CNI International News

ဘန်ကောက်၊ သြဂုတ် ၁၂

ထိုင်းနိုင်ငံတွင် ဆောက်လုပ်ရေးပါမစ် ရုပ်သိမ်းခံခဲ့ရသည့် Ashton Asoke ကွန်ဒို၏ ဖြစ်စဉ်ကြောင့် ငွေထုတ်ချေး သူများသည် ချေးငွေပေးရန် ပိုမိုတွန့်ဆုတ်ခဲ့သဖြင့် ငွေကြေးထောက်ပံ့မှုအတွက် ကြွေးမြီ စာချုပ်များနှင့် ချေးငွေ များ ရရှိရေးအပေါ် မှီခိုနေရသည့် အိမ်ခြံမြေလုပ်ငန်းရှင်များနှင့် ကုမ္ပဏီများအပေါ် သက်ရောက်မှုရှိလာနိုင်သည်ဟု ဘန်ကောက်ပို့စ်မှ ဖော်ပြခဲ့သည်။

အဆိုပါ ကွန်ဒိုအမှုအပြီးတွင် ဘဏ္ဍာရေးထောက်ပံ့မှု အဖွဲ့များသည် အိမ်ခြံမြေကုမ္ပဏီများအတွက် ချေးငွေထုတ် ပေးခြင်းနှင့်ပတ်သက်ပြီး ပိုပြီး သတိထား ဆောင်ရွက်လာကြသည်ဟု ထိုင်းစတော့အိတ်ချိန်း စာရင်းဝင် AP Thailand အိမ်ခြံမြေကုမ္ပဏီ၏ အမှုဆောင်ချုပ် အနျူပွန် အက်ဆာဗာဟိုကင် (Anuphong Assavabhokhin) က ပြောသည်။

"အပေါင်ထားပြီး ချေးငွေရယူဖို့ ငြင်းပယ်ခံရတဲ့ အခြေအနေတွေ ပိုမိုမြင့်တက်လာတာနဲ့အမျှ ချေးငွေတွေ ရရှိဖို့ ဆိုတာ မလွယ်ကူတော့ပါဘူး။ အစိုးရဆီက ကြွေးမြီစာချုပ်တွေ ရရှိဖို့က ပိုပြီး ခက်ခဲလာပါလိမ့်မယ်" အနျူပွန်က ပြောသည်။

အဆိုပါ သက်ရောက်မှုသည် အိမ်ခြံမြေလုပ်ငန်းများ၊ အထူးသဖြင့် ကြွေးမြီစာချုပ် ထုတ်ပေးသည့် အလတ်စား ကုမ္ပဏီများအပေါ် သက်ရောက်စေမည်ဖြစ်ပြီး ကြွေးမြီများနှင့် ပတ်သက်သည့် ငွေကြေးသ ဘောတူညီချက်များ အပေါ်ကိုလည်း သက်ရောက်စေလိမ့်မည်ဟု မစ္စတာ အနျူပွန်က ပြောသည်။

"အိမ်ခြံမြေလုပ်ငန်းတွေက အဲဒီလို ငွေကြေးသဘောတူညီချက်တွေ မရနိုင်တော့ဘူးဆိုရင် ဒါဟာ ၁၉၉၇ ခုနှစ် အာရှ စီးပွားရေး အကျပ်အတည်းလို ပြဿနာမျိုးတွေ ဖြစ်လာမလားဆိုတာ မသိနိုင်ပါဘူး" ဟု အနျူပွန်က ပြောသည်။

Ashton Asoke ရဲ့ ကွန်ဒိုအဆောက်အအုံကိုတွေ့ရစဉ်

ကုမ္ပဏီအများစုသည် ဘဏ်မှ ချေးငွေများ ရယူခြင်းထက် အစိုးရနှင့် ကြွေးမြီစာချုပ်များ ချုပ်ဆိုနိုင်ရေးကိုသာ စိတ်အားထက်သန်နေကြသည်။ 

အကယ်၍ ဘဏ်များထံမှ ချေးငွေများ မရနိုင်တော့ဘဲ အစိုးရထံမှ ကြွေးမြီစာချုပ်များနှင့် ပတ်သက်သည့် ငွေကြေး သဘောတူညီချက်များလည်း မရနိုင်တော့ပါက ကြီးမားသည့် အကျပ်အတည်း တစ်ခုအတွင်းသို့ ကျရောက် သွားနိုင်သည်ဟု မစ္စတာ အနျူပွန်က ပြောကြားခဲ့သည်။

ဇူလိုင် ၂၇ ရက်တွင် ထိုင်းအုပ်ချုပ်ရေး တရားရုံးချုပ်သည် Ashton Asoke ကွန်ဒို တည်ဆောက်ရေး သို့မဟုတ် အဆင့်မြှင့်တင် မွမ်းမံရေး စီမံကိန်း ပါမစ်ကို ရုပ်သိမ်းကြောင်း အမိန့်ထုတ်ပြန်ခဲ့သည်။ 

အထပ် ၅၀ မြင့်ပြီး ဘတ် ၆ ဒသမ ၄ ဘီလျံတန်ကြေးရှိသည့် အဆိုပါ စီမံကိန်းသည် ထိုင်း စတော့အိတ်ချိန်း စာရင်း ဝင် Ananda Development နှင့် ဂျပန်ကုမ္ပဏီ Mitsui Fudosan တို့အကြား အကျိုးတူ ပူးပေါင်းဆောင်ရွက်သည့် စီမံကိန်းများထဲမှ တစ်ခုဖြစ်သည်။

ထိုင်းနှင့် ပြည်ပ ရင်းနှီးမြှုပ်နှံမှု ကုမ္ပဏီတို့အကြား ပူးပေါင်းဆောင်ရွက်သည့် ထိုစီမံကိန်းကို ပိတ်ပင်ခဲ့သည့် တရားရုံး၏ ဆုံးဖြတ်ချက်သည် ထိုင်း၏ အိမ်ခြံမြေကဏ္ဍတစ်ခုလုံးကို ထိခိုက်စေခဲ့သည်ဟု အိမ်ခြံမြေ ကုမ္ပဏီ Noble Development Plc ၏ တွဲဘက် အမှုဆောင်ချုပ်ဖြစ်သူ သွန်ချိုင်း ဘူစရာပန် (Thongchai Busrapan) က ပြောကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ သြဂုတ် ၁၁

ထိုင်းနိုင်ငံ၏ Charoen Pokphand Foods Plc (CP Foods) ကုမ္ပဏီသည် အာရှတိုက်၏ ပထမဆုံး ကာဗွန်ကင်းမဲ့ ကြက်ဥ (carbon-neutral egg) ကို စတင်ထုတ်လုပ်ပြီး မိတ်ဆက်ပြသခဲ့သည်ဟု ဘန်ကောက်ပို့စ်မှ ဖော်ပြခဲ့ သည်။

အဆိုပါ ထုတ်ကုန်သည် ထိုင်းနိုင်ငံ၏ ဖန်လုံအိမ် ဓာတ်ငွေ့ စီမံခန့်ခွဲရေးအဖွဲ့ (TGO) ၏ တရားဝင် ထောက်ခံချက် ရရှိခဲ့ပြီး သဘာဝပတ်ဝန်းကျင်ကို မထိခိုက်စေမည့် ကြက်ဥများ ထုတ်လုပ်ရေးအတွက် CP Foods ကုမ္ပဏီ၏ ကတိကဝတ်ကို အကောင်အထည်ဖော် ပြသရာရောက်ခဲ့သည်။

ကုမ္ပဏီအနေနှင့် သဘာဝပတ်ဝန်းကျင် ထိခိုက်မှုကို လျှော့ချရန် ကာဗွန် ထုတ်လွှတ်မှု နည်းပါးသည့် ထုတ်ကုန် များကို ထုတ်လုပ်ရန် အာရုံစိုက် လုပ်ဆောင်နေသည်ဟု CP Foods ကုမ္ပဏီ၏ ကြက်ဥထုတ်လုပ်ရေး လုပ်ငန်း အကြီးအကဲ ဆွမ်ကစ် ဝဏ္ဏလွတ်ခီး (Somkid Wannalukkhee) က ပြောကြားခဲ့သည်။

 ကြက်မွေးမြူရေးလုပ်နေစဉ်

ကြက်ဥထုတ်လုပ်ရေး လုပ်ငန်းစဉ်များတွင် ဆိုလာပြားများကဲ့သို့ စွမ်းအင်အရင်းအမြစ်ကို ပြောင်းလဲအသုံးပြုနေပြီး ကုလသမဂ္ဂ စားနပ်ရိက္ခာနှင့် စိုက်ပျိုးမွေးမြူရေးအဖွဲ့၏ မူဘောင်များကို အခြေခံသည့် စီမံကိန်း အများအပြားကို လုပ်ဆောင်နေကြောင်း ဆွမ်ကစ်က ပြောသည်။

ရလဒ်အနေနှင့် လတ်ဆတ်သည့် ကြက်ဥများနှင့် ဘက်ထရီ လှောင်အိမ်များ အသုံးမပြုသည့် ကြက်ဥ (cage-free egg) အမျိုးအစား ၂၃ မျိုး ရရှိခဲ့ပြီး ကာဗွန် လျှော့ချရေးတံဆိပ် (Carbon Footprint Reduction Label) သို့မဟုတ် ကမ္ဘာလုံးဆိုင်ရာ ပူနွေးမှု လျှော့ချရေး တံဆိပ် (Global Warming Reduction Label) ကို ပြီးခဲ့သည့် နှစ်က တရားဝင်ရရှိခဲ့သည်ဟု CP Foods က ပြောသည်။

စက်ရုံ၀န်ထမ်းများကိုတွေ့ရစဉ် 

CP Foods ၏ cage-free အမျိုးအစား ကြက်ဥ အမှတ်တံဆိပ်ဖြစ်သည့် U Farm သည်လည်း အာရှတွင် ပထမဆုံး ကာဗွန်ကင်းမဲ့ cage-free ကြက်ဥဆိုသည့် သမိုင်းမှတ်တိုင် တစ်ခုကို ထူထောင်နိုင်ခဲ့သည်ဟု မစ္စတာ ဆွမ်ကစ်က ပြောသည်။

အဆိုပါ ကြက်ဥ အမျိုးအစားသည် ပိုမိုကောင်းမွန်သည့် အာဟာရတန်ဖိုးကို ပေးစွမ်းနိုင်ရုံ သာမကဘဲ စားသုံးသူ များအတွက် သဘာဝပတ်ဝန်းကျင်ကို ကာကွယ်လိုသော စိတ်ဆန္ဒကိုလည်း ပေးစွမ်းနိုင်သည်ဟု ၎င်းက ပြောကြား ခဲ့သည်။ 

ကာဗွန်ကင်းမဲ့ cage-free ကြက်ဥများသည် ပုံမှန် ကြက်ဥထုတ်လုပ်ရေး ကြက်ခြံများကဲ့သို့ ကြက်များကို ဘက်ထရီ လှောင်ချိုင့်များထဲတွင် ထည့်ပြီး အနွေးဓာတ်နှင့် အလင်းရောင်ပေးပြီး ကြက်ဥထုတ်လုပ်ခြင်း မဟုတ်ဘဲ ကျယ်ဝန်းသည့် မွေးမြူရေးခြံများထဲတွင် ကြက်များကို လွှတ်ထားပြီး သဘာဝအတိုင်း ဥဥစေသည့် နည်းလမ်းဖြစ် သည်။

Source: ဘန်ကောက်ပို့စ်

NI International News

ဆန်ဖရန်စစ္စကို၊ ဇူလိုင် ၂၉

အီလွန်မာ့စ် (Elon Musk) သည် မကြာသေးမီက X ဟု အမည်ပြောင်းလဲခဲ့သည့် Twitter ကုမ္ပဏီကို သူ့အကျင့် စရိုက်အတိုင်း အုပ်ချုပ်နေသည်ဟု ရာထူးမှ ထုတ်ပယ်ခံခဲ့ရသည့် Twitter ၏ ထုတ်ကုန် မန်နေဂျာ အက်စ်သာ ခရောဖို့ဒ် (Esther Crawford) က ပြောကြောင်း ဘန်ကောက်ပို့စ်မှ ဖော်ပြခဲ့သည်။

အီလွန်မာ့စ်သည် စိတ်အပြောင်းအလဲ မြန်သူဖြစ်ပြီး ကုမ္ပဏီတွင် သူ့ကို မြှောက်ပင့် ထောက်ခံသူများကိုသာ ထားရှိခဲ့သည်ဟုလည်း ခရောဖို့ဒ်က ပြောကြားခဲ့သည်။ 

ပြီးခဲ့သည့််နှစ်က Twitter ရုံးခန်းထဲတွင် အိပ်ပျော်နေသည့် ဓာတ်ပုံကြောင့် လူမှုကွန်ရက်တွင် လူသိများခဲ့သော ခရောဖို့ဒ်သည် ဇူလိုင် ၂၆ ရက်က ၎င်း၏ အတွေးအမြင်များကို Twitter တွင် ရေးသားဖော်ပြခဲ့သည်။

"သူ့ဆုံးဖြတ်ချက် အများစုကို ကျမ သဘောမတူပါဘူး။ ပြီးတော့ သူ့ သဘောဆန္ဒအတိုင်း လုပ်ချင်တာတွေ လုပ်နေတာကလည်း အံ့သြစရာပါပဲ။ ဒါပေမယ့် အချိန်နဲ့ ငွေကြေး လုံလုံလောက်လောက် ရှိနေတာကြောင့် ဆန်းသစ်တီထွင်မှု တစ်ခုခုကတော့ ရှိလာပါလိမ့်မယ်"ဟု ခရောဖို့ဒ်က ပြောသည်။

Twitter ကုမ္ပဏီကို ဒေါ်လာ ၄၄ ဘီလျံဖြင့် အီလွန်မာ့စ် မဝယ်ယူမီ ခရောဖို့ဒ်သည် ၂၀၂၀ ပြည့်နှစ်က Twitter သို့ ရောက်ရှိခဲ့သူ ဖြစ်သည်။

"အီလွန်မာ့စ်ဟာ ညှို့ဓာတ်ရှိပြီး ထူးဆန်းတဲ့လူ ဖြစ်ပါတယ်။ သူ့ရဲ့ ပင်ကိုယ်စရိုက်နဲ့ ပြောပုံဆိုပုံတွေက ချက်ချင်း ဆိုသလို ပြောင်းလဲသွားနိုင်တာက ပြဿနာတစ်ခု ဖြစ်ပါတယ်"ဟု ခရောဖို့ဒ်က ပြောသည်။

Twitter ၏ ထုတ်ကုန် မန်နေဂျာ အက်စ်သာ ခရောဖို့ဒ်ကို တွေ့ရစဉ်

Twitter ကုမ္ပဏီ ဝန်ထမ်းများသည် အီလွန်မာ့စ်နှင့် အစည်းအဝေး ပြုလုပ်ရန် သို့မဟုတ် မကောင်းသည့် သတင်း ကိုပြောရန် ကြောက်ရွံ့နေကြသည်ဟုလည်း ၎င်းက ဆိုသည်။

"တစ်ခါတစ်လေမှာ သူ့ရဲ့ အတွင်းစည်းက လူတွေဟာ သူ ပြောသမျှ အကုန်လုံးကို အားတက်သရော ထောက်ခံနေ တယ်လို့ ခံစားရပါတယ်။ ထုတ်လုပ်ရေးနဲ့ စီးပွားရေးဆိုင်ရာ ဆုံးဖြတ်ချက်တွေကို သူ့ရဲ့ ပင်ကိုယ် အကျင့်စရိုက် အတိုင်း ချမှတ်လေ့ရှိပါတယ်။ လုပ်ငန်းပိုင်းဆိုင်ရာ ကျွမ်းကျင်မှုတွေ ဒါမှမဟုတ် အဲဒါနဲ့ပတ်သက်တဲ့ အချက် အလက်တွေကို ထည့်တွက်တာမျိုး မရှိပါဘူး"ဟု ခရောဖို့ဒ်က ပြောသည်။ 

ထို့ပြင် အီလွန်မာ့စ်သည် ကုမ္ပဏီတွင် ပြဿနာများကို ဖြေရှင်းရန် ကုမ္ပဏီလုပ်နေသည့် ဝန်ထမ်းများထက် သုံးစွဲသူ များ၏ ကြုံရာကျပန်း တုံ့ပြန်ချက်များ၊ Twitter ပေါ်မှ စစ်တမ်းများကို ပိုပြီး ယုံကြည်သည်ဟု ထင်မြင်ရကြောင်း ခရောဖို့ဒ်က ဆိုသည်။ 

အီလွန်မာ့စ် ပြောင်းလဲလိုက်တဲ့ X ကိုတွေ့ရစဉ်

"သူ့ရဲ့ လုပ်ရဲကိုင်ရဲတဲ့ သတ္တိ၊ ပြင်းပြတဲ့ စိတ်ဆန္ဒနဲ့ ဟောပြောပို့ချမှုတွေဟာ စိတ်ခွန်အား တက်စေပေမယ့် လုပ်ငန်းပိုင်းဆိုင်ရာ စီမံမှုအပိုင်းနဲ့ ကိုယ်ချင်းစာမှု နည်းပါးတာက စိတ်ညစ်ဖို့ ကောင်းပါတယ်"ဟု ၎င်းက ပြောသည်။

အီလွန်မာ့စ်သည် Twitter ကို ပြီးခဲ့သည့်နှစ် အောက်တိုဘာလက ဝယ်ယူခဲ့ပြီးနောက် တရုတ်၏ လူသုံးအများဆုံး WeChat ကဲ့သို့ စူပါအက်ပလီကေးရှင်းတစ်ခု ဖန်တီးရန် ဆန္ဒရှိကြောင်း ပြောကြားခဲ့သည်။ 

Twitter ကို အီလွန်မာ့စ် ဝယ်ယူပြီးကတည်းက ၎င်း၏ အုပ်ချုပ်ပုံစနစ်နှင့် ဝန်ထမ်း အများအပြားကို ထုတ်ပယ်မှု တို့ကြောင့် ကုမ္ပဏီ၏ ကြော်ငြာ စီးပွားရေးလုပ်ငန်း ကျဆင်းခဲ့သည်။ 

Source: ဘန်ကောက်ပို့စ်

CNI International News

ဘန်ကောက်၊ ဇူလိုင် ၂၆

ထိုင်းနိုင်ငံ၏ စီးပွားရေးလုပ်ငန်းရှင်များသည် နိုင်ငံရေး မတည်ငြိမ်မှုနှင့်ပတ်သက်ပြီး စိုးရိမ်ကြောင်း ဖော်ပြခဲ့ကြပြီး တစ်လအတွင်း အစိုးရဖွဲ့ရန် လွှတ်တော်ကို တိုက်တွန်းခဲ့သည်ဟု Thai PBS World မှ ဖော်ပြခဲ့သည်။

မေလက ပြုလုပ်ခဲ့သည့် ရွေးကောက်ပွဲပြီးကတည်းက အစိုးရသစ် ဖွဲ့စည်းနိုင်ခြင်း မရှိသေးပေ။

နိုင်ငံရေး တည်ငြိမ်မှုရှိစေရန် စီးပွားရေး အသိုင်းအဝိုင်းက တောင်းဆိုနေကြပြီး လက်ရှိ ဖြစ်ပျက်နေသည့် အခင်း အကျင်းသည် ပြည်ပရင်းနှီးမြှုပ်နှံသူများ၏ ယုံကြည်မှုကို ထိခိုက်စေနိုင်သည်ဟု ပြောကြားခဲ့သည်။

ရွေးကောက်ပွဲအပြီး နှစ်လကြာသည်အထိ ထိုင်းတွင် ဝန်ကြီးချုပ်ရာထူးနေရာ ရွေးချယ်ရေးအတွက် လွှတ်တော်၌ မဲခွဲဆုံးဖြတ်မှုများ ပြုလုပ်ခဲ့သော်လည်း နိုင်ငံ၏ အယောက် ၃၀ မြောက် ဝန်ကြီးချုပ်သည် မည်သူဖြစ်လာနိုင်သည် ဆိုခြင်းကို သေသေချာချာ မသိရသေးပေ။

လက်ရှိနိုင်ငံရေး အကျပ်အတည်းသည် ထိုင်းနိုင်ငံအတွင်း ငွေကြေးအများအပြား ရင်းနှီးမြှုပ်နှံရေးနှင့် ပတ်သက်ပြီး ပြည်ပ ရင်းနှီးမြှုပ်နှံသူများ၏ ဆုံးဖြတ်ချက်အပေါ် သက်ရောက်မှုရှိနေသည်။

ထို့ကြောင့် ရှင်းလင်းပြတ်သားသည့် အခြေအနေတစ်ရပ်ကို အမြန်ဆုံး ဖော်ဆောင်ရန် လိုအပ်သည်ဟု ပူးတွဲ ပြည်ပကုန်သည်ကြီးများအသင်း (Joint Foreign Chamber of Commerce)၏ ဥက္ကဋ္ဌဟောင်း စတန်လေကန် (Stanley Kang) က ပြောသည်။

အမေရိကန်ကုန်သည်ကြီးများအသင်း၏ ဥက္ကဋ္ဌ မွတ်ခ်ပီဘူလ်ဒမ်ကို တွေ့ရစဉ်

စီးပွားရေး အသိုင်းအဝိုင်းသည် အဆုံးမရှိသည့် အခြေအနေတစ်ရပ်ကို စောင့််ဆိုင်းနိုင်မည် မဟုတ်ကြောင်း စတန်လေက Thai PBS World ကို ဇူလိုင် ၂၅ ရက်တွင် ပြောကြားခဲ့သည်။

"ပါတီတစ်ခုချင်းစီတိုင်းဟာ ပါတီရဲ့ အကျိုးစီးပွားတွေထက် နိုင်ငံနဲ့ ပြည်သူတွေရဲ့ အကျိုးစီးပွားတွေကို ရှေ့တန်း တင်သင့်ပါတယ်။ ထိုင်းနိုင်ငံရဲ့ စီးပွားရေးနဲ့ ပထဝီနိုင်ငံရေးကို ထိခိုက်မှုရှိစေတဲ့ ပြဿနာတွေကို အလျင်အမြန် ဖြေရှင်းဖို့ လိုအပ်တာကြောင့် တစ်လအတွင်း အစိုးရအဖွဲ့ ဖွဲ့စည်းဖို့ကို ပုဂ္ဂလိကကဏ္ဍက မျှော်လင့်နေပါတယ်။ ဘယ်ပါတီပဲ အုပ်ချုပ်ပါစေ၊ ပုဂ္ဂလိက ကဏ္ဍကတော့ ပူးပေါင်းဆောင်ရွက်ဖို့ အသင့်ပါပဲ" ဟုစတန်လေက ပြော သည်။

ပြည်ပရင်းနှီးမြှုပ်နှံသူများကလည်း လျင်မြန်ချောမွေ့သည့်် အာဏာလွှဲပြောင်းရေးကိုသာ လိုချင်ကြကြောင်း အမေရိကန်ကုန်သည်ကြီးများအသင်း (American Chamber of Commerce)၏ ဥက္ကဋ္ဌ မွတ်ခ် ပီဘူလ်ဒမ် (Mook Pibuldham) က ပြောသည်။ 

အစိုးရအဖွဲ့၏ ခိုင်မာတောင့်တင်းမှုသည် လာမည့်လေးနှစ်အတွက် နိုင်ငံရေးတည်ငြိမ်မှုနှင့် သက်ဆိုင်နေသဖြင့် ပြည်ပရင်းနှီးမြှုပ်နှံသူများသည် ရွေးကောက်ပွဲတွင် နေရာအများစု အနိုင်ရရှိသူများကိုသာ အစိုးရကို ဖွဲ့စည်းစေလို သည်ဟု မွတ်ခ်က ပြောကြားခဲ့သည်။

အသစ်ဖွဲ့စည်းမည့် အစိုးရသည် အိမ်ထောင်စုများ၏ ကြွေးမြီ မြင့်တက်မှုနှင့် လျှပ်စစ်ဓာတ်အားအတွက် ကုန်ကျ စရိတ် မြင့်တက်မှုများ အပါအဝင် ပြဿနာအများအပြားကို ဖြေရှင်းပေးရန် လိုအပ်သည်ဟုလည်း မွတ်ခ်က ပြောကြားခဲ့သည်။  

ဥရောပ စီးပွားရေးနှင့် ကုန်သွယ်ရေးအသင်း၏ ဥက္ကဋ္ဌ ဖာရစ်ဘစ်ဂိုလီကို တွေ့ရစဉ်

"ကျမတို့ ပြောခဲ့သလိုပဲ အိမ်ထောင်စု ကြွေးမြီတွေက ဂျီဒီပီရဲ့ ၉၀ ဒသမ ၆ ရာခိုင်နှုန်းအထိ ရှိခဲ့ပြီး လျှပ်စစ် ဓာတ်အားအတွက် ကုန်ကျစရိတ်ကလည်း ကြီးမားနေပါတယ်။ အခုအချိန်မှာ ပြည်ပရင်းနှီးမြှုပ်နှံသူတွေဟာ လျှပ်စစ်ဓာတ်အားခတွေကို ဗီယက်နမ်မှာထက် နှစ်ဆ၊ မလေးရှားမှာထက် သုံးဆလောက် ပိုပေးနေရပါတယ်။ အဲဒါကြောင့် ထိုင်းမှာရှိတဲ့ ပြည်တွင်း၊ ပြည်ပကုမ္ပဏီတွေဟာ နိုင်ငံတကာ ဈေးကွက်မှာ ဘယ်လိုလုပ်ပြီး ယှဉ်နိုင် မှာလဲ" ဟု မွတ်ခ်က ပြောသည်။

ပြည်တွင်းရေး ပြဿနာများအပြင် နိုင်ငံရေးတည်ငြိမ်မှုသည် ဥရောပသမဂ္ဂ (EU) နှင့် ထိုင်းနိုင်ငံအကြား ရေရှည် တည်တံ့သည့် ပူးပေါင်းဆောင်ရွက်မှုကို ထိန်းသိမ်းရန် အဓိကအခန်းကဏ္ဍမှ ပါဝင်နေသည်ဟု ဥရောပ စီးပွားရေး နှင့် ကုန်သွယ်ရေးအသင်း (European Association for Business and Commerce) ၏ ဥက္ကဋ္ဌ ဖာရစ် ဘစ်ဂိုလီ (Farid Bidgoli)က ပြောသည်။ 

"စက်တင်ဘာ ဒါမှမဟုတ် မကြာခင် အချိန်အတွင်း ထိုင်းမှာ အစိုးရအဖွဲ့သည် ဖွဲ့စည်းပြီးဖို့ ကျနော်တို့ မျှော်လင့်ပါ တယ်။ ရွေးကောက်ခံထားရပြီး ခိုင်မာတဲ့ အစိုးရဖြစ်ဖို့ မျှော်လင့်ပါတယ်။ လွတ်လပ်စွာ ကုန်သွယ်ရေး ညှိနှိုင်း ဆွေးနွေး မှုတွေကို နှောင့်နှေးကြန့်ကြာစေနိုင်မယ့် စိန်ခေါ်မှုတွေ မရှိဖို့ မျှော်လင့်ပါတယ်"ဟု ဖာရစ်က ပြောသည်။

နိုင်ငံရေးအကျပ်အတည်း၏ သက်ရောက်မှုနှင့်အတူ ထိုင်းဗဟိုဘဏ်သည် ယခုနှစ်အတွက် ဂျီဒီပီ ဖွံ့ဖြိုးတိုးတက်မှု ကို ၃ ဒသမ ၆ ရာခိုင်နှုန်းမှ ၃ ဒသမ ၈ ရာခိုင်နှုန်းအကြား ရှိနိုင်ကြောင်း ခန့်မှန်းထုတ်ပြန်ခဲ့သည်။ 

မည်သို့ပင်ဆိုစေ Move Forward ပါတီခေါင်းဆောင် ပီတာလင်ဂျာရိုရတ် (Pita Limjaroenrat) နှင့် ၎င်း၏ ပါတီ သည် ဖျက်သိမ်းခြင်း ခံရမည်ဆိုပါက အန္တရာယ်ရှိသည့် သက်ရောက်မှုများကို ဖြစ်စေနိုင်သည်ဟု ထိုင်းကုန်သည် ကြီးများအသင်းမှ တက္ကသိုလ်ပါမောက္ခချုပ် ဒေါက်တာ သာနာဝပ် ဖိုလ်ဗီချိုင်း (Thanawat Pholvichai) က ပြော သည်။ 

Source: Thai PBS World

CNI International News

ဘန်ကောက်၊ ဇူလိုင် ၂၂

ထိုင်းစတော့အိပ်ချိန်း (SET)ညွှန်းကိန်းမှာ သုံးလေးရက် ဆက်တိုက် တက်နေခဲ့ရာမှ ဇူလိုင် ၂၀ ရက်တွင် ပြန်ကျ သွားခဲ့သည်။ 

လေ့လာသူများ၏ ပြောကြားချက်အရ ဖြူးထိုင်းပါတီ (Pheu Thai)ခေါင်းဆောင်သည့် အစိုးရသစ်တွင် ပါဝင်နိုင်ခြေ ရှိသောကြောင့် ဘွန်ဂျာထိုင်းပါတီ (Bhumjaithaiနှင့် ဆက်နွယ်နေသည့် စတော့ရှယ်ယာများ နောက်ရက် အနည်းငယ်အတွင်း တက်လာဖွယ်ရှိကြောင်း သိရသည်။

Move Forward Party (MFP)နှင့် ဖြူးထိုင်းပါတီပြီးလျှင် တတိယ အမတ်နေရာ အများဆုံး အနိုင်ရခဲ့သည့် ဘွန်ဂျာထိုင်းပါတီမှာ ညွန့်ပေါင်းအစိုးရအဖွဲ့သစ်ထဲ ဝင်မည်ဖြစ်၍ Trinity Securities ကုမ္ပဏီမှ  အလားအလာ ကောင်းကို ကြိုတင်သုံးသပ်နေသည်။ 

လက်ရှိတွင် ဖြူးထိုင်းပါတီသည် အစိုးရသစ်ကို ဦးဆောင်ရန် ပြင်ဆင်နေပြီးဖြစ်၍ ၎င်းတို့၏ ဝန်ကြီးချုပ်လောင်းကို အဆိုပြုတော့မည်ဖြစ်သည်။

ထို့ကြောင့် Sino Thai Engineering and Construction၊ STP&I နှင့် PTG Energy အပါအဝင် ဘွန်ဂျာထိုင်း ပါတီနှင့် ဆက်နွယ်နေသည့် စတော့ရှယ်ယာများမှာ လှုပ်ခတ်နေသည်။ 

ဘွန်ဂျာထိုင်းပါတီ ခေါင်းဆောင်ကိုတွေ့ရစဉ်

ဖြူးထိုင်းနှင့် MFP တို့ လာမည့် တတိယအကြိမ် ပူးတွဲလွှတ်တော်တွင် အတူတွဲနေသေးပါက ညွန့်ပေါင်းအဖွဲ့ အနေနှင့် ဝန်ကြီးချုပ် တင်မြှောက်ရန် လုံလောက်သည့် ထောက်ခံမဲကို ရနိုင်ဖွယ်မရှိဟု Krungsri Securities ကုမ္ပဏီက ယုံကြည်နေသည်။ 

လက်ရှိတွင် ဖြူးထိုင်းပါတီသည် အစိုးရဖွဲ့ပြီး ဝန်ကြီးချုပ် တင်မြှောက်ရန် ထောက်ခံမဲ အလုံအလောက်ရရန် အတွက် Move Forward ပါတီနှင့် မဟာမိတ်အဖြစ်က ရပ်ဆိုင်ရန် ဆုံးဖြတ်ဖွယ် ရှိနေသည်။ 

ဖြူးထိုင်းသာ အဆင်ပြေစွာဖြင့် အစိုးရဖွဲ့နိုင်ပါက စတော့ညွှန်းကိန်းတွင် ၁၅၇၀-၁၅၉၀ မှတ် ဝန်းကျင်လောက်ဖြင့် အရောင်းအဝယ် ဖြစ်ဖွယ် ရှိနေသည်။ 

အစိုးရသစ်က ၎င်း၏ စီးပွားရေးပေါ်လစီကို ကြေညာပြီးလျှင်မူ စတော့ညွှန်းကိန်းမှာ ထပ်တက်လာဖွယ် ရှိသည်။ 

KGI Securities မှ ဒုတိယဥက္ကဋ္ဌ ရတ်ပွန်းချိုင်ဆူပရာခါး (Rakpong Chaisuparakul)ကတော့ နိုင်ငံရေး ဆန့်ကျင် မှုများနှင့် ပတ်သက်သော စိုးရိမ်သောကများက ထိုင်းစတော့ ဈေးကွက်အပေါ်တွင် ဆက်လက် ဂယက်ရိုက် နေဦး မည်ဟု ပြောသည်။ 

၎င်းက “ကျနော်တို့ အမြင်မှာတော့ ဈေးကွက်ထဲမှာ လတ်တလော အားကောင်းလာပေမယ့်လည်း စတော့ညွှန်း ကိန်းက နောက်အပတ် ပူးတွဲလွှတ်တော် မတိုင်မီအထိ ရက်အနည်းငယ် ရှေ့လည်းမတိုး နောက်လည်းမဆုတ် တန်းနေဦးမယ့် သဘောရှိပါတယ်”ဟု ပြောသည်။ 

ထိုင်းစတော့ဈေးကွက်ကိုတွေ့ရစဉ်

MFP ပါတီခေါင်းဆောင် ပီတာလင်ဂျာရိုရတ်၏ အမည်စာရင်း တင်သွင်းမှု တစ်ခန်းရပ်ပြီဟု လွှတ်တော်က ဆုံးဖြတ်အပြီးတွင်မူ ထိုင်းအစိုးရသစ် ဖွဲ့စည်းရေးတွင် အပြောင်းအလဲ ဖြစ်လာလိမ့်မည်ဟူသော အမြင်ကို ယုံကြည်နေဆဲဖြစ်ကြောင်း KGI က ပြောသည်။ 

သို့သော် ယခုအချိန်အထိ ဝန်ကြီးချုပ် မည်သူမည်ဝါ ဆိုသည်ကိုတော့ဖြင့် သဲသဲကွဲကွဲ မသိရသေးပေ။ 

Krungsri ၏ သုတေသနဌာန အကြီးအကဲ ကိုရာဖတ် ဗိုရာချတ် (Koraphat Vorachet)ကတော့ ဘတ်ငွေတန်ဖိုး မှာ အမေရိကန် ဒေါ်လာနှင့်ယှဉ်ပါက နှစ်လကြာ တန်ဖိုးတက်နေသည်ကို ထောက်ရှု၍ ပြည်ပဈေးကွက်က ကုန်သည်များအတွက် ထိုင်းနိုင်ငံရေးမှာ အဖြေပေါ်လာပြီဆိုသည်ကို ညွှန်ပြနေသည်ဟု ပြောသည်။ 

သို့သော် အစိုးရသစ်၏ ဖွဲ့စည်းပုံ ပြောင်းလဲသွားပြီး မဲအနည်းစုသာရသည့် ပါတီများဖြင့် အစိုးရသစ်ကို ဖွဲ့စည်း လာပါက စတော့ညွှန်းကိန်းမှာ ၁၅၀၀ အမှတ်အောက်သို့ တစ်ဖန် ပြန်ထိုးဆင်း သွားလိမ့်မည်ဟု ၎င်းက သတိပေး သည်။ 

Source: ဘန်ကောက်ပို့စ်

CNI International News

ဘန်ကောက်၊ ဇွန်လ ၁

နိုင်ငံတကာ အသိုင်းအဝိုင်း၏ အနီးကပ် စောင့်ကြည့်နေမှုကြောင့် အစိုးရသစ် ဖွဲ့စည်းရန်အတွက် ကြန့်ကြာမှု တိုင်းသည် တိုင်းပြည်ကို ထိလိုက်စေလိမ့်မည်ဟု ထိုင်းကုန်သည်ကြီးများအသင်း (TCC) ဥက္ကဋ္ဌဖြစ်သူ ဆာနန် အန်ဂူဘော်ကူး (Sanan Angubolkul) က မေလ ၃၁ ရက်တွင် ပြောကြောင်း Thai PBS World မှဖော်ပြခဲ့သည်။

မည်သူက ဦးဆောင်စေကာမူ အစိုးရအသစ် ဖွဲ့စည်းခြင်းကို မြန်မြန်ဆောင်ရွက်နိုင်လေ ပိုကောင်းလေဟု ဆာနန် က ပြောသည်။

TCC အဖွဲ့ဝင်များနှင့် Move Forward ပါတီ ခေါင်ဆောင်းအပြင် ဝန်ကြီးချုပ် ဖြစ်လာမည်ဟု တစ်ပြေးနေသူ ပီတာလင်ဂျာရိုရန်ရတ် (Pita Limjaroenrat) တို့ တွေ့ဆုံစဉ် ဆာနန်က ထိုသို့ ပြောခဲ့ခြင်း ဖြစ်သည်။
တွေ့ဆုံပွဲသည် အပြုသဘောဆောင်မှု ရှိသည်ဟုလည်း ဆာနန်က ပြောသည်။

ထိုင်းနိုင်ငံအတွင်း တစ်နေရာကိုတွေ့ရစဉ်

သို့သော် ဆာနန်က ၎င်းအနေဖြင့် အစိုးရသစ်၏ ကာလ တစ်ခုချင်းစီအလိုက် ဘတ်ဂျက် သတ်မှတ်မည့် အစီအစဉ် အပေါ် စိုးရိမ်မိကြောင်း၊ ထိုင်းနိုင်ငံတွင် ယင်းစနစ်ကို ကျင့်သုံးခဲ့ပြီး ဖြစ်သော်လည်း မှားယွင်းစွာ အကောင်အထည် ဖော်မိလျှင် အချိန်မှီ ပြန်မဖြည့်နိုင်သည့် ဘတ်ဂျက် လိုငွေပြမှုကို ဖြစ်စေလိမ့်မည်ဟု ပြောသည်။

ထိုသို့ဖြစ်လျှင် ယင်းက တိုင်းပြည်၏ စီးပွားရေးအပြင် စီးပွားရေးကို တိုးတက်စေသည့် အရာများကိုပါ ထိခိုက် စေလိမ့်မည်ဟုလည်း ဆာနန်က ပြောသည်။

ဆာနန်၏ ပြောဆိုမှုများနှင့် ပတ်သက်၍ တုံ့ပြန်ရာတွင် ပီတာက အစိုးရအသစ် ဖွဲ့စည်းရေးနှင့် စတင် လုပ် ဆောင်ရေးသည် ရွေးကောက်ပွဲကော်မရှင်ပေါ်တွင်သာ မူတည်သည်ဟု ဆိုသည်။

MFP ဦးဆောင်သည့် အစိုးရအဖွဲ့သည် စတင် တာဝန်ယူရန် အဆင်သင့် ဖြစ်နေသည်ထက်ပိုကြောင်း၊ ဒီဇယ်ဈေး ကို ငါးဘတ်ထိ တိုးမြှင့်ခြင်း အပါအဝင် ထိုင်းပြည်သူများအတွက် ဖြေရှင်းပေးရမည့် အကြောင်းကိစ္စများစွာ ရှိနေ ကြောင်း ပီတာက ပြောသည်။

ဒီဇယ်ဈေး တိုးမြှင့်မှုကိစ္စကို ယခင်အစိုးရက ချောင်ထိုးထားသည့်အတွက် ယင်းသည် ဇူလိုင် ၂၁ ရက်တွင် စတင် အသက် ဝင်လာမည်ဖြစ်ကာ လက်ရှိ အခွန်လျှော့ပေါ့မှုကို ဆက်လက် ကျင့်သုံးသွားမည်လား အစိုးရသစ်၏ အဆုံး အဖြတ်ကို စောင့်ဆိုင်းနေသည်။

ပီတာလင်ဂျာရိုရန်ရတ်နဲ့ ထိုင်းကုန်သည်ကြီးများအသင်း တွေ့ဆုံစဉ်

ပြည်သူများ၏ ခံစားနေရမှုများကို ရှေ့မဆက် စေလိုကြောင်း ပီတာက ပြောသည်။

အစိုးရသစ်အား ဇူလိုင် ၂၁ ရက်မတိုင်ခင် မဖွဲ့စည်းနိုင်လျှင် ဒီဇယ်ဈေးသည် ၃၇ ဘတ်အထိ မြင့်တက်လာနိုင် သည်ဟု ၎င်းက ပြောသည်။

ထို့ကြောင့် အစိုးရသစ် အာဏာလွှဲပြောင်း ရယူပြီးချိန်မှသာ ထိုကိစ္စကို ကိုင်တွယ် ဖြေရှင်းပေးနိုင်မည်ဟု ပီတာက ပြောသည်။

TCC နှင့် တွေ့ဆုံစဉ် အစိုးရသစ် ဖွဲ့စည်းခြင်းမှ တိုးတက်ပြောင်းလဲမှုများနှင့် သက်ဆိုင်ရာ အကြောင်းကိစ္စများကို ပြောဆို ဆွေးနွေးခဲ့သည်ဟုလည်း ပီတာက ပြောသည်။

Source: Thai PBS

CNI International News

ဆစ်ဒနီ၊ မေလ ၂၄

လာမည့် ငါးနှစ်အတွင်း အိန္ဒိယ-သြစတြေးလျ နှစ်နိုင်ငံကြား ကုန်သွယ်ရေး ကို နှစ်ဆမြှင့်တင်ရန် ရည်မှန်းထား သည်ဟု အိန္ဒိယဝန်ကြီးချုပ် နာရန်ဒရာမိုဒီ (Narendra Modi)က မေလ ၂၃ ရက်နေ့ သြစတြေးလျ ခရီးစဉ်တွင် ပြောကြားခဲ့သည်။

မိုဒီ၏ မေလ ၂၃ ရက်နေ့ ခရီးစဉ်သည် အိန္ဒိယခေါင်းဆောင်အဖြစ် ဒုတိယကြိမ်မြောက် သြစတြေးလျခရီးစဉ် လည်း ဖြစ်သည်။

သြစတြေးလျသို့ အလည်အပတ် ရောက်ရှိလာသော အိန္ဒိယဝန်ကြီးချုပ် နာရန်ဒရာမိုဒီ (Narendra Modi)အား ဆစ်ဒနီ အားကစားကွင်းတွင် လူပေါင်း ၂၀၀၀၀ ခန့်က ကြိုဆိုခဲ့ကြသည်ဟု AP သတင်းတွင် ဖော်ပြထားသည်။
မိုဒီအား ထောက်ခံသူများက သူ၏နာမည်ကို သံပြိုင်အော်ဟစ် ကြိုဆိုခဲ့ကြပြီး သြစတြေးလျဝန်ကြီးချုပ် အန်တိုနီ အယ်လ်ဘာနက်ဆီ (Anthony Albanese) က Qudos Bank အားကစားကွင်းတွင်းမှ မိုဒီအား ကြိုဆိုပုံကို အမေရိကန်ရော့ခ်စတား ဘရုစ် စပင်စတင်း (Bruce Springsteen) အား ကြိုဆိုပုံနှင့် ခိုင်းနှိုင်း အရွှမ်းဖောက် ခဲ့သည်။

 မိုဒီနဲ့ သြစတြေးလျဝန်ကြီးချုပ် အန်တိုနီ အယ်လ်ဘာနက်ဆီကို တွေ့ရစဉ်

ဝန်ကြီးချုပ်မိုဒီသည် ဆရာကြီးဖြစ်သည်ဟုလည်း သြစတြေးလျဝန်ကြီးချုပ်က ဗြိတိန်အဆိုတော်၏ နာမည်ပြောင် ကို အသုံးပြုကာ ပြောဆိုခဲ့သည်။

ကြိုဆိုသူများနှင့် တွေ့ဆုံရာတွင် မိုဒီက လာမည့် ငါးနှစ်အတွင်း အိန္ဒိယ-သြစတြေးလျ နှစ်နိုင်ငံကြား ကုန်သွယ်ရေး ကို နှစ်ဆမြှင့်တင်ရန် ရည်မှန်းထားသည်ဟု ပြောသည်။

သဘာဝပတ်ဝန်းကျင်၊ ဘေးအန္တရာယ် စီမံခန့်ခွဲရေး၊ မဟာဗျူဟာမြောက် နည်းပညာများ၊ မှီခို၍ရသော ထောက်ပံ့ ရေး လုပ်ငန်း၊ ပညာရေးနှင့် ကျန်းမာရေးစသော ကဏ္ဍများတွင် နှစ်နိုင်ငံ အပြုသဘောဆောင်သော ပူးပေါင်း ဆောင်ရွက်မှုများ မြင့်တက်လာသည်ဟု မိုဒီက ပြောသည်။

ယင်းသည် သံရေးတမံရေး နည်းလမ်းများကြောင့် မဟုတ်ဘဲ သြစတြေးလျတွင် နေထိုင်သည့် အိန္ဒိယသားများ ကြောင့် ဖြစ်သည်ဟုလည်း မိုဒီက ပြောသည်။

မိုဒီ၏ ခရီးစဉ်အတွင်း မိုဒီအား ကြိုဆိုပါသည် ဆိုသည့် စာတန်းကို ဆစ်ဒနီမြို့ ကောင်းကင်ယံတွင် ဖော်ကျူးခဲ့သည်။

မိုဒီနဲ့ ထောက်ခံသူများကိုတွေ့ရစဉ်

ယင်းက ဆစ်ဒနီမြို့၏ အသက် ၇၂ နှစ်အရွယ် မိုဒီအပေါ် ချစ်ခင်မြတ်နိုးမှုကိုလည်း ဖော်ပြနေသည်။

အိန္ဒိယမှ ရွှေ့ပြောင်း နေထိုင်သူများသည် သြစတြေးလျ လူဦးရေ၏ ၃ ရာခိုင်နှုန်းသာ ရှိသော်လည်း ယင်းတို့သည် နိုင်ငံတွင်း၌ လူဦးရေ တိုးပွားမှုအများစု လူနည်းစုများ ဖြစ်သည်။

မိုဒီသည် အစီအစဉ်အတိုင်း သြစတြေးလျသို့ ရောက်ရှိလာသည့် Quad အဖွဲ့၏ တစ်ဦးတည်းသော ခေါင်းဆောင် ဖြစ်သည်။

အမေရိကန်သမ္မတ ဂျိုးဘိုင်ဒန် (Joe Biden) နှင့် ဂျပန်ဝန်ကြီးချုပ် ဖူမီအို ကီရှီဒါ (Fumio Kishida) တို့သည် သြစတြေးလျသို့ လာရန် စီစဉ်ခဲ့သော်လည်း နောက်ပိုင်းတွင် ဖျက်သိမ်းသွားခဲ့သည်။

လွတ်လပ်၍ ပွင့်လင်းသော အင်ဒို-ပစိဖိတ်ဒေသဖြစ်ရေး အထောက်အကူ ဖြစ်စေရန် ကာကွယ်ရေးနှင့် လုံခြုံရေး ဆိုင်ရာ ပိုမိုနီးကပ်သော ဆက်ဆံရေးများ အပါအဝင် နှစ်နိုင်ငံကြား ဆက်ဆံရေးကို နောက်တစ်ဆင့်သို့ မြှင့်တင် လိုသည်ဟု မိုဒီက ပြောသည်။

Source:AP

CNI International News

ရှီယန်၊ မေလ ၂၀

ဗဟိုအာရှနိုင်ငံများ ဖွံ့ဖြိုးတိုးတက်မှုအတွက် တရုတ်သမ္မတ ရှီကျင့်ဖျင် (Xi Jinping)က ရည်ရွယ်ချက် ကြီးမား သော အစီအစဉ်တစ်ခုကို ထုတ်ပြန် ကြေညာခဲ့သည်ဟု Al Jazeera သတင်းတွင် ဖော်ပြထားသည်။

ထိုအစီအစဉ်တွင် ကုန်သွယ်မှုကို မြှင့်တင်ရေးအတွက် အခြေခံ အဆောက်အဦများ တည်ဆောက်ရေး၊ အစဉ် အလာအရ ရုရှား၏ လွှမ်းမိုးမှု ကြီးစိုးခဲ့သော ဒေသအတွင်း ခေါင်းဆောင်မှု ပုံစံအသစ် ဖြစ်ပေါ်လာရေးတို့ ပါဝင် သည်။

တရုတ်သည် ကာဇတ်စတန်၊ ကာဂျစ်စတန်၊ တာဂျစ်ကစ္စတန်၊ တာ့မင်နစ္စတန်နှင့် ဥဇဘတ်ကစ္စတန် စသော နိုင်ငံ များနှင့် ဖွံ့ဖြိုးတိုးတက်ရေး မဟာဗျူဟာများကို ပူးပေါင်းဆောင်ရွက်ကာ ယင်းတို့အားလုံးကို ခေတ်မှီစေရေး အထောက်အကူ ဖြစ်စေရန် အဆင်သင့်ရှိကြောင်း ရှီက သောကြာနေ့ ရှီယန် (Xian) မြို့တွင် ကျင်းပခဲ့သည့် တရုတ်-ဗဟိုအာရှ ညီလာခံတွင် ပြောခဲ့သည်။

ယခုညီလာခံသည် နိုင်ငံခြောက်ခု၏ ဖွံ့ဖြိုးတိုးတက်မှု၊ ရှင်သန်ရုန်းထွက်နိုင်မှုတို့အတွက် တွန်းအားအသစ်ကို ဖြစ်စေကာ ဒေသတွင်း တည်ငြိမ်ရေးနှင့် လုံခြုံရေးတို့အတွက် ခိုင်မာသော စွမ်းအင်ကောင်းများကို ဖြစ်စေသည်ဟု ရှီက သတင်းစာ ရှင်းလင်းပွဲတွင် ပြောခဲ့သည်။

 ဗဟိုအာရှ အစည်းအဝေးကို ကျင်းပနေစဉ်

ခိုင်မာသော လိုက်လျောညီထွေဖြစ်မှုနှင့် အပြန်အလှန် အကျိုးဖြစ်ထွန်းသော ပူးပေါင်းဆောင်ရွက်မှုတို့အတွက် စံနမူနာအသစ်တစ်ခု ဖြစ်လာစေရေး ပူးပေါင်း မြှင့်တင်သွားမည်ဟုလည်း ရှီက ပြောသည်။ညီလာခံ၌ ရှီသည် တရုတ်နှင့် ကာဇတ်စတန်တို့အကြား ခိုင်မာသော ဆက်ဆံရေး ရှိထားသည်ဟု ကာဇတ်သမ္မတ ကာဆင်ဂျိုမတ် တိုကာယတ်ဗ် (Kassym Jomart Tokayev) အား ပြောခဲ့သည်ဟု ရှီယန်ရှိ Al Jazeera သတင်း ထောက် ဂျက်စီကာ ဝါရှင်တန် (Jessica Washington) က ပြောသည်။

ယင်းက ရှီအနေဖြင့် ဗဟိုအာရှနိုင်ငံများကို ပြောခဲ့သည့် စကားဖြစ်ကြောင်း၊ တရုတ်အား ဒေသတွင်း ယုံကြည်၍ ရသော နိုင်ငံတစ်ခုအဖြစ် ပူးပေါင်းမှုနှင့် မိတ်ဆွေဖြစ်မှုတို့အတွက် ပြောခဲ့သော မက်ဆေ့ချ် ဖြစ်ကြောင်းလည်း ဝါရှင်တန်က ပြောသည်။

အဆိုပါ ခြောက်နိုင်ငံအနေဖြင့် ၎င်းတို့၏ ဖွံ့ဖြိုးတိုးတက်ရေး လမ်းကြောင်း လွတ်လပ်၍ လေးစားမှုရှိစွာ ရွေးချယ် ရမည်ဖြစ်ကြောင်း၊ နယ်မြေ ပိုင်ဆိုင်မှု၊ လုံခြုံရေးနှင့် လွတ်လပ်မှု၊ အချုပ်အခြာအာဏာတို့သည် လုံခြုံမှုရှိရမည် ဖြစ်သည်ဟု ပြောခဲ့သည်။

ရှီကျင့်ဖျင် ဗဟိုအာရှအစည်းအဝေး တက်ရောက်စဉ်

ထိုကဲ့သို့သော တွေ့ဆုံမှုများဖြင့် တရုတ်သည် အရင်းအမြစ် ကြွယ်ဝသော ဒေသအတွင်း နိုင်ငံရေးဆိုင်ရာ လွှမ်းမိုးမှု နှင့် စွမ်းအင်ပိုင်ဆိုင်မှု ရရှိရေး ယှဉ်ပြိုင်မှုတွင် ဦးဆောင်နိုင်အောင် လုပ်ဆောင်လျက် ရှိသည်။

ယူကရိန်းစစ်ပွဲကြောင့် ရုရှားတို့ အားနည်းနေချိန်၊ အာဖဂန်မှ အမေရိကန်တပ်များ ထွက်ခွာသွား၍ ဒေသတွင်း အမေရိကန်တို့၏ အင်အားနည်းပါး နေချိန်တွင် ဖြစ်သည်။

ဆိုဗီယက်နိုင်ငံဟောင်းများ၏ ကုန်သွယ်ရေး စင်္ကြန်ကွန်ယက်သည်လည်း ကမ္ဘာတစ်လွှား မတည်ငြိမ်မှုများ ရှိနေချိန်တွင် တရုတ်နိုင်ငံအတွက် လောင်စာ၊ အစားအသောက်နှင့် တခြားသော အရာများကို သယ်ယူ ပို့ဆောင်ရေးဆိုင်ရာ လမ်းကြောင်းတစ်ခုကို ရရှိစေမည်လည်း ဖြစ်သည်။

Source: Aljazeera

CNI News

၂၀၂၃ ခုနှစ်၊ မေလ ၁၂

မလေးရှားဘက်မှ မြန်မာလုပ်သား ခေါ်ယူမှုနှုန်းထားအား ကိုဗစ်မတိုင်ခင် ကာလများကဲ့သို့ အများအပြား ပြန်ရှိ လာစေရန် မြန်မာနိုင်ငံဘက်မှ တာဝန်ရှိသူများ အနေဖြင့် အချိန်ယူ၍ ပြန်ကြိုးစားရမည်ဖြစ်ကြောင်း မလေးရှား တွင် မြန်မာနိုင်ငံသားများအရေး ကူညီဆောင်ရွက်ပေးနေသူများက CNI သတင်းဌာနသို့ ပြောသည်။

ထို့ကြောင့် ယခင်ကကဲ့သို့ မြန်မာလုပ်သားခေါ်ယူမှု များပြားလာစေရန် နှစ်နိုင်ငံဆက်ဆံရေးအားကောင်းရန် လိုအပ်ကြောင်း မလေးရှားတွင် မြန်မာများအား ကူညီဆောင်ရွက်ပေးနေသူ ဦးဘာဘူကြီးက CNI သတင်းဌာနသို့ ပြောသည်။

ဦးဘာဘူကြီးက “လက်ရှိ အနေအထားမျိုးမှာ အဓိက ဘင်္ဂလားဒေ့ရှ်၊ အင်ဒိုနီးရှား ဒီနှစ်နိုင်ငံနဲ့ သူတို့ အလုပ်သမား ခေါ်ယူထားတာ နည်းနည်းနောနော အင်အားတော့ မဟုတ်ဘူး။ ဆိုတဲ့ အနေအထားမျိုးမှာ ဘင်္ဂလားဒေ့ရှ်ကတော့ စက်ရုံရယ်၊ ဆောက်လုပ်ရေး လုပ်ငန်းပိုင်းတွေမှာ အဓိက ဝင်လာတာဖြစ်ပြီး အင်ဒိုနီးရှားကြတော့ သန့်ရှင်းရေးနဲ့ စိုက်ပျိုးရေးတွေမှာ အများဆုံး ဝင်လာထားတဲ့ အနေအထားမျိုးမှာ ရှိတယ်။ နီပေါတို့ ဘာတို့ကနေပြီးတော့ လုံခြုံရေးတွေ ဘာတွေမှာ ဝင်လာတဲ့လူတွေက သူ့ဌာနနဲ့သူ ဝင်လာတဲ့လူတွေက လုံလုံလောက်လောက် ဖြစ်နေ ပြီ။ ရှေ့ဆက်လုပ်ဖို့ဆိုတာ မြန်မာနိုင်ငံသားတွေ အလုပ်သမား ပြန်ခေါ်ယူနိုင်ဖို့အတွက် လုပ်ရမယ်ဆိုရင် ဒါတော် တော်လေး ပြန်ကြိုးစားယူရမှာပေါ့။ ဒီ သံတမန် ရေးရာမှာလည်း တော်တော်လေးကို အင်အားကောင်းပြီးတော့ နှစ်နိုင်ငံ ချစ်ကြည်ရေး၊ နှစ်နိုင်ငံ ဆက်ဆံရေး တော်တော်ကောင်းမွန်မှသာလျှင် ဒါတွေ ပြန်ဖြစ်လာနိုင်တယ်လို့ ကျနော် ထင်တယ်” ဟု ပြောသည်။

 မလေးရှားအစိုးရကို တွေ့ရစဉ်

မလေးရှားသည် လက်ရှိတွင် အခြားနိုင်ငံများမှ လုပ်သားများအား ခေါ်ယူရန် လက်မှတ်ရေးထိုး ချုပ်ဆိုထားသည့် အပြင် အလုပ်လုပ်ကိုင်ခွင့် ပါမစ်များလည်း ယခုနှစ်ကုန်အထိ လျှောက်ခွင့် ပြုထားသည့်အတွက် မြန်မာလုပ်သား အများအပြား ခေါ်ယူမှုမှာ အချိန်ကာလတစ်ခုအထိ ရှိဦးမည်မဟုတ်ကြောင်း မလေးရှား၌ မြန်မာနိုင်ငံသားများ အရေး ကူညီဆောင်ရွက်ပေးနေသူများက သုံးသပ်သည်။

အခြားနိုင်ငံမှ လုပ်သားများအား ခေါ်ယူရန် ခွင့်ပြုထားသော်လည်း အလုပ်ရှင်၏ လုပ်ငန်းလိုအပ်ချက်အရ မြန်မာ လုပ်သားများ ခေါ်ယူမည်ဆိုပါကလည်း မလေးရှားအာဏာပိုင်များထံ တင်ပြနိုင်ကြောင်းလည်း သိရသည်။

သို့သော် လက်ရှိတွင် မလေးရှားနိုင်ငံဘက်မှ မြန်မာလုပ်သားများအား ခေါ်ယူသည့် အလုပ်ခေါ်စာ အသစ်များ သည် မရှိသလောက် နည်းပါးနေကြောင်း၊ ထိုသို့ နည်းပါးရခြင်းသည် လုပ်သားခေါ်ယူရာ၌ ဘင်္ဂလားဒေ့ရှ် အပါအဝင် အခြားနိုင်ငံများထက် မြန်မာဘက်မှ အေဂျင်စီများသို့ ပေးရသည့် ငွေပမာဏများသောကြောင့်ဖြစ်ကြောင်း မလေးရှားတွင် မြန်မာများအား ကူညီပေးနေသူ မွှားမိုက်ကယ်က CNI သတင်းဌာနသို့ ပြောသည်။

မလေးရှားရောက် ရွှေ့ပြောင်းလုပ်သားများကိုတွေ့ရစဉ်

၎င်းက “ဘင်္ဂလား ၃ ယောက်ခေါ်ရင် မြန်မာ ၂ ယောက်ခေါ်တဲ့ ဈေးနှုန်းနဲ့ ကိုက်ညီနေတယ် ဈေးကွက်တော့။ မြန်မာပြည်က ခေါ်မယ်ဆိုရင် မြန်မာပြည်က အစိုးရကို ပေးချေရတဲ့ ငွေကြေးပမာဏက နည်းနည်းများတယ်။ ဥပမာ ဘင်္ဂလား ၃၀ လောက်ခေါ်လို့ရတာကို မြန်မာက အယောက် ၂၀ လောက်ပဲ ခေါ်လို့ရတယ်။ အဲဒီလောက် ငွေကြေး ကွာဟနေတဲ့အတွက် ဒီဘက်က သူဌေးတွေကလည်း အလုပ်သမားကို ဒီပိုက်ဆံအပေါ် မူတည်ပြီးတော့ နီပေါနဲ့ ဘင်္ဂလားကိုပဲ သူတို့ အေးဂျင့်တွေက ဦးတည်ပြီးတော့ ခေါ်တာပေါ့။ အေးဂျင့်တွေ အနေနဲ့ကလည်း ဘင်္ဂလားနဲ့ နီပေါကို ခေါ်တဲ့အတွက် သူတို့ဘက်မှာလည်း charges ပိုကျန်တယ်ပေါ့။ အဲဒါကြောင့် မြန်မာတွေကို တရားဝင် ခေါ်တဲ့ calling visa တွေနဲ့ ခေါ်တာကို အရမ်းနည်းသွားတာပေါ့။ ပြောရမယ်ဆိုရင် အခုနိုင်ငံရေးအရ ဆိုရင်တော့ ဈေးနှုန်းတွေ ချပေးရင်တော့ ကျနော်တို့ နိုင်ငံကလူတွေ အခွင့်အလမ်းတစ်ခုနဲ့ တရားဝင်သွားလို့ရမယ့် အခွင့်အလမ်းလေး ပိုပြီးတော့ ပေါများလာတာပေါ့။ လောလောဆယ်က ဈေးနှုန်းလေးက နည်းနည်းများနေတဲ့ အတွက်ကြောင့် ဒီဘက်က သူဌေးတွေအနေနဲ့က ဈေးချိုတဲ့နိုင်ငံသားကိုပဲ သူတို့ဘက်က ခေါ်သွင်းတာပေါ့” ဟု ပြောသည်။

နှစ်နိုင်ငံအစိုးရ အပြောင်းအလဲများ ဖြစ်သွားပြီး နောက်ပိုင်းတွင် ယခုကဲ့သို့ မြန်မာလုပ်သားများအတွက် အလုပ် ခေါ်စာ အသစ်များဖြင့် အများအပြား ခေါ်ယူမှု မရှိသလောက် နည်းပါးသွားခြင်းဖြစ်ကြောင်း သိရသည်။

ထို့သို့ တရားဝင် ခေါ်ယူမှု မရှိသည့်အတွက် တရားမဝင် လမ်းကြောင်းများမှ ခိုး၍ဝင်ရောက်ကာ အလုပ်လုပ်ကိုင် ရန် ပြင်ဆင်ကြရာတွင် ပွဲစားများထံမှ ငွေကြေးလိမ်လည်ခြင်းများဖြင့်လည်း ကြုံတွေ့ခဲ့ကြရသည်။

လက်ရှိတွင် မလေးရှားနိုင်ငံ၌ တရားဝင် မှတ်ပုံတင်ထားသည့် မြန်မာအလုပ်သမား ၂ သိန်းခန့်ရှိသည့်အပြင် မြန်မာ့နိုင်ငံရေး အပြောင်းအလဲ ဖြစ်ပြီးနောက်ပိုင်း တရားမဝင် ခိုးဝင်လာသူ ဦးရေမှာလည်း အင်မတန် များပြား လှကြောင်း သိရသည်။