CNI Sport News

၂၀၂၂ ခုနှစ်၊ စက်တင်ဘာ ၁၀

စပါးအသင်းတိုက်စစ်မှူး ဆွန်ဟောင်မင်က ဂိုးပေါက်ပျောက်ဆုံးနေမှုအပေါ်မှာ စိုးရိမ်မှုမရှိဘဲ ဒီထက်ပိုကောင်းအောင် လုပ်ဖို့ စိတ်ပိုင်းဖြတ်ထားတယ်လို့ ပြောလိုက်ပါတယ်။

ဆွန်ဟောင်မင်က “တိုးတက်မှုတစ်ခုခုရှိလာမယ်လို့ ကျနော်မြင်မိပါတယ်။ဘာကြောင့်လဲဆိုရင် ကျနော့်မှာ တိုးတက်ဖို့အတွက် နေရာတွေအများကြီးကျန်ရှိနေသေးလို့ပါ။အသင်းတစ်သင်းအနေနဲ့ရော တစ်ဦးချင်းအနေနဲ့ပါ ကောင်းမွန်အောင်လုပ်ရမှာပါ။အရေးကြီးဆုံးက ကျနော်တို့ဟာ အသင်းလိုက် ကောင်းမွန်စွာ လုပ်ဆောင်နိုင်ဖို့ပါ။ အသင်းလိုအပ်တဲ့အရာတွေကို ကျနော်လုပ်ဆောင်သွားမယ်”လို့ ပြောခဲ့တာပါ။

ဆွန်ဟောင်မင်ဟာ ပြီးခဲ့တဲ့ရာသီက စပါးအသင်းအတွက် ပရီးမီးယားလိဂ်ပြိုင်ပွဲမှာ ၂၃ ဂိုးသွင်းယူပြီး ဆာလတ်နဲ့ အတူ ဂိုးသွင်းအများဆုံး ရွှေဖိနပ်ဆုကို ပူးတွဲရရှိခဲ့တာ ဖြစ်ပါတယ်။တောင်ကိုရီးယား ကစားသမားဟာ ဒီရာသီမှာ တော့ ဂိုးပေါက်ပျောက်ဆုံးနေပြီး ၇ ပွဲကစားအပြီးမှာ သွင်းဂိုး မရရှိသေးပါဘူး။

ဆွန်ဟောင်မင်က “ရိုးရိုးသားသားပြောရရင် ပွဲမှာ အခွင့်အရေးမရတော့ဘူးဆိုရင် စိုးရိမ်နိုင်ပေမယ့် အခုထိ အခွင့်အရေးတွေက ရတုန်းပါ။တချိုပွဲတွေမှာ ကံမကောင်းခဲ့သလို၊ တချို့ပွဲတွေမှာတော့ အဆုံးသတ်ပိုင်း ဆိုးရွားခဲ့ပါတယ်။တချို့ပွဲတွေမှာဆို အခွင့်အရေးကြီးကြီးမားရပေမယ့် ဂိုးမဝင်တာကြောင့် စိတ်ပျက်တာတွေ လည်း ရှိခဲ့ပါတယ်။ဒါပေမယ့် ကျနော်မစိုးရိမ်ပါဘူး။ဘာဖြစ်လို့လဲဆိုရင် အသင်း၊ဝန်ထမ်းတွေနဲ့ ပရိသတ်တွေက ကျနော့်ကိုကူညီနေတာကြောင့်ပါ။တစ်ဂိုးသွင်းလိုက်ပြီဆိုရင် ယုံကြည်မှုတွေပြန်ပြီးတော့ ရမှာပါ။အဲဒါကနေ ရှေ့ဆက်ဂိုးတွေသွင်းနိုင်တော့မှာပါ”လို့ ပြောခဲ့ပါတယ်။

စပါးအသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် မန်စီးတီးနဲ့ ကစားဖို့ ရှိခဲ့ပေမယ့် ဘုရင်မကြီး အယ်လိဇဘတ် II ကွယ်လွန်ခဲ့တာကြောင့် ပွဲစဉ်တွေကို ရွှေ့ဆိုင်းခဲ့ရတာပါ။လန်ဒန်ကလပ်ဟာ ပရီးမီးယားလိဂ် ၆ ပွဲကစားအပြီးမှာ ၄ ပွဲနိုင် ၂ ပွဲသရေ ရမှတ် ၁၄ မှတ်နဲ့ အမှတ်ပေးဇယား တတိယနေရာမှာ ရပ်တည်နေတာ ဖြစ်ပါတယ်။စပါးအသင်းဟာ ကြားရက်က ကစားခဲ့တဲ့ ချန်ပီယံလိဂ်ပွဲစဉ်မှာ မာဆေးလ်အသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာပါ။

စပါးအသင်းဟာ အခုလာမယ့်အပတ်မှာ ချန်ပီယံလိဂ်ပွဲစဉ်အဖြစ် စပို့တင်းလစ္စဘွန်းအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Daily Mail

CNI Sport News

၂၀၂၂ ခုနှစ်၊ စက်တင်ဘာ ၈

ရုရှားအမျိုးသားဘောလုံးအသင်းဟာ အီရန်၊ ကာဂျစ္စတန်တို့နဲ့ ခြေစမ်းပွဲကစားမယ်လို့ ကြေညာလိုက်ပြီး ဒီပွဲတွေကို တီဟီရန်မှာ ကျင်းပသွားဖွယ်ရှိတယ်လို့ သတင်းတွေအရ သိရပါတယ်။

ရုရှားဘောလုံးနဲ့ သက်ဆိုင်တဲ့အသင်းတွေဟာ ယူကရိန်းမှာ မော်စကိုစစ်ဆင်ရေး စတင်လုပ်ဆောင်ပြီး နောက် ယူအီးအက်ဖ်အေနဲ့ ဖီဖာက ကျင်းပတဲ့ ပြိုင်ပွဲတွေမှာ ပါဝင်ယှဉ်ပြိုင်ခွင့် ပိတ်ပင်ခြင်းခံထားရ တာပါ။ဒီလို ပိတ်ပင်မှုကြောင့် ရုရှားလက်ရွေးစင်အမျိုးသားဘောလုံးအသင်းဟာ ၂၀၂၂ ကမ္ဘာ့ဖလား ခြေစစ်ပွဲ ပလေးအောဖ့် ပွဲစဉ်ယှဉ်ပြိုင်ခွင့် မရခဲ့ပါဘူး။ဒါပေမယ့် သူတို့ဟာ ခြေစမ်းပွဲတော့ ယှဉ်ပြိုင်ခွင့် ရတာ ဖြစ်ပါတယ်။

ရုရှားအသင်းဟာ ကမ္ဘာ့ဖလားပြိုင်ပွဲမှာ အင်္ဂလန်၊ အမေရိကန်၊ ဝေးလ်စ်တို့နဲ့ တစ်အုပ်စုတည်း ကျရောက် နေတဲ့ အီရန်အသင်းနဲ့ ခြေစမ်းပွဲကစားဖို့ စီစဉ်ထားတာပါ။အီရန်အသင်းဟာ အိမ်ရှင်အဖြစ် နိုဝင်ဘာလ ၁၅ ရက်မှာ ရုရှားအသင်းနဲ့ ယှဉ်ပြိုင်ကစားဖို့ သတ်မှတ်ထားပေမယ့် ဘယ်နေရာမှာ ကျင်းပမလဲဆိုတာ တော့ အတည်ပြုရခြင်း မရှိသေးပါဘူး။ဒါပေမယ့် Match TV ရဲ့ ဖော်ပြမှုအရ တီဟီရန်မှာ ကျင်းပဖွယ်ရှိ တယ်လို့ သိရပါတယ်။

ကာဂျစ္စတန်နဲ့ ပွဲကိုတော့ စက်တင်ဘာလ ၂၄ ရက်မှာ ကျင်းပဖို့ သတ်မှတ်ထားတာဖြစ်ပြီး ဒီပွဲဟာ နှစ်သင်းကြား ပထမဆုံးတွေ့ဆုံမယ့် ပွဲလည်းဖြစ်ပါတယ်။

ရုရှားဟာ နိုဝင်ဘာလထဲမှာ တတိယမြောက် ခြေစမ်းပွဲကစားဖို့ ပစ်မှတ်ထားနေပြီး အသေးစိတ်အချက်အလက်တွေကို အတည်မပြုနိုင်ပေမယ့် ဘော့စနီးယားအသင်း ဖြစ်တယ်လို့ ရုရှားနိုင်ငံရဲ့ သတင်းတွေမှာ ဖော်ပြထားတာပါ။ရုရှားအသင်းဟာ ခရိုအေးရှားအသင်းကို အရေးနိမ့်ခဲ့တဲ့ ပြီးခဲ့တဲ့နှစ် နိုဝင်ဘာလကတည်းက ဘောလုံးပြိုင်ပွဲတွေ ယှဉ်ပြိုင် ကစားခြင်း မရှိခဲ့တာ ဖြစ်ပါတယ်။

ရုရှားအသင်းဟာ ကာဂျစ္စတန်နဲ့ ခြေစမ်းပွဲအတွက် ကစားသမား ၃၅ ဦးနဲ့ လေ့ကျင့်မှုတွေ ပြုလုပ် နေတာပါ။ ရုရှားနည်းပြ ကာပင်က “အီရန်ဟာ ကမ္ဘာ့ဖလားမှာ ပါဝင်ခွင့်ရတဲ့အသင်းဖြစ်ပြီး အဆင့် သတ်မှတ်ချက်ကောင်းပါတယ်။ပွဲကျင်းပမယ့် ရက်စွဲကတော့ မေးခွန်းထုတ်စရာတွေရှိနေပါတယ်။ အီရန်ဟာ နိုဝင်ဘာ ၂၁ ရက်မှာ ကမ္ဘာ့ဖလားအဖွင့်ပွဲစဉ်အဖြစ် အင်္ဂလန်နဲ့ ကစားရမှာပါ။ ညှိနှိုင်းမှုတွေ တော့ ပြုလုပ်နေဆဲပဲ”လို့ ပြောခဲ့ပါတယ်။

ရုရှားဟာ ဖီဖာရဲ့ ကမ္ဘာ့အဆင့်သတ်မှတ်ချက် ၃၅ နေရာမှာရှိနေပြီး၊ အီရန်က ကမ္ဘာ့အဆင့် ၂၂ နဲ့ ကာဂျစ္စတန်အသင်းက ကမ္ဘာ့အဆင့် ၉၅ နေရာမှာ ရပ်တည်နေတာဖြစ်ပါတယ်။

Source:အာရ်တီ

CNI Sport News

၂၀၂၂ ခုနှစ်၊ စက်တင်ဘာ ၇

ရီးရယ်လ်အသင်းတိုက်စစ်ကစားသမား ဟာဇတ်ဟာ ဆဲလ်တစ်အသင်းကို အနိုင်ရခဲ့တဲ့ ချန်ပီယံလိဂ် အုပ်စုအဖွင့်ပွဲစဉ်မှာ ၂၀၂၀ နောက်ပိုင်း၂ နှစ်ကျော်အကြာမှ ပထမဆုံးချန်ပီယံလိဂ် သွင်းဂိုးကို ရယူ နိုင်ခဲ့တာဖြစ်ပါတယ်။

ဒီပွဲမှာ ရီးရယ်လ်အသင်းက ဆဲလ်တစ်အသင်းကို ၃ ဂိုး- ဂိုးမရှိနဲ့ အနိုင်ရရှိခဲ့တာပါ။ ရီးရယ်လ်အတွက်ဂိုး တွေကို ဗီနီစီးယက်စ်၊ မိုဒရစ်နဲ့ ဟာဇတ်တို့က သွင်းယူခဲ့တာဖြစ်ပါတယ်။

ဟာဇတ်ဟာ ဒီပွဲစဉ်ရဲ့ ပွဲချိန် မိနစ် ၃၀ မှာ ဘန်ဇီမာဒဏ်ရာ ရသွားခဲ့လို့ လူစားဝင်ကစားသမားအဖြစ် ပါဝင်ခဲ့ရတာပါ။ဒါပေမယ့် ဘယ်လ်ဂျီယံအသင်းခေါင်းဆောင်ဟာ ဒီပွဲမှာ ခြေစွမ်းပြသခဲ့ပြီး ၁ ဂိုးသွင်းယူခဲ့သလို အသင်းဖော် မိုဒရစ်သွင်းယူခဲ့တဲ့ ဂိုးကိုလည်း ဖန်တီးပေးခဲ့တာပါ။

ရီးရယ်လ်အသင်းနည်းပြ အန်ဆယ်လော့တီက ဟာဇတ် အလွန်ပျော်ရွှင်နေတာကို မြင်တွေ့ခဲ့ရတယ်လို့ ပွဲအပြီးမှာ ပြောခဲ့ပါတယ်။အန်ဆယ်လော့တီက “ ကျနော်သူ့ကို လူစားထည့်သွင်းလိုက်ချိန်မှာ ဟာဇတ်ရဲ့ အခိုက်အတန့်ပဲလို့ ကျနော်ထင်ခဲ့ပါတယ်။သူကလည်း ကျနော်မှန်တယ်ဆိုတာကို သက်သေပြသနိုင်ခဲ့ ပါတယ်။သူ အခုအလွန်ပျော်ရွှင်နေပါတယ်။

ဒီလိုပုံစံအတိုင်းပဲ သူဆက်ရှိဖို့ ကျနော်မျှော်လင့်ပါတယ်”လို့ ပွဲအပြီးမှာ သတင်းထောက်တွေကို ပြောခဲ့တာပါ။

ဟာဇတ်ဟာ ရီးရယ်လ်အသင်းကို ၂၀၁၉ က ချယ်လ်ဆီးကနေ ရောက်ရှိလာခဲ့တာဖြစ်ပြီး ကစားသမား ဟာ စပိန်ကလပ်ကို ရောက်ရှိလာကတည်းက ဒဏ်ရာတွေနဲ့ လုံးပန်းခဲ့ရတာဖြစ်ပါတယ်။ သူဟာ ဒီလို အခြေအနေတွေကြောင့် ရီးရယ်လ်အသင်းအတွက် ပွဲစဉ်ပေါင်း ၆၉ ပွဲသာ ပါဝင်ကစားထားနိုင်ခဲ့ပြီး သွင်းဂိုးကလည်း အခုသွင်းဂိုး အပါမှ ၇ ဂိုးသာ ရရှိထားတာပါ။

ဟာဇတ်ဟာ ဒီရာသီမှာတော့ ကြံ့ခိုင်မှုအပြည့်နဲ့ အသင်းအတွက် ပါဝင်ကစားနိုင်ဖို့ ပစ်မှတ်ထားနေတာ ဖြစ်ပါတယ်။ချယ်လ်ဆီးကစားသမားဟောင်းဟာ ဆဲလ်တစ်နဲ့ပွဲမှာ သွင်းယူခဲ့တဲ့ဂိုးကြောင့် သူ့ရဲ့ ကလပ်နဲ့ နိုင်ငံအသင်းကစားသမားဘ၀ သွင်းဂိုး ၂၀၀ ပြည့်မြောက်သွားခဲ့တာပါ။ရီးရယ်လ်အသင်းဟာ အခုအပတ် မှာ စပိန်လာလီဂါပွဲစဉ်အဖြစ် မာယော့ကာအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:DailyMail

CNI Sport BREAKING NEWS

၂၀၂၂ ခုနှစ်၊ စက်တင်ဘာ ၇

ချယ်လ်ဆီးအသင်းဟာ ဒိုင်နမိုဇာဂရက်အသင်းကို ချန်ပီယံလိဂ် အဖွင့်ပွဲစဉ်မှာ အရေးနိမ့်ပြီးနောက် နည်းပြ တူချယ်လ်ကို ရာထူးကနေ ထုတ်ပယ်လိုက်ပြီ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ စက်တင်ဘာ ၆

ပြင်သစ်လီဂူးဝမ်းပွဲစဉ်မှာ ပင်နယ်တီ ကန်သွင်းမှုနဲ့ ပတ်သက်ပြီး အငြင်းအခုံ ဖြစ်ခဲ့ပေမယ့် နေမာနဲ့ ကောင်းမွန်တဲ့ ဆက်ဆံရေးရှိတယ်လို့ ဘတ်ပီက ပြောပါတယ်။

ဘတ်ပီက “ ကျနော်တို့ရဲ့ ဆက်ဆံရေးက အမြဲတမ်း ဒီလိုပါပဲ။ အနည်းငယ် နွေးထွေးတဲ့ အခိုက်အတန့်တွေရှိသလို အေးတိအေးစက်ဖြစ်တဲ့ အချိန်တွေလည်း ရှိပါတယ်။ တစ်ခါတလေမှာ ကျနော်တို့ဟာ အခင်ဆုံး သူငယ်ချင်းတွေ ဖြစ်ပြီး တချို့အချိန်တွေမှာဆို စကားပြောနည်းကြပါတယ်။ ဒါပေမယ့် အမြဲတမ်းတော့ လေးစားမှုရှိပါတယ်။ အသင်းမှာ ဒီလို ကစားသမားတွေ ရှိရင်တော့ ပြဿနာဖြစ်တက်ပါတယ်။ ဒါပေမယ့် ကျနော်တို့ တစ်ယောက်နဲ့ တစ်ယောက် အမြဲတမ်းလေးစား မှုရှိပါတယ်”လို့ ပြောပါတယ်။

နေမာနဲ့ ဘတ်ပီတို့ဟာ မောင့်ပယ်လီယာကို အနိုင်ရခဲ့တဲ့ ပြင်သစ်လီဂူးဝမ်းပွဲစဉ်မှာ ပင်နယ်တီ ကန်သွင်းမှုနဲ့ ပတ်သက်ပြီး အငြင်းအခုံ ဖြစ်ခဲ့ကြပါတယ်။

ပင်နယ်တီ ကန်ဖို့ လုနေကြတဲ့ နေမာနဲ့ဘတ်ပီ

ဘတ်ပီဟာ ဒီပွဲမှာ ပီအက်စ်ဂျီအသင်း ပထမဆုံးပင်နယ်တီ ကန်သွင်းမှုရခဲ့တာကို ကန်သွင်းတာမှာ လွဲချော်သွားခဲ့ တာပါ။ နောက်ထပ်တစ်ကြိမ် ပင်နယ်တီ ကန်သွင်းခွင့်ရတဲ့အချိန်မှာ ဘတ်ပီက ကန်သွင်းချင်ခဲ့ပေမယ့် နေမာက ကန်သွင်းသွားခဲ့တာ ဖြစ်ပါတယ်။ ဒါနဲ့ ပတ်သက်ပြီး အဆင်မပြေမှုတွေ ရှိခဲ့ကြတာပါ။

နောက်ပိုင်းပွဲတွေမှာတော့ ၂ ဦးသား ပြန်အဆင်ပြေ သွားခဲ့ကြပြီး လီဂူးဝမ်းပြိုင်ပွဲမှာ ၇ ဂိုးစီ သွင်းယူထားကာ ဂိုး သွင်း အများဆုံး ကစားသမားတွေအဖြစ် ထိပ်ဆုံးမှာ ဦးဆောင်နေခဲ့ပါတယ်။ မက်ဆီကလည်း သူတို့ ၂ ဦး ဂိုးသွင်း ယူမှုတွေ ပြုလုပ်နိုင်အောင် ဂိုးဖန်တီးမှု ၆ ကြိမ် ပြုလုပ်ထား နိုင်ခဲ့တာပါ။

ပီအက်စ်ဂျီအသင်းဟာ ဒီရာသီ လီဂူးဝမ်း ၆ ပွဲကစားအပြီးမှာ ၂၄ ဂိုး သွင်းယူထားကာ ဂိုးသွင်းစွမ်းရည်ကို ပြသထား တာ ဖြစ်ပါတယ်။

ပီအက်စ်ဂျီအသင်းဟာ ဒီရာသီမှာ ချန်ပီယံလိဂ် အပါအဝင် ဆုဖလားအားလုံးကို ရယူနိုင်ဖို့ ပစ်မှတ်ထားနေတာ ဖြစ်ပြီး ပိုချက်တီနိုကို ထုတ်ပယ်ကာ ဂယ်လ်တီယာကို နည်းပြသစ်အဖြစ် ခန့်အပ်ခဲ့တာပါ။

ချန်ပီယံလိဂ်အုပ်စု အဖွင့်ပွဲစဉ်အဖြစ် ဂျူဗင်တပ်စ်အသင်းနဲ့ ကစားခဲ့တဲ့ ပီအက်စ်ဂျီအသင်းဟာ ဒီတစ်ပတ်မှာ လီဂူးဝမ်းပွဲစဉ်အဖြစ် ဘရက်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA