CNI Sport News
၂၀၂၅ ခုနှစ်၊ မေလ ၂
ယူနိုက်တက်အသင်းဟာ ယူရိုပါလိဂ် ဆီမီးဖိုင်နယ် ပထမအကျော့ အဝေးကွင်းပွဲစဉ်မှာ ဘီလ်ဘာအိုအသင်းကို ၃ ဂိုး-ဂိုးမရှိနဲ့ ဂိုးပြတ် အနိုင်ရရှိခဲ့ပေမယ့် နည်းပြအာမိုရင်က သူတို့ဗိုလ်လုပွဲကို တက်နိုင်ခြင်း မရှိသေးဘူးလို့ ကစားသမားတွေကို သတိပေးခဲ့ပါတယ်။
အာမိုရင်က “ဒါက အကောင်းဆုံးရလဒ်လို့ ကျနော်ထင်ပါတယ်။ ဘာလို့လဲဆိုရင် ဘယ်သူကမှ ဒီရလဒ်မျိုးကို မမျှော်လင့်ထားလို့ပါ။ အိုးထရက်ဖို့ဒ်မှာလည်း ဒီလိုတူညီတဲ့ ရလဒ်မျိုး ဖြစ်ပေါ်လာနိုင်လို့ ကျနော်တို့ ပြင်ဆင်ထား ဖို့ လိုပါတယ်။ အဝေးဂိုး စည်းမျဉ်းမရှိတာကြောင့် ဘာမဆို ပြောင်းလဲသွားနိုင်ပြီး ဒါက ကစားသမားတွေကို ကျနော် ပေးချင်တဲ့ မက်ဆေ့ချ်ပါ။ ဒီပွဲရဲ့အစပိုင်းမှာ ကျနော်တို့ ရုန်းကန်ခဲ့ရပေမယ့် သွင်းဂိုးနဲ့ အနီကတ်က ပွဲကို ပြောင်းလဲသွားခဲ့ပါတယ်”လို့ ပြောခဲ့တာပါ။
ဘီလ်ဘာအိုအသင်းဟာ ဒီပွဲစဉ်ရဲ့ပွဲချိန်မိနစ် ၂၀ ကျော်အထိ ယူနိုက်တက်အသင်းဘက်ကို ဂိုးရနိုင်မယ့် အခွင့်အရေး အများအပြား ဖန်တီးပြီး ခြိမ်းခြောက်မှုတွေ ပြုလုပ်နိုင်ခဲ့ပါတယ်။
ဒါပေမယ့် ကတ်စီမီရိုရဲ့ ခေါင်းတိုက်သွင်းဂိုး၊ ပင်နယ်တီနဲ့ အနီကတ် ပြစ်ဒဏ်တွေက ဘီလ်ဘာအိုအသင်းကို အိမ်ကွင်းမှာ ဂိုးပြတ်ရှုံးနိမ့်ဖို့ဖြစ်ခဲ့တာပါ။
ယူနိုက်တက်အသင်းနဲ့ ဘီလ်ဘာအိုအသင်း ယှဉ်ပြိုင်နေစဉ်
ယူနိုက်တက်အသင်းအတွက် နောက်ထပ် သွင်းဂိုး ၂ ဂိုးကို အသင်းခေါင်းဆောင် ဘရူနိုဖာနန်ဒက်စ်က သွင်းယူခဲ့တာဖြစ်ပါတယ်။
ယူနိုက်တက်အသင်းဟာ ယူရိုပါလိဂ် ဆီမီးဖိုင်နယ် ပထမအကျော့ပွဲစဉ်မှာ ဂိုးပြတ်အနိုင်ရရှိခဲ့တာကြောင့် ဗိုလ်လုပွဲ တက်ဖို့ နီးစပ်သွားခဲ့ပေမယ့် နည်းပြအာမိုရင်က ဒုတိယအကျော့ပွဲစဉ်အတွက် ပြင်ဆင်ဖို့လိုအပ်တယ်လို့ သတိ ပေးခဲ့ပါတယ်။
ဘီလ်ဘာအိုအသင်းနည်းပြ ဗယ်လ်ဗာဒီက ယူနိုက်တက်အသင်း တိုက်စစ်မှူး ဟော့ဂျ်လန်းကို ဂိုးဧရိယာထဲ ပြစ်ဒဏ် ကျူးလွန်တယ်ဆိုပြီး နောက်ခံလူ ဗီဗီယန်ကို တိုက်ရိုက်အနီကတ်ပြသကာ ပင်နယ်တီပေးခဲ့တဲ့ ကွင်းလယ်ဒိုင်လူကြီးရဲ့ ဆုံးဖြတ်ချက်ကို ဒေါသထွက်နေခဲ့တာပါ။
ဘီလ်ဘာအိုအသင်းနည်းပြ ဗယ်လ်ဗာဒီက ဒီဖြစ်ရပ်မတိုင်ခင်မှာ ယူနိုက်တက်အသင်း တောင်ပံကစားသမား ဂါနာချို ဘောလုံးကို လက်နဲ့ထိခဲ့ပေမယ့် ကွင်းလယ်ဒိုင်လူကြီးက ဆက်ပြီး ကစားစေခဲ့တာကို ဝေဖန်မှုပြုလုပ်ခဲ့ပါ တယ်။
ယူနိုက်တက်နဲ့ ဘီလ်ဘာအိုအသင်းတို့ရဲ့ ယူရိုပါလိဂ် ဆီမီးဖိုင်နယ် ဒုတိယအကျော့ပွဲစဉ်ကို မေလ ၉ ရက် အိုးထရက်ဖို့ဒ်ကွင်းမှာ ယှဉ်ပြိုင်သွားမှာဖြစ်ပါတယ်။
Source: ESPN
