CNI News

၂၀၂၃ ခုနှစ်၊ ဇွန် ၂၈

ကရင်အမျိုးသားအစည်းအရုံး (KNU) အနေဖြင့် တပ်မဟာ တစ်ခုကို ဖွဲ့စည်းရန် ပြင်ဆင်နေကြောင်း သတင်းများ ထွက်ပေါ်လာပြီးနောက် လက်တွေ့ အကောင်အထည်ဖော်နေခြင်း ရှိ/မရှိကိုတော့ မေးခွန်းထုတ်နေဆဲဖြစ်သည်။

KNU သည် တပ်မဟာ ၈ ကို ဖွဲ့စည်းမည်ဟု ယခင်ကတည်းက သတင်းထွက်ပေါ်ခဲ့ဖူးသလို လက်ရှိတွင်လည်း အမျိုးသားညီညွတ်ရေးအစိုးရ (NUG) နှင့် ပူးပေါင်းကာ တပ်မဟာတစ်ခု ဖွဲ့စည်းမည်ဟူသော သတင်းထွက်ပေါ် ခဲ့သည်။

နွေဦးတော်လှန်ရေးတွင် ပါဝင်မည့် အင်အားစုများ KNU ထံ ဝင်ရောက်သွားသည်မှာ အင်အားအများအပြား ရှိလာ ကြောင်း၊ KNU က တပ်မဟာတစ်ခု ဖွဲ့စည်းမည်ဆိုသည်မှာ ဖြစ်နိုင်ကြောင်း မြန်မာ့နိုင်ငံရေး လေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။

၎င်းက “KNU ကို ဝင်ရောက်လာတဲ့ နွေဦးတော်လှန်ရေးထဲမှာ ပါဝင်မယ့် အင်အားစုတွေ သင်တန်းတွေ အကြိမ် ကြိမ်ပေးပြီးတော့ တည်ဆောက်လာတာ၊ ထောင်ဂဏန်းလောက်ရှိနေပြီလို့ ကျနော်တော့ ယူဆပါတယ်။ အဲဒါ ကြောင့် အဲဒီအင်အားတွေကို တပ်မဟာသစ် ဖွဲ့စည်းမယ်ဆိုတဲ့ ကိစ္စက ကျနော်အနေနဲ့ ဖြစ်လာနိုင်တယ်လို့ ယူဆ ပါတယ်။ နောက်တစ်ခုက ပြောရလို့ရှိရင် KNU မှာက တပ်မဟာတွေက နယ်မြေအလိုက် တပ်မဟာမှူးတွေရဲ့ စီမံ ကွပ်ကဲမှုအောက်မှာ ရှိပြီးတော့ KNU ဗဟိုရဲ့ လက်ဦးတပ်ဆိုတာ မရှိခဲ့သလောက် အနေအထား ဖြစ်ပါတယ်။

 ဒါပေ မဲ့ အခုအခါမှာ အင်အားကလည်း အဆမတန် တိုးပွားလာ လေ့ကျင့်လှုပ်ရှားမှုတွေလည်း ပြီးတဲ့အခါမှာ ကျနော် ထင်တယ်၊ KNU ဗဟိုကနေပြီးတော့ ကိုင်တွယ်မယ့် နွေဦးစစ်ဆင်ရေးမှာ အခြားသော NUG တိုင်းရင်းသား မဟာမိတ်တွေနဲ့ ပူးပေါင်းပြီးတော့ တိုက်ပွဲဝင်မယ့် လက်ဦးတပ် တစ်တပ်ဖွဲ့ပြီးပြီဆိုတာလည်း ကြသိရပါတယ်။ အဲဒါဟာ တပ်မဟာ ၈ ဖြစ်လာနိုင်ချေရှိတယ်လို့ ကျနော်တော့ မျှော်မှန်းမိပါတယ်” ဟု ပြောသည်။

သံဖြူဇရပ်-ရေးမြို့ ကားလမ်းတစ်လျှောက်တွင် KNU နဲ့ PDF ပူးပေါင်း လှုပ်ရှားလာစဉ် (NUG)

တပ်မဟာတစ်ခု ထပ်တိုးဖွဲ့စည်းမည်ဆိုသည့် သတင်းထွက်ပေါ်မှုနှင့် ပတ်သက်၍ KNU မှ တာဝန်ရှိပုဂ္ဂိုလ်များထံ CNI က ဖုန်းဆက်သွယ်ခဲ့သော်လည်း ဆက်သွယ်၍ မရသေးပေ။

KNU တပ်မဟာ အသစ်တစ်ခုကို ဖွဲ့စည်းသည့်ဟု တရားဝင် ထုတ်ပြန်ခြင်း မရှိသောကြောင့် ထိုကိစ္စအား အတည် ပြု၍မရကြောင်း ကရင်ငြိမ်းချမ်းရေး အထောက်အကူပြုကွန်ယက်မှ စောလေးက‌ပေါက CNI သတင်းဌာနသို့ ပြောသည်။

၎င်းက “ကျနော်တို့ကတော့ ဘာမှ မကြားဘူး။ မကြားဘူးဆိုတာ KNU ကနေပြီးတော့ တရားဝင်ထုတ်ပြန်တာ မရှိတဲ့ အတွက်ကြောင့်မို့လို့ အဲဒါကို ကျ‌နော်တို့ ဘယ်လိုမှ အတည်ပြုပေးလို့ မရဘူးခင်ဗျ” ဟု ပြောသည်။

လက်ရှိ ကရင်အမျိုးသားအစည်းအရုံး (KNU) တွင် တပ်မဟာ ၇ ခုကို ဖွဲ့စည်းထားပြီး တပ်မဟာ (၁) သထုံခရိုင်၊ တပ်မဟာ (၂) တောင်ငူခရိုင်၊ တပ်မဟာ (၃) ညောင်လေးပင်ခရိုင်၊ တပ်မဟာ (၄) ထားဝယ်ခရိုင်၊ တပ်မဟာ (၅) ဖာပွန်ခရိုင်၊ တပ်မဟာ (၆) ဒူးပလာယာခရိုင်နှင့် တပ်မဟာ (၇) ဘားအံခရိုင် စသဖြင့် ဖွဲ့စည်းထားသည်။

KNU ၏ အသစ်ဖွဲ့စည်းမည့် တပ်မဟာ ၈ ကို မွန်ပြည်နယ်တောင်ပိုင်း ရေးမြို့နယ်အတွင်းတွင် ဖွဲ့စည်းမည်ဟု သတင်းများ ထွက်နေသည်။

မွန်ပြည်သစ်ပါတီကိုတွေ့ရစဉ်

KNU က တပ်မဟာ တစ်ခုကို ဖွဲ့စည်းသည်ဟု ကြားမိသလို သုံးသပ်ချက်လည်း အမျိုးမျိုးထွက်နေကြောင်း ရေးမြို့ ဒေသခံတစ်ဦးက CNI သတင်းဌာနသို့ ပြောသည်။

၎င်းက “မီဒီယာမှ ကျနော်တို့ မြင်နေရတာတော့ အဲဒီလိုပဲ ပြောတာပေါ့၊ အဲဒီလိုဖွဲ့တယ်လို့ ပြောတယ်၊ ပြောနေကြ တာပဲ၊ သုံးသပ်တဲ့သူ အမျိုးမျိုး ရှိနေတယ်၊ သူတို့ကတော့ KNU ရဲ့ နယ်မြေကို ချဲ့တာလား။ ဒါမှ မဟုတ်လည်း NUG ရဲ့ စစ်တိုင်းအနေနဲ့ လုပ်ချင်တာလား၊ နောက်မှာ ဘာအကြောင်းတွေရှိလဲ ကျနော်တို့လည်း မသိဘူး။ သေချာ တာကတော့ သူတို့ကတော့ လုပ်နေတယ်ပေါ့နော်၊ အဲဒီလိုတော့ သိရတယ်” ဟု ပြောသည်။

သံဖြူဇရပ်-ရေးမြို့ ကားလမ်းတစ်လျှောက်တွင် KNU ၏ စစ်ရေးလက်အောက်ခံ ကရင်အမျိုးသား လွတ်မြောက် ရေး တပ်မတော် (KNLA) နှင့် ပြည်သူ့ကာကွယ်ရေးတပ် (PDF) တို့ ယခုလလယ်ပိုင်းက စတင်ကာ လှုပ်ရှားမှု ရှိလာခဲ့သည်။

လက်ရှိ KNLA ၊ PDF ပူးပေါင်းတပ်လို့ လှုပ်ရှားလာသည့် မုဒုံ၊ သံဖြူဇရပ်၊ ရေး၊ မြိတ်-ထားဝယ်ခရိုင်တို့တွင် မွန်ပြည်သစ်ပါတီ (NMSP) လှုပ်ရှားရာ နယ်မြေများလည်း ဖြစ်ကြောင်း သိရသည်။

ထို့ကြောင့် KNU တပ်မဟာ ၈ ကိုဖွဲ့စည်းလာပါက မွန်ပြည်သစ်ပါတီ(NMSP)နှင့် စစ်ရေးအငြင်းပွားမှုများ ဖြစ်လာ နိုင်သည်ဟု သုံးသပ်နေကြသည်။

CNI International News

အစ္စလာမ္မာဘတ်၊ ဇွန်လ ၂၈

အာဖဂန်နစ္စတန်တွင် တာလီဘန်များ အာဏာရရှိခဲ့ပြီးနောက် အရပ်သား သေဆုံးမှု ၁၀၀၀ ကျော်ရှိလာခဲ့သည်ဟု ကုလသမဂ္ဂအဖွဲ့က ပြောသည်။

လွန်ခဲ့သော နှစ်များနှင့် နှိုင်းယှဉ်လျှင် နည်းပါးလာသည့်တိုင် အာဖဂန်နစ္စတန်တွင် တာလီဘန်များအာဏာ လွှဲပြောင်းရယူပြီးချိန်မှစ၍ တိုက်ခိုက်မှုများကြောင့် ထိခိုက်သေဆုံးသူ အရပ်သား အရေအတွက်မှာ ထင်သာ မြင်သာသည့် အဆင့်တစ်ခုတွင် ရှိနေသည်ဟု ကုလသမဂ္ဂအဖွဲ့က ဇွန်လ ၂၇ ရက်နေ့တွင် ထုတ်ပြန်ခဲ့သည်။

ကုလသမဂ္ဂ၏ အာဖဂန်ရေးရာအဖွဲ့(UNAMA) မှ ထုတ်ပြန်သည့် ကြေညာချက်သစ် တစ်ခုတွင် တာလီဘန်များ အာဏာလွှဲပြောင်းရယူခဲ့သည့် ၂၀၂၁ ခုနှစ်၊ သြဂုတ်လလယ်မှ ယခုနှစ် မေလကုန်ပိုင်းအထိ အရပ်သား ၃၇၇၄ ဦး သေဆုံးခဲ့ကြောင်း၊ ယင်းတို့မှ ၁၀၉၅ ဦးမှာ နိုင်ငံတွင်းရှိ အကြမ်းဖက်မှုများကြောင့် သေဆုံးရခြင်းဖြစ်ကြောင်း ဖော်ပြထားသည်။ 

ယင်းသည် အသတ်ခံရသူ ၃၀၃၅ ဦး အပါအဝင် အရပ်သား ၈၈၂၀ ဦး သေဆုံးခဲ့ရသည့် ၂၀၂၂ ခုနှစ်ကထက် ပို၍ နည်းပါးနေသည်။ 

UNAMA ၏  လူ့အခွင့်အရေး အဖွဲ့ခေါင်းဆောင် ဖီအိုနာ ဖရာဇာကိုတွေ့ရစဉ်

တာလီဘန်များသည် အမေရိကန်နှင့် နေတိုးတပ်ဖွဲ့များ နိုင်ငံတွင်းမှ အပြီးသတ် ထွက်ခွာရန် ပြင်ဆင်နေစဉ် ၂၀၂၁ သြဂုတ်လတွင် နိုင်ငံ၏အာဏာကို သိမ်းယူခဲ့သည်။ 

တာလီဘန်များ အာဏာရရှိခဲ့ပြီးနောက် ဖြစ်ပွားခဲ့သည့် တိုက်ခိုက်မှုများ၏ ၄ ပုံ ၃ ပုံသည် ဘုရားကျောင်းများ၊ ကျောင်းများနှင့် ဈေးများ အပါအဝင် လူထူထပ်ရာ ဧရိယာများကို ပစ်မှတ်ထားသည့် အင်အားပြင်း ဖောက်ခွဲရေး ပစ္စည်းများ (IED) နှင့် တိုက်ခိုက်မှုများ ဖြစ်သည်ဟု ကုလ၏ ကြေညာချက်တွင် ဖော်ပြသည်။

အဆိုပါ တိုက်ခိုက်မှုများကြောင့် သေဆုံးသူများတွင် အမျိုးသမီး ၉၂ ဦးနှင့် ကလေးငယ် ၂၈၇ ဦးတို့လည်း ပါဝင် သည်။ 

ထိုကိန်းဂဏန်များအရ ယခင်သုံးနှစ်နှင့် ယှဉ်လျှင် တာလီဘန်တို့ အာဏာရရှိခဲ့သည့် သုံးနှစ်အတွင်း ဝတ်ပြုရာ နေရာများသို့ IED ဖြင့် တိုက်ခိုက်မှုကြောင့် အရပ်သား ထိခိုက်မှုများ သိသိသာသာ မြင့်တက်လာသည်ကိုလည်း ဖော်ပြနေသည်ဟု ကုလ၏ ကြေညာချက် တစ်စောင်တွင် ဖော်ပြထားသည်။

ရှီးအိုက် (Shiite) များအပေါ် ပစ်မှတ်ထားသည့် ကျောင်းများနှင့် ပညာရေးဆိုင်ရာ အဆောက်အဦများ၊ တခြား နေရာများသို့ တိုက်ခိုက်မှုများအတွင်း အနည်းဆုံးလူ ၉၅ ဦး သေဆုံးခဲ့သည်ဟုလည်း ထိုကြေညာချက်တွင် ဖော်ပြ သည်။ 

အာဖဂန်နစ္စတန်တွင် ပေါက်ကွဲမှုဖြစ်ပွားစဉ်

တိုက်ခိုက်မှု အများစုကို IS နှင့် ဆက်စပ်နေသည့် ဒေသတွင်း အဖွဲ့အစည်းများက လုပ်ဆောင်ခဲ့ခြင်း ဖြစ်သည်။ 

အရပ်သားများနှင့် အရပ်သား ပစ်မှတ်များအပေါ် တိုက်ခိုက်နေခြင်းကို မဖြစ်မနေ ရပ်တန့်ရမည်ဟု UNAMA ၏  လူ့အခွင့်အရေး အဖွဲ့ခေါင်းဆောင် ဖီအိုနာ ဖရာဇာ (Fiona Frazer) က ပြောသည်။ 

လူ့အသက်များကို ကာကွယ်ရန် တာဝန်ရှိမှုကို လေးစားလိုက်နာရန်လည်း သူမက တာလီဘန်များအား တိုက်တွန်း ခဲ့သည်။ လက်သည် မပေါ်သည့် တိုက်ခိုက်မှုများကြောင့် သေဆုံးသူ အရေအတွက်လည်း သိသာထင်ရှားစွာ ရှိနေ သည်ဟု ကုလ၏ ကြေညာချက်တွင် ဖော်ပြထားသော်လည်း ထိုသို့သော တိုက်ခိုက်မှုများကြောင့် သေဆုံးရသူ အရေအတွက်ကိုမူ မသိရပေ။ 

Source: AP

CNI International News

ဘန်ကောက်၊ ဇွန်လ ၂၈

Move Forward ပါတီနှင့် ဆွေးနွေးမှုများတွင် ဖြူးထိုင်းပါတီသည် အစိုးရအဖွဲ့အတွင်း ရာထူး ၁၄ နေရာနှင့် လွှတ်တော်ဥက္ကဋ္ဌနေရာအတွက် တောင်းဆိုသွားမည်ဖြစ်ကြောင်း Thai PBS သတင်းမှ ရေးသား ဖော်ပြခဲ့သည်။

ထိုသဘောထားကို ဇွန်လ ၂၇ ရက်နေ့က ဖြူးထိုင်း (Pheu Thai) ပါတီ၏ အမှုဆောင်ကော်မတီနှင့် လွှတ်တော် အမတ်များ အစည်းအဝေးတွင် တစ်ဖက်သတ် ဆုံးဖြတ်လိုက်ခြင်း ဖြစ်သည်။ 

ထိုရပ်တည်ချက်ကို ဇွန်လ ၂၈ ရက်တွင် ပါတီနှစ်ခု၏ စေ့စပ်ညှိနှိုင်းရေးအဖွဲ့များ တွေ့ဆုံစဉ် တင်ပြသွားရန်လည်း စီစဉ်ထားသည်။ 

ညှိနှိုင်းရေးအဖွဲ့သည် ၁၄+၁ ဖော်မြူလာကို အခိုင်အမာ ရပ်တည်သွားမည်ဟု ဖြူးထိုင်းပါတီခေါင်းဆောင် ချိုနန် သီရိကော (Chonlanan Srikaew) က ပြောသည်။ 

တောင်းဆိုသည့်အတိုင်း မဖြစ်ခဲ့လျှင် ပါတီနှစ်ခုစလုံးအနေဖြင့် ၎င်းတို့၏ အခြေအနေများနှင့် ပတ်သက်၍ ပြန်လည်သုံးသပ်သွားမည် ဖြစ်သည်။ 

Move Forward ပါတီသည် လွှတ်တော်အတွင်း ရာထူးနေရာ ၁၄ နေရာအပြင် ဝန်ကြီးချုပ်ရာထူးကိုပါ ရယူမည် ဖြစ်သည်။ 

Move Forward ပါတီ ခေါင်းဆောင် ပီတာကိုတွေ့ရစဉ်

လွှတ်တော်ဥက္ကဋ္ဌ ရာထူးသည် လွှတ်တော်တွင်းရှိ အမတ်များ၏ စွမ်းဆောင်ရည်အပေါ် စောင့်ကြည့် အကဲခတ်မှု လုပ်ဆောင်ရခြင်းကြောင့် ယင်းသည် အရေးပါသည့် ရာထူးတစ်ခုဖြစ်ကြောင်း၊ ထို့ကြောင့် ဥက္ကဋ္ဌသည် သမာသမတ်ကျ၍ ကြံရည်ဖန်ရည်ရှိကာ သက်ဆိုင်ရာပါတီ အားလုံး၏ အသိအမှတ်ပြုခြင်းကို ရရှိထားသူ ဖြစ်ရ မည် ဖြစ်ကြောင်းလည်း ဖြူးထိုင်းပါတီ၏ ဒုတိယ ခေါင်းဆောင် ချိုဆတ်သီရိနီလ် (Chousak Sirinil) က ပြော သည်။

Move Forward ပါတီဘက်က ဝန်ကြီးချုပ်ရာထူးကို ရယူထားသည့် အခြေအနေတွင် ဖြူးထိုင်းပါတီ အနေဖြင့် လွှတ်တော်ဥက္ကဋ္ဌ ရာထူးကို ရယူခြင်းမှာ မျှတမှုရှိကြောင်းလည်း ၎င်းက ဆက်လက် ပြောကြားခဲ့သည်။

ထို့နောက် ညှိနှိုင်းရေးအဖွဲ့က ထိုသဘောထားကို ဆုပ်ကိုင်ထားသွားမည်ဟု ချိုဆတ်သီရိနီလ်က ပြောသည်။

ဖြူးထိုင်းပါတီ ခေါင်းဆောင် တစ်ဦးဖြစ်သူ ဖွမ်သမ် ဝီချာယာချိုင်ကိုတွေ့ရစဉ်

၁၄+၁ ဖော်မြူလာသည် ပါတီ၏ တရားဝင် ထုတ်ပြန်ချက် တစ်စုံတစ်ရာ မဟုတ်သော်လည်း ယင်းသည် အမှု ဆောင်ကော်မတီ၊ လွှတ်တော်အမတ်များအားလုံး၏ တူညီသည့် သဘောဆန္ဒပင် ဖြစ်သည်ဟုလည်း နောက်ထပ် ခေါင်းဆောင်တစ်ဦးဖြစ်သူ ဖွမ်သမ် ဝီချာယာချိုင် (Phumtham Wechayachai) က ပြောသည်။ 

၁၄+၁ သည် စေ့စပ်ညှိနှိုင်းရေးအဖွဲ့များအကြား စတင်ဆွေးနွေးမည့် ခေါင်းဆောင်မျိုး မဖြစ်သင့်ကြောင်း၊ အဖွဲ့များ အနေဖြင့် ထိုကိစ္စနှင့်ပတ်သက်၍ သဘောတူညီချက် မရရှိခဲ့လျှင် ၎င်းတို့၏ အနေအထားကို ပြန်လည်သုံးသပ်သင့် ကြောင်း ၎င်းက ပြောသည်။ 

မည်သို့ပင်ဆိုစေကာမူ လွှတ်တော်ဥက္ကဋ္ဌ ရာထူးအတွက် ဇူလိုင် ၄ ရက်မတိုင်ခင်အထိ အချိန်ရှိနေကြောင်း၊ ထိုကိစ္စကို ဇွန်လ ၂၈ ရက်နေ့ အစည်းအဝေးတွင်ပင် ဖြေရှင်းလိုက်နိုင်မည်ဟု ယုံကြည်မှုရှိကြောင်းလည်း ၎င်းက ဆက်လက် ပြောကြားခဲ့သည်။ 

Source: ဘန်ကောက်ပို့စ်

CNI International News

မော်စကို၊ ဇွန်လ ၂၈

ဝဂ်နာ (Wagner) ကြေးစားစစ်သားများ ကိုင်ဆောင်ထားသည့် အကြီးစား စစ်လက်နက်များကို ရုရှားတပ်ဖွဲ့များ ထံ လွှဲပြောင်းပေးရမည်ဟု ရုရှားကာကွယ်ရေးဌာနက ပြောခဲ့ကြောင်း Al Jazeera မှ ရေးသားဖော်ပြခဲ့သည်။

ထိုသို့ လက်နက်များ အပ်ခိုင်းခြင်းက ပုန်ကန်ခဲ့သော ကြေးစားစစ်တပ်အား စစ်တပ်၏ ထိန်းချုပ်မှုအောက်သို့ ထည့်ရန် လုပ်ဆောင်ချက် ဖြစ်သည်။ 

ပုဂ္ဂလိက ကုမ္ပဏီ ဖြစ်သည့် ဝဂ်နာထံမှ အကြီးစား စစ်လက်နက်များကို ရုရှားတပ်ဖွဲ့များထံ လွှဲပြောင်းပေးရေးအ တွက် ကြိုတင်ပြင်ဆင်မှုများကို လုပ်ဆောင်လျက်ရှိသည်ဟု ရုရှားကာကွယ်ရေးဌာနက ဇွန်လ ၂၇ ရက်နေ့တွင် ထုတ်ပြန်ခဲ့သည်။
 
ဇွန်လ ၂၄ ရက်နေ့က ဝဂ်နာအဖွဲ့ပိုင်ရှင် ယက်ဂျီနီ ပရီဂေါ့ဇ်ဟင် (Yevgeny Prigozhin) ဦးဆောင်သည့် ပုန်ကန်မှု သည် ရုရှားအတွက် ဆယ်စုနှစ်များအတွင်း အပြင်းထန်ဆုံးသော လုံခြုံရေးပဋိပက္ခကို ဖြစ်စေကာ ယူကရိန်းစစ်ပွဲ ရှိနေချိန်တွင် ပူတင်၏ ရာထူးတည်မြဲမှုနှင့် ပတ်သက်သည့် မေးခွန်းများကိုလည်း ဖြစ်စေခဲ့သည်။ 

ထိုသို့သော တော်လှန်ပုန်ကန်မှုမျိုး ဖြစ်ပွားခဲ့သည့်တိုင် ရုရှားဖက်ဒရယ်လုံခြုံရေးအေဂျင်စီသည် အစိုးရကိုဖြုတ်ချ ရန် ကြိုးပမ်းခဲ့သည့် ဝဂ်နာအဖွဲ့သားများ၏ ရာဇဝတ်မှုကို ရုတ်သိမ်းပေးခဲ့သည်။

ပူတင်ကို တွေ့ရစဉ်

ပရီဂေါ့ဇ်ဟင်သည် ဝဂ်နာတပ်ဖွဲ့များ၏ ချီတက်လာမှုကို ဇွန်လ ၂၅ ရက်တွင် ရပ်ဆိုင်းလိုက်သည်။ 

ရုရှားရဟတ်ယာဉ်ခြောက်စင်း၊ ထိန်းချုပ်ကွပ်ကဲရေး လေယာဉ်တစ်စင်းတို့အား ပစ်ချကာ တောင်ပိုင်းရှိ Rostov-on-Don မြို့အား သိမ်းပိုက်ပြီးချိန်၌ ဖြစ်သည်။ 

ဘယ်လာရုစ်သမ္မတ အလက်ဇန္ဒား လူကာရှန်(Alexander Lukashenko)၏ ကြားဝင်စေ့စပ်ပေးမှုကြောင့် ပုန်ကန် မှု အပြီးသတ်ခဲ့သည်။ 

ပုန်ကန်မှု အဆုံးသတ်သွားခဲ့ပြီးနောက် ပြုလုပ်ခဲ့သည့် ပထမဆုံးသော မိန့်ခွန်းတွင် ပူတင်က ၎င်းအနေဖြင့် သွေးထွက်သံယိုမှုများကို ရှောင်လွဲရန်၊ ဝဂ်နာတပ်ဖွဲ့ဝင်များ လွှတ်ငြိမ်းချမ်းသာခွင့် ရရှိစေရန် အမိန့်များ ထုတ်ပြန် ခဲ့သည်ဟု ဇွန်လ ၂၆ ရက်နေ့တွင် ပြောသည်။ 

ထို့နောက် ယူကရိန်းနှင့် ယင်း၏အနောက်အုပ်စု မဟာမိတ်များသည် ရုရှားတို့ အချင်းချင်း ပြန်သတ်မည်ကို အလို ရှိနေကြသည်ဟုလည်း ၎င်းက စွပ်စွဲသည်။ 

ဝဂ်နာအဖွဲ့ခေါင်းဆောင် ပရီဂေါ့ဇ်ဟင်ကလည်း သူတို့၏လုပ်ရပ်ကို ဆန္ဒပြမှု တစ်ခုသာဖြစ်သည်ဟု ကာကွယ်ပြော ကြားခဲ့သည်။

ဝဂ်နာ ကြေးစားစစ်တပ်ကိုတွေ့ရစဉ်

ယင်းက ကြေးစားလက်နက်ကိုင် တပ်ဖွဲ့များကို ကာကွယ်ရန်၊ ရုရှားစစ်ဘက် ခေါင်းဆောင်များ၏ ညံ့ဖျင်းမှုကို ဖော်ထုတ်ရန် လုပ်ဆောင်ချက်သာဖြစ်ပြီး ရုရှားအစိုးရကို စိန်ခေါ်လိုသည့် သဘောမရှိဟုလည်း ပြောသည်။ 

ထိုဖြစ်ရပ် ဖြစ်ပွားပြီးနောက်ပိုင်း ထွက်ပေါ်လာသည့် ပထမဆုံးသော အသံဖိုင်တွင် ဝဂ်နာအဖွဲ့များ မော်စကိုမြို့ဆီ သို့ လျင်လျင်မြန်မြန် ချီတက်လာနိုင်ခြင်းက ဆိုးရွားသည့် လုံခြုံရေးဆိုင်ရာ ပြဿနာများကို ဖြစ်စေသည်ဟုလည်း ၎င်းက ပြောသည်။ 

မကျေလည်မှုကို ဖော်ပြခြင်းသာ ဖြစ်ကြောင်း၊ နိုင်ငံ၏ အစိုးရကို ဖယ်ရှားရန် မဟုတ်ကြောင်း ဝဂ်နာအဖွဲ့ပိုင်ရှင်က ပြောသည်။

ထို့နောက် ဝဂ်နာများသည် လေတပ်စခန်းများ အပါအဝင် စစ်တပ်၏ အခြေခံအဆောက်အဦများကို ပိတ်ဆို့ခဲ့ပြီး နောက် မော်စကိုမြို့သို့ ရောက်ရန် ကီလိုမီတာ ၂၀၀ ခန့်တွင် ရပ်တန့်ခဲ့သည်ဟု ပြောသည်။ 

Source: Aljazeera

CNI International News

မော်စကို၊ ဇွန်လ ၂၇

ဇွန် ၂၄ ရက်က တပ်တွင်းပုန်ကန်မှုအတွင်း ပြင်သစ်သမ္မတ အီမန်နျူရန် မက်ခရွန် (Emmanuel Macron) သည် ရုရှားနှင့် အပေးအယူလုပ်ရန် ခြိမ်းခြောက်မှုသည် ဆိုးရွားပြင်းထန်သည့် ထိုးနှက်ချက် တစ်ခုဖြစ်သည်ကို နားလည်သဘောပေါက်ရန် အခွင့်အရေးဖြစ်ခဲ့သည်ဟု ရုရှားနိုင်ငံခြားရေးဝန်ကြီး ဆာဂျေလာဗရော့ဗ် (Sergey Lavrov)က ပြောသည်။

ရုရှားသတင်းဌာနဖြစ်သည့် အာတီသတင်းဌာနနှင့် အင်တာဗျူးတစ်ခုတွင် ပြောခဲ့ခြင်းသည်။  

မက်ခရွန်သည် အမေရိကန်နှင့် အတူတကွရှိနေကြောင်း လာဗရော့ဗ်က ပြောသည်။

အခြေအနေကို ဂရုတစိုက် စောင့်ကြည့်နေကြောင်း၊ ယင်းသည် အလျင်အမြန်ပင် ပြောင်းလဲဖြစ်ပျက်နေကြောင်း၊ သို့သော် အဓိကအချက်မှာ ခွဲထွက်မှု၊ အစိုးရနှင့်စစ်တပ်၏ ထိလွယ်ရှလွယ် ဖြစ်မှုတို့သည် ယူကရိန်းတွင် စစ်ရေး အရ ထောက်ပံ့မှုများကို ဆက်လက် လုပ်ဆောင်ရန် ကြိုးပမ်းမှုများသည် တရားမျှတမှုရှိသည်ကို အပြည့်အဝ ဖော်ပြနေကြောင်း ရုရှားသံတမန်က ပြောသည်။ 

လာဗရော့ဗ်နဲ့ အာတီ အင်တာဗျူး လုပ်နေစဉ်

ဖြစ်စဉ်များတွင် မက်ခရွန်သည် ယူကရိန်း၏ ရုရှားနှင့်ဆက်ဆံခြင်းဆိုင်ရာ ခြိမ်းခြောက်မှုသည် မဟာဗျူဟာ မြောက် ထိုးနှက်ချက် ဖြစ်သည်ကို နားလည် သဘောပေါက် သွားခဲ့ကြောင်း၊ ယင်းသည် နေတိုးအဖွဲ့ ခေါင်းဆောင် များ ကိုင်ဆွဲထားသည့် အယူအဆတစ်ခုလည်းဖြစ်ကြောင်း လာဗရော့ဗ်က ပြောသည်။ 

မက်ခရွန်သည်လည်း ယူကရိန်းနှင့် အနောက်အုပ်စု မီဒီယာများမှ အာဏာပိုင်များနည်းတူ ရုရှားအား ဆန့်ကျင် သည့် စက်တစ်လုံး၏ အစိတ်အပိုင်း တစ်ခုသာဖြစ်သည်ဟု လာဗရော့ဗ်က ပြောသည်။ 

ရုရှားသမ္မတ ပူတင်၏ ဇွန်လ ၂၄ ရက်နေ့ မိန့်ခွန်းကဲ့သို့ပင် အနောက်အုပ်စု၏ စစ်ဘက်၊ စီးပွားရေးနှင့် သတင်း အချက်အလက် အဖွဲ့အစည်းတစ်ခုလုံးသည် ရုရှားကို ဆန့်ကျင်ရန်အတွက် ဖန်တီးထားသည်ဟုလည်း ရုရှား နိုင်ငံခြားရေးဝန်ကြီးက အဆုံးသတ် ပြောသွားခဲ့သည်။ 

Source: တာ့စ်

CNI International News

ဘန်ကောက်၊ ဇွန်လ ၂၇

လွှတ်တော်၏ ဝန်ကြီးချုပ်အသစ် ရွေးချယ်မှုတွင် Move Forward ပါတီ (MFP)ခေါင်းဆောင် ပီတာလင်ဂျာရိုရန် ရတ်(Pita Limjaroenrat) အပြင် တခြားသော အမည်များကိုလည်း အဆိုပြု တင်သွင်းနိုင်ဖွယ်ရှိကြောင်း လွှတ်တော်အမတ်တစ်ဦးဖြစ်သူ ဗိုလ်ချုပ်ကြီး အကာနစ် မြူအမ်ဆာဝပ် (Akanit Muensawad) ကပြောသည်။  

မစ္စတာပီတာအား ဝန်ကြီးချုပ်သစ်အဖြစ် ရွေးချယ်ရန် MFP ထောက်ခံသူများက လွှတ်တော်အမတ်များအပေါ် ဖိအားပေးမှုများ မြင့်တက်လာချိန်တွင် ၎င်းက ထိုသို့ ပြောခဲ့ခြင်း ဖြစ်သည်။ 

တခြားသော ကိုယ်စားလှယ်ဟောင်းများ၏ အမည်စာရင်း တင်သွင်းမှုများလည်း ရှိလာနိုင်ခြင်းကြောင့် လွှတ်တော် အမတ်များအနေဖြင့် ဝန်ကြီးချုပ်အသစ်ရာထူးတွင် ကျင့်ဝတ်ပိုင်းနှင့် လုပ်နိုင်စွမ်း နှစ်ခုစလုံး ကောင်းမွန်သည်ဟု ၎င်းတို့ ယူဆသူအား မဲပေးရန် အခွင့်အရေး ရှိနေသည်ဟု ဗိုလ်ချုပ်ကြီး အကာနစ်က ပြောသည်။ 

လွှတ်တော်အမတ်တစ်ဦးဖြစ်သူ ဗိုလ်ချုပ်ကြီး အကာနစ် မြူအမ်ဆာဝပ်ကိုတွေ့ရစဉ်

MFP အနေဖြင့် ကနဦး အခြေအနေတွင် ကတည်းက လွှတ်တော်အမတ် ၃၇၆ ဦးထံမှ ထောက်ခံမဲ ရရှိထားသင့် ကြောင်း၊ ထိုအခြေအနေတွင် လွှတ်တော်အမတ်များသည် ဝန်ကြီးချုပ်အသစ် ရွေးချယ်မှုကို လက်ရှောင်နေတော့ မည်ဖြစ်ကြောင်းလည်း ၎င်းက ပြောသည်။

ပီတာအနေဖြင့် လွှတ်တော်အတွင်းမှ ထောက်ခံမဲ ၃၇၆ မဲ မရရှိခဲ့လျှင် MFP အား ထောက်ခံသူများက လွှတ်တော် အား ပြစ်တင်ဝေဖန်မှု လုပ်ဆောင်လာနိုင်သည်ဆိုသည့် ခန့်မှန်းမှုများအပေါ် အကာနစ်က တုံ့ပြန် ပြောဆိုခဲ့ခြင်း ဖြစ်သည်။ 

အစပိုင်း ထောက်ခံမဲ ၃၇၆ မဲရခဲ့လျှင် အစိုးရဖြစ်လာမည်ဖြစ်ကြောင်း၊ ထိုသို့ လုပ်နိုင်ပါသလား၊ ထိုသို့ မလုပ်နိုင်ခဲ့ လျှင်လည်း လွှတ်တော်၏အပြစ်ဟု မထိုးချသင့်ကြောင်း အကာနစ်က ပြောသည်။ 

MFP ပါတီသည် ပီတာအား ဝန်ကြီးချုပ်သစ်အဖြစ် တင်မြှောက်နိုင်ရေးအတွက် လွှတ်တော်အမတ်များနှင့် တွေ့  ဆုံဆွေးနွေးရန် ကြိုးပမ်းလျက်ရှိချိန်တွင် လွှတ်တော်အမတ်တချို့သည် ၎င်းတို့နှင့် တွေ့ဆုံလိုခြင်း မရှိဟုလည်း လွှတ်တော်အမတ် ဂျာတီသီရသာရာနွန့် (Jate Siratharanont) က ပြောသည်။ 

MFP သည် တော်ဝင်မိသားစုနှင့် သက်ဆိုင်သည့် ပုဒ်မ ၁၁၂ ကို ပြင်ဆင်လိုနေကြောင်း၊ ယင်းကို ပြည်သူတချို့က လက်မခံကြပေ။ 

Move Forward ပါတီ (MFP)ခေါင်းဆောင် ပီတာလင်ဂျာရိုရန်ရတ်ကိုတွေ့ရစဉ်

MFP ပါတီ၏ လက်နက်ကိုင်တပ်ဖွဲ့များ ပြုပြင်ပြောင်းလဲရေး မူဝါဒနှင့်ပတ်သက်၍ မေးမြန်းခဲ့ရာတွင် ဗိုလ်ချုပ်ကြီး အကာနစ်က လက်နက်ကိုင်တပ်ဖွဲ့များအတွက် ပြုပြင်ပြောင်းလဲရေးကို လက်နက်ကိုင်တပ်ဖွဲ့ဝင်များကသာ လုပ်ဆောင်သင့်ကြောင်း၊ MFP မှ အဆိုပြုသည့် ပုံစံမျိုးမဖြစ်သင့်ကြောင်း ပြန်လည်ဖြေကြားခဲ့သည်။ 

MFP သည် ထိုင်းလက်နက်ကိုင် တပ်ဖွဲ့များအတွက် ပြုပြင်ပြောင်းလဲရေးမူဝါဒကို အမေရိကန် စစ်တပ် ဖွဲ့စည်းပုံ အား ကူးချထားသည်ဟုလည်း အကာနစ်က စွပ်စွဲသည်။ 

MFP ပါတီမှ အဆိုပြုထားသည့် ပြုပြင်ပြောင်းလဲရေး လုပ်ငန်းစဉ်များတွင် စစ်မှု မထမ်းမနေရစနစ်ကို ရပ်ဆိုင်း ထားရန်နှင့် ကာကွယ်ရေးကောင်စီ၊ ပြည်တွင်းလုံခြုံရေးဌာနချုပ် (Isco) နှင့် စစ်ခုံရုံးတို့အား ဖျက်သိမ်းမှုများ ပါဝင်နေသည်။ 

Source: ဘန်ကောက်ပို့စ်

CNI International News

ဆိုးလ်၊ ဇွန်လ ၂၇

ကိုရီးယားစစ်ပွဲဖြစ်ပွားခြင်း ၇၃ နှစ်ပြည့် အထိမ်းအမှတ်အဖြစ် မြောက်ကိုရီးယားနိုင်ငံသားများသည် မြို့တော် ပြုံယမ်း (Pyongyang) တွင် ကြီးမားသည့် လူထုစုဝေးပွဲများ ကျင်းပကာ အမေရိကန်အား ဖျက်ဆီးရေးအတွက် လက်တုံ့ပြန်စစ်ပွဲ ကျင်းပရန် ဆောင်ပုဒ်များကို သံပြိုင်အော်ဟစ်ခဲ့ကြသည်။

ဇွန်လ ၂၅ ရက်နေ့ မြို့တော်တစ်လွှား ကျင်းပခဲ့သည့် လူထုစုဝေးပွဲများသို့ လုပ်သားနှင့်ကျောင်းသား ၁၂၀,၀၀၀ ခန့် တက်ရောက်ခဲ့သည်ဟု နိုင်ငံပိုင် KCNA သတင်းတွင် ဖော်ပြထားသည်။ 

နိုင်ငံပိုင်သတင်းဌာနမှ ထုတ်ပြန်သည့် ဓာတ်ပုံများတွင်  ကွင်းလုံးပြည့် လူအုပ်ကြီးကို မြင်တွေ့ရပြီး ထိုသူများသည် အမေရိကန်တစ်နိုင်ငံလုံးသည် ငါတို့ပစ်ခတ်နိုင်သည့် အတိုင်းအတာ အတွင်း၌ပင်ရှိသည်၊ နယ်ချဲ့ အမေရိကန်တို့ သည် ငြိမ်းချမ်းရေးကို ဖျက်ဆီးသူများ ဖြစ်သည်ဟု အဓိပ္ပါယ်ရသည့် စာတန်းများကိုလည်း ကိုင်ဆောင်ထားသည် ကို တွေ့ရသည်။ 

အမေရိကန်ကို ဆန့်ကျင်ကြောင်း ပြသနေသည့် မြောက်ကိုရီးယားလူထု

ဇွန်လ ၂၅ ရက်နေ့ နှစ်ပတ်လည် အခမ်းအနားသည် မြောက်ကိုရီးယား အနေဖြင့် ၎င်းတို့၏ ပထမဆုံးသော စစ်ဘက်ဆိုင်ရာ ထောက်လှမ်းရေး ဂြိုဟ်တုကို ထပ်မံလွှတ်တင် နိုင်သည်ဆိုသည့် စိုးရိမ်မှုများ ရှိနေချိန်တွင် ပေါ်ထွက်လာခဲ့သည်။ 

အမေရိကန်၏ စစ်ရေးလှုပ်ရှားမှုကို စောင့်ကြည့်နိုင်မှုအား မြှင့်တင်ရန် ဂြိုဟ်တုလွှတ်တင်ခြင်းဖြစ်သည်။

သို့သော် ၎င်းတို့၏ မေလ ၃၁ ရက်က ပထမအကြိမ် ကြိုးပမ်းမှုသည် မအောင်မြင်ခဲ့ပေ။

အမေရိကန်၏ နယ်ချဲ့ဝါဒကို အပြစ်ပေးရန် မြောက်ကိုရီးယားသည် အခိုင်မာဆုံး လက်နက်ကို ပိုင်ဆိုင်ထား ကြောင်း၊ ကိုရီးယားကျွန်းပေါ်ရှိ လက်စားချေသူများသည် ရန်သူအား လက်စားချေရန်အတွက် တောက်လောင်နေ သော စိတ်ဓာတ်ကို ပိုင်ဆိုင်ထားသည်ဟု KCNA တွင် ဖော်ပြသည်။

အမေရိကန်ကို ဆန့်ကျင်ကြောင်း ပြသနေသည့် မြောက်ကိုရီးယားလူထု

နျူကလီးယားပိုင်ရှင် မြောက်ကိုရီးယားသည် ၎င်းတို့၏ အကြီးမားဆုံးသော တိုက်ချင်းပစ် ပဲ့ထိန်ဒုံးကျည် အပါအဝင် လက်နက်ပေါင်းများစွာကို ပစ်ခတ်စမ်းသပ်ခဲ့သောကြောင့် တောင်ကိုရီးယားနှင့်သာမက အမေရိကန်နှင့်ပါ တင်းမာမှုများ မြင့်တက်လာခဲ့ရသည်။ 

နိုင်ငံခြားရေးဌာန၏ သီးခြားထုတ်ပြန်ချက် တစ်ခုတွင် အမေရိကန်သည် ဒေသတွင်းသို့ မဟာဗျူဟာမြောက် အင်အားများ ပို့ဆောင်နေကြောင်း စွပ်စွဲခဲ့သလို အမေရိကန်သည် နျူကလီးယားစစ်ပွဲ ဖြစ်ပွားစေရန် မီးရှို့ နေသည်ဟု ပြောခဲ့သည်။ 

၁၉၅၀-၅၃ ခုနှစ် ကိုရီးယားစစ်ပွဲသည် သဘောတူညီချက် မဟုတ်သော အပစ်အခတ်ရပ်စဲရေး စာချုပ်ဖြင့်သာ အဆုံးသတ်ခဲ့ခြင်းကြောင့် တောင်နှင့်မြောက် ကိုရီးယားနှစ်နိုင်ငံသည် စစ်ပွဲအခြေအနေ၌ပင် တည်ရှိနေဆဲ ဖြစ် သည်။ 

Source: Reuters

CNI International News

မော်စကို၊ ဇွန်လ ၂၆

မော်စကိုမြို့လမ်းမများပေါ်ရှိ ရုရှားအစိုးရတပ်များသည် ဇွန်လ ၂၅ ရက်နေ့တွင် ရုတ်သိမ်းသွားခဲ့ပြီဖြစ်သလို မြို့များကို သိမ်းပိုက်ထားသော ကြေးစားစစ်သားများသည်လည်း ပြန်လည်ဆုတ်ခွာသွားပြီဟု အေပီမှ  ဖော်ပြခဲ့ သည်။ 

အချိန်ပိုင်းသာ ကြာမြင့်ခဲ့သော ပုန်ကန်မှုသည် ယူကရိန်းတွင် တန်ပြန်ထိုးစစ်နှင့် ရင်ဆိုင်နေရသည့် သမ္မတ ဗလာဒီမာပူတင် (Vladimir Putin) ကို အားနည်း သွားစေခဲ့သည်။ 

မြို့တော်ဆီသို့ ချီတက်မှုကို ဖျက်သိမ်းခဲ့ခြင်းက ယက်ဂျီနီ ပရီဂေါ့ဇ်ဟင် (Yevgeny Prigozhin) နှင့်သူ၏ ဝဂ်နာ (Wagner) တပ်ဖွဲ့များ၏ ကံကြမ္မာကိုလည်း မရေမရာ ဖြစ်စေခဲ့သည်။

 ပဋိပက္ခကို အဆုံးသတ်စေခဲ့သည့် သဘောတူညီချက်အရ ပရီဂေါ့ဇ်ဟင်သည် ဘယ်လာရုစ်သို့ ရွှေ့ပြောင်းရမည် ဖြစ်ကာ ဖမ်းဆီး အရေးယူမှုနှင့် ရင်ဆိုင်ရမည် မဟုတ်ပေ။ 

ထိုသဘောတူညီချက်ကို ဘယ်လာရုစ်သမ္မတ အလက်ဇန္ဒား လူကာရှန်ကို (Alexander Lukashenko) က ကြားဝင် စေ့စပ်ပေးခဲ့ခြင်းဖြစ်ပြီး ဇွန်လ ၂၄ ရက်ညတွင် ထုတ်ပြန် ကြေညာခဲ့သည်။ 

ပူတင်ကို တွေ့ရစဉ်

ထိုထုတ်ပြန်မှု ပြီးချိန်ကတည်းက ပူတင်နှင့် ပရီဂေါ့ဇ်ဟင်တို့ထံမှ မည်သည့်အကြောင်းမှ ထပ်မံမကြားသိရသေး ပေ။ 

သီတင်းပတ်ကုန်ပိုင်းတွင် ဖြစ်ပွားခဲ့သော ဖြစ်ရပ်များကို ပုံမှန်မဟုတ်သော အခြေအနေများဟု အမေရိကန် နိုင်ငံ ခြားရေးဝန်ကြီး အန်တိုနီ ဘလင်ကင် (Antony Blinken)က ပြောသည်။ 

ပြီးခဲ့သော ၁၆ လက ပူတင်သည် ယူကရိန်းမြို့တော်သို့ ချီတက်ပုံနှင့် လက်ရှိအချိန်တွင် ၎င်း၏ မော်စကိုမြို့အား ခုခံရန် ပြင်ဆင်နေရပုံ တို့ကိုလည်း ၎င်းက ဆက်စပ် ပြောဆိုခဲ့သည်။ 

ရုရှားစာမျက်နှာတွင် အက်ကြောင်းများစွာကို မြင်တွေ့ရမည်ဟုလည်း ၎င်းက ပြောသည်။ 

ဘာတွေဖြစ်နေသလဲ တိတိကျကျ မသိရသော်လည်း ပူတင်သည် ယခုကိစ္စကို လာမည့် သီတင်းပတ်များအတွင်း ဖြေရှင်းရတော့မည်မှာ သေချာသည်ဟုလည်း ရုရှားနိုင်ငံခြားရေးဝန်ကြီးက ပြောသည်။ 

လက်ရှိအချိန်အထိ ၂၄ နာရီကြာ ပုန်ကန်မှုသည် ယူကရိန်းစစ်ပွဲအတွက် မည်သို့မည်ပုံ သက်ရောက်မှု ရှိသည်ကို လည်း မသိရသေးပေ။

သို့သော် ထိုဖြစ်ရပ်ကြောင့် ယူကရိန်းစစ်မြေပြင်တွင် ရုရှားဘက်က တိုက်ခိုက်ပေးနေသည့် အကောင်းဆုံး တပ်ဖွဲ့များသည် စစ်မြေပြင်မှ ပြန်လည် ဆုတ်ခွာလာခြင်းကို ဖြစ်စေခဲ့သည်။ 

ဝဂ်နာအုပ်စု ပုန်ကန်မှုလုပ်နေစဉ်

ယင်းတို့တွင် ဝဂ်နာများနှင့် ချေချင်းညာ တပ်ဖွဲ့ များလည်း ပါဝင်သည်။ 

ဝဂ်နာများ မော်စကိုမြို့ဆီသို့ ချီတက်ရာ လမ်းကြောင်းသည် အတားအဆီးမရှိဘဲ လျင်လျင်မြန်မြန် ရှေ့တိုး လာနိုင် ခဲ့ခြင်းက ရုရှားလုံခြုံရေးနှင့် စစ်တပ်တို့၏ အားပျော့မှုကိုလည်း ဖော်ပြနေသည်။ 

ဝဂ်နာများသည် ပြီးခဲ့သည့် တစ်ရက်အတွင်း ယူကရိန်းတပ်ဖွဲ့များ၏ သုံးပတ်တာ ကာလထက်ပိုကာ ရုရှားလေတပ် ကို ထိခိုက်ပျက်စီးမှု ဖြစ်စေခဲ့သည်ဟု ယူဆကြောင်း ရုရှားအရေး လေ့လာသုံးသပ်သူတစ်ဦးက မှတ်ချက်ပြုသည်။ 

ဝဂ်နာများသည် မော်စကိုမြို့သို့ ချီတက်ရာတွင် ရဟတ်ယာဉ်တချို့နှင့် စစ်တပ်၏ ဆက်သွယ်ရေး လေယာဉ်များ ကို ပစ်ချခဲ့သည်ဟု သတင်းများတွင် ဖော်ပြသည်။ 

ကာကွယ်ရေးဌာနကတော့ ယင်းနှင့်ပတ်သက်၍ မှတ်ချက်ပြု ပြောဆိုခြင်း မရှိသေးပေ။ ရုရှားတို့၏ ပြည်တွင်း မငြိမ်သက်မှုများက ၎င်းတို့ စစ်တပ်အတွက် အခွင့်အရေးများ ဖန်တီးပေးမည်ကိုလည်း ယူကရိန်းဘက်က မျှော်လင့်နေသည်။

Source: AP

CNI International News

ဘရပ်ဆဲလ်၊ ဇွန်လ ၂၃

နှစ်နိုင်ငံနယ်စပ်အနီးတွင် အကြမ်းဖက်ပဋိပက္ခများ ဖြစ်ပွားနေခြင်းကို အဆုံးသတ်နိုင်ရေး အရေးပေါ် အစည်း အဝေးအတွက် ဥရောပသမဂ္ဂက ဆားဘီးယားနှင့် ကိုဆိုဗိုခေါင်းဆောင်များကို ခေါ်ယူတွေ့ဆုံခဲ့သည်ဟု Al Jazeera သတင်းတွင် ဖော်ပြထားသည်။ 

ကိုဆိုဗို ဝန်ကြီးချုပ် အယ်လ်ဘင် ကာတီ (Albin Kurti)၊ ဆားဘီးယား သမ္မတ အလက်ဇန္ဒား ဗူချိ(Aleksander Vucic) တို့နှင့် ကြားသပတေးနေ့၌ ဘရပ်ဆဲလ် (Brussels) မြို့တွင် အရေးပေါ် အစည်းအဝေး ကျင်းပသွားမည်ဟု EU နိုင်ငံခြားရေးမူဝါဒ အကြီးအကဲ ဂျိုးဆက် ဘော်ရယ် (Josep Borrell) က ပြောသည်။

သို့သော် ခေါင်းဆောင်နှစ်ဦးသည် မျက်နှာချင်းဆိုင် တွေ့ဆုံမည်လား သို့မဟုတ် ဘော်ရယ်နှင့် သီးခြားစီ တွေ့ဆုံ သွားမည်လား ဆိုသည်ကိုတော့ တိတိကျကျ မသိရသေးပေ။ 

တင်းမာမှုများကို လျှော့ချရန်၊ ကိုဆိုဗိုရှိ ဆာ့ဘ်လူမျိုးများ ပါဝင်သည့် မြောက်ပိုင်း ရွေးကောက်ပွဲသစ်များ ပြန်လည် စတင်ရန် ချက်ချင်း ကြိုးပမ်းသင့်ကြောင်း၊ ယင်းသည် ဒေသတွင်းနှင့် EU တို့အတွက် မရှိမဖြစ် အရေးပါကြောင်း ဘော်ရယ်က ဆွေးနွေးပွဲမတိုင်ခင် တွစ်တာတွင် ပြောခဲ့သည်။

အဖွဲ့ဝင် ၂၇ နိုင်ငံပါ EU အဖွဲ့သည် နှစ်နိုင်ငံကြား ပြန်လည်ရင်ကြားစေ့မှုအတွက် ဆွေးနွေးပွဲများကို နှစ်ချီကာ ဦးဆောင် ကျင်းပပေးခဲ့သော်လည်း အောင်မြင်မှု အနည်းငယ်သာ ရရှိထားသည်။

ကိုဆိုဗိုမှာ အကြမ်းဖက်မှုများ ဖြစ်ပွားစဉ်

ဆားဘီးယားနှင့် ယင်း၏ ပြည်နယ်ဟောင်း တစ်ခုဖြစ်သော ကိုဆိုဗိုတို့ကြားတွင် ကာလရှည် တင်းမာမှုများရှိခဲ့ သည်။ 

၁၉၉၈-၉၉ ခုနှစ်က နှစ်နိုင်ငံကြား ပဋိပက္ခများကြောင့် လူ ၁၀၀၀၀ ကျော် သေဆုံးခဲ့ကာ အများစုမှာ ကိုဆိုဗို အယ်လ်ဘေးနီးယား လူမျိုးများ ဖြစ်သည်။ 

ကိုဆိုဗို၏ ၂၀၀၈ ခုနှစ် လွတ်လပ်ရေး ကြေညာချက်ကို ဆားဘီးယားဘက်က အသိအမှတ်ပြုရန် ငြင်းဆန်သည်။ 

ဆားဘီးယားသည် ကိုဆိုဗိုအား ၎င်းတို့နှင့် နှီးနှော ဆက်နွယ်မှုများစွာ ရှိသည့် နယ်မြေတစ်ခုအဖြစ် ရှုမြင်ထားကာ ကိုဆိုဗိုတွင် ဆားဘီးယား အော်သိုဒေါ့ အသင်းတော်၏ အထင်ရှားဆုံး ကျောင်းတော်များ ဆက်လက် တည်ရှိ နေ ဆဲလည်း ဖြစ်သည်။ 

နှစ်နိုင်ငံကြား တင်းမာမှုများသည် ပြီးခဲ့သည့်လတွင် ပိုမိုဆိုးရွားလာခဲ့သည်။ 

ကိုဆိုဗို လုံခြုံရေးတစ်ဦးကိုတွေ့ရစဉ်

ဒေသတွင်း ရွေးကောက်ပွဲတစ်ခု ကျင်းပခဲ့ပြီးနောက် အယ်လ်ဘေးနီးယား မြို့တော်ဝင်များကို တင်မြှောက်ရန် ကိုဆိုဗို မြောက်ပိုင်းရှိ မြူနီစီပယ် အဆောက်အဦတစ်ခုကို ကိုဆိုဗိုရဲတပ်ဖွဲ့က သိမ်းပိုက်ခဲ့ပြီးနောက်တွင် ဖြစ်သည်။

ထိုဒေသတွင် ဆာ့ဘ်လူမျိုး အများစုနေထိုင်ကာ ယင်းတို့သည် ရွေးကောက်ပွဲကိုလည်း အကြီးအကျယ် သပိတ် မှောက်ခဲ့ကြသည်။ 

ဆားဘီးယားသည် နယ်စပ်ရှိ ၎င်းတို့၏ တပ်ဖွဲ့များကို အမြင့်ဆုံး အဆင့် တပ်လှန့်မှု လုပ်ဆောင်ထားသည်။ 

ကိုဆိုဗို ဆာ့ဘ်လူမျိုးများနှင့် ကိုဆိုဗိုရဲတပ်ဖွဲ့၊ နေတိုး ဦးဆောင်သည့် ငြိမ်းချမ်းမှု ထိန်းသိမ်းရေး တပ်ဖွဲ့များအကြား ပဋိပက္ခများ ဖြစ်ပွားခဲ့ပြီးနောက်တွင် ထိုသို့ လုပ်ဆောင်ခဲ့ခြင်း ဖြစ်သည်။

နေတိုးအဖွဲ့သည် မကြာသေးခင်ကလည်း တပ်ဖွဲ့များကို အင်အား ဖြည့်တင်းမှု လုပ်ဆောင်ခဲ့သည်ဟု သိရသည်။

Source:  Aljazeera