- By CNI
- Category: စီးပွားရေး
- Hits: 679
CNI International News
ဟောင်ကောင်၊ မတ်လ ၁၅
အမေရိကန်ဘဏ်နှစ်ခု ပြိုလဲသွားခဲ့ပြီးနောက် ငွေကြေးကဏ္ဍကို ရိုက်ခတ်မှုများ ရှိလာမည်အား စိုးရိမ်မှုဖြင့် စုပြုံရောင်းချခြင်းကြောင့် အာရှဈေးကွက်သည် အင်္ဂါနေ့တွင် ကျဆင်းခဲ့သည်ဟု CNA သတင်းက ဖော်ပြခဲ့သည်။
Silicon Valley နှင့် Signature ဘဏ်တို့ ပိတ်ခဲ့ရမှုတို့ကြောင့် အမေရိကန် အာဏာပိုင်များသည်ပင် တခြားသော ဘဏ်များနှင့် ငွေအပ်နှံသူများအား ထောက်ပံ့ကူညီမှု လုပ်ဆောင်ပေးမည်ဟု ချက်ချင်း ကတိပြုခဲ့ရသည်။
ဖက်ဒရယ်အရံငွေ၊ ဘဏ္ဍာရေးဌာနနှင့် ဖက်ဒရယ်ဘဏ် အပ်နှံငွေ အာမခံကော်ပိုရေးရှင်းတို့၏ ဆောင်ရွက်ချက် သည် ရင်းနှီးမြှုပ်နှံသူများအတွက် ပူပင်မှု လျော့ကျစေခဲ့သော်လည်း ကာစတန်မာများ၏ စိုးရိမ်မှုကြောင့် အမေရိကန်ဘဏ် တချို့၏ ရှယ်ယာတန်ဖိုးကို ထိခိုက်စေခဲ့သည်။
အမေရိကန်သမ္မတနှင့် ဥရောပ ခေါင်းဆောင်များဘက်မှ ရင်းနှီးမြှုပ်နှံသူများ၏ စိုးရိမ်မှုကို ပြေပျောက်စေရန် အာမခံချက် ပေးခဲ့သည့်တိုင် ထိုသို့ ဖြစ်ပွားခဲ့ခြင်း ဖြစ်သည်။
Silicon Valley ဘဏ်ကိုတွေ့ရစဉ်
နည်းပညာ လုပ်ငန်းများတွင် အဓိက အခြေခံသည့် Silicon Valley ဘဏ် ပြိုလဲရမှုသည် ငွေကြေးဖောင်းပွမှုကို ကာမိစေရန် ရည်ရွယ်သည့် FED ၏ အတိုးနှုန်း မြှင့်တင်မှုနှင့် များစွာဆက်စပ်မှု ရှိနေသည်။
ထို့ကြောင့် FED အနေဖြင့် ငွေကြေးဈေးကွက်အတွင်း တည်ငြိမ်မှုရှိစေရန် ယင်း၏ တင်းကြပ်သော ကမ်ပိန်းကို ရပ်တန့်ရန် လိုအပ်သည်ဆိုသည့် ထောက်ပြမှုများအပြင် ချေးငွေစရိတ်ကို ဖြတ်တောက်သင့်သည်ဆိုသော အကြံ ပြုမှုများလည်း ပေါ်ထွက်လာသည်။
Silicon Valley ဘဏ် ပြိုလဲရမှုသည် ဗဟိုဘဏ်များအား အတိုးနှုန်းမြှင့်တင်မှုကို အရှိန်လျော့ရန် ဖိအားဖြစ်စေ သည်ဟု Pictet Asset Management မှ အာရန်ဆိုင် (Arun Sai) က ပြောသည်။
ဘဏ္ဍာရေးစနစ်တွင် တည်ငြိမ်မှု ရှိစေရေးအတွက် ဗဟိုဘဏ်များ အနေဖြင့် နောက်ထပ် အတိုးနှုန်း မြှင့်တင်မှု လုပ်ဆောင်ရန် စဉ်းစားလာရပြီဟုလည်း ၎င်းက ပြောသည်။
အာရှ စတော့ဈေးကွက်ကိုတွေ့ရစဉ်
လက်ရှိ အခြေအနေကြောင့် တနင်္လာနေ့ ဒေါ်လာဈေးကွက်ကို ရိုက်ခတ်မှုများလည်း ဖြစ်စေခဲ့သည်။
ထို့နောက် လက်ရှိ အခြေအနေများက ကမ္ဘာတစ်ဝန်းလုံးရှိ အစိုးရစာချုပ်များ ထုတ်ခြင်းကိုလည်း ရိုက်ခတ်မှု ဖြစ်စေခဲ့ကာ စီးပွားရေးကျဆင်းမှု ပေါ်ပေါက်လာနိုင်ခြေလည်း မြင့်တက်လာသည်ဟု လေ့လာသူများက သတိ ပေးသည်။
ကမ္ဘာ့စာချုပ် ဈေးကွက်သည် ကမ္ဘာ့စီးပွားရေး ကျဆင်းလာမှုကို ညွှန်းဆိုနေကာ ယင်းသည် အာရှဒေသအတွက် ကောင်းမွန်သည့် လက္ခဏာမဟုတ်ဟု Nikko Assest Management မှ ဂျွန်ဗေးလ် (John Vail) က ပြောသည်။
အာရှစတော့ ဈေးကွက်တွင် ကျဆင်းမှုများရှိနေပြီး တိုကျို၊ ဟောင်ကောင်နှင့် ဆိုးလ်တို့တွင် နှစ်ရာခိုင်နှုန်းကျော် ကျဆင်းကာ ဆစ်ဒနီ၊ တိုင်ပေ၊ မနီလာ၊ ဂျကာတာနှင့် ဘန်ကောက်တို့၌ တစ်ရာခိုင်နှုန်းကျော် ကျဆင်းမှု ရှိသည်။
ရှန်ဟိုင်း၊ မွမ်ဘိုင်းနှင့် စင်ကာပူတို့တွင်လည်း ကျဆင်းမှုများ ရှိသည်ဟု သိရသည်။
Source: CNA
- By CNI
- Category: စီးပွားရေး
- Hits: 874
CNI International News
ဒူဘိုင်း၊ မတ်လ ၁၃
ပြီးခဲ့သည့်နှစ်တွင် ဒေါ်လာ ၁၆၁ ဘီလီယံ အမြတ်ရရှိခဲ့သည်ဟု Saudi Aramco ရေနံကုမ္ပဏီက အင်္ဂါနေ့၌ ထုတ်ပြန် ကြေညာခဲ့သည်။
ယင်းသည် အများပိုင်ကုမ္ပဏီတစ်ခု အနေဖြင့် သမိုင်းတစ်လျှောက် စံချိန်တင် အမြတ်ငွေ ပမာဏဖြစ်ကာ တက်ကြွလှုပ်ရှားသူများ၏ ဝေဖန်မှုများကိုလည်း ဖြစ်စေခဲ့သည်ဟု အေပီသတင်းတွင် ဖော်ပြထားသည်။
Saudi Arabian Oil Co., ဟုခေါ်သော ကုမ္ပဏီ၏ စံချိန်တင် အမြတ်ငွေ ရရှိမှုမှာ ၂၀၂၂ ခုနှစ်၊ ဖေဖော်ဝါရီလ ယူကရိန်းအား ရုရှားမှ ကျူးကျော်စစ် ဆင်နွဲခဲ့ခြင်းကနေ ဖြစ်ပေါ်လာသည့် စွမ်းအင်ဈေးနှုန်းများ မြင့်တက်လာ မှုကြောင့် ဖြစ်သည်။
ဆော်ဒီမင်းသားကိုတွေ့ရစဉ်(GETTY IMAGES)
အဆိုပါ ကျူးကျော်မှုကြောင့် ရုရှား၏ ရေနံနှင့် သဘာဝ ဓာတ်ငွေ့များ အနောက်နိုင်ငံ ဈေးကွက်များတွင် ရောင်းချ ခွင့် ကန့်သတ်သည့် ပိတ်ဆို့အရေးယူမှုများ ချမှတ်ခဲ့ခြင်းကြောင့် ဖြစ်သည်။ ကိုရိုနာဗိုင်းရပ်စ်ဆိုင်ရာ ကန့်သတ်မှု များ လျော့ချခဲ့ပြီးနောက် တရုတ်နိုင်ငံသည်လည်း ကမ္ဘာ့ဈေးကွက်အတွင်းသို့ ပြန်လည် ဝင်ရောက်လာချိန်တွင် ဈေးကွက် လိုအပ်ချက်ကို အသုံးချနိုင်ရေး ထုတ်လုပ်မှု တိုးမြှင့်သွားနိုင်ရန် မျှော်လင့်ထားသည်ဟု ကုမ္ပဏီဘက်က ပြောသည်။
ယင်းက ဆော်ဒီနိုင်ငံအား ရေနံအပေါ် မှီခိုနေရမှုမှ ရုန်းထွက်နိုင်ရေး အိမ်ရှေ့မင်းသား မိုဟာမက်ဘင်ဆယ်လ်န် (Mohammed bin Salman) ၏ အနာဂတ် စီမံကိန်းများအတွက် လိုအပ်သော ဒေါ်လာ ဘီလီယံ ပေါင်းများစွာ ကိုလည်း အထောက်အပံ့ ဖြစ်စေနိုင်သည်။
သို့သော် ထိုစီမံကိန်းများသည် ရုပ်ကျွင်းလောင်စာများ လောင်ကျွမ်းခြင်းက ရာသီဥတု ပြောင်းလဲမှုကို မြန်ဆန် လာစေနိုင်မည်ကို စိုးရိမ်နေသောကြောင့် ဝေဖန်မှုများနှင့်လည်း ရင်ဆိုင်နေရသည်။ ထို့အပြင် ရေနံဈေးမြင့် တက် လာမှုကြောင့် အမေရိကန်နှင့် ဆော်ဒီနိုင်ငံတို့ကြား ဆက်ဆံရေး ဆိုးရွားလာစေခဲ့ရုံမက ကမ္ဘာတစ်ဝန်း ငွေကြေး ဖောင်းပွမှုနှုန်းကိုလည်း မြင့်တက်စေခဲ့သည်။
ရုရှားရေနံကိုတွေ့ရစဉ်(GETTY IMAGES)
ကုမ္ပဏီသည် ၂၀၂၁ ခုနှစ်တွင် ဒေါ်လာ ၁၁၀ ဘီလီယံ အမြတ်ငွေ ရရှိခဲ့ပြီး ပြီးခဲ့သည့် နှစ်တွင် ၄၆ ဒသမ ၅ ရာခိုင် နှုန်း မြင့်တက်လာခြင်း ဖြစ်သည်။ ကိုရိုနာဗိုင်းရပ်စ်၏ ဆိုးကျိုးများကို အဆိုးရွားဆုံး ရင်ဆိုင်နေရသည့် ၂၀၂၀ ခုနှစ် တွင် ကုမ္ပဏီ၏ အမြတ်ငွေမှာ ၄၉ ဘီလီယံသာ ရှိခဲ့သည်။
၂၀၂၂ ခုနှစ်တွင် တစ်နေ့လျှင် ရေနံစည် ၁၁ ဒသမ ၅ သန်း ထုတ်လုပ်ရာမှ လာမည့် ၂၀၂၇ တွင် ၁၃ သန်းအထိ တိုးမြှင့် ထုတ်လုပ်နိုင်ရန် ရည်ရွယ်ထားသည်ဟု Aramco က ပြောသည်။
ထုတ်လုပ်မှုကို မြှင့်တင်နိုင်ရန် ယခုနှစ် ငွေရင်းငွေနှီး စီမံကိန်းများတွင် ဒေါ်လာ ၅၅ ဘီလီယံထက် မနည်း အသုံးပြု သွားရန်လည်း စီစဉ်ထားသည်။ ၂၀၂၂ ခုနှစ် နောက်ဆုံး သုံးလပတ်အတွက် အစုရှယ်ယာပေါ် အမြတ်ငွေ ၁၉ ဒသမ ၅ သန်းကို ယခုနှစ်ပထမ သုံးလပတ်တွင် ပေးသွားမည်ဟု ကုမ္ပဏီက ကြေညာခဲ့သည်။
Source: AP
- By CNI
- Category: စီးပွားရေး
- Hits: 856
CNI International News
ဂျင်ဂျိုး၊ မတ်လ ၄
Apple ၏ မိတ်ဖက်ဖြစ်သော Foxconn Technology Group သည် ဒေသတွင်း ထုတ်လုပ်မှုကို မြှင့်တင်ခြင်း အ ဖြစ် အိန္ဒိယတွင် စက်ရုံသစ်တစ်ခု တည်ဆောက်ရန် ဒေါ်လာသန်း ၇၀၀ ရင်းနှီးမြှုပ်နှံမှု လုပ်ဆောင်ရန် စီစဉ်နေ သည်ဟု South China Morning Post သတင်းတွင် ဖော်ပြသည်။
တရုတ်-အမေရိကန် တင်းမာမှုများ မြင့်တက်နေချိန်တွင် ထုတ်လုပ်မှုများအား တရုတ်ပြင်ပတွင် လုပ်ဆောင်ရန် ပြောင်းလဲလာခြင်း ဖြစ်သည်။
Hon Hai Precision Industry ဟုထင်ရှားသော ထိုင်ဝမ်ကုမ္ပဏီသည် ဘန်ဂလော (Bangalore) လေဆိပ် အနီး တွင် ဧက ၃၀၀ ရှိသော နေရာ၌ iPhone အစိတ်အပိုင်းများ ထုတ်လုပ်ရေး စက်ရုံတည်ဆောက်ရန် စီစဉ်နေခြင်း ဖြစ်သည်ဟု ၎င်းနှင့်နီးစပ်သူများက ပြောသည်။
အဆိုပါ စက်ရုံတွင် Apple ၏ ဟမ်းဆက်များကို ထုတ်လုပ်မည်ဖြစ်ပြီး Foxconn သည် ယင်းစက်ရုံကို ၎င်းတို့၏ ဖွံ့ဖြိုးစ လျှပ်စစ်ယာဉ် အစိတ်အပိုင်းများ ထုတ်လုပ်ရန် အသုံးပြုဖွယ်လည်း ရှိသည်။
ယခုကိစ္စသည် Foxconn ၏ အိန္ဒိယတွင် အကြီးမားဆုံး ရင်းနှီးမြှုပ်နှံမှုများမှ တစ်ခုဖြစ်ကာ တရုတ်အနေဖြင့် ကမ္ဘာ့ အကြီးဆုံး လျှပ်စစ်ပစ္စည်း ထုတ်လုပ်သူ နိုင်ငံဆိုသည့် အနေအထားကို ဆုံးရှုံးနိုင်ခြေ ရှိနေသည် ဆိုခြင်းကိုလည်း မီးမောင်းထိုးပြနေသည်။
Apple နှင့်တခြားသော အမေရိကန် ဘရမ်းများသည် တရုတ်အခြေစိုက် supplier များမှ ထွက်ခွာကာ အိန္ဒိယနှင့် ဗီယက်နမ်တို့ ကဲ့သို့သော တခြားနေရာများကို ရှာဖွေလာကြသည်။
ယင်းက ကူးစက်ရောဂါ ဖြစ်ပွားမှု ကာလနှင့် ယူကရိန်းစစ်ပွဲအတွင်း ပေါ်ပေါက်လာသော ကမ္ဘာလုံးဆိုင်ရာ ထောက်ပံ့ရေး လမ်းကြောင်း ပြောင်းလဲမှုဖြစ်ပြီး ကမ္ဘာလုံးဆိုင်ရာ လျှပ်စစ်ပစ္စည်းများ ထုတ်လုပ်မှုပုံစံကိုလည်း ပြောင်းလဲပေးနိုင်ဖွယ်ရှိသည်။
တရုတ်မှာရှိသည့် Foxconn Technology Group ကိုတွေ့ရစဉ်
အိန္ဒိယရှိ စက်ရုံသစ်တွင် အလုပ်အကိုင်နေရာ ၁၀၀၀၀၀ ခန့် ဖန်တီးပေးနိုင်မည်ဟု ခန့်မှန်းကြောင်း အမည်မဖော် လိုသည့် နီးစပ်သူက ပြောသည်။
လက်ရှိ တရုတ်နိုင်ငံ ဂျင်ဂျိုး (Zhengzhou) မြို့ရှိ စက်ရုံတွင် အလုပ်အကိုင် နေရာပေါင်း ၂၀၀၀၀၀ ရှိသော်လည်း ထုတ်လုပ်မှုဆိုင်ရာ အမြင့်ဆုံး အနေအထားတွင် ထိုထက် ပိုများမည် ဖြစ်သည်။
ကိုဗစ်နှင့် ဆက်စပ်နေသော အခြေအနေများကြောင့် ဂျင်ဂျိုးစက်ရုံရှိ ထုတ်လုပ်မှုသည် နှစ်ကုန်ပိုင်း အားလပ်ရက် မတိုင်ခင် ထိုးကျသွားခြင်းကြောင့် Apple အနေဖြင့် တရုတ်ရှိ supplier များ၏ အခြေအနေကို ပြန်လည် စဉ်းစား ရန် ဖြစ်စေသည်။
Foxconn ၏ ဆုံးဖြတ်ချက်ကြောင့် Apple ၏ supplier များသည် တရုတ်မှ ခန့်မှန်းထားသည်ထက် ပို၍ မြန်မြန် ထွက်ခွာမည့် သဘောမျိုးလည်း ဖြစ်သည်။
ယခုအစီအစဉ်သည် တရုတ်မှ ဗီယက်နမ်ဘက်သို့ ပြောင်းလဲလာမည့် အရိပ်အယောင်မျိုးလည်း ဖြစ်သည်။
စက်ရုံတည်ဆောက် ပြီးစီးချိန်တွင် ယင်းသည် အိန္ဒိယ၏ iphone အစိတ်အပိုင်းများ ထုတ်လုပ်နိုင်မှုကို ၁၀ ရာခိုင် နှုန်းမှ ၁၅ ရာခိုင်နှုန်းအထိ မြှင့်တင်ပေးနိုင်မည် ဖြစ်သည်။
လက်ရှိ ထုတ်လုပ်နိုင်မှုမှာ ၅ ရာခိုင်နှုန်းသာ ရှိသည်။
သို့သော် ရင်းနှီးမြှုပ်နှံမှု လုပ်ငန်းစဉ်နှင့် ယင်း၏ အသေးစိတ် အချက်အလက်များမှာ အပြီးသတ်နေဆဲ ဖြစ်ခြင်း ကြောင့် Foxconn ၏ စီမံကိန်းမှာ ပြောင်းလဲသွားနိုင်ခြေ ရှိနေဆဲဖြစ်သည်ဟု နီးစပ်သူများက ပြောသည်။
ထို့အပြင် စက်ရုံသစ်အနေဖြင့် ထုတ်လုပ်မှု အသစ်များကို လုပ်ဆောင်မည်လား သို့မဟုတ် တရုတ်စက်ရုံများမှ ထုတ်လုပ်မှုများကို ပြောင်းရွှေ့လာမည်လား ဆိုသည်ကိုလည်း တိတိကျကျ သိရခြင်း မရှိသေးပေ။
ထိုကိစ္စနှင့်ပတ်သတ်၍ Apple ဘက်မှ တစ်စုံတစ်ရာ ပြောဆိုရန် ငြင်းဆိုထားပြီး Hon Hai ၏ဥက္ကဋ္ဌ ဖြစ်သူက လည်း ဆက်သွယ် မေးမြန်းမှုကို ပြန်လည် ဖြေကြားမှုမရှိသေးပေ။
Source: SCMP
- By CNI
- Category: စီးပွားရေး
- Hits: 596
CNI International News
ကွာလာလမ်ပူ၊ ဖေဖော်ဝါရီ - ၂၅
မလေးရှားဝန်ကြီးချုပ် အန်ဝါ အီဗရာဟင် (Anwar Ibrahim)သည် ရင်းဂစ် ၃၈၈ ဒသမ ၁ ဘီလီယံ တန်ဖိုးရှိ ၂၀၂၃ ခုနှစ်အတွက် ဘက်ဂျက်ကို သောကြာနေ့တွင် ထုတ်ဖော်ကြေညာခဲ့သည်။
အဆိုပါ အစီအစဉ်သည် မလေးရှားသမိုင်း တစ်လျှောက်အမြင့်ဆုံး အသုံးစရိတ်ဖြစ်သည်ဟု CNA သတင်းတွင် ဖော်ပြသည်။
တစ်ဆက်တည်းမှာပင် ၎င်းသည် လူနေမှုစရိတ် လျှော့ချရန် ရည်ရွယ်သည့် လုပ်ဆောင်ချက်များကိုလည်း ထုတ်ပြန် ကြေညာခဲ့သည်။
သောကြာနေ့တွင် တင်သွင်းခဲ့သော ဘတ်ဂျက်ပမာဏသည် ၂၀၂၂ ခုနှစ် ဘတ်ဂျက်ဖြစ်သော ရင်းဂစ် ၃၂၂ ဒသမ ၁ ဘီလီယံ ပမာဏကို ကျော်လွန်နေသည်။
အစ္စမေ ဆာဘရီ ယာယွတ် ဦးဆောင်သော အစိုးရသည် ၂၀၂၃ ခုနှစ်အတွက် ရင်းဂစ် ၃၇၂ ဒသမ ၃ ဘီလီယံ ဘတ်ဂျက်ကို ထုတ်ပြန်ခဲ့သော်လည်း ပြီးခဲ့သည့်နှစ် ၁၅ ကြိမ်မြောက် အထွေထွေရွေးကောက်ပွဲ ကျင်းပရေး အောက်လွှတ်တော်ကို ဖျက်သိမ်းလိုက်ခြင်းကြောင့် ယင်းသည် လွှတ်တော်၏ အတည်ပြုကို မရခဲ့ပေ။
မလေးရှားက စားသောက်ဆိုင်တစ်ဆိုင်ကိုတွေ့ရစဉ်
နိုင်ငံသားအားလုံး အကျိုးရှိစေမည့် စီးပွားရေး တိုးတက်မှုကိုဖြစ်ရန် ရည်ရွယ်ချက်ဖြင့် အစိုးရသည် ၂၀၂၃ ခုနှစ် ဘတ်ဂျက်အတွက် ကျယ်ပြန့်သော ချည်းကပ်မှုကို လုပ်ဆောင်ခဲ့သည်ဟု အန်ဝါက သူ၏ မိန့်ခွန်းတွင် ပြောသည်။
တင်သွင်းခဲ့သော ၃၈၈ ဒသမ ၁ ဘီလီယံ ဘတ်ဂျက်တွင် ၂၈၉ ဒသမ ၁ ဘီလီယံသည် စီမံခန့်ခွဲရေး အသုံးစရိတ်၊ ၉၉ ဘီလီယံသည် ဖွံ့ဖြိုးတိုးတက်မှု အသုံးစရိတ်နှင့် ၂ ဘီလီယံသည် အရေးပေါ် အသုံးစရိတ် ဖြစ်သည်ဟုလည်း ၎င်းက ပြောသည်။
ပြီးခဲ့သည့် နှစ်တွင် ဖွံ့ဖြိုးတိုးတက်ရေးဆိုင်ရာ ဘတ်ဂျက်သည် ၇၁ ဒသမ ၆ ဘီလီယံရှိခဲ့သော်လည်း ယခုနှစ်တွင် ၉၇ ဘီလီယံအထိ မြှင့်တင်ထားသည်ဟု အန်ဝါက နှိုင်းယှဉ်ပြောဆိုခဲ့သည်။
ဝန်ကြီးဌာနများ၌ ပညာရေးဌာနသည် အများဆုံး အသုံးစရိတ်ကို ရရှိမည်ဖြစ်ပြီး ၅၅ ဒသမ ၂ ဘီလီယံဖြစ်ကာ ပြီးခဲ့သည့် ၅၂ ဒသမ ၆ ဘီလီယံထက် ပိုများသည်။
ကျန်းမာရေးဌာနသည်လည်း ပြီးခဲ့သည့်နှစ် ၃၂ ဒသမ ၄ ဘီလီယံထက် ပိုများသော ၃၆ ဒသမ ၃ ဘီလီယံ အသုံး စရိတ်ကို ရရှိမည်ဖြစ်သည်။
မလေးရှား လူစည်ကားရာ နေရာတစ်ခုကိုတွေ့ရစဉ်
၂၀၂၂ ခုနှစ်တွင် ၈ ဒသမ ၇ ရာခိုင်နှုန်း ရှိခဲ့သော နိုင်ငံ၏စီးပွားရေး ဖွံ့ဖြိုးတိုးတက်မှုသည် ၂၀၂၃ ခုနှစ်၌ ၄ ဒသမ ၅ ရာခိုင်နှုန်းသာရှိမည်ဟု ဘဏ္ဍာရေးဝန်ကြီး၏ လွှတ်တော်မိန့်ခွန်း မတိုင်ခင် ထုတ်ပြန်ခဲ့သော စီးပွားရေးနှင့် ဘဏ္ဍာ ရေးဆိုင်ရာ ထုတ်ပြန်ချက်တွင် ဖော်ပြထားသည်။
ငွေကြေးဖောင်ပွမှုနှုန်းသည် ပြီးခဲ့သည့်နှစ် နည်းတူ ၃ ဒသမ ၃ ရာခိုင်နှုန်းဆက် ရှိမည်ဟု ခန့်မှန်းထားပြီး ကမ္ဘာလုံး ဆိုင်ရာ ထောက်ပံ့ရေး အခြေအနေများကြောင့် ယင်းထက် ပို၍ ဆိုးရွားနိုင်သည်ဟုလည်း အန်ဝါက သတိပေး သည်။
ဘဏ္ဍာရေးဆိုင်ရာ လိုငွေပြမှုကို ၂၀၂၃ ခုနှစ်တွင် GDP ၏ ၅ ရာခိုင်နှုန်းအထိ လျှော့ချရန် ရည်ရွယ်ထားကြောင်း ပြီးခဲ့သည့် နှစ်တွင် ၅ ဒသမ ၆ ရာခိုင်နှုန်းရှိကြောင်း နှင့် ၂၀၂၅ ခုနှစ်တွင် ၃ ဒသမ ၂ ရာခိုင်နှုန်းအထိ လျှော့ကျရန် စီစဉ်ထားသည်ဟုလည်း အန်ဝါက ပြောသည်။
Source:CNA
- By CNI
- Category: စီးပွားရေး
- Hits: 746
CNI International News
မော်စကို၊ ဖေဖော်ဝါရီ ၁၁
ရုရှား၏ ရေနံထုတ်လုပ်မှုကို တစ်နေ့လျှင် စည် ၅၀၀၀၀၀(ငါးသိန်း) သို့မဟုတ် ထုတ်လုပ်မှု၏ ၅ ရာခိုင်နှုန်းကို မတ်လမှ စတင်လျှော့ချသွားမည်ဟု ရုရှားဒုတိယဝန်ကြီးချုပ် အလက်ဇန်းဒါး နိုဗက်ခ် (Alexander Novak) က ပြောကြောင်း ရိုက်တာသတင်းတွင် ဖော်ပြထားသည်။
ရုရှားသည် ဆော်ဒီပြီးနောက် ကမ္ဘာ့ ဒုတိယအကြီးမားဆုံး ရေနံတင်ပို့သူဖြစ်ကာ ထုတ်လုပ်မှု လျှော့ချမည့် သတင်း ကြောင့် Brent ရေနံဈေးကွက်တွင် ရေနံတစ်စည်လျှင် ၈၆ ဒသမ ၆ ဒေါ်လာထိ ၂ ဒသမ ၅ ရာခိုင်နှုန်း ကျော်မြင့် တက်သွားသည်။
ယနေ့တွင် ထုတ်လုပ်ထားသော ရေနံပမာဏအားလုံးကို ရောင်းချခဲ့ပြီး ဖြစ်သော်လည်း ပြောခဲ့သည့် အတက် ဈေးနှုန်း သတ်မှတ်ခြင်း (price cap) နည်းလမ်းများကို တိုက်ရိုက် သို့မဟုတ် သွယ်ဝိုက် ကျင့်သုံးသူများဆီ ရေနံ လုံးဝရောင်းချတော့မည် မဟုတ်ဟု နိုဗက်ခ်က ကြေညာချက် တစ်စောင် ထုတ်ပြန်ပြောကြားခဲ့သည်။
ရေနံပိုက်လိုင်းကိုတွေ့ရစဉ်(GETTY IMAGES)
ထို့ကြောင့် လာမယ့် မတ်လတွင် ရုရှားသည် ကိုယ်ပိုင် သဘောထားဖြင့် ရေနံထုတ်လုပ်မှုကို စည် ၅၀၀၀၀၀ လျှော့ချသွားမည်ဖြစ်ကာ ယင်းက ဈေးကွက် အခြေအနေကို ပြန်လည် ထိန်းသိမ်းရန် အထောက်အကူ ဖြစ်စေလိမ့်မည်ဟု ၎င်းက ပြောသည်။
ရေနံထုတ်လုပ်မှုကို လျှော့ချခြင်းနှင့် ပတ်သက်သည့် ဆုံးဖြတ်ချက်အား OPEC + ရေနံထုတ်လုပ်သူများ အဖွဲ့ဝင် တစ်ချို့နှင့် ပြောဆိုဆွေးနွေးခဲ့ပြီး ဖြစ်သည်ဟု ရုရှားအစိုးရက သောကြာနေ့တွင် ပြောသည်။
ထုတ်လုပ်မှုကို ၎င်းတို့သဘောဆန္ဒဖြင့် လျှော့ချမည်ဖြစ်ခြင်းကြောင့် ထိုကိစ္စအပေါ် မည်သည့် တရားဝင် ဆွေးနွေး ညှိနှိုင်းမှုများ လုပ်ဆောင်ရခြင်း မရှိသေးဟု ရုရှားဘက်က နောက်ပိုင်းတွင် ပြောခဲ့သည်။
ထိုကိစ္စနှင့်ပတ်သက်၍ မည်သည့် ဆောင်ရွက်ချက်မှ လုပ်ဆောင်သွားရန် အစီအစဉ်မရှိဟု OPEC + နိုင်ငံနှစ်ခုက ပြောသည်။
ရေနံမှ ရရှိသော ဝင်ငွေကို ကန့်သတ်ရန် ကြိုးပမ်းမှုအဖြစ် အနောက်အုပ်စုက ချမှတ်သော ကန့်သတ်ချက်များ အောက်တွင် ရှိနေသည့် ရုရှားနိုင်ငံအတွက် ထုတ်လုပ်မှုလျှော့ချခြင်းက ဈေးနှုန်းသတ်မှတ်ခြင်းသည် ရုရှား၏ ရေနံထုတ်လုပ်မှုအပေါ် အကျိုးသက်ရောက်မှု ရှိသည်ကို ဖော်ပြနေသည်။
ရုရှားဒုတိယဝန်ကြီးချုပ် အလက်ဇန်းဒါး နိုဗက်ခ်ကိုတွေ့ရစဉ်(GETTY IMAGES)
ယူကရိန်းအပေါ် ရုရှား၏ ကျူးကျော်မှုနှင့် ပတ်သက်၍ ပိတ်ဆို့ အရေးယူမှု တစ်စိတ်တစ်ပိုင်းအဖြစ် တစ်စည်လျှင် ဒေါ်လာ ၆၀ ကျော် ဈေးပေါက်သော ရေကြောင်းမှလာသည့် ရုရှားရေနံများအတွက် အနောက်အုပ်စုမှ ထောက်ပံ့ သည့် ရေကြောင်း အာမခံ၊ ငွေကြေးနှင့် ကြားဝင် ဆောင်ရွက်ပေးမှု စသည်တို့ကို ဒီဇင်ဘာ ၅ ရက်မှ စတင်ကာ ပိတ်ပင်သွားရန် G7၊ အီးယူနှင့် သြစတြေးလျတို့က သဘောတူခဲ့သည်။
အီးယူအဖွဲ့သည် ဖေဖော်ဝါရီ ၅ ရက်မှ စတင်ကာ ရုရှားရေနံထွက် ပစ္စည်းများ ရောင်းချခြင်းကို ပိတ်ပင်ခြင်း၊ ဈေးနှုန်း သတ်မှတ်မှုကို ကျင့်သုံးခြင်း စသည်တို့ကို ချမှတ်ခဲ့သည်။
အပြန်အလှန်အနေဖြင့် ရုရှားဘက်ကလည်း ဈေးနှုန်းသတ်မှတ်ခြင်း လုပ်ငန်းစဉ်တွင် ပါဝင်နေသည့် သဘောတူညီ ချက်များကို ပိတ်ပင်ခဲ့သည်။
Source: Reuters
- By CNI
- Category: စီးပွားရေး
- Hits: 985
ဘဂ္ဂဒက်၊ဖေဖော်ဝါရီ - ၃
အမေရိကန်သည် အီရတ်နိုင်ငံပိုင် ဒေါ်လာများရရှိခွင့်ကို လပေါင်းများစွာ ကန့်သတ်ထားကြောင်း အေပီ သတင်းတွင် ဖော်ပြထားသည်။
ထို ကန့်သတ်ထားခြင်းကြောင့် အီရန်နှင့်ဆီးရီးယားတို့ကို အကျိုးဖြစ်ထွန်းစေသည့် ငွေကြေးခဝါချမှုများ ဖြစ်ပေါ် လာပြီး အီရတ်ကို ဖိနှိပ်နေသည့် အခြေအနေသို့ ရောက်ရှိအောင် လုပ်နေသည်ဟု အီရတ်အာဏာပိုင်များက ပြော သည်။
ထို့ကြောင့် အီရတ်တွင် ငွေကြေးတန်ဖိုးကျ ဆင်းလာခြင်း၊ ဝန်ကြီးချုပ်အပေါ် ပြည်သူများ၏ ဒေါသထွက်ခြင်း စသော ထိလွယ်ရှလွယ်သည့် အနေအထားသို့ ရောက်ရှိလာစေသည်။
အီရတ်နိုင်ငံသုံး ဒီနာငွေကြေး (Iraqi dinar) လဲလှယ်နှုန်းသည် တစ်ဒေါ်လာကို ၁၇၅၀ အထိ မြင့်တက်လာ ကြောင်း၊ ယခင်က ၁၄၆၀ သာရှိသည်။
ကြာသပတေးနေ့တွင် ဘဂ္ဂဒက်(Baghdad)ရှိ နိုင်ငံခြားငွေလဲ လုပ်ငန်းများကို ပိတ်ခဲ့ရပြီး ကာဒစ်စတန် (Kurdistan)ဒေသ အစိုးရသည်လည်း ဆူလိုင်မာနီယာ့ (Sulaimaniyah) ရှိ ငွေလဲကုမ္ပဏီများကို ငွေကြေး လွှဲပြောင်းမှု မလုပ်ရန် တားမြစ်ခဲ့သည်။
အီရတ် ငွေကြေး ဒီနာကိုတွေ့ရစဉ်(AP)
နိုင်ငံတွင်း ငွေမာ ရှားပါးမှုကို လျှော့ချရန် ဗဟိုဘဏ်အနေဖြင့် သီးသန့် ဖက်ဒရယ်ငွေဆိုင်ရာ လိုအပ်ချက်များကို ပြည့်မှီရမည်ဟု အီရတ်လွှတ်တော် ဘတ်ဂျက် ကော်မတီအဖွဲ့ဝင် တစ်ဦးက ပြောသည်။
ငွေကြေးအသုံးပြုခွင့် မြင့်တင်ရေး ပြည်တွင်း လုပ်ငန်းစဉ်များကို ထုတ်ပြန်မည်ဖြစ်ကာ ဆွေးနွေးညှိနှိုင်းမှုများ လုပ်ဆောင်ရန် အီရတ်ကိုယ်စားလှယ် အဖွဲ့တစ်ခုသည် သောကြာနေ့တွင် အမေရိကန်သို့ သွားရောက်မည်ဟု လည်း ၎င်းက ပြောသည်။
ငွေတန်ဖိုး ကျဆင်းလာခြင်းကြောင့် ဆန္ဒပြမှုများ ပေါ်ပေါက်ခဲ့ပြီး ဖြစ်သည်။ ထိုသို့ ဆက်ဖြစ်နေမည်ဆိုလျှင် ယင်းက အောက်တိုဘာလတွင် ဖွဲ့စည်းခဲ့သည့် အီရတ်အစိုးရ၏ လုပ်ပိုင်ခွင့်အတွက် စိန်ခေါ်မှု ဖြစ်စေနိုင်သည် ဟုလည်း လေ့လာသူများက သုံးသပ်သည်။
ရေနံဈေး မြင့်တက်လာမှုကြောင့် အီရတ်၏ နိုင်ငံခြား အရံငွေပမာဏသည် စံချိန်တင် အမြင့်ဆုံး အနေအထားတွင် ရှိနေသော်လည်း ဒီနာ(အီရတ်ငွေကြေး) တန်ဖိုးကျဆင်းမှုနှင့် ကြုံတွေ့နေရခြင်း ဖြစ်သည်။
သို့သော် ထိုငွေကြေးကို ရယူအသုံးပြုခွင့်တွင် အခက်အခဲများ ရှိနေသည်။ ၂၀၀၃ ခုနှစ် အမေရိကန် ကျူးကျော်မှု ကတည်းက အီရတ်၏ နိုင်ငံခြားအရံငွေများသည် အမေရိကန် ဗဟိုဘဏ်သို့ ရောက်ရှိသွားကာ အမေရိကန်ဘက် က အီရတ်၏ ဒေါ်လာ ဝင်ရောက်မှုကို သိသိသာသာ ထိန်းချုပ်ခွင့် ရရှိခဲ့သည်။
ငွေကြေးတန်ဖိုးကျဆင်း၍ အီရတ်မှာ မကျေမနပ်မှုများဖြစ်ပေါ်နေစဉ်(AP)
အီရတ်ဗဟိုဘဏ်က အမေရိကန်ထံမှ ဒေါ်လာများကို တောင်းယူကာ ယင်းတို့ကို ဒေါ်လာလေလံဟု ထင်ရှားသော လုပ်ငန်းစဉ်တွင် တရားဝင် ငွေလဲနှုန်းဖြင့် စီးပွားရေးဘဏ်များ၊ ငွေလဲလုပ်ငန်းများသို့ ရောင်းချရသည်။
ယခင်က ထိုသို့ လေလံဖြင့် ရောင်းချမှုသည် တစ်ခါတစ်ရံတွင် တစ်နေ့အတွင်း ဒေါ်လာသန်း ၂၀၀ ကျော်အထိ မြင့်တက်ခဲ့သည်။
အပြင်ပန်းအားဖြင့် လေလံတွင် ရောင်းချသော ဒေါ်လာအများစုသည် သွင်းကုန် ကုမ္ပဏီးများထံ ရောက်ရှိသွား သည်ဟု ယူဆနိုင်သော်လည်း ယင်းတွင် အားနည်းချက်များနှင့် အလွဲသုံးစားမှုများစွာ ရှိနေသည်ဟု အီရတ်ဘဏ် လုပ်ငန်းနှင့် နိုင်ငံရေးဆိုင်ရာ အရာရှိများက အေပီသို့ ပြောသည်။
Source: AP
- By CNI
- Category: စီးပွားရေး
- Hits: 728
CNI International News
ဘန်ကောက်၊ ဇန်နဝါရီ ၁၆
ဘန်ကောက်မြို့ရှိ တရုတ်တန်းမှ တရုတ်နိုင်ငံသားပိုင် ဆိုင်များတွင် အရင်းအနှီးထည့်ဝင်ထားသော ထိုင်းနိုင်ငံ သားများသည် အများစုထောင်ဒဏ်သုံးနှစ် သို့မဟုတ် ဘတ်တစ်သန်းနှင့် နေ့စဉ်ဒဏ်ကြေးများ ပေးဆောင်ရနိုင် သည်ဟု ထိုင်းနိုင်ငံ၏ စီးပွားရေးဖွံ့ဖြိုးတိုးတက်မှုဌာနမှ အကြီးအကဲဖြစ်သူက သတိပေးလိုက်ကြောင်း Bangkok Post သတင်းတွင် ဖော်ပြသည်။
ဌာန၏ညွှန်ကြားရေးမှူးဖြစ်သူ သိုးဆပန် ဒန်ဆူပူထရာ (Thosapone Dansuputra) က ထိုင်းနိုင်ငံရှိ နိုင်ငံခြားသား ပိုင် စီးပွားရေးလုပ်ငန်းများအပေါ် ကန့်သတ်ခြင်းနှင့် ထိုဥပဒေကို ချိုးဖောက်ခြင်းအတွက် အပြစ်ပေးမှုများကို တနင်္ဂနွေနေ့တွင် အလေးထားပြောကြားခဲ့ခြင်းဖြစ်သည်။ ဘန်ကောက် တရုတ်တန်းတွင် ခရီးသွားဗီဇာ ကိုင်ဆောင်ထားသော တရုတ်နိုင်ငံသားများက ထိုင်းနိုင်ငံသားများ၏ ရင်းနှီးငွေများဖြင့် ဆိုင်များ၊ စားသောက်ဆိုင် များ ဖွင့်လှစ်နေကြပြီး ယင်းက ဒေသခံများ၏ စီးပွားရေးကို ထိခိုက်စေသည်ဟု ဈေးသည်တစ်ဦးက တိုင်ကြားခဲ့ပြီး နောက် ထိုကဲ့သို့ထွက်ပေါ်လာခဲ့ခြင်းဖြစ်သည်။
ဘန်ကောက်မြို့ တရုတ်တန်း(ဓါတ်ပုံ- ဘန်ကောက်ပို့စ်)
ထိုင်းဥပဒေအရ နိုင်ငံခြားသားများအနေဖြင့် ထိုင်းနိုင်ငံအတွင်း အစားအသောက်နှင့် အဖျော်ယမကာလုပ်ငန်း စတင်ရန်အတွက် ထိုင်းနိုင်ငံ စီးပွားရေးဖွံ့ဖြိုးတိုးတက်မှုဌာန၏ ခွင့်ပြုချက်လိုအပ်ကြောင်း၊ ဒေသခံများ၏ မတည်ငွေကို အသုံးပြုထားသော တရားမဝင် စီးပွားရေးလုပ်ငန်းများကို ရှာဖွေဖော်ထုတ်သွားမည်ဖြစ်ကြောင်း လည်း သိုးဆပန်က ပြောခဲ့သည်။
နိုင်ငံခြားသားများနှင့်စပ်တူလုပ်ငန်းလုပ်ကိုင်သော ထိုင်းနိုင်ငံသားများသည် ၎င်းတို့ အမှန်တကယ်လုပ်ငန်း လုပ်ဆောင်သည်ဆိုသည့် ဘဏ်မှစာရွက်စာတမ်းများကို ပြသရမည်ဖြစ်ကာ စီးပွားရေးဖွံ့ဖြိုးတိုးတက်မှုဌာနနှင့် အလုပ်သမားဝန်ကြီးဌာနတို့မှ ဝန်ထမ်းများသည် ထိုသို့ ချိုးဖောက်မှုများကို ပုံမှန်စစ်ဆေးမှုများ လုပ်ဆောင်နေ သည်ဟုလည်း ၎င်းက ပြောသည်။
နိုင်ငံခြားသားများကို ငွေအရင်းအနှီးထုတ်ပေးထားသူများ၊ တရားဝင် စာရွက်စာတမ်းမရှိဘဲ စပ်တူလုပ်ကိုင်နေ သည့် ထိုင်းနိုင်ငံသားများသည် ထောင် ၃ နှစ် သို့မဟုတ် ဘတ် ၁ သန်း ဒဏ်ငွေအပြင် ချိုးဖောက်မှုကို မရပ်မချင်း ဒဏ်ကြေး ဘတ် ၁၀၀၀၀(တစ်သောင်း) မှ ၅၀၀၀၀ (ငါးသောင်း) အထိ ပေးဆောင်ရမည်ဟုလည်း ၎င်း၏ ပြောဆိုမှု တွင် ပါဝင်သည်။ သမိုင်းကြောင်း၊ အစားအသောက် အရည်အသွေးနှင့် လုပ်ဆောင်ချက်များကြောင့် ဘန်ကောက်မြို့ရှိ တရုတ်တန်းသည် ပြီးခဲ့သည့်နှစ်တွင် လည်ပတ်ရန်အကောင်းဆုံး ကမ္ဘာ့ပေါ်ရှိ လမ်းများတွင် နံပါတ် ၈ နေရာရှိခဲ့သည်။
Source:Bangkokpost
- By CNI
- Category: စီးပွားရေး
- Hits: 558
CNI International News
အဘူဒါဘီ၊ဇန်နဝါရီ ၁၆
စစ်လက်နက် ရောင်းဝယ်မှုကို မြှင့်တင်ရန် မျှော်လင့်ထားသော ခရီးစဉ်အဖြစ် တောင်ကိုရီးယားသမ္မတ ယွန်ဆော့ရွဲ(Yoon Suk Yeol) သည် တနင်္ဂနွေနေ့တွင် ယူအေအီးနိုင်ငံသို့ ရောက်ရှိခဲ့သည်ဟု အေပီသတင်းတွင် ဖော်ပြထားသည်။
တောင်ကိုရီးယားနှင့် ယူအေအီး တို့အကြား ဒေါ်လာ ဘီလီယံနှင့်ချီ စီပွားရေး သဘောတူညီချက်များ၊ ယူအေ အီးကို ကာကွယ်ရေး အထူးတပ်ဖွဲ့ဝင်များ ချထားရေး စသည့်ကိစ္စရပ်များ ပူးပေါင်းဆောင်ရွက်ရန် ရှိနေပြီးနောက် ယွန်၏ ခရီးစဉ်ပေါ် ပေါက်ခဲ့ခြင်းဖြစ်သည်။
ထိုသဘောတူညီချက်သည် တောင်ကိုရီးယားသမ္မတဟောင်း လက်ထက်တွင် ဝေဖန်မှုများနှင့် ရင်ဆိုင်ခဲ့ရသည်။
ထို့အပြင် ၂၀၂၁ ခုနှစ်တွင် ယူအေအီး၏ အိမ်နီးချင်း အီရန်က အဆိုပါကိစ္စများကြောင့် တောင်ကိုရီးယား ရေနံတင် သင်္ဘောတစ်စင်းကို သိမ်းဆည်းလိုက်သည်အထိ တင်းမာမှုများလည်း ဖြစ်ခဲ့သည်။
ယူအေအီး ခေါင်းဆောင် ရှိတ်မိုဟာမက် ဘင်ဇာယတ် အယ်လ်နာယန်ကိုတွေ့ရစဉ်(AP)
ထိုသို့ တင်းမာမှုများ ရှိနေသော်လည်း တောင်ကိုရီးယားသမ္မတသည် နှစ်နိုင်ငံကြား စစ်ဘက်ဆိုင်ရာ ဆက်သွယ်မှု များကို မြှင့်တင်ရန် ကြိုးပမ်းခဲ့ခြင်း ဖြစ်သည်။
ပထဝီနိုင်ငံရေးအရ အရှေ့အလယ်ပိုင်းသည် စဉ်ဆက်မပြတ် ပြောင်းလဲနေကြောင်း၊ ထို့ကြောင့် တောင်ကိုရီးယား အနေဖြင့် ယူအေအီးနှင့် ဆက်သဆံရေးကို သေချာအောင် ဆောင်ရွက်ခြင်း ဖြစ်ကြောင်း နိုင်ငံတကာ မဟာဗျူဟာ ဖိုရမ်မှ အဖွဲ့ဝင်တစ်ဦးက ပြောသည်။
တောင်ကိုရီးယား သမ္မတသည် အဘူဒါဘီရှိ ကာအယ်လ်ဝါတန် (Qasr Al Watan) နန်းတော်၌ ယူအေအီး ခေါင်းဆောင် ရှိတ်မိုဟာမက် ဘင်ဇာယတ် အယ်လ်နာယန် (Sheik Mohammed bin Zayed Al Nahyan) နှင့် တွေ့ဆုံခဲ့ကာ ရှိတ်မိုဟာမက်က တောင်ကိုရီးယားတွင် ဒေါ်လာ ဘီလီယံ ၃၀ ရင်းနှီးမြှုပ်နှံရန် စီစဉ်ထားသည်ဟု ပြောကြောင်း တောင်ကိုရီးယားနိုင်ငံပိုင် ယွန်ဟတ် သတင်းတွင် ဖော်ပြသည်။
အတိအကျကိုမူ ရှင်းလင်းထား ခြင်းတော့ မရှိပေ။ တောင်ကိုရီးယားနိုင်ငံသည် ရေနံအတွက် ယူအေအီးကို မှီခိုနေ ရသော်လည်း ပင်လယ်ကွေ့နိုင်ငံများနှင့် ရေနံအပြင် တခြားသော သဘောတူညီချက်များစွာ ရရှိထားသည်။
တောင်ကိုရီးယားနှင့် ယူအေအီးတို့အကြား ကား အပါအဝင် တခြားသော ကုန်ပစ္စည်းများအတွက် ကုန်သွယ်မှု တန်ဖိုးမှာ ဒေါ်လာဘီလီယံချီ ရှိသည်။
ယူအေအီး ခေါင်းဆောင် ရှိတ်မိုဟာမက် ဘင်ဇာယတ် အယ်လ်နာယန်နဲ့ တောင်ကိုရီးယား သမ္မတ ယွန်ဆော့ရွဲကိုတွေ့ရစဉ် (AP)
ယွန်၏ခရီးစဉ်တွင် ဆမ်ဆောင်း၊ ဟွန်ဒိုင်းနှင့် တခြားသော စီးပွားရေး လုပ်ငန်းများမှ အရာရှိများလည်း ပါဝင်ခဲ့ကာ ယခုခရီးစဉ်သည် နှစ်နိုင်ငံကြား ဆက်ဆံရေးကို ခိုင်မာမှုရှိစေရန် လုပ်ဆောင်ခြင်းဖြစ်သည်ဟုလည်း ခရီးစဉ်မတိုင် ခင် ကတည်းက သတ်မှတ်ခဲ့သည်။
အဆိုပါ ခရီးစဉ်တွင် လက်နက်ရောင်းဝယ်ရေး ကိစ္စရပ်များပါ ထည့်သွင်း ဆွေးနွေးရန် ဆောင်ရွက်ထားသည်ဟု အမည်မဖော်လိုသော သမ္မတရုံး အရာရှိတစ်ဦး၏ ပြောဆိုမှုကို ကိုးကား၍ ယွန်ဟတ်သတင်းတွင် စနေနေ့က ဖော်ပြခဲ့သည်။
တောင်ကိုရီးယားနှင့် ယူအေအီး နှစ်နိုင်ငံကြား M-SAM ရောင်းချခြင်းအတွက် ၂၀၂၂ ခုနှစ်တွင် ဒေါ်လာ ၃ ဒသမ ၅ ဘီလီယံ တန်ကြေးရှိ သဘောတူညီချက် ရရှိခဲ့ပြီးဖြစ်သည်။ M-SAM သည် ၄၀ ကီလိုမီတာ အောက်တွင် အလုပ် လုပ်သော ဒုံးခွင်းလေကြောင်း ကာကွယ်ရေးစနစ်တစ်ခု ဖြစ်သည်။
ယူအေအီးအာဏာပိုင်များသည် အီရန်မှ ထောက်ပံ့ထားသော ယီမင်ရှိ ဟူသီသူပုန်များ၏ တာဝေးပစ် ဒုံးကျည်များ ဖြင့် ပစ်မှတ်ထား ခံခဲ့ရမှုကြောင့် ၎င်းတို့၏ လေကြောင်းပိုင်နက်ကို ကာကွယ်ရန် အရှိန်မြှင့်လျက်ရှိသည်။
Source: AP
- By CNI
- Category: စီးပွားရေး
- Hits: 2208
CNI News
၂၀၂၃ ခုနှစ်၊ ဇန်နဝါရီ ၆
မလေးရှားနိုင်ငံသည် ယခင်ကကဲ့သို့ အလုပ်အကိုင် ကောင်းပြီး ပိုက်ဆံရှာရန် ကောင်းမွန်သော နိုင်ငံတစ်ခု မဟုတ် သည့်အပြင် မြန်မာနိုင်ငံမှ အလုပ်သမားများအား တရားဝင် ခေါ်ယူမှု မရှိသည့်အတွက် လက်ရှိတွင် လာရောက် အလုပ် မလုပ်ကိုင်သင့်သေးကြောင်း မလေးရှားရှိ မြန်မာ အဖွဲ့အစည်းများက CNI သတင်းဌာနသို့ ပြောသည်။
မလေးရှားနိုင်ငံတွင် နိုင်ငံခြားသား အလုပ်သမားများအား တရားဝင် ခေါ်စာများဖြင့် ခေါ်ယူနေသော်လည်း မြန်မာများ မပါဝင်သည့်အတွက် လာရောက် မလုပ်ကိုင်သင့်သေးကြောင်း မလေးရှား၌ မြန်မာများအား ကူညီဆောင်ရွက် ပေးနေသူ ဦးဘာဘူကြီးက CNI သတင်းဌာနသို့ ပြောသည်။
မလေးရှားရှိ စက်ရုံတစ်ရုံကိုတွေ့ရစဉ်
၎င်းက “အခုအချိန်မှာတော့ ကျနော်ကတော့ မလာသင့်တော့ဘူးလို့ ထင်တယ်။ မလေးရှားကလည်း အရင်ကလိုမျိုး ကောင်းတော့တာ မဟုတ်ပါဘူး။ လောလောဆယ် အခြေအနေမှာ သူလည်း အခြေအနေ ကောင်းနေတာ မဟုတ်ဘူး။ ဟိုအရင်ကလိုမျိုး လျှမ်းလျှမ်းတောက် ပိုက်ဆံရှာလို့ ကောင်းတဲ့ နိုင်ငံလည်း မဟုတ်တော့ပါဘူး။ ကောင်းတဲ့နိုင်ငံ မဟုတ်ဘူးဆိုတာ အခုအချိန်မှာ နိုင်ငံခြားသား အလုပ်သမားတွေကလည်း အရမ်းပေါများနေပြီ။ အလုပ်သမား လိုအပ်ချက်တွေ ရှိနေတာတောင်မှ ကျနော်တို့ မြန်မာနိုင်ငံသားတွေကို တရားဝင် ခေါ်စာ ချပေးတာမျိုး မရှိဘူး။ ဒီစက်ရုံ တစ်ရုံက မြန်မာနိုင်ငံသား အလုပ်သမားတွေကို ကြိုက်မှသာလျှင် အယောက် ၅၀၊ အယောက် ၁၀၀ အဲဒီလို အနည်းအကျဉ်း ခေါ်တာမျိုးတွေပဲ ရှိတယ်လေ။ အဲဒါကြောင့်မို့လို့ အလုပ် မလေးရှားကို ဦးတည်ပြီး လာမယ်ဆိုရင်တော့ လောလောဆယ် အခြေအနေကတော့ အခက်အခဲတွေ အများကြီး ရှိမယ်။ လောလောဆယ် အခြေအနေကတော့ မလေးရှားထက် ကောင်းမယ့်နိုင်ငံ ရှိမယ်ဆိုရင် မလေးရှားကို မလာသင့် သေးဘူးလို့ ကျနော် ထင်တယ်။ ဒီထဲမှာ တရားဝင် calling နဲ့ လာတဲ့ လူတွေအတွက်ကတော့ ပြဿနာ မရှိပါဘူး။ ဟိုအရင်ကလို လခ မကောင်းခဲ့ရင်တောင်မှ basic လေးနဲ့ မှိန်းနေလို့ ရသေးတာပေါ့နော်” ဟု ပြောသည်။
လက်ရှိတွင် မလေးရှားနိုင်ငံ၌ အလုပ်လုပ်ကိုင်လျက်ရှိသည့် မြန်မာအလုပ်သမားများ အနေဖြင့်လည်း အလုပ်အကိုင် အဆင်မပြေခြင်းများ ရှိနေကြကြောင်းလည်း သိရသည်။
မလေးရှားနိုင်ငံသို့ တရားဝင် လာရောက် လုပ်ကိုင်ခြင်းသည် မည်သည့် ပြဿနာမျှ မရှိသော်လည်း တရားမဝင် လာရောက်ပါက ၎င်းနိုင်ငံထဲတွင် အသိမိတ်ဆွေများ ရှိမှသာ အဆင်ပြေမည်ဖြစ်ကြောင်း မလေးရှားရှိ မြန်မာ အဖွဲ့အစည်းများက CNI သတင်းဌာနသို့ ပြောသည်။
မြန်မာအလုပ်သမားများ မလေးရှားမှာ ဖမ်းဆီးခံရစဉ်
မလေးရှားနိုင်ငံသို့ သွားရောက် အလုပ်လုပ်ကိုင်မည်ဆိုပါက မတားလိုသော်လည်း သေချာစွာ စုံစမ်း လေ့လာပြီး မှသာ သွားရောက် အလုပ်လုပ်ကိုင်စေလိုကြောင်း မလေးရှားမှ မြန်မာရွှေ့ပြောင်း အလုပ်သမား ကူညီမှု အဖွဲ့အစည်းမှ အထွေထွေအတွင်းရေးမှူး ဦးချစ်ကောင်းက CNI သတင်း ဌာနသို့ ပြောသည်။
၎င်းက “ဟိုဘက်မှာ ကိုယ့်ရဲ့ လူခံလေးပေါ့နော်။ တယောက်ယောက်ပေါ့။ သူငယ်ချင်းသော်လည်းကောင်း တစ်ဦး ဦးရှိလို့ ကိုယ်သွားတယ်ဆိုရင်တော့ ရာနှုန်းပြည့် မဟုတ်ပေမယ့် ၆၀ ရာခိုင်နှုန်းလောက်ကတော့ အဆင်ပြေတာ ပေါ့ တစ်ဖက်လူရဲ့ ကူညီပံ့ပိုးမှုနဲ့။ လုံးဝ ဘာမှ မရှိပဲနဲ့ သွားတဲ့လူဆိုရင်တော့ နည်းနည်းတော့ အခက်အခဲတော့ ရှိတာပေါ့ အလုပ်သွားလုပ်ဖို့အတွက် ဆိုရင်တော့။ အဓိကက ဘာသာစကားရှိမယ်။ သူ့ရဲ့ နယ်မြေ မကျွမ်းကျင်မှု တွေ ရှိမှာပေါ့။ အဲဒီတော့ ဟိုဘက်မှာ လူခံရှိပြီးသွားတာကတော့ ပိုအဆင်ပြေတာပေါ့။ လူခံမရှိပဲ သွားတဲ့လူတွေ အတွက် ကြတော့လည်း သူ့ဘက်က ဘာကျွမ်းကျင်မှုရှိလဲ။ ဘာသာစကား ကျွမ်းကျင်လား။ ဘာသာစကား ကျွမ်းကျင်မှု ရှိတယ်ဆိုရင်တော့ အဆင်ပြေတယ်။ ဘာသာစကားလည်း မကျွမ်းကျင်ဘူး ဟိုဘက်မှာ လူခံလည်း မရှိဘူး။ ဒီအတိုင်းချည်းပဲ ကိုယ်က သွားပြီးတော့ စမ်းသပ်တဲ့အနေနဲ့ သွားမယ်ဆိုရင်တော့ အဲဒါကတော့ အဆင် မပြေ နိုင်ဘူး” ဟု ပြောသည်။
မလေးရှိ အထည်ချုပ်စက်ရုံကိုတွေ့ရစဉ်
လက်ရှိတွင် မလေးရှားနိုင်ငံ၌ အဖမ်းအဆီးများမှာ ရပ်တန့်သွားခြင်း မရှိသေးကြောင်း၊ တရားမဝင် အထောက် အထားမဲ့ မြန်မာများ နေ့စဉ် ဖမ်းဆီးခံရနေရသည်ကို တွေ့ရှိရကြောင်း မလေးရှားရှိ မြန်မာ အဖွဲ့အစည်းများက CNI သတင်းဌာနသို့ ပြောသည်။
ထို့နောက် လက်ရှိ မြန်မာနိုင်ငံသားများ အနေဖြင့် ကိုဗစ်မတိုင်ခင်က ခေါ်စာကျထားပြီးသား အလုပ်သမားများသာ တရားဝင် သွားရောက်နေရခြင်းဖြစ်ပြီး အများစုသည် တရားမဝင် လမ်းကြောင်းများမှ တဆင့် မလေးရှား နိုင်ငံထဲ သို့ ခိုးဝင်ကာ အလုပ်လုပ်ကိုင်ရန်နှင့် ဒုက္ခသည်အဖြစ် ခံယူရန် သွားရောက်နေကြခြင်း ဖြစ်သည်။
ထို့ကြောင့် မလေးရှားသို့ လာရောက် အလုပ်လုပ်ကိုင်မည်ဆိုပါက ပြဿနာမရှိသည့် တရားဝင် ခေါ်စာများဖြင့်သာ လာရောက် အလုပ်လုပ်ကိုင်ကြရန်နှင့် လာရောက် အလုပ်လုပ်ကိုင်မည် ဆိုပါကလည်း တရားဝင် မြန်မာအလုပ် သမားများ ခေါ်ယူသည့် အခါမှသာ လာရောက်သင့်ကြောင်း မလေးရှားရှိ မြန်မာ အဖွဲ့အစည်းများက အကြံပြုသည်။
- By CNI
- Category: စီးပွားရေး
- Hits: 2183
CNI International News
ဆိုးလ်၊ဒီဇင်ဘာ၂၃
မြောက်ကိုရီးယား ဟက်ကာများသည် ပြီးခဲ့သည့် ငါးနှစ်အတွင်း ဝမ် ၁ ဒသမ ၅ ထရီလီယမ် (ဒေါ်လာ ၁ ဒသမ ၂ ဘီလီယံ) ခန့်မှန်းခြေ တန်ကြေးရှိသော crypto ငွေကြေးနှင့် တခြားသော အွန်လိုင်းပိုင်ဆိုင်မှုများကို ခိုးယူခဲ့သည် ဟု တောင်ကိုရီးယား ထောက်လှမ်းရေး အေဂျင်စီက ကြာသပတေးနေ့(ဒီဇင်ဘာ ၂၂ ရက်)တွင် ပြောခဲ့သည်ဟု အေပီက ရေးသားဖော်ပြခဲ့သည်။
အဆိုပါ မြောက်ကိုရီးယား ဟက်ကာများသည် ဒေါ်လာ ၁ ဒသမ ၂ ဘီလီယံအနက် တစ်ဝက်ကျော်ကို ယခုနှစ် တစ်နှစ်ထဲအတွင်း ခိုးယူခဲ့ခြင်း ဖြစ်သည်။
မြောက်ကိုရီးယားနိုင်ငံသည် ၎င်းတို့၏ ယိုင်နဲ့နေသော စီးပွားရေး အခြေအနေကို ထောက်ပံ့ရန် ဆိုးဆိုးရွားရွား လိုအပ်နေသော နိုင်ငံခြားငွေကြေးအား ကာမိစေရန်နှင့် နျူကလီးယား ပရိုဂရမ်များအတွက် ရံပုံငွေရရှိရန် crypto hacking နှင့်တခြားသော တရားမဝင် ဆိုက်ဘာလုပ်ငန်းများကို လုပ်ဆောင်ခဲ့သည်ဟု ကျွမ်းကျင်သူများနှင့် အာဏာပိုင်များက ပြောသည်။
မြောက်ကိုရီးယားခေါင်းဆောင်ကိုတွေ့ရစဉ် (AP)
ကုလသမဂ္ဂ၏ အရေးယူ ပိတ်ဆိုမှုနှင့် ကိုဗစ်-၁၉ ကူးစက်ရောဂါ အခြေအနေများကြောင့် ယခုကဲ့သို့ လိုအပ်နေခြင်း လည်း ဖြစ်သည်။ မြောက်ကိုရီးယား၏ နျူကလီးယားနှင့် ဒုံးကျည် စမ်းသပ်မှုများကြောင့် ကုသသမဂ္ဂက ၎င်းတို့ကို ၂၀၁၇ ခုနှစ်တွင် ပိတ်ဆို့ အရေးယူမှုများ စတင်ခဲ့သည်။
ထိုအချိန်မှစ၍ ဆိုက်ဘာလုပ်ငန်းများကို အာရုံစိုက် ဆောင်ရွက်ခဲ့ခြင်းကြောင့် မြောက်ကိုရီးယား၏ ဒစ်ဂျစ်တယ် ပိုင်ဆိုင်မှုများအားပေး ခိုးယူနိုင်မှုသည် ကမ္ဘာ့အကောင်းဆုံး စာရင်းဝင် ဖြစ်ခဲ့သည်ဟု တောင်ကိုရီးယားနိုင်ငံ၏ ပင်မထောက်လှမ်းရေးအေဂျင်စီ(NIS)က ပြောသည်။
မြောက်ကိုရီးယားအပေါ် ကုလသမဂ္ဂ၏ ၂၀၁၆-၂၀၁၇ အရေးယူ ပိတ်ဆို့မှုများတွင် ကျောက်မီးသွေး၊ ချည်မျှင်နှင့် ပင်လယ်စာ စသော ပို့ကုန်ပစ္စည်းများ ပါဝင်နေပြီး အဖွဲ့ဝင် နိုင်ငံများကိုလည်း မြောက်ကိုရီးယား လုပ်သားများကို လက်မခံရန် တားမြစ်ခဲ့သည်။
ထို့အပြင် ကိုဗစ်ကပ်ရောဂါ ကာလအတွင်း ကမ္ဘာပေါ်တွင် အတင်းကြပ်ဆုံး စည်းမျဉ်းများ ချမှတ်ခဲ့ခြင်းကြောင့် နိုင်ငံ၏ စီးပွားရေး အခြေအနေမှာ ပိုပြီး ဆိုးရွားခဲ့ရသည်။
မြောက်ကိုရီးယား ဟက်ကားနည်းပညာ သင်တန်းခန်းကိုတွေ့ရစဉ် (GETTY IMAGES)
အစိုးရပိုင်းမှ ပါဝင် ပတ်သက်နေသော မြောက်ကိုရီးယား ဟက်ကာများသည် ၂၀၁၇ ခုနှစ်မှ စတင်ကာ ကမ္ဘာ တစ်ဝန်းရှိ ဒစ်ဂျစ်တယ် ပိုင်ဆိုင်မှုပေါင်း ဝမ် ၁ ဒသမ ၅ ထရီလီ ယံ (ဒေါ်လာ ၁ ဒသမ ၂ ဘီလီယံ) ကို ခိုးယူခဲ့ပြီး ၂၀၂၂ တစ်နှစ်အတွင်း ခိုးယူမှု စုစုပေါင်းမှာ ဝမ် ၈၀၀ ဘီလီယံ (ဒေါ်လာ ၆၂၆ သန်း) ရှိကြေင်း NIS က ပြောသည်။
၎င်းတို့မှ ဝမ်ဘီလီယံ ၁၀၀ (ဒေါ်လာ ၇၈ သန်း) မှာ တောင်ကိုရီးယားနိုင်ငံမှ ဖြစ်သည်။
မြောက်ကိုရီးယား ဟက်ကာများသည် တောင်ကိုရီးယား နည်းပညာများအပြင် နိုင်ငံ၏ နိုင်ငံခြားရေးနှင့် လုံခြုံရေး ဆိုင်ရာ လျှို့ဝှက်ချက်များကို ခိုးယူရန် ဆိုက်ဘာတိုက်ခိုက်မှုများ ပိုမိုလုပ်ဆောင် လာလိမ့်မည်ဟု NIS က ခန့်မှန်း ထားသည်။
နိုင်ငံ၏ စီးပွားရေး ချွတ်ချုံကျနေသော်လည်း မြောက်ကိုရီးယား အစိုးရသည် ယခုနှစ်အတွင်း စံချိန်တင် ဒုံးကျည် စမ်းသပ်မှုများကို ပြုလုပ်ခဲ့သည်။ ယင်းမှာ ၎င်းတို့၏ လက်နက်တိုက်ကို အဆင့်မြှင့်တင်ရန် အပြင် ပြိုင်ဘက်များ နှင့် ဆွေးနွေး ညှိနှိုင်းရာတွင် ပိုမိုအသာစီး ရရှိရေး ကြိုးပမ်းခြင်းဟု ကျွမ်းကျင်သူများက ကောက်ချက်ချသည်။
Source: AP
Page 28 of 35
Connect with us
