CNI International News

ကိယက်ဗ်၊ စက်တင်ဘာ ၃၀

ယူကရိန်းဒေသ ၄ ခုကို သိမ်းပိုက်ရန် ရုရှား၏ အစီအစဉ်ကြောင့် အခြေခံကျ၍ အဓိကအရေးကြီးသော ဆုံးဖြတ် ချက်များချမှတ်မည့် အရေးပေါ် ထိပ်သီးအစည်းအဝေးကို ယူကရိန်းသမ္မတ ဗိုလိုဒီမီယာ ဇာလန်းစကီးက စက်တင်ဘာ ၃၀ ရက်တွင် ခေါ်ယူကျင်းပမည်ဖြစ်ကြောင်း ယူကရိန်းတာဝန်ရှိသူတစ်ဦးက စက်တင်ဘာ ၂၉ ရက် တွင် ပြောကြားခဲ့သည်။

အတုအယောင် ဆန္ဒခံယူပွဲများဟု ကိယက်ဗ်နှင့် အနောက်အုပ်စုတို့က ပြောကြားထားသည့် ရုရှားသိမ်းယူထား သော ယူကရိန်းနယ်မြေများကို အပြီးအပိုင် သိမ်းယူကြောင်း ကြေညာထားသည့် စာရွက်စာတမ်းများအား သမ္မတ ဗလာဒီမာပူတင်က စက်တင်ဘာ ၃၀ ရက်၌ လက်မှတ်ထိုးပေးခဲ့ကြောင်း ကရင်မလင်က သတင်းထုတ်ပြန်ခဲ့သည်။

အမျိုးသားလုံခြုံရေးနှင့်ကာကွယ်ရေးကောင်စီသည် စက်တင်ဘာ ၃၀ ရက်တွင် တွေ့ဆုံညှိနှိုင်းရန် ရှိကြောင်း ဇာလန်းစကီး၏ ရုံးက ပြောကြားခဲ့သည်။

အဆိုပါ ကောင်စီ၏ အတွင်းရေးမှူး အိုလက်စကီဒနီလော့ဗ် (Oleksiy Danilov) က ယခုအစည်းအဝေးနှင့် ပတ်သက်၍ “ကျနော်တို့နိုင်ငံအတွက် အရေးကြီးပြီး အခြေခံကျတဲ့ ဆုံးဖြတ်ချက်တွေ ချမှတ်နိုင်မယ်လို့ ယုံကြည် ပါတယ်” ဟု ပြောကြားခဲ့သည်။

ယူကရိန်း၏ အမျိုးသားလုံခြုံရေးနှင့် ကာကွယ်ရေးကောင်စီကို တွေ့ရစဉ် (GETTY IMAGES)

ယူကရိန်း 1+1 ရုပ်သံလိုင်းကို ဖြေကြားခဲ့သော ဒနီလော့ဗ်သည် အသေးစိတ် အချက်အလက်များကိုတော့ ထုတ်ဖော် ပြောကြားခြင်း မရှိပေ။

လူထုဆန္ဒခံယူပွဲဟု ခေါ်ဝေါ်ခြင်းသည် တရားမဝင်ကြောင်း၊ ယူကရိန်းက ခိုင်မာစွာ တုံ့ပြန်သွားမည်ဟု သတိပေး ကြောင်း ဇာလန်းစကီးက ထပ်ခါတလဲလဲ ပြောကြားခဲ့သည်။

ယူကရိန်း၏ အမျိုးသားလုံခြုံရေးနှင့် ကာကွယ်ရေးကောင်စီတွင် စစ်ဦးစီးချုပ်၊ ကာကွယ်ရေးဝန်ကြီး၊ နိုင်ငံခြား ရေးဝန်ကြီးနှင့် ဝန်ကြီးချုပ်များ၊ ယူကရိန်းလုံခြုံရေးဌာန အကြီးအကဲတို့ ပါဝင်ကြသည်။

၎င်းတို့သည် အမျိုးသားလုံခြုံရေး မူဝါဒရေးဆွဲရေးနှင့် ပေါင်းစပ်ညှိနှိုင်းရေးအတွက် သမ္မတနှင့် လက်တွဲ ဆောင် ရွက်ရန် တာဝန်ရှိကြသူများ ဖြစ်ကြသည်။

Source: Reuters

CNI International News

မော်စကို၊ စက်တင်ဘာ ၃၀

၇ လကြာ ကျူးကျော်စစ်အတွင်း ယူကရိန်းပိုင်နက်များ အပြီးအပိုင်သိမ်းရန် ပြင်ဆင်နေချိန်၌ ရုရှားသမ္မတ ဗလာဒီမာ ပူတင်သည် ဇာပိုရေဇီးယားနှင့် ခါဆွန်နယ်မြေများ၏ လွတ်လပ်ရေး ရရှိကြောင်း အမိန့်ကို လက်မှတ် ရေးထိုး၍ အတည်ပြုကြေညာခဲ့ကြောင်း အယ်လ်ဂျာဇီးယားသတင်းအရ သိရသည်။

ယူကရိန်းတောင်ပိုင်းရှိ ဇာပိုရေဇီးယား၊ ခါဆွန်တို့၏ အချုပ်အခြာ အာဏာနှင့်လွတ်လပ်ရေးကို အသိအမှတ် ပြု ကြောင်း ပူတင်က စက်တင်ဘာ ၂၉ ရက်နှောင်းပိုင်းတွင် ထုတ်ပြန်ခဲ့သော သမ္မတ၏အမိန့်စာတွင် အတည်ပြုခဲ့ သည်။

ရုရှားသိမ်းထားသည့် ယူကရိန်းနယ်မြေများတွင် လူထုဆန္ဒခံယူပွဲများ အလျင်အမြန် ကျင်းပပြီးနောက် ယနေ့ (စက်တင်ဘာ ၃၀ ရက်)တွင် ကရင်မလင်သမ္မတနန်းတော်ထဲ၌ ကြီးကျယ်စည်ကားသော အခမ်းအနား တစ်ရပ် ကျင်းပပြီး အဆိုပါနယ်မြေနှစ်ခုကို ရုရှားထဲသို့ ပေါင်းထည့်ရန် စီစဉ်ထားသည်။

 ယူကရိန်းနိုင်ငံအတွင်းက ခွဲထွက်၍ ရုရှားနဲ့ပူးပေါင်းရေး မဲပေးနေကြစဉ် 

ရုရှားနှင့်ပေါင်းရန်အတွက် အဆိုပါဒေသခံများ၏ ထောက်ခံမဲ ၉၉ ရာခိုင်နှုန်းအထိ အများစုက တောင်းဆိုထား ကြောင်း ကရင်မလင်က ပြောသည်။

ပူတင်သည် ပြီးခဲ့သည့် ဖေဖော်ဝါရီလတွင် ဒွန်နက်စ်နှင့်လူဟန့်စ် နယ်မြေနှစ်ခု၏ လွတ်လပ်ရေးကိုလည်း အသိအမှတ် ပြုခဲ့ပြီး ဖြစ်သည်။

ခရိုင်းမီးယား ကျွန်းဆွယ်ကို ယူကရိန်းလက်မှ ရုရှားသိမ်းပိုက်ပြီး ၈ နှစ်အကြာ ယခုကဲ့သို့ ကရင်မလင်နန်းတော်၌ အခမ်းအနားတစ်ရပ်ကို ဒေသစံတော်ချိန် ညနေ ၃ နာရီ (ဂရင်းနစ်စံတော်ချိန် မွန်းတည့် ၁၂ နာရီ) တွင် ကျင်းပ မည်ဟု သိရသည်။

ယခု အခမ်းအနားကို ရွှေကွပ်ထားသည့် စကျင်ကျောက်များ စီခြယ်ထားသော ကရင်မလင်နန်းတော်၏ ဂျော်ဂျီဗာ စကီ (Geogrevsky) ခန်းမ၌ ကျင်းပမည်ဖြစ်သည်။

ကုလသမဂ္ဂ အတွင်းရေးမှူးချုပ် အန်တိုနီယိုဂူတာရက်စ်က “ရုရှား၏သိမ်းယူမှုသည် ကုလသမဂ္ဂ ပဋိညာဉ်ကို ချိုးဖောက်ရာ ရောက်ပြီး တရားဝင်တန်ဖိုး ပျောက်ဆုံးနေကြောင်း”နယူးယောက်မြို့၌ သတင်းထောက်များနှင့် တွေ့ဆုံစဉ် သာမန်ထက် ပြင်းထန်သော လေသံဖြင့် ပြောကြားခဲ့သည်။

ကရင်မလင်နန်းတော်မှာ ရုရှားနဲ့ပူးပေါင်းမယ့် ယူကရိန်းကခွဲထွက်ဒေသ မဲပေးမှု အောင်မြင်မှု အထိမ်းအမှတ် ကျင်းပရန် ပြင်ဆင်နေစဉ် (AP)

ပြီးခဲ့သည့် ဖေဖော်ဝါရီလ ၂၄ ရက်၌ စတင်ခဲ့သော ရုရှားကျူးကျော်စစ်ကို ခေတ်သစ်ကမ္ဘာတွင် နေရာမပေးနိုင် ကြောင်း၊ လက်မခံသင့်ကြောင်း ဂူတာရက်စ်က ဆက်လက်ပြောကြားခဲ့သည်။

ရုရှား ဗီတိုအာဏာ သုံးပိုင်ခွင့်ရှိသည့် ကုလသမဂ္ဂ လုံခြုံရေးကောင်စီ (UNSC) ထဲတွင် အမေရိကန်နှင့် အယ်လ်ဘေးနီးယားတို့က ယနေ့ (စက်တင်ဘာ ၃၀ ရက်)တွင် တွေ့ဆုံရန် စီစဉ်ထားပြီး ယခုကဲ့သို့ သိမ်းပိုက်မှုကို ရှုတ်ချသည့် ဆုံးဖြတ်ချက်မူကြမ်း ထွက်ရှိနိုင်ရေး ကြိုးပမ်းကြမည်ဖြစ်သည်။

ယူကရိန်းပိုင်နက်ကို ရုရှားတောင်းဆိုမှုအား အမေရိကန်က အသိအမှတ်မပြုကြောင်း စက်တင်ဘာ ၂၉ ရက်တွင် အမေရိကန်သမ္မတ ဂျိုးဘိုင်ဒန်က ထပ်လောင်းပြောကြားခဲ့သည်။

Source: Aljazeera

CNI International news

နယူးဒေလီ၊ စက်တင်ဘာ ၂၉

ရုရှားဖက်ဒရေးရှင်းထဲသို့ တရားဝင် သွတ်သွင်းရန်အတွက် ပုံဖော်လုပ်ဆောင်ခဲ့သည့် ယူကရိန်းနယ်မြေ အစိတ် အပိုင်းများ၌ ရုရှားလိုလားသော လူထုဆန္ဒခံယူပွဲများ ကျင်းပနေစဉ် အိန္ဒိယပြည်ပရေးရာဝန်ကြီး အက်စ်ဂျိုင်ရှန် ကာ (S Jaishankar) က ကုလသမဂ္ဂ(UN)တွင် ၎င်း၏ရပ်တည်ချက်ကို ရှင်းလင်းပြောကြားရန် ရှိကြောင်း နယူးဒေလီက သတင်းထုတ်ပြန်ခဲ့သည်။

ဝါရှင်တန်ဒီစီတွင် ၎င်း၏ (၁၁)ရက်ကြာ အမေရိကန်ခရီးစဉ်အပြီး သတင်းစာ ရှင်းလင်းပွဲ ကျင်းပခဲ့ရာ၌ ဂျိုင်ရှန် ကာကို ဟိန္ဒူစတန်တိုင်းမ်မီဒီယာက “ရုရှား၏ ဆန္ဒခံယူပွဲ ကျင်းပခြင်းအပေါ် ဘယ်လိုထင်မြင်ပါသလဲ၊ ငြိမ်းချမ်း ရေးအတွက် အထောက်အကူဖြစ်စေပြီး UN ပဋိညာဉ်စာတမ်းကို လိုက်နာခြင်းရှိ/မရှိ” မေးမြန်းခဲ့ရာ ၎င်းက “ယူကရိန်း အရေးနှင့်ပတ်သက်၍ အိန္ဒိယက မိမိချမှတ်ထားသော မူဝါဒနှစ်ရပ်အပေါ် ရပ်တည်သွားမည်” ဟု ဖြေကြားခဲ့သည်။

ယူကရိန်း နယ်မြေထဲကနေ ခွဲထွက်ရေး လူထုဆန္ဒခံယူပွဲလုပ်နေစဉ် (AP)

ဂျိုင်ရှန်ကာက “ဒါဟာ စဉ်းစားရမယ့် ကိစ္စတစ်ခုလို့ ကျနော်ထင်ပါတယ်။ ကျနော် နားလည်တာကတော့ အဲဒီ အဖြေက UN ထဲမှာ ရှိပါတယ်။ UN မှာ ကျနော်တို့ သံအမတ် ဘာပြောမလဲဆိုတာ စောင့်ကြည့်ဖို့ တိုက်တွန်းချင် ပါတယ်” ဟု ဆက်လက် ဖြေကြားခဲ့သည်။

ယူကရိန်းနယ်မြေများ၌ ရုရှား၏ လူထုဆန္ဒခံယူပွဲအပေါ် အိန္ဒိယ၏ ရပ်တည်ချက်သည် ယူကရိန်း စစ်ပွဲနှင့် ပတ်သက်၍ သံတမန်ရေးရာ နောက်ထပ် စမ်းသပ်ချက်တစ်ခု ဖြစ်လာမည်ဟု ဟိန္ဒူစတန်တိုင်းမ်က ရေးသား ဖော်ပြခဲ့သည်။

ရုရှားသမ္မတ ဗလာဒီမာပူတင်နှင့် တွေ့ဆုံစဉ် အိန္ဒိယဝန်ကြီးချုပ် နရိန္ဒရာမိုဒီက “ယခုခေတ်သည် စစ်ဖြစ်ရမယ့် ခေတ် မဟုတ်ကြောင်း” ပြောကြားခဲ့မှုအပေါ် အနောက်အုပ်စုနိုင်ငံများက ကျယ်ကျယ်ပြန့်ပြန့် ချီးကျူးခဲ့ကြသည်။

ယူကရိန်း နယ်မြေထဲကနေ ခွဲထွက်ရေး လူထုဆန္ဒခံယူပွဲလုပ်နေစဉ် (AP)

သို့သော် ဥဇဘက်ကစ္စတန်နိုင်ငံ၊ စမာခန်မြို့၌ ပြောကြားခဲ့သည့် မိုဒိ၏ မှတ်ချက်ကြောင့် မြေပြင် စစ်ရေး ဆုတ် ယုတ်နေသည့် ရုရှားသည် နောက်ထပ် စစ်ရေးအင်အား ဖြည့်တင်းရန် စည်းရုံးကြေညာခြင်းများ၊ နျူကလီးယား ခြိမ်းခြောက်ခြင်းများ ပြုလုပ်ခဲ့ပြီး ၎င်းထိန်းချုပ်ထားသည့် ယူကရိန်းနယ်မြေများကို တရားဝင် သိမ်းပိုက် နိုင်ရန် အလို့ငှာ လူထုဆန္ဒခံယူပွဲများ အဆောတလျင် ကျင်းပစေခဲ့သည်။

အမေရိကန်သည် ယခုသီတင်းပတ်အကုန်ပိုင်း (သို့မဟုတ်) လာမည့် သီတင်းပတ် အစောပိုင်းတွင် ဆွေးနွေးရန် မျှော်မှန်းထားသော ခိုင်မာသည့် ဆုံးဖြတ်ချက်မူကြမ်းကို ကုလသမဂ္ဂလုံခြုံရေးကောင်စီ (UNSC) တွင် တင်သွင်း ထားပြီး ဖြစ်သည်။

သို့သော် မည်သည့် ပုံစံဖြင့်မဆို UNSC သို့ တင်သွင်းသည်ဖြစ်စေ ကောင်စီ၏ အမြဲတမ်း အဖွဲ့ဝင်ဖြစ်သော ရုရှား၏ ဗီတိုအာဏာကြောင့် ယင်းဆုံးဖြတ်ချက်ကို အကောင်အထည်ဖော်နိုင်မည့် အလားအလာ မရှိပေ။

ထို့နောက် UN အထွေထွေညီလာခံတွင် ဆုံးဖြတ်ချက်ချနိုင်အောင် လုပ်ဆောင်မည်ဟု အမေရိကန်က ပြောကြား ထားသည်။

Source: Hindustan Times

CNI International News

မော်စကို၊ စက်တင်ဘာ ၂၉

ယူကရိန်းစစ်ပွဲသို့ တိုက်ခိုက်ရန်အတွက် ရုရှားစစ်တပ်က နိုင်ငံသားများကို စစ်မှုထမ်းရန် ဆင့်ခေါ်ခဲ့ခြင်းကြောင့် စစ်မှုမထမ်းလိုသူများက အိမ်နီးချင်းနိုင်ငံများသို့ထွက်ခွာနေကြခြင်းကို တားဆီးရန် ရုရှားက ယာယီစစ်ဆေးရေး ဂိတ်များ ဖွင့်လှစ်လာကြောင်း သိရသည်။

ယူကရိန်းသို့ သွား‌ရောက် တိုက်ပွဲဝင်ဖို့ ဆင့်ခေါ်ခံရခြင်းမှ လွတ်မြောက်ရန် ကြိုးစားနေသည့် ရုရှားနိုင်ငံသားများ သည် စက်တင်ဘာ ၂၈ ရက်၌ နယ်စပ်သို့ထွက်သည့် အဝေးပြေးလမ်းများတွင် တန်းစီလျက် ယာဉ်ကြောပိတ်ဆို့ နေဆဲဖြစ်ကြောင်း အေပီသတင်းဌာနက ရေးသားဖော်ပြသည်။

ထိုသို့ ထွက်ပြေးကြသူများကို ကြားဖြတ်ဟန့်တားရန်အတွက် မော်စကိုအစိုးရက နယ်စပ်များတွင် ယာယီရုံးခန်း များ အသစ်ဖွင့်လှစ် ထားခဲ့သည်။

နယ်စပ် စစ်ဆေးရေးဂိတ်နဲ့ ရုရှားနိုင်ငံသားများ (AP)

ဂျော်ဂျီယာနှင့် နယ်နိမိတ်ချင်း ထိစပ်နေသည့် ရုရှားနိုင်ငံ၊ မြောက်ပိုင်း အိုစီတီယားတွင် အထူးသတိပေးချက် တစ်ရပ် ထုတ်ပြန်ထားပြီး ရက်ပေါင်းများစွာ တန်းစီစုပြုံ နေသူများအတွက် အစားအစာ၊ သောက်ရေ၊ အပူပေး စနစ်နှင့်အခြား အထောက်အကူပစ္စည်းများ ယူဆောင်လာသင့်ကြောင်း နှိုးဆော်ထားသည်။

ဂျော်ဂျီယာနယ်စပ်ရှိ စေတနာ့ဝန်ထမ်းကလည်း သောက်ရေ၊ ခြုံစောင်နှင့် အခြား အထောက်အကူများကို လာရောက် ပေးအပ်ကြကြောင်း တွေ့ရသည်ဟု အေပီက သတင်းဆက်လက် ဖော်ပြသည်။

မြောက်ပိုင်း အိုစီတီယားဒေသ၌ ရုရှားပိုင်နက်အတွင်း ခရီးသည်ယာဉ် အရေအတွက် ကန့်သတ်တားမြစ်ထားပြီး ဗာခေးလာ့စ် (Verkhy Lars) နယ်စပ်ဖြတ်ကျော်သည့် နေရာတွင် ယာယီရုံးခန်းတစ်ခု ဖွင့်ထားကြောင်း ရုရှား သတင်းဌာနများက ရေးသားကြသည်။

နယ်စပ် စစ်ဆေးရေးဂိတ် (AP)

စစ်မှုထမ်းရုံးဟု ရေးသားထားသည့် အနက်ရောင် ဗင်ကားကို ရုရှားမီဒီယာများတွင် ပြသခဲ့ပြီး နယ်စပ်လမ်း ကြောင်း ဖြတ်ကျော်နေကြသူများ၏ ဓာတ်ပုံများကိုပါ ထုတ်ပြန်ခဲ့သည်။

အလားတူ ရုရှား-ဖင်လန် နယ်စပ်မျဉ်း တလျှောက်တွင်လည်း ရုရှား၏နောက်ထပ် စစ်ဆေးရေးဂိတ်နှင့် ယာယီ ရုံးခန်းတစ်ခု ထပ်မံဖွင့်လှစ်ခဲ့ကြောင်း ရုရှားပြည်တွင်း မီဒီယာတစ်ခုဖြစ်သော မီဒူဇာ (Meduza) က သတင်းဖော် ပြခဲ့သည်။

ယူကရိန်းတွင် ရုန်းကန်နေရသော ရုရှားတပ်ဖွဲ့များ အားဖြည့်တင်းရန်အတွက် သမ္မတ ဗလာဒီမာပူတင်၏ စစ်မှု ထမ်းရေး လှုံ့ဆော်ချက် ကြေညာပြီးနောက် ရက်သတ္တတစ်ပတ်အတွင်း ရုရှားနိုင်ငံသားပေါင်း သောင်းနှင့်ချီ၍ ပြည်တွင်းမှ ထွက်ပြေးခဲ့ကြသည်။

ယခင် စစ်မှုထမ်းဟောင်း ဖြစ်ခဲ့ဖူးသူ ၃ သိန်းခန့်ကို ရည်ရွယ်ခေါ်ဆိုခြင်းဖြစ်သည်ဟု သိရသော်လည်း ရုရှားနိုင်ငံ သား အများအပြားကတော့ ထို့ထက်ပို၍ စိုးရိမ်စိတ်များ ပြင်းထန်နေခဲ့ကြသည်။

စစ်ရေး အတွေ့အကြုံမရှိသော အမျိုးသား အများအပြားနှင့် အသက်အရွယ်မရွေး စစ်မှုထမ်းရန် အကြောင်းကြား စာ ရုရှားနိုင်ငံသားများ လက်ဝယ်သို့ ပေးပို့ခဲ့ကြောင်း သတင်းများလည်း ထွက်ပေါ်နေခဲ့သည်။

Source: AP

CNI International News

တာလင်းန်(အက်စ်တိုးနီးယား)၊ စက်တင်ဘာ ၂၈

သမ္မတ ဗလာဒီမာပူတင်၏ စစ်မှုထမ်းရေး ကြေညာချက်ထွက်ပေါ်ပြီးနောက် ရက်သတ္တတစ်ပတ်အတွင်း အိမ်နီးချင်း နိုင်ငံများဖြစ်ကြသည့် ဂျော်ဂျီယာ၊ ကာဇက်စတန်နှင့် ဖင်လန်တို့သို့ ထွက်ပြေး တိမ်းရှောင်လာသူ ရုရှားနိုင်ငံသားပေါင်း ၁၉၄,၀၀၀ ကျော်ရှိကြောင်း အေပီသတင်းအရ သိရသည်။

၎င်းတို့အများစုသည် မော်တော်ယာဉ်၊ စက်ဘီး (သို့မဟုတ်) ခြေလျင်ခရီးဖြင့် ထွက်ပြေးခဲ့ကြခြင်း ဖြစ်သည်။

ထွက်ပြေး တိမ်းရှောင်သူ တစ်ဦးဖြစ်သည့် ရုရှားအမျိုးသား ဗက်စီဗိုလော့ (Vsevolod) က မော်စကိုမြို့တော်မှ ရုရှားတောင်ပိုင်း နယ်စပ်အနီးသို့ ဖြတ်သန်းလျက် ဂျော်ဂျီယာနိုင်ငံအထိ ရောက်ရှိအောင် မော်တော်ယာဉ် မောင်းနှင်ခဲ့ရာ ၄ ရက်ကြာခဲ့ကြောင်း၊ ထို့နောက် ၎င်း၏ မော်တော်ယာဉ်ကို တစ်နေရာတွင် စွန့်ပစ်ခဲ့ပြီး ဂျော်ဂျီယာ နိုင်ငံထဲသို့ ခြေလျင်ခရီးဖြင့် ဝင်ရောက်ခဲ့ကြောင်း ၎င်းက အေပီသတင်းဌာနသို့ ပြောကြားခဲ့သည်။

စက်တင်ဘာ ၂၇ ရက်တွင် ဗက်စီဗိုလော့သည် ၎င်းဖြတ်သန်းခဲ့သော ကီလီမီတာ ၁,၈၀၀ (မိုင် ၁,၁၀၀) ခရီးကို အဆုံးသတ်ခဲ့ခြင်းဖြင့် ယူကရိန်းပြည်တွင်းသို့ ရုရှားထိုးစစ်အတွက် စစ်မှုထမ်းရေး ဆင့်ခေါ်မည့်ဘေးမှ ကင်းဝေး သွားခဲ့သည်။

စစ်မှုမထမ်းချင်လို့ အိမ်နီးချင်းနိုင်ငံတွေဘက်ကို ကားတန်းအရှည်ကြီးနဲ့ ရုရှားနိုင်ငံသားတွေထွက်ခွာနေကြ (AP)

“အင်ပါယာ တည်ထောင်ချင်စိတ် ပြင်းပြနေသူ တစ်ယောက်အတွက် ဖြစ်ရတဲ့စစ်ကြောင့် ကျနော့်အသက် ၂၆ နှစ် မှာ တခြားသူတွေရဲ့သွေး စွန်းထင်းနေတဲ့ ခန္ဓာကိုယ်ကို သယ်ပြီး အိမ်မပြန်ချင်တော့ဘူး” ဟု ၎င်းက အေပီသတင်း ဌာနသို့ ရင်ဖွင့်သည်။

ရုရှားတို့၏ လက်စားချေမှုကို ကြောက်ရွံ့နေရချိန်ဖြစ်၍ ၎င်း၏ နောက်ဆုံးအမည်ကို သတင်းထဲ ထည့်မရေးရန် လည်း ၎င်းက အေပီကို မေတ္တာရပ်ခံခဲ့သည်။

ပူတင်၏ စစ်မှုထမ်းဆင့်ခေါ်ရေး မိန့်ခွန်းပြောပြီး တစ်ပတ်အတွင်း ရုရှားပြည်တွင်း၌ ယောက်ျားလေးများနှင့် မိသားစုများ၊ မိတ်ဆွေ အပေါင်းအသင်းများသည် စက်တင်ဘာ ၂၁ ရက်မှစ၍ တစ်ဦးချင်းရော၊ အစုအဖွဲ့လိုက်ပါ ဆက်တိုက်ဆိုသလို မော်စကိုအား ကျောခိုင်းထွက်ခွာနေကြသည်။

အစောပိုင်းတွင် ရုရှားနိုင်ငံမှ ထွက်ခွာမည့် လေကြောင်းလိုင်း အနည်းငယ်တွင် လေယာဉ်လက်မှတ်နှုန်းထားများ ဈေးတက်သွားခဲ့သည်။

ပူတင်နဲ့ ကာကွယ်ရေး၀န်ကြီးတို့ကိုတွေ့ရစဉ် (GETTY IMAGES)

အချို့ကတော့ မော်တော်ယာဉ်များကို ဆီဖြည့်၊ ဓာတ်ငွေ့ဖြည့်၍ ရုရှားနယ်စပ် မျဉ်းကြောင်းတလျှောက် တသီ တသန်းကြီး ထွက်ခွာကြသည်။

ထိုသို့ ထွက်ခွာသည့် ယာဉ်များပြားမှုကြောင့် ရုရှား၏မြောက်ပိုင်း အိုစီတီးယား (Ossetia) ဒေသမှ ဂျော်ဂျီယာ နယ်စပ်သို့ ဖြတ်ကျော်သည့် ဗာခါနီလာ့စ်(Verkhny Lars) လမ်းပိုင်းတွင် ယာဉ်ကြောပိတ်ဆို့မှုမှာ စက်တင်ဘာ ၂၇ ရက်တွင် ၁၅ ကီလိုမီတာ (၉ မိုင်ကျော်)အထိ ရှည်လျားသွားခဲ့သည်။

ရုရှားနယ်ခြားစောင့်တပ်များကလည်း စည်းမျဉ်းစည်းကမ်းများကို ဖြေလျော့ပေးပြီး ထွက်ခွာသူများကို ခြေလျင် ဖြတ်ကျော်ခွင့်ပေးခဲ့ရာ ရာနှင့်ချီသော လမ်းသွားလမ်းလာများဖြင့် ပျားပန်းခတ်နေပုံကို လူမှုကွန်ရက် မီဒီယာများ တွင် တွေ့ရှိရသည်။

အလားတူ ရုရှားမှ ကာဇက်စတန်နိုင်ငံသို့ နယ်စပ်ဖြတ်ကျော် ထွက်ခွာရန်အတွက် ရှည်လျားစွာ တန်းစီစောင့်ဆိုင်း မှုများလည်း ရှိခဲ့ကြောင်း အေပီသတင်းအရ သိရသည်။

Source: AP

CNI International News

ကိယက်ဗ်၊ စက်တင်ဘာ ၂၇

ကရင်မလင် ကြိုးကိုင်ထားသော လူထုဆန္ဒခံယူပွဲများသည် သိမ်းပိုက်ခံထားရသော ယူကရိန်းနယ်မြေ ၄ ခု အတွက် ရုရှား၏ အနီးကပ် ထိန်းချုပ်နိုင်မှုကို ပြသလာသဖြင့် စစ်ဒဏ်ကို ၇ လကြာအောင် ခံစားနေရသည့် ယူကရိန်းပြည်သူများအတွက် စိုးရိမ်ထိတ်လန့်စရာများ တိုးပွားလာခဲ့ကြောင်း အေပီသတင်းဌာနက ရေးသား ဖော်ပြသည်။

အဆိုပါ နယ်မြေများတွင် ဆန္ဒခံယူပွဲများ မစတင်မီကပင် ဒေသခံအချို့သည် အတင်းအကျပ် မဲထည့်စေခြင်း (သို့မဟုတ်) ရုရှားစစ်တပ်ထဲသို့ မဖြစ်မနေ စစ်မှုထမ်းစေခြင်းတို့မှ ရှောင်ရှားလိုကြသဖြင့် နေရပ်စွန့်ခွာ ထွက်ပြေးခဲ့ ကြသည်။

အချို့က အိမ်တံခါးအလုံပိတ်၍ ပုန်းအောင်းနေကြခြင်းဖြင့် မဲထည့်ဖို့ တစ်အိမ်တက်ဆင်း စည်းရုံးနေသော လက်နက်ကိုင် စစ်သားများကို ရှောင်လွှဲနိုင်မည်ဟု မျှော်လင့်ကြသည်။

ကြိုတင်မဲပေးမှုများ မစတင်မီ စက်တင်ဘာ ၂၃ ရက်ကပင် ရုရှားထိန်းချုပ်ထားသော ယူကရိန်းတောင်ပိုင်း၊ ခါဆွန်နယ်မြေမှ ထွက်ပြေးလာသည့် ပက်ထရိုကိုဘာနစ် (Petro Kobernik) အမည်ရှိ ဒေသခံတစ်ဦးက “ရုရှား ဥပဒေအောက်တွင် နေရခြင်းနှင့် တိုက်ပွဲများ ပြင်းထန်လာခြင်းတို့က မိမိနှင့် အခြားသူများ၏ အနာဂတ်ကို တုန်လှုပ်ခြောက်ခြားစေခဲ့ကြောင်း” ပြောကြားခဲ့သည်။

ရုရှားစစ်သားများကို တွေ့ရစဉ် (AP)

“အခြေအနေတွေက ပြောင်းလဲပုံက အင်မတန်မြန်ပါတယ်။ ရုရှားစစ်တပ် (ဒါမှမဟုတ်) ယူကရိန်း ပြောက်ကျား တွေနဲ့ ချီတက်လာတဲ့တပ်တွေ ထိတွေ့မှာကို ဒီကလူတွေ စိုးရိမ်နေကြပါတယ်” ဟု အသက် ၃၁ နှစ်အရွယ်ရှိ ပက်ထရိုကိုဘာနစ်က အေပီသတင်းဌာနသို့ တယ်လီဖုန်းဖြင့် ပြောကြားခဲ့သည်။

လက်နက်ကိုင် ရဲသားများနှင့်အတူ ရုရှားတပ်ဘက် အရာရှိတချို့က မဲပုံးများ ယူဆောင်လာစဉ် ခါဆွန်နယ်မြေ၏ တစိတ်တပိုင်းဖြစ်သော နိုဗိုထရိုက်စကီ (Novotroitske) ကျေးရွာရှိ ၎င်း၏နေအိမ်၌ ကိုဘာနစ်သည် အသက် ၇၀ အရွယ်ရှိ ဖခင်ကြီးကို အိမ်ထဲသို့ မည်သူမျှ ဝင်ခွင့်မပေးရန် မှာကြားပြီး ပုန်းအောင်းနေခဲ့သည်။

ကိယက်ဗ်အစိုးရနှင့် အနောက်အုပ်စု မဟာမိတ်များက အတုအယောင်ဟု ရှုတ်ချထားသည့် အဆိုပါ လူထု ဆန္ဒခံ ယူပွဲကို ယခုရက်ပိုင်း ရုရှားထိန်းချုပ်ထားသော လူဟန့်စ် (Luhansk) ၊ ခါဆွန်၊ ဒွန်နက်စ်၊ ဇာပိုရေဇီးယား စသည့် နယ်မြေ ၄ ခုတွင် ကျင်းပနေခဲ့သည်။

ထိုနယ်မြေများကို ရုရှား အပြီးအပိုင် သိမ်းယူရန်အတွက် အကြောင်းပြချက်အဖြစ် ဆန္ဒမဲကောက်ခံခြင်းဟု ရှုမြင် ကြပြီး စက်တင်ဘာ ၂၇ ရက် (ယနေ့)တွင် မဲစာရင်းများ အတည်ပြုပြီးလျှင် ရုရှားအာဏာပိုင်များက ၎င်းတို့ ပိုင်ဆိုင်သော နယ်မြေဒေသများအတွက် ထုတ်ဖော်ကြေညာတော့မည်ဟု မျှော်လင့်ရသည်။

ယူကရိန်းခွဲထွက်ဒေသအတွင်းတစ်နေရာကိုတွေ့ရစဉ် (AP)

ကရင်မလင်သမ္မတနန်းတော်သည် ယခင်ကလည်း ထိုသို့နည်းဗျူဟာများကို အသုံးပြုခဲ့ဖူးသည်။

ပင်လယ်နက် ကျွန်းဆွယ်တစ်ခုဖြစ်သည့် ယူကရိန်းနိုင်ငံ၊ ခရိုင်းမီးယားဒေသကိုလည်း လူထုဆန္ဒခံယူပွဲဟူ၍ အဆောတလျင် ခေါ်ဝေါ်သမုတ်လျက် ဒေသခံများထံမှ အလားတူ ထောက်ခံမဲများကို ၂၀၁၄ ခုနှစ်က ဖန်တီးပြု လုပ်ခဲ့သည်။

လက်ရှိ ဖြစ်ပွားနေဆဲ စစ်ပွဲအတွက် တပ်ဖွဲ့ဝင်အင်အား တိုးမြှင့်စုဆောင်းစေရန် ဗလာဒီမာပူတင်က ယခင် သီတင်း ပတ်တွင် အမိန့်ပေးခဲ့ပြီးနောက် နယ်မြေများကာကွယ်ရေးအတွက် နျူလက်နက်များ ထုတ်သုံးဖို့ အသင့်ရှိကြောင်း ယူကရိန်းကို ပြတ်ပြတ်သားသား ခြိမ်းခြောက်ခဲ့သည်။

Source: AP

CNI International News

နယူးယောက်၊ စက်တင်ဘာ ၂၆

ယူကရိန်းအရေးကို မော်စကိုအနေဖြင့် စစ်ရေးအရ အရေးယူခြင်းမှအပ အခြားရွေးချယ်စရာမရှိတော့ကြောင်း ကုလသမဂ္ဂ (UN) အထွေထွေညီလာခံသို့ ရုရှားက ပြောကြားခဲ့သည်။

ထို့နောက် ယူကရိန်းသို့ ကျူးကျော်စစ်နှင့်ပတ်သက်၍ ရုရှားက ၎င်း၏ရပ်တည်ချက်ကို ကမ္ဘာသိအောင် စက်တင်ဘာ ၂၄ ၌ ပြောကြားရာတွင် အိမ်နီးချင်း ယူကရိန်းနှင့်အနောက်အုပ်စုနိုင်ငံအပေါ် မကျေနပ်ချက်များကို ထပ်လောင်း ပြောကြားခဲ့သည်။

UN ညီလာခံကဲ့သို့ ထင်ရှားသည့် သံတမန် အစည်းအဝေးတွင် ရက်အတန်ကြာအောင် ရှုတ်ချခံရပြီးနောက် ရုရှား နိုင်ငံခြားရေးဝန်ကြီး ဆာဂျေလာဗရော့ဗ်က ဝါရှင်တန်ကို အထူးအာရုံစိုက်ခဲ့သည်။

UN တွင် ပြောကြားခဲ့သည့် ၎င်း၏မိန့်ခွန်းထဲ၌ လာဗရော့ဗ်က “အမေရိကန်နှင့် ၎င်း၏ မဟာမိတ်များသည် ကုလသမဂ္ဂ ကိုယ်စားပြုသော နိုင်ငံတကာစနစ်ကို ပြင်းပြင်းထန်ထန် ထိခိုက်စေခဲ့ကြောင်း” အဓိကထား ပြောကြားသွားခဲ့သည်။

၂၀၀၀ ပြည့်လွန်နှစ်များ အစောပိုင်း အီရတ်သို့ အမေရိကန် စစ်ပြုခဲ့ကြောင်း၊ ၂၀ ရာစုကာလ စစ်အေးကာလ၊ ၁၉ ရာစု အမေရိကန် မူဝါဒများကို ပြန်ကြည့်လျှင် အနောက်ကမ္ဘာခြမ်းအပေါ် အမေရိကန်၏ ဩဇာလွှမ်းမိုးမှုကို အဓိက ကြွေးကြော်ထားသည့် သမိုင်းကြောင်းအား တွေ့ရမည်ဖြစ်ကြောင်း လာဗရော့ဗ်က ပြောကြားခဲ့သည်။

ဇာလန်းစကီးနဲ့ ဘိုင်ဒန်ကိုတွေ့ရစဉ် (GETTY IMAGES)

အမေရိကန်သည် ၎င်းအလိုရှိသည့် နေရာတိုင်းတွင် အပြစ်ကင်းစေခြင်းအလို့ငှာ တတ်နိုင်သမျှ ကြိုးပမ်းလေ့ ရှိသော်လည်း အခြားသူများ ၎င်းတို့အမျိုးသား အကျိုးစီးပွား မြှင့်တင်ခြင်းကိုတော့ လက်မခံနိုင်ကြောင်း အမေရိကန်၏ ရပ်တည်ချက်ကို လာဗရော့ဗ်က ပုံဖော်ပြောကြားခဲ့သည်။

“အမေရိကန်နဲ့ သူ့မဟာမိတ်တွေက သမိုင်းကြောင်းအရ ချီတက်နေမှုကို ရပ်တန့်ချင်ကြတယ်” ဟု ၎င်းက ထောက်ပြခဲ့သည်။

စက်တင်ဘာ ၂၄ ရက်၌ UN ညီလာခံ၌ လာဗရော့ဗ်၏ ပြောကြားချက်များကို အမေရိကန်နှင့် ယူကရိန်းတို့က တုံ့ပြန်ခြင်း မရှိသေးသော်လည်း ညီလာခံ ပြီးစီးသည့်နောက်ပိုင်း တရားဝင်တုံ့ပြန်မှု ရှိလာနိုင်သေးသည်။

“ယူကရိန်းနှင့်အမေရိကန် နှစ်နိုင်ငံစလုံးမှ သမ္မတများက ရုရှားကို အန္တရာယ်ရှိသော ရန်လိုသူအဖြစ် သတ်မှတ် ထားခြင်းကို ရပ်တန့်ရမည်” ဟု လာဗရော့ဗ်က ပြောကြားခဲ့သည်။

အနောက်အုပ်စုသည် ရုရှားကို ဖြိုခွဲရန် ရည်ရွယ်နေကြောင်း လာဗရော့ဗ်က စွပ်စွဲခဲ့သည်။

“လွတ်လပ်လွန်းလှတဲ့ ပထဝီဝင်နိုင်ငံရေး အဖွဲ့အစည်းတစ်ခုကို ကမ္ဘာ့မြေပုံကနေ ဖယ်ထုတ်နိုင်ဖို့ သူ ကြိုးစား နေကြတယ်” ဟု ၎င်းက အတိအလင်း ပြောကြားခဲ့သည်။

Source: AP

CNI International News

ကိယက်ဗ်၊ စက်တင်ဘာ ၂၄

ယူကရိန်းထံမှ ရုရှားသိမ်းပိုက်ထားသော ဒေသ ၄ ခုကို အပြီးအပိုင် ထိန်းချုပ်ရန် ရည်ရွယ်၍ ပြုလုပ်သော လူထု ဆန္ဒခံယူပွဲကို ရုရှားအစိုးရက စက်တင်ဘာ ၂၃ ရက်တွင် စတင်ခဲ့သည်။

ထိုဆန္ဒခံယူပွဲသည် အတုအယောင် ထောက်ခံမဲများကို လုပ်ကြံဖန်တီးမည်ဖြစ်၍ ယင်းပွဲမှ မဲရလဒ်များကို အသိ အမှတ် မပြုကြရန် ကိယက်အစိုးရနှင့် အနောက်အုပ်စုက အပြစ်တင်ရှုတ်ချခဲ့ကြသည်။

၄ ရက်ကြာ မဲပေးနေမှုများ မပြီးမချင်း ဒေသခံများကို ရုရှားသိမ်းထားသည့် နေရာတချို့မှ ထွက်ခွာခွင့် ပိတ်ပင် ထားကြောင်း၊ အစိုးရဝန်ထမ်းများ သွားရောက် မဲမပေးလျှင် အလုပ်ထုတ်ခံရမည်ဟု ခြိမ်းခြောက်ထားကြောင်း ယူကရိန်းအစိုးရ အရာရှိများက ပြောသည်။

အဆိုပါ လူထုဆန္ဒခံယူပွဲ မဲများကို ကမ္ဘာက ပြတ်ပြတ်သားသား ရှုတ်ချမှ ဖြစ်မည်ဟု ညစဉ်ဗွီဒီယိုမိန့်ခွန်းတွင် ယူကရိန်းသမ္မတ ဗိုလိုဒီမီယာ ဇာလန်းစကီးက ပြောကြားခဲ့သည်။

ရုရှားနဲ့ပေါင်းစည်းရေး ယူကရိန်းနိုင်ငံထဲက ခွဲထွက်ဒေသ (AP)

ထိုကဲ့သို့ မဲပေးစေ၍ စည်းရုံးသိမ်းသွင်းရေး လှုပ်ရှားမှုကို ခရိုင်းမီးယားနှင့် အခြားသိမ်းပိုက်နယ်မြေများ အပါအဝင် ရုရှားက ယခုသီတင်းပတ်၌ စတင်ခဲ့သည်။

“ဒါတွေဟာ နိုင်ငံတကာဥပဒေနဲ့ ယူကရိန်းဥပဒေကို ဆန့်ကျင်တဲ့ ရာဇဝတ်မှုတွေ ဖြစ်ရုံတင်မကဘဲ လူမျိုးတစ်မျိုး အပေါ် ကျူးလွန်တဲ့ရာဇဝတ်မှုတွေလည်း ဖြစ်ပါတယ်” ဟု ဇာလန်းစကီးက ထပ်လောင်း ပြောကြားခဲ့သည်။

ယခုလ အစောပိုင်း တန်ပြန်ထိုးစစ်တစ်ခုတွင် ယူကရိန်းက ၎င်း၏အရှေ့မြောက် နယ်မြေ အများအပြားကို ပြန်လည် သိမ်းပိုက်နိုင်ခဲ့ပြီးနောက် ရုရှားတို့က လူထုဆန္ဒခံယူပွဲ မဲများ ရရှိဖို့ အဆောတလျင် စီစဉ်ခဲ့ကြသည်။

တစ်ချိန်တည်းမှာပင် ယူကရိန်း၌ တိုက်ပွဲဝင်ဖို့ တပ်ဖွဲ့ဝင် ၃ သိန်း စစ်မှုထမ်းစေရေးကို ရုရှားသမ္မတ ဗလာဒီမာ ပူတင်က ယခုသီတင်းပတ်၌ ကြေညာခဲ့သည်။ ဖေဖော်ဝါရီ ၂၄ ရက် ကျူးကျော်မှုနောက်ပိုင်း အကြိတ်အနယ် တိုက်ခိုက်ကြသည့် စစ်ရေးပဋိပက္ခအတွက် ကရင်မလင်သမ္မတနန်းတော်သည် အလောတကြီးဖြင့် ကြိုးစား နေပုံရသည်။

ရုရှားပေါင်းစည်းရေး ယူကရိန်းနိုင်ငံထဲက ခွဲထွက်ဒေသမှ လူထုဆန္ဒခံယူပွဲ (တာ့စ်)

ဇာလန်းစကီး ကတော့ ရုရှားသိမ်းပိုက်ထားသော ယူကရိန်းနယ်မြေများရှိ ဒေသခံပြည်သူများကို တိုက်ရိုက် ရည်ညွှန်း၍ မိန့်ခွန်းပြောကြားခဲ့ပြီး ဆက်လက်တွန်းသွားကြဖို့ တိုက်တွန်းခဲ့သည်။

“ရုရှားစည်းရုံးရေးကနေ အတတ်နိုင်ဆုံး ရှောင်ပါ။ အမိန့်မူကြမ်းတွေ လက်မခံပါနဲ့။ ယူကရိန်းရဲ့နယ်မြေ ပြန်ဖြစ် လာအောင် ကြိုးစားကြပါ” ဟု မှာကြားခဲ့ပြီး ရုရှားလက်နက်တပ်ဖွဲ့များတွင် ဆုံးဖြတ်ချသူများ တွေ့လျှင် အဖျက် အမှောင့် စွက်ဖက်မှုအဖြစ် ယူကရိန်းထောက်လှမ်းရေးထံသို့ သတင်းပို့ကြရန် ဆော်ဩထားသည်။

ရုရှားသည် ၎င်းသိမ်းပိုက်ထားသော နယ်မြေ ၄ ခုကို တပေါင်းတစည်း ဖြစ်စေခြင်းဖြင့် ရုရှားတိုက်ခိုက်မှု အရှိန်ကို ပြန်လည် ပုံဖော်နိုင်မည်ဖြစ်သည်။ အကယ်၍ နျူကလီးယားဖြင့် တုံ့ပြန်လာသည့်တိုင် မျှတမှု ရှိစေရေးအတွက် ယခု ဆန္ဒခံယူပွဲကို အသုံးချခြင်းဖြစ်နိုင်ကြောင်း ရိုက်တာက ဆက်လက် ရေးသားထားသည်။

Source: Reuters

CNI International News

ကိယက်ဗ်၊ စက်တင်ဘာ ၂၄

ယူကရိန်းနိုင်ငံကို တိုက်ခိုက်ရန် အီရန်လုပ် မောင်းသူမဲ့လေယာဉ် (ဒရုန်း)များအား ရုရှားဘက်မှ ဆက်တိုက် သုံးစွဲ လာသဖြင့် ကိယက်ဗ်မြို့တော်ရှိ အီရန်သံရုံးဝန်ထမ်းအင်အားကို လျှော့ချပြီး ယူကရိန်းဆိုင်ရာ အီရန်သံအမတ် အပေါ် အစိုးရအသိအမှတ်ပြုမှု ရုပ်သိမ်းမည်ဟု ယူကရိန်းသမ္မတ ဗိုလိုဒီမီယာဇာလန်းစကီးက ပြောကြားခဲ့ကြောင်း အယ်လ်ဂျာဇီးယားသတင်းတစ်ပုဒ်တွင် တွေ့ရသည်။

ယူကရိန်းတပ်ဖွဲ့များသည် ယခုအချိန်အထိ စစ်ရေးပဋိပက္ခအတွင်း အီရန်လုပ် ဒရုန်း ၈ စင်းကို ပစ်ချခဲ့ပြီးဖြစ် ကြောင်း ဇာလန်းစကီးက စက်တင်ဘာ ၂၃ ရက်နှောင်း ပုံမှန်ဗီဒီယိုမိန့်ခွန်းတွင် ထည့်သွင်းပြောကြားခဲ့သည်။

“ဒီကနေ့ ရုရှားစစ်တပ်ဟာ ကျနော်တို့ရဲ့ ဒနီပရိုပက်ထရိုဗက်ဒေသ (Dnipropetrovsk) နဲ့ အိုဒက်ဆာဒေသတွေကို တိုက်ခိုက်တာမှာ အီရန်ဒရုန်း သုံးခဲ့ပါတယ်။ ဒီကိစ္စကို ပြင်းပြင်းထန်ထန် နိုင်ငံခြားရေးဝန်ကြီးဌာနကို ညွှန်ကြားခဲ့ ပါတယ်” ဟု ဇာလန်းစကီးက ၎င်း၏မိန့်ခွန်းတွင် ဆက်လက် ပြောကြားခဲ့သည်။

“ဒီ အီရန် ဒရုန်း ၆ စင်းကို အရှေ့နဲ့တောင်ဘက် စစ်ရေးကွပ်ကဲမှု အောက်မှာရှိတဲ့ လေကြောင်းရန် ကာကွယ်ရေး စနစ်သုံးပြီး ပစ်ချခဲ့ပါတယ်။ နောက်ထပ် တစ်စင်းကိုလည်း ကျနော်တို့ရေတပ်ရဲ့ လေကြောင်းရန် ကာကွယ်ရေး စနစ်နဲ့ပဲ မြေပြင်ဆင်းသက်စေခဲ့ပါတယ်။ အခုလေးတင်ပဲ အီရန်ဒရုန်း ထပ်တက်လာတယ်လို့ တောင်ပိုင်းစစ်ရေး ကွပ်ကဲမှုကနေ သတင်းပို့တာကို နားထောင်နေတုန်းပါ” ဟု ၎င်းက ဆက်လက် ပြောကြားခဲ့သည်။

ယူကရိန်းရှိ အီရန်သံရုံး (GETTY IMAGES)

“ဒီလိုမျိုး ဖော်ရွေချစ်ကြည်မှုမရှိတဲ့ အီရန်ရဲ့ လုပ်ရပ်ကို တုံ့ပြန်တဲ့အနေနဲ့ ယူကရိန်းဘက်က သူတို့သံအမတ်ကို ရုပ်သိမ်းဖို့နဲ့ ကိယက်ဗ်မြို့တော်က သံရုံးဝန်ထမ်းအရေအတွက် သိသိသာသာ လျှော့ချဖို့ ဆုံးဖြတ်ခဲ့ပါတယ်” ဟု ၎င်းက ရှင်းပြသည်။

ရုရှားထံသို့ ဒရုန်းများ ပံ့ပိုးပေးခဲ့ကြောင်း ကိယက်ဗ်နှင့်ဝါရှင်တန်တို့၏ စွပ်စွဲချက်များကို အီရန်က ငြင်းဆိုထားပြီး တီဟီရန် အစိုးရတာဝန်ရှိသူများအနေဖြင့် စစ်ပွဲ၌ နှစ်ဘက်စလုံးကို မကူညီကြောင်း၊ ဆွေးနွေးမှုများမှတဆင့် စစ်ဖြစ်နေသည့် နှစ်နိုင်ငံ၏ ဆုံးဖြတ်ချက်ကို ထောက်ခံသွားမည်ဖြစ်ကြောင်း ယခင်ကတော့ ပြောကြားခဲ့ဖူးသည်။

“ရုရှားနိုင်ငံကို လက်နက်ပေးပို့တာကို တုံ့ပြန်တဲ့အနေနဲ့ ကျနော်တို့ ကိယက်ဗ်မြို့က အီရန်သံအမတ်ကို အသိ အမှတ်ပြုမှု ရုပ်သိမ်းကြောင်း ကြေညာခဲ့ပါတယ်။ အီရန်သံရုံး ဝန်ထမ်းဦးရေ လျှော့ချဖို့လည်း ပြောခဲ့ပါတယ်” ဟု ယူကရိန်းနိုင်ငံခြားရေးဝန်ကြီးဌာန ပြောခွင့်ရသူ အိုလက်နီကိုလန်ကို (Oleg Nikolenko) က အသိပေးခဲ့သည်။

Source: Aljazeera