- By CNI
- Category: စီးပွားရေး
- Hits: 1737
CNI News
၂၀၂၂ ခုနှစ်၊ ဇွန်လ ၁၆
ထိုင်းနိုင်ငံတွင် တစ်နိုင်ငံလုံးအတိုင်းအတာဖြင့် အလုပ်အကိုင် ၁၆ မျိုးမှ ကျွမ်းကျင်လုပ်သားများအား အခြေခံ လုပ်ခလစာ တိုးမြှင့်ပေးသည့်ထဲတွင် အောက်ခြေတွင် အလုပ်လုပ်ကိုင်နေသည့် မြန်မာအပါအဝင် ရွှေ့ပြောင်း အလုပ်သမားများ မပါကြောင်းသိရသည်။
၎င်း အခြေခံလုပ်ခလစာ တိုးမြှင့်သည့်အထဲတွင် အများစုသည် ထိုင်းနိုင်ငံသားများ လုပ်ကိုင်နေသည့် အလုပ်များ ဖြစ်ကာ မြန်မာအပါအဝင် ရွှေ့ပြောင်းအလုပ်သမားများကိုပါ တပြေးညီ အခြေခံလုပ်ခလစာ တိုးမြှင့်ပေးသင့် ကြောင်း မြန်မာရွှေ့ပြောင်းအလုပ်သမားအရေး ဆောင်ရွက်နေသည့် ကိုသားကြီးက CNI သတင်းဌာနသို့ ပြော သည်။
“ဇွန်လ ၉ ရက်နေ့ကထုတ်တဲ့ အလုပ်သမားအရေးနဲ့ ပတ်သက်ပြီးတော့ လုပ်ခလစာ တိုးမြှင့်ပေးရေးမှာ အထူး သဖြင့်တော့ ကျနော်တို့ မြင်တာကတော့ သူ့နိုင်ငံသားတွေ ဘွဲ့ရ ပညာတတ်တွေ စက်ရုံတွေ၊ ကုမ္ပဏီ အသီးသီးမှာ လုပ်တဲ့ တာဝန်ယူနေတဲ့၊ အစိုးရဝန်ထမ်းတွေမှာ လုပ်တဲ့သူတွေကိုလောက်ပဲ လုပ်ခ လစာတိုးပေးတဲ့ ပုံစံမျိုး ဖြစ် နေတယ်။ အောက်ခြေက အခြေခံလူတန်းစား ဥပမာ မြန်မာရှိမယ်၊ လာအို၊ ကမ္ဘောဒီးယား၊ အင်ဒိုနီးရှား ဒီနိုင်ငံ သားတွေ ထိုင်းထဲမှာ အလုပ်လုပ် နေတာတွေ ရှိတယ်။ ဆိုတော့ သူတို့တွေအတွက် လုပ်ခလစာ တိုးပေးမယ့် အနေအထားမျိုးကို မတွေ့ရဘူး။ အခြေခံလစာကို တိုးလိုက်တာနဲ့ ဒီအောက်ခြေမှာရှိတဲ့ နယ်ပယ်အသီးသီးက အလုပ်လုပ်နေတဲ့ အလုပ်သမားတွေ အားလုံးကိုလည်း တပြေးညီပဲ လုပ်အားခကို တိုးပေးသင့်တယ်”ဟု ပြောသည်။
ထိုင်းအာဏာပိုင်များ
နိုင်ငံတကာ အလုပ်သမားဥပဒေတွင် သက်ဆိုင်ရာ နိုင်ငံတစ်နိုင်ငံ၏ အလုပ်သမား လုပ်အားခနှင့်ပတ်သက်၍ ပြု ပြင် ပြောင်းလဲခြင်း၊ ပြင်ဆင်ခြင်းများ လုပ်ဆောင်ခဲ့ပါက ထိုနိုင်ငံရှိ အလုပ်သမားအားလုံး အကျိုးခံစားခွင့် ရှိရမည် ဟူ၍ ပါရှိသည်။
ထို့ကြောင့် ယခုကဲ့သို့ ထိုင်း အလုပ်သမားဝန်ကြီးဌာန၏ ယခုကဲ့သို့ လုပ်ဆောင်ချက်သည် တည်ဆဲဥပဒေအား ခွဲခြား ဆက်ဆံသည်ဟု အလုပ်သမားအရေး ဆောင်ရွက်နေသူများက ဝေဖန် သုံးသပ်မှုများ ရှိသည်။
ထိုင်းအာဏာပိုင်မှ အခြေခံ လုပ်ခလစာ တိုးမြှင့်ပေးသည့် အလုပ်အကိုင်များမှာ ဆောက်လုပ်ရေး အလုပ်အကိုင် ၅ မျိုး၊ လက်မှုပညာ အလုပ်အကိုင် ၄ မျိုးနှင့် ဝန်ဆောင်မှု အလုပ်အကိုင် ၇ မျိုး တို့ဖြစ်ကြောင်း၊ ထိုအထဲကမှ အလုပ် အကိုင် ၆ မျိုးတွင်သာ မြန်မာလုပ်သားများ လုပ်ကိုင်ခွင့် ရရှိထားခြင်း ဖြစ်ကြောင်း သိရသည်။
ထိုင်းနိုင်ငံတွင် မြန်မာ အပါအဝင် ရွှေ့ပြောင်း အလုပ်သမားများအား အခြေခံလုပ်ခလစာ မတိုးပေးသည့်အပြင် မြန်မာရွှေ့ပြောင်း အလုပ်သမားများသည် လုပ်ခလစာ အပြည့် မရခြင်းများနှင့်လည်း ရင်ဆိုင်နေရကြောင်း အလုပ် သမားအရေး ဆောင်ရွက်နေသူများနှင့် ရွှေ့ပြောင်းအလုပ်သမားများထံမှ သိရသည်။
ထိုင်းရောက် ရွှေ့ပြောင်းလုပ်သားများ
ထိုင်းတွင် အလုပ်လုပ်ကိုင်နေသည့် အလုပ်သမားတစ်ဦးက “သူတို့ အစိုးရအနေနဲ့ ကိုယ်တွေကို တိုးပေးမယ်ဆိုရင် တော့ အဆင်ပြေတာပေါ့။ ဒါပေမယ့် အခုချိန်မှာက ကျနော်တို့က ဘယ်လိုပြောမလဲ။ မိခင်မဲ့နေတဲ့ ရွှေ့ပြောင်း အလုပ်သမားတွေလို ဖြစ်နေကြတယ်။ လိုတာထက် ပိုတာတောင်မှ တောင်းလို့မရတဲ့ဟာတွေ ဖြစ်နေတာပေါ့နော်။ သူတို့ပေးမှ ကိုယ်တွေက ရမှာ။ သူတို့ကျွေးမှ ရမှာဖြစ်နေတဲ့ အနေအထားမျိုး ဖြစ်နေတာ” ဟု ပြောသည်။
ထိုင်းနိုင်ငံတွင် အခြေခံ လုပ်ခလစာသည် အလုပ်သမားတစ်ဦးအတွက် တစ်ရက်လျှင် ဘတ်ငွေ ၃၂၀ ခန့် သတ်မှတ် ကြောင်း၊ သို့သော် တချို့ စက်ရုံ၊ အလုပ်ရုံများတွင် ဘတ်ငွေ ၂၀၀ ကျော်သာ ရသူများရှိသကဲ့သို့ ၁၀၀ ကျော်သာ ရရှိသည့် အလုပ်သမားများလည်း ရှိကြောင်း သိရသည်။
ထို့နောက် ထိုင်းနိုင်ငံတွင် ကုန်ဈေးနှုန်း မြင့်တက်နေမှုများ ရှိသဖြင့် ယခုရရှိသည့် အခြေခံလုပ်ခလစာနှင့် အဆင် မပြေကြောင်း ထိုင်းရောက် မြန်မာအလုပ်သမားများမှ ပြောကြသည်။
လက်ရှိ အခြေခံလုပ်ခလစာ တိုးမြှင်ပေးရန် သတ်မှတ်လိုက်သည့် အလုပ်အကိုင် ၁၆ မျိုးတွင် အခြေခံ လုပ်ခလစာ အား တစ်ရက်လျှင် ဘတ် ၄၀၀ ကျော်မှ ၆၀၀ ကျော်အထိ တိုးမြှင့်ပေးလိုက်ခြင်း ဖြစ်သည်။
- By CNI
- Category: စီးပွားရေး
- Hits: 1361
CNI International News
နယူးဒေလီ၊ ဇွန်လ ၁၄
ယူကရိန်းစစ်ကြောင့် ရုရှားထံမှ စွမ်းအင်တင်သွင်းခြင်းကို ဥရောပသမဂ္ဂ(EU)နှင့် အခြား မဟာမိတ်နိုင်ငံများက ပိတ်ဆို့ ဖြတ်တောက်ခဲ့ပြီး ပြင်းထန်သော ဖိအားပေးနေသော်လည်း အာရှနိုင်ငံများက ရုရှားကို ဝင်ငွေတိုးစေခဲ့ ကြောင်း အေပီသတင်းဌာနက ရေးသားဖော်ပြသည်။
ထို့နောက် ယခုအခါ အိန္ဒိယနှင့် အခြား အာရှနိုင်ငံများသည် ရုရှားရေနံဖြင့် ဝင်ငွေရှာဖွေရန် အရေးပါသော အရင်း အမြစ်များ ဖြစ်လာနေသည်ဟု အေပီက ဆက်လက်ရေးသားထားသည်။
ဝါရှင်တန်(အမေရိကန်) ဦးဆောင်သော အနောက်အုပ်စု မဟာမိတ်နိုင်ငံများက မော်စကို(ရုရှား)၏ ကျူးကျော် စစ်ကို အကြောင်းပြုပြီး ငွေကြေး စီးဆင်းမှုကိုလည်း ကန့်သတ်သွားရန် ကြိုးစားနေချိန်၌ အထက်ပါအတိုင်း အာရှမှဝယ်ယူမှုများ ရှိနေ၍ ရုရှား ပို့ကုန်ဝင်ငွေများ ရရှိစေခဲ့သည်။
ရုရှားသည် ယူကရိန်းသို့ ကျူးကျော်စစ်ဖြင့် ဝင်ရောက်ပြီးနောက် ပြီးခဲ့သည့် မေလတွင် ပို့ကုန်ပမာဏ ကျဆင်း ခဲ့သော်လည်း ပထမရက် ၁၀၀ အတွင်း ရေနံစသည့် ရုပ်ကြွင်းလောင်စာတင်ပို့မှုမှ ယူရို ၉၃ ဘီလီယံ (ဒေါ်လာ ၉၇ ဒသမ ၄ ဘီလီယံ) ရရှိခဲ့ကြောင်း ဖင်လန်နိုင်ငံအခြေစိုက် စွမ်းအင်နှင့်သန့်ရှင်းလေထုသုတေသနဌာန၊ ဟယ်စင်ကီ (Helsinki) အစီရင်ခံစာထဲတွင် ဖော်ပြထားသည်။ အဆိုပါအစီရင်ခံစာကို ဇွန်လ ၁၂ ရက်က ထုတ်ပြန်ခဲ့ခြင်း ဖြစ်သည်။
အိန္ဒိယနိုင်ငံ မွမ်ဘိုင်းမြို့ရှိ စက်သုံးဆီဆိုင်တစ်ဆိုင်တွင် ဆိုင်ကယ်စီးသူတစ်ဦး ဆီဖြည့်နေစဉ်(ဓါတ်ပုံ-အေပီ)
“ရုပ်ကြွင်းတင်ပို့ရောင်းချခြင်းမှ ရသည့်ဝင်ငွေသည် ရုရှား၏ စစ်အင်အားတည်ဆောက်မှုနှင့် ရန်လိုတိုက်ခိုက်နိုင်မှု ၏ အဓိကအကြောင်းရင်းဖြစ်ပြီး ဖက်ဒရယ်အစိုးရဘတ်ဂျက်၏ ၄၀ ရာခိုင်နှုန်းကို ပံ့ပိုးပေးနေကြောင်း” ဟယ်စင် ကီ အစီရင်ခံစာ ပြုစုရာတွင်ပါဝင်ခဲ့သည့် လွတ်လပ်သောအတွေးအခေါ်ပညာရှင်တစ်ဦးက ပြောကြားခဲ့သည်။
လူဦးရေ ၁ ဒသမ ၄ ဘီလီယံရှိ၍ စွမ်းအင်ဆာလောင်နေသော အိန္ဒိယနိုင်ငံသည် ၂၀၂၂ ခုနှစ်တွင် ရုရှားရေနံစည် သန်း ၆၀ နီးပါး ဝယ်ယူခဲ့ရာ ၂၀၂၁ ခုနှစ်က ဝယ်ယူခဲ့သည့် စည်ပေါင်း ၁၂ သန်းနှင့် နှိုင်းယှဉ်ကြည့်နိုင်ကြောင်း ကုန်စည်အချက်အလက်ဆိုင်ရာကုမ္ပဏီတစ်ခုဖြစ်သည့် ကာပလာ (Kpler) ၏အဆိုအရ သိရသည်။ တရုတ် နိုင်ငံကဲ့သို့ အခြားအာရှနိုင်ငံများသို့လည်း ရုရှားတင်ပို့မှုမှာ မကြာသေးမီလများအတွင်း တိုးလာသော်လည်း အတိုင်းအတာတစ်ခုအထိတော့ နည်းပါးနေသေးသည်။
အေပီနှင့်အင်တာဗျူးတစ်ခုတွင် သီရိလင်္ကာဝန်ကြီးချုပ်က ရုရှားထံမှ ရေနံ ပိုမိုဝယ်ယူရန် တံခါးဖွင့်ထားကြောင်း ပြောကြားခဲ့ပြီးဖြစ်သည်။ ၎င်းနိုင်ငံသည် စီးပွားရေးအခြေအနေ အလွန်ဆိုးရွားနေပြီး တိုင်းပြည်လည်ပတ်နိုင်မည့် လောင်စာဆီ အသည်းအသန်ရှာဖွေနေရသည်။
မကြာသေးမီက အာဏာရလာခဲ့သော ရွေးကောက်ခံ ဖိလစ်ပိုင်သမ္မတ ဖာဒီနန်မားကို့စ်ဂျူနီယာထံသို့ ရုရှား သံအမတ် မာရက်ပက်ဗ်လော့က ဇွန်လ ၁၂ ရက်တွင် သွားရောက်တွေ့ဆုံခဲ့ပြီး ရေနံနှင့်သဘာဝဓာတ်ငွေ့ ပံ့ပိုးမည့် မော်စကို၏အကူအညီကို ကမ်းလှမ်းခဲ့သည်။
Source: AP
- By CNI
- Category: စီးပွားရေး
- Hits: 899
CNI International News
ကိုလံဘို၊ ဇွန်လ ၁၃
စီးပွားရေးအကျပ်အတည်းဆိုက်ရောက်နေသော ကျွန်းနိုင်ငံတစ်နိုင်ငံဖြစ်သည့် သီရိလင်္ကာတွင် လောင်စာဆီ အသည်းအသန်လိုက်လံရှာဖွေနေရချိန်၌ ရုရှားထံမှ ရေနံဝယ်ယူရန် အလားအလာကောင်းနေပြီး တံခါးဖွင့်မည် ဖြစ်ကြောင်း အသစ်ခန့်အပ်ခံရသော ဝန်ကြီးချုပ်က အေပီသတင်းဌာနသို့ ပြောကြားခဲ့သည်။
လောင်စာဆီအတွက် အခြားရင်းမြစ်များကို ဦးစွာကြည့်ရှုမည်ဖြစ်သော်လည်း မော်စကိုထံမှ ရေနံစိမ်းများ ပိုမို ဝယ်ယူနိုင်ရန် လမ်းဖွင့်ထားကြောင်း ဝန်ကြီးချုပ် ရာနေးလ်ဝစ်ကရီမီဆင်က ပြောကြားခဲ့သည်။
ယူကရိန်းစစ်ပွဲကြောင့် အနောက်အုပ်စုနိုင်ငံများက အရေးယူပိတ်ဆို့မှုများ ချမှတ်ခဲ့ပြီးနောက် ရုရှားထံမှ စွမ်းအင် တင်သွင်းခြင်းကို ဖြတ်တောက်ခဲ့သည်။
ဇွန်လ ၁၁ ရက်က ပြုလုပ်သည့် အေပီသတင်းဌာနနှင့် သီးသန့်အင်တာဗျူးတွင် ရာနေးလ်ဝစ်ကရီမီဆင်က “မိမိ နိုင်ငံတွင် ကြွေးမြီထူပြောနေသော်လည်း တရုတ်ထံမှ ငွေကြေးအကူအညီ ပိုမိုလက်ခံဖို့လည်း ဆန္ဒရှိနေကြောင်း” ပြောကြားခဲ့သည်။
သီရိလင်္ကာနိုင်ငံ၊ ကိုလံဘိုမြို့တွင် ရေနံဆီဝယ်ရရှိရန်မျှော်လင့်ချက်ဖြင့် လောင်စာဆီဆိုင်တစ်ဆိုင်တွင် ပြည်သူများ တန်းစီစောင့်ဆိုင်းနေစဉ်(ဓါတ်ပုံ-အေပီ)
သီရိလင်္ကာ၏လက်ရှိအကျပ်အတည်းသည် ကိုယ့်ကြမ္မာကိုယ်ဖန်တီးခြင်းဖြစ်သည်ဟု ၎င်းက ဝန်ခံခဲ့သော်လည်း ယူကရိန်းစစ် ပိုမိုပြင်းထန်နေသည့်အလျောက် စားနပ်ရိက္ခာအခက်အခဲမှာ ၂၀၂၄ ခုနှစ်အထိ ဆက်ရှိနေနိုင်ကြောင်း မှတ်ချက်ချခဲ့သည်။
ရုရှားသည် သီရိလင်္ကာထံသို့ ဂျုံတင်ပို့ရေးလည်း ကမ်းလှမ်းခဲ့ကြောင်း ၎င်းက ပြောကြားခဲ့သည်။
သီရိလင်္ကာ၏ ဘဏ္ဍာရေးဝန်ကြီးလည်းဖြစ်သည့် ဝစ်ကရီမီဆင်သည် မြို့တော်ကိုလံဘိုရှိ ၎င်း၏ရုံးခန်းတွင် အေပီ သတင်းဌာနနှင့်တွေ့ဆုံခဲ့ပြီး နိုင်ငံ၏ ၆ ကြိမ်မြောက် ဝန်ကြီးချုပ်တာဝန်ယူပြီးနောက် တစ်လအကြာတွင် ယင်း ကဲ့သို့ သတင်းဌာနတစ်ခုနှင့် တွေ့ဆုံခဲ့ခြင်းဖြစ်သည်။
ပြည်တွင်း၌ နိုင်ငံခြားအရန်ငွေကြေး ကင်းစင်လုနီးဖြစ်နေသည့် စီးပွားရေးအကျပ်အတည်းကို ဖြေရှင်းရန်အတွက် သမ္မတ ဂိုတာဘာယာရာဂျာပက်ဆာက ဝစ်ကရီမီဆင်ကို ဝန်ကြီးချုပ်အဖြစ် အသစ်ခန့်အပ်ခဲ့ခြင်းဖြင့် မကျေမနပ် ဖြစ်နေသော လူထုဒေါသကို ထိန်းသိမ်းခဲ့သည်။
သီရိလင်္ကာသည် နိုင်ငံခြားကြွေးမြီ ၅၁ ဘီလီယံရှိပြီး ယခုနှစ်အတွက် အကျေပေးချေရမည့် ဒေါ်လာ ၇ ဘီလီယံကို ပြန်မဆပ်နိုင်သေးဘဲ ဒေဝါလီခံခဲ့ရသည်။ အခြေခံစားသောက်ကုန်နှင့် လူသုံးကုန်များကို ဝယ်ယူတင်သွင်းရန် နိုင်ငံခြားငွေ မရှိတော့သဖြင့် အစားအစာ၊ လောင်စာဆီ၊ ဆေးဝါးမှသည် အိမ်သာသုံးစက္ကူနှင့်မီးခြစ်အထိ ပြတ်လပ် သွားခဲ့ရသည်။ လျှပ်စစ်မီးများ ပြတ်တောက်ခဲ့ပြီး ပြည်သူများမှာ မီးဖိုချောင်သုံးဓါတ်ငွေ့နှင့် ဓာတ်ဆီရဖို့ ရက်အတန်ကြာ တန်းစီးစောင့်ဆိုင်းခဲ့ရသည်။
Source: AP
- By CNI
- Category: စီးပွားရေး
- Hits: 705
CNI International News
မော်စကို၊ ဇွန်လ ၄
ယူကရိန်း ဆိပ်ကမ်းများ၌ မိုင်းများ ရှင်းလင်းပြီးလျှင် ယူကရိန်းစပါး၊ ကောက်ပဲ သီးနှံတင် သင်္ဘောများ အတားအဆီးမရှိ ဖြတ်သန်းသွားလာခွင့်ကို ရုရှား အာမခံကြောင်း၊ ဘက်ဒ်ယန်ဆက်နှင့် မာရီယူပေါလ်ကဲ့သို့ ရုရှားထိန်းချုပ်ထားသော ဆိပ်ကမ်း များမှ လုံခြုံစိတ်ချစွာ တင်ပို့နိုင်စေမည်ဖြစ်ကြောင်း Rossiya 1 ရုပ်သံလိုင်းနှင့် အင်တာဗျူးတွင် သမ္မတ ဗလာဒီမာပူတင်က ကတိပြုခဲ့သည်ဟု တာ့စ်သတင်းဌာနက ရေးသားဖော်ပြသည်။
ယူကရိန်း အစိုးရသည် ကုန်းလမ်းမှ ကောက်ပဲသီးနှံများ တင်ပို့ရောင်းချနိုင်ပြီး လက်တွေ့ အကျဆုံး နည်းလမ်းမှာ ဘယ်လာရုစ်နိုင်ငံ ဖြစ်သော်လည်း အနောက်အုပ်စုနိုင်ငံများ၏ ပိတ်ဆို့ အရေးယူမှုများကို ဖယ်ရှားပေးရမည်ဖြစ်ကြောင်း ပူတင်၏ အဆိုအရ သိရသည်။
ကမ္ဘာ့စားနပ်ရိက္ခာ ဈေးကွက်သည် ၂၀၂၀ ပြည့်နှစ်၊ ဖေဖော်ဝါရီလ ကတည်းက စတင်ခဲ့သော ပြဿနာများနှင့် စွမ်းအင် ပြဿနာများအပေါ် အခြေခံကြောင်း၊ အကြောင်းရင်းမှာ အနောက်အုပ်စု နိုင်ငံများ၏ အမြင်ကျဉ်းသည့် မူဝါဒကြောင့် ဖြစ် ကြောင်း ရုရှားသမ္မတ ပူတင်က ယခုအင်တာဗျူးတွင် ပြောကြားခဲ့သည်။
ကမ္ဘာ့ဈေးကွက် အတွင်းရှိ စားနပ်ရိက္ခာ ပြဿနာများနှင့် ပတ်သက်၍ ပူတင်က “ဥရောပနိုင်ငံများ၏ အမြင်ကျဉ်းမြောင်း သော မူဝါဒနှင့် စွမ်းအင် နယ်ပယ်အတွက် ပထမ သာဓကအဖြစ် ဥရောပကော်မရှင်၏ သဘောထားတို့အပေါ် မူတည်နေခဲ့ ကြောင်း” ဆက်လက် ပြောကြားခဲ့သည်။
ပူတင်နဲ့ Rossiya 1 TV channel အင်တာဗျူးနေစဉ်
“အဲဒီနေရာမှာ ဖြစ်ပေါ် တိုးတက်မှုတွေကို ကျနော်တို့ သတိပြုမိပါတယ်။ အမေရိကန်နဲ့ ဥရောပနိုင်ငံရေး အင်အားစုတွေဟာ ရာသီဥတု အခြေအနေနဲ့ ပတ်သက်လို့ ကမ္ဘာ့လူသားတွေရဲ့ ပကတိ စိုးရိမ်မှုတွေကိုလည်း ထည့်စဉ်းစားလာကြပြီဆိုတာ ကျနော်ကိုယ်တိုင် လက်ခံယုံကြည်ပါတယ်။ ရာသီဥတု ပြောင်းလဲမှုအတွက် စွမ်းအင်ကဏ္ဍ အပါအဝင် အခု ပြောပြောနေကြ တဲ့ အစိမ်းရောင် အစီအစဉ်ကို မြှင့်တင်နေကြပါတယ်” ဟု ပူတင်က ပြောကြားခဲ့သည်။
“အဲဒီနောက်မှာ ဥရောပနိုင်ငံတွေက သဘာဝဓာတ်ငွေ့ ဖြန့်ဖြူးအတွက် နှစ်ရှည် စာချုပ်တွေကို ထိန်းထားဖို့ ကျနော် အလေး အနက် တောင်းဆိုတာကို နားမထောင်ဘဲ ပိတ်ဆို့လိုက်ကြတယ်ဗျာ။ စာချုပ် အတော်များများက အသက်ဝင်နေသေးပေမယ့် သူတို့ဘက်က စပြီး ပိတ်တာလေ။ ဒါကလည်း အပျက်သဘောဆောင်တဲ့ သက်ရောက်မှုတွေ ရှိပါတယ်။ ဥရောပစွမ်းအင်ဈေး တက်လာတယ်လေ” ဟု ၎င်းက ဆက်လက် ပြောကြားခဲ့သည်။
ရုရှားသည် ယူကရိန်း၏ ဆန်စပါးနှင့်ဂျုံ တင်ပို့မှုများကို မဟန့်တားကြောင်း၊ တင်ပို့ရေးကို ပင်လယ်နက် ဒေသအတွင်းရှိ ဆိပ်ကမ်းများနှင့် အိမ်နီးချင်းနိုင်ငံများမှတဆင့် လုပ်ဆောင်နိုင်ကြောင်း ၎င်းက ထပ်လောင်း ပြောကြားခဲ့သည်။
“ယူကရိန်းရဲ့ ကောက်ပဲ သီးနှံ တင်ပို့မှုနဲ့ ပတ်သက်ပြီး ကျနော်တို့က အတားအဆီး မရှိပါဘူး” ဟု ပူတင်က အတိအလင်း ပြောကြားခဲ့သည်။
တင်ပို့ရေးအတွက် နည်းလမ်းများစွာရှိကြောင်း၊ ယူကရိန်းထိန်းချုပ်ထားသော ဆိပ်ကမ်းက တဆင့်ဖြစ်စေ၊ ဘက်ဒ်ယန်ဆက် နှင့် မာရီယူပေါလ်မြို့များမှ တဆင့်ဖြစ်စေ ဒင်းညုမြစ်ကြောင်းအတိုင်း ရိုမေးနီးယား၊ ဟန်ဂေရီနှင့် ပိုလန်တို့ကို ဖြတ်သန်း တင် ပို့ နိုင်ကြောင်း၊ အရိုးရှင်းဆုံးနှင့် လက်တွေ့အကျဆုံး လမ်းကြောင်းမှာ ဘယ်လာရုစ်နိုင်ငံကို ဖြတ်ပို့ရန် ဖြစ်သော်လည်း ထို လမ်းကြောင်းအတွက် အနောက်အုပ်စု ပိတ်ဆို့မှုများ ဖယ်ရှားပေးဖို့ လိုအပ်ကြောင်း ပူတင်က ရုပ်သံအင်တာဗျူးထဲ၌ အကျယ်တဝင့် ပြောကြားသွားခဲ့သည်။
Source: တာ့စ်သတင်းဌာန
- By CNI
- Category: စီးပွားရေး
- Hits: 1015
CNI International News
ဂျွန်ဟန်နက်ဘတ်၊ ဇွန်လ ၂
ယူကရိန်းသို့ ရုရှား၏ ကျူးကျော်စစ်နှင့် ဘရန့်(Brent) ရေနံစိမ်း ဈေးတက်၍ လောင်စာဆီ နှုန်းထားများ အဆမတန်ကြီးမြင့် လာခြင်း၏ ဆိုးကျိုးသက်ရောက်မှုကို တောင်အာဖရိကပြည်သူများ ခံစားနေကြရကြောင်း အေပီသတင်းဌာနက ရေးသား ဖော်ပြသည်။
တောင်အာဖရိကနိုင်ငံ၏ အိမ်နီးချင်း ဇင်ဘာဘွေနှင့် အခြား အာဖရိကနိုင်ငံများတွင် လောင်စာဆီ ဈေးတက်သည့် ဒဏ်ကို အလူးအလဲ ခံစားနေကြရသည်။ အာဖရိကတိုက်၏ စီးပွားရေး အဖွံ့ဖြိုးဆုံးဖြစ်သည့် တောင်အာဖရိက ဒေသတွင်း၌ သဘာဝ ဓါတ်ငွေ့ဈေးသည် တစ်လီတာလျှင် ၁ ဒသမ ၅၀ ဒေါ်လာ အထက်တွင် ရှိနေပြီး တစ်ဂါလံလျှင် ၅ ဒသမ ၈၀ ဒေါ်လာထက် ကြီးမြင့်နေသည်။
ဒီဇယ်ဈေးကလည်း အလားတူ ကြီးမြင့်လာခဲ့သည်။ သို့ဖြစ်၍ တောင်အာဖရိကတွင် လောင်စာဆီဈေးမှာ ယမန်နှစ်ကထက် ၄၀ ရာခိုင်နှုန်း တက်လာခဲ့သည်။ ဈေးနှုန်းကြီးမြင့်လာမှုကို ထိန်းထားနိုင်ရန်အတွက် အစိုးရက လောင်စာဆီ ရောင်းချမှုအပေါ် အခွန်လျှော့ပေးခဲ့သည်။
ထိုသို့ ဆီဈေးတက်ရခြင်းမှာ ဘရန့်ရေနံစိမ်း ဈေးကြောင့် ဖြစ်ကြောင်း အစိုးရက အကြောင်းပြခဲ့သည်။
တောင်အာဖရိက ဓာတ်ဆီဆိုင် တစ်ဆိုင်မှ ဈေးနှုန်း (AP)
လောင်စာဆီ ဈေးတက်မှုသည် အလုပ်လက်မဲ့ ရာခိုင်နှုန်း ၃၄ ဒသမ ၅ ရှိပြီး Covid-19 ကပ်ရောဂါကြောင့် အလုပ်အကိုင် ၂ သန်း ဆုံးရှုံးခဲ့ရသော တောင်အာဖရိကအတွက် စီးပွားရေး မပြေလည်ခြင်းအား တစ်ပူပေါ် နှစ်ပူဆင့်စေခဲ့သည်။
အစားအသောက်၊ လျှပ်စစ်မီးနှင့် သယ်ယူပို့ဆောင်ရေး စရိတ်များ တက်လာသဖြင့် စားသုံးသူများအတွက် ထိခိုက်နစ်နာမှုများ ယခုနှစ် တစ်နှစ်တာလုံးအတွက် နောက်ထပ် တိုးလာနိုင်စရာ ရှိကြောင်း စီးပွားရေးပညာရှင်များက သတိပေးထားသည်ဟု ဝစ်ဝါးတားစရင်းတက္ကသိုလ်မှ စီးပွားရေးပညာရှင် ပါမောက္ခ ဂျန်နီးရို့ဇိုက ပြောကြားခဲ့သည်။
စီးပွားရေး အကျပ်အတည်း တွေ့ကြုံနေရသော ဆင်းရဲသားများမှာ အကြီးမားဆုံး သက်ရောက်မှု ပိုမိုခံစားရမည်ဖြစ်ကြောင်း ၎င်းက ဆက်လက် ပြောကြားခဲ့သည်။
“အစိုးရအနေနဲ့ လောင်စာဆီအပေါ် အခွန်စည်းကြပ်မှု လျှော့ချလိုက်တာဟာ ဘဏ္ဍာတော် ကောက်ခံမှုအပေါ် အကျိုး သက် ရောက်မှု ရှိတာကြောင့် ကုန်ကျစရိတ်တွေ ဖြတ်တောက်ပြီး ချွေတာသုံးစွဲတဲ့ သဘောပါပဲ။ အစိုးရ သာမန်ပြည်သူတွေ မျှော်မှန်းထားတဲ့အတိုင်း လုပ်ဆောင်ရမှာ ဖြစ်တယ်” ဟု ၎င်းက မှတ်ချက်ချခဲ့သည်။
“ဈေးတက်တာတော့ မကြိုက်ဘူးဗျ။ တအားများလွန်းတယ်။ အခု ကလေးတွေ စားစရာဝယ်ဖို့ သိပ်ခက်တော့မှာ။ ဆီဖိုး မကုန် အောင် ကားတွေ ရောင်းရတော့မယ်ဗျာ” ဟု ဆော်ဝီတိုမြို့နယ်တွင် ယာဉ်မောင်းအဖြစ် လုပ်ကိုင်နေသူ မာဝီလက်မိုးကီက ပြောသည်။
ရုရှား-ယူကရိန်း စစ်ပွဲ(AFP)
မာဝီလက်မိုးကီသည် ကားထဲ ဆီဖြည့်ရန် ဓာတ်ဆီဆိုင်၌ ညဉ့်နက် သန်းခေါင်အထိ စောင့်ဆိုင်းတန်းစီရသည်။ တောင်အာဖရိကနိုင်ငံ၏ အိမ်နီးချင်းဖြစ်သော ဇင်ဘာဘွေတွင်လည်း လောင်စာဆီ ဈေးနှုန်းက အလားတူ တက်ခဲ့သည်။
ယူကရိန်းကို ရုရှားကျူးကျော်စစ် မစတင်မီကထက် ယခုအခါ ဓာတ်ဆီတစ်လီတာလျှင် ၁ ဒသမ ၇၀ ဒေါ်လာ ဈေးတက်ခဲ့ သည်။ ယူကရိန်းစစ်ပွဲကြောင့် ဈေးတက်ရသည်ဟု ဇင်ဘာဘွေအစိုးရက အသိအမှတ်ပြု ပြောကြားခဲ့သည်။
လောင်စာဆီဈေး ချပေးနိုင်ရန်အတွက် ဇင်ဘာဘွေတွင် ပြည်တွင်းဖြစ် အီသနောနှင့် မဖြစ်မနေ ရောနှောရသည့် သဘာဝ ဓာတ်ငွေ့ကို ပြန်သုံးဖို့ မိတ်ဆက်ရတော့သည်။ ဇွန်လ ၁ ရက်မှစတင်၍ ဓာတ်ဆီ ၂၀ ရာခိုင်နှုန်းကို အီသနော ရောစပ်ပြီးသား ဆိုင်ထုတ်ဈေးကို ၇ ဆင့်အထိ လျှော့ချမည်ဟု ဇင်ဘာဘွေ ပြန်ကြားရေးဝန်ကြီး မိုနီကာ မက်စဗန်ဂွါက ပြောကြားခဲ့သည်။
Source: AP
- By CNI
- Category: စီးပွားရေး
- Hits: 880
CNI International News
ဆစ်ဒနီ၊ မေလ ၃၀
အမေရိကန် ငွေကြေး တင်းကျပ်မှုများ နှေးကွေးသွားချိန်တွင် ဒေါ်လာဈေးသည် ရက်သတ္တပတ် ၅ ပတ်အတွင်း အနိမ့်ဆုံး ရှိနေခဲ့သော်လည်း အာရှစတော့ရှယ်ယာများမှာ မေလ ၃၀ ရက် (ယနေ့)၌ နယူးယောက်မြို့ရှိ ဗဟိုငွေကြေး ဈေးကွက်ဖြစ်သည့် Wall Street ၌ မြင့်တက်လာခဲ့ကြောင်း ရိုက်တာသတင်းအရ သိရသည်။
ပြီးခဲ့သည့် နှစ်လက lockdown ချခဲ့ခြင်းအား ရှန်ဟိုင်းအာဏာပိုင်များက ပြန်လည် ဖြေလျှော့ပေးပြီးနောက် ဇွန်လတစ်ရက်မှ စတင်၍ စီးပွားရေးလုပ်ငန်းများ တဖန်လည်ပတ်နိုင်ဖို့ အခြေအနေ တစ်ရပ်ကို ကြေညာခဲ့ရာ ဈေးကွက်အတွက် စိတ်သက်သာ စရာ ဖြစ်စေခဲ့သည်။
အမေရိကန်နိုင်ငံတွင် အောက်မေ့ဖွယ်ရာနေ့ အထိမ်းအမှတ် အားလပ်ရက်၌ ယခုလကုန် ဝယ်လိုအားအပေါ် အကန့်အသတ် ဖြင့်သာ ရှိစေခဲ့သော်လည်း ဂျပန်နိုင်ငံပြင်ပမှ အာရှ-ပစိဖိတ် အစုရှယ်ယာများ၏ အကျယ်ပြန်ဆုံး ညွှန်းကိန်း (.MIAP J0000 PUS) သည် သီတင်းပတ် ၃ ပတ်အတွင်း ၁ ဒသမ ၉ ရာခိုင်နှုန်း တက်လာခဲ့သည်။
ဂျပန် Nikkei (.N225) သည် ၂ ရာခိုင်နှုန်းနှင့် တောင်ကိုရီးယား (.KS11) သည် ၁ ဒသမ ၂ ရာခိုင်နှုန်း အသီးသီး တက်လာခဲ့သည်။ အလားတူ တရုတ် အပြာရောင်ချစ်ပ် (blue chips) (.CSI300) သည် သုညဒသမ ၇ ရာခိုင်နှုန်း ခိုင်မာလာခဲ့သည်။
အမေရိကန် ဒေါ်လာဈေးနှုန်း
အမေရိကန်တွင် ရင်းနှီးမြှုပ်နှံသူများသည် ဖက်ဒရယ် အရန်ငွေကြေးစနစ်ကို အရိပ်အမြွက်အားဖြင့် ဖမ်းဆုတ်နိုင်ခဲ့ပြီး နောက်ထပ် နှစ်လအတွင်း အလျင်အမြန် တိုးတက်မှုနှင့်အတူ ငွေကြေး တင်းကျပ်မှုများလည်း ပိုမိုနှေးကွေး သွားနိုင်သည်။
ဈေးကွက် တည်ငြိမ်လာခြင်းသည် ဒေါ်လာနှင့်ယန်းငွေများကို လုံခြုံစိတ်ချစွာ ပြန်လည် ကျဆင်းစေလာခဲ့သည်။ ယမန်နှစ်က အတိုးနှုန်းတက်ဖို့ အချက်ပြခဲ့သည့် ဥရောပဗဟိုဘဏ် (ECB) အရာရှိများသည် သဘောထား တင်းမာသည့် မှတ်ချက်များ ချမှတ်ခဲ့ပြီးနောက် ယူရိုငွေကြေးကို မြှင့်တင်ခဲ့ကြသည်။
“အမေရိကန်ရဲ့ စီးပွားရေး အချက်အလက်တွေ နှေးကွေးနေပုံ ရပါတယ်။ ECB အရာရှိတွေကို အတိုးနှုန်းတက်ဖို့ အခြေအတင် ဆွေးနွေး နေကြတုန်းပါ။ ရှေ့အရောက်ဆုံး နှုန်းထား ကွဲပြားမှုတွေက ယူရိုငွေကြေးအပေါ်မှာ လိုလိုလားလားနဲ့ လှုပ်ရှားလာ ကြပါတယ်” ဟု Goldman Sachs ဘဏ္ဍာစနစ်မှ သုတေသီ ဇာ့ချ်ပန်ဒယ်က မှတ်ချက်ချခဲ့သည်။
“ဥရောပမှာလည်း အလားတူ အားနည်းနေတာကြောင့် အမေရိကန် စီးပွားရေး သိသိသာသာ နှေးကွေးနေတာက ယူရိုငွေ ပြန်ရဖို့ ဖြစ်နိုင်ပါတယ်။ ဒါပေမယ့် အမေရိကန်ရဲ့ အချက်အလက်တွေက မျှော်လင့်ထားတာထက် ပိုကောင်းနေရင်တော့ ပြောင်း ပြန် ဖြစ်သွားလည်း ဟန်ချက်ညီမှာပါ” ဟု ၎င်းက ပြောကြားခဲ့သည်။
ရုရှားရေနံတင်ပို့မှု
ဒေါ်လာဈေး ပြန်ကျမှုက ရွှေကို မကြာသေးမီက အနိမ့်ဆုံး နေရာဖြစ်နေရာမှ ပြန်လည် အထောက်အကူ ပေးခဲ့ပြီး ရွှေ တစ်အောင်စကို ၁,၈၆၂ ဒေါ်လာဖြင့် အရောင်းအဝယ် ဖြစ်ခဲ့သည်။
အမေရိကန်၏ အရှိန်အဟုန်နှင့် ရုရှားရေနံစိမ်းကို လုံးဝ တားမြစ်ပိတ်ပင်ရန် ဥရောပနိုင်ငံများနှင့် ညှိနှိုင်းနေချိန်တွင် ပိုမို အားကောင်းသော ဝယ်လိုအားအတွက် မျှော်လင့်ထားမှုများကလည်း ရေနံစျေးနှုန်းများအပေါ် သက်ရောက်နေဆဲ ဖြစ်သည်။
ဥရောပသမဂ္ဂ(EU)သည် ရုရှား၏ ရေနံရောင်းချမှုအပေါ် သဘောတူပေးဖို့ မေလ ၂၉ ရက်တွင် ပျက်ကွက်ခဲ့သော်လည်း သံတမန် များကတော့ မေလ ၃၀ ရက်မှ ၃၁ ရက်အထိ ကျင်းပမည့် ထိပ်သီး အစည်းအဝေး မတိုင်မီ တိုးတက်မှု ရရှိအောင် ကြိုးစားနေကြသည်။
ဘရင့်ရေနံဈေး (Brent) သည် ဆင့် (cents) ၈၀ မှ ၁၂၀ ဒသမ ၂၃ ဒေါ်လာသို့ တက်ခဲ့ပြီး အမေရိကန် ရေနံစိမ်းမှာ တစ်စည် လျှင် ၁ ဒသမ ၇ ဒေါ်လာမှ ၁၁၅ ဒသမ ၁၄ ဒေါ်လာသို့ တက်ခဲ့သည်။
Source: Reuters
- By CNI
- Category: စီးပွားရေး
- Hits: 1622
CNI International News
၂၀၂၂ ခုနှစ်၊ မေလ ၂၇
ကော်လာပြာ (ဉာဏမဟုတ်သောအလုပ်) အတွက် လစာတော်တော်မြင့်ပေမယ့်၊ ဒီလိုဆွဲဆောင်မှုရှိတဲ့ အလုပ်ခေါ်မှုမျိုး ဖြစ် ပေမယ့် စင်ကာပူက အစားအသောက်နဲ့ အဖျော်ယမကာ လုပ်ငန်းရှင် တချို့ကတော့ ဒီရာထူးကို ထမ်းဆောင်လိုတဲ့ ဝန်ထမ်းရ ဖို့ မနည်းရုန်းကန်ပြီး ရှာဖွေနေရပါတယ်။
အောချက်လမ်းမ (Orchard Road) မှာရှိတဲ့ အီရှိနိုမာကီ အကင်နဲ့ဆာကေး (Grill & Sake) ဆိုင်ရဲ့ တွဲဖက်တည်ထောင်သူ ဖြစ် တဲ့ ချန်ဝေရှင်း (Chen Weixin) ကတော့ ဒီအလုပ်လုပ်ချင်တဲ့ လူတွေ ရှားနေတာမို့လို့ သူ့ဘာသာသူ လက်အိတ်စွပ်ပြီး ပန်းကန်ခွက်ယောက် ဆေးကြောနေရတယ်လို့ ရှင်မင်းနေ့စဉ် သတင်းစာကို ပြောပါတယ်။
တစ်ရက်ကို စင်ကာပူဒေါ်လာ ၅၀ ပိုပေးပါ့မယ်လို့ ပြောတာတောင် ပန်းကန်ဆေးချင်တဲ့ ဝန်ထမ်းဆိုလို့ ရောက်မလာကြဘူးလို့ သူက ဆက်ပြောပါတယ်။
“လူတော်တော်များများက ပန်းကန်ဆေးတဲ့ အလုပ်ကို နိမ့်ကြတယ်လို့ မြင်ကြတယ်။ ပိုက်ဆံများများ ပေးတာတောင်မှ မလုပ် ချင် ကြပုံရပါတယ်” ဟု ချန်ဝေရှင်းက ရှင်မင်းနေ့စဉ်ကို ရှင်းပြပါတယ်။
စားသောက်ဆိုင် လုပ်ငန်းရဲ့ ရှယ်ယာရှင်ဖြစ်တဲ့ ချန်ဝေရှင်းဟာ တစ်လကို ဒေါ်လာ ၃၅၀၀ (တက္ကသိုလ်ဘွဲ့ရ အချို့နဲ့ တန်းတူ လစာပမာဏ) ပေးပါ့မယ်လို့ သတင်းဖြန့်တော့မှ မလေးရှား လုပ်သားတစ်ဦးကို ရှာတွေ့နိုင်ခဲ့ပါတယ်။
အဲဒီလိုဝန်ထမ်းကို တစ်လကြာအောင် ရှာခဲ့ပေမယ့် စင်ကာပူနိုင်ငံသား ဘယ်သူကမှ လာမလုပ်ချင်ကြပါဘူး။ ကပ်ရောဂါ ကြောင့် စင်ကာပူသားတချို့ဟာ သူတို့ဇာတိမြေကို ပြန်လာခဲ့ကြပေမယ့် ဒီလိုအလုပ်မျိုး အတွက်တော့ နိုင်ငံခြားသား အလုပ် သမားတွေကိုပဲ အားကိုးရတယ်လို့ သူက ပြောပြပါတယ်။
စင်ကာပူက စားသောက်ဆိုင် တစ်ခုတွင် ဧည့်သည်များကို မှာမည့် အစားအသောက်ကို မေးမြန်းနေသူ
ဒီနှစ် မတ်လ ၂၉ ရက်ကတည်းက Covid-19 စည်းကမ်းတွေ ဖြေလျှော့ပေးလိုက်ပေမယ့် နိုင်ငံခြားသား အလုပ်သမားဆိုင်ရာ မူဝါဒတွေ တင်းကြပ်လာတာနဲ့အမျှ အလုပ်အကိုင် အကျပ်အတည်းတွေကတော့ စင်ကာပူမှာ ရှိနေတုန်းပါ။ ဒါပေမယ့် စင်ကာပူနိုင်ငံသား အနည်းအကျဉ်းလောက်ကပဲ ဒီလို အလုပ်ကြမ်းတွေကို လုပ်ချင်ကြပါတယ်။
တချို့ စားသောက်ဆိုင် လုပ်ငန်းတွေမှာဆိုရင် ပန်းကန်းဆေးစက်နဲ့ အလုပ်လုပ်ဖို့ တစ်လကို လစာ စင်ကာပူ ဒေါ်လာ ၄၀၀၀ နဲ့ ဘောနပ်စ်(အပိုဆုကြေး) ၃၀၀၀ လောက်အထိ ပေးနေရတယ်လို့ ရှင်မင်းနေ့စဉ် သတင်းစာက ဆက်လက် ရေးသားထား ပါတယ်။
“တစ်လကို စင်ကာပူဒေါ်လာ ၁၀၀၀ အထိ စွမ်းဆောင်ရည် ဆုကြေး ပေးပေမယ့်လည်း အခုအထိ ဝန်ထမ်းရှားပါးမှုနဲ့ ရင်ဆိုင် နေရတုန်းပါ” ဟု သူက ရင်ဖွင့်ပါတယ်။
နေးလ်လမ်းမဘေးက အိုင်ကီ စားသောက်ဆိုင်နှင့် ဘားလုပ်ငန်း တွဲဖက်ပိုင်ရှင် လမ်းဘတ်ချန်က အလုပ်ဆိုတာ တောင်းဆိုမှုနဲ့ ကြိုးစားအားထုတ်မှု နှစ်ခုစလုံးဖြစ်ကြောင်း Asai One မီဒီယာကို ပြောပါတယ်။ အဲဒါကြောင့် စင်ကာပူနိုင်ငံသား အနည်းစုက ပဲ ဒီအလုပ် လုပ်ချင်ကြတာမျိုးလို့ သူက ဆက်ပြောပါတယ်။
တန်လော့ (Tung Lok) စားတော်ဆက်တွေရဲ့ အမှုဆောင်အရာရှိချုပ် အင်ဒရူးတာ့ဂျိုးက အဲဒီလို ပန်းကန်ဆေး ဝန်ထမ်း ပြဿနာကို ဖြေရှင်းဖို့အတွက် ပြီးခဲ့တဲ့ ၁၀ နှစ် လောက်ကတည်းက သန့်ရှင်းရေးကုမ္ပဏီ တစ်ခုကို ငှားရမ်းလုပ်ကိုင်တယ်လို့ ပြောပါတယ်။
ငှားရမ်းလုပ်ကိုင်မှုအတွက် ကုမ္ပဏီကနေ လွှတ်ပေးတဲ့ အလုပ်သမားတစ်ဦးကို စင်ကာပူဒေါ်လာ ၃,၈၀၀ ကနေ ၄,၀၀၀ ကြား ပေးရတယ်လို့ ရှင်မင်းနေ့စဉ် သတင်းစာကို သူကပြောပြပါတယ်။
စင်ကာပူက စားသောက်ဆိုင်တစ်ခု
“သန့်ရှင်းရေးကုမ္ပဏီကို တခါတည်း ပိုက်ဆံပေးလိုက်တော့ ပန်းကန်ဆေးမယ့်သူ ဒီနေ့ရှိမှာလား၊ မနက်ဖြန် ကျမှလားဆိုပြီး စိုးရိမ်စရာ မရှိတော့ဘူးဗျာ” ဟု အင်ဒရူးတာ့ဂျိုးက ရှင်းပြသည်။
အခုဆိုရင် Covid-19 ကြောင့် စားသောက်ဆိုင်ထဲ ကန့်သတ်ချက်တွေ ရုပ်သိမ်းလိုက်တဲ့အတွက် လတ်တလော ကာလ အတွက် ပန်းကန်ဆေးဝန်ထမ်း ထပ်ခေါ်ဖို့ လိုနေတယ်လို့ သူက ဆက်ပြောပါတယ်။
လမ်းဘတ်ချန်ကတော့ သန့်ရှင်းရေး ကုမ္ပဏီတွေကနေ တဆင့် ဝန်ထမ်းခေါ်သုံးတာဟာ ကုန်ကျစရိတ် ပိုများလို့ သူ့အတွက် ရွေးချယ်ဖို့ အဆင်မပြေဘူးလို့ ရင်ဖွင့်ပါတယ်။
“ပန်းကန်ဆေးတဲ့ဝန်ထမ်း အပြောင်းအလဲက ခဏခဏ ကြုံရလွန်းလို့ သီးသန့် စံချိန်စံညွှန်းတွေလည်း မထားနိုင်တော့ပါဘူး ဗျာ” ဟု သူကပြောပါတယ်။
သူ့စားသောက်ဆိုင်မှာ လက်ရှိ ပန်းကန်ဆေး စက်တစ်လုံး၊ နိုင်ငံခြား အလုပ်သမားကို တစ်လလျှင် စင်ကာပူဒေါ်လာ ၂၇၀၀ ပေးပြီး ခန့်ထားရတယ်လို့ လမ်းဘတ်က ပြောပါတယ်။
တချို့သော သန့်ရှင်းရေး ကုမ္ပဏီများကတော့ သူတို့တောင်းတဲ့ စျေးနှုန်းက ၃၀ ရာခိုင်နှုန်းနီးပါးအထိ တက်သွားကြပါတယ်။ ချန်ဝေရှင်းတော့ မဖြစ်မနေ ဝန်ထမ်းလိုတဲ့အတွက် သန့်ရှင်းရေးကုမ္ပဏီ တစ်ခုကနေ သန့်ရှင်းရေး သမားတစ်ဦးအတွက် ဒေါ်လာ ၄၉၀၀ ပေးခဲ့ရလို့ မန်နေဂျာတစ်ဦးရဲ့ လစာနဲ့တန်းတူပဲလို့ ပြောပြပါတယ်။ လစာနှင့် ညီမျှသည်ဟု သူမက ပြောပြခဲ့ သည်။
သန့်ရှင်းရေးကုမ္ပဏီ သူမရဲ့ စားသောက်ဆိုင် အရွယ်အစားကြောင့် အလုပ်သမား သုံးဦးကို ငှားရမ်းပေးဖို့ တောင်းဆိုခဲ့သည်။
“ဒါက ပန်းကန်ဆေးဖို့ကိစ္စ တစ်ခုအတွက် တစ်လကို စင်ကာပူဒေါ်လာ တစ်သောင်းခွဲနီးပါး အကုန်ခံရမယ်လို့ ဆိုလိုတဲ့ သဘောပါ” ဟု သူမက တွက်ချက်ပြသည်။
ပန်းကန်ဆေးဝန်ထမ်း ငှားရမ်းခြင်းဟာ ၂၀၁၂ ခုနှစ်တုန်းကဆိုရင် စင်ကာပူဒေါ်လာ ၃၀၀၀ တောင်းတဲ့အထိ အခက်အခဲတွေနဲ့ ရင်ဆိုင်ခဲ့ဖူးပါတယ်။
ပြီးခဲ့သည့်လက သြစတြေးလျနိုင်ငံ၊ မဲလ်ဘုန်းမြို့က မလေးရှား စားသောက်ဆိုင် တစ်ဆိုင်မှာဆိုရင် စားဖိုမှူးတစ်ဦးကို တစ်လ လျှင် စင်ကာပူဒေါ်လာ ၅၅၀၀ နဲ့ ကမ်းလှမ်းခဲ့တာ ရှိပါတယ်။
Source: Asia One
- By CNI
- Category: စီးပွားရေး
- Hits: 968
CNI News
၂၀၂၂ ခုနှစ်၊ မေ ၁၂
ရခိုင်ပြည်နယ်နှင့် ဘင်္ဂလားဒေ့ရှ်နိုင်ငံ ကုန်သွယ်မှုပြုလုပ်နေသည့် နယ်စပ်ကုန်သွယ်ရေးစခန်းတစ်ခုဖြစ်သည့် မောင်တောမြို့နယ်ရှိ ကညင်ချောင်းစီးပွားရေးဇုန်လမ်းပိုင်းသည် ပြီးခဲ့သည့်နှစ် မိုးရာသီတွင် လမ်းပိုင်းပျက်စီးနေမှု ဖြစ်ပေါ်ခဲ့ရာတွင် ဇုန်တာဝန်ရှိသူများအနေဖြင့် ကျောက်သားလမ်းသာ ခင်းပေးထားခဲ့သည့်အတွက် ယခုတွင် မိုးရွာ သွန်းထားခြင်းကြောင့် လမ်းပိုင်း စတင်ပျက်စီးလာပြီဟု ကုန်သည်များထံမှ သိရသည်။
ကညင်ချောင်း စီးပွားရေးဇုန်လမ်းပိုင်း ပျက်စီးနေမှုကို ကုန်သည်များနှင့် လုပ်ငန်းရှင်များ၊ သက်ဆိုင်ရာ တာဝန် ရှိသူများအနေဖြင့် အစိုးရပိုင်းဆိုင်ရာ အစည်းအဝေးများတွင် ပြန်လည်ပြုပြင်မည်ဟု ပြောဆိုမှုများ ရှိသော်လည်း လက်တွေ့တွင် ယခုအချိန်ထိ ပြင်ဆင်ထားခြင်း မရှိကြောင်း မောင်တောနယ်စပ်ကုန်သည်ကြီးများအသင်း ဒုတိယဥက္ကဋ္ဌ ဦးအောင်စံသိန်းက CNI သတင်းဌာနသို့ ပြောသည်။
“ဘာမှ မလုပ်သေးဘူးတဲ့။ အခု မိုးရွာလို့ လမ်းတွေ ကားသွားတာ တအားဆိုးတယ်လို့ ပြောတယ်။ လေမုန်တိုင်း ရှိလို့ မိုးရွာတာ နှစ်ရက်၊ သုံးရက်ရှိပြီ။ အစည်းအဝေးထဲမှာလည်း ထိုင်ပြီးတော့ လုပ်ပေးမယ် ဘာညာဆိုတော့ အခုက နောက်လဆို မိုးရောက်ပြီလေ။ ကျနော်လည်း ဟိုကို (ကညင်ချောင်းစီးပွားရေးဇုန်) မသွားတာ နည်းနည်း ကြာပြီလေ။ အလုပ်လုပ်မယ်ဆိုတော့ ခုနက ရုံးက အတွင်းရေးမှူးကို ဖုန်းခေါ်တော့လေ အဝင်အထွက် ဆိုးတာ ဘာမှ မလုပ်ပေးဘူးတဲ့” ဟု ပြောသည်။
ပြီးခဲ့သည့်နှစ်များတွင် ကညင်ချောင်းစီးပွားရေးဇုန် လမ်းပိုင်း ပျက်စီးနေမှုကို ပြေလည်စေရန်အတွက် ကျောက်များကို ခင်းကျင်းပေးထားခြင်းကြောင့် လတ်တလောတွင် သွားလာ၍ အဆင်ပြေနေသော်လည်း ကားအဝင်အထွက် များသည့်အခါမျိုးနှင့် မိုးရွာသွန်းမှု များပြားလာသည့်အချိန်မျိုးတွင် ဖြစ်ပေါ်လာမည့် အခြေအနေကို စောင့်ကြည့်ရမည်ဟု မောင်တောကုန်သည်တစ်ဦးဖြစ်သူ ဦးအောင်နိုင်က ပြောသည်။
“လောလောဆယ် အဝင်အထွက် အဆင်ပြေပါတယ်။ တကယ် ၇ လပိုင်း၊ ၈ လပိုင်းတို့ မိုးအများကြီး ရွာသွားတဲ့အချိန်မှာ ဘယ်လိုရှိမယ် ကြည့်ရမှာပေါ့။ လောလောဆယ် အဆင်ပြေပါတယ်။ မိုးအများကြီး ရွာတဲ့အချိန်မှာ နစ်မလား တစ်ချက် ကြည့်ရမှာပေါ့” ဟု CNI သတင်းဌာနသို့ ပြောသည်။
မိုးရာသီကာလမျိုးတွင် ကညင်ချောင်း စီးပွားရေးဇုန်၌ ကုန်သွယ်မှု ပြုလုပ်၍ မရလျှင် အမှတ် (၁) အဝင် အထွက်စခန်း POE သို့ ပြောင်းလဲ ကုန်သွယ်ရန် စဉ်းစားနေကြောင်း ဦးအောင်နိုင်က CNI သို့ ပြောသည်။
“ကားလည်း အဝင်အထွက် ဒီအတိုင်း ပုံမှန်ရှိမယ်ဆိုရင် မိုးလည်း ဒီထက်များလာရင် လမ်းမှာ နစ်သွားမလား။ ကျနော်တို့လည်း စဉ်းစားနေတာပေါ့။ ၇ လပိုင်း၊ ၈ လပိုင်းမှာ ကားအဝင်အထွက် အဆင်မပြေရင် ဟိုဘက် (POE) ရွှေ့ရမလားပေါ့” ဟု ပြောသည်။
POE ဆိပ်ကမ်းသည် ဒီရေ အတက်အကျကို စောင့်ဆိုင်းရခြင်း၊ သင်္ဘောများ ဝင်ရောက်၍ မရခြင်းနှင့် စက်လှေ များဖြင့် ကုန်သွယ်ရမည် ဖြစ်ခြင်းတို့ကြောင့် အဆိုပါ ဆိပ်ကမ်းတွင် ကုန်သွယ်မှု လုပ်ဆောင်ရမည်ဆိုပါက ကုန်စည်စီးဆင်းမှု နှေးကွေးသွားနိုင်သည်ဟု ကုန်သည်များက ပြောသည်။
ကညင်ချောင်းစီးပွားရေးဇုန်အား ၂၀၁၅ - ၂၀၁၆ ဘဏ္ဍာနှစ်မှ စတင်ကာ ကုန်သွယ်ရေးဇုန်အဖြစ် ပြည်နယ်အစိုးရနှင့် ကညင်ချောင်းစီးပွားရေးဖွံ့ဖြိုးတိုးတက်ရေး ကုမ္ပဏီလီမိတက်တို့ ပူးပေါင်းကာ အကောင်အထည်ဖော် လုပ်ဆောင်ထားခြင်း ဖြစ်သည်။
အစိုးရမှ ငွေကျပ် သိန်းပေါင်း ၂၅၀၀၀ နှင့် ပုဂ္ဂလိကဖက်မှ ငွေကျပ် သိန်းပေါင်း ၁၃၄၀၀၊ စုစုပေါင်း ငွေကျပ် ၃၈၄၀၀ အကုန်ကျခံ လုပ်ဆောင်ခဲ့ခြင်း ဖြစ်သည်။
မောင်တောမြို့နယ်တွင် ဘင်္ဂလားဒေ့ရှ်နိုင်ငံနှင့် ကုန်သွယ်မှု ပြုလုပ်နေသည့် ကညင်ချောင်း စီးပွားရေးဇုန်နှင့် အမှတ်(၁)အဝင်အထွက်စခန်း (POE) ဟူ၍ ကုန်သွယ်ရေးစခန်း နှစ်ခု ရှိသည်။
- By CNI
- Category: စီးပွားရေး
- Hits: 740
CNI International News
တိုကျို၊ မေလ ၂
အရှေ့တောင်အာရှဒေသတွင်းရှိ မြန်မာနိုင်ငံတွင် နိုင်ငံရေး မတည်ငြိမ်မှုများကြောင့် ဂျပန်စွမ်းအင်ကုမ္ပဏီကြီး တစ်ခုဖြစ်သော ENEOS Holdings Inc. သည် လက်ရှိလုပ်ကိုင်နေသည့် သဘာဝဓာတ်ငွေ့စီမံကိန်းကို ကျောခိုင်းထွက်ခွာတော့မည်ဟု မေလ ၂ ရက် (ယနေ့) ကြေညာခဲ့ကြောင်း ကျိုဒိုသတင်းဌာနက ရေးသားဖော်ပြသည်။
ENEOS လက်အောက်ရှိ JX နိပွန်ရေနံနှင့် သဘာဝဓာတ်ငွေ့ ရှာဖွေရေး ကော်ပိုရေးရှင်းသည် မြန်မာနိုင်ငံရှိ ရဲတံခွန် ဓာတ်ငွေ့ စီမံကိန်းရှိ ၎င်း၏ စီးပွားရေး မိတ်ဖက်များကို ကျောခိုင်းထွက်ခွာမည့်အကြောင်း ဆုံးဖြတ်ချက်အား ဧပြီ ၂၉ ရက်တွင် အသိ ပေးခဲ့ကြောင်း ENEOS ၏ ထုတ်ပြန်ချက်တွင် ဖော်ပြထားသည်။
အဆိုပါ စီမံကိန်းတွင် အစုရှယ်ယာ ၁၉ ဒသမ ၃ ရာခိုင်နှုန်း ပိုင်ဆိုင်သည့် JX နိပွန်သည် လူမှုရေးဆိုင်ရာ ပြဿနာများ အပါ အဝင် မြန်မာနိုင်ငံ၏ လက်ရှိ အခြေအနေနှင့် ဓာတ်ငွေ့ လုပ်ငန်းနယ်ပယ်၏ နည်းပညာဆိုင်ရာ အကဲဖြတ်ချက်ကို အခြေခံ လျက် စီမံကိန်းစီးပွားရေးကို ထည့်သွင်းစဉ်းစားခဲ့ကြောင်း ENEOS က ဆက်လက် ပြောကြားခဲ့သည်။
၂၀၂၁ ခုနှစ်၊ ဖေဖော်ဝါရီလတွင် စစ်တပ်က အာဏာသိမ်း၍ ဒေါ်အောင်ဆန်းစုကြည် ဦးဆောင်သော ရွေးကောက်ခံ အရပ်သား အစိုးရကို ဖြုတ်ချလိုက်ပြီးနောက် ENEOS သည် မြန်မာနိုင်ငံမှ နောက်ဆုံး ထွက်ခွာသွားသည့် ဂျပန်စွမ်းအင်ကုမ္ပဏီ ဖြစ်လာခဲ့ သည်။
ယခုနှစ်ဆန်းပိုင်း ဖေဖော်ဝါရီလကလည်း ကီရင် (Kirin Holdings) ကုမ္ပဏီသည် မြန်မာပြည်တွင်း စစ်တပ်နှင့် ဆက်စပ်သည့် အဖွဲ့အစည်းတစ်ခုနှင့် စီးပွားရေး ပူးပေါင်း ဆောင်ရွက်မှုများကို အဆောတလျင် အဆုံးသတ်ဖို့ မြန်မာနိုင်ငံရှိ ဘီယာဈေးကွက် မှ ထွက်ခွာသွားကြောင်း ကြေညာခဲ့သည်။
ယခု စွမ်းအင်ကုမ္ပဏီတစ်ခု၏ ကျောခိုင်းထွက်ခွာမှုသည် မြန်မာအာဏာပိုင်များထံမှ ခွင့်ပြုချက်ရပြီးလျှင် ထွက်ခွာမှု လက် တွေ့ အကျိုးသက်ရောက်ခြင်း ရှိမည်ဟု ENEOS ထုတ်ပြန်ချက်ထဲတွင် ဆက်လက် ရေးသားထားသည်။
ယခုကဲ့သို့ ထွက်ခွာသွားမှုအတွက် ကုမ္ပဏီအပေါ် ထိခိုက်စေခြင်းမှာ အနည်းငယ်သာ ရှိမည်ဟု ၎င်းထုတ်ပြန်ချက်အရ သိရသည်။
Source: Kyodo News Agency
- By CNI
- Category: စီးပွားရေး
- Hits: 763
CNI International News
ကိုလံဘို၊ ဧပြီ ၁၉
ဆယ်စုနှစ်များစွာအတွင်း တိုင်းပြည်စီးပွားရေး အကျပ်ရိုက်စေခဲ့သော အမှားများကို မိမိကျူးလွန်မိခဲ့ကြောင်း၊ ပြုပြင်ပြောင်းလဲ ရေး ဆက်လက် လုပ်ဆောင်သွားမည်ဖြစ်ကြောင်း သီရိလင်္ကာသမ္မတက ဧပြီ ၁၈ ရက်၌ ဝန်ခံပြောကြားခဲ့ဟု အေပီသတင်း အရ သိရသည်။
သမ္မတ ဂိုတာဘာ ယာရာဂျာပတ်ဆာသည် ဧပြီ ၁၈ ရက်၌ ၎င်းခန့်အပ်လိုက်သော အစိုးရအဖွဲ့ဝင် ဝန်ကြီးအသစ် ၁၇ ဦး ကျမ်းသစ္စာ ကျိန်ဆိုပွဲ၌ တိုင်းပြည်၏ ဆိုးရွားလှသော စီးပွားရေး အကျပ်အတည်းမှ ရုန်းထွက်နိုင်အောင် ကြိုးပမ်းနေကြောင်း ဝန်ခံ ကတိပြုခဲ့သည်။
သီရိလင်္ကာနိုင်ငံသည် ယခုနှစ်အတွင်း ပြန်ဆပ်ရမည့် နိုင်ငံခြားကြွေးမြီ စုစုပေါင်း ၂၅ ဘီလီယံအနက် ဒေါ်လာ ၇ ဘီလီယံ နီးပါးဖြင့် ဒေဝါလီခံခဲ့ရသည်။ နိုင်ငံခြားငွေ ပြတ်လပ်မှု ဆိုးရွားလာခြင်းကြောင့် ပြည်ပမှ တင်သွင်းသည့်ကုန်ပစ္စည်းကို အလုံ အလောက် ဝယ်ယူရန် အခက်အခဲလည်း ရှိနေသည်။
ပြည်သူများသည် အစားအသောက်၊ မီးဖိုချောင်သုံးဓါတ်ငွေ့၊ လောင်စာဆီနှင့် ဆေးဝါးစသည့် မရှိမဖြစ် ကုန်ပစ္စည်းများ လနှင့် ချီ၍ ပြတ်လပ်ခဲ့မှုကို ကြံ့ကြံ့ခံနေထိုင်ခဲ့ရပြီး အကန့်အသတ်ဖြစ် ကျန်ရှိသည့် အသုံးအဆောင်များကို ဝယ်ယူနိုင်ရေး နာရီပေါင်း များစွာ တန်းစီစောင့်ဆိုင်းခဲ့ရသည်။
လောင်စာဆီ မလောက်လို့ တန်းစီစောင့်နေကြ
“ပြီးခဲ့တဲ့ နှစ်နှစ်ခွဲအတွင်းမှာ ကျနော်တို့ဟာ ကြီးမားတဲ့ စိန်ခေါ်မှုတွေနဲ့ ရင်ဆိုင်ခဲ့ရပါတယ်။ အဲဒီလို ရင်ဆိုင်ခဲ့ရတာဟာ Covid-19 ကပ်ရောဂါအပြင် ကြွေးမြီဝန်ထုပ်ဝန်ပိုးနဲ့ ကျနော်တို့ဘက်က အမှားတချို့ကြောင့်ပါ” ဟု ယာရာဂျာပတ်ဆာက ပြောကြားခဲ့သည်။
“ဒါတွေကို ပြုပြင်ဖို့ လိုပါတယ်။ ပြင်ဆင်ပြီး ရှေ့ဆက်သွားရပါလိမ့်မယ်။ ပြည်သူတွေရဲ့ ယုံကြည်မှု ပြန်ရဖို့ လိုပါတယ်” ဟု ၎င်းက ဆက်လက် ပြောကြားခဲ့သည်။
မိမိတို့အစိုးရအနေဖြင့် နိုင်ငံတကာငွေကြေးရန်ပုံငွေအဖွဲ့ (IMF) ထံသို့ အဆောတလျင် ချဉ်းကပ်သင့်ကြောင်း၊ သီရိလင်္ကာ စိုက်ပျိုးရေးကဏ္ဍကို အပြည့်အဝ အော်ဂဲနစ်ကြိုးပမ်းရာ၌ ဓာတုဆေးသုံး ဓာတ်မြေဩဇာ တားမြစ်ပိတ်ပင်ခြင်းမျိုး မပြုလုပ် သင့်ကြောင်း သီရိလင်္ကာသမ္မတ ယာရာဂျာပတ်ဆာ ထပ်လောင်းပြောကြားခဲ့သည်။
ပြည်ပမှ တင်သွင်းလာသော ဓာတ်မြေဩဇာများကို ပိတ်ပင်ခြင်းသည် နိုင်ငံခြားငွေကြေး ကိုင်ဆောင်မှုကို ထိန်းရန်နှင့် တောင်သူများကို ဆိုးဆိုးရွားရွား ထိခိုက်စေရန် ရည်ရွယ်ကြောင်း ဝေဖန်သုံးသပ်သူများက ပြောကြသည်။
ငွေကြေး တစ်စုံတစ်ရာ အာမခံမပါဝင်ဘဲ အခြေခံ အဆောက်အဦ စီမံကိန်းများအတွက် ပြည်ပချေးငွေ အများအပြား ယူခဲ့ခြင်းအပေါ် သီရိလင်္ကာအစိုးရကို အပြစ်တင် ဝေဖန်စရာ တိုးလာခဲ့သည်။
စားနပ်ရိက္ခာပြတ်လပ်မှုကြောင့် ဒေါသထွက်နေကြစဉ်
“ဒီကနေ့ စီးပွားရေး အကျပ်အတည်းကြောင့် ပြည်သူတွေ ဖိစီးခံနေရပါတယ်။ အဲဒီလို အခြေအနေ ဖြစ်သွားတာ ကျနော် တကယ့်ကို နောင်တရမိတယ်” ဟု သမ္မတ ယာရာဂျာပတ်ဆာက တောင်းပန်ခဲ့သည်။
ပြည်သူများအနေဖြင့် ဈေးနှုန်းကြီးမားလှသော မရှိမဖြစ် လိုအပ်သည့် ပစ္စည်းများရရှိရန် တန်းစီစောင့်ဆိုင်းရသော ဒုက္ခကြောင့် ဒေါသဖြစ်နေကြခြင်းမှာလည်း တရားနည်းလမ်းကျပါကြောင်း ၎င်းက ဆက်လက်ပြောကြားခဲ့သည်။
လောင်စာဆီနှင့် စားနပ်ရိက္ခာ ပြတ်လပ်မှုကြောင့် ရက်သတ္တပတ် အတန်ကြာ ဆန္ဒပြမှုများ ဖြစ်ပွားခဲ့ရာ သမ္မတနှင့် အစိုးရအဖွဲ့ဝင် ဝန်ကြီးများ နုတ်ထွက်ကြဖို့ တောင်းဆိုခဲ့ကြပြီးနောက် သမ္မတက အာဏာဆက်လက် ဆုတ်ကိုင်ထားခဲ့ပြီး ၎င်းအစိုးရအဖွဲ့အတွင်း ဝန်ကြီးအသစ်များ အစားထိုးခန့်အပ်၍ အပြောင်းအလဲပြုလုပ်ခဲ့သည်။
Source: AP