CNI News

၂၀၂၂ ခုနှစ်၊ မေလ ၂၆

မောင်တောမြို့နယ်အတွင်း ဖြတ်သန်းသွားလာသည့် ယာဉ်များအနေဖြင့် စစ်တပ်(သို့မဟုတ်) ရဲဌာနများသို့ သတင်းပို့ရမည်ဟု စစ်ဆေးရေးဂိတ်အရာရှိများက ပြောဆိုကြောင်း ဒေသခံများက CNI သတင်းဌာနသို့ ပြောသည်။

၂၆ ရက်နေ့ မနက်ပိုင်းမှ စတင်ပြီး မောင်တောမြို့နယ်အတွင်းရှိ စစ်ဆေးရေးဂိတ်များတွင် ဖြတ်သန်းသွားလာသည့် ယာဉ်များကို သတင်းပို့၊ စစ်ဆေးမှုများကို လုပ်ဆောင်နေသည်ဟု မောင်တောဒေသခံ ကိုမောင်မောင်ကျော်က ပြောသည်။

“ကျနော်တို့ မောင်တောတစ်လျှောက်ပေါ့ ကားတွေ ထွက်လို့ရှိရင် သတင်းပို့ရတယ်။ ကိုယ်နေတဲ့နေရာကနေ ထွက်လာလို့ရှိရင် သတင်းပို့။ သူတို့ စစ်ကြောင်းဗျူဟာကို သတင်းပို့ရတာပေါ့နော်။ သူတို့ ကြိုပြီးတော့ ပြောထား တာလည်း မရှိဘူး။ ကျနော်တို့ တောင်ပြိုကိုရောက်တာနဲ့ ဂိတ်မှာ သတင်းပို့ပြီးပြီလား အဲလိုမေးတယ်။ မပို့ထားဘူး ဆိုရင် သူတို့ ဖုန်းနဲ့ဆက်ခိုင်းတယ်။ လမ်းတံတားကောင်စီက G 3 လား ဘာလား မသိဘူး။ G 3 ကို ဖုန်းဆက်ပြီးတော့ သူတို့က မင်းတို့က စစ်တပ်ကို သတင်းမပို့ဘူးဆိုလို့ရှိရင် ရဲကို သတင်းပို့ ဒီလိုမျိုး လုပ်ရမယ်ပေါ့နော်။ ပြန်ဝင်လာလို့ရှိရင်လည်း ပြန်ဝင်လာကြောင်းကို ပြောရတယ်။ ပြီးတော့ ကားပေါ်မှာပါတဲ့သူတွေက မှတ်ပုံတင် တွေပြရတယ်” ဟု CNI သတင်းဌာနသို့ ပြောသည်။

မောင်တောမြို့နယ်အတွင်း သွားလာမှုများကို ယခင်ကလည်း ကန့်သတ်တားမြစ်ခြင်း၊ ဆက်သွားခွင့်မပေးဘဲ ပြန် လှည့်ခိုင်းခြင်းများနှင့် သွားလာခွင့် ပိတ်ပင်ထားခြင်းများကို စစ်ဆေးရေးဂိတ်များက လုပ်ဆောင်လေ့ရှိကြောင်း သိရသည်။

မောင်တောဒေသခံ တစ်ဦးဖြစ်သူ ကိုလှမောင်က ပြည်သူများ၏ လုပ်ကိုင်ခွင့်များကို ကန့်သတ်နေသည့် သဘော ရောက်နေသည်ဟု CNI သို့ ပြောသည်။

“သူတို့က တည်ငြိမ်နေတဲ့နေရာကို သူတို့က ဆူပူအောင် လုပ်သလို၊ ပြည်သူလူထုကို ထပ်ပြီးတော့ ဘာမှလုပ်ခွင့် မရှိဘူး။ ဘယ်မှသွားစရာမလိုဘူး အဲလိုမျိုး လုပ်တာလို့ မြင်တာပေါ့နော်။” ဟု ပြောသည်။

မောင်တောမြို့နယ်အတွင်း စစ်ဆေးရေးဂိတ်သို့ သတင်းပို့ လုပ်ဆောင်နေရခြင်းနှင့်ပတ်သက်ပြီး ကြိမ်ချောင်း အုပ်ချုပ်ရေးမှူးကို မေးမြန်းရာတွင် လက်ရှိ မောင်တောမြို့နယ်၏ ကျေးရွာများဘက်တွင် ယင်းသို့ ဆောင်ရွက် နေမှုများ မတွေ့ရကြောင်းနှင့် မြို့ပေါ်တွင်သာ ဖြစ်နိုင်သည်ဟု CNI သတင်းဌာနသို့ ပြောသည်။

မောင်တောမြို့နယ်မှ တောင်ပြိုသို့ သွားရာလမ်းတစ်လျှောက်တွင် ကျီးကန်းပြင် စစ်ဆေးရေးဂိတ်၊ အင်းဒင် စစ်ဆေးရေးဂိတ်နှင့် ကြိမ်ချောင်း စစ်ဆေးရေးဂိတ်အပြင် စစ်ဆေးရေးဂိတ် ၇ ခုရှိပြီး ဂိတ်တစ်ခုရောက်တိုင်း သတင်းပို့ရသည်ဟု ဒေသခံများက ပြောသည်။

လက်ရှိတွင် မောင်တောမြို့နယ်အတွင်း ညမထွက်ရအမိန့်ကို ၆ နာရီအထိ သတ်မှတ်ထားသည့်အတွက် ကုန်တင်ယာဉ်များ၊ ခရီးသည်တင်ယာဉ်များနှင့် ဒေသခံများအနေဖြင့် ည ၆ နာရီအမီ ဖြတ်သန်းသွားလာနေရကြောင်း သိရသည်။

CNI News

၂၀၂၂ ခုနှစ်၊ မေလ ၂၆

နစကနှင့် မွန်ပြည်သစ်ပါတီ (NMSP)တို့ ငြိမ်းချမ်းရေးဆွေးနွေးပွဲတွင် အချက် (၇) ချက်ကို သဘောတူ လက်မှတ် ရေးထိုးနိုင်ခဲ့ ကြောင်း မွန်ပြည်သစ်ပါတီမှ ဗဟိုအလုပ်အမှုဆောင်ကော်မတီဝင် နိုင်အောင်မငေးက CNI သတင်းဌာနသို့ ပြောသည်။

မေလ ၂၃ ရက်မှ ၂၅ ရက်နေ့အထိ နစကနှင့် မွန်ပြည်သစ်ပါတီတို့ တွေ့ဆုံ၍ ငြိမ်းချမ်းရေးလုပ်ငန်းစဉ်များကို ဆွေးနွေးခဲ့ပြီးနောက် နိုင်ငံရေးရာကိစ္စများနှင့် မွန်အမျိုးသားရေးရာကိစ္စများကို သဘောတူခဲ့ကြောင်း ၎င်းက ပြောသည်။

နိုင်အောင်မငေးက “ကျနော်တို့ ဒီနေ့ တွေ့ပြီးတော့ သဘောတူညီချက် (၇) ချက် ချမှတ်ခဲ့ပါတယ်ခင်ဗျ။ လက်မှတ် ရေးထိုးခဲ့ ပါတယ်။ အဲဒီ (၇) ချက်ကတော့ ကျနော်တို့ ဒီရဲ့ နိုင်ငံရေးရာကိစ္စတွေ ၂ ချက်နဲ့ ကျန်တဲ့ဟာက ကျနော်တို့ အမျိုးသားရေး ဆိုင်ရာ ကိစ္စတွေ ပါပါတယ်ခင်ဗျ။ နိုင်ငံရေးဆိုင်ရာတော့ ကျနော်တို့ ပါတီစုံဒီမိုကရေစီစနစ် ပိုမိုခိုင်မာလာအောင် ဘယ်လို လုပ်မလဲ။ အကောင်အထည်ဖော်မှုမှာ ပေါ့နော်။ နောက်တစ်ခုမှာက ဒီမိုကရေစီနဲ့ ဖက်ဒရယ်စနစ်ကို အခြေခံထားတဲ့ ပြည်ထောင်စုကြီးကို ဘယ်လိုတည်ဆောက်ကြမလဲ၊ ဒါကိုလည်း ဆက်လက် တည်ဆောက်သွားဖို့ ဒါကို သဘောတူထားတယ်။ နောက် ငြိမ်းချမ်းရေးနဲ့ ဖွံ့ဖြိုးရေးအတွက်တော့ ဒါကို ဆက်လက် လုပ်ဆောင် သွားမယ်လို့လည်း သဘောတူညီချက်ထဲမှာလည်း ပါဝင် ပါတယ်ခင်ဗျ။ ကျန်တဲ့ဟာတော့ အသေးစိတ်ပြောလို့ မရသေးတာ ရှိပါတယ်ခင်ဗျ” ဟု CNI သတင်းဌာနသို့ ပြောသည်။

နစက ဥက္ကဋ္ဌမှ တိုင်းရင်းသား ခေါင်းဆောင်များနှင့် ငြိမ်းချမ်းရေး တွေ့ဆုံဆွေးနွေးလိုကြောင်း ဖိတ်ခေါ်ခဲ့ပြီးနောက် မေလ ၂၀ ရက်က သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA)၊ မေလ ၂၃ ရက်က စတင်ကာ မွန်ပြည်သစ်ပါတီနှင့် တွေ့ဆုံဆွေးနွေး ခဲ့ကြသည်။

ထို့နောက် ယနေ့ (မေလ ၂၆ ရက်)တွင် ကရင်မျိုးသားအစည်းအရုံး/ကရင်မျိုးသား လွတ်မြောက်ရေး တပ်မတော်- ငြိမ်းချမ်း ရေးကောင်စီ (KNU/KNLA/PC) နှင့် စတင် ဆွေးနွေးလျက်ရှိကြောင်း သိရသည်။

အဆိုပါ ငြိမ်ချမ်းရေး ဆွေးနွေးပွဲကို ၃ ရက်ခြား တစ်ဖွဲ့နှုန်းဖြင့် တွေ့ဆုံဆွေးနွေး သွားမည်ဖြစ်ကြောင်း နစက၏ သတင်း ထုတ်ပြန်ရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်းက မေလ ၁၉ ရက်က ပြောထားသည်။

နစကနဲ့ မွန်ပြည်သစ်ပါတီ ဆွေးနွေးနေစဉ်

အနာဂတ်ပြည်ထောင်စု တည်ဆောက်ရာတွင် လုံခြုံရေးဆိုင်ရာ ပြန်လည်ပေါင်းစည်းရေးကို ဆွေးနွေးကြရန် သဘောထားရှိ ကြောင်း နိုင်အောင်မငေးက ပြောသည်။ငြိမ်းချမ်းရေး လုပ်ငန်းစဉ်တွင် တစ်ဦးတစ်ဖွဲ့ဖြင့် လုံလောက်မှု မရှိကြောင်း၊ အားလုံးပါဝင်ရန် လိုအပ်ကြောင်း၊ ပြဿနာများကို အတူတကွ ဝိုင်းဝန်း အဖြေရှာကြဖို့ လိုအပ်ကြောင်း ၎င်းက ပြောသည်။

နိုင်ငံအောင်မငေးက “ကျနော်တို့ ငြိမ်းချမ်းရေး လုပ်ငန်းစဉ်က ဆက်လက် လုပ်သွားရမှာပေါ့နော်။ ငြိမ်းချမ်းရေး လုပ်ငန်းစဉ်က ကျနော်တို့ တစ်ဦးတစ်ဖွဲ့ထဲနဲ့လည်း လုံလောက်မှု မရှိပါဘူး။ အများ ပါဝင်ပတ်သက်တဲ့သူက အများကြီး စုစုစည်းစည်းနဲ့ အတူတကွ လုပ်ဆောင်ရမှာပဲ အောင်မြင်မယ့် အခြေအနေ ရှိပါတယ်၊ ဒါကြောင့်မို့ ကျနော်တို့ တစ်ဦးတစ်ယောက်တည်းနဲ့လည်း ပြီးမယ့်ကိစ္စ မဟုတ်ဘူးဆိုတော့ ကျနော်တို့က အတူတကွ ဝိုင်းဝန်းပြီးတော့ အတူတကွ အဖြေရှာဖို့ သင့်ပါတယ်။ နည်းလမ်း ရှာဖို့ သင့်ပါတယ်လို့လည်း ကျနော်တို့ မြင်ပါတယ်။ ဒါကြောင့်မို့လို့ အတူတကွ ဆွေးနွေးသွားဖို့ပဲ လိုပါတယ် ခင်ဗျ” ဟု CNI သတင်းဌာနသို့ ပြောသည်။

နစက၏ ငြိမ်းချမ်းရေး ဆွေးနွေးပွဲသို့ RCSS/SSA၊ NMSP၊ KNU/ KNLA-PC၊ ‘ဝ’ ပြည် သွေးစည်း ညီညွတ်ရေး တပ်မတော် (UWSA)၊ အမျိုးသား ဒီမိုကရေစီ မဟာမိတ် တပ်မတော်(NDAA-မိုင်းလားအဖွဲ့)၊ ရှမ်းပြည်တိုးတက်ရေးပါတီ (SSPP/ SSA)၊ ဒီမိုကရေစီ အကျိုးပြု ကရင်တပ်မတော် (DKBA)၊ ရခိုင်ပြည် လွတ်မြောက်ရေးပါတီ (ALP)၊ ပအိုဝ်းအမျိုးသား လွတ်မြောက် ရေး အဖွဲ့ချုပ် (PNLO)၊ လားဟူဒီမိုကရက်တစ် အစည်းအရုံး(LDU)တို့ တက်ရောက်မည်ဖြစ်ကြောင်း နစက၏ သတင်းထုတ် ပြန်ရေးအဖွဲ့ ခေါင်းဆောင်က ပြောသည်။

သို့သော်လည်း ကချင်လွတ်လပ်ရေးအဖွဲ့ (KIO)၊ ကရင်အမျိုးသားအစည်းအရုံး(KNU)၊ ကရင်နီ အမျိုးသားတိုး တက်ရေးပါတီ (KNPP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)၊ မြန်မာအမျိုးသား ဒီမိုကရက်တစ် မဟာမိတ် တပ်မတော် – ကိုးကန့်တပ်ဖွဲ့ (MNDAA)၊ ပလောင်ပြည် လွတ်မြောက်ရေးတပ်ဦး (PSLF/TNLA)နှင့် ရက္ခိုင့်တပ်တော် (AA)တို့ တက်ရောက်မည် မဟုတ်ကြောင်း သိရသည်။

ထို့နောက် ချင်းအမျိုးသားတပ်ဦး (CNF)ကိုတော့ နစကဘက်က ဖိတ်ကြားထားခြင်းမရှိကြောင်း သိရသလို CNF ကလည်း တက်ရောက်မည် မဟုတ်ကြောင်း ထုတ်ပြန်ထားသည်။

CNI News

၂၀၂၂ ခုနှစ်၊ မေလ ၂၅

နိုင်ငံရေးက ဆုတ်ခွာရမည်ဆိုလျှင် တစ်ဖက်တည်းကိုပဲ ပြော၍မရဘဲ တပ်မတော် အပါအဝင် လက်နက်ကိုင်ထားသည့် တပ်ဖွဲ့ များအားလုံး နိုင်ငံရေးက ဆုတ်ခွာဖို့ လိုအပ်ကြောင်း နိုင်ငံရေး လေ့လာသုံးသပ်သူ ဦးရဲထွန်းက CNI သတင်းဌာနသို့ ပြောသည်။

တချို့သော လက်နက်ကိုင် တပ်ဖွဲ့များမှာ တပ်မတော်ကို နိုင်ငံရေးမှ ဆုတ်ခွာရန် ပြောဆိုနေကြောင်း၊ လက်နက်ကိုင် ဆောင် ထားသည့် တပ်အားလုံးကို ဆိုလိုပါက မှန်ကန်ကြောင်း ၎င်းက ပြောသည်။

ဦးရဲထွန်းက “ကျနော့် အမြင်အရကတော့ တချို့ ပြောနေကြတဲ့ တပ်က နိုင်ငံရေးက ဆုတ်ခွာရမယ်၊ နိုင်ငံရေးမှာ မပါရဘူး ဆိုတဲ့ ကိစ္စက လက်နက်ကိုင်တပ် အားလုံးကို ပြောတာဆိုရင်တော့ မှန်တယ်ဗျ၊ နောင်အနာဂတ်မှာ ကျနော်တို့က ဖက်ဒရယ် အခြေခံ ဥပဒေ ရေးဆွဲပြီးတော့ အားလုံးက လိုက်နာကြမယ်၊ အားလုံးက ဒီအတိုင်း အကောင်အထည် ဖော်ချင်တယ်ဆိုရင် ခုန တပ်တွေ အားလုံးကလည်း လက်နက်ကိုင်တပ် တစ်ခုတည်းသော လက်နက်ကိုင် ပြည်ထောင်စု တပ်မတော် ဖြစ်ရမှာပေါ့နော်၊ အဲဒီလို ပြည်ထောင်စု တပ်မတော် ဖြစ်ပြီးတော့ အားလုံးက နိုင်ငံရေးက ဆုတ်ခွာရမှာ” ဟု ပြောသည်။

လက်ရှိ မြန်မာတွင် ဖြစ်ပွားနေသည့် လက်နက်ကိုင် ပဋိပက္ခမှာ တပ်မတော်မှ နိုင်ငံရေးတွင် ပါဝင် ပတ်သက်နေ၍ ဖြစ်ပေါ်နေ သည့် ပြဿနာဖြစ်ကြောင်း ကရင်အမျိုးသားအစည်းအရုံး (KNU) မှ နိုင်ငံခြားရေးတာဝန်ခံ ပဒိုစောတောနီးက ပြောသည်။

NCA လက်မှတ်ထိုးကြစဉ်

KNU ၏ လက်အောက်ခံ တပ်ဖွဲ့ဖြစ်သည့် KNLA၊ KNDO တို့မှာ နိုင်ငံရေးတွင် ပါဝင်ပတ်သက်မှု မရှိကြောင်း ပဒိုစောတောနီး က သတင်းထောက်တစ်ဦးဖြစ်သူ Thet Htwe Naing နှင့် အင်တာဗျူးတွင် ပြောထားသည်။

ပဒိုစောတောနီးက “ကျနော်တို့ နိုင်ငံရေးဦးဆောင် အဖွဲ့အစည်း ဆိုကတည်းကိုက ကိုယ့်ရဲ့ နယ်မြေရှိလာတဲ့ အခါကြတော့ ကိုယ့်ရဲ့ အုပ်ချုပ်ရေး လုပ်ငန်းတွေ လုပ်နေရတယ်၊ အဲဒီအုပ်ချုပ်ရေး လုပ်ငန်းတွေကတော့ ကျနော်ဟာ ဌာနအနေနဲ့ လက်ရှိ မှာဆို ကျနော်တို့ ဌာန အချက် ၄ ခုထဲမှာ ကျနော်တို့ အဲဒီအချက် ၄ ခုထဲမှာ ကာကွယ်ရေးဌာနဆိုတာ အပါအဝင် ဖြစ်တယ်၊ အဲဒီ ကာကွယ်ရေးဌာန လက်အောက်မှာမှ KNLA ဆိုတဲ့ ကရင်အမျိုးသား လွတ်မြောက်ရေး တပ်မတော်ရယ်၊ နောက် KNDO ဆိုတဲ့ ကရင်အမျိုးသား ကာကွယ်ရေး အဖွဲ့အစည်းဆိုတာက အဲဒီကာကွယ်ရေးဌာန အောက်မှာပဲ ရှိတယ်။ ဆိုလိုတာက ကျနော်တို့ ကိုယ်တိုင်က လက်တွေ့ ပြသနေတဲ့ ကျနော်တို့ တပ်တွေက ကျနော်တို့ လက်နက်ကိုင် တပ်တွေဖြစ်တဲ့ KNLA နဲ့ KNDO တွေက ဘယ်လိုမှ နိုင်ငံရေးမှာ ပါဝင်ပတ်သက်တာ မရှိဘူး။ သူ့အလုပ် သူလုပ်တာပဲ။ KNU ကနေပြီးတော့ နိုင်ငံရေး မူဝါဒ ပေါ်လစီတွေ အကုန်လုံးကို ချမှတ်တဲ့ အပေါ်မှာပဲ အဲဒီ KNLA နဲ့ KNDO ကပဲ ဒါလက်တွေ့ အကောင်အထည်ဖော်ရတဲ့ အပိုင်းမှာ ရှိတယ်။ သူတို့က စစ်တပ်တွေ ဖြစ်တယ်။ စစ်တပ်ဟာ ကျနော်တို့ နိုင်ငံရေး ဦးဆောင်အဖွဲ့ရဲ့ ချမှတ်ထားတဲ့ ပေါ်လစီပဲ သူအကောင်အထည် ဖော်သွားတာပဲ ရှိတယ်။ သူတို့ လုံးဝနိုင်ငံရေးထဲမှာ ဝင်ရှုပ်လို့မရဘူး။ အဲဒါ ကျနော်တို့ ကိုယ်တိုင် တကယ့်လက်တွေ့ ကျင့်သုံးနေတဲ့ အနေအထားဖြစ်တယ်” ဟု Thet Htwe Naing နှင့် အင်တာဗျူးတွင် ပြောထားသည်။

လက်နက်ကိုင်ထားသည့် တပ်မတော်ကို နိုင်ငံရေးနှင့် မပတ်သက်ရဟု ဆိုပါက လက်နက်ကိုင်တပ်ဖွဲ့များ အနေဖြင့်လည်း နိုင်ငံရေးနှင့် မပတ်သက်နှင့်ဟု နစက သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်းက ပြန်လည် မေးခွန်း ထုတ်ထားခဲ့သည်။

CNI News
၂၀၂၂ ခုနှစ်၊ မေလ ၂၄

မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်း ဦးဆောင်သည့် ကိုယ်စားလှယ်အဖွဲ့နှင့် နစက အဖွဲ့ဝင် အမျိုးသားစည်း လုံး ညီညွတ်ရေးနှင့် ငြိမ်းချမ်းရေးေဖော်ဆောင်မှုညှိနှိုင်းရေးကော်မတီ(NSPNC)ဥက္ကဋ္ဌ ဒုဗိုလ်ချုပ်ကြီး ရာပြည့် ဦးဆောင် သော ကိုယ်စားလှယ်အဖွဲ့တို့ မေလ ၂၅ ရက် (မနက်ဖြန်)ဆက်လက် ဆွေးနွေးမည် ဖြစ်ကြောင်း သိရသည်။

ယနေ့ (မေလ ၂၄ ရက်)တွင် နိုင်အောင်မင်း ဦးဆောင်သည့် ကိုယ်စားလှယ်အဖွဲ့နှင့် ဒုဗိုလ်ချုပ်ကြီး ရာပြည့် ဦးဆောင် သော ကိုယ်စားလှယ်အဖွဲ့တို့ နေပြည်တော်မှာ ငြိမ်းချမ်းရေးနှင့်ဖွံ့ဖြိုးရေးဆိုင်ရာ ကိစ္စများကို ဆွေးနွေးခဲ့ကြသည်။

အဆိုပါ တွေ့ဆုံ ဆွေးနွေးပွဲကို နစကဘက်က နစက အဖွဲ့ဝင် NSPNC ဥက္ကဋ္ဌ ဒုဗိုလ်ချုပ်ကြီးရာပြည့်၊ ဒုဗိုလ်ချုပ် ကြီး မိုးမြင့်ထွန်း၊ NSPNC အတွင်းရေးမှူး ဒုဗိုလ်ချုပ်ကြီးမင်းနောင် တို့တက်ရောက်ခဲ့ပြီး မွန်ပြည်သစ်ပါတီ (NMSP)ဘက်ကမူ ဒုဥက္ကဋ္ဌ နိုင်အောင်မင်း၊ တွဲဖက်အထွေထွေအတွင်းရေးမှူး နိုင်ဝင်းလှ၊ ဗဟိုအလုပ်အမှုဆောင်ကော်မတီဝင် နိုင်ဗညားလယ် တို့ တက်ရောက်ခဲ့သည်။

၂၀၂၂ ခုနှစ်၊ မေလ ၂၃ ရက် ဗိုလ်ချုပ်မှူးကြီးမင်းအောင်လှိုင်နဲ့ NMSP ဒုဥက္ကဋ္ဌ နိုင်အောင်မင်း တို့တွေ့ဆုံ

ပြီးခဲ့သည့် မေလ ၂၃ ရက်ကတော့ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် NMSP ဒုဥက္ကဋ္ဌ နိုင်အောင်မင်းတို့ တွေ့ဆုံ၍ ဖက်ဒရယ်အခြေခံဥပေဒရေးဆွဲနိုင်ရေးနှင့် မွန်ပြည်နယ် ဖွဲ့စည်းပုံအခြေခံဥပဒေ ရေးဆွဲ ပြဋ္ဌာန်းနိုင်ရေး ဆွေးနွေး ခဲ့ကြသည်ဟု NMSP မှ ဗဟိုအလုပ်အမှုဆောင်ကော်မတီဝင် နိုင်အောင်မငေးက CNI သတင်းဌာနသို့ ပြောသည်။

မွန်ပြည်သစ်ပါတီ(NMSP)သည် ဦးသိန်းစိန် အစိုးရလက်ထက် ၂၀၁၂ ခုနှစ်၊ဖေဖော်ဝါရီလက ပြည်နယ်-ပြည်ထောင်စု အဆင့် ပဏာမ အပစ်အခတ်ရပ်စဲရေးစာချုပ်(Bilateral) လက်မှတ်ထိုးခဲ့ပြီး ဒေါ်အောင်ဆန်းစုကြည် အစိုးရလက်ထက် ၂၀၁၈ ခုနှစ်၊ ဖေဖော်ဝါရီ ၁၃ ရက်တွင် တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA)ထိုးခဲ့သည်။

CNI News

၂၀၂၂ ခုနှစ်၊ မေလ ၂၄

ငြိမ်းချမ်းရေး လုပ်ငန်းစဉ် ဦးဆောင်အဖွဲ့ (PPST) အစုအဖွဲ့နှင့် တွေ့ဆုံခွင့် ပြုရန် နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်ထံ တောင်းဆိုထားသော်လည်း လောလောဆယ်တွင် တွေ့ဆုံနိုင်ရေး မဖြစ်နိုင်သေးကြောင်း PPST အဖွဲ့ဝင် ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။

လက်ရှိတွင် နစက ဥက္ကဋ္ဌသည် တိုင်းရင်းသားလက်နက်ကိုင် ၁၀ ဖွဲ့အား တစ်ဖွဲ့ချင်း တွေ့ဆုံဆွေးနွေးနေကြောင်း၊ ထို ၁၀ ဖွဲ့နှင့် ဆွေးနွေးပြီးမှသာ ထပ်စဉ်းစားမည်ဖြစ်ကြောင်း၊ အဆိုပါ လက်နက်ကိုင် ၁၀ ဖွဲ့တွင် PPST အဖွဲ့ဝင် ၇ ဖွဲ့ပါဝင်ကြောင်း သိရသည်။

ဗိုလ်မှူးကြီး ခွန်ဥက္ကာက “မထူးခြားသေးဘူးဗျ သူတို့က ကျနော်တို့ကို အစုအဖွဲ့နဲ့ တွေ့ဖို့က တွေ့ဖို့ အဆင်မပြေသေးဘူးလို့ ပြောပါတယ်။ တစ်ဖွဲ့ချင်းပဲ တွေ့ပြီးတော့ အဖွဲ့တွေ အားလုံးကုန်မှ ထပ်စဉ်းစားမယ်လို့ ပြောတယ်၊ အဖွဲ့ (၁၀) အကုန်တွေ့ပြီးရင်တော့ စဉ်းစားမယ်လို့ ပြောတယ်၊ အခုကတော့ ဒီကြားထဲမှာတော့ သူတို့ တစ်ဖွဲ့ချင်း တစ်ဖွဲ့ ၂ ရက်၊ ၃ ရက်နဲ့ပဲ သွားနေ ဦးမယ်ထင်တယ်။ လကုန် သွားမယ်ထင်တယ်၊ ဇွန်လ ကုန်သွားလိမ့်မယ်”ဟု CNI သတင်းဌာနသို့ ပြောသည်။

နစက ဥက္ကဋ္ဌမှ တိုင်းရင်းသား ခေါင်းဆောင်များနှင့် ငြိမ်းချမ်းရေး တွေ့ဆုံဆွေးနွေးလိုကြောင်း ဖိတ်ခေါ်ခဲ့ပြီးနောက် မေလ ၂၀ ရက်က သျှမ်းပြည်ပြန်လည်ထူထောင်ရေးကောင်စီ/ သျှမ်းပြည်တပ်မတော် (RCSS/SSA) မှ ဥက္ကဋ္ဌ စဝ်ယွက်ဆစ်နှင့် ဗိုလ်ချုပ်မှူးကြီး မင်းအောင်လှိုင်တို့ တွေ့ဆုံဆွေးနွေးခဲ့ ကြသည်။

ဗိုလ်ချုပ်မှူးကြီးမင်းအောင်လှိုင်နဲ့ PPST ကိုယ်စားလှယ်အဖွဲ့ ၂၀၁၈ ခုနှစ်က တွေ့ဆုံစဉ်

ထို့နောက် မေလ ၂၃ ရက်က စတင်ကာ မွန်ပြည်သစ်ပါတီ (NMSP) နှင့် နစကတို့ ငြိမ်းချမ်းရေး ဆွေးနွေးလျက် ရှိကြောင်း၊ အဆိုပါ ငြိမ်ချမ်းရေး ဆွေးနွေးပွဲကို ၃ ရက်ခြား တစ်ဖွဲ့နှုန်းဖြင့် တွေ့ဆုံဆွေးနွေး သွားမည်ဖြစ်ကြောင်း နစက၏ သတင်း ထုတ်ပြန်ရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်းက မေလ ၁၉ ရက်က ပြောထားသည်။

နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် PPST အစုအဖွဲ့ကြား တွေ့ဆုံဆွေးနွေးခွင့်ရရန် ထပ်မံ တောင်းဆိုသွားမည် ဖြစ်ကြောင်း ဗိုလ်မှူးကြီး ခွန်ဥက္ကာက ပြောသည်။

ဗိုလ်မှူးကြီးခွန်ဥက္ကာက “ကျနော်တို့ကတော့ အစုအဖွဲ့တွေ့ခွင့်က ဆက်ပြီးတောင်းမှာပဲ အဆင်ပြေတဲ့ အချိန်ပေါ့ဗျာ၊ တစ်ချိန်ချိန်တော့ တွေ့ရမယ်လို့ ထင်ပါတယ်၊ သို့သော် အခု (၁၀) ဖွဲ့မှာ ၂ ဖွဲ့ပြီးပြီဆိုတော့ နောက်ထပ် ၈ ဖွဲ့ အားလုံးပြီးမှပဲ အခြေအနေ ကြည့်ရမှာပါ။ တစ်ဖွဲ့ချင်း အရေးအခင်းတွေ ပြီးပြတ်မှ ဘုံရပ်တည်ချက်တွေ တူလို့ရှိရင် အဲဒီအပေါ်မှာ ပြန်စုမယ်လို့ သတင်းတော့ ကြားပါတယ်။ အခုက မွန်ပြီးမှ ကျနော်တို့ ထပ်နားထောင်ရဦးမှာ၊ RCSS ပြီးသွားလို့ သတင်းရလာတော့ (၁၀) ဖွဲ့လုံးပြီးမှ တစ်ဖွဲ့ချင်းစီက တူတဲ့အချက်တွေရှိရင် ပြန်စုမယ်လို့တော့ ကြားတယ်ဗျ၊ ဒါပေမဲ့ မသေချာသေးပါဘူး။ အဲဒါလည်း ” ဟု ပြောသည်။

ဗိုလ်ချုပ်ကြီးယွက်စစ်နဲ့ ဗိုလ်ချုပ်မှူးကြီးမင်းအောင်လှိုင် ၂၀၂၂ ခုနှစ်၊ မေလ ၂၀ ရက်က တွေ့ဆုံစဉ်

နစက၏ ငြိမ်းချမ်းရေး ဆွေးနွေးပွဲသို့ RCSS/SSA၊ NMSP၊ ‘ဝ’ ပြည် သွေးစည်း ညီညွတ်ရေး တပ်မတော် (UWSA)၊ အမျိုးသား ဒီမိုကရေစီ မဟာမိတ် တပ်မတော်(NDAA-မိုင်းလားအဖွဲ့)၊ ရှမ်းပြည်တိုးတက်ရေးပါတီ (SSPP/ SSA)၊ ဒီမိုကရေစီ အကျိုးပြု ကရင် တပ်မတော် (DKBA)၊ ရခိုင်ပြည် လွတ်မြောက်ရေးပါတီ (ALP)၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေး တပ်မတော်- ငြိမ်းချမ်းရေးကောင်စီ (KNU/ KNLA-PC)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO)၊ လားဟူဒီမိုကရက်တစ် အစည်အရုံး(LDU)တို့ တက်ရောက်မည် ဖြစ်ကြောင်း နစက၏ သတင်းထုတ်ပြန်ရေး အဖွဲ့ ခေါင်းဆောင်က ပြောသည်။

သို့သော်လည်း ကချင်လွတ်လပ်ရေးအဖွဲ့ (KIO)၊ ကရင်အမျိုးသားအစည်းအရုံး(KNU)၊ ကရင်နီ အမျိုးသားတိုး တက်ရေးပါတီ (KNPP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး(ABSDF)၊ မြန်မာအမျိုးသား ဒီမိုကရက်တစ် မဟာမိတ် တပ်မတော် – ကိုးကန့်တပ်ဖွဲ့ (MNDAA)၊ ပလောင်ပြည် လွတ်မြောက်ရေးတပ်ဦး (PSLF/TNLA)နှင့် ရက္ခိုင့်တပ်တော် (AA)တို့ တက်ရောက်မည် မဟုတ်ကြောင်း သိရသည်။

ထို့နောက် ချင်းအမျိုးသားတပ်ဦး (CNF)ကိုတော့ နစကဘက်က ဖိတ်ကြားထားခြင်းမရှိကြောင်း သိရသလို CNF ကလည်း တက်ရောက်မည် မဟုတ်ကြောင်း ထုတ်ပြန်ထားသည်။

CNI News

၂၀၂၂ ခုနှစ်၊ မေလ ၂၄

နိုင်ငံလုံးဆိုင်ရာ ညီလာခံကို ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) မှ မေလ ၂၆ ရက်နေ့တွင် ကျင်းပသွားမည် ဖြစ်ကြောင်း သိရသည်။

ရှမ်းတိုင်းရင်းသားများ ဒီမိုကရေစီအဖွဲ့ချုပ် (SNLD) ၏ ပါတီဖွဲ့စည်းပုံ စည်းမျဉ်းအရ လည်းကောင်း၊ ၂၀၂၂ ခုနှစ်၊ ဧပြီ ၃ ရက် တွင် ပြုလုပ်သော ဗဟိုကော်မတီ အစည်းအဝေးအရ လည်းကောင်း၊ ၂၀၂၂ ခုနှစ်၊ ဧပြီလ ၂၀ ရက်တွင် ပြုလုပ်သော ဗဟို အလုပ်မှုဆောင် ကော်မတီ အစည်းအဝေးအရ လည်းကောင်း နိုင်ငံလုံးဆိုင်ရာညီလာခံကို မေလ ၂၆ ရက်မှ ၂၇ ရက်ထိ ကျင်းပ သွားမည်ဖြစ်ကြောင်း သိရသည်။

မေလ ၂၆ ရက်နေ့ နံနက် ၈ နာရီမှ ၁၁ နာရီအထိ ညီလာခံဖွင့်ပွဲ အခမ်းအနားကို ကျင်းပမည် ဖြစ်ပါကြောင်း SNLD က ပြောသည်။

SNLD ပါတီသည် ၁၉၈၈ ခုနှစ်က စတင် တည်ထောင်ခဲ့ပြီး ၁၉၉၀ အထွေထွေရွေးကောက်ပွဲ၊ ၂၀၁၅ အထွေထွေရွေးကောက်ပွဲ၊ ၂၀၂၀ အထွေထွေရွေးကောက်ပွဲများကို ဝင်ရောက်ယှဉ်ပြိုင်ခဲ့ပြီး မြန်မာနိုင်ငံ၏ တတိယ အင်အားကြီး ပါတီအဖြစ် ရပ်တည် လျက်ရှိသည်။

CNI News

၂၀၂၂ ခုနှစ်၊ မေလ ၂၄

ကရင်ပြည်နယ်အတွင်းရှိ သေ့ဘော့ဘိုး စခန်းကို တိုက်ခိုက် သိမ်းဆည်းနိုင်ခဲ့သည့် ကော်ဘရာစစ်ကြောင်းနှင့် ကရင်အမျိုး သား ကာကွယ်ရေးတပ်ဖွဲ့(KNDO) ပူးပေါင်းအဖွဲ့ကို ယနေ့ (မေလ ၂၄ ရက်)တွင် ဒေသခံများက ဂုဏ်ပြု ကြိုဆိုခဲ့ကြကြောင်း သိရသည်။

တပ်မတော်၏ သေ့ဘောဘိုးစခန်းကို ကော်ဘရာနှင့် KNDO ပူးပေါင်းအဖွဲ့က မေလ ၁၈ ရက်တွင် တိုက်ခိုက် သိမ်းဆည်းခဲ့ခြင်း ဖြစ်သည်။

ကော်ဘရာနှင့် KNDO ပူးပေါင်းအဖွဲ့ကို ကြိုဆိုနေကြ (Cobra Column)

ကော်ဘရာစစ်ကြောင်းကို ကရင်အမျိုးသားအစည်းအရုံး(KNU)၏ စစ်ရေးလက်အောက်ခံ KNLA တပ်မဟာ(၆) မှ တပ်ရင်း (၂၇) တပ်ခွဲ ၂ က ဒုခွဲမှူး ဗိုလ်ဒါဘောက ဦးဆောင်ပြီး KNDO ဘက်ကမူ ဗိုလ်စောအယ်စေးဝါး အဖွဲ့ က ဦးဆောင်ကြောင်း Salween Press တွင် ဖော်ပြထားသည်။

CNI News

၂၀၂၂ ခုနှစ်၊ မေလ ၂၃

မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်း ဦးဆောင်သည့် ကိုယ်စားလှယ်အဖွဲ့နှင့် ဗိုလ်ချုပ်မှူးကြီး မင်းအောင်လှိုင် ဦးဆောင်သော ကိုယ်စားလှယ်အဖွဲ့တို့ ယနေ့ (မေလ ၂၃ ရက်) နံနက်ပိုင်းက နေပြည်တော်မှာ တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးခဲ့ကြသည်။

အဆိုပါ တွေ့ဆုံ ဆွေးနွေးပွဲကို မွန်ပြည်သစ်ပါတီဘက်မှ ဒုဥက္ကဋ္ဌ နိုင်အောင်မင်း၊ အထွေထွေအတွင်းရေးမှူး ဦးဝင်းလှ နှင့် တခြား တစ်ဦး၊ နစကဘက်မှ နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်၊ နစက ဒုဥက္ကဋ္ဌ ဒုတိယဗိုလ်ချုပ်မှူးကြီး စိုးဝင်း၊ နစက အဖွဲ့ဝင် ဗိုလ်ချုပ်ကြီး မြထွန်းဦး၊ ဒုတိယဗိုလ်ချုပ်ကြီး ရာပြည့်နှင့် ဒုတိယဗိုလ်ချုပ်ကြီး မိုးမြင့်ထွန်းတို့ တက်ရောက်ခဲ့ကြသည်။

ထို့နောက် မေလ ၂၄ ရက်တွင် နစက အဖွဲ့ဝင် အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေး ကော်မတီ(NSPNC)ဥက္ကဋ္ဌ ဒုတိယဗိုလ်ချုပ်ကြီး ရာပြည့် ဦးဆောင်သည့် ကိုယ်စားလှယ်အဖွဲ့နှင့် NMSP ဒုဥက္ကဋ္ဌ နိုင်အောင်မင်း ဦးဆောင်သော ကိုယ်စားလှယ် အဖွဲ့တို့ ဆက်လက် ဆွေးနွေးကြမည် ဖြစ်သည်။

မွန်ပြည်သစ်ပါတီ(NMSP)သည် ၂၀၁၂ ခုနှစ်၊ ဖေဖော်ဝါရီလက ပြည်နယ်-ပြည်ထောင်စုအဆင့် ပဏာမ အပစ်အခတ်ရပ်စဲရေး (Bilatera)စာချုပ် လက်မှတ်ရေးထိုးခဲ့ပြီး ၂၀၁၈ ခုနှစ်၊ ဖေဖော်ဝါရီ ၁၃ ရက်တွင် တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ်(NCA)ထိုးထားသည့် မွန်လက်နက်ကိုင် အဖွဲ့ဖြစ်သည်။

NMSP နဲ့ နစက ကိုယ်စားလှယ်များ

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် တိုင်းရင်းသား လက်နက်ကိုင် အဖွဲ့များကို ငြိမ်းချမ်းရေး ဆွေးနွေးလို ကြောင်း၊ မိမိကိုယ်တိုင် တွေ့ဆုံ ဆွေးနွေးမည်ဖြစ်ကြောင်း၊ တစ်ဖွဲ့ချင်း ဆွေးနွေးသွားမည်ဖြစ်ကြောင်း ဧပြီ ၂၂ ရက် မိန့်ခွန်း ပြောကြား၍ ဖိတ်ခေါ်ခဲ့သည်။

ထို့နောက် ရှမ်းပြည်ပြန်လည်ထူထောင်ရေးကောင်စီ(RCSS/SSA)ဥက္ကဋ္ဌ ဗိုလ်ချုပ်ကြီး ယွက်စစ် ဦးဆောင်သည့် ကိုယ်စားလှယ် အဖွဲ့နှင့် မေလ ၂၀ ရက်နေ့က ပထမဆုံး တွေ့ဆုံခဲ့ပြီးနောက် ယခု မေလ ၂၃ ရက်တွင် မွန်ပြည်သစ်ပါတီ(NMSP)နှင့် တွေ့ဆုံ ဆွေးနွေးခြင်း ဖြစ်သည်။

အဆိုပါ ငြိမ်းချမ်းရေး ဖိတ်ခေါ် ဆွေးနွေးပွဲကို NCA ထိုးထားသည့် ဒီမိုကရေစီအကျိုးပြု ကရင်တပ်မတော် (DKBA)၊ ကရင် အမျိုးသားအစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ (KNU/KNLA-PC)၊ ပအိုဝ်း အမျိုးသား လွတ်မြောက်ရေးအဖွဲ့ချုပ်(PNLO)၊ ရခိုင်ပြည် လွတ်မြောက်ရေးပါတီ(ALP)၊ လားဟူဒီမိုကရက်တစ် အစည်းအရုံး (LDU) အပါအဝင် NCA မထိုးရသေးသည့် “ဝ”ပြည်သွေးစည်းညီညွတ်ရေး တပ်မတော်(UWSA)၊ အမျိုးသားဒီမိုကရေစီ မဟာမိတ် တပ်မတော်(NDAA-မိုင်းလားအဖွဲ့)၊ ရှမ်းပြည်တိုးတက်ရေး ပါတီ(SSPP)တို့လည်း တက်ရောက် ကြမည် ဖြစ်သည်။

CNI News

၂၀၂၂ ခုနှစ်၊ မေလ ၂၃

အမျိုးသားညီညွတ်ရေး အတိုင်ပင်ခံကောင်စီ (NUCC)ကနေ အမျိုးသားဒီမိုကရေစီအဖွဲ့ချုပ်(NLD)နုတ်ထွက်၍ မိတ်ဖက် ဆက်ဆံရေးအဖြစ်သာ ရပ်တည်မည်ဆိုသည်မှာ လုံးဝ မဖြစ်နိုင်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင် က CNI သတင်းဌာနသို့ ပြောသည်။

NLD အနေဖြင့် NUCC တွင် ကိုယ်စားပြုမှု မပါဝင်ဘဲ မိတ်ဖက် ဆက်ဆံရေးအဖြစ်သာ ရပ်တည်တော့မည် ဖြစ်ကြောင်း သတင်းဌာနအချို့တွင် ရေးသားဖော်ပြထားသည်။

ဦးသန်းစိုးနိုင်က “အဲဒါက ကျနော့်အမြင်နဲ့ ပြောရလို့ရှိရင် မဖြစ်နိုင်တဲ့ ကိစ္စပါ၊ အဲဒါကြောင့် အလားအလာ အကြောင်းတော့ ကျနော် ထပ်ပြီး မပြောတော့ပါဘူး။ ခြုံပြီးတော့ ပြောရလို့ရှိရင်တော့ NLD ပါတီအနေနဲ့ ဒီလိုလည်း လုပ်မှာ မဟုတ်ဘူး။ ဒီလို လည်း ဆုံးဖြတ်မယ် မထင်ဘူး။ NUG ဆိုတဲ့ ကိစ္စ၊ နောက် CRPH အဲဒီကိစ္စတွေ အားလုံးက NLD ပါတီကို အခြေပြုလို့ ပေါ် ပေါက်လာတာ ဖြစ်တဲ့အတွက် NLD ပါတီ NUG ကနေပြီး ခွဲထွက်ဖို့ ဆိုတဲ့ကိစ္စ၊ အမျိုးသားကောင်စီက NUCC ကနေ ခွဲထွက်ဖို့ ကိစ္စဟာ လုံးဝ မဖြစ်နိုင်ပါဘူး။ ဒါကြောင့် အဲဒီ အလားအလာနဲ့ ပတ်သက်ပြီး ကျနော်အနေနဲ့ သဘောထား ပြောစရာ သိပ်မရှိ ပါဘူး။ နွေဦးတော်လှန်ရေးနဲ့အတူ NLD ပါတီဟာ အတူ တည်ရှိနေမယ်လို့ ကျနော်ကတော့ ယုံကြည်ပါတယ်” ဟု ပြောသည်။

၂၀၂၂ ခုနှစ်က ကျင်းပခဲ့သည့် ပထမအကြိမ် ပြည်သူ့ညီလာအပြီး NUCC မှ ကျင်းပသည့် အစည်းအဝေးများကို NLD ပါတီအနေ ဖြင့် တက်ရောက်ခြင်း မရှိတော့ကြောင်း MPA သတင်းဌာနက ရေးသား ဖော်ပြထားသည်။

NUCC အစည်းအဝေးတစ်ခု ကျင်းပနေစဉ်

NUCC မှ အဖွဲ့ဝင်ဖြစ်သည့် ကရင်အမျိုးသားအစည်းအရုံး (KNU) အနေဖြင့်လည်း အဆိုပါ ကိစ္စနှင့် ပတ်သက်၍ မသိရှိရသေး ကြောင်း၊ သတင်းအရ ကြားသိရကြောင်း KNU မှ နိုင်ငံခြားရေးတာဝန်ခံ ပဒိုစောတောနီးက CNI သတင်းဌာနသို့ ပြောသည်။

ပဒိုစောတောနီးက “အဲဒါလည်း ကျနော်လည်း အသေအချာပြောလို့ မရသေးဘူး။ Sorry ပါနော်။ အဲဒါလည်း ကျနော်တို့လည်း သတင်းအရ ကြည့်နေရတာပဲ ရှိသေးတယ်။ ဒါပေမဲ့ ကျနော်လည်း ကောင်စီဝင်ထဲမှာ မပါတော့ အကုန်လုံးကလည်း မရလိုက် ဘူးလေနော်” ဟု ပြောသည်။

အခြားတစ်ဖက်တွင်လည်း ကချင်လွတ်လပ်ရေးတပ်မတော် (KIA) မှ ဗိုလ်ချုပ်ဂွမ်မော် ဦးဆောင်သည့် (KPICT) အနေဖြင့် လည်း NUCC တွင် ကိုယ်စားလှယ် တက်ရောက်ခြင်း မရှိတော့သည်မှာ အချိန်ကာလ တစ်ခုထိရှိခဲ့ပြီး ဖြစ်ကြောင်း MPA သတင်းဌာနက ရေးသားထားသည်။

သို့သော် NLD နှင့် KPICT တို့ NUCC မှာ ကိုယ်စားပြုမှု မရှိတော့ခြင်းနှင့်ပတ်သက်ပြီး CNI အနေဖြင့် သီးခြား အတည်ပြုနိုင် ခြင်း မရှိသေးပေ။
CRPH၊ NUG၊ NUCC စသည့် အဖွဲ့အစည်းများမှာ ၂၀၂၀ အထွေထွေရွေးကောက်ပွဲတွင် အနိုင်ရခဲသည့် NLD ပါတီမှ ကိုယ်စား လှယ်များကို အခြေပြု ဖွဲ့စည်းထားခြင်း ဖြစ်ကြောင်း၊ ထို့ကြောင့် ယခုကိစ္စများသည် သွေးခွဲမှုသာ ဖြစ်ကြောင်း ဦးသန်းစိုးနိုင် က ပြောသည်။

ရွေးကောက်ပွဲကာလ NLD ပါတီစည်းရုံးရေး (judithbluepool)

ဦးသန်းစိုးနိုင်က “အဲဒီ သဘောထား ဖော်ပြချက်က မမှန်ဘူးလို့ ကျနော်က ပြောချင်ပါတယ်၊ သူက မိတ်ဖက် အဖွဲ့အစည်း မဟုတ်ပါဘူး။ NLD ပါတီ ရွေးကောက်ခံ ကိုယ်စားလှယ်တွေကို အကြောင်းပြုပြီး ပေါ်ပေါက်လာတဲ့ NUG ဟာ နောက်ပြီးတော့ CRPH ဟာ၊ နောက်ပြီးတော့ NUCC အဲဒါတွေ အားလုံးဟာ ကျနော်တို့ ၂၀၂၀ ရွေးကောက်ပွဲမှာ အနိုင်ရတဲ့ ကိုယ်စားလှယ်တွေ ကို အခြေပြုပြီး ဖွဲ့စည်းထားတဲ့ အဖွဲ့အစည်းပါ၊ ဒါကြောင့်မို့လို့ NLD ပါတီနဲ့ မိတ်ဖက် အဖွဲ့အစည်း ဘာညာဆိုတဲ့ ကိစ္စတွေဟာ ဒါက သွေးခွဲသပ်လျှိုတဲ့ သဘောထားတွေ ထုတ်လွှင့်တာလို့ ကျနော်တော့ ယူဆပါတယ်” ဟု ပြောသည်။

အမျိုးသားညီညွတ်ရေး အတိုင်ပင်ခံကောင်စီ (NUCC) ကို ဖက်ဒရယ်ဒီမိုကရေစီပဋိညာဉ်ကို အခြေခံ၍ အဖွဲ့အစည်း (၃၃) ဖွဲ့ ဖြင့် ဖွဲ့စည်းခဲ့ကြောင်း၊ ထိုအထဲတွင် တိုင်းရင်းသား လက်နက်ကိုင် အဖွဲ့အစည်း (၈) ဖွဲ့မှ မတူညီသည့် ပုံစံတွင် ပါဝင်နေ ကြောင်း ၂၀၂၁ ခုနှစ်၊ နိုဝင်ဘာလအတွင်းက ပြုလုပ်သည့် NUCC ၏ သတင်းစာ ရှင်းလင်းပွဲတွင် ပြောကြားထားသည်။