CNI News

၂၀၂၂ ခုနှစ်၊ ဇွန်လ ၁၄

ရခိုင်ပြည် လွတ်မြောက်ရေးပါတီ (ALP)သည် အစိုးရမဟုတ်သော အဖွဲ့အစည်း (NGO) ဆန်သည့် အဖွဲ့အစည်း ပုံစံမျိုး ဖြစ်နေ သည်ဟု နိုင်ငံရေးအကျဉ်းသားဟောင်း စာရေးဆရာ ဝေဟင်အောင်က CNI သတင်းဌာနသို့ ပြောသည်။

လက်ရှိမှာ ALP သည် နစကနှင့် ငြိမ်းချမ်းရေး တွေ့ဆုံဆွေးနွေးနေပြီး ဒေသဖွံ့ဖြိုးရေးများ ဆွေးနွေးခဲ့ကြောင်း၊ တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ထိုးပြီးနောက် ဖက်ဒရယ်ဘက်ကို ယိမ်းသွားကြောင်း ၎င်းက ပြောသည်။

ဦးဝေဟင်အောင်က “သူတို့အဖွဲ့က လက်ရှိ လက်နက်ကိုင်အဖွဲ့ဆိုတာထက် ဘယ်လိုပြောမလဲဆိုရင် နောက်ပိုင်းမှာ NGO ဆန်တဲ့ အဖွဲ့အစည်းပုံစံမျိုး တစ်ခုဖြစ်သွားတယ်ပေါ့။ အရင်တုန်းကဆိုရင် အရှေ့မှာ ချခဲ့တဲ့ ALP ရဲ့ မူဝါဒက ရခိုင်ပြည် လွတ်မြောက်ရေးဆိုတာ အဓိကပေါ့။ အခု လွတ်မြောက်ရေးကနေ သူတို့ ဘာဖြစ်သွားလဲဆိုရင် NCA ကို ဝင်လိုက်တဲ့ အချိန်မှာ သူတို့က ဒီဖက်ဒရယ် ဘက်ကို နည်းနည်းလေး ယိမ်းသွားတယ်၊ အခုနောက်ပိုင်း မနေ့က သတင်းတွေမှာ လိုက်ကြည့်ရ သလောက်ဆိုရင် သူတို့ ဆွေးနွေးခဲ့တာကြည့်ရင် ဒေသဖွံ့ဖြိုးရေးလောက်ကိုပဲ သူတို့ ဆွေးနွေးခဲ့တယ်၊ အမှန်လည်း သူတို့ ဆွေးနွေးနိုင်တဲ့ဘောင်က အဲဒီလောက်ပဲ ရှိတယ်ပေါ့လေ၊ ဖွံ့ဖြိုးရေး ဘောင်လောက်ပဲ ရှိတယ်၊ ဘာဖြစ်လို့လဲဆိုရင် လက်ရှိ မြေပြင် အခင်းအကျင်းအရဆိုရင် မြေပြင်မှာ စိုးမိုးထားတာက ULA/AA က ရခိုင်ပြည်ရဲ့ နေရာအများစုကို သူတို့ စိုးမိုးထား တယ်။ အဲဒီမှာ ALP အနေနဲ့ဆိုရင် အင်အားအားဖြင့် သော်လည်းကောင်း၊ မြေပြင်အရသော်လည်းကောင်း သူတို့က သတ် သတ် မှတ်မှတ် မရှိဘူး။ ဆိုတော့ သူတို့အနေနဲ့ အများဆုံး ပြောနိုင်တာက ဒေသဖွံ့ဖြိုးရေးလောက်ပဲ သူတို့ ပြောနိုင်တဲ့ အတိုင်းအတာပဲ ရှိတာပေါ့” ဟု CNI သတင်းဌာနသို့ ပြောသည်။

ALP အနေဖြင့် NGO အဖွဲ့အစည်းမျိုး သွားနေခြင်း မဟုတ်ကြောင်း၊ နိုင်ငံရေးပြဿနာကို နိုင်ငံရေးနည်းလမ်းဖြင့် စားပွဲဝိုင်း တွင် ဖြေရှင်းရမည်ဖြစ်ကြောင်း ALP မှ တွဲဖက်အထွေထွေအတွင်းရေးမှူး ခိုင်အောင်စိုးသန်းက CNI သတင်းဌာနသို့ ပြော သည်။

ဦးခိုင်ရဲခိုင်နှင့် ALP အဖွဲ့ဝင်များ

ခိုင်အောင်စိုးသန်းက “ဒါတော့ သူတို့ အမြင်ရှိမှာပေါ့။ ကျနော်တို့ကတော့ ကျနော်တို့ အဖွဲ့အစည်းက နှစ်ပေါင်း ၅၀ ကျော်၊ ၆၀ နီးပါးလောက် ကျနော်တို့ တိုက်ပွဲဝင်လာတာ၊ အဲဒါတော့ NGO ပုံစံမျိုး ကျနော်တို့ လုပ်စားတဲ့ဟာ မဟုတ်ပါဘူး၊ ဘာဖြစ်လို့လဲ ဆိုတော့ ကျနော်တို့က နိုင်ငံရေးနဲ့ကို စစ်ပွဲဖြစ်လာတာလည်း ကျနော်တို့က များနေပြီ၊ စစ်ပွဲကြီးပဲ သူလည်းမနိုင်၊ ကိုယ်လည်း မနိုင် အဲဒါကြောင့် ကျနော်တို့ NCA ထိုးတာလည်း အဲဒါပဲ၊ တစ်ပြိုင်နက် တစ်ဖက်က တိုက်ပွဲဖြစ်နေလို့ ကျနော်တို့ အဖြေရှာလို့ မရဘူး။ အဲဒါကြောင့် ကျနော်တို့ နိုင်ငံရေးပြဿနာကို နိုင်ငံရေးနည်းလမ်းပဲ ကျနော်တို့က စားပွဲဝိုင်းမှာပဲ ဖြေရှင်းရမယ်ဆိုတဲ့ အမြင်နဲ့ပဲ ကျနော်တို့ သွားနေတာဆိုတော့ အခု NGO လုပ်တယ်၊ ဟိုဟာ၊ ဒီဟာဆိုတာ အဲဒါတော့ မဟုတ်ပါဘူး။ ကျနော်တို့က တော့ နိုင်ငံရေး၊ တော်လှန်ရေးကို ကျနော်တို့ ဆက်ပြီးသွားနေတာ ကျနော်တို့ ၊ အခု စစ်ကောင်စီနဲ့လည်း ကျနော်တို့ မိတ်ဖွဲ့ တာလည်း မဟုတ်ဘူး။ ကျ‌နော်တို့ ဘာမှမဟုတ်ဘူး။ ကျနော်တို့ကနေပြီးတော့ နိုင်ငံရေးကို နိုင်ငံရေးနည်းလမ်းဖြင့် ကျနော်တို့ ငြိမ်းငြိမ်းချမ်းချမ်း ဖြေရှင်းမယ်ဆိုတဲ့ အဲဒီအတိုင်းပါပဲ”ဟု ပြောသည်။

ALP အနေဖြင့် ရခိုင်ပြည်အတွင်းက တိုက်ပွဲရှောင်များ နေရပ်ပြန်နိုင်ရေး၊ ဒေသတွင်း ဖွံ့ဖြိုးရေး၊ တိုက်ပွဲကြားတွင် အရပ်သား ပြည်သူများကို အကာအကွယ် ပေးနိုင်ရေးများကို ဆွေးနွေးသွားမည်ဖြစ်ကြောင်း ၎င်းက ပြောသည်။

တော်လှန်ရေးတွင် သက်တမ်းကြာလာပြီး အောင်မြင်မှု မဖော်ဆောင်နိုင်သည့် အဖွဲ့အစည်းများသည် အခြားသော ပုံစံများကို ပြောင်းလဲ လုပ်ဆောင်နေရကြောင်း ရခိုင်တိုင်းရင်းသားကွန်ဂရက်မှ အတွင်းရေးမှူး ကိုဇော်ဇော်ထွန်းက CNI သတင်းဌာနသို့ ပြောသည်။

ဒေါ်စောမြရာဇာလင်းနဲ့ ရခိုင်တိုင်းရင်းသူ/သားများကို ၂၀၂၂ ခုနှစ်၊ ဇွန်လ ၁၂ ရက် တွေ့ရစဉ်

ကိုဇော်ဇော်ထွန်းက “ဒါကလည်း ALP မှ မဟုတ်ဘူးပေါ့လေ။ တော်လှန်ရေးမှာ သက်တမ်းကြာလာပြီးတော့မှ အောင်မြင်မှုကို မဖော်ဆောင်ပေးနိုင်တဲ့ အဖွဲ့ကတော့ ဒီလိုပုံစံ တစ်မျိုးမျိုးသော ရလာပေးတယ်လေ။ သူတို့လည်း သူတို့ ရေရှည်ရပ်တည်ရေး အတွက်ကို ရုန်းကန်ရတာပေါ့။ အဲဒီအခါမှာ ရုန်းကန်တဲ့အခါမှာ ပုံစံအမျိုးမျိုးတော့ ရှိမှာပေါ့။ ရွေးချယ်တဲ့ နည်းလမ်းတွေ အမျိုးမျိုး ရှိမှာပေါ့။ အဲဒီတော့ သူတို့ အခု ရွေးလိုက်တဲ့ ပုံစံကတော့ NGO ပုံစံမျိုး အတိအကျ ပြောဖို့တော့ ခက်‌တာပေါ့လေ၊ ကျနော်တို့ မသိနိုင်တဲ့ တခြားသော လုပ်ဆောင်ချက်တွေလည်း ရှိကောင်းရှိမှာပေါ့။ ဒါပေမဲ့ အများအမြင်ကတော့ အဲဒီပုံစံ အတိုင်း မြင်နေကြတာကတော့ အမှန်တကယ်ပါပဲ” ဟု ပြောသည်။

ရခိုင်ပြည်လွတ်မြောက်ရေးပါတီ(ALP)သည် ပြည်နယ်-ပြည်ထောင်စုအဆင့် ပဏာမ အပစ်အခတ်ရပ်စဲရေး(Bilateral) အပြင် တစ်နိုင်ငံလုံး အပစ်အခတ်တိုက်ခိုက်မှု ရပ်စဲရေး သဘောတူစာချုပ်(NCA) လက်မှတ် ရေးထိုးထားသည့် ရခိုင်လက်နက်ကိုင် အဖွဲ့ ဖြစ်သည်။

ALP ကို ၁၉၆၇ ခုနှစ်တွင် ခိုင်မိုးလင်း ဦးဆောင်၍ ဖွဲ့စည်းခဲ့ပြီး ၁၉၇၄ ခုနှစ်မှာတော့ ရခိုင်ပြည်လွတ်မြောက်ရေးတပ်မတော် (ALA)ကို ဖွဲ့စည်းခဲ့သည်။ ထို့နောက် အမျိုးသားဒီမိုကရေစီတပ်ပေါင်းစု(NDF)၊ ပြည်ထောင်စုတိုင်းရင်းသားလူမျိုးများဒီမိုကရေ စီ တပ်ပေါင်းစု(UNLD)၊ တစ်နိုင်ငံလုံးအပစ်အခတ်ရပ်စဲရေးဆိုင်ရာညှိနှိုင်းရေးအဖွဲ့(NCCT)၊ ညီညွတ်သောတိုင်းရင်းသားလူမျိုး များ ဖက်ဒရယ်ကောင်စီ(UNFC)၊ ငြိမ်းချမ်းရေးလုပ်ငန်းစဉ်ဦးဆောင်အဖွဲ့(PPST) စသည့် မဟာမိတ်များတွင် အဖွဲ့ဝင် အဖြစ် ပါဝင်လှုပ်ရှားခဲ့သည်။

လက်ရှိတွင် ALP ကို ဦးခိုင်ရဲခိုင်က ဥက္ကဋ္ဌအဖြစ်လည်းကောင်း၊ ဒေါ်စောမြရာဇာလင်းက ဒုဥက္ကဋ္ဌအဖြစ်လည်းကောင်း တာဝန်ယူ၍ ရခိုင်နိုင်ငံရေးကို ဆောင်ရွက်နေကြောင်း သိရသည်။

CNI News

၂၀၂၂ ခုနှစ်၊ ဇွန်လ ၁၃

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် ရခိုင်ပြည်လွတ်မြောက်ရေးပါတီ(ALP)ဒုဥက္ကဋ္ဌ ဒေါ်စောမြရာဇာလင်း ဦးဆောင်သည့် ကိုယ်စားလှယ်အဖွဲ့တို့ ယနေ့ (ဇွန်လ ၁၃ ရက်)နေပြည်တော်မှာ တွေ့ဆုံ၍ ငြိမ်းချမ်းရေး လုပ်ငန်းစဉ်များ ကို ဆွေးနွေးခဲ့ကြသည်။

ထို့နောက် ဒုဗိုလ်ချုပ်ကြီးရာပြည့် ဦးဆောင်သည့် နစက အဖွဲ့ဝင်များဖြစ် ဖွဲ့စည်းထားသည့် ငြိမ်းချမ်းရေးဆွေးနွေးရေး အဖွဲ့နှင့် ဒေါ်စောမြရာဇာလင်းတို့ ဆက်လက်၍ အသေးစိတ်ကို ဆွေးနွေးကြမည် ဖြစ်သည်။

နစကသည် ငြိမ်းချမ်းရေး ဆွေးနွေးရန် တိုင်းရင်းသား လက်နက်ကိုင်အဖွဲ့များကို ဖိတ်ခေါ်ထားသလို တိုင်းရင်းသား လက်နက် ကိုင်အဖွဲ့ ခေါင်းဆောင်များအား ကိုယ်တိုင် တွေ့ဆုံ ဆွေးနွေးမည်ဟု ဧပြီ ၂၂ ရက်က ဗိုလ်ချုပ်မှူးကြီး မင်းအောင်လှိုင်က ပြော ခဲ့သည်။

ထို့နောက် မေလ ၂၀ ရက်မှ ဇွန်လ ၇ ရက်နေ့အတွင်း ရှမ်းပြည်ပြန်လည်ထူထောင်ရေးကောင်စီ (RCSS/SSA)ဥက္ကဋ္ဌ ဗိုလ်ချုပ်ကြီး ယွက်စစ်နှင့်လည်းကောင်း၊ မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့်လည်းကောင်း၊ ကရင် အမျိုးသား အစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC)ဥက္ကဋ္ဌ ဦးစောထော့လေး နှင့်လည်းကောင်း၊ “ဝ”ပြည်သွေးစည်းညီညွတ်ရေးတပ်မတော်(UWSA)ဒုဥက္ကဋ္ဌ ဦးလော့ယာကုနှင့် လည်းကောင်း၊ အမျိုးသား ဒီမိုကရေစီမဟာမိတ်တပ်မတော်(NDAA)ဒုဥက္ကဋ္ဌ ဦးစံပေ့နှင့်လည်းကောင်း အသီးသီး တွေ့ ဆုံ ဆွေးနွေးထားပြီး ဖြစ်သည်။

CNI News

၂၀၂၂ ခုနှစ်၊ ဇွန်လ ၁၃

ထိုင်းနိုင်ငံသားတစ်ဦး အသတ်ခံရမှုကြောင့် ဖမ်းဆီးထိန်းသိမ်းခံထားရသည့် သံသယရှိသူ ရခိုင် ၉ ဦးအပါအဝင် မြန်မာအလုပ်သမား ၃၀၀ ကျော်အတွက် အကူအညီများလိုအပ်နေကြောင်း လိုက်ပါကူညီပေးနေသည့် သူများထံက သိရသည်။

အဆိုပါ မြန်မာ ၃၀၀ ကျော်အား နေရာ ၇ နေရာတွင် ဖမ်းဆီးထားကာ ထမင်းနှင့်ဟင်းအပါအဝင် ဆေးဝါး၊ အဝတ် အထည်၊ ရေသန့် စသည်တို့အား နေ့စဉ် ပေးပို့နေရခြင်းဖြစ်ပြီး တစ်ရက်လျှင် ပျမ်းမျှ ဘတ်ငွေ တစ်သောင်းမှ နှစ်သောင်း (မြန်မာငွေ ၁၀ သိန်း) နီးပါးခန့် ကုန်ကျကြောင်း MWRN မှ မြန်မာအလုပ်သမားတာဝန်ခံ ကိုသိန်းထွန်း က CNI သတင်းဌာနသို့ ပြောသည်။

“သက်ဆိုင်ရာဌာန ရဲစခန်းအသီးသီးကနေပြီးတော့ ထမင်း‌မ‌ကျွေးတာ မဟုတ်ဘူး ကျွေးတယ်။ ဒါပေမယ့် သူတို့ ကျွေးတဲ့ ထမင်းက ထမင်းဘူးက သေးသေးလေး၊ ကျနော်တို့ ယူလာတာက ထမင်းဘူးက အကြီးကြီး။ နောက်ပြီး တော့ ကိုယ်ကိုယ်တိုင်ချက်ပြုတ်တာဆိုတော့လေ အပြည့်ထည့်တာပေါ့။ သူတို့မှာက ထမင်းဘူးက သေးသေးလေး ဆိုတော့ ထမင်းက နည်းနည်းလောက်ပဲပါတယ်။ နောက်ပြီး ဟင်းက နည်းနည်းလောက်ပဲ။ အဲဒါဆိုတော့ ကျနော်တို့လူမျိုးတွေက မလောက်ဘူး။ တစ်နေရာတည်း မဟုတ်ဘူးလေ။ နေရာက ၇ နေရာ ဖြစ်သွားတယ် ဆိုတော့လေ။ ထမင်းကျွေးတဲ့အဖွဲ့က ၄ဖွဲ့လောက် ခွဲပြီးတော့ ရက်သတ်မှတ်ပြီးတော့ ကျွေးနေတယ်။ တစ်ရက်မှာ တစ်ကြိမ်လောက်ပဲကျွေးဖြစ်တယ်။ မနက်ဖြန်ကျွေးမယ်ဆိုရင် အလှူငွေတွေက မရောက်သေးဘူးပေါ့လေ။ အလှူငွေက မရောက်သေးဘူးဆိုရင် ရင်းနှီးတဲ့ဆိုင်တွေကနေပြီး စားသောက်ဖွယ်ရာတွေကို အကြွေးယူတာမျိုး ပေါ့။ အလှူအတန်းတွေ ရောက်တဲ့အခါကျမှ ကျနော်တို့ ပြန်ပြီးတော့ ဆပ်ရတာပေါ့။ အဲဒါမျိုးတွေ ကြုံနေရတယ်။ ဒါပေမယ့် ရေရှည်အတွက်တော့ မပြောတတ်ဘူး။ အလှူရှင်တွေပေါ်မှာလည်း မူတည်ပါလိမ့်မယ်” ဟု ပြောသည်။

မြန်မာအလုပ်သမားများ ဖမ်းဆီးထိန်းသိမ်းခံထားရသည့် အချုပ်ခန်းမြင်ကွင်း

ထိုင်း-မလေးရှားနယ်စပ်၊ ထိုင်းဘက်အပိုင် တောထဲတွင် ထိုင်းနိုင်ငံသား အလုပ်သမားတစ်ဦး၏ အလောင်းကို မေလ ၃၁ ရက်က တွေ့ရှိခဲ့သဖြင့် ဇွန်လ ၂ ရက်နေ့မှစတင်ကာ ယခုကဲ့သို့ မလေးရှားသို့ တရားမဝင် ခိုးဝင်မည့် မြန်မာ ၃၀၀ ကျော်သည် ဖမ်းဆီးထိန်းသိမ်းခံထားရခြင်းဖြစ်သည်။

ကိုသိန်းထွန်းက “နယ်စပ်ရေးရာလုံခြုံရေး တပ်စခန်းကို ပို့ထားတဲ့ ၂၀၀ ကျော်ထဲက လူပေါင်း ၆၀၊ ၆၁ ယောက်ကို ဒီ ထိုင်းတောင်ပိုင်းမှာ ဖမ်းဆီးရမိတဲ့ တရားမဝင်ရွှေ့ပြောင်းတွေကို အကုန်လုံးကို ပြစ်ဒဏ်ကျခံပြီးတော့ မြန်မာ ပြည်ပြန်ပို့မယ်ဆိုရင် မြန်မာနိုင်ငံ လ.ဝ.ကနဲ့ ချိတ်ဆက်ပြီးတော့ ဥပမာ မြဝတီလမ်းက ပို့မယ်။ ကော့သောင်းလမ်း၊ ရနောင်းလမ်းက ပို့မယ်ဆိုရင် အဲဒီလိုမျိုး ချိတ်ဆက်ပြီးလုပ်တယ်။ အကုန်လုံး ဖမ်းဆီးရမိပြီး ပြစ်ဒဏ်က ကင်းလွတ်ပြီဆိုရင် အဲဒီတပ်စခန်းကို ပို့ရတယ်။ အဲဒီလုံခြုံရေးတပ်စခန်းကနေပြီး လူပေါင်း ၆၀ ပို့တဲ့အထဲမှာ အခုက လူ ၄၀ လောက်ကို မြဝတီဘက်ကို ပို့လိုက်ပြီလို့ ကြားတယ်။ ဒါပေမယ့် မြဝတီကို ရောက်မရောက်တော့ မသိရသေးဘူး” ဟု ပြောသည်။

အချုပ်ခန်းထဲရှိ မြန်မာအလုပ်သမားများကိုတွေ့ရစဉ်

အဆိုပါဖမ်းဆီးခံထားရသည့် မြန်မာ အလုပ်သမား ၃၀၀ ကျော်ထဲကမှ သံသယဖြစ်သူ ရခိုင် ၉ ဦးအား ထိုင်း သက်ဆိုင်ရာ အာဏာပိုင်များက ၂ ကြိမ်စစ်ဆေးပြီးဖြစ်ကြောင်းနှင့် ထို ၂ ကြိမ်စလုံးတွင် ၎င်းတို့သည် အပြစ်မရှိကြောင်း၊ ၎င်းထိုင်းနိုင်ငံသား သေဆုံးမှုနှင့် မသက်ဆိုင်ကြောင်းသာ ပြောကြားသည်ဟု သိရသည်။

သံသယဖြစ်ခံရသူ ရခိုင် ၉ ဦးကို ထိုင်းနိုင်ငံသားသေဆုံးသည့်အမှုနှင့် လုံးဝမသက်ဆိုင်ကြောင်း စစ်ဆေးတွေ့ရှိမှ သာလျှင် နေရပ်ပြန်ပို့ပေးမည်ဖြစ်ကြောင်း သိရသည်။

အဆိုပါ ဖမ်းဆီးထိန်းသိမ်းခံထားရသည့် မြန်မာ ၃၀၀ ကျော်သည် မလေးရှားသို့ တရားမဝင် သွားရောက် အလုပ် လုပ်ကိုင်ရန်အတွက် ပွဲစားများအား တစ်ဦးလျှင် မြန်မာကျပ်ငွေ ၂၆ သိန်းမှ သိန်း ၃၀ အထိ ပေးခဲ့ကြရခြင်း ဖြစ်သည်။

CNI News

၂၀၂၂ ခုနှစ်၊ ဇွန်လ ၁၃

နစက၏ အကြံအစည်းများကို ဖွင့်ချဖော်ထုတ်ပြီး ၎င်းတို့၏ ထွက်ပေါက်မှန်သမျှကို အခိုင်အမာ ပိတ်ဆို့သွားကြရန် အဖွဲ့အစည်း ၃၃ ဖွဲ့က ပူးပေါင်း၍ ယနေ့ (ဇွန်လ ၁၃ ရက်)ထုတ်ပြန် ခဲ့သည်။

ယနေ့ စစ်အာဏာရှင်စနစ် တိုက်ဖျက်ရေးနှင့် ဖက်ဒရယ် ဒီမိုကရေစီစနစ် ထူထောင်ရေး တိုက်ပွဲဝင် အင်အားစု အသီးသီး၏ ရည်မှန်းချက်သည် စစ်အာဏာရှင်စနစ် အကုန်အစင်ဖျက်သိမ်းရေး၊ ၂၀၀၈ ဖွဲ့စည်းပုံအခြေခံဥပဒေ အပြီးအပိုင် ဖျက်သိမ်း ရေးနှင့် ဖက်ဒရယ်ဒီမိုကရေစီပြည်ထောင်စု တည်ဆောက်ရေးတို့ ဖြစ်သည်ဟု အဆိုပါ ထုတ်ပြန်ချက်တွင် ဖော်ပြထား သည်။

အဖွဲ့အစည်း ၃၃ ဖွဲ့၏ ပူးတွဲထုတ်ပြန်ချက်က “၂၀၂၃ ရွေးကောက်ပွဲသည် စစ်ကောင်စီအဖို့ အထက်ပါ ရည်မှန်းချက် ၃ ရပ်လုံးမှ ရှောင်ထွက်ရန်အတွက် ထွက်ပေါက်ဖြစ်သည်။ ဒီမိုကရေစီ၏ အရွေ့လုံးဝမဟုတ်ဘဲ စစ်အာဏာရှင်စနစ်ကို အသွင်သဏ္ဍာန်ပြောင်းခြင်းမျှသာဖြစ်သည်”ဟု ပြောသည်။

ထို့နောက် ၂၀၂၃ ရွေးကောက်ပွဲကို ၂၀၀၈ ဖွဲ့စည်းပုံ အခြေခံဥပဒေအောက်တွင် ကျင်းပရမည်ပြီး ထိုရွေးကောက်ပွဲကို အသိ အမှတ်ပြုလိုက်ပါက ၂၀၀၈ ဖွဲ့စည်းပုံ အခြေခံဥပဒေအောက် ပြန်ရောက်သွားပြီး စစ်အာဏာရှင်စနစ်ကို ပိုမို ခိုင်မြဲသွားစေ မည်ဟု အထက်ပါ ထုတ်ပြန်ချက်မှာ ဖော်ပြထားသည်။

အဖွဲ့အစည်းများ၏ ထုတ်ပြန်ချက်

နစကဥက္ကဋ္ဌ ဗိုလ်ချုပ်မှူးကြီး မင်းေးအာင်လှိုင်က တစ်နိုင်ငံလုံးတွင် ရွေးကောက်ပွဲ ကျင်းပနိုင်ရန် ပြင်ဆင်နေကြောင်း၊ ရွေး ကောက်ပွဲ မကျင်းပနိုင်ပါက ထိုဒေသရှိ ပြည်သူလူထုများ အခွင့်အရေးဆုံးရှုံးနိုင်ကြောင်း၊ လက်ရှိ ပါတီစုံဒီမိုကရေစီစနစ်ကို လျှောက်လှမ်းနေကြောင်း၊ ပါတီစုံဒီမိုကရေစီစနစ်ကို နည်းလမ်းမှန်မှန်ကန်ကန်ဖြင့် တည်ဆောက်ရန် လိုအပ်ကြောင်း ပြော ထားသည်။

အဖွဲ့အစည်း ၃၃ ဖွဲ့ပူးတွဲထုတ်ပြန်ချက်တွင် “၎င်းတို့ စီစဉ်ထားသည့်အတိုင်း ဖြစ်လာပါက စစ်အုပ်စုအနေဖြင့် စစ်ရေး၊ နိုင်ငံရေး၊ စီးပွားရေး၊ သံတမန်ရေး စသည့် အဖက်ဖက်တွင် အရူးမီးဝိုင်းဖြစ်နေသည့် အခြေအနေမှ တစ်စုံတစ်ရာ ဟန်ထုတ်ပြောပြ၍ ရခိုင်သည့် အနေအထားအသစ်ကို ရရှိသွားမည်”ဟု ပြောသည်။

ထို့ကြောင့် နွေဦးတော်လှန်ရေးအောင်ပွဲကို လူထုအားဖြင့်သာ၊ လူထု၏ နည်းသဏ္ဍာန်ပေါင်းစုံသော တိုက်ပွဲများဖြင့်သာ အရယူနိုင်မည်ဖြစ်သည်ဟု မိမိတို့ အနေဖြင့် အလေးအနက် ယုံကြည်ကြောင်း၊ သို့ဖြစ်ပါ၍ တော်လှန်ရေးအင်အားစု အသီးသီးက နစက၏ အကြံအစည်းများကို ဖွင့်ချဖော်ထုတ်ပြီး ၎င်းတို့၏ ထွက်ပေါက်မှန်သမျှကို အခိုင်အမာ ပိတ်ဆို့ သွားကြရန် အဖွဲ့အစည်းပေါင်း ၃၃ ဖွဲ့က ပူးတွဲ ထုတ်ပြန်ခဲ့သည်။

၂၀၂၀ အထွေထွေရွေးကောက်ပွဲတွင် ဗိုလ်ချုပ်မှူးကြီးမင်းအောင်လှိုင် မဲထည့်နေစဉ်

စင်ကာပူနိုင်ငံတွင် ဇွန်လ ၁၁ ရက်က ကျင်းပသည့် လုံခြုံရေးနှင့် နိုင်ငံတကာရေးရာ ကျွမ်းကျင်သူများ၏ နှစ်ပတ်လည် အစည်းအဝေးတွင် မြန်မာနိုင်ငံဆိုင်ရာ ထိုင်းအထူးကိုယ်စားလှယ် မစ္စပွန်ပီမောကန်ချာနာလက်က နိုင်ငံတကာ အသိုက် အဝန်းသည် ရွေးကောက်ပွဲ ကျင်းပမည်ဟုဆိုသည့် မြန်မာ့တပ်မတော်၏ ကတိကဝတ်များကို အလေးထား နားထောင်ရ မည်ဖြစ် ကြောင်း ပြောကြားခဲ့သည်။

ထို့နောက် မြန်မာနိုင်ငံဆိုင်ရာ ကုလအထူးကိုယ်စားလှယ် မစ္စနိုလင်းဟေဇာကလည်း မြန်မာ့တပ်မတော်၏ ရွေးကောက်ပွဲ သည် အရပ်သား အုပ်ချုပ်ရေးသို့ မှန်မှန်ကန်ကန် ပြန်လည် ပို့ဆောင်ပေးမည်ဖြစ်ကြောင်းနှင့် အများပြည်သူများ၏ သဘော ဆန္ဒကို လေးစားကြောင်း မြန်မာနိုင်ငံသားများအနေဖြင့် ယုံကြည်ခြင်း မရှိခဲ့လျှင် ထိုအချက်သည် ပိုမိုကြီးမားသော အကြမ်းဖက်မှုအတွက် အစပျိုးရာ ရောက်လာနိုင်ကြောင်း ဇွန်လ ၁၁ ရက် မှတ်ချက်ပြုခဲ့သည်။

နစက၏ ၂၀၂၃ ခုနှစ်တွင် ကျင်းပရန် ပြင်ဆင်နေသည့် ရွေးကောက်ပွဲကို ဆန့်ကျင်ရန်နှင့် ထွက်ပေါက်များကို ပိတ်ဆို့ရန် လူ့ဘောင်သစ်ဒီမိုကရက်တစ်ပါတီ(DPNS)၊ အမျိုးသမီးများအဖွဲ့ချုပ်(မြန်မာနိုင်ငံ) – WLB၊ စစ်အာဏာရှင်စနစ် ဆန့်ကျင် ရေး အထွေထွေသပိတ်တပ်ပေါင်းစု(GSC)၊ လူမျိုးပေါင်းစုံ အထွေထွေသပိတ်ကော်မတီ(GSCN)၊ အထွေထွေသပိတ် ပေါင်းစပ် ညှိနှိုင်းရေးအင်အားစု(GSCB) စသည့် အဖွဲ့အစည်းများ အပါအဝင် အဖွဲ့အစည်း ၃၃ ဖွဲ့က တိုက်တွန်းထားသည်။

CNI News

၂၀၂၂ ခုနှစ်၊ ဇွန်လ ၁၃

တပ်မတော်သည် ၎င်းကို ဆန့်ကျင်နေကြသော လက်နက်ကိုင် အဖွဲ့အစည်းများကို အနိုင်ရနိုင်သည့် အနေအထား မရှိကြောင်း အမေရိကန် အကြီးတန်း သံတမန်တစ်ဦး၏ ပြောကြားချက်မှာ အရှိန်ကုန်ခါနီး မီးတောက်တစ်ခုကို မီးထိုးပေးနေခြင်း ဖြစ် သည်ဟု သေနင်္ဂမဟာဗျူဟာ လေ့လာရေးအဖွဲ့မှ ဒါရိုက်တာ ဦးသိန်းထွန်းဦးက CNI သတင်းဌာနကို ပြောသည်။

ဦးသိန်းထွန်းဦးက “အဲဒီပြောတဲ့ အပြောပေါ်မှာ ပြန်သုံးသပ်မယ်ဆိုရင် အထူးသဖြင့် ဒီငြိမ်းချမ်းရေး ဖိတ်ခေါ်ချက် ငြိမ်းချမ်းရေး ဖိတ်ခေါ်ချက်နဲ့ ပြန်ပြီး ယှဉ်တွဲပြီး လေ့လာကြည့်လို့ရတယ်။ ငြိမ်းချမ်းရေးဖိတ်ခေါ် တိုင်းတဲ့ EAO တွေဖက်က အသံထွက်တာက တပ်မတော်ဘက်က ရှုံးနိမ့်နေလို့ စစ်ရေးလှုပ်ရှားမှု မလုပ်နိုင်တော့လို့ ဘာလို့၊ ညာလို့ပေါ့နော် မျိုးစုံပေါ့။ ဒါပေမယ့် တကယ် တမ်း အဲဒီလိုဖြစ်လား ဆိုတော့လည်း မဖြစ်ဘူး။ ဒီမှာက PDF ရဲ့ လှုပ်ရှားမှုဟာ သူတို့မျှော်လင့်တဲ့ စိတ်ခံစားချက်ပေါ့နော်၊ စိတ်ခံစားချက်ပေါ် မှီတည်ထားတဲ့ မျှော်လင့်ချက် အစွန်းစုံ တစ်ခုကနေ သူတို့ပေါက်ကွဲ ထွက်လာတာ။ အဲဒါဟာ ဘယ်လိုမှ ရှေ့ဆက်တိုးလို့လည်း မရဘူး။ ကျနော်တို့လည်း ဒါကို အကြိမ်ပေါင်းများစွာ ထောက်ပြတယ်။ ရှင်းပြတယ်။ ဒါပေမဲ့ အခုချိန်ထိ နိုင်နေတုန်းပဲ ဆိုတဲ့ဟာကတော့ သူတို့ အကောင်းဆုံး မျှော်လင့်ချက်နဲ့ တစ်ဖက်စွန်းကို ရောက်နေတယ်။ အဲဒါကို အမေရိကန် ဖက်က ပြောလိုက်တဲ့ ပြောစကားဟာ တော်တော်လေး မီးထိုးပေးရာ ရောက်တယ်လို့ ကျနော်သုံးသပ်တယ်။ ဆိုလိုတာက တော့ အချိန်ကုန်ခါနီး ငြိမ်းခါနီး မီးတောက်တစ်ခုကို နည်းနည်းလေးများ လှုပ်ရှားမှု ဖြစ်မလားဆိုတော့ သွေးထိုးမြောက်ပင့်တဲ့ Level လောက်လို့ အဲဒီလိုပြောတဲ့ စကားလုံးလို့ သတ်မှတ်ပါတယ်” ဟု ဦးသိန်းထွန်းဦးက ပြောသည်။

NUG ကာကွယ်ရေး၀န်ကြီး ဦးရည်မွန်နဲ့ PDF များ

တပ်မတော်မှ အနိုင်ရရန် မဖြစ်နိုင်ကြောင်း ၎င်းတို့ နယ်မြေများ ဆုံးရှုံးနေကြောင်း၊ တိုက်ပွဲကို အဆုံးသတ်ကာ ဒီမိုကရေစီ လမ်းကြောင်းပေါ် ပြန်သွားသင့်ကြောင်း အမေရိကန် နိုင်ငံခြားရေးဝန်ကြီးဌာနမှ အကြံပေး ဒဲရက်ခ်ချောလက်က ဇွန်လ ၁၁ ရက်က စင်ကာပူနိုင်ငံတွင် ကျင်းပနေသည့် လုံခြုံရေးနှင့် နိုင်ငံတကာရေးရာ ကျွမ်းကျင်သူများ၏ နှစ်ပတ်လည် အစည်းအဝေး တွင် ပြောကြားခဲ့သည်။

နိုင်ငံရေးအကျပ်အတည်းကို အင်အားစုများအားလုံး တွေ့ဆုံဆွေးနွေး ဖြေရှင်းရန် လိုအပ်ကြောင်း၊ အကြမ်းဖက်မှုများကို ရပ်တန့်ရန် လိုအပ်ကြောင်း မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) မှ ရဲဘော်ဆန်နီက CNI သတင်းဌာနကို ပြောသည်။

ရဲဘော်ဆန်နီက “ကျနော်တို့ ဒီနေ့ နိုင်ငံရေး အကျပ်အတည်းကို ဒီနေ့ ဖြစ်တည်နေတဲ့ နိုင်ငံရေး အကျပ်အတည်းကို အင်အား စု အားလုံး တွေ့ဆုံပြီး ဖြေရှင်းနိုင်ဖို့ လိုတယ်လေ။ နောက် အဓိပ္ပာယ်ပြည့်ဝတဲ့ အနှစ်သာရရှိတဲ့ တွေ့ဆုံဆွေးနွေးရေးကို ဖြစ် ပေါ်ဖို့ကို အားလုံး ဝိုင်းဖန်တီးဖို့ လိုမယ်။ တစ်ချိန်တည်းမှာပဲ အကြမ်းဖက်မှု အကုန်လုံးကိုလည်း ရပ်တန့်ဖို့လိုမယ်၊ ဖမ်းဆီး ထားတဲ့ ခေါင်းဆောင်တွေကိုလည်း နိုင်ငံရေး အကျဉ်းသားအားလုံးကို ကျနော်တို့ လွှတ်ပေးဖို့ လိုတယ်။ သေဆုံးသွားကြတဲ့၊ ကျဆုံးသွားကြတဲ့ ရဲဘော်တွေအတွက်ကို လူထုတွေ အတွက်ကို တရားမျှတမှု ရရှိရေးအတွက်ကို ဖန်တီးပေးဖို့ လိုတယ်။ နောက် အင်အားစု အားလုံးပါဝင်တဲ့ အဓိပ္ပာယ်ပြည့်ဝတဲ့ တွေ့ဆုံ ဆွေးနွေးမှုကို သွားကြဖို့ လိုတယ်၊ အခုကတော့ ဒီကနေ့ ဆောင်ရွက် မှုတွေက အရပ်သားများကို အကာအကွယ် ပေးတယ်ဆိုတာထက် အရပ်သားများကို အကြီးအကျယ် ဒုက္ခပေးစေတဲ့ လှုပ်ရှား ဆောင်ရွက်မှုမျိုးက စစ်ကောင်စီက ရှောင်ရှားဖို့ လိုတယ်လေ” ဟု ပြောသည်။

မြန်မာ့တပ်မတော်

လက်ရှိ ဖြစ်ပွားနေသော ပဋိပက္ခသည် ယခင်ကလို တိုင်းရင်းသားဒေသများတွင် ဖြစ်ပွားနေခြင်း မဟုတ်တော့ကြောင်း၊ တစ်တိုင်းပြည်လုံးတွင် ခုခံတိုက်ခိုက်မှုများ ဖြစ်ပွားနေခြင်း ဖြစ်ကြောင်း၊ လက်ရှိ အနေအထားအရ တပ်မတော်ကို အကျပ်အတည်း တွေ့စေကြောင်း ၎င်းက ပြောသည်။

လက်ရှိတွင် ကရင်ပြည်နယ်၊ ကယား(ကရင်နီ)ပြည်နယ်၊ ချင်းပြည်နယ်၊ မကွေးတိုင်းဒေသကြီး၊ စစ်ကိုင်းတိုင်းဒေသကြီး တို့ တွင် တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းတချို့၊ ပြည်သူ့ကာကွယ်ရေးတပ် (PDF) တို့အကြား တိုက်ပွဲ များ ဖြစ်ပွားလျက်ရှိသည်။

CNI News

၂၀၂၂ ခုနှစ်၊ ဇွန်လ ၁၃

ကရင်ပြည်နယ်၊ ကရင်အမျိုးသားအစည်းအရုံး(KNU)၏ တပ်မဟာ-၆ နယ်မြေ ဝေါလေမြို့နယ်ခွဲ မြို့အဝင်နေရာက ရဲစခန်း တစ်ခုကို ယနေ့ (ဇွန်လ ၁၃ ရက်)တွင် KNLA နှင့် KNDO ပူးပေါင်းတပ်ဖွဲ့က ဝင်ရောက်တိုက်ခိုက်၍ သိမ်းပိုက်ခဲ့ကြောင်း သိရသည်။

KNLA ရဲဘော်များ

အဆိုပါ စခန်းသိမ်းတိုက်ခိုက်မှုတွင် ဝေါလေမြို့နယ်ခွဲက ရဲစခန်းမှူး အပါအဝင် တပ်ဖွဲ့ဝင် တချို့ကိုလည်း ဖမ်းမိခဲ့သည်ဟု KNLA ဘက်က ပြောသည်။

ကရင်အမျိုးသားလွတ်မြောက်ရေးတပ်မတော်(KNLA) နှင့် ကရင်အမျိုးသားကာကွယ်ရေးတပ်ဖွဲ့(KNDO)သည် KNU ၏ စစ်ရေး လက်အောက်ခံ အဖွဲ့အစည်းများ ဖြစ်သည်။

CNI News

၂၀၂၂ ခုနှစ်၊ ဇွန်လ ၁၂

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်တွေ့ဆုံ၍ ငြိမ်းချမ်းရေး ဆွေးနွေးရန် ရခိုင်ပြည်လွတ်မြောက်ရေးပါတီ(ALP) ဒုဥက္ကဋ္ဌ ဒေါ်စောမြရာဇာလင်း ဦးဆောင်သည့် ကိုယ်စားလှယ်အဖွဲ့ ယနေ့ (ဇွန်လ ၁၂ ရက်) နေပြည်တော် ရောက်ရှိလာ ကြောင်း သိရသည်။

ဒေါ်စောမြရာဇာလင်း ဦးဆောင်သည့် ကိုယ်စားလှယ်အဖွဲ့သည် ယနေ့ နံနက်ပိုင်းက ရခိုင်ပြည်နယ်၊ စစ်တွေ လေဆိပ်မှ နေပြည်တော်သို့ ရောက်ရှိလာခြင်း ဖြစ်သည်။

ထို့နောက် မနက်ဖြန် (ဇွန်လ ၁၃ ရက်)တွင် နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်နှင့် တွေ့ဆုံ၍ ငြိမ်းချမ်းရေး လုပ်ငန်းစဉ်များကို ဆွေးနွေးကြမည်ဖြစ်သည်။

ထိုသို့ ဆွေးနွေးပြီးပါက နောက်ရက်များတွင် ဒုဗိုလ်ချုပ်ကြီး ရာပြည့် ဦးဆောင်သည့် နစက၏ ငြိမ်းချမ်းရေးဆွေးနွေးရေး အဖွဲ့နှင့် ဆက်လက် ဆွေးနွေးကြမည်ဖြစ်သည်။

နစကသည် ငြိမ်းချမ်းရေး ဆွေးနွေးရန် တိုင်းရင်းသား လက်နက်ကိုင်အဖွဲ့များကို ဖိတ်ခေါ်ထားသလို တိုင်းရင်းသား လက်နက်ကိုင် အဖွဲ့ ခေါင်းဆောင်များအား ကိုယ်တိုင် တွေ့ဆုံ ဆွေးနွေးမည်ဟု ဧပြီ ၂၂ ရက်က ဗိုလ်ချုပ်မှူးကြီး မင်း အောင်လှိုင်က ပြောခဲ့သည်။

ထို့နောက် မေလ ၂၀ ရက်မှ ဇွန်လ ၇ ရက်နေ့အတွင်း ရှမ်းပြည်ပြန်လည်ထူထောင်ရေးကောင်စီ (RCSS/SSA)ဥက္ကဋ္ဌ ဗိုလ်ချုပ်ကြီးယွက်စစ်နှင့်လည်းကောင်း၊ မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့်လည်းကောင်း၊ ကရင် အမျိုးသား အစည်းအရုံး/ကရင်အမျိုးသားလွတ်မြောက်ရေးတပ်မတော်-ငြိမ်းချမ်းရေးကောင်စီ(KNU/KNLA-PC)ဥက္ကဋ္ဌ ဦးစောထော့လေးနှင့်လည်းကောင်း၊ “ဝ”ပြည်သွေးစည်းညီညွတ်ရေးတပ်မတော်(UWSA)ဒုဥက္ကဋ္ဌ ဦးလော့ယာကုနှင့် လည်းကောင်း၊ အမျိုးသားဒီမိုကရေစီမဟာမိတ်တပ်မတော်(NDAA)ဒုဥက္ကဋ္ဌ ဦးစံပေ့နှင့်လည်းကောင်း အသီးသီး တွေ့ ဆုံ ဆွေးနွေးထားပြီး ဖြစ်သည်။

CNI News

၂၀၂၂ ခုနှစ်၊ ဇွန်လ ၁၁

ပြည်သူ့ကာကွယ်ရေးတပ်ဖွဲ့(PDF) များ အပါအဝင် အဖွဲ့အစည်း အမျိုးမျိုးအနေဖြင့် နိုင်ငံတော်၏ ရှေ့လုပ်ငန်းစဉ်များတွင် ပါဝင် ပူးပေါင်းဆောင်ရွက်နိုင်ရေး သတ်မှတ်စည်းကမ်းချက်များနှင့်အညီ ဥပဒေဘောင်အတွင်းသို့ လက်နက်အပ်နှံ့ပြီး ပြည်သူ့ဘဝသို့ ပြန်လည်ဝင်ရောက်ခြင်း ပြုမည်ဆိုပါက ကြိုဆိုလက်ခံသွားမည်ဟု နစက-က ဇွန်လ ၁၁ ရက်တွင် ထုတ်ပြန် သွားသည်ကို တွေ့ရသည်။

PDF များနှင့် ဒီမိုကရေစီအင်အားစုများကတော့ တပ်မတော်၏ အာဏာသိမ်းမှုကို ဆန့်ကျင်ပြီး အရပ်သား အစိုးရ ပြန်လည် တင်မြှောက်နိုင်ရေး လက်နက်ကိုင် တိုက်ပွဲ အပါအဝင် သံတမန်ရေးရာ တိုက်ပွဲများကို ဆင်နွှဲလျက်ရှိသည်။

CNI News

၂၀၂၂ ခုနှစ်၊ ဇွန် ၁၁

မွန်ပြည်နယ်၊ မော်လမြိုင်မြို့တွင် ကမ္ဘာ့ကျန်းမာရေးအဖွဲ့ (WHO) ဝန်ထမ်းတစ်ဦး အသတ်ခံရမှုမှာ တိုင်းပြည်ပုံရိပ် ကို ထိခိုက်စေသည်ဟု မြန်မာနိုင်ငံရေးသမားများက ပြောသည်။

ပြီးခဲ့သည့် ဇွန်လ ၈ ရက် ညနေပိုင်းက WHO ဝန်ထမ်း ဦးမျိုးမင်းထွဋ်သည် ဆိုင်ကယ်နှင့် အိမ်ပြန်လာချိန်မှာ လုပ်ကြံ ပစ်သတ်ခံခဲ့ရသည်။

WHO ဝန်ထမ်းလုပ်ကြံသတ်ဖြတ်ခံရမှုမှာ တိုင်းပြည်အတွက် ပုံရိပ်မကောင်းကြောင်း ရန်ကုန်စောင့်ကြည့်အဖွဲ့မှ ဥက္ကဋ္ဌ ဒေါက်တာညိုညိုသင်းက CNI သတင်းဌာနကို ပြောသည်။

ဒေါက်တာ ညိုညိုသင်းက “ဒါကတော့ ကိုယ့်တိုင်းပြည်အတွက်ကတော့ မကောင်းဘူးပေါ့၊ ကိုယ့်တိုင်းပြည်အတွက် Image ကတော့ မကောင်းဘူးပေါ့၊ ဘာပဲဖြစ်ဖြစ်၊ အဟောင်းပဲဖြစ်ဖြစ်၊ အသစ်ပဲဖြစ်ဖြစ် ဒီလိုလက်နက်မဲ့တဲ့ အရပ်သားတွေ အပေါ်မှာ ဒီလိုအကြမ်းဖက်တာ ဘယ်အဖွဲ့ပဲဖြစ်ဖြစ် ဒါကတော့ မကောင်းဘူးပေါ့။ မတော်တဆ ဖြစ်တယ်ဆိုလည်း တစ်မျိုးပေါ့နော်၊ တမင်တကာ လုပ်ကြံတယ်တာမျိုး ဆိုရင်‌တော့ မကောင်းဘူးပေါ့” ဟု ပြောသည်။

ဦးမျိုးမင်းထွဋ်သည် WHO မြန်မာရုံးတွင် ၅ နှစ်နီးပါး ကားဒရိုင်ဘာအဖြစ် တာဝန်ထမ်းဆောင်ခဲ့သူဖြစ်ကြောင်း မိသားစုနှင့် ထပ်တူဝမ်းနည်းကြောင်း WHO မှ ထုတ်ပြန်ခဲ့သည်

မော်လမြိုင် ဒေသကာကွယ်ရေးတပ်ဖွဲ့(PDF)က ဦးမျိုးမင်းထွဋ်သည် စစ်သတင်းပေး ဖြစ်သည့်အတွက် လုပ်ကြံ သတ်ဖြတ်ရခြင်းဖြစ်ကြောင်း ထုတ်ပြန်ခဲ့သည်။

WHO ဝန်ထမ်း ဦးမျိုးမင်းထွဋ် ၂၀၂၂ ခုနှစ်၊ ဇွန်လ ၈ ရက် သတ်ဖြတ်ခံရ

ဦးမျိုးမင်းထွဋ် သတ်ဖြတ် ခံရခြင်းအပေါ် WHO၊ ကုလသမဂ္ဂ တာဝန်ရှိသူများက ပြစ်တင်ရှုတ်ချခဲ့ပြီး မိသားစုနှင့် အတူ ဝမ်းနည်းကြောင်း ကြေညာချက်များ ထုတ်ပြန်ခဲ့သည်။

WHO ဝန်ထမ်း ဦးမျိုးမင်းထွဋ်ကို PDF က သတ်ဖြတ်သွားခြင်းဖြစ်သည့်အတွက် အမျိုးသားညီညွတ်ရေးအစိုးရ(NU G)တွင် တစ်စုံတစ်ရာ တာဝန်ရှိကြောင်း ထောက်ပြနေကြသည်။

နိုင်ငံရေးလေ့လာသုံးသပ်သူ ဦးသန်းစိုးနိုင်က ထိုကိစ္စသည် NUG နှင့် တိုက်ရိုက် ပတ်သက်စရာမရှိကြောင်း၊ ညွှန်ကြားမှုများလည်း လုပ်မှာမဟုတ်ကြောင်း CNI သတင်းဌာနသို့ ပြောသည်။

ဦးသန်းစိုးနိုင်က “WHO တို့ နိုင်ငံတကာ အဖွဲ့အစည်း ဝန်ထမ်းတစ်ယောက် အသတ်ခံရတယ်ဆိုတဲ့ ကိစ္စတော့ ဒါနိုင်ငံတကာအနေနဲ့ ကြည့်ရင်တော့ ဒါမကောင်းတဲ့ ကိစ္စပေါ့ဗျာ၊ ဒါပေမဲ့ PDF တွေကလည်း စည်းလွတ်၊ ဝါးလွတ် သတိလက်လွတ် သူတို့ အရေးယူတဲ့ ပုံမဟုတ်ပါဘူး။ ဒီအခြေအနေနဲ့ ပတ်သက်ပြီး သူတို့က ဒီလူဘာတွေ လုပ်ခဲ့ တယ်၊ ဘယ်သူနဲ့ ပူးပေါင်း ဆောင်ရွက်ခဲ့တယ်ဆိုတဲ့ အကြောင်းတွေ ထုတ်ပြန် ကြေညာထားတာ ဖြစ်ပါတယ်။ အဲဒီတော့ ဒီကိစ္စတွေက NUG နဲ့လည်း တိုက်ရိုက် ပတ်သက်စရာ အကြောင်းမရှိပါဘူး။ ဘာဖြစ်လို့လဲဆို‌တော့ NUG က အဲဒီလို အောက်ခြေက လုပ်တာကိုင်တာ အားလုံးကို အသေးစိတ် အနေနဲ့ သူတို့ အနေနဲ့ သိမှာလည်း မဟုတ်ဘူး။ အဲဒီအပေါ်မှာ ညွှန်ကြားမှာလည်း မဟုတ်ပါဘူး။ သို့သော်ငြားလည်း ဒေသဆိုင်ရာက PDF တွေက အခြေအနေ ပိုပြီးနားလည်လို့ ဖြေရှင်းရမယ်လို့ ယူဆပြီး ဖြေရှင်းတာကို သူတို့ ရှင်းပြထားတာ ကျနော်လည်း နားထောင်နေပါတယ်။ အဲဒါကြောင့် NUG နဲ့ တိုက်ရိုက်အားဖြင့် မသက်ဆိုင်ဘူး။ NUG မှာ တာဝန်မရှိဘူးလို့ ကျနော့် အနေနဲ့တော့ မြင်ပါတယ်ခင်ဗျ။ ဒါမျိုးက ဗမာပြည်မှာ ဖြစ်နေတဲ့ အခြေအနေမျိုးမှာ ဒါကတော့ ဖြစ်တတ် ပါတယ်” ဟု ပြောသည်။

လက်ရှိ မြန်မာနိုင်ငံတွင် လက်နက်ကိုင် ပဋိပက္ခများ ကျယ်ကျယ်ပြန့်ပြန့် ဖြစ်ပွားနေပြီး နွေဦးတော်လှန်ရေးကို ဆင်နွှဲနေကြကြောင်း၊ အဆိုပါ တော်လှန်ရေးအတွင်းမှာ မြန်မာနိုင်ငံသား တချို့ လုပ်ကြံသတ်ဖြတ် ခံနေကြရသည်။