- By CNI
- Category: အားကစား
- Hits: 2234
CNI Sport News
၂၀၂၂ ခုနှစ်၊ ဇူလိုင် ၂၁
Thai Figt မှာ နာမည်ကြီးနေတဲ့ ဘရော်နီကာကို ONE Championship က စာချုပ်ချုပ်ဆိုဖို့ တိုက်ဂါးမွေထိုင်း ကနေ တစ်ဆင့်ကမ်းလှမ်းမှုပြုလုပ်ခဲ့တယ်လို့ ဘရော်နီကာက သူ့ရဲ့ ဖေ့စ်ဘုတ်စာမျက်နှာကတဆင့် ရေးသား ပြောဆိုခဲ့ပါတယ်။
“ဒီမနက် တိုက်ဂါးသူဋ္ဌေးက ခေါ်တွေ့ပြီး ONE Championship က ဘရော်နဲ့ စာချုပ်ချုပ်ချင်တဲ့အကြောင်းကို ပြောပြခဲ့ပါတယ်။ဒါပေမယ့် သူကလက်ခံလို့ မရသေးဘူး။ဘာဖြစ်လို့လဲဆိုတော့ ထိုင်းဖိုက်နဲ့ စာချုပ်ရှိနေသေးတဲ့ အတွက်ကြောင့်လို့ ပြောခဲ့တယ်။အဲဒီတစ်ခုပေါ့နော်။ပြီးတော့လည်း သူတို့က ပြောတယ် ဘယ်အချိန်မဆို လာလို့ရတယ်ပေါ့နော်။သူတို့အမြဲတမ်းကြိုဆိုနေမယ်။သူတို့က ဘရော်ကိုကြိုက်တဲ့ အကြောင်းတွေ၊ သဘောကျ တဲ့ အကြောင်းတွေပြောသွားခဲ့တယ်တဲ့။အဲဒါကြောင့် နင်ကြိုးစားဖို့လိုတယ်လို့ သူဌေးက ပြောခဲ့တယ်”လို့ ရေးသားထားတာပါ။
ဘရော်နီကာဟာ Thai Fight မှာ နိုင်ပွဲဆက်နေပြီး အကောင်းဆုံးပုံစံတစ်ခုကို ထိန်းသိမ်းထားနိုင်ခဲ့ကာ ကမ္ဘာ့ မွေထိုင်းအဖွဲ့အစည်းရဲ့ bantamweight အဆင့်သတ်မှတ်ချက် နံပတ် ၁ နေရာကို နိုင်ပွဲတွေနဲ့အတူ ဆက်လက် ရယူထားသူလည်းဖြစ်ပါတယ်။ဘရော်နီကာဟာ အောင်မြင်မှုအများကြီးမရသေးပေမယ့် ONE Championship ရဲ့ အခုလိုကမ်းလှမ်းမှုအပေါ်မှာ အလွန်ဝမ်းသာတယ်လို့လည်း ပြောခဲ့ပါတယ်။
“အရမ်းအောင်မြင်နေတာမျိုးလည်း မဟုတ်ပေမယ့် သူတို့က ကိုယ့်ကိုဒီလိုမျိုးလာကမ်းလှမ်းတာတွေ ကြားရတော့ တကယ်ဝမ်းသာတယ်ပေါ့နော်။ပြီးတော့ အားလည်းပိုရှိတယ်။ဒီထက်ကြိုးစားရမယ်ဆိုတဲ့ စိတ်က ကိုယ့်မှာ တာဝန် ပိုရှိသွားတာပေါ့နော်။အားလုံးလည်း ဘရော်အတွက်ဆုတောင်းပေးပါ။ဘရော်လည်း အကောင်းဆုံးကြိုးစား သွားမယ်။ချန်ပီယံကြီးဖြစ်အောင်လုပ်မယ်”လို့ ဘရော်နီကာက ပြောခဲ့ပါတယ်။
ဘရော်နီကာဟာ ပြီးခဲ့တဲ့လက နောက်ဆုံးထိုးသတ်ထားတဲ့ Thai Fight မှာလည်း အနိုင်ရခဲ့ပြီး ၅ ပွဲဆက်တိုက် နိုင်ပွဲရရှိခဲ့တာပါ။ဘရော်နီကာဟာ အခုထက်ပိုမိုကောင်းမွန်လာဖို့အတွက် လေ့ကျင့်ပြင်ဆင်မှုတွေ ပြုလုပ်နေတာ လည်း ဖြစ်ပါတယ်။
- By CNI
- Category: အားကစား
- Hits: 1979
CNI Sport News
၂၀၂၂ ခုနှစ်၊ ဇူလိုင် ၂၁
အာဖရိကဘောလုံးအဖွဲ့ချုပ်က တစ်နှစ်တာအကောင်းဆုံးတွေအတွက် ဆန်ကာတင် ၃ ဦးစာရင်း ထုတ်ပြန် လိုက်ပြီး အမျိုးသားဆုအတွက် မာနေး၊ မန်ဒီနဲ့ ဆာလတ်တို့ ၃ ဦးယှဉ်ပြိုင်ရမှာ ဖြစ်ပါတယ်။
သူတို့ ၃ ဦးဟာ ပြီးခဲ့တဲ့ အာဖရိကဖလားပြိုင်ပွဲနဲ့ ကမ္ဘာ့ဖလားခြေစစ်ပွဲတွေမှာ အကောင်းဆုံး ခြေစွမ်း၊ ပြသနိုင်ခဲ့သ လို ပရီးမီးယားလိဂ်ပြိုင်ပွဲမှာလည်း အကောင်းဆုံးစွမ်းဆောင်နိုင်ခဲ့ကြတာပါ။မာနေး၊ မန်ဒီတို့ဟာ ဆီနီဂေါလက်ရွေး စင်အသင်းနဲ့ အာဖရိကဖလားချန်ပီယံဆုကို ရယူနိုင်ခဲ့ပြီး ၂၀၂၂ ကမ္ဘာ့ဖလားခြေစစ်ပွဲလည်း အောင်မြင်ခဲ့တာ ဖြစ်ပါတယ်။ဆာလတ်ကတော့ အီဂျစ်နဲ့အတူ အာဖရိကဖလား ဗိုလ်လုပွဲတက်နိုင်ခဲ့တာကြောင့် နောက်ဆုံး ၃ ဦး စာရင်းမှာ သူတို့ ပါဝင်ခဲ့တာပါ။
၂၀၁၉ က နောက်ဆုံးအကြိမ်ပေးခဲ့တဲ့ အာဖရိကတစ်နှစ်တာအကောင်းဆုံး အမျိုးသားဆုကို မာနေးက ရယူ နိုင်ခဲ့တာဖြစ်ပြီး အခုနှစ်မှာလည်း ဒီဆုကို ထပ်မံရယူနိုင်ဖို့ ရေပန်းစားနေခဲ့တာဖြစ်ပါတယ်။ အမျိုးသမီးဆုအတွက် ဆန်ကာတင် ၃ ဦးစာရင်းမှာတော့ နိုင်ဂျီးရီးယားလက်ရွေးစင် အိုရှိုအာလာ၊ ကင်မရွန်းလက်ရွေးစင် အန်ဂျိုယာနဲ့ ဇမ်ဘီယာလက်ရွေးစင် ချန်ဒါတို့ ရွေးချယ်ခံရတာပါ။၂၀၁၉ က အမျိုးသမီးအကောင်းဆုံးဆုကို အိုရှိုအာလာက ရရှိခဲ့တာ ဖြစ်ပါတယ်။
အာဖရိကဘောလုံးအဖွဲ့ချုပ်ဟာ နည်းပြဆု၊ လူငယ်ကစားသမားဆု၊ အကောင်းဆုံးသွင်းဂိုးဆုတွေ အပါအဝင် အခြားသောဆုတွေအတွက်လည်း ဆန်ကာတင် ၃ ဦးစာရင်းကို ထုတ်ပြန်ခဲ့တာပါ။ပြီးခဲ့တဲ့နှစ်တွေအတွင်းမှာ ကိုဗစ် ကပ်ရောဂါအခြေအနေတွေကြောင့် ဆုပေးပွဲကို မကျင်းပနိုင်ခဲ့တာဖြစ်ပြီး အခုနှစ်မှ ပြန်လည်ကျင်းပနိုင်မှာ ဖြစ်ပါတယ်။တစ်နှစ်တာအကောင်းဆုံး အမျိုးသားကစားသမားဆုကို အီတူးက ၄ ကြိမ်အများဆုံးရရှိထားပြီး ၊ အမျိုးသမီးကစားသမားဆုကို အိုရှိုအာလာနဲ့ အန်ကွာချာတို့က ၄ ကြိမ်စီနဲ့ အများဆုံး ရရှိထားတာပါ။
၂၀၂၂ ခုနှစ်အတွက် အာဖရိကအကောင်းဆုံး ဆုပေးပွဲကို ဇူလိုင်လ ၂၁ ရက် မော်ရိုကိုနိုင်ငံ ရာဘတ်မှာ ကျင်းပ သွားမှာဖြစ်ပြီး အမျိုးသမီးအကောင်းဆုံးကစားသမားဆုကလွဲပြီး ဆုတွေအားလုံးကို ကြေညာသွားမှာ ဖြစ်ပါတယ်။ အဆိုပါဆုကိုတော့ အမျိုးသမီးအာဖရိကဖလား ဗိုလ်လုပွဲအပြီး စနေနေ့မှာ ကြေညာသွားမယ်လို့ သိရပါတယ်။
Source:BBC
- By CNI
- Category: အားကစား
- Hits: 1439
CNI Sport News
၂၀၂၂ ခုနှစ်၊ ဇူလိုင် ၂၁
အင်္ဂလန်အသင်းဟာ လက်ရှိကျင်းပနေတဲ့ အမျိုးသမီးယူရိုပြိုင်ပွဲရဲ့ ကွာတားဖိုင်နယ်ပွဲစဉ်မှာ စပိန်အသင်းကို အချိန်ပိုမှာ အနိုင်ရပြီး ဆီမီးဖိုင်နယ်တက်ရောက်နိုင်ခဲ့ပြီ ဖြစ်ပါတယ်။
ဒီပွဲမှာ စပိန်အသင်းက ပွဲချိန် ၅၄ မိနစ်မှာ ဂွန်ဇာလတ်ဇ်က ဦးဆောင်ဂိုးစတင်သွင်းယူခဲ့တာဖြစ်ပြီး အယ်လ်လာ တုန်းက ပွဲချိန် ၈၄ မိနစ်မှာ အင်္ဂလန်အတွက် ချေပဂိုးပြန်သွင်းယူခဲ့တာပါ။ပွဲချိန်မိနစ် ၉၀ ပြည့်တဲ့အထိ ၁ ဂိုးစီ သရေကျနေခဲ့လို့ အချိန်ပိုဆက်လက်ယှဉ်ပြိုင်ခဲ့ရပါတယ်။အချိန်ပို ၉၆ မိနစ်အရောက်မှာ စတန်းဝေးက အင်္ဂလန် အတွက် အဖိုးတန်အနိုင်ဂိုးကို ဂိုးဧရိယာထိပ်ကနေ ကန်သွင်းယူသွားခဲ့တာပါ။အဲဒီနောက်ပိုင်း နှစ်သင်းစလုံး ဂိုးထပ် မသွင်းနိုင်တော့လို့ အင်္ဂလန်အသင်းဟာ ၂ ဂိုး- ၁ ဂိုးနဲ့ အနိုင်ရပြီး ဆီမီးဖိုင်နယ်ကို တက်ရောက်နိုင်ခဲ့တာ ဖြစ်ပါတယ်။
အနိုင်ဂိုးရှင် စတန်းဝေးက “ဒါက ကျမတို့ ရောက်ရှိနေတဲ့ အဆင့်ကို ပြသတာပါပဲ။အရေးနိမ့်နေရာကနေ ပြန်လာ နိုင်ခဲ့ပါတယ်။အလုပ်ကိုအောင်မြင်စွာလုပ်နိုင်ခဲ့တယ်။အခုတော့ ဆီမီးဖိုင်နယ်ကို အာရုံစိုက်ရတော့မယ်။ ကျမတို့ ဟာ ဒီအခိုက်အတန့်ကို ပျော်ရွှင်စွာဖြတ်သန်းနိုင်ဖို့ လိုအပ်ပါတယ်”လို့ ပြောခဲ့တာပါ။
ကိုဗစ်ရှိခဲ့လို့ အင်္ဂလန်အသင်းရဲ့ အုပ်စုနောက်ဆုံးပွဲစဉ်ကို မကိုင်တွယ်နိုင်ခဲ့တဲ့ နည်းပြ ဝီဂ်မန်းဟာ ဒီပွဲမတိုင်ခင် စစ်ဆေးမှုပြုလုပ်ခဲ့ရာ ကိုဗစ်ရှိကြောင်းမတွေ့ရတော့လို့ ကိုင်တွယ်ခွင့်ရခဲ့ပါတယ်။ဒီပွဲကို ကိုင်တွယ်ဖို့ အဆင်သင့် ဖြစ်နေခဲ့ပေမယ့် စောင့်ဆိုင်းနေခဲ့ရပါတယ်။
နောက်ဆုံးမှာ ကိုင်တွယ်လို့ ရပြီလို့ ပြောခဲ့ပါတယ်။အနိုင်ရခဲ့လို့ အလွန် ပျော်ရွှင်မိပါတယ်။ပွဲအပြီးမှာ ကျမ အနည်းငယ်ရူးသွပ်သွားတယ်လို့ ထင်မိပါတယ်။နှစ်သင်းစလုံးဟာ အလွန် ကောင်းမွန်ခဲ့ကြပါတယ်။အသင်းအတွက် အလွန်ဂုဏ်ယူပါတယ်”လို့ ပြောခဲ့ပါတယ်။
အင်္ဂလန်အသင်းဟာ ဆွီဒင်နဲ့ ဘယ်လ်ဂျီယံတို့ ပွဲစဉ်က အနိုင်ရတဲ့အသင်းနဲ့ ဆီမီးဖိုင်နယ် ပွဲစဉ်ယှဉ်ပြိုင်ရမှာပါ။ အင်္ဂလန်အသင်းဟာ အမျိုးသမီးယူရိုပြိုင်ပွဲသမိုင်းမှာ အမြင့်ဆုံးအောင်မြင်မှုအဖြစ် ဒုတိယနေရာသာ ရရှိခဲ့တာ ဖြစ်ပါတယ်။
Source:DailyMail
- By CNI
- Category: Watch TV
- Hits: 739
- By CNI
- Category: Watch TV
- Hits: 720
- By CNI
- Category: အားကစား
- Hits: 1195
CNI Sport News
၂၀၂၂ ခုနှစ်၊ ဇူလိုင် ၂၀
ဗြိတိန်နိုင်ငံသား ဝှိုက်မန်းဟာ အော်ရီဂွန်မှာ ကျင်းပနေတဲ့ ကမ္ဘာ့ပြေးခုန်ပစ်ချန်ပီယံရှစ် မီတာ ၁၅၀၀ ပြေးပွဲမှာ ရွှေတံဆိပ်ဆုကို ရယူနိုင်ခဲ့ပါတယ်။
အသက် ၂၈ နှစ်အရွယ်ရှိ ဝှိုက်မန်းဟာ အိုလံပစ်ချန်ပီယံ အင်ဂါဘရစ်ဆန်ကို အသာရပြီး ၃ မိနစ် ၂၉.၂၃ စက္ကန့်နဲ့ ရွှေတံဆိပ်ဆု ရယူခဲ့တာပါ။နော်ဝေနိုင်ငံသား အင်ဂါဘရစ်ဆန်က ၃ မိနစ် ၂၉. ၄၇ စက္ကန့်နဲ့ ငွေတံဆိပ်၊ စပိန်နိုင်ငံ သား ကာတီးယားက ၃ မိနစ် ၂၉.၉၀ စက္ကန့်နဲ့ ကြေးတံဆိပ်ရရှိခဲ့တာဖြစ်ပါတယ်။
ဝှိုက်မန်းဟာ ၁၉၈၃ က စတိဗ် ခရမ်နောက်ပိုင်း ကမ္ဘာ့မီတာ ၁၅၀၀ ပြိုင်ပွဲမှာ အနိုင်ရတဲ့ ပထမဆုံး ဗြိတိန်နိုင်ငံသား ဖြစ်လာခဲ့တာပါ။ ဝှိုက်မန်းရဲ့ ဖခင်ဖြစ်သူ ဂျက်ဗ်ကတော့ ဒီပြိုင်ပွဲမှာ ကြေညာသူအဖြစ်ဆောင်ရွက်နေခဲ့တာဖြစ်ပြီး သားဖြစ်သူရဲ့အောင်ပွဲကို ကြေညာနိုင်ခဲ့ပါတယ်။
“အပြေးက အိမ်ကိုပြန်ရောက်လာပြီ။ဒါက ကျနော့်ရဲ့သား သူက ကမ္ဘာ့ချန်ပီယံပဲ”လို့ ဂျက်ဗ်က ပြောခဲ့တာပါ။ ဒီ ရွှေတံဆိပ်ဟာ အခုပြိုင်ပွဲမှာ ဗြိတိန်နိုင်ငံက ရရှိတဲ့ ပထမဆုံးရွှေတံဆိပ်ဖြစ်ပြီး နိုင်ငံအလိုက် ဆုတံဆိပ်ရရှိမှု စာရင်းမှာ ဗြိတိန်နိုင်ငံက ရရှိတဲ့ ဒုတိယမြောက်ဆုတံဆိပ်ဖြစ်ခဲ့ပါတယ်။မီရာက အမျိုးသမီး မီတာ ၁၅၀၀ ပြေးပွဲမှာ ဗြိတိန်နိုင်ငံအတွက် ကြေးတံဆိပ်ရရှိခဲ့တာပါ။
ဝှိုက်မန်းက “ဒါက တကယ်ဖြစ်ပျက်ခဲ့တယ်ဆိုတာကို အံသြပြီး မယုံကြည်နိုင်သေးပါဘူး။အခု အသက် ၂၈ နှစ်ရှိပြီ၊ နောက်ထပ်အခွင့်အရေးတွေ ဘယ်လောက်ရနိုင်မလဲဆိုတာကို ကျနော်မသိပါဘူး။ နောက်ထပ်အများကြီး ရှိလာ ဖို့တော့ မျှော်လင့်ပါတယ်။ဒါကို အကောင်းဆုံးဖြစ်အောင်လုပ်ရပါမယ်။ဒီလိုသမိုင်းမှတ်တိုင်ကို ရောက်ဖို့က အရေး ကြီးပါတယ်။ဒီလိုမျိုးနေရာကို ရောက်ဖို့ ကျနော်အများကြီး စွန့်လွှတ်ခဲ့ရပါတယ်။အများကြီးလည်း ပေးဆပ်ခဲ့ရတာ ကြောင့် တန်ဖိုးရှိတယ်”လို့ ပြောခဲ့ပါတယ်။
ဝှိုက်မန်းဟာ ၂၀၁၈ ခုနှစ် ဘာလင်မှာ ကျင်းပခဲ့တဲ့ ဥရောပချန်ပီယံရှစ်ပြိုင်ပွဲမှာ ကြေးတံဆိပ်ဆုကို ရရှိခဲ့ပြီး အဆိုပါ နှစ်မှာပဲ သြစတြေးလျနိုင်ငံမှာကျင်းပတဲ့ ဓနသဟာယအားကစားပြိုင်ပွဲမှာ စကော့တလန်ကိုယ်စားပြုပြီး ကြေး တံဆိပ်ရရှိခဲ့တာ ဖြစ်ပါတယ်။
Source:BBC
- By CNI
- Category: အားကစား
- Hits: 1875
CNI Sport News
၂၀၂၂ ခုနှစ်၊ ဇူလိုင် ၂၀
ကိုဗစ်ကြောင့် ရွှေ့ဆိုင်းခဲ့ရတဲ့ ၂၀၂၂ အာရှအားကစားပြိုင်ပွဲကို ၂၀၂၃ မှာ တရုတ်နိုင်ငံက အိမ်ရှင်အဖြစ် ပြန်ကျင်းပမယ်လို့ ပွဲစီစဉ်သူတွေက ပြောပါတယ်။
ဒီပွဲကို ဟန်ကျိုးမှာ စက်တင်ဘာ ၂၃ ရက်ကနေ အောက်တိုဘာ ၈ ရက်အထိ ကျင်းပသွားမယ်လို့ အာရှအိုလံပစ်ကောင်စီက ပြောခဲ့တာ ဖြစ်ပါတယ်။
အာရှအားကစားပြိုင်ပွဲကို မူလက အခုနှစ် စက်တင်ဘာလမှာ ကျင်းပဖို့ သတ်မှတ်ထားခဲ့ပေမယ့် တရုတ်နိုင်ငံဟာ နိုင်ငံအတွင်း မှာ ကြီးမားတဲ့ ကိုဗစ် ပြန်လည် ဖြစ်ပွားနေမှုကို တိုက်ဖျက်ဖို့ ကြိုးပမ်းနေတဲ့အတွက် ပွဲစီစဉ်သူတွေက မေလမှာ ရွှေ့ဆိုင်းခဲ့ တာ ဖြစ်ပါတယ်။
ဟန်ကျိုးဟာ အခုနှစ် အစောပိုင်းက လအတန်ကြာ လောဒ့်ဒေါင်းချခံခဲ့ရတဲ့ နိုင်ငံရဲ့ အကြီးဆုံးမြို့ ရှန်ဟိုင်းကနေ ကီလိုမီတာ ၂၀၀ အောက်သာ ကွာဝေးတာပါ။
အခြား နိုင်ငံတကာ အားကစားပွဲကြီးတွေနဲ့ ပဋိပက္ခကို ရှောင်ရှားနိုင်ဖို့အတွက် နေ့ရက် အသစ်တွေကို ရွေးချယ်ခဲ့ရတယ်လို့ အာရှအိုလံပစ်ကောင်စီက အင်္ဂါနေ့မှာ ပြောခဲ့ပါတယ်။
တရုတ်က အိမ်ရှင်အဖြစ် ကျင်းပမယ့် အာရှအားကစားပြိုင်ပွဲ ပြင်ဆင်ထားမှု (France 24)
အာရှအားကစားပြိုင်ပွဲဟာ ပုံမှန်ဆိုရင် ဒေသတွင်းက အားကစားသမားပေါင်း ၁ သောင်းကျော်ကို ဆွဲဆောင်လေ့ရှိတဲ့ ပြိုင်ပွဲ ဖြစ်ပါတယ်။
တရုတ်နိုင်ငံဟာ ကပ်ရောဂါ စတင်ကတည်းက ဘေဂျင်းမှာ ဆောင်းရာသီ အိုလံပစ်ပြိုင်ပွဲက လွဲပြီး ပြိုင်ပွဲတွေ အားလုံးကို ဖျက်သိမ်းတာ ဒါမှမဟုတ် ရွှေ့ဆိုင်းတာတွေကို ပြုလုပ်ခဲ့ပြီး နိုင်ငံရဲ့ နိုင်ငံတကာအားကစား ရည်မှန်းချက်တွေကို ထိခိုက်စေခဲ့ ပါတယ်။
တရုတ်နိုင်ငံဟာ အာရှဖလား ပြိုင်ပွဲကိုလည်း အိမ်ရှင်အဖြစ် လက်ခံ ကျင်းပခွင့် ရခဲ့ပေမယ့် ကိုဗစ်ကြောင့်ပဲ အိမ်ရှင်အဖြစ် ကနေ နုတ်ထွက်ခဲ့ပါတယ်။
အဲ့ဒါကြောင့် တောင်ကိုရီးယား၊ သြစတြေးလျ၊ ကာတာနဲ့ အင်ဒိုနီးရှားတို့က အိမ်ရှင်အဖြစ် ပြုလုပ်ဖို့ အာရှဘောလုံးအဖွဲ့ချုပ်ထံ လျှောက်ထားခဲ့ကြတာ ဖြစ်ပါတယ်။ ဒါ့အပြင် ချန်ဒူးမှာ ဇွန်လထဲ ကျင်းပဖို့ စီစဉ်ထားတဲ့ ကမ္ဘာ့တက္ကသိုလ်များ အားကစား ပြိုင်ပွဲကို ၂၀၂၃ အထိ ထပ်မံရွှေ့ဆိုင်းထားခဲ့တာပါ။
ဒါပေမယ့် တရုတ်စူပါလိဂ် ပြိုင်ပွဲကိုတော့ ဇွန်လ ၃ ရက်မှာ ပြန်လည် စတင်နိုင်ခဲ့ပြီး အသင်းပေါင်း ၁၈ သင်း ဝင်ရောက် ယှဉ်ပြိုင်နေကြတာ ဖြစ်ပါတယ်။
Source: CNA
- By CNI
- Category: အားကစား
- Hits: 1216
CNI Sport News
၂၀၂၂ ခုနှစ်၊ ဇူလိုင် ၂၀
ယူကရိန်းကလပ် ဒိုင်နမိုကိဗ်အသင်းဟာ ရုရှားကျူးကျော်မှုခံရပြီးကတည်းက ပထမဆုံးပွဲစဉ်အဖြစ် ချန်ပီယံလိဂ် ခြေစစ်ပွဲယှဉ်ပြိုင်မှာဖြစ်ပါတယ်။
ဒိုင်နမိုကိဗ်အသင်းဟာ ဖီနာဘာချီအသင်းနဲ့ ကစားရမယ့် ပထမအကျော့ပွဲစဉ်ကို ပိုလန်နိုင်ငံ လိုဒ့်ဇ်မှာ အိမ်ကွင်း ပွဲစဉ်အဖြစ် ယှဉ်ပြိုင်မှာပါ။ဒီပွဲဟာ ဒိုင်နမိုကိဗ်အသင်းအတွက်တော့ ဒီဇင်ဘာလနောက်ပိုင်း ပထမဆုံးအကြိမ် ပြိုင်ပွဲအဖြစ် ကစားရမယ့်ပွဲဖြစ်ပါတယ်။ဒိုင်နမိုကိဗ်အသင်းနည်းပြ လူဆက်စ်ကူဟာ ကျူးကျော်မှု အစောပိုင်း ကာလတွေအတွင်းမှာ နိုင်ငံအတွင်းကနေ ထွက်ခွာခြင်းမပြုခဲ့ဘဲ ယူကရိန်းတော်လှန်ရေးအတွက် ဦးဆောင်ခဲ့သေး တာပါ။လူဆက်စ်ကူဟာ ဧပြီလမှာတော့ လုံခြုံမှုအတွက် အသင်းကို ဘူခါရတ်စ်ထံ စေလွှတ်ခဲ့တာဖြစ်ပြီး အဲဒီ နောက်ပိုင်း ငြိမ်းချမ်းရေးနဲ့ပတ်သက်တဲ့ခြေစမ်းပွဲတွေ ကစားခဲ့ပါတယ်။
ယူအီးအက်ဖ်အေက ယူကရိန်းနိုင်ငံအတွင်းမှာ စစ်ပွဲတွေဆက်လက်ဖြစ်ပွားနေတာကြောင့် အဆိုပါနိုင်ငံရဲ့ကလပ် တွေမှာပါဝင်တဲ့ အိမ်ကွင်းပွဲစဉ်တွေကို ကြားကွင်းတွေမှာသာ ကစားဖို့ ဆုံးဖြတ်ခဲ့တာပါ။အဲဒါကြောင့် ဒိုင်နမိုကိဗ် အသင်းအပြင် ရှက်တာဒိုးနက်အသင်းကလည်း ပိုလန်နိုင်ငံမှာ အိမ်ကွင်းကစားဖို့ သတ်မှတ်ခဲ့ကြတာဖြစ်ပါတယ်။ ရှက်တာဒိုးနက်အသင်းကတော့ ပြီးခဲ့တဲ့ရာသီက လိဂ်အမှတ်ပေးဇယား ထိပ်ဆုံးနေရာမှာ ရပ်တည်ခဲ့တဲ့အတွက် အုပ်စုအဆင့်ကနေ စတင်ယှဉ်ပြိုင်ရမှာပါ။
လူဆက်စ်ကူက “ဘောလုံးဆိုတာ လူတိုင်းရဲ့ဘဝအစိတ်အပိုင်းတစ်ခုပါ။ဒါဟာ ကပ်ရောဂါအခြေအနေဆိုးတွေ အတွက် အရေးကြီးပြီး အခုအချိန်မှာတော့ ဘဝအတွက် မျှော်လင့်ချက်၊ စိတ်အားထက်သန်မှုနဲ့ လှုံ့ဆော်မှုတွေ ကိုပေးပါတယ်။ဥရောပမှာကြောက်စရာအကောင်းဆုံး စစ်ပွဲဖြစ်ပွားနေပြီး ဒါကမပြီးသေးဘူးဆိုတာ လူတိုင်းကို သတိပေးဖို့ပါ”လို့ ပြောခဲ့ပါတယ်။
ယူကရိန်းကလပ်ဟာ ပြီးခဲ့တဲ့ရာသီက ချန်ပီယံလိဂ် အုပ်စုအဆင့်မှာ ဘိုင်ယန်မြူးနစ်၊ ဘင်ဖီကာ၊ ဘာစီလိုနာ အသင်းတွေနဲ့ တစ်အုပ်စုတည်းကျရောက်ခဲ့ပြီး ၅ ပွဲရှုံး ၁ ပွဲသရေနဲ့ အုပ်စုကနေ လှည့်ပြန်ခဲ့ရတာပါ။ အခုနှစ် ရာသီသစ်အတွက် ယူကရိန်းပရီးမီးယားလိဂ်ပြိုင်ပွဲကို သြဂုတ်လ ၂၀ ရက်မှာ ပြန်လည်စတင် ကျင်းပသွားတော့မှာ ဖြစ်ပါတယ်။
Source:The Sun
- By CNI
- Category: အားကစား
- Hits: 1328
CNI Sport News
၂၀၂၂ ခုနှစ်၊ ဇူလိုင် ၂၀
ဘာစီလိုနာတိုက်စစ်မှူးသစ် လီဝန်ဒေါစကီးကတော့ အသင်းကို ထိပ်ဆုံးပြန်ပို့ပြီး ရရှိနိုင်တဲ့ဆုဖလားတွေ အားလုံး ကို ရယူပေးသွားမယ်လို့ ပြောလိုက်ပါတယ်။
လီဝန်ဒေါစကီးက “နောက်ဆုံးတော့ ကျနော်ဒီကိုရောက်လာခဲ့ပါပြီ။ဘာစီလိုမှာရှိနေတဲ့အတွက် အလွန်ဝမ်းသာ မိပါတယ်။ပြီးခဲ့တဲ့ ရက်အနည်းငယ်က အလွန်ရှည်ကြာခဲ့ပေမယ့် အခုတော့ အားလုံးပြီးဆုံးသွားခဲ့ပါပြီ။အခု ကျနော့် ဘဝရဲ့ အခန်းအသစ်နဲ့စိန်ခေါ်မှုအသစ်တွေကို အာရုံစိုက်လို့ရပါပြီ။ ကျနော် အမြဲတမ်းလာလီဂါနဲ့ ကလပ်အသင်း ကြီးအတွက် ကစားချင်ခဲ့ပါတယ်။ဘာစီလိုနာကို ထိပ်ဆုံးရောက်အောင်နဲ့ ရရှိနိုင်တဲ့ ဆုဖလားတွေအားလုံး ရနိုင် အောင်ကူညီပေးဖို့ ဒီကိုရောက်လာတာ” လို့ ပြောခဲ့တာပါ။
ဘာစီလိုနာအသင်းဟာ လီဝန်ဒေါစကီးကို ယူရိုသန်း ၅၀ နဲ့ ၄ နှစ်စာချုပ်ချုပ်ဆိုကာ ခေါ်ယူလိုက်ပြီလို့ တရားဝင် ထုတ်ပြန်ခဲ့တာဖြစ်ပါတယ်။ဘိုင်ယန်မြူးနစ်အသင်းဟာ လီဝန်ဒေါစကီးကို ရောင်းချဖို့ တွန့်ဆုတ်နေခဲ့ပေမယ့် နောက်ဆုံးမှာ လိုချင်တဲ့ပြောင်းရွှေ့ကြေးရခဲ့လို့ လက်လွှတ်ခဲ့တာပါ။လီဝန်ဒေါစကီးနဲ့ ဘာစီလိုနာတို့ ချုပ်ဆိုခဲ့တဲ့ စာချုပ်ထဲမှာ စာချုပ်ဖျက်သိမ်းကြေး ယူရိုသန်း ၅၀၀ ပါဝင်ခဲ့တာဖြစ်ပါတယ်။
လီဝန်ဒေါစကီးဟာ ပြီးခဲ့တဲ့ရာသီက ဘိုင်ယန်မြူးနစ်အသင်းအတွက် ၄၆ ပွဲကစားပြီး ဂိုး ၅၀ သွင်းယူကာ အသင်း ကို ဘွန်ဒစ်လီဂါဖလား ၁၀ ကြိမ်ဆက်တိုက်ရရှိနိုင်အောင် ကူညီပေးနိုင်ခဲ့တာပါ။သူဟာ ဂျာမန်ကလပ်အတွက် ၃၇၄ ပွဲကစားကာ ၃၄၄ ဂိုးသွင်းယူနိုင်ခဲ့ပြီး အသင်းရဲ့ဂိုးသွင်းအများဆုံး ကစားသမားဖြစ်တဲ့ ဂတ်မူလာရဲ့ နောက် ဒုတိယနေရာမှာ ရပ်တည်နိုင်ခဲ့တာ ဖြစ်ပါတယ်။
ပိုလန်တိုက်စစ်မှူးဟာ အမေရိကန်မှာ ခြေစမ်းပွဲကစားဖို့ ရောက်နေတဲ့ ဘာစီလိုနာအသင်းနဲ့ မိုင်ယာမီမှာ ပူးပေါင်း နေခဲ့တာပါ။ဘာစီလိုနာအသင်းဟာ ဇူလိုင်လ ၂၀ ရက် မနက်ပိုင်းက ရာသီကြိုခြေစမ်းပွဲအဖြစ် အင်တာမိုင်ယာမီ အသင်းနဲ့ ကစားခဲ့ရာမှာ ၆ ဂိုး- ဂိုးမရှိနဲ့ ဂိုးပြတ်အနိုင်ရရှိခဲ့တာ ဖြစ်ပါတယ်။လီဝန်ဒေါစကီးဟာ ဒီပွဲမှာ ဘာစီလိုနာ အသင်းရဲ့ လူစာရင်းမှာမပါဝင်ခဲ့ဘဲ ပွဲကြည့်စင်ကနေ အသင်းရဲ့ပွဲကို ကြည့်ရှုခဲ့တာပါ။ လီဝန်ဒေါစကီးဟာ ရီးရယ်လ်အသင်းနဲ့ကစားမယ့် ခြေစမ်းပွဲမှာတော့ ဘာစီလိုနာအတွက် ပါဝင်ကစားနိုင်ဖွယ် ရှိနေပါတယ်။
ဘာစီလိုနာအသင်းဟာ ပြီးခဲ့တဲ့ရာသီက ဆုဖလားလက်မဲ့ဖြစ်ခဲ့တဲ့အတွက် အခုအပြောင်းအရွှေ့မှာ ကစားသမား တချို့ကိုခေါ်ယူပြီး အသင်းကို ပြင်ဆင်နေခဲ့တာပါ။ဘာစီလိုနာအသင်းဟာ လီဝန်ဒေါစကီး၊ ရာဖင်ဟာ၊ ကတ်ဆီနဲ့ ခရစ်တန်ဆန်တို့ကို ခေါ်ယူခဲ့ပြီး ဒမ်ဘီလီကိုလည်း သက်တမ်းတိုးစာချုပ်ချုပ်ဆိုခဲ့တာ ဖြစ်ပါတယ်။
Source:BBC
- By CNI
- Category: Watch TV
- Hits: 824
- By CNI
- Category: အားကစား
- Hits: 1245
CNI Sport News
၂၀၂၂ ခုနှစ်၊ ဇူလိုင် ၁၉
ဘာကာယိုကိုဟာ သေနတ်ပစ်ခတ်မှုမှာ ပါဝင်ပတ်သက်နေတဲ့ သံသယရှိသူကို ရဲများက ရှာဖွေခဲ့ချိန်မှာ အဲဒီ ပတ်ခတ်မှုနဲ့ အနီးတဝိုက်မှာရှိနေတဲ့ ၎င်းကိုပါ စစ်ဆေးမှုခံယူရန် ရပ်တန့်တားဆီးခဲ့ပြီးနောက်မှာတော့ ရဲတပ်ဖွဲ့က ပြန်လည်တောင်းပန်ပြီး လွှတ်ပေးခဲ့တယ်လို့ အေစီမီလန်အသင်းက ပြောပါတယ်။
“ဘာကာယိုကိုရှိခဲ့တဲ့ ဧရိယာမှာ ပစ်ခတ်မှုဖြစ်ပွားခဲ့တာကြောင့် ရဲတွေက စစ်ဆေးမှုတွေ ပြုလုပ်ခဲ့တာပါ။ ကစားသမားကို ရပ်တန့်ခဲ့ပေမယ့် ဖြစ်ပျက်ခဲ့တဲ့အရာတွေနဲ့ သူနဲ့ ဘာမှသက်ဆိုင်မှုမရှိကြောင်း စစ်ဆေး အတည်ပြုခဲ့ပါတယ်။အဲဒီနောက် သူ့ကိုတောင်းပန်ပြီး ပြန်လွှတ်ပေးခဲ့တယ်”လို့ အေစီမီလန်အသင်းရဲ့ ပြောရေး ဆိုခွင့်ရှိသူက ပြောခဲ့တာပါ။
ဒီအဖြစ်အပျက်ဟာ ဇူလိုင်လ ၃ ရက်နေ့က မီလန်မှာဖြစ်ပွားခဲ့တာဖြစ်ပေမယ့် ပြီးခဲ့တဲ့ တနင်္လာနေ့ကမှ လှုမှုကွန်ယက်စာမျက်နှာများပေါ်တွင် ပြန်လည်ဝေမျှလာကာ ပျံ့နှံ့သွားခဲ့တာပါ။ချယ်လ်ဆီးအသင်းကနေ အငှားလာရောက်ကစားနေတဲ့ ဘာကာယိုကိုဟာ ရဲတပ်ဖွဲ့ရဲ့ ရှာဖွေမှုတွေခံခဲ့ရပြီး နောက်ထပ်ရဲတပ်ဖွဲ့ ၂ ဦးက ကားတစ်စီးကို သေနတ်နဲ့ ချိန်ထားခဲ့တာဖြစ်ပါတယ်။ရဲတပ်ဖွဲ့အရာရှိတွေနဲ့ စကားပြောဆိုပြီးနောက်မှာ ဘာကာယိုကိုဟာ ပြန်လည်လွတ်လာခဲ့တာပါ။
အေစီမီလန်အသင်းမှာ ၂၀၁၈-၁၉ ရာသီကလည်း အငှားကစားခဲ့တဲ့ ဘာကာယိုကိုဟာ ပြီးခဲ့တဲ့ရာသီက ၂ နှစ် အငှားစာချုပ်နဲ့ ထပ်မံပြောင်းရွှေ့လာခဲ့တာဖြစ်ပါတယ်။ပြင်သစ်ကစားသမားဟာ ပြီးခဲ့တဲ့ရာသီက အေစီမီလန် အသင်းအတွက် ၁၈ ပွဲပါဝင်ကစားခဲ့ပြီး စီးရီးအေဖလား ဆွတ်ခူးနိုင်ခဲ့တာပါ။ဘာကာယိုကိုဟာ ၂၀၁၇ က မိုနာကို ကနေ ချယ်လ်ဆီးအသင်းကို ပေါင်သန်း ၄၀ နဲ့ ရောက်ရှိလာခဲ့ပြီး ပထမရာသီမှာ ပွဲပေါင်း ၄၃ ပွဲ ပါဝင် ကစားခဲ့ရပါတယ်။
အဲဒီနောက်ပိုင်းမှာ ဘာကာယိုကိုဟာ အငှားတွေသာ စေလွှတ်ခံခဲ့ရပြီး ၂၀၁၉ မှာ အသင်းဟောင်း မိုနာကိုနဲ့ ၂၀၂၀ မှာ နာပိုလီအသင်းတွေထံ အငှားသွားရောက်ကစားခဲ့ရတာပါ။ဘာကာယိုကိုဟာ ပြင်သစ်လက်ရွေးစင်အတွက် ၂၀၁၇ က ၁ ပွဲသာပါဝင်ကစားခဲ့ရတာ ဖြစ်ပါတယ်။
Source:BBC
- By CNI
- Category: အားကစား
- Hits: 1246
CNI Sport News
၂၀၂၂ ခုနှစ်၊ ဇူလိုင် ၁၉
ရုရှားတင်းနစ်မယ် ကာဆတ်ကီနာက သူမဟာ လိင်တူချစ်သူဖြစ်ကြောင်း ပြောလိုက်ပြီး လိင်တူဆက်ဆံခြင်း အပေါ် နိုင်ငံရဲ့ သဘောထားကိုလည်း ဝေဖန်ခဲ့ပါတယ်။
ကာဆတ်ကီနာက “သူတို့ ပြောနေသလိုပဲ ဗီရိုထဲမှာ နေထိုင်ရတာက အဓိပ္ပါယ်မရှိပါဘူး။တစ်ခုခု မပြောမချင်း ခင်ဗျားခေါင်းထဲမှာ အမြဲတမ်းချာချာလည်နေပါလိမ့်မယ်။ဘယ်လိုဖွင့်ပြောရမလဲဆိုတာကို လူတိုင်းက ဆုံးဖြတ် ပါတယ်”လို့ ပြောခဲ့တာပါ။ ဒါ့အပြင် အသက် ၂၅ နှစ်အရွယ်ရှိ တင်းနစ်မယ်က ရုရှားနိုင်ငံမှာ တားမြစ်ထားတဲ့ အကြောင်းအရာတွေအများကြီးရှိတယ်လို့လည်း ပြောခဲ့ပါတယ်။
“အားကစားမှာ အရေးပါအရာရောက်တဲ့သူတွေ ဒါမှမဟုတ် တခြားနယ်ပယ်တစ်ခုခုက ဒီကိစ္စကို တကယ်ပြောဖို့ အရေးကြီးတယ်လို့ ယုံကြည်ပါတယ်။လူငယ်တွေအတွက် အရေးကြီးပါတယ်။သူတို့တွေဟာ လူမှုအသိုက်အဝန်းမှာ ဆက်ဆံနေရတာကို အခက်တွေ့နေပြီး ပံ့ပိုးကူညီမှုတွေလိုအပ်နေတဲ့သူတွေပါ”လို့ ပြောခဲ့တာပါ။သူမဟာ ဒီလို ပြောထားတဲ့ရုပ်သံကို လွှင့်တင်ပြီး နာရီပိုင်းအကြာမှာ အခြားအမျိုးသမီးတစ်ဦးနဲ့ ပွေ့ဖက်နေတဲ့ပုံကို အင်စတာ ဂရမ်မှာ မျှဝေခဲ့တာဖြစ်ပါတယ်။
တနင်္လာနေ့က ရုရှားလွှတ်တော်အမတ်တွေဟာ အများပြည်သူနယ်ပယ်မှာ သမားရိုးကျမဟုတ်တဲ့ လိင်ဆက်ဆံမှု ဆိုင်ရာ ဆွေးနွေးမှုတွေကို ပိတ်ပင်ဖို့ အဆိုပြုခဲ့ပြီးနောက် ကာဆတ်ကီနာရဲ့ ကြေညာချက် ထွက်ပေါ်လာခဲ့တာပါ။ ပြင်သစ်အိုးပန်းပြိုင်ပွဲရဲ့ ဆီမီးဖိုင်နယ်တက်ရောက်နိုင်ခဲ့တဲ့ ကာဆတ်ကီနာက ရုရှားနိုင်ငံဟာ လိင်တူဆက်ဆံတာ ကို ချုပ်ကိုင်ဖို့ ကြိုးစားနေတဲ့အပေါ် ့သြစရာမရှိဘူးလို့လည်း ပြောခဲ့ပါတယ်။ရုရှားနိုင်ငံဟာ လိင်တူချစ်သူတွေနဲ့ ပတ်သက်လို့ ဝါဒဖြန့်တဲ့ ဥပဒေကို ၂၀၁၃ က စတင်ကျင့်သုံးခဲ့ကာ လိင်တူချစ်သူ အခွင့်အရေးလှုပ်ရှားသူတွေကို ဖမ်းဆီးထိန်းသိမ်းခဲ့တာပါ။
စစ်ပွဲတွေအမြန်ဆုံးပြီးဆုံးဖို့ အခုအချိန် သူမဘဝမှာ အလိုချင်ဆုံးအရာဖြစ်တယ်လို့လည်း ကာဆတ်ကီနာက ပြောခဲ့တာဖြစ်ပါတယ်။ကာဆတ်ကီနာဟာ အမျိုးသမီးတစ်ဦးချင်း ကမ္ဘာ့အဆင့် ၁၃ နေရာမှာရပ်တည်နေတာ ဖြစ်ပြီး အခုနှစ် ပြင်သစ်အိုးပန်းပြိုင်ပွဲမှာ ဆီမီးဖိုင်နယ်တက်နိုင်ခဲ့ခြင်းက သူမရဲ့ ဂရမ်းဆလမ်းအမြင့်ဆုံး အောင်မြင်မှုအဖြစ် ရှိခဲ့တာပါ။
Source:DW
- By CNI
- Category: အားကစား
- Hits: 1675
CNI Sport News
၂၀၂၂ ခုနှစ်၊ ဇူလိုင် ၁၉
ဒေါ့မွန်တိုက်စစ်မှူးသစ် ဟော်လာဟာ ဝှေးစေ့မှာ အကျိတ်တွေ့ခဲ့ရလို့ ရာသီကြိုအတွက် ပြင်ဆင်နေတဲ့အသင်းရဲ့ လေ့ကျင့်ရေးစခန်းကနေ ထွက်ခွာခဲ့ရပြီ ဖြစ်ပါတယ်။
ဂျာမန်ကလပ်ဟာ အခုနွေရာသီအပြောင်းအရွှေ့ကမှ ဟော်လာကို အေဂျက်စ်အသင်းကနေ ယူရို ၃၁ သန်းနဲ့ ဝယ်ယူထားပြီး ၄ နှစ်စာချုပ်ချုပ်ဆိုခဲ့တာပါ။ဟော်လာဟာ တနင်္လာနေ့က ပြုလုပ်ခဲ့တဲ့ လေ့ကျင့်မှုအပြီးမှာ နေထိုင်မကောင်းဘူးဆိုပြီး ညဉ်းညူခဲ့တာကြောင့် စမ်းသပ်စစ်ဆေးမှုတွေ ပြုလုပ်ခဲ့ရာမှ ဝှေးစေ့အကျိတ်ကို တွေ့ရှိခဲ့တာလို့ ဒေါ့မွန်အသင်းက ပြောခဲ့တာဖြစ်ပါတယ်။လာမယ့်ရက်ပိုင်းအတွင်းမှာ ဟော်လာကို နောက်ထပ် စမ်းသပ်စစ်ဆေးမှုတွေ ထပ်မံပြုလုပ်ဦးမှာပါ။
အိုင်ဗရီကို့စ်လက်ရွေးစင်ကစားသမားဟာ ဝှေးစေ့မှာ အကျိတ်တွေ့ခဲ့တဲ့ အခြေအနေကြောင့် ဒေ့ါမွန်အသင်း အတွက် ပွဲကစားနိုင်ဦးမှာမဟုတ်ဘဲ ရက်အကန့်အသတ်မရှိ အနားယူရမှာဖြစ်ပါတယ်။ “ဒီသတင်းဟာ ဟော်လာနဲ့ တခြားလူတွေအားလုံးကို ထိတ်လန့်တုန်လှုပ်စေပါတယ်။ဟော်လာအနေနဲ့ ဖြစ်နိုင်ဖွယ်ရှိတဲ့ ကုသမှုတွေကို အကောင်းဆုံးခံယူနိုင်ဖို့ ကျနော်တို့ဘက်က အကောင်းဆုံးလုပ်ဆောင်ပေးသွားမှာပါ”လို့ ဒေါ့မွန်အသင်း အားကစားဒါရိုက်တာ ဆီဘတ်စတီယန်ခါးလ်က ပြောခဲ့တာပါ။
ဒေါ့မွန်အသင်းဟာ ကစားသမားနဲ့ သူ့ရဲ့မိသားစုတို့ကို မေးခွန်းတွေ မမေးကြဖို့ တောင်းဆိုထားခဲ့ပြီး နောက်ထပ် အချက်အလက်တွေရတာနဲ့ ကစားသမားနဲ့တိုင်ပင်ကာ အကြောင်းကြားသွားမယ်လို့ သူတို့ရဲ့ထုတ်ပြန်ချက်မှာ ဖော်ပြခဲ့ပါတယ်။ဂျာမန်ကလပ်ရဲ့အဓိကတိုက်စစ်မှူးဖြစ်တဲ့ ဟာလန်းက မန်စီးတီးအသင်းထံ ပြောင်းသွားခဲ့တာ ကြောင့် သူ့ရဲ့နေရာမှာ ဟော်လာကို အစားထိုးခေါ်ယူခဲ့တာပါ။အိုင်ဗရီကို့စ်ကစားသမားဟာ ပြီးခဲ့တဲ့ရာသီက အေဂျတ်စ်အသင်းအတွက် ခြေစွမ်းပြသနိုင်ခဲ့ပြီး ပြိုင်ပွဲစုံ ၄၃ ပွဲမှာ ၃၄ ဂိုးအထိ သွင်းယူနိုင်ခဲ့ကာ အသင်းနဲ့အတူ အမှတ်ပေးချန်ပီယံဆုကိုပါ ရယူနိုင်ခဲ့တာ ဖြစ်ပါတယ်။
ဒေါ့မွန်အသင်းဟာ ဇူလိုင်လ ၂၂ ရက်မှာ ရာသီကြိုခြေစမ်းပွဲအဖြစ် ဗီလာရီးရယ်လ်အသင်းနဲ့ ကစားမှာဖြစ်ပြီး ဒီပွဲပြီးရင်တော့ ဂျာမန်ပိုကယ်လ်ဖလားပွဲစဉ်အဖြစ် ၁၈၆၀ မြူးနစ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source:Talksport
- By CNI
- Category: အားကစား
- Hits: 1694
CNI Sport News
၂၀၂၂ ခုနှစ်၊ ဇူလိုင် ၁၉
ယူကရိန်းကလပ်ရှက်တာဒိုးနက်အသင်းဟာ ဆုံးရှုံးသွားခဲ့တဲ့ ပြောင်းရွှေ့ကြေးတွေအတွက် နစ်နာကြေး ယူရို သန်း ၅၀ ပေးဖို့ ဖီဖာဆီကနေ တောင်းဆိုလိုက်ပါတယ်။
ရှက်တာဒိုးနက်အသင်း အမှုဆောင် အရာရှိချုပ် ဆာဂျီပယ်လ်ကင်က “ဖီဖာရဲ မျှတမှုမရှိတဲ့ စီရင်ချက်ကြောင့် ကျနော်တို့ ဒီလိုလုပ်ခဲ့ရတာပါ။ ဒီအကျိုးဆက်တွေကြောင့် ကျနော်တို့ဟာ ဝင်ငွေအများအပြားကို ဆက်ပြီး ဆုံးရှုံးနိုင်ပါတယ်။ယူကရိန်း ကလပ်တွေ စစ်ပွဲနဲ့ ရင်ဆိုင်နေရတဲ့ အခြေအနေတွေကို မီးမောင်း ထိုးပြလိုပါတယ်။ ဖီဖာက ဒီကလပ်တွေအပေါ်မှာ လေးစားမှုအနည်းငယ်သာရှိပါတယ်။ဖီဖာက ကလပ်တွေအပေါ်မှာ အကာအကွယ် ပေးဖို့ မစဉ်းစားထားသလို အဖြေရှာဖို့လည်း ကျနော်တို့နဲ့ မတိုင်ပင်ခဲ့ပါဘူး။ သူတို့တွေဟာ စစ်ပွဲအစကတည်းက ယူကရိန်းကလပ်တွေရင်ဆိုင်နေရတဲ့ အန္တရာယ်ရှိတဲ့အခြေအနေတွေကို လျစ်လျူရှုထားပုံရတယ်”လို့ ပြောခဲ့တာပါ။
ရုရှားရဲ့ကျူးကျော်မှုကိုခံရအပြီးမှာ ယူကရိန်းနိုင်ငံအတွင်းရှိ နိုင်ငံခြားသားကစားသမားတွေအနေနဲ့ သူတို့ရဲ့ စာချုပ်တွေကို ရပ်ဆိုင်းနိုင်ကြောင်း ဇွန်လထဲမှာ ဖီဖာက ဆုံးဖြတ်ချက်ချခဲ့ပါတယ်။ဒါနဲ့ပတ်သက်ပြီး ရှက်တာဒိုး နက်အသင်းဟာ အားကစားခုံရုံးကို အယူခံဝင်ခဲ့တာပါ။ရှက်တာဒိုးနက်အသင်းဟာ ချန်ပီယံလိဂ်ပုံမှန် ကစားခွင့် ရနေတာဖြစ်ပြီး ဖီဖာရဲ့စီရင်ချက်ကြောင့် ကစားသမားတွေရဲ့ စာချုပ်ကို ရပ်ဆိုင်းလိုက်ရတဲ့အတွက် အသင်းက ထွက်ခွာခဲ့တဲ့ ကစားသမား ၄ ဦးအတွက် ဝင်ငွေတွေဆုံးရှုံးခဲ့ရတာ ဖြစ်ပါတယ်။
အဆိုပါကစားသမား ၄ ဦးထွက်ခွာခဲ့တာကြောင့် ရှက်တာဒိုးနက်အသင်းဟာ ပြောင်းရွှေ့ကြေး ယူရိုသန်း ၅၀ နီးပါး ဆုံးရှုံးသွားခဲ့တာပါ။ဖီဖာက ဇွန်လ ၃၀ ရက်နောက်ဆုံးထားပြီး သဘောတူညီမှုမရခဲ့ဘူးဆိုရင် နိုင်ငံခြားသား ကစား သမားတွေနဲ့ နည်းပြတွေဟာ ယူကရိန်းကလပ်တွေနဲ့ချုပ်ဆိုထားတဲ့ သူတို့ရဲ့စာချုပ်တွေကို ၂၀၂၃ ဇွန်လ ၃၀ ရက် အထိ ရပ်ဆိုင်းထားနိုင်တယ်လို့ ပြောခဲ့တာဖြစ်ပါတယ်။ရှက်တာဒိုးနက်အသင်းဟာ သူတို့ဆုံးရှုံးသွားခဲ့တဲ့ ဝင်ငွေ တွေကို ကာမိစေဖို့အတွက် အသင်းမှာရှိတဲ့ နိုင်ငံခြားသား ၁၄ ဦးထဲက အချို့ကို ရောင်းချထားဖို့ ရည်ရွယ်ထားတာပါ။
ဆာဂျီပယ်လ်ကင်က “ဖီဖာဆီက တုံ့ပြန်မှုတစ်စုံတစ်ရာမရှိရင်တော့ တရားရုံးတွေဆီကနေ နစ်နာကြေး တောင်းခံ တာကလွဲပြီး ရွေးချယ်စရာမရှိတော့ပါဘူး။ဖီဖာကနေ ယူကရိန်းကလပ်တွေအတွက် ပိုပြီး အဓိပ္ပါယ်ရှိတဲ့ ပံ့ပိုးကူညီ မှုတွေလိုအပ်တယ်လို့ ကျနော်ယုံကြည်ပါတယ်”လို့ ပြောခဲ့ပါတယ်။ ယူကရိန်းထိပ်တန်းလိဂ်ပွဲစဉ်တွေဟာ စစ်ပွဲ ဖြစ်ပွားနေတဲ့အတွက် ဧပြီလ ၂၇ ရက်မှာ ရပ်နားခဲ့တာပါ။
အခုနှစ်ရာသီအတွက် ယူကရိန်းပရီးမီးယားလိဂ်ပြိုင်ပွဲတွေကို သြဂုတ်လ ၂၃ ရက်မှာ ပြန်လည်စတင်မှာဖြစ်ပြီး ပရိသတ်တွေကိုတော့ ဝင်ရောက်ခွင့်ပြုမှာမဟုတ်ဘူးလို့ နိုင်ငံရဲ့ အားကစားဝန်ကြီးက ပြောထားခဲ့ပါတယ်။
Source:BBC
- By CNI
- Category: Watch TV
- Hits: 768
Page 58 of 82
Connect with us
