CNI News

၂၀၂၂ ခုနှစ်၊ ဇွန်လ ၆

ဒီမိုကရေစီလိုလားသည့် အတိုက်အခံခေါင်းဆောင်များကို ကွပ်မျက်ရန် နစက၏ သတင်းထုတ်ပြန်ချက်သည် လူ့အခွင့် အရေးနှင့် တရားဥပဒေစိုးမိုးရေးကို ဂရုမစိုက်ကြောင်း သာဓကပြလျက်ရှိနေသည်ဟု အမေရိကန်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် နက်ဒ်ပရိုက်စ်က ပြောသည်။

အမျိုးသားဒီမိုကရေစီအဖွဲ့ချုပ်(NLD)၏ ပြည်သူ့လွှတ်တော်ကိုယ်စားလှယ်ဟောင်း ကိုဖြိုးဇေယျာသော်နှင့် ၈၈ မျိုးဆက် ကျောင်းသားခေါင်းဆောင်ဟောင်း ကိုဂျင်မီတို့ကို သေဒဏ်အမိန့်ပေးလိုက်ကြောင်းကို အတည်ပြုသည်ဟု နစက၏ သတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ်ဇော်မင်းထွန်းက ဇွန်လ ၃ ရက်နေ့က သတင်းမီဒီယာများကို ပြောကြား ခဲ့သည်။

အမေရိကန်နိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် နက်ဒ်ပရိုက်စ်က “ ဒီမိုကရေစီလိုလားသည့် အတိုက်အခံ ခေါင်းဆောင်များကို ကွပ်မျက်ရန် မြန်မာစစ်အာဏာရှင်အဖွဲ့အစည်း၏ သတင်းထုတ်ပြန်ချက်သည် စစ်အာဏာရှင် အဖွဲ့အစည်းက လူ့အခွင့်အရေးနှင့် တရားဥပဒေ စိုးမိုးရေးကို ဂရုမစိုက်ကြောင်း သာဓကပြလျက်ရှိပြီး အမေရိကန် ပြည်ထောင်စု ပြင်းထန်စွာ ရှုတ်ချပါသည်”ဟု ပြောသည်။

ထို့နောက် မတရားဖမ်းဆီး ထိန်းသိမ်းထားသူများ အားလုံးကို ပြန်လွှတ်ပေးရန် မိမိတို့ တောင်းဆိုပါသည်ဟုလည်း အမေရိကန်သံရုံးက ထုတ်ပြန်ခဲ့သည်။

ကိုဂျင်မီနဲ့ ကိုဖြိုးဇေယျာသော်

လက်ရှိတွင် ကိုဖြိုးဇေယျာသော်နှင့် ကိုဂျင်မီတို့အား သေဒဏ် အတည်ပြုသည်ဟု နစက-က ထုတ်ပြန်ထား သော်လည်း သေမိန့်ပေးခြင်း ရှိ၊မရှိကိုတော့ ရှင်းရှင်းလင်းလင်း မရှိသေးပေ။

ပြည်သူ့ပါတီဥက္ကဋ္ဌ ဦးကိုကိုကြီးက “ကျနော်တို့ ၈၈၈၈ အရေးတော်ပုံ နောက်ပိုင်းမှာလည်း ကိုယ်ယုံကြည်ရာ နည်းလမ်းနဲ့ ဆောင်ရွက်တဲ့အတွက်ကြောင့် သေဒဏ်ကျ ရဲဘော်တွေ ကျ‌နော်တို့နဲ့ အတူနေခဲ့ရတာပါပဲ၊ အဲဒီတော့ သေဒဏ်ကနေပြီး တော့ တစ်သက်တစ်ကျွန်း၊ တစ်သက်တစ်ကျွန်းကနေ ၁၀ နှစ်စီဆိုပြီးတော့ လွတ်မြောက်သွားတဲ့ဟာတွေ အများကြီး ကျ‌နော်တို့ ကြုံခဲ့ပြီးပါပြီ။ ဥပမာ အားဖြင့် ပြောရရင် ရေနံချက်စက်ရုံရော နောက်ပြီးတော့ မြို့တော်ခန်းမ‌ရော ဗုံးနှစ်လုံးပေါ့၊ နှစ်နေရာ ဖောက်ခွဲခဲ့တဲ့ ပုဂ္ဂိုလ်ဆို လို့ရှိရင် သေဒဏ်ကနေ အနှစ် ၂၀၊ အနှစ် ၂၀ ကနေ ၁၀ နှစ်စီဆိုပြီးတော့ ဒါ ၇ နှစ် ကျော်ကျော်လောက် နေပြီးတော့ ပြန်လွတ် သွားတာက ကျ‌နော်တို့ လွတ်ခါနီးမှာကို အတူတူ နေခဲ့ရပါသေးတယ်၊ ဒါကြောင့်မို့လို့ အခုဖြစ်တဲ့ ကိစ္စမှာလည်းပဲ နိုင်ငံရေးအရ ဖြစ်ပေါ်တဲ့ ကိစ္စမှာ နိုင်ငံရေးအရပဲ ကျနော်တို့ ရလဒ်ကောင်းတွေ ထွက်လာဖို့ မိသားစုတွေနဲ့ စုံစည်းနိုင်ဖို့အတွက် မျှော်လင့် ရ မှာ ဖြစ်ပါတယ်”ဟု CNI သတင်းဌာနသို့ ဇွန်လ ၄ ရက်က ပြောကြားထားသည်။

လက်ရှိ မြန်မာနိုင်ငံသည် ၂၀၂၁ ခုနှစ်၊ ဖေဖော်ဝါရီ ၁ ရက်က အမျိုးသားဒီမိုကရေစီအဖွဲ့ချုပ်(NLD)အစိုးရသည် ၂၀၂၀ အထွေထွေရွေးကောက်ပွဲ မဲစာရင်း အငြင်းပွားမှုအား မဖြေရှင်းဘဲ အစိုးရဖွဲ့စည်းရေး ကြိုးပမ်းသည်ဟုဆိုကာ တပ်မတော် က ဖြုတ်ချ၍ နိုင်ငံတော်ကို အရေးပေါ် ကြေညာထားသည်။

ထို့ကြောင့် တပ်မတော် ဆန့်ကျင်ရေးနှင့် လက်နက်ကိုင် တိုက်ခိုက်ခြင်းများ ကျယ်ကျယ်ပြန့်ပြန့် ဖြစ်ပေါ်လျက်ရှိနေသည်။

CNI News

၂၀၂၂ ခုနှစ်၊ ဇွန်လ ၄

အမျိုးသားဒီမိုကရေစီမဟာမိတ်တပ်မတော်(NDAA-မိုင်းလားအဖွဲ့)အနေဖြင့် နိုင်ငံတော်မှ ခွဲမထွက်ဘူးဟု NDAA ဒုဥက္ကဋ္ဌ ဦးစံပေ့နှင့် ကိုယ်စားလှယ်အဖွဲ့က နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့်တွေ့ဆုံစဉ် ပြောကြားခဲ့သည်။

ယနေ့ (ဇွန်လ ၄ ရက်) နံနက်ပိုင်းက နေပြည်တော်မှာ နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် NDAA ဒုဥက္ကဋ္ဌ ဦးစံပေ့၊ အထွေထွေအတွင်းရေးမှူး ဦးကြည်မြင့်၊ အတွင်းရေးမှူး(၂) ဦးအားလူ၊ ဆက်ဆံရေးနှင့်ဆက်သွယ်ရေးဌာနကြီးမှူး ဦးစိုင်း မောက် တို့ တွေ့ဆုံ၍ ငြိမ်းချမ်းရေးလုပ်ငန်းစဉ်များကို ဆွေးနွေးခဲ့ကြသည်။

NDAA ဒုဥက္ကဋ္ဌ ဦးစံပေ့က “ NDAA (မိုင်းလား)အဖွဲ့အနေဖြင့် နိုင်ငံတော်မှ ခွဲမထွက်ဘဲ ပြည်ထောင်စုမပြိုကွဲရေး၊ တိုင်းရင်း သား စည်းလုံးညီညွတ်ရေးနှင့်နိုင်ငံတော် အချုပ်အခြာအာဏာ တည်တံ့ခိုင်မြဲရေးကို စွဲမြဲစွာ ထိန်းသိမ်းလိုက်နာလျက်ရှိ သည်” ဟု ပြောသည်။

ထို့နောက် ပါတီစုံ ဒီမိုကရေစီစနစ် ကျင့်သုံးရေး၊ ဒီမိုကရေစီနှင့်ဖက်ဒရယ်ကို အခြေခံသည့် ပြည်ထောင်စုစနစ် တည်ဆောက် ရေး၊ ဒေသခံ တိုင်းရင်းသားများ၏ စီးပွားရေး၊ ကျန်းမာရေး၊ ပညာရေးနှင့် ဒေသဖွံ့ဖြိုးတိုးတက်ရေးဆိုင်ရာများကို NDAA အဖွဲ့ က တင်ပြ ဆွေးနွေးခဲ့ကြောင်း သိရသည်။

၂၀၂၂ ခုနှစ်၊ ဇွန်လ ၄ ရက်နေ့က NDAA ဒုဥက္ကဋ္ဌ ဦးစံပေ့ ဦးဆောင်သည့် ကိုယ်စားလှယ်အဖွဲ့နှင့် နစက တွေ့ဆုံစဉ်

နစကဥက္ကဋ္ဌက “လက်နက်ကိုင် ပဋိပက္ခများကို ငြိမ်းချမ်းစွာ ဆွေးနွေးအဖြေရှာနိုင်မှသာလျှင် ပြည်ထောင်စုကြီး ဖွံ့ဖြိုးတိုး တက်ရေး လုပ်ငန်းများကို ပိုမိုဆောင်ရွက်နိုင်မည်ဖြစ်ကြောင်း၊ ငြိမ်းချမ်းရေးဆွေးနွေးပွဲများ ဆောင်ရွက်နေချိန်တွင်လည်း ပညာရေး၊ ကျန်းမာရေး၊ စီးပွားရေးတို့တွင် ရပ်တန့်နေ၍ မရဘဲ စဉ်ဆက်မပြတ် တိုးတက်မှုရှိအောင် ဆောင်ရွက်နေရမည်” ဟု ပြောသည်။

ထို့နောက် မိမိတို့အနေဖြင့် တိုင်းပြည်၏ အနာဂတ်မျိုးဆက်သစ်များကို တည်ငြိမ် အေးချမ်းပြီး ဖွံ့ဖြိုးတိုးတက်သည့် ပြည် ထောင်စု နိုင်ငံတော်ကြီးကို လက်ဆင့်ကမ်းနိုင်ရေး ငြိမ်းချမ်းရေး ရရှိအောင်  ကြိုးပမ်းဆောင်ရွက်သွားရမည် ဖြစ်ကြောင်း၊ ပြည်သူလူထုဆန္ဒနှင့် ကိုက်ညီသည့် ပါတီစုံ ဒီမိုကရေစီစနစ် ကျင့်သုံးဆောင်ရွက်ရေး၊ ဒီမိုကရေစီနှင့် ဖက်ဒရယ်ကို အခြေခံ သည့် ပြည်ထောင်စုစနစ် တည်ဆောက်ရေး စသည်တို့ကို နစကဥက္ကဋ္ဌက ချပြ ဆွေးနွေးခဲ့ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် တိုင်းရင်းသား လက်နက်ကိုင် အဖွဲ့များကို ငြိမ်းချမ်းရေး ဆွေးနွေးရန်နှင့် တိုင်းရင်းသား လက်နက်ကိုင် ခေါင်းဆောင်များကို ကိုယ်တိုင် တွေ့ဆုံမည်ဖြစ်ကြောင်း ဧပြီ ၂၂ ရက်က ပြောကြား၍ ဖိတ် ခေါ်ခဲ့သည်။

၂၀၂၂ ခုနှစ်၊ ဇွန်လ ၄ ရက်နေ့က NDAA အထွေထွေအတွင်းရေးမှူး ဦးကြည်မြင့်နဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

ထို့နောက် မေလ ၂၀ ရက်မှ ဇွန်လ ၂ ရက်နေ့အတွင်းမှာ နစက ဥက္ကဋ္ဌသည် ရှမ်းပြည် ပြန်လည် ထူထောင်ရေးကောင်စီ (RCSS) မှ ဗိုလ်ချုပ်ကြီးယွက်စစ်နှင့် လည်းကောင်း၊ မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့် လည်းကောင်း၊ ကရင်အမျိုးသား အစည်းအရုံး/ ကရင်အမျိုးသား လွတ်မြောက်ရေး တပ်မတော်-ငြိမ်းချမ်းရေးကောင်စီ (KNU/KNLA-PC) ဥက္ကဋ္ဌ ဦးစောထော့လေး နှင့်လည်းကောင်း၊ "ဝ"ပြည်သွေး စည်းညီညွတ်ရေးတပ်မတော်(UWSA) ဒုဥက္ကဋ္ဌ ဦးလော့ယာကု နှင့်လည်းကောင်း အသီးသီး  တွေ့ဆုံ ဆွေးနွေးထားပြီး ဖြစ်သည်။

NDAA သည် ၁၉၈၉ ခုနှစ်က ဗမာပြည်ကွန်မြူနစ်ပါတီ(ဗကပ)ကနေ ခွဲထွက်ပြီး တပ်မတော်နှင့် ငြိမ်းချမ်းရေး ရယူခဲ့သည်။ ထို့နောက် အထူးဒေသ(၄)အဖြစ် သတ်မှတ်ပေးကာ မိုင်းလားမြို့ကို ဌာနချုပ်အဖြစ် ထားကာ ကိုယ်ပိုင်အုပ်ချုပ်ခွင့်ရရှိထား သည်။

ထို့နောက် ဦးသိန်းစိန် အစိုးရလက်ထက် ၂၀၁၁ ခုနှစ်တွင် ပြည်နယ်အဆင့်- ပြည်ထောင်စုအဆင့် ပဏာမ အပစ်အခတ်ရပ်စဲ ရေး (Bilateral)ရေးထိုးခဲ့သည်။

CNI News

၂၀၂၂ ခုနှစ်၊ ဇွန်လ ၄

အမျိုးသားဒီမိုကရေစီမဟာမိတ်တပ်မတော်(NDAA-မိုင်းလားအဖွဲ့)ဒုဥက္ကဋ္ဌ ဦးစံပေ့နှင့် နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်တို့ ယနေ့ (ဇွန်လ ၄ ရက်) နေပြည်တော်မှာ တွေ့ဆုံ ဆွေးနွေးခဲ့ကြကြောင်း သိရသည်။

နစက ကိုယ်စားလှယ်များနဲ့ NDAA ကိုယ်စားလှယ်များ

အဆိုပါ တွေ့ဆုံမှုတွင် NDAA ဘက်မှ ဒုဥက္ကဋ္ဌ ဦးစံပေ့၊ အထွေထွေအတွင်းရေးမှူး ဦးကြည်မြင့်တို့ တက်ရောက်ခဲ့ပြီး နစကဘက်မှ ဗိုလ်ချုပ်မှူးကြီးမင်းအောင်လှိုင်၊ ဒုဗိုလ်ချုပ်မှူးကြီး စိုးဝင်း၊ ဒုဗိုလ်ချုပ်ကြီး မိုးမြင့်ထွန်း၊ ဒုဗိုလ်ချုပ်ကြီး မြထွန်းဦး၊ ဒုဗိုလ်ချုပ်ကြီး ရာပြည့်တို့ တက်ရောက်ခဲ့ကြသည်။

#NDAA #ဗိုလ်ချုပ်မှူးကြီးမင်းအောင်လှိုင် #ငြိမ်းချမ်းရေး #နိုင်ငံရေး #CNImyanmar #cninews

CNI News

၂၀၂၂ ခုနှစ်၊ ဇွန်လ ၄

၈၈ မျိုးဆက် ကျောင်းသားခေါင်းဆောင် ကိုဂျင်မီနှင့် လွှတ်တော်ကိုယ်စားလှယ်ဟောင်း ကိုဖြိုးဇေယျာသော်တို့ကို သေဒဏ် အစား အခြားပြစ်ဒဏ် ပြောင်းလဲပေးသင့်ကြောင်း ပြည်သူ့ပါတီမှ ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။

၎င်းတို့ နှစ်ဦးကို အကြမ်းဖက်မှု ဥပဒေပုဒ်မများနှင့် တရားစွဲဆိုထားပြီးနောက် သေဒဏ်အမိန့်ချမှတ်ကြောင်း အတည်ပြုသည် ဟု နစကမှ ဗိုလ်ချုပ်ဇော်မင်းထွန်းက မီဒီယာများအား ဇွန်လ ၃ ရက် ပြောကြားခဲ့သည်။

ဦးကိုကိုကြီးက “ ကျနော်တို့ ၈၈၈၈ အရေးတော်ပုံ နောက်ပိုင်းမှာလည်း ကိုယ်ယုံကြည်ရာ နည်းလမ်းနဲ့ ဆောင်ရွက်တဲ့အတွက် ကြောင့် သေဒဏ်ကျ ရဲဘော်တွေ ကျ‌နော်တို့နဲ့ အတူနေခဲ့ရတာပါပဲ၊ အဲဒီတော့ သေဒဏ်ကနေပြီးတော့ တစ်သက်တစ်ကျွန်း၊ တစ်သက်တစ်ကျွန်းကနေ ၁၀ နှစ်စီဆိုပြီးတော့ လွတ်မြောက်သွားတဲ့ဟာတွေ အများကြီး ကျ‌နော်တို့ ကြုံခဲ့ပြီးပါပြီ။ ဥပမာ အားဖြင့် ပြောရရင် ရေနံချက်စက်ရုံရော နောက်ပြီးတော့ မြို့တော်ခန်းမ‌ရော ဗုံးနှစ်လုံးပေါ့၊ နှစ်နေရာ ဖောက်ခွဲခဲ့တဲ့ ပုဂ္ဂိုလ်ဆို လို့ရှိရင် သေဒဏ်ကနေ အနှစ် ၂၀၊ အနှစ် ၂၀ ကနေ ၁၀ နှစ်စီဆိုပြီးတော့ ဒါ ၇ နှစ်ကျော်ကျော်လောက် နေပြီးတော့ ပြန်လွတ် သွားတာက ကျ‌နော်တို့ လွတ်ခါနီးမှာကို အတူတူ နေခဲ့ရပါသေးတယ်၊ ဒါကြောင့်မို့လို့ အခုဖြစ်တဲ့ ကိစ္စမှာလည်းပဲ နိုင်ငံရေးအရ ဖြစ်ပေါ်တဲ့ ကိစ္စမှာ နိုင်ငံရေးအရပဲ ကျနော်တို့ ရလဒ်ကောင်းတွေ ထွက်လာဖို့ မိသားစုတွေနဲ့ စုံစည်းနိုင်ဖို့အတွက် မျှော်လင့် ရ မှာ ဖြစ်ပါတယ်”ဟု ပြောသည်။

ဗိုလ်ချုပ်ဇော်မင်းထွန်း

မြန်မာနိုင်ငံမှာ သေဒဏ် စီရင်ချက်ဖြင့် ကြိုးမိန့်ပေးခြင်းမှာ ၁၉၈၉ ခုနှစ်က နောက်ဆုံးဖြစ်ကြောင်း၊ ကိုဂျင်မီနှင့် ကိုဖြိုးဇေယျ သော် တို့ကို သေဒဏ်စီရင်ချက် မချသင့်ကြောင်း တရားလွှတ်တော်ရှေ့နော် ဦးကြီးမြင့်က CNI သတင်းဌာနသို့ ပြောသည်။

ဦးကြီးမြင့်က “မလုပ်သင့်ဘူး။ ဒီဟာကြီးက ကမ္ဘာကလည်း လက်မခံတော့ဘူးလေ၊ ကုလသမဂ္ဂ သေဒဏ်တွေ ပယ်ဖျက်ပေး ဖို့ တောင်းဆိုတာတွေ ရှိတယ်၊ ကျနော်တို့ ပြည်တွင်းမှာလည်းပဲ ကျနော် ကြိုးတိုက်မှာ နှစ်ချီပြီး နေခဲ့ရတယ်၊ ကြိုးသမားတွေ နဲ့ အတူနေခဲ့ရတယ်၊ လူသတ်သမားတွေ၊ မုဒိမ်းသမားတွေ လူသတ်တာတော့ တစ်ခါလောက်ဆို ကျုပ်မပြောဘူးနော်၊ သုံးခါ၊ သုံးခါ၊ ကြိုးသုံးခါ အဲဒီလူက ဘာမှ မဖြစ်ဘူး။ ကြည်လင်းတို့ဆိုလည်း ရက်ရက်စက်စက် သတ်တာဗျာ၊ ကြိုတင် ကြံစည် ချက်နဲ့ သေသေချာချာ သတ်တာ ကြည်လင်းတို့ဆို၊ ဘာမှမဖြစ်ဘူး၊ ထောင်ထဲမှာ အေးအေးဆေးဆေးပဲ ဝတ်ကောင်းစားလှ တွေ ဝတ်ပြီးတော့ စားသောက်ပြီးတော့ ပြောချင်တာက သေဒဏ် တကယ်ပေးရမယ့် လူတွေ ရှိပါတယ်၊ စင်ကာပူတို့၊ အမေရိကားတို့ အခုထက်ထိ ကြိုးပေးတာ ပုံစံမျိုးစုံနဲ့ သေဒဏ်‌တွေ ချမှတ်ပြီး ကျင့်သုံးနေတာ နည်းသွားပြီ အရမ်းနည်းသွား ပြီ ဂျပန်လည်း အဲဒီအတိုင်းပဲ၊ ရှိတယ် အရမ်းနည်းသွားပြီ၊ ၁၀ နှစ်မှာ တစ်ယောက်လောက်၊ နှစ်ယောက်လောက် ဒီလောက် ပဲ ရှိတော့တယ်၊ ဒါလည်း တကယ့်ကို လူအများကြီး သေအောင်လုပ်လို့ လုပ်တာ” ဟု ပြောသည်။

၈၈ ငြိမ်းချမ်းရေးနှင့်ပွင့်လင်း လူ့အဖွဲ့အစည်းမှ ကိုဂျင်မီနှင့် အမျိုးသားဒီမိုကရေစီအဖွဲ့ချုပ် (NLD) အမတ်ဟောင်း ကိုဖြိုးဇေယျာသော် တို့ကို အကြမ်းဖက်မှု တိုက်ဖျက်ရေး ဥပဒေပုဒ်မ ၄၉(က)၊ ၅၀(ဈ)နှင့် ၅၀(ည)တို့ဖြင့် ဇန်နဝါရီ ၂၁ ရက်က သေဒဏ် အမိန့်ချမှတ်လိုက်ကြောင်း နစက-က ထုတ်ပြန်ခဲ့သည်။

CNI News
၂၀၂၂ ခုနှစ်၊ ဇွန်လ ၄

ယနေ့ (ဇွန်လ ၄ ရက်)ကျရောက်သည့် ၅၈ နှစ်မြောက် ကယန်းအမျိုးသား လက်နက်ကိုင် တော်လှန်ရေးနေ့ အခမ်းအနားကို ကယန်းပြည်သစ်ပါတီသည် ၎င်းတို့၏ ဌာနချုပ်ဖြစ်သော ဆီးဘူးဒေသမှာ ကျင်းပခဲ့ကြောင်း သိရသည်။

ဓာတ်ပုံ - ခွန်ဗဟန်းထန်

CNI News

၂၀၂၂ ခုနှစ်၊ ဇွန်လ ၃

တီထွင်ဆန်းသစ်မှုနှင့် ဖန်တီးမှုများကို ဖွံ့ဖြိုးတိုးတက်စေနိုင်မည့် မူပိုင်ခွင့်စနစ် တစ်ရပ်ကို ပြည်သူနှင့်အတူ လက်တွဲ၍ အမြန် ဆုံး အကောင်အထည်ဖော် ဆောင်ရွက်ကြရန် နစကဒုဥက္ကဋ္ဌ ဒုဗိုလ်ချုပ်မှူးကြီး စိုးဝင်းက ပြောသည်။

ယနေ့ (ဇွန်လ ၃ ရက်) ကျင်းပသည့် မူပိုင်ခွင့်ဆိုင်ရာ ဗဟိုကော်မတီ အစည်းအဝေးတွင် ၎င်းက အထက်ပါ အတိုင်း ပြောသွား ခဲ့သည်။

မူပိုင်ခွင့်ဆိုင်ရာဗဟိုကော်မတီ၏ အဓိက ဆောင်ရွက်ရမည့် လုပ်ငန်းတာဝန်များကို မူပိုင်ခွင့်ဥပဒေများတွင် ဖော်ပြထား  ကြောင်း၊ ဗဟိုကော်မတီ အနေဖြင့် မူပိုင်ခွင့်ဆိုင်ရာ လုပ်ငန်းများ ကောင်းစွာ ဖွံ့ဖြိုးတိုးတက်စေရန် လိုအပ်မည့် မူဝါဒများ၊ မဟာဗျူဟာများနှင့် လုပ်ငန်းစီမံချက်များကို လမ်းညွှန်ချမှတ်ပေးသွားမည်ဖြစ်ကြောင်း၊ ဗဟိုကော်မတီက ချမှတ်သည့် လုပ်ငန်းတာဝန်များကို အကောင်အထည်ဖော်ရာတွင် လိုအပ်မည့် အမိန့် ကြော် ငြာစာ၊ အမိန့်နှင့်ညွှန်ကြားချက်များကို ထုတ်ပြန်နိုင်ရန် မူပိုင်ခွင့်ဆိုင်ရာ အေဂျင်စီကို အမြန်ဆုံး ဖွဲ့စည်းဆောင် ရွက်ရမည်ဟု နစကဒုဥက္ကဋ္ဌက ပြောသည်။

၎င်းက “ယခု ဖွဲ့စည်းထားသည့် မူပိုင်ခွင့်ဆိုင်ရာ ဗဟိုကော်မတီတွင် ပါဝင်သော တာဝန်ခံ ဝန်ကြီးဌာနနှင့် သက်ဆိုင်ရာ ဝန် ကြီးဌာန၊ အစိုးရ မဟုတ်သော အဖွဲ့အစည်းများ အနေဖြင့် မိမိတို့ပါဝင် ဆောင်ရွက်နိုင်သည့် အခန်းကဏ္ဍများတွင် ဝိုင်းဝန်း ပူးပေါင်း ပါဝင်ဆောင်ရွက် ပေးကြစေလိုကြောင်း၊ နိုင်ငံရဲ့ စီးပွားရေး၊ လူမှုရေး၊ သိပ္ပံနှင့် ယဉ်ကျေးမှုကဏ္ဍများ၊ တီထွင် ဆန်း သစ်မှုနှင့် ဖန်တီးမှုများကို ဖွံ့ဖြိုးတိုးတက်စေနိုင်မည့် မူပိုင်ခွင့်စနစ် တစ်ရပ်ကို အစိုးရနှင့်ပြည်သူ အတူလက်တွဲ၍ အမြန်ဆုံး အကောင်အထည်ဖော် ဆောင်ရွက်ကြ”ဟု ပြောသည်။

ထို့နောက် မူပိုင်ခွင့်ဆိုင်ရာ ဥပဒေများနှင့်ပတ်သက်၍ အစိုးရအနေဖြင့် ၂၀၁၉ ခုနှစ်၊ ဇန်နဝါရီ ၃၀ ရက် ရက်စွဲဖြင့် ကုန်အမှတ် တံဆိပ် မူပိုင်ခွင့်ဥပဒေ၊ စက်မှု ဒီဇိုင်းမှုပိုင်ခွင့်ဥပဒေ၊ တီထွင်မှု မူပိုင်ခွင့်ဥပဒေ၊ စာပေနှင့်အနုပညာ မူပိုင်ခွင့် ဥပဒေတို့ကို အတည်ပြု ပြဋ္ဌာန်းပြီး ဖြစ်ကြောင်း သိရသည်။

အလားတူ အကောင်အထည်ဖော် ဆောင်ရွက်ခြင်းကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန မူပိုင် ခွင့် ဦးစီးဌာနက အဓိက တာဝန်ယူဆောင်ရွက်မည်ဖြစ်ပြီး မူပိုင်ခွင့် ချိုးဖောက်မှုအပေါ် အကောက်ခွန်ဦးစီးဌာန၊ စီမံကိန်းနှင့် ဘဏ္ဍာရေးဝန်ကြီး ဌာန၊ ပြည်ထောင်စုတရားလွှတ်တော်ချုပ် စသည့် ဌာနများက သက်ဆိုင်ရာ ကဏ္ဍများအလိုက် အကောင်အထည်ဖော် ဆောင် ရွက် သွားကြရမည်ဟု နစကဒုဥက္ကဋ္ဌက ပြောသည်။

CNI News

၂၀၂၂ ခုနှစ်၊ ဇွန်လ ၃

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် တွေ့ဆုံ၍ ငြိမ်းချမ်းရေးလုပ်ငန်းစဉ်များ ဆွေးနွေးရန် အမျိုးသားဒီမိုကရေစီ မဟာမိတ်တပ်မတော်(NDAA-မိုင်းလားအဖွဲ့)ဒုဥက္ကဋ္ဌ ဦးစံပေ့ ဦးဆောင်သည့် ကိုယ်စားလှယ်အဖွဲ့ ယနေ့ (ဇွန်လ ၃ ရက်) နေပြည်တော်သို့ ရောက်ရှိလာကြောင်း သိရသည်။

ယနေ့ ညနေတွင် ငြိမ်းချမ်းရေး လုပ်ငန်းစဉ်တွင် ပါဝင်နေသူ တချို့နှင့် NDAA ဒုဥက္ကဋ္ဌ ဦးစံပေ့တို့ နေပြည်တော်မှာ တွေ့ဆုံ မည်ဖြစ်ကြောင်း၊ ထို့နောက် ဗိုလ်ချုပ်မှူးကြီးမင်းအောင်လှိုင်နှင့် နောက်ရက်များတွင် တွေ့ဆုံကြမည် ဖြစ်သည်။

NDAA နှင့် နီးစပ်သူ တစ်ဦးက “ ဟုတ်တယ်၊ မနက်ဖန်က စနေနေ့ဆိုတော့ ဖြစ်/မဖြစ် မသေချာသေး၊ တွေ့ရင်တော့ တပ်ချုပ်နဲ့ အရင်တွေ့မှာပေါ့”ဟု ပြောသည်။

NDAA ဒုဥက္ကဋ္ဌ ဦးစံပေ့ ဦးဆောင်သည့် ကိုယ်စားလှယ်အဖွဲ့ ၂၀၂၂ ခုနှစ်၊ဇွန်လ ၃ ရက်က ကျိုင်းတုံလေဆိပ်မှ နေပြည်တော်သို့ လာရောက်စဉ်

NDAA ကိုယ်စားလှယ် အဖွဲ့ကို ဒုဥက္ကဋ္ဌ ဦးစံပေ့၊ အထွေထွေအတွင်းရေးမှူး ဦးကြည်မြင့် အပါအဝင် ၁၃ ဦး ပါဝင်ကြောင်း၊ ယနေ့ (ဇွန်လ ၃ ရက်) ကျိုင်းတုံ လေဆိပ်ကနေ နေပြည်တော်သို့ တပ်မတော်အထူးလေယာဉ်ဖြင့် လာရောက်ကြောင်း သိရသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်သည် တိုင်းရင်းသား လက်နက်ကိုင် အဖွဲ့အစည်းများနှင့် တွေ့ဆုံ၍ ငြိမ်းချမ်းရေး ဆွေးနွေးလိုကြောင်း၊ မိမိကိုယ်တိုင် တွေ့ဆုံဆွေးနွေးမည်ဖြစ်ကြောင်း ဧပြီ ၂၂ ရက်က ဖိတ်ခေါ်ထားသည်။

ထို့နောက် မေလ ၂၀ ရက်နေ့မှ ဇွန်လ ၂ ရက်နေ့အထိ ရှမ်းပြည် ပြန်လည်ထူထောင်ရေး ကောင်စီ(RCSS) မှ ဗိုလ်ချုပ်ကြီး ယွက်စစ်နှင့် လည်းကောင်း၊ မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့် လည်းကောင်း၊ ကရင်အမျိုးသား အစည်း အရုံး/ ကရင်အမျိုးသား လွတ်မြောက်ရေး တပ်မတော်-ငြိမ်းချမ်းရေးကောင်စီ (KNU/KNLA-PC)ဥက္ကဋ္ဌ ဦးစောထော့လေး နှင့်လည်းကောင်း၊ "ဝ"ပြည်သွေးစည်း ညီညွတ်ရေး တပ်မတော်(UWSA) ဒုဥက္ကဋ္ဌ ဦးလော့ယာကုနှင့် တွေ့ဆုံ ဆွေးနွေး ထားပြီး ဖြစ်သည်။

CNI News

၂၀၂၂ ခုနှစ်၊ ဇွန်လ ၃

နစက အနေဖြင့် တိုင်းရင်းသား လက်နက်ကိုင် အဖွဲ့အစည်းအချို့နှင့် ငြိမ်းချမ်းရေး ဆွေးနွေးနေခြင်းသည် နိုင်ငံတကာ သံတမန်ရေးရာတွင် အသာစီးရအောင် လုပ်နေခြင်းဖြစ်ကြောင်း ချင်းအမျိုးသားတပ်ဦး (CNF) မှ ပြောခွင့်ရပုဂ္ဂိုလ် ဆလိုင်း ထက်နီက CNI သတင်းဌာနသို့ ပြောသည်။

တိုင်းရင်းသား လက်နက်ကိုင် ခေါင်းဆောင်များနှင့် ငြိမ်းချမ်းရေး ဆွေးနွေးလိုကြောင်း နစကဥက္ကဋ္ဌက ဖိတ်ခေါ်ခဲ့ပြီးနောက် မေလ ၂၀ ရက်နေ့မှ ဇွန်လ ၂ ရက်နေ့အထိ လက်နက်ကိုင် ၄ ဖွဲ့နှင့် နစကတို့ တွေ့ဆုံဆွေးနွေးထားပြီး ဖြစ်သည်။

ဆလိုင်းထက်နီက “တိုင်းရင်းသားအရေးပဲ မဟုတ်ဘဲနဲ့ တစ်ပြည်လုံးအရေး ဖက်ဒရယ်ဒီမိုကရေစီ တည်ဆောက်ဖို့အတွက် ကျနော်တို့ တိုက်ပွဲဝင်နေတာ ဖြစ်တယ်၊ ဒီဆွေးနွေးပွဲကတော့ ကျနော်တို့ရဲ့ အတွေ့အကြုံအရ ကျနော်တို့က အယုံအကြည် မရှိဘူး။ သူ့ရဲ့ ဖိတ်ခေါ်တဲ့ ပုံစံကလည်း တစ်ဖွဲ့ချင်း တက်တာတွေ၊ ဖိတ်တာတွေဆိုတာက အမှန်ဆို ပါဝင်သင့်၊ ပါဝင်ထိုက်တဲ့ သူအားလုံး ပါဝင်ပြီး ဖိတ်ခေါ်ရမှာ ဖြစ်တယ်၊ အဲဒါကြောင့် သူဖိတ်ကြားတဲ့ ပုံစံကို ကျနော်တို့က အယုံအကြည် မရှိဘူး၊ သူတို့ရဲ့ နိုင်ငံရေး ထွက်ပေါက်၊ နိုင်ငံတကာမှာ တိုင်းရင်းသား လက်နက်ကိုင်တွေကို ကျနော် ဖိတ်နေပါတယ်ဆိုပြီးတော့ နိုင်ငံတကာ မှာ နိုင်ငံရေး အသာစီးရအောင် လုပ်နေတဲ့ လုပ်ရပ်ဖြစ်တယ်”ဟု CNI သတင်းဌာနသို့ ပြောသည်။

လက်ရှိ ငြိမ်းချမ်းရေး ဆွေးနွေးပွဲ မတက်သည့် လက်နက်ကိုင် အဖွဲ့အစည်းများသည် မိမိတို့၏ တိုင်းရင်းသားအရေးကို အလုပ် ဟုလည်းကောင်း၊ တချို့ လက်နက်ကိုင် အဖွဲ့အစည်းများမှာ ငြိမ်းချမ်းရေးကို မသိချင်ယောင် ဆောင်နေကြောင်း နစက၏ သတင်း ထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ဇွန်လ ၁ ရက်တွင် ပြောကြားခဲ့သည်။

ဗိုလ်ချုပ်မှူးကြီးမင်းအောင်လှိုင်နဲ့ ဗိုလ်ချုပ်ကြီး ယွက်စစ် တွေ့ဆုံစဉ်

ဗိုလ်ချုပ်ဇော်မင်းထွန်းက “ပြည်တွင်းမှာ အဓိကတွေ့ရတဲ့ အခက်အခဲကတော့ တိုက်ရိုက် ပါဝင်ပတ်သက်သူတွေ ကိုယ်တိုင် တချို့က တိုက်ရိုက် ပါဝင် ပတ်သက်သူတွေ ကိုယ်တိုင်၊ နံပါတ်တစ်ကတော့ သိလျက်နဲ့ မသိချင်ယောင်ဆောင်ခြင်း၊ တိုက်ရိုက် ပါဝင် ပတ်သက်သူတွေ ကိုယ်တိုင်၊ သိလျက်နဲ့ မသိချင်ယောင်ဆောင်ခြင်း၊ နံပါတ်နှစ်အချက်ကတော့ တိုက်ရိုက် ပါဝင် ပတ် သက်သူတွေ ကိုယ်တိုင် မသိချင်ယောင်ဆောင်တာ မဟုတ်ဘူး။ မကြားချင်ယောင် ဆောင်တာပေါ့ဗျာ၊ မသိချင်ယောင် ဆောင် ခြင်းနဲ့ မကြားချင်ယောင် ဆောင်ခြင်းက‌တော့ အဓိက အခက်အခဲပါပဲ။ NCA စာချုပ် ဖြစ်ပေါ်လာဖို့ ဆိုလို့ရှိရင် ဘယ်မှာ အခြေ ခံ သလဲဆိုရင် လိုင်ဇာမှာ အခြေခံခဲ့တယ်၊ KIA မှာ အခြေခံခဲ့တယ်၊ NCA စာချုပ်ကို ထပ်ပြီး မြှင့်တင်တာတို့၊ NCA စာချုပ်ကို ထပ်ပြီး အတည်ပြုခဲ့တာ ဘယ်မှာလဲဆို လော်ခီးလားမှာ KNU က ခုငြိမ်းချမ်း‌ရေးဆွေးနွေးတဲ့ အခါမှာ KNU, KIA ပါလား။ ကျ‌နော်တို့ ဆွေးနွေးနေတာ သူတို့ ဆွဲခဲ့တဲ့ဟာအတိုင်း ဆွေးနွေးနေတာလေ။ ပါလား အဲဒါကို မသိချင်ယောင်ဆောင်ခြင်းလို့ ခေါ်တယ်” ဟု ပြောသည်။

လက်ရှိ နစကမှာ ၂၀၀၈ တွင် မပါသည့် အချိုးကျကိုယ်စားပြုစနစ် (PR) ဖြင့် ရွေးကောက်ပွဲကျင်းပရန် ပြင်ဆင်နေကြောင်း၊ ၎င်းတို့ ဖိတ်ကြားသည့် ငြိမ်းချမ်းရေးဆွေးနွေးပွဲကို မသိချင်ယောင်ဆောင်ခြင်း မဟုတ်ကြောင်း ဆလိုင်းထက်နီက ပြောသည်။

၎င်းက “ပြတ်ပြတ်ပြောရရင်တော့ သူ့ရဲ့ နိုင်ငံတကာမှာ နိုင်ငံရေး ထွက်ပေါက်အတွက် အဲဒီလို လုပ်နေတယ်၊ အဲဒီ ထွက် ပေါက်ဆိုတာ ဘာလဲ ရှင်းတယ်၊ နောက်နှစ် ဩဂုတ်မှာ သူက ရွေးကောက်ပွဲ လုပ်မလို့၊ အဲဒီရွေးကောက်ပွဲလုပ်ဖို့ အဲဒီ ရွေး ကောက်ပွဲ တောင်မှ ၂၀၀၈ ဖွဲ့စည်းပုံမှာ မရှိတဲ့ PR ပုံစံနဲ့ လုပ်မယ်လို့ ကျနော်တို့ သိရတယ်၊ သူက ကြိုက်သလို လုပ်နေတယ်၊ အဲဒီလို လုပ်လိုက်ရင် တိုင်းရင်းသားတွေကို နိုင်ငံရေးဆွေးနွေးပွဲနဲ့ ချဉ်းကပ်ပြီးတော့ တိုင်းရင်းသားဒေသတွေ တည်ငြိမ်အောင် လုပ်မယ်၊ အဲဒီမှာ PDF တွေကို ဖြုတ်မယ် ပြီးတော့ ရွေးကောက်ပွဲလုပ်မယ်၊ ရွေးကောက်ပွဲ လုပ်မယ်ဆိုတဲ့ဟာလည်း PR စနစ် နဲ့ဆိုတော့ အဲဒါ ပြည်သူလူထုရဲ့ ဆန္ဒပါသော မပါသောသူက ဂရုစိုက်တာ မဟုတ်ဘူး။ အဲဒါက လုံးဝ မဖြစ်သင့်တဲ့ ကိစ္စ။ သူ့ဟာသူ ကြိုက်သလို လုပ်ပြီး ကစားနေတဲ့ပုံ ဖြစ်နေတယ်၊ ကျနော်တို့က သူဖိတ်ခေါ်တာတွေ မသိချင်ယောင်ဆောင်တာ မဟုတ်ပါဘူး။ သိတယ်”ဟု ပြောသည်။

လက်ရှိတွင် နစက ဥက္ကဋ္ဌသည် ရှမ်းပြည်ပြန်လည်ထူထောင်ရေးကောင်စီ(RCSS) မှ ဗိုလ်ချုပ်ကြီးယွက်စစ်နှင့် လည်းကောင်း၊ မွန်ပြည်သစ်ပါတီ(NMSP)ဒုဥက္ကဋ္ဌ နိုင်အောင်မင်းနှင့် လည်းကောင်း၊ ကရင်အမျိုးသား အစည်းအရုံး/ ကရင်အမျိုးသား လွတ် မြောက်ရေး တပ်မတော်-ငြိမ်းချမ်းရေးကောင်စီ (KNU/KNLA-PC)ဥက္ကဋ္ဌ ဦးစောထော့လေး နှင့်လည်းကောင်း၊ "ဝ"ပြည်သွေး စည်းညီညွတ်ရေးတပ်မတော်(UWSA) ဒုဥက္ကဋ္ဌ ဦးလော့ယာကုနှင့် တွေ့ဆုံ ဆွေးနွေးထားပြီး ဖြစ်သည်။

မကြာခင်မှာ အမျိုးသားဒီမိုကရေစီမဟာမိတ်တပ်မတော်(NDAA-မိုင်းလားအဖွဲ့)နှင့် တွေ့ဆုံ ဆွေးနွေးမည်ဖြစ်သည်။

CNI News

၂၀၂၂ ခုနှစ်၊ ဇွန်လ ၂

ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)သည် တတိယအကြိမ်မြောက် ညီလာခံကို ကျင်းပခဲ့ပြီး ဗဟိုအလုပ်အမှု ဆောင်ကော်မတီ အပါအဝင် ဗဟိုကော်မတီဝင်များ ပြန်လည် ရွေးချယ်ရာတွင် PNLO ဒုဥက္ကဋ္ဌဖြစ် တာဝန်ယူထားသည့် ခွန်မြင့်ထွန်းမှာ အရွေးချယ် မခံရကြောင်း သိရသည်။

PNLO သည် တတိယအကြိမ်မြောက် ညီလာခံကို ဗဟိုဌာနချုပ် တည်ရှိရာ မောက်မယ်မြို့နယ်၊ ကဒူးကြီးဒေသ၌ ၂၀၂၂ ခုနှစ်၊ မေလ ၂၉ ရက်မှ ဇွန်လ ၁ ရက်အထိ ကျင်းပခဲ့ပြီး ဗဟိုအလုပ်အမှုဆောင်ကော်မတီဝင် (၉)ဦး အပါအဝင် ဗဟို ကော်မတီဝင် (၁၉)ဦးကို ရွေးချယ်ခဲ့သည်။

PNLO  ဥက္ကဋ္ဌ အဖြစ် အရွေးချယ်ခံရတဲ့ ဗိုလ်ချုပ်ခွန်သူရိန်

ဗဟိုအလုပ်အမှုဆောင်ကော်မတီဝင်(၉)ဦးမှာ ဗိုလ်ချုပ်ခွန်သူရိန်က ဥက္ကဋ္ဌ အဖြစ် လည်းကောင်း၊ ခွန်ထွန်းတင်မှ ဒုဥက္ကဋ္ဌ (၁)ဖြင့် လည်းကောင်း၊ ဗိုလ်မှူးချုပ် ခွန်ကျော်ထင်က ဒုဥက္ကဋ္ဌ(၂)ဖြင့်လည်းကောင်း၊ ဗိုလ်မှူးကြီး ခွန်အောင်မန်းက အထွေထွေ အတွင်းရေးမှူးဖြင့် လည်းကောင်း၊ ဗိုလ်မှူးခွန်းမင်းသိမ်းက တွဲဖက်အထွေထွေအတွင်းရေးမှူး(၁)ဖြင့် လည်းကောင်း၊ နန်းယဉ် ယဉ်စိုးက တွဲဖက်အထွေထွေအတွင်းရေးမှူး(၂)ဖြင့် လည်းကောင်း အသီးသီး တာဝန်ယူ ကြမည် ဖြစ်သည်။

အဆိုပါ ထိပ်သီး ရာထူးနေရာများတွင် ယခင်က PNLO ၏ ဥက္ကဋ္ဌ ၊ ဒုဥက္ကဋ္ဌ များအဖြစ် တာဝန်ယူခဲ့သူ ခွန်မြင့်ထွန်း အရွေး ချယ် မခံရသည်ကို တွေ့ရသည်။

လက်ရှိတွင် ခွန်မြင့်ထွန်းသည် ပအိုဝ်းအမျိုးသားများဖက်ဒရယ်ကောင်စီ(PNFC)ကို ဖွဲ့စည်း၍ ဥက္ကဋ္ဌ အဖြစ် တာဝန်ယူ၍ ဆောင်ရွက်နေကြောင်း သိရသည်။