CNI International News
ဝါရှင်တန်၊ ဇူလိုင် ၂၃
အမေရိကန်သမ္မတ ဂျိုးဘိုင်ဒန် (Joe Biden)က သူသည် လာမည့်ရွေးကောက်ပွဲကို ဝင်ပြိုင်တော့မည် မဟုတ် ကြောင်း ကြေညာခဲ့ပြီးနောက် ဒုတိယသမ္မတဖြစ်သည့် ကာမယ်လာဟားရစ် (Kamala Harris)ကို ပါတီကိုယ်စား ပြု သမ္မတရွေးကောက်ပွဲဝင် ကိုယ်စားလှယ်လောင်းအဖြစ် ထောက်ခံပေးရန် ပြောကြားခဲ့သည်ဟု ရိုက်တာမှ ဖော်ပြခဲ့သည်။
သမ္မတရွေးကောက်ပွဲတွင် ရီပတ်ဘလစ်ကန် ကိုယ်စားလှယ်လောင်း ဒေါ်နယ်ထရမ့် (Donald Trump) နှင့် ယှဉ်ပြိုင်ရန် ဟားရစ်အား ဘိုင်ဒင်၏ အဆိုပြုချက်ကို ဒီမိုကရက်အများစုက လျင်မြန်စွာ ထောက်ခံခဲ့ကြသော် လည်း အောက်လွှတ်တော်ဥက္ကဋ္ဌဟောင်း နန်စီပယ်လိုစီ (Nancy Pelosi) အပါအဝင် ဒီမိုကရက်တစ်ပါတီ၏ သြဇာကြီးမားသည့် ပါတီဝင်အချို့က နှုတ်ဆိတ်နေခဲ့ကြသည်။
အကယ်၍ ဟားရစ်သာ ဒီမိုကရက်တစ်ပါတီ ကိုယ်စားပြု သမ္မတရွေးကောက်ပွဲဝင် ကိုယ်စားလှယ်လောင်းအဖြစ် ရွေးချယ်ခံရမည်ဆိုပါက နိုဝင်ဘာလတွင် ပြုလုပ်မည့် ရွေးကောက်ပွဲမတိုင်မီ ရက်ပေါင်း ၁၀၀ သာ ကျန်ရှိတော့ သည့်အချိန်တွင် သူ့အတွက် မဲဆွယ်စည်းရုံးမှုများသည် အတိမ်းအစောင်း မခံနိုင်ဘဲ အရေးကြီးလာလိမ့်မည် ဖြစ်သည်။
ဟားရစ်နဲ့ဘိုင်ဒန်ကို တွေ့ရစဉ်
သို့သော်လည်း ဟားရစ်သည် ထရမ့်ကို ယှဉ်ပြိုင်ပြီး အနိုင်ယူနိုင်ခြေ ရှိ/မရှိအပေါ် ဒီမိုကရက်တစ်ပါတီအတွင်း သံသယများ ထွက်ပေါ်နေပြီး ဒီမိုကရက်အချို့ကမူ ပါတီအနေဖြင့် သြဂုတ်လတွင် ကျင်းပမည့် ပါတီညီလာခံ မတိုင်မီ အသေးစား အစည်းအဝေးတစ်ခု ပြုလုပ်သင့်ကြောင့် တိုက်တွန်းလျက်ရှိသည်။
ဘိုင်ဒန်ကမူ သူနုတ်ထွက်ကြောင်း ကြေညာပြီးနောက် ဟားရစ်ကို ကိုယ်စားလှယ်လောင်းအဖြစ် ထောက်ခံခဲ့ပြီး မကြာမီအချိန်မှာပင် အမေရိကန်လွှတ်တော်အတွင်းမှ အာဖရိကန်-အမေရိကန်နွယ်ဖွား အဖွဲ့ဝင်များ၊ အဓိက အလှူရှင်များ၊ လွှတ်တော်အမတ်များက လျင်မြန်စွာ ထောက်ခံခဲ့ကြသည်။
"ဒီနေ့မှာတော့ ကာမယ်လာကို ကျနော်တို့ ပါတီကိုယ်စားပြု ရွေးကောက်ပွဲဝင် ကိုယ်စားလှယ်လောင်းအဖြစ် ကျနော် အပြည့်အဝ ထောက်ခံကြောင်း ပြသလိုပါတယ်" ဟု ဘိုင်ဒန်က X လူမှုမီဒီယာတွင် ရေးသားခဲ့သည်။
ဟားရစ်ကိုတွေ့ရစဉ်
ထို့ပြင် အမေရိကန်၏ ပြည်နယ် ၅၀ စလုံးမှ ဒီမိုကရက်တစ်ပါတီ ပြည်နယ်ဥက္ကဋ္ဌများကလည်း ဟားရစ်ကို ပါတီ၏ သမ္မတရွေးကောက်ပွဲဝင် ကိုယ်စားလှယ်လောင်းအဖြစ် ထောက်ခံကြလိမ့်မည်ဟု များပြားသည့် သတင်းရင်းမြစ် များကို ကိုးကားပြီး ရိုက်တာမှ ဖော်ပြခဲ့သည်။
အမေရိကန်သမ္မတဟောင်း ဘီလ်ကလင်တန် (Billi Clinton) ၏ ဇနီးဖြစ်ပြီး သမ္မတဘာရက် အိုဘားမား (Barack Obama) လက်ထက်တွင် နိုင်ငံခြားရေးဝန်ကြီးအဖြစ် တာဝန်ထမ်းဆောင်ခဲ့သည့် ဟီလာရီ ကလင်တန် (Hillary Clinton) ကလည်း ဟားရစ်ကို ထောက်ခံကြောင်း ထုတ်ပြန်ခဲ့သည်။
ပယ်လိုစီ၊ အိုဘားမား အပါအဝင် သြဇာကြီးမားသည့် အချို့ဒီမိုကရက်များကမူ ဘိုင်ဒန်၏ မျိုးချစ်စိတ်ဓာတ်ရှိမှုကို ကျေးဇူးတင်ကြောင်း ပြောကြားခဲ့သော်လည်း ဟားရစ်ကို ပါတီကိုယ်စားပြု ကိုယ်စားလှယ်လောင်းအဖြစ် ထောက်ခံကြောင်း ထုတ်ဖော်ပြောဆိုခြင်း မရှိခဲ့ပေ။
Source: ရိုက်တာ
