CNI Sport News

၂၀၂၂ ခုနှစ်၊ ဇူလိုင် ၁၄

မန်ချက်စတာ ယူနိုက်တက် အသင်းနည်းပြ အဲရစ်တန်ဟတ်က ရော်နယ်ဒိုနဲ့ ပတ်သက်ပြီးတော့ အသင်းဘက်က ပြောင်းလဲမှု မရှိဘူးလို့ မဲလ်ဘုန်းဗစ်ထရီအသင်းနဲ့ ကစားမယ့် ခြေစမ်းပွဲမတိုင်ခင် ပြုလုပ်တဲ့ သတင်းစာ ရှင်းလင်းပွဲမှာ ပြောခဲ့ပါတယ်။

အဲရစ်တန်ဟတ်က “ကျနော်တို့ ကြေညာချက် ထုတ်ပြီးပါပြီ။ ဘာမှပြောင်းလဲခြင်း မရှိပါဘူး”လို့ ရော်နယ်ဒိုနဲ့ ပတ်သက်တဲ့ မေးခွန်းကို လိုရင်းတိုရှင်းပဲ ဖြေသွားခဲ့တာပါ။
ရော်နယ်ဒိုဟာ အခုနွေရာသီ အပြောင်းအရွှေ့မှာ အသင်းက ထွက်ခွာခွင့် တောင်းဆိုထားပြီး အသင်းနဲ့ လေ့ကျင့်မှု ပြုလုပ်ခြင်း မရှိသေးသလို ထိုင်း၊ သြစတြေးလျထံ ရာသီကြိုခြေစမ်းဖို့ ထွက်ခွာတဲ့ အသင်းလူစာရင်းမှာလည်း ပါဝင်ခဲ့ခြင်း မရှိပါဘူး။

ယူနိုက်တက်အသင်းက ရော်နယ်ဒိုကို ထွက်ခွာခွင့်ပြုမှာ မဟုတ်ကြောင်း ရှင်းရှင်းလင်းလင်း ပြောထားပေမယ့် ကစားသမား ဘက်က အသင်းနဲ့အတူ လာရောက် ပူးပေါင်းဖို့ အရိပ်အယောင်တောင် မပြသေးပါဘူး။

ထိုင်းမှာ လီဗာပူးလ်အသင်းကို ၄ ဂိုး- ဂိုး မရှိနဲ့ အနိုင်ရခဲ့တဲ့ ခြေစမ်းပွဲ မတိုင်ခင်ကလည်း ရော်နယ်ဒိုရဲ့ အကြောင်းနဲ့ ပတ်သက် ပြီး နည်းပြ အဲရစ်တန်ဟတ် မေးမြန်းခံခဲ့ရ ပါသေးတယ်။ အဲ့ဒီ အချိန်တုန်းကလည်း နယ်သာလန် လူမျိုးနည်းပြက ရော်နယ်ဒို ကို ရောင်းချမှာ မဟုတ်ဘဲ သူ့ရဲ့ အစီအစဉ်မှာ ပါဝင်တယ်လို့ ဖြေခဲ့တာပါ။

ရော်နယ်ဒိုကို တွေ့ရစဉ်

ပြီးခဲ့တဲ့နှစ် နွေရာသီကမှ ဂျူဗင်တပ်စ်ကနေ မန်ချက်စတာယူနိုက်တက်ကို ပြန်လည် ရောက်ရှိလာတဲ့ ရော်နယ်ဒိုဟာ မနှစ်က ရာသီက ပြိုင်ပွဲစုံ ၂၄ ဂိုး သွင်းယူပြီး အသင်းရဲ့ ထိပ်တန်း ဂိုးသွင်းရှင်အဖြစ် ရပ်တည်ခဲ့ပါတယ်။ ဒါပေမယ့် အသင်းဟာ လာမယ့် ရာသီ ယူရိုပါလိဂ် ဝင်ခွင့်ရပြီး ဆုဖလား အောင်မြင်မှုတွေ ရယူနိုင်ဖို့အတွက် လုံလောက်မှု မရှိဘူးလို့ ရော်နယ်ဒိုက ယုံကြည် နေတာပါ။
အဲ့ဒါကြောင့်လည်း သင့်လျော်တဲ့ ကမ်းလှမ်းမှုရရင် သူ့ကို ထွက်ခွာခွင့်ပေးဖို့ အသင်းထံ ရော်နယ်ဒိုက တောင်းဆိုခဲ့တာ ဖြစ်ပါတယ်။

ရော်နယ်ဒိုရဲ့ အေးဂျင့်ဖြစ်သူ ဂျော့ချ်မန်ဒတ်စ်ကလည်း သူ့ရဲ့ ကစားသမားအတွက် အသင်းသစ် ရှာဖွေပေးနိုင်ဖို့ ကြိုးစားနေပြီး အသင်းကြီးတချို့နဲ့ ချိတ်ဆက်မှုတွေ ပြုလုပ်ခဲ့ပါတယ်။ ဒါပေမယ့် ပီအက်စ်ဂျီ၊ ဘိုင်ယန်မြူးနစ်နဲ့ ချယ်လ်ဆီး အသင်းတို့က ရော်နယ်ဒိုကို ခေါ်ယူဖို့ တွန့်ဆုတ်နေခဲ့ပါတယ်။

ယူနိုက်တက်နဲ့ စာချုပ်တစ်နှစ်သာ ကျန်ရှိတော့တဲ့ ရော်နယ်ဒိုကို ဆော်ဒီကလပ် တစ်သင်းက တစ်နှစ်ကို ပေါင် ၁၀၅ သန်းနဲ့ ကမ်းလှမ်းထားတယ်လို့လည်း သတင်းထွက်နေပါတယ်။

မန်ချက်စတာ ယူနိုက်တက် အသင်းဟာ သြစတြေးလျမှာ မဲလ်ဘုန်းဗစ်ထရီ၊ ပဲလေစ့်၊ အက်စတွန်ဗီလာတို့နဲ့ ခြေစမ်းပွဲ ၃ ပွဲ ကစားသွားမှာ ဖြစ်ပါတယ်။ ဒါပြီးရင်တော့ အော်စလိုမှာ အသလက်တီကို၊ အိုးထရက်ဖို့ဒ်မှာ ဗယ်လက်ကာနို အသင်းတို့နဲ့ ခြေစမ်းပွဲကစားပြီး ရာသီကြိုပြင်ဆင်မှုကို အဆုံးသတ်မှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ ဇူလိုင် ၁၄

ကမ္ဘာ့နံပါတ်တစ် တင်းနစ်သမားဟောင်း အန်ဒီမာရေးက သူ့ရဲ့ ကစားသမားဘဝ အဆုံးသတ်တော့မယ်လို့ ပြောလိုက်ပါတယ်။

အန်ဒီမာရေးက “ခင်ဗျား ဘယ်အချိန်မှာ အဆုံးသတ်မလဲဆိုတာ မသိပေမယ့် ကျနော်ကတော့ ကျနော့်ရဲ့ ကစားသမားဘဝ အဆုံးသတ်ကို ရောက်နေပြီဆိုတာ သိပါတယ်။ ဒါကြောင့်လည်း ကျနော်ကစားရမယ့် ပြိုင်ပွဲတိုင်းရဲ့ ပွဲစဉ်တိုင်းကို အကောင်း ဆုံး ဖြစ်အောင် လုပ်ချင်ပါတယ်”လို့ ပြောပါတယ်။

ဂရမ်းဆလမ်း ချန်ပီယံဆု ၉ ကြိမ် ရရှိထားတဲ့ အန်ဒီမာရေးဟာ လက်ရှိကမ္ဘာ့အဆင့် ရပ်တည်မှု ၅၂ နေရာမှာ ရပ်တည်နေပြီး အခုနှစ်အတွင်း ကစားခဲ့တဲ့ ATP ပြိုင်ပွဲ ဗိုလ်လုပွဲ ၂ ကြိမ် အရေးနိမ့်ထားခဲ့တာပါ။

ဗြိတိန် ကစားသမားဟာ ပြီးခဲ့တဲ့ ၅ နှစ်အတွင်းမှာ ဒဏ်ရာတွေကြောင့် လက်စွမ်း တည်ငြိမ်မှုရဖို့ ရုန်းကန်ခဲ့ရပြီး ဝင်ဘယ်လ် ဒန် အိုးပန်းပြိုင်ပွဲမှာလည်း ဒုတိယအဆင့်က ထွက်ခွာခဲ့ရပါတယ်။ အန်ဒီမာရေးဟာ ဂရိတ်ဗြိတိန်အတွက် ၂၀၁၂ နဲ့ ၂၀၁၆ အိုလံပစ် ပြိုင်ပွဲတွေမှာ ရွှေတံဆိပ် ရယူပေးနိုင်ခဲ့တာပါ။

အသက် ၃၅ နှစ်အရွယ်ရှိ အန်ဒီမာရေးဟာ သြဂုတ်လမှာ စတင်မယ့် အမေရိကန် အိုးပန်းပြိုင်ပွဲအတွက် ပြင်ဆင်နေတာလည်း ဖြစ်ပါတယ်။ အန်ဒီမာရေးဟာ အခုနှစ်ကို ထိပ်ဆုံး ၁၃၀ ပြင်ပကနေ စတင်ခဲ့ရတာကြောင့် အမှတ်တွေ ရသလောက်ယူပြီး ပိုမိုကောင်းမွန်တဲ့အဆင့် တက်လှမ်းနိုင်အောင် ပြိုင်ပွဲ အများအပြားကို ဝင်ရောက် ယှဉ်ပြိုင်ချင်နေတာပါ။

အန်ဒီမာရေးကို တွေ့ရစဉ် (Tennis)

“လာမယ့် ရက်သတ္တပတ် အနည်းငယ်အတွင်းက ကျနော့်ရဲ့ ကြီးမားတဲ့ ရည်မှန်းချက်ပါ။ ပြီးခဲ့တဲ့ လအနည်းငယ် အတွင်းမှာ ကျနော်ဟာ ပိုပြီးကောင်းမွန်အောင် ကစားနိုင်ခဲ့ပါတယ်။ အကြီးမားဆုံး ပြိုင်ပွဲတွေမှာ ဒီထက် ကောင်းမွန်အောင် သွားချင်ရင် တော့ ဆီဒင်အဆင့် သတ်မှတ်ချက် ကောင်းဖို့လိုပါတယ်။ ဒါကြောင့် ကျနော်အစွမ်းကုန် ကြိုးစားနေတယ်”လို့ အန်ဒီမာရေးက ပြောခဲ့ပါတယ်။

ဝင်ဘယ်လ်ဒန် အိုးပန်းချန်ပီယံ ဂျိုကိုဗစ်က လန်ဒန်ရှိ The O2 မှာ ဖက်ဒဲရား၊ နာဒယ်လ်၊ အန်ဒီမာရေးတို့နဲ့ အတူ ပြန်လည် ဆုံစည်းချင်တဲ့ သူ့ရဲ့ ဆန္ဒကို ထုတ်ဖော် ပြောထားပါတယ်။

သူတို့ ၄ ဦးဟာ မကြာသေးခင် နှစ်တွေအတွင်းမှာ ပြိုင်ဆိုင်မှု ပြင်းထန်ခဲ့ကြတဲ့သူတွေ ဖြစ်ပါတယ်။ အန်ဒီမာရေး၊ နာဒယ်လ်နဲ့ ဖက်ဒဲရားတို့ဟာ စက်တင်ဘာလထဲမှာ Laver Cup ပြိုင်ပွဲ ယှဉ်ပြိုင်ဖို့ စီစဉ်ထားပြီး ဂျိုကိုဗစ်ကလည်း ဝင်ရောက်ပူးပေါင်း နိုင်ခြေ ရှိနေပါတယ်။

ဂျိုကိုဗစ်က “ဒါဟာ အလွန်ထူးခြားပါလိမ့်မယ်။ ဝင်ရောက်ယှဉ်ပြိုင်ဖို့ ဖြစ်နိုင်ချေရှိပါတယ်။ ကျနော့်ရဲ့ အေးဂျင့်က Laver Cup အသင်းနဲ့ ဆက်သွယ်မှု ရှိပါတယ်။ ဝင်ဘယ်လ်ဒန် အိုးပန်းအပြီးမှာ ဆုံးဖြတ်ချက်ချဖို့ ကျနော်တို့ သဘောတူညီချက် ရှိခဲ့ပါ တယ်။ Laver Cup က ပြိုင်ဘက်ကြီးတွေ အတူတူ တစ်သင်းထဲမှာ ပါဝင်နိုင်တဲ့ တစ်ခုတည်းသော ပြိုင်ပွဲပါ”လို့ ပြောခဲ့ပါတယ်။

Source: Metro

CNI Sport News

၂၀၂၂ ခုနှစ်၊ ဇူလိုင် ၁၄

စတာလင်ဟာ ချယ်လ်ဆီးအသင်းကို မန်စီးတီးအသင်းကနေ ပေါင်သန်း ၅၀နဲ့ ပြောင်းရွှေ့ကြောင်း အတည်ပြုပြီး တာနဲ့ နာရီဝက်အကြာမှာပဲ အသင်းနဲ့အတူ ပထမဆုံးအကြိမ် လေ့ကျင့်မှုပြုလုပ်သွားခဲ့ပါတယ်။

အသက် ၂၇ နှစ်အရွယ်ရှိ စတာလင်ဟာ ပိုင်ရှင်သစ်တော့ဒ်ဘိုလီလက်ထက် ချယ်လ်ဆီးအသင်းရဲ့ ပထမဆုံး ခေါ်ယူတဲ့ ကစားသမားဖြစ်ခဲ့ပြီး တစ်ပတ်လုပ်ခပေါင် ၃ သိန်းနဲ့ ၅ နှစ်စာချုပ်ချုပ်ဆိုခဲ့တာပါ။စတာလင်ဟာ အမေရိကန်ကို ရာသီကြိုခရီးစဉ်ထွက်ခွာခဲ့တဲ့ ချယ်လ်ဆီးအသင်းထံကို သွားရောက်ပူးပေါင်းခဲ့ပြီး လော့စ်အိန် ဂျလိစ်နေရောင်အောက်မှာ ပြုလုပ်ခဲ့တဲ့ လေ့ကျင့်ရေးအစီအစဉ်မှာ ပါဝင်ခဲ့တာဖြစ်ပါတယ်။ ချယ်လ်ဆီး အသင်း နည်းပြ တူချယ်လ်က စတာလင်ကို အသင်းဖော်အသစ်တွေနဲ့ မိတ်ဆက်မှုတွေ ပြုလုပ်ပေးခဲ့တာပါ။

တူချယ်လ်က “ရာဟင်မ်က ကျနော်တို့ရဲ့ ကစားသမားသစ်ပါ။ကျနော်တို့ အားလုံးသူ့ကို နွေးထွေးစွာကြိုဆို ပါတယ်။သူဒီမှာရှိနေလို့ ကျနော်တို့အားလုံးပျော်ရွှင်ပါတယ်။ပထမဆုံးအကြိမ်လေ့ကျင့်မှုကို ကောင်းမွန်စွာ လုပ်ဆောင်ပါ”လို့ ပြောခဲ့တဲ့ ဗီဒီယိုဖိုင်ကို အသင်းရဲ့တရားဝင်တွစ်တာအကောင့်မှာ တင်ခဲ့တာဖြစ်ပါတယ်။

စတာလင်ဟာ အသင်းဖော်သစ်တွေနဲ့အတူ အပြေးလေ့ကျင့်မှု၊ ဘောလုံးပေးပို့မှု အစရှိတဲ့ လေ့ကျင့်ခန်း အစီအစဉ်တွေကို ပြုလုပ်ကာ အင်္ဂလန်လက်ရွေးစင်အသင်းဖော်တွေဖြစ်တဲ့ ရီစီဂျိမ်းစ်၊ အိုဒွိုင်းတို့နဲ့လည်း စကားပြောဆိုနေခဲ့တာပါ။မန်စီးတီးကစားသမားဟောင်းဟာ လေ့ကျင့်မှုမစတင်ခင်မှာ ချယ်လ်ဆီးအသင်း ပရိသတ်တွေကို လတ်မှတ်ထိုးပေးခဲ့ပါသေးတယ်။စတာလင်ဟာ ကလပ်အမေရိကအသင်းနဲ့ ကစားမယ့် ခြေစမ်းပွဲမှာ ချယ်လ်ဆီးအတွက် ပထမဆုံးပွဲစဉ်အဖြစ် ပါဝင်ကစားဖို့ ရှိနေတာပါ။

ချယ်လ်ဆီးအသင်းဟာ အမေရိကန်ခရီးစဉ်မှာ ချာလော့တီ၊ ပရီးမီးယားလိဂ်ပြိုင်ဘက် အာဆင်နယ်တို့နဲ့ ခြေစမ်းပွဲ ယှဉ်ပြိုင်မှာဖြစ်ပါတယ်။စတာလင်က “ဒီမှာ ရှိနေရတာကို အလွန်ဝမ်းသာပါတယ်။ကျနော့်ရဲ့ ကစားသမားဘဝမှာ အခုအချိန်ထိ အောင်မြင်မှုအများအပြားရယူနိုင်ခဲ့ပေမယ့် အောင်မြင်မှုအများကြီး ရဖို့ ကျန်နေသေးတာကို ချယ်လ် ဆီးဂျာစီနဲ့ လုပ်ဆောင်နိုင်ဖို့ မျှော်လင့်ပါတယ်”လို့ ပြောခဲ့တာပါ။

စတာလင်ဟာ မန်စီးတီးအသင်းမှာ ကစားခဲ့တဲ့ ၇ ရာသီကြာအတွင်း ပွဲပေါင်း ၃၀၀ ကျော်ပါဝင်ကစားပြီး ၁၃၁ ဂိုး သွင်းယူကာ ဆုဖလားပေါင်း ၁၁ လုံးရယူနိုင်ခဲ့တာဖြစ်ပါတယ်။

Source:Daily Mail

CNI Sport News

၂၀၂၂ ခုနှစ်၊ ဇူလိုင် ၁၄

မြန်မာအသင်းဟာ အာဆီယံအမျိုးသမီးချန်ပီယံရှစ်ပြိုင်ပွဲ အုပ်စုနောက်ဆုံးပွဲစဉ်မှာ ဗီယက်နမ်အသင်းကို အရေးနိမ့်ခဲ့တာကြောင့် ထိုင်းအသင်းနဲ့ ဆီမီးဖိုင်နယ်ပွဲစဉ်ယှဉ်ပြိုင်ရမှာဖြစ်ပါတယ်။

မြန်မာအသင်းဟာ ဗီယက်နမ်အသင်းနဲ့ ကစားခဲ့တဲ့ ပွဲမှာ ၄ ဂိုး- ဂိုးမရှိနဲ့ ဂိုးပြတ်အရေးနိမ့်ခဲ့တာပါ။ဒီပွဲ အရေးနိမ့် ခဲ့တဲ့အတွက် မြန်မာအသင်းဟာ အုပ်စုတွင်း ဒုတိယနေရာသာ ရရှိခဲ့ပြီး တစ်ဖက်အုပ်စုမှာ ထိပ်ဆုံးရရှိခဲ့တဲ့ ထိုင်းအသင်းနဲ့ ဆီမီးဖိုင်နယ်ယှဉ်ပြိုင်ရမှာဖြစ်ပါတယ်။ဗီယက်နမ်အသင်းကတော့ တစ်ဖက်အုပ်စုက ဒုတိယရရှိတဲ့ အိမ်ရှင်ဖိလစ်ပိုင်အသင်းနဲ့ ဆီမီးဖိုင်နယ်ယှဉ်ပြိုင်ရမှာပါ။မြန်မာအသင်းနည်းပြကတော့ ဗီယက်နမ်နဲ့ပွဲမှာ လူငယ် ကစားသမားတွေအများစု အသုံးပြုခဲ့လို့ အခုလို ရလဒ်ထွက်ပေါ်ခဲ့တာလို့ ပွဲအပြီးမှာ ပြောခဲ့ပါတယ်။

မြန်မာအသင်းနည်းပြ ဒေါ်သက်သက်ဝင်းက “ဒီပွဲအတွက် ပွဲထွက်လူစာရင်းမှာ အသက် ၁၉ နှစ်အောက်အသင်းက လူငယ်တွေကိုအများစု အသုံးပြုခဲ့ပါတယ်။ကလေးတွေ အကောင်းဆုံးကြိုးစားခဲ့ပေမယ့် အတွေ့အကြုံပိုင်းမှာသာ တဲ့ ဗီယက်နမ်ကစားသမားတွေက ပွဲကိုအပြောင်းအလဲလုပ်ပြီး အသာရသွားတယ်လို့ မြင်မိပါတယ်။ ခွင့်ပြုခဲ့ရတဲ့ ၄ ဂိုးမှာ လူကျွံအနေအထား၊ ပင်နယ်တီတွေပါဝင်လာလို့ ဒီလိုရလဒ်မျိုးဖြစ်သွားတယ်လို့ ထင်ကြောင်း” ပြောခဲ့တာပါ။

ဆီမီးဖိုင်နယ်ပွဲစဉ်အဖြစ် ယှဉ်ပြိုင်ရမယ့် ထိုင်းအသင်းနဲ့ ပွဲအတွက် အကောင်းဆုံးပြင်ဆင်သွားမှာပါလို့ မြန်မာ နည်းပြက ထပ်ပြီး ပြောခဲ့ပါတယ်။မြန်မာအသင်းဟာ အုပ်စုတွင်း ၄ ပွဲမှာ တီမောကို ၇ ဂိုး- ဂိုးမရှိ၊ ကမ္ဘောဒီးယားကို ၃ ဂိုး- ဂိုးမရှိ၊ လာအိုကို ၃ ဂိုး- ၁ ဂိုးနဲ့ အနိုင်ရခဲ့ပြီး ဗီယက်နမ်အသင်းကို အရေးနိမ့်ခဲ့တာပါ။ ဆီမီးဖိုင်နယ်မှာ တွေ့ဆုံရမယ့် မြန်မာအသင်းနဲ့ ထိုင်းအသင်းဟာ ပြီးခဲ့တဲ့ ဆီးဂိမ်းစ်ပြိုင်ပွဲမှာ တွေ့ဆုံခဲ့တုန်းက ၁ ဂိုးစီ သရေကျ ခဲ့တာဖြစ်ပါတယ်။

အာဆီယံအမျိုးသမီးချန်ပီယံရှစ်ပြိုင်ပွဲမှာ ချန်ပီယံဆု ၂ ကြိမ်ရရှိထားတဲ့ မြန်မာအသင်းဟာ ၂၀၁၉ က နောက်ဆုံး ယှဉ်ပြိုင်ခဲ့တဲ့ ပြိုင်ပွဲမှာတော့ တတိယနေရာရရှိခဲ့တာပါ။အခုနှစ်ပြိုင်ပွဲအတွက် ဆီမီးဖိုင်နယ်ပွဲစဉ်တွေကို ဇူလိုင်လ ၁၅ ရက်မှာ ကျင်းပသွားမှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇူလိုင် ၁၃

တင်းနစ်ဂန္တဝင် ကစားသမား ရော်ဂျာဖက်ဒဲရားဟာ ဒူးဒဏ်ရာကြောင့် တစ်နှစ်ကျော်ကြာ ပြိုင်ပွဲတွေနဲ့ ဝေးကွာခဲ့ပြီးနောက် အနားယူမယ့်အကြောင်း အရိပ်အမြွက် ပြောလိုက်ပါတယ်။

ဖက်ဒဲရားက “ ရိုးရိုးသားသားပြောရရင် အိမ်မှာနေရတာ အလွန်ပျော်ပါတယ်။ မိသားစုနဲ့ ခရီးသွားရတာကို လွမ်းသလို အားကစားကိုလည်း လွမ်းပါတယ်။ ဒါပေမယ့် အိမ်မှာနေရတဲ့ ဘဝက ပိုကောင်းပါတယ်။ တင်းနစ်ခရီးစဉ်က တစ်ခါတရံ အလွန်များပြီး အခု အနားယူနေရတာ ကောင်းပါတယ်။ ခရီးသွားရတာကို လွမ်းနေပေမယ့် ကလေးတွေအတွက် ကောင်း ပါတယ်”လို့ ဒတ်ချ်သတင်းစာ Algemeen Dagblad ကို ပြောပါတယ်။

ဖက်ဒရားဟာ လက်ရှိအချိန်မှာ ဒဏ်ရာကြောင့် အနားယူနေရလို့ ကလေး ၄ ဦးကို အချိန် ပိုပေးနိုင်နေတာ ဖြစ်ပါတယ်။ ဆွစ်ဇာလန် တင်းနစ်သမားဟာ ကစားပွဲတွေနဲ့ ဝေးကွာနေတာကြောင့် ၂၅ နှစ်အတွင်း ပထမဆုံးအကြိမ် ATP အဆင့် သတ်မှတ်ချက်မှာ မပါဝင်တော့ပါဘူး။

ဖက်ဒဲရားနဲ့ သူ့ရဲ့မိသားစု (Yahoo News)

ဖက်ဒဲရားဟာ ဒူးကို ၃ ကြိမ် ခွဲစိတ်ကုသမှု ခံယူခဲ့ရပြီး စက်တင်ဘာလ Laver Cup ပြိုင်ပွဲမှာ ပါဝင်ကစားနိုင်ဖို့ မျှော်လင့်နေ တာ ဖြစ်ပါတယ်။ အောက်တိုဘာလ ဘေဆဲလ်မှာ ကျင်းပမယ့် ATP ပြိုင်ပွဲကိုလည်း ပါဝင်ယှဉ်ပြိုင်နိုင်ဖို့ ဖက်ဒဲရားက ပစ်မှတ် ထားနေပါတယ်။

ဖက်ဒဲရားဟာဆိုရင် ပြီးခဲ့တဲ့နှစ် ဝင်ဘယ်လ်ဒန် အိုးပန်း ကွာတားဖိုင်နယ်မှာ နောက်ဆုံး ပါဝင်ယှဉ်ပြိုင်ခဲ့တာဖြစ်ပြီး အဲဒီပွဲမှာ အရေးနိမ့်ခဲ့တာ ဖြစ်ပါတယ်။ ဖက်ဒဲရား အနေနဲ့ ဝင်ဘယ်လ်ဒန်အိုးပန်း ချန်ပီယံဆုကို ၈ ကြိမ် ရရှိထားပြီး ဂရမ်းဆလမ်း ချန်ပီယံဆုကို အကြိမ် ၂၀ ရရှိထားပါတယ်။

ဖက်ဒဲရားက “တင်းနစ်ဟာ ကျနော့်အတွက် အစိတ်အပိုင်း တစ်ခုဖြစ်ပေမယ့် ကိုယ်ပိုင် အရာအားလုံး မဟုတ်ပါဘူး။ ဒီမှာ ဆက်ရှိချင်သလို အောင်မြင်မှုတွေလည်း ရယူချင်ပါတယ်။ ပရော်ဖက်ရှင်နယ် အသက်မွေးဝမ်းကြောင်း တစ်ခုဟာ ထာဝရ မတည်မြဲနိုင်ဘူးဆိုတာ ကျနော်သိပါတယ်။ ဒါပေမယ့် အဆင်ပြေပါတယ်”လို့ ပြောခဲ့ပါတယ်။

အသက် ၄၀ အရွယ်ရှိပြီဖြစ်တဲ့ ဖက်ဒဲရားဟာ ကစားသမားဘဝ တစ်လျှောက်မှာ ATP တစ်ဦးချင်း ဆုဖလား ၁၀၃ ကြိမ်၊ ဂရမ်းဆလမ်း အကြိမ် ၂၀ နဲ့ အိုလံပစ် ငွေတံဆိပ်ဆုတို့ ရယူနိုင်ခဲ့ပြီး အောင်မြင်ခဲ့တာလည်း ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ ဇူလိုင် ၁၃

မန်ချက်စတာယူနိုက်တက်နည်းပြဟောင်း ဆိုးလ်ရှားဟာ အီရန်လက်ရွေးစင်နည်းပြရာထူးအတွက် ကမ်းလှမ်းမှုကို ငြင်းပယ်လိုက်တယ်လို့ သိရပါတယ်။

အီရန်အသင်းဟာ နည်းပြဖြစ်သူ ဒရာဂန်ကို ၂၀၂၂ ကမ္ဘာ့ဖလားပြိုင်ပွဲမတိုင်ခင် ၄ လအလိုမှာ ရာထူးကနေ ထုတ်ပယ်လိုက်ပြီး မန်ယူနည်းပြဟောင်း ဆိုးလ်ရှားကို ကမ်းလှမ်းခဲ့တာလည်း ဖြစ်ပါတယ်။

အာရှကလပ်ဟာ ကမ္ဘာ့ဖလားပြိုင်ပွဲရဲ့ အုပ်စုတွင်းမှာ အင်္ဂလန်၊ အမေရိကန်၊ ဝေးလ်စ်တို့နဲ့ တစ်အုပ်စုတည်း ကျရောက်နေခဲ့တာ ဖြစ်ပါတယ်။ခရိုအေးရှားလူမျိုး ဒရာဂန်ဟာ အီရန်အသင်းကို ၁၈ ပွဲ ကိုင်တွယ်ခဲ့တာမှာ ၁၅ ပွဲအနိုင်ရရှိအောင် စွမ်းဆောင်နိုင်ခဲ့ပေမယ့် နောက်ဆုံး ၃ ပွဲမှာ ၂ ပွဲအထိရှုံးနိမ့်ခဲ့တာကြောင့် နည်းပြရာထူးကနေ ထုတ်ပယ်ခံခဲ့ ရတာပါ။

Foot Mercato က အီရန်ဟာ ကမ္ဘာ့ဖလားပြိုင်ပွဲဝင်အမျိုးသားအသင်းကို ဦးဆောင်ပေးနိုင်ဖို့ ဆိုးလ်ရှားထံ ချဉ်းကပ်ခဲ့တယ်လို့ ဖော်ပြခဲ့ပါတယ်။ဒါပေမယ့် ဆိုးလ်ရှားဟာ သရဲနီကြယ်ပွင့်ဟောင်းတွေနဲ့ ပြန်လည်ဆုံတွေ့ရ မယ့် လက်ရွေးစင်နည်းပြရာထူး ကမ်းလှမ်းမှုကို ပယ်ချခဲ့ပြီး အခြားနေရာတွေမှာ ရေတိုဦးစားပေးရမှာတွေ ရှိနေတာကြောင့် ဒီလိုကမ်းလှမ်းမှုကို ပယ်ချခဲ့တယ်လို့ အဆိုပါသတင်းက ဖော်ပြခဲ့ပါတယ်။

လက်ရှိအချိန်မှာ အသင်းလက်မဲ့ဖြစ်နေတဲ့ ဆိုးလ်ရှားကို နည်းပြလောကထဲ ပြန်လည်ဝင်ရောက်နိုင်ဖို့အတွက် ကလပ်အသင်းတွေရဲ့ကမ်းလှမ်းမှုတွေလည်း ရှိနေတာပါ။ပြီးခဲ့တဲ့ နိုဝင်ဘာလက အိုးထရက်ဖိုဒ့်ကနေ ထွက်ခွာခဲ့တဲ့ ဆိုးလ်ရှားကို အမည်မဖော်လိုတဲ့ ပရီးမီးယားလိဂ်ကလပ်က ချဉ်းကပ်ခဲ့သလို ဥရောပတစ်ဝှမ်းမှာရှိတဲ့ ကလပ် အသင်းအများအပြားရဲ့ စိတ်ဝင်စားမှုကို ရခဲ့ပါတယ်။

မန်ချက်စတာယူနိုက်တက် အရန်အသင်းကနေ နည်းပြ ဘဝအစပြုခဲ့တဲ့ ဆိုးလ်ရှားဟာ မိုလ်ဒီ၊ ကာဒစ်ဖ်နဲ့ မန်ချက်စတာယူနိုက်တက်တို့ကို ကိုင်တွယ်ထားခဲ့တာပါ။

ဆိုးလ်ရှားဟာ နည်းပြဘဝမှာ မိုလ်ဒီအသင်းနဲ့ ဆုဖလား ၃ လုံးရယူနိုင်ခဲ့ပြီး မန်ချက်စတာယူနိုက်တက်နဲ့တော့ ယူရိုပါလိဂ် ဒုတိယသာ ရရှိခဲ့တာဖြစ်ပါတယ်။

Source:The Sun

CNI Sport News

၂၀၂၂ ခုနှစ်၊ ဇူလိုင် ၁၃

ပီအက်စ်ဂျီအသင်းဟာ ရော်နယ်ဒိုအတွက် အသင်းမှာ နေရာမရှိတာကြောင့် ခေါ်ယူနိူင်မယ့်အခွင့်အရေးကို ပယ်ချလိုက်ပါတယ်။

ရော်နယ်ဒိုဟာ ဆုဖလားတွေကိုင်မြှောက်ချင်တဲ့ ရည်မှန်းချက်ကြောင့် အခုနွေရာသီအပြောင်းအရွှေ့မှာ မန်ချက် စတာယူနိုက်တက်ကနေ ထွက်ခွာချင်ကြောင်း ပြောထားခဲ့တာပါ။ဒါပေမယ့် သူ့ရဲ့ လုပ်ခလစာအား တစ်ပတ်ပေါင် ၅ သိန်းကို ပေးနိုင်တဲ့အသင်းအရေအတွက် အနည်းငယ်သာရှိပြီး ဒီထဲမှာ ပီအက်စ်ဂျီအသင်းလည်း ပါဝင်နေတာ ဖြစ်ပါတယ်။

ဒါပေမယ့် ပီအက်စ်ဂျီဥက္ကဋ္ဌ အယ်လ်ခီလိုင်ဖီနဲ့ အေးဂျင့် ဂျော့ချ်မန်ဒတ်စ်တို့ ဆွေးနွေးအပြီးမှာတော့ ရော်နယ်ဒိုကို ခေါ်ယူခွင့်ပယ်ချခဲ့တယ်လို့ ESPN သတင်းဌာနက ဖော်ပြခဲ့တာပါ။

အယ်လ်ခီလိုင်ဖီနဲ့ ဂျော့ချ်မန်ဒတ်စ်တို့ဟာ ရင်းနှီးတဲ့ဆက်ဆံရေးရှိပြီး ရော်နယ်ဒိုရဲ့ အပြောင်းအရွှေ့အတွက် တွေ့ဆုံခဲ့ကြတာဖြစ်ပါတယ်။

ပီအက်စ်ဂျီအသင်းဟာ ရော်နယ်ဒိုနဲ့ လိုက်လျောညီထွေဖြစ်မယ့် လုပ်ခဘတ်ဂျတ် သူတို့ဆီမှာ အလုံအလောက်မရှိသလို ဘတ်ပီ၊ နေမာနဲ့ မက်ဆီတို့လို နာမည်ကြီးကစားသမားတွေရှိနေတာ ကြောင့် အသင်းမှာအံမဝင်နိုင်မှာကို စိုးရိမ်မှုတွေရှိနေတာပါ။ဒါ့အပြင် အခုအချိန်ဟာ ရော်နယ်ဒိုကို ခေါ်ယူဖို့ အတွက် မှန်ကန်တဲ့အချိန်မဟုတ်ဘူးလို့လည်း ပြင်သစ်ကလပ်က ယုံကြည်နေတာဖြစ်ပါတယ်။

ဘိုင်ယန်မြူးနစ်အသင်းကလည်း ရော်နယ်ဒိုကို ခေါ်ယူလို့ရမယ့်အခွင့်အရေးကို ငြင်းပယ်ခဲ့တယ်လို့ သတင်းတွေ ထွက်ပေါ်ခဲ့တာကြောင့် ပေါ်တူဂီကစားသမားအတွက် ရွေးချယ်စရာတွေဟာ လျော့နည်းလာခဲ့တာပါ။

ရော်နယ်ဒို ကို ခေါ်ယူဖို့ ချယ်လ်ဆီးအသင်းက စိတ်ဝင်စားနေပေမယ့် နည်းပြတူချယ်လ်ရဲ့နည်းစနစ်နဲ့ အံဝင်နိုင်မလားဆိုပြီး စိုးရိမ်မှုတွေရှိနေတာဖြစ်ပါတယ်။ရော်နယ်ဒိုဟာ အသင်းကထွက်ခွာချင်တဲ့ဆန္ဒကြောင့် မန်ချက်စတာယူနိုက်တက် နဲ့ လေ့ကျင့်မှုပြုလုပ်ခြင်းမရှိသလို ရာသီကြိုခရီးစဉ်လည်း လိုက်ပါခြင်းမရှိပါဘူး။

မန်ချက်စတာကလပ်ကတော့ ရာသီကြိုခြေစမ်းပွဲမှာ လီဗာပူးလ်အသင်းကို ၄ ဂိုး- ဂိုးမရှိနဲ့ ဂိုးပြတ်အနိုင်ရရှိခဲ့တာ ဖြစ်ပါတယ်။ဒီပွဲမတိုင်ခင် ပြုလုပ်ခဲ့တဲ့ သတင်းစာရှင်းလင်းပွဲမှာ နည်းပြ အဲရစ်တန်ဟတ်က ရော်နယ်ဒိုကို ရောင်းချ သွားမှာမဟုတ်ဘဲ သူ့ရဲ့အစီအစဉ်မှာပါဝင်တယ်လို့ ပြောခဲ့တာပါ။

ကလပ်ကလည်း စာချုပ်ကျန်ရှိနေတဲ့ ရော်နယ်ဒို ကို ရောင်းချသွားမှာမဟုတ်ဘူးလို့ ပြတ်ပြတ်သားသား ပြောခဲ့တာဖြစ်ပါတယ်။မန်ချက်စတာ ယူနိုက်တက်ဟာ ပြီးခဲ့တဲ့ရာသီအကုန်က အဓိက ကစားသမားအများအပြားကို ဆုံးရှုံးခဲ့တာကြောင့် ရော်နယ်ဒိုကို ထပ်ပြီးလက်လွှတ် ရမှာ စိုးရိမ်နေတာပါ။

အခုအချိန်ထိ အပြောင်းအရွှေ့မှာ မာလာစီယာတစ်ဦးတည်းကိုသာ ခေါ်ယူထားနိုင်သေးတာကြောင့် မန်ချက်စတာ ကလပ်ဟာ ကစားသမားအချို့ကို အမြန်ဆုံးခေါ်ယူနိုင်ဖို့ လုပ်ဆောင်နေတာဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ ဇူလိုင် ၁၃

ယူကရိန်းပရီးမီးယားလိဂ်ပြိုင်ပွဲကို ပရိသတ်မပါဘဲ သြဂုတ်လ ၂၃ ရက်မှာ ပြန်လည်စတင်မယ်လို့ နိုင်ငံရဲ့ အားကစားဝန်ကြီးက အင်္ဂါနေ့မှာ ပြောလိုက်ပါတယ်။

ယူကရိန်းအားကစားဝန်ကြီးက “ယူကရိန်းမှာ တခြားနိုင်ငံတွေရဲ့ ချန်ပီယံပြိုင်ပွဲတွေလိုပဲ ဘောလုံးပြန် ကစား နိုင်ဖို့က အလွန်အရေးကြီးပါတယ်။ယူကရိန်းအားကစားဟာ နယ်ပယ်ပေါင်းစုံမှာ အောင်ပွဲခံနိုင်ပြီး တိုးတက်မှုတွေ ကနေ ရပ်တန့်လို့ မရပါဘူး။ကျနော်တို့ အနိုင်ရဖို့ ဆက်လက်ပြီး တိုက်ပွဲဝင်နေပါတယ်”လို့ သူ့ရဲ့ လူမှုကွန်ယက်မှာ ရေးသားခဲ့ပါတယ်။

ဒါပေမယ့် အားကစားကွင်းတွေမှာ ဘယ်လိုလေကြောင်းတိုက်ခိုက်မှုအတွက်မဆို အမိုးအကာတွေ တပ်ဆင်ပြီး ကျင်းပသွားမှာပါ။အားကစားဝန်ကြီးကတော့ ပွဲတွေမှာ လုံခြုံရေးအပြင် တခြားဘေးကင်းစီမံမှုတွေပါရှိရမယ်လို့ ပြောထားပါတယ်။

သြဂုတ်လ ၂၃ ရက်ဟာ ယူကရိန်းနိုင်ငံရဲ့ အမျိုးသားအလံထူတဲ့နေ့နဲ့ တိုက်ဆိုင်တယ်လို့ သတင်း မှာ ဖော်ပြထားတာပါ။

ရုရှားရဲ့ကျူးကျော်မှုကိုခံရတဲ့ ဖေဖော်ဝါရီလကတည်းက ယူကရိန်းပရီးမီးယားလိဂ်ပြိုင်ပွဲကို ရပ်တန့်ခဲ့တာပါ။ လိဂ်ပြိုင်ပွဲကို ဒီဇင်ဘာလက နောက်ဆုံးကစားခဲ့ပြီး ဆောင်းရာသီအားလပ်ရက်အဖြစ် ၃ လကြာ ရပ်နားခဲ့တာ ဖြစ်ပါတယ်။

ရှက်တာဒိုးနတ်အသင်းဟာ ၁၈ ပွဲကစားပြီး ၄၇ မှတ်နဲ့ ဒုတိယနေရာက ဒိုင်နမိုကိဗ်အသင်းထက် ၂ မှတ်အသာနဲ့ အမှတ်ပေးဇယားထိပ်ဆုံးနေရာမှာ ရပ်တည်ခဲ့တာပါ။ ရှက်တာဒိုးနတ်အသင်းဟာ အခုလာမယ့် ရာသီ ချန်ပီယံလိဂ်ပြိုင်ပွဲရဲ့ အုပ်စုအဆင့်ကို ဝင်ရောက်ယှဉ်ပြိုင်ရမှာ ဖြစ်ပါတယ်။

ရှက်တာဒိုးနတ်အသင်းအားကစားဒါရိုက်တာ ဒါရီဂျိုဆာနာက သူတို့ရဲ့ ချန်ပီယံလိဂ်ပွဲစဉ်တွေကို ပိုလန်မြို့တော် ဝါဆောမှာ ကစားမယ်လို့ ပြီးခဲ့တဲ့အပတ်က အတည်ပြုထားခဲ့တာပါ။

ဒိုင်နမိုကိဗ်ကလည်း ချန်ပီယံလိဂ်ဒုတိယ အဆင့် ခြေစစ်ပွဲအဖြစ် ဖီနာဘာချီအသင်းနဲ့ ယှဉ်ပြိုင်ရမှာဖြစ်ပြီး အိမ်ကွင်းပွဲစဉ်အဖြစ် ဇူလိုင်လ ၂၀ ရက် ပိုလန် နိုင်ငံမှာပဲ ယှဉ်ပြိုင်မှာ ဖြစ်ပါတယ်။

ပရီးမီးယားလိဂ်ကလပ် အဲဗာတန်အသင်းဟာ ဇူလိုင်လ ၂၉ ရက်မှာ ရာသီကြိုခြေစမ်းပွဲအဖြစ် ဒိုင်နမိုအသင်းနဲ့ ကစားဖို့ ရှိနေပြီး ရရှိလာမယ့် ငွေကြေးတွေကို ယူကရိန်းပြည်သူတွေကို ထောက်ပံ့ကူညီနေတဲ့ လူသားချင်းစာနာမှု ဆိုင်ရာ ပရဟိတအဖွဲ့တွေကို လှူဒါန်းသွားမှာဖြစ်ပါတယ်။

Source:ChannelNewsAsia

CNI Sport News

၂၀၂၂ ခုနှစ်၊ ဇူလိုင် ၁၂

ထိုင်းနိုင်ငံ ဘန်ကောက်မှာ ရာသီကြို ခြေစမ်းပွဲအဖြစ် ကစားခဲ့တဲ့ လီဗာပူးလ်နဲ့ မန်ချက်စတာ ယူနိုက်တက် အသင်းတို့ပွဲမှာ မန်ချက်စတာ ယူနိုက်တက် အသင်းက ၄  ဂိုး - ဂိုးမရှိနဲ့ အနိုင်ရရှိခဲ့ပါတယ်။

ယူနိုက်တက်အတွက် ဂိုးတွေကို ဆန်ချို၊ ဖရက်ဒ်၊ မာရှယ် နဲ့ ပယ်လီစထရီတို့က သွင်းယူခဲ့တာဖြစ်ပါတယ်။ ဒီပွဲရဲ့ ပထမပိုင်းမှာ ယူနိုက်တက်အသင်းဟာ အဓိက ကစားသမားတွေနဲ့ ပွဲထွက်ခဲ့ပြီး လီဗာပူးလ် အသင်းကတော့ အဓိက ကစားသမား အနည်း ငယ်နဲ့ လူငယ်ကစားသမားတွေကို ပွဲထွက်ခဲ့တာ ဖြစ်ပါတယ်။

ဒါပေမယ့် လီဗာပူးလ် အသင်းရဲ့ ဂိုးကန်သွင်းချက် အချို့ကို ဒီဂီယာ အကောင်းဆုံး လက်စွမ်းပြနိုင်ခဲ့လို့သာ ဂိုးမပေးခဲ့ရတာ ဖြစ်ပါတယ်။ ပထမပိုင်းမှာ ယူနိုက်တက် အသင်းက ၃ ဂိုး- ဂိုးမရှိနဲ့ ဦးဆောင်နေခဲ့တာပါ။

ဒုတိယပိုင်း ကစားချိန် အနည်းငယ်အကြာမှာ လီဗာပူးလ်အသင်းဟာ အဓိက ကစားသမားတွေကို ထည့်သွင်းပြီး ချေပဂိုးရဖို့ ပိုမိုအားစိုက်လာခဲ့တာ ဖြစ်ပါတယ်။

ဒါပေမယ့် ယူနိုက်တက်က နောက်တစ် ဂိုးထပ်ရခဲ့ပြီး ပယ်လီစထရီက သွင်းယူခဲ့တာ ဖြစ်ပါတယ်။ အဲ့ဒီနောက်ပိုင်းမှာ နှစ်သင်း စလုံး ဂိုးထပ် မသွင်းနိုင်တော့တာကြောင့် မန်ချက်စတာ ယူနိုက်တက် အသင်းက ၄ ဂိုး- ဂိုးမရှိနဲ့ အနိုင်ရပြီး ရာသီကြိုကို အနိုင် နဲ့ စတင်ခဲ့ပါတယ်။

CNI Sport News

၂၀၂၂ ခုနှစ်၊ ဇူလိုင် ၁၂

ထိုင်းနိုင်ငံ၊ Rajamangala ကွင်းမှာ မန်ချက်စတာ ယူနိုက်တက်အသင်းနှင့် လီဗာပူးလ် အသင်းတို့ ယနေ့ (ဇူလိုင် ၁၂ ရက်) ခြေစမ်းပွဲ ယှဉ်ပြိုင်နေကြသည်။

အဆိုပါ ခြေစမ်းပွဲ ကျင်းပသည့် Rajamangala ကွင်းတွင် သရဲနီ (မန်ချက်စတာယူနိုက်တက်အသင်း) ပရိသတ်များ အနီ ရောင် လွှမ်းမိုးထားသည်ဟု ကွင်းအတွင်းရောက်ရှိနေသူ တစ်ဦးက ရေးသားထားသည်။

ယခု မြင်တွေ့ရသည့် ပုံသည် မန်ချက်စတာယူနိုက်တက်အသင်းနှင့် လီဗာပူးလ်အသင်းတို့ ယှဉ်ပြိုင်မှုမစခင် ကွင်းဖွင့်ပွဲအစ ဖြေဖျော်မှု တစ်ခုကို မြင်တွေ့ရခြင်း ဖြစ်သည်။

CNI Sport News

၂၀၂၂ ခုနှစ်၊ ဇူလိုင် ၁၁

ဂျူဗင်တပ်စ်အသင်းဟာ မန်ချက်စတာ ယူနိုက်တက်အသင်းနဲ့ စာချုပ်ကုန်ဆုံးသွားတဲ့ ပေါ့ဘာကို အလွတ်ပြောင်းရွှေ့ကြေးနဲ့ ပြန်လည် ခေါ်ယူနိုင်ခဲ့ပြီလို့ တရားဝင် ကြေညာလိုက်ပါတယ်။

ပေါ့ဘာဟာ ဂျူဗင်တပ်စ်အသင်းနဲ့ ၂၀၂၆ ဇွန်လအထိ စာချုပ်ချုပ်ဆိုခဲ့တာဖြစ်ပြီး တစ်နှစ်လုပ်ခ ပေါင် ၈ သန်းအပြင် ထပ်တိုး ပေးချေငွေတွေလည်း ရရှိမှာ ဖြစ်ပါတယ်။ ပေါ့ဘာဟာ သောကြာနေ့ ကတည်းက ဆေးစစ်မှုတွေ ပြုလုပ်ဖို့ တူရင်ကို ရောက် ရှိလာခဲ့တာဖြစ်ပြီး အပြောင်းအရွှေ့ကို တနင်္လာနေ့မှ ဂျူဗင်တပ်စ်အသင်းက တရားဝင် ကြေညာခဲ့တာ ဖြစ်ပါတယ်။

ပေါ့ဘာကို တွေ့ရစဉ် (Twitter)

ပေါ့ဘာဟာ ဂျူဗင်တပ်စ်အသင်းမှာ အရင်ဝတ်ဆင်ခဲ့တဲ့ ကျောနံပါတ် ၁၀ ဂျာစီကို ပြန်လည် ဝတ်ဆင်မှာ ဖြစ်ပါတယ်။ ပေါ့ဘာ ဟာဆိုရင် ဂျူဗင်တပ်စ်အသင်းမှာ ပထမတစ်ကြိမ် ကစားခဲ့တဲ့ ၂၀၁၂ ကနေ ၂၀၁၆ အထိ စီးရီးအေဆုဖလား ၄ ကြိမ်၊ ကိုပါ အီတာလီယာဖလား ၂ ကြိမ်နဲ့ စူပါကိုပါအီတာလီယာဖလား ၂ ကြိမ် ရယူနိုင်ခဲ့တာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ ဇူလိုင် ၁၁

ဒမ်ဘီလီဟာ ဘာစီလိုနာအသင်းနဲ့ ၂ နှစ် စာချုပ်ချုပ်ပြီး လစာလျှော့ယူဖို့ သဘောတူညီခဲ့တယ်လို့ နိုင်ငံတကာ အားကစား သတင်းတွေက ဖော်ပြလိုက်ပါတယ်။

ဒမ်ဘီလီနဲ့ ဘာစီလိုနာ အသင်းတို့ဟာ စာချုပ်သက်တမ်းတိုးဖို့ နှစ်ဦးနှစ်ဖက် သဘောတူညီမှု မရရှိခဲ့လို့ ပြီးခဲ့တဲ့ ဇွန်လ အကုန် မှာ စာချုပ်သက်တမ်း ကုန်ဆုံးသွားခဲ့တာပါ။

အဲ့ဒါကြောင့် အလွတ်ပြောင်းရွှေ့ကြေးနဲ့ ခေါ်ယူလို့ရမယ့် ဒမ်ဘီလီကို ပီအက်စ်ဂျီနဲ့ ချယ်လ်ဆီးအသင်းတို့က စိတ်ဝင်စား လာတာနဲ့အတူ အပြောင်းအရွှေ့ ထင်ကြေးတွေကလည်း ကျယ်ကျယ်ပြန့်ပြန့် ထွက်ပေါ်လာခဲ့ပါတယ်။ ဒါပေမယ့် ကစား သမားက ဘာစီလိုနာမှာ ဆက်နေချင်တာကြောင့် နှစ်ဦးနှစ်ဖက် သဘောတူညီမှု ရရှိဖို့ လုပ်ဆောင်လာခဲ့ရတာပါ။
အီတလီ နာမည်ကြီး ဂျာနယ်လစ် ဖာဘရီဇီယိုရိုမန်နိုက ဒမ်ဘီလီဟာ စာချုပ်ပါ အချက်အလက်အားလုံးကို လက်ခံခဲ့ပြီး ၂၀၂၄ အထိ သက်တမ်းရှိ စာချုပ်ချုပ်ဆိုမှာ ဖြစ်သလို ဘာစီလိုနာရဲ့ ဘဏ္ဍာရေးအခက်အခဲကြောင့် လစာလျှော့ယူရမယ်လို့ ဖော်ပြခဲ့ ပါတယ်။

ဇာဗီနဲ့ ဒမ်ဘီလီကို တွေ့ရစဉ် (Barca Blaugranes)

ဘာစီလိုနာအသင်းနည်းပြ ဇာဗီကိုယ်တိုင်က ဒမ်ဘီလီကို အသင်းမှာ ဆက်ထိန်းသိမ်းနိုင်ဖို့ ကြိုးစားခဲ့ပြီး အခုရက်သတ္တပတ် မကုန်ခင်မှာ စာချုပ်သစ် ချုပ်ဆိုနိုင်ခဲ့ကြောင်း ကြေညာဖွယ်ရှိနေပါတယ်။

ဒမ်ဘီလီဟာ ဘာစီလိုနာအသင်းမှာ အရင်ကရခဲ့တဲ့ လုပ်ခလစာ ယူရို ၆ သန်းကို နှစ်ဆ အလိုရှိခဲ့ပေမယ့် ဘဏ္ဍာရေး အခြေအနေတွေကြောင့် မဖြစ်နိုင်တော့တာကို လက်ခံခဲ့ပါတယ်။

ဒမ်ဘီလီဟာ ပြီးခဲ့တဲ့ ဇန်နဝါရီ အပြောင်းအရွှေ့က ဘာစီလိုနာ အသင်းကနေ ထွက်ခွာချင်တယ်လို့ ပြောခဲ့ပေမယ့် နည်းပြ ဇာဗီက သူ့ရဲ့အကောင်းဆုံးပုံစံ ပြန်ရအောင် ရှာဖွေပေးနိုင်ခဲ့လို့ ရာသီအကုန်ထိ ဆက်ရှိခဲ့တာပါ။

ဒမ်ဘီလီဟာ ပြီးခဲ့တဲ့ရာသီက ဘာစီလိုနာ အသင်းအတွက် ၃၂ ပွဲ ပါဝင်ကစားခဲ့ပြီး ၂ ဂိုး သွင်းယူကာ ၁၃ ဂိုး ဖန်တီးနိုင်ခဲ့ပါတ ယ်။ ဘာစီလိုနာ အသင်းကို ၂၀၁၇ က ဒေါ့မွန်ကနေ ရောက်ရှိလာခဲ့တဲ့ ဒမ်ဘီလီဟာ ဒဏ်ရာတွေကြောင့် မကြာခဏ ဆိုသလို အနားယူနေခဲ့ရပြီး အသင်းအတွက် စုစုပေါင်း ၁၄၉ ပွဲသာ ပါဝင်ကစားနိုင်ခဲ့ကာ ၃၂ ဂိုးသွင်းပြီး ၃၄ ဂိုး ဖန်တီးနိုင်ခဲ့တာပါ။

ဘာစီလိုနာအသင်းဟာ ပြီးခဲ့တဲ့ရာသီက ဆုဖလားလက်မဲ့ ဖြစ်ခဲ့တာကြောင့် အခုရာသီမှာ အသင်းလူစာရင်း တောင့်တင်း အောင် ကတ်ဆီနဲ့ ခရစ်တန်ဆန်တို့ကို အားဖြည့်ထားပါတယ်။ ဒါ့အပြင် လီဝန်ဒေါစကီးနဲ့ ရာဖင်ဟာတို့ကိုလည်း ခေါ်ယူနိုင်ဖို့ ကြိုးစားလုပ်ဆောင်နေတာ ဖြစ်ပါတယ်။

Source: Sportsmole