CNI International News

အစ္စလမ္မာဘတ်၊ ဩဂုတ် ၂၂

အစ္စလာမ္မာဘတ်မြို့တော်တွင် ဩဂုတ် ၂၀ ရက်၌ ဝန်ကြီးချုပ်ဟောင်း အီမရန်ခမ်း မိန့်ခွန်းပြောကြားရာတွင် ရဲတပ်ဖွဲ့နှင့်အခြားပြည်နယ်အုပ်ချုပ်ရေးအဖွဲ့အစည်းများကို ဝေဖန်အပြစ်တင်ခဲ့သဖြင့် ၎င်း၏မိန့်ခွန်းများအား တိုက်ရိုက်ထုတ်လွှင့်မှုများကို ပါကစ္စတန်မီဒီယာထိန်းချုပ်ရေးအဖွဲ့က တားမြစ်လိုက်ကြောင်း အယ်လ်ဂျာဇီးယား သတင်းအရ သိရသည်။

အီမရန်ခမ်းသည် အခြေအမြစ်မရှိသော စွပ်စွဲချက်များ၊ နိုင်ငံတော်အဆင့်အဖွဲ့အစည်းများ၊ တာဝန်ရှိသူများနှင့် စပ်လျဉ်း၍ အမုန်းစကားများ ဖြန့်ချိပြောကြားခဲ့ကြောင်း ပါကစ္စတန်အီလက်ထရောနစ် မီဒီယာထိန်းချုပ်ရေး အာဏာပိုင်အဖွဲ့ (PEMRA) က ထုတ်ပြန်ခဲ့သည်။

ခမ်း၏မိန့်ခွန်းသည် အခြေခံဥပဒေပုဒ်မ ၁၉ ကို ချိုးဖောက် ကြောင်း၊ မိမိတို့ဖမ်းယူတည်းဖြတ်ထားသော မိန့်ခွန်းများကိုသာ ထုတ်လွှင့်ခွင့်ပေးမည်ဟု ညွှန်ကြားပါကြောင်း၊ ထိရောက်သော ဆိုင်းငံ့စေမှုဖြင့် တည်းဖြတ် ထိန်းချုပ်သွားမည်ဖြစ်ကြောင်း စာမျက်နှာ ၆ မျက်နှာ ပါဝင်သည့် သတိပေးစာထဲတွင် PEMRA က ပြောကြားထားသည်။

ဩဂုတ် ၂၀ ရက်ညပိုင်းတွင် အစ္စလာမ္မာဘတ်မြို့၌ လူထုမိန့်ခွန်းပြောကြားခဲ့ရာမှာ “အီမခရန်ခမ်း၏ အနီးကပ် လက်ထောက်ဖြစ်သူ ရှာဘတ်ဂီးလ် (Shahbaz Gill) ကို ဩဂုတ် ၉ ရက်၌ ဖမ်းဆီးသွားခဲ့သည့် ထိပ်တန်း ရဲ အရာရှိ များကို အမှုတွဲတင်မည်”ဟု အီမရန်ခမ်းက ခြိမ်းခြောက်ခဲ့သည်။

အစ္စလာမ္မာဘတ်မြို့တော်၌ ဝန်ကြီးချုပ်ဟောင်း အီမရန်ခမ်း မိန့်ခွန်းပြောနေစဉ်(ဓါတ်ပုံ-အေပီ)

ဂီးလ်ကို ဖမ်းဆီးပြီးနောက် နှစ်ရက်အတွင်း ချုပ်နှောင်ခွင့်ရမန်အတွက် ကြိုးစားခဲ့ကြသည့် အစ္စလာမ္မာဘတ် ရဲတပ်ဖွဲ့အရာရှိများနှင့် အမျိုးသမီးတရားသူကြီးတစ်ဦးကို ခမ်းက ပစ်မှတ်ထား၍ ခြိမ်းခြောက်ခဲ့ခြင်းဖြစ်သည်။

ဂီးလ်သည် တိုင်းပြည်၏အင်အားအကြီးဆုံးစစ်တပ်အတွင်း ပုန်ကန်မှုပေါ်ပေါက်အောင် လှုံဆော်ခဲ့သည်ဟု အစွပ်စွဲခံထားရသည်။

ခမ်းကလည်း ဂီးလ်အပေါ် ရဲတပ်ဖွဲ့၏ညှင်းပန်းနှိပ်စက်မှုများ ရှိခဲ့ကြောင်း ပြန်လှန်စွပ်စွဲခဲ့သည်။ ၎င်း၏ လက်ထောက်လည်းဖြစ်၊ စစ်ဦးစီးချုပ်ဟောင်းလည်း ဖြစ်ခဲ့သည့် ဂီးလ်ကို စွဲချက်တင်ခြင်းသည် ၎င်း၏ပါတီအား စစ်တပ်က အမြင်မကြည်စေရန် ပူးပေါင်းကြံစည်မှုသာဖြစ်ကြောင်း ခမ်းက မိန့်ခွန်းထဲတွင် ဆက်လက်ပြောကြား ခဲ့သည်။

ခမ်းသည် ဂီးလ်ဖမ်းဆီးခံရခြင်းအပေါ် ဆန့်ကျင်ကန့်ကွက်ခဲ့သလို ၎င်း၏ပါတီဖြစ်သော ပါကစ္စတန်သီးရက် အီအင်ဆက်ဖ် (PTI) အပေါ် ပါကစ္စတန်အာဏာပိုင်များ၏ စွပ်စွဲချက်များကိုလည်း ဆန့်ကျင်ကန့်ကွက်ခဲ့သည်။

ဂီးလ်ကို နိုင်ငံရေးအကျဉ်းသားဟူ၍ ခမ်းက ခေါ်ဝေါ်သုံးစွဲခဲ့ပြီး ချက်ချင်းပြန်လွှတ်ပေးရန် အာဏာပိုင်များကို တောင်းဆိုထားသည်။

Source: Aljazeera

CNI International News

ပေါ့ဒ်ဂိုရစ်ဆာ၊ ဩဂုတ် ၂၀

မွန်တီနီဂရိုးနိုင်ငံတွင် ဝန်ကြီးချုပ် ဒရစ်တန်အဘာဇိုဗစ်၏ အစိုးရအဖွဲ့အပေါ် အယုံအကြည်မရှိကြောင်း အဆိုကို လွှတ်တော်က ဩဂုတ် ၂၀ ရက် (ယနေ့) အတည်ပြုခဲ့ကြောင်း ရိုက်တာသတင်းအရ သိရသည်။

အင်အားကောင်းနေသည့် ဆားဘီးယား ဩသဒေါ့ ဘာသာရေး အဖွဲ့အစည်းနှင့် ကာလအတန်ကြာ အငြင်းပွားနေသော သဘောတူစာချုပ် လက်မှတ် ရေးထိုးရေးကို ကန့်ကွက်ရန်လည်း လွှတ်တော်အမတ် များက အဆိုပြုခဲ့ကြသည်။

ဆားဘီးယားဘာသာရေးအဖွဲ့ ကျောထောက်နောက်ခံ ပြုထားသော ဝန်ကြီးချုပ် ဇာဒရက်ဗ်ကိုကရီဗို ကာပစ်၏ အစိုးရကို ပြီးခဲ့သည့် ဖေဖော်ဝါရီလတွင် ပြုတ်ကျခဲ့ပြီးနောက်ပိုင်း ယခုလွှတ်တော်၏ အယုံ အကြည်မရှိ အဆိုတင်သွင်းခြင်းမှာ ဒုတိယအကြိမ် ဖြစ်သည်။
“ရက်ပေါင်း ၁၀၀ အတွင်း ကျနော်တို့ တတ်နိုင်သမျှ လုပ်ဆောင်ခဲ့တဲ့အတွက် အင်မတန် ဂုဏ်ယူပါတယ်။ သက်တမ်းအတိုဆုံး အစိုးရဖြစ်ခဲ့ပေမယ့်လည်း အခက်အခဲဆုံး ဆုံးဖြတ်ချက်တွေ ချခဲ့ရတဲ့ အစိုးရအဖြစ် ကျနော်တို့ အမှတ်တရ ရှိနေမှာပါ” ဟု ဝန်ကြီးချုပ် အဘာဇိုဗစ်က လွှတ်တော်အတွင်း မဲခွဲ အတည်ပြုပြီး နောက် ပြောကြားခဲ့သည်။

မွန်တီနီဂရိုး လွှတ်တော် (Reuters)

ယခုအခါ သမ္မတ မီလိုဒဂျူကာနိုဗစ်သည် နောက်ထပ် ဝန်ကြီးချုပ်အသစ် ခန့်အပ်ရန် အမည်စာရင်း တင်သွင်းရမည် ဖြစ်သည်။ မြောက်အတ္တလန္တိတ်စစ်စာချုပ် (နေတိုး) အဖွဲ့ဝင်ဖြစ်သော မွန်တီနီဂရိုးသည် ဥရောပသမဂ္ဂ (EU) ထဲသို့ ပါဝင်ရန် ဆန္ဒရှိနေပြီး ကြားဖြတ်ရွေးကောက်ပွဲ ကျင်းပပေးနိုင်သည့် အခွင့် အလမ်းလည်း ရှိပြီးဖြစ်သည်။

အေဒရီယေးတစ်ပင်လယ်နှင့် ထိစပ်နေသော မွန်တီနီဂရိုး၏ နိုင်ငံရေးမှာ မွန်တီနီဂရင်း လူမျိုးများနှင့် ရုရှား လိုလားသည့် ဆာ့ဘ်လူမျိုးဟု သတ်မှတ် ခံရသူများအကြား ကာလရှည်ကြာ သဘောထား ကွဲလွဲ မှုများ ရှိခဲ့သည်။ ရုရှားလိုလားသော ဆာ့ဘ်များက မွန်တီနီဂရိုးနှင့် ဆားဘီးယားတို့၏ လွတ်လပ်ရေးကို ဆန့်ကျင်နေကြသည်။

တစ်ရက်ကြာ အခြေအတင် ဆွေးနွေးကြပြီးနောက် သမ္မတမီလိုဒဂျူကာနိုဗစ်၏ ဆိုရှယ်လစ် ဒီမိုကရက် တစ်ပါတီ (DPS) နှင့် အာဏာရ ညွန့်ပေါင်းအဖွဲ့တွင် ပါဝင်သည့် အခြား ပါတီအချို့တို့ ပူးပေါင်း အဆိုပြု ခဲ့သော အယုံအကြည်မရှိ အဆိုကို လွှတ်တော်အမတ် ၈၁ ဦးအနက် ၅၀ ၏ ထောက်ခံမှုဖြင့် အတည်ပြု နိုင်ခဲ့သည်။

အခြား ဘာသာဝင်များနှင့် နှိုင်းယှဉ်ပါက ဩသဒေါ့ ဘာသာရေးအဖွဲ့ကို အလွန်အမင်း အားကောင်း စေ သည်ဟု လူ့အခွင့်အရေး အဖွဲ့များနှင့် အနောက်အုပ်စု လိုလားသော နိုင်ငံရေးပါတီများက ဝေဖန်ခဲ့ကြ သော်လည်း ယခုလအတွင်း ဝန်ကြီးချုပ် အဘာဇိုဗစ်က အဆိုပါ ဘာသာရေးအဖွဲ့နှင့် သဘောတူ စာချုပ် ကို လက်မှတ်ရေးထိုးခဲ့သည်။

ဝန်ကြီးချုပ် အဘာဇိုဗစ် လွှတ်တော်မှာ မိန့်ခွန်းပြောနေ (Reuters)

အထက်ပါ သဘောတူစာချုပ်အရ ပြည်တွင်း၌ နှစ်ပေါင်းများစွာ တည်ရှိနေသော ပြဿနာတစ်ရပ်ကို ဖြေရှင်းနိုင်ခဲ့ပြီး EU လိုလားသော နိုင်ငံရေးပါတီများ၊ ဆားဘီးယားနှင့်ရုရှားတို့ ကျောထောက် နောက်ခံ ပြုသူများအကြား အကွဲအပြဲများကို ကုစားရန် အထောက်အကူပြုကြောင်း ဝန်ကြီးချုပ်က ပြောကြားခဲ့ သည်။

အစိုးရအဖွဲ့အတွင်း အကျင့်ပျက် ခြစားမှု တိုက်ဖျက်ရေး လှုပ်ရှားမှုအား တားဆီးရန်အတွက် နိုင်ငံရေး ပါတီ အချို့ကို ယခု အယုံအကြည်မရှိအဆို တင်သွင်းနိုင်အောင် ပံ့ပိုးပေးသည့် ဒုစရိုက်ဂိုဏ်များလည်း နောက်ကွယ်၌ ရှိခဲ့ကြောင်း ဝန်ကြီးချုပ်က ဩဂုတ် ၁၉ ရက်တွင် ပြောကြားခဲ့သည်။

“ဒီတိုင်းပြည်ကို ရာဇဝတ်သားတွေကပဲဖြစ်ဖြစ်၊ နိုင်ငံသားတွေကပဲဖြစ်ဖြစ် ဆက်ပြီး အုပ်ချုပ်ကြပါ လိမ့် မယ်။ မွန်တီနီဂရိုးမှာ ဒီလို ဒုစရိုက်သမားတွေက နိုင်ငံရေး ဆက်ဆံရေးကို ချိန်ညှိဖို့ သူတို့လက်တံ ထုတ် သုံး နေကြတဲ့အတွက် ကျနော် စိတ်မကောင်း ဖြစ်ရပါတယ်” ဟု အယုံအကြည်မရှိအဆို တင်သွင်းခြင်း ခံရသည့် အစိုးရအဖွဲ့ကို ဦးဆောင်သူ ဝန်ကြီးချုပ် အဘာဇိုဗစ်က ရင်ဖွင့်သွားခဲ့သည်။

Source: Reuters

CNI Internaional News

လန်ဒန်၊ ဩဂုတ် ၂၀

ရုရှားသည် ယူကရိန်းကို ကျူးကျော်ခဲ့ခြင်းကြောင့် နိုင်ငံပေါင်း ၂၀ ပါဝင်သည့် G-20 အုပ်စုအစည်းအဝေးသို့ တက် ရောက်ခွင့် မရှိကြောင်း ဗြိတိန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ဩဂုတ်လ ၁၉ ရက်တွင် ပြောကြား ခဲ့သည်ဟု ရိုက်တာသတင်းဌာနက ရေးသားဖော်ပြသည်။

“ယူကရိန်းမှာ ရန်လိုမှု ဆက်ရှိနေတဲ့အတွက် ရုရှားဟာ G-20 အစည်းအဝေး တက်ခွင့်မရှိပါဘူး” ဟု အဆိုပါ ပြောရေးဆိုခွင့်ရှိသူက ပြောကြားခဲ့သည်။

“G-20 အစည်းအဝေးမှာ ရုရှားရဲ့ သက်ရောက်မှုတွေကို ထည့်စဉ်းစားဖို့ အင်ဒိုနီးရှားရဲ့ ကြိုးပမ်းချက်ကို ကြိုဆိုပါတယ်။ ထို့အတူ G-20 ထိပ်သီး အစည်းအဝေးကို သမ္မတ ဇာလန်းစကီး ကိုယ်စားပြုပြီး ယူကရိန်းတက်မယ့် အလားအလာကိုလည်း ကြိုဆိုပါတယ်” ဟု ၎င်းက ဆက်လက် ပြောကြားခဲ့သည်။

အဆိုပါ ထိပ်သီး အစည်းအဝေးကို လာမည့် နိုဝင်ဘာလတွင် အင်ဒိုနီးရှားနိုင်ငံက အိမ်ရှင်အဖြစ် လက်ခံ ကျင်းပ မည်ဖြစ်ပြီး ရုရှားသမ္မတ ဗလာဒီမာပူတင်နှင့် တရုတ်ခေါင်းဆောင် ရှီကျင့်ဖျင်တို့ တက်ရောက်ကြမည်ဟု သိရသည်။

ဗြိတိန် ဝန်ကြီးချုပ်အဖြစ် ဘောရစ်ဂျွန်ဆင်၏ နေရာကို အစားထိုးရန် ယှဉ်ပြိုင်မည့် ကိုယ်စားလှယ်လောင်း နှစ်ဦး အနက်မှ တစ်ဦးဖြစ်သူ ရီရှီဆန်းနက်က “မော်စကိုအနေဖြင့် ယူကရိန်းစစ်ပွဲ ရပ်တန့်သွားချိန်အထိ ပူတင်ကို အစည်းအဝေးများ တက်ရောက်ခြင်းမှ တားမြစ်ရန်” G-20 အုပ်စုဝင်နိုင်ငံများအား တောင်းဆိုခဲ့သည်။

G-20 အစည်းအဝေး

“ကျနော်တို့ G-20 မိတ်ဖက်နိုင်ငံတွေ၊ မဟာမိတ်တွေအနေနဲ့ ပူတင်ရဲ့ စက်ဆုပ်စရာကောင်းတဲ့ အပြုအမူကို စုပေါင်း ဖော်ထုတ်ကြဖို့ တာဝန်ရှိပါတယ်။ ယူကရိန်းမှာ သူ့ရဲ့ တရားမဝင်စစ်ပွဲကို မရပ်မချင်း (G-20 အစည်း အဝေး) စားပွဲဝိုင်းမှာ ဝင်ထိုင်ခွင့် မရှိဘူးဆိုတာ ပူတင်ဆီကို အသိပေးလိုပါတယ်” ယခင်ဗြိတိန် ဘဏ္ဍာရေး ဝန်ကြီး ဟောင်းဖြစ်ခဲ့သူ ရီရှီဆန်းနက်၏ ပြောရေးဆိုခွင့်ရှိသူက မှတ်ချက်ချခဲ့သည်။

ဘောရစ်ဂျွန်ဆင် နေရာအတွက် ယှဉ်ပြိုင်နေသူ လက်ရှိ ဗြိတိန်နိုင်ငံခြားရေးဝန်ကြီး လစ်ဇ်ထရက်စ် (Liz Truss) ကတော့ “အိန္ဒိယနှင့်အင်ဒိုနီးရှားတို့လို မဟာမိတ်နိုင်ငံများ၏ ရှေ့မှာ ပူတင်ကို ထိပ်တိုက်ရင်ဆိုင်ဖို့ အရေးကြီးကြောင်း” ယခင်ဇူလိုင်လ သူမ၏ သဘောထား မှတ်ချက်များကို ကိုးကားပြီး ထပ်မံပြောကြားခဲ့သည်။

“ကျမ အဲဒီ အစည်းအဝေးတက်မယ်။ အဲဒီမှာ ပူတင်ကို ပြောမယ်” ဟု ယခင် ဇူလိုင် ၂၅ ရက်၌ ရုပ်သံလိုင်း ထုတ်လွှင့်ခဲ့သည့် စကားစစ်ထိုးပွဲတွင် လစ်ဇ်ထရက်ဇ်က မှတ်ချက်ပေးခဲ့သည်။

G-20 အစည်းအဝေးသို့ တက်ရောက်ရန် ရှီကျင့်ဖျင်နှင့် ပူတင်တို့ထံမှ မိမိ အတည်ပြုချက် ရပြီးဖြစ်ကြောင်း အင်ဒိုနီးရှားသမ္မတ ဂျိုကိုဝီဒိုဒိုက Bloomberg သတင်းဌာနသို့ ပြောကြားခဲ့သည်။

Source: Reuters, The Straits Times

CNI International News

ဝါရှင်တန်၊ ဩဂုတ် ၂၀

အမေရိကန်၏စုံစမ်းစစ်ဆေးရေးအဖွဲ့(FBI)ကို သမ္မတ ဂျိုးဘိုင်ဒန်၏ကိုယ်ရေးကိုယ်တာ ဂက်စတာပို ပုလိပ်များဟု အမေရိကန်နိုင်ငံသားအချို့အား ကောက်ယူခဲ့သည့် စစ်တမ်းတစ်စောင်သို့ ဝင်ရောက်ဖြေဆိုသူများက ရှုမြင်ခဲ့ကြ သည်ဟု အာရ်တီသတင်းတစ်ပုဒ်တွင် တွေ့ရသည်။

ကာကွယ်ရေးဦးစီးချုပ်ဟောင်းအား စုံစမ်းစစ်ဆေးမှုအတွင်း ဗဟိုရဲဌာနနှင့်ပတ်သက်၍ သဘောကွဲလွဲမှုအမြင်များ ပိုမိုတိုးပွားလာခြင်းကို အဆိုပါစစ်တမ်းတွင် ထင်ဟပ်မှုရှိခဲ့သည်။

ဩဂုတ် ၁၈ ရက်တွင် ထုတ်ပြန်ခဲ့သည့် ရက်မက်ဆန် (Rasmussen) စစ်တမ်းတွင် FBI အပေါ် အမေရိကန် နိုင်ငံသားများ၏ သဘောထားကွဲလွဲမှုများကို အဓိကပြသခဲ့ပြီး ထရမ့်၏ဖလော်ရီဒါပြည်နယ်ရှိနေအိမ်ကို မကြာ သေးမီက ဝင်ရောက်စီးနင်းမှုအတွက် စစ်တမ်းဖြေဆိုသူ ၄၄ ရာခိုင်နှုန်းတို့က FBI အပေါ် ယုံကြည်ချက်များ ပျောက်ဆုံးစေခဲ့သည်။

သို့သော် ဖြေဆိုသူ ၂၉ ရာခိုင်နှုန်းတို့က FBI အပေါ် ၎င်းတို့ယုံကြည်မှုတိုးလာကြောင်း ပြသခဲ့ကြပြီး ကျန် ၂၃ ရာခိုင် နှုန်းကတော့ ထူးခြားမှုမရှိကြောင်း ဆန္ဒထုတ်ဖော်ခဲ့ကြသည်။

သမ္မတဟောင်း ဒေါ်နယ်ထရမ်း၏ နေအိမ်ကို FBI တပ်ဖွဲ့ဝင်များက ရှာဖွေစီးနင်းမှုများပြလုပ်နေစဉ်(ဓါတ်ပုံ-AP)

FBI ကို ပြည်တွင်းထိပ်ပိုင်းရှိ နိုင်ငံရေးလူရမ်းကားများဟု ပြောခဲ့သည့် ထရမ့်၏အကြံပေးဟောင်း ရော်ဂျာစတုန်း (Roger Stone) ၏ ယခင်မှတ်ချက်ဟောင်းကို စစ်တမ်းတွင် ထည့်သွင်းမေးမြန်းရာ FBI အပေါ် ဂျိုးဘိုင်ဒန်၏ ကိုယ်ရေးကိုယ်တာသုံး ဂက်စတာပိုရဲများအဖြစ် အသုံးချနေခဲ့ကြောင်း ဖြေဆိုသူအများစုဖြစ်သည့် ၅၃ ရာခိုင် နှုန်းက သဘောတူလက်ခံခဲ့ကြသည်။ ၎င်းတို့အထဲတွင် ၃၄ ရာခိုင်နှုန်းက ခြွင်းချက်မရှိ သဘောတူကြောင်း ပြသခဲ့ကြသည်။

အဆိုပါရာခိုင်နှုန်းသည် ပြီးခဲ့သည့်ဒီဇင်ဘာလ၌ ကောက်ယူခဲ့သော စစ်တမ်းမှ ၄၆ ရာခိုင်နှုန်းတက်လာသော်လည်း ၃၆ ရာခိုင်နှုန်းကတော့ ရော်ဂျာစတုန်း၏ စရိုက်လက္ခဏာကို မကြိုက်ကြောင်း ဖော်ပြခဲ့ကြသည်။ စစ်တမ်းရလဒ် များအနက် ရီပက်ဘလစ်ကန်ပါတီဝင် ၇၆ ရာခိုင်နှုန်းနှင့် ဒီမိုကရက်တစ်ပါတီဝင် ၃၇ ရာခိုင်နှုန်းတို့က ဂက်စတာရဲ ဟူသော အဆိုကို သဘောတူကြသဖြင့် နိုင်ငံရေးပါတီဝင်များထံမှ စစ်တမ်းရလဒ်များမှာ လုံးဝကွဲပြားသွားခဲ့သည်။

ထရမ့်၏ ဖလော်ရီဒါပြည်နယ်ရှိ နေအိမ်ကို FBI ဝင်ရောက်စီးနင်းမှုတွင် အိမ်ဖြူတော်ထံမှ ထရမ့်ယူထားသည့် စာရွက်စာတမ်းများကို ခွဲခြားသိမ်းဆည်းထားမှုအား အဓိကရှာဖွေခဲ့ခြင်းဖြစ်ပြီး အချို့မှတ်တမ်းများမှာ ထိပ်တန်း လျှို့ဝှက်ချက်များဖြစ်ကြောင်း၊ နျူကလီးယားလက်နက်ကိစ္စများပင် ပါဝင်နိုင်ခြေရှိကြောင်း FBI ဗျူရိုက မျှော်လင့် ခဲ့သည်ဟု အမေရိကန်အစိုးရတာဝန်ရှိသူများအချို့က ပြောကြားခဲ့သည်။

သို့သော် ယင်းသို့ရှာဖွေမှုအပြီး မည်သည့်အကြောင်းအရာများကို တွေ့ရှိကြောင်းကိုတော့ ရှင်းရှင်းလင်းလင်း ပြောကြားခြင်း မရှိသေးကြောင်း၊ မကြာသေးမီက NBC မီဒီယာမှ ကိုးကားဖော်ပြခဲ့သော အမည်မဖော်လိုသူ သတင်းရင်းမြစ်၏အဆိုအရ FBI အေးဂျင့်များသည် ရှာဖွေသိမ်းဆည်းရမိသော မှတ်တမ်းဖိုင်များကို ခွဲခြားစိတ်ဖြာ ရန် အချိန်လိုအပ်သေးကြောင်း သိရသည်။

Source: အာရ်တီသတင်းဌာန

CNI International News

ရန်ကုန်၊ ဩဂုတ် ၂၀

ဖြုတ်ချခံထားရသော ဒေါ်အောင်ဆန်းစုကြည်ကို တရားရုံးများတွင် စစ်ဆေးမှုများအပြီး၌ အာဏာသိမ်းမှု အကျပ်အတည်း အဆုံးသတ်ရန်အတွက် စေ့စပ်ညှိနှိုင်းဖို့ လမ်းဖွင့်ထားကြောင်း မြန်မာစစ်တပ်အကြီးအကဲက ဩဂုတ် ၁၉ ရက်တွင် ပြောကြားခဲ့သည်ဟု AFP သတင်းကို ကိုးကား၍ CNA ဝက်ဘ်ဆိုက်တွင် ဖော်ပြထားသည်။

အသက် ၇၇ နှစ်ရှိပြီဖြစ်သည့် ဒေါ်အောင်ဆန်းစုကြည်သည် ပြီးခဲ့သည့်နှစ် ဖေဖော်ဝါရီ ၁ ရက် အာဏာသိမ်းမှု၌ မြန်မာစစ်ဗိုလ်ချုပ်ကြီးများ၏ ဖြုတ်ချခြင်း၊ ထိန်းသိမ်းခြင်း ခံခဲ့ရသည်။

သူမကို စွဲချက်တင်ပြီး ထောင်ဒဏ် ၁၇ နှစ် ချမှတ်ထားခဲ့သည်။ စစ်တပ်အုပ်ချုပ်မှုအောက်ရှိ တရားရုံးတွင် ထောင် ဒဏ် ဆယ်စုနှစ်နှင့်ချီနိုင်သည့် အခြားသော စွဲချက်များကိုလည်း သူမအနေဖြင့် ဆက်လက် ရင်ဆိုင်နေရသည်။

“၎င်းအပေါ် ဥပဒေအရ တရားစီရင်မှုကိစ္စများ ပြီးဆုံးပြီးနောက် မိမိတို့လုပ်ဆောင်ချက်အပေါ် တုံ့ပြန်လာမှုများကို မူတည်၍ စဉ်းစားဆောင်ရွက်သွားမည်ဖြစ်ပါသည်” ဟု ဗိုလ်ချုပ်မှူးကြီးမင်းအောင်လှိုင်က ကြေညာချက် တစ်စောင်တွင် ပြောကြားခဲ့သည်။

တရားရုံးမှာ အမှုရင်ဆိုင်နေသော ဒေါ်အောင်ဆန်းစုကြည်နဲ့ ဦးဝင်းမြင့် (AFP)

တရားစီရင်နေမှုများကို သတင်းထောက်များ သတင်းယူခွင့် တားမြစ်ခြင်း၊ သူမ၏ရှေ့နေများက သတင်းမီဒီယာ များအပေါ် နှုတ်ဆိတ်နေခြင်းတို့ ရှိနေသည်။ ဒေါ်အောင်ဆန်းစုကြည်အပေါ် တရားစွဲဆိုမှုများ မည်သည့်အချိန်တွင် နိဂုံးချုပ်မည်ဆိုသည့် အလားအလာကိုမူ နစကဘက်မှ ထုတ်ပြောခြင်း မရှိပေ။

ဒေါ်အောင်ဆန်းစုကြည်ကို တရားဥပဒေနှင့်အညီ အရေးယူ ဆောင်ရွက်နေကြောင်း နစက ဥက္ကဋ္ဌက ပြောကြားခဲ့သည်။

၂၀၁၈ ခုနှစ်တွင် အကျင့်ပျက်ခြစားမှုဖြင့် ဥပဒေအတိုင်း ပြစ်ဒဏ်ချမှတ်ခံခဲ့ရသော တောင်ကိုရီးယားသမ္မတ ပက်ချုံဟီး (Park Geun-hye) ၏ အမှုကိုလည်း ၎င်းက ကိုးကားဖော်ပြခဲ့သည်။

ပက်ချုံဟီးကိုတော့ နောက်ပိုင်းမှာ လွတ်ငြိမ်းချမ်းသာခွင့်နှင့် ပြန်လွှတ်ပေးခဲ့ကြောင်း AFP က ဆက်လက် ရေးသားသည်။

ကုလအထူးကိုယ်စားလှယ် နိုလင်းဟေဇာနဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ် 

ဒေါ်အောင်ဆန်းစုကြည်အပေါ် အခြားစွဲချက် ၇ ချက်တွင် အဂတိလိုက်စားမှု၊ ရွေးကောက်ပွဲဥပဒေ ချိုးဖောက်မှုနှင့် ကိုလိုနီခေတ် တရားဝင် လျှို့ဝှက်ချက်ဥပဒေ ချိုးဖောက်မှု အပါအဝင် အခြားစွဲချက် အတင်ခံထားရသည့် ဩစတြေးလျ စီးပွားရေးပညာရှင် ရှောင်တာနဲလ် (Sean Turnell) နှင့်လည်း ပူးတွဲ စွပ်စွဲထားသည်။

၎င်းတို့နှစ်ဦးစလုံးသည် အဆိုပါစွပ်စွဲချက်တွင် အပြစ်ရှိကြောင်း တွေ့ရှိပါက ထောင်ဒဏ် ၁၅ နှစ်အထိ ကျခံရနိုင်သည်။

ရှောင်တာနဲလ်ကို ပြင်းထန်သော ပြစ်ဒဏ်ချမှတ်မှုအတွက် လုံလောက်သည့် သက်သေ အထောက်အထားများ ရှိကြောင်း ဗိုလ်ချုပ်မှူးကြီးမင်းအောင်လှိုင်က ပြောကြားခဲ့သည်။

အသေးစိတ် အချက်အလက်များကို ဖော်ပြခြင်း မရှိသော်လည်း ဩစတြေးလျအစိုးရဘက်မှ အပြုသဘောဆောင် လုပ်ဆောင်ပါက ၎င်းအနေဖြင့် သက်ညှာနိုင်ကြောင်း ဆက်လက် ပြောကြားခဲ့သည်။

Source: AFP, Channel News Asia

CNI International News

ကိယက်ဗ်၊ ဩဂုတ် ၁၉

ရုရှားထံမှ ယခင်က ဝယ်ယူထားမိသည့် လက်နက်များကို ပြန်လည်စဉ်းစားရန် လိုအပ်ကြောင်း အရှေ့တောင် အာရှနိုင်ငံများကို ယူကရိန်းက တိုက်တွန်းခဲ့သည်ဟု ဩဂုတ် ၁၈ ရက် ရက်စွဲဖြင့် South China Morning Post သတင်းစာက ရေးသားဖော်ပြသည်။

ထို့နောက် မော်စကို(ရုရှား)၏ စစ်မြေပြင်စွမ်းဆောင်ရည် ညံ့ဖျင်းမှုမှာ ၎င်း၏ လက်နက် အရည်အသွေးနှင့် ပတ်သက်၍ သတိပေး ချက်တစ်ခု ဖြစ်ကြောင်း ယူကရိန်းဘက်က ဆက်လက်ပြောသည်။

ယူကရိန်းနိုင်ငံခြားရေးဝန်ကြီး ဒီမီထရိုကူလီဘာသည် ဩဂုတ် ၁၇ ရက်တွင် အာရှဒေသမှ သတင်းထောက်များနှင့် တွေ့ဆုံ၍ အင်တာဗျူး ဖြေကြားစဉ် This Week in Asia ကဏ္ဍမှ မေးမြန်းမှုကို အထက်ပါအတိုင်း သဘောထား မှတ်ချက်ပေးခဲ့ခြင်း ဖြစ်သည်။
ယူကရိန်း-ရုရှား ပဋိပက္ခ ဖြစ်ပွားခဲ့ခြင်းကြောင့် ရုရှား၏ လက်နက် တင်ပို့မှုပုံစံမှာ ပုံစံပြောင်းလဲနေပြီဖြစ်ကြောင်း စစ်ရေးလေ့လာသုံးသပ်သူများက ပြောကြားခဲ့ကြသည်။

ရုရှားသည် အမေရိကန်ပြီးလျှင် ကမ္ဘာ့ဒုတိယ လက်နက်တင်ပို့ ရောင်းချမှု အများဆုံးနိုင်ငံ ဖြစ်သော်လည်း အရှေ့ တောင် အာရှတွင်တော့ ရုရှားက ထိပ်ဆုံးမှ ရပ်တည်နေသည်။

ရုရှား စစ်လက်နက် ပြပွဲမှာ ပူတင်နဲ့ကာကွယ်ရေး၀န်ကြီးကိုတွေ့ရစဉ် (GETTY IMAGES)

အဆိုပါ လက်နက်သွင်းကုန်များကို ကိုယ်ကျင့်တရားနှင့် လက်တွေ့ကျသော အကြောင်းပြချက်များဖြင့် ရှောင်ရှား ကြရန်မှာ အရှေ့တောင်အာရှဒေသတွင်းရှိ အစိုးရများအပေါ် တာဝန်ရှိကြောင်း ကူလီဘာက ဆက်လက် ပြော ကြားခဲ့သည်။

ယခုပြိုင်ဆိုင်နေခြင်းထက် စော၍ ရုရှားလက်နက်များကို ထုတ်လုပ်ထားပြီးသားဖြစ်ကြောင်း မော်စကိုမြို့ပြင်တွင် ကျင်းပသည့် လက်နက်ပြပွဲ၌ သမ္မတ ဗလာဒီမာပူတင် ပြောကြားခဲ့ပြီး နှစ်ရက်အကြာတွင် ကူလီယာ၏ အထက်ပါ သဘောထား မှတ်ချက်များ ထွက်ပေါ်လာခဲ့ခြင်း ဖြစ်သည်။

“ရုရှားဆီက လက်နက်ဝယ်ဖို့ စဉ်းစားတဲ့သူတွေဟာ ဒီလက်နက်တွေရဲ့ အဖျက်စွမ်းအားကို ယူကရိန်းရဲ့ အတွေ့ အကြုံကနေ အရင်ဆုံး လေ့လာသင့်ပါတယ်” ဟု Zoom ဖြင့် အွန်လိုင်းအင်တာဗျူး၌ ကူလီဘာက ထပ်လောင်း ပြောကြားခဲ့သည်။

“ခင်ဗျားတို့ အနေနဲ့ ပြပွဲတစ်ခုမှာ အင်မတန် ကြည့်ကောင်းတယ်ဆိုပြီးတော့ ငွေကြေး သန်းနဲ့ချီ၊ ကုဋေနဲ့ချီပြီး ချမသုံးကြစေချင်ဘူး။ ဒါပေမယ့် စစ်မြေပြင်အတွက်တော့ တချို့ဟာတွေက အလုပ်မဖြစ်ဘူး” ဟု ၎င်းက ရှင်းပြ သည်။

၎င်းတို့ ရရှိထားသော အချက်အလက်များအရ ရုရှားသည် ခေတ်မီပြီး တိကျသည့် လက်နက်များ ပြတ်တောက်မှု နှင့် ရင်ဆိုင်နေရသော်လည်း ဆိုဗီယက်ခေတ်ဟောင်းမှ လက်ကျန် စစ်သုံးကိရိယာများစွာ ရှိနေသေးကြောင်း၊ ရုရှား၏ သူရသတ္တိဖြင့် လက်နက်အားလုံးကို ယခင်နှစ်များကဲ့သို့ လိုချင်သလောက် ထုတ်ရောင်းရန် အဆင့်သင့် ဖြစ်မည် မထင်ကြောင်း ယူကရိန်းနိုင်ငံခြားရေးဝန်ကြီး ကူလီဘာက သတင်းထောက်များကို ပြောကြားခဲ့ သည်။

ရုရှားရဲ့ စစ်လက်နက်ပြပွဲ (TASS)

၂၀၀၀ ပြည့်နှစ်မှ ၂၀၂၁ ခုနှစ်အထိ အရှေ့တောင်အာရှသို့ ရုရှားလက်နက်တင်ပို့မှု တန်ဖိုး စုစုပေါင်း အမေရိကန် ဒေါ်လာ ၁၀ ဒသမ ၈၇ ဘီလီယံရှိခဲ့ရာ အလားတူ တရုတ်၏ လက်နက်တင်ပို့မှု ဒေါ်လာ ၂ ဒသမ ၉ ဘီလီယံနှင့် နှိုင်းယှဉ်ကြည့်နိုင်သည်။

အရှေ့တောင်အာရှတွင် ရုရှားအတွက် အရေးပါသည့် ကာကွယ်ရေးပစ္စည်း ဖောက်သည်များမှာ ဗီယက်နမ်၊ မြန်မာ၊ မလေးရှားနှင့် အင်ဒိုနီးရှားတို့ ဖြစ်ကြသည်။

မော်စကိုနှင့် မည်သည့် အရောင်းအဝယ် စာချုပ်ကိုမဆို မျက်နှာပန်းလှအောင် ခြယ်သထားခြင်းအား သတိပြုမိရန် လိုအပ်ကြောင်း၊ ဒုံးကျည်တစ်စင်းကို ရောင်းချခြင်းကိုပင် ရုရှားဝါဒ ဖြန့်ချိရေးထံမှ အစင်းရေ ၁၀၀ ရောင်းချမည်ဟု ပြောဆိုတတ်ကြောင်း ကူလီဘာက ထောက်ပြသွားခဲ့သည်။

Source: South China Morning Post

CNI International News

ဝါရှင်တန်၊ ဩဂုတ် ၁၉

ယူကရိန်းအတွက် အမေရိကန်က နောက်ထပ် စစ်ရေးအကူအညီ ဒေါ်လာ သန်း ၈၀၀ တန်ဖိုးရှိ အကူအညီများ ပေးအပ်ရန် ပြင်ဆင်နေကြောင်း ရိုက်တာသတင်းက ရေးသားထားသည်။

အဆိုပါ အစီအစဉ်ကို ဩဂုတ် ၁၉ ရက်တွင် ကြေညာနိုင်ကြောင်း ထိုအရေးကိစ္စနှင့်နီးစပ်သည့် သတင်းရင်းမြစ် ၃ ခု က ပြောကြားခဲ့သည်ဟု ရိုက်တာက ဖော်ပြထားသည်။

ဂျိုးဘိုင်ဒန်သည် ၎င်း၏ သမ္မတလုပ်ပိုင်ခွင့်ထဲမှ ယူငင်သုံးစွဲနိုင်ခြင်းကို အသုံးပြု၍ ယခုအကူအညီ ပေးအပ်မည် ဖြစ်ကြောင်း၊ ပိုလျှံနေသော လက်နက်များကို အမေရိကန်၏ လက်ကျန်များအဖြစ် လွှဲပြောင်းပေးမည်ဟု ကြားသိရကြောင်း အဆိုပါသတင်းရင်းမြစ်များက ဆက်လက်ပြောကြားခဲ့သည်။

အမည်မဖော်လိုသူ ၎င်းသတင်းရင်းမြစ်များက “အမေရိကန်၏ကြေညာချက်တစ်စောင်သည် လာမည့် ရက်သတ္တပတ်သို့ ကူးပြောင်းသွားနိုင်ကြောင်းနှင့် ကြေညာချက်မထွက်မီ လက်နက်တန်ဖိုး ကိန်းဂဏန်းအပြောင်းအလဲ ရှိနိုင်ကြောင်း” မှတ်ချက်ချခဲ့ကြသည်။

ယူကရိန်းဆီသို့ အမေရိကန်က ထပ်မံပို့ဆောင်မည့် ဒေါ်လာ သန်း ၈၀၀ စစ်ရေးအကူအညီများကို ပြင်ဆင် နေစဉ်(ဓါတ်ပုံ-ရိုက်တာ)

အထက်ပါသတင်းနှင့်ပတ်သက်၍ အိမ်ဖြူတော်သို့ ရိုက်တာက မေးမြန်းခဲ့ရာ ဖြေကြားဖို့ရန် ငြင်းဆန်ခဲ့သည်။

ပြီးခဲ့သည့် ဖေဖော်ဝါရီလတွင် ရုရှားတပ်များ ယူကရိန်းနိုင်ငံထဲသို့ ကျူးကျော်ဝင်ရောက်ချိန်မှစတင်ပြီး ရုရှားသမ္မတ ဗလာဒီမာပူတင်က အထူးစစ်ဆင်ရေးတစ်ရပ်ဟု ကင်ပွန်းတပ်ခဲ့ပြီး လက်ရှိစစ်ရေးပဋိပက္ခသည် ယူကရိန်း အရှေ့ ပိုင်းနှင့်တောင်ပိုင်းတို့ကို အဓိကအာရုံစိုက်သည့် စစ်ပွဲအဖြစ်သို့ ကူးပြောင်းရောက်ရှိသွားခဲ့သည်။

နည်းပညာမြင့်၍ ရွေ့လျားနိုင်စွမ်း ပိုမိုကောင်းမွန်သော ဟိမာ့စ် အမြောက်ဒုံးကျည်စနစ် (HIMARS) နှင့် အမြောက် ကျည်ဆန်များ၊ ဂျာဗီလင် (Javelin) တင့်ကားဖျက်ဒုံးစနစ်များ၊ ဖောက်ခွဲရေးပစ္စည်းများ၊ ချေမှုန်းရေးကိရိယာများ အပါအဝင် ကိယက်ဗ်အစိုးရထံသို့ အမေရိကန်က လုံခြုံရေးအကူအညီ ဒေါ်လာဘီလီယံနှင့်ချီ၍ ဆက်တိုက်ပံ့ပိုးနေ ခဲ့သည်။

ယခုနောက်ဆုံးပေးအပ်မည့် အစီအစဉ်တွင် မည်သည့်လက်နက်အမျိုးအစားများ ပါဝင်မည်ကို မသိရကြောင်း ရိုက်တာသတင်းကို ကိုးကား၍ အယ်လ်ဂျာဇီးယားက ရေးသားဖော်ပြသည်။

Source: Reuters, Aljazeera

CNI International News

ဆိုးလ်၊ ဩဂုတ် ၁၉

တောင်ကိုရီးယားသမ္မတ ယွန်ဆော့ရွဲ (Yoon Suk Yeol) ကမ်းလှမ်းလာသည့် စီးပွားရေး အကျိုးအမြတ် အကူအညီ ကို လက်ခံမည် မဟုတ်ကြောင်းနှင့် ပါးစပ်ပိတ်ထားရန် မြောက်ကိုရီးယားခေါင်းဆောင် ကင်မ်ဂျုံအန်း၏ ညီမ ဖြစ်သူ ကင်မ်ယိုဂျုံက ပြောကြားခဲ့သည်။

နျူကလီးယားကင်းစင်ရေး ခြေလှမ်းများအတွက် ပြန်လည်စဉ်းစားရန် တောင်ကိုရီးယားဘက်မှ အဆိုပြုချက်များ ကိုလည်း မြောက်ကိုရီးယားက ထပ်တလဲလဲ ပယ်ချခဲ့သည်။

တောင်ကိုရီးယားသမ္မတ ယွန်ဆော့ရွဲ၏ အတင့်ရဲသော ကမ်းလှမ်းချက်ကို ပြီးခဲ့သည့် မေလတွင် စတင် အဆိုပြုခဲ့ ခြင်းအပေါ် မြောက်ကိုရီးယားမှ ထိပ်ပိုင်းတာဝန်ရှိသူ တစ်ဦးအနေဖြင့် အထက်ပါအတိုင်း ပထမဆုံးအကြိမ် တုံ့ပြန် ခဲ့ခြင်းဖြစ်သည်။

ကင်မ်ယိုဂျုံ၏ သဘောထား မှတ်ချက်များသည် သူမအတွက် အစိုးရတာဝန်ယူခြင်း ရက် ၁၀၀ ပြည့် အထိမ်း အမှတ်အဖြစ် ဩဂုတ် ၁၇ ရက် သတင်းစာ ရှင်းလင်းပွဲ၌ ထပ်လောင်း ပြောကြားခဲ့ခြင်းဖြစ်သည်။

ကင်မ်ယိုဂျုံက “တကယ့်ကို ရိုးရှင်းပါတယ်။ ကလေးဆန်တဲ့ သဘောရှိတာကြောင့် သူ့ပုံစံက ပါးစပ်ပိတ်ထားရင် ပိုအဆင်ပြေမှာပါ” ဟု ပြောကြားခဲ့ကြောင်း မြောက်ကိုရီးယားအစိုးရမီဒီယာ KCNA က ထုတ်လွှင့်ခဲ့သည်။

“မြောက်ကိုရီးယားရဲ့ဂုဏ်သိက္ခာနဲ့ နျူကလီးယား လက်နက်တွေကို စီးပွားရေးနဲ့ လဲမယ်လို့ သူထင်နေတာ။ ပြောင်းဖူး ကိတ်မုန့် တစ်လုံးရဖို့ ကိုယ့်ကံကြမ္မာကို ဘယ်သူကမှ အလဲအလှယ် မလုပ်ဘူး” ဟု ၎င်းက ဆက်လက် ပြောကြားခဲ့သည်။

 တောင်ကိုရီးယားသမ္မတ ယွန်ဆော့ရွဲ(Reuters)

သူမ၏ သဘောထား မှတ်ချက်များသည် သေးသိမ်ယုတ်ညံ့လွန်းကြောင်း မြောက်ကိုရီးယားနှင့် ဆက်ဆံရေးကိစ္စ ကိုင်တွယ်နေရသည့် တောင်ကိုရီးယားဘက်မှ ပြန်လည်ပေါင်းစည်းဝန်ကြီးက ပြောကြားခဲ့သည်။

နျူကလီးယား လက်နက် ထုတ်လုပ်မှု ရပ်တန့်ပြီး အဏုမြူကင်းစင်ရေး စတင်လျှင် မြောက်ကိုရီးယားကို စီးပွား ရေး အကူအညီများ ပေးအပ်ရန် ဆန္ဒရှိကြောင်း တောင်ကိုရီးယားသမ္မတ ယွန်ဆော့ရွဲက ယခင်ကတည်းက ပြော ကြား နေခဲ့သည်။

ထို့ပြင် မြောက်ကိုရီးယားအပေါ် စစ်ရေးအရ ဟန့်တားမှုကို တိုးမြှင့် လုပ်ဆောင်သွားရန်လည်း သမ္မတယွန်က အလေးပေး နေခဲ့သည်။

တောင်ကိုရီးယားသည် လာမည့် သီတင်းပတ်တွင် လုပ်ဆောင်မည့် ကွင်းဆင်း လေ့ကျင့်မှု အပါအဝင် အမေရိကန် နှင့် အချိန်အတန်ကြာ ဆိုင်းငံ့ထားသည့် ပူးတွဲစစ်ရေး လေ့ကျင့်မှုများကို ပြန်လည် စတင်ခဲ့သည်။

အမေရိကန်နိုင်ငံခြားရေးဌာန ပြောရေးဆိုခွင့်ရှိသူက သမ္မတယွန်၏ မူဝါဒများကို ဝါရှင်တန်အနေဖြင့် ထောက်ခံ ကြောင်း ဩဂုတ် ၁၇ ရက်တွင် ပြောကြားခဲ့သည်။

သိုသော် ယခုစတင်မည့် စစ်ရေးလေ့ကျင့်မှုတွင် အမေရိကန်၏ မဟာမိတ်နိုင်ငံများ သံတမန်ရေးရာ ပြောဆို ဆက်ဆံမှုမှာ ရိုးဖြောင့်ခြင်း မရှိပုံကို ပြသနေကြောင်း ကင်မ်ယိုဂျုံက ဝေဖန်ခဲ့သည်။

“သူနဲ့ မျက်နှာချင်းဆိုင် ထိုင်လို့မရဘူးဆိုတာ ရှင်းပါတယ်” ဟု ယွန်ဆော့ရွဲနှင့်ပတ်သက်၍ ၎င်းက ဆက်လက် ဝေဖန်ခဲ့သည်။

ကင်မ်ယိုဂျုံသည် မကြာသေးမီ နှစ်များအတွင်း တောင်ကိုရီးယားကို ဝေဖန် အပြစ်တင်သူ တစ်ဦးဖြစ်လာခဲ့ပြီး အစ်ကို ဖြစ်သူ၏ ပြောကြားချက်များကို ပိုမိုသိမ်မွေ့စွာ ထပ်ဆင့် ပြောဆိုရာ၌ ရဲရဲတင်းတင်း ရှိသူအဖြစ် လေ့လာ သုံးသပ်သူများက ရှုမြင်နေကြသည်။

ဩဂုတ် ၁၉ ရက် သတင်းထုတ်ပြန်ချက်သည် ယနေ့ အချိန်အထိ ယွန်ဆော့ရွဲ အပေါ် သူမ၏ အပြင်းထန်ဆုံး ပုဂ္ဂိုလ်ရေးအရ တိုက်ခိုက်မှုဖြစ်ကြောင်း ရိုက်တာက ဆက်လက် ရေးသားထားသည်။

Source: Reuters

CNI International News

ဘာမာကို၊ ဩဂုတ် ၁၈

မိမိ၏ဝေဟင်ပိုင်နက်ကို ချိုးဖောက်ပြီး ပြည်တွင်း လက်နက်ကိုင် အဖွဲ့များထံသို့ ပြင်သစ်က လက်နက်များ ပေးပို့နေကြောင်း မာလီအစိုးရမှ စွပ်စွဲခဲ့သည်။

အနောက်အာဖရိကရှိ မာလီနိုင်ငံနှင့် ၎င်း၏ ယခင်ကိုလိုနီ အုပ်ချုပ်သူ ပြင်သစ်တို့အကြား တင်းမာမှုများရှိနေခဲ့ရာ ယခု နောက်ဆုံး စွပ်စွဲချက်ကို မာလီအစိုးရက ထုတ်ဖော်လိုက်ခြင်း ဖြစ်သည်။

ဩဂုတ် ၁၅ ရက် ရက်စွဲဖြင့် ကုလသမဂ္ဂ (UN) လုံခြုံရေးကောင်စီ အကြီးအကဲထံသို့ စာတစ်စောင် ပေးပို့ခဲ့ရာ မာလီနိုင်ငံခြားရေးဝန်ကြီး အဗ္ဗဒူလာရီဒီးရော့ (Abdoulaye Diop) က “၎င်းတို့၏ ဝေဟင်ပိုင်နက်အတွင်းသို့ ယခု နှစ်အတွင်း အကြိမ် ၅၀ ကျော် ချိုးဖောက် ဝင်ရောက်မှုများ ရှိခဲ့ကြောင်း၊ ဒရုန်းများ၊ စစ်သုံး ရဟတ်ယာဉ်များနှင့် တိုက်လေယာဉ်များဖြင့် ပြင်သစ်တပ်ဖွဲ့၏ ချိုးဖောက်ဝင်ရောက်မှုများဖြစ်ကြောင်း” အသိပေး ရေးသားခဲ့သည်။

မာလီနိုင်ငံက ပြင်သစ်တပ်ဖွဲ့ကိုတွေ့ရစဉ် (GETTY IMAGES)

“မာလီ ဝေဟင်ပိုင်နက်ထဲကို ပြောင်ပြောင်တင်းတင်း ချိုးဖောက်မှုတွေ အနေနဲ့ ဆာဟဲ (Sahel) ဒေသမှာ ရှိနေတဲ့ အကြမ်းဖက် အဖွဲ့တွေရဲ့ အချက်အလက်တွေ စုဆောင်းတာ၊ လက်နက်ခဲယမ်း မီးကျောက် ချပေးတာတွေ ပြင်သစ် လုပ်ဆောင်ခဲ့ပါတယ်” ဟု အထက်ပါစာထဲတွင် ဆက်လက် ရေးသားထားသည်။

ကမ္ဘာတဝန်းအတွင်း အကြမ်းဖက်ဟု သတ်မှတ်ထားသော အဆိုပါ လက်နက်ကိုင် အဖွဲ့များထံသို့ ပြင်သစ်က တိုက်ရိုက် (သို့မဟုတ်) သွယ်ဝိုက်သောနည်းဖြင့် ပံ့ပိုးကူညီမှု မရှိကြောင်း မာလီနိုင်ငံရှိ ပြင်သစ်သံရုံးက တွစ်တာမှ တစ်ဆင့် ပြောကြား၍ တုံ့ပြန်ခဲ့သည်။

မာလီတွင် ၉ နှစ်ကြာ စစ်ဆင်ရေးအတွင်း ပြင်သစ်တပ်ဖွဲ့ဝင် ၅၃ ဦး ကျဆုံးခဲ့ကြောင်း၊ ပြင်သစ်သည် မာလီနိုင်ငံ သားများ လုံခြုံရေးတိုးမြှင့်ရန်အတွက် ပြည်တွင်း လက်နက်ကိုင် အဖွဲ့များကို ရာနှင့်ချီ၍ သတ်ဖြတ် ရှင်းလင်း ပေးခဲ့ကြောင်း သံရုံးက ဆက်လက် ပြောကြားခဲ့သည်။

မာလီနိုင်ငံအတွင်းက လက်နက်ကိုင်အဖွဲ့ကိုတွေ့ရစဉ် (GETTY IMAGES)

တဖန် မာလီစစ်တပ်က ငှားရမ်းထားသော ရုရှားကြေးစား တိုက်ခိုက်ရေးသမားများ ပြည်တွင်း၌ ဖြန့်ကြက်ထား ချိန်၌ ပါရီ(ပြင်သစ်အစိုးရ)သည် မိမိတို့နိုင်ငံ မတည်မငြိမ်ဖြစ်အောင် လုပ်ဆောင်နေသည်ဟု ဘာမာကိုမြို့တော်ရှိ မာလီအစိုးရက အကြိမ်ကြိမ် စွပ်စွဲနေခဲ့သည်။

ပြင်သစ်သည် ဆာဟဲဒေသ လုံခြုံရေး အကျပ်အတည်းကြောင့် ၉ နှစ်ကြာ စစ်ဆင်ရေးကို အဆုံးသတ်ခဲ့ပြီး မာလီ နိုင်ငံအတွင်းမှ ပြင်သစ်တပ်များကို ဩဂုတ် ၁၅ ရက်တွင် အပြီးအစီး ရုပ်သိမ်းခဲ့သည်။

ဆယ်စုနှစ် ၁ ခုကြာ ချေမှုန်းရေးအတွက် ဒေါ်လာဘီလီယံ ပေါင်းများစွာ သုံးစွဲခဲ့သော ပြင်သစ်သည် မိမိတို့ ပြည်တွင်း လက်နက်ကိုင်များကို လက်နက်များ အထောက်အပံ့ ပေးခဲ့ခြင်းအတွက် ခိုင်လုံသော အထောက်အထား များရှိကြောင်း ဘာမာကိုမြို့တော်ရှိ အာဏာပိုင်များက ပြောကြားခဲ့ကြသည်။

Source: Aljazeera