CNI Sport News

၂၀၂၅ ခုနှစ်၊ မတ်လ ၃

ဒဏ်ရာကြောင့် အနားယူနေရတဲ့ ကွင်းလယ်လူ ရိုဒရီဟာ ဒီရာသီမှာ မန်စီးတီးအသင်းအတွက် ပြန်ပါဝင် ကစားနိုင်တယ်လို့ နည်းပြ ဂွာဒီယိုလာက ပြောခဲ့ပါတယ်။

ဂွာဒီယိုလာက “ရက်သတ္တပတ်တွေစောပြီး ပြန်လာမယ်ဆိုတဲ့ မိုက်မဲတဲ့ ဆုံးဖြတ်ချက်တွေ ချဖို့မလိုပါဘူး။ ရိုဒရီ ဟာ ကောင်းမွန်နေပေမယ့် ပြန်လာဖို့ မနီးစပ်သေးဘူးလို့ ပြောချင်ပါတယ်။ သူဟာ အဝတ်လဲခန်းထဲမှာ ဘောလုံး ကို ထိတွေ့နေပြီး ယုံကြည်မှုအပြည့်နဲ့ ပျော်ရွှင်နေတယ်လို့ ခံစားရပါတယ်။ ကျနော်ဟာ သူ့ကို ရာသီမကုန်ခင်မှာ ပြန်လာဖို့ မမျှော်လင့်ထားပေမယ့် ပြန်လာဖို့ဖြစ်သွားနိုင်ပါတယ်”လို့ ပြောခဲ့တာပါ။

ရိုဒရီဟာ ပြီးခဲ့တဲ့ စက်တင်ဘာက အာဆင်နယ်အသင်းနဲ့ ပရီးမီးယားလိဂ်ပွဲစဉ်မှာ ဒူးအရွတ် ဆုတ်ပြဲဒဏ်ရာရရှိပြီး ခွဲစိတ်မှုခံယူပြီးကတည်းက ပွဲတွေကစားနိုင်ခြင်း မရှိသေးပါဘူး။ 

ဒါပေမယ့် ရိုဒရီဟာ အသင်းမှာ တစ်ဦးချင်း လေ့ကျင့်မှုတွေ စတင်ပြုလုပ်နေပြီဖြစ်လို့ မန်စီးတီးအသင်းအတွက် သတင်းကောင်းဖြစ်ခဲ့ပါတယ်။ 

မန်စီးတီးအသင်းနည်းပြ ဂွာဒီယိုလာဟာ ရိုဒရီကို လာမယ့်ရာသီမှသာ ပြန်လာနိုင်ဖို့ မျှော်လင့်ခဲ့ပေမယ့် အသင်း ဘက်က သူတစ်ဦးချင်း လေ့ကျင့်နေတဲ့ ရုပ်သံပြခဲ့ပြီးနောက်မှာ ရာသီမကုန်ခင် ပြန်ကစားနိုင်မယ့် အရိပ်အမြွက် ပြောခဲ့တာပါ။

ရိုဒရီနဲ့ ဂွာဒီယိုလာကို တွေ့ရစဉ်

မန်စီးတီးအသင်းဟာ ရိုဒရီရဲ့ဒဏ်ရာကြောင့် ဒီရာသီမှာ ရလဒ်ကောင်းတွေရရှိဖို့ ရုန်းကန်နေရပြီး ပရီးမီးယားလိဂ် ပြိုင်ပွဲမှာ ထိပ်ဆုံးနေရာ ရပ်တည်နေတဲ့ လီဗာပူးလ်အသင်းနဲ့ ရမှတ် ၂၀ အထိ ကွာဟသွားခဲ့ပါတယ်။

ဒါအပြင် ချန်ပီယံလိဂ်ပြိုင်ပွဲကနေ စောစီးစွာ ထွက်ခဲ့ရပြီး ဒီရာသီမှာ ရယူနိုင်စရာ ဆုဖလား မျှော်လင့်ချက်အဖြစ် FA ဖလားသာ ရှိတော့ပါတယ်။ 

မန်စီးတီးအသင်းဟာ FA ဖလား ကွာတားဖိုင်နယ်အဖြစ် ဘုန်းမောက်အသင်းနဲ့ ယှဉ်ပြိုင်ရမှာပါ။

မန်စီးတီးအသင်းဟာ အခုလာမယ့် ပရီးမီးယားလိဂ် ပွဲစဉ်အဖြစ် နော်တင်ဟမ်ဖောရက်စ်အသင်း အိမ်ကွင်း သွားရောက် ယှဉ်ပြိုင်ရမှာဖြစ်ပါတယ်။

Source: BBC

CNI Sport News

၂၀၂၅ ခုနှစ်၊ မတ်လ ၃

ယူနိုက်တက်အသင်းရဲ့ ရည်မှန်းချက်က ပရီးမီးယားလိဂ်ဖလား ရဖို့ဆိုပြီး ပြောခဲ့တဲ့အပေါ် နုံအတဲ့သူလို့ မှတ်ချက် ပေးခဲ့တဲ ဂန္ထဝင်တိုက်စစ်မှူး ဝိန်းရွန်နီကို နည်းပြအာမိုရင်က ဝေဖန်သုံးသပ်သူဖြစ်ရတာ လွယ်ကူတယ်လို့ပြောကာ တုန့်ပြန်ခဲ့ပါတယ်။

အာမိုရင်က “ပရီးမီးယားလိဂ်က ရည်မှန်းချက်ပန်းတိုင်ပါ။ ဒီလိုပြောတာကို နုံအတယ်လို့ ထင်ကြမှာပါ။ ဘာလို့လဲ ဆိုရင် ကျနော်တို့ရဲ့ လက်ရှိအနေအထားက အလွန်ဝေးကွာနေလို့ပါ။ ဒါကို ကျနော်သိပြီး အလွန်လွယ်ကူပါတယ်။ ကျနော်ဟာ ကစားသမားဘဝ ကုန်ဆုံးပြီးချိန်မှာ ဝေဖန်သုံးသပ်သူဖြစ်ခဲ့ပြီး ဒါက အလွန်လွယ်ကူတယ်ဆိုတာ သိပါ တယ်။ ကျနော်တို့ရဲ့ ရည်မှန်းချက်က ပရီးမီးယားလိဂ်ဖလား ရဖို့ဖြစ်ပြီး အားလုံးရည်မှန်းထားတဲ့ အရာပါ။ အခုက ခက်ခဲတဲ့ အခိုက်အတန့်မှာရှိနေပြီး ပိုကောင်းအောင်လုပ်ရမှာပါ။ ကျနော်က နုံအတဲ့သူ မဟုတ်ပါဘူး”လို့ ပြောခဲ့ တာပါ။

လက်ရှိ ချန်ပီယံ ယူနိုက်တက်အသင်းဟာ FA ဖလား ပဉ္စမအဆင့်ပွဲစဉ်မှာ ဖူလ်ဟမ်အသင်းကို ပင်နယ်တီ အဆုံးအဖြတ်နဲ့ အရေးနိမ့်ပြီးနောက် ပြိုင်ပွဲကနေ စောစီးစွာ ထွက်ခွာခဲ့ရပါတယ်။ 

ဒီရှုံးပွဲကြောင့် ယူနိုက်တက်အသင်းဟာ လာမယ့်ရာသီ ဥရောပပြိုင်ပွဲ ယှဉ်ပြိုင်ခွင့် ရရှိဖို့ဆိုရင် ယူရိုပါလိဂ်ပြိုင်ပွဲမှာ ချန်ပီယံဆု ရယူနိုင်ဖို့ ကြိုးစားရတော့မှာပါ။

 ယူနိုက်တက်အသင်းကို တွေ့ရစဉ် 

ဖူလ်ဟမ်အသင်းကို အရေးနိမ့်ပြီးနောက် BBC Sport နဲ့ ပြုလုပ်ခဲ့တဲ့ အင်တာဗျူးမှာ နည်းပြအာမိုရင်က ယူနိုက်တက်အသင်းရဲ့ ရည်မှန်းချက်က ပရီးမီးယားလိဂ်ဖလားရဖို့လို့ ပြောခဲ့ပါတယ်။

ဒီအချိန်မှာ BBC ရဲ့ ရုပ်သံဘောလုံး ဝေဖန်သုံးသပ်သူအဖြစ် ဆောင်ရွက်နေတဲ့ ဝိန်းရွန်နီက အာမိုရင်ကို နုံအတဲ့ သူလို့ပြောခဲ့ပြီး လက်ရှိ အခြေအနေအပေါ် ပိုအာရုံစိုက်သင့်တယ်လို့ မှတ်ချက်ပေးခဲ့တာပါ။ 

ဒါကို နည်းပြအာမိုရင်က ရုပ်သံစတူဒီယိုထဲကနေ ဘေးကင်းစွာနဲ့ ပြောရတာဟာ လွယ်ကူတယ်လို့ပြောကာ ဝိန်းရွန်နီကို ပြန်တုန့်ပြန်ခဲ့ပါတယ်။ 

ပေါ်တူဂီလူမျိုးနည်းပြ အာမိုရင် လက်ထက်မှာ ယူနိုက်တက်အသင်းဟာ ရလဒ်ကောင်းတွေ ရရှိနိုင်ဖို့ ရုန်းကန် နေရတာပါ။

ယူနိုက်တက်အသင်းဟာ လာမယ့် ကြားရက်မှာ ယူရိုပါလိဂ် ၁၆ သင်းအဆင့် ပထမအကျော့ပွဲစဉ်အဖြစ် ဆိုစီဒက်အသင်းအိမ်ကွင်း သွားရောက်ယှဉ်ပြိုင်ရမှာ ဖြစ်ပါတယ်။

Source: ESPN

CNI Sport News

၂၀၂၅ ခုနှစ်၊ မတ်လ ၁

ဒီရာသီအကုန်မှာ မန်စီးတီးအသင်းနဲ့ စာချုပ်ကုန်ဆုံးတော့မယ့် ကွင်းလယ်လူ ဒီဘရိုင်းရဲ့ အနာဂတ်ဟာ သူ့ရဲ့ လက်ထဲမှာပဲရှိတယ်လို့ နည်းပြဂွာဒီယိုလာက ပြောခဲ့ပါတယ်။ 

ဂွာဒီယိုလာက “ကလပ်ရဲ့အနာဂတ်မှာ အစိတ်အပိုင်းအဖြစ် ရှိနေမယ့် အသက် ၃၀ ကျော် ကစားသမားတွေ ရှိပါတယ်။ ဒီဘရိုင်းကတော့ သူနဲ့ ကလပ်က ဆုံးဖြတ်သွားပါလိမ့်မယ်။ စာချုပ်ရှိနေတဲ့ သူတွေကို လာမယ့် ရာသီ အသင်းမှာ ဆက်ရှိဖို့ ကျနော် မျှော်လင့်ပါတယ်။ ကျနော်တို့ဟာ ကစားသမားအသစ်တွေ ဒါမှမဟုတ် အဟောင်း တွေနဲ့ပဲ လုပ်လို့မရဘဲ အားလုံး အတူတူတွဲလုပ်ရမှာပါ”လို့ ပြောခဲ့တာပါ။

မန်စီးတီးအသင်းဟာ ပြီးခဲ့တဲ့ ဇန်နဝါရီလက အိုမာမာမွတ်ရှ်၊ နီကိုဂွန်ဇာလက်ဇ် အပါအဝင် ကစားသမား ၅ ဦးကို ပေါင်သန်း ၁၈၀ ကျော် သုံးစွဲပြီး အားဖြည့်ခဲ့သလို လာမယ့် နွေရာသီမှာလည်း အသင်းကို အပြောင်းအလဲ ပြုလုပ်သွားဖို့ ရှိနေတာဖြစ်ပါတယ်။

အဲဒါကြောင့် စာချုပ်ကုန်ဆုံးမယ့် ဒီဘရိုင်း အပါအဝင် ကစားသမားတချို့ဟာ နွေရာသီမှာ မန်စီးတီးအသင်းကနေ ထွက်ခွာရဖို့ ရှိနေတာပါ။ 

ဂွာဒီယိုလာကတော့ အတွေ့အကြုံရင့် ကစားသမားတွေကို လာမယ့်ရာသီအသင်းမှာ ဆက်ရှိနေဖို့ မျှော်လင့် နေပါတယ်။ 

ဒီဘရိုင်းနဲ့ မန်စီးတီးအသင်းတို့ရဲ့ စာချုပ်သက်တမ်းတိုးဖို့ ဆွေးနွေးမှုတွေဟာ ပြီးခဲ့တဲ့ နိုဝင်ဘာလက ရပ်တန့်နေ ခဲ့ပြီး ကစားသမားကတော့ သူ့ရဲ့အနာဂတ်ကို ဆုံးဖြတ်ရခြင်း မရှိသေးဘူးလို့ ပြောထားတာပါ။ 

လက်ရှိအချိန်မှာ ဒီဘရိုင်းကို ခေါ်ယူဖို့ မေဂျာလိဂ်နဲ့ ဆော်ဒီပရိုလိဂ် ကလပ်တွေက စိတ်ဝင်စားနေတာ ဖြစ်ပါတယ်။ 

၂၀၁၅ ခုနှစ်က ဝုလ်ဖ်ဘတ်အသင်းကနေ ရောက်ရှိလာခဲ့တဲ့ ဒီဘရိုင်းဟာ မန်စီးတီးအသင်းနဲ့အတူ ပရီးမီးယားလိဂ် ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အများအပြား ရယူနိုင်ခဲ့တာပါ။ 

မန်စီးတီးအသင်းနဲ့ ပရီးမီးယားလိဂ်သမိုင်းမှာ အကောင်းဆုံး ကစားသမားတွေထဲက တစ်ဦးဖြစ်ခဲ့တဲ့ ဒီဘရိုင်းဟာ ပြီးခဲ့တဲ့နှစ်တွေအတွင်း ဒဏ်ရာတွေနဲ့ ရုန်းကန်ခဲ့ရပြီး ပွဲကစားချိန် အကန့်အသတ်နဲ့သာ ရရှိတော့တာဖြစ်ပါတယ်။

Source: Metro

CNI Sport News

၂၀၂၅ ခုနှစ်၊ မတ်လ ၁

ချယ်လ်ဆီးအသင်းဟာ ဂိုးသမားနှစ်ဦးဖြစ်တဲ့ ဆန်းချက်ဇ်နဲ့ ယော်ဂင်ဆန်တို့ လက်စွမ်းပိုင်းတည်ငြိမ်မှုမရှိပေမယ့် နွေရာသီမှာ ဂိုးသမားသစ်တစ်ဦးခေါ်ယူဖို့ အစီအစဉ်မရှိဘူးလို့ ဗြိတိန်မီဒီယာတွေက ဖော်ပြထားပါတယ်။ 

စပိန်ဂိုးသမား ဆန်းချက်ဇ်ဟာ ဒီရာသီအစပိုင်းမှာ ချယ်လ်ဆီးအသင်းရဲ့ နံပါတ်တစ်ဂိုးသမားအဖြစ် ပွဲထွက်ခွင့်ရခဲ့ပေမယ့် အမှားယွင်းတွေအများကြီးပြုလုပ်ခဲ့တာပါ။

အဲဒါကြောင့် ချယ်လ်ဆီးအသင်းနည်းပြ မာရက်စ်ကာဟာ ဆန်းချက်ဇ်ကို နံပါတ်တစ်နေရာကနေ ဖယ်ရှားပြီး ယော်ဂင်ဆန်ကို ပွဲထွက်ဂိုးသမားအဖြစ် ပြောင်းလဲအသုံးပြုခဲ့တာ ဖြစ်ပါတယ်။ 

ပြီးခဲ့တဲ့နွေရာသီက ဗီလာရီးရယ်လ်အသင်းကနေ ရောက်ရှိလာခဲ့တဲ့ ယော်ဂင်ဆန်ဟာ ဆန်းချက်ဇ်ရဲ့နေရာမှာ နံပါတ်တစ်ဂိုးသမားအဖြစ် အစားမထိုးခံရခင်က ဖလားပြိုင်ပွဲတွေမှာသာ ပါဝင်ခဲ့ရတာပါ။

ဒါပေမယ့် ယော်ဂင်ဆန်ဟာ ဘရိုက်တန်၊အက်စတွန်ဗီလာအသင်းတို့နဲ့ ပရီးမီးယားလိဂ်ပွဲတွေမှာ အမှားအယွင်းတွေပြုလုပ်ခဲ့တာကြောင့် ဝေဖန်မှုတွေခံခဲ့ရပါတယ်။ 

ပုံစာ-ချယ်လ်ဆီးအသင်း ဂိုးသမားကို တွေ့ရစဉ်

ဆန်းချက်ဇ်နဲ့ ယော်ဂင်ဆန်တို့ရဲ့ လက်စွမ်းပိုင်းမတည်ငြိမ်မှုတွေကြောင့် နွေရာသီမှာ ဂိုးသမားသစ် တစ်ဦးခေါ်ယူဖို့ ချယ်လ်ဆီးအသင်းကို ပရိသတ်တွေနဲ့ ဘောလုံးဝေဖန်သုံးသပ်သူတွေက တိုက်တွန်းထားကြပါတယ်။ 

ဒီလိုတောင်းဆိုမှုတွေ ရှိနေပေမယ့် ချယ်လ်ဆီးအသင်းဟာ နွေရာသီမှာ ဂိုးသမားသစ် ခေါ်ယူဖို့ အစီအစဉ်မရှိဘူးလို့ သိရပါတယ်။

ချယ်လ်ဆီးအသင်းဟာ အငှားချထားတဲ့ ဂိုးသမားတွေအသင်းထံ ပြန်ရောက်ရှိလာမှာဖြစ်လို့ နံပါတ်တစ်နေရာအတွက် အပြိုင်အဆိုင် ကြိုးစားကြမှာကို မြင်တွေ့ချင်နေတာပါ။ 

နည်းပြဟောင်း ပိုချက်တီနို လက်ထက်မှာ နံပါတ်တစ်ဂိုးသမားဖြစ်ခဲ့တဲ့ ပီထရိုဗစ်ဟာ ပြင်သစ်ကလပ်မှာ လက်စွမ်းပြသနေသလို စပိန်ဂိုးသမား ကီပါကလည်း ဘုန်းမောက်အသင်းမှာ လက်စွမ်းပြသနေတာဖြစ်ပါတယ်။ 

ဒါပေမယ့် ကီပါရဲ့အနာဂတ်ကတော့ ချယ်လ်ဆီးအသင်းမှာ မရေမရာဖြစ်နေပြီး နွေရာသီမှာ အပြီးသတ်ထွက်ခွာဖွယ်ရှိနေတာပါ။

ချယ်လ်ဆီးအသင်းဟာ လာမယ့် ကြားရက်ထဲမှာ ကိုပင်ဟေဂင်အသင်းနဲ့ ကွန်းဖရန့်လိဂ် ၁၆ သင်းအဆင့် ပထမအကျော့ပွဲစဉ်ကစားရမှာဖြစ်ပြီး ယော်ဂင်ဆန်နဲ့ ဆန်းချက်ဇ်တို့ နှစ်ဦးထဲက ဘယ်သူ့ကိုပွဲထွက်အသုံးပြုမလဲဆိုတာ စောင့်ကြည့်ရမှာဖြစ်ပါတယ်။ 

Source:Metro

CNI Sport News

၂၀၂၅ ခုနှစ်၊ မတ်လ ၁

ယူနိုက်တက်အသင်းနည်းပြ အာမိုရင်က ကွင်းလယ်လူဟောင်း ရွိုင်ကိန်းရဲ့ဝေဖန်မှုကို ခံခဲ့ရတဲ့ အသင်းခေါင်းဆောင် ဘရူနိုဖာနန်ဒက်စ်ဘက်ကနေ ရပ်တည်ခဲ့ပြီး နည်းပြရဲ့အမြင်က ပိုအရေးပါတယ်လို့ ပြောခဲ့ပါတယ်။

အာမိုရင်က “ကျနော် ဒီအကြောင်းကို ကြားခဲ့ပါတယ်။ ကျနော့်မှာလည်း မတူညီတဲ့အမြင်ရှိပါတယ်။ ဘရူနိုက အသင်းအတွက်ရော ကျနော့်အတွက်ပါ အလွန်အရေးပါတဲ့သူပါ။ သူဟာ အသင်းဖော်တွေကို စိတ်ပျက်ပြီး ဝေဖန်တဲ့ပုံစံတွေလုပ်တာကို ကျနော်သိပါတယ်။ လူတိုင်းမှာအမြင်ရှိပြီး၊ ရွိုင်ကိန်းဟာ သူကစားခဲ့တဲ့အချိန်တုန်းက ကြီးမားတဲ့စံနှုန်းတွေရှိခဲ့ပါတယ်။ ကျနော်က နည်းပြဖြစ်တဲ့အတွက် ရွိုင်ကိန်းရဲ့အမြင်ထက် ကျနော့်ရဲ့အမြင်က ပိုအရေးပါတယ်လို့ထင်ကြောင်း" ပြောခဲ့တာပါ။

ယူနိုက်တက်အသင်း ခေါင်းဆောင်ဟောင်း ရွိုင်ကိန်းဟာ အာဆင်နယ်အသင်းတိုက်စစ်မှူးဟောင်း အီယန်ရိုက်နဲ့ ပြုလုပ်ခဲ့တဲ့ Overlap podcast မှာ ဘရူနိုဟာ အရည်အသွေးရှိတဲ့သူဖြစ်ပေမယ့် ဒါက မလုံလောက်ကြောင်းနဲ့ သူဟာ တိုက်ပွဲဝင်နေတဲ့သူမဟုတ်ဘူးလို့ပြောခဲ့တာဖြစ်ပါတယ်။ 

ဒါ့အပြင် ရွိုင်ကိန်းက ယူနိုက်တက်တစ်သင်းလုံးကို အယောင်ဆောင်တဲ့သူတွေလို့ တံဆိပ်ကပ်ဖော်ပြခဲ့တာပါ။ 

ယူနိုက်တက်အသင်းနည်းပြ အာမိုရင်ကတော့ သူ့ရဲ့ကစားသမား ဘရူနိုဖာနန်ဒက်စ်ဘက်ကနေ ရပ်တည်သွားခဲ့တာ ဖြစ်ပါတယ်။

ဒါ့အပြင် နည်းပြအာမိုရင်ဟာ ပြီးခဲ့တဲ့ပွဲတွေက အမှားတွေကြောင့် ဝေဖန်မှုတွေခံနေရတဲ့ ဂိုးသမား အိုနာနာကိုလည်း ကာကွယ်မှုတွေပြုလုပ်ခဲ့တာပါ။ 

အိုနာနာဟာ အဲဗာတန်နဲ့ အစ်စဝှစ်ချ်အသင်းပွဲတွေမှာ လက်စွမ်းပြသနိုင်ဖို့ ရုန်းကန်နေရပြီး ယူနိုက်တက်အသင်းပရိသတ်တွေက သူ့ကိုစိတ်ပျက်နေကြတာဖြစ်ပါတယ်။ 

ဒါပေမယ့် ဒုတိယဂိုးသမား ဘာယင်ဒါဟာ ဒဏ်ရာရရှိနေတာကြောင့် ဖူလ်ဟမ်အသင်းနဲ့ ယှဉ်ပြိုင်ရမယ့် FA ဖလားပဉ္စမအဆင့်ပွဲစဉ်မှာ အိုနာနာကပဲ ယူနိုက်တက်အသင်းရဲ့ပွဲထွက်လူစာရင်းထဲ ပါဝင်ရဖို့ရှိနေတာပါ။

ယူနိုက်တက်အသင်းဟာ ဖူလ်ဟမ်အသင်းနဲ့ပွဲစဉ်ပြီးရင် ဆိုစီဒက်အသင်းနဲ့ ယူရိုပါလိဂ် ၁၆ သင်းအဆင့် ပထမအကျော့ပွဲစဉ်ယှဉ်ပြိုင်ရမှာဖြစ်ပါတယ်။

Source:ESPN

CNI Sport News

၂၀၂၅ ခုနှစ်၊ မတ်လ ၁

အာဂျင်တီးနားအသင်းခေါင်းဆောင် မက်ဆီက ပီအက်စ်ဂျီအသင်းမှာ ကစားခဲ့တဲ့ ၂ ရာသီအတွင်းမပျော်ရွှင်ခဲ့ဘူးလို့ ပြောခဲ့ပါတယ်။

မက်ဆီက “ပီအက်စ်ဂျီမှာ နောက်ဆုံးနှစ်ဖြတ်သန်းခဲ့ရတဲ့ အခြေအနေကြောင့် အင်တာမိုင်ယာမီမှာ ကစားဖို့ရခဲ့တာက အခွင့်အလမ်းတစ်ခု ဖြစ်ခဲ့ပါတယ်။ ကျနော်ဟာ ပီအက်စ်ဂျီမှာ မပျော်ရွှင်ခဲ့တဲ့ ၂ နှစ်ကိုဖြတ်သန်းခဲ့ရပါတယ်။ လေ့ကျင့်ရေး၊ပွဲတွေနဲ့အတူ နေ့တိုင်းကို ကျနော်မပျော်ရွှင်ခဲ့ရပါဘူး။ ဒါတွေအားလုံးကို လိုက်လျောညီထွေဖြစ်အောင် လုပ်ရတာကခက်ခဲပါတယ်”လို့ Apple Music Zane Lowe နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

မက်ဆီဟာ ၂၁ နှစ်ကြာရှိခဲ့တဲ့ ဘာစီလိုနာအသင်းကနေ ထွက်ခွာပြီးနောက် ၂၀၂၁ ခုနှစ်မှာပီအက်စ်ဂျီအသင်းထံ ၂ နှစ်စာချုပ်နဲ့ပြောင်းရွှေ့ခဲ့တာဖြစ်ပါတယ်။ 

မက်ဆီဟာ ပီအက်စ်ဂျီအသင်းအတွက် ၇၆ ပွဲပါဝင်ကစားခဲ့ပြီး ၃၂ ဂိုးသွင်းယူကာ ဂိုးဖန်တီးမှု ၃၅ ကြိမ်ပြုလုပ်နိုင်ခဲ့တာပါ။ 

အာဂျင်တီးနားကစားသမားဟာ ပီအက်စ်ဂျီအသင်းနဲ့အတူ အောင်မြင်မှုအဖြစ် လီဂူး-၁ ဖလား ၂ ကြိမ် အပါအဝင် ဆုဖလား ၃ လုံးရယူနိုင်ခဲ့တာဖြစ်ပါတယ်။

မက်ဆီဟာ ပီအက်စ်ဂျီအသင်းမှာ ပရိသတ်တွေနဲ့ ဆက်ဆံရေး အဆင်မပြေမှုတွေရှိခဲ့ပြီး ထွက်ခွာချိန်မှာအသင်းကို ဝေဖန်မှုတွေပြုလုပ်ခဲ့တာပါ။ 

မက်ဆီဟာ ပီအက်စ်ဂျီအသင်းကနေထွက်ခွာပြီးနောက်မေဂျာလိဂ်ကလပ် အင်တာမိုင်ယာမီအသင်းထံပြောင်းရွှေ့ကာ အသင်းကို သမိုင်းတစ်လျှောက်ပထမဆုံးဆုဖလား ၂ ခုရယူပေးထားနိုင်ခဲ့ပါတယ်။ 

အင်တာမိုင်ယာမီအသင်းအတွက် ၄၂ ပွဲကစားထားပြီး ဂိုးပါဝင်ပတ်သက်မှု ၅၆ ဂိုးအထိရှိထားတဲ့ မက်ဆီက ကလပ်အသင်းနဲ့မေဂျာလိဂ်ပြိုင်ပွဲကို ကြီးထွားဖို့ကူညီပေးချင်နေတာပါ။

အင်တာမိုင်ယာမီအသင်းဟာ ရီးရယ်လ်၊ချယ်လ်ဆီး၊မန်စီးတီးနဲ့ ပီအက်စ်ဂျီအသင်းတို့ ပါဝင်ယှဉ်ပြိုင်မယ့် ၂၀၂၅ ခုနှစ်ဖီဖာကလပ်ကမ္ဘာ့ဖလားပြိုင်ပွဲကို ပါဝင်ခွင့်ရရှိထားတာဖြစ်ပါတယ်။

Source:BBC

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

ဘိုင်ယန်မြူးနစ်အသင်းဟာ ကင်မစ်ချ်ကို စာချုပ်သက်တမ်းတိုးဖို့ ကမ်းလှမ်းမှုကနေ နုတ်ထွက်ခဲ့တာကြောင့် ကင်မစ်ချ်ဟာ နွေရာသီမှာ ဂျာမန်ကလပ်ကနေ ထွက်ခွာဖွယ်ရှိနေပါတယ်။ 

ကင်မစ်ချ်ရဲ့ စာချုပ်ဟာ နွေရာသီမှာ ကုန်ဆုံးတော့မှာ ဖြစ်တဲ့အတွက် အသင်းမှာဆက်ရှိနိုင်ဖို့ ဘိုင်ယန်မြူးနစ် အသင်းနဲ့ အချိန်အကြာကြီး ဆွေးနွေးမှုတွေ ပြုလုပ်ခဲ့တာပါ။ 

ဘိုင်ယန်မြူးနစ်အသင်းဟာ အဓိက ကစားသမားတွေဖြစ်တဲ့ နူအာ၊ မူစီယာလာနဲ့ အယ်လ်ဖွန်ဆိုဒေးဗီးစ်တို့ကို စာချုပ် သက်တမ်းတိုးခဲ့တာကြောင့် ကင်မစ်ချ်ကိုလည်း စာချုပ်သက်တမ်းတိုးနိုင်ဖို့ မျှော်လင့်ခဲ့တာဖြစ်ပါတယ်။ 

ဘိုင်ယန်မြူးနစ်အသင်း အားကစားဒါရိုက်တာက သူတို့ဟာ ကင်မစ်ချ်ကို စာချုပ်သက်တမ်းတိုးဖို့ စိတ်အား ထက်သန်နေပေမယ့် ဆုံးဖြတ်ချက်က သူ့အပေါ်မှာ မူတည်တယ်လို့ ပြောထားတာပါ။

ဒါပေမယ့် ဂျာမန်သတင်းစာ Bild က ဘိုင်ယန်မြူးနစ်အသင်းဟာ ကင်မစ်ချ်ရဲ့ တုန့်ဆိုင်းနေမှုကို စိတ်ပျက်နေ တာကြောင့် သက်တမ်းတိုးဖို့ ကမ်းလှမ်းမှုကနေ နုတ်ထွက်ခဲ့တယ်လို့ ဖော်ပြထားပါတယ်။

ကင်မစ်ချ်ကိုတွေ့ရစဉ် 

အဲဒါကြောင့် ကင်မစ်ချ်ဟာ စာချုပ်ကုန်ဆုံးမယ့် နွေရာသီမှာ ဘိုင်ယန်မြူးနစ်အသင်းကနေ ထွက်ခွာဖို့ ပိုပြီးများလာခဲ့တာပါ။

ပရီးမီးယားလိဂ် ထိပ်သီးကလပ်တွေဖြစ်တဲ့ လီဗာပူးလ်နဲ့ မန်စီးတီးအသင်းတို့ဟာ ကင်မစ်ချ်ရဲ့ အခြေအနေကို စောင့်ကြည့်နေတာ ဖြစ်ပါတယ်။ 

ကင်မစ်ချ်ဟာ ကွင်းလယ်နေရာအပြင် ညာနောက်ခံ နေရာမှာလည်း ကစားနိုင်တဲ့သူဖြစ်လို့ လီဗာပူးလ်အသင်းဟာ နွေရာသီမှာ ထွက်ခွာဖွယ်ရှိတဲ့ အာနိုးလ်ရဲ့နေရာမှာ သူ့ကိုအစားထိုးဖို့ ပစ်မှတ်ထားနေတာပါ။ 

မန်စီးတီးအသင်းကလည်း ကင်မစ်ချ်ကို နည်းပြဂွာဒီယိုလာနဲ့ ပြန်ပြီးလက်တွဲ အလုပ်လုပ်နိုင်ဖို့ နွေရာသီမှာ ခေါ်ယူချင်နေတာ ဖြစ်ပါတယ်။ 

ဂျာမနီအသင်းခေါင်းဆောင် ကင်မစ်ချ်ကို အလွတ်နဲ့ခေါ်ယူဖို့ ဘာစီလိုနာအသင်းကလည်း စိတ်ဝင်စားနေတာပါ။ 

၂၀၁၅ ခုနှစ်က လိုက်ပ်ဇစ်အသင်းကနေ ရောက်ရှိလာခဲ့တဲ့ ကင်မစ်ချ်ဟာ ဘိုင်ယန်မြူးနစ်အသင်းအတွက် ပွဲပေါင်း ၄၃၀ ကျော် ပါဝင်ကစားထားပြီး ဆုဖလားအောင်မြင်မှု အများအပြား ရယူထားတာဖြစ်ပါတယ်။

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

အင်္ဂလန်တောင်ပံကစားသမား ရက်ရှ်ဖို့ဒ်ဟာ လာမယ့် နွေရာသီ အပြောင်းအရွှေ့ ဈေးကွက်ဖွင့်ချိန်မှာ ယူနိုက်တက်အသင်းကနေ အက်စတွန်ဗီလာအသင်းထံ အပြီးသတ် ပြောင်းရွှေ့ဖို့ ဆုံးဖြတ်ခဲ့ပါတယ်။ 

ရက်ရှ်ဖို့ဒ်ဟာ ယူနိုက်တက်အသင်းမှာ နည်းပြအာမိုရင်နဲ့ အဆင်မပြေမှုတွေ ရှိခဲ့တာကြောင့် ပွဲကစားခွင့် ဆုံးရှုံးခဲ့ ရပြီးနောက် ဇန်နဝါရီအပြောင်းအရွှေ့က အက်စတွန်ဗီလာအသင်းထံ ရာသီအကုန်ထိ အငှားစာချုပ်နဲ့ ပြောင်းရွှေ့ခဲ့ တာပါ။ 

The Sun က ရက်ရှ်ဖို့ဒ်ဟာ အက်စတွန်ဗီလာအသင်းမှာ ကောင်းမွန်စွာ စတင်နိုင်ခဲ့ပြီးနောက် သူ့ရဲ့အနာဂတ်ကို ဆုံးဖြတ်ခဲ့တယ်လို့ ဖော်ပြထားပါတယ်။ 

ရက်ရှ်ဖို့ဒ်ဟာ နည်းပြ အူနှိုင်းအမ်မရီရဲ့ လက်အောက်မှာ တိုးတက်မှုတွေနဲ့အတူ အက်စတွန်ဗီလာအသင်းထံ အပြီးသတ် ပြောင်းရွှေ့ချင်နေတာပါ။

ရက်ရှ်ဖို့ဒ်ကို တွေ့ရစဉ်

ရက်ရှ်ဖို့ဒ်က သူဟာ နည်းပြ အူနှိုင်းအမ်မရီရဲ့ လက်အောက်မှာ သူ့ရဲ့ကစားသမားဘဝ ပြန်လည် အသက်ဝင် လာတယ်လို့ ခံစားနေရပြီး နည်းပြဟာ သူ့ကို လက်ရွေးစင်အသင်း လူစာရင်းထဲ ပြန်လည် ပါဝင်နိုင်အောင် လုပ်ပေးနိုင်မယ်လို့ ယုံကြည်ကြောင်း သူငယ်ချင်းတွေကို ပြောခဲ့တယ်လို့ သိရပါတယ်။ 

အင်္ဂလန်အသင်း လူစာရင်းနဲ့ ဝေးကွာနေတဲ့ ရက်ရှ်ဖို့ဒ်ဟာ နည်းပြသစ် တူချယ်လ်ရဲ့ လက်ထက်မှာ လူစာရင်းထဲ ပြန်ပါဝင်ပြီး ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားချင်နေတာပါ။

ရက်ရှ်ဖို့ဒ်ရဲ့ အငှားစာချုပ်ထဲမှာ အက်စတွန်ဗီလာအသင်းဟာ ရာသီကုန်ချိန်မှာ သူ့ကို ယူနိုက်တက်အသင်းကနေ ပေါင်သန်း ၄၀ နဲ့ အပြီးသတ် ဝယ်ယူနိုင်ဖို့ ရွေးချယ်ခွင့်ပါဝင်တာ ဖြစ်ပါတယ်။ 

ရက်ရှ်ဖို့ဒ်နဲ့ ယူနိုက်တက်အသင်းတို့ရဲ့ စာချုပ်ဟာ ၂၀၂၈ ခုနှစ်အထိ သက်တမ်းရှိနေပေမယ့် နည်းပြအာမိုရင် တာဝန်ယူနေချိန်အတွင်း သူ့အတွက် ငယ်ဘဝကလပ်မှာ ပြန်ကစားခွင့်ရဖို့ ခက်ခဲနိုင်တာပါ။ 

ရက်ရှ်ဖို့ဒ်ဟာ ကာဒစ်ဖ်အသင်းနဲ့ FA ဖလား ပဉ္စမအဆင့် ပွဲမတိုင်ခင်အထိ အက်စတွန်ဗီလာ အသင်းအတွက် ၅ ပွဲ ပါဝင်ကစားထားပြီး ဂိုးဖန်တီးမှု ၂ ကြိမ် ပြုလုပ်ထားတာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၂၈

လက်စတာအသင်းဟာ ဝက်စ်ဟမ်းအသင်းကို ၂ ဂိုး-ဂိုးမရှိနဲ့ အရေးနိမ့်ပြီး ရလဒ်တွေ ဆိုးရွားနေပေမယ့် အသင်းဟာ ပရီးမီးယားလိဂ်မှာ ဆက်ပြီးရှိနေနိုင်ဖို့ တိုက်ပွဲဝင်နေဆဲလို့ နည်းပြနစ္စတယ်ရွိုင်းက ပြောခဲ့ပါတယ်။

နစ္စတယ်ရွိုင်းက “ကျနော်တို့ဟာ ရလဒ်ကောင်းတွေရရှိအောင် ပြန်လုပ်ရတော့မှာဖြစ်ပြီး ဒီတိုက်ပွဲထဲမှာရှိနေဆဲပါ။ သင်္ချာနည်းအရ ကျနော်တို့ ဒီမှာရှိနေတဲ့အတွက် ကျနော်တို့ဟာ ကျနော်တို့ လုပ်နိုင်သလောက် ဆက်တိုက်ပွဲ ဝင်သွားမှာဖြစ်ပါတယ်။ ဒါပေမယ့် ဒီနေ့တိုက်ပွဲက တစ်ပိုင်းပဲရှိခဲ့တဲ့အတွက် မလုံလောက်ဘူးဆိုတာ ရှင်းပါတယ်”လို့ ပြောခဲ့တာပါ။ 

နစ္စတယ်ရွိုင်းဟာ လက်စတာအသင်းကို တာဝန်ယူ ကိုင်တွယ်ခဲ့တဲ့ ပရီးမီးယားလိဂ် ၁၄ ပွဲမှာ ၂ ပွဲသာ နိုင်ပွဲ ရရှိအောင် ကိုင်တွယ်နိုင်ခဲ့ပြီး အသင်းဟာ နောက်ဆုံးကစားခဲ့တဲ့ ၁၂ ပွဲမှာ ၁၁ ပွဲအထိ အရေးနိမ့်ခဲ့တာ ဖြစ်ပါတယ်။ 

လက်စတာအသင်းဟာ ဒီရလဒ်တွေကြောင့် ပရီးမီးယားလိဂ် အမှတ်ပေးဇယား အဆင့် ၁၉ နေရာမှာ ရပ်တည်နေ ပြီး တန်းဆင်းဇုန်အထက်က ဝုလ်ဗ်စ်အသင်းနဲ့ ၅ မှတ်ကွာဟနေတာပါ။ 

နစ္စတယ်ရွိုင်းကို တွေ့ရစဉ်

နစ္စတယ်ရွိုင်းအတွက်လည်း လက်စတာအသင်းရဲ့ ရလဒ်ဆိုးတွေကြောင့် နည်းပြရာထူးကနေ ထုတ်ပယ်ခံရမယ့် ဖိအားတွေ ပိုပြီးများလာခဲ့တာ ဖြစ်ပါတယ်။ 

နစ္စတယ်ရွိုင်းကတော့ သူဟာ အလုပ်ကို ဆက်လုပ်သွားမှာဖြစ်ပြီး အမှတ်ပေးဇယား အခြေအနေကို သိပေမယ့် ရလဒ်ကောင်းတွေ ပြန်ရအောင် လုပ်နိုင်မယ်လို့ ယုံကြည်နေတာပါ။ 

လက်စတာအသင်းဟာ ပရီးမီးယားလိဂ် နောက်ဆုံး ၄ ပွဲစလုံး ဂိုးမသွင်းနိုင်ဘဲ အရေးနိမ့်ခဲ့တာဖြစ်ပြီး ဒီရာသီ လိဂ်ပြိုင်ပွဲမှာ ပေးဂိုးမပေးရတာ ၁ ပွဲပဲရှိခဲ့ပါတယ်။

လက်စတာအသင်းဟာ လာမယ့် ပရီးမီးယားလိဂ် ပွဲစဉ်အဖြစ် မတ်လ ၉ ရက်မှာ ချယ်လ်ဆီးအသင်း အိမ်ကွင်း သွားရောက် ယှဉ်ပြိုင်ရမှာဖြစ်ပါတယ်။ 

Source: Dailymail