CNI International News

နယူးဒေလီ၊ ဧပြီ ၁၈

အိန္ဒိယနှင့် ရုရှားတို့သည် လွတ်လပ်စွာ ကုန်သွယ်ရေး သဘောတူညီချက် (FTA) တစ်ခုအတွက် ဆွေးနွေးနေသည် ဟု ရိုက်တာ သတင်းတွင် ဖော်ပြထားသည်။

ယူကရိန်းစစ်ပွဲ ပေါ်ပေါက်လာခဲ့ပြီးနောက် နှစ်နိုင်ငံကြား ကုန်သွယ်ရေးဆိုင်ရာ ဆက်ဆံရေးများ မြင့်တက်လာ ခဲ့သည်။

FTA ဆွေးနွေးပွဲများသည် နှစ်နိုင်ငံကြား စီးပွားရေး ဆက်ဆံမှုများ စတင်လာခြင်းဖြစ်သည်။ ထိုဆွေးနွေးမှုသည် ယူကရိန်းအား ကျူးကျော်မှုကြောင့် ရုရှားနှင့် ဝေးဝေးနေရန် အနောက်နိုင်ငံများက အိန္ဒိယအား တောင်းဆိုမှုများ ရှိနေချိန် တွင် ပေါ်ပေါက်လာခြင်း ဖြစ်သည်။

အိန္ဒိယသို့ ရုရှား၏ ပို့ကုန်တင်သွင်းမှုမှာ ပြီးခဲ့သည့် ဘဏ္ဍာရေးနှစ်တွင် ဒေါ်လာ ၄၆ ဒသမ ၃၃ ဘီလီယံအထိ လေးဆကျော် မြင့်တက်လာခဲ့ကာ အများစုမှာ ရေနံဖြစ်သည်။

ရုရှားဒုတိယဝန်ကြီးချုပ် ဒန်းနစ် မန်တူရော့ဗ်ကိုတွေ့ရစဉ်

နှစ်နိုင်ငံ ဈေးကွက်များသို့ ထုတ်ကုန်များ အပြန်အလှန် ဝင်ရောက်ခြင်း ကိစ္စများအပေါ် အထူး အလေးထား ဆောင်ရွက်နေသည်ဟု ရုရှားဒုတိယဝန်ကြီးချုပ် ဒန်းနစ် မန်တူရော့ဗ် (Denis Manturov) က ဒေလီမြို့မှ အခမ်းအနား တစ်ခုတွင် ပြောခဲ့သည်။

၎င်းသည် ကုန်သွယ်ရေးဝန်ကြီးအဖြစ် ဆောင်ရွက်နေသူလည်း ဖြစ်သည်။

Eurasian စီးပွားရေးကော်မရှင်နှင့် ပူးပေါင်းကာ အိန္ဒိယနှင့် လွတ်လပ်စွာ ကုန်သွယ်ရေး သဘောတူညီချက် ရရှိရေး ဆွေးနွေးမှုများကို အရှိန်မြှင့်တင် ဆောင်ရွက်နေသည်ဟုလည်း ၎င်းက ပြောသည်။

ကိုဗစ်ရောဂါ ဖြစ်ပွားမှုက အိန္ဒိယနှင့် ရုရှား ဦးဆောင်သည့် Eurasian တို့အကြား FTA ရရှိရေး ဆွေးနွေးမှုများကို အနှောင့်အယှက် ဖြစ်စေခဲ့ကြောင်း၊ ထိုသဘောတူညီချက်သည် နှစ်နိုင်ငံကုန်သွယ်ရေးဆိုင်ရာ ဆက်ဆံရေးကို အမှန်တကယ် ခြားနားမှု ဖြစ်စေခြင်းကြောင့် ယင်းကို စတင်နိုင်မည်ဟု မျှော်လင့်ကြောင်း အိန္ဒိယနိုင်ငံခြားရေး ဝန်ကြီး အက်စ် ဂျိုင်ရှန်ကာ (S. Jaishankar) က ပြောသည်။

ရုရှားဈေးကွက်တွင် လမ်းတည်ဆောက်ဆိုင်ရာ ပစ္စည်း၊ ကိရိယာများ၊ ဓာတုပစ္စည်းများ၊ ဆေးဝါးထုတ်ကုန်များ ဝယ်လိုအား ရှိနေခြင်းကြောင့် ယင်းသည် အိန္ဒိယကုမ္ပဏီများအတွက် ရုရှားသို့ ပို့ကုန်တင်သွင်းမှု မြှင့်တင်ရန် အခွင့်အလမ်း ဖြစ်စေမည်ဟု မန်တူရော့ဗ်က ပြောသည်။

အိန္ဒိယနိုင်ငံခြားရေး ဝန်ကြီး အက်စ် ဂျိုင်ရှန်ကာကိုတွေ့ရစဉ်

ယခု ထုတ်ပြန်မှုသည် အိန္ဒိယ အနေဖြင့် ဗြိတိန်၊ အီးယူနှင့် ပင်လယ်ကွေ့ ပူးပေါင်းဆောင်ရွက်မှု ကောင်စီ စသည် တို့နှင့် FTA ရရှိရေး ဆွေးနွေးမှုများ လုပ်ဆောင်နေစဉ် ပေါ်ပေါက်လာခြင်း ဖြစ်သည်။

ယူကရိန်း အရေးအတွက် အနောက်အုပ်စု၏ ပိတ်ဆို့ အရေးယူမှုများကြောင့် ပင်မလုပ်ငန်းများ ဆောင်ရွက်ရန် အကန့်အသတ် ရှိနေချိန်တွင် ရုရှားသည် ကား၊ လေယာဉ်၊ ရထားတို့ကဲ့သို့ အရေးပါသော ကဏ္ဍများအတွက် အိန္ဒိယမှ ထုတ်ကုန် ၅၀၀ ကျော်ကို တင်သွင်းရန် ကြိုးစားနေသည်ဟု ပြီးခဲ့သည့် နိုဝင်ဘာလတွင် ရိုက်တာက ဖော်ပြခဲ့ဖူးသည်။

ရုရှားအနေဖြင့် ၎င်းတို့နိုင်ငံသုံး ငွေကြေးနှင့် မိတ်ဖက်နိုင်ငံများ၏ ငွေကြေးများအား အသုံးပြုခြင်းကို ချဲ့ထွင်ရန် စဉ်းစားနေသည်ဟု မာတူရော့ဗ်က ပြောသည်။ အိန္ဒိယအနေဖြင့်လည်း ရုရှားနှင့် ကုန်သွယ်ရေးတွင် ၎င်းတို့နိုင်ငံ သုံး ရူပီး အသုံးပြုမှုကို မြှင့်တင်သွားလို နေသည်ဟု သိရသည်။

Source: ရိုက်တာ

CNI International News

ဖရန့်ဖတ်၊ မတ်လ ၂၃

ဒေါ်လာ ၁၅ ဒသမ ၆ ဘီလီယံ ချေးငွေအစီအစဉ်နှင့် ပတ်သက်၍ ယူကရိန်းနှင့် နိုင်ငံတကာ ငွေကြေးရံပုံငွေအဖွဲ့ IMF တို့အကြား သဘောတူညီချက် ရရှိခဲ့သည်ဟု အေပီသတင်းတွင် ဖော်ပြသည်။

ထိုချေးငွေ အစီအစဉ်သည် ရုရှား၏ ကျူးကျော်စစ်ကြောင့် ကျဆင်းလာရသည့် ယူကရိန်း၏ ဘဏ္ဍာရေး အခြေ အနေကို မြှင့်တင်ရန် ယူကရိန်းသည် ခိုင်မာသော စီးပွားရေးမူဝါဒများအတိုင်း ဆောင်ရွက်ခြင်း၊ အကျင့်ပျက် ခြစားမှုကို တိုက်ဖြတ်ခြင်း စသည့်တို့ဖြင့် မဟာမိတ်များ၏ ယုံကြည်မှုကို ရယူကာ အကူအညီများ ထပ်မံရရှိရေး အတွက် ရည်ရွယ်သည်။

ဗုဒ္ဓဟူးနေ့တွင် သဘောတူခဲ့သော ချေးငွေ အစီအစဉ်သည် ယူကရိန်း၏ နိုင်ငံတကာ မိတ်ဖက်များထံမှ ငွေကြေး ထောက်ပံ့မှုကို စုစည်းရေးအတွက်သာမက အသေးစား ငွေကြေးလုပ်ငန်း တည်ငြိမ်မှုကို ထိန်းသိမ်းရန်နှင့် စစ်အောင်ပွဲ ရရှိချိန်တွင် ပြည်လည် တည်ဆောက်ရေး လမ်းကြောင်းကို သေချာစေရေးတို့ကိုပါ အထောက်အကူ ဖြစ်စေမည်ဟု ယူကရိန်းဘဏ္ဍာရေးဝန်ကြီးက ပြောသည်။

IMF ရုံးကိုတွေ့ရစဉ်

ချေးငွေ အစီအစဉ်သည် လေးနှစ်ကြာမည်ဖြစ်ကာ ပထမ ၁၂ လမှ ၁၈ လအတွင်း ယူကရိန်း၏ ကြီးမားသော ဘတ်ဂျက်လိုငွေပြမှုကို ကျဉ်းမြောင်းစေရန်နှင့် အသုံးစရိတ်အတွက် ငွေစက္ကူ ရိုက်နှိပ်ရေး ဖိအားများကို သက်သာ စေရန် ရည်ရွယ်သည်ဟု အင်္ဂါနေ့က IMF မှ ထုတ်ပြန်သော ကြေညာချက် တစ်စောင်တွင် ဖော်ပြထားသည်။

ပင်စင်ပေးရန်၊ လစာပေးရန်နှင့် တခြားသော ဝန်ဆောင်မှုများအတွက် ငွေစက္ကူများ ရိုက်နှိပ်ခြင်းသည် ငွေကြေး ဖောင်းပွမှုနှင့် မတည်မငြိမ်မှုတို့ကို ဖြစ်စေသည်။ အစီအစဉ်၏ ကျန်အစိတ်အပိုင်းများသည် ယူကရိန်း၏ အီးယူ အဖွဲ့ဝင် ဖြစ်ရေးနှင့် စစ်အပြီး ပြန်လည် ထူထောင်ရေး လုပ်ငန်းများကို ထောက်ပံ့သွားမည် ဖြစ်သည်။

IMF နှင့် သဘောတူညီချက်သည် G-7 နိုင်ငံများနှင့် အီးယူတို့ ကဲ့သို့ ဖြစ်လာနိုင်သော အလှူရှင်နိုင်ငံများကို ယူကရိန်းသည် ကောင်းမွန်သော စီးပွားရေး မူဝါဒများကို အကောင်အထည် ဖော်နေသည်ဆိုသည့် သက်သေခံ ချက်ကို ဖြစ်စေသောကြောင့် ယူကရိန်းအနေဖြင့် နောက်ထပ် ငွေကြေးများ ထပ်မံရရှိမည်ဟုလည်း ယူဆရသည်။

သဘောတူညီချက်သည် IMF ၏ အမှုဆောင် ဘုတ်အဖွဲ့ထံမှ အတည်ပြုချက် လိုအပ်နေဆဲ ဖြစ်သော်လည်း ယင်း သည် အစီအစဉ် ကာလအတောအတွင်း ယူကရိန်း၏ နိုင်ငံတကာ အလှူရှင်များထံမှ ကြီးမားသည့် ငွေကြေး ထောက်ပံ့မှုဆိုင်ရာ အလျော့ပေးမှုများကိုလည်း ရရှိစေနိုင်သည်ဟု ယူကရိန်း နိုင်ငံဆိုင်ရာ IMF မစ်ရှင် အကြီးအကဲ က ပြောသည်။

ရုရှားပစ်ခတ်မှုကြောင့် ပျက်စီးနေသော ယူကရိန်းနိုင်ငံအတွင်းက အဆောက်အအုံကိုတွေ့ရစဉ်

လွှတ်တော်ဆိုင်ရာ ဆွေးနွေးညှိနှိုင်းမှုများတွင် ယူကရိန်း အာဏာပိုင်များသည် ကောင်းမွန်သော စီးပွားရေး မူဝါဒအတွက် ၎င်းတို့၏ ပေးထားသော ကတိကို တည်ကြောင်း ပြသနိုင်ခဲ့ကာ သဘောတူရန် လိုအပ်သည့် ရည်မှန်းချက်များနှင့်လည်း ကိုက်ညီမှု ရှိခဲ့သည်ဟု ဝါရှင်တန်အခြေစိုက် IMF ကပြောသည်။

ယူကရိန်းနှင့် သဘောတူညီချက်သည် စစ်ဖြစ်နေသော နိုင်ငံမျးကို ငွေထုတ်ချေးသည့် IMF ၏ သဘော သဘာဝကိုလည်း ကျော်လွန်လျက်ရှိသည်။

Source: AP

CNI International News

ဝါရှင်တန်၊ မတ်လ ၁၅

အမေရိကန်ဘဏ် စတော့များသည် အင်္ဂါနေ့တွင် သိသိသာသာ မြင့်တက်လာခဲ့သည်ဟု ရိုက်တာ သတင်းတွင် ဖော်ပြထားသည်။

Silicon Valley ဘဏ်နှင့် Signature ဘဏ်တို့ ပြိုလဲသွားမှုကြောင့် စတော့ဈေးကွက် ကျဆင်းသွားခဲ့ရာမှ ပြန်ရုန်း ထွက်လာနိုင်ခဲ့ခြင်းဖြစ်သည်။ ဘဏ်များ ပြိုလဲသွားခြင်းက အမေရိကန်သမ္မတ အပါအဝင် ကမ္ဘာ့ ခေါင်းဆောင် များထံမှ အာမခံချက်များကိုလည်း ထွက်ပေါ်လာစေခဲ့သည်။

အမေရိကန်ဘဏ်နှစ်ခု ပြိုလဲခြင်း၏ ရိုက်ခတ်မှုများအပေါ် စိုးရိမ်မှုများနှင့် ဘဏ်များ အတိုးနှုန်း မြှင့်တင်လာမည့် အပေါ် ရင်းနှီးမြှုပ်နှံသူများ၏ စိုးရိမ်မှုများက အာရှနှင့်ဥရောပရှိ ဘဏ်ရှယ်ယာများကို ထိခိုက်စေခဲ့သည်။

ဥရောပရှိ ဘဏ်စနစ်မှ ဆုံးရှုံးနိုင်ခြေ ညွှန်းကိန်းသည် ဇူလိုင်လလယ် နောက်ပိုင်း အမြင့်ဆုံးသို့ ရောက်ရှိခဲ့ကာ အဆင့် သတ်မှတ်ရေး အေဂျင်စီ တစ်ခုဖြစ်သည့် Moody’s ကလည်း လုပ်ငန်းဆောင်ရွက်မှု ပတ်ဝန်းကျင်တွင် စဉ်ဆက်မပြတ် ကျဆင်းနေမှုများကြောင့် အမေရိကန်ဘဏ်စနစ်အပေါ် ရှုမြင်သုံးသပ်ချက်ကို တည်ငြိမ်မှုမှ ဆိုးရွားမှုအဆင့်သို့ ပြောင်းလဲသတ်မှတ်ခဲ့သည်။

Silicon Valley ဘဏ် ပြိုပြီးနောက် အရှေ့မှာ ငွေအပ်နှံသူများကိုတွေ့ရစဉ်

VIX ၏ ဆိုးရွားမှုညွှန်းကိန်း၊ Wall Street ၏ ဆိုးရွံ့မှု အတိုင်းအတာတို့သည်လည်း ခြောက်လအတွင်း အမြင့်ဆုံးသို့ ညတွင်းခြင်း ရောက်ရှိခဲ့သည့်တိုင် အမေရိကန်ဘဏ် ရှယ်ယာတန်ဖိုး ပြန်လည်မြင့်တက်လာသည်နှင့်အမျှ First Republic ဘဏ်၏ ရှယ်ယာတန်ဖိုးမှာ ၅၂ ဒသမ ၇ ရာခိုင်နှုန်းသို့ တက်လာခဲ့သည်။

တစ်နေ့အတွင်း စံချိန်တင် ၁၇ ဒသမ ၅၃ သို့ ကျဆင်းခဲ့ပြီး တစ်ရက်အကြာတွင် ထိုသို့ ဖြစ်ခဲ့ခြင်း ဖြစ်သည်။

မဝေးတော့သည့် အနာဂတ်ကာလတွင် ထင်ရှားသည့် ဘဏ်များ ပြိုကွဲမှု မဖြစ်လာပါက ငွေကြေးကဏ္ဍမှ စိုးရိမ်မှု များသည်လည်း လျော့ပါးလာလိမ့်မည်ဟု Cresset Capital မှ ရင်းနှီးမြှုပ်နှံမှု ခေါင်းဆောင် ဂျက်အဘင်လင်း (Jack Ablin) က ပြောသည်။

ဈေးကွက်မဖွင့်မီ ထိပ်သီးဘဏ်များဖြစ်သော Citi၊ Wells Fargo နှင့် JP Morgan တို့၏ ရှယ်ယာတန်ဖိုးများသည် လည်း မြင့်တက်လာခဲ့သည်။

Silicon Valley ဘဏ် ပြိုပြီးနောက် အရှေ့မှာ ငွေအပ်နှံသူများကိုတွေ့ရစဉ်

သို့သော် First Republic၊ Zions Bancorp၊ Western Alliance Bancorp နှင့် Comerica ဘဏ်တို့ အပါအဝင် ဘဏ်ခြောက်ခုအား အဆင့်လျှော့ချ သတ်မှတ်ရေး ပြန်လည် သုံးသပ်မှုများ လုပ်ဆောင်နေသည်ဟု Moody’s က ပြောသည်။

ဥရောပ၏ ဘဏ်စနစ် ညွှန်းကိန်းများသည်လည်း အင်္ဂါနေ့တွင် ကနဦး ကျဆင်းမှု ရှိခဲ့သော်လည်း ၂ ဒသမ ၇ ရာခိုင်နှုန်းအထိ ပြန်လည် မြင့်တက်လာခဲ့သည်။ တစ်နှစ်ကျော် ကာလအတွင်း အကြီးမားဆုံး ဆုံးရှုံးမှု ရာခိုင်နှုန်း ကို တနင်္လာနေ့တွင် ဖြစ်စေခဲ့ပြီးနောက် ဥရောပဒေသရှိ ဘဏ်များသည် အားနည်းချက် နည်းပါသည်ဟု တချို့က သုံးသပ်သည်။

ဥရောပနှင့် အမေရိကားရှိ ဘဏ်စနစ်များ၏ အသိသာဆုံး ခြားနားချက်မှာ ဥရောပဘဏ်များသည် စာချုပ်များ အပေါ် ချုပ်ကိုင်ထားမှု နည်းပါးကာ ယင်းတို့၏ အတိုးနှုန်းများ တည်ငြိမ်ခြင်းကြောင့် ဖြစ်သည်ဟု Moody’s မှ ထုတ်ပြန်ထားသည်။

Source: ရိုက်တာ

CNI International News

ဟောင်ကောင်၊ မတ်လ ၁၅

အမေရိကန်ဘဏ်နှစ်ခု ပြိုလဲသွားခဲ့ပြီးနောက် ငွေကြေးကဏ္ဍကို ရိုက်ခတ်မှုများ ရှိလာမည်အား စိုးရိမ်မှုဖြင့် စုပြုံရောင်းချခြင်းကြောင့် အာရှဈေးကွက်သည် အင်္ဂါနေ့တွင် ကျဆင်းခဲ့သည်ဟု CNA သတင်းက ဖော်ပြခဲ့သည်။

Silicon Valley နှင့် Signature ဘဏ်တို့ ပိတ်ခဲ့ရမှုတို့ကြောင့် အမေရိကန် အာဏာပိုင်များသည်ပင် တခြားသော ဘဏ်များနှင့် ငွေအပ်နှံသူများအား ထောက်ပံ့ကူညီမှု လုပ်ဆောင်ပေးမည်ဟု ချက်ချင်း ကတိပြုခဲ့ရသည်။
ဖက်ဒရယ်အရံငွေ၊ ဘဏ္ဍာရေးဌာနနှင့် ဖက်ဒရယ်ဘဏ် အပ်နှံငွေ အာမခံကော်ပိုရေးရှင်းတို့၏ ဆောင်ရွက်ချက် သည် ရင်းနှီးမြှုပ်နှံသူများအတွက် ပူပင်မှု လျော့ကျစေခဲ့သော်လည်း ကာစတန်မာများ၏ စိုးရိမ်မှုကြောင့် အမေရိကန်ဘဏ် တချို့၏ ရှယ်ယာတန်ဖိုးကို ထိခိုက်စေခဲ့သည်။

အမေရိကန်သမ္မတနှင့် ဥရောပ ခေါင်းဆောင်များဘက်မှ ရင်းနှီးမြှုပ်နှံသူများ၏ စိုးရိမ်မှုကို ပြေပျောက်စေရန် အာမခံချက် ပေးခဲ့သည့်တိုင် ထိုသို့ ဖြစ်ပွားခဲ့ခြင်း ဖြစ်သည်။

Silicon Valley ဘဏ်ကိုတွေ့ရစဉ်

နည်းပညာ လုပ်ငန်းများတွင် အဓိက အခြေခံသည့် Silicon Valley ဘဏ် ပြိုလဲရမှုသည် ငွေကြေးဖောင်းပွမှုကို ကာမိစေရန် ရည်ရွယ်သည့် FED ၏ အတိုးနှုန်း မြှင့်တင်မှုနှင့် များစွာဆက်စပ်မှု ရှိနေသည်။

ထို့ကြောင့် FED အနေဖြင့် ငွေကြေးဈေးကွက်အတွင်း တည်ငြိမ်မှုရှိစေရန် ယင်း၏ တင်းကြပ်သော ကမ်ပိန်းကို ရပ်တန့်ရန် လိုအပ်သည်ဆိုသည့် ထောက်ပြမှုများအပြင် ချေးငွေစရိတ်ကို ဖြတ်တောက်သင့်သည်ဆိုသော အကြံ ပြုမှုများလည်း ပေါ်ထွက်လာသည်။

Silicon Valley ဘဏ် ပြိုလဲရမှုသည် ဗဟိုဘဏ်များအား အတိုးနှုန်းမြှင့်တင်မှုကို အရှိန်လျော့ရန် ဖိအားဖြစ်စေ သည်ဟု Pictet Asset Management မှ အာရန်ဆိုင် (Arun Sai) က ပြောသည်။

ဘဏ္ဍာရေးစနစ်တွင် တည်ငြိမ်မှု ရှိစေရေးအတွက် ဗဟိုဘဏ်များ အနေဖြင့် နောက်ထပ် အတိုးနှုန်း မြှင့်တင်မှု လုပ်ဆောင်ရန် စဉ်းစားလာရပြီဟုလည်း ၎င်းက ပြောသည်။

အာရှ စတော့ဈေးကွက်ကိုတွေ့ရစဉ်

လက်ရှိ အခြေအနေကြောင့် တနင်္လာနေ့ ဒေါ်လာဈေးကွက်ကို ရိုက်ခတ်မှုများလည်း ဖြစ်စေခဲ့သည်။

ထို့နောက် လက်ရှိ အခြေအနေများက ကမ္ဘာတစ်ဝန်းလုံးရှိ အစိုးရစာချုပ်များ ထုတ်ခြင်းကိုလည်း ရိုက်ခတ်မှု ဖြစ်စေခဲ့ကာ စီးပွားရေးကျဆင်းမှု ပေါ်ပေါက်လာနိုင်ခြေလည်း မြင့်တက်လာသည်ဟု လေ့လာသူများက သတိ ပေးသည်။

ကမ္ဘာ့စာချုပ် ဈေးကွက်သည် ကမ္ဘာ့စီးပွားရေး ကျဆင်းလာမှုကို ညွှန်းဆိုနေကာ ယင်းသည် အာရှဒေသအတွက် ကောင်းမွန်သည့် လက္ခဏာမဟုတ်ဟု Nikko Assest Management မှ ဂျွန်ဗေးလ် (John Vail) က ပြောသည်။

အာရှစတော့ ဈေးကွက်တွင် ကျဆင်းမှုများရှိနေပြီး တိုကျို၊ ဟောင်ကောင်နှင့် ဆိုးလ်တို့တွင် နှစ်ရာခိုင်နှုန်းကျော် ကျဆင်းကာ ဆစ်ဒနီ၊ တိုင်ပေ၊ မနီလာ၊ ဂျကာတာနှင့် ဘန်ကောက်တို့၌ တစ်ရာခိုင်နှုန်းကျော် ကျဆင်းမှု ရှိသည်။

ရှန်ဟိုင်း၊ မွမ်ဘိုင်းနှင့် စင်ကာပူတို့တွင်လည်း ကျဆင်းမှုများ ရှိသည်ဟု သိရသည်။

Source: CNA

CNI International News

ဒူဘိုင်း၊ မတ်လ ၁၃

ပြီးခဲ့သည့်နှစ်တွင် ဒေါ်လာ ၁၆၁ ဘီလီယံ အမြတ်ရရှိခဲ့သည်ဟု Saudi Aramco ရေနံကုမ္ပဏီက အင်္ဂါနေ့၌ ထုတ်ပြန် ကြေညာခဲ့သည်။

ယင်းသည် အများပိုင်ကုမ္ပဏီတစ်ခု အနေဖြင့် သမိုင်းတစ်လျှောက် စံချိန်တင် အမြတ်ငွေ ပမာဏဖြစ်ကာ တက်ကြွလှုပ်ရှားသူများ၏ ဝေဖန်မှုများကိုလည်း ဖြစ်စေခဲ့သည်ဟု အေပီသတင်းတွင် ဖော်ပြထားသည်။

Saudi Arabian Oil Co., ဟုခေါ်သော ကုမ္ပဏီ၏ စံချိန်တင် အမြတ်ငွေ ရရှိမှုမှာ ၂၀၂၂ ခုနှစ်၊ ဖေဖော်ဝါရီလ ယူကရိန်းအား ရုရှားမှ ကျူးကျော်စစ် ဆင်နွဲခဲ့ခြင်းကနေ ဖြစ်ပေါ်လာသည့် စွမ်းအင်ဈေးနှုန်းများ မြင့်တက်လာ မှုကြောင့် ဖြစ်သည်။

ဆော်ဒီမင်းသားကိုတွေ့ရစဉ်(GETTY IMAGES)

အဆိုပါ ကျူးကျော်မှုကြောင့် ရုရှား၏ ရေနံနှင့် သဘာဝ ဓာတ်ငွေ့များ အနောက်နိုင်ငံ ဈေးကွက်များတွင် ရောင်းချ ခွင့် ကန့်သတ်သည့် ပိတ်ဆို့အရေးယူမှုများ ချမှတ်ခဲ့ခြင်းကြောင့် ဖြစ်သည်။ ကိုရိုနာဗိုင်းရပ်စ်ဆိုင်ရာ ကန့်သတ်မှု များ လျော့ချခဲ့ပြီးနောက် တရုတ်နိုင်ငံသည်လည်း ကမ္ဘာ့ဈေးကွက်အတွင်းသို့ ပြန်လည် ဝင်ရောက်လာချိန်တွင် ဈေးကွက် လိုအပ်ချက်ကို အသုံးချနိုင်ရေး ထုတ်လုပ်မှု တိုးမြှင့်သွားနိုင်ရန် မျှော်လင့်ထားသည်ဟု ကုမ္ပဏီဘက်က ပြောသည်။

ယင်းက ဆော်ဒီနိုင်ငံအား ရေနံအပေါ် မှီခိုနေရမှုမှ ရုန်းထွက်နိုင်ရေး အိမ်ရှေ့မင်းသား မိုဟာမက်ဘင်ဆယ်လ်န် (Mohammed bin Salman) ၏ အနာဂတ် စီမံကိန်းများအတွက် လိုအပ်သော ဒေါ်လာ ဘီလီယံ ပေါင်းများစွာ ကိုလည်း အထောက်အပံ့ ဖြစ်စေနိုင်သည်။

သို့သော် ထိုစီမံကိန်းများသည် ရုပ်ကျွင်းလောင်စာများ လောင်ကျွမ်းခြင်းက ရာသီဥတု ပြောင်းလဲမှုကို မြန်ဆန် လာစေနိုင်မည်ကို စိုးရိမ်နေသောကြောင့် ဝေဖန်မှုများနှင့်လည်း ရင်ဆိုင်နေရသည်။ ထို့အပြင် ရေနံဈေးမြင့် တက် လာမှုကြောင့် အမေရိကန်နှင့် ဆော်ဒီနိုင်ငံတို့ကြား ဆက်ဆံရေး ဆိုးရွားလာစေခဲ့ရုံမက ကမ္ဘာတစ်ဝန်း ငွေကြေး ဖောင်းပွမှုနှုန်းကိုလည်း မြင့်တက်စေခဲ့သည်။

ရုရှားရေနံကိုတွေ့ရစဉ်(GETTY IMAGES)

ကုမ္ပဏီသည် ၂၀၂၁ ခုနှစ်တွင် ဒေါ်လာ ၁၁၀ ဘီလီယံ အမြတ်ငွေ ရရှိခဲ့ပြီး ပြီးခဲ့သည့် နှစ်တွင် ၄၆ ဒသမ ၅ ရာခိုင် နှုန်း မြင့်တက်လာခြင်း ဖြစ်သည်။ ကိုရိုနာဗိုင်းရပ်စ်၏ ဆိုးကျိုးများကို အဆိုးရွားဆုံး ရင်ဆိုင်နေရသည့် ၂၀၂၀ ခုနှစ် တွင် ကုမ္ပဏီ၏ အမြတ်ငွေမှာ ၄၉ ဘီလီယံသာ ရှိခဲ့သည်။

၂၀၂၂ ခုနှစ်တွင် တစ်နေ့လျှင် ရေနံစည် ၁၁ ဒသမ ၅ သန်း ထုတ်လုပ်ရာမှ လာမည့် ၂၀၂၇ တွင် ၁၃ သန်းအထိ တိုးမြှင့် ထုတ်လုပ်နိုင်ရန် ရည်ရွယ်ထားသည်ဟု Aramco က ပြောသည်။

ထုတ်လုပ်မှုကို မြှင့်တင်နိုင်ရန် ယခုနှစ် ငွေရင်းငွေနှီး စီမံကိန်းများတွင် ဒေါ်လာ ၅၅ ဘီလီယံထက် မနည်း အသုံးပြု သွားရန်လည်း စီစဉ်ထားသည်။ ၂၀၂၂ ခုနှစ် နောက်ဆုံး သုံးလပတ်အတွက် အစုရှယ်ယာပေါ် အမြတ်ငွေ ၁၉ ဒသမ ၅ သန်းကို ယခုနှစ်ပထမ သုံးလပတ်တွင် ပေးသွားမည်ဟု ကုမ္ပဏီက ကြေညာခဲ့သည်။

Source: AP

CNI International News

ဂျင်ဂျိုး၊ မတ်လ ၄

Apple ၏ မိတ်ဖက်ဖြစ်သော Foxconn Technology Group သည် ဒေသတွင်း ထုတ်လုပ်မှုကို မြှင့်တင်ခြင်း အ ဖြစ် အိန္ဒိယတွင် စက်ရုံသစ်တစ်ခု တည်ဆောက်ရန် ဒေါ်လာသန်း ၇၀၀ ရင်းနှီးမြှုပ်နှံမှု လုပ်ဆောင်ရန် စီစဉ်နေ သည်ဟု South China Morning Post သတင်းတွင် ဖော်ပြသည်။

တရုတ်-အမေရိကန် တင်းမာမှုများ မြင့်တက်နေချိန်တွင် ထုတ်လုပ်မှုများအား တရုတ်ပြင်ပတွင် လုပ်ဆောင်ရန် ပြောင်းလဲလာခြင်း ဖြစ်သည်။

Hon Hai Precision Industry ဟုထင်ရှားသော ထိုင်ဝမ်ကုမ္ပဏီသည် ဘန်ဂလော (Bangalore) လေဆိပ် အနီး တွင် ဧက ၃၀၀ ရှိသော နေရာ၌ iPhone အစိတ်အပိုင်းများ ထုတ်လုပ်ရေး စက်ရုံတည်ဆောက်ရန် စီစဉ်နေခြင်း ဖြစ်သည်ဟု ၎င်းနှင့်နီးစပ်သူများက ပြောသည်။

အဆိုပါ စက်ရုံတွင် Apple ၏ ဟမ်းဆက်များကို ထုတ်လုပ်မည်ဖြစ်ပြီး Foxconn သည် ယင်းစက်ရုံကို ၎င်းတို့၏ ဖွံ့ဖြိုးစ လျှပ်စစ်ယာဉ် အစိတ်အပိုင်းများ ထုတ်လုပ်ရန် အသုံးပြုဖွယ်လည်း ရှိသည်။

ယခုကိစ္စသည် Foxconn ၏ အိန္ဒိယတွင် အကြီးမားဆုံး ရင်းနှီးမြှုပ်နှံမှုများမှ တစ်ခုဖြစ်ကာ တရုတ်အနေဖြင့် ကမ္ဘာ့ အကြီးဆုံး လျှပ်စစ်ပစ္စည်း ထုတ်လုပ်သူ နိုင်ငံဆိုသည့် အနေအထားကို ဆုံးရှုံးနိုင်ခြေ ရှိနေသည် ဆိုခြင်းကိုလည်း မီးမောင်းထိုးပြနေသည်။

Apple နှင့်တခြားသော အမေရိကန် ဘရမ်းများသည် တရုတ်အခြေစိုက် supplier များမှ ထွက်ခွာကာ အိန္ဒိယနှင့် ဗီယက်နမ်တို့ ကဲ့သို့သော တခြားနေရာများကို ရှာဖွေလာကြသည်။

ယင်းက ကူးစက်ရောဂါ ဖြစ်ပွားမှု ကာလနှင့် ယူကရိန်းစစ်ပွဲအတွင်း ပေါ်ပေါက်လာသော ကမ္ဘာလုံးဆိုင်ရာ ထောက်ပံ့ရေး လမ်းကြောင်း ပြောင်းလဲမှုဖြစ်ပြီး ကမ္ဘာလုံးဆိုင်ရာ လျှပ်စစ်ပစ္စည်းများ ထုတ်လုပ်မှုပုံစံကိုလည်း ပြောင်းလဲပေးနိုင်ဖွယ်ရှိသည်။

တရုတ်မှာရှိသည့် Foxconn Technology Group ကိုတွေ့ရစဉ်

အိန္ဒိယရှိ စက်ရုံသစ်တွင် အလုပ်အကိုင်နေရာ ၁၀၀၀၀၀ ခန့် ဖန်တီးပေးနိုင်မည်ဟု ခန့်မှန်းကြောင်း အမည်မဖော် လိုသည့် နီးစပ်သူက ပြောသည်။

လက်ရှိ တရုတ်နိုင်ငံ ဂျင်ဂျိုး (Zhengzhou) မြို့ရှိ စက်ရုံတွင် အလုပ်အကိုင် နေရာပေါင်း ၂၀၀၀၀၀ ရှိသော်လည်း ထုတ်လုပ်မှုဆိုင်ရာ အမြင့်ဆုံး အနေအထားတွင် ထိုထက် ပိုများမည် ဖြစ်သည်။

ကိုဗစ်နှင့် ဆက်စပ်နေသော အခြေအနေများကြောင့် ဂျင်ဂျိုးစက်ရုံရှိ ထုတ်လုပ်မှုသည် နှစ်ကုန်ပိုင်း အားလပ်ရက် မတိုင်ခင် ထိုးကျသွားခြင်းကြောင့် Apple အနေဖြင့် တရုတ်ရှိ supplier များ၏ အခြေအနေကို ပြန်လည် စဉ်းစား ရန် ဖြစ်စေသည်။

Foxconn ၏ ဆုံးဖြတ်ချက်ကြောင့် Apple ၏ supplier များသည် တရုတ်မှ ခန့်မှန်းထားသည်ထက် ပို၍ မြန်မြန် ထွက်ခွာမည့် သဘောမျိုးလည်း ဖြစ်သည်။

ယခုအစီအစဉ်သည် တရုတ်မှ ဗီယက်နမ်ဘက်သို့ ပြောင်းလဲလာမည့် အရိပ်အယောင်မျိုးလည်း ဖြစ်သည်။

စက်ရုံတည်ဆောက် ပြီးစီးချိန်တွင် ယင်းသည် အိန္ဒိယ၏ iphone အစိတ်အပိုင်းများ ထုတ်လုပ်နိုင်မှုကို ၁၀ ရာခိုင် နှုန်းမှ ၁၅ ရာခိုင်နှုန်းအထိ မြှင့်တင်ပေးနိုင်မည် ဖြစ်သည်။

လက်ရှိ ထုတ်လုပ်နိုင်မှုမှာ ၅ ရာခိုင်နှုန်းသာ ရှိသည်။

သို့သော် ရင်းနှီးမြှုပ်နှံမှု လုပ်ငန်းစဉ်နှင့် ယင်း၏ အသေးစိတ် အချက်အလက်များမှာ အပြီးသတ်နေဆဲ ဖြစ်ခြင်း ကြောင့် Foxconn ၏ စီမံကိန်းမှာ ပြောင်းလဲသွားနိုင်ခြေ ရှိနေဆဲဖြစ်သည်ဟု နီးစပ်သူများက ပြောသည်။

ထို့အပြင် စက်ရုံသစ်အနေဖြင့် ထုတ်လုပ်မှု အသစ်များကို လုပ်ဆောင်မည်လား သို့မဟုတ် တရုတ်စက်ရုံများမှ ထုတ်လုပ်မှုများကို ပြောင်းရွှေ့လာမည်လား ဆိုသည်ကိုလည်း တိတိကျကျ သိရခြင်း မရှိသေးပေ။

ထိုကိစ္စနှင့်ပတ်သတ်၍ Apple ဘက်မှ တစ်စုံတစ်ရာ ပြောဆိုရန် ငြင်းဆိုထားပြီး Hon Hai ၏ဥက္ကဋ္ဌ ဖြစ်သူက လည်း ဆက်သွယ် မေးမြန်းမှုကို ပြန်လည် ဖြေကြားမှုမရှိသေးပေ။

Source: SCMP

CNI International News

ကွာလာလမ်ပူ၊ ဖေဖော်ဝါရီ - ၂၅

မလေးရှားဝန်ကြီးချုပ် အန်ဝါ အီဗရာဟင် (Anwar Ibrahim)သည် ရင်းဂစ် ၃၈၈ ဒသမ ၁ ဘီလီယံ တန်ဖိုးရှိ ၂၀၂၃ ခုနှစ်အတွက် ဘက်ဂျက်ကို သောကြာနေ့တွင် ထုတ်ဖော်ကြေညာခဲ့သည်။

အဆိုပါ အစီအစဉ်သည် မလေးရှားသမိုင်း တစ်လျှောက်အမြင့်ဆုံး အသုံးစရိတ်ဖြစ်သည်ဟု CNA သတင်းတွင် ဖော်ပြသည်။

တစ်ဆက်တည်းမှာပင် ၎င်းသည် လူနေမှုစရိတ် လျှော့ချရန် ရည်ရွယ်သည့် လုပ်ဆောင်ချက်များကိုလည်း ထုတ်ပြန် ကြေညာခဲ့သည်။

သောကြာနေ့တွင် တင်သွင်းခဲ့သော ဘတ်ဂျက်ပမာဏသည် ၂၀၂၂ ခုနှစ် ဘတ်ဂျက်ဖြစ်သော ရင်းဂစ် ၃၂၂ ဒသမ ၁ ဘီလီယံ ပမာဏကို ကျော်လွန်နေသည်။

အစ္စမေ ဆာဘရီ ယာယွတ် ဦးဆောင်သော အစိုးရသည် ၂၀၂၃ ခုနှစ်အတွက် ရင်းဂစ် ၃၇၂ ဒသမ ၃ ဘီလီယံ ဘတ်ဂျက်ကို ထုတ်ပြန်ခဲ့သော်လည်း ပြီးခဲ့သည့်နှစ် ၁၅ ကြိမ်မြောက် အထွေထွေရွေးကောက်ပွဲ ကျင်းပရေး အောက်လွှတ်တော်ကို ဖျက်သိမ်းလိုက်ခြင်းကြောင့် ယင်းသည် လွှတ်တော်၏ အတည်ပြုကို မရခဲ့ပေ။

 မလေးရှားက စားသောက်ဆိုင်တစ်ဆိုင်ကိုတွေ့ရစဉ်

နိုင်ငံသားအားလုံး အကျိုးရှိစေမည့် စီးပွားရေး တိုးတက်မှုကိုဖြစ်ရန် ရည်ရွယ်ချက်ဖြင့် အစိုးရသည် ၂၀၂၃ ခုနှစ် ဘတ်ဂျက်အတွက် ကျယ်ပြန့်သော ချည်းကပ်မှုကို လုပ်ဆောင်ခဲ့သည်ဟု အန်ဝါက သူ၏ မိန့်ခွန်းတွင် ပြောသည်။

တင်သွင်းခဲ့သော ၃၈၈ ဒသမ ၁ ဘီလီယံ ဘတ်ဂျက်တွင် ၂၈၉ ဒသမ ၁ ဘီလီယံသည် စီမံခန့်ခွဲရေး အသုံးစရိတ်၊ ၉၉ ဘီလီယံသည် ဖွံ့ဖြိုးတိုးတက်မှု အသုံးစရိတ်နှင့် ၂ ဘီလီယံသည် အရေးပေါ် အသုံးစရိတ် ဖြစ်သည်ဟုလည်း ၎င်းက ပြောသည်။

ပြီးခဲ့သည့် နှစ်တွင် ဖွံ့ဖြိုးတိုးတက်ရေးဆိုင်ရာ ဘတ်ဂျက်သည် ၇၁ ဒသမ ၆ ဘီလီယံရှိခဲ့သော်လည်း ယခုနှစ်တွင် ၉၇ ဘီလီယံအထိ မြှင့်တင်ထားသည်ဟု အန်ဝါက နှိုင်းယှဉ်ပြောဆိုခဲ့သည်။

ဝန်ကြီးဌာနများ၌ ပညာရေးဌာနသည် အများဆုံး အသုံးစရိတ်ကို ရရှိမည်ဖြစ်ပြီး ၅၅ ဒသမ ၂ ဘီလီယံဖြစ်ကာ ပြီးခဲ့သည့် ၅၂ ဒသမ ၆ ဘီလီယံထက် ပိုများသည်။

ကျန်းမာရေးဌာနသည်လည်း ပြီးခဲ့သည့်နှစ် ၃၂ ဒသမ ၄ ဘီလီယံထက် ပိုများသော ၃၆ ဒသမ ၃ ဘီလီယံ အသုံး စရိတ်ကို ရရှိမည်ဖြစ်သည်။

မလေးရှား လူစည်ကားရာ နေရာတစ်ခုကိုတွေ့ရစဉ်

၂၀၂၂ ခုနှစ်တွင် ၈ ဒသမ ၇ ရာခိုင်နှုန်း ရှိခဲ့သော နိုင်ငံ၏စီးပွားရေး ဖွံ့ဖြိုးတိုးတက်မှုသည် ၂၀၂၃ ခုနှစ်၌ ၄ ဒသမ ၅ ရာခိုင်နှုန်းသာရှိမည်ဟု ဘဏ္ဍာရေးဝန်ကြီး၏ လွှတ်တော်မိန့်ခွန်း မတိုင်ခင် ထုတ်ပြန်ခဲ့သော စီးပွားရေးနှင့် ဘဏ္ဍာ ရေးဆိုင်ရာ ထုတ်ပြန်ချက်တွင် ဖော်ပြထားသည်။

ငွေကြေးဖောင်ပွမှုနှုန်းသည် ပြီးခဲ့သည့်နှစ် နည်းတူ ၃ ဒသမ ၃ ရာခိုင်နှုန်းဆက် ရှိမည်ဟု ခန့်မှန်းထားပြီး ကမ္ဘာလုံး ဆိုင်ရာ ထောက်ပံ့ရေး အခြေအနေများကြောင့် ယင်းထက် ပို၍ ဆိုးရွားနိုင်သည်ဟုလည်း အန်ဝါက သတိပေး သည်။

ဘဏ္ဍာရေးဆိုင်ရာ လိုငွေပြမှုကို ၂၀၂၃ ခုနှစ်တွင် GDP ၏ ၅ ရာခိုင်နှုန်းအထိ လျှော့ချရန် ရည်ရွယ်ထားကြောင်း ပြီးခဲ့သည့် နှစ်တွင် ၅ ဒသမ ၆ ရာခိုင်နှုန်းရှိကြောင်း နှင့် ၂၀၂၅ ခုနှစ်တွင် ၃ ဒသမ ၂ ရာခိုင်နှုန်းအထိ လျှော့ကျရန် စီစဉ်ထားသည်ဟုလည်း အန်ဝါက ပြောသည်။

Source:CNA

CNI International News

မော်စကို၊ ဖေဖော်ဝါရီ ၁၁

ရုရှား၏ ရေနံထုတ်လုပ်မှုကို တစ်နေ့လျှင် စည် ၅၀၀၀၀၀(ငါးသိန်း) သို့မဟုတ် ထုတ်လုပ်မှု၏ ၅ ရာခိုင်နှုန်းကို မတ်လမှ စတင်လျှော့ချသွားမည်ဟု ရုရှားဒုတိယဝန်ကြီးချုပ် အလက်ဇန်းဒါး နိုဗက်ခ် (Alexander Novak) က ပြောကြောင်း ရိုက်တာသတင်းတွင် ဖော်ပြထားသည်။

ရုရှားသည် ဆော်ဒီပြီးနောက် ကမ္ဘာ့ ဒုတိယအကြီးမားဆုံး ရေနံတင်ပို့သူဖြစ်ကာ ထုတ်လုပ်မှု လျှော့ချမည့် သတင်း ကြောင့် Brent ရေနံဈေးကွက်တွင် ရေနံတစ်စည်လျှင် ၈၆ ဒသမ ၆ ဒေါ်လာထိ ၂ ဒသမ ၅ ရာခိုင်နှုန်း ကျော်မြင့် တက်သွားသည်။

ယနေ့တွင် ထုတ်လုပ်ထားသော ရေနံပမာဏအားလုံးကို ရောင်းချခဲ့ပြီး ဖြစ်သော်လည်း ပြောခဲ့သည့် အတက် ဈေးနှုန်း သတ်မှတ်ခြင်း (price cap) နည်းလမ်းများကို တိုက်ရိုက် သို့မဟုတ် သွယ်ဝိုက် ကျင့်သုံးသူများဆီ ရေနံ လုံးဝရောင်းချတော့မည် မဟုတ်ဟု နိုဗက်ခ်က ကြေညာချက် တစ်စောင် ထုတ်ပြန်ပြောကြားခဲ့သည်။

 ရေနံပိုက်လိုင်းကိုတွေ့ရစဉ်(GETTY IMAGES)

ထို့ကြောင့် လာမယ့် မတ်လတွင် ရုရှားသည် ကိုယ်ပိုင် သဘောထားဖြင့် ရေနံထုတ်လုပ်မှုကို စည် ၅၀၀၀၀၀ လျှော့ချသွားမည်ဖြစ်ကာ ယင်းက ဈေးကွက် အခြေအနေကို ပြန်လည် ထိန်းသိမ်းရန် အထောက်အကူ ဖြစ်စေလိမ့်မည်ဟု ၎င်းက ပြောသည်။

ရေနံထုတ်လုပ်မှုကို လျှော့ချခြင်းနှင့် ပတ်သက်သည့် ဆုံးဖြတ်ချက်အား OPEC + ရေနံထုတ်လုပ်သူများ အဖွဲ့ဝင် တစ်ချို့နှင့် ပြောဆိုဆွေးနွေးခဲ့ပြီး ဖြစ်သည်ဟု ရုရှားအစိုးရက သောကြာနေ့တွင် ပြောသည်။

ထုတ်လုပ်မှုကို ၎င်းတို့သဘောဆန္ဒဖြင့် လျှော့ချမည်ဖြစ်ခြင်းကြောင့် ထိုကိစ္စအပေါ် မည်သည့် တရားဝင် ဆွေးနွေး ညှိနှိုင်းမှုများ လုပ်ဆောင်ရခြင်း မရှိသေးဟု ရုရှားဘက်က နောက်ပိုင်းတွင် ပြောခဲ့သည်။

ထိုကိစ္စနှင့်ပတ်သက်၍ မည်သည့် ဆောင်ရွက်ချက်မှ လုပ်ဆောင်သွားရန် အစီအစဉ်မရှိဟု OPEC + နိုင်ငံနှစ်ခုက ပြောသည်။

ရေနံမှ ရရှိသော ဝင်ငွေကို ကန့်သတ်ရန် ကြိုးပမ်းမှုအဖြစ် အနောက်အုပ်စုက ချမှတ်သော ကန့်သတ်ချက်များ အောက်တွင် ရှိနေသည့် ရုရှားနိုင်ငံအတွက် ထုတ်လုပ်မှုလျှော့ချခြင်းက ဈေးနှုန်းသတ်မှတ်ခြင်းသည် ရုရှား၏ ရေနံထုတ်လုပ်မှုအပေါ် အကျိုးသက်ရောက်မှု ရှိသည်ကို ဖော်ပြနေသည်။

ရုရှားဒုတိယဝန်ကြီးချုပ် အလက်ဇန်းဒါး နိုဗက်ခ်ကိုတွေ့ရစဉ်(GETTY IMAGES)

ယူကရိန်းအပေါ် ရုရှား၏ ကျူးကျော်မှုနှင့် ပတ်သက်၍ ပိတ်ဆို့ အရေးယူမှု တစ်စိတ်တစ်ပိုင်းအဖြစ် တစ်စည်လျှင် ဒေါ်လာ ၆၀ ကျော် ဈေးပေါက်သော ရေကြောင်းမှလာသည့် ရုရှားရေနံများအတွက် အနောက်အုပ်စုမှ ထောက်ပံ့ သည့် ရေကြောင်း အာမခံ၊ ငွေကြေးနှင့် ကြားဝင် ဆောင်ရွက်ပေးမှု စသည်တို့ကို ဒီဇင်ဘာ ၅ ရက်မှ စတင်ကာ ပိတ်ပင်သွားရန် G7၊ အီးယူနှင့် သြစတြေးလျတို့က သဘောတူခဲ့သည်။

အီးယူအဖွဲ့သည် ဖေဖော်ဝါရီ ၅ ရက်မှ စတင်ကာ ရုရှားရေနံထွက် ပစ္စည်းများ ရောင်းချခြင်းကို ပိတ်ပင်ခြင်း၊ ဈေးနှုန်း သတ်မှတ်မှုကို ကျင့်သုံးခြင်း စသည်တို့ကို ချမှတ်ခဲ့သည်။

အပြန်အလှန်အနေဖြင့် ရုရှားဘက်ကလည်း ဈေးနှုန်းသတ်မှတ်ခြင်း လုပ်ငန်းစဉ်တွင် ပါဝင်နေသည့် သဘောတူညီ ချက်များကို ပိတ်ပင်ခဲ့သည်။

Source: Reuters

ဘဂ္ဂဒက်၊ဖေဖော်ဝါရီ - ၃

အမေရိကန်သည် အီရတ်နိုင်ငံပိုင် ဒေါ်လာများရရှိခွင့်ကို လပေါင်းများစွာ ကန့်သတ်ထားကြောင်း အေပီ သတင်းတွင် ဖော်ပြထားသည်။

ထို ကန့်သတ်ထားခြင်းကြောင့် အီရန်နှင့်ဆီးရီးယားတို့ကို အကျိုးဖြစ်ထွန်းစေသည့် ငွေကြေးခဝါချမှုများ ဖြစ်ပေါ် လာပြီး အီရတ်ကို ဖိနှိပ်နေသည့် အခြေအနေသို့ ရောက်ရှိအောင် လုပ်နေသည်ဟု အီရတ်အာဏာပိုင်များက ပြော သည်။

ထို့ကြောင့် အီရတ်တွင် ငွေကြေးတန်ဖိုးကျ ဆင်းလာခြင်း၊ ဝန်ကြီးချုပ်အပေါ် ပြည်သူများ၏ ဒေါသထွက်ခြင်း စသော ထိလွယ်ရှလွယ်သည့် အနေအထားသို့ ရောက်ရှိလာစေသည်။

အီရတ်နိုင်ငံသုံး ဒီနာငွေကြေး (Iraqi dinar) လဲလှယ်နှုန်းသည် တစ်ဒေါ်လာကို ၁၇၅၀ အထိ မြင့်တက်လာ ကြောင်း၊ ယခင်က ၁၄၆၀ သာရှိသည်။

ကြာသပတေးနေ့တွင် ဘဂ္ဂဒက်(Baghdad)ရှိ နိုင်ငံခြားငွေလဲ လုပ်ငန်းများကို ပိတ်ခဲ့ရပြီး ကာဒစ်စတန် (Kurdistan)ဒေသ အစိုးရသည်လည်း ဆူလိုင်မာနီယာ့ (Sulaimaniyah) ရှိ ငွေလဲကုမ္ပဏီများကို ငွေကြေး လွှဲပြောင်းမှု မလုပ်ရန် တားမြစ်ခဲ့သည်။

အီရတ် ငွေကြေး ဒီနာကိုတွေ့ရစဉ်(AP)

နိုင်ငံတွင်း ငွေမာ ရှားပါးမှုကို လျှော့ချရန် ဗဟိုဘဏ်အနေဖြင့် သီးသန့် ဖက်ဒရယ်ငွေဆိုင်ရာ လိုအပ်ချက်များကို ပြည့်မှီရမည်ဟု အီရတ်လွှတ်တော် ဘတ်ဂျက် ကော်မတီအဖွဲ့ဝင် တစ်ဦးက ပြောသည်။

ငွေကြေးအသုံးပြုခွင့် မြင့်တင်ရေး ပြည်တွင်း လုပ်ငန်းစဉ်များကို ထုတ်ပြန်မည်ဖြစ်ကာ ဆွေးနွေးညှိနှိုင်းမှုများ လုပ်ဆောင်ရန် အီရတ်ကိုယ်စားလှယ် အဖွဲ့တစ်ခုသည် သောကြာနေ့တွင် အမေရိကန်သို့ သွားရောက်မည်ဟု လည်း ၎င်းက ပြောသည်။

ငွေတန်ဖိုး ကျဆင်းလာခြင်းကြောင့် ဆန္ဒပြမှုများ ပေါ်ပေါက်ခဲ့ပြီး ဖြစ်သည်။ ထိုသို့ ဆက်ဖြစ်နေမည်ဆိုလျှင် ယင်းက အောက်တိုဘာလတွင် ဖွဲ့စည်းခဲ့သည့် အီရတ်အစိုးရ၏ လုပ်ပိုင်ခွင့်အတွက် စိန်ခေါ်မှု ဖြစ်စေနိုင်သည် ဟုလည်း လေ့လာသူများက သုံးသပ်သည်။

ရေနံဈေး မြင့်တက်လာမှုကြောင့် အီရတ်၏ နိုင်ငံခြား အရံငွေပမာဏသည် စံချိန်တင် အမြင့်ဆုံး အနေအထားတွင် ရှိနေသော်လည်း ဒီနာ(အီရတ်ငွေကြေး) တန်ဖိုးကျဆင်းမှုနှင့် ကြုံတွေ့နေရခြင်း ဖြစ်သည်။

သို့သော် ထိုငွေကြေးကို ရယူအသုံးပြုခွင့်တွင် အခက်အခဲများ ရှိနေသည်။ ၂၀၀၃ ခုနှစ် အမေရိကန် ကျူးကျော်မှု ကတည်းက အီရတ်၏ နိုင်ငံခြားအရံငွေများသည် အမေရိကန် ဗဟိုဘဏ်သို့ ရောက်ရှိသွားကာ အမေရိကန်ဘက် က အီရတ်၏ ဒေါ်လာ ဝင်ရောက်မှုကို သိသိသာသာ ထိန်းချုပ်ခွင့် ရရှိခဲ့သည်။

ငွေကြေးတန်ဖိုးကျဆင်း၍ အီရတ်မှာ မကျေမနပ်မှုများဖြစ်ပေါ်နေစဉ်(AP)

အီရတ်ဗဟိုဘဏ်က အမေရိကန်ထံမှ ဒေါ်လာများကို တောင်းယူကာ ယင်းတို့ကို ဒေါ်လာလေလံဟု ထင်ရှားသော လုပ်ငန်းစဉ်တွင် တရားဝင် ငွေလဲနှုန်းဖြင့် စီးပွားရေးဘဏ်များ၊ ငွေလဲလုပ်ငန်းများသို့ ရောင်းချရသည်။

ယခင်က ထိုသို့ လေလံဖြင့် ရောင်းချမှုသည် တစ်ခါတစ်ရံတွင် တစ်နေ့အတွင်း ဒေါ်လာသန်း ၂၀၀ ကျော်အထိ မြင့်တက်ခဲ့သည်။

အပြင်ပန်းအားဖြင့် လေလံတွင် ရောင်းချသော ဒေါ်လာအများစုသည် သွင်းကုန် ကုမ္ပဏီးများထံ ရောက်ရှိသွား သည်ဟု ယူဆနိုင်သော်လည်း ယင်းတွင် အားနည်းချက်များနှင့် အလွဲသုံးစားမှုများစွာ ရှိနေသည်ဟု အီရတ်ဘဏ် လုပ်ငန်းနှင့် နိုင်ငံရေးဆိုင်ရာ အရာရှိများက အေပီသို့ ပြောသည်။

Source: AP