင်းအတာဖြင့် မည်သို့မည်ပုံ ခံစားနေရဆဲဖြစ်သည်ကို ဖော်ပြနေသည်ဟုလည်း ဂရစ်ဖစ်က ပြောသည်။

အီရန်သည် ရုရှားဘက်သို့ Kamikaze ဒရုန်းများထောက်ပံ့ခဲ့သည်ဟု ယူကရိန်းဘက်က စွပ်စွဲပြောဆိုခဲ့ပြီး ယင်းကို ကနဦး၌ အီရန်ဘက်က ငြင်းဆိုထားသည်။ သို့သော် နောက်ပိုင်းမှ အီရန်ဘက်က ဝန်ခံကာ ကျူးကျော်စစ်မစတင် ခင် ရုရှားသို့ အရေအတွက်အကန့်အသတ်ဖြင့် ဒရုန်းများပေးခဲ့သည်ဟု ဝန်ခံခဲ့သည်။

Source:BBC

CNI International News

ကိယတ်ဗ်၊ ဒီဇင်ဘာ ၁၃

Patriot ဒုံးကျည်များနှင့် တခြားသော နည်းပညာမြင့် ဒုံးကျည်ကာကွယ်ရေးစနစ်များ ထောက်ပံ့ပေးရန် ယူကရိန်း ဝန်ကြီးချုပ် ဒန်းနစ် ရှမီဟဲလ် (Denys Shmyhal)က တောင်းဆိုခဲ့သည်ဟု AP သတင်းတွင် ဖော်ပြထားသည်။

တနင်္လာနေ့(ဒီဇင်ဘာ ၁၂ ရက်)က ယူကရိန်း အရှေ့ပိုင်းဒေသများတွင် ရုရှား၏ လက်နက်ကြီး ပစ်ခတ်မှုများ ပို၍ ဖြစ်ပွားခဲ့ပြီးနောက် ၎င်းက တောင်းဆိုလာခြင်း ဖြစ်သည်။

ရုရှားသည် ဥရောပဒေသကို ယူကရိန်း ဒုက္ခသည်များနှင့် ပြည့်နှက်သွားအောင် လုပ်ဆောင်လိုနေသည်ဟု ယူကရိန်း ဝန်ကြီးချုပ် ဒန်းနစ် ရှမီဟဲလ် (Denys Shmyhal) က ပြင်သစ်ရုပ်သံဌာနတစ်ခုကို ပြောခဲ့သည်။

ယူကရိန်းရှိ အခြေခံ အဆောက်အဦများကို ရုရှားဘက်က ပြစ်မှတ်ထား တိုက်ခိုက်မှုကြောင့် အေးခဲနေသော ရာသီဥတုအတွင်း လျှပ်စစ်နှင့်ရေ ပြတ်လပ်မှုများ ပေါ်ပေါက်နေရသည်။

ယူကရိန်း ဝန်ကြီးချုပ် ဒန်းနစ် ရှမီဟဲလ်ကိုတွေ့ရစဉ်  (GETTY IMAGES)

ယူကရိန်းသည် ဒုံးအမြောက်များနှင့် နောက်ဆုံးပေါ် တင့်ကားများလည်း လိုအပ်နေသည်ဟု ရှမီဟဲလ်က ပြော သည်။ ယူကရိန်းအတွက် နိုင်ငံတကာ အကူအညီများ ရရှိရေး ပူးပေါင်းဆောင်ရွက်မှုဆိုင်ရာ ပဲရစ်(ပြင်သစ်) အစည်းအဝေး မတိုင်ခင် ထိုသို့ ပြောဆိုခဲ့ခြင်းလည်း ဖြစ်သည်။

ယူကရိန်း စွမ်းအင် ထောက်ပံ့ရေး စနစ်များကို တိုက်ခိုက်ခြင်းသည် ခရိုင်းမီးယားကျွန်းဆွယ်ရှိ ရုရုားတို့ဘက်မှ တည်ဆောက်ထားသော အရေးပါသည့် တံတားတစ်စီးကို ယူကရိန်းဘက်က တိုက်ခိုက်ခဲ့ခြင်းအပေါ် လက်တုန့် ပြန်ခြင်းဟု ရုရှားက ပြောသည်။

ယူကရိန်းနှင့် အမေရိကန်သမ္မတများ တနင်္ဂနွေနေ့တွင် ဖုန်းဖြင့် ဆက်သွယ်မှုရှိခဲ့ပြီး ၎င်းတွင် သမ္မတ ဘိုင်ဒန်က ဒေါ်လာ ၂၇၅ သန်းတန် ထပ်တိုး လက်နက်ခဲယမ်းများ၊ ရုရှား၏မောင်းသူမဲ့ လေကြောင်း တိုက်ခိုက်မှုများကို တုန့်ပြန်ရန် စနစ်များ အပါအဝင် လုံခြုံရေးဆိုင်ရာ အကူအညီများဖြင့် ယူကရိန်းလေကြောင်း ကာကွယ်ရေးစနစ် ကို မြှင့်တင်ပေးရန် အမေရိကန်ဘက်က ကြိုးပမ်းနေသည်ဟု ပြောခဲ့သည်။

Patriot ဒုံးကျည်စနစ်ကိုတွေ့ရစဉ် (GETTY IMAGES)

အိုဒီဆာ (Odesa) ပင်လယ်နက် ဆိပ်ကမ်းအနီးသို့ ရုရှား၏ သီတင်းပတ်ကုန်ပိုင်း ဒရုန်းတိုက်ခိုက်မှုများကြောင့် ယူကရိန်းနိုင်ငံတွင်းရှိ စွမ်းအင်စက်ရုံတချို့ ပျက်စီးကာ လူပေါင်းများစွာ စွမ်းအင် ပြတ်တောက် ခဲ့ရသည်။

နောက်ထပ် တိုက်ခိုက်မှုများကို ကာကွယ်ရန် ရှမီဟဲလ်က ယခင်ကတည်းက တောင်းဆိုခဲ့ဖူးသည့် မြေပြင်မှ ဝေဟင်ပစ် Patriot ဒုံးကျည်များကို ထပ်မံတောင်းဆိုခဲ့ခြင်းဖြစ်သည်။ ထို့အပြင် လက်ရှိနိုင်ငံတွင်း၌ အသုံးပြုနေ သော ပြင်သစ်နှင့် ဂျာမနီတို့မှ ဒုံးကျည်ကာကွယ်ရေး စနစ်များကိုလည်း ထပ်မံကူညီပေးရန် ၎င်းက တောင်းဆိုသည်။

Patriot ဒုံးကျည်များ ရရှိမည်ဆိုပါက ၎င်းသည် ယူကရိန်း၏ လေကြောင်းကာကွယ်ရေး စနစ်များအတွက် ကြီးမားသော အထောက်အပံ့ တစ်ခုဖြစ်လာမည် ဖြစ်သော်လည်း ရုရှားနှင့်တင်းမားမှုများ မြင့်တက်လာ နိုင်ခြေ ရှိခြင်းကြောင့် မည်သည့်နိုင်ငံကမှ ယူကရိန်းအား ကူညီရန် ကမ်းလှမ်းမှုမျိုး မရှိသေးပေ။

Source: AP

CNI International News

မော်စကို၊ ဒီဇင်ဘာ ၁၂

ဥရောပ၊ အမေရိကန်နှင့် သြစတြေးလျတို့ရှိ ရန်သူများထံမှ မိမိကိုယ်ကို ကာကွယ်ရန် ရုရှားနိုင်ငံသည် မျိုးဆက်သစ်လက်နက်များထုတ်လုပ်ခြင်းကို အရှိန်မြှင့်တင်ဆောင်ရွက်နေပြီဟု ရုရှားသမ္မတဟောင်း ဒီမီထရီ မက်ဗီဒက်ဗ် (Dmitry Medvedev) က ပြောသည်ဟု Bangkok Post သတင်းတွင် ဖော်ပြသည်။

“ဖျက်အားပြင်းလက်နက်ထုတ်လုပ်နေမှုကို အရှိန်မြှင့်တင်နေပါတယ်။ အဲဒီထဲမှာ နိယာမသစ်များကို အသုံးပြုရတဲ့ လက်နက်များလည်းပါဝင်နေပါတယ်” ဟု မက်ဗီဒက်ဗ်က တယ်လီဂရမ်မှာ ပြောခဲ့သည်။

“ရန်သူများဟာ ကျွန်တော်တို့မူလရင်းမြစ်ဖြစ်တဲ့ မာလိုရော့စီယာ (Malorossiya) ရှိ ကိယက်ဗ် (Kyiv) တွင်သာ မဟုတ်ဘဲ ဥရောပ၊ မြောက်အမေရိက၊ ဂျပန်၊ သြစတြေးလျ၊ နယူးဇီလန်တို့အပါအဝင် နာဇီဝါဒကို လက်ခံတဲ့ တခြားကမ္ဘာ့နေရာများမှာရှိနေပြီ” ဟုလည်း သမ္မတဟောင်းက ပြောသည်။

ရုရှား၏ အသံထက်မြန်သော ဒုံးကျည်ကို တွေ့ရစဉ်(ဓါတ်ပုံ-TASS)

ရုရှားဘုရင်များလက်ထက်က ရုရှားအင်ပါယာ၏ အစိတ်အပိုင်းတစ်ခုဖြစ်ခဲ့သော လက်ရှိ ယူကရိန်းနိုင်ငံ တည်ရှိရာ နယ်မြေကို ရည်ရွယ်ကာ မာလိုရော့စီယာဟု ၎င်းက ရည်ရွယ်သုံးနှုန်းခဲ့ခြင်းလည်းဖြစ်သည်။

မက်ဗီဒက်ဗ်သည် ရုရှားလုံခြုံရေးကောင်စီ၏ လက်ထောက်ခေါင်းဆောင်အဖြစ် တာဝန်ယူခဲ့သူဖြစ်ပြီး လက်နက် များနှင့်ပတ်သတ်၍ အသေးစိတ်အချက်အလက်များကိုတော့ ပြောဆိုခဲ့ခြင်းမရှိပေ။ ရုရှားသမ္မတ ဗလာဒီမာပူတင် (Vladimir Putin)သည်လည်း ရုရှားသည် အသံထက်ပိုမြန်သော လက်နက်များအပါအဝင် လက်နက်သစ်များကို ထုတ်လုပ်နေသည်ဟု မကြာခဏပြောဆိုခဲ့ဖူးသည်။ အသံထက်ပိုမြန်သောလက်နက်များသည် ကမ္ဘာပေါရှိ လက်ရှိ ဒုံးကျည်ကာကွယ်ရေးစနစ်အားလုံးကို ကျော်ဖြတ်နိုင်သည်ဟုလည်း ၎င်းက အမွှန်းတင်ထားသည်။

ရုရှားထုတ် ဝေဟင်ပစ်ဒုံးကျည်များကို ပြသထားစဉ်(ဓါတ်ပုံ- Piotr Butowski)

ယူကရိန်းကို ရုရှားတပ်များစတင်ဝင်ရောက်ခဲ့သည့် ဖေဖော်ဝါရီ ၂၄ ရက်နေ့မှစတင်ကာ မက်ဗီဒက်ဗ်သည် လူမှုကွန်ယက်တွင် လေကျယ်သော ပို့စ်များကို မကြာခဏရေးတင်လေ့ရှိသူ ဖြစ်သည်။

ယူကရိန်းစစ်ပွဲတွင် အခြေအနေမကောင်းမှုကြောင့် စစ်ဘက်ဆိုင်ရာ အသာစီးရယူမှုအတွက် ရုရှားအနေဖြင့် နျူကလီးယားလက်နက်များအသုံးပြုလာနိုင်သည်ဆိုသည့် အနေအထားက စိုးရိမ်မှုများကိုမြင့်တက်စေလျက် ရှိသည်။

ပြီးခဲ့သည့် သောကြာနေ့ကလည်း ပူတင်သည် နျူကလီးယားလက်နက်များကို အသုံးပြုလာနိုင်မည့် အဓိပ္ပာယ်မျိုးပေါ်အောင် ပြောခဲ့ဖူးသည်။ ရုရှားတွင်ရှိနေသော ခရုဇ်ဒုံးကျည်များနှင့် အသံထက်မြန်သော ဒုံးကျည်များက အမေရိကန်တွင်ရှိသောလက်နက်များထက် ပိုခေတ်မှီကာ ပိုအသုံးဝင်သည်ဟုလည်း ပူတင်က ပြောသည်။

Source:Bangkok Post

CNI International News

မော်စကို၊ ဒီဇင်ဘာ ၂

ယူကရိန်းအား လက်နက်များ ထောက်ပံ့ခြင်း၊ စစ်သားများကို လေ့ကျင့်ပေးခြင်းတို့ဖြင့် အနောက်အုပ်စုသည် ယူကရိန်းပဋိပက္ခတွင် တိုက်ရိုက်ပါဝင် ပတ်သက်နေသည်ဟု ရုရှားနိုင်ငံခြားရေးဝန်ကြီး လာဗရော့ဗ်က အင်္ဂါနေ့တွင် စွပ်စွဲ ပြောကြားခဲ့ကြောင်း အေပီသတင်းတွင် ဖော်ပြသည်။

သတင်းထောက်များနှင့် တွေ့ဆုံမှုတစ်ခုအတွင်း ယခုကဲ့သို့ ပြောကြားခဲ့ခြင်းဖြစ်သည်။ လက်နက်ထောက်ပံ့ရုံတင် မဟုတ်ဘဲ ဗြိတိန်၊ ဂျာမနီ၊ အီတလီနှင့် တခြားနိုင်ငံများသည် စစ်ရေး လေ့ကျင့်မှုများပါ လုပ်ဆောင်နေသည်ဟု ပြောသည်။

ရုရှားဘက်မှ ဒုံးကျည်၊ ဒရုန်းနှင့် အမြောက် ပစ်ခတ်မှုများကြောင့် ယူကရိန်းပြည်သူ သန်းချီ၍ စွမ်းအင်၊ အပူဓာတ် နှင့် ရေပျက်တောက်မှုများ ဖြစ်ပွားခဲ့ရသည်။

စက်မှုထိပ်သီးနိုင်ငံများကိုတွေ့ရစဉ် (GETTY IMAGES)

ထိုသို့ စွမ်းအင်စက်ရုံများနှင့် အခြေခံ အဆောက်အဦများကို ပစ်မှတ်ထားရခြင်းမှာ ရုရှားများအား သတ်မည့် စစ်လက်နက်များ ယူကရိန်းနိုင်ငံအတွင်း ဝင်ရောက်နေမှုကို တားဆီးရန်နှင့် ယူကရိန်းစစ်တပ်များ အင်အား လျော့ကျသွားစေရန် ဖြစ်သည်ဟု နိုင်ငံခြားရေးဝန်ကြီး ဆာဂေး လာဗရော့ဗ် (Sergey Lavrov) က ပြောသည်။

သို့သော် ရုရှား၏ တိုက်ခိုက်မှုများသည် ပြည်သူများကို ဒုက္ခရောက်စေပြီး ရုရှားနှင့် ငြိမ်းချမ်းရေး ဆွေးနွေးရန် ယူကရိန်းအစိုးရကို ဖိအားပေးနေခြင်းသာ ဖြစ်သည်ဟုလည်း ယူကရိန်းနှင့် အနောက်အုပ်စုဘက်က စွပ်စွဲထား သည်။

ယူကရိန်းတောင်ပိုင်း ခါဆန်ဒေသ(Kherson) သည်လည်း ရုရှား၏ ပစ်မှတ်များမှ တစ်ခုဖြစ်သည်။ ထိုဒေသကို အစပိုင်းတွင် ရုရှားက သိမ်းပိုက်ထားခဲ့သော်လည်း ပြီးခဲ့သည့်လတွင် ပြန်လည် စွန့်ခွာခဲ့သည်။

ခါဆန်နှင့်အခြား ဒေသ ၃ ခုကို ရုရှားက ၎င်းတို့ ပိုင်နယ်မြေအဖြစ် ကြေညာခဲ့သော်လည်း ယူကရိန်း အစိုးရနှင့် အနောက်အုပ်စုမှ လက်မခံခဲ့ပေ။

အမေရိကန်ကာကွယ်ရေး၀န်ကြီးနဲ့ နေတိုး အထွေထွေအတွင်းရေးမှူးကိုတွေ့ရစဉ် (GETTY IMAGES)

ခါဆန်မြို့မှ အခြေခံ အဆောက်အဦများကို ပစ်မှတ်ထား တိုက်ခိုက်နေခြင်းနှင့် ရုရှားစကားပြော ယူကရိန်းလူထု ကို ကာကွယ်ပေးရေးဆိုင်ရာ ရုရှားအစိုးရ၏ ရည်ရွယ်ချက်တို့အကြား ဆက်စပ်ပုံအား မေးမြန်းခဲ့ရာတွင် လာဗရော့ဗ်က ဒုတိယကမ္ဘာစစ်အတွင်းမှ စတာလင်ဂတ်တိုက်ပွဲ (Battle of Stalingrad) ဖြစ်စဉ်နှင့် နှိုင်းယှဉ် ပြောဆိုခဲ့သည်။

ရုရှားအစိုးရ အနေဖြင့် ပဋိပက္ခကို အဆုံးသတ်ရေး ဆွေးနွေးပွဲများ လုပ်ဆောင်ရန် တောင်းဆိုမည် မဟုတ်သော် လည်း ဆွေးနွေးပွဲများအား လမ်းဖွင့် ပေးထားဆဲ ဖြစ်သည်ဟု လာဗရော့ဗ်က ပြောသည်။

“ကျနော်တို့အနေနဲ့ ဆွေးနွေးဖို့ တောင်းဆိုသွားမှာ မဟုတ်ပေမယ့် ဆွေးနွေးပွဲ လုပ်ဆောင်ရန် ဆန္ဒရှိသူများကို နားထောင်ပေးသွားဖို့ အဆင်သင့် ရှိနေပါသည်”ဟု ပြောသည်။

အမေရိကန်သမ္မတ ဂျိုးဘိုင်ဒန် (Joe Biden)နှင့် ရုရှားသမ္မတ ဗလာဒီမာပူတင် (Vladimir Putin) တို့ကြား ဆွေးနွေးပွဲများ ရှိလာနိုင်မည်လားဆိုသည့် မေးခွန်းအတွက်လည်း ဆက်သွယ်မှုများကို ရှောင်လွဲမှာ မဟုတ် ကြောင်း၊ သို့သော် ယခုကိစ္စနှင့်ပတ်သတ်၍ တစ်စုံတစ်ရာ ကြားသိရခြင်း မရှိသေးကြောင်း ၎င်းက ပြန်လည် ဖြေကြားခဲ့သည်။

Source: AP

CNI International News

၂၀၂၂ ခုနှစ်၊ နိုဝင်ဘာ ၂၅

အရှေ့ဥရောပဒေသတွင် လက်နက်ထုတ်လုပ်တင်ပို့ရေးလုပ်ငန်းများသည် စစ်အေးခေတ်ကတည်းက မမြင်ခဲ့ရ သော သေနတ်များ၊ အမြောက်ကျည်များနှင့် အခြားစစ်ရေးဆိုင်ရာအထောက်အပံ့များမှာ အလျင်အမြန် တက်လာ နေကြောင်း ရိုက်တာသတင်းအရ သိရသည်။

ထိုသို့ တက်လာခြင်းမှာ ယူကရိန်းက ရုရှားကို တွန်းလှန်တိုက်ခိုက်ရာတွင် ဒေသတွင်းရှိအစိုးရများက ထောက်ပံ့ ကူညီရေး ဦးဆောင်မှုယူထား၍ ဖြစ်သည်။

လက်ရှိအနေအထားတွင် အဆိုပါမဟာမိတ်နိုင်ငံများက ကိယက်ဗ်အစိုးရကို လက်နက်နှင့်စစ်သုံးပစ္စည်းများ ဆက်တိုက်ထောက်ပံ့နေသည်။

ရုရှားသည် ပြီးခဲ့သည့် ဖေဖော်ဝါရီ ၂၄ ရက်တွင် ၎င်း၏အိမ်နီးချင်းယူကရိန်းအတွင်းသို့ ကျူးကျော်တိုက်ခိုက် ခဲ့သည်။

အမေရိကန်နိုင်ငံ Dover လေတပ်အခြေစိုက်စခန်းတစ်ခုရှိ အကြီးတပ်လေတပ်အရာရှိတစ်ဦး ယူကရိန်းသို့ ပို့ဆောင်မည့် လက်နက်များကို စီမံခန့်ခွဲနေစဉ်(ဓါတ်ပုံ-အေပီ)

အမေရိကန်နှင့်ဗြိတိန်တို့သည် ယူကရိန်းအတွက် တိုက်ရိုက်စစ်ရေးအကူအညီကို သည့်မတိုင်မီ ဇန်နဝါရီ ၂၄ ရက် ကတည်းက စတင်ပေးအပ်ခဲ့ရာ အောက်တိုဘာ ၃ ရက် ဆက်တိုက်ပေးအပ်ခဲ့ကြောင်း ကမ္ဘာ့စီးပွားရေး စောင့်ကြည့်အဖွဲ့တစ်ဖွဲ့ဖြစ်သော Kiel သိပ္ပံကျောင်းက ဖော်ပြသည်။ ထိုသို့ စစ်ရေးအကူအညီများပေးအပ်မှု၌ တတိယနေရာလိုက်သည့်နိုင်ငံမှာ ပိုလန်ဖြစ်ပြီး နဝမနေရာတွင် ချက်သမ္မတနိုင်ငံတို့ ရှိနေသည်။ ချက်နှင့်ပိုလန် တို့သည် အရှေ့ဥရောပနိုင်ငံများ ဖြစ်ကြသည်။

ယခင် ဝါဆောစစ်စာချုပ်အဖွဲ့ဝင်ဟောင်းများဖြစ်သော အဆိုပါနှစ်နိုင်ငံအနေဖြင့် ယူကရိန်းကို ဒေသတွင်း လုံခြုံရေးအကူအညီပေးနေခြင်းအပေါ် ရုရှားက သတိကြီးကြီးဖြင့် စောင့်ကြည့်နေခဲ့သည်။ ယခင် စစ်အေး ခေတ်ဟောင်းတလျှောက် ဝါဆောစစ်စာချုပ်အဖွဲ့ကို ဆိုဗီယက်(ရုရှား) က ဦးဆောင်ခဲ့သည်။

သို့သော် ရိုက်တာသတင်းဌာနက ဆက်သွယ်မေးမြန်းနိုင်ခဲ့သည့် အစိုးရဘက်နှင့် ပုဂ္ဂလိကကုမ္ပဏီများမှ တာဝန်ရှိသူများအပါအဝင် စစ်ရေးလေ့လာသုံးသပ်သူ ဆယ်ဂဏန်းမျှတို့က လက်ရှိပဋိပက္ခသည် အရှေ့ ဥရောပဒေသတွင်း လက်နက်လုပ်ငန်းများအတွက် အခွင့်အလမ်းသစ်များကို မြင်တွေ့လာစေကြောင်း ပြောကြားခဲ့ကြသည်။

လက်နက်စက်ရုံတစ်ခု မြင်ကွင်း(ဓါတ်ပုံ-ရိုက်တာ)

“ယူကရိန်းမှာ ဖြစ်ပွားနေတဲ့ စစ်ပွဲရဲ့ သရုပ်မှန်နဲ့ ကာကွယ်ရေးအသုံးစရိတ်တွေကို တိုးမြှင့်ဖို့ ရည်ရွယ်ထားတဲ့ တိုင်းပြည်တွေရဲ့ မြင်သာတဲ့သဘောထားကို ထည့်စဉ်းစားမယ်ဆိုရင် လာမယ့်နှစ်တွေမှာ ဈေးကွက်သစ်ထဲ ဝင်ဖို့နဲ့ ပို့ကုန်တိုးလာဖို့ အမှန်တကယ် အခွင့်အလမ်းရှိနေပါတယ်” ဟု ပိုလန်မှ PGZ လုပ်ငန်းစု၊ အမှုဆောင်အရာရှိချုပ် ဆာဘတ်ရှန်ချက်ဝါလက် (Sebastian Chwalek) က ပြောကြားခဲ့သည်။

အစိုးရပိုင် PGZ လုပ်ငန်းစုသည် လက်နက်နှင့်ခဲယမ်းမီးကျောက် ထုတ်လုပ်သည့် ကုမ္ပဏီပေါင်း ၅၀ ကျော် ထိန်းချုပ်ထားပြီး ကျည်ကာမော်တော်ယာဉ်များမှ မောင်းသူမဲ့လေယာဉ်စနစ်အထိ အစုရှယ်ယာပေါင်းများစွာ ပိုင်ဆိုင်ထားကြသည်။

ထိုလုပ်ငန်းစုအနေဖြင့် လာမည့် ဆယ်စုနှစ်အတွင်း ပိုလန်သုံး zlotys ၈ ဘီလီယံ (ဒေါ်လာ ၁ ဒသမ ၈) အထိ ရင်းနှီးမြှုပ်နှံရန် စီစဉ်ထားသည်။

အခြားထုတ်လုပ်သူများကလည်း ပိုလန်၊ ဆလိုဗက်ကီးယားနှင့် ချက်သမ္မတနိုင်ငံတို့မှ အလုပ်သမားများ၊ အစိုးရဘက်မှလုပ်ငန်းများ ငှားရမ်းပြီး ၎င်းတို့၏ ထုတ်လုပ်မှုစွမ်းရည်ကို တိုးမြှင့်နိုင်ဖို့ ပြိုင်ဆိုင်နေကြသည်ဟု ပြောကြားထားသည်။

Source: Reuters