CNI News

၂၀၂၂ ခုနှစ်၊ စက်တင်ဘာ ၂၂

ရုရှားငွေပေးချေရေး MIR card စနစ်ကို မြန်မာနိုင်ငံတွင် အသုံးပြုနိုင်ရန်နှင့် ရုရှားရူဘယ်နှင့် မြန်မာကျပ်ငွေကို တိုက်ရိုက် လဲလှယ်အသုံးပြုနိုင်ရန် နစက-က ဆောင်ရွက်နေကြောင်း ပြီးခဲ့သည့် စက်တင်ဘာ ၂၀ ရက်နေ့မှာ ကျင်းပသည့် သတင်းစာရှင်းလင်းပွဲတွင် ပြောကြားခဲ့သည်။

MIR Card အသုံးပြုခြင်းနှင့် ပတ်သက်ပြီး ရေတိုတွင် အကျိုးသက်ရောက်မှု သိပ်မရှိသေးသော်လည်း ရေရှည်တွင် ရုရှားမှ ရင်းနှီးမြှုပ်နှံမှု ဝင်ရောက်လာမည့် အခြေအနေပေါ် မူတည်ပြီး အကျိုးသက်ရောက်မှု ရှိနိုင်သည်ဟု စီးပွားရေး ပညာရှင်တစ်ဦးက CNI သတင်းဌာနသို့ ပြောသည်။

၎င်းက “General Public အတွက်ကတော့ သိပ်အများကြီးတော့ မရှိပါဘူး။ ဘာဖြစ်လို့လဲဆိုတော့ Russian investment ဘယ်လောက်ထိ လာမလဲဆိုတာ အဲဒါလည်း တစ်ချက်ကြည့်ရမယ်။ ဒီ short term မှာတော့ သိပ် အများကြီး မရှိဘူး။ ဒီ short term မှာတော့ ဒေါ်လာအစားထိုး သုံးမယ်ဆိုရင်တောင်မှ ရုရှားငွေကို လက်ခံတဲ့ နိုင်ငံ တွေက ဘယ်လောက်ရှိမှာလဲ။ နောက် လေကြောင်းလိုင်းတွေ ဘာတွေကရော အဲဒီဟာနဲ့ လက်ခံမလား။ ဒါတွေ လက်မခံဘူးဆိုရင်တော့ ဘာမှ လောက်လောက်လားလား သိပ်အကျိုးမရှိပါဘူး။ အခုက ရုရှား - မြန်မာ တိုက်ရိုက် Flight တွေ ဆွဲတော့မယ်။ Tourist Promotion တွေ လုပ်နေတယ်။ မြန်မာပြည်က ရုရှားသွားလည်ချင်တဲ့သူတွေ အတွက်ဆိုရင်တော့ အဆင်ပြေမှာပေါ့။ ဒီ short term အတွက်ကတော့ သိပ်လောက်လောက်လားလား မရှိဘူး။ Negative ရော Positive ရော။ Long term မှာတော့ Russian investment ရုရှားနဲ့ပတ်သက်တဲ့ employer တွေက ဘယ်လောက်ထိ investment လုပ်မလဲဆိုတာ အဲပေါ်မှာပဲ ကြည့်ရမှာပေါ့” ဟု ပြောသည်။

၂၀၂၂ ခုနှစ်၊ စက်တင်ဘာ ၂၀ ရက်နေ့က နစကသတင်းစာရှင်းလင်းပွဲမှာ MIR Card စနစ်အကြောင်း ရှင်းပြနေစဉ်

MIR card စနစ်ကို ၂၀၂၂ ခုနှစ်၊ စက်တင်ဘာလအထိ နိုင်ငံ ၁၀ နိုင်ငံမှာ အသုံးပြုနေပြီး အာဆီယံဒေသအတွင်းတွင် ဗီယက်နမ်နိုင်ငံ၌ အသုံးပြုလျက် ရှိကြောင်း သိရသည်။

ရုရှားငွေပေးချေရေး MIR card စနစ်ကို လျင်မြန်စွာ အသုံးပြုနိုင်ရေးအတွက် ရုရှား ငွေရေးကြေးရေး အဖွဲ့အစည်း များက ကူညီဆောင်ရွက်ပေးသွားမည် ဖြစ်ကြောင်း၊ ရုရှားနိုင်ငံ၏ MIR card ကို မြန်မာနိုင်ငံ၏ ငွေပေးချေမှုစနစ် မှာ အသုံးပြုနိုင်ဖို့အတွက် ဆွေးနွေးနေကြောင်း နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ် ဇော်မင်းထွန်းက စက်တင်ဘာ ၂၀ ရက်တွင် ပြောသည်။

နိုင်ငံရေး လေ့လာသုံးသပ်သူ ဦးရဲထွန်းက “အဲဒါသုံးတာကို မြန်မာက လက်ခံတယ်ဆိုလို့ရှိရင် မြန်မာနိုင်ငံနဲ့ ရုရှား ကြားမှာ စီးပွားကုန်သွယ်မှု များဖို့တော့ လိုတာပေါ့။ များမှ အသုံးများမှာလေ။ လက်ခံတယ်လို့ ပြောထားပြီးတော့ ဦးတို့က ရုရှားကထွက်တဲ့ ပစ္စည်းကို သိပ်မဝယ်ဘူးဆို ဝယ်တဲ့သူတွေကျတော့ ရေနံတို့၊ သဘာဝဓာတ်ငွေ့တို့၊ ရွှေ တို့ စသဖြင့်ပေါ့ကွာ။ အဲဒါမျိုးလေးတွေ ဝယ်မယ့်သူတွေကပဲ သုံးတယ်။ ဖုန်းတို့၊ တယ်လီဖုန်းတို့ လူသုံးများတဲ့ဟာ တွေကျတော့ ရုရှားကနေ မဝယ်ဘူး။ တရုတ်ကနေ ဝယ်မယ်။ ရုရှားကနေ ဝယ်စရာပစ္စည်း သိပ်မရှိဘူးဆိုရင် အသုံးက နည်းမှာပဲလေ” ဟု CNI သတင်းဌာနသို့ ပြောသည်။

MIR card စနစ်ကို ရုရှားနိုင်ငံဗဟိုဘဏ်က ၂၀၁၇ ခုနှစ်တွင် စတင်အသုံးပြုခဲ့ကြောင်း၊ Master card နှင့် Visa card များ၏ လွှမ်းမိုးမှုအပြင် နိုင်ငံတကာ၏ ပိတ်ဆို့မှုများကို ကျော်လွှားနိုင်ရန် ဈေးကွက်အတွင်း အသုံးပြုလာ ခြင်းဖြစ်ကြောင်း သိရသည်။

ထို့နောက် MIR Card သည် လက်ရှိ မြန်မာနိုင်ငံတွင် အသုံးပြုနေသည့် MPU Card နှင့် သဘောတရား တူညီသည် ဟု စီးပွားရေးပညာရှင်တစ်ဦးက CNI သတင်းဌာနသို့ ပြောသည်။

MIR ရုံးချုပ်ကိုတွေ့ရစဉ်

၎င်းက “အဲဒီဟာကတော့ ထုတ်ပေးတဲ့ဟာအပေါ်မှာ မူတည်တယ်။ credit card အနေနဲ့ ထုတ်ပေးမှာလား Debit card အနေနဲ့ ထုတ်ပေးမှာလား သူက ဒီမှာသုံးနေတဲ့ MPU Card နဲ့ တူတူပဲလေ သဘောတရားကလေ။ ရုရှားရဲ့ ငွေနဲ့ စပြီးတော့ issue ထုတ်ရတာပေါ့။ ဒါပေမယ့် အဲဒါက ဘယ်နိုင်ငံသွားသွား သွားတဲ့နိုင်ငံက အဲဒီဟာကို လက်ခံ တဲ့ post တွေမှာ သုံးလို့ရတယ်ပေါ့။ အဲဒီဟာတော့ ဒီ MPU Card လိုပါပဲ။ ဈေးဝယ်တာ၊ Transition ငွေ လှမ်းလွှဲ ပေးတာတို့။ ဒီကဒ်က သိပ်ပြီးတော့ Amount အကြီးကြီးတော့ သိပ်အဆင်မပြေပါဘူး” ဟု ပြောသည်။

MIR Card သည် ဈေးဝယ်ခြင်း၊ လေယာဉ်လက်မှတ်ကဲ့သို့ တခြားသော လက်မှတ်များ ဝယ်ယူခြင်း၊ ဘဏ် အကောင့်များနှင့် ချိန်ဆက်ကာ ငွေလွှဲငွေထုတ် လုပ်ဆောင်ခြင်း စသည့် လုပ်ငန်းများကို ဆောင်ရွက်နိုင်ကြောင်း သိရသည်။

ငွေထည့်ဝင်နိုင်သည့် ပမာဏနှင့် လွှဲပြောင်းနိုင်သည့် ပမာဏ ကန့်သတ်ချက် ရှိခြင်းကြောင့် ကုန်သွယ်ရေးကဏ္ဍ အပိုင်းတွင် MIR Card ကို အသုံးပြုနိုင်ခြေ နည်းပါးနိုင်သည်ဟု စီးပွားရေးလုပ်ငန်းရှင်များက ပြောသည်။

CNI News

၂၀၂၂ ခုနှစ်၊ စက်တင်ဘာ ၁၆

မလေးရှားနိုင်ငံတွင် MyRC ကတ် ကိုင်ဆောင်ထားသည့် မြန်မာအပါအဝင် အခြားနိုင်ငံသားများကို မလေးရှား အစိုးရအနေဖြင့်တစ်စုံတစ်ရာ တာဝန်ယူပေးမှုမရှိကြောင်း မလေးရှားနိုင်ငံရှိ မြန်မာအဖွဲ့အစည်းများ က CNI သတင်းဌာနသို့ ပြောသည်။

MyRC ကတ်သည် မလေးရှားသို့ ရောက်ရှိနေသည့် ဒုက္ခသည်များ လုပ်ဆောင်ရမည်ဟုဆိုကာ ပြီးခဲ့သည့် မလေးရှား အစိုးရလက်ထက်က တရားဝင် စတင်ခဲ့သော Project ဖြစ်သော်လည်း မြေပြင်တွင် ထိုကတ် ကိုင်ဆောင်ထားပါကလည်း တရားဝင်မှုမရှိကြောင်း ကြုံတွေ့နေရသည်ဟု ARRC မှ ဒုတိယဥက္ကဋ္ဌ ကိုအောင်မင်းသူက CNI သတင်းဌာနသို့ ပြောသည်။

“တကယ်တန်းကျတော့ MyRC ကတ်နဲ့ အဖမ်းခံထိတယ်ဆိုလည်း ဘာမှလည်း ဆောင်ရွက်ပေးတာတို့ ဘာတို့ မရှိဘူးပေါ့။ အဲဒီတော့ MyRC ကတ်က အဆင်မပြေဘူးပေါ့။ မလေးရှားထဲမှာ တရားဝင်မှု မရှိဘူးပေါ့။ အရင်အစိုးရရဲ့ရွေးကောက်ပွဲကိစ္စတွေမှာ လုပ်ခဲ့တဲ့အစီအစဉ်ဆိုတော့ နောက်အစိုးရတက်လာတဲ့အချိန်မှာ အသိအမှတ် မပြုဘူးပေါ့ ခန့်မှန်းရတာပေါ့။ ဒါပေမယ့် ဥပဒေအကြောင်းအရကျတော့ ရဲဖမ်းခံရရင် အဲဒီကတ်ကို ပြတယ်။ ရဲက လက်မခံဘူး။ လ.ဝ.က က အဖမ်းခံထိရင်လည်း အဲဒီအတိုင်းပဲပေါ့။ မလေးရှား အာဏာပိုင်တွေဆီ ပြလိုက်ရင် သူတို့က အဆင်မပြေဘူးဆိုတဲ့ အသံပဲကြားတာပေါ့။ ဘာမှမရဘူး။ ကျနော်တို့က ကျန်းမာရေးဆိုရင် လည်း UN ကိုပဲ အကူအညီတောင်းရတယ်။ ဒေသတွင်း NGO တွေကို အကူအညီတောင်းရတယ်။ ဒီလောက်ပဲ။ သူတို့အပိုင်းမှာတော့ ဘာမှမရဘူး။ သူတို့ထုတ်ပြန်ချက်တွေမှာတော့ မလေးရှားပိုင်းမှာ တရားဝင်မှုတွေဘာတွေ ရှိတယ်လို့တော့ တွေ့ရတယ်။ ဒါပေမယ့် တကယ့် လက်တွေ့မှာကြတော့ မရှိပါဘူး” ဟု ၎င်းက ပြောသည်။

မလေးရှားနိုင်ငံတွင် MyRC ကတ်နှင့် UN ကတ်နှစ်ခုအား တွဲ၍ ကိုင်ဆောင်ထားပါက မလေးရှားအစိုးရထံမှ ကျန်းမာရေး၊ ပညာရေးထောက်ပံ့မှုများအပြင် စက်ရုံ၊ အလုပ်ရုံတို့တွင် တရားဝင်လုပ်ကိုင်ခွင့်ပေးမည်ဟု ဆိုထားသော်လည်း ထိုအခွင့်အရေးအား ကတ်ကိုင်ဆောင်ထားကြသူတိုင်း မရရှိကြောင်း သိရသည်။

UNHCR မှ ထုတ်ပေးသည့် ဒုက္ခသည်ကတ်(ဓါတ်ပုံ-UNHCR)

MyRC ကတ်ကိုင်ဆောင်ထားပြီး အဖမ်းခံရပါက မလေးရှားအစိုးရမှ တာဝန်ယူမှုမရှိသည့်အတွက် သတ်မှတ် ထားသည့် ဥပဒေအလိုက် ပြစ်ဒဏ်ချမှတ်ခံရပြီး UNHCR မှ ထုတ်ပေးသည့် ဒုက္ခသည်ကတ် ကိုင်ဆောင် ထားသူများသည် ဖမ်းဆီးခံရပါက ပြန်လွတ်ကြောင်း သိရသည်။

မလေးရှားတွင် ရောက်ရှိနေသည့် ဒုက္ခသည်များအနေဖြင့် ၎င်းတို့အား တစ်စုံတစ်ရာ တာဝန်ယူပေးနိုင်သည့် ဒုက္ခသည်ကတ်မျိုးသာ ကိုင်ဆောင်၊ လုပ်ဆောင်ထားသင့်ကြောင်း ရခိုင်ဒုက္ခသည်များ ဗဟို(CAR) မှ နာယကချုပ် ဆရာတော် ဦးဥတ္တရက CNI သတင်းဌာနသို့ မိန့်သည်။

“တကယ်လို့ ကိုင်မယ်ဆိုရင် ဒုက္ခသည်ဆိုရင် မြန်မာဒုက္ခသည်တွေဆိုရင် ဒုက္ခသည် community အဖွဲ့အစည်း တွေမှာ ဒုက္ခသည်ကတ် ကိုင်တာကတော့ အကောင်းဆုံးပါပဲ။ အဲဒါဆိုရင် ဦးဇင်းတို့က ကမ္ဘာ့ကုလသမဂ္ဂ UNHCR တို့ဆီ တာဝန်ယူပြီး ဖြေရှင်ပေးတဲ့ ဒါက ကမ္ဘာက အသိအမှတ်ပြုထားတဲ့ အဖွဲ့အစည်းတွေဆိုတော့။ ဒီ MyRC ကတ်ကြတော့ သူတို့နည်း သူတို့ဟန်နဲ့ လုပ်ထားကြတာလေ။ အဲဒါကတော့ တစ်ကဏ္ဍပေါ့။ အဲဒါကတော့ ဒုက္ခသည်ကတ် မဟုတ်ဘူးလို့ ပြောလို့ရတယ်။ သူတို့ နားလည်မှုတွေနဲ့ လုပ်ထားကြတာပါ။ ဒုက္ခသည်စာရင်း ဝင်တဲ့ ကတ်တွေတော့မဟုတ်ဘူး။ ကတ်ထုတ်ပေးတာပဲရှိတယ်။ လိုက်ပြီးတော့ ဆောင်ရွက်ပေးတယ်၊ ကူညီ ပေးတယ်၊ ရဲစခန်း၊ ကျန်းမာရေးအခက်အခဲဖြစ်တယ်။ အလုပ်ရှင်နဲ့ အလုပ်သမားကြားမှာ ပြဿနာတွေဖြစ်ကြ တယ်။ အဲဒီလိုတွေဖြစ်လာရင် ရှင်းပေးတဲ့အသံတော့မကြားဘူး”ဟု ၎င်းက မိန့်သည်။

ယခုနောက်ပိုင်းတွင် မလေးရှားနိုင်ငံ၌ MyRC ကတ်အား လုပ်ဆောင်လာကြမှု နည်းပါးလာကြောင်းနှင့် ဒုက္ခသည် အရေးဆောင်ရွက်နေသည့် အဖွဲ့အစည်းအချို့အနေဖြင့်လည်း MyRC ကတ် လုပ်ဆောင်ရန် မတိုက်တွန်းကြောင်း လည်း သိရသည်။

ARRC မှ ဒုတိယဥက္ကဋ္ဌ ကိုအောင်မင်းသူက“အရင်က ကျနော်တို့ အဖွဲ့အစည်းကတ် ကိုင်ဆောင်ထားသူတွေကို MyRC ကတ် လုပ်ပေးတာပေါ့။ ချိတ်ဆက်ပြီးတော့။ ဒါပေမယ့် နောက်ပိုင်း အဖမ်းခံထိတယ်။ သူတို့ဘက်က ဥပဒေအကြောင်းအရ ဆောင်ရွက်မပေးနိုင်ဘူးဆိုတဲ့အခါကြတော့ ကျနော်တို့ မန်ဘာတွေကို ပေးပြီး မလုပ် တော့ဘူးပေါ့။ အသစ်လုပ်တဲ့လူတော့နည်းသွားတာပေါ့။ အရင်လူတွေကိုတော့ အလုပ်ရှင်တွေကနေ သက်တမ်း မတိုးရင် မနေရဆိုပြီး သက်တမ်းတိုးတဲ့လူတွေတော့ရှိတာပေါ့။ ဒါပေမယ့် အသစ်လုပ်တဲ့လူတွေကြတော့ ကျနော် တို့က အားမပေးတော့ဘူးပေါ့။ ဘာလို့လဲဆို ဥပဒေအကြောင်းအရ တရားဝင်မှုရှိမနေတော့ မလုပ်စေချင်တဲ့ သဘောပေါ့” ဟုပြောသည်။

လက်ရှိတွင် မလေးရှားနိုင်ငံ၌ MyRC ကတ် ကိုင်ဆိုင်ထားသည့် မြန်မာ တစ်သောင်းကျော်ခန့်ရှိပြီး မလေးရှားသို့ ရောက်ရှိနေသည့် မြန်မာဒုက္ခသည်များအနေဖြင့် ဒုက္ခသည်ကတ် လျှောက်မည်ဆိုပါက မလေးရှားရှိ သက်ဆိုင်ရာ တိုင်းရင်းသားလူမျိုးတို့၏ အဖွဲ့အစည်းမှ ထုတ်ပေးသည့်ကတ် ရှိရမည်ဖြစ်ကြောင်း သိရသည်။

CNI International News

ဘန်ကောက်၊ စက်တင်ဘာ ၁၄

ထိုင်းနိုင်ငံတွင် ချမ်းသာသော နိုင်ငံခြားသားများကို ပစ်မှတ်ထားသည့် ပြည်ဝင်ခွင့်(ဗီဇာ)အစီအစဉ်သစ်အတွက် လျှောက်လွှာများ လျော့ပါးသွားခဲ့သဖြင့် ထိုအချင်းအရာသည် နောင်လာမည့် အလားအလာ တစ်ရပ်အဖြစ် ထိုင်း အစိုးရ တာဝန်ရှိသူများက ရှုမြင်နေကြကြောင်း South China Morning Post သတင်းစာက ရေးသားဖော်ပြသည်။

ပထမ ၁၂ ရက်အတွင်း ဗီဇာလျှောက်ထားသူပေါင်း ၄၀၀ ခန့်ရှိရာ ထိုအထဲတွင် ပင်စင်စားများ၏ လျှောက်ထားမှု ၄၀ ရာခိုင်နှုန်း ပါဝင်ကြောင်း ထိုင်းရင်းနှီးမြှုပ်နှံမှု ဘုတ်အဖွဲ့ လက်ထောက်အတွင်းဝန်ချုပ် နာရစ် သက်ဒစတီယာ ဆောက်ဒီက ဘန်ကောက်တွင် ပြုလုပ်သည့် အင်တာဗျူးတစ်ခုတွင် ပြောကြားခဲ့သည်။

ထိုင်းနိုင်ငံတွင် အလုပ်လုပ် ကိုင်ခွင့်အတွက် ဗီဇာလျှောက်သူ ၃၀ ရာခိုင်နှုန်းမှာ ကျွမ်းကျင်ပညာရှင်များနှင့် ချမ်းသာသော နိုင်ငံကြီးများမှ နိုင်ငံသားအချို့ကို ခွဲခြား၍ တွက်ချက်ထားကြောင်း ၎င်းက ဆက်လက် ပြောကြားခဲ့ သည်။
အဆိုပါ အစီအစဉ်သည် ထိုင်းနိုင်ငံပြင်ပရှိ နိုင်ငံခြားသားများ အတွက်သာ ရည်ရွယ်ခြင်း မဟုတ်ဘဲ အခြား ပြည်ဝင် ခွင့် ပါမစ်များသုံး၍ နိုင်ငံအတွင်းသို့ ပြည်ပမှ လာရောက်နေထိုင်သူ ခန့်မှန်းခြေ ၃ သိန်းအတွက်လည်း ထည့်သွင်း တွက်ချက်ထားသည်။

ထိုအစီအစဉ်သည် ဒေသတွင်း စင်ကာပူနိုင်ငံရှိ အလုပ်သမားဈေးကွက်၌ လစ်လပ်နေရာများ ဖြည့်ဆည်းနိုင်ရန် အရည်အချင်း ရှိသူများကို ဆွဲဆောင်ဖို့ ဦးတည်ထားပုံမျိုးနှင့် မတူဘဲ နယ်ပယ် သတ်မှတ်ချက် အနေဖြင့် ကွဲပြား ခြားနားနေသည်။
“အပြုံးများနှင့်တိုင်းပြည်” ဟု အမွှမ်းတင်ထားသော ထိုင်းနိုင်ငံတွင် ငွေကြေးချမ်းသာသူများ ပြည်တွင်းသို့ လာရောက် အလုပ်လုပ်ကိုင်မှု အဆင်ပြေ လွယ်ကူစေရန် ဖန်တီးပေးခြင်းဖြင့် စီးပွားရေး မြှင့်တင်ရန် ကြိုးပမ်း နေသည်။

ပြည်တွင်းသို့ အသစ်ထပ်မံ ဝင်ရောက်လာသူများ၏ ရင်းနှီးမြှုပ်နှံမှုနှင့် အိမ်ခြံမြေ ဝယ်ယူမှုတို့ကြောင့် နှစ်စဉ် ဘတ်ငွေ ၁ ထရီလီယံ (အမေရိကန်ဒေါ်လာ ၂၇ ဒသမ ၄ ဘီလီယံ)နှင့် ညီမျှသော စီးပွားရေး အကျိုးအမြတ်များကို ထိုင်းအစိုးရက ပစ်မှတ်ထားသည်။

“ကျနော်တို့မှာ ဖော်ရွေပျူငှာတဲ့ ပတ်ဝန်းကျင်ရှိပြီးတော့ နိုင်ငံခြားသားတွေနဲ့ လက်တွဲလုပ်ကိုင်ဖို့ ပွင့်လင်းပါတယ်” ဟု လက်ထောက်အတွင်းဝန်ချုပ် နာရစ်က ရှင်းပြသည်။

ထိုင်းအစိုးရထံသို့ ဗီဇာလျှောက်ထားမှု ၂၀ ရာခိုင်နှုန်းမှာ အမေရိကန် နိုင်ငံသားများဖြစ်ကြပြီး တရုတ်က ၁၅ ရာခိုင် နှုန်း၊ ဗြိတိန်က ၁၀ ရာခိုင်နှုန်းရှိကြောင်း ၎င်းက ထပ်လောင်း ပြောကြားခဲ့သည်။

“ဒီမှာနေထိုင်မှု စရိတ်က နည်းပါတယ်” ဟု ၎င်းက ပြောသည်။

ထိုင်းခရီးသွား လုပ်ငန်းဝင်ငွေမှာ ပြည်တွင်း အသားတင် ထုတ်လုပ်မှုတန်ဖိုး (GDP) ၏ ၁၂ ရာခိုင်နှုန်းခန့် ရှိသဖြင့် ကပ်ရောဂါ အလွန်ကာလတွင် ခရီးသွားဧည့်သည်များကို ကြိုဆိုရန်အတွက် ထိုင်းအာဏာပိုင်များ အထူးကြိုးပမ်း နေကြသည်။

ယခု ဗီဇာအစီအစဉ်အရ နိုင်ငံခြားသား ဧည့်သည်များကို ၁၀ နှစ်သက်တမ်း ပြန်တိုးနိုင်သည့် မျိုးစုံသုံး ပြည်ဝင်ခွင့် ဗီဇာ ထုတ်ပေးနေသည်။ အဆိုပါဗီဇာ ကိုင်ဆောင်ထားသူ အနေဖြင့် အလုပ်လုပ်ကိုင်ခွင့်ရှိပြီး အခွန်ဖြတ်တောက် မှုလည်း ခံရမည်ဖြစ်သည်။

ကျွမ်းကျင်ပညာရှင်များအတွက် ကိုယ်ပိုင်ဝင်ငွေခွန် ၁၇ ရာခိုင်နှုန်း ပေးဆောင်ခြင်းဖြင့် ၎င်း၏အိမ်ထောင်ဘက်နှင့် သားသမီးများအတွက် အကျိုးခံစားခွင့် ပြန်လည်ဝေငှမည်ဖြစ်သည်။

၂၀၁၈ ခုနှစ်မှစ၍ နိုင်ငံခြားသား အလုပ်သမားများကို ပစ်မှတ်ထားသည့် သီးခြား ၄ နှစ် စမတ်ဗီဇာ အစီအစဉ်အရ လျှောက်လွှာပေါင်း ၁၂၀၀ ကို အစိုးရအနေဖြင့် လက်ခံထားကြောင်း နာရစ်က ဆက်လက်ပြောကြားခဲ့သည်။

Source: South China Morning Post

CNI International News

မဲလ်ဘုန်း၊ စက်တင်ဘာ ၇

အရှေ့တီမောနှင့် ဩစတြေးလျနိုင်ငံတို့အကြား ရေပိုင်နက်အတွင်း ကာလရှည်လျားစွာ နှောင့်နှေးနေခဲ့သည့် သဘာဝ ဓာတ်ငွေ့ စီမံကိန်းသို့ အင်ဒိုနီးရှား၊ တောင်ကိုရီးယား၊ ဂျပန်နှင့် တရုတ်တို့ ရင်းနှီးမြှုပ်နှံရန် စိတ်ဝင်စားလာသဖြင့် အာရှ နိုင်ငံများ၏ အနာဂတ်အတွက် ယင်းစီမံကိန်းမှာ အရေးကြီးကြောင်း အရှေ့တီမောသမ္မတ ဂျိုစီရာမို့စ်ဟော်တာ (Jose Ramos-Horta) က စက်တင်ဘာ ၇ ရက်တွင် ပြောကြားခဲ့သည်ဟု ရိုက်တာသတင်းဌာနက ရေးသားဖော်ပြသည်။

အရှေ့တီမောသည် Greater Sunrise ဓာတ်ငွေ့စီမံကိန်း ရှေ့ဆက်ဖွံ့ဖြိုးတိုးတက်စေရန် ဩစတြေးလျနှင့် ရှေ့မတိုးသာ နောက်မဆုတ်သာ ဖြစ်နေသည့် အခြေအနေကို ကျော်လွှားနိုင်ဖို့ အထက်ပါ ၄ နိုင်ငံတို့ကို အလားအလာရှိသော ရင်းနှီး မြှုပ်နှံသူများအဖြစ် ဂျိုစီရာမို့စ်က ပြောကြားခဲ့သည်။

အဆိုပါ စီမံကိန်းကို ဦးဆောင်လုပ်ကိုင်သူဖြစ်သည့် Woodside Energy Group (WDS.AX) ၏ ရွေးချယ်မှုအရ ဩစတြေးလျ နိုင်ငံ၊ ဒါဝင်နယ်မြေအစား အရှေ့တီမောကို ဖြတ်သန်း၍ ဓာတ်ငွေ့ပိုက်လိုင်း သွယ်တန်းရန် ကြိုးစားနေသည်။

 Greater Sunrise ဓာတ်ငွေ့စီမံကိန်း အခြေပြမြေပုံ(GETTY IMAGES)

“ဒါကြောင့် အင်ဒိုနီးရှားဟာ Greater Sunrise စီမံကိန်းမှာ အလားအလာရှိတဲ့ ရင်းနှီးမြှုပ်နှံသူပါ။ ထို့နည်းတူစွာပဲ တောင်ကိုရီးယားဟာလည်း အလားအလာရှိတဲ့ ရင်းနှီးမြှုပ်နှံသူတွေထဲက တစ်ယောက်ဖြစ်ပါတယ်” ဟု ဂျိုစီရာမို့စ်က ဩစတြေးလျနိုင်ငံ၊ ကင်ဘာရာမြို့တော်တွင် ကျင်းပသည့် အမျိုးသားစာနယ်ဇင်းကလပ် အခမ်းအနားမှာ မိန့်ခွန်းပြောစဉ် ထည့်သွင်းပြောကြားခဲ့သည်။

တစ်ဆက်တည်းမှာပင် ဂျပန်နှင့် တရုတ်တို့မှ ရင်းနှီးမြှုပ်နှံလိုသူ လုပ်ငန်းရှင်များလည်း စိတ်ဝင်စားလာနိုင်ကြောင်း ၎င်းက ထပ်လောင်း ပြောကြားခဲ့သည်။

ထို့ပြင် အရှေ့တီမောသို့ ပိုက်လိုင်းသွယ်တန်းရေး ဩစတြေးလျကို ၎င်းက တိုက်တွန်းခဲ့ပြီး ၎င်း၏နိုင်ငံကို ဒူဘိုင်း (သို့မဟုတ်) စင်ကာပူအဖြစ် ပြောင်းလဲ အထောက်အကူပြုနိုင်ကြောင်း၊ တိုင်းပြည်ဝင်ငွေ ဒေါ်လာ ဘီလီယံ ၅၀ နှင့် ဖွံ့ဖြိုးရေး အကျိုးအ မြတ် ဒေါ်လာ ဘီလီယံ ၅၀ ရည်မှန်းထားကြောင်း ရှင်းပြခဲ့သည်။

“ကျနော်တို့မှာ ဒီလို အံ့အားသင့်စရာတွေ ပေါ်ပေါက်လာနိုင်အောင် လုပ်ပေးနိုင်တဲ့ အိမ်နီးချင်း ဩစတြေးလျ ရှိနေပါတယ်” ဟု ဂျိုစီရာမို့က မှတ်ချက်ချခဲ့သည်။

၎င်းသည် ဩစတြေးလျဝန်ကြီးချုပ် အန်တိုနီအယ်ဘန်နိစ်နှင့် စက်တင်ဘာ ၈ ရက်တွင် တွေ့ဆုံဆွေးနွေးရန်လည်း စီစဉ်ထားသည်။

Greater Sunrise ဟူသော ဓာတ်ငွေ့သိုက်နှစ်ခုကို ၁၉၇၄ ခုနှစ်တွင် ရှာဖွေတွေ့ရှိခဲ့ပြီး ခန့်မှန်းခြေ ဓာတ်ငွေ့ ၅ ဒသမ ၁ ထရီလီယံ ကုဗပေနှင့် ရေနံစည်သန်းပေါင်း ၂၂၆ သန်း ထွက်ရှိနိုင်မည်ဟု တွက်ချက်ထားသည်။

ရေနံစိမ်းအနေဖြင့် ဓာတ်ငွေ့နှင့်အတူ တူးဖော်ရရှိမည့် အပေါ့စားရေနံစိမ်း အမျိုးအစားဖြစ်သည်။

Source: Reuters

CNI International News

ကိယက်ဗ်၊ စက်တင်ဘာ ၅

မော်စကိုသည် ရေနံနှင့်သဘာဝ ဓာတ်ငွေ့ တင်ပို့နေခြင်းကို ဖြတ်တောက်ရန် ဦးတည်နေသောကြောင့် လာမည့် ဆောင်းရာသီအတွက် ခက်ခဲပင်ပန်းစွာ ဖြတ်သန်းကြရလိမ့်မည်ဟု ယူကရိန်းသမ္မတ ဇာလန်းစကီးက ဥရောပနိုင်ငံ များကို ပြောကြားထားကြောင်း ရိုက်တာသတင်းကို ကိုးကားလျက် The Express Tribune ဝက်ဘ်ဆိုက်တွင် ဖော်ပြထားသည်။

ရုရှားနိုင်ငံမှ တင်ပို့ပေးနေသည့် ဓာတ်ငွေ့ ပင်မပိုက်လိုင်းကို မော်စကိုအစိုးရ ပိတ်လိုက်ပြီးနောက် စက်တင်ဘာ ၃ ရက်၊ ညပိုင်းတွင် ဇာလန်းစကီးက အထက်ပါအတိုင်း ပြောကြားခဲ့သည်။

“ရုရှားဟာ ဒီဆောင်းရာသီအတွက် ဥရောပသားအားလုံးကို အဆုံးအဖြတ်ပေးမယ့် စွမ်းအင်ကိစ္စအတွက် ပြင်ဆင် နေပါတယ်” ဟု ၎င်း၏နေ့စဉ် ဗွီဒီယိုမိန့်ခွန်းထဲတွင် ထည့်သွင်း ပြောကြားခဲ့သည်။

ရုရှားက ဥရောပနိုင်ငံများသို့ ရေနံလွှတ်ပေးမှု လမ်းကြောင်း (GETTY IMAGES)

စွမ်းအင် ပြတ်တောက်မှုများအတွက် နည်းပညာပိုင်းဆိုင်ရာ ပြဿနာများနှင့် ပတ်သက်၍ အနောက်နိုင်ငံများ၏ ပိတ်ဆို့ ဒဏ်ခတ်မှုကို မော်စကိုက အကြောင်းပြခဲ့သည်။

ကိယက်ဗ်အစိုးရကို သံတမန်ရေးနှင့် စစ်ရေး ကျောထောက်နောက်ခံပြုထားသော ဥရောပနိုင်ငံများက “ရုရှားသည် စွမ်းအင်ကို လက်နက်တစ်ခုအဖြစ် အသုံးချနေကြောင်း” စွပ်စွဲထားကြသည်။

ဆောင်းဝင်ခါနီး အချိန်ရောက်လာသည်နှင့်အမျှ စွမ်းအင် အကျပ်အတည်းကြောင့် မကျေမနပ်ဖြစ်နေကြသော ပြည်သူများကို ကိုင်တွယ်ဖြေရှင်းပေးရန်အတွက် ဥရောပအစိုးရများ ကြိုးစားနေသော်လည်း ရှားပါးလာမှုနှင့် လူနေမှု စရိတ်များကလည်း တဟုန်ထိုး တက်လာခဲ့ကြောင်း လေ့လာသုံးသပ်သူများက ထောက်ပြကြသည်။

ဂျာမနီနိုင်ငံသို့ ၎င်း၏ အဓိကဓာတ်ငွေ့ တင်သွင်းသည့် လမ်းကြောင်းဖြစ်သော Nord Stream 1 ပိုက်လိုင်းကို ပိတ်ထားမည်ဖြစ်ကြောင်း ယခင်သီတင်းပတ်၌ မော်စကိုက ကြေညာခဲ့သည်။

ယူကရိန်းပြည်သူများ 

စက်မှုထိပ်သီး (G-7) နိုင်ငံများကလည်း ရုရှားရေနံတင်ပို့မှုအတွက် ၎င်းတို့စီစဉ်ထားသည့် ဈေးနှုန်း ကန့်သတ်ချက် ကို တန်ပြန်ကြေညာခဲ့သည်။

မိမိအပေါ် ဖိအားပေးသော မည်သည့် နိုင်ငံကိုမဆို ရေနံရောင်းချခြင်း ရပ်တန့်မည်ဟု ကရင်မလင်သမ္မတ နန်းတော်က ပြောကြားခဲ့ပြီး ဖြစ်သည်။

ဂျာမနီဝန်ကြီးချုပ် အိုလာရှော့ဇ်ကတော့ ၎င်း၏အစိုးရသည် လာမည့်ဒီဇင်ဘာလတွင် ဓာတ်ငွေ့ရယူနေမှုအားလုံး ရပ်တန့်ရန် စီစဉ်နေသော်လည်း ဆောင်းရာသီကို အဆင်ပြေချောမွေ့စွာ ဖြတ်သန်းနိုင်စေမည်ဟု ကတိပြုထားသည်။

“ရုရှားဟာ ယုံကြည်စိတ်ချရတဲ့ စွမ်းအင်မိတ်ဖက် မဟုတ်တော့ဘူး” ဟု အိုလာရှော့ဇ်က ဘာလင်မြို့တော်တွင် ကျင်းပသည့် သတင်းစာရှင်းလင်းပွဲတွင် ပြောကြားခဲ့သည်။

Source: Reuters

CNI International News

ဂျကာတာ၊ စက်တင်ဘာ ၃

အရှေ့တောင်အာရှတဝန်း ဟောင်ကောင် အပါအဝင် နိုင်ငံအသီးသီးမှ လူငယ်များကို အလုပ်အကိုင် လိမ်လည်ခေါ် ယူနေလျက်ရှိရာ အင်ဒိုနီးရှား နိုင်ငံသားများလည်း အတုအယောင် ကမ်းလှမ်းမှုများ၏ သားကောင်မဖြစ်စေရေး အတွက် အင်ဒိုနီးရှားနှင့် ကမ္ဘောဒီးယား ရဲတပ်ဖွဲ့တို့ ပူးပေါင်းဆောင်ရွက်မှု တိုးမြှင့်မည်ဖြစ်ကြောင်း South China Morning Post သတင်းဝက်ဘ်ဆိုက်၌ ဖော်ပြထားသည်။

ကမ္ဘောဒီးယား၊ မြန်မာ၊ လာအိုနှင့် ထိုင်းနိုင်ငံတို့မှ ထွက်ပေါ်လာသော သတင်းများအရ သားကောင်များသည် အွန်လိုင်းမှတဆင့် လိမ်လည် ခေါ်ဆောင်ခြင်းခံရပြီး လုပ်ငန်းခွင်ထဲတွင် နေ့စဉ် နာရီပေါင်းများစွာ အလုပ်လုပ်ကြ ရသည်။

တခါတရံ အဆိုပါ အလုပ်သမားများ၏ ဆန္ဒနှင့် ဆန့်ကျင်လျက် အလုပ်ရှင်များက အခြားဒုစရိုက်လုပ်ငန်းများသို့ လွှဲပြောင်းရောင်းချခြင်း ခံရသည်လည်း ရှိနေသည်။

အင်ဒိုနီးရှားနိုင်ငံခြားရေးဝန်ကြီး ရက်နိုမာစူဒီ (Reuters)

အဆိုပါ ရွှေ့ပြောင်း အလုပ်သမားများကို အမေရိကန် ဒေါ်လာဖြင့် လုပ်ခလစာ မြင့်မားစွာ ရရှိစေမည်ဟု ဆွဲဆောင် လေ့ရှိသော်လည်း လက်တွေ့တွင် လစာနည်းပါးခြင်း (သို့မဟုတ်) လုံးဝမရခြင်းတို့ ကြုံကြရသည်။

“ဒီခေတ်မှာ လူသစ်စုသူတွေအတွက် အလုပ်သမားရှာရတာ သိပ်လွယ်နေပါတယ်။ သူတို့ဟာ ဖေ့စ်ဘွတ်ခ်လို လူမှု မီဒီယာမှာ အလုပ်အကိုင် လစ်လပ်နေရာရှိတယ်လို့ လွှင့်တင်လိုက်ရုံနဲ့ ထောင်နဲ့ချီသူပြီး ရှာတွေ့နိုင်ပါတယ်” ဟု ရွှေ့ပြောင်း အလုပ်သမားသမဂ္ဂမှ အထွေထွေအတွင်းရေးမှူး ဘော်ဘီအန်နဝါမာရစ်ဖ်က ပြောသည်။

၎င်းတို့၏ သားကောင်ဖြစ်သွားရသူ အင်ဒိုနီးရှား နိုင်ငံသားအချို့သည် လိမ်လည်ပြီး ရင်းနှီးမြှုပ်နှံကြသည့် ကုမ္ပဏီ များ (သို့မဟုတ်) အွန်လိုင်း လောင်းကစား ဝက်ဘ်ဆိုက်များအတွက် အသုံးချရန် အလုပ်ခန့်ထားခြင်း ခံနေရသည်။

ထိုအလုပ်သမားများ၏ နိုင်ငံကူး လက်မှတ်များကို အလုပ်ရှင်များက သိမ်းဆည်းထားပြီး လူသစ်စုဆောင်း သွေး ဆောင်ခြင်းအတွက် ကော်မရှင်ခ(ပွဲခ) ပေးရကြောင်း သိရသည်။

ဟောင်ကောင်မှ လိမ်လည် ခေါ်ဆောင်ခံ ရသူများနှင့်စပ်လျဉ်း၍ အကူအညီ တောင်းခံမှု ၄၃ ခုကို လက်ခံရရှိ ကြောင်း ဟောင်ကောင် အာဏာပိုင်များက ပြောကြသည်။ ထိုသူများထဲမှ ၂၈ ဦးမှာ ဘေးကင်းလုံခြုံစွာ ရှိနေ ကြောင်း အတည်ပြုနိုင်ခဲ့ပြီး ၂၃ ဦးမှာ ဟောင်ကောင်သို့ ပြန်လာနိုင်ကြသည်။

ကမ္ဘောဒီးယားက လိမ်လည်ပြီး ခေါ်ထားခံရသူများကို ထားထားသည့် အဆောက်အဦ(Cindy Liu)

ကျန်ရှိနေသော ဒုက္ခသည်များမှာ မြန်မာ (သို့မဟုတ်) ကမ္ဘောဒီးယားမှ ဖြစ်သည်။

အင်ဒိုနီးရှားနှင့် ကမ္ဘောဒီးယား အာဏာပိုင်များသည် အလားတူ မတော်တဆမှုများ ထပ်မံဖြစ်ပွားပါက ကိုင်တွယ် ဖြေရှင်းရ လွယ်ကူစေရန်အတွက် ရဲတပ်ဖွဲ့ အချင်းချင်း ဆက်သွယ် ဖလှယ်ခြင်းဖြင့် ပိုမိုနီးကပ်စွာ လုပ်ဆောင်ကြ ရန် သဘောတူခဲ့ကြောင်း အင်ဒိုနီးရှားနိုင်ငံခြားရေးဝန်ကြီး ရက်နိုမာစူဒီက စက်တင်ဘာ ၁ ရက်တွင် ပြောကြား ခဲ့သည်။

အင်ဒိုနီးရှားနိုင်ငံသား စုစုပေါင်း ၄၄၆ ဦးတို့သည် ၂၀၂၂ ခုနှစ်၊ ဇန်နဝါရီလမှ ဩဂုတ်လအထိ လိမ်လည်မှုများ၏ သားကောင်ဖြစ်ခဲ့ပြီး ယမန်နှစ်က စုစုပေါင်း ၁၁၉ ဦးသာ ရှိခဲ့သဖြင့် အရေအတွက် သိသာစွာ တိုးလာသည်ဟု ရက်နိုက ဆက်လက် ပြောကြားခဲ့သည်။

ကမ္ဘောဒီးယားနိုင်ငံ၊ ပင်လယ်ကမ်းခြေမြို့ဖြစ်သော သီဟာနုဗီလီတွင် ဖမ်းဆီးထိန်းသိမ်း ခံထားရသော အင်ဒိုနီးရှား နိုင်ငံသား ၂၂၅ ဦး အပါအဝင် လိမ်လည်မှု သားကောင် ဖြစ်ခဲ့ရသူ အားလုံးကို ကယ်ဆယ်၍ မိခင်နိုင်ငံသို့ ပြန်ပို့နိုင်ခဲ့ သည်။

သားကောင် ဖြစ်ခဲ့ရသူအားလုံးသည် ကမ္ဘောဒီးယားတွင် ငွေရှာရန် အလုပ်အကိုင် ဗီဇာအစား ခရီးသွားဗီဇာကို အသုံးပြုခဲ့ကြကြောင်း သိရသည်။

Source: South China Morning Post

CNI International News

ဘာလင်၊ စက်တင်ဘာ ၂

ဂျာမနီနိုင်ငံတွင် အစိုးရထောက်ပံ့ကြေး စာချုပ်စာတမ်းများ သက်တမ်းကုန်သွားပြီဖြစ်၍ စက်တင်ဘာ ၁ ရက်နေ့ တွင် လောင်စာဆီနှင့် အများပြည်သူ သယ်ယူပို့ဆောင်စရိတ်များ ခုန်တက်သွားခဲ့ကြောင်း အေပီသတင်းဌာနက ရေးသားထားသည်။

ထို့နောက် ခရီးသွားလာနေသူများလည်း ထိခိုက်စေခဲ့ကြောင်း အေပီက ဆက်လက် ဖော်ပြထားသည်။

ဓာတ်ငွေ့နှင့် လောင်စာဆီဆိုင်ရာ စာချုပ်စာတမ်းများကို ပြန်လည် သက်တမ်းတိုးရန် ရုရှားအား ယခုအခါ အားကိုး၍ မရနိုင်တော့ကြောင်း ဂျာမနီအစိုးရ ထိပ်တန်းအရာရှိတစ်ဦးက သတိပေးခဲ့သည်။

စက်တင်ဘာ ၂ ရက် (ယနေ့) နံနက်ပိုင်းတွင် E10 စူပါလောင်စာဆီ ပျမ်းမျှဈေးနှုန်းသည် ယခင်နေ့ထက် ၀ ဒသမ ၂၅ ယူရို ပိုတက်လာကြောင်း၊ ဒီဇယ်ဆီလည်း ၀ ဒသမ ၁၀ ယူရိုခန့် ဈေးကြီးလာကြောင်း ဂျာမနီပြည်တွင်း အကြီး မားဆုံး မော်တော်ယာဉ်အုပ်စုဖြစ်သည့် ADAC က ကနဦး ခန့်မှန်းနှုန်းထားများကို ရည်ညွှန်းပြောကြားခဲ့သည်။

စက်တင်ဘာ ၂ ရက်တွင် လောင်စာဆီ အခွန်အခများ ယာယီဖြတ်တောက်ထားခြင်းကို အစိုးရက အဆုံးသတ်ပေး ခဲ့သည်။ ထို့ပြင် ငွေကြေးဖောင်းပွမှု ပြဿနာကို ကုစားရန်အတွက် ပြီးခဲ့သည့် မေလ၌ အထူးလစဉ် ၉ ယူရိုနှုန်းဖြင့် အများပြည်သူ သယ်ယူပို့ဆောင်ရေး ယာဉ်စီးခ လက်မှတ်ကို သတ်မှတ်ပေးခဲ့သည်။

ဂျာမနီနိုင်ငံ မီးရထားပြေးဆွဲနေခြင်းကိုတွေ့ရစဉ် (AP)

ပြည်တွင်းရှိ ဒေသအသီးသီးအတွက် ဘတ်စ်ကားခများနှင့် ရထားလက်မှတ်ခများကို ဈေးလျှော့ပေးခဲ့ရာ သန်းနှင့် ချီသော ပြည်သူများ အဖိုးနှုန်း ချိုသာစွာဖြင့် သွားလာနိုင်ခဲ့၍ အထူးအောင်မြင်ခဲ့သည်။ ထို့ပြင် ကာဗွန်ဒိုင် အောက် ဆိုက် ဓာတ်ငွေ့ ထုတ်လွှတ်မှု ခန့်မှန်းခြေ ၁ ဒသမ ၈ သန်းကိုလည်း လျော့နည်းသွားစေခဲ့သည်။

အဆိုပါ ယာဉ်စီးခ လက်မှတ်များကို တစ်နည်းနည်းဖြင့် သက်တမ်းတိုးပေးရန် သဘာဝပတ်ဝန်းရေးရာ တက်ကြွ လှုပ်ရှားသူများက တောင်းဆိုထားပြီး ဂျာမနီအစိုးရ၊ သယ်ယူပို့ဆောင်ရေးဝန်ကြီးက သင့်လျော်သည့် နည်းလမ်း ရှာကြံနေကြောင်း ပြောကြားခဲ့သည်။

ရုရှားက ဂျာမနီနိုင်ငံသို့ ရုပ်ကြွင်းလောင်စာ တင်ပို့ရောင်းချမှုကို သိသာစွာ လျှော့ချလိုက်ပြီးနောက် လာမည့် ဆောင်းရာသီတွင် လောင်စာဆီ မပြတ်လပ်စေဖို့ စားသုံးသူများနှင့် စီးပွားရေးလုပ်ငန်းများအတွက် စွမ်းအင် ချွေတာနိုင်ရန် ကြိုးပမ်းနေကြောင်း အစိုးရက ကတိပြုခဲ့သည်။

ထို့ပြင် ဆောင်းရာသီဝင်သည်နှင့် အများသူငှါ ဝင်ထွက်သွားလာနေသော ရုံးများတွင် အပူပေးသည့် စနစ်ကို လျှော့ချမည်ဖြစ်ကြောင်း၊ လမ်းဘေးကြော်ငြာ ဆိုင်းဘုတ်များတွင် ညအချိန် မီးပိတ်ထားရမည်ဖြစ်ကြောင်း မကြာသေးမီက ကန့်သတ်ချက်များ ထုတ်ပြန်ခဲ့သည်။

Source: AP

CNI International News

ကိုလံဘို၊ စက်တင်ဘာ ၂

သီရိလင်္ကာ၏ အဆိုးရွားဆုံး စီးပွားရေး အကျပ်အတည်းကို ကယ်တင်နိုင်ရန်အတွက် နိုင်ငံတကာငွေကြေး ရန်ပုံ ငွေအဖွဲ့ (IMF)က ၄ နှစ်အတွင်း ဒေါ်လာ ၂ ဒသမ ၉ ဘီလီယံ ပံ့ပိုးပေးဖို့ ပဏာမသဘောတူညီချက် တစ်ရပ်ကို စက်တင်ဘာ ၂ ရက်တွင် ရရှိပြီဟု ကြေညာခဲ့ကြောင်း အေပီသတင်းဌာနက ရေးသားဖော်ပြသည်။

အဆိုပါ အစီအစဉ်အရ သီရိလင်္ကာနိုင်ငံ၏ ဘဏ္ဍာရေးနှင့် မက်ခရို စီးပွားရေး တည်ငြိမ်မှုနှင့် ကြွေးမြီများ တင်ရှိနေခြင်းကို ပြန်လည် ပေးဆပ်နိုင်ရေး အကူအညီပေးမည်ဖြစ်ကြောင်း၊ နိုင်ငံဖွံ့ဖြိုးတိုးတက်စေဖို့ အလားအလာကို အထောက်အကူ ပြုသွားမည်ဖြစ်ကြောင်း ကိုလံဘိုမြို့သို့ ရောက်ရှိနေသော IMF အဖွဲ့၏ ထုတ်ပြန်ချက်ထဲတွင် ဖော်ပြထားသည်။

ယခုထောက်ပံ့မည့် အစီအစဉ်တွင် IMF စီမံခန့်ခွဲမှုနှင့် အမှုဆောင်ဘုတ်အဖွဲ့၏ ခွင့်ပြုချက်အပြင် တရုတ်၊ အိန္ဒိယ၊ ဂျပန်တို့ အပါအဝင် သီရိလင်္ကာ၏ ကြွေးမြီရှင်များထံမှ အာမခံချက် ရယူရေးတို့ ပါဝင်သည်။ ထိုသို့ အာမခံချက် တွင်လည်း ကြွေးမြီ ရေရှည်တည်တံ့စေမှုကို ပြန်လည်ထားရှိမည် ဖြစ်သည်။

ကိုလံဘိုမြို့၌ သတင်းထောက်များနှင့် တွေ့ဆုံစဉ် IMF အရာရှိ ပီတာဘောယာ (Peter Breuer) က ပြောကြားရာ တွင် “သီရိလင်္ကာ၏ကြွေးမြီသည် ရေရှည်မတည်တံ့နိုင်သဖြင့် ငွေချေးသူများသည် နိုင်ငံနှင့်ကြွေးမြီရှင်များအကြား အရင်းအမြစ် ကတိကဝတ်များ ချိုးဖောက်ခြင်းမပြုမီ ထိတွေ့ဆက်ဆံမှု မြင်တွေ့ရန် လိုအပ်ကြောင်း” ရှင်းပြခဲ့ သည်။

“ကြွေးမြီရှင်တွေက ဒီအာမခံချက်ကို မပေးချင်ဘူးဆိုရင် အဲဒါက သီရိလင်္ကာ အကျပ်အတည်းကို ပိုဆိုးစေမှာဖြစ် ပြီး ပြန်ဆပ်နိုင်စွမ်းကို ထိခိုက်စေလိမ့်မယ်” ဟု ၎င်းက ဆက်လက် ရှင်းပြခဲ့သည်။

ကြွေးမြီရှင်များနှင့် သီရိလင်္ကာ နိုင်ငံတို့အကြား ပူးပေါင်းဆောင်ရွက်ခြင်းဖြင့်သာ အကျပ်အတည်းမှ အမြန်ဆုံး လွတ်မြောက်နိုင်ဖို့ အထောက်အကူ ပြုမည်ဖြစ်ကြောင်း၊ သို့ဖြစ်၍ ကြွေးမြီများ ပြန်လည်စုစည်းခြင်းဆိုင်ရာ ဖိုရမ်ဆွေးနွေးပွဲတစ်ရပ် ကျင်းပရန် နှစ်ဘက်စလုံးကို မိမိတို့အကြံပြုထားကြောင်း ပီတာဘောယာက ပြောကြား ခဲ့သည်။

သီရိလင်္ကာနိုင်ငံတွင် နိုင်ငံခြားငွေကြေး အလွန်အမင်း ပြတ်လပ်ခဲ့သဖြင့် လောင်စာဆီ၊ ဆေးဝါးနှင့် မီးဖိုချောင်သုံး ဓာတ်ငွေ့ကဲ့သို့ မရှိမဖြစ် နေ့စဉ်သုံးပစ္စည်းများ ပြည်ပမှ မဝယ်နိုင်တော့ဘဲ မကြုံစဖူး စီးပွားရေးအကျပ်အတည်း ကျရောက်ခဲ့သည်။

ယခုအခါ ကမ္ဘာ့ဘဏ်၏ပံ့ပိုးမှုဖြင့် မီးဖိုချောင်သုံးဓာတ်ငွေ့ ပြန်လည်ရရှိခဲ့သော်လည်း လောင်စာဆီ၊ ဆေးဝါးနှင့် စားသောက်ကုန်များကတော့ ပြတ်လပ်နေဆဲဖြစ်သည်။

Source: AP

CNI International News

ကိုလံဘို၊ ဩဂုတ် ၃၁

ဒေဝါလီခံခဲ့ရသည့် သီရိလင်္ကာစီးပွားရေးကို ကယ်တင်နိုင်ရေးအတွက် နိုင်ငံတကာငွေကြေးရန်ပုံငွေအဖွဲ့(IMF) နှင့် မိမိတို့အစိုးရအဖွဲ့ ဆွေးနွေးနေမှု အခြေအနေမှာ အောင်မြင်လုနီးပါးရှိပြီဟု သီရိလင်္ကာသမ္မတက ထုတ်ဖော်ပြော ကြားလိုက်ကြောင်း အေပီသတင်းဌာနက ရေးသားဖော်ပြသည်။

ငွေကြေးဖောင်းပွမှုနှုန်းနှင့် အခွန်တိုးမြှင့် ကောက်ခံရန် ကြိုးပမ်းချက်အဖြစ် ပြင်ဆင်ထားသော ဘတ်ဂျက် အနေအထားကို တိုင်းပြည်သို့ တင်ပြစဉ် သမ္မတက ထိုကဲ့သို့ ပြောကြားခဲ့ခြင်း ဖြစ်သည်။

ဘဏ္ဍာရေးဝန်ကြီးလည်းဖြစ်၊ သမ္မတလည်းဖြစ်သူ ရာနေးလ်ဝီကရီမီဆင်က “၎င်းအစိုးရအနေဖြင့် သီရိလင်္ကာ ချေးငွေ ပြန်ဆပ်ရမည့် နိုင်ငံများနှင့် မကြာခင်မှာ ကြွေးမြီကိစ္စ ညှိနှိုင်းရေး စတင်တော့မည်”ဟု လွှတ်တော်တွင် မိန့်ခွန်း ပြောကြားခဲ့သည်။

သီရိလင်္ကာ ပြန်လည်ထူထောင်ရေးအတွက် အချိန်တိုအတွင်း လမ်းကြောင်းမှန်ပေါ်သို့ ရောက်နေပြီဟု ကြေညာ လိုက်ခြင်းဖြင့် ၂၀၂၃ ခုနှစ်အတွက် ဘတ်ဂျက်ကို ၎င်းက အာရုံစိုက်၍ ပြောကြားခဲ့သည်။

အမျိုးသားစီးပွားရေး မူဝါဒတစ်ရပ် ချမှတ်နိုင်ဖို့ အနည်းဆုံး ၂၅ နှစ် ကြိုတင်ပြင်ဆင် ရမည်ဖြစ်ကြောင်း ဝီကရီမီဆင်က သတိပေးခဲ့သည်။

 သီရိလင်္ကာပြည်သူများ (AP)

IMF အဖွဲ့သည် သီရိလင်္ကာသို့ ရောက်ရှိနေကြပြီး လက်ရှိ ညှိနှိုင်းဆွေးနွေးနေမှုများကို ဩဂုတ် ၃၁ ရက် အဆုံး သတ်ရန် မျှော်လင့်ထားသည်။

IMF ၏ အမှုဆောင်ဘုတ်အဖွဲ့ အနေဖြင့် သီရိလင်္ကာ ကြွေးမြီရှင်များ၏ အာမခံချက် လိုအပ်ကြောင်း၊ ချေးငွေသစ် အစီအစဉ် မစတင်မီ ယခင်ကြွေးမြီဟောင်း ရေရှည်တည်တံ့မှု ပြန်လည်ရရှိဖို့ ဖြစ်ကြောင်း၊ အကြောင်းရင်းမှာ သီရိလင်္ကာ၏ ပြည်သူ့ကြွေးမြီ ရေရှည်မတည်တံ့ နိုင်တော့သည့် အခြေအနေရှိနေ၍ ဖြစ်ကြောင်း IMF က ပြော ကြားခဲ့သည်။

သီရိလင်္ကာ၏ စုစုပေါင်း ပြည်ပကြွေးမြီသည် ဒေါ်လာ ၅၁ ဘီလီယံကျော်ရှိပြီး ယင်းတို့အထဲမှ ဒေါ်လာ ၂၈ ဘီလီယံ ကို ၂၀၂၇ ခုနှစ်တွင် ပြန်လည် ပေးဆပ်ရမည် ဖြစ်သည်။

သီရိလင်္ကာနိုင်ငံတွင် အလွန်အမင်း နိုင်ငံခြားငွေကြေး ပြတ်လပ်ခဲ့သဖြင့် လောင်စာဆီ၊ ဆေးဝါးနှင့် မီးဖိုချောင်သုံး ဓာတ်ငွေ့ကဲ့သို့ မရှိမဖြစ် အသုံးအဆောင်များ လအတန်ကြာ မရရှိနိုင်ခဲ့ဘဲ စီးပွားရေး အကျပ်အတည်း အဆိုးရွား ဆုံး ရင်ဆိုင်ခဲ့ရသည်။

ယခုနောက်ပိုင်း ကမ္ဘာ့ဘဏ်၏ ပံ့ပိုးမှုဖြင့် မီးဖိုချောင်သုံး ဓာတ်ငွေ့ ပြန်လည်ရရှိခဲ့သော်လည်း လောင်စာဆီ၊ ဆေးဝါးနှင့် စားနပ်ရိက္ခာများ ဆက်လက် ပြတ်တောက်နေခဲ့သည်။

Source: AP