CNI Sport Article

၂၀၂၅ ခုနှစ်၊ ဇူလိုင် ၂၅

ဆွစ်ဇာလန်နိုင်ငံမှာ ကျင်းပနေတဲ့ ၂၀၂၅ အမျိုးသမီး ယူရိုပြိုင်ပွဲဟာ ဗိုလ်လုပွဲကို ရောက်ရှိလာခဲ့ပြီဖြစ်ပါတယ်။

ဒီဗိုလ်လုပွဲမှာ လက်ရှိချန်ပီယံ အင်္ဂလန်နဲ့ စပိန်အသင်းတို့ ယှဉ်ပြိုင်ကြရမှာဖြစ်ပါတယ်။

အင်္ဂလန်နဲ့စပိန်အသင်းဟာ ပြီးခဲ့တဲ့ ၂၀၂၃ အမျိုးသမီး ကမ္ဘာ့ဖလားပြိုင်ပွဲ ဗိုလ်လုပွဲမှာ ထိပ်တိုက်တွေ့ဆုံ ခဲ့ပြီးနောက် အမျိုးသမီး ယူရိုပြိုင်ပွဲ ဗိုလ်လုပွဲမှာ ထပ်မံတွေ့ဆုံကြရမှာပါ။ 

၂၀၂၃ ကမ္ဘာ့ဖလားပြိုင်ပွဲ ဗိုလ်လုပွဲမှာ စပိန်အသင်းက အင်္ဂလန်အသင်းကို ၁ ဂိုး-ဂိုးမရှိနဲ့ အနိုင်ရပြီး ချန်ပီယံဆုကို ရယူနိုင်ခဲ့တာဖြစ်ပါတယ်။

အဲဒါကြောင့် အမျိုးသမီး ယူရိုပြိုင်ပွဲ ဗိုလ်လုပွဲဟာ အင်္ဂလန်နဲ့ စပိန်အသင်းအတွက် ကမ္ဘာ့ဖလားဗိုလ်လုပွဲ မကျေပွဲ အဖြစ် တွေ့ဆုံရမယ့် ပွဲစဉ်လည်း ဖြစ်တာပါ။

စပိန်နဲ့အင်္ဂလန်အသင်း ယှဉ်ပြိုင်စဉ်

အင်္ဂလန်အသင်းဟာ ၂၀၂၂ အမျိုးသမီး ယူရိုပြိုင်ပွဲမှာ ချန်ပီယံဆုကို ပထမဆုံးအကြိမ် ရယူနိုင်ခဲ့ပြီးနောက် ယူရိုဗိုလ်လုပွဲကို ၂ ကြိမ်ဆက် တက်နိုင်ခဲ့သလို နိုင်ငံတကာပြိုင်ပွဲတွေရဲ့ ဗိုလ်လုပွဲတွေကို ၃ ကြိမ်ဆက် တက်နိုင်ခဲ့တာ ဖြစ်ပါတယ်။ 

စပိန်အသင်းကတော့ သူတို့အသင်း သမိုင်းတစ်လျှောက် ယူရိုအမျိုးသမီး ဗိုလ်လုပွဲကို ပထမဆုံးအကြိမ် တက်နိုင် ခဲ့တာပါ။

စပိန်အသင်းဟာ ကမ္ဘာ့ချန်ပီယံဆုကို ရယူနိုင်ခဲ့သလို ပြီးခဲ့တဲ့ နေးရှင်းလိဂ်ပြိုင်ပွဲမှာလည်း ချန်ပီယံဆုကို ရယူကာ အကောင်းဆုံး အသင်းအဖြစ် ရပ်တည်နေတာ ဖြစ်ပါတယ်။ 

စပိန်အသင်းအနေနဲ့ ယူရိုပြိုင်ပွဲမှာသာ ချန်ပီယံဆုကို ရယူနိုင်ခဲ့ရင် သူတို့ဟာ နောက်ဆုံး ၃ နှစ်ဆက်တိုက် ယှဉ်ပြိုင်ခဲ့တဲ့ ပြိုင်ပွဲတိုင်းမှာ ချန်ပီယံဆုကို ရယူနိုင်တဲ့ မှတ်တမ်းကောင်းကို ပိုင်ဆိုင်နိုင်မှာပါ။ 

စပိန်အသင်း အောင်ပွဲခံနေစဉ်

အင်္ဂလန်အသင်းဟာ အမျိုးသမီး ယူရိုပြိုင်ပွဲ စတင်ဖို့ လပိုင်းအလိုမှာ စီနီယာကစားသမား ၂ ဦးဖြစ်တဲ့ ဂိုးသမား မာရီအာ့ပ်စ်နဲ့ ကွင်းလယ်လူ ခါဘီတို့ လက်ရွေးစင်အသင်းကနေ အနားယူခဲ့ပြီး အသင်းခေါင်းဆောင် တစ်ဦးဖြစ်တဲ့ ဘရိုက်က လူစာရင်းကနေ နုတ်ထွက်ခဲ့ပါတယ်။

အဲဒါကြောင့် အင်္ဂလန်အသင်းဟာ ဒီပြိုင်ပွဲအတွက် လူစာရင်း ထုတ်ပြန်ခဲ့တာမှာ အခက်အခဲ ရှိခဲ့သလို အုပ်စု အဖွင့်ပွဲစဉ်မှာ ပြင်သစ်အသင်းကို အရေးနိမ့်ခဲ့တာပါ။

အဲဒါကြောင့် အင်္ဂလန်အသင်းဟာ ဒီပြိုင်ပွဲကို ခက်ခက်စွာနဲ့ စတင်ခဲ့ရပေမယ့် နောက်ပိုင်းပွဲတွေမှာ နိုင်ပွဲတွေ ရယူပြီး ယူရိုဗိုလ်လုပွဲ တက်နိုင်ခဲ့တာဖြစ်ပါတယ်။

ဒါပေမယ့် အင်္ဂလန်အသင်းဟာ ကွာတားဖိုင်နယ်နဲ့ ဆီမီးဖိုင်နယ်ပွဲစဉ်တွေမှာ ပြိုင်ပွဲကနေထွက်ခွာရဖို့ အနီးစပ်ဆုံး ဖြစ်ခဲ့ပေမယ့် နောက်ကျ သွင်းဂိုးတွေ၊ ပင်နယ်တီ အဆုံးအဖြတ်တွေမှာ အနိုင်ရပြီး ကံကောင်းလို့ ဗိုလ်လုပွဲ တက်နိုင်ခဲ့တာပါ။ 

အင်္ဂလန်အသင်းနည်းပြ  ဝီဂ်မန်းကိုယ်တိုင်က သူတို့ရဲ့ ဗိုလ်လုပွဲ တက်နိုင်မှုဟာ ရုပ်ရှင်နဲ့တူတယ်လို့ မှတ်ချက် ပေးခဲ့တာ ဖြစ်ပါတယ်။ အင်္ဂလန်အသင်း ဗိုလ်လုပွဲ တက်နိုင်မှုမှာ လူစားဝင် ကယ်လီနဲ့ အက်ဂ်ယီမန်တို့ရဲ့ အခန်းကဏ္ဍကလည်း အရေးပါခဲ့ပါတယ်။

အင်္ဂလန်အသင်းကိုတွေ့ရစဉ်

စပိန်အမျိုးသမီးကလည်း ယူရိုပြိုင်ပွဲမတိုင်မီမှာ ဘောလွန်းဒီအောဆုရှင် ဘွန်မာတီဟာ ဦးနှောက် အမြှေးရောင် ဝေဒနာ ခံစားခဲ့ရလို့ ဒီပြိုင်ပွဲမှာ ပါဝင်နိုင်မယ့် အခြေအနေအပေါ် စိုးရိမ်မှုတွေရှိခဲ့တာပါ။ 

ဒါပေမယ့် ဘွန်မာတီဟာ ဒီပြိုင်ပွဲမှာ ပါဝင်နိုင်ခဲ့သလို ဂျာမနီအသင်းကို အနိုင်ရခဲ့တဲ့ ဆီမီးဖိုင်နယ်ပွဲစဉ်မှာ စပိန်အသင်းအတွက် အဖိုးတန် အနိုင်ဂိုး သွင်းယူပေးခဲ့ပြီး ဗိုလ်လုပွဲ ပို့ဆောင်ပေးနိုင်ခဲ့တာ ဖြစ်ပါတယ်။ 

စပိန်အသင်းရဲ့ လူငယ်ကစားသမားအချို့ဟာ ၂၀၂၅ အမျိုးသမီး ယူရိုပြိုင်ပွဲမှာ တောက်ပခဲ့တာကလည်း နိုင်ငံအသင်းအတွက် အားရစရာကောင်းခဲ့တာပါ။

စပိန်အသင်းဟာ ယူရိုပြိုင်ပွဲ အုပ်စုအဆင့်ကနေ ဗိုလ်လုပွဲအထိ ပွဲတိုင်းအနိုင်ရခဲ့ပြီး ဂျာမနီအသင်းနဲ့ ဆီမီးဖိုင်နယ် ပွဲစဉ်မှာသာ နိုင်ပွဲရယူနိုင်ဖို့ ခက်ခက်ခဲခဲ ယှဉ်ပြိုင်ခဲ့ရတာ ဖြစ်ပါတယ်။

အင်္ဂလန်နဲ့စပိန်အသင်းတို့ဟာ ၂၀၂၃ ကမ္ဘာ့ဖလားပြိုင်ပွဲ ဗိုလ်လုပွဲပြီးနောက် နေးရှင်းလိဂ် အုပ်စုအဆင့်မှာလည်း တွေ့ဆုံခဲ့ကြပြီး ၁ ပွဲစီ အနိုင်ရရှိခဲ့ကြတာပါ။ 

အခုတစ်ကြိမ် တွေ့ဆုံမယ့် အမျိုးသမီး ယူရိုပြိုင်ပွဲ ဗိုလ်လုပွဲမှာ အင်္ဂလန်အသင်းက ကမ္ဘာ့ဖလား ဗိုလ်လုပွဲ ရှုံးကြွေး ဆပ်ပြီး စပိန်အသင်းကို အနိုင်ယူကာ ယူရိုချန်ပီယံဆုကို ၂ ကြိမ်ဆက် ရယူနိုင်မလား ဒါမှမဟုတ် စပိန်အသင်းက အင်္ဂလန်အသင်းကို ထပ်အနိုင်ယူပြီး ယူရိုချန်ပီယံဆုကို ပထမဆုံးအကြိမ် ရယူနိုင်မလားဆိုတာ စောင့်ကြည့်ရမှာပဲ ဖြစ်ပါတယ်။

CNI Sport News

၂၀၂၅ ခုနှစ်၊ ဇူလိုင် ၁၈

အီတလီဖက်ဆစ် အာဏာရှင် ဘင်နီတိုမူဆိုလီနီရဲ့ မြစ်ဖြစ်သူ ရိုမာနိုဖလော်ရီယန်နီ မူဆိုလီနီဟာ ခရီမိုနီဆီ အသင်းထံ ပြောင်းရွှေ့ခဲ့တာကြောင့် မူဆိုလီနီရဲ့ မျိုးဆက်တစ်ဦး စီးရီးအေပြိုင်ပွဲမှာ ကစားတာကို မြင်တွေ့ရ တော့မှာ ဖြစ်ပါတယ်။

အသက် ၂၂ နှစ်အရွယ်ရှိ ရိုမာနိုမူဆိုလီနီဟာ လာဇီယိုအသင်းကနေ စီးရီးအေတန်းတက်ကလပ် ခရီမိုနီဆီအသင်း ထံ အပြီးသတ်ဝယ်ယူဖို့ ရွေးချယ်မှုပါဝင်တဲ့ အငှားစာချုပ်နဲ့ ပြောင်းရွှေ့ခဲ့တာပါ။ 

ညာနောက်ခံလူနဲ့ ကွင်းလယ်နေရာတွေမှာ ကစားနိုင်တဲ့ ရိုမာနိုမူဆိုလီနီဟာ အရင်က စီးရီးစီနဲ့ စီးရီးဘီကလပ် အသင်းတွေဖြစ်တဲ့ ပတ်စ်ကာရာနဲ့ ဂျူဗီစတာဘီယာ အသင်းတွေမှာ အငှားကစားခဲ့တာဖြစ်ပြီး အခုအချိန်မှာတော့ သူ့ရဲ့ကစားသမားဘဝ ကြီးကျယ်ခမ်းနားတဲ့ အချိန်တွေကို ရယူနိုင်တော့မှာဖြစ်ပါတယ်။ 

အီတလီမီဒီယာတွေက မူဆိုလီနီဂျူနီယာလို့ ခေါ်ဝေါ်တဲ့ ရိုမာနိုမူဆိုလီနီဟာ နိုင်ငံရေးကို စိတ်မဝင်စားဘူးလို့ အခိုင်အမာ ပြောထားတာပါ။

ရိုမာနိုမူဆိုလီနီဟာ ပြီးခဲ့တဲ့ဒီဇင်ဘာက သူ့ရဲ့ပထမဆုံး ပရော်ဖက်ရှင်နယ် သွင်းဂိုးကို သွင်းယူနိုင်ခဲ့ချိန်မှာ ပရိသတ်တွေက သူ့ဘေးဖြစ်သူရဲ့ ဖက်ဆစ်အလေးပြုတဲ့ပုံစံ ပြုလုပ်ခဲ့ကြတာ ဖြစ်ပါတယ်။

 ရိုမာနိုကို တွေ့ရစဉ်

ရိုမာနိုမူဆိုလီနီဟာ အောင်ပွဲခံရင်း သူ့ရဲ့လက်ကို နှုတ်ခမ်းပေါ် တင်ခဲ့သလို ကွင်းအတွင်း ကြေညာသူကလည်း သူ့ရဲ့ပထမနာမည်ဖြစ်တဲ့ ရိုမာနိုလို့ ခေါ်ခဲ့ပေမယ့် ပရိသတ်တွေကတော့ မူဆိုလီနီအမည်ကို သီကြွေးပြီး ဖက်ဆစ် အလေးပြုခဲ့ကြတာပါ။

ရိုမာနိုမူဆိုလီနီရဲ့ ဘေးဖြစ်သူ ဘင်နီတိုမူဆိုလီနီဟာ အမျိုးသားဖက်ဆစ်ပါတီကို တည်ထောင်ပြီး အီတလီနိုင်ငံရဲ့ ဝန်ကြီးချုပ်အဖြစ် ၁၉၂၂ ခုနှစ်ကနေ ၁၉၄၃ ခုနှစ်အထိ ဆောင်ရွက်ခဲ့ပါတယ်။ 

ရိုမာနိုမူဆိုလီနီဟာ လာဇီယို လူငယ်အသင်းထံ ၂၀၁၆ ခုနှစ်မှာ မပြောင်းရွှေ့မီ ရိုးမားအကယ်ဒမီမှာ အချိန်တွေ ကုန်ဆုံးခဲ့တာပါ။

သူဟာ လာဇီယိုအသင်းကြီးရဲ့ ပြိုင်ပွဲ အမျိုးမျိုးမှာ အရန်လူစာရင်းထဲ ပါဝင်ခဲ့ပေမယ့် ပြိုင်ဆိုင်မှု ပြင်းထန်တဲ့ အသင်းကြီး ပွဲဦးထွက်ကိုတော့ ပါဝင်ကစားရခြင်း မရှိသေးတာဖြစ်ပါတယ်။

ရိုမာနိုကို တွေ့ရစဉ်

ဝက်ဖို့ဒ်နဲ့ အူဒီနီးစ်အသင်းတို့ဟာ ရိုမာနိုမူဆိုလီနီကို ခေါ်ယူဖို့ စိတ်ဝင်စားခဲ့တယ်လို့ သတင်းတွေ ထွက်ခဲ့ပေမယ့် သူဟာ စီးရီးအေတန်းတက်ကလပ် ခရီမိုနီဆီအသင်းကို ပြောင်းရွှေ့ဖို့ ဆုံးဖြတ်ခဲ့တာပါ။

ခရီမိုနီဆီအသင်းဟာ စီးရီးအေပြိုင်ပွဲမှာ အကောင်းဆုံး ရလဒ်တွေရယူပြီး တန်းပြန်မဆင်းအောင်လုပ်ဖို့ ရည်မှန်း ထားပါတယ်။ 

အဲဒါကြောင့် ရိုမာနိုမူဆိုလီနီအနေနဲ့ ခရီမိုနီဆီအသင်းကို ဘယ်လောက်အထိ အကူအညီပေးနိုင်မလဲဆိုတာ စောင့်ကြည့်ရမှာပါ။

ရိုမာနို မူဆိုလီနီ အနေနဲ့ ခရီမိုနီဆီအသင်းမှာ အကောင်းဆုံး စွမ်းဆောင်ရည်တွေ ပြသနိုင်ရင် အီတလီသက်တမ်း လိုက် အသင်းတွေမှာလည်း ရွေးချယ်ခံရနိုင်တဲ့ အခွင့်အရေးရှိမှာဖြစ်လို့ လာမယ့် စီးရီးအေပြိုင်ပွဲမှာ သူ့ရဲ့ လုပ်နိုင် စွမ်းတွေကို မြင်တွေ့ရတော့မှာ ဖြစ်ပါတယ်။ 

Source: Dailymail

CNI Sport Article 

၂၀၂၅ ခုနှစ်၊ ဇူလိုင် ၁၁

PSG အသင်းက ရီးရယ်လ်အသင်းကို ၄ ဂိုး-ဂိုးမရှိနဲ့ အနိုင်ရခဲ့တဲ့ ဖီဖာကလပ် ကမ္ဘာ့ဖလား ဆီမီးဖိုင်နယ်ပွဲစဉ်မှာ လူစားဝင် ကစားသမားအဖြစ် ပါဝင်ခဲ့တဲ့ ခရိုအေးရှား ကွင်းလယ်လူ မိုဒရစ်အတွက် ဒီပွဲဟာ သူ့ရဲ့ ရီးရယ်လ်အသင်း ကစားသမားဘဝ နောက်ဆုံးပွဲ ဖြစ်ခဲ့ပါတယ်။ 

ဒီပြိုင်ပွဲအပြီးမှာ ရီးရယ်လ်အသင်းကနေ ထွက်ခွာမယ်လို့ တရားဝင် ကြေညာခဲ့တဲ့ မိုဒရစ်ဟာ သူ့ရဲ့ ၁၃ နှစ်ကြာ စပိန်ကလပ် ကစားသမားဘဝကို အဆုံးသတ်ခဲ့ရတာပါ။

၂၀၁၂ ခုနှစ်က စပါးအသင်းကနေ ရောက်ရှိလာခဲ့တဲ့ မိုဒရစ်ဟာ ရီးရယ်လ်အသင်းအတွက် ၅၉၇ ပွဲ ကစားခဲ့ပြီး ၄၃ ဂိုးသွင်းယူကာ ဂိုးဖန်တီးမှု ၉၅ ကြိမ် ပြုလုပ်နိုင်ခဲ့ပါတယ်။ 

ရီးရယ်လ်အသင်း နည်းပြဇာဘီအလွန်ဆိုက “ဒါဟာ မိုဒရစ်အတွက် ခါးသီးတဲ့ အဆုံးသတ် ဖြစ်ခဲ့ပေမယ့် သူဟာ ဘောလုံးလောကရဲ့ ဂန္ထဝင်တစ်ဦးဖြစ်ပြီး ရီးရယ်လ်အသင်းက ထာဝရအမှတ်ရနေမှာပါ”လို့ နှုတ်ဆက်ခဲ့ပါတယ်။ 

မိုဒရစ်ကိုတွေ့ရစဉ်

၂၀၁၈ ခုနှစ်ဘောလွန်းဒီအောဆုကို ပိုင်ဆိုင်ခဲ့တဲ့ မိုဒရစ်ဟာ ရီးရယ်လ်အသင်းမှာ ချန်ပီယံလိဂ်ဖလား ၆ ကြိမ်နဲ့ လာလီဂါဖလား ၄ ကြိမ် အပါအဝင် ဆုဖလားပေါင်း ၂၈ ခုရယူနိုင်ခဲ့ပြီး အသင်းခေါင်းဆောင်ဟောင်း နာချိုရဲ့ စံချိန်ကို ကျော်ဖြတ်ကာ အသင်းရဲ့သမိုင်းမှာ ဆုဖလားအောင်မြင်မှု အများဆုံးဆိုတဲ့ စံချိန်မှတ်တမ်းကောင်းကို တင်နိုင်ခဲ့ပါတယ်။

ဒါအပြင် မိုဒရစ်ဟာ တစ်ဦးချင်း အောင်မြင်မှု အများအပြားကိုလည်း ပိုင်ဆိုင်ခဲ့ပါတယ်။

မိုဒရစ်က “ဒီလိုအချိန်မျိုးကို ဘယ်တော့မှ မရောက်ချင်ပေမယ့် ဒါက ဘောလုံးဖြစ်ပြီး ဘဝမှာ အရာအားလုံးက အစနဲ့အဆုံး ရှိပါတယ်။ ရီးရယ်လ်အသင်းမှာ ကစားတာက ဘောလုံးသမား အနေနဲ့ရော၊ လူပုဂ္ဂိုလ် အနေနဲ့ရော ကျနော့်ရဲ့ဘဝကို ပြောင်းလဲမှု ဖြစ်စေခဲ့ပါတယ်။ သမိုင်းတစ်လျှောက် အကောင်းဆုံးအသင်းရဲ့ အအောင်မြင်ဆုံး ခေတ်တွေထဲမှာ အစိတ်အပိုင်းအနေနဲ့ ပါဝင်ခွင့်ရတာကို ဂုဏ်ယူမိတယ်”လို့ အသင်းကနေ ထွက်ခွာကြောင်း ကြေညာချိန်မှာ ပြောခဲ့တာပါ။

မိုဒရစ်ကိုတွေ့ရစဉ်

အသက် ၃၉ နှစ်အရွယ်ရှိ မိုဒရစ်ဟာ ဒီရာသီမှာ ရီးရယ်လ်အသင်းအတွက် ၆၃ ပွဲအထိ ပါဝင်ကစားခဲ့ပေမယ့် ပွဲအများစုကတော့ လူစားဝင်အဖြစ်သာ ပါဝင်ခဲ့ရတာဖြစ်ပါတယ်။ 

မိုဒရစ်ဟာ ရီးရယ်လ်အသင်းရဲ့ အောင်မြင်မှုတွေမှာ အဓိကကျတဲ့ အခန်းကဏ္ဍကနေ ပါဝင်ခဲ့ရပေမယ့် အသက် အရွယ်အရ ပုံမှန်ပွဲထွက်ခွင့်ရဖို့ မလွယ်ကူတော့တာပါ။

ရီးရယ်လ်အသင်းဥက္ကဋ္ဌ့ ပီရက်ဇ်က မိုဒရစ်ဟာ ထူးခြားပြီး စံထားရမယ့် ဘောလုံးသမားဖြစ်ကာ သူ့ရဲ့ အမွေအနှစ်က ထာဝရရှင်သန်နေမှာပါလို့ ပြောခဲ့ပါတယ်။

PSG အသင်း ကွင်းလယ်လူ ဗီတင်ညာဟာ ဖီဖာကလပ် ကမ္ဘာ့ဖလား ဆီမီးဖိုင်နယ်ပွဲစဉ်အပြီးမှာ မိုဒရစ်နဲ့ ကွင်းထဲမှာ မျှဝေခွင့်ရတဲ့အတွက် ဂုဏ်ယူမိပြီး သူက စံပြတစ်ဦးဖြစ်တယ်လို့ ပြောခဲ့ပါတယ်။

မိုဒရစ်ကိုတွေ့ရစဉ်

မိုဒရစ်ဟာ ရီးရယ်လ်အသင်းမှာ ကစားသမားဘဝကို အဆုံးသတ်ဖို့ ရည်ရွယ်ခဲ့ပေမယ့် သူဟာ နည်းပြ ဇာဘီအလွန်ဆိုရဲ့ ကစားကွက် တောင်းဆိုမှုတွေကို ဖြည့်ဆည်းပေးနိုင်ဖို့ လုံလောက်မှု မရှိတော့ပါဘူး။

ပြီးတော့ သူဟာ ၂၀၂၆ ကမ္ဘာ့ဖလားပြိုင်ပွဲမှာ ခရိုအေးရှား လက်ရွေးစင်အသင်းအတွက် ပါဝင်ကစားချင်တာကြောင့် အရန်ခုံမှာပဲ ထိုင်နေဖို့ကလည်း အဆင်မပြေတာပါ။

အဲဒါကြောင့်လည်း မိုဒရစ်က သူဟာ ထိပ်တန်းအဆင့်မှာ ကစားနိုင်ကြောင်းကို ပြသနိုင်ဖို့အတွက် စီးရီးအေကလပ် အေစီမီလန်အသင်းထံ ပြောင်းရွှေ့မှာ ဖြစ်ပါတယ်။

မိုဒရစ်ဟာ ပရော်ဖက်ရှင်နယ် ဘောလုံးသမား ဘဝကနေ အနားယူပြီးသွားရင် ကလပ်အသင်း ပိုင်ရှင်ဘက်ကို ပြောင်းလဲနိုင်ဖို့အတွက် ရင်းနှီးမြှုပ်နှံမှုတွေလည်း လုပ်ဆောင်နေတာပါ။ 

မိုဒရစ်ဟာ အင်္ဂလန် ချန်ပီယံရှစ် ကလပ် ဆွမ်ဆီးအသင်းရဲ့ အစုရှယ်ယာ အနည်းငယ်ကို ဝယ်ယူပြီး အသင်းရဲ့ ရင်းနှီးမြှုပ်နှံသူနဲ့ ပူးတွဲပိုင်ရှင်လည်း ဖြစ်လာခဲ့ပါတယ်။ 

Source: BBC

CNI Article

၂၀၂၅ ခုနှစ်၊ ဇူလိုင် ၆

မကြာသေးမီက အိန္ဒိယနှင့် ဘင်္ဂလားဒေ့ရှ် ဆက်ဆံရေးသည် ဆိုးရွားလာခဲ့သဖြင့် ကုလားတန် ဘက်စုံသယ်ယူ ပို့ဆောင်ရေး စီမံကိန်း(KMMTTP)သည် မီဇိုရမ်(Mizoram) ပြည်နယ်နှင့် ကိုလ်ကတ္တား (Kolkata) မြို့ကို မြန်မာနိုင်ငံမှတဆင့်ဖြတ်ပြီး ချိတ်ဆက်ရေးသည် ပိုပြီး အရေးကြီးလာခဲ့သည်။

အိန္ဒိယ၏ ကုန်းလမ်းပို့ဆောင်ရေးနှင့် အဝေးပြေးလမ်းများဆိုင်ရာ ဝန်ကြီးဌာနသည် အိန္ဒိယနိုင်ငံ၊ ရှီလောင်း (Shillong)မြို့မှ စီလ်ချာ (Silchar) မြို့အထိ ၁၆၆ ဒသမ ၈ ကီလိုမီတာ ရှည်လျားသည့် လေးလမ်းသွား အဝေးပြေး လမ်းမကြီးသစ် ဖောက်လုပ်ရေးကို အတည်ပြုခဲ့သည်။

ဤလမ်းကို နောက်ပိုင်းတွင် မီဇိုရမ်ပြည်နယ်ရှိ ဇိုရင်ပူအီ (Zorinpui)မြို့အထိ တိုးချဲ့မည်ဖြစ်ပြီး အိန္ဒိယ အရှေ့ မြောက်ပိုင်းကိုဖြတ်ပြီး အမြန်လမ်း ကွန်ရက်မှတဆင့် ကုလားတန်စီမံကိန်းနှင့် ချိတ်ဆက်သွားမည်ဖြစ်ကြောင်း The Indian Express မှ ဖော်ပြခဲ့သည်။

“ကုလားတန်စီမံကိန်းကြောင့် ဘင်္ဂလားဒေ့ရှ်နိုင်ငံကို မမှီခိုဘဲ ကိုးလ်ကတ္တားနဲ့ ဗီဇက် (Vizag) မြို့ကနေ အရှေ့မြောက်ဘက်သို့ ကုန်စည်တွေ ပို့ဆောင်နိုင်ပါလိမ့်မယ်” ဟု National Highways & Infrastructure Development Corporation Limited (NHIDCL) မှ အကြီးတန်းအရာရှိတစ်ဦးက Indian Express သို့ ပြောကြားခဲ့သည်။

မြန်မာ-အိန္ဒိယ ကုလားတန်းမြစ် စီမံကိန်းကို ဖော်ညွှန်းထားစဉ်

ဘင်္ဂလားဒေ့ရှ်နှင့် တင်းမာမှု
************************
၂၀၂၄ ခုနှစ်၊ သြဂုတ်လက ဘင်္ဂလားဒေ့ရှ်တွင် ဝန်ကြီးချုပ် ရှိတ်ဟာဆီနာ (Sheikh Hasina) ကို ဖယ်ရှားပြီးနောက် အိန္ဒိယနှင့် ဘင်္ဂလားဒေ့ရှ် ဆက်ဆံရေး သိသိသာသာ ကျဆင်းသွားခဲ့သည်။ ဟာဆီနာသည် အိန္ဒိယနှင့် အလွန် ရင်းနှီးသည့် မဟာမိတ်ဖြစ်သည်။

မကြာသေးမီက ဘင်္ဂလားဒေ့ရှ် ကြားဖြတ်အစိုးရအဖွဲ့ခေါင်းဆောင် မိုဟာမက် ယူနွတ်(Muhammad Yunus) ၏ တရုတ်နိုင်ငံသို့ သွားရောက်သည့် ခရီးစဉ်အတွင်း အိန္ဒိယအရှေ့မြောက်ဒေသသည် ကုန်းတွင်းပိတ် ဒေသဖြစ်နေပြီး ဘင်္ဂလားဒေ့ရှ်သည် အိန္ဒိယသမုဒ္ဒရာ၏ တစ်ဦးတည်းသော အုပ်ထိန်းသူဖြစ်ကြောင်း ပြောကြားခဲ့သဖြင့် အိန္ဒိယ အာဏာပိုင်များကို စိုးရိမ်စေခဲ့သည်။

လက်ရှိတွင် အိန္ဒိယ၏ အရှေ့မြောက်ပြည်နယ် ၇ ခုသို့ ပေါက်ရောက်သည့် တစ်ခုတည်းသော ကုန်းလမ်းကြောင်း မှာ အလွန်ကျဉ်းမြောင်းသော Siliguri စင်္ကြံဖြစ်သည်။

ထိုစင်္ကြံ၏ အကျဉ်းဆုံး လမ်းအပိုင်းသည် ကီလိုမီတာ ၂၀ သာ အကျယ်ရှိပြီး နီပေါနှင့် ဘင်္ဂလားဒေ့ရှ်ကြားမှ ဖြတ်ဖောက်ထားခြင်းဖြစ်သည်။

ထိုစင်္ကြံ၏ သေးငယ်သော အရွယ်အစားကြောင့် ကျွမ်းကျင်သူများက ထိုစင်္ကြံကို အိန္ဒိယ၏ “ကြက်လည် ချောင်းရိုး” ၊ “အားနည်းချက်” အစရှိသည့် နာမည်ပြောင်များ ပေးထားသည်။

အိန္ဒိယသည် အရှေ့မြောက်ဘက်ဒေသကို ချိတ်ဆက်နိုင်ရန် ဘင်္ဂလားဒေ့ရှ်ကို ဖြတ်ဖောက်မည့် လမ်းကြောင်းများ ကို အသုံးပြုရန် ဟာဆီနာ အစိုးရနှင့် နှစ်ပေါင်းများစွာ လုပ်ဆောင်ခဲ့သည်။

ဥပမာအားဖြင့် ထရီပူရ (Tripura) ပြည်နယ်၏မြို့တော် အာဂါတာလာ(Agartala)သည် ဘင်္ဂလားဒေ့ရှ်၏ စစ်တဂေါင်း (Chattogram) ဆိပ်ကမ်းနှင့် ကီလိုမီတာ ၂၀၀ မျှသာ ကွာဝေးသည်။

ထိုလမ်းကြောင်းများသည် အိန္ဒိယနှင့် ဘင်္ဂလားဒေ့ရှ် နှစ်နိုင်ငံစလုံးအတွက် ကုန်သွယ်မှုကို အထောက်အကူ ဖြစ်စေနိုင်သည်။

သို့သော် လက်ရှိ ဘင်္ဂလားဒေ့ရှ် အစိုးရသစ်သည် အိန္ဒိယနှင့် ဆက်ဆံရေး အဆင်မပြေသဖြင့် အိန္ဒိယသည် မြန်မာနိုင်ငံဘက်ကို ပိုမိုအာရုံစိုက်လာခဲ့ခြင်းဖြစ်သည်။

ကုလားတန်စီမံကိန်း
*****************

အိန္ဒိယနှင့် မြန်မာတို့သည် ၁၉၉၀ ပြည့်လွန်နှစ် နှောင်းပိုင်း ကာလများနှင့် ၂၀၀၀ ပြည့်နှစ် အစောပိုင်း ကာလများ တွင် လေ့လာမှုများ ပြုလုပ်ခဲ့ပြီးနောက် ၂၀၀၈ ခုနှစ်၌ KMMTTP သဘောတူညီချက်ကို လက်မှတ်ရေးထိုးခဲ့သည်။

ထိုစီမံကိန်းသည် အိန္ဒိယ၏ အရှေ့မျှော် (ယခင် Look East၊ ယခု Act East) မူဝါဒ၏ တစ်စိတ်တစ်ပိုင်းဖြစ်ပြီး ကိုးလ်ကတ္တားကို မြန်မာနိုင်ငံမှတဆင့် မီဇိုရမ်ပြည်နယ်နှင့် ချိတ်ဆက်ရန်ဖြစ်သည်။

ထိုလမ်းကြောင်းသည် ကိုးလ်ကတ္တားနှင့် မီဇိုရမ်ကြား အကွာအဝေးကို ၁၀၀၀ ကီလိုမီတာအထိ လျှော့ချပေးနိုင် မည်ဖြစ်ပြီး သယ်ယူပို့ဆောင်ရေးအတွက် ကြာချိန်ကိုလည်း ၃ ရက်မှ ၄ ရက်အထိ လျှော့ချပေးနိုင်မည်ဖြစ်သည်။

၂၀၁၄ ခုနှစ်တွင် အိန္ဒိယအကြီးတန်းသံတမန် သီရိပရီယာ ရန်ဂနာသန် (Sriripriya Ranganathan) က “ဒီပရောဂျက်က နှစ်ဖက်စလုံး အကျိုးရှိစေမှာပါ။ အိန္ဒိယကတော့ အရှေ့မြောက်ဒေသကို ဝင်ရောက်ခွင့်ရတယ်။ မြန်မာနိုင်ငံဘက်ကတော့ ဆင်းရဲတဲ့ ရခိုင်ပြည်နယ်မှာ အခြေခံ အဆောက်အအုံတွေ ပေါ်ပေါက်လာနိုင်မှာ ဖြစ်ပါ တယ်” ဟု ပြောကြားခဲ့သည်။

ပလက်ဝမြို့ အဝင်ကို တွေ့ရစဉ်

လမ်းကြောင်း အဓိကအစိတ်အပိုင်း ၄ ခု
************************************

¤ ကိုးလ်ကတ္တားမှ စစ်တွေ (ရေလမ်းကြောင်း အကွာအဝေး ၅၃၉ ကီလိုမီတာ) - ကိုးလ်ကတ္တားမှ စစ်တွေ ဆိပ်ကမ်းသို့ သင်္ဘောများဖြင့် ကုန်စည်များ သယ်ယူပို့ဆောင်နိုင်သည်။

¤ စစ်တွေမှ ပလက်ဝ (ရေလမ်းကြောင်း အကွာအဝေး ၁၅၈ ကီလိုမီတာ) - ကုန်စည်များကို ကုလားတန်မြစ်မှ တဆင့် သင်္ဘောများဖြင့် သယ်ဆောင်ပေးနိုင်ပြီး အိန္ဒိယသည် မြစ်ထဲတွင် ဆိပ်ခံဘောတံတားများ တည်ဆောက် ပြီးစီးခဲ့ပြီ ဖြစ်သည်။

¤ ပလက်ဝမှ ဇိုရင်ပူအီ (ကုန်းလမ်းကြောင်း အကွာအဝေး ၁၀၈ ကီလိုမီတာ) - ထိုလမ်းအပိုင်းသည် မြန်မာနိုင်ငံ ရခိုင်ပြည်နယ်မှ ဖြတ်သန်းမည်ဖြစ်သော်လည်း ပလက်ဝမြို့အနီးတွင် လမ်းအရှည် ၅၀ ကီလိုမီတာမှာ အပြီးသတ် ဖောက်လုပ်ရခြင်း မရှိသေးပေ။

¤ ဇိုရင်ပူအီမှ အိုက်ဇောနှင့် အခြားအရှေ့မြောက်ဒေသများ - ဇိုရင်ပူအီသည် မီဇိုရမ်ပြည်နယ် အိုက်ဇောလ် (Aizwal) မြို့နှင့် ကုန်းလမ်းကြောင်းချင်း ချိတ်ဆက်ထားသည်။ ထို့ကြောင့် အိန္ဒိယသည် ရှီလောင်း-စီချာ အဝေး ပြေးလမ်းကွန်ရက်ဖြင့် တိုးချဲ့ရန် စီစဉ်ထားသည်။

AA ခေါင်းဆောင်များကို တွေ့ရစဉ် 

နှောင့်နှေးကြန့်ကြာမှု
*******************

ကုလားတန်စီမံကိန်းကို လွန်ခဲ့သည့် ၁၅ နှစ်ကျော်က စတင်တည်ဆောက်ခဲ့သော်လည်း  မပြီးပြတ်သေးပေ။ အဓိက အကြောင်းအရင်းမှာ မြန်မာနိုင်ငံ ရခိုင်ပြည်နယ်၏ နိုင်ငံရေး မတည်ငြိမ်မှုကြောင့်ဖြစ်သည်။

မြန်မာနိုင်ငံတွင် တိုင်းရင်းသားလူမျိုးစုပေါင်း ၁၀၀ ကျော် နေထိုင်လျက်ရှိပြီး ၁၉၄၈ ခုနှစ်တွင် လွတ်လပ်ရေး ရရှိပြီးကတည်းက လက်နက်ကိုင်အဖွဲ့ အများအပြားသည် ဗဟိုအစိုးရကို ဆန့်ကျင်ခဲ့ကြသည်။

ထို့ပြင် ၂၀၂၁ ခုနှစ်တွင် တပ်မတော်က အာဏာကို ရယူခဲ့ပြီးနောက် တိုက်ပွဲများ ပိုမိုဆိုးရွားလာခဲ့သည်။

ယခုအခါ ရခိုင်ပြည်နယ်၏ နယ်မြေအများစုသည် အာရက္ခတပ်တော် (AA) ၏ ထိန်းချုပ်မှုအောက်တွင် ရှိနေပြီး မြန်မာ့တပ်မတော်က AA ကို အကြမ်းဖက်အဖွဲ့အဖြစ် ကြေညာထားသည်။ 

ထို့ပြင် ရခိုင်ပြည်နယ်တွင် တိုက်ပွဲများ ပြင်းထန်ခဲ့သဖြင့် ကုလားတန်စီမံကိန်းကို အပြီးသတ် အကောင်အထည် ဖော်ရန် ခက်ခဲလိမ့်မည်ဖြစ်သည်။

၂၀၂၂ ခုနှစ်တွင် အိန္ဒိယသည် အစိုးရပိုင် ကုမ္ပဏီတစ်ခုဖြစ်သည့် IRCON International Limited နှင့် စာချုပ်သစ် ချုပ်ဆိုခဲ့သည်။ IRCON သည် ဒေသတွင်း ကန်ထရိုက်တာများကို ငှားရမ်းပြီး အဝေးပြေးလမ်းစီမံကိန်းကို 
လပေါင်း ၄၀ အတွင်း အပြီးသတ်ဖောက်လုပ်ရမည်ဖြစ်သည်။

သို့သော် သဘောတူညီချက်တွင် စစ်ပွဲ၊ အဓိကရုဏ်း သို့မဟုတ် ပဋိပက္ခများ အစရှိသည့် အကြောင်းရင်းများ ကြောင့် စီမံကိန်း သတ်မှတ်ကာလကို နှောင့်နှေးကြန့်ကြာခွင့် ပြုထားသည်။

ယခုအချိန်အထိ IRCON သည် ကန်ထရိုက်တာ အချို့ကို ငှားရမ်းထားသော်လည်း တိုးတက်မှု အနည်းငယ်သာ ရှိသေးသည်။

စိတ်ဝင်စရာကောင်းသည့် အချက်မှာ AA သည် ကုလားတန် စီမံကိန်း၏ အဝေးပြေးလမ်း ဖောက်လုပ်မှုကို ထောက်ခံကြောင်း ကြေညာထားခြင်းဖြစ်သည်။

“ကျနော်တို့က ကုလားတန်စီမံကိန်းအတွက် ၂၀၂၁ ခုနှစ်ကတည်းက လုံခြုံရေး အထောက်အပံ့ ပေးခဲ့ပါတယ်။ ဒီစီမံကိန်းအတွက် လုံခြုံရေးဆိုင်ရာ ခြိမ်းခြောက်မှုမရှိပါဘူး” ဟု AA ၏ ပြောရေးဆိုခွင့်ရှိသူ ဦးခိုင်သုခက ၂၀၂၄ ခုနှစ်တွင် The Diplomat သတင်းဌာနကို ပြောကြားခဲ့သည်။

Source: The Indian Express

CNI Sport Article

၂၀၂၅ ခုနှစ်၊ ဇူလိုင် ၆

မြန်မာအမျိုးသမီးအသင်းဟာ ပြီးခဲ့တဲ့ ၂၀၂၆ AFC အာရှဖလားခြေစစ်ပွဲမှာ ဘင်္ဂလားဒေ့ရှ်အသင်းကို ၂ ဂိုး-၁ ဂိုးနဲ့ အရေးနိမ့်ပြီး အာရှဖလားပြိုင်ပွဲ ယှဉ်ပြိုင်ချင်တဲ့ သူတို့ရဲ့မျှော်လင့်ချက်ကို အဆုံးသတ်ခဲ့ရပါတယ်။ 

မြန်မာအမျိုးသမီးအသင်းဟာ အိမ်ကွင်းပရိသတ်တွေ အရှေ့မှာ ကစားခဲ့ရတဲ့ အာရှဖလား ခြေစစ်ပွဲ ဖြစ်တာကြောင့် အားလုံးက အများကြီးမျှော်လင့်ခဲ့ကြတာပါ။

ဒါပေမယ့် မျှော်လင့်သလို ဖြစ်မလာခဲ့ဘဲ အာရှဖလားခြေစစ်ပွဲ အဆင့်နဲ့ပဲ ကျေနပ်ခဲ့ရတာဖြစ်ပါတယ်။

မြန်မာအမျိုးသမီးအသင်းဟာ အာရှဖလားခြေစစ်ပွဲ အောင်မြင်နိုင်ဖို့ စခန်းသွင်းလေ့ကျင့်မှုကို သေသေချာချာ ပြုလုပ်ခဲ့သလို ဒီမတိုင်မီ ကစားခဲ့တဲ့ နီပေါဖိတ်ခေါ်ပွဲမှာ ချန်ပီယံဆုကို ရယူထားတာပါ။

အဲဒါကြောင့်လည်း ဘောလုံးအဖွဲ့ချုပ်ရော၊ ပရိသတ်တွေရောက မြန်မာအမျိုးသမီးအသင်းဟာ အာရှဖလားကို ၆ ကြိမ်မြောက် ဝင်ရောက်ယှဉ်ပြိုင်နိုင်မယ်လို့ ယုံကြည်မှုရှိနေခဲ့တာ ဖြစ်ပါတယ်။ 

မြန်မာအသင်းနဲ့ဘင်္ဂလားဒေ့ရှ်အသင်း ယှဉ်ပြိုင်နေစဉ်

ဒါပေမယ့် အဆုံးအဖြတ်ပွဲဖြစ်တဲ့ ဘင်္ဂလားဒေ့ရှ်အသင်းနဲ့ ပွဲမှာ မြန်မာအမျိုးသမီးအသင်းရဲ့ ဆိုးရွားတဲ့ပုံစံကို မြင်တွေ့ခဲ့ရတာပါ။ 

မြန်မာအမျိုးသမီးအသင်းဟာ လူပေးတာ အပါအဝင် အရာအားလုံး မှားယွင်းနေခဲ့ပြီး စိုးရိမ်မှုတွေနဲ့ ဖိအားတွေ အများကြီး ကျရောက်နေသလို ကစားနေခဲ့တာ ဖြစ်ပါတယ်။ 

မြန်မာအသင်းဟာ သူတို့ထက် ကမ္ဘာ့အဆင့် ၇၀ ကျော်နိမ့်တဲ့ ဘင်္ဂလားဒေ့ရှ်အသင်းရဲ့ စိတ်ကြိုက်ကစားခြင်းကို ခံစားခဲ့ရပြီး လူကျွံထောင်ချောက်ကိုလည်း ကျော်ဖြတ်နိုင်ခဲ့ခြင်းမရှိဘဲ အကြိမ်ကြိမ် လူကျွံနေခဲ့တာပါ။ 

ဘင်္ဂလားဒေ့ရှ်အသင်းက နည်းဗျူဟာကျကျ ကစားနိုင်ချိန်မှာ မြန်မာအသင်းဟာ ရတဲ့အခွင့်အရေးတွေလည်း အသုံးမချနိုင်ခဲ့တာကြောင့် ချေပဂိုး နောက်ထပ် တစ်ဂိုးမရခဲ့ဘဲ ရှုံးပွဲကြုံတွေ့ခဲ့တာဖြစ်ပါတယ်။

ဒီပွဲမှာ မြန်မာအသင်းနည်းပြရဲ့ ပွဲထွက် လူစာရင်းရွေးချယ်မှုနဲ့ ကွင်းလယ်ဒိုင်လူကြီးရဲ့ ဆုံးဖြတ်ချက်အချို့က ပြောစရာရှိခဲ့ပေမယ့် ရလဒ်ကို ပြောင်းလဲလို့ မရတော့တဲ့အတွက် နောက်လာမယ့် ပြိုင်ပွဲတွေကိုသာ ပိုပြီး အာရုံစိုက် လုပ်ဆောင်ရတော့မှာပါ။

မြန်မာအမျိုးသမီး အသင်းအနေနဲ့ ရလဒ်ကောင်းတွေ ပြန်ရရှိဖို့ အတွက်ဆိုရင် ဖိအားဒဏ်တွေကို ခံနိုင်အောင် လုပ်ဖို့သလို ရုပ်ပိုင်းနဲ့ စိတ်ပိုင်းဆိုင်ရာ ၂ ခုစလုံးကို အားကောင်းအောင် လုပ်ဖို့လည်း လိုအပ်တာဖြစ်ပါတယ်။

 မြန်မာအသင်းနဲ့ဘင်္ဂလားဒေ့ရှ်အသင်း ယှဉ်ပြိုင်နေစဉ်

ဒါမှလည်း မြန်မာအမျိုးသမီး အသင်းဟာ ပွဲကိုတည်ငြိမ်စွာ ကစားပြီး လိုချင်တဲ့ ရလဒ်ကောင်းတွေ ရယူနိုင်မှာပါ။

မြန်မာအမျိုးသမီးအသင်းမှာ ဝါရင့်ကစားသမားတွေ တစ်ဦးပြီးတစ်ဦး မပါဝင်နိုင်တော့တဲ့ အချိန်မှာ အသင်းကို ကွင်းအတွင်းမှာ ဦးဆောင်မောင်းနှင်ပေးနိုင်မယ့် ခေါင်းဆောင်ကောင်း တစ်ဦးလည်း မရှိမဖြစ် လိုအပ်နေပါတယ်။ ဒါမှလည်း ကွင်းအတွင်းမှာရှိတဲ့ ကစားသမားတွေ အားလုံးဟာ စိတ်အားတက်ကြွစွာနဲ့ ပွဲအပေါ်ယုံကြည်မှု အပြည့်နဲ့ ကစားနိုင်မှာပါ။ 

ဒါအပြင် လိဂ်ပြိုင်ပွဲကနေ ကောင်းမွန်တဲ့ မျိုးဆက်သစ် ကစားသမားတွေကို ရှာဖွေဖို့လည်း ပြုလုပ်ရမှာ ဖြစ်ပါ တယ်။ 

လက်ရှိအချိန်မှာတော့ မြန်မာအမျိုးသမီး အသင်းအနေနဲ့ အာရှဖလားခြေစစ်ပွဲ ကျရှုံးမှုကို မေ့ပစ်ပြီး လာမယ့်ပြိုင်ပွဲ မတိုင်မီ ရုန်းထွက်ပြသရမှာပါ။

မြန်မာအမျိုးသမီးဟာ လာမယ့်ပြိုင်ပွဲတွေအဖြစ် သြဂုတ်ထဲမှာ အာဆီယံ ချန်ပီယံရှစ်ပြိုင်ပွဲနဲ့ ဒီဇင်ဘာမှာ ထိုင်း ဆီးဂိမ်းစ်ပြိုင်ပွဲတို့ ယှဉ်ပြိုင်ရမှာ ဖြစ်ပါတယ်။ 

အာဆီယံ ချန်ပီယံရှစ်ပြိုင်ပွဲဟာ မြန်မာအမျိုးသမီး အသင်းအတွက် အာရှဖလား ခြေစစ်ပွဲ မအောင်မြင်ပြီးနောက် ပထမဆုံးစမ်းသပ်မှုဖြစ်ပြီး ဖိလစ်ပိုင်၊ သြစတြီးယားအသင်းတို့နဲ့ တစ်အုပ်စုတည်း ကျရောက်နေတာကြောင့် အကောင်းဆုံး ပြင်ဆင်မှုတွေ ပြုလုပ်ထားနိုင်မှသာ အုပ်စုအဆင့်ကနေ ကျော်ဖြတ်နိုင်ဖို့ မျှော်လင့်လို့ရမှာပါ။

အဲဒါကြောင့် မြန်မာအမျိုးသမီး အသင်းအနေနဲ့ လာမယ့်ပြိုင်ပွဲ ၂ ခုမှာ ဘယ်လောက်အထိ စွမ်းဆောင် နိုင်မလဲ၊ ပရိသတ်တွေအတွက် ဆုတံဆိပ်တွေ ရယူပေးပြီး ပြန်လာနိုင်မလားဆိုတာတော့ စောင့်ကြည့်ရမှာပဲ ဖြစ်ပါတယ်။ 

CNI International Article

၂၀၂၅ ခုနှစ်၊ ဇွန်လ ၂၈

အမေရိကန်သည် ကမ္ဘာ့ရေးရာများတွင် အဓိကအခန်းကဏ္ဍမှ ဆက်လက် ပါဝင်နေသဖြင့် နိုင်ငံအများအပြားသည် အမေရိကန်နှင့် နီးကပ်သော ဆက်ဆံရေး တည်ဆောက်ရာ၌ အကျိုးကျေးဇူးများနှင့် အန္တရာယ်များကို ချိန်ဆနေ ကြသည်။

စစ်ရေးအထောက်အကူမှအစ၊ နည်းပညာ အကူအညီအလယ်၊ စီးပွားရေးအရ မိတ်ဖက်ဆက်ဆံမှုများအဆုံး အမေရိကန်နှင့် လိုက်လျောညီထွေဖြစ်အောင် လုပ်ဆောင်နေရခြင်းသည် အခွင့်အလမ်းများသာမက စိန်ခေါ်မှုများ ကိုလည်း ကြုံတွေ့ရလေ့ရှိသည်။

အမေရိကန်သည် ကမ္ဘာပေါ်တွင် စစ်အင်အားနှင့် စီးပွားရေးအင်အား အကြီးဆုံးနိုင်ငံဖြစ်ပြီး ကုလသမဂ္ဂ လုံခြုံရေး ကောင်စီတွင် အမြဲတမ်းအဖွဲ့ဝင်နိုင်ငံဖြစ်ကာ သံတမန်ရေးရာ သြဇာလွှမ်းမိုးမှု အားကောင်းသဖြင့် နိုင်ငံအများစုက အမေရိကန်နှင့် မိတ်ဖက်ဖြစ်ချင်ကြသည်။

အမေရိကန်နှင့် ခိုင်မာသော ဆက်ဆံရေးကို ထိန်းသိမ်းထားသည့် နိုင်ငံများသည် ကုန်သွယ်ရေး အကျိုးအမြတ်များ ရရှိလေ့ရှိသည်။ အမေရိကန်သည် ကမ္ဘာပေါ်တွင် ကုန်ပစ္စည်းနှင့် ဝန်ဆောင်မှုများကို အများဆုံးဝယ်ယူ တင်သွင်း သည့် နိုင်ငံဖြစ်သည်။

 တရုတ်နဲ့အမေရိကန်ကို တွေ့ရစဉ်

သို့သော် မကြာသေးမီက သမ္မတ ဒေါ်နယ်ထရမ့် (Donald Trump) က အမေရိကန်၏ မိတ်ဖက်နိုင်ငံများ အပါအဝင် ကမ္ဘာတစ်ဝန်းရှိ နိုင်ငံများအပေါ် ကုန်သွယ်ခွန်များ တိုးမြှင့်ကောက်ခံကြောင်း ကြေညာခဲ့သည့်အတွက် အမေရိကန်နှင့် ကုန်သွယ်သည့် နိုင်ငံအားလုံးကို ထိခိုက်စေခဲ့သည်။

အမေရိကန်နှင့် ပြိုင်ဘက်အဖြစ် ရှုမြင်ခံထားရသည့် တရုတ်နိုင်ငံသည် အမေရိကန်နှင့် ကုန်သွယ်ရေးစစ်ပွဲကို အရှိန်မြှင့်တင်ခဲ့သဖြင့် အခြားနိုင်ငံများကိုလည်း စိုးရိမ်စေခဲ့သည်။

တရုတ်သည် အမေရိကန်ပြီးလျှင် ဒုတိယမြောက် စီးပွားရေး အင်အားအကြီးဆုံး နိုင်ငံဖြစ်ပြီး အမေရိကန်နှင့် ဆက်ဆံရေး အဆင်မပြေသည့် နိုင်ငံများနှင့် ခိုင်မာသည့် ဆက်ဆံရေး ထူထောင်ထားသည်။

ထို့ကြောင့် နိုင်ငံတကာ ဆက်ဆံရေးတွင် အမြဲတမ်းရန်သူ၊ အမြဲတမ်းမိတ်ဆွေမရှိ၊ အမြဲတမ်း အကျိုးစီးပွားသာ ရှိသည် ဆိုသည့် ဆိုရိုးစကားသည် လက်တွေ့ကျသည့် ဆိုရိုးစကားဖြစ်သည်။

သမိုင်းကြောင်းကို ပြန်လည်သုံးသပ် ရမည်ဆိုလျှင်လည်း အမေရိကန်သည် ရေရှည်တည်တံ့ခိုင်မြဲသည့် မိတ်ဖက် ဆက်ဆံရေးများ ပုံသေမရှိဘဲ မဟာဗျူဟာအရ လိုအပ်လျင် လိုအပ်သလို ပြောင်းလဲခဲ့သည်။

ဥပမာအားဖြင့် အမေရိကန်သည် အီရန်၏ ရှားဘုရင်၊ အီရတ်ခေါင်းဆောင် ဆက်ဒမ် ဟူစိန် (Saddam Hussein) နှင့် အာဖဂန်နစ္စတန်၏ မူဂျာဟီဒင် လက်နက်ကိုင်များကို ထောက်ပံ့ပေးခဲ့သော်လည်း အမေရိကန်၏ အကျိုး စီးပွားများ ပြောင်းလဲသွားချိန်တွင် ထိုဆက်ဆံရေးများ ကျိုးပျက်သွားခဲ့သည်။

လက်ရှိတွင် အမေရိကန်နှင့် တရုတ် ပြိုင်ဆိုင်မှုများ ပြင်းထန်နေသဖြင့် နိုင်ငံအများစုသည် ၎င်းတို့၏ ဆက်ဆံရေး များကို ထိန်းညှိပြင်ဆင်နေရသည်ဟု ကျွမ်းကျင်သူများက ပြောကြားခဲ့သည်။

အိန္ဒိယ၊ ဗီယက်နမ်၊ ဆော်ဒီနှင့် အခြားနိုင်ငံများသည် အမေရိကန်နှင့်သာမက အမေရိကန်၏ ပြိုင်ဘက်များ ဖြစ်သည့် တရုတ်၊ ရုရှားနိုင်ငံတို့နှင့် လက်တွဲလုပ်ဆောင်လျက်ရှိသည်။

ထိုနိုင်ငံများသည် မိတ်ဖက်ဆက်ဆံရေးအတွက် သစ္စာစောင့်သိမှုကြောင့် မဟုတ်ဘဲ လက်တွေ့ကျသည့် ချဉ်းကပ် မှုဖြင့် လုပ်ဆောင်နေကြခြင်းဖြစ်သည်။

ကမ္ဘာ့ခေါင်းဆောင်များကို တွေ့ရစဉ်

ထို့ကြောင့် နှစ်ဖက်စလုံးထံမှ အကျိုးအမြတ်များကို ရရှိခဲ့ပြီး တစ်ဖက်ကနိုင်ပြီး၊ တစ်ဖက်က ရှုံးသည့် ယှဉ်ပြိုင်မှု ကစားပွဲထဲတွင် ပိတ်မိခဲ့ကြခြင်းမရှိပေ။

အမေရိကန်နှင့် မဟာမိတ်ဖွဲ့ခြင်းသည် ကြီးမားသည့် ကောင်းကျိုးများ ရရှိနိုင်ပြီး တောင်ကိုရီးယားနှင့် ဂျပန်တို့ သည် အမေရိကန်၏ လုံခြုံရေး အကာအကွယ်အောက်တွင် ကမ္ဘာ့စီးပွားရေး အင်အားကြီးနိုင်ငံများအဖြစ် တည်ထောင်နိုင်ခဲ့ကြသည်။

နေတိုးအဖွဲ့ဝင် နိုင်ငံများကြားတွင်လည်း စစ်ရေး ပူးပေါင်းဆောင်ရွက်မှုများနှင့် ထောက်လှမ်းရေးသတင်းများ မျှဝေရာတွင် အမေရိကန်၏ အထောက်အကူကို ရရှိခဲ့သည်။

သို့သော် ထရမ့် လက်ထက်တွင် အမေရိကန်၏ နိုင်ငံခြားရေးမူဝါဒ မှန်းဆမရခြင်းသည် နောက်ထပ် စိန်ခေါ်မှု တစ်ခုဖြစ်နေသည်။

ဂျာမနီ၊ ကနေဒါနှင့် တောင်ကိုရီးယားတို့ကဲ့သို့ မဟာမိတ်များသည် အမေရိကန်နှင့် ဆယ်စုနှစ်များစွာ ပူးပေါင်း ဆောင်ရွက်ခဲ့သော်လည်း ကုန်သွယ်ခွန် တိုးမြှင့်မှုနှင့်ပတ်သက်ပြီး တင်းမာမှုများနှင့် ရင်ဆိုင်ခဲ့ရသည်။

ထို့ကြောင့် ကမ္ဘာ့နိုင်ငံများအနေဖြင့် ဤနိုင်ငံရေး စက်ဝန်းအတွက် ကြိုတင်ပြင်ဆင်ပြီး မည်သည့် အစိုးရ တစ်ခုတည်းကိုမျှ အလွန်အကျွံ အားကိုးခြင်းမှ ရှောင်ကြဉ်ရမည်ဟု ကျွမ်းကျင်သူများက ပြောကြားခဲ့သည်။ 

တရုတ်နဲ့အမေရိကန်ကို တွေ့ရစဉ်

အမေရိကန်၏ အာဏာအပျော့ (Soft power) အပျော့ကလည်း အခြားနိုင်ငံများနှင့် ဆက်ဆံရေးတွင် အဓိက ကျသည့် အခန်းကဏ္ဍမှ ပါဝင်နေသည်။

အမေရိကန် ရုပ်ရှင်များ၊ မီဒီယာများ၊ အမေရိကန်ယဉ်ကျေးမှုနှင့် အမေရိကန်၏ ကုန်ပစ္စည်း အမှတ်တံဆိပ် များသည် အခြားနိုင်ငံများအပေါ် လွှမ်းမိုးထားပြီး အခြားနိုင်ငံများတွင် နေထိုင်သူများ၏ အတွေးအမြင်ကို ပုံဖော်နေသည်ဟု ကျွမ်းကျင်သူများက ပြောကြားခဲ့သည်။

ယနေ့ခေတ် ပြောင်းလဲနေသည့် ပထဝီနိုင်ငံရေး အခင်းအကျင်းတွင် အမေရိကန်နှင့် မိတ်ဆွေဖွဲ့ရန် ထိုက်တန်မှု ရှိသလား ဟူသည့် မေးခွန်းကို ဖြေဆိုရမည်ဆိုပါက ထိုက်တန်သည်ဟု ဖြေဆိုရမည်ဖြစ်သည်။

သို့သော် အမေရိကန်နှင့် ဆက်ဆံရေးတွင် ဂရုတစိုက် တွက်ချက်မှုများနှင့် ရှင်းလင်းသည့် ဦးစားပေး ကိစ္စများကို ခွဲခြားသတ်မှတ်ရမည်ဖြစ်သည်။

လက်ရှိအချိန်အထိ နိုင်ငံအများစုသည် အမေရိကန်နှင့် ရင်းနှီးသည့် ဆက်ဆံရေးမှတဆင့် အကျိုးအမြတ်များကို ရရှိရန် မျှော်လင့်နေကြပြီး ပြောင်းလဲနေသည့် ကမ္ဘာ့အခင်းအကျင်းတွင် အမေရိကန်၏ မဟာဗျူဟာ အပြောင်းအလဲများကို အနီးကပ်စောင့်ကြည့်ပြီး ချဉ်းကပ်ဆောင်ရွက်မှုများကို ထိန်းညှိရမည်ဖြစ်ပေသည်။

Source: Nikkei Asia