CNI News

၂၀၂၂ ခုနှစ်၊ သြဂုတ် ၁၀

မြန်မာနိုင်ငံအလယ်ပိုင်း ဒေသများတွင် စစ်ဖြစ်နေခြင်းကြောင့် စိုက်ပျိုးရေး လုပ်ငန်းများ အရင်နှစ်ကလို မလုပ်နိုင်၍ ဆန်ရေ စပါးပြတ်လပ်နိုင်သည့်အတွက် ဆန်နှင့် အခြား သီးနှံများ စိုက်ပျိုးထုတ်လုပ်ခြင်းများ အားသွန်ခွန်စိုက် စိုက်ပျိုးကြရန် ကချင် လွတ်လပ်ရေးအဖွဲ့(KIO)ဥက္ကဋ္ဌ ဗိုလ်ချုပ်ကြီး အင်ဘန်လက ပြောသည်။

KIO/KIA ဌာချုပ် လိုင်ဇာမြို့မှာ သြဂုတ် ၁၀ ရက်က ကျင်းပသည့် ၄၇ နှစ်မြောက် ကချင်အာဇာနည်နေ့ ၎င်းက အထက်ပါ အတိုင်းပြောကြားခဲ့ခြင်း ဖြစ်သည်။

ဗိုလ်ချုပ်ကြီးအင်ဘန်လက "စစ်ဖြစ်ပွားရာဒေသဖြစ်သော မြန်မာနိုင်ငံအလယ်ပိုင်းတွင် အရင်နှစ်တွေလို စိုက်ပျိုးရေး လုပ်ငန်း များကို ထိထိရောက် ရောက် လုပ်ကိုင်နိုင်ခြင်း မရှိတော့တာကြောင့် လာမယ့် နှစ်များတွင် မြန်မာနိုင်ငံ၌ အစားအစာ ငတ်မွတ် ခြင်းများ ကြုံတွေ့ လာနိုင်သောကြောင့် မိမိဒေသ ကျေးရွာများတွင် ဆန်နှင့် အခြားသီးနှံများ စိုက်ပျိုးထုတ်လုပ်ခြင်းများကို စိုက်ပျိုးကြရန် အလေးအနက် တိုက်တွန်းအပ်ပါသည်။ ဆန်နှင့် အစားအသောက်များကို ချွေတာကြရန်လည်း အရေးကြီးပြီ” ဟု ပြောသည်။

ဗိုလ်ချုပ်ကြီး အင်ဘန်လသည် ကချင်ဘာသာစကားဖြင့် ပြောကြားခြင်းဖြစ်ပြီး မိန့်ခွန်းစာရွက်ပါ ပြောစကား တချို့ကို Simsa Kasa Multimedia က ပြန်လည် ရေးသားဖော်ပြထားခဲ့သည်။

KIA စစ်ဦးစီးချုပ် ဗိုလ်ချုပ်ကြီး ဂမ်ရှောင် (Simsa Kasa Multimedia)

လက်ရှိ မြန်မာနိုင်ငံတွင် စစ်ကိုင်းတိုင်းဒေသကြီး၊ မကွေးတိုင်းဒေသကြီး၊ ချင်းပြည်နယ်၊ ကရင်ပြည်နယ်၊ ကယားပြည်နယ် တို့တွင် တိုက်ပွဲများ မြန်မာ့တပ်မတော်နှင့် ဒေသကာကွယ်ရေးတပ်ဖွဲ့(LPDF)၊ ဒေသတွင်း တိုင်းရင်းသား လက်နက်ကိုင်အဖွဲ့ တို့ကြား တိုက်ပွဲများ ဖြစ်ပွားနေသည်။

ထို့ကြောင့် စိုက်ပျိုးရေး လုပ်ငန်းများ ဆောင်ရွက်ရန် အခက်အခဲဖြစ်နေခြင်းကြောင့် ဆန်စပါး အထွက်နှုန်းများ လျော့နည်း လာလျက်ရှိသည်။ တခြားသော ရခိုင်ပြည်နယ်နှင့် ဧရာဝတီတိုင်းဒေသကြီးတို့တွင် တိုက်ပွဲဖြစ်ပွားခြင်းမရှိသော်လည်း သွင်းအားစုစရိတ် (ဓာတ်မြေသြဇာ၊ စက်သုံးဆီ၊ ပိုးသတ်ဆေး)များ ဈေးကြီးနေခြင်းနှင့် စိုက်ပျိုးရေ မရရှိခြင်းတို့ကြောင့် လယ်စိုက်ဧကများ လျော့နည်းလားပြီး စပါးအထွက်နှုန်းလျော့နည်းမည်ဟု တောင်သူလယ်သမားများက ပြောသည်။

ဆန်စပါး အထွက်နှုန်းများ တိုးပွားလာရေးနှင့် စိုက်ပျိုးရေးလုပ်ငန်းများ အဆင်ပြေစွာ လုပ်ကိုင်နိုင်ရေးအတွက် နစက-က ကျပ် ဘီလီယံ ၄၀၀ ကို မတည်၍ ဓာတ်မြေသြဇာ၊ ပိုးသတ်ဆေး၊ စက်သုံးဆီ၊ စိုက်ပျိုးရေ စသည့် လိုအပ်ချက်များကို ဖြည့်စီးပေး သွားမည်ဟု နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က သြဂုတ် ၈ ရက်မှ ၁၀ ရက်အထိ ကျင်းပခဲ့သော အစည်းအဝေးမှာ ပြောကြားခဲ့သည်။

CNI News

၂၀၂၂ ခုနှစ်၊ သြဂုတ် ၁၀

မိမိတို့ခေါင်းဆောင်ကြီး စောဘဦး ချမှတ်ခဲ့သည့် ကရင့်ကံကြမ္မာ ကရင်ဖန်တီးရမည် ဆိုပါ အချက် အပါအဝင် မှာကြားချက် ၄ ချက်ကို မရောက်မခြင်း ဆက်လက်ဆောင်ရွက်သွားရမည်ဟု ကရင်အမျိုးသားလွတ်မြောက်ရေးတပ်မတော်(KNLA)က ယနေ့ ထုတ်ပြန် ပြောကြားခဲ့သည်။

သြဂုတ် ၁၂ ရက်နေ့တွင် ကျရောက်မည့် ၇၂ နှစ်မြောက် ကရင်အမျိုးသား အာဇာနည်နေ့ အထိမ်းအမှတ် အခမ်းအနားသို့ ပေးပို့သော သဝဏ်လွှာမှာ ဖော်ပြထားသည်။

စောဘဦးက လက်နက်ချစကား အလျင်းမပြောရ၊ ကရင့်လက်နက် ကရင့်လက်ထဲရှိရမည်၊ ကရင်ပြည် အသိအမှတ်ပြုမှု ပြီးပြည့်စုံရမည်၊ ကရင့်ကံကြမ္မာ ကရင်ဖန်တီးရမည် စသည့် အချက် ၄ ချက်ကို မှာကြားခဲ့ကြောင်း KNLA က ထုတ်ပြန် ခဲ့သည်။

ထို့နောက် ရန်သူက ၎င်း၏ ဆန္ဒဖြင့် ပေးခြင်း၊ စစ်ရေးဖြင့် တိုက်ခိုက်ချေမှုန်းခြင်း၊ ပတ်ဝန်းကျင် အခြေအနေ အဘက်ဘက် က တွန်းပို့ပေးခြင်းဖြင့် နိုင်ငံရနိုင်သည် စသည့် လမ်းကြောင်းများကိုလည်း ချမှတ်ခဲ့သည်။

 စောဘဦးကြီး ရုပ်တု (KIC)

KNLA က “ ကရင်တော်လှန်ရေးသည်လည်း နှစ်ပေါင်း ၇၃ နှစ်တိုင်ရောက်ရှိခဲ့ပြီးဖြစ်ပါသည်။ ကျနော်တို့ခေါင်းဆောင် စောဘဦးကြီးနှင့်တကွ အာဇာနည်ပီပီ အသက်စွန့်ပေးလှူသွားကြတဲ့ ခေါင်းဆောင်များ၊ ရဲဘော်များ၊ ပြည်သူများရဲ့ ခရီး လမ်းဟာ မဆုံးသေးသလို ကျနော်တို့ ပုခုံးပေါ်နှင့်လက်ထဲမှာ ကျရောက်လာသည့် တာဝန်တွေကို လက်ဆင့်ကမ်း သမိုင်း ပေး တာဝန်အဖြစ် အနှစ် ၇၀ ကျော်တိုင် အနိုင်မခံ အရှုံးမပေးဘဲ ကျွနှ်ပ်တို့ ဆက်လက် တိုက်ပွဲဝင်နေဆဲပဲ ဖြစ်ပါသည်။ အာဇာနည် အဖြစ် အသိအမှတ်ပြုခြင်း မခံခဲ့ရသော်လည်း မိမိတို့ ကရင့်တော်လှန်ရေးတွင် အသက်ပေး စွန့်လွတ်ခဲ့ရသော ခေါင်းဆောင် များ၊ ရဲဘော်များနှင့် ပြည်သူလူထုများသည်လည်း ထောင်သောင်းမက ရှိခဲ့ပြီ ဖြစ်သည်။ ရှေ့ဆက်ပြီးလည်း မပြီးဆုံးသေးသည့် သမိုင်းပေး တာဝန်များကိုလည်း ဆ်ကလက်ထမ်းရွက်ဖို့ အသိပေး တိုက်တွန်းလိုပါသည်”ဟု ပြောသည်။

ထို့နောက် ခေါင်းဆောင်များ၊ ရဲဘော်များနှင့် ပြည်သူလူထု အပေါင်းတို့ မိမိတို့အသီးသီး ကိုယ်စီကိုယ်ငှ ထမ်းရွက်ရမည့် တာဝန်များ ရှိထားသည့်အလျောက် အထက်တာဝန်ရှိ ခေါင်းဆောင်များ၏ အစီအစဉ်၊ ညွှန်ကြားချက်များကို စောင့်ကြည့် နားထောင်ပြီး ဥက္ကဋ္ဌ စောဘဦးကြီးနှင့်တကွ ခေါင်းဆောင် အဆက်ဆက် လက်ဆင့်ကမ်း ချပေးထားခဲ့သည့် မိမိတို့၏ လမ်းစဉ်၊ လုပ်ငန်းစဉ်များအပေါ်မှာ မားမားမတ်မတ် ရပ်တည်ကြရန် ထပ်မံတိုက်တွန်း နိုးဆော်ပါသည်ဟု KNLA ၏ သဝဏ်လွှာ ထဲမှာ ဖော်ပြထားသည်။

ကရင့်တော်လှန်ရေးသည် ၁၉၄၉ ခုနှစ်တွင် စတင်ခဲ့ခြင်း ဖြစ်ပြီး လက်ရှိ ကရင်အမျိုးသားအစည်းအရုံး(KNU)၏ ဥက္ကဋ္ဌမှာ ဗိုလ်ချုပ်ကြီး စောမူတူးစေးဖိုးဖြစ်သည်။

လက်ရှိတွင် KNU ၏ စစ်ရေးလက်အောက်ခံမှာ ကရင်အမျိုးသားလွတ်မြောက်ရေးတပ်မတော်(KNLA)၊ ကရင်အမျိုးသား ကာကွယ်ရေး တပ်ဖွဲ့(KNDO)တို့ရှိကြသည်။

ထို့နောက် အစိုးရနှင့်တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်(NCA)ကို ၂၀၁၅ ခုနှစ်၊ အောက်တိုဘာ ၁၅ ရက်က တခြားသော လက်နက်ကိုင်များနှင့်အတူ လက်မှတ်ရေးထိုးထားသည်။

CNI News

၂၀၂၂ ခုနှစ်၊ ဩဂုတ် ၁၀

ကချင်တော်လှန်ရေး အင်အားစုများနှင့် လက်တွဲကာ စစ်အာဏာရှင်စနစ်ကို ဖြုတ်ချပြီး ဖက်ဒရယ် ဒီမိုကရေစီ ပြည်ထောင်စု ကို တည်ဆောက် သွားမည်ဖြစ်ကြောင်း အမျိုးသားညီညွတ်ရေးအစိုးရ (NUG) မှ ပြောသည်။

ထို့အတူ ကချင်လူမျိုးများ အပါအဝင် မြန်မာနိုင်ငံ တိုင်းရင်းသားအားလုံး လိုလားသည့် ဖက်ဒရယ်ဒီမိုကရေစီ ပြည်ထောင်စုကို တည်ဆောက်သွားရန် သန္နိဋ္ဌာန်ချထားကြောင်း ဩဂုတ် ၁၀ ရက်နေ့က ကချင်အာဇာနည်နေ့ ပေးပို့သည့် သဝဏ်လွှာတွင် ဖော်ပြထားသည်။

နိုင်ငံရေးအရ KIO နှင့် NUG တို့ မည်သည့် အတိုင်းအတာအထိ လက်တွဲမည်ဆိုသည်ကို မသိရှိရသေးကြောင်း၊ လက်ရှိ အနေ အထားအရ အကောင်အထည် ဖော်ခြင်းမျိုး မတွေ့ရသေးကြောင်း KIA မှ ပြန်ကြားရေးတာဝန်ခံ ဗိုလ်မှူးကြီးနော်ဘူက CNI သို့ ပြောသည်။

 NUG ကာကွယ်ရေး၀န်ကြီး ဦးရည်မွန်နဲ့ PDF များ (NUG-fb)

ဗိုလ်မှူးကြီးနော်ဘူက “နိုင်ငံရေးနဲ့ ပတ်သက်လို့ ကျနော်တို့ KIO ဘယ်လောက်အထိ ဘယ်လို လက်တွဲမယ်ဆိုတာတော့ KIO ဗဟိုကော်မတီကနေပဲ ဆုံးဖြတ်မှာ ဖြစ်ပါတယ်။ အခုလောလောဆယ် ကျနော်တို့ KIO ဗဟိုကော်မတီ KIO အနေနဲ့ NUG နဲ့ လက်တွေ့ အကောင်အထည်‌ ဖော်တာမျိုးကတော့ မတွေ့ရသေးပါဘူး။ သူတို့နဲ့ ဆွေးနွေးတာ KPICT ပေါ့နော်။ အဲဒါတွေတော့ ရှိပါတယ်။ ဒါပေမဲ့ တစ်ခုရှိတာကတော့ ကျနော်တို့ KIO လည်း စစ်အာဏာရှင်စနစ် ချုပ်ငြိမ်းဖို့ ရည်မှန်းချက်တွေ ရှိပါတယ်။ NUG ကလည်း ဒီစစ်အာဏာရှင်စနစ် ချုပ်ငြိမ်းဖို့ သူတို့က ရည်မှန်းချက်တွေ ရှိပါတယ်။ အဲဒါကို သိရပါတယ်။ ရည်မှန်းချက် တူညီတဲ့ အပိုင်းဖက်မှာကတော့ လက်တွဲပြီးမှ လုပ်လို့ရမယ်လို့ ကျနော်ထင်ပါတယ်။ ကျ‌နော်တို့ KIO ရဲ့ ဆုံးဖြတ်ချက်တွေ သဘောထား ထုတ်ပြန်တာတွေ အခုထက်ထိ ဘာမှမရှိပါဘူး၊ အဲဒါတစ်ပိုင်းကတော့ ဒါပေမဲ့ ခုနက ပြောသလို စစ်အာဏာရှင် ဖြုတ်ချတဲ့ ရည်မှန်းချက်ကတော့ တူညီမှု ရှိတယ်ဆိုတာကို ကျ‌နော်ပြောလိုတာ ဖြစ်ပါတယ်” ဟု ပြောသည်။

သို့သော်လည်း အမျိုးသားညီညွတ်ရေး အတိုင်ပင်ခံကောင်စီ (NUCC)၏ အမြဲတမ်း အဖွဲ့ဝင်အဖြစ် ကချင်နိုင်ငံရေးကြားကာလ ညှိနှိုင်းရေးအဖွဲ့ (KPICT) မှ ဇူလိုင်လ အစောပိုင်းက နုတ်ထွက်ခဲ့သည်။

NUG ဦးဆောင်သည့် နွေဦးတော်လှန်ရေး အရှိန်မြင့်တင်ရန် တိုင်းရင်းသား လက်နက်ကိုင် အဖွဲ့အစည်းများနှင့် ပူးပေါင်း ဆောင်ရွက်မှု မြင့်တင်နိုင်မှ နွေဦးတော်လှန်ရေးမှာ အောင်ပွဲခံမည့် သဘောရှိသည့်အတွက် စာတမ်းပေးပို့သည်ဟု ယူဆ ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သို့ ပြောသည်။

KPICT နှင့် CRPH တွေ့ဆုံစဉ် (CRPH)

ဦးသန်းစိုးနိုင်က “NUG နဲ့ KIA တို့ ပူးပေါင်း ဆောင်ရွက်သွားကြဖို့ လိုအပ်ချက်ကို ကျနော်တို့ ‌ထောက်ပြပြီးတော့ သူတို့ရဲ့ အဖွဲ့ အစည်း လှုပ်ရှားမှုတွေကို ထောက်ခံတဲ့ သဘောပါပဲ။ အဲဒီကာလ အဲဒီဟာက KIA နဲ့ တင်မကပါဘူး။ ကျနော်တို့ ကရင်နီရော၊ ကျနော်တို့ CNF တို့လို ချင်းတွေ‌ရော၊ KNU အဖွဲ့အစည်းတွေရော သူတို့ရဲ့ အရေးကြီးတဲ့ လှုပ်ရှားမှုတွေ၊ အခမ်းအနားတွေမှာ ကျင်းပနေတဲ့ ကိစ္စတွေမှာ ထောက်ခံပြီးတော့ တောင်းဆိုတာ ဖြစ်တယ်လို့ ကျနော့်အနေနဲ့ ယူဆပါတယ်။ အဲဒီလို တိုင်းရင်း သား EAO အဖွဲ့အစည်းတွေနဲ့ ပူးပေါင်းဆောင်ရွက်မှု အရှိန်အဟုန်ကို မြင့်တင်နိုင်မှလည်း ဒီ NUG ဦးဆောင်တဲ့ နွေဦး တော်လှန်ရေးဟာ အလျင်အမြန် အောင်ပွဲခံမယ့် သဘောရှိတဲ့အတွက် တာဝန်သိစွာ စာတမ်းပေးပို့တယ်လို့ ကျနော့်အနေနဲ့ ယူဆပါတယ်” ဟု ပြောသည်။

လက်ရှိတွင် KIA အနေဖြင့် ဒေသကာကွယ်ရေးတပ် (PDF) များနှင့် ပူးပေါင်းကာ စစ်ကိုင်းတိုင်း ဒေသကြီးအတွင်းရှိ ကသာ၊ ပင်လည်ဘူး၊ ဗန်းမောက်၊ ကောလင်းနှင့် ကချင်ပြည်နယ်အတွင်းက အင်းတော်ကြီးဒေသ၊ ဖားကန့်တို့တွင် တပ်မတော်နှင့် တိုက်ပွဲများ ဖြစ်ပွားလျှက်ရှိသည်။

CNI News

၂၀၂၂ ခုနှစ်၊ သြဂုတ် ၉

တော်လှန်ရေးအဆုံးသတ် အမြစ်ဖြတ်တိုက်ပွဲများ ဆင်နွှဲနိုင်ဖို့ မိမိတို့မှာ ဘဏ္ဍာငွေလိုအပ်သည်မှာ အမှန်ပဲ ဖြစ်ကြောင်း အမျိုးသားညီညွတ်ရေးအစိုးရ(NUG)၏ ဝန်ကြီးချုပ် မန်းဝင်းခိုင်သန်းက ပြောသည်။

NUG ၏ ၆၃ ကြိမ်မြောက် အစည်းအဝေးကို သြဂုတ် ၉ ရက်နေ့ နံနက် ၁၀ နာရီက ကျင်းပခဲ့စဉ် ၎င်းက အထက်ပါ အတိုင်း ပြောကြားခဲ့ခြင်း ဖြစ်သည်။

NUG ၏ ဝန်ကြီးချုပ် မန်းဝင်းခိုင်သန်းက “တော်လှန်ရေးအဆုံးသတ် အမြစ်ဖြတ်တိုက်ပွဲတွေ ဆင်နွှဲနိုင်ဖို့တော့ ကျနော်တို့ မှာ ဘဏ္ဍာငွေလိုအပ်တာ အမှန်ပဲ ဖြစ်ပါတယ်။ ပြီးခဲ့တဲ့ ဘဏ္ဍာရေးကော်မရှင် အစည်းအဝေးမှာ ကျနော် ပြောခဲ့သလိုပဲ ကျနော်တို့ အစိုးရဟာ တော်လှန်ရေးအစိုးရတစ်ရပ် ဖြစ်တာကြောင့် ဘဏ္ဍာငွေတွေ စီမံခန့်ခွဲသုံးစွဲရတာ အင်မတန် အခက်အခဲ ရှိပါတယ်။ ဘဏ္ဍာငွေ ရှာဖွေမှု အပိုင်းမှာလည်း ပုံမှန်ကာလ အစိုးရတွေလို အခွန်ဘဏ္ဍာတွေက ပုံမှန်ရရှိ နေတာမျိုး မဟုတ်ဘဲ မြန်မာ နိုင်ငံတွင်းက ပြည်သူတွေနဲ့ ကမ္ဘာအနှံ့က မြန်မာ ပြည်သူပြည်သားတွေ အခက်အခဲကြားက တော်လှန် ရေးအပေါ် ယုံယုံကြည် ကြည် စိတ်ဓာတ်ပြင်းပြစွာနဲ့ လှူဒါန်းပေးနေကြတဲ့ ပြည်သူ့လှူဒါန်းငွေ အဓိကနဲ့ ရုန်းကန် လှုပ်ရှားနေ ကြရတာ ဖြစ်ပါတယ်” ဟု ပြောသည်။

 ၂၀၂၂ ခုနှစ်၊ သြဂုတ် ၉ ရက် ကျင်းပသည့် NUG အစည်းအဝေး

ထို့နောက် စီမံကိန်း၊ ဘဏ္ဍာရေးနှင့် ရင်းနှီးမြှုပ်နှံမှုဝန်ကြီးဌာနက နည်းလမ်းမျိုးစုံ၊ ခေါင်းစဉ်မျိုးစုံနှင့် ရံပုံငွေ ရှာဖွေရေး နည်းလမ်းများကို စဉ်းစားကြိုးပမ်း ဆောင်ရွက်ပေးနေတာကြောင့်လည်း ယနေ့ (၁) နှစ်ခွဲ ကာလအထိ တော်လှန်ရေးကို အရှိန်ပြင်းပြင်းနှင့် ရှေ့ဆက်နေနိုင်ကြခြင်း ဖြစ်သည်ဟု ၎င်းက ပြောသည်။

NUG ၏ ဝန်ကြီးချုပ် မန်းဝင်းခိုင်သန်းက “အခုချိန်ထိ ကိုယ့်အားကိုယ်ကိုးပြီး ရုန်းကန်လှုပ်ရှားရင်း အောင်ပွဲတွေ ရရှိနေတာ မို့ ဂုဏ်ယူစရာလည်း ဖြစ်ပါတယ်။ ရှေ့ဆက် လုပ်ဆောင်ရမှာတွေကလည်း ပိုမိုများပြားလာတာမို့ ဘဏ္ဍာငွေ လိုအပ်မှုတွေ လည်း ပိုများလာမှာ အမှန်ပဲ ဖြစ်ပါတယ်။ ရရှိလာတဲ့ ဘဏ္ဍာငွေတွေကိုလည်း စနစ်တကျ ထိထိရောက်ရောက် စီမံခန့်ခွဲကြ ဖို့လည်း အင်မတန် အရေးကြီးပါတယ်။ အုပ်ချုပ်ရေး အကောင်အထည် ဖော်နေတဲ့ ဒေသတွေ ဘက်မှာဆိုရင်လည်း အုပ်ချုပ် ရေး လုပ်ငန်းတွေ လည်ပတ်နိုင်ဖို့ ကြိုးစားလေလေ လိုအပ်ချက်တွေက ပိုရှိလေလေဖြစ်မှာပါ”ဟု ပြောသည်။

NUG သည် နစကကို ဖြုတ်ချနိုင်ရေးအတွက် ပြည်သူ့ကာကွယ်ရေးတပ်ဖွဲ့(PDF)ကို ဖွဲ့စည်း၍ လက်နက်ကိုင် တိုက်ခိုက် လျက်ရှိရာ ယခုဆိုလျှင် ၁ နှစ်နှင့် ၆ လ (၁၈ လ)ကြာခဲ့ပြီ ဖြစ်သည်။

လက်ရှိတွင် နစက၏ လက်အောက်ခံ တပ်မတော်နှင့် NUG ၏ လက်အောက်ခံ PDF များ၊ ဒေသခံကာကွယ်ရေးတပ်ဖွဲ့( LPDF)၊ တိုင်းရင်းသားလက်နက်ကိုင်(EAOs)များကြား လက်နက်ကိုင် ပဋိပက္ခများသည် စစ်ကိုင်းတိုင်းဒေသကြီး၊ မကွေး တိုင်းဒေသကြီး၊ ချင်းပြည်နယ်၊ ကရင်ပြည်နယ်၊ ကယားပြည်နယ် တို့မှာ ဖြစ်ပွားနေသည်။

CNI News

၂၀၂၂ ခုနှစ်၊ ဩဂုတ် ၉

နစကနှင့် တိုင်းရင်းသား လက်နက်ကိုင် အဖွဲ့အစည်းအချို့ ငြိမ်းချမ်းရေးဆွေးနွေးပွဲကို ယခု ဩဂုတ်လတွင် ပြုလုပ်နိုင်ခြေ မရှိကြောင်း တိုင်းရင်းသား လက်နက်ကိုင် ခေါင်းဆောင်တစ်ဦးဖြစ်သူ ဗိုလ်မှူးကြီး ခွန်ဥက္ကာက CNI သို့ ပြောသည်။

ကိုဂျင်မီ၊ ကိုဖြိုးဇေယျာသော် အပါအဝင် လေးဦးကို သေဒဏ်စီရင်ပြီးနောက် လူထုဆန့်ကျင်မှု မြင့်တက်လာကြောင်း၊ အာဆီယံ အထူးကိုယ်စားလှယ် လာရောက်မည့် စက်တင်ဘာလအတွင်းမှသာ ဖြစ်နိုင်ကြောင်း ၎င်းက ပြောသည်။

ဗိုလ်မှူးကြီး ခွန်ဥက္ကာက “ကျနော်တော့ မသိဘူးဗျ။ ဘာကြောင့်လဲဆိုတော့ ပုဂ္ဂိုလ်လေးဦးကို ကွပ်မျက်ပြီးနောက်ပိုင်းမှာ ပြည်သူတွေရဲ့ လှုပ်ရှားမှု၊ အုံကြွမှုက ပိုမြင့်လာတော့ နည်းနည်းလေးတော့ လျင်လျင်မြန်မြန်တော့ ဖြစ်မယ်မထင်ဘူး။ ဖြစ်ခြင်းဖြစ်ရင်လည်း အာဆီယံအထူးကိုယ်စားလှယ် ထပ်လာမယ့် အချိန်ပေါ့။ အာဆီယံ အထူးကိုယ်စားလှယ်က ဒီ စက်တင်ဘာလထဲမှာ လာဖို့ရှိတော့ အဲဒီ အာဆီယံကိုယ်စားလှယ် မလာခင်လောက်မှာမှ ဖြစ်မလား၊ ဩဂုတ်လထဲမှာတော့ ကျနော် သိပ်မမြင်ဘူးဗျ။ အာဆီယံ ကိုယ်စားလှယ်လာတဲ့ အချိန်နဲ့ တိုက်ပြီးတော့များ ဖိတ်မလား မပြောတတ်သေးဘူးဗျ။ အခုချိန်ထိတော့ ကျနော်တို့ ဖိတ်စာ ဟုတ်တိပတ်တိ မတွေ့သေးဘူးလေ။ လေထဲမှာပဲ ဖိတ်မယ်၊ ဒုတိယအကျော့ရှိတယ် ဆိုတာလောက်ပဲ ကြားနေရတာ အစီအစဉ်ကို ကျနော်တို့ မသိရသေးဘူးခင်ဗျ” ဟု CNI သို့ ပြောသည်။

နစက ဥက္ကဋ္ဌက ၂၀၂၂ ခုနှစ်မှာ ငြိမ်းချမ်းရေးနှစ် ဖြစ်ကြောင်း၊ တစ်နိုင်ငံလုံး လက်နက်ကိုင်ပဋိပက္ခများ ချုပ်ငြိမ်းရေးကို ဆောက်ရွက်သွားမှာ ဖြစ်ကြောင်း ပြောကြားခဲ့ပြီးနောက် လက်နက်ကိုင်အဖွဲ့အစည်း ၁၀ ဖွဲ့နှင့် တွေ့ဆုံဆွေးနွေးထားသည်။

ဗိုလ်ချုပ်မှူးကြီးမင်းအောင်လှိုင်နဲ့ SSPP ခေါင်းဆောင်များ

ထို့နောက် ဒုတိယအကြိမ် ငြိမ်းချမ်းရေး ဆွေးနွေးပွဲကို ဆက်လက် လုပ်ဆောင်သွားမည် ဖြစ်ကြောင်း၊ ပြီးခဲ့သည့် ဆွေးနွေးပွဲ တွင် ပါတီစုံဒီမိုကရေစီ ကျင့်သုံးဆောင်ရွက်ရေး၊ ဒီမိုကရေစီနှင့် ဖက်ဒရယ်စနစ်ကို အခြေခံသည့် ပြည်ထောင်စု တည်ဆောက် ရေးတို့ကို ရင်းနှီးပွင့်လင်းစွာ ညှိနှိုင်းဆွေးနွေးခဲ့ကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားခဲ့သည်။

လက်ရှိအချိန်ထိတော့ ဒုတိအကြိမ် ငြိမ်းချမ်းရေး ဆွေးနွေးပွဲကို မည်သည့်အချိန်တွင် စတင်မည်ဖြစ်ကြောင်း နစကဘက်က ယနေ့အထိ ထုတ်ပြန်ခြင်း မရှိသေးပေ။

တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးသည့် သျှမ်းပြည်ပြန်လည် ထူထောင် ရေး ကောင်စီ (RCSS/SSA)၊ မွန်ပြည်သစ်ပါတီ (NMSP)၊ ဒီမိုကရေစီ အကျိုးပြု ကရင်တပ်မတော် (DKBA)၊ ရခိုင်ပြည် လွတ် မြောက်ရေးပါတီ (ALP)၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေး တပ်မတော်/ ငြိမ်းချမ်းရေး ကောင်စီ (KNU/KNLA-PC)၊ ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO) တို့မှ ခေါင်းဆောင်များ တက်ရောက် ဆွေးနွေးထားသည်။

အလားတူ NCA မရေးထိုးရသေးသည့် ‘ဝ’ ပြည် သွေးစည်းညီညွတ်ရေး တပ်မတော် (UWSA)၊ အမျိုးသား ဒီမိုကရေစီ မဟာမိတ်တပ်မတော်(NDAA-မိုင်းလားအဖွဲ့)၊ ရှမ်းပြည်တိုးတက်ရေးပါတီ(SSPP/SSA)တို့မှ ခေါင်းဆောင်များလည်း နစကနှင့် တွေ့ဆုံ ဆွေးနွေးထားကြသည်။

CNI News

၂၀၂၂ ခုနှစ်၊ ဩဂုတ် ၈

ဖားကန့်မြို့နယ်၊ ဆယ်ဇင်းကျေးရွာ အနီးရှိ ရှမ်းနီအမျိုးသားများ တပ်မတော် (SNA) ၏ ရှေ့တန်း တပ်စခန်းတစ်ခုကို ကချင် လွတ်လပ်ရေးတပ်မတော် (KIA) မှ ဝင်ရောက် တိုက်ခိုက်ခဲ့ကြောင်း သိရသည်။

ကချင်ပြည်နယ်နှင့် စစ်ကိုင်းတိုင်းဒေသကြီး နယ်စပ်ဒေသ စစ်ကိုင်းတိုင်းဘက်ခြမ်းရှိ ရွှေပြည်မြင့်ကျေးရွာမှ SNA ၏ တပ်စခန်း ကို KIA မှ အင်အား အလုံးအရင်းဖြင့် ဝင်ရောက်တိုက်ခိုက်ခဲ့ကြောင်း SNA မှ ပြောရေးဆိုခွင့်ရှိသူ ဗိုလ်မှူးကြီး စိုင်းအောင်မိန်း က CNI သို့ ပြောသည်။

ဗိုလ်မှူးကြီး စိုင်းအောင်မိန်းက “ကျနော်သိသလောက် ဆိုရင်တော့ ဒီနေ့(ဩဂုတ် ၈ ရက်) မနက်လို့ ပြောရမှာပေါ့ဗျာ။ ၁ နာရီ ဝန်းကျင်လောက်မှာ အဲဒါ အင်အားအလုံးအရင်းနဲ့ ထိုးစစ်ဆင် တိုက်ခိုက်လာတယ်လို့ ပြောတယ်။ အဲဒါ ထိုးစစ်ဆင် တိုက်ခိုက် လာတော့ ကျနော်တို့ဘက်ကနေ နောက်ဆုတ် ပေးထားလိုက်တယ်ဗျ။ ရှေ့တန်း စခန်းလေးပါ။ ‌ရှေ့တန်းစခန်း လူ ၁၀ ကျော် ကျော် လောက်ရှိတဲ့ စခန်းလေးကို ဝင်တိုက်တာ” ဟု ပြောသည်။

ဆယ်ဇင်းကျေးရွာတွင် တပ်မတော် စခန်းတစ်ခုကို KIA ၊ ဒေသကာကွယ်ရေးတပ် (PDF) ပူးပေါင်းတပ်တို့မှ နံနက် ၁ နာရီ ခန့်က ဝင်ရောက်တိုက်ခိုက်ခဲ့ကြောင်း၊ ယင်းနောက် SNA ၏ ရှေ့တန်း တပ်စခန်း တစ်ခုကို KIA၊ PDF ပူးပေါင်းတပ်မှ ထပ်မံ တိုက်ခိုက်ခဲ့ခြင်း ဖြစ်ကြောင်း သိရသည်။

KIA ခေါင်းဆောင် ဗိုလ်ချုပ်ကြီးအင်ဘန်လကိုတွေ့ရစဉ်

ဆယ်ဇင်းဒေသခံ တစ်ဦးဖြစ်သူ ကိုနေလင်း(အမည်လွှဲ)က ဆယ်ဇင်းရှိ တပ်မတော်စခန်းကို KIA က သိမ်းထားသည့် သဘောရှိကြောင်း၊ ထို့နောက် ရွှေပြည်မြင့်ကျေးရွာရှိ SNA ကင်းစခန်းတစ်ခုကို KIA မှ သွားရောက်တိုက်ခိုက်ခဲ့ကြောင်း CNI သို့ ပြောသည်။

၎င်းက “လက်ရှိက KIA သိမ်းထားတဲ့ သဘောရှိပါတယ်။ ကျနော်တို့ ဆယ်ဇင်း တပ်မတော်စခန်းကိုလေ။ အဲဒီလိုတော့ ကြား သိရတာပဲ၊ ကျ‌နော်တို့လည်း လက်တွေ့ မမြင်ရတော့၊ မနက် မိုးမလင်းခင်က မီးလောင်တာတော့ ကြားလိုက်တယ်။ ဟုတ်တယ်၊ ဟုတ်တယ်၊ ဆယ်ဇင်း တပ်စခန်းဖြစ်ပြီးမှ ဟိုဖက်မှာ တောက်လျှောက် သွားဖြစ်တာကိုး။ တစ်ချိန်ထဲပါပဲ သိပ်မကွာပါဘူး။ အဲဒီရွှေပြည်မြင့်ဆိုတာက စစ်ကိုင်းတိုင်းဖက်မှာ‌ ရောက်သွားတာကိုး၊ ကြိုးတံတားကို အလယ်ထားပြီးမှာ SNA နဲ့ ဟိုဖက်၊ ဒီဖက် ပစ်နေကြတာကိုး။ အဲဒီလိုကြီးလည်း မဟုတ်လောက်ဘူးထင်တယ်၊ ဂိတ်ပုံစံမျိုးပေါ့၊ ဂိတ်စခန်းပေါ့၊ ကင်းစခန်းပေါ့” ဟု ပြောသည်။

အဆိုပါ တိုက်ခိုက်မှုနှင့် ပတ်သက်၍ KIA မှ တာဝန်ရှိသူထံ CNI သတင်းဌာနက ဖုန်းဆက်သွယ် မေးမြန်းခဲ့သော်လည်း အစည်းအဝေး ပြုလုပ်နေသည့်အတွက် ဖြေကြားပေးနိုင်ခဲ့ခြင်း မရှိသေးကြောင်း ပြောသည်။

SNA မှ ဗိုလ်မှူးကြီး စိုင်းအောင်မိန်းက “နိုင်ငံ‌ရေးအရ ဖြစ်လာတဲ့ ပြဿနာတွေကို နိုင်ငံရေးအရ မဖြေရှင်းဘဲနဲ့ လက်နက်ကိုင် အင်အားသုံးပြီး ဖြေရှင်းမယ်ဆိုရင်တော့ ကျနော်တို့ကလည်း ပြည်သူလူထုဖက်ကနေ ရပ်တည်ပြီးတော့မှ ခုခံကာကွယ်သွား ရပါလိမ့်မယ်၊ အဓိကတော့ ဒီပြဿနာတွေ ဒီတိုက်ပွဲတွေ ဖြစ်လာတာက KIA ရဲ့ စီမံချက်တွေကြီးပဲ ဖြစ်တယ်၊ PDF တွေ အနေ နဲ့ကတော့ ဒါနားလည်ချင်မှ နားလည်နိုင်လိမ့်မယ်၊ KIA ကနေ ရှမ်းနီမျိုးနွယ်စုအားလုံး၊ အလုံးစုံ ပျက်သုန်းရေးဆိုတဲ့ စီမံချက် ကို ချပြီး လုပ်နေတယ်လို့ ကျနော်တို့ အနေနဲ့ သုံးသပ်လို့ရပါတယ်၊ ဒီတော့ သူတို့ လုပ်တဲ့ ပြဿနာကို တနေ့၊ တချိန်ကြရင် သူတို့ ပြန်လည်ပြီးတော့ ခေါင်းခံဖြေရှင်းရပါလိမ့်မယ်” ဟု CNI သို့ ပြောသည်။

ဆယ်ဇင်းကျေးရွာအ၀င် (Tun Lin Aung)

အဆိုပါ ဆယ်ဇင်းဒေသတွင် ပြီးခဲ့သော ဇူလိုင်အတွင်းကလည်း တပ်မတော်နှင့် KIA တို့ တိုက်ပွဲဖြစ်ပွားခဲ့ကြောင်း၊ SNA နှင့် KIA တို့ကြားတိုက်ပွဲဖြစ်ပွားခဲ့ကြောင်း၊ ထို့နောက် စစ်ရေးတင်းမာနေလျက်ရှိနေခဲ့ကြောင်း သိရသည်။

SNA သည် စစ်ကိုင်းတိုင်းဒေသကြီး၊ ခန္တီးမြို့နယ်၊ ဟုမ္မလင်းမြို့နယ်၊ ဖောင်းပြင်မြို့နယ်၊ ပင်လည်ဘူးမြို့နယ်၊ ဝန်းသို မြို့နယ်၊ ဗန်းမောက်မြို့နယ်နှင့် အိန္ဒိယ-မြန်မာ နယ်စပ်တလျှောက် အပါအဝင် ကချင် ပြည်နယ်၊ မိုးညှင်းမြို့နယ်၊ မိုးကောင်းမြို့နယ် တို့တွင် လှုပ်ရှားလျက် ရှိသည်။

ရှမ်းနီအမျိုးသားများ တပ်မတော်(SNA)သည် စစ်ကိုင်းတိုင်းဒေသကြီးတွင် ပါဝင်နေသည့် မော်လိုက်ခရိုင်၊ ကလေးခရိုင်၊ ခန္တီး ခရိုင်၊ ကသာခရိုင်၊ တမူးခရိုင်နှင့် ကချင်ပြည်နယ်အတွင်း ပါဝင်နေသော ဗန်းမော်ခရိုင်၊ မြစ်ကြီးနားခရိုင်၊ မိုးညှင်းခရိုင်၊ မိုးကောင်း ဒေသတို့ကို စုစည်း၍ ရှမ်းနီပြည်နယ် ပြန်လည်ရရှိရေး ကြိုးပမ်းနေသည့် တိုင်းရင်းသား လက်နက်ကိုင်အဖွဲ့ ဖြစ်သည်။

CNI News

၂၀၂၂ ခုနှစ်၊ သြဂုတ် ၈

ယနေ့ (သြဂုတ် ၈ ရက်)တွင် ကျရောက်သည့် “၈”လေးလုံးအရေးတော်ပုံ ၃၄ နှစ်မြောက် အထိမ်းအမှတ် အနေဖြင့် ရန်ကုန်လူထုသပိတ်က “၈”လေးလုံး ထီးသပိတ်လှုပ်ရှားမှုကို ရန်ကုန်မြို့အတွင်းနေရာ ၄ နေရာမှာ ပြုလုပ်ခဲ့ကြောင်း ထုတ်ပြန်ခဲ့သည်။

“၈”လေးလုံး အရေးတော်ပုံ အထိမ်းအမှတ် ထီးသပိတ် လှုပ်ရှားမှုကို ဆူးလေ လူကူးကုန်းတံတား၊ ဗိုလ်ချုပ်ဈေး၊ အင်းလျား ကန်ဘောင်နှင့် လှည်းတန်းတို့မှာ ပြုလုပ်ခဲ့သည်။

“ “၈” လေးလုံးရေးဆွဲထားသော ထီးများဖြင့် ရန်ကုန်လူထုသပိတ်မှ စစ်အာဏာရှင် ဆန့်ကျင်ရေး လှုပ်ရှားမှုကို ပြုလုပ်ခဲ့ သည်။ လူထုလူတန်းစား တစ်ရပ်လုံးက စစ်အာဏာရှင်စနစ်ကို ဆန့်ကျင်တော်လှန်ခ့ကြသော “၈”လေးလုံးအရေးတော်ပုံ ကြီးမှသည် ယခု ၂၀၂၁ နွေဦးတော်လှနေရးအထိ စစ်အာဏာရှင် ဆန့်ကျင်ရေးတိုက်ပွဲဟာ မပြီးဆုံးသေးဘဲ နှစ်ပေါင်း ၇၀ ကျော် ကြာမြှင့်ခဲ့ပြီ ဖြစ်ပါသည်” ဟု ရန်ကုန်လူထုသပိတ်က ထုတ်ပြန်ထားသည်။

ထို့ကြောင့် မိမိတို့အား ချုပ်ကိုင်ခြယ်လှယ်နေသော စစ်တပ်ကို အမြစ်ပါမကျန် ရှင်းလင်းဖို့ လူထုလူတန်းစားတစ်ရပ်လုံး အတူတူ တော်လှန်မျိုးဆက် ပုန်ကန် ရုန်းထွက်ဟု ရန်ကုန်လူထုသပိတ်၏ ထုတ်ပြန်ချက်မှာ ဖော်ပြထားသည်။

CNI News

၂၀၂၂ ခုနှစ်၊ ဩဂုတ် ၆

တိုင်းရင်းသားအခွင့်အရေးများ လွှတ်တော်မှာ အဖြေရှာရန်ဆိုသည်မှာ အကြောင်းပြချက်တစ်ခုသာ ဖြစ်ကြောင်း ရခိုင်နိုင်ငံရေး သမား ဦးဖေသန်းက CNI သို့ ပြောသည်။

ဒီမိုကရေစီစနစ်မှာ လွှတ်တော်သည် နိုင်ငံရေးအရ အမြင့်ဆုံးဖြစ်ပြီး တိုင်းရင်းသားများ အနေဖြင့် မိမိတို့ဒေသ အခွင့်အရေး များကို တရားဥပဒေနှင့်အညီ တောင်းဆိုနိုင်ရေး လွှတ်တော်တွင် ပိုမိုပါဝင်လာရမည်ဟု နစက နှင့် ရှမ်းပြည်တိုးတက်ရေးပါတီ (SSPP) တို့ ဩဂုတ် ၄ ရက်နေ့က တွေ့ဆုံစဉ် ဗိုလ်ချုပ်မှူးကြီးမင်းအောင်လှိုင်မှ ပြောကြားခဲ့သည်။

ဦးဖေသန်းက “ဒီမိုကရေစီပါတီလို့ ပြောကြတဲ့ NLD အစိုးရ လက်ထက်မှာတောင် လွှတ်တော် အခင်းအကျင်းက မပီပြင်ဘူး ပေါ့။ သူတို့ အစိုးရအဖွဲ့ကပဲ ဆုံးဖြတ်တာရှိတယ်၊ လွှတ်တော်ထဲမှာလည်း အနိုင်ရပါတီကပဲ ဦးဆောင်ပြီး ဆုံးဖြတ်တာတွေ ရှိတယ်။ တိုင်းရင်းသားတွေ တင်ပြခဲ့တာတွေကို ပယ်ချတာတွေ၊ အရေးမစိုက်တာတွေ တိုင်းရင်းသားဒေသ ဘတ်ဂျက်ခွဲဝေမှု တွေက အားနည်းတာတွေ အများကြီးပေါ့။ ဒီလို စစ်အစိုးရတစ်ပိုင်း အစိုးရဖြစ်လာမယ်ဆိုရင်တော့ PR စနစ်နဲ့ ဖြစ်လာတဲ့ အစိုးရကတော့ လွှတ်တော်ထဲမှာ ဆွေးနွေးပါ၊ လွှတ်တော်ထဲမှာ အဖြေရှာပါဆိုတာ ဒါက သက်သက် အကြောင်းပြချက်တစ်ခု ပဲ ဖြစ်တယ်။ နဂိုကတည်းက စစ်အာဏာရှင်စနစ်ကို ဖက်တွယ်ထားတဲ့ အဖွဲ့အစည်းတစ်ခုက အာဏာရလာပြီဆိုရင်တော့ တိုင်းရင်းသားတွေ အနေနဲ့တော့ ဘာမှ ပြောစရာကို မလိုလောက်အောင်အထိ အခွင့်အရေးတွေက ရလာစရာ အကြောင်းမရှိ ဘူး။ ပေးရင်လည်း မဖြစ်စလောက်ပဲ ပေးမယ်ဆိုတာ ကျနော်တို့ ယုံကြည်တယ်” ဟု CNI သို့ ပြောသည်။

လက်နက်ကိုင်ဘ၀ကနေ ပြည်သူ့လွှတ်တော်ဥက္ကဋ္ဌဖြစ်လာသူ ဦးတီခွန်မြတ် (EPA)

ထို့အတူ လာမည့် လွှတ်တော်အခင်းအကျင်းမှာ နိုင်ငံရေးအားဖြင့် ပြည်သူလူထု ထောက်ခံမည် မဟုတ်သလို အသိအမှတ်ပြုမှု အားနည်းမည်ဖြစ်ကြောင်း ၎င်းက ပြောသည်။

လွှတ်တော်တွင် တပ်မတော်သား ၂၅ ရာခိုင်နှုန်း ပါဝင်နေသည့်အတွက် ဒီမိုကရေစီနှင့် ဆန့်ကျင်နေကြောင်း၊ ၂၀၀၈ ဖွဲ့စည်းပုံ အောက်မှာ တိုင်းရင်းသား အခွင့်အရေး ရနိုင်မှာမဟုတ်ကြောင်း တိုင်းရင်းသား လက်နက်ကိုင် ခေါင်းဆောင်တစ်ဦး ဖြစ်သူ ဗိုလ်မှူးကြီး ခွန်ဥက္ကာက CNI သို့ ပြောသည်။

ဗိုလ်မှူးကြီး ခွန်ဥက္ကာက “အခု ဗမာပြည်မှာ ပေါ်ပေါက်လာတဲ့ လွှတ်တော်ပေါ့။ ဦးနုလက်ထက်က လွှတ်တော်၊ ဦးနေဝင်း လက်ထက်က ပြည်သူ့လွှတ်တော်၊ နောက်ပိုင်းမှာ ဦးသိန်းစိန် လက်ထက်မှာ ပေါ်လာတဲ့ ပြည်ထောင်စုလွှတ်တော်နဲ့ ပြည်နယ် လွှတ်တော်တွေပေါ့။ အဲဒါတွေ အားလုံးက ရှင်းရှင်းပြောရရင်တော့ ဒီမိုကရေစီ ပုံစံအောက်က လွှတ်တော်လို့ မပြောနိုင်ဘူး ခင်ဗျ။ ဒါကြောင့် လွှတ်တော်ထဲမှာ တပ်မတော်သား ၂၅ ရာခိုင်နှုန်း ပါနေ ကတည်းကိုက ဒီမိုကရေစီနဲ့ ဆန့်ကျင်နေတာပဲ။ ၇၅ ရာခိုင်နှုန်းမှာလည်း ရွေးကောက်ခံတဲ့သူတွေ တက်တော့ ၇၅ မှာလည်းဘဲ အနိုင်ရတဲ့ ပါတီကြီးက တစ်ခါ လွှမ်းမိုးနေပြန်ရော၊ ဒါဆိုတော့ တိုင်းရင်းသားပါတီတွေ၊ တိုင်းရင်းသား လွှတ်တော်အမတ်တွေက ပြောရေးဆိုခွင့်ဆိုတာ ကျုံ့သွားတာပေါ့ဗျာ။ တော်တော်လေး ကျုံ့သွားတာပေါ့။ ဒါကြောင့် ဘယ်လိုမှ အခွင့်အရေး တောင်းဆိုလို့ အောင်မြင်နိုင်ဖို့ အကြောင်း မရှိပါဘူး။ လက်ရှိ ၂၀၀၈ အောက်က လုပ်သွားတဲ့ ဖွဲ့စည်းပုံအတိုင်းဆိုရင်တော့ အခွင့်အရေးဘာမှရဖို့ အကြောင်းမရှိပါဘူးခင်ဗျ” ဟု ပြောသည်။

လက်ရှိ မြန်မာ့နိုင်ငံရေး လောကတွင် တိုင်းရင်းသား လက်နက်ကိုင်များကနေ လွှတ်တော် ကိုယ်စားလှယ်များ အဖြစ်လည်း ကောင်း၊ လွှတ်တော်ဥက္ကဋ္ဌအဖြစ်လည်းကောင်း၊ ရွေးကောက်ပွဲ ဝင်ရောက်ယှဉ်ပြိုင်သူများအဖြစ်လည်းကောင်း စသဖြင့် ရှိနေ ကြောင်း သိရသည်။

သို့သော် မြန်မာနိုင်ငံ၏ လွှတ်တော်အတွင်း ဖြစ်တည်မှုများသည် အားကြီးသူက အသာစီးယူလေ့ရှိခြင်းကြောင့် တိုင်းရင်းသား ပါတီများမှာ သူတို့ လိုလားချက်နှင့် အခွင့်အလှမ်းများကို ပိတ်ပင်ခံနေရကြောင်း ခံစားလာခဲ့ရပြီး လက်နက်ကိုင်လမ်းစဉ်ကို ရွေးချယ်မှုများလည်း ရှိနေသည်။

CNI News

၂၀၂၂ ခုနှစ်၊ သြဂုတ် ၆

မြန်မာ့နိုင်ငံရေး အကျပ်အတည်း ဖြေရှင်းနိုင်ရန် အာဆီယံ၏ ဘုံသဘောတူညီချက် ၅ ချက်က ချဉ်းကပ်၍ အလုပ်မဖြစ်လျှင် နည်းလမ်းသစ်ရှာဖွေပြီး မြန်မာကို အာဆီယံက ထုတ်သင့်ပါက ထုတ်ပယ်ရမည်ဟု နိုင်ငံတကာမှာ ဆွေးနွေးမှုများ ရှိလာခဲ့ သည်။

ထို့နောက် ပြည်တွင်း နိုင်ငံရေးအသိုင်းအဝန်းနှင့် ပြည်ပရောက် မြန်မာ့နိုင်ငံရေး လေ့လာသုံးသပ်သူများကတော့ အာဆီယံ သည် မြန်မာနိုင်ငံကို အဖွဲ့ဝင်အဖြစ်က ထုတ်ပယ်ရန်မှာ မဖြစ်နိုင်ကြောင်း ပြောသည်။

တရုတ်ပြည်အခြေစိုက် မြန်မာ့နိုင်ငံရေးလေ့လာသုံးသပ်သူ ဒေါက်တာလှကျော်ဇောက “ ကျမကြည့်တာကတော့ ထုတ်ပယ် ပစ်ဖို့ အထိတော့ မလုပ်ဘူးထင်တယ်။ ဘာဖြစ်လို့လဲဆိုတော့ အခု အာဆီယံ အစည်းအဝေးမှာ သူတို့က တရားဝင်သာ မဖိတ်တာ သံတမန်တစ်ယောက် တက်တယ်လို့ကြားတယ်။ ဒါကြောင့်မလို့ သူတို့ Communicate ထုတ်ပြန်တဲ့အခါမှာ ဗမာပြည်ကို ပြောမယ့် ကိစ္စကိုတောင်မှ အဲဒီသံတမန်က ကန့်ကွက်လို့ အဲဒီအပိုဒ်ကို ဖြုတ်ခဲ့ရ တယ်လို့ ပြောတယ်။ ထုတ်တဲ့ အထိတော့ မဖြစ်ဘူး ဘာဖြစ်လို့လဲဆိုတော့ ဒီလိုလေး ဟိုဒင်းတစ်ခုလုံးက Regional Economic Forum အဲဒါ တစ်ခု လုံးက သူက ထောက်ပို့ ကွင်းဆက်တစ်ခုလုံးဖြစ်အောင် လုပ်ရမှာ အဲဒါကြောင့်မလို့ ထုတ်တဲ့အထိတော့ မဖြစ်ဘူး။ အရေး ယူတာတို့၊ ဖိအားပေးတာတို့တော့ ဖြစ်ကောင်းဖြစ်နိုင်တာပေါ့။ သို့သော် ထုတ်တဲ့ အထိတော့ မဖြစ်နိုင်ဘူး ထင်တယ် ”ဟု CNI သို့ ပြောသည်။

အမေရိကန်နိုင်ငံခြားရေးဝန်ကြီး အန်တိုနီဘလင်ကင်ကတော့ နစကဘက်က အာဆီယံ ဘုံသဘောတူညီချက် ၅ ချက်ကို လိုက်နာဖို့ ငြင်းပယ်ထားသည့်အတွက် အာဆီယံအနေဖြင့် အခြေအနေတွေအပေါ် ပြန်သုံးသပ်၍ အာဆီယံကနေ ထုတ် ပယ်သည့် အဆင့်အထိ လုပ်သွားရမည်ဟု VOA မြန်မာပိုင်းနှင့်အင်တာဗျူးမှာ ပြောထားသည်။

ဘလင်ကင်က “စစ်ကောင်စီဘက်က အာဆီယံ သဘောတူညီချက် ၅ ချက်ကို လိုက်နာဖို့ ငြင်းပယ်ထားပါတယ်။ အဲဒီတော့ အခု လောလောဆယ်အားဖြင့် အရေးပါတဲ့ အစည်းအဝေးတွေမှာ နိုင်ငံရေးအရ မပတ်သက်တဲ့ ကိုယ်စားလှယ်ကိုပဲ လက်ခံ မယ်လို့ သတ်မှတ်ထားတဲ့ အချက်ဟာ မှန်ကန်တဲ့အချက်ဖြစ်တယ်။ စစ်ကောင်စီအနေနဲ့ ဒီကိစ္စအပေါ် လိုက်နာမှုတွေ မရှိ ဘူးဆိုရင် အာဆီယံအနေနဲ့ အခြေအနေတွေအပေါ် ပြန်သုံးသပ်ပြီး အာဆီယံကနေ ထုတ်ပယ်တဲ့ အဆင့်အပါအဝင် လုပ် စရာရှိတာ လုပ်သွားရမှာပါ”ဟု ပြောသည်။

အာဆီယံအစည်းအဝေးတွင် အမေရိကန်နိုင်ငံခြားရေးဝန်ကြီး အန်တိုနီဘလင်ကင်ကို တွေ့ရစဉ်

ဒေါက်တာလှကျော်ဇောကတော့ ယခုခေတ်သည် အမေရိကန်ပြောတိုင်း ရသည့် အခြေအနေမဟုတ်တော့ကြောင်း ပြောသည်။

လက်ရှိတွင် အာဆီယံသည် နိုင်ငံခြားရေးဝန်ကြီးများ အစည်းအဝေးနှင့် ထိပ်သီး ခေါင်းဆောင်များ အစည်းအဝေးများ ကျင်းပစဉ် နစကကို တက်ရောက်ခွင့် မပေးဘဲ နိုင်ငံရေးနှင့်မဆိုင်သော သံတမန် တစ်ဦးသား တက်ရောက်ခွင့်ပေးမည် ဆိုသော ဆုံးဖြတ်ချက်ကို ချမှတ်ထားသည်။

ကမ္ဘောဒီးယား နိုင်ငံခြားရေးဝန်ကြီးလည်းဖြစ် အာဆီယံအထူးကိုယ်စားလှယ်လည်း ဖြစ်သူ ပရတ်ဆိုခွန်က “မြန်မာ ဗိုလ်ချုပ်ကြီးများသည် တိုးတက်မှု ပြသနိုင်သည့် နည်းလမ်းဖြင့် လုပ်ဆောင်ရမည်ဖြစ်ကြောင်း၊ ထို့နောက် တိုးတက်မှု ပြသနိုင်မှသာ မိမိတို့ အဖွဲ့အစည်းအတွင်း ဆုံးဖြတ်ချက်တစ်ခု ချမှတ် နိုင်မည်ဖြစ်ကြောင်း”ဟု ပြောသည်။
ပြည်တွင်း မြန်မာ့နိုင်ငံရေးလေ့လာသုံးသပ်သူ ဦးရဲထွန်းကတော့ အာဆီယံသည် အရေးကြီးသည့် ဆုံးဖြတ်ချက်များကို အားလုံး သဘောတူညီမှု ရမှ ဆုံးဖြတ်ရလေ့ရှိသည့်အတွက် အားလုံးသဘောတူပါက မြန်မာကို အဖွဲ့ဝင်အဖြစ်က ထုတ် နိုင်သည်ဟု ပြောသည်။

ဦးရဲထွန်းက “သူတို့ အာဆီယံရဲ့ ချာတာအရဆိုရင်တော့ အဲလိုအရေးကြီးတဲ့ ဆုံးဖြတ်ချက်တွေ ချမယ်ဆိုရင် အားလုံး သဘောတူမှ ဖြစ်တာလေ။ အားလုံးသဘောတူမှ ဖြစ်တယ်ဆိုတော့ အားလုံးက သဘောတူတယ်ဆိုရင်တော့ ထုတ်တာ ဖြစ်နိုင်တာပေါ့။ သူတို့ ထုတ်မှာကို မစောင့်ဘဲနဲ့ နစက ကနေပြီးတော့ သူတို့ကိုလည်း မဖိတ်တဲ့အတွက်ကြောင့်မလို့ ဒီအဖွဲ့ ဝင်အဖြစ်ကနေ ခေတ္တာ ယာယီရပ်ဆိုင်းမယ်၊ ဒါမှမဟုတ် ထွက်တယ်ဆိုပြီး သူတို့လုပ်ရင်လည်း အာဆီယံက နောက်ဆက် တွဲ ထုတ်တာ ဖြစ်လာနိုင်တာပေါ့လေ”ဟု CNI သို့ ပြောသည်။

ပရတ်ဆိုခွန်နဲ့ ဗိုလ်ချုပ်မှူးကြီးမင်းအောင်လှိုင်

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ ပြည်တွင်း တည်ငြိမ်းမှုများကို မထိန်းနိုင်သေးသည့်အတွက် အာဆီယံ ဘုံသဘောတူညီချက် ၅ ချက်ကို အကောင်အထည် မဖော်နိုင်သေးခြင်း ဖြစ်ကြောင်း၊ နောက်လာမည့် ကာလများမှာတော့ အာဆီယံ ဘုံသဘောတူညီချက်ကို အကောင်အထည်ဖော်နိုင်မည်ဟု ပြောလိုကြောင်း ၂၀၂၂ ခုနှစ်၊ သြဂုတ် ၁ ရက်နေ့က မိန့်ခွန်းပြောစဉ် ထည့်သွင်း ပြောသွားခဲ့သည်။

အာဆီယံ ဘုံသဘောတူညီချက် ၅ ချက်မှာ သွေးထွက်သံယိုမှုများ ရပ်တန့်ရေး၊ နိုင်ငံရေးအကျဉ်းသားများ ဖမ်းဆီးထားမှု ကနေ ပြန်လွှတ်ပေးရေး၊ သက်ဆိုင်သူများ အားလုံးပါဝင်ပြီး တွေ့ဆုံ ဆွေးနွေးရေး၊ လူသားချင်းစာနာထောက်ထားမှု အကူ အညီများ ပေးအပ်ရေး၊ မြန်မာနိုင်ငံဆိုင်ရာ အာဆီယံအထူးကိုယ်စားလှယ် ခန့်အပ်၍ မြန်မာနိုင်ငံသို့ ဝင်ရောက်ခွင့်ပြုရေး တို့ဖြစ်သည်။

လက်ရှိတွင် မြန်မာနိုင်ငံဆိုင်ရာ အာဆီယံ အထူးကိုယ်စားလှယ် မစ္စတာ ပရတ်ဆိုခွန်သည် မြန်မာနိုင်ငံသို့ ၂ ကြိမ် လာရောက် ထားပြီး ဖြစ်သော်လည်း သိသာ ထင်ရှားသည့် နိုင်ငံရေး အကျပ်အတည်း ဖြေရှင်းနိုင်မည့် တိုးတက်မှုကို မရသေးကြောင်း၊ စက်တင်ဘာ- အောက်တိုဘာလအတွင်း တတိယအကြိမ် လာရောက်မည့် မြန်မာပြည်ခရီးစဉ်အတွင်း ဒေါ်အောင်ဆန်းစုကြည်နှင့် အာဆီယံအထူးကိုယ်စားလှယ်ကို ပေးတွေ့မည်ဟု နစကဘက်က ကတိပြုထားကြောင်း သိရသည်။