CNI Sport News

၂၀၂၂ ခုနှစ်၊ ဇူလိုင် ၁

တောင်ကိုရီးယားနိုင်ငံဟာ ၂၀၂၃ အာရှဖလားပြိုင်ပွဲကို အိမ်ရှင်အဖြစ် ကျင်းပဖို့ တရားဝင် တင်သွင်းလိုက်ပြီ ဖြစ်တယ်လို့ ကိုရီးယားဘောလုံးအဖွဲ့ချုပ် (KFA) က ပြောပါတယ်။

ဒီပြိုင်ပွဲရဲ့ အိမ်ရှင်ဖြစ်တဲ့ တရုတ်နိုင်ငံဟာ နိုင်ငံရဲ့ တင်းကျပ်တဲ့ ကိုဗစ်မူဝါဒကြောင့် အိမ်ရှင်အဖြစ်ကနေ နုတ်ထွက်ခဲ့ပါတယ်။

ဒါကြောင့် အာရှဘောလုံးအဖွဲ့ချုပ်က အိမ်ရှင်အဖြစ် လျှောက်ထား တင်သွင်းမှုတွေ ပြုလုပ်ဖို့ ဇူလိုင်လ ၁၅ ရက်အထိရက် ထပ်တိုး ပေးခဲ့တာ ဖြစ်ပါတယ်။

“KFA က ၂၀၂၃ အာရှဖလားပြိုင်ပွဲကို အိမ်ရှင်အဖြစ် ကျင်းပဖို့ ရည်ရွယ်ထားတဲ့ စာကို အာရှဘောလုံးအဖွဲ့ချုပ်ထံ တရားဝင် ပေးပို့ခဲ့တယ်”လို့ အဖွဲ့ချုပ်က ကြာသပတေးနေ့မှာ ပြောခဲ့တာပါ။

တောင်ကိုရီးယားဟာ အာရှဖလားပြိုင်ပွဲမှာ ၁၉၅၆ နဲ့ ၁၉၆၀ ခုနှစ်တွေမှာ ဗိုလ်စွဲခဲ့ပြီး အဲ့ဒီနောက်ပိုင်းမှာ ချန်ပီယံဆုနဲ့ ဝေးကွာ သွားခဲ့တာ ဖြစ်ပါတယ်။

အာရှဖလားပြိုင်ပွဲအဖွဲ့ချုပ် (insideTheGames)

တောင်ကိုရီးယားဟာဆိုရင် ၂၀၀၂ ကမ္ဘာ့ဖလားပြိုင်ပွဲကို ဂျပန်နဲ့ ပူးတွဲ ကျင်းပပြီး နောက်ပိုင်း အဓိကပြိုင်ပွဲတွေကို အိမ်ရှင် အဖြစ် လက်ခံ ကျင်းပနိုင်ခြင်း မရှိသေးပါဘူး။

၂၀၂၃ အာရှဖလားပြိုင်ပွဲကို တောင်ကိုရီးယားအပြင် အင်ဒိုနီးရှား၊ သြစတြေးလျ နဲ့ ဂျပန်တို့ကလည်း အိမ်ရှင်အဖြစ် ကျင်းပဖို့ အပြိုင်ဖြစ်နေကြပါတယ်။

လာမယ့်နှစ် ဇွန်လ ၁၆ ရက်ကနေ ဇူလိုင်လ ၁၆ ရက်အထိ ကျင်းပမယ့် အာရှဖလားပြိုင်ပွဲကို အသင်းပေါင်း ၂၄ သင်းက ဝင်ရောက် ယှဉ်ပြိုင်ကြမှာပါ။

ဒီအသင်းတွေထဲမှာ အာဆီယံဒေသတွင်းက အသင်းတွေဖြစ်တဲ့ ထိုင်း၊ ဗီယက်နမ်၊ မလေးရှားနဲ့ အင်ဒိုနီးရှားအသင်းတို့ ခြေစစ်ပွဲအောင်မြင်ပြီး ဝင်ရောက်ယှဉ်ပြိုင်ကြမှာ ဖြစ်ပါတယ်။

အာရှဖလားပြိုင်ပွဲရဲ့ လက်ရှိ ချန်ပီယံကတော့ ၂၀၂၂ ကမ္ဘာဖလား အိမ်ရှင် ကာတာအသင်းဖြစ်ပြီး ဂျပန်အသင်းကို ၃ ဂိုး- ၁ ဂိုးနဲ့ အနိုင်ရခဲ့ပြီး ဗိုလ်စွဲခဲ့တာပါ။ အာရှဖလားပြိုင်ပွဲရဲ့ အအောင်မြင်ဆုံး အသင်းကတော့ ဂျပန်အသင်းဖြစ်ပြီး ၄ ကြိမ် ဗိုလ်စွဲထားတာ ဖြစ်ပါတယ်။

Source: Reuters

CNI Sport News

၂၀၂၂ ခုနှစ်၊ ဇူလိုင် ၁

မန်ချက်စတာယူနိုက်တက် အသင်းရဲ့ ကြယ်ပွင့် ဘရူနိုဖာနန်ဒတ်စ်က ပြီးခဲ့တဲ့ ရက်သတ္တပတ် အနည်းငယ်ကပဲ ရော်နယ်ဒိုနဲ့ စကားပြောခဲ့ပြီး သူအသင်းမှာ ဆက်ရှိမယ်လို့ အရိပ်အမြွက် ပြောလိုက်ပါတယ်။

ဘရူနိုဖာနန်ဒက်စ်က “လွန်ခဲ့တဲ့ ရက်သတ္တပတ် အနည်းငယ်က ကျနော်တို့ စကားတွေ ပြောခဲ့ကြပါတယ်။ ဇူလိုင်လ ၄ ရက် မန်ချက်စတာယူနိုက်မှာ လေ့ကျင့်ရေး ပြန်ဆင်းတဲ့အချိန် သူနဲ့ တွေ့ရဖို့ မျှော်လင့်ထားပါတယ်။ ဒီထက် ပိုပြီး ဘာမှ မမျှော်လင့် ထားပါဘူး။ လူတိုင်းက သူတို့ရဲ့ အနာဂတ်တွေကို ဂရုစိုက်ကြပါတယ်။ ကလပ်အသင်း အနေနဲ့လည်း ရော်နယ်ဒိုလို တန်ဖိုးရှိ တဲ့ ကစားသမားတစ်ဦးကို ဆုံးရှုံးဖို့ ဆန္ဒရှိတယ်လို့ ကျနော်မထင်ပါဘူး”လို့ ပေါ်တူဂီသတင်းစာ Record ကို ပြောခဲ့ပါတယ်။

ရော်နယ်ဒိုဟာ မန်ချက်စတာယူနိုက်တက်အသင်း ချန်ပီယံလိဂ်ဝင်ခွင့် ဆုံးရှုံးခဲ့တာနဲ့ လူသစ်ဖြည့်တင်းမှု အားနည်းတာတွေ ကြောင့် အပြောင်းအရွှေ့အတွင်းမှာ ချိတ်ဆက်မှုတွေ ရှိနေပါတယ်။

မကြာသေးခင်က ရော်နယ်ဒိုရဲ့ အေးဂျင့်ဖြစ်သူ ဂျော့ချ်မန်ဒတ်စ်ဟာ ကစားသမားရဲ့ အပြောင်းအရွှေ့အတွက် ချယ်လ်ဆီး၊ စပို့တင်းလစ္စဘွန်း အသင်းတွေနဲ့ စကားပြောဆိုမှုတွေ ရှိခဲ့ပါတယ်။ ရော်နယ်ဒိုရဲ့ အသင်းဟောင်း စပို့တင်းလစ္စဘွန်း အသင်း က ရော်နယ်ဒို ပြန်လာနိုင်ချေနဲ့ပတ်သက်ပြီး ငြင်းဆိုခဲ့ခြင်း မရှိတာလည်း တွေ့ရပါတယ်။

 ရော်နယ်ဒိုနဲ့ နည်းပြသစ် အဲရစ်တန်ဟတ် (Manchester Evening News)

ဂျော့ချ်မန်ဒတ်စ်ဟာ ချယ်လ်ဆီး အသင်းပိုင်ရှင်သစ် တော့ဒ်ဘိုလီ ဆွေးနွေးခဲ့ပေမယ့် ချယ်လ်ဆီး အသင်းကတော့ ဒီအပြောင်းအရွှေ့ကို ဆက်လက် လုပ်ဆောင်မလားဆိုတာ ရှင်းရှင်းလင်းလင်း မသိရသေးပါဘူး။

ဘိုင်ယန်မြူးနစ်နဲ့ ရိုးမားအသင်းတို့ကလည်း ရော်နယ်ဒိုနဲ့ မန်ချက်စတာယူနိုက်တက်ရဲ့ အခြေအနေကို စောင့်ကြည့်နေကြပါတယ်။ ဒါပေမယ့် မန်ချက်စတာ ယူနိုက်တက်အသင်းကတော့ ရော်နယ်ဒိုကို ရောင်းချသွားမှာ မဟုတ်ဘူးလို့ ပြတ်ပြတ် သား သား ပြောထားပါတယ်။

နည်းပြသစ် အဲရစ်တန်ဟတ်ကလည်း ရော်နယ်ဒိုကို အသင်းရဲ့ အဓိက ကစားသမားအဖြစ် သတ်မှတ်ကာ အတူတူ လက်တွဲ အလုပ်လုပ် ချင်နေပါတယ်။

ရော်နယ်ဒိုနဲ့ မန်ချက်စတာ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ အခုရာသီ အကုန် မှာ ကုန်ဆုံးမှာဖြစ်ပေမယ့် နောက်ထပ် တစ်ရာသီ ထပ်တိုးဖို့ ရွေးချယ်ခွင့် ရှိနေပါတယ်။

ပြီးခဲ့တဲ့နှစ် နွေရာသီကမှ မန်ချက်စတာ ယူနိုက်တက်အသင်းထံ ပြန်လည် ရောက်ရှိလာခဲ့တဲ့ ရော်နယ်ဒိုဟာ ပြီးခဲ့တဲ့ရာသီက အသင်းအတွက် ၃၈ ပွဲကစားပြီး ၂၄ ဂိုး သွင်းယူနိုင်ခဲ့ပါတယ်။

Source: The Sun

CNI Sport News

၂၀၂၂ ခုနှစ်၊ ဇူလိုင် ၁

မြန်မာပြည်ဖွား MMA တိုက်ခိုက်ရေး ကစားသမား အောင်လအန်ဆန်းက သူ့ရဲ့ ပိုကောင်းတဲ့ ပုံစံအသစ်တွေ မြင်တွေ့ရဖို့ ရှိတယ်လို့ ပြောလိုက်ပါတယ်။

အောင်လအန်ဆန်းက လေ့ကျင့်မှုတွေ ပြုလုပ်နေတဲ့ ဗွီဒီယိုဖိုင်နဲ့အတူ “ခင်ဗျားတို့ကို ကတိပေးပါတယ်။ ကျနော့်ရဲ့ ပိုကောင်း တဲ့ ပုံစံအသစ်တွေကို မြင်တွေ့ရဖို့ ရှိတယ်”လို့ သူ့ရဲ့ လှုမှုကွန်ရက်မှာ ရေးသားခဲ့ပါတယ်။

အောင်လအန်ဆန်းဟာ ပြီးခဲ့တဲ့ ဖေဖော်ဝါရီလက ရုရှားဖိုက်တာ ဘဏ်ဒက်ရှ်နဲ့ နောက်ဆုံးပွဲ ထိုးသတ်ထားခဲ့တာမှာ အရေး နိမ့်ခဲ့လို့ ချန်ပီယံခါးပတ် စိန်ခေါ်ခွင့် ဆုံးရှုံးခဲ့ပါတယ်။

အောင်လအန်ဆန်းဟာ နောက်ဆုံး ထိုးသတ်ထားခဲ့တဲ့ ၄ ပွဲမှာ ၃ ပွဲအထိ ရှုံးနိမ့်ထားတာကြောင့် နိုင်ပွဲပြန်ရနိုင်ဖို့ လေ့ကျင့်မှု တွေ ပြင်းပြင်းထန်ထန် လုပ်နေပါတယ်။

ဒါကြောင့် အောင်လအန်ဆန်းဟာ သူ ကြိုက်နှစ်သက်ခြင်း မရှိတဲ့ နပန်းပညာရပ်ကို မကြာသေးခင်က လေ့ကျင့်သင်ကြားခဲ့ပါသေးတယ်။

 အောင်လအန်ဆန်း ထိုးသတ်နေခြင်း (Aung La Nsang-FB)

မြန်မာပြည်ဖွား တိုက်ခိုက်ရေးသမားဟာ သူလက်လွှတ်ခဲ့ရတဲ့ မစ်ဒယ်ဝိတ် ချန်ပီယံခါးပတ်ကို ရယူနိုင်ဖို့ အာရုံစိုက် ကြိုးစား နေပါတယ်။

အောင်လအန်ဆန်းဟာဆိုရင် မစ်ဒယ်ဝိတ်နဲ့ လိုက်ဟဲဗီးဝိတ် ချန်ပီယံခါးပတ်တွေကို ၂၀၁၇ ကနေ ၂၀၁၉ အထိ ထိန်းထား နိုင်ခဲ့ပေမယ့် ၂၀၂၀ နဲ့ ၂၀၂၁ ပြိုင်ပွဲတွေမှာ အရေုးနိမ့်ပြီး ရိုင်နီယာထံ ချန်ပီယံခါးပတ် နှစ်ခုစလုံး လွှဲပေးခဲ့ရပါတယ်။

ဒီနောက် ရိုင်နီယာကို ပြန်စိန်ခေါ်နိုင်ဖို့ ပြီးခဲ့တဲ့ ဖေဖော်ဝါရီလက ထိုးသတ်ခဲ့တဲ့ပွဲမှာ ဘစ်ဒက်ရှ်ကို အရေးနိမ့်ပြီး မျှော်လင့်ချက် ပျက်ပြယ်ခဲ့ပါတယ်။

ဘစ်ဒက်ရှ်ကတော့ ချန်ပီယံခါးပတ်ကို ပြန်လည်ရယူနိုင်ဖို့ ရိုင်နီယာနဲ့ ထိုးသတ်ရတော့မှာ ဖြစ်ပါတယ်။ အသက် ၃၇ နှစ် အရွယ်ရှိ အောင်လအန်ဆန်းဟာ MMA ပွဲစဉ်ပေါင်း ၄၁ ပွဲအထိ ထိုးသတ်ထားခဲ့တာမှာ ၂၇ ပွဲ အနိုင်ရပြီး ၁၃ ပွဲ အရေး နိမ့် ခဲ့တာပါ။

အောင်လအန်ဆန်းဟာ ဒီအနိုင်ရတဲ့ ၂၇ ပွဲမှာ ၁၃ ပွဲကို အလဲထိုးခဲ့တာ ဖြစ်ပါတယ်။

CNI Sport News

၂၀၂၂ ခုနှစ်၊ ဇွန်လ ၃၀

မြန်မာနေရှင်နယ်လိဂ် ပွဲစဉ် ၁ ရဲ့ နောက်ဆုံးပွဲစဉ်အဖြစ် ဇွန်လ ၃၀ ရက်က ဂျီအက်ဖ်အေနဲ့ ရတနာပုံအသင်းတို့ ကစားခဲ့တာ မှာ ရတနာပုံအသင်းက ဂိုးပြတ် အနိုင်ရသွားခဲ့ပါတယ်။

ဒီပွဲမှာ ရတနာပုံအသင်းဟာ ဂျီအက်ဖ်အေအသင်းကို ၇ ဂိုး- ဂိုး မရှိနဲ့ ဂိုးပြတ် အနိုင်ရရှိခဲ့ပါတယ်။

ရတနာပုံ အသင်းအတွက် ဂိုးတွေကို ရဲရင့်အောင်က ၂ ဂိုး၊ မျိုးကိုထွန်း၊ သက်နိုင်၊ Thyne Phwet Aung ၊ ဘီဘီနဲ့ ဟိန်းနေဆန်း တို့က ၁ ဂိုးစီ သွင်းယူခဲ့တာ ဖြစ်ပါတယ်။ ရတနာပုံအသင်းဟာ ပထမပိုင်းမှာ ၃ ဂိုး ၊ ဒုတိယပိုင်းမှာ ၄ ဂိုး သွင်းယူခဲ့တာကြောင့် အခုလို ဂိုးပြတ် နိုင်ပွဲရရှိခဲ့တာ ဖြစ်ပါတယ်။

ရတနာပုံအသင်းနဲ့ ဂျီအက်ဖ်အေ အသင်းတို့ ယှဉ်ပြိုင်နေကြစဉ် (MNL)

မြန်မာနေရှင်နယ်လိဂ် ပွဲစဉ် ၁ ယှဉ်ပြိုင်အပြီးမှာ ရတနာပုံအသင်း အပါအဝင် ရန်ကုန်ယူနိုက်တက်၊ ဟံသာဝတီယူနိုက်တက်၊ ရှမ်းယူနိုက်တက်၊ ISPE FC တို့ နိုင်ပွဲရယူနိုင်ခဲ့ကြပါတယ်။

ရတနာပုံအသင်း ကတော့ နိုင်ပွဲရ အသင်းတွေနဲ့ ရမှတ်တူ ဂိုးကွာခြားချက်ကြောင့် မြန်မာနေရှင်နယ်လိဂ် အမှတ်ပေးဇယားကို ဦးဆောင်နိုင်ခဲ့ပြီ ဖြစ်ပါတယ်။ ဒုတိယနေရာမှာ ရှမ်းယူနိုက်တက်အသင်းက ရပ်တည်နေပါတယ်။

မြန်မာနေရှင်နယ်လိဂ် ပွဲစဉ် ၂ ရဲ့ ပွဲစဉ်တွေကို ဇူလိုင်လ ၂ ရက်နေ့မှာ ပြန်လည် စတင် ယှဉ်ပြိုင်မှာဖြစ်ပြီး အဖွင့်ပွဲစဉ်အဖြစ် ဟံသာဝတီ ယူနိုက်တက်နဲ့ မဟာယူနိုက်တက်အသင်းတို့ ယှဉ်ပြိုင်ကြမှာ ဖြစ်ပါတယ်။

CNI Sport News

၂၀၂၂ ခုနှစ်၊ ဇွန်လ ၃၀

အီတလီဘောလုံးအဖွဲ့ချုပ်က လာမယ့် ရာသီက စတင်ပြီး အမှတ်ပေးဇယား ထိပ်ဆုံးနေရာမှာ ရပ်တည်နေတဲ့ နှစ်သင်း အမှတ်တူညီနေမယ်ဆိုရင် ပလေးအော့ဖ်ကစားပြီး ချန်ပီယံဆုကို ဆုံးဖြတ်မယ်လို့ အတည်ပြု လိုက်ပါတယ်။

ဒီအကြံအစည်ကို အခုလ အစောပိုင်းက စီးရီးအေကလပ် အသင်းတွေ ဆွေးနွေးခဲ့ကြပြီး အီတလီဘောလုံး အဖွဲ့ချုပ်က သူတို့ ရဲ့ အစည်းအဝေးမှာ အတည်ပြုကာ အင်္ဂါနေ့နှောင်းပိုင်းမှာ ကြေညာချက် ထုတ်ပြန်ခဲ့တာပါ။

ဒီ ပလေးအော့ဖ် ပွဲစဉ်မှာ အချိန်ပိုမရှိဘဲ ပွဲချိန်အတွင်း အနိုင်အရှုံး မပေါ်ရင် ပင်နယ်တီ အဆုံးအဖြတ် ခံယူကြမှာ ဖြစ်ပါတယ်။ ပြီးခဲ့တဲ့ ရာသီက စီးရီးအေ ချန်ပီယံဆုကို နောက်ဆုံးပွဲစဉ်ကြမှသာ အဖြေပေါ်ခဲ့တာပါ။

အေစီမီလန်အသင်းဟာ ဒုတိယနေရာက မြို့ခံပြိုင်ဘက် အင်တာမီလန်အသင်းထက် နှစ်မှတ်အသာနဲ့ နှစ်ပေါင်း ၁၁ နှစ် အကြာမှာ ပထမဆုံး စကူဒတ်တိုဖလားကို ရရှိခဲ့ပါတယ်။

အေစီမီလန်အသင်း စီရီးအေချန်ပီယံဆု ရခဲ့စဉ် (Football Italia)

ဒီနောက်ဆုံး ပွဲစဉ်မှာ ထိပ်ဆုံးနှစ်သင်း အမှတ်တူညီနေခဲ့မယ်ဆိုရင် အေစီမီလန်အသင်းဟာ ထိပ်တိုက်တွေ့ဆုံမှုမှာ အင်တာ မီလန် အသင်းကို အသာရထားတာကြောင့် ချန်ပီယံဆုကို ဆွတ်ခူးနိုင်ဦးမှာပါ။

ဥရောပထိပ်တန်း လိဂ်တွေမှာတော့ ပလေးအော့ဖ် ပုံစံ အသုံးပြုခြင်း မရှိသေးပါဘူး။ သူတို့တွေဟာ ဂိုးကွာခြားချက်ကို အသုံး ပြုပြီး အဆုံးအဖြတ် ခံယူခဲ့ကြတာ ဖြစ်ပါတယ်။

အီတလီဟာ ၂၀၀၅-၀၆ ရာသီ မတိုင်ခင်အထိ ချန်ပီယံဆု၊ တန်းဆင်း တန်းတက်နဲ့ ဥရောပ ဝင်ခွင့်တွေအတွက် ဆုံးဖြတ်ဖို့ အမှတ် တူညီနေရင် ပလေးအော့ဖ်စနစ်ကို အသုံးပြုဖို့ ဆုံးဖြတ်ခဲ့ပါတယ်။ အဲ့ဒီနောက်ပိုင်းမှာ ဒီစနစ် ပျောက်ပျက်သွားခဲ့ပြီး လာမယ့်ရာသီမှ ပြန်လည် အသုံးပြုမှာ ဖြစ်ပါတယ်။

လာမယ့်ရာသီ စီးရီးအေပြိုင်ပွဲကို သြဂုတ်လ ၁၃ ရက်မှာ စတင် ကျင်းပသွားမှာ ဖြစ်ပြီး ၂၀၂၃ ခုနှစ်၊ ဇွန်လ ၄ ရက်မှာ ပြီးဆုံးမှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ ဇွန်လ ၃၀

ဘိုကာဂျူနီယာအသင်း အားပေးတဲ့ ပရိသတ်သုံးဦးဟာ ကိုရင်သီယန်အသင်းနဲ့ ဂိုးမရှိသရေကျခဲ့တဲ့ ကိုပါလီ ဘာတေးဒိုးစ်ပွဲစဉ်မှာ လူမျိုးရေးခွဲခြားမှုတွေပြုလုပ်ခဲ့တဲ့အတွက် ဖမ်းဆီးခံခဲ့ရတယ်လို့ သိရပါတယ်။

၁၆ သင်းအဆင့်ပွဲစဉ်အဖြစ် ကစားခဲ့တဲ့ ဒီပွဲမှာ လာရောက်အားပေးတဲ့ ဘိုကာဂျူနီယာ ပရိသတ်တွေထဲက နှစ်ဦးဟာ ကိုရင်သီယန်အသင်း ပရိသတ်တွေရှေ့မှာ မျောက်တွေလို ပုံစံမျိုးလုပ်ပြီး ရိုက်ကူးခဲ့ကြကာ နောက် တစ်ဦးကတော့ နာဇီပုံစံ အလေးပြုခဲ့တာပါ။အဲဒါကြောင့် အဆိုပါ ပရိသတ်သုံးဦးစလုံးဟာ ဖမ်းဆီးခံခဲ့ရတာ ဖြစ်ပါတယ်။သူတို့သုံးဦးစလုံးကို ထောင်ထဲမှာ ထိန်းသိမ်းထားတယ်လို့ ပြည်သူ့လုံခြုံရေးဌာနရဲ့ ပြောကြားချက်ကို ကိုးကားပြီး ဒေသ သတင်းမီဒီယာတွေက ဖော်ပြခဲ့ကြတာပါ။

“ကိုရင်သီယန်သားတွေဟာ လူမျိုးရေးခွဲခြားတဲ့လုပ်ရပ်တွေကို ပြင်းပြင်းထန်ထန် ရှုတ်ချပြီး ဒီလိုအပြုအမူတွေ အပေါ် သည်းခံနေမှာမဟုတ်ပါဘူး။ဒါနဲ့ပတ်သက်ပြီး တိုင်ကြားမှုတွေ ပြုလုပ်သွားမှာ ဖြစ်တယ်”လို့ ကိုရင်သီယန် အသင်းက သူတို့ရဲ့တွစ်တာမှာ ရေးသားခဲ့ပါတယ်။

မျောက်တွေလိုပြုလုပ်ခဲ့သူနှစ်ဦးအနေနဲ့ ပြစ်မှုထင်ရှားခဲ့မယ်ဆိုရင် ထောင်ဒဏ် တစ်နှစ်ကနေ သုံးနှစ်အထိ ကျခံရမှာဖြစ်ပြီး သူတို့ရဲ့ အာမခံကြေးကို ဒေါ်လာ ၃၈၅၀ သတ်မှတ်ထားတယ်လို့ ဒီအမှုရဲ့ တာဝန်ခံ စစ်ဆေး ရေးမှူးက CNN Brazil ကို ပြောခဲ့တာပါ။နာဇီပုံစံပြုလုပ်ခဲ့တဲ့ ပရိသတ်တစ်ဦးကတော့ အာမခံရမှာမဟုတ်ဘဲ ပြစ်မှုထင်ရှားခဲ့ရင် ထောင်ဒဏ် ၃ လကနေ ၆ လအထိ ကျခံရမယ်လို့ သိရပါတယ်။

ပြီးခဲ့တဲ့နှစ်လက ကိုပါလီဘာတေးဒိုးစ်အုပ်စုအဆင့်ပွဲစဉ်မှာ အဆိုပါ နှစ်သင်းတွေ့ဆုံခဲ့တုန်းက ဘိုကာဂျူနီယာ ပရိသတ်တစ်ဦးဟာ မျောက်လိုအော်ဟစ်ခဲ့တဲ့အတွက် ဖမ်းဆီးခံခဲ့ရသေးတာပါ။တောင်အမေရိကဘောလုံး အဖွဲ့ချုပ်က ဘိုကာဂျူနီယာအသင်းကို ပြီးခဲ့တဲ့လက ဒဏ်ကြေးငွေ ဒေါ်လာ ၁ သိန်း ဒဏ်ရိုက်ခဲ့တာဖြစ်ပါတယ်။

ဘိုကာဂျူနီယာနဲ့ ကိုရင်သီယန်အသင်းတို့ဟာ ဇူလိုင်လ ၅ ရက်မှာ ၁၆ သင်းအဆင့် ဒုတိယအကျော့ပွဲစဉ်အဖြစ် အာဂျင်တီးနားမှာ ယှဉ်ပြိုင်ကြမှာဖြစ်ပါတယ်။

Source:ChannelNewsAsia,Bescoccer

CNI Sport News

၂၀၂၂ ခုနှစ်၊ ဇွန်လ ၃၀

နယ်သာလန်ကွင်းလယ်လူ ဒီဂျောင်က မန်ချက်စတာယူနိုက်တက်နဲ့ ဘာစီလိုနာအသင်းတို့ကို သူ့အနေနဲ့ နူးကမ့်ပ်မှာပဲ ဆက်ပြီးနေချင်ကြောင်း ပြောခဲ့တယ်လို့ စပိန်ကလာတဲ့ သတင်းတွေမှာ ဖော်ပြထားပါတယ်။

မန်ချက်စတာယူနိုက်တက်အသင်းဟာ ဒီဂျောင်အတွက် ဘာစီလိုနာအသင်းနဲ့ ထပ်တိုးပေးချေငွေအပါအဝင် ပြောင်းရွှေ့ကြေး ယူရို ၆၅ သန်း နဲ့ ကနဦးသဘောတူညီမှုရရှိထားတာပါ။

နည်းပြသစ် အဲရစ်တန်ဟတ်ဟာ ဒီဂျောင်ကို အသင်းရဲ့ အရေးပါတဲ့ အစိတ်အပိုင်းအဖြစ် သတ်မှတ်ထားတာကြောင့် မန်ချက်စတာကလပ်ဟာ နယ်သာလန်ကစားသမားကို အရခေါ်ယူနိုင်ဖို့ ကြိုးစားနေတာဖြစ်ပါတယ်။

ဘာစီလိုနာအသင်းဟာ နွေရာသီ အပြောင်းအရွှေ့ ကစားသမားခေါ်ယူမှုတွေပြုလုပ်ဖို့ ငွေကြေးလိုအပ်နေတာကြောင့် ဒီဂျောင်အတွက် ယူရိုသန်း ၁၀၀ နီးပါးလိုချင်နေတာပါ။

ဒီဂျောင်ဟာ ဘာစီလိုနာအသင်းရဲ့ အပြောင်းအရွှေ့ အစီအစဉ်ကို အလွန်စိတ်ပျက်နေပြီး သူဟာ အခုနွေရာသီမှာ ထွက်ခွာဖို့ ရည်ရွယ်ထားခြင်းမရှိကြောင်း အဆိုပါ နှစ်သင်းစလုံးကို ပြောခဲ့တယ်လို့ Sport သတင်းဌာနက ဖော်ပြ ခဲ့တာဖြစ်ပါတယ်။

ဘာစီလိုနာအသင်းက သူ့ကို အတင်းရောင်းချဖို့ လုပ်ဆောင်နေတဲ့အပေါ်မှာလည်း ဒီဂျောင်က မပျော်ရွှင်ဘဲဖြစ်နေကာ နောက်ထပ်တစ်ရာသီ နူးကမ့်ပ်မှာ ဆက်နေဖို့ စိတ်ပိုင်း ဖြတ်ထားတာပါ။

ဒီဂျောင်ဟာ ဘာစီလိုနာအသင်းမှာ ဆက်နေချင်ကြောင်းကို လက်ရွေးစင်အသင်းမှာ ရှိနေချိန် ပြုလုပ်ခဲ့တဲ့ အင်တာဗျူးမှာ ပြောခဲ့ပါတယ်။

ဒီဂျောင်က “ကျနော် ဘာစီလိုနာမှာပဲ ဆက်နေရတာကို သဘောကျပါတယ်။ဘာစီလိုနာက ကျနော့်ရဲ့ အိပ်မက် အသင်းပါ။ဒါဟာ ငယ်ငယ်လေးကတည်းကဖြစ်ပြီး အခုလည်း ဒီလိုပါပဲ။ကျနော့်ရဲ့ ရွေးချယ်မှုအပေါ်မှာ ဘယ်တော့ မှ နောင်တရမှာမဟုတ်ပါဘူး”လို့ ပြောခဲ့ပါတယ်။

မန်ချက်စတာယူနိုက်တက်အသင်းကတော့ အပြောင်းအရွှေ့ဖြစ်ပေါ်ဖို့ တွန်းအားပေးလုပ်ဆောင်နေပြီး နည်းပြ သစ်တန်ဟတ်က ရာသီကြိုခြေစမ်းပွဲမတိုင်ခင် ဒီဂျောင်ကို အရခေါ်စေချင်နေတာဖြစ်ပါတယ်။

ဒီဂျောင်နဲ့ အဲရစ်တန် ဟတ်တို့ဟာ အေဂျတ်စ်မှာ အတူလက်တွဲခဲ့တာကြောင့် နည်းပြဟာ နောက်ထပ်တစ်ကြိမ် ထပ်မံလက်တွဲ အလုပ် လုပ်ချင်နေတာပါ။

မကြာသေးခင်က ဘာစီလိုနာနည်းပြဟောင်း ရော်နယ်လ်ကိုးမန်းက ဒီဂျောင်ဟာ စပိန်ကလပ် မှာပဲ နေချင်ကြောင်း သူ့ကို ပြောခဲ့တယ်လို့ ပြောကြားခဲ့တာဖြစ်ပါတယ်။

ဘာစီလိုနာအသင်းကတော့ ဒီဂျောင်ကို အသင်းမှာဆက်ထားချင်ပေမယ့် သူတို့လိုချင်တဲ့ ပြောင်းရွှေ့ကြေး ရရင် ရောင်းချသွားဖို့ ဆုံးဖြတ်ထားတာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဇွန်လ ၃၀

လူကာကူကတော့ အသင်းဟောင်း အင်တာမီလန်အသင်းနဲ့ အငှားစာချုပ်ချုပ်ပြီးချိန်မှာ သူ့အနေနဲ့ အိမ်ကို ပြန်လာရသလို အလွန်ပျော်ရွှင်မိတယ်လို့ အသင်းဝက်ဘ်ဆိုဒ်မှာ တရားဝင်ရေးသား ပြောဆိုလိုက်ပါတယ်။

လူကာကူက “အိမ်ကိုပြန်ရောက်တာနဲ့တူပါတယ်။ကျနော့်မိသားစုနဲ့ ကျနော်ဟာ ပရိသတ်တွေနဲ့ အသင်းဖော် တွေကြောင့် မီလန်မှာ အလွန်ကောင်းမွန်တဲ့ အချိန်တွေရရှိခဲ့ပါတယ်။ဒီကိုရောက်လာတဲ့ ပထမဆုံးနေ့ကစပြီး အားလုံးက ကျနော့်ကို အများကြီးအကူအညီပေးကြတယ်။ကျနော် အလွန်ပျော်ရွှင်ပါတယ်။အင်္ဂလန်ကိုသွားတဲ့ အချိန်မှာ ဒီကအိမ်ကို ဒီအတိုင်းထားခဲ့တာပါ။ဒီကိုပြန်လာရတာ ဘယ်လောက်ပျော်နေလဲဆိုတာကို ပြသနေတာ ပါပဲ။အခုကွင်းထဲမှာ ကောင်လေးတွေနဲ့ ပြန်ပြီးတွေ့ချင်ပါတယ်”လို့ ပြောခဲ့ပါတယ်။

ပြီးခဲ့တဲ့နှစ်နွေရာသီက ပေါင် ၉၇.၅ သန်းနဲ့ ချယ်လ်ဆီးကို ပြောင်းရွှေ့ခဲ့တဲ့ လူကာကူဟာ တစ်ရာသီအကြာမှာပဲ အသင်းဟောင်း အင်တာမီလန်အသင်းထံ တစ်ရာသီအငှားစာချုပ်နဲ့ ပြန်လည်ပြောင်းရွှေ့လာခဲ့ပြီဖြစ်ပါတယ်။

လူကာကူဟာ ချယ်လ်ဆီးအသင်းမှာ အဆင်မပြေမှုတွေကြုံတွေ့ခဲ့ရပြီး အင်တာမီလန်အသင်းထံ ပြန်လာချင်တဲ့ သူ့ရဲ့ဆန္ဒကို လျှို့ဝှက်ထားခြင်းမရှိခဲ့ပါဘူး။ဗုဒ္ဓဟူးနေ့မှာ အပြောင်းအရွှေ့ကို အတည်ပြုခဲ့ပြီးနောက် လူကာကူဟာ ချယ်လ်ဆီးအသင်းကို ရောက်သွားကတည်းက အင်တာမီလန်နည်းပြ အင်ဇာဂီနဲ့ အဆက်အသွယ်အမြဲ ရှိနေ ကြောင်း ပြောခဲ့ပါတယ်။

လူကာကူက “ ပြီးခဲ့တဲ့ရာသီက သူနဲ့ ကျနော် အဆက်အသွယ်မပြတ်ခဲ့ပါဘူး။နည်းပြက အသင်းမှာ အလွန် ကောင်းမွန်စွာ အလုပ်လုပ်နေတယ်လို့ ထင်ပါတယ်။အင်တာမီလန်အတွက် ပိုမိုကောင်းမွန်အောင် လုပ်ပေးချင် ပါတယ်”လို့ ပြောခဲ့တာပါ။

လူကာကူဟာ အင်တာမီလန်အသင်းမှာ ကစားခဲ့တဲ့ နှစ်ရာသီအတွင်း ပွဲပေါင်း ၉၅ ပွဲမှာ ၆၄ ဂိုးသွင်းယူနိုင်ခဲ့ပြီး အသင်းကို ၂၀၂၀-၂၁ ရာသီ စီးရီးအေဖလား ရရှိအောင် စွမ်းဆောင်ပေးနိုင်ခဲ့တာဖြစ်ပါတယ်။

လူကာကူဟာ အဆိုပါ ရာသီမှာ စီးရီးအေရဲ့ အကောင်းဆုံးကစားသမားဆုကို ရရှိခဲ့တာပါ။အင်တာမီလန်အသင်းထံ တစ်ကျော့ပြန် ရောက်ရှိလာတဲ့ လူကာကူဟာ ကျောနံပတ် ၉၀ ဂျာစီဝတ်ဆင်သွားမှာလည်းဖြစ်ပါတယ်။

အင်တာမီလန်အသင်းဟာ လူကာကူအတွက် လစာအပြည့်အဝပေးချေရမှာဖြစ်သလို ချယ်လ်ဆီးအသင်းကို အငှားကြေး ယူရို ၈ သန်းပေးချေရမှာပါ။လူကာကူဟာ အငှားစာချုပ်ကုန်ဆုံးချိန်မှာ ချယ်လ်ဆီးအသင်းထံ ပြန်သွားရမှာလည်း ဖြစ်ပါတယ်။

Source:DailyMail

CNI Sport News

၂၀၂၂ ခုနှစ်၊ ဇွန်လ ၂၉

လူကာကူဟာ အင်တာမီလန်ကို ပြောင်းဖို့အတွက် မီလန်မြို့ကိုအရောက်မှာပဲ အသင်းဟောင်းထံ ပြန်လာရတာ အလွန်ပျော်ရွှင်တယ်လို့ သတင်းထောက်တွေနဲ့တွေ့ဆုံစဉ် ပြောလိုက်ပါတယ်။

လူကာကူဟာ အသင်းဟောင်း အင်တာမီလန်အသင်းထံ တစ်ရာသီအငှားစာချုပ်နဲ့ ပြန်လည်ပြောင်းရွှေ့လာခဲ့ တာပါ။ဘယ်လ်ဂျီယံတိုက်စစ်မှူးဟာ မီလန်မြို့ကိုရောက်ရှိလာပြီး သူ့ရဲ့ကားရှိရာနေရာဆီ လမ်းလျှောက်လာ ရင်းနဲ့ သတင်းထောက်တွေရဲ့မေးခွန်းကို အတိုချုံးဖြေသွားခဲ့တာဖြစ်ပါတယ်။လူကာကူဟာ အပြာရောင်နဲ့ အနက်ရောင် အင်တာမီလန်ပဝါကို ကိုင်ဆောင်ပြီး ဓါတ်ပုံအရိုက်ခံခဲ့တာပါ။ပြီးခဲ့တဲ့ တစ်ရာသီလုံး ချယ်လ်ဆီး အသင်းမှာ ရုန်းကန်ခဲ့ရတဲ့ လူကာကူဟာ အင်တာမီလန်အသင်းထံ ပြန်လာခဲ့ရာမှာ ပြုံးရွှင်နေခဲ့တာဖြစ်ပါတယ်။

အင်တာမီလန်အသင်းဟာ လူကာကူရဲ့လစာကို အပြည့်အဝပေးချေဖို့နဲ့ အငှားကြေး ယူရို ၈ သန်း ချယ်လ်ဆီး အသင်းကို ပေးချေဖို့ သဘောတူညီထားတာပါ။လူကာကူဟာ ချယ်လ်ဆီးအသင်းနည်းပြ တူချယ်လ်ရဲ့ အစီအစဉ် မှာ မပါဝင်တော့တာကြောင့် ကစားသမားနဲ့ သူ့ရဲ့ မန်နေဂျာတို့ဟာ လန်ဒန်ကလပ်ကနေ အငှားနဲ့ ထွက်ခွာဖို့ ကြိုးစားခဲ့ကြတာဖြစ်ပါတယ်။ချယ်လ်ဆီးပိုင်ရှင်သစ် တောဒ့်ဘိုလီက လူကာကူကို အပြီးသတ် ရောင်းချဖို့ထက် အငှားချဖို့ ခွင့်ပြုခဲ့တာပါ။

အဲဒါကြောင့် ပြီးခဲ့တဲ့ရာသီက အင်တာမီလန်အသင်းကနေ ကလပ်စံချိန်တင်ပြောင်းရွှေ့ကြေးနဲ့ ခေါ်ယူခဲ့တဲ့ လူကာကူကို ချယ်လ်ဆီးအသင်းဟာ တစ်ရာသီအကြာမှာပဲ ထွက်ခွာခွင့်ပြုခဲ့ရတာဖြစ်ပါတယ်။လူကာကူဟာ ချယ်လ်ဆီးအသင်းကို ရောက်လာကတည်းက နည်းပြတူချယ်လ်ရဲ့နည်းစနစ်နဲ့ အံ့မဝင်တာကြောင့် လန်ဒန် ကလပ်မှာ မပျော်ရွှင်ဘဲ အင်တာမီလန်အသင်းထံ ပြန်လာချင်တဲ့ဆန္ဒကို အင်တာဗျူးမှာ ထုတ်ပြောခဲ့တာပါ။

အခုအချိန်မှာတော့ လူကာကူရဲ့ ဆန္ဒပြည့်ဝသွားခဲ့တာဖြစ်ပေမယ့် အပြီးသတ်ဝယ်ယူခွင့်မပါတာကြောင့် ကစားသမားဟာ ရာသီအကုန်မှာ ချယ်လ်ဆီးအသင်းထံ ပြန်လာရမှာဖြစ်ပါတယ်။လူကာကူဟာ အင်တာမီလန် အသင်းမှာ ကစားခဲ့တဲ့ နှစ်ရာသီအတွင်း ပြိုင်ပွဲစုံ ၉၆ ပွဲမှာ ၆၄ ဂိုးသွင်းယူနိုင်ခဲ့ပြီး အသင်းရဲ့ ဂိုးသွင်းအများဆုံး ကစားသမားအဖြစ် ရပ်တည်ခဲ့တာပါ။တိုက်စစ်မှူးဟောင်းဟာ အင်တာမီလန်အသင်းကို နှစ်ပေါင်း ၁၁ နှစ်အတွင်း ပထမဆုံးအကြိမ် စီးရီးအေဖလား ရရှိအောင် ကူညီပေးနိုင်ခဲ့တာဖြစ်ပါတယ်။

လူကာကူဟာ ပြီးခဲ့တဲ့ရာသီက ချယ်လ်ဆီးအသင်းအတွက် ၄၄ ပွဲပါဝင်ကစားခဲ့ပြီး ၁၅ ဂိုးသွင်းယူနိုင်ခဲ့ကာ ဖီဖာကလပ်ကမ္ဘာ့ဖလား ချန်ပီယံဆုကို ရယူနိုင်ခဲ့တာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဇွန်လ ၂၉

အခု နွေရာသီ အပြောင်းအရွှေ့မှာ ပီအက်စ်ဂျီကနေ ထွက်ခွာဖို့ ရှိတယ်လို့ သတင်းတွေ ကျယ်ကျယ်ပြန့်ပြန့် ထွက်ပေါ်နေတဲ့ နေမာကို ချယ်လ်ဆီးအသင်းထံ ပြောင်းလာဖို့ ဘရာဇီးလ် လက်ရွေးစင် အသင်းဖော် သီယာဂိုဆေးလ်ဗားက ပြောလိုက်ပါတယ်။

သီယာဂိုဆေးလ်ဗားက “နေမာ ချယ်လ်ဆီးကို လာရမှာပါ။ တကယ်လို့ သူ ပီအက်စ်ဂျီက ထွက်ခွာခဲ့မယ်ဆိုရင် အဲ့ဒီကို လာရမှာပါ။ ဖြစ်လာခဲ့ရင်တော့ ဒါဟာ အကောင်းဆုံး မျှော်လင့်ချက် ဖြစ်လာနိုင်ပါတယ်။ နေမာရဲ့ စွမ်းဆောင်ရည်ကို ပြောဖို့တောင် မလိုပါဘူး။ သတင်းချည်းပဲ ဖြစ်မယ့်အစား တကယ်ဖြစ်လာနိုင်ဖို့ မျှော်လင့်ပါတယ်။ ဒါနဲ့ပတ်သက်ပြီးတော့ ကျနော်ဘာမှ မသိပါဘူး” လို့ Globo နဲ့ အင်တာဗျူးမှာ ပြောသွားပါတယ်။

ပီအက်စ်ဂျီ အသင်းဟာ အခုနွေရာသီ အပြောင်းအရွှေ့မှာ နေမာအတွက် ထိုက်တန်တဲ့ ပြောင်းရွှေ့ကြေးနဲ့ ကမ်းလှမ်းမှုရရင် ရောင်းချသွားဖို့ စဉ်းစားနေပေမယ် နေမာကတော့ ပီအက်စ်ဂျီအသင်းမှာ သူ့ရဲ့ လုပ်ငန်းစဉ်တွေ မပြီးပြတ် သေးတာကြောင့် ထွက်ခွာဖို့ မစဉ်းစားထား သေးဘူးလို့ သိရပါတယ်။

လက်ရှိ အပြောင်းအရွှေ့ ဈေးကွက်မှာ နေမာကို ခေါ်ယူဖို့ တက်နိုင်တဲ့အသင်း အနည်းငယ်ထဲမှာ ချယ်လ်ဆီး အသင်းလည်း တစ်သင်းအနေနဲ့ ပါဝင်နေတဲ့အတွက်ကြောင့် သီယာဂိုဆေးလ်ဗားက နေမာကို ချယ်လ်ဆီးအသင်းထံ လာဖို့ ပြောခဲ့တာပဲ ဖြစ်ပါတယ်။

နေမာနဲ့ သီယာဂိုဆေးလ်ဗား တို့ကို တွေ့ရစဉ် (Sports)

နေမာနဲ့ သီယာဂိုဆေးလ်ဗားတို့ဟာ ပီအက်စ်ဂျီအသင်းမှာလည်း အတူတွဲကစားခဲ့ပြီး ဘရာဇီးလ် လက်ရွေးစင် အသင်းမှာ လည်း အသင်းဖော်တွေအဖြစ် အခုအချိန်ထိ ရှိနေကြတာပါ။

ပီအက်စ်ဂျီအသင်းဟာ ပြီးခဲ့တဲ့ရာသီက ချန်ပီယံလိဂ်ပြိုင်ပွဲမှာ အောင်မြင်မှု မရခဲ့တဲ့အတွက် နေမာဟာ အသင်းအားပေးသူ ပရိသတ်တွေရဲ့ အပြင်းအထန် ဝေဖန်ခြင်းကို ခံခဲ့ရတာ ဖြစ်ပါတယ်။ နေမာဟာ ပီအက်စ်ဂျီအသင်း ချန်ပီယံလိဂ်က ထွက်ခဲ့ ရပြီးနောက် မကြာခဏ ဆိုသလို ပရိသတ်တွေရဲ့ လှောင်ပြောင်ခြင်းကို ခံခဲ့ရပါတယ်။

နေမာဟာ ၂၀၁၇ ခုနှစ်က ပီအက်စ်ဂျီအသင်းကို ဘာစီလိုနာ အသင်းကနေ ကမ္ဘာ့စံချိန်တင် ပြောင်းရွှေ့ကြေးနဲ့ ရောက်ရှိ လာခဲ့သူဖြစ်ပြီး အသင်းအတွက် ပြိုင်ပွဲစုံ ၁၄၄ ပွဲ ပါဝင်ကစားထားကာ ဂိုး ၁၀၀ သွင်းယူထားပါတယ်။

ဒီနောက်မှာတော့ နေမာဟာ ပီအက်စ်ဂျီ အသင်းနဲ့အတူ လီဂူးဝမ်းဖလား ၄ ကြိမ် အပါအဝင် ဆုဖလားပေါင်း ၁၀ ခု ရယူထား ပါတယ်။

Source: Goal

CNI Sport News

၂၀၂၂ ခုနှစ်၊ ဇွန်လ ၂၉

နာမည်ကြီး အမေရိကန် တင်းနစ်မယ် ဆရီနာဝီလျံဟာ ဝင်ဘယ်လ်ဒန် အိုးပန်းပြိုင်ပွဲ ပထမအဆင့်အဖြစ် ပြင်သစ်တင်းနစ် မယ် ဟာမိုနီတန်ကို အရေးနိမ့်ပြီး ပြိုင်ပွဲကနေ ထွက်ခွာခဲ့ရပါတယ်။

ဆရီနာဝီလျံဟာ ပြီးခဲ့တဲ့နှစ်က ဒဏ်ရာရရှိခဲ့တဲ့ ဝင်ဘယ်လ်ဒန် အိုးပန်းပြိုင်ပွဲကို ပြန်လည်ယှဉ်ပြိုင်ခဲ့ပြီး စိတ်အားထက်သန်မှု အပြည့်နဲ့ ကစားခဲ့ပေမယ့် ၅-၇၊ ၆-၁၊ ၆-၇ နဲ့ အရေးနိမ့်ခဲ့တာပါ။

ပွဲချိန် ၃ နာရီကျော် ကစားခဲ့ရတဲ့ ဒီပွဲမှာ အသက် ၄၀ အရွယ်ရှိ ဆရီနာဝီလျံဟာ အကောင်းဆုံးပုံစံနဲ့ ယှဉ်ပြိုင်နိုင်ခဲ့တာဖြစ်ပါ တယ်။ ဟာမိုနီတန်ကို အရေးနိမ့်တဲ့ ပွဲအပြီးမှာ ဒီပွဲဟာ သူမရဲ့ နောက်ဆုံး ဝင်ဘယ်လ်ဒန်ပွဲစဉ်လားလို့ မေးခြင်းခံခဲ့ရပါတယ်။

ဆရီနာဝီလျံက “ဒါက ကျမ မဖြေနိုင်တဲ့ မေးခွန်းပါ။ ကျမ ဒါကို မသိပါဘူး။ ဘယ်သူသိနိုင်မှာလဲ၊ ကျမ ဘယ်အချိန် ပြန်လာနိုင် လဲဆိုတာ ဘယ်သူသိလဲ” လို့ သတင်းစာ ရှင်းလင်းပွဲမှာ ပြောသွားခဲ့ပါတယ်။

ဆရီနာဝီလျံဟာ ပြီးခဲ့တဲ့နှစ်က ဝင်ဘယ်လ်ဒန် အိုးပန်းပြိုင်ပွဲမှာလည်း ပထမအဆင့်မှာပဲ ဒဏ်ရာကြောင့် အရေးနိမ့် သွားခဲ့ ပါတယ်။ အမေရိကန် တင်းနစ်မယ်ဟာ ဒီပြိုင်ပွဲမတိုင်ခင် ကျင်းပခဲ့တဲ့ Eastbourne international နှစ်ယောက်တွဲ ပြိုင်ပွဲမှာ ဝင်ရောက် ယှဉ်ပြိုင်ခဲ့ပါသေးတယ်။

ဟာမိုနီတန်ကို ရှုံးနိမ့်သွားတဲ့ အမေရိကန် တင်းနစ်မယ် ဆရီနာဝီလျံ (RTHK)

အဲ့ဒီနောက်မှာ ဝင်ဘယ်လ်ဒန် အိုးပန်းပြိုင်ပွဲရဲ့ အမျိုးသမီး တစ်ဦးချင်း ပြိုင်ပွဲကို ဝင်ရောက် ယှဉ်ပြိုင်ခဲ့တာပါ။

ကမ္ဘာ့အဆင့် ၁၁၅ မှာ ရပ်တည်နေတဲ့ ပြင်သစ်တင်းနစ်မယ် ဟာမိုနီတန် ကတော့ သူ့ရဲ့ ပထမဆုံး ဝင်ဘယ်လ်ဒန် ပြိုင်ပွဲမှာ ဆရီနာဝီလျံကို အနိုင်ရခဲ့လို့ ပျော်ရွှင်ကြောင်း ပြောခဲ့ပါတယ်။

ဟာမိုနီတန် က “ကျမရဲ့ ပထမဆုံး ဝင်ဘယ်လ်ဒန်က အံသြဖို့ ကောင်းပါတယ်။ ကျမ ငယ်ငယ်လေးတုန်းက ဆရီနာကို တီဗီ မှာပဲ မြင်ဖူးတာပါ။ အဲ့ဒါကြောင့် ဒါဟာ အိမ်မက်ဆိုတာ ရှင်တို့သိပါတယ်။ သူမဟာ ဂန္တဝင် ကစားသမားပါ။ သူမနဲ့ ယှဉ်ပြိုင် ရတာကို ကြောက်မိပေမယ့် အနိုင်ရခဲ့လို့ အလွန်ပျော်ရွှင်ပါတယ်”လို့ ပြောပါတယ်။

ဆရီနာဝီလျံကို အနိုင်ရခဲ့တဲ့ ဟာမိုနီတန်ဟာ ဒုတိယအဆင့် ပွဲစဉ်အဖြစ် စပိန်တင်းနစ်မယ် တိုမိုနဲ့ ယှဉ်ပြိုင်ရမှာ ဖြစ်ပါတယ်။

ဆရီနာဝီလျံဟာ ဝင်ဘယ်လ်ဒန် အိုးပန်းပြိုင်ပွဲမှာ ၇ ကြိမ် ဗိုလ်စွဲခဲ့တာဖြစ်ပြီး ဂရမ်းဆလမ်း ချန်ပီယံဆုကို ၂၃ ကြိမ် ရယူထား သူ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ ဇွန်လ ၂၉

၂၀၂၃ အာရှဖလားပြိုင်ပွဲကို အိမ်ရှင်အဖြစ်ပြုလုပ်မယ့် အင်ဒိုနီရှားဘောလုံးအဖွဲ့ချုပ်ရဲ့အဆိုပြုချက်ကို အစိုးရက ထောက်ခံခဲ့တယ်လို့ သိရပါတယ်။

ဒီပြိုင်ပွဲကို အိမ်ရှင်အဖြစ်ကျင်းပဖို့ သတ်မှတ်ခြင်းခံထားရတဲ့ တရုတ်နိုင်ငံဟာ ကိုဗစ်ပျံ့နှံ့မှုတွေကြောင့် အိမ်ရှင် အဖြစ်ကနေ နှုတ်ထွက်သွားခဲ့တာပါ။ “အစိုးရက အင်ဒိုနီးရှားဘောလုံးအဖွဲ့ချုပ်ကို အာရှဘောလုံးအဖွဲ့ချုပ်ထံ အဆိုပြုချက်တင်သွင်းဖို့ ခွင့်ပြုခဲ့တယ်” လို့ လူငယ်နဲ့အားကစားဝန်ကြီး ဇိုင်နူဒင်အမာလီက အင်္ဂါနေ့မှာ ပြုလုပ် ခဲ့တဲ့ သတင်းစာရှင်းလင်းပွဲမှာ ပြောခဲ့တာဖြစ်ပါတယ်။ အင်ဒိုနီးရှားဘောလုံးအဖွဲ့ချုပ်ကို ကိုယ်စားပြုပြီး ဒုတိယ ဥက္ကဋ္ဌနဲ့ အထွေထွေအတွင်းရေးမှူးတို့ဟာ အာရှဘောလုံးအဖွဲ့ချုပ် တာဝန်ရှိသူတွေနဲ့ တွေ့ဆုံမှာဖြစ်တယ်လို့ လူငယ်နဲ့ အားကစားဝန်ကြီးက ပြောခဲ့တာပါ။

အင်ဒိုနီးရှားနိုင်ငံဟာ ၂၀၂၃ ယူ-၂၀ ကမ္ဘာ့ဖလားပြိုင်ပွဲကို အိမ်ရှင်အဖြစ် လက်ခံကျင်းပခွင့် ရထားတာဖြစ်ကာ ဒီ ပြိုင်ပွဲအပြီး ကျင်းပမယ့် အာရှဖလားပြိုင်ပွဲကိုပါ အိမ်ရှင်အဖြစ်ပြုလုပ်ချင်နေတာဖြစ်ပါတယ်။၂၀၂၃ ယူ-၂၀ ကမ္ဘာ့ ဖလားပြိုင်ပွဲကို မေလကနေ ဇွန်လအထိ ကျင်းပသွားမှာဖြစ်ပြီး အာရှဖလားပြိုင်ပွဲကတော့ ဇွန်လကနေ ဇူလိုင်လ အထိ ကျင်းပဖို့ သတ်မှတ်ထားတာပါ။

လူငယ်နဲ့ အားကစားဝန်ကြီးက “ ယူ-၂၀ ကမ္ဘာ့ဖလားပြိုင်ပွဲအပြီး အာရှဖလားကို ဆက်လက်ကျင်းပဖို့ ကျနော်တို့ရဲ့ အခြေခံအဆောက်အဦတွေဟာ အဆင်သင့်ဖြစ်နေဆဲဖြစ်ပြီး လူသားအရင်းအမြစ်တွေကိုလည်း ဆက်လက်အသုံး ချနိုင်ဖို့ အဆင်သင့်ဖြစ်နေပါတယ်။အဲဒါကြောင့် ၂၀၂၃ အာရှဖလားကို အိမ်ရှင်အဖြစ် အကောင်အထည်ဖော်ဖို့ ကျနော်တို့အတွက် ခက်ခဲမှာမဟုတ်ဘူး”လို့ ရှင်းပြခဲ့ပါတယ်။

အင်ဒိုနီးရှားဟာ ယူ-၂၀ ကမ္ဘာ့ဖလားပြိုင်ပွဲအတွက် ကွင်း ၆ ကွင်းကို အဓိကထားပြင်ဆင်ထားတာပါ။ဒါပေမယ့် လိုအပ်ချက်တွေရှိမယ်ဆိုရင် အစိုးရအနေနဲ့ နောက်ထပ်နေရာတွေ ပံ့ပိုးဖို့အသင့်ရှိနေတယ်လို့ ဝန်ကြီးက ပြောခဲ့ ပါတယ်။၂၀၂၃ အာရှဖလားပြိုင်ပွဲကို အိမ်ရှင်အဖြစ် ကျင်းပဖို့ အတွက် အင်ဒိုနီးရှားအပြင် တောင်ကိုရီးယား၊ ဂျပန်၊ သြစတြေးလျနဲ့ကာတာတို့ကလည်း ကြိုးစားနေကြတာပါ။အင်ဒိုနီးရှားဟာ ဒီပြိုင်ပွဲကို အိမ်ရှင်အဖြစ် ပြုလုပ်ဖို့ တရားဝင်အဆိုပြုထားတယ်လို့ အချက်အလက်အရ သိရပါတယ်။

အာရှဘောလုံးအဖွဲ့ချုပ်က ဒီပြိုင်ပွဲကို အိမ်ရှင်အဖြစ်ပြုလုပ်မယ့် နိုင်ငံတွေအနေနဲ့ ဇူလိုင်လ ၁၅ ရက် နောက်ဆုံး ထားပြီး လျှောက်ထားဖို့ ရက်သတ်မှတ်ကြောင်း ကြေညာချက်ထုတ်ခဲ့ပါတယ်။

Source:En.antaranews.com