CNI Sport News

၂၀၂၃ ခုနှစ်၊ အောက်တိုဘာ ၁၉

ချယ်လ်ဆီးနဲ့ ရီးရယ်လ်အသင်းကစားသမားဟောင်း ဟာဇက်က ဘောလုံးကစားရတာမပျော်ရွှင်တော့သလို ပိုက်ဆံအတွက်တခြားနေရာမှာ သွားကစားလိုခြင်းမရှိတော့တဲ့အတွက် ကစားသမားဘဝက အနားယူခဲ့တာလို့ ပြောလိုက်ပါတယ်။

ဟာဇက်က “ဘောလုံးကစားရတာ မပျော်ရွှင်တော့ဘူးဆိုရင် ရပ်လိုက်မယ်လို့ ကျနော်အမြဲတမ်းပြောခဲ့ဖူးပါတယ်။ ပိုက်ဆံရဖို့အတွက်တခြားနေရာကို သွားပြီးလည်းမကစားချင်တော့ပါဘူး။ ဒါဟာ အကောင်းဆုံးဖြေရှင်းချက် ဖြစ်ခဲ့ပါတယ်။ လေ့ကျင့်ရတာမပျော်ရွှင်တော့တဲ့အတွက် ကစားလည်းမကစားချင်ပါဘူး။ ဒါကရိုးရှင်းတဲ့ ဆုံးဖြတ်ချက်ပါ။ အရာရာကိုရှင်းပြလို့မရပါဘူး” လို့  L'Avenir ကို ပြောခဲ့တာပါ။

အသက် ၃၂ နှစ်အရွယ်ရှိ ဟာဇက်ဟာ ရီးရယ်လ်အသင်းနဲ့ ချုပ်ဆိုထားတဲ့စာချုပ်ကို နှစ်ဦးသဘောတူ တစ်နှစ် စောပြီးဖျက်သိမ်းကာ ပြီးခဲ့ရာသီအကုန်မှာ စပိန်ကလပ်ကနေ ထွက်ခွာခဲ့တာဖြစ်ပါတယ်။ ဟာဇက်ဟာ ရီးရယ်လ် အသင်းက ထွက်ခွာခဲ့ပြီးနောက် နွေရာသီအပြောင်းအရွှေ့မှာ ကမ်းလှမ်းမှုတွေခံခဲ့ရပေမယ့် ကစားသမားဘဝက အနားယူဖို့ ဆုံးဖြတ်ခဲ့တာပါ။ ဟာဇက်ဟာ ကစားသမားဘဝက အနားယူခဲ့ပြီးနောက် ပရဟိတပွဲတစ်ပွဲမှာ ဝင်ရောက်ကစားခဲ့ပြီး ၁ ဂိုးသွင်းယူကာ ၃ ဂိုးဖန်တီးမှုပြုလုပ်နိုင်ခဲ့ပါတယ်။

ကမ္ဘာ့အကောင်းဆုံးကစားသမားတွေထဲက တစ်ဦးဖြစ်ခဲ့တဲ့ ဟာဇက်ဟာ ရီးရယ်လ်အသင်းမှာ ကစားခဲ့တဲ့ ၄ ရာသီအတွင်း ပွဲပေါင်း ၇၆ ပွဲသာပါဝင်ကစားနိုင်ခဲ့ပြီး ၇ ဂိုးသွင်းယူခဲ့ကာ ပွဲကစားချိန်ထက် ဒဏ်ရာကြောင့် အနားယူခဲ့ရတာက ပိုပြီးများခဲ့တာပါ။ အသက် ၃၂ နှစ်အရွယ်ရှိ ကစားသမားဟာ ရီးရယ်လ်အသင်းနဲ့အတူ လာလီဂါဖလား ၂ ကြိမ်၊ ချန်ပီယံလိဂ်၊ ဥရောပစူပါဖလားနဲ့ ကိုပါဒယ်ရေးဖလားတို့ကို ၁ ကြိမ်စီရယူနိုင်ခဲ့ပါတယ်။

ဟာဇက်ဟာ ကစားသမားဘဝမှာ ရီးရယ်လ်အသင်းအပြင် ချယ်လ်ဆီးနဲ့ လိုင်လီအသင်းတွေမှာ ကစားခဲ့ပြီး ဒီအသင်းတွေမှာလည်း ဆုဖလားအောင်မြင်မှုတွေရယူနိုင်ခဲ့တာပါ။ ဘယ်လ်ဂျီယံကစားသမားဟောင်းဟာ ချယ်လ်ဆီးအသင်းနဲ့အတူ ပရီးမီးယားလိဂ် နဲ့ ယူရိုပါလိဂ် ၂ ကြိမ်စီ၊ FA ဖလား၊ လိဂ်ဖလားတို့ကိုရယူနိုင်ခဲ့ပြီး လိုင်လီအသင်းနဲ့ လီဂူးဝမ်း၊ ပြင်သစ်ဖလားတို့ကို ရယူနိုင်ခဲ့ပါတယ်။

Source:DailyMail

CNI Sport News

၂၀၂၃ ခုနှစ်၊ အောက်တိုဘာ ၁၉

လီဗာပူးလ်နဲ့ အီဂျစ်တိုက်စစ်မှူး ဆာလတ်က အစ္စရေး-ပါလက်စတိုင်း ပဋိပက္ခတွေ ဆက်လက် ဖြစ်ပွားနေချိန်မှာ ဂါဇာကို လူသားချင်းစာနာထောက်ထားမှု အကူအညီတွေ ချက်ချင်းပေးဖို့ သူ့ရဲ့ ဆိုရှယ်မီဒီယာကနေ တောင်းဆို သွားခဲ့ပါတယ်။

ဆာလတ်က “ဒီလိုအချိန်မှာ ပြောရတာက မလွယ်ကူပါဘူး။ ဘဝအားလုံးဟာ မြင့်မြတ်ပြီး ကာကွယ်ရမှာပါ။ အစုလိုက် အပြုံလိုက် သတ်ဖြတ်မှုတွေကို ရပ်တန့်ဖို့လိုအပ်ပြီး မိသားစုတွေဟာ ပြိုကွဲနေကြပါတယ်။ ဂါဇာကို လူသားချင်း စာနာထောက်ထားမှုဆိုင်ရာ အကူအညီတွေ ချက်ချင်းပေးရမယ်ဆိုတာ ရှင်းနေပါတယ်။ လူတွေက ကြောက်စရာကောင်းတဲ့ အခြေအနေမှာရှိနေပြီး ဆေးရုံမြင်ကွင်းတွေကလည်း တကယ်ကို ကြောက်ဖို့ ကောင်းပါ တယ်။ ဂါဇာမှာရှိတဲ့ လူတွေအတွက် စားနပ်ရိက္ခာ၊ ရေနဲ့ ဆေးဝါးပစ္စည်းတွေ အရေးပေါ် လိုအပ်နေတယ်”လို့ ပြောခဲ့ပါတယ်။

အင်္ဂါနေ့ညက ဂါဇာရှိ ဆေးရုံတစ်ခုမှာ ပေါက်ကွဲမှု ဖြစ်ပွားခဲ့တာကြောင့် လူပေါင်းရာနဲ့ချီ သေဆုံးခဲ့တယ်လို့ ကျန်းမာရေး တာဝန်ရှိသူတွေက ပြောထားပါတယ်။

Al-Ahli Arab ဆေးရုံမှာ ဖြစ်ပွားခဲ့တဲ့ ပေါက်ကွဲမှုဟာ အစ္စရေးလေကြောင်း တိုက်ခိုက်မှုကြောင့် ဖြစ်တယ်လို့ ပါလက်စတိုင်းဘက်က ပြောခဲ့တာ ဖြစ်ပါတယ်။ 

ဂါဇာတိုက်ခိုက်ခံရမှုကို တွေ့ရစဉ်

ဂါဇာမှာ ဖြစ်ပွားနေတဲ့ ပဋိပက္ခတွေကြောင့် လူပေါင်း ၄,၀၀၀ ကျော်သေဆုံးပြီး အများအပြား ဒဏ်ရာရရှိခဲ့တယ်လို့ သတင်းမှာ ဖော်ပြထားပါတယ်။

ဒါ့အပြင် ဆာလတ်က ကမ္ဘာ့ခေါင်းဆောင်တွေ အတူတကွစည်းလုံးပြီး အပြစ်မဲ့တဲ့သူတွေကို နောက်ထပ် သတ်ဖြတ်ခြင်းကနေ တားဆီးပေးဖို့နဲ့ လူသားဆန်မှုကသာ အောင်နိုင်ရမယ်လို့ ထပ်ပြီး ပြောခဲ့ပါတယ်။

ဒီတစ်ပတ်ကစားမယ့် ပရီးမီးယားလိဂ်ပွဲစဉ်တွေမှာ ဒီအဖြစ်အပျက်တွေကြောင့် သေဆုံးခဲ့ကြတဲ့ အပြစ်မဲ့သူတွေကို ဝမ်းနည်းကြောင်း အထိမ်းအမှတ်အဖြစ် အနက်ရောင်လက်ပတ်ကို ကစားသမားတွေက ဝတ်ဆင်သွားကြမှာပါ။

ပရီးမီးယားလိဂ်ကတော့ အပြစ်မဲ့တဲ့ သူတွေအပေါ် ကြောက်စရာကောင်းပြီး ရက်စက်ကြမ်းကြုတ်တဲ့ လုပ်ရပ်တွေ ကို ပြင်းပြင်းထန်ထန် ရှုတ်ချတယ်လို့ ကြေညာချက် ထုတ်ပြန်ထားပါတယ်။

Source: Daily Mail

CNI Sport News

၂၀၂၃ ခုနှစ်၊ အောက်တိုဘာ ၁၉

ဘရာဇီးလ်အသင်းတိုက်စစ်မှူး နေမာဟာ ဒူးအရွတ်ဒဏ်ရာနဲ့ ဘယ်ဘက်ဒူးအတွင်းအရိုးနုကို ခွဲစိတ်ကုသမှု ခံယူရမှာဖြစ်တဲ့အတွက် အခုရာသီအကုန်ထိ အနားယူဖွယ်ရှိနေတယ်လို့ သိရပါတယ်။

နေမာဟာ ဘရာဇီးလ်အသင်းက ဥရုဂွေးအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့တဲ့ ၂၀၂၆ ကမ္ဘာ့ဖလားခြေစစ်ပွဲ (တောင်အမေရိကဇုန်)ပွဲစဉ်ရဲ့ ပထမပိုင်းမပြီးခင်မှာ ဒဏ်ရာရရှိသွားခဲ့တာပါ။ နေမာဟာ ခွဲစိတ်ကုသမှုကြောင့် ကာလရှည်ကြာအနားယူရဖွယ်ရှိတဲ့အတွက် ဘရာဇီးလ်အတွက်ရော အယ်လ်ဟီလယ်အသင်းအတွက်ပါ ကြီးမား တဲ့ထိုးနှက်ချက်ဖြစ်လာခဲ့ပါတယ်။ 

အသက် ၃၁ နှစ်အရွယ်ရှိ နေမာဟာ ပြီးခဲ့တဲ့နွေရာသီအပြောင်းအရွှေ့ကမှ ပီအက်စ်ဂျီအသင်းကနေ ဆော်ဒီကလပ် အယ်လ်ဟီလယ်အသင်းထံ ပြောင်းရွှေ့ခဲ့တာပါ။ ဘရာဇီးလ်တိုက်စစ်မှူးဟာ အယ်လ်ဟီလယ်အသင်းအတွက် ၅ ပွဲသာပါဝင်ကစားပေးထားရတာဖြစ်ပြီး အခုအချိန်မှာ ခွဲစိတ်မှုခံယူရမှာဖြစ်လို့ အသင်းရဲ့ ပွဲစဉ်အများအပြားကို လွဲချော်ရတော့မှာဖြစ်ပါတယ်။ အယ်လ်ဟီလယ်အသင်းဟာ ဒီရာသီ ဆော်ဒီပရိုလိဂ်ပြိုင်ပွဲနဲ့ အာရှချန်ပီယံလိဂ် ပြိုင်ပွဲမှာ ချန်ပီယံဆုရယူနိုင်ဖို့ ပစ်မှတ်ထားနေတာဖြစ်ပြီး သူတို့ရဲ့ အဓိကတိုက်စစ်မှူး နေမာမပါဝင်ဘဲ ဒီပွဲစဉ် တွေကို ကစားရတော့မှာပါ။ 

နေမာဟာ ပြီးခဲ့တဲ့နှစ်တွေအတွင်းမှာ ဒဏ်ရာအများအပြားရရှိခဲ့ပြီး ပီအက်စ်ဂျီအသင်းမှာကစားခဲ့တဲ့ နောက်ဆုံးနှစ် ရာသီမှာ မတူညီတဲ့ခြေကျင်းဝတ်ဒဏ်ရာတွေကြောင့် လပေါင်းများစွာ အနားယူခဲ့ရတာဖြစ်ပါတယ်။ ဒါ့အပြင် နေမာဟာ ဘရာဇီးလ်အသင်းနဲ့ ၂၀၂၂ ကမ္ဘာ့ဖလားအုပ်စုအဖွင့်ပွဲစဉ်မှာ ရခဲ့တဲ့ဒဏ်ရာကြောင့် အုပ်စုနောက်ဆုံးနှစ် ပွဲကို လွဲချော်ခဲ့တာပါ။ နေမာဟာ ကစားသမားကောင်းတစ်ဦးဖြစ်ပေမယ့် ဒဏ်ရာတွေနှိပ်စက်မှုကြောင့် ကမ္ဘာ့ အကောင်းဆုံးဆုတွေနဲ့ ဝေးကွာနေရတာဖြစ်ပါတယ်။

နေမာအနေနဲ့ လက်ရှိဒဏ်ရာအခြေအနေကနေ အမြန်ဆုံးပြန်လည်မကောင်းမွန်လာဘူးဆိုရင် လာမယ့် နွေရာသီ မှာကျင်းပမယ့် ကိုပါအမေရိကဖလားပြိုင်ပွဲမှာ ဘရာဇီးလ်အသင်းအတွက် ပါဝင်နိုင်ဖို့ အခက်တွေ့နိုင်တယ်လို့ သတင်းမှာ ဖော်ပြထားပါတယ်။

Source:DailyMail

CNI Sport News

၂၀၂၃ ခုနှစ်၊ အောက်တိုဘာ ၁၈

၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)ပွဲစဉ်မှာ ပီရူးအသင်းကို ၂ ဂိုး- ဂိုးမရှိနဲ့ အနိုင်ရခဲ့ပြီးနောက် အာဂျင်တီးနားအသင်းဟာ သမိုင်းတစ်လျှောက် အကောင်းဆုံးဖြစ်ဖို့ နီးစပ်နေပြီလို့ အသင်းခေါင်းဆောင် မက်ဆီက ပြောလိုက်ပါတယ်။

မက်ဆီက “ဒီအသင်း မယုံနိုင်လောက်ဖွယ် ကောင်းမွန်ပြီး သူတို့ကစားတိုင်းမှာ သူတို့ဟာ သမိုင်းတစ်လျှောက် အကောင်းဆုံးဖြစ်ဖို့ အလွန်နီးစပ်နေပါပြီ။ ကမ္ဘာ့ဖလားရယူပြီးနောက် ကျနော်တို့ဟာ ယုံကြည်မှုတွေ ပိုရှိလာသလို ပိုစည်းလုံးပြီး ခိုင်လည်းခိုင်မာလာခဲ့ပါတယ်။ ကျနော်တို့ ဆက်ပြီးတိုးတက်နိုင်ဖို့ မျှော်လင့်တယ်”လို့ ပြောပါတယ်။

ပီရူးအသင်းနဲ့ပွဲမှာ အာဂျင်တီးနားအသင်းအတွက် ၂ ဂိုးစလုံး သွင်းယူခဲ့တဲ့ မက်ဆီဟာ တောင်အမေရိကဇုန်ရဲ့ ကမ္ဘာ့ဖလား ခြေစစ်ပွဲသမိုင်းမှာ ဂိုးအများဆုံး သွင်းယူထားသူအဖြစ် စံချိန်သစ် တင်နိုင်ခဲ့ပါတယ်။ 

မက်ဆီနဲ့ အာဂျင်တီးနား အသင်းကစားဖော်တွေကိုတွေ့ရစဉ်

မက်ဆီဟာ အရင်က ဥရုဂွေးလက်ရွေးစင် အသင်းရဲ့ ဘာစီလိုနာ အသင်းဖော်ဟောင်း ဆွာရက်ဇ်နဲ့ ၂၉ ဂိုးစီ တူညီ နေခဲ့ပါတယ်။

အသက် ၃၆ နှစ်အရွယ်ရှိ မက်ဆီဟာ ပီရူးအသင်းနဲ့ပွဲမှာ ၂ ဂိုး သွင်းယူနိုင်ခဲ့တာကြောင့် ၃၁ ဂိုးနဲ့ စံချိန်သစ် တင်နိုင်ခဲ့တာ ဖြစ်ပါတယ်။

အာဂျင်တီးနားအသင်းဟာ ကမ္ဘာ့ဖလားခြေစစ်ပွဲ ၄ ပွဲ ကစားအပြီးမှာ ရာနှုန်းပြည့် နိုင်ပွဲရရှိထားပြီး ဥရုဂွေး၊ ဘရာဇီးလ်၊ ဗင်နီဇွဲလားအသင်းတို့ထက် ၅ မှတ်အသာနဲ့ အမှတ်ပေးဇယားကို ဦးဆောင်နေပါတယ်။

ကမ္ဘာ့ဖလားပြိုင်ပွဲရဲ့ လက်ရှိချန်ပီယံအသင်းဟာ နိုဝင်ဘာလထဲမှာ ဥရုဂွေး၊ ဘရာဇီးလ်အသင်းတို့နဲ့ ခြေစစ်ပွဲတွေ ဆက်ပြီးယှဉ်ပြိုင်ရမှာ ဖြစ်ပါတယ်။

မက်ဆီဟာ ပီရူးအသင်းနဲ့ ပွဲစဉ်အပြီးမှာ ချားလော့အသင်းနဲ့ ကစားမယ့် အင်တာမိုင်ယာမီအသင်းထံ သွားရောက် ပူးပေါင်းရမှာပါ။ 

အင်တာမိုင်ယာမီအသင်းဟာ မေဂျာလိဂ်ရာသီ နောက်ဆုံးပွဲစဉ် ကစားအပြီး နိုဝင်ဘာလထဲမှာ တရုတ်နိုင်ငံကို သွားရောက်ကာ ခြေစမ်းပွဲ ၂ ပွဲကစားဖို့ စီစဉ်ထားတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ အောက်တိုဘာ ၁၈

ဒတ်ချ်တောင်ပံကစားသမား အယ်လ်ဂါဇီဟာ အစ္စရေး-ဂါဇာ ပဋိပက္ခနဲ့ ပတ်သက်ပြီး ဆိုရှယ်မီဒီယာမှာ တင်ခဲ့တဲ့ ပို့စ်ကြောင့် မိန့်ဇ်အသင်းက သူ့ကို ပွဲကစားခွင့်နဲ့ လေ့ကျင့်ခန်း ဆင်းခွင့် ဆိုင်းငံ့လိုက်ပါတယ်။

အသက် ၂၈ နှစ်အရွယ်ရှိ အယ်လ်ဂါဇီဟာ ဒီပို့စ်ကို ဖျက်ခဲ့ပေမယ့် မိန့်ဇ်အသင်းကတော့ ဒီလိုလုပ်ရပ်ကို လက်ခံနိုင် စရာ မရှိဘူးလို့ ပြောခဲ့ပါတယ်။

အယ်လ်ဂါဇီဟာ မိန့်ဇ်အသင်းကို အလွတ်ပြောင်းရွှေ့ကြေးနဲ့ ပြောင်းရွှေ့လာခဲ့တာဖြစ်ပြီး ဘွန်ဒစ်လီဂါပွဲစဉ် ၃ ပွဲ ပါဝင် ကစားထားတာ ဖြစ်ပါတယ်။ 

မိန့်ဇ်အသင်းဟာ အယ်လ်ဂါဇီကို ပွဲကစားခွင့်နဲ့ လေ့ကျင့်ခန်း ဆင်းခွင့်ပိတ်ပင်တဲ့ ဆုံးဖြတ်ချက် မချခင်မှာ ကလပ်နဲ့ ကစားသမားတို့ဟာ ဆွေးနွေးမှုတွေ ပြုလုပ်ခဲ့ကြပါတယ်။

 မိန့်ဇ်အသင်း ကစားသမား အယ်လ်ဂါဇီကို တွေ့ရစဉ်

ဒါ့အပြင် ဘိုင်ယန်မြူးနစ် အသင်းကလည်း ပါလက်စတိုင်းလိုလားတဲ့ ဗွီဒီယိုကို အင်စတာဂရမ်မှာ မျှဝေခဲ့တဲ့ မော်ရိုကို လက်ရွေးစင် မက်ဇာအိုရီနဲ့ တွေ့ဆုံဖို့ စီစဉ်ထားတယ်လို့ သတင်းတွေ ထွက်ပေါ်နေပါတယ်။

ဘိုင်ယန်မြူးနစ်အသင်းဟာ အင်စတာဂရမ်ပို့စ်ကြောင့် မက်ဇာအိုရီကို ချက်ချင်း ဆက်သွယ်မှုတွေ ပြုလုပ်ခဲ့ပြီး ကစားသမားဟာ နိုင်ငံအသင်းအတွက် ကစားပြီး ပြန်လာချိန်မှာ ကလပ်အသင်း တာဝန်ရှိသူတွေနဲ့ တွေ့ဆုံရဖို့ ရှိနေပါတယ်။
BBC Sport က ဒီအဖြစ်အပျက်တွေနဲ့ ပတ်သက်ပြီး မှတ်ချက်ပေးဖို့ ဘိုင်ယန်မြူးနစ်နဲ့ မိန့်ဇ်အသင်းတို့ကို ဆက်သွယ်ခဲ့တယ်လို့ သိရပါတယ်။ 

ဒါ့အပြင် ပြင်သစ်လီဂူးဝမ်းကလပ် နိုက်စ်အသင်း နောက်ခံလူ ယူဆက်ဖ်ကလည်း အစ္စရေး-ဂါဇာ ပဋိပက္ခနဲ့ ပတ်သက်ပြီး ဂျူးလူမျိုး ဆန့်ကျင်တဲ့ ဗွီဒီယိုဖိုင် တင်ခဲ့တယ်ဆိုပြီး စွပ်စွဲခံထားရကာ လက်ရှိအချိန်မှာ ပြင်သစ် အစိုးရရှေ့နေတွေရဲ့ စုံစမ်းစစ်ဆေးမှုတွေ ခံနေရတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ အောက်တိုဘာ ၁၈

အင်္ဂလန်အသင်းနည်းပြ ဆောက်ဂိတ်က အီတလီအသင်းကို အနိုင်ရပြီး ယူရို ၂၀၂၄ ပြိုင်ပွဲ ယှဉ်ပြိုင်ခွင့် ရရှိသွားခဲ့ပြီးနောက် သူတို့ဟာ ဒီပြိုင်ပွဲမှာ ချန်ပီယံဆုရယူနိုင်မယ်လို့ ယုံကြည်ကြောင်း ပြောလိုက်ပါတယ်။

ဆောက်ဂိတ်က “ကျနော်တို့ဟာ ဒီပြိုင်ပွဲမှာ အနိုင်ရဖို့အတွက် စွမ်းဆောင်နိုင်စွမ်းရှိတဲ့အသင်းတွေထဲက တစ်သင်းဖြစ်ပါတယ်။ အကြီးမားဆုံးအရာတွေဖြစ်တဲ့ စိတ်ဓါတ်ပိုင်း၊ နည်းစနစ်ကောင်းမွန်တဲ့ကစားသမားတွေ၊ ကောင်းမွန်တဲ့ ရုပ်ပိုင်းဆိုင်ရာတွေရှိရမှာဖြစ်ပေမယ့် ဒီလိုမျိုးပွဲကြီးပွဲကောင်းတွေကို ဆက်ပြီးအနိုင်ယူနိုင်ဖို့ လိုအပ်ပါတယ်။ ကျနော်တို့ဆီကနေ ဒီထက်လာဖို့ ရှိပါသေးတယ်။ လူတွေကတော့ ကျနော်တို့ဟာ ထိပ်တန်း အသင်းတွေကို လုံလောက်စွာအနိုင်ယူခဲ့ခြင်းမရှိဘူးလို့ ဝေဖန်ကြပါတယ်။ ဒါပေမယ့် ကျနော်တို့ဟာ အလွန် ကောင်းမွန်စွာစွမ်းဆောင်နိုင်ခဲ့ပါတယ်” လို့ ပြောခဲ့ပါတယ်။

အင်္ဂလန်အသင်းဟာ ဝင်ဘာလေမှာ ကစားခဲ့တဲ့ ယူရို ၂၀၂၄ ခြေစစ်ပွဲမှာ အီတလီအသင်းကို ၃ ဂိုး- ၁ ဂိုးနဲ့ အနိုင် ရခဲ့တာဖြစ်ပြီး ယူရို ၂၀၂၀ ဗိုလ်လုပွဲက ရှုံးကြွေးကိုပြန်ပြီးဆပ်နိုင်ခဲ့တာပါ။ ဒီပွဲမှာ အီတလီအသင်းက ဦးဆောင်ဂိုး စတင်ရရှိခဲ့တာဖြစ်ပြီး ဆကာမာကာက သွင်းယူခဲ့တာဖြစ်ပေမယ့် အင်္ဂလန်အသင်းအတွက် ချေပဂိုးနဲ့ အနိုင်ဂိုး တွေကို ဟာရီကိန်းက ၂ ဂိုး၊ ရက်ရှ်ဖိုဒ့်က ၁ ဂိုးသွင်းယူခဲ့တာဖြစ်ပါတယ်။

အင်္ဂလန်အသင်းဟာ ဒီနိုင်ပွဲကြောင့် ယူရို ၂၀၂၄ ခြေစစ်ပွဲ ၆ ပွဲကစားအပြီးမှာ ရမှတ် ၁၆ မှတ်ရရှိခဲ့ပြီး ပွဲစဉ် ၂ ပွဲ ကစားဖို့ ကျန်ရှိသေးပေမယ့် ခြေစစ်ပွဲအောင်မြင်ခဲ့ပြီဖြစ်ပါတယ်။ အီတလီအသင်းကတော့ ဒီပွဲရှုံးနိမ့်ခဲ့ပေမယ့် လက်ကျန်ပွဲစဉ်ကစားဖို့ ၂ ပွဲကျန်ရှိနေသေးသလို အနည်းဆုံးပလေးအောဖ့်အဆင့်ကစားခွင့်ရဖို့ ရှိနေတာကြောင့် ယူရို ၂၀၂၄ ခြေစစ်ပွဲအောင်မြင်ဖို့ မျှော်လင့်ချက်တွေရှိနေသေးတာဖြစ်ပါတယ်။ 

အင်္ဂလန်အသင်းခေါင်းဆောင် ဟာရီကိန်းက ခြေစစ်ပွဲတွေမှာ ပြသခဲ့တဲ့အရာတွေကြောင့် အင်္ဂလန်အသင်းဟာ မှန်ကန်တဲ့လမ်းကြောင်းပေါ်မှာ ရှိနေတယ်လို့ ပြောခဲ့ပါတယ်။ အင်္ဂလန်အသင်းဟာ နိုဝင်ဘာလထဲမှာ ယူရို ၂၀၂၄ ခြေစစ်ပွဲလက်ကျန် ၂ ပွဲဖြစ်တဲ့ မောလ်တာ၊ မြောက်မက်ဆီဒိုးနီးယားအသင်းတို့နဲ့ ယှဉ်ပြိုင်ရမှာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ အောက်တိုဘာ ၁၈

ဘရာဇီးလ်အသင်းတိုက်စစ်မှူး နေမာဟာ ဥရုဂွေးအသင်းကို ၂ ဂိုး- ဂိုးမရှိနဲ့ အရေးနိမ့်ခဲ့တဲ့ ၂၀၂၆ ကမ္ဘာ့ဖလား ခြေစစ်ပွဲ(တောင်အမေရိကဇုန်)ပွဲစဉ်ရဲ့ ပထမပိုင်းမပြီးခင်မှာ ပြင်းထန်တဲ့ဒူးဒဏ်ရာရရှိသွားခဲ့ပါတယ်။

နေမာဟာ သူ့ရဲ့ဘယ်ဘက်ဒူးကိုကိုင်ကာ ငိုကြွေးနေခဲ့တာဖြစ်ပြီး ကွင်းထဲမှာ မိနစ်အနည်းငယ်ကြာ သေးကုသမှု ခံယူပြီးနောက် ထမ်းစင်နဲ့ သယ်ထုတ်သွားခဲ့ရတာပါ။ ဘရာဇီးလ် FA သတင်းရင်းမြစ်တွေက နေမာဟာ ဘယ်ဘက် ဒူးအဆစ်ပြင်းထန်တဲ့ ဒဏ်ရာရရှိသွားခဲ့တာဖြစ်ပြီး အရွတ်ပျက်စီးခြင်းရှိ၊မရှိဆုံးဖြတ်ဖို့အတွက် စမ်းသပ် စစ်ဆေးမှု တွေပြုလုပ်ရမယ်လို့ ပြောထားတာဖြစ်ပါတယ်။

နေမာအနေနဲ့ ဒဏ်ရာပြင်းထန်မယ်ဆိုရင် ကာလရှည်ကြာအနားယူရမှာဖြစ်တဲ့အတွက် ဘရာဇီးလ်အသင်းနဲ့ အယ်လ်ဟီလယ်အသင်းအတွက် ကြီးမားတဲ့ထိုးနှက်ချက်ဖြစ်လာနိုင်တာပါ။ ပြီးခဲ့တဲ့ နွေရာသီအပြောင်းအရွှေ့မှာ ပီအက်စ်ဂျီအသင်းကနေ ထွက်ခွာပြီး အယ်လ်ဟီလယ်အသင်းထံ ပြောင်းရွှေ့ခဲ့တဲ့ နေမာဟာ ဆော်ဒီကလပ် အတွက် ၅ ပွဲပါဝင်ကစားထားပြီး ၁ ဂိုးသွင်းယူထားတာဖြစ်ပါတယ်။ အသက် ၃၁ နှစ်အရွယ်ရှိ နေမာဟာ ဘရာဇီးလ်အသင်းအတွက် ၁၂၇ ပွဲကစားထားပြီး ၇၉ ဂိုးသွင်းယူကာ နိုင်ငံရဲ့ဂိုးသွင်းအများဆုံးကစားသမားအဖြစ် ရပ်တည်နေတာပါ။

ဘရာဇီးလ်အသင်းဟာ ဒီပွဲစဉ်မှာ ဥရုဂွေးအသင်းကို အရေးနိမ့်ခဲ့တာကြောင့် ၂၀၁၅ ခုနှစ်နောက်ပိုင်း ပထမဆုံး အကြိမ်ကမ္ဘာ့ဖလားခြေစစ်ပွဲ ရှုံးပွဲနဲ့ ကြုံတွေ့ခဲ့ရတာဖြစ်ပြီး ၂ ပွဲဆက်တိုက်နိုင်ပွဲပျောက်ဆုံးခဲ့တာလည်း ဖြစ်ပါတယ်။ ဘရာဇီးလ်အသင်းဟာ ကမ္ဘာ့ဖလားခြေစစ်ပွဲ ၄ ပွဲကစားအပြီးမှာ ရမှတ် ၇ မှတ်နဲ့ တတိယနေရာမှာ ရပ်တည်နေပြီး အာဂျင်တီးနားအသင်းက ထိပ်ဆုံးနေရာက ဦးဆောင်နေကာ ဥရုဂွေးအသင်းက ဒုတိယနေရာမှာ ရှိနေတာပါ။

ဘရာဇီးလ်အသင်းဟာ လာမယ့်နိုဝင်ဘာမှာ ကမ္ဘာ့ဖလားခြေစစ်ပွဲတွေအဖြစ် ကိုလံဘီယာ၊ အာဂျင်တီးနားအသင်း တို့နဲ့ ယှဉ်ပြိုင်ရမှာဖြစ်ပါတယ်။

Source:Reuters

CNI Sport News

၂၀၂၃ ခုနှစ်၊ အောက်တိုဘာ ၁၇

မြောက်အိုင်ယာလန် အသင်းရဲ့ နောက်ခံလူ အီဗန်စ်က ဒဏ်ရာတွေ နှိပ်စက်မှုကြောင့် ယူနိုက်တက်အသင်းထံ ပြန်မလာခင် ပြီးခဲ့တဲ့ရာသီအကုန်က ကစားသမားဘဝက အနားယူဖို့ စဉ်းစားခဲ့တယ်လို့ ပြောလိုက်ပါတယ်။

အီဗန်စ်က “ဒဏ်ရာတွေကြောင့် ကစားသမားဘဝကို အဆုံးသတ်ဖို့ ကျနော်စဉ်းစားခဲ့ပါတယ်။ ဒဏ်ရာတွေကို မကျော်ဖြတ်နိုင်ခဲ့ဘဲ ပြန်လာတဲ့အချိန်တိုင်း ကြေကွဲနေရပါတယ်။ ဒါပေမယ့် ကျနော်ဟာ လုပ်နိုင်စွမ်းရှိတဲ့ အကြောင်းကို ကိုယ်တိုင် သက်သေပြသ နိုင်ခဲ့ပါတယ်။ ကျနော် အများကြီး လေ့ကျင့်ပြီး ပွဲတွေကို ပြီးမြောက် အောင် ကစားနိုင်ခဲ့ပါတယ်။ တစ်ခါတလေ ကိုယ့်ကိုယ်ကို အတည်ပြုရပြီး ဒီလုပ်ငန်းစဉ်ကို ဖြတ်ကျော်နိုင်ခဲ့ တာကြောင့် ကျေနပ်မိတယ်”လို့ ပြောပါတယ်။

အသက် ၃၅ နှစ်အရွယ်ရှိ အီဗန်စ်ဟာ ဒဏ်ရာတွေကြောင့် ပြီးခဲ့တဲ့ရာသီက လက်စတာအသင်းအတွက် ၁၄ ပွဲသာ ပါဝင်ကစားနိုင်ခဲ့ပြီး ရာသီအကုန်မှာ ထွက်ခွာခဲ့တာ ဖြစ်ပါတယ်။

အီဗန်စ်ကို တွေ့ရစဉ်

ယူနိုက်တက် အကယ်ဒမီကနေ ထွက်ပေါ်လာခဲ့တဲ့ အီဗန်စ်ဟာ လက်စတာအသင်းကနေ ထွက်ခွာပြီးနောက် အသင်းဟောင်းမှာ လာရောက် လေ့ကျင့်မှုပြုလုပ်ရင်း ရာသီကြိုခြေစမ်းပွဲတွေမှာ ပါဝင်ကစားခွင့် ရခဲ့ပါတယ်။ 

ယူနိုက်တက်အသင်းနည်းပြ အဲရစ်တန်ဟတ်ဟာ အီဗန်စ်ရဲ့ ခြေစွမ်းကို သဘောကျခဲ့တာကြောင့် နွေရာသီ အပြောင်းအရွှေ့ နောက်ဆုံးနေ့မှာ ရာသီအကုန်ထိ စာချုပ်ချုပ်ဆိုကာ ခေါ်ယူခဲ့ပါတယ်။

အီဗန်စ်ဟာ အသင်းဖော် နောက်ခံလူတွေရဲ့ ဒဏ်ရာကြောင့် ယူနိုက်တက်အသင်းအတွက် ဒီရာသီမှာ ပွဲစဉ် ၄ ပွဲ အထိ ပါဝင်ကစားခွင့်ရခဲ့ပါတယ်။
 
အီဗန်စ်ဟာ ယူနိုက်တက်အသင်းမှာ ပထမဆုံးအကြိမ် ကစားခဲ့တုန်းက ပရီးမီးယားလိဂ်ဖလား ၃ ကြိမ်၊ ချန်ပီယံ လိဂ်ဖလား ၁ ကြိမ် အပါအဝင် ဆုဖလားအောင်မြင်မှုတွေ အများကြီး ရယူနိုင်ခဲ့ပါတယ်။

ဒီရာသီမှာတော့ ယူနိုက်တက်အသင်းဟာ ရလဒ်တွေ ဆိုးရွားနေပြီး ပရီးမီးယားလိဂ်ပြိုင်ပွဲမှာ အဆင့် ၁၀ နေရာ ရပ်တည်နေပါတယ်။

ယူနိုက်တက်အသင်းဟာ ဒီအပတ်မှာ ပရီးမီးယားလိဂ် ပွဲစဉ်အဖြစ် ရှက်ဖီးယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ အောက်တိုဘာ ၁၇

ပါလက်စတိုင်း ဘောလုံးအဖွဲ့ချုပ်ရဲ့ တောင်းဆိုမှုအရ ပါလက်စတိုင်း လက်ရွေးစင်အသင်းရဲ့ လာမယ့်ပွဲစဉ်တွေကို အိမ်ရှင်အဖြစ် လက်ခံကျင်းပမယ်လို့ အယ်လ်ဂျီးရီးယားက ပြောပါတယ်။

ပါလက်စတိုင်းအသင်းဟာ နိုဝင်ဘာလထဲမှာ ၂၀၂၆ ကမ္ဘာ့ဖလား ခြေစစ်ပွဲ ဒုတိယအဆင့်(အာရှဇုန်) ပွဲစဉ်တွေကို ယှဉ်ပြိုင်ရတော့မှာပါ။ 

ပထဆုံးပွဲစဉ်အဖြစ် နိုဝင်ဘာ ၁၆ ရက်မှာ လက်ဘနွန်အသင်းနဲ့ အဝေးကွင်းပွဲစဉ် ယှဉ်ပြိုင်ရမှာဖြစ်ပြီး ၂၁ ရက်မှာ ကစားမယ့် သြစတြေးလျအသင်းနဲ့ အိမ်ကွင်းပွဲစဉ်ကို အယ်လ်ဂျီးရီးယားမှာ ယှဉ်ပြိုင်သွားမှာ ဖြစ်ပါတယ်။ 

အယ်လ်ဂျီးရီးယား ဘောလုံးအဖွဲ့ချုပ်ဟာ ပါလက်စတိုင်းနေထိုင်မှုနဲ့ ပတ်သက်တဲ့ ကုန်ကျစရိတ်တွေ အားလုံးကို ပေးသွားမယ်လို့လည်း သူတို့ရဲ့ ထုတ်ပြန်ချက်မှာ ဖော်ပြထားပါတယ်။

ပါလက်စတိုင်းအသင်း ယှဉ်ပြိုင်နေစဉ်

ဒေသတွင်းမှာ ပဋိပက္ခတွေ ပြင်းထန်နေတာကြောင့် သြစတြေးလျအသင်းနဲ့ ပွဲကို ကြားကွင်းမှာ ကျင်းပဖို့ အာရှ ဘောလုံးအဖွဲ့ချုပ်က တောင်းဆိုထားတဲ့အတွက် ပါလက်စတိုင်း ဘောလုံးအဖွဲ့ချုပ်ဟာ ပြင်ပအကူအညီတွေကို ရယူခဲ့ရတာ ဖြစ်ပါတယ်။ 

ပါလက်စတိုင်းအသင်းရဲ့ ပွဲစဉ်တွေကို လက်ခံကျင်းပဖို့ အယ်လ်ဂျီးရီးယားရဲ့ သဘောတူညီမှုဟာ ကမ္ဘာ့ဘောလုံး အဖွဲ့ချုပ်(ဖီဖာ)ဆီကနေ ခွင့်ပြုချက်ရယူဖို့ လိုအပ်နေသေးတယ်လို့ သတင်းမှာ ဖော်ပြထားပါတယ်။

အစ္စရေးနဲ့ ပဋိပက္ခတွေ ပြင်းထန်လာတဲ့ ပါလက်စတိုင်းဟာ မလေးရှားမှာ ကျင်းပခဲ့တဲ့ Merdeka ဖလားပြိုင်ပွဲ ကနေ နုတ်ထွက်ခဲ့ရပြီး ကမ္ဘာ့ဖလားခြေစစ်ပွဲ ကစားဖို့ ပြင်ဆင်မှုတွေဟာ ထိခိုက်ခဲ့ရတာ ဖြစ်ပါတယ်။ 

အစ္စရေးအသင်း ကစားဖို့ ရှိနေတဲ့ ဆွစ်ဇာလန်၊ ကိုဆိုဗို အသင်းတို့နဲ့ ယူရို ၂၀၂၄ ခြေစစ်ပွဲတွေကိုလည်း ဥရောပ ဘောလုံးအဖွဲ့ချုပ်(UEFA)က ရွှေ့ဆိုင်းခဲ့ပါတယ်။

အစ္စရေးအသင်းဟာ ခြေစစ်ပွဲ ၆ ပွဲ ကစားအပြီးမှာ ရမှတ် ၁၁ မှတ်နဲ့ အုပ်စုတွင်းအဆင့် ၃ နေရာမှာ ရပ်တည် နေပေမယ့် ယူရို ၂၀၂၄ ပြိုင်ပွဲကို ပလေးအော့ဖ်ကနေ ယှဉ်ပြိုင်ခွင့်ရဖို့ မျှော်လင့်ချက်ရှိနေတာ ဖြစ်ပါတယ်။

Source: BBC