NUG ဝန်ကြီး ဒေါက်တာလျန်မှုန်းဆာခေါင်းနေအိမ်ကို သိမ်းဆည်း

: By CNI News; Category: နိုင်ငံရေး; Hits: 1013

၂၀၂၁ ခုနှစ်၊ နိုဝင်ဘာ ၁

အမျိုးသားညီညွတ်ရေးအစိုးရ(NUG)တွင် ဖက်ဒရယ်ပြည်ထောင်စုရေးရာဝန်ကြီးအဖြစ်လည်းကောင်း၊ ချင်းအမျိုးသားတပ်ဦး(CNF)၏ ဒုဥက္ကဋ္ဌ(၂)အဖြစ်လည်းကောင်း တာဝန်ထမ်းဆောင်လျက်ရှိသည့် ဒေါက်တာလျန်မှုန်းဆာခေါင်း နေအိမ်အား နစက-က သိမ်းဆည်းလိုက်ကြောင်း သိရသည်။

ချင်းပြည်နယ်၊ ဟားခါးမြို့ရှိ ဒေါက်တာလျန်မှုန်းဆာခေါင်း၏ နေအိမ်အား ပုဒ်မ ၅၆ အရ နိုင်ငံတော်ဘဏ္ဍာအဖြစ် သိမ်းဆည်းမည်ဟု နစက၏ သက်ဆိုင်ရာအာဏာပိုင်များက စာကပ်ထားသည်။

အဆိုပါ စာတွင် “ယခုနေအိမ်သည် အကြမ်းဖက်မှု ကျူးလွန်သူ တစ်ဦးအား ပုန်းအောင်းခွင့်ပေးခြင်းနှင့် ယာယီ နေထိုင်ခွင့်ပေးကြောင်း ဖော်ထုတ်ရရှိသည့်အတွက် အကြမ်းဖက်မှု တိုက်ဖျက်ရေးဥပဒေပုဒ်မ ၅၂ အရ နေအိမ် အဆောက်အဦ ပိုင်ရှင်အား တရားစွဲဆိုသည့်အပြင် ပုဒ်မ ၅၆ အရ နေအိမ် အဆောက်အဦအား နိုင်ငံတော် ဘဏ္ဍာအဖြစ် သိမ်းဆည်းမည်ဖြစ်သည်”ဟု ဖော်ပြထားသည်။

ဒေါက်တာလျန်မှုန်းဆာခေါင်းကတော့ ဟားခါးမြို့ရှိ မိမိ၏ နေအိမ်ကို သိမ်း ဆည်း သွားကြောင်း သူ၏ လူမှု ကွန်ရက် စာမျက်နှာပေါ်တွင် တရားဝင် ရေး သားဖော်ပြထားသည်။

၎င်းက "ဟားခါးမြို့ရှိ ကျနော့နေအိမ်ကို မင်းအောင်လှိုင်နဲ့ ၎င်းရဲ့စစ်တပ်ကသိမ်းဆည်း/လုယူသွားပါတယ်။ တိုင်းပြည်နဲ့ နိုင်ငံသားများ လွတ်မြောက်နိုင်ရေးအတွက် ကျနော်တို့မှာ ရှိရှိသမျှအကုန်ပေးဆပ်ရပါတယ်။ အိမ်နဲ့ ပိုင်ဆိုင်မှု တွေကို သူတို့သိမ်းယူလို့ရပေမယ့် ကျနော်တို့ရဲ့ တော်လှန်ရေး စိတ်ဓာတ်နဲ့ ဝိညာဉ်ကိုတော့ ဘယ် တော့မှ သိမ်းပိုက်လို့မရပါဘူး"ဟု ရေးသားဖော်ပြထားသည်။

အကြမ်းဖက်တိုက်ဖျက်ရေးဥပဒေပုဒ်မ ၅၆ တွင် တရားရုံးသည် အကြမ်းဖက်မှု သို့မဟုတ် အကြမ်းဖက်မှုကို ငွေကြေး ထောက်ပံ့မှုဆိုင်ရာ ပြစ်မှုဖြင့် ပြစ်ဒဏ်ချမှတ်လျှင် သက်သေခံ ပစ္စည်းအဖြစ် သိမ်းဆည်းထားသော ငွေကြေးနှင့် ပစ္စည်းများကို နိုင်ငံတော်ဘဏ္ဍာအဖြစ် သိမ်းယူခြင်း သို့မဟုတ် သတ်မှတ်ချက်နှင့်အညီ စီမံ ခန့်ခွဲ ခြင်းပြုသည့် အမိန့်ချမှတ်ရမည်ဟု ပြဋ္ဌာန်းပါရှိသည်။

အဆိုပါ ဖြစ်စဉ်နှင့်ပတ်သက်ပြီး နစက သတင်းထုတ်ပြန်ရေးအဖွဲ့ထံ CNI သတင်းဌာနက မေးမြန်းထားသော် လည်း ပြန်လည်ဖြေကြားခြင်းမရှိသေးပေ။