CNI Sport News

၂၀၂၃ ခုနှစ်၊ ဧပြီ ၁၈

အင်ဒိုနီးရှားနိုင်ငံကို ယူ-၂၀ ကမ္ဘာ့ဖလားပြိုင်ပွဲ အိမ်ရှင်အဖြစ် ကျင်းပခွင့် ရုပ်သိမ်းပြီးနောက် အာဂျင်တီးနားနိုင်ငံ ဟာ အိမ်ရှင်အဖြစ် လက်ခံကျင်းပမယ်လို့ ကမ္ဘာ့ဘောလုံးအဖွဲ့ချုပ်(ဖီဖာ)က အတည်ပြုလိုက်ပါတယ်။

ဘာလီအုပ်ချုပ်ရေးမှူး ဝါရန်ကိုစတာက အစ္စရေးအသင်းကို အိမ်ရှင်အဖြစ် လက်ခံကျင်းပဖို့ ငြင်းဆိုခဲ့ပြီးနောက် ယူ-၂၀ ကမ္ဘာ့ဖလားပြိုင်ပွဲအတွက် တရားဝင် မဲခွဲမှုပြုလုပ်မယ့် အစီအစဉ်ကို ရွှေ့ဆိုင်းခဲ့ရပါတယ်။

အဲဒီ နောက်ပိုင်းမှာ ဖီဖာဟာ အင်ဒိုနီးရှား ဘောလုံးအဖွဲ့ချုပ်နဲ့ ဆွေးနွေးမှုတွေ ပြုလုပ်ပြီးနောက် အိမ်ရှင်အဖြစ် ကနေ ရုပ်သိမ်းတဲ့ ဆုံးဖြတ်ချက်ကို မတ်လ ၂၉ ရက်က ချမှတ်ခဲ့တာ ဖြစ်ပါတယ်။

အဲဒါကြောင့် အာဂျင်တီးနားက အခုနှစ် မေလ ၂၀ ရက်ကနေ ဇွန်လ ၁၁ ရက်အထိ ကျင်းပမယ့် ဒီပြိုင်ပွဲကို အိမ်ရှင် အဖြစ် လက်ခံကျင်းပဖို့ ဖီဖာထံ တရားဝင် လျှောက်ထားခဲ့ပါတယ်။ ဒီပြိုင်ပွဲအတွက် မဲခွဲမှုကို သောကြာနေ့တွင် ဇူးရစ်မှာ ကျင်းပမယ်လို့ ဖီဖာက ကြေညာခဲ့ပါတယ်။

အာဂျင်တီးနား ဘောလုံးအဖွဲ့ချုပ်ကိုတွေ့ရစဉ်

ဖီဖာဥက္ကဋ္ဌ အင်ဖန်တီနိုက “ဒီလို ကြီးကျယ်ခမ်းနားတဲ့ ပွဲကိုကျင်းပဖို့ သူတို့ရဲ့ ကတိကဝတ် ပြုမှုအတွက် အာဂျင်တီးနား ဘောလုံးအဖွဲ့ချုပ်၊ ဥက္ကဋ္ဌ တာပီယာနဲ့ အစိုးရအာဏာပိုင်တွေကို ကျေးဇူးတင်ရှိပါတယ်။ ကမ္ဘာ့ ချန်ပီယံတွေရဲ့ အိမ်က ကမ္ဘာ့ဘောလုံးလောကရဲ့ စူပါစတားတွေကို တံခါးဖွင့် ပေးလိုက်သလိုပါပဲ”လို့ အာဂျင်တီးနားကို အိမ်ရှင်အဖြစ် ကြေညာချိန်မှာ ပြောခဲ့တာပါ။

၂၀၀၁ ကလည်း ယူ-၂၀ ကမ္ဘာ့ဖလားပြိုင်ပွဲကို အိမ်ရှင်အဖြစ် လက်ခံကျင်းပခဲ့တဲ့ အာဂျင်တီးနားအသင်းဟာ ဒီပြိုင်ပွဲမှာ ချန်ပီယံဆုကို စံချိန်တင် ၆ ကြိမ်အထိ ရရှိထားတာ ဖြစ်ပါတယ်။

အာဂျင်တီးနားနိုင်ငံဟာ ၂၀၃၀ မှာ ကျင်းပမယ့် ကမ္ဘာ့ဖလားပြိုင်ပွဲကို ဥရုဂွေး၊ ချီလီ၊ ပါရာဂွေးတို့နဲ့အတူ ပူးတွဲ အိမ်ရှင်အဖြစ် ကျင်းပနိုင်ဖို့ ကြိုးပမ်းနေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဧပြီ ၁၈

စီးရီးအေ ထိပ်သီးကလပ် အေစီမီလန်အသင်းဟာ ယူနိုက်တက်အသင်းမှာ အနာဂတ် မရေမရာဖြစ်နေတဲ့ တိုက်စစ် မှူး ဂရင်းဝုဒ်ကို ခေါ်ယူဖို့ စိတ်ဝင်စားနေတယ်လို့ သိရပါတယ်။

အသက် ၂၁ နှစ်အရွယ်ရှိ တိုက်စစ်မှူးဟာ မုဒိမ်းမှု စွဲချက်တွေနဲ့ ရင်ဆိုင်ခဲ့ရပြီးနောက် ၂၀၂၂ ခုနှစ်၊ ဇန်နဝါရီလမှာ အသင်းအတွက် ပါဝင်ကစားခွင့် ဆိုင်းငံ့ခံရပြီးကတည်းက ယူနိုက်တက်အတွက် ပါဝင်ကစားခွင့် မရခဲ့ပါဘူး။

ဂရင်းဝုဒ်ဟာ ဖေဖော်ဝါရီလမှာ အဓိကသက်သေတွေ နှုတ်ထွက်မှုနဲ့အတူ သူ့ကို စွဲချက်တင်ထားတဲ့ အမှုတွေဟာ ရုပ်သိမ်း ခံခဲ့ရပါတယ်။

အာဏာပိုင်တွေက ဂရင်းဝုဒ်ရဲ့ အမှုတွေကို ရုပ်သိမ်းပေးခဲ့ပေမယ့် ယူနိုက်တက်ကတော့ အသင်းအတွင်းပိုင်းမှာ စုံစမ်းစစ်ဆေးမှုတွေကို စတင်ခဲ့ပြီး ဒါဟာ ရာသီကုန်ဆုံးပြီးရင်တောင် ပြီးဆုံးဖို့ မရှိသေးပါဘူး။

ဂရင်းဝုဒ်ဟာ သူ့ရဲ့ ငယ်ဘဝ ကလပ်မှာ ပြန်ကစားခွင့် ရဖို့အတွက် အုတ်နံရံကို ပြေးပြီးတိုက်ဆိုလည်း တိုက်ဖို့ ရှိနေပေမယ့် ယူနိုက်တက်ဘက်က စုံစမ်းစစ်ဆေးမှုပြီးမယ့် အချိန်ကာလကို သတ်မှတ်ထားခြင်း မရှိတာ ဖြစ်ပါ တယ်။

အဲဒါကြောင့်လည်း ဂရင်းဝုဒ်ဟာ လက်ရှိအချိန်အထိ အသင်းရဲ့ လေ့ကျင့်ရေး အစီအစဉ်ကို ပြန်လည်ဝင်ရောက်လို့ မရသေးတာပါ။

ဂရင်းဝုဒ်ကို တွေ့ရစဉ်

ယူနိုက်တက်နဲ့ ၂၀၂၅ အထိ စာချုပ်သက်တမ်းရှိနေတဲ့ ဂရင်းဝုဒ်ကို ခေါ်ယူဖို့ ဥရောပတစ်ဝှမ်းရှိ ကလပ် အသင်း အများအပြားက စိတ်ဝင်စားနေတယ်လို့ Ravelo က ဖော်ပြထားပါတယ်။

ဒီအသင်းတွေထဲမှာ ဂရင်းဝုဒ်ရဲ့ နည်းစနစ် အရည်အသွေးကို သဘောကျနေတဲ့ အေစီမီလန်အသင်းလည်း ပါဝင် နေတာပါ။

ဂရင်းဝုဒ် ဘက်ကလည်း သူ့ရဲ့ ကစားသမားဘဝ လမ်းကြောင်းပေါ်ကို ပြန်လည် ရောက်ရှိဖို့အတွက် ပြည်ပ ကလပ် အသင်းတွေမှာ စတင်နိုင်ဖို့ မျှော်လင့်ထားပါတယ်။

ယူနိုက်တက်အသင်းဟာ ဂရင်းဝုဒ်ကို ခေါ်ယူဖို့ တူရကီကလပ်တွေရဲ့ ဇန်နါရီလက ကမ်းလှမ်းမှုတွေကို ပယ်ချထား ပါတယ်။ ဂရင်းဝုဒ်ဟာ ယူနိုက်တက် အသင်းကို အသက် ၆ နှစ် အရွယ်ကတည်းက ရောက်ရှိလာခဲ့တာဖြစ်ပြီး အသင်းကြီးအတွက် ၂၀၁၉ မှာ စတင်ပွဲထွက်ခွင့် ရခဲ့တာပါ။

အသက် ၂၁ နှစ်အရွယ်ရှိ တိုက်စစ်မှူးဟာ ၂၀၂၀ ခုနှစ်၊ စက်တင်ဘာလက ကစားခဲ့တဲ့ အိုက်စလန်အသင်းနဲ့ ပွဲမှာ အင်္ဂလန် လက်ရွေးစင် အသင်းအတွက် ၁ ပွဲ ပါဝင်ကစားခဲ့တာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၁၈

ဘာစီလိုနာအသင်း ဥက္ကဋ္ဌ လာပေါ်တာက အကြီးတန်း တာဝန်ရှိ ဒိုင်လူကြီးတစ်ဦး ပိုင်ဆိုင်တဲ့ ကုမ္ပဏီထံ ငွေပေး ချေမှုဟာ အကြံပေး ကိစ္စရပ်တွေ အတွက်သာဖြစ်ပြီး ပြစ်မှုရှိတယ်လို့ စွပ်စွဲထားတာကို ငြင်းဆန်လိုက်ပါတယ်။

လာပေါ်တာက “အကြံဉာဏ်ပေးမှုဟာ ဘယ်လို အကျင့်ပျက် ခြစားမှုမျိုးမှာမှ မပါဝင်သလို ပြစ်မှုလည်း မမြောက် ပါဘူး။ စပိန်အခွန်ဌာနက အစိုးရရှေ့နေရုံးကို စာတစ်စောင်ပို့ခဲ့ပြီး မစ္စတာနီဂရီရာနဲ့ သက်ဆိုင်တဲ့ ကုမ္ပဏီတွေထံ ငွေပေးချေမှုက ပွဲရလဒ်အပေါ် လွှမ်းမိုးမှု ရှိတယ်ဆိုတာကို သက်သေ မပြနိုင်ပါဘူး။ ဒါက ကျနော်တို့ သမိုင်းမှာ အပြင်းထန်ဆုံး တိုက်ခိုက်မှုတွေထဲက တစ်ခုပါ”လို့ သတင်းစာ ရှင်းလင်းပွဲမှာ ပြောခဲ့တာပါ။

ဘာစီလိုနာ အသင်းဟာ ၂၀၀၁ ကနေ ၂၀၁၈ အထိ စပိန်ဒိုင်လူကြီးများ ကော်မတီရဲ့ ဒုဥက္ကဋ္ဌဟောင်း နီဂရီရာ ပိုင်ဆိုင်တဲ့ ကုမ္ပဏီတွေထံ ယူရို ၈.၄ သန်း ပေးချေခဲ့တယ်ဆိုပြီး စပိန်အစိုးရရှေ့နေတွေက စွပ်စွဲထားပေမယ့် စပိန် ကလပ်ကတော့ ဒီငွေပေးချေမှုဟာ အကြံပေးကိစ္စအတွက်သာ ဖြစ်တယ်လို့ ပြောခဲ့ပါတယ်။

ဘာစီလိုနာ အသင်းကိုတွေ့ရစဉ်

လာပေါ်တာဟာ ဒီအဖြစ်အပျက်တွေနဲ့ ပတ်သက်ပြီး ကလပ်အတွင်းပိုင်း စုံစမ်းစစ်ဆေးမှုတွေကို ပြုလုပ်တာမှာ ဘယ်လို အမှားအယွင်းမှ မရှိခဲ့ဘဲ ဒါက ဘာစီလိုနာကို အသရေဖျက်ဖို့ ကြိုးကိုင်တဲ့ လှုပ်ရှားမှုတစ်ခုလို့ ပြောခဲ့ပါ တယ်။
ဒါ့အပြင် လာပေါ်တာက လာလီဂါ အကြီးအကဲ တီဘတ်စ်ဟာ ဘာစီလိုနာရဲ့ ဂုဏ်သိက္ခာကို ထိခိုက်စေတယ်လို့ စွပ်စွဲခဲ့သလို၊ ရီးရယ်လ်အသင်းဟာ သမိုင်းကြောင်းအရ ဒိုင်လူကြီးတွေရဲ့ မျက်နှာသာပေးမှု အမြဲတမ်း ခံခဲ့ရတယ် ဆိုပြီး သူတို့ကို စွဲချက်တင်တဲ့အထဲ ပါဝင်တဲ့ ပြိုင်ဘက်ကြီးကို ပြန်လည် တိုက်ခိုက်ခဲ့ပါတယ်။

ဘာစီလိုနာ အသင်းဟာ လက်ရှိအချိန်မှာ ယူအီးအက်ဖ်အေရဲ့ စုံစမ်းစစ်ဆေးမှုတွေလည်း ခံနေရတာပါ။

ယူအီးအက်ဖ်အေ အနေနဲ့ သူတို့ရဲ့ စုံစမ်းစစ်ဆေးမှုမှာ ဘာစီလိုနာအတွက် မျှတမှုရှိစေဖို့ လာပေါ်တာက တိုက် တွန်း ထားတယ်လို့ သတင်းမှာ ဖော်ပြထားပါတယ်။

လာလီဂါ ဘက်ကတော့ လာပေါ်တာရဲ့ စွပ်စွဲမှုတွေနဲ့ ပတ်သက်ပြီး မှတ်ချက် တစ်စုံတစ်ရာ ထုတ်ပြန်သွားမှာ မဟုတ်ဘူးလို့ တနင်္လာနေ့က ရိုက်တာသတင်းဌာနကို ပြောခဲ့တာပါ။

ဘာစီလိုနာအသင်းဟာ ဒီရာသီ လာလီဂါပြိုင်ပွဲမှာ ချန်ပီယံဆု ရယူနိုင်ဖို့ အခြေအနေ ကောင်းနေပြီး ဒုတိယနေရာ က ရီးရယ်လ်အသင်းကို ၁၁ မှတ်ဖြတ်ကာ အမှတ်ပေးဇယားကို ဦးဆောင်နေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ ဧပြီ ၁၈

လီဗာပူးလ်အသင်းနည်းပြ ကလောပ့်က လိဒ်စ်အသင်းကို ၆ ဂိုး- ၁ ဂိုးနဲ့ ဂိုးပြတ်အနိုင်ရခဲ့တဲ့ ပရီးမီးယားလိဂ်ပွဲ အပြီးမှာ ဒီပွဲဟာ ဒီရာသီ သူတို့ရဲ့ အကောင်းဆုံးပွဲလို့ ပြောလိုက်ပါတယ်။

ကလောပ့်က “ဒီပွဲဟာ မတူညီတဲ့ ရှုထောင့်ပေါင်းစုံကနေ ဒီရာသီမှာ ကစားခဲ့တဲ့ အကောင်းဆုံးပွဲလို့ ကျနော် ထင်ပါတယ်။ ဒီပွဲဟာ တကယ်ကို ကောင်းမွန်တဲ့ပွဲဖြစ်ပြီး စိတ်လှုပ်ရှားဖွယ်ကောင်းတဲ့ ဂိုးတွေလည်း သွင်းနိုင် ခဲ့ပါတယ်။ တန်ပြန်တိုက်စစ်တွေနဲ့ပွဲကို ဖိအားပေးနိုင်ခဲ့ပြီး ဆယ်စုနှစ်အတွင်း အကောင်းဆုံးဖြစ်ခဲ့တယ်လို့ ကျနော် ပြောချင်ပါတယ်။ ခက်ခဲတဲ့ အခိုက်အတန့်တွေရှိခဲ့ပြီး မလိုအပ်တဲ့ ဂိုးတစ်ဂိုးကို ပေးလိုက်ရပေမယ့် ဒါက ဖြစ်တတ် ပါတယ်။ ကျနော်တို့ဟာ ပွဲကိုလည်း အကောင်းဆုံးထိန်းချုပ်နိုင်ခဲ့ပါတယ်” လို့ Sky Sports ကို ပြောခဲ့တာပါ။

ဒီပွဲမှာ လီဗာပူးလ်အသင်းအတွက် ဂိုးတွေကို ဆာလတ်နဲ့ ဂျိုတာတို့က ၂ ဂိုးစီ၊ ဂတ်ပိုနဲ့ ဒါဝင်နူနက်ဇ်တို့က ၁ ဂိုးစီ သွင်းယူခဲ့ပြီး လိဒ်စ်အတွက် ချေပဂိုးကို ဆင်စတီရာက သွင်းယူခဲ့ပါတယ်။ ဒီနိုင်ပွဲဟာ လီဗာပူးလ်အသင်းအတွက် တော့ ယူနိုက်တက်အသင်းကို ဂိုးပြတ်အနိုင်ရပြီးနောက်ပိုင်း ပရီးမီးယားလိဂ်ပြိုင်ပွဲမှာ ပထမဆုံးပြန်လည်ရရှိတဲ့ နိုင်ပွဲလည်း ဖြစ်ခဲ့ပါတယ်။

လီဗာပူးလ်အသင်းဟာ ဒီရာသီ ပရီးမီးယားလိဂ်မှာ ဘုန်းမောက်အသင်းကို ၉ ဂိုး- ဂိုးမရှိ၊ ယူနိုက်တက်အသင်းကို ၇ ဂိုး- ဂိုးမရှိ၊ ချန်ပီယံလိဂ်ပြိုင်ပွဲမှာ ရိန်းဂျားစ်အသင်းကို ၇ ဂိုး- ၁ ဂိုးနဲ့ ဂိုးပြတ်နိုင်ပွဲတွေ ရယူနိုင်ခဲ့တာပါ။ဒါပေမယ့် ကလောပ့်က သူတို့တွေ ဂိုးသွင်းတဲ့ ဂိုးအရေအတွက်တွေထက် ကစားသမားတွေရဲ့ စွမ်းဆောင်ရည်အပေါ်ကိုသာ အမြဲတမ်းအကဲဖြတ်မယ်လို့ ပြောခဲ့ပါတယ်။

ကလောပ့်က “၆ ဂိုးသွင်းတယ်ဆိုတာ စွမ်းဆောင်ရည်နဲ့ ပတ်သက်ပါတယ်။ဒါက အနိုင်ရတဲ့ စွမ်းဆောင်ရည်ပါ။ ဒီပွဲက လုပ်ဆောင်မှုတွေဟာ အခုရာသီ အစောပိုင်းမှာ ဘာကြောင့် အလုပ်မဖြစ်ခဲ့လဲဆိုတာကို ရှင်းပြလို့မရပေမယ့် ဒီညမှာတော့ ကျနော်တို့ လုပ်နိုင်ခဲ့ပါတယ်” လို့ ပြောခဲ့တာပါ။

လီဗာပူးလ်အသင်းဟာ ဒီပွဲအနိုင်ရခဲ့ပေမယ့် ပရီးမီးယားလိဂ်အမှတ်ပေးဇယား အဆင့် ၈ နေရာမှာ ဆက်လက် ရပ်တည်နေကာ ချန်ပီယံလိဂ်ဝင်ခွင့်ရ အဆင့် ၄ နေရာမှာရှိတဲ့ နယူးကာဆယ်အသင်းနဲ့ ၉ မှတ် ကွာဟနေတာ ဖြစ်ပါတယ်။ လီဗာပူးလ်အသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် နော်တင်ဟမ်ဖောရက်စ်အသင်းနဲ့ ယှဉ်ပြိုင်ရမှာဖြစ်ပါတယ်။

Source:DailyMail

CNI News
၂၀၂၃ ခုနှစ်၊ ဧပြီ ၁၄

ဂျူဗင်တပ်စ်ဂိုးသမား ဆက်ဇနီဟာ စပို့တင်းလစ္စဘွန်းအသင်းနဲ့ ကစားခဲ့တဲ့ ယူရိုပါလိဂ်ကွာတားဖိုင်နယ် ပထမအကျော့ပွဲစဉ်မှာ ရင်ဘတ်အောင့်ပြီး အသက်ရှုဖို့ ခက်ခဲ့တာကြောင့် ကြောက်ရွံ့မိတယ်လို့ ပွဲအပြီးမှာ ပြောခဲ့ပါတယ်။

ဆက်ဇနီက "အခုတော့ အဆင်ပြေသွားပါပြီ။အနည်းငယ် စိုးရိမ်မိပေမယ့် ကျနော်စမ်းသပ်မှုတွေပြုလုပ်ခဲ့ပြီး အရာအားလုံးအဆင်ပြေပါတယ်။ကျနော်ကြောက်ရွံ့မိပါတယ်။အရင်က ဒီလိုမျိုးတစ်ခါမှ မဖြစ်ခဲ့ဖူးပါဘူး။အသက်ရှုဖို့ ခက်ခဲခဲ့လို့ အလွန်စိုးရိမ်မိပြီး မျက်ရည်ကျခဲ့တာပါ"လို့ Sky Sport Italia ကိုပြောခဲ့တာပါ။

ဆက်ဇနီဟာ ဂျူဗင်တပ်စ်နဲ့ စပို့တင်းလစ္စဘွန်းတို့ပွဲစဉ်ရဲ့ပွဲချိန် ၄၁ မိနစ်မှာ ရင်ဘတ်အောင့်လာလို့ ဆေးအဖွဲ့ရဲ့ ကုသမှုခံယူခဲ့ရပြီး ၂ မိနစ်ကျော်အကြာမှာ ဂိုးသမား ပီရင်နဲ့ လူစားလဲမှုပြုလုပ်ခဲ့ရပါတယ်။

ဆက်ဇနီဟာ ကွင်းထဲက ထွက်ခွာလာချိန်မျာ ငိုကြွေးနေခဲ့တာဖြစ်ပြီး ပွဲကြည့်ပရိသတ်တွေဟာ မတ်တပ်ရပ်ပြီး လက်ခုပ်တီးဂုဏ်ပြုခဲ့ကြတာဖြစ်ပါတယ်။

ဆက်ဇနီဟာ ဂျူဗင်တပ်စ်အသင်းရဲ့နံပါတ်တစ်ဂိုးသမားအဖြစ် လက်စွမ်းပြနေတာဖြစ်ပြီး လာမယ့် ဆက်ဆူအိုလိုနဲ့ စီးရီးအေပွဲမှာ ပွဲထွက်ပါဝင်နိုင်ဖွယ် ရှိ၊မရှိတော့ မသိရသေးပါဘူး။

ဒီပွဲမှာ ဂျူဗင်တပ်စ်အသင်းဟာ စပို့တင်းလစ္စဘွန်းအသင်းကို ၁ ဂိုး- ဂိုးမရှိနဲ့ အနိုင်ရခဲ့ပြီး အနိုင်ဂိုးကို ဂတ်တီက သွင်းယူခဲ့တာဖြစ်ပါတယ်။

Source: Fotmob

CNI Sport News

၂၀၂၃ ခုနှစ်၊ ဧပြီ ၁၃

ဘိုင်ယန်မြူးနစ်အသင်းဟာ တောင်ပံကစားသမား မာနေးကို ဟော်ဖန်ဟိမ်းနဲ့ ကစားမယ့် ဘွန်ဒစ်လီဂါပွဲစဉ် အတွက် အသင်းလူ စာရင်းကနေ ချန်လှပ်ခဲ့တယ်လို့ တရားဝင် အတည်ပြုခဲ့ပါတယ်။

မာနေးဟာ မန်စီးတီးအသင်းနဲ့ ချန်ပီယံလိဂ် ကွာတားဖိုင်နယ် ပထမအကျော့ ပွဲအပြီး အဝတ်လဲခန်းမှာ အသင်းဖော် ဆာနေးရဲ့ မျက်နှာကို လက်သီးနဲ့ ထိုးခဲ့ပါတယ်။

ဒီအဖြစ်အပျက်ကြောင့် ဆာနေးဟာ နှုတ်ခမ်းကွဲသွားပြီးနောက် အသင်းဖော်တွေက သူတို့နှစ်ဦးကို လူစုခွဲခဲ့ရတာ ဖြစ်ပါတယ်။

မာနေးနဲ့ ဆာနေးတို့ဟာ ဒီနေ့ပြုလုပ်ခဲ့တဲ့ ဘိုင်ယန်မြူးနစ် အသင်းရဲ့ လေ့ကျင့်ရေး အစီအစဉ်မှာ ပါဝင်ခဲ့ကြပါ တယ်။

ဒါပေမယ့် ဘိုင်ယန်မြူးနစ်အသင်းဟာ မာနေးကို အခုတစ်ပတ် ဟော်ဖန်ဟိမ်းအသင်းနဲ့ ကစားမယ့် ပွဲစဉ်ရဲ့ အသင်း လူစာရင်းကနေ ချန်လှပ်ကြောင်း ထုတ်ပြန်ခဲ့ပါတယ်။

မာနေးဟာ လူစာရင်းကနေ ချန်လှပ်ခံရတဲ့အပြင် ဒဏ်ကြေးငွေပါ ပေးဆောင်ရမယ်လို့ ဘိုင်ယန်မြူးနစ် အသင်းရဲ့ ထုတ်ပြန်ချက်မှာ ဖော်ပြထားပါတယ်။

Source: FC Bayern Munchen

CNI Sport News

၂၀၂၃ ခုနှစ်၊ ဧပြီ ၈

အေစီမီလန်အသင်းဟာ ဝါရင့်တိုက်စစ်မှူး အီဘရာဟီမိုဗစ်ကို စာချုပ်သက်တမ်း မတိုးဖို့ ဆုံးဖြတ်ခဲ့တယ်လို့ သိရပါတယ်။

အေစီမီလန်အသင်းနဲ့ အီဘရာဟီမိုဗစ်တို့ ချုပ်ဆိုထားတဲ့ စာချုပ်ဟာ အခုရာသီ အကုန်မှာ ကုန်ဆုံးတော့မှာ ဖြစ်တာကြောင့် စီးရီးအေ လက်ရှိ ချန်ပီယံအသင်းဟာ ဆွီဒင် လက်ရွေးစင် ကစားသမားကို သက်တမ်း မတိုးဖို့ ဆုံးဖြတ်ခဲ့တာလို့ Footbercato က ဖော်ပြခဲ့ပါတယ်။

အီဘရာဟီမိုဗစ်ဟာ ၂၀၂၂ ခုနှစ်၊ မေလက ဘယ်ဘက်ဒူး ခွဲစိတ် ကုသမှု ခံယူခဲ့တာကြောင့် အခုနှစ်ရာသီ ပွဲအများ အပြားကို ပါဝင်နိုင်ခဲ့ခြင်း မရှိပါဘူး။

ဒီနောက်မှာတော့ အီဘရာဟီမိုဗစ်ဟာ ဖေဖော်ဝါရီလ ၂၆ ရက်က အေစီမီလန်အသင်းအတွက် ပြန်လည် ကစား ပေးနိုင်ခဲ့ပြီး အူဒီးနီးစ်နဲ့ပွဲမှာ ဂိုးသွင်း ယူနိုင်ခဲ့ပါတယ်။

ဒါပေမယ့် အသက် ၄၁ နှစ်အရွယ်ရှိ ဝါရင့်တိုက်စစ်မှူးဟာ ဆွီဒင်လက်ရွေးစင် အသင်းနဲ့ နိုင်ငံတကာပွဲ ပါဝင် ကစားပေးပြီးနောက် ပေါင်ဒဏ်ရာ ရခဲ့တဲ့အတွက် လာမယ့် ပွဲတွေကိုလည်း ထပ်ပြီး ပါဝင်နိုင်ဖွယ် မရှိဘူးလို့ သိရတာပါ။

အီဘရာဟီမိုဗစ်ဟာ ပြီးခဲ့တဲ့ ရာသီက အေစီမီလန်အသင်းကို စီးရီးအေဖလား ရရှိအောင် ကူညီပေးနိုင်ခဲ့လို့ အသင်းက သူ့ကို ၁ နှစ် သက်တမ်းတိုးခဲ့တာ ဖြစ်ပါတယ်။

ဆုဖလားနဲ့အတူ အီဘရာဟီမိုဗစ်ကိုတွေ့ရစဉ်

အီဘရာဟီမိုဗစ် ကတော့ သူဟာ လာမယ့်နှစ် ရာသီမှာ ပုံစံကောင်းရှိနေရင် အေစီမီလန်အသင်းမှာ ဆက်ပြီး ကစားချင်တယ်လို့ ပြီးခဲ့တဲ့လက ပြောထားတာပါ။

အီဘရာဟီမိုဗစ်ဟာ အေစီမီလန်အသင်းမှာ ဒုတိယအကြိမ် ကစားဖို့အတွက် ၂၀၁၉-၂၀ ရာသီက ပြန်လည် ရောက်ရှိ လာခဲ့တာဖြစ်ပြီး အခုအချိန်ထိ ပွဲပေါင်း ၇၈ ပွဲ ပါဝင်ကစားကာ ၃၇ ဂိုး သွင်းယူပေးထားတာ ဖြစ်ပါတယ်။

စီးရီးအေကလပ် မွန်ဇာအသင်းကတော့ အီဘရာဟီမိုဗစ် အနေနဲ့ အနားယူဖို့ မဆုံးဖြတ်ခဲ့ဘူး ဆိုရင်တော့ ခေါ်ယူ ချင်နေတယ်လို့လည်း သတင်းတွေ ထွက်နေတာပါ။

နောက်ဆုံး ကစားခဲ့တဲ့ စီးရီးအေပွဲစဉ်မှာ အမ်ပိုလီအသင်းနဲ့ ဂိုးမရှိ သရေကျခဲ့တဲ့ အေစီမီလန်အသင်းဟာ လာမယ့် ကြားရက်မှာတော့ ချန်ပီယံလိဂ် ကွာတားဖိုင်နယ် ပထမအကျော့အဖြစ် နာပိုလီအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဧပြီ ၈

ဗြိတိန်ဟဲဗီးဝိတ် လက်ဝှေ့သမား အန်သိုနီဂျိုရွှာက ဖရန်ကလင်မ်ကို အနိုင်ရပြီးနောက် လာမယ့် ၃ လအတွင်းမှာ လက်ဝှေ့ကြိုးဝိုင်းထဲကို ပြန်လည် ဝင်ရောက်မယ်လို့ ပြောခဲ့ပါတယ်။

အန်သိုနီဂျိုရွှာက “ဖရန်ကလင်မ်နဲ့ ပွဲစဉ် မတိုင်ခင်ကဆိုရင် ပွဲနဲ့ ဝေးခဲ့တာ ၉ လ ကြာခဲ့ပါတယ်။ အဲဒီလောက် အကြာကြီး ပွဲနဲ့ မဝေးချင်ပါဘူး။ နောက် ၃ လနေရင် ကျနော် ပြန်လာချင်ပါတယ်။ နောက် ၃ လမှာ ထိုးသတ် ချင်တယ်ဆိုတာ သေချာပေမယ့် ဘယ်သူနဲ့ ထိုးသတ်ရမလဲဆိုတာတော့ မသိသေးပါဘူး”လို့ ပြောခဲ့တာပါ။

အန်သိုနီဂျိုရွှာဟာ ဖရန်ကလင်မ်ကို အနိုင်ရတဲ့ ပွဲမတိုင်ခင် ယူကရိန်း လက်ဝှေ့သမား အူဆက်ခ်ကို ၂ ကြိမ် ဆက် တိုက် အရေးနိမ့်ခဲ့ပြီး WBA (Super)၊IBF နဲ့ WBO ကမ္ဘာ့ချန်ပီယံခါးပတ်တွေ ဆုံးရှုံးခဲ့ရတာ ဖြစ်ပါတယ်။

ဧပြီလ ၁ ရက်က ထိုးသတ်ခဲ့တဲ့ ဖရန်ကလင်မ်နဲ့ ပွဲကတော့ အန်သိုနီဂျိုရွှာအတွက် ၂ နှစ်ကျော်အကြာမှ ပထမဆုံး နိုင်ပွဲ ဖြစ်ခဲ့တာပါ။ အန်သိုနီဂျိုရွှာဟာ တိုင်ဆန်ဗျူရီနဲ့ ထိုးသတ်ဖို့ အတွက်လည်း သတင်းတွေ ထွက်ခဲ့ပေမယ့် အခု အချိန်ထိ သဘောတူညီမှု မရရှိသေးတာ ဖြစ်ပါတယ်။

အန်သိုနီဂျိုရွှာကို တွေ့ရစဉ်

ဗြိတိန်ဟဲဗီးဝိတ် လက်ဝှေ့သမားတစ်ဦးဖြစ်တဲ့ ဒီလီယန်ဝှိုက်က အန်သိုနီဂျိုရွှာဟာ ဖရန်ကလင်မ်ကို အနိုင် ရပြီးတဲ့ အချိန်မှာ နောက်ထပ် မထိုးသတ်ချင်တော့တဲ့ လက္ခဏာတွေကို ပြသခဲ့တယ်လို့ ပြောခဲ့တာပါ။

“အန်သိုနီဂျိုရွှာ အနေနဲ့ နောက်ထပ် မထိုးသတ်ချင်တော့ဘူး ဆိုရင်တော့ သူရပ်တန့် လိုက်သင့်ပြီလို့ ထင်ကြောင်း” ဒီလီယန်ဝှိုက်က BBC Radio 5 Live ကို ပြောခဲ့တာ ဖြစ်ပါတယ်။

အသက် ၃၃ နှစ်အရွယ်ရှိ ဗြိတိန် လက်ဝှေ့သမားဟာ ပရော်ဖက်ရှင်နယ် လက်ဝှေ့သမားဘဝမှာ ပွဲပေါင်း ၂၈ ပွဲ အထိ ထိုးသတ်ခဲ့တာမှာ ၂၅ ပွဲအထိ အနိုင်ရခဲ့ပြီး ၃ ပွဲသာ အရေးနိမ့်ထားတာပါ။

အန်သိုနီဂျိုရွှာဟာ ဒီအရေးနိမ့်ခဲ့တဲ့ ၃ ပွဲထဲမှာ အူဆက်ခ်နဲ့ ၂ ပွဲ ပါဝင်ခဲ့ပြီး ကျန် ၁ ပွဲကတော့ ၂၀၁၉ က အန်ဒီရူးဝစ် ကို အရေးနိမ့်ခဲ့တာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဧပြီ ၈

အာဆင်နယ်အသင်းနည်းပြ အာတီတာက လီဗာပူးလ်အသင်းကို အန်ဖီးလ်ကွင်းမှာ အနိုင်ရအောင် လုပ်နိုင်စွမ်း ရှိတယ်လို့ ပွဲကြို သတင်းစာ ရှင်းလင်းပွဲမှာ ပြောလိုက်ပါတယ်။

အာတီတာက “ကျနော်တို့မှာ ကြီးမားတဲ့ စိန်ခေါ်မှုကြီး ရှိတယ်ဆိုတာကို သိပါတယ်။ ဒါဟာ အန်ဖီးလ်ကွင်းကို သွားပြီး နှစ်ပေါင်းများစွာကြာ ကျနော်တို့ မလုပ်ဖူးတဲ့ အရာတစ်ခုကို လုပ်ဖို့အတွက် ကြီးမားတဲ့ အခွင့်အရေးဖြစ်ပြီး ဒါက အသင်းကို တွန်းအားပေးနေတဲ့ အရာပါ။ ကျနော်တို့ လုပ်နိုင်စွမ်း ရှိပါတယ်။ အနိုင်ရဖို့ အကောင်းဆုံး ကြိုးစား ရမယ်ဆိုတာ သိပါတယ်။ မနှစ်ကထက် ကျနော်တို့ ပိုပြီးကောင်းမယ်ဆိုတာ အသေအချာပါပဲ”လို့ ပြောခဲ့တာပါ။

အာဆင်နယ်အသင်းက လီဗာပူးလ်အသင်းကို အန်ဖီးလ်ကွင်းမှာ နောက်ဆုံး အနိုင်ရခဲ့တဲ့ ပရီးမီးယားလိဂ် ပွဲစဉ် ကတော့ ၂၀၁၂ က ဖြစ်ပြီး အဲဒီတုန်းက အာတီတာဟာ အာဆင်နယ်အသင်းမှာ ကစားသမားအဖြစ် ရှိနေတာ ဖြစ်ပါတယ်။

အာဆင်နယ်အသင်းဟာ အန်ဖီးလ်ကွင်းမှာ နောက်ဆုံးကစားခဲ့တဲ့ ပရီးမီးယားလိဂ် ၆ ပွဲစလုံး အရေးနိမ့်ခဲ့တာ ဖြစ်ပြီး ဒီပွဲတွေ အားလုံးပေါင်းမှာ လီဗာပူးလ်က ၂၂ ဂိုးအထိ သွင်းယူထားနိုင်ခဲ့ကာ အာဆင်နယ်ကတော့ ၄ ဂိုးသာ သွင်းယူနိုင်ခဲ့တာပါ။

အာဆင်နယ်အသင်းဟာ လီဗာပူးလ်အသင်းနဲ့ ပွဲမှာ ရလဒ်ကောင်း ရယူနိုင်ခဲ့ရင် ပရီးမီးယားလိဂ် ချန်ပီယံဆု အတွက် နောက်ထပ် ခြေလှမ်းတစ်လှမ်းကို ထပ်ပြီး လှမ်းနိုင်မယ်လို့ ယုံကြည်မှုတွေ ရှိနေတာ ဖြစ်ပါတယ်။

လီဗာပူးလ်အသင်းက ဆာလတ်ကိုတွေ့ရစဉ်

အဲဒါကြောင့် အာတီတာက အန်ဖီးလ်ကွင်းမှာ ၁၁ နှစ်ကြာ နိုင်ပွဲပျောက်ဆုံးနေမှုကို အဆုံးသတ် ချင်နေတာဖြစ်ပြီး မနှစ်ကရာသီ နောက်ဆုံး တွေ့ဆုံခဲ့တဲ့ပွဲမှာ ၄ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့တာကြောင့် စပိန်လူမျိုးနည်းပြဟာ ဝေဖန်မှုတွေ ခံခဲ့ရတာပါ။

အာတီတာက “ကစားသမားတွေကို တိရစ္ဆာန်ရုံမှာ လေ့ကျင့်ခိုင်းလို့ မရပေမယ့် တနင်္ဂနွေနေ့မှာ တောအုပ်ကြီးထဲ ကို သွားရမှာပါ။ ဒါက မဖြစ်နိုင်ပေမယ့် ကိုယ့်ကိုယ်ကို အကောင်းဆုံး ပြင်ဆင်ထားရမှာဖြစ်ပြီး ကစားသမားတွေ ကလည်း ပြင်ဆင်ထားရပါမယ်။ သူတို့ ကြုံတွေ့ရမယ့် အရာတွေကို ပြောပြထားရမှာ ဖြစ်သလို ဒါကိုလည်း အသိ အမှတ် ပြုရပါမယ်။ အသင်းဟာ စိတ်အားထက်သန်မှုနဲ့ အပေါင်းလက္ခဏာဆောင်တဲ့ အရာတွေကတော့ အပြည့်ရှိ နေပါတယ်”လို့ ပြောခဲ့ပါတယ်။

အာဆင်နယ်အသင်းဟာ အခုနှစ်ရာသီ အိမ်ကွင်းမှာ လီဗာပူးလ်အသင်းကို ဧည့်ခံကစားခဲ့တာမှာတော့ ၃ ဂိုး- ၂ ဂိုးနဲ့ အနိုင်ရထားတာ ဖြစ်ပါတယ်။

Source: Daily Mail