CNI International News

တိုကျို၊ဇန်နဝါရီ ၂၆

ယူကရိန်းစစ်ပွဲတွင် ရုရှားတို့ ရှုံးနိမ့်ရန်မှာ ဖြစ်နိုင်ခြေနည်းပါးကြောင်း ဂျပန်ဝန်ကြီးချုပ်ဟောင်း ယိုရှီရို မိုရီ (Yoshiro Mori) က ပြောကြားပြီးနောက် ဂျပန်ပါဝင်နေသော အမေရိကန်ဦးဆောင်သည့် ယူကရိန်းထောက်ပံ့ရေး လုပ်ငန်းကိုလည်း မေးခွန်းထုတ်ခဲ့သည်ဟု အာရ်တီသတင်းတွင် ဖော်ပြသည်။

ရုရှားအနေဖြင့် ယခုစစ်ပွဲတွင် ရှုံးနိမ့်ရန်ဖြစ်နိုင်ခြင်း မရှိကြောင်းကို ဝန်ကြီးချုပ်ဟောင်းက ဗုဒ္ဓဟူးနေ့ တိုကျိုရှိ ဂျပန်-အိန္ဒိယ အဖွဲ့အစည်းအစည်းအဝေးတစ်ခုတွင် ပြောကြားခဲ့ခြင်းဖြစ်သည်။ ယခုကဲ့သို့ အခြေအနေမျိုးတွင် ဂျပန်အစိုးရအနေဖြင့် အဘယ့်ကြောင့် ရုရှားနှင့်ဆက်ဆံရေးကိုဖျက်ဆီးရန် ဆန္ဒရှိနေသလဲဆိုသည်ကို နားမလည် နိုင်ကြောင်းလည်း အသက် ၈၅ နှစ်အရွယ် နိုင်ငံရေးသမားကြီးက ပြောသည်။

ရုရှားနှင့်ဂျပန်တို့တွင် မဖြေရှင်းရသေးသော နိုင်ငံပိုင်ဆိုင်မှုဆိုင်ရာ အငြင်းပွားမှုရှိနေပြီး ထိုနှစ်နိုင်ငံသည် လုပ်ထုံး လုပ်နည်းများအရ စစ်ဖြစ်နေဆဲဖြစ်သည်။ မိုရီသည် ဝန်ကြီးချုပ်အဖြစ် ၂၀၀၀ ခုနှစ်မှ ၂၀၀၁ ခုနှစ်အထိ တစ်နှစ်ကျော်သာထမ်းဆောင်ခဲ့သူဖြစ်ကာ ၎င်း၏ သက်တမ်းသည်လည်း ပြောဆို၊လုပ်ကိုင်ပုံ မှားယွင်းမှုများ အပေါ် မီဒီယာများ၏ထောက်ပြမှုများဖြင့် ကုန်ဆုံးခဲ့ရသည်။ ရာထူးမှ နုတ်ထွက်သွားချိန်တွင် ၎င်းသည် ၂၀၂၀ နွေရာသီအိုလံပစ်ကျင်းပရေးအဖွဲ့အား ဦးဆောင်ရန်ရွေးချယ်ခြင်းခံခဲ့ရသည်။

ယူကရိန်းနိုင်ငံ Kryvyi Rih မြို့တွင် ရုရှားတိုက်ခိုက်မှုကြောင့် ပျက်စီးဆုံးရှုံးများအကြား ဝမ်းနည်းစွာ ငိုကြွေးနေသည့် ယူကရိန်းနိုင်ငံသူ သက်ကြီးရွယ်အိုတစ်ဦးကို တွေ့ရစဉ်(ဓါတ်ပုံ-အေပီ)

ဝေဖန်ခံရမှုအကြားမှာပင် မိုရီသည် ရုရှားအစိုးရနှင့်ကောင်းမွန်သော ဆက်ဆံရေးကို မြှင့်တင်နိုင်ခဲ့သည်။ မြို့ငယ်လေးတစ်ခုတွင် မြို့တော်ဝန်အဖြစ် တာဝန်ထမ်းဆောင်ခဲ့ဖူးသော မိုရီ၏ဖခင်ဖြစ်သူသည် ဆိုဗီယက် ပြည်ထောင်စုရှိ ဂျပန်စစ်သားများ၏ အုတ်ဂူများကို ထိန်းသိမ်းလိုခဲ့သူဖြစ်သည်။ ၎င်းသည် တူညီသော သဘောထားရှိသည့် ရုရှားမိတ်ဆွေများစွာနှင့် တွေ့ခဲ့ရပြီး ၎င်းကွယ်လွန်ချိန်တွင် အရိုးပြာတစ်ချို့ကို ရုရှားတွင် မြုပ်နှံပေးရန်အထိ တောင်းဆိုခဲ့သူလည်းဖြစ်သည်။

မိုရီငယ်ရွယ်စဉ်အချိန်အခါမှာလည်း ရုရှားသမ္မတပူတင်နှင့်ကောင်းမွန်သောဆက်ဆံရေးရှိခဲ့ကာ ၎င်းသည် ထိုစဉ်က ဂျပန်ဝန်ကြီးချုပ် ရှင်ဇိုအာဘေး၏ ၂၀၁၇ ရုရှားခရီးစဉ်အတွက် လိုအပ်သည်များကိုပင် စီစဉ်ပေးခဲ့ရသည်ဟု သိရ သည်။ ယူကရိန်းပဋိပက္ခနှင့်ပတ်သက်လို့ အမေရိကန်နှင့်ဥရောပမှ သတင်းရင်းမြစ်များကို မှီငြမ်းကာ တစ်ဖက် သတ် သတင်းထုတ်ပြန်မှု လုပ်ဆောင်နေသည်ဟု နိုဝင်ဘာလတွင် နိုရီက ၎င်း၏ယူဆချက်နှင့် ပတ်သက်၍ ဂျပန်မီဒီယာများကို ပြောခဲ့သည်။ ယူကရိန်းပြည်သူမြောက်များစွာကို ထိခိုက်စေခဲ့သော်လည်း ပူတင်သည် ဝေဖန်မခံရသင့်ဟု ၎င်းကယူဆသည်။

တနင်္လာနေ့ လွှတ်တော်မိန့်ခွန်းတစ်ခုတွင် လက်ရှိဂျပန်ဝန်ကြီးချုပ် ဖူမီယို ကီရှီဒါက ရုရှားသမ္မတပူတင်ကို ဝေဖန် ခဲ့သည်။ အငြင်းပွားနေသော ကူရီကျွန်းများနှင့်ပတ်သက်၍ ဂျပန်အစိုးရသည် နယ်မြေရေးရာဆိုင်ရာဖြေရှင်းမှု မူဝါဒများကို ဆက်လက်ကျင့်သုံးသွားမည်ဟု ပြောကာ ယူကရိန်းကို စစ်ရေးအရ တိုက်ခိုက်ခြင်းဖြင့် ပူတင်သည် နိုင်ငံတကာစည်းမျဉ်၏ အခြေခံအုတ်မြစ်များကို လှုပ်ခါအောင်လုပ်ဆောင်ခဲ့သည်ဟု စွပ်စွဲခဲ့သည်။ ဂျပန်အစိုးရသည် ရုရှားကိုအရေးယူပိတ်ဆို့ခြင်းဖြင့် ယူကရိန်းကို ဆက်လက်ထောက်ပံ့သွားမည်ဟုလည်း ကီရှီဒါက ကတိပြုခဲ့သည်။

Source:အာရ်တီ

CNI International News

မော်စကို၊ ဇန်နဝါရီ ၂၅

ဖြစ်နိုင်ခြေရှိသည့် နေတိုးအဖွဲ့ဝင်တိုးချဲ့လာမှုနှင့် အနောက်အုပ်စု စုပေါင်းအင်အားတို့ကို တုန့်ပြန်ရန်အတွက် စစ်ဘက်ဆိုင်ရာပြုပြင်ပြောင်းလဲမှုများ လုပ်ဆောင်သွားမည်ဟု ရုရှားဗိုလ်ချုပ်ကြီး ဗယ်လာရီ ဂီရာဆီမော့ဗ်က ပြောကြောင်း Aljazeera သတင်းတွင် ဖော်ပြသည်။

ရုရှားစစ်ဦးစီးချုပ်ဖြစ်သူ ဗိုလ်ချုပ်ကြီး ဂီရာဆီမော့ဗ်သည် ယူကရိန်းစစ်မြေပြင်တွင်ရုရှားတပ်များကို ကိုင်တွယ်ရန် ပြောင်းလဲတာဝန်ပေးခံခဲ့ရသူဖြစ်ကာ ၁၁ လကြာစစ်ပွဲတွင် တပ်သားစုဆောင်းရေးအပြင် နယ်စပ်ဒေသဆိုင်ရာ ပြဿနာများနှင့် ရင်ဆိုင်နေရသည်ဟု ဝန်ခံခဲ့သည်။

ရုရှားနိုင်ငံတွင်းရှိတပ်သားသစ်စုဆောင်းရေးစနစ်သည် မျက်မှောက်ခေတ် စီးပွားရေးအခြေအနေများနှင့် အပြည့်အဝ ကိုက်ညီမှုမရှိဟု ဂီရာဆီမော့ဗ်က ပြောသည်။ ယင်းကို မြန်မြန်ဆန်ဆန် ပြုပြင်ပြောင်းလဲရမည်ဟု ၎င်းကပြောကာ လုံခြုံရေးဆိုင်ရာ စိန်ခေါ်မှုများကို တုန့်ပြန်ရန်အတွက် ဇန်နဝါရီလလယ်ပိုင်းတွင် ကြေညာခဲ့သော စစ်ဘက်ဆိုင်ရာပြုပြင်ပြောင်းလဲမှုများကို ချိန်ညှိမှုများလုပ်ဆောင်ရမည်ဟုလည်း ၎င်းက သတိပေးသည်။

လက်ရှိကြုံတွေ့နေရသော လုံခြုံရေးဆိုင်ရာ ခြိမ်းခြောက်မှုများတွင် ဖင်လန်နှင့်ဆွီဒင်နိုင်ငံတို့ နေတိုးအဖွဲ့သို့ ဝင်ရောက်ရန် ကြိုးပမ်းခြင်းအပြင် ရုရှားကိုစစ်ပွဲဆင်နွှဲရန် ယူကရိန်းကို ကိရိယာတစ်ခုအဖြစ် အသုံးချနေခြင်းတို့ ပါဝင်သည်ဟုလည်း ၎င်းက ပြောသည်။ ယူကရိန်းနိုင်ငံအပေါ် ရုရှားတို့၏ကျူးကျော်မှုကြောင့် ဖင်လန်နှင့် ဆွီဒင် တို့သည် ပြီးခဲ့သည့်နှစ်တွင် နေတိုးအဖွဲ့သို့ဝင်ရောက်ရန် လျှောက်ထားခဲ့သည်။

ရုရှားသိမ်းယူထားသည့် နယ်မြေများကို မြေပုံတွင် ပြသထားစဉ်

ပြုပြင်ပြောင်းလဲရေး အစီအစဉ်များတွင် ရုရှားဘက်က သိမ်းပိုက်ထားသော ခါဆွမ်နှင့် ဇာပိုရေးဇီးယားဒေသတို့ တွင် တပ်ဖွဲ့များ ပူးပေါင်းဖွဲ့စည်းခြင်းအစိတ်အပိုင်းတစ်ခုအဖြစ် စစ်ဘက်ဆိုင်ရာယန္တရားတပ်မ သုံးခုဖွဲ့စည်းရန်၊ မော်စကိုနှင့် စိန့်ပီတာစဘတ်(လီနင်ဂတ်)မြို့တို့တွင် စစ်ဘက်ဆိုင်ရာဒေသနှစ်ခု ထပ်တိုးရန် တောင်းဆိုမှုလည်း ပါဝင်သည်။

ခေတ်သစ် ရုရှားနိုင်ငံတွင် ယခုကဲ့သို့သော ပြင်းထန်သည့် စစ်ဘက်ဆိုင်ရာ ရန်လိုမှုများနှင့် မကြုံတွေ့ခဲ့ဖူးကြောင်း နှင့် အခြေအနေကို တည်ငြိမ်စေရေးအတွက် ထိုးစစ်ဆင်မှုများလုပ်ဆောင်ရန် တွန်းအားဖြစ်စေသည်ဟုလည်း ဂီရာဆီမော့ဗ်က ပြောသည်။ ရုရှားနှင့် ရုရှားတပ်ဖွဲ့များသည် အနောက်အုပ်စုတစ်ခုလုံးနှင့် ရင်ဆိုင်နေရသည် ဟုလည်း ၎င်းကဆိုသည်။

အနောက်အုပ်စု မဟာမိတ်များသည် လက်နက်၊ ခဲယမ်းနှင့် လူသားချင်းစာနာမှုအကူအညီများကို ထောက်ပံ့ခြင်း ဖြင့် ယူကရိန်းနိုင်ငံကို ကူညီလျက်ရှိသည်။ သို့သော် ရုရှား၏ကျူးကျော်မှု တစ်နှစ်နီးပါးသို့ ရောက်ရှိလာချိန်တွင် ၎င်းတို့၏ အထူးစစ်ဆင်ရေး ရည်ရွယ်ချက်မှာ ပြောင်းလဲလာသည်။ ယူကရိန်းကို နာဇီကင်းစင်ရေးနှင့် စစ်ရေး လှုပ်ရှားမှု ကင်းပရေး စစ်ဆင်ရေးသည် လက်ရှိအချိန်တွင် အနောက်အုပ်စု၏ ရန်လိုမှုနှင့် တစ်ဦးတည်း အုပ်စိုး လိုသော ကမ္ဘာကြီးအား ကာကွယ်ရေးအဖြစ် ညွှန်းဆိုလာသည်။ ထိုသို့ စစ်ရေးပြောင်းလဲမှုများသည် ရုရှားနိုင်ငံ၏ အချုပ်အခြာအာဏာနှင့် နယ်မြေကို ကာကွယ်ရန်ဖြစ်သည်ဟု ဂီရာဆီမော့ဗ်က Argumenty i Fakty သတင်းကို ပြောခဲ့သည်။

Source:Aljazeera

CNI International News

မော်စကို၊ ဇန်နဝါရီ ၂၁

တိုက်ပွဲများဖြစ်ပွားနေသည့် ဘက်ခ်မွတ်(Bakhmut )မြို့အနီးရှိ ယူကရိန်းအရှေ့ပိုင်းကျေးရွာတစ်ခုကို ထိန်းချုပ်နိုင်ခဲ့ပြီဟု ရုရှားဘက်က ထုတ်ပြန်ကြောင်း Aljazeera သတင်းတွင်ဖော်ပြသည်။

ယူကရိန်းနိုင်ငံ ဒွန်နက်ခ်(Donetsk)ပြည်နယ်မှ ကလစ်ရှ်ချိကာ (Klishciivka) ရွာကို ရုရှားတပ်များက သိမ်းပိုက်နိုင်ခဲ့ကြောင်း ကာကွယ်ရေးဝန်ကြီးက သောကြာနေ့တွင် ပြောသည်။ စစ်မဖြစ်ခင် ဒေသခံ ၄၀၀ နီးပါး နေထိုင်သော အဆိုပါရွာကို အမြှောက်နှင့်လေကြောင်းအကူအညီများကြောင့် မြေပြင်တပ်ဖွဲ့များက သိမ်းပိုက် နိုင်ခဲ့သည်ဟု ကာကွယ်ရေးဌာနမှ ပြောသော်လည်း လက်ရှိအချိန်အထိ ယူကရိန်းဘက်က အဆိုပါကိစ္စရပ်အပေါ် မှတ်ချက်ပြုပြောဆိုခြင်း မရှိသေးပေ။ ကလစ်ရှ်ချိကာရွာသည် ဘက်ခ်မွတ်မြို့၏ တောင်ဘက် ၆ မိုင်အကွာတွင် တည်ရှိသည်။ ဘက်ခ်မွတ်မြို့သည် မဟာဗျူဟာအရ အရေးပါသောမြို့ဖြစ်ခြင်းကြောင့် ယင်းကို သိမ်းပိုက်ရန်နှင့် ကာကွယ်ရန် ရုရှားနှင့်ယူကရိန်းတပ်များ ပြင်းပြင်းထန်ထန်တိုက်ခိုက်လျက်ရှိသည်။

ကာကွယ်ရေးဌာန၏ ထုတ်ပြန်ချက်မတိုင်ခင်ကတည်းက ရုရှားဘက်မှ ကြေးစားစစ်သည်များနှင့် ဒွန်နက်ခ်ရှိ ခွဲထွက်ရေးလက်နက်ကိုင်တပ်ဖွဲ့များက ကလစ်ရှ်ချိကာကို သိမ်းပိုက်နိုင်လိုက်ပြီဖြစ်ကြောင်း ကြေညာခဲ့သည်။

ယူကရိန်းနှင့် ရုရှားတို့ အပြင်းအထန် တိုက်ပွဲများဖြစ်ပွားနေသည့် နယ်မြေဒေသများကို မြေပုံတွင် အနီရောင်ဖြင့် ပြသထားစဉ်(အယ်လ်ဂျာဇီးယား)

ထို့အပြင် တပ်ဖွဲ့များသည် ယူကရိန်းတောင်ပိုင်း ဇာပိုရစ်ဇီးရား (Zaporizhia) ပြည်နယ်ဒေသရှိ လော့ဘ်ကိုဗက် (Lobkove) မှ ရွာတစ်ရွာကိုလည်း ထိန်းချုပ်နိုင်ခဲ့ပြီဟု ရုရှားကာကွယ်ရေးဌာနမှ ထုတ်ပြန်သည်။ ဇာပိုရစ်ဇီးရားနှင့် ဒွန်နက်ခ်တို့သည် ရုရှားဘက်မှ တစ်စိတ်တစ်ပိုင်းကျူးကျော်ထားရာ ယူကရိန်းပြည်နယ် လေးခုမှနှစ်ခုအပါအဝင် လည်းဖြစ်သည်။

ယူကရိန်းသို့ စစ်ရေးအကူအညီများ တိုးမြှင့်ပေးရေးအတွက် ယူကရိန်း၏ အနောက်အုပ်စုမှ မဟာမိတ်များ ဂျာမနီတွင်တွေ့ဆုံဆွေးနွေးနေစဉ် ရုရှားဘက်မှ စစ်မြေပြင်အောင်မြင်မှုများ ရယူနိုင်ခဲ့ခြင်းဖြစ်သည်။ အဆိုပါ ဆွေးနွေးပွဲမတိုင်ခင်ကတည်းက ယူကရိန်းသို့ စစ်ရေးအကူအညီသစ်များပေးမည်ဟု အမေရိကန်နှင့် ဖင်လန်တို့က ကြိုတင်ကြေညာခဲ့သည်။သောကြာနေ့ဆွေးနွေးပွဲတွင် ဂျာမနီလုပ် Leopard 2 တင့်ကားများကို ယူကရိန်းသို့ပေးပို့ရေးအတွက် ဂျာမနီဘက်ကခွင့်ပြုမလားဆိုခြင်းအပေါ်ဆွေးနွေးသွားကြ မည်ဖြစ်သည်။

ထိုဆွေးနွေးပွဲတွင် ယူကရိန်းသမ္မတ ဇာလန်းစကီးက ဗီဒီယိုမိန့်ခွန်းပြောကြားခဲ့ကာ အကူအညီများအတွက် မဟာမိတ်များကို ကျေးဇူးတင်ကြောင်း ပြောခဲ့ရုံသာမက နောက်ထပ်အကူအညီများကို အချိန်တိုအတွင်းပေးရန် တောင်းဆိုခဲ့သည်ဟု သိရသည်။ တခြား မဟာမိတ်များဘက်မှ ယူကရိန်းသို့ ဂျာမနီလုပ်တင့်ကားများပေးခြင်းကို ဆုံးဖြတ်ရန် ဂျာမနီအနေဖြင့် ဗီတိုအာဏာကို ပိုင်ဆိုင်ထားသော်လည်း လက်ရှိအချိန်အထိ ဂျာမနီအစိုးရသည် ထိုကိစ္စနှင့်ပတ်သတ်၍ နှုတ်ဆိတ်နေလျက်ရှိသည်။ တင့်ကားများပေးပို့ခြင်းသည် ရုရှားဘက်သို့ ရန်စသည့် အပြု အမူမျိုး ဖြစ်သွားမည်ကို ဂျာမနီအာဏာပိုင်များက စိုးရိမ်နေခြင်းဖြစ်သည်။

Source:Aljazeera

CNI International News

မော်စကို၊ ဇန်နဝါရီ ၂၀

ရုရှားသာ ယူကရိန်းစစ်ပွဲတွင် ရှုံးနိမ့်ခဲ့လျှင် နျူကလီးယားစစ်ပွဲအထိ ဖြစ်လာနိုင်သည်ဟု ရုရှားသမ္မတဟောင်း ဒီမီထရီ မက်ဗီဒက်ဗ် (Dmitry Medvedev) က နေတိုးအဖွဲ့ကို သတိပေးလိုက်သည်။၎င်းသည် သမ္မတပူတင်နှင့် အနီးကပ်ဆက်ဆံရေးရှိသူလည်းဖြစ်သည်။

နျူကလီးယားပိုင်ရှင် နိုင်ငံတစ်ခုရှုံးနိမ့်မှုသည် နျူကလီးယားစစ်ပွဲတစ်ခုကို ဖြစ်စေနိုင်သည်ဟု မက်ဗီဒက်ဗ်က တယ်လီဂရမ်ပို့စ်တစ်ခုတွင် ရေးသားခဲ့သည်။၎င်းသည် ပူတင်၏ အင်အားကြီးလုံခြုံရေးကောင်စီတွင် လက်ထောက်ဥက္ကဋ္ဌအဖြစ် တာဝန်ထမ်းဆောင်နေသူလည်းဖြစ်သည်။ နျူကလီးယားပိုင်ရှင်သည် ၎င်းတို့ ကံကြမ္မာပေါ်မူတည်နေသည့် ပဋိပက္ခကြီးများတွင် မည်သည့်အခါတွင်မှ ရှုံးနိမ့်မည်မဟုတ်ဟုလည်း သမ္မတ ဟောင်းက ပြောသည်။

ယူကရိန်းကို ထောက်ပံ့ပေးရေးအတွက် ဂျာမနီတွင်ဆွေးနွေးမည့် စစ်ဘက်ဆိုင်ရာ မဟာမိတ်အဖွဲ့များနှင့် အနောက်အုပ်စုမှ ကာကွယ်ရေးခေါင်းဆောင်များအနေဖြင့် ၎င်းမူဝါဒ၏ အန္တရာယ်နှင့် ပတ်သက်ကာ စဉ်းစား သင့်ကြောင်းလည်း ၎င်းက သတိပေးသည်။အဆိုပါ ပြောဆိုမှုများကို ရုရှားအစိုးရဘက်မှလည်း ထောက်ခံခဲ့ကာ မက်ဗီဒက်ဗ်၏ ပြောစကားများသည် ၎င်းတို့၏ နည်းလမ်းများနှင့် ကိုက်ညီမှုရှိသည်ဟု ပြောသည်။

ရုရှားနိုင်ငံ မော်စကိုမြို့တွင် ပြုလုပ်ခဲ့သည့် နှစ်ပတ်လည်နေ့ အထိမ်းအမှတ် စစ်ရေးပြအခမ်းအနားတစ်ခုတွင် နျူကလီးယားလက်နက်များကို ထုတ်ဖော်ပြသခဲ့စဉ်(ဓါတ်ပုံ-အေပီ)

ရုရှားအစိုးရ၏ မူဝါဒအရ နိုင်ငံ၏တည်ရှိမှုကို ခြိမ်းခြောက်လာသော သမားရိုးကျလက်နက်များနှင့်သော်လည်း ကောင်း ရုရှားနိုင်ငံအပေါ် ရန်လိုမှုများကို နျူကလီးယားလက်နက်ဖြင့် တုန့်ပြန်ရန်သော်လည်းကောင်း ခွင့်ပြုချက် ပေးသည်။ အသက် ၅၇ နှစ်အရွယ် မက်ဗီဒက်ဗ်သည် ယခင်က အမေရိကန်နှင့်ပူးပေါင်းကာ ရုရှားနိုင်ငံအား လစ်ဘရယ်စနစ်သို့ ပြောင်းလဲရေးအတွက် အဆင်သင့်ဖြစ်နေသော ပြုပြင်ပြောင်းလဲရေးသမားအဖြစ် ၎င်းကို၎င်း ဖော်ပြခဲ့သော်လည်း လက်ရှိအချိန်တွင်တော့ ပူတင်၏အတွင်းစည်းမှ လူသိရှင်ကြား ရန်လိုသူတစ်ဦးအဖြစ် ပြောင်းလဲလာခဲ့သည်။

ယူကရိန်းစစ်ပွဲ စတင်ချိန်ကတည်းက ၎င်းသည် နျူကလီးယားလက်နက်အသုံးပြုရေးနှင့်ပတ်သက်သည်များကို ထပ်ဖန်တလဲလဲ ပြောဆိုခဲ့ရုံမက အနောက်အုပ်စုကိုလည်း စဉ်ဆက်မပြတ် ပြစ်တင်ရှုတ်ချခဲ့သူဖြစ်သည်။

လက်ရှိအချိန်တွင် အင်အားအကြီးဆုံးနျူကလီးယားပိုင်ရှင်နိုင်ငံနှစ်ခုဖြစ်သော ရုရှားနှင့်အမေရိကန်တို့သည် ကမ္ဘာ့နျူကလီးယားလက်နက်များ၏ ၉၀ ရာခိုင်နှုန်းနီးပါးကို ပိုင်ဆိုင်ထားသည်။ အမေရိကန်သိပ္ပံပညာရှင်များ အဖွဲ့၏ ထုတ်ပြန်ချက်အရ ရုရှားတွင် နျူကလီးယားဒုံးကျည်ထိပ်ဖူး ၅၉၇၇၊ အမေရိကန်တွင် ၅၄၂၈၊ တရုတ်တွင် ၃၅၀၊ ပြင်သစ်တွင် ၂၉၀နှင့် ဗြိတိန်တွင် ၂၂၅ ခု ရှိသည်ဟု သိရသည်။ ရုရှား၏ နျူကလီးယားအသုံးပြုရေးတွင် သမ္မတပူတင်သည် ဆုံးဖြတ်ပိုင်ခွင့်ရှိသူဖြစ်သည်။
ရုရှားဘက်ကသာ အမှန်တကယ်နျူကလီးယားလက်နက် အသုံးပြုလာလျှင် မည်သို့တုန့်ပြန်မည်လဲ ဆိုသည်နှင့်ပတ်သက်၍ အမေရိကန်ဘက်မှ အသေးစိတ်ထုတ်ပြန်ထားခြင်းမရှိသေးပေ။

သမားရိုးကျလက်နက်များနှင့်ပတ်သက်လျှင် နေတိုးသည် ရုရှားထက် အင်အားသာလွန်သော်ငြား နျူကလီးယား လက်နက်အရေးတွင်မူ ရုရှားသည် နေတိုးအဖွဲ့ထက်ပို၍ အင်အားကောင်းနေသည်။

Source:Aljazeera

CNI International News

ကိယတ်ဗ်၊ ဇန်နဝါရီ ၁၄

ပြင်းပြင်းထန်ထန် တိုက်ခိုက်နေရသော ဆားတူးဖော်ရေးမြို့ကို သိမ်းပိုက်နိုင်ခဲ့ပြီဟု ရုရှားဘက်က သောကြာနေ့ တွင် ကြေညာခဲ့ကြောင်း အေပီသတင်းတွင် ဖော်ပြထားသည်။

ယင်းက ယူကရိန်းစစ်ပွဲအတွင်း ဆုံးရှုံးမှုများနေသော ရုရှားတို့အတွက် ကြုံတောင့်ကြုံခဲ အောင်ပွဲတစ်ခုလည်း ဖြစ်သည်။ သို့သော် ဆိုလီဒါ (Soledar) မြို့တွင် တိုက်ပွဲများ ဆက်လက် ဖြစ်ပွားနေဆဲဟု ယူကရိန်းဘက်က ပြောသည်။

ဆိုလီဒါနှင့် အနီးအနားရှိ ဘတ်မုမြို့ တိုက်ပွဲများသည် ယူကရိန်းအရှေ့ပိုင်းဒေသ တစ်ခုလုံးကို သိမ်းပိုက်ရန် အရေးပါသော တိုက်ပွဲများ အဖြစ်သာမက ယူကရိန်းရှိ အကောင်းဆုံး တပ်ဖွဲ့များ အားလျော့ကာ တန်ပြန် ထိုးစစ်များ မလုပ်ဆောင်နိုင်ရန် အဓိကကျသည့် တိုက်ပွဲများအဖြစ် ရုရှားဘက်က သတ်မှတ်ထားသည်။

သို့သော် ယူကရိန်းဘက်က အရှေ့ပိုင်းမှ ခြေကုပ်ဒေသများကို စွမ်းစွမ်းတမံ ခုခံနေခြင်းက ရုရှားတပ်ဖွဲ့များကို ပိတ်မိနေစေရန် အထောက်အကူ ဖြစ်စေသည်ဟု ပြောသည်။

ဆိုလီဒါမြို့ကို ရုရှားတပ်က ပစ်ခတ်နေစဉ် (AP)

ယူကရိန်းစစ်ပွဲ စတင်ချိန်ကတည်းက ရုရှားသည် ဒွန်းနက်စ်(Donetsk)နှင့် လူဟန့်ခ်(Luhansk) ပြည်နယ်များ ပါဝင်သော ဒွန်းဘတ်စ် (Donbas) ဒေသကို အပြည့်အဝ ထိန်းချုပ်နိုင်ရန် ဦးစားပေးခဲ့သည်။

အဆိုပါ ပြည်နယ်များသည် ၂၀၁၄ ခွဲထွက်ရေး ပုန်ကန်မှုကို ထောက်ခံသည့် နယ်မြေများ ဖြစ်သည်။ သို့သော် လက်ရှိအချိန်တွင် ရုရှားသည် လူဟန့်ခ်ပြည်နယ် အများစုကို သိမ်းပိုက်ထားနိုင်သော်လည်း ဒွန်းနက်စ် ပြည်နယ် တစ်ဝက်ခန့်သည် ယူကရိန်း၏ ထိန်းချုပ်မှု အောက်တွင်သာ ရှိနေသေးသည်။

ဆိုလီဒါမြို့သိမ်း တိုက်ပွဲနှင့်ပတ်သက်၍ သတင်းအမျိုးမျိုး ပေါ်ထွက်လျက်ရှိပြီး မည်သည့်ဘက်က ထုတ်ပြန် ချက်က မှန်ကန်သည်ကို သီးခြား အတည်ပြုနိုင်ခြင်း မရှိသေးပေ။

ယူကရိန်းတပ်မှူး စကားပြောနေစဉ် (AP)

ဆိုလီဒါမြို့သည် ဇန်နဝါရီ ၁၂ ရက်နေ့ ညနေပိုင်းတွင် လွတ်မြောက်သွားခဲ့ပြီဟု ရုရှားကာကွယ်ရေးဌာန ပြောခွင့်ရ ပုဂ္ဂိုလ်က ပြောခဲ့သည်။

အဆိုပါ ဒွန်းညက်စ်ဒေသသည် ထိုးစစ်ဆင်မှုများကို ဆက်လက် ပြုလုပ်နိုင်ရန် အရေးပါသည်ဟု ဆိုသည်။ ဆိုလီဒါ မြို့ကို ထိန်းချုပ်နိုင်ခဲ့ခြင်းကြောင့် ရုရှားတပ်ဖွဲ့များသည် ဘတ်မု(Bakhmut)မြို့ရှိ ယူကရိန်းတပ်ဖွဲ့များအတွက် ထောက်ပံ့ရေး လမ်းကြောင်းများကို ဖြတ်တောက်နိုင်ကာ ယင်းရှိ ယူကရိန်းတပ်ဖွဲ့များအား ပိတ်ဆို့၊ ဝန်းရံနိုင်လိမ့် မည်ဟုလည်း ၎င်းက ဆက်လက် ပြောကြားခဲ့သည်။

ဝါရှင်တန်ရှိ စစ်ပွဲများကို စောင့်ကြည့်လေ့လာရေး အဖွဲ့တစ်ခုကလည်း ဆိုလီဒါမြို့ကို ရုရှားတို့ ရရှိခဲ့သော်လည်း ယင်းက ရုရှားအတွက် ကြီးကြီးမားမား အကျိုးသက်ရောက်မှုရှိရန် ရာခိုင်နှုန်း နည်းပါးသည်ဟု သုံးသပ်သည်။

Source: AP

CNI International News

မော်စကို၊ဇန်နဝါရီ ၁၄

နိုင်ငံနှင့် စစ်တပ်ကိုဝေဖန်နေသည့် ပြည်ပရောက်ရုရှားနိုင်ငံသားများ၏ ပိုင်ဆိုင်မှုများကို နိုင်ငံပိုင်အဖြစ် သိမ်းယူ သင့်ကြောင်း ရုရှားလွှတ်တော်ဥက္ကဋ္ဌ ဗာချယ်ဆပ်ဗ် ဗိုလိုဒင် (Vyachlesav Volodin) က ပြောကြောင်း BBC သတင်းတွင်ဖော်ပြသည်။

ရုရှားသမ္မတပူတင်၏ ကာလရှည်မဟာမိတ်တစ်ဦးဖြစ်သော ဗိုလိုဒင်က ရုရှားနိုင်ငံ၊နိုင်ငံသား၊ စစ်သား သို့မဟုတ် အရာရှိများကိုစော်ကားသူများနှင့် ဗီလိန်များကို ပေါ်ပေါ်ထင်ထင်ထောက်ခံသူအားလုံးကို အရေးယူရန် ပြောဆို ခဲ့ခြင်းဖြစ်သည်။

ယူကရိန်းကိုစစ်ပွဲစတင်ခဲ့ခြင်းကြောင့် ရုရှားနိုင်ငံသားထောင်ပေါင်းများစွာသည် နိုင်ငံတွင်းမှ ထွက်ပြေးခဲ့ကြသည်။ အများစုမှာ စစ်မှုထမ်းရန် ခိုင်းစေခံရခြင်းမှရှောင်လွှဲရန်ဖြစ်သည်။ ပြည်ပရောက် ထင်ရှားသူများက ရုရှားအစိုးရ၏ စစ်ပွဲနှင့်ပတ်သက်၍ ဝေဖန်ပြစ်တင်မှုများအပေါ် ပူတင်ကို ထောက်ခံသူများအကြား စိတ်ဆိုးဒေါသထွက်မှုများ ရှိနေချိန်တွင် ဗိုလိုဒင်က ယခုကဲ့သို့ ပြောဆိုခဲ့ခြင်းဖြစ်သည်။

ယူကရိန်းနိုင်ငံရှိ မီးလောင်ပျက်ဆီးနေသည့် အဆောက်အဦတစ်ခု(ဓါတ်ပုံ-ယူကရိန်းတိုင်းမ်)

ပြီးခဲ့သည့်နှစ် ဖေဖော်ဝါရီလက ယူကရိန်းဘက်သို့ ကျူးကျော်စစ် စတင်ပြီး ရက်အနည်းငယ်အကြာတွင် ရုရှားနိုင်ငံ၌ လက်နက်ကိုင်တပ်ဖွဲ့များကို ဝေဖန်ခြင်း (သို့မဟုတ်) ယူကရိန်းစစ်ပွဲနှင့်ပတ်သက်၍ သတင်း အမှားများ ထုတ်ပြန်ခြင်းသည် ရာဇဝတ်မှုမြောက်သည်ဆိုသော ဥပေဒတစ်ရပ်ကို အတည်ပြုခဲ့သည်။

ယင်းကြောင့် ထင်ရှားသော အတိုက်အခံများအပါအဝင် အစိုးရနှင့် သဘောထားကွဲလွဲသူများစွာသည် စစ်ပွဲကို ဆန့်ကျင်ခြင်းအတွက် ဖမ်းဆီးထောင်ချမှုများနှင့် ရင်ဆိုင်နေရသည်။ ပူတင်၏ အမာခံထောက်ခံသူတစ်ဦးဖြစ်သော သမ္မတဟောင်း ဒီမီထရီ မတ်ဗီဒတ်ဗ် (Dmitry Medvedev) က အဖနိုင်ငံတော်ကြီးကို ပျက်စီးစေလိုသော သစ္စာဖောက်များအတွက် စစ်ပွဲကာလအတွင်း အထူးဥပဒေများ ရှိခဲ့သည်ဟု ပြီးခဲ့သည့် ရက်ပိုင်းအတွင်းက ပြောခဲ့သည်။ ၎င်းသည် ရုရှားလုံခြုံရေးကောင်စီဝင်လည်းဖြစ်သည်။

စစ်ဒဏ်ခံလိုက်ရသည့် ယူကရိန်းရှိ နယ်မြေတစ်ခုမြင်ကွင်း

သမ္မတဟောင်းမတိုင်ခင် ရုရှားသရုပ်ဆောင် တစ်ဦးဖြစ်သော အာသာ စမိုယာနီနော့ဗ်( Artur Smolyaninov) က သူ့အနေဖြင့် စစ်ပွဲအတွင်း ပါဝင်ခွင့်ရလျှင်ယူကရိန်းဘက်မှဝင်တိုက်ပေးချင်သည်ဟု ပြောခဲ့သည်။ အဆိုပါ ပြော စကားကြောင့် စမိုယာနီနော့ဗ်ကို နိုင်ငံတော်မှရိုက်ကူးသောဇာတ်ကားများတွင် ပါဝင်ခွင့်ပိတ်ပင်ရန် ရုရှားအမတ် များက တောင်းဆိုခဲ့ကာ အဆိုပါ ပြောစကားအတွက် စုံစမ်းစစ်ဆေးရေးကော်မတီက ရာဇဝတ်မှုဖြင့် အမှုဖွင့်ခဲ့ သည်။

ထို့အပြင် ဒူဘိုင်းနှစ်သစ်ကူးဖျော်ဖြေပွဲ၌ ယူကရိန်းနိုင်ငံသားများအတွက် ဆုတောင်းပေးခဲ့သော ရုရှား အဆိုတော် ဗယ်လာရီ မီလတ်ဇီ(Valery Meladze)ကိုလည်း နိုင်ငံသားအဖြစ်မှဖယ်ရှားရန် တောင်းဆိုခဲ့ကြသည်။ ဗိုလိုဒင်သည် ရုရှားအောက်လွှတ်တော် ဥက္ကဋ္ဌဖြစ်ကာ တိုင်ပြည်ကိုစော်ကားသည့်ပြောစကားများကို တုန့်ပြန်ရေး သတ်မှတ် ချက်များသည် ထိရောက်မှုမရှိကြောင်း၊ ထိုသို့စော်ကားပြောဆိုသူများကို အကြမ်းဖက်မှုအဖြစ် သတ်မှတ်ကာ အရေးယူသင့်သည်ဟု သူ၏ တယ်လီဂရမ်တွင် ရေးသားခဲ့သည်။ နိုင်ငံပိုင်သိမ်းရန် ၎င်း၏ တောင်းဆိုမှုကိုလည်း ရုရှားဆီနိတ်တာတစ်ဦးဖြစ်သူ အန်ဒရီ ကလစ်ရှက်စ် (Andrei Klishas) ကလည်း ထောက်ခံခဲ့သည်။

Source:BBC

CNI International News

ကိယတ်ဗ်၊ဇန်နဝါရီ ၁၃

ရုရှားတပ်ဖွဲ့ဝင်များသည် ယူကရိန်းအရှေ့ပိုင်းရှိ ဆားတူးဖော်ရေး မြို့တစ်မြို့သို့ သိမ်းပိုက်နိုင်ရန် နီးကပ်လာပြီဟု ရုရှားဘက်မှ ကြာသပတေးနေ့တွင် ပြောကြားခဲ့ကြောင်း အေပီသတင်းတွင် ဖော်ပြထားသည်။

ထိုသို့ သိမ်းပိုက်နိုင်ခဲ့လျှင် ရုရှားအတွက် ကြီးမားသော အောင်မြင်မှုတစ်ခု ဖြစ်လာနိုင်သည်။ သို့သော်လည်း တခြား တစ်ဖက်မှာတော့ စစ်သား အများအပြား သေဆုံးခဲ့ခြင်း၊ သိမ်းပိုက်ထားသော နယ်မြေများကို ပြန်လည် လက်လွှတ် ခဲ့ရခြင်း စသော ပေးဆပ်မှုများလည်း ရှိခဲ့သည်။

ဆိုလီဒါ(Soledar)မြို့ တိုက်ပွဲတွင် ပြီးခဲ့သည့် ၂၄ နာရီအတွင်း ရုရှားတပ်ဖွဲ့ဝင် ၁၀၀ ကျော် သေဆုံးခဲ့သည်ဟု ဒွန်းဘတ်ခ်အုပ်ချုပ်ရေးမှူးက ပြောသည်။

ရုရှားတပ်များသည် ၎င်းတို့ တပ်သား အလောင်းများပေါ် နင်းဖြတ်လာခဲ့ကာ ၎င်းတို့လမ်းကြောင်းရှိ အရာအားလုံး ကို မီးရှို့ဖျက်ဆီးခဲ့သည်ဟုလည်း ၎င်းက ပြောသည်။

ယူကရိန်းစစ်သားများ ရှေ့တန်းမှာ ပြေးလွှားနေစဉ် (Reuters)

ရုရှားတပ်ဖွဲ့များသည် မော်တာများ၊ ဒုံးကျည်များ အသုံးပြုကာ ဆိုလီဒါမြို့ကို ပြင်းပြင်းထန်ထန် ထိုးစစ်ဆင်မှု လုပ် ဆောင်လျက်ရှိသည်။

ယင်းက အလွယ်တကူ အနိုင်ရရှိလိမ့်မည်ဟု မျှော်လင့်ထားသော တိုက်ပွဲ ၁၁ လနီးပါး ကြာမြင့်လာချိန်၊ စစ်ရေး အရ ဆုံးရှုံးမှုများ ရှိလာချိန်တွင် အောင်ပွဲရရှိရေး ရုရှားတို့၏ ကြိုးစားမှုလည်း ဖြစ်သည်။

ဆိုလီဒါကို ရရှိပါက ရုရှားတပ်များအတွက် ဆုလာဘ်တစ်ခု ဖြစ်လာမည်ဖြစ်သည်။ ထိုမြို့ကို ရမည်ဆိုလျှင် ရုရှား တပ်များအနေဖြင့် ယူကရိန်းဘက်က ထိန်းချုပ်ထားဆဲဖြစ်သော ဒွန်းဘတ်ခ်ပြည်နယ် အရှေ့ပိုင်းနှင့် အနီးအနားရှိ မဟာဗျူဟာကျသည့် ဘတ်မု (Bakhmut) မြို့တို့ကိုပါ ဆက်လက် သိမ်းပိုက်ရေးအတွက် အခွင့်အလမ်းကောင်း တစ်ခု ဖြစ်လာမည် ဖြစ်သည်။

ဆိုလီဒါမြို့ ထိုးစစ်တွင် ရုရှား၏ နည်းဗျူဟာမှာ နောက်ထပ် စစ်သားများကို တိုက်ပွဲတွင်းသို့ ပို့ဆောင်ရေး ဖြစ် သည်ဟု မြို့အနီးရှိ ယူကရိန်းအရာရှိတစ်ဦးက အေပီသို့ ပြောသည်။

ယူကရိန်း၏ဒုတိယကာကွယ်ရေးဝန်ကြီးဖြစ်သူ ဟန်နာမယ်လ်ယာကိုတွေ့ရစဉ် (GETTY IMAGES)

ယူကရိန်းတပ်များ အထိအခိုက်ရှိပြီး မောပန်းနေချိန်တွင် လေ့ကျင့်သား ပြည့်ဝသော တပ်သားသစ်များ၊ လေထီး တပ်သားများ သို့မဟုတ် အထူးတပ်ဖွဲ့များ စေလွှတ်ခြင်းဖြင့် ရုရှားသည် တိုက်ပွဲကို အနိုင်ရရှိရေး လုပ်ဆောင်နိုင် သည်ဟုလည်း အမည်မဖော်လိုသော ယူကရိန်းအရာရှိတစ်ဦးက ပြောသည်။

ရုရှားအစိုးရ ပြောခွင့်ရပုဂ္ဂိုလ် ဒီမီထရီပတ်စ်ကော့ဗ်(Dmitry Peskov) ကလည်း ရုရှားစစ်သားများကို ချီးကျူးကာ စစ်သားများ၏ အနစ်နာခံမှုနှင့် သတ္တိရှိမှုတို့ကြောင့် ဆိုလီဒါထိုးစစ်ကို ရှေ့ရောက်အောင် ဆောင်ရွက်နိုင်ခြင်း ဖြစ်သည်ဟု ပြောသည်။

သို့သော် ယူကရိန်း၏ဒုတိယကာကွယ်ရေးဝန်ကြီးဖြစ်သူ ဟန်နာမယ်လ်ယာ(Hanna Malyar)က ရန်သူများသည် ထိုးစစ်ဆင်မှုကို လုပ်ဆောင်နေဆဲ ဖြစ်သော်လည်း အောင်မြင်မှု မရှိသေးကြောင်းနှင့် အကျအဆုံး များနေကြောင်း ပြောခဲ့သည်။

Source: AP

CNI International News

ဘာလင်၊ ဇန်နဝါရီ ၇

ဂျာမနီအစိုးရအနေဖြင့် ယခုနှစ် ပထမသုံးလအတွင်း ယူကရိန်းသို့ မာဒါ (Mardar) ကျည်ကာယာဉ်အစီး ၄၀ ဝန်းကျင် ထောက်ပံ့သွားရန် ရည်ရွယ်ထားသည်ဟု သောကြာနေ့က ပြောကြောင်း AP သတင်းတွင်ဖော်ပြသည်။

ဂျာမနီအဓိပတိ အိုလပ်ဇ် ရွိုင်း (Olaf Scholz) နှင့် အမေရိကန်သမ္မတ ဂျိုးဘိုင်ဒန် (Joe Biden) တို့ကြား ဖုန်းဖြင့် ဆက်သွယ်ပြောဆိုခဲ့ပြီးနောက် ဂျာမနီဘက်က ထုတ်ပြန်ကြေညာခဲ့ခြင်းဖြစ်ကာ ၎င်းမှာယူကရိန်းကို လက်နက် ထောက်ပံ့ရေးနှင့်ပတ်သက်၍ ဂျာမနီအစိုးရ၏ သိသာထင်ရှားသော ပြောင်းလဲမှုတစ်ခုလည်း ဖြစ်သည်။

အဆိုပါယာဉ်အစင်း ၄၀ သည် ယူကရိန်းသို့ ပို့ဆောင်ရန် ယခုနှစ် ပထမ ၃ လပတ်အတွင်း အဆင်သင့်ဖြစ်နေရ မည်ဟု ရွိုင်း၏ပြောခွင့်ရပုဂ္ဂိုလ် စတဲဖန် ဟေဘစ်စတိုင်းမ် (Steffen Hebestreit) က ပြောသည်။ ဂျာမနီသည် ယာဉ်များကို အသုံးပြုပုံနှင့်ပတ်သက်၍ ယူကရိန်းတပ်ဖွဲ့ဝင်များကို လေ့ကျင့်ပေးရန်လည်း စီစဉ်ထားပြီး သီတင်းပတ် ရှစ်ပတ်မျှကြာမြင့်မည်ဟု ခန့်မှန်းထားကြောင်းလည်း ၎င်းကပြောသည်။

ဆီးရီးယားအရှေ့မြောက်ပိုင်းရှိ Deir Ezzor ကျေးလက်ဒေသတွင် ဆီးရီးယားဒီမိုကရက်တစ်တပ်ဖွဲ့များနှင့် ပူးတွဲစစ်ရေးလေ့ကျင့်မှုအတွင်း Bradley တိုက်ခိုက်ရေးယာဉ်တစ်စီးကို အမေရိကန်စစ်သားများက မောင်းနှင်လာစဉ်(ဓါတ်ပုံ-အေပီ)

ဟောင်ဝှစ်ဇာများ (howitzer)၊ ဂျပတ်(Gepard) လေယာဉ်ပစ်သေနတ်များနှင့် အိုင်းရစ်-တီ(IRIS-T) မြေပြင်မှ ဝေဟင်ပစ်ဒုံးကျည်စနစ် တစ်ခုအပါအဝင် ဂျာမနီသည် ယူကရိန်းသို့စစ်ရေးအကူအညီများစွာ ပေးထားခဲ့ပြီးဖြစ်ကာ အဆိုပါ လက်နက်များကို ယခုနှစ်အတွင်းထပ်ပေးရန်လည်း စီစဉ်ထားသည်။

မာဒါ(Marder)ယာဉ်များ၊ တင့်ကားများကဲ့သို့ အနောက်နိုင်ငံလုပ် စစ်ဘက်သုံးယာဉ်များကို ထောက်ပံ့ရန်အတွက် ရွိုင်းသည် စိုးရိမ်မှုများစွာရှိခဲ့ကာ ဂျာမနီတစ်နိုင်ငံတည်းအနေဖြင့် ထိုသို့ထောက်ပံ့မှုများကို မလုပ်ဆောင်နိုင် ကြောင်းလည်း ၎င်းကပြောခဲ့သည်။ တခြားသောနိုင်ငံများသည် မည်သည့်အကူအညီမှ မပေးသေးဟုလည်း အာဏာပိုင်များကပြောသည်။ သို့သော် ယခုသီတင်းပတ်တွင်မှ ပြင်သစ်၊ အမေရိကန်နှင့်ဂျာမနီတို့က အဆိုပါယာဉ် များကိုထောက်ပံ့ပေးမည်ဟု ထုတ်ပြန်ကြေညာခဲ့ခြင်းဖြစ်သည်။

ယူကရိန်းအတွက် မည်သို့မည်ပုံ ထောက်ပံ့ပေးမလဲဆိုသည်နှင့်ပတ်သက်၍ ဒီဇင်ဘာလ အလယ်ပိုင်းမှ စတင်ကာ အမေရိကန်အပြင် တခြားနိုင်ငံများနှင့် ဆွေးနွေးခဲ့သည်ဟု ဟေဘစ်စတိုင်းမ်က ပြောသည်။ အခြေခံ အဆောက် အဦများကို ပစ်မှတ်ထားကာ ရုရှားတို့ဘက်မှ ဗျူဟာပြောင်းလဲလာခြင်း၊ ရာသီဥတု ပူနွေးလာချိန်တွင် တိုက်ပွဲများ ပိုမိုပြင်းထန်လာနိုင်ခြင်းတို့ကြောင့် ယူကရိန်းသို့ ဆိုဗီယက်ခေတ် လက်နက်များထောက်ပံ့ခြင်းက စစ်ပွဲကို အဆုံးသတ်ရန် ပို၍ကြာမြင့်စေလိမ့်မည်ဟုလည်း ၎င်းက ပြောခဲ့သည်။

Source:AP

CNI International News

ကိယတ်ဗ်၊ ဇန်နဝါရီ ၃

ယူကရိန်းဘက်မှ ဒုံးကျည်ပစ်ခတ်မှုများကြောင့် ရုရှားစစ်သား ၆၃ ဦး သေဆုံးခဲ့ရသည်ဟု ရုရှားကာကွယ်ရေးဌာန က ထုတ်ပြန်ခဲ့သည်ဟု အေပီသတင်းတွင် ဖော်ပြထားသည်။

ရုရှားစစ်သားများ စခန်းချရာ ဒွန်းတက်ခ် (Donetsk) ဒေသအရှေ့ပိုင်းမှ စက်ရုံတစ်ခုကို ယူကရိန်းဘက်မှ ပစ်ခတ်ခဲ့ ခြင်းဖြစ်သည်။ ယင်းသည် ၁၀ လကျော် စစ်ပွဲကာလအတွင်း ရုရှားတပ်များအား ဆိုးဆိုးရွားရွား တိုက်ခိုက်မှုများမှ တစ်ခုလည်း ဖြစ်သည်။

ယူကရိန်းတပ်ဖွဲ့များက HIMARS ဖြင့် ဒုံးကျည်ခြောက်လုံး ပစ်ခဲ့ကြောင်း၊ ထိုထဲမှ နှစ်လုံးကို ပစ်ချနိုင်ကြောင်း ရုရှားကာကွယ်ရေးဌာန၏ ထုတ်ပြန်ချက် တစ်ခုတွင် ပါဝင်သော်လည်း မည်သည့်အချိန်တွင် ဖြစ်ခဲ့သည်ကိုတော့ မဖော်ပြထားချေ။

ယခု တိုက်ခိုက်မှုကို အမေရိကန်မှ ထောက်ပံ့ထားသော လက်နက်များကို အသုံးပြု၍ လုပ်ဆောင်ခဲ့ခြင်းဖြစ်ပြီး ယင်းက ရုရှားတပ်ဖွဲ့အတွက် နောက်ထပ် ဆုံးရှုံးနစ်နာမှု တစ်ခုလည်း ဖြစ်သည်။

ယူကရိန်းစစ်ပွဲအတွင်း ပျက်စီးနေမှုကိုတွေ့ရစဉ်(AP)

ရုရှားသည် ပြီးခဲ့သည့် လများအတွင်း ယူကရိန်းတပ်များ၏ တင်ပြန် ထိုးစစ်ဆင်မှုများနှင့် ရင်ဆိုင်ခဲ့ရသည်။ ယခု တိုက်ခိုက်မှုနှင့်ပတ်သက်၍ ယူကရိန်းဘက်မှ တိုက်ရိုက် အတည်ပြု ပြောဆိုခြင်းမျိုး မရှိသော်လည်း ရုရှား ကာကွယ်ရေးဌာနမှ ထုတ်ပြန်ခဲ့သည့် တိုက်ခိုက်မှုနှင့်ကိုက်ညီသော တိုက်ခိုက်မှုအကြောင်းကိုတော့ ပြောဆိုခဲ့ သည်။

ယူကရိန်း၏ မဟာဗျူဟာမြောက် ဆက်သွယ်ရေး ညွှန်ကြားမှုအဖွဲ့၏ တနင်္ဂနွေနေ့(ဇန်နဝါရီ ၁ ရက်) ထုတ်ပြန် ချက်တွင် မာကစ်ဗ်ကာ (Makiivaka) မြို့ရှိ ကျောင်းအဆောက်အဦ တစ်ခုတိုက်ခိုက်မှုများ၌ ရုရှားစစ်သား ၄၀၀ သေဆုံးကာ ၃၀၀ ဒဏ်ရာ ရရှိခဲ့သည်ဟု ဖော်ပြထားသည်။

သို့သော် ထိုပြောဆိုချက်ကို သီးခြား အတည်ပြုနိုင်ခြင်း မရှိသေးချေ။ ရုရှားဘက်မှ ထုတ်ပြန်မှုတွင်လည်း တိုက် ခိုက်မှုသည် မာကစ်ဗ်ကာမြို့တွင် ဖြစ်ခဲ့သည်ဟု ဖော်ပြထားသော်လည်း ကျောင်းတွင် ဖြစ်ခဲ့သည်ဟု သီးခြား ပြောဆိုခြင်းမရှိပေ။

မြို့တော်ဝန် ဗီတာလီ ကလစ်ချ်ကို အားတွေ့ရစဉ် (GETTY IMAGES)

ရုရှားတပ်များသည် တနင်္လာနေ့တွင်လည်း ဖောက်ခွဲရေး ဒရုန်းများနှင့် ညအချိန် တိုက်ခိုက်မှုများကို ထပ်မံ လုပ် ဆောင်ခဲ့သည်။ ယင်းက ရုရှားအစိုးရအနေဖြင့် ယူကရိန်းရှိ အခြေခံ အဆောက်အဦများကို တိုက်ခိုက်ကာ ၎င်းတို့ ၏ ကျူးကျော်မှုအပေါ် ယူကရိန်းတို့ဘက်မှ မဟန့်တားနိုင်ရေး မဟာဗျူဟာကို ဆက်လက် ကျင့်သုံးနေသည့် သဘောလည်း ဖြစ်သည်။

ကိယတ်ဗ်မြို့တော်ဆီ ဦးတည်လာသော ရုရှား၏ ဒရုန်းအစင်း ၄၀ ကို ယူကရိန်းလေကြောင်း ကာကွယ်ရေး တပ်ဖွဲ့များက ပစ်ချနိုင်ခဲ့သည်ဟု မြို့တော်ဝန် ဗီတာလီ ကလစ်ချ်ကို (Vitali Klitschko) က တနင်္လာနေ့တွင် ပြောခဲ့သည်။

ဒရုန်း ၂၂ စင်းကို မြို့တော်ကောင်းကင်ယံတွင် ပစ်ချနိုင်ခဲ့ခြင်းဖြစ်ကာ ကျန် ၁၈ စီးကို အနီးအနားရှိ ပြည်နယ်များ တွင် ပစ်ချခဲ့ခြင်း ဖြစ်သည်ဟုလည်း ၎င်းက ပြောသည်။

Source: AP