CNI International News

ဘေဂျင်း၊ဖေဖော်ဝါရီ - ၁၃

အမေရိကန်၏ ရန်ဘက်ဖြစ်သူ အီရန်သမ္မတ အီဗရာဟင် ရိုင်ဆီသည် တရုတ်နှင့်ဆက်ဆံရေး တိုးမြှင့်ရန်အတွက် တရုတ်သို့ သွားမည်ဖြစ်ကြောင်း သိရသည်။

အင်္ဂါနေ့တွင် စတင်မည့် သုံးရက်ကြာ တရုတ်ခရီးစဉ်တွင် အီရန်သမ္မတ အီဗရာဟင် ရိုင်ဆီ (Ebrahim Raisi) သည် တရုတ်သမ္မတ ရှီကျင့်ဖျင် (Xi Jinping) နှင့် တွေ့ဆုံသွားမည်ဟု အေပီသတင်းတွင် ဖော်ပြသည်။

တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဟွာချန်ရင် (Hua Chunying) က အီရန်သမ္မတ ခရီးစဉ်နှင့် ပတ်သက်ပြီး တနင်္ဂနွေနေ့တွင် ထုတ်ပြန် ကြေညာခဲ့သည်။

ရှီက ရိုင်ဆီကို ဖိတ်ကြားခဲ့ခြင်း ဖြစ်သည်ဟု ဟွာချန်ရင်က ပြောသည်။

ရိုင်ဆီသည် ရှီနှင့်တွေ့ဆုံပြီးနောက်မှာတော့ ကိုယ်စားလှယ်အဖွဲ့သည် ပူးပေါင်းဆောင်ရွက်မှုဆိုင်ရာ စာရွက် စာတမ်းများကို လက်မှတ်ရေးထိုးမည်ဟု အီရန် နိုင်ငံပိုင် IRNA သတင်းတွင် ဖော်ပြသည်။

ရှီကျင့်ဖျင်နဲ့ဘိုင်ဒန်ကိုတွေ့ရစဉ်(Reuters)

အီရန်၊ တရုတ်စီးပွားရေး ခေါင်းဆောင်များ တွေ့ဆုံခြင်း၊ တရုတ်ရှိ အီရန်နိုင်ငံသားများနှင့် တွေ့ဆုံခြင်းသည်လည်း သမ္မတ၏ ခရီးစဉ်တွင် ပါဝင်သည်ဟု သတင်းတွင် ရေးသားထားသည်။

ရိုင်ဆီ၏ တရုတ်ခရီးစဉ်သည် အမေရိကန်ဦးဆောင်သည့် ကမ္ဘာ့ရေးရာများအပေါ် အနောက်အုပ်စု၏ လွှမ်းမိုးထား ခြင်းအပေါ် ဆန့်ကျင်သည့် နှစ်နိုင်ငံအကြား ဆက်ဆံရေးများကို ခိုင်မာအောင် လုပ်ဆောင်မည်ဟု ယူဆရသည်။

ခေါင်းဆောင်နှစ်ဦးသည် ပြီးခဲ့သည့် စက်တင်ဘာတွင် အဇာဘိုင်ဂျန်၌ တွေ့ဆုံခဲ့သည်။ ထိုတွေ့ဆုံမှုတွင် တရုတ်၏ အီရန်အပေါ် ထောက်ပံ့မှုများကို ရှီက အလေးအနက်ထား ပြောကြားခဲ့သည်။

တရုတ်ဒုတိယဝန်ကြီးချုပ် ဟူချန်းဟွာ (Hu Chunhua) နှင့် ဒီဇင်ဘာလက တွေ့ဆုံမှုတွင် မဟာဗျူဟာမြောက် မိတ်ဖက် ဆက်ဆံရေးကို ခိုင်မာအောင် ဆောင်ရွက်ရေး ကတိအတိုင်း ဆက်ရှိနေမည်ဟု ရိုင်ဆီက ကတိပေးခဲ့ သည်။

တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဟွာချန်ရင်ကိုတွေ့ရစဉ်(GETTY IMAGES)

တရုတ်သည် အီရန်၏ ရေနံကို အဓိက ဝယ်ယူသူဖြစ်ကာ အီရန်နိုင်ငံတွင်းရှိ ရင်းနှီးမြှုပ်နှံမှုများအတွက် အရေးပါ သော အရင်းအမြစ်တစ်ခုလည်း ဖြစ်သည်။

၂၀၂၁ ခုနှစ်တွင် တရုတ်နှင့် အီရန်တို့သည် ရေနံ၊ သတ္တုတူး ဖော်ရေးမှစ၍ သယ်ယူပို့ဆောင်ရေးနှင့် စိုက်ပျိုးရေး အထိ ပါဝင်သည့် အဓိကကျသော စီးပွားရေး လုပ်ဆောင်ချက်များ ပါဝင်သည့် ၂၅ နှစ် သက်တမ်းရှိ မဟာဗျူဟာ မြောက် ပူးပေါင်းဆောင်ရွက်မှု သဘောတူညီချက်ကို လက်မှတ် ရေးထိုးခဲ့သည်။

၎င်းတို့ နှစ်နိုင်ငံသည် အမေရိကန်နှင့်တင်းမာသော ဆက်ဆံရေးကို ပိုင်ဆိုင်ထားပြီး ရုရှားနှင့်အတူ အမေရိကန်အား တန်ပြန်နိုင်သည့် အင်အားစု တစ်ခု ဖြစ်စေရန် ကြိုပမ်းလျက်ရှိသည်။

Source: AP

CNI International News

လန်ဒန်၊ ဖေဖော်ဝါရီ ၁၃

ဒေသတွင်းလိုင်စင်ဖြင့် ယူကရိန်းတွင် လက်နက်များ၊ သံချပ်ကာကားများ ထုတ်လုပ်ရေးအတွက် ဗြိတိန် ကာကွယ်ရေးကဏ္ဍမှ ထိပ်တန်းအရာရှိများက ဆွေးနွေးမှုများလုပ်ဆောင်နေသည်ဟု Telegraph သတင်းတွင် စနေနေ့က ဖော်ပြသည်။

ထိုမှ အချို့သောအရာရှိများသည် ကိယက်ဗ်သို့သွားကာ ပူးတွဲထုတ်လုပ်ရေးအတွက် အခွင့်အလမ်းများ ရှာဖွေခဲ့ပြီး ဖြစ်သည်ဟုလည်း အဆိုပါသတင်းတွင် ဖော်ပြသည်။

ယင်းသို့ ဖော်ပြချက်အရ ဗြိတိန်ရှိကာကွယ်ရေးကုမ္ပဏီများသည် ၎င်းတို့ပြိုင်ဘက်များဖြစ်သော ပြင်သစ်နှင့်ဂျာမနီ တို့မှ ကုမ္ပဏီများသည် ယူကရိန်းနှင့်သဘောတူညီချက်များဦးစွာ ရရှိသွားမည်ကို စိုးရိမ်နေသည်ဟု သိရသည်။

လက်ရှိဆွေးနွေးမှုများသည် ဗြိတိန်ကို သဘောတူညီချက်ရရှိရေးအားသာချက်ဖြစ်စေသည်ဟု ကာကွယ်ရေး ကုမ္ပဏီအမှုဆောင်တစ်ဦးက ပြောသည်ကို ကိုးကားဖော်ပြထားသည်။ သို့သော် ထိုသို့ ထုတ်လုပ်ခွင့်ရရေးတွင် ဗြိတိန်အစိုးရ၏အတည်ပြုမှု လိုအပ်နေဆဲဖြစ်သည်။

ရုရှား၏ကျူးကျော်မှုကို ကာကွယ်ရန် ယူကရိန်းအစိုးရကို စစ်ဘက်အကူအညီများပေးရေးအတွက် ယင်း၏ အနောက်အုပ်စုမဟာမိတ်များက ဆောင်ရွက်နေစဉ်တွင် ယခုကဲ့သို့သတင်းထွက်ပေါ်လာခြင်းဖြစ်သည်။ ဗြိတိန် အစိုးရသည်လည်း ယူကရိန်းအစိုးရအား Challenger 2 တင့်ကားများပေးရန် ပြီးခဲ့သည့်လတွင် ကတိပြုခဲ့သည်။

ယူကရိန်းစစ်သားများသည် အမေရိကန်လုပ် Javelin တင့်ကားဖျက်ဒုံးကျည်များကို ထရပ်ကားတစ်စီးပေါ် တင်ဆောင်နေစဉ်(ဓါတ်ပုံ-အေအက်ဖ်ပီ)

ယူကရိန်းသို့ တိုက်လေယာဉ်များထောက်ပံ့ရေးအတွက် လေ့လာမှုပြုလုပ်ရန် ဗြိတိန်ဝန်ကြီးချုပ် ရီရှီ ဆူနက် (Rishi Sunak) က ကာကွယ်ရေးဌာနကို ညွှန်ကြားထားသည်။ ထိုဆုံးဖြတ်ချက်ကို ဂရုတစိုက်ဆောင်ရွက်နေကြောင်း၊ တင်းမာမှုများ ပိုမိုမြင့်တက်လာနိုင်သည်ကိုလည်း သတိပြုမိကြောင်း ဆူနက်၏ ပြောခွင့်ရပုဂ္ဂိုလ်က ထုတ်ဖော်ပြောဆိုထားသည်။

ယူကရိန်းသို့တခြားနိုင်ငံများမှ လက်နက်များထောက်ပံ့ပေးခြင်းသည် လက်ရှိ ပဋိပက္ခကို ပိုမိုဆိုးရွားလာစေမည် ဖြစ်ကြောင်း၊ အနောက်အုပ်စုမှ ထောက်ပံ့ပေးသောလက်နက်များကို တရားဝင်ပစ်မှတ်များအဖြစ် သတ်မှတ် သွားမည်ဖြစ်ကြောင်း ရုရှားဘက်က ထပ်ဖန်တလဲလဲ သတိပေးထားသည်။

လက်နက်များ ထောက်ပံ့ခြင်းက လက်ရှိယူကရိန်းပဋိပက္ခ၏ ရလာဒ်ကို ပြောင်းလဲစေနိုင်မည်မဟုတ်ဟုလည်း ရုရှားအစိုးရပြောခွင့်ရ ပုဂ္ဂိုလ်က ကြာသပတေးနေ့တွင် ပြောသည်။

ယူကရိန်းကိုလက်နက်များထောက်ပံ့ပေးခြင်းက ယူကရိန်းနိုင်ငံကို ပို၍ အထိနာစေလိမ့်မည်ဟုလည်း ၎င်းက သတိပေးထားသည်။

Source:RT

CNI International News

ဝါရှင်တန်၊ ဖေဖော်ဝါရီ ၁၃

ကနေဒါလေပိုင်နက်အတွင်း တွေ့ခဲ့ရသည့် အမျိုးအမည်မသိ ဆလင်ဒါပုံစံ အရာဝတ္တုတစ်ခုကို အမေရိကန် F-22 ဂျက်လေယာဉ်တစ်စင်းက စနေနေ့တွင် ပစ်ချခဲ့သည်ဟု ရိုက်တာ သတင်းတွင် ဖော်ပြထားသည်။

အဆိုပါ ပစ်ချမှုမတိုင်ခင် တရုတ်၏ မိုးပျံပူဖောင်းတစ်ခုကိုလည်း အမေရိကန်က ပစ်ချခဲ့ရသေးသည်။

ရေဒါတွေ့ရှိမှု တစ်ခုကို စုံစမ်းရန်အတွက် အမေရိကန်စစ်တပ်က မွန်တားနား (Montana) မှ ဂျက်လေယာဉ် များကို စေလွှတ်ခဲ့ပြီး ထိုအရာကြောင့် လေပိုင်နက်ကိုလည်း ယာယီပိတ်ခဲ့ရသည်။

ရေဒါတွင်ပေါ်သော အရာကို လေယာဉ်များက အမျိုးအမည် မခွဲခြားနိုင်ခဲ့ဟု မြောက်အမေရိက လေကြောင်း ကာကွယ်ရေးဌာနချုပ် (NORAD) က ပြောသည်။

ကနေဒါကာကွယ်ရေးဝန်ကြီး အနီတာအာနန်းကိုတွေ့ရစဉ်(GETTY IMAGES)

ထိုပစ်ချမှုကို ကနေဒါဝန်ကြီးချုပ် ဂျက်စတင် ထရူးဒူး (Justin Trudeau) က စနေနေ့တွင် ပထမဆုံး ကြေညာခဲ့ ကာ အပျက်အစီးများအား ကနေဒါတပ်ဖွဲ့များက စုစည်း၊ စစ်ဆေးသွားမည်ဟု ဆိုသည်။

ကနေဒါကာကွယ်ရေးဝန်ကြီး အနီတာအာနန်း (Anita Anand) ကလည်း ထိုအရာ၏ မူရင်းဇစ်မြစ်နှင့် ပတ်သက်၍ ပြောဆိုရန် ငြင်းဆိုခဲ့ပြီး ယင်းသည် ဆလင်ဒါပုံစံ ရှိသည်ဟုသာ ပြောသည်။

ထိုအရာဝတ္တုသည် ပြီးခဲ့သည့် သီတင်းပတ်တွင် ပစ်ချခဲ့သော တရုတ်မိုးပျံပူးဖောင်းနှင့် ပုံစံခြင်း တူညီသော်လည်း ပို၍ သေးသည်ဟုလည်း သူမက ပြောသည်။

အမြင့်ပေ ၄၀၀၀၀ တွင် ပျံသန်းသော ထိုအရာသည် အရပ်ဘက် လေကြောင်း လမ်းအတွက် အန္တရာယ် ဖြစ်စေ နိုင်သောကြောင့် ဒေသစံတော်ချိန် ၃ နာရီ ၄၁ မိနစ်တွင် ပစ်ချခဲ့သည်ဟု ကနေဒါကာကွယ်ရေးဝန်ကြီးက ပြောသည်။

ထိုအရာကို သောကြာနေ့ နှောင်းပိုင်း အလက်စကာ (Alaska) ကောင်းကင်တွင် NORAD က သတိပြုမိခဲ့သည်ဟု ပင်တဂွန်က ပြောသည်။

မြောက်အမေရိက လေကြောင်း ကာကွယ်ရေးဌာနချုပ်ကိုတွေ့ရစဉ်(GETTY IMAGES)

ထိုအရာဝတ္တု ကနေဒါလေပိုင်နက်တွင်းသို့ ဝင်ရောက်လာချိန်တွင် ယင်းကို အလက်စကာ ပူးတွဲစစ်စခန်းမှ အမေရိကန် ဂျက်လေယာဉ်များက စောင့်ကြည့်ခဲ့ပြီး ကနေဒါ၏ CF-18 နှင့် CP-140 တို့ကလည်း ပူးပေါင်းခဲ့သည်။

နှစ်နိုင်ငံကြား အနီးကပ် ပူးပေါင်းဆောင်ရွက်ခဲ့ပြီးနောက် အမေရိကန် F-22 တစ်စင်းက AIM 9X ဒုံးကျည်အသုံးပြု ကာ ယင်းကို ပစ်ချခဲ့သည်ဟု ပင်တဂွန်ပြောခွင့်ရပုဂ္ဂိုလ်က ပြောသည်။

နှစ်နိုင်ငံ ခေါင်းဆောင်ခြင်း ဆက်သွယ်ခဲ့ပြီးနောက် အမေရိကန်စစ်တပ်ကို ကနေဒါနှင့် ပူးပေါင်းဆောင်ရွက်ရန် သမ္မတဘိုင်ဒန်က အမိန့်ပေးခဲ့သည်ဟုလည်း ပင်တဂွန်က ပြောသည်။

လေပိုင်နက် လုံခြုံရေးနှင့်ပတ်သက်၍ အနီးကပ် ဆက်လက် ပူးပေါင်းဆောင်ရွက်သွားရန် ခေါင်းဆောင်နှစ်ဦးက သဘောတူခဲ့သည်ဟုလည်းသိရသည်။

Source: Reuters

CNI International News

ဘန်ကောက်၊ဖေဖော်ဝါရီ ၁၁

မြန်မာနိုင်ငံတွင် ဖြစ်ပွားနေသည့် နိုင်ငံရေးပဋိပက္ခ ဖြေရှင်းရေးတွင် ပိုမိုတက်ကြွစွာ ပါဝင်ဆောင်ရွက်ရန် မလေးရှား ဝန်ကြီးချုပ် အန်ဝါအီဗရာဟင်(Anwar Ibrahim)က ထိုင်းနိုင်ငံကို တိုက်တွန်းခဲ့သည်ဟု ဘန်ကောက်ပို့ သတင်းတွင် ဖော်ပြ ထားသည်။

၎င်းက မြန်မာ့အရေးနှင့် ပတ်သက်ရာတွင် ထိုင်းနိုင်ငံကဲ့သို့ တိုက်ရိုက်ထိစပ်နေသော အိမ်နီးချင်းများက ထုတ်ဖော် ပြောဆိုခြင်း နည်းပါးနေချိန်၌ တခြားသော ရေကြောင်းအရ ထိစပ်နေသည့် အရှေ့တောင်အာရှ နိုင်ငံများက ဒုက္ခ သည် ပြဿနာကို ဖြစ်စေသည့် မြန်မာပဋိပက္ခအပေါ် ပိုမိုအာရုံစိုက် ထုတ်ဖော်ပြောဆိုလျက် ရှိနေသည့် အနေ အထားကိုလည်း ပိုမိုပေါ်လွင် လာစေသည်။

အခြားသော အာဆီယံအဖွဲ့ဝင် နိုင်ငံများနှင့်အတူ ထိုင်းနှင့်မလေးရှားတို့သည် မြန်မာနိုင်ငံတွင်းမှ ပြဿနာများကို အနည်းဆုံး လျော့နည်းသွားစေရန် အရှိန်မြှင့် ဆောင်ရွက်သင့်ကြောင့် အန်ဝါက ပြောသည်။

ဘန်ကောက်မြို့တွင် ထိုင်းဝန်ကြီး ချုပ်ပရာယွတ် (Prayut) နှင့် တွေ့ဆုံခဲ့ပြီးနောက် ထိုသို့ ပြောဆိုခဲ့ခြင်း ဖြစ်သည်။

ပရာယွတ်နဲ့ ဗိုလ်ချုပ်မှူးကြီးမင်းအောင်လှိုင်ကိုတွေ့ရစဉ်(GETTY IMAGES)

မလေးရှားဝန်ကြီးချုပ်သည် ပြီးခဲ့သည့်နှစ်က အာဏာရရှိခဲ့ပြီးနောက် ပထမဆုံးသော တရားဝင် ခရီးစဉ်အဖြစ် ထိုင်းနိုင်ငံသို့ ရောက်ရှိနေခြင်း ဖြစ်သည်။

မြန်မာ့ပြည်တွင်းရေးကို ပြည်တွင်း၌သာ ဖြေရှင်းရမည်ဖြစ်သော်လည်း ယင်းက ဒေသတွင်း နိုင်ငံများအတွက် အကျိုးဆက်များ ဖြစ်စေသည့် စိုးရိမ်မှုများကို ဖော်ပြရန် အကောင်းဆုံး အခြေအနေတွင် ရှိနေသည်ဟု အန်ဝါက ပူးတွဲသတင်းစာ ရှင်းလင်းပွဲ၌ ပရာယွတ်ကို ပြောကြားခဲ့သည်။

ယင်းက မြန်မာအရေးနှင့်ပတ်သက်၍ တိုက်ရိုက် အကျဆုံး ထောက်ပြမှုလည်း ဖြစ်သည်။

အန်ဝါ၏ ပြောဆိုမှုကို ပရာယွတ်ဘက်က တိုက်ရိုက် တုန့်ပြန်ပြောဆိုမှု လုပ်ဆောင်ခဲ့ခြင်းမရှိဘဲ နောက်ပိုင်းတွင်မှ “အားလုံးဟာ မိသားစု ဖြစ်ပြီး ကျေးဇူးတင်ပါတယ်၊ မိတ်ဆွေကြီး”ဟု တုန့်ပြန်ပြောဆို သွားခဲ့သည်။

ဒီမိုကရေစီအရေးတောင်းဆိုနေကြစဉ်(ဖရွန်တီးယားမြန်မာ)

၂၀၂၁ အရပ်သားအစိုးရကို ဖယ်ရှားပြီးချိန်မှ စတင်ကာ နစကသည် သဘောထား မတိုက်ဆိုင်သူများကို နှိမ်နင်း လျက်ရှိသည်။ လုံခြုံရေးတပ်ဖွဲ့ဝင်များနှင့် ပဋိပက္ခများတွင် လူပေါင်း ၃၀၀၀ နီးပါး သေဆုံးခဲ့ရပြီး ခန့်မှန်းခြေ လူပေါင်း ၇၂၀၀၀ နီးပါးသည်လည်း ထိုင်း၊ မလေးရှား၊ အိန္ဒိယနှင့် ဘင်္ဂလားဒေ့ရှ်သို့ ထွက်ပြေးခဲ့ရသည်။

နစကသည် အရေးပေါ်ကာလကို ခြောက်လ တိုးမြှင့် သတ်မှတ်ခဲ့ခြင်းကြောင့် သြဂုတ်လတွင် လျာထားသည့် ရွေးကောက်ပွဲကို ကြန့်ကြာသွားဖွယ်ရှိသည်။

အမေရိကန်နှင့် မဟာမိတ်များက မြန်မာနိုင်ငံအပေါ် အရေးယူ ပိတ်ဆို့မှုများကို ပိုမိုပြုလုပ်ချိန်တွင် အရေးပါသော ကာလကို သက်တမ်းတိုး ခဲ့ခြင်းဖြစ်သည်။

မလေးရှားတွင် ဒုက္ခသည် ၂၀၀၀၀၀ နီးပါးရှိပြီး အများစုမှာ မြန်မာလူမျိုးများ ဖြစ်သည်ဟု အန်ဝါက ပြောသည်။

သေးငယ်သော အရွယ်အစားအရ မလေးရှားသည် ကန့်သတ်ချက်များကို ချမှတ်ထားကာ ဒုက္ခသည် အရေအတွက် များပြားလာချိန်တွင် အရင်းအမြစ်ဆုံးရှုံးမှု သို့မဟုတ် လူသားချင်း စာနာမှုဆိုင်ရာ စိုးရိမ်မှုများကို ထိထိရောက် ရောက် ဖြေရှင်းနိုင်လိမ့်မည် မဟုတ်ဟုလည်း ပြောသည်။

Source: ဘန်ကောက်ပို့စ်

CNI International News

ဘရပ်ဆဲလ်၊ ဖေဖော်ဝါရီ ၁၁

ယူကရိန်းနိုင်ငံအား ဥရောပသမဂ္ဂ(အီးယူ)အဖွဲ့သို့ ဝင်ရောက်ခွင့်ပေးရန် သမ္မတ ဗိုလိုဒီမီယာ ဇာလန်းစကီး (Volodymyr Zelensky) က ကြာသပတေးနေ့တွင် ဘရပ်ဆဲလ်(Brussels) မြို့ရှိ လွှတ်တော်အမတ်များကို အူလှိုက်သည်းလှိုက် တောင်းဆိုခဲ့သည်ဟု CNN သတင်းတွင်ဖော်ပြသည်။

ဥရောပသည် ယူကရိန်း၏ဇာတိ ဖြစ်သည် ဟုလည်း ၎င်းက အခိုင်အမာ ပြောကြားခဲ့သည်။

ဥရောပလွှတ်တော်မိန့်ခွန်းတွင် ဇာလန်းစကီးက ယူကရိန်းနှင့်အီးယူတို့သည် တူညီသောတန်ဖိုးများရှိကြောင်း၊ ဥရောပ၏ ဘဝအဆင့်အတန်းနှင့် ဥရောပ၏ဘဝသတ်မှတ်ချက်များသည် ဉပဒေစိုးမိုးမှုရှိချိန်မှသာ အလုပ်ဖြစ်မည် ဟု ပြောခဲ့သည်။

ယူကရိန်း၏ အီးယူသို့ ပူးပေါင်းရန်ရည်ရွယ်ချက်ကို ရည်ညွှန်းကာ ဇာလန်းစကီးက အိမ်ပြန်လမ်း ဖြစ်ကြောင်း၊ အိမ်သို့အပြန်လမ်းဖြစ်ကြောင်း၊ ပြည်သူများ၏ အိမ်အပြန်လမ်းကို ကာကွယ်ပေးရန် ဒီနေရာတွင် ရှိနေခြင်း ဖြစ်ကြောင်းလည်း ဇာလန်းစကီးက ပြောသည်။ ဇာလန်းစကီး၏ စိတ်ခံစားချက်ပြင်းထန်သော မိန့်ခွန်းသည် ယူကရိန်းနိုင်ငံကို အီးယူအဖွဲ့ဝင်ဖြစ်ရေးကြိုးပမ်းနေချိန်တွင် အီးယူလွှတ်တော်အမတ်များနှင့်ပါ ချိတ်ဆက်နိုင်ရန် ကြိုးပမ်းမှုဖြစ်သည်။

ယူကရိန်းနိုင်ငံသည် ရုရှားထက်စာလျှင် ဥရောပနှင့် တူညီသောတန်ဖိုး ပိုရှိကြောင်း၊ ရုရှားသည် ယူကရိန်းနိုင်ငံအား အတိတ်မှအချိန်များဆီသို့ ပြန်ဆွဲခေါ်ရန်ကြိုးပမ်းနေခြင်းဖြစ်ကြောင်းလည်း ယူကရိန်း သမ္မတက ထောက်ပြ ပြောဆိုခဲ့သည်။

 ဇာလန်းစကီးသည် ဘရပ်ဆဲလ်ရှိ အီးယူ လွှတ်တော်သို့ ရောက်ရှိစဉ် ဥရောပပါလီမန်ဥက္ကဋ္ဌ ရော်ဘတ်တာ မတ်ဆိုလာနှင့် လက်ဆွဲနှုတ်ဆက်ခဲ့စဉ်(ဓါတ်ပုံ-အေအက်ဖ်ပီ)

ရုရှားသည် ဥရောပကို ၁၉၃၀ နှင့် ၄၀ နှစ်များဆီက ကြောက်ရွံ့ထိတ်လန့်နေရသည့် အခြေအနေသို့ ပြန်လည် ခေါ်ဆောင်သွားလိုနေသည်ဟုလည်း ဇာလန်းစကီးက ဥရောပလွှတ်တော်အမတ်များကို သတိပေးသည်။

ယင်းမှာ ယူကရိန်းပြည်သူများအတွက် အဖြေမဟုတ်ကြောင်း၊၎င်းတို့သည် ကိုယ့်ကိုယ်ကို ကာကွယ်နေခြင်း ဖြစ်ကြောင်း၊ ကာကွယ်ရမည်ဖြစ်ကြောင်းလည်း ၎င်းက ပြောသည်။ အီးယူ လွှတ်တော်မိန့်ခွန်းတွင် ဇာလန်းစကီး က ယူကရိန်နိုင်ငံအား လက်နက်နှင့်စစ်ဘက်ဆိုင်ရာအကူအညီများထောက်ပံ့ပေးသည့် နိုင်ငံတိုင်းကို ကျေးဇူးတင် ကြောင်းခဲ့ပြောဆိုခဲ့သော်လည်း နိုင်ငံ၏ လုံခြုံရေးကိုကာကွယ်ရန် ခေတ်မီတင့်ကားများ၊ တာဝေးပစ်ဒုံးကျည်များ နှင့် ခေတ်မီတိုက်လေယာဉ်များမှာ လိုအပ်နေဆဲဖြစ်သည်ဟုလည်း ပြောသည်။

ယူကရိန်းနိုင်ငံ၏ လုံခြုံရေးသည် ဥရောပ၏ လုံခြုံရေးဖြစ်သည်ဟုလည်း ၎င်းကပြောသည်။ လွှတ်တော်မိန့်ခွန်း မတိုင်ခင် ဇာလန်းစကီးကို အီးယူလွှတ်တော်ဥက္ကဋ္ဌ ရော်ဘတ်တာ မတ်ဆိုလာ (Roberta Metsola) က မိတ်ဆက်ခဲ့ပြီး ယူကရိန်းသည် ဥရောပဖြစ်ကြောင်း၊ ယူကရိန်း၏အနာဂတ်သည် အီးယူတွင် ရှိနေကြောင်း ပြောခဲ့သည်။

ဘရပ်ဆဲလ်မြို့၌ ရှိနေစဉ် ယူကရိန်းသို့ တိုက်လေယာဉ်များ ထောက်ပံ့ပေးရေးကိစ္စအတွက် ဆွေးနွေးပွဲများ လုပ်ဆောင်သွားမည်ဖြစ်ကြောင်း၊ ပြုလုပ်ခဲ့ပြီးသော ဆွေးနွေးပွဲများတွင်လည်း ခိုင်မာ၊ ပြတ်သားသော ရလာဒ်များ ရရှိခဲ့ပြီဖြစ်ကြောင်း ဇာလန်းစကီးက ပြောသည်။

Source:CNN

CNI International News

တိုကျို၊ဖေဖော်ဝါရီ ၁၀

ကာကွယ်ရေးဆိုင်ရာ ဆက်ဆံရေးများကို အခိုင်အမာ မြှင့်တင်ရန် ဂျပန်နှင့်ဖိလစ်ပိုင် ခေါင်းဆောင်များက ကြာသပတေးနေ့တွင် သဘောတူခဲ့ကြပြီး ဖိလစ်ပိုင်မြေသို့ ဂျပန်တပ်ဖွဲ့များ ပိုမိုဝင်ရောက်ရန် ခွင့်ပြုခဲ့သည်ဟု အေပီသတင်းတွင် ဖော်ပြထားသည်။

အာရှတွင် တရုတ်၏ လွှမ်းမိုးမှု ကြီးထားလာခြင်းကြောင့် တင်းမာမှုများ မြင့်တက်နေချိန်တွင် ထိုသို့ သဘောတူ ခဲ့ခြင်း ဖြစ်သည်။

ဖိလစ်ပိုင်သမ္မတ ဖာဒီနန် မားကို့စ်ဂျူနီယာ(Ferdinand Marcos Jr.) သည် ဂျပန်နိုင်ငံသို့ ရောက်ရှိနေသည်။

အမေရိကန်တပ်များကို ဖိလစ်ပိုင် စစ်စခန်းများသို့ ဝင်ရောက်ခွင့် တိုးမြှင့်ပေးရေး အမေရိကန်ကာကွယ်ရေး ဝန်ကြီး လွိုက်အော်စတင်(Lloyd Austin)နှင့် သဘောတူညီချက် ရရှိခဲ့ပြီးနောက် ဂျပန်သို့ သွားရောက်ခဲ့ခြင်း ဖြစ်သည်။

တရုတ်၏ နယ်မြေပိုင်ဆိုင်ရေး ရည်ရွယ်ချက်များအပေါ် စောင့်ကြည့်နိုင်ရန် အမေရိကန်ကို ခွင့်ပြုပေးခြင်း ဖြစ်သည်။

ဖိလစ်ပိုင်သမ္မတ မားကို့စ်နှင့်ဂျပန်ဘုရင်ကိုတွေ့ရစဉ်(AP)

မားကို့စ်နှင့် ဂျပန်ဝန်ကြီးချုပ် ဖူမီအို ကီရှီဒါ (Fumio Kishida) တို့ လက်မှတ်ထိုးခဲ့သော ကာကွယ်ရေး သဘောတူ ညီချက်အရ ဂျပန်တပ်များ ဖိလစ်ပိုင်တွင် သဘာဝဘေးအန္တရာယ်များနှင့် လူသားချင်း စာနာမှု လိုအပ်ချက်များ ပေးရေး ပူးပေါင်းလေ့ကျင့်မှုများတွင် ပါဝင်ခွင့်ပေးမည် ဖြစ်သည်။

ထိုသဘောတူညီချက်ကို ကျယ်ပြန့်သော စစ်ဘက်ဆိုင်ရာ ပူးပေါင်းဆောင်ရွက်မှုများဆီသို့ ဦးတည်သော ခြေလှမ်း တစ်ရပ်အဖြစ် ရှုမြင်ကြပြီး ယင်းက ဂျပန်နှင့်တခြားသော အရှေ့တောင်အာရှ နိုင်ငံများကြား သဘောတူညီချက် များနှင့် တူညီသော အခြေအနေသို့ ရောက်ရှိလာဖွယ် ရှိသည်။

ဂျပန်ကာကွယ်ရေး ပစ္စည်းများနှင့် နည်းပညာများကို ဖိလစ်ပိုင်သို့ လွှဲပြောင်းပေးရေး တိုးမြှင့်ရန်၊ အမေရိကန်နှင့် သုံးနိုင်ငံ ပူးပေါင်းဆောင်ရွက်ခြင်းများကို မြှင့်တင်ရန် ကြိုးစားခြင်းအပြင် ဂျပန်နှင့်ဖိလစ်ပိုင်တို့သည် ပူးတွဲစစ်ရေး လေ့ကျင့်မှုများနှင့် တခြားသော စစ်ဆင်ရေးများတွင် ပိုမိုအားကောင်း လာစေရေးအတွက် နောက်ထပ် ပြောဆို ဆွေးနွေးမှုများ လုပ်ဆောင်သွားမည်ဟု ကီရှီဒါက ပြောသည်။

ကာကွယ်ရေး သဘောတူညီချက်သစ်အရ ဂျပန်သည် လူသားချင်း စာနာမှု မစ်ရှင်များ၊ သဘာဝဘေးအန္တရာယ် တုန့်ပြန်ရေး လုပ်ငန်းများအတွက် ဖိလစ်ပိုင်သို့ တပ်ဖွဲ့များ စေလွှတ်ခွင့် ရရှိမည်ဖြစ်သည်။

ထိုသဘောတူညီချက်ကို စစ်ရေးပူးတွဲ လေ့ကျင့်ခြင်း၊ ပူးပေါင်း ဆောင်ရွက်ခြင်းနှင့် အပြန်အလှန် အလည်အပတ် ပြုလုပ်ခြင်း စသည်တို့အထိ မြှင့်တင်ရန် မျှော်လင့်ထားသည်ဟုလည်း ဂျပန်အရာရှိများက ပြောသည်။

Source: AP

CNI International News

မနီလာ၊ ဖေဖော်ဝါရီ ၁၀

တိုက်ခိုက်ရေးဆိုင်ရာ ပူးတွဲလေ့ကျင့်မှုများကို နှစ်ပေါင်းများစွာ လုပ်ဆောင်ခဲ့ပြီးနောက် အမေရိကန်တပ်ဖွဲ့များနှင့် အာရှမဟာမိတ်များသည် တိုက်ပွဲဝင်ရန် အဆင်သင့် ဖြစ်နေပြီဟု အမေရိကန် ဗိုလ်ချုပ်ကြီး ဂျိုးဆက် ရိုင်ရယ် (Joseph Ryan)က ဗုဒ္ဓဟူးနေ့တွင် ပြောခဲ့ကြောင်း အေပီသတင်းတွင် ဖော်ပြထားသည်။

ယူကရိန်းတွင် ရုရှားတပ်များ အထိနာနေခြင်းသည် တရုတ်နှင့်မြောက်ကိုရီးယားတို့ကဲ့သို့ အာရှမှ ရန်လိုသူများ အတွက် သတိပေးချက် ဖြစ်သင့်သည်ဟုလည်း ၎င်းက ဆက်လက် ပြောကြားခဲ့သည်။

ဖိလစ်ပိုင်၊ ဂျပန်နှင့် သြစတြေးလျတို့ အပါအဝင် အမေရိကန်၏ မဟာမိတ်များသည် အတူတကွ ပေါင်းစည်းခြင်း ဖြင့် ကမ္ဘာ့အခြေအနေကို ပြောင်းလဲလိုနေသည့် နိုင်ငံများ၏ ရန်လိုမှုများအား လက်ပိုက်ကြည့်နေမည် မဟုတ် ကြောင်း ဗိုလ်ချုပ်ကြီး ဂျိုးဆက် ရိုင်ရယ် (Joseph Ryan)က ပြောသည်။

 ဖိလစ်ပိုင်၊ ဂျပန်နှင့် သြစတြေးလျ အလံများကိုတွေ့ရစဉ်(GETTY IMAGES)

အာရှဒေသတွင် မဟာမိတ်အဖွဲ့ဝင် မရှိသော်လည်း နေတိုးအဖွဲ့သည် အဖွဲ့ဝင်နိုင်ငံ အချင်းချင်းတွင် သာမက ဒေသ တွင်း လုံခြုံရေးကို ထောက်ပံ့ပေးသော နိုင်ငံတကာသမ္မာစဉ်အား ထောက်ခံသည့် အမေရိကန်၏ မဟာမိတ်များနှင့် ကာကွယ်ရေးပူးပေါင်း ဆောင်ရွက်မှုရှိသော မိတ်ဆွေနိုင်ငံများကို ပြင်ပတိုက်ခိုက်မှုများမှ ကာကွယ်ပေးသွားမည် ဟုလည်း ၎င်းက ပြောသည်။

ရိုင်ရယ်သည် ဟာဝိုင်အီ အခြေစိုက် အမေရိကန်စစ်တပ်၏ အမှတ် ၂၅ ခြေလျင်တပ်မကို ကွပ်ကဲနေသူ ဖြစ်ကာ နှစ်စဉ်ပြုလုပ်နေသော တိုက်ခိုက်ရေးဆိုင်ရာ ပူးတွဲစစ်ရေး လေ့ကျင့်မှု မတိုင်မီ မနီလာမြို့သို့ ရောက်ရှိကာ ဖိလစ်ပိုင်စစ်တပ် အရာရှိများနှင့် တွေ့ဆုံဆွေးနွေးခဲ့သည်။

မတ်လနှင့် ဧပြီလတို့တွင် ပြုလုပ်မည့် အကြီးစား စစ်ရေးလေ့ကျင့်မှုတွင် နှစ်နိုင်ငံတပ်သား ထောင်ပေါင်းများစွာ ပါဝင်ကာ ကြည်း၊ ရေ၊ လေ လေ့ကျင့်ခန်းများနှင့် ကျည်အစစ်များကို အသုံးပြုသော လေ့ကျင့်မှုများ ပါဝင်မည် ဖြစ်သည်။

ဖိလစ်ပိုင်အစိုးရသည် အနည်းဆုံး စစ်စခန်း ၉ ခုတွင် အမေရိကန်တပ်ဖွဲ့များ ဝင်ရောက်ကာ လက်နက်နှင့် ဆက်စပ် စစ်ဘက်သုံးပစ္စည်းများ နေရာချထားရန် ခွင့်ပြုပေးခဲ့သည်။

၂၀၁၄ ကာကွယ်ရေး သဘောတူညီချက်အရ ထိုသို့ လုပ်ဆောင်ခြင်း ဖြစ်သည်။ အမေရိကန် ကာကွယ်ရေးဝန်ကြီး မနီလာမြို့သို့ ရောက်ရှိစဉ် ယင်းကို ထုတ်ပြန် ကြေညာခဲ့ခြင်း ဖြစ်သည်။

 ရှီကျင့်ဖျင်နဲ့ ကင်မ်ဂျုံအန်းကိုတွေ့ရစဉ်(AP)

တရုတ်နှင့်မြောက်ကိုရီးယားတို့ အင်အား ကြီးမားလာခြင်းကြောင့် ဖြစ်သော ခြိမ်းခြောက်မှုများကို တန်ပြန်ရန် အမေရိကန်က ပိုမိုကျယ်ပြန့်သော အာရှ-ပစိဖိတ်ဒေသတွင် တပ်အင်အားကို တိုးချဲ့လာသည်။

တောင်တရုတ် ပင်လယ်အနီးရှိ ကမ်းရိုးတန်း ဒေသများတွင် အမေရိကန်များ ပါဝင်သော စစ်ရေးလေ့ကျင့်မှုများ သည် တရုတ်နိုင်ငံအတွက် စိတ်ဆိုးစရာ ဖြစ်ခဲ့သည်။

တရုတ်သည် တောင်တရုတ်ပင်လယ်မှ ဧရိယာအများစုကို ၎င်းတို့အပိုင်ဟု ကြေညာကာ ဒေသတွင်း နိုင်ငံများနှင့် တင်းမာမှုများ မြင့်တက်လျက် ရှိသည်။

အမေရိကန်သည် အာရှဒေသမှ အငြင်းပွားမှုများကို ကြားဝင်နေကြောင်း၊ ရေတပ်သင်္ဘောနှင့် တိုက်လေယာဉ်များ ပုံမှန်စေလွှတ်ခြင်းဖြင့် အာရှဒေသကို အန္တရာယ်များသည် စစ်ပုံသွင်းနေ ကြောင်း တရုတ်ဘက်က စွပ်စွဲပြောဆို ထားသည်။

Source: AP

CNI International News

မော်စကို၊ဖေဖော်ဝါရီ ၁၀

အမေရိကန်သမ္မတ ဂျိုးဘိုင်ဒန်ကို အကြမ်းဖက်သမားဟု ရုရှားလွှတ်တော်ဥက္ကဋ္ဌ ဗီယာချီဆလတ်ဗ် ဗိုလိုဒင် (Vyacheslav Volodin) က ခေါ်ဝေါ်သမုတ်ခဲ့သည်ဟု အာတီသတင်းတွင် ဖော်ပြထားသည်။

အမေရိကန်သည် ပြီးခဲ့သည့်နှစ်တွင် Nord Stream ပိုက်လိုင်းကို ဖောက်ခွဲခဲ့သည်ဟု ထင်ရှားသော အမေရိ ကန်ထောက်လှမ်းရေး သတင်းထောက် ဆေးမော် ဟာ့ရှ်(Seymour Hersh) က ပြစ်တင်ဝေဖန်ခဲ့ပြီးနောက် ထိုသို့ သမုတ်ခဲ့ခြင်း ဖြစ်သည်။

ဘိုင်ဒန်၏ နှစ်သစ်ကူးလွှတ်တော် မိန့်ခွန်းတွင် အမေရိကန်နိုင်ငံသည် ကမ္ဘာကြီးအတွက် မီးပြတိုက်အဖြစ် ရှိနေသည်ဆိုသော ပြောစကားသည် ဂျာမနီနာဇီ ခေါင်းဆောင်များ၏ ပြောစကားများကို အမှတ်ရစေခဲ့သည်ဟု ဗိုလိုဒင်က ကြာသပတေးနေ့တွင် ပြောခဲ့သည်။

ရုရှားလွှတ်တော်ဥက္ကဋ္ဌ ဗီယာချီဆလတ်ဗ် ဗိုလိုဒင်ကိုတွေ့ရစဉ်(GETTY IMAGES)

ပူလစ်ဇာဆုရှင် သတင်းထောက် ဟာ့ရှ်သည် ပြီးခဲ့သည့် ဗုဒ္ဓဟူးနေ့တွင် ထုတ်ပြန်ချက်တစ်ခု ပြုလုပ်ခဲ့သည်။

ထိုထုတ်ပြန်ချက်၌ အမေရိကန်သည် ပြီးခဲ့သည့်နှစ် စက်တင်ဘာလက Nord Stream ပိုက်လိုင်းများ ပေါက်ကွဲမှု နောက်ကွယ်တွင် ရှိနေသည်ဟု ပြောသည်။

သတင်းအရင်းအမြစ်များ၏ အဆိုအရ အမေရိကန်ရေတပ်မှ ရေငုပ်သမားများသည် ၂၀၂၂ ခုနှစ်၊ ဇွန်လတွင် နေတိုး စစ်ရေး လေ့ကျင့်မှု အယောင်ဆောင်ကာ ဘောလ်တစ်ပင်လယ်တွင်းရှိ အရေးပါသော ပိုက်လိုင်းများ၌ ဖောက်ခွဲ ရေး ပစ္စည်းများ တပ်ဆင်ခဲ့ကြောင်း၊ ထို့နောက်တွင် ဖောက်ခွဲခဲ့ကြောင်း သိခဲ့ရသည်ဟု ဖော်ပြထားသည်။

Nord Stream ၁ နှင့် ၂ တို့သည် ရုရှားမှ သဘာဝဓာတ်ငွေ့ကို ဂျာမနီမှတစ်ဆင့် ဥရောပသို့ ပေးပို့ရေးအတွက် အရေးပါသော လမ်းကြောင်းများ ဖြစ်သည်။

ဟီရိုရှီးမား (Hiroshima) နှင့် နာဂါစကီ (Nagasaki)မှ အရပ်သားများကို နျူကလီးယားလက်နက် အသုံးပြုခဲ့သည့် ထရူးမန်း (Truman) သည် ရာဇဝတ်ကောင် ဖြစ်မည်ဆိုလျှင် ဂျာမနီ၊ ပြင်သစ်နှင့် နယ်သာလန်တို့ကဲ့သို့ မဟာမိတ် များ၏ စွမ်းအင်ဆိုင်ရာ အခြေခံ အဆောက်အဦးကို ဖျက်ဆီးရန် အမိန့်ပေးခဲ့သည့် ဘိုင်ဒန်သည် အကြမ်းဖက်သမား ဖြစ်သည်ဟု ဗိုလိုဒင်က ပြောသည်။

ပိုက်လိုင်းများကို ဖောက်ခွဲခဲ့သည့် အမေရိကန်၏ လုပ်ရပ်သည် သက်ဆိုင်ရာ နိုင်ငံသားများ၏ အကျိုးစီးပွား တိုးတက်အောင် လုပ်ဆောင်ခဲ့သည့် ၎င်းနောက်လိုက် နိုင်ငံများအတွက် ခြိမ်းခြောက်မှုပင် ဖြစ်သည်ဟုလည်း လွှတ်တော် ဥက္ကဋ္ဌက ပြောသည်။

အမေရိကန် ထောက်လှမ်းရေး သတင်းထောက် ဆေးမော်ဟာ့ရှ်ကို တွေ့ရစဉ်(GETTY IMAGES)

ဟာ့ရှ်၏ ဖော်ထုတ်မှုများသည် ဘိုင်ဒန်နှင့် သူ၏ အပေါင်းအဖော်များကို တရားစီရင်ရေး နိုင်ငံတကာစုံစမ်း စစ်ဆေးမှု စတင်ရန်နှင့် အကြမ်းဖက်မှုဒဏ် ခံခဲ့ရသည့် နိုင်ငံများအတွက် လျော်ကြေးပေး သင့်သည်ဆိုသည်ကို သေချာစေရန် အခြေခံ အချက်အလက်အဖြစ် အသုံးပြုသင့်ကြောင့်လည်း ၎င်းက ဆက်လက် ပြောကြားသည်။

အမေရိကန်အစိုးရဘက်က ဟာ့ရှ်၏ ဖော်ထုတ် ရေးသားချက်များကို ငြင်းဆိုခဲ့ကာ ထိုဖော်ထုတ်ချက်များသည် လုံးဝမှားယွင်းသည့် စိတ်ကူးယဉ် သက်သက်သာဖြစ်ကြောင်း လုံခြုံရေးကောင်စီ၏ ပြောခွင့်ရပုဂ္ဂိုလ်က တုန့်ပြန် သည်။

သို့သော် ရုရှားအာဏာပိုင်များဘက်က ပိုက်လိုင်းများ ပေါက်ကွဲမှုကြောင့် အကျိုးအမြတ် ရရှိခဲ့သည့် တစ်ခုတည်း သော နိုင်ငံမှာ အမေရိကန်ဖြစ်သည်ဟု ပေါက်ကွဲမှုအပြီး အမေရိကန်၏ ဥရောပသို့ ဓာတ်ငွေ့တင်ပို့မှု သိသိသာ သာ မြင့်တက်လာခြင်းကို ထောက်ပြပြောဆိုလျက်ရှိသည်။

Source: အာတီ

CNI International News

ဆိုးလ်၊ဖေဖော်ဝါရီ ၁၀

မြောက်ကိုရီးယားခေါင်းဆောင် ကင်ဂျုံအန်းသည် အကြီးစားစစ်ရေးပြအခမ်းအနားတစ်ခုကို သမီးငယ်ဖြစ်သူ နှင့်အတူ တက်ရောက်ခဲ့သည်။

ယင်းသို့ အကြီးစားနျူကလီးယားဒုံးကျည်များပြသမှုတွင် သမီးငယ်ကို ပွဲထုတ်ခဲ့ခြင်းကြောင့် အဆိုပါ ကလေးငယ် သည် မြောက်ကိုရီးယားနိုင်ငံ၏ အနာဂတ်ခေါင်းဆောင်အဖြစ် လျာထားခံရသည်ဆိုသည့် ထင်ကြေးပေးမှုများကို ပိုမိုကြီးထွားလာစေခဲ့ကြောင်း AP သတင်းတွင် ဖော်ပြသည်။

မြို့တော်ပြုံယမ်းတွင် ဗုဒ္ဓဟူးနေ့ည၌ ပြုလုပ်ခဲ့သော စစ်ရေးပြပွဲ၌ ကင်၏ တိုးပွားလာသော နျူကလီးယား လက်နက်တိုက်မှ အကြီးစားလက်နက်အသစ်များကို ပြသခဲ့သည်။ ယင်းတို့တွင် လာမည့်လများအတွင်း စမ်းသပ် ပစ်ခတ်ပြဖွယ်ရှိမည့် အစိုင်အခဲလောင်စာသုံး တိုက်ချင်းပစ်ပဲ့ထိန်းဒုံးကျည်သစ်တစ်မျိုးပါ ပါဝင်ဖွယ်ရှိသည်ဟု ကျွမ်းကျင်သူများက ပြောသည်။

မြောက်ကိုရီးယားခေါင်းဆေင် ကင်ဂျုံအန် မိသားစုကို ဧည့်ပရိသတ်များနှင့် တပ်ဖွဲ့ဝင်များကို ကြိုဆိုဂုဏ်ပြု နေစဉ်(ဓါတ်ပုံ-အေပီ)

ယင်းသည် စစ်ရေးပြပွဲတွင်မြောက်ကိုရီးယားတပ်ဖွဲ့မှ ထုတ်ပြခဲ့သည့် တိုက်ချင်းပစ် ပဲ့ထိန်းဒုံးကျည်သစ် တစ်ဒါဇင်နီးပါးမှ တစ်ခုဖြစ်ကာ ထိုသို့သော ပြသမှုက မြောက်ကိုရီးယားအနေဖြင့် ၎င်းတို့စစ်ဘက်စွမ်းရည်အား မည်သို့မြှင့်တင်နေသလဲဆိုသည်ကို ဖော်ညွှန်းသည်။

ဗုဒ္ဓဟူးနေ့အခမ်းအနားသည် ကင်၏သမီးဖြစ်သူ အသက် (၁၀)နှစ်ဝန်းကျင်အရွယ် ကင်ဂျူအေး (Kim Ju Ae) အား ငါးကြိမ်မြောက် လူမြင်ကွင်းသို့ ပွဲထုတ်မှုလည်းဖြစ်သည်။ အင်္ဂါနေ့တွင်လည်း ကင်သည် သမီးဖြစ်သူကို တပ်ဖွဲ့များ ထံ သွားရောက်တွေ့ဆုံရာသို့ ခေါ်ဆောင်သွားခဲ့သည်။ သူမကို မြောက်ကိုရီးယား မီဒီယာက အလွန်အဆင့်မြင့်မား သူဟု တင်စားကာ သူမသည် အလေးစားခံ၊ အချစ်ခံရသူဟုလည်း သတ်မှတ်ခံထားရသည်။

ထွက်ပေါ်လာသော ဓာတ်ပုံတစ်ပုံ၌ သူမသည် ဗိုလ်ချုပ်ကြီးများ၊ မိဘများခြံရံကာ စားသောက်ပွဲတစ်ခု၏ ဂုဏ်ထူး ဆောင်ထိုင်ခုံတွင် ထိုင်နေသည်ကိုလည်း တွေ့ရသည်။

 စစ်ရေးပြအခမ်းအနားတွင် နျူကလီးယား လက်နက်ပစ္စည်းများကို ထုတ်ဖော်ပြသစဉ်(ဓါတ်ပုံ-အေပီ)

ဗုဒ္ဓဟူးနေ့စစ်ရေးပြပွဲသည် မြောက်ကိုရီးယားစစ်တပ်ကို တည်ထောင်ခြင်း (၇၅) နှစ်ပြည့်အထိမ်းအမှတ်ဖြစ်သည်။ ကင်၏ အုပ်ချုပ်မှုနှင့် နျူကလီးယားပိုင်ရှင်အဖြစ် နိုင်ငံအားတည်ဆောက်မှုတို့အပေါ် ချီးကျူးဂုဏ်ပြုရန် ထိုပွဲကို စစ်သားနှင့်အရပ်သားထောင်ချီက သီတင်းပတ်ပေါင်းများစွာ ကြိုတင်ပြင်ဆင်ခဲ့ကြသည်။

ကြာသပတေးနေ့က မြောက်ကိုရီးယားနိုင်ငံပိုင်ရုပ်သံမှထုတ်လွှင့်မှုတွင် အဆိုပါ အခမ်းအနားသို့ ကင်သည် ၎င်း၏ ဇနီး၊ သမီးဖြစ်သူတို့နှင့် ရောက်ရှိလာကာ ကင်မိသားစုအား ဧည့်ပရိတ်သတ်နှင့် တပ်ဖွဲ့ဝင်ထောင်ပေါင်းများစွာက သောင်းသောင်းဖြဖြ ကြိုဆိုခဲ့ကြသည်ကိုလည်း တွေ့ရသည်။

Source:AP