CNI International News

၂၀၂၂ ခုနှစ်၊ ဇူလိုင် ၈

- ၁၉၅၄ ခုနှစ်၊ စက်တင်ဘာ ၂၁ ရက်တွင် ဂျပန်နိုင်ငံ၊ တိုကျိုမြို့၌ ဖွားမြင်
- ၁၉၇၇ ခုနှစ်တွင် စီကိုင်းတက္ကသိုလ်မှ ဘွဲ့ရ
- ၁၉၈၂ ခုနှစ်တွင် နိုင်ငံခြားရေးဝန်ကြီး၏ လက်ထောက်တစ်ဦးဖြစ်လာ
- ၁၉၉၃ ခုနျစ်တွင် လွှတ်တော်အမတ်အဖြစ် ရွေးကောက်တင်မြှောက်ခံရ
- ၁၉၉၉ ခုနှစ်တွင် လူမှုရေးရာဌာနခွဲ၏ ညွှန်ကြားမှူးဖြစ်လာ
- ၂၀၀၀ ပြည့်နှစ်မှ ၂၀၀၃ ခုနှစ်အထိ ယိုရှီရိုမိုရီနှင့် ဂျူနီချီရိုကိုအိဇုမိ၏အစိုးရအဖွဲ့တွင် ဒုတိယအစိုးရအတွင်းဝန်ချုပ်တာဝန်ယူ
- လစ်ဘရယ်ဒီမိုကရက်တစ်ပါတီ (LDP) ၏ ဥက္ကဋ္ဌဖြစ်လာ
- ၂၀၀၆ ခုနှစ်၊ စက်တင်ဘာ ၂၀ ရက်တွင် ဂျပန်နိုင်ငံ၏ အယောက် ၉၀ မြောက် ဝန်ကြီးချုပ်အဖြစ် ခန့်အပ်ခံရ
- ၂၀၀၇ ခုနှစ်၊ စက်တင်ဘာတွင် ကျန်းမာရေးအခြေအနေအရ ရာထူးမှ အနားယူ
- ၂၀၁၂ ခုနှစ်၊ ဒီဇင်ဘာတွင် ဝန်ကြီးချုပ်ရာထူး ဒုတိယသက်တမ်း ခန့်အပ်ခံရ
- ၂၀၂၀ ပြည့်နှစ်၊ စက်တင်ဘာတွင် ကျန်းမာရေးကြောင့်ပင် ရာထူးမှ နုတ်ထွက်
- ၂၀၂၂ ခုနှစ်၊ ဇူလိုင် ၈ ရက်တွင် နာရာမြို့တွင် သေနတ်သမားတစ်ဦး၏ လုပ်ကြံမှုကြောင့် ကွယ်လွန်

CNI International News

တိုကျို၊ ဇူလိုင် ၈

ဂျပန်ဝန်ကြီးချုပ်ဟောင်း ရှင်ဇိုအာဘေးသည် လွှတ်တော်ရွေးကောက်ပွဲအတွက် မဲဆွယ်စည်းရုံးစဉ် သေနတ်ဒဏ်ရာဖြင့် ဇူလိုင် ၈ ရက် (ယနေ့) ကွယ်လွန်သွားခဲ့ပြီဖြစ်ကြောင်း တိုကျိုမှလာသော သတင်းများကို စုစည်း၍ Channel News Asia က ဖော်ပြ သည်။

“ရှင်ဇိုအာဘေးကို နေ့လယ် ၁၂ နာရီ ၂၀ မိနစ်မှာ ဆေးရုံကို ပို့ခဲ့ပါတယ်။ ရောက်တာနဲ့ နှလုံးရပ်သွားပါတယ်” ဟု နာရာ ဆေးတက္ကသိုလ်၏ ဆေးရုံမှ အရေးပေါ်ဌာန၊ ဆေးပညာပါမောက္ခ ဟီဒီတာဒါဖူကူရှီးမား (Hidetada Fukushima) က အတည်ပြု ပြောကြားခဲ့သည်။

ရှင်ဇိုအာဘေးကို ဆေးရုံ ခေါ်သွားစဉ် (AP)

“အသက်ကယ်တင်ဖို့ ကြိုးစားကြည့်ပါတယ်။ ဒါပေမယ့် ကံမကောင်း အကြောင်းမလှတော့ (ဂျပန်စံတော်ချိန်) ညနေ ၅း၀၃ နာရီမှာ ကွယ်လွန်သွားခဲ့ပါပြီ” ဟု ၎င်းက သတင်းထောက်များကို ဆက်လက် ပြောကြားခဲ့သည်။

အာဘေးသည် ဂျပန်နိုင်ငံ၊ အနောက်ပိုင်းရှိ နာရာမြို့တွင် မဲဆွယ်စည်းရုံးရေး မိန့်ခွန်းပြောနေစဉ် သေနတ်သမားတစ်ဦး၏ ပစ်ခတ်ခြင်း ခံခဲ့ရပြီးနောက် ၎င်းကို ရဟတ်ယာဉ်ဖြင့် ဆေးရုံသို့ အရေးပေါ် ပို့ဆောင်ခဲ့သည်။

သို့သော် ဆေးရုံရောက်ချိန်မှာ အာဘေး၏ လည်ပင်းနှင့် ရင်ဘတ်၌ ကျည်ဆန်ဒဏ်ရာများ ရရှိခဲ့သည်။ ကျည်ဆန်တစ်တောင့် သည် ၎င်း၏ ဘယ်ဘက်ပခုံးမှတဆင့် ဝင်ရောက်သွားပုံရသည်။

သွေးအမြောက်အမြား သွင်းခဲ့သော်လည်း သွေးထွက်လွန်နေ ပြီဖြစ်၍ သေဆုံးကြောင်း ဝမ်းနည်းစွာဖြင့် အတည်ပြုခဲ့ရသည် ဟု ပါမောက္ခ ဖူကူရှီးမားက ရှင်းပြခဲ့သည်။

အာဘေး သေဆုံးမှုနှင့်ပတ်သက်၍ မိသားစုထံ အကြောင်းကြားခဲ့ရာ ဝန်ကြီးချုပ်ဟောင်း အာဘေး၏ဇနီး အကီအာဘေး (Akie Abe) သည် ဇူလိုင် ၈ ရက် မွန်းလွဲပိုင်းတွင် ဆေးရုံသို့ ရောက်ရှိလာခဲ့ကြောင်း ဖူကူရှီးမားက ဆက်လက် ပြောကြားခဲ့သည်။

အသက် ၆၇ နှစ်အရွယ်ရှိ အာဘေးသည် ယနေ့(ဇူလိုင် ၈ ရက်) နံနက် ၁၁ နာရီခွဲခန့်တွင် နာရာမြို့၊ မီးရထားဘူတာရုံ အနီးတွင် မိန့်ခွန်းပြောနေစဉ် အကြမ်းဖက်သမား၏ ပစ်ခတ်ခြင်းကို ခံခဲ့ရကြောင်း ဂျပန် NHK ရုပ်သံလိုင်းမှ ထုတ်လွှင့်သည့် ဗွီဒီယိုဖိုင် အရ သိရသည်။

အဆိုပါ ဗွီဒီယိုဖိုင်ထဲတွင် ကျယ်လောင်သော မီးခိုးငွေ့များနှင့်အတူ ပေါက်ကွဲသံကို ကြားလိုက်ရချိန်၌ အာဘေးသည် စင်မြင့် ပေါ်တွင် မတ်ရပ်နေသည်ကို တွေ့ရသည်။

ရှင်ဇိုအာဘေးကို လုပ်ကြံသူဟု သံသယရှိသူကို ဖမ်းနေစဉ် 

ပစ်ခတ်မှုကျူးလွန်ကြောင်း သံသယရှိသူ အသက် ၄၁ နှစ်အရွယ် အမျိုးသားတစ်ဦးကို ဖမ်းဆီးထားသည်ဟု ရဲတပ်ဖွဲ့က ပြောသည်။

ယာမာဂမီ တက်ဆူယ (Yamagami Tetsuya) ဟု သိရသော အဆိုပါ သံသယရှိသူသည် အာဘေးကို မကျေနပ်၍ ယခုကဲ့သို့ သတ်ဖြတ်ခဲ့ခြင်းဖြစ်ကြောင်း ရဲတပ်ဖွဲ့ကို ဝန်ခံပြောကြားခဲ့သည်။

ယခုဖြစ်စဉ်သည် ဒုတိယကမ္ဘာစစ်ကြိုခေတ် ၁၉၃၀ ပြည့်လွန် နှစ်များကတည်းက ဂျပန်နိုင်ငံတွင် တစ်ကြိမ်မှ မကြုံခဲ့ဖူးသော ဝန်ကြီးချုပ်ဟောင်းတစ်ဦးကို လုပ်ကြံသတ်ဖြတ်မှု ဖြစ်သည်။

အာဘေး ကွယ်လွန်ကြောင်း မကြေညာမီတွင် ဂျပန်နိုင်ငံ၏ လက်ရှိဝန်ကြီးချုပ် ဖူမီယိုကီရှီဒါက အဆိုပါ ပစ်ခတ်လုပ်ကြံမှုကို အပြင်းထန် ဆုံး ရှုတ်ချခဲ့သည်။

နိုင်ငံရေး အကြမ်းဖက်မှု ရှားပါးပြီး သေနတ်ကိုင်ဆောင်ခြင်းအား တင်းကျပ်စွာ ထိန်းချုပ်ထားသည့် နိုင်ငံ၌ ယခုကဲ့သို့ သွေးထွက် သံယိုမှုကြောင့် ဂျပန်ပြည်သူများနှင့်အတူ ကမ္ဘာ့ခေါင်းဆောင်များလည်း တုန်လှုပ်ခြောက်ခြားသွားကြောင်း ဖူမီယို ကီရှီဒါက ထုတ်ဖော်ပြောဆိုခဲ့သည်။

“ဒီတိုက်ခိုက်မှုဟာ ရွေးကောက်ပွဲ ကာလအတွင်း ဖြစ်ပျက်ခဲ့ရတဲ့ ရက်စက်ကြမ်းကြုတ်လှတဲ့ လုပ်ရပ်တစ်ခုဖြစ်ပြီးတော့ ကျနော်တို့ရဲ့ ဒီမိုကရေစီအခြေခံအုတ်မြစ်ကို ထိပါးရာရောက်လို့ လုံးဝခွင့်မလွှတ်နိုင်ပါဘူး” ဟု ၎င်းက ဆက်လက် ပြောကြား ခဲ့သည်။

သေနတ်သမားဟု သံသယရှိသူ အမျိုးသားမှာ နာရာမြို့ခံ တစ်ဦးဖြစ်ကြောင်း ရဲတပ်ဖွဲ့က ပြောသည်။

ပစ်ခတ်မှုတွင် ၎င်းသုံးစွဲသည့် သေနတ်မှာ လက်လုပ် သေနတ်ဖြစ်ကြောင်း NHK က အစောပိုင်း၌ သတင်းဖော်ပြခဲ့သည်။ ၎င်းသည် ရေကြောင်းကိုယ်ပိုင်ကာကွယ်ရေးတပ်ဖွဲ့၏ အဖွဲ့ဝင်ဟောင်း တစ်ဦးဖြစ်ကြောင်း မီဒီယာများက ရေးသားကြသည်။

အာဘေး၏ ညီဖြစ်သူ ကာကွယ်ရေးဝန်ကြီး နိုဘူရိုကီရှီ (Nobuo Kishi) က ယခုဖြစ်စဉ်အပေါ် သဘောထား မှတ်ချက်ပေးရန် ငြင်းဆိုခဲ့သည်။

ရှင်ဇိုအာဘေး လုပ်ကြံခံရမှုသတင်း NHK လွှင့်နေစဉ်(AP)

“ကျယ်လောင်တဲ့ ပေါက်ကွဲသံကြီး ကြားရပြီးတော့ မီးခိုးတွေ ထွက်လာတယ်” ဟု အခင်းဖြစ်ပွားရာ နေရာတွင် ရှိနေသည့် စီးပွားရေး လုပ်ငန်းရှင်တစ်ဦးဖြစ်သူ မာကိုတာအီချီကာဝါက ရိုက်တာသတင်းဌာနသို့ ပြောကြားခဲ့သည်။

“ပထမ ပစ်ခတ်တုန်းကတော့ ဘာဖြစ်လို့ ဖြစ်သွားမှန်း ဘယ်သူမှ မသိခဲ့ကြပေမယ့် နောက်တစ်ချက် ထပ်ပစ်တော့ အထူးရဲ တွေက သူ့ကို ဖမ်းချုပ်လိုက်ပုံ ရပါတယ်” ဟု ၎င်းက ပြောကြားခဲ့သည်။

အာဘေးသည် လည်ပင်းနှင့် ဘယ်ဘက် ညှပ်ရိုးတို့တွင် ဒဏ်ရာများရခဲ့ကြောင်း နာရာမြို့ မီးသတ်တပ်ဖွဲ့ အရေးပေါ်ဌာနက ပြောကြားခဲ့သည်။

၎င်း၏အစ်ကိုအား သွေးသွင်းကုသနေကြောင်း အစောပိုင်းက အာဘေးညီဖြစ်သူ ကီရှီက ပြောသည်။

အာဘေး၏ဇနီး အကီသည် ခင်ပွန်းသည် ကုသမှုခံယူနေသည့် ဆေးရုံသို့ မီးရထားဖြင့် ချက်ချင်းသွားရောက်ခဲ့ရာ လမ်း တလျှောက်တွင် NHK သတင်းဌာနက တိုက်ရိုက် ဗွီဒီယို ရိုက်ကူးပြသခဲ့သည်။

ဝါဒီဒါတက္ကသိုလ်မှ နိုင်ငံရေးသိပ္ပံပါမောက္ခ Airo Hino က “ဒီလို ပစ်ခတ်လုပ်ကြံမှုဟာ ဂျပန်နိုင်ငံမှာ မကြုံစဖူး ကြုံဖူးလိုက်ပြီ။ ဒီလိုမျိုး တစ်ခါမှ မဖြစ်ဖူးသေးဘူး” ဟု မှတ်ချက်ခဲ့သည်။

“ဝန်ကြီးချုပ်ဟောင်း ရှင်ဇိုအာဘေးရဲ့ ပစ်သတ်ခံရမှုကြောင့် ကျနော်တို့အားလုံး ဝမ်းနည်းပြီး တုန်လှုပ်မိပါတယ်” ဟု ဂျပန် နိုင်ငံဆိုင်ရာ အမေရိကန် သံအမတ်ကြီး ရာဟန်အီမန်နွယ် (Rahm Emanuel) က အာဘေး ကွယ်လွန်ကြောင်း အတည်ပြု မကြေညာမီ၌ ကြေညာချက် ထုတ်ပြန်ခဲ့သေးသည်။

  ရှင်ဇိုအာဘေး လုပ်ကြံခံရတဲ့ နေရာကို အပေါ်က မြင်ရစဉ် (AP

အမေရိကန် နိုင်ငံခြားရေးဝန်ကြီး အန်တိုနီဘလင်ကင် (Antony Blinken) က အဆိုပါ ပစ်ခတ်မှုနှင့် ပတ်သက်၍ ဝမ်းနည်းမိပါ ကြောင်း ပြောကြားခဲ့ပါသည်။

“ဒါဟာ အင်မတန် ဝမ်းနည်းစရာကောင်းတဲ့ အခိုက်အတန့်ပါ” ဟု အင်ဒိုနီးရှားနိုင်ငံ၊ ဘာလီကျွန်းတွင် ကျင်းပနေသည့် G-20 အစည်းအဝေးသို့ တက်ရောက်နေသူ ဘလင်ကင်က သတင်းထောက်များကို ပြောကြားခဲ့သည်။

အမေရိကန်ပြည်ထောင်စု အနေဖြင့် အလွန်ဝမ်းနည်းကြေကွဲပါကြောင်း၊ စိုးရိမ်မကင်းဖြစ်မိကြောင်း ၎င်းက ဆက်လက် ပြောကြားခဲ့သည်။

“ဝန်ကြီးချုပ်ဟောင်း ရှင်ဇိုအာဘေးအတွက် ကျနော်တို့ အလေးအနက်ထား၊ လေးစားတဲ့ အထိမ်းအမှတ်အဖြစ် ၂၀၂၂ ခုနှစ်၊ ဇူလိုင် ၉ ရက် (မနက်ဖြန်) မှာ အမျိုးသားရေး ဝမ်းနည်းကြောင်း တစ်ရက် သတ်မှတ်သွားမှာပါ” ဟု အိန္ဒိယဝန်ကြီးချုပ် နရိန္ဒရာမိုဒီက ၎င်း၏တွစ်တာစာမျက်နှာတွင် ရေးသားခဲ့သည်။

အလားတူ ယခုရက်ပိုင်း နုတ်ထွက်သွားပြီဖြစ်သည့် ဗြိတိန်ဝန်ကြီးချုပ် ဘောရစ်ဂျွန်ဆင်ကလည်း “ရှင်ဇိုအာဘေးနဲ့ ပတ်သက် ပြီး အလန့်တကြားသတင်း ကြားလိုက်ရပါတယ်။ ပြန်လည် အစားထိုး မရနိုင်တဲ့ ကာလတလျှောက် သူ့ရဲ့ ကမ္ဘာ့အခန်းကဏ္ဍ မှာ ဦးဆောင်ခဲ့ပုံတွေကို လူတွေ သတိရနေကြဦးမှာပါ။ ကျနော့် အတွေးထဲမှာ သူ့မိသားစု၊ မိတ်ဆွေတွေနဲ့ ဂျပန်ပြည်သူတွေ ရှိနေကြပါတယ်။ အခုလို မှောင်မိုက်ပြီး အင်မတန် ဝမ်းနည်းစရာကောင်းတဲ့ ကာလမှာ ဗြိတိန်ကလည်း ဂျပန်ပြည်သူတွေနဲ့ အတူ ရှိနေမှာပါ” ဟု တွစ်တာပို့စ်တစ်ခု ရေးသားလွှင့်တင်ခဲ့သည်။

Ref: Channel News Asia, News Agencies and Social Media

CNI International News

တိုကျို၊ ဇူလိုင် ၈

ဂျပန်ဝန်ကြီးချုပ်ဟောင်း ရှင်ဇိုအာဘေးသည် လူထုစည်းရုံးဟောပြောမှု တစ်ခု လုပ်နေစဉ် လုပ်ကြံပစ်ခတ်ခံခဲ့ရပြီးနောက် သေဆုံးသွားကြောင်း NHK ဂျပန်ရုပ်သံလိုင်းက ထုတ်လွှင့်ခဲ့သည်။

ရှင်ဇိုအာဘေးသည် လုပ်ကြံခံရမှု ဒဏ်ရာဖြင့် အရေးပေါ်ဆေးကုသမှု ခံယူနေသည့်ဆေးရုံမှာပင် ယနေ့မွန်းလွဲပိုင်း၌ ကွယ်လွန် အနိစ္စရောက်သွားခဲ့ခြင်း ဖြစ်သည်။

၎င်းသည် မကြာမီ ကျင်းပတော့မည့် အထက်လွှတ်တော် ရွေးကောက်ပွဲအတွက် မဲဆွယ်စည်းရုံး ဟောပြောနေစဉ် ယနေ့ (ဇူလိုင် ၈ ရက်) ဒေသစံတော်ချိန် နံနက် ၁၁ နာရီ ၃၀ မိနစ်ခန့်တွင် ဂျပန်နိုင်ငံအနောက်ပိုင်း နာရာမြို့ရှိ လမ်းပေါ်တစ်နေရာ တွင် သေနတ်ဖြင့် ပစ်သတ် လုပ်ကြံခံခဲ့ရ ခြင်းဖြစ်သည်။

ကွယ်လွန်ချိန်၌ အာဘေးသည် အသက် ၆၇ နှစ်ရှိပြီဖြစ်သည်။

ရှင်ဇိုအာဘေးသည် လစ်ဘရယ်ဒီမိုကရက်တစ်ပါတီ (LDP) ခေါင်းဆောင်ဟောင်းဖြစ်ပြီး ၂၀၀၆ ခုနှစ်မှ ၂၀၀၇ ခုနှစ်အထိ တစ်ကြိမ်၊ ၂၀၁၂ ခုနှစ်မှ ၂၀၂၀ ပြည့်နှစ်အထိ နောက်ထပ်တစ်ကြိမ် စုစုပေါင်း နှစ်ကြိမ်ဆက်တိုက် ဝန်ကြီးချုပ်အဖြစ် တာဝန် ထမ်းဆောင် ခဲ့ရာ ဂျပန်နိုင်ငံ၏ သက်တမ်းအရှည်ဆုံး ဝန်ကြီးချုပ်ဟု အသိအမှတ်ပြုကြသည်။

ရှင်ဇိုအာဘေး လုပ်ကြံသူကို ဖမ်းဆီးနေစဉ် 

ထို့နောက် ရှင်ဇိုအာဘေးသည် ကျန်းမာရေး အခြေအနေကြောင့် ဝန်ကြီးချုပ်ရာထူးမှ နုတ်ထွက်ခဲ့သည်။

နာရာမြို့ရှိ ယခု အခင်းဖြစ်ပွားရာ နေရာသို့ အရေးပေါ်ယာဉ်များ ရောက်ရှိလာသည့် ဓာတ်ပုံကို ဝေဟင်မှ ရိုက်ကူးခဲ့ပြီး ဂျပန် မီဒီယာများက ထုတ်လွှင့်ခဲ့ကြသည်။

NHK မှ ထုတ်လွှင့်သော ဗွီဒီယိုဖိုင်ထဲတွင် အာဘေးသည် မဲဆွယ်စည်းရုံးရေး မိန့်ခွန်းပြောနေစဉ် နောက်ကျ လက်လုပ် သေနတ်ဖြင့် ပစ်ခတ်ခံခဲ့ရပြီး လဲကျသွားခဲ့သည်။ ထို့နောက် ရှင်ဇိုအာဘေး အနီးရှိ လူတစ်ဦးကို ရဲများက လုံးထွေးသတ်ပုတ်၍ လမ်းပေါ်ခေါ်ဆောင်လာကြောင်း တွေ့ရသည်။

အာဘေးသည် လာမည့် ဇူလိုင် ၁၀ ရက်၌ ကျင်းပမည့် အထက်လွှတ်တော် ရွေးကောက်ပွဲမတိုင်မီ LDP ပါတီမှ ကိုယ်စားလှယ် လောင်းများကို ထောက်ခံကြဖို့အကြောင်း မိန့်ခွန်းပြောကြားနေခြင်း ဖြစ်သည်။

ထိုမိန့်ခွန်းပြောပြီးလျှင် ၎င်းသည် မြို့တော် တိုကျိုအနီးရှိ ကျိုတိုနှင့် ဆိုင်တာမားခရိုင်များသို့ ဆက်လက် သွားရောက်ရန် စီစဉ် ထားသော်လည်း ယခုဖြစ်စဉ်နှင့် ကြုံခဲ့ရသည်။

Source: CNN

CNI International News

မော်စကို၊ ဇူလိုင် ၈

ရုရှားသမ္မတ ဗလာဒီမာပူတင်က ယူကရိန်းစစ်မြေပြင်တွင် ရုရှားကို အနောက်အုပ်စုနိုင်ချင်သလား စမ်းကြည့် လိုက်ပါဟု စိန်ခေါ်ခဲ့ကြောင်း အယ်လ်ဂျာဇီးယားက ရေးသားဖော်ပြခဲ့သည်။

“ဒီနေ့စစ်မြေပြင်မှာ သူတို့က ကျနော်တို့ကို အနိုင်ယူချင်တယ်လို့ကြားတယ်။ ခင်ဗျားတို့ ဘာပြောနိုင်မလဲ။ စမ်းကြည့်ကြပါစို့” ဟု ၎င်းက စိန်ခေါ်ခဲ့သည်။

ထို့နောက် ယူကရိန်းတွင် မော်စကို(ရုရှား)၏ စစ်ရေးစွက်ဖက်မှုမှာ ဝင်ရိုးဘက်စုံကမ္ဘာ (multi-polar world) ကူးပြောင်းရောက်ရှိသွားပြီဖြစ်ကြောင်း ပူတင်ကပြောသည်ဟု အယ်လ်ဂျာဇီးယားက ဆက်လက်ဖော်ပြထား သည်။

ယူကရိန်းတွင် ရုရှားဆင်နွှဲနေသော စစ်မှာ အစသာရှိသေးကြောင်း၊ မော်စကိုသည် ငြိမ်းချမ်းရေး ဆွေးနွေးရန် စိတ်ကူးစိတ်သန်းကို တံခါးဖွင့်ထားဆဲဖြစ်ကြောင်း ပူတင်က ဇူလိုင် ၇ ရက်တွင် ပြောကြားခဲ့သည်။

ယူကရိန်းသို့ ရုရှားကျူးကျော်ဝင်ရောက်ပြီး ၄ လကျော်အကြာ ဇူလိုင် ၇ တွင် လွှတ်တော်အကြီးအကဲများ ရှေ့မှောက်၌ ရန်လို၍ ရင့်သီးသောမိန့်ခွန်းတစ်ရပ်ပြောကြားခဲ့ရာ ပူတင်က “ပဋိပက္ခကြာရှည်လာသည်နှင့်အမျှ စေ့စပ်ညှိနှိုင်းရေးတစ်ခုအတွက် အလားအလာတိုးလာမည်” ဟု ထည့်သွင်းပြောကြားခဲ့သည်။

ရုရှားသမ္မတ ဗလာဒီမာပူတင်(ဓါတ်ပုံ-ရိုက်တာ)

“အနောက်အုပ်စု ကျနော်တို့ကို ယူကရိန်းကြားခံထားပြီး တိုက်ချင်နေတာလို့ ခဏခဏ ကြားဖူးပါတယ်။ ဒါဟာ ယူကရိန်းပြည်သူတွေအေတွက် ကြေကွဲစရာဖြစ်ပေမယ့် အရာအားလုံးက အဲဒီဘက်ကိုပဲ ဦးတည်သွားနေပုံ

ရတယ်ဗျ” ဟု ပူတင်က ဆက်လက်ပြောကြားခဲ့သည်။

အနောက်အုပ်စုသည် မိမိတို့နိုင်ငံကို ဒဏ်ခတ်ပိတ်ဆို့မှုချမှတ်ပြီး ယူကရိန်းကို ခေတ်မီလက်နက်များ ထောက်ပံ့ နေခြင်းအားဖြင့် မိမိတို့ကို ဆန့်ကျင်သည့်စစ်ပွဲ ဆင်နွှဲနေကြောင်း ရုရှားနိုင်ငံက စွပ်စွဲထားသည်။

သို့သော် ရုရှားသည် ယခုစစ်ပွဲနှင့်ပတ်သက်၍ နောက်တစ်ဆင့်‌ တက်လှမ်းနေပြီဟု ကြွားလုံးထုတ်ချိန်နှင့် တပြိုင် တည်းမှာပင် ပူတင်က စေ့စပ်ညှိနှိုင်းရေးဖြစ်နိုင်ခြေကို ရည်ညွှန်းပြောကြားလာခဲ့သည်။

“ကျနော်တို့က ဘာမှ ပြင်းပြင်းထန်ထန် မစသေးဘူးဆိုတာ လူတိုင်းသိသင့်တယ်” ဟု ၎င်းက ပြောကြားခဲ့သည်။

“တစ်ချိန်တည်းမှာပဲ ငြိမ်းချမ်းရေးဆွေးနွေးပွဲဆိုတာကို ကျနော်တို့မငြင်းပါဘူး။ ဒါပေမယ့် သူတို့(အနောက်အုပ်စု) အပေါ် ငြင်းတဲ့သူတွေ ဒီထက် ပိုများလေလေ၊ ကျနော်တို့နဲ့ ညှိဖို့ ပိုခက်လေလေ ဖြစ်လာမယ်ဆိုတာ သိထားဖို့ပါ” ဟု ၎င်းက ထပ်လောင်းပြောကြားခဲ့သည်။

အနောက်အုပ်စု၏ ဒဏ်ခတ်ပိတ်ဆို့မှုများသည် အခက်အခဲများ ဖန်တီးနေခြင်းမှာ ထင်ရှားကြောင်း ပူတင်က ပြောကြားခဲ့သော်လည်း “ရုရှားကို စီးပွားပျက်‌အောင် စတင်လုပ်ဆောင်တဲ့သူတွေရဲ့ တွက်ကိန်း လုံးဝမှားသွား မည်” ဟု ဒူးမားလွှတ်တော်သို့ ချပြခဲ့သည်။

Source: Aljazeera

CNI International News

ဂျကာတာ ဇူလိုင် ၈

ကမ္ဘာ့အချမ်းသာဆုံးနှင့် အင်အားအကြီးဆုံး ဖွံ့ဖြိုးဆဲနိုင်ငံများမှ ထိပ်တန်း သံတမန်များသည် ယူကရိန်းတွင် ရုရှား၏ ကျူးကျော်စစ် အဆုံးသတ်ရေးအတွက် အိမ်ရှင်ဖြစ်သူ အင်ဒိုနီးရှားနိုင်ငံ၏ ပန်ကြားချက်ဖြင့် ယနေ့ (ဇူလိုင် ၈ ရက်) G-20 အစည်း အဝေးကို စတင်လိုက်ကြောင်း အေပီက ရေးသားထားသည်။

အဆိုပါ G-20 သည် စက်မှု ထိပ်သီး နိုင်ငံပေါင်း ၂၀ ကို ကိုယ်စားပြု ဖွဲ့စည်းထားခြင်း ဖြစ်သည်။

ကိုရိုနာဗိုင်းရပ်စ် ကပ်ရောဂါ၏ သက်ရောက်မှု အပါအဝင် ယူကရိန်းစစ်ပွဲ၏ လှိုင်းဂယက်များက ယခုအစည်းအဝေးတွင် သက်ရောက်မှုရှိနေကြောင်း အိမ်ရှင်ဖြစ်သူ အင်ဒိုနီးရှား နိုင်ငံခြားရေးဝန်ကြီး ရက်နိုမာဆုဒီ (Retno Marsudi) က အစည်း အဝေး အဖွင့်မိန့်ခွန်းတွင် ထည့်သွင်း ပြောကြားခဲ့သည်။

ရုရှားနိုင်ငံခြားရေးဝန်ကြီး ဆာဂျေလာဗရော့ (Sergey Lavrov) ၊ တရုတ်နိုင်ငံခြားရေးဝန်ကြီး ဝမ်ယိ (Wang Yi) ၊ အမေရိကန် နိုင်ငံခြားရေးဝန်ကြီး အန်တိုနီဘလင်ကင် (Antony Blinken) နှင့် ဥရောပနိုင်ငံများမှ သံတမန်များ ပါဝင်ကြသည့် G-20 အဖွဲ့ အတွင်း စည်းလုံးညီညွတ်ကြရန် ၎င်းက မေတ္တာရပ်ခံ ပန်ကြားခဲ့သည်။

ရုရှားနိုင်ငံခြားရေးဝန်ကြီး ဆာဂျေလာဗရော့နဲ့ ရက်နိုမာဆုဒီကိုတွေ့ရစဉ် (AP)

“ကမ္ဘာကြီးမှာ ကပ်ရောဂါဘေးကနေ သိပ်မကောင်းလာသေးပေမယ့်လည်း ကျမတို့ဟာ ယူကရိန်းစစ်ဆိုတဲ့ နောက်ထပ် အကျပ်အတည်း တစ်ခုနဲ့ ရင်ဆိုင်နေရပါတယ်။ ဒီလို လှိုင်းဂယက်တွေရဲ့ သက်ရောက်မှုကို တကမ္ဘာလုံးမှာ အစားအစာ၊ စွမ်းအင်နဲ့ ရုပ်ပိုင်းဆိုင်ရာ နေရာတွေမှာ လွှမ်းခြုံခံစားနေကြရပါတယ်” ဟု ၎င်းက ဆက်လက် ပြောကြားခဲ့သည်။

ယခုအခါ ဆင်းရဲနွမ်းပါးပြီး ဖွံ့ဖြိုးဆဲနိုင်ငံများသည် ယူကရိန်းစစ်ပွဲ၏ ဂယက်ကြောင့် ဖြစ်ပေါ်လာသော လောင်စာဆီနှင့် ဂျုံစပါး ပြတ်လပ်မှုများနှင့် ရင်ဆိုင်နေရကြောင်း ရက်နိုမာဆုဒီက သဘောထား မှတ်ချက်ပေးခဲ့သည်။

G-20 အဖွဲ့သည် အဆိုပါ ပြဿနာများကို ကိုင်တွယ်ဖြေရှင်းရန် (သို့မဟုတ်) ဒုတိယကမ္ဘာစစ်အပြီး ပေါ်ပေါက်လာသော နိုင်ငံပေါင်းစုံ စည်းမျဉ်းများအပေါ် အခြေခံသည့် နိုင်ငံတကာအစီအစဉ် (the multilateral rules-based international order) နှင့်စပ်လျဉ်း၍ ကမ္ဘာ့ယုံကြည်မှု ပျက်ပြားစေလာမည့် အန္တရာယ်အတွက် တာဝန်ယူရန် လိုအပ်ကြောင်း ၎င်းက ထပ်လောင်း ပြောကြားခဲ့သည်။

ယူကရိန်းစစ်ပွဲသည် နိုင်ငံတကာ အစီအစဉ်ကို ယိမ်းယိုင်စေကြောင်း ရက်နိုမာဆုဒီက ပြောကြားနေစဉ်အတွင်း ရုရှား နိုင်ငံခြားရေးဝန်ကြီး လာဗရော့သည် ဆော်ဒီအာရေဗျနှင့် မက္ကစီကိုနိုင်ငံများမှ ဝန်ကြီးများကြားတွင် ထိုင်နေပြီး တစုံတရာ တီးတိုးပြောဆိုခြင်းမရှိဘဲ စာရွက်များကိုသာ ဟိုလှန်၊ သည်လှန်လုပ်နေပုံရကြောင်း အေပီသတင်းတွင် ဆက်လက် ရေးသား ထားသည်။

 ယူကရိန်းစစ်ပွဲ 

ရက်နိုမာဆုဒီက “ရိုးရိုးသားသား ပြောရရင် ကမ္ဘာကြီးမှာ အတူယှဉ်တွဲနေထိုင်ဖို့ ပိုခက်ခဲလာတယ်ဆိုတာ ငြင်းမရဘူးရှင့်။ လက်ရှိ ကမ္ဘာ့အခြေအနေက လူတွေဟာ နိုင်ငံစုံဝါဒကို ယုံကြည်လာကြပြီး ကမ္ဘာ့စိန်ခေါ်မှုတွေကို ထိထိရောက်ရောက် တုံ့ပြန်နိုင်တဲ့စွမ်းရည် ဆုံးရှုံးစေတာ တွေ့ရပါတယ်” ဟု ဖြည့်စွက် ပြောကြားခဲ့သည်။

“ဒါကြောင့် စစ်မြေပြင်မှာ မဟုတ်ဘဲ စေ့စပ်ညှိနှိုင်းရေး စားပွဲပေါ်မှာတင် သဘောထား ကွဲလွဲမှုတွေကို ဖြေရှင်းဖို့က ကျမတို့ရဲ့ တာဝန်ပဲ ဖြစ်ပါတယ်။ ကမ္ဘာက ကျမတို့ကို စောင့်ကြည့်နေတော့ ကျမတို့ မအောင်မြင်လို့ မဖြစ်ဘူးရှင့်” ဟု တိုက်တွန်းခဲ့ သည်။
ရက်နိုမာဆုဒီ၏ သဘောထား မှတ်ချက်များသည် G-20 နိုင်ငံများ၏ ခေါင်းဆောင်များအတွက် ရှေ့ပြေး ပြောကြားခဲ့ခြင်း ဖြစ်သည်။

ယခု အစည်းအဝေး၏ အပြင်ဘက်တွင် နိုင်ငံ ၂၀ မှ နိုင်ငံခြားရေးဝန်ကြီးများသည် တစ်ဦးချင်းအလိုက်၊ အဖွဲ့ငယ်များအလိုက် သီးခြားအစည်းအဝေးများ ကျင်းပကြရန် မျှော်လင့်ထားသည်။ လာမည့် နိုဝင်ဘာလတွင်လည်း G-20 ထိပ်သီး အစည်းအဝေး ကျင်းပသွားရန် စီစဉ်ထားကြောင်း အေပီသတင်းအရ သိရသည်။

Source: AP

CNI International News

နယူးဒေလီ၊ ဇူလိုင် ၇

ပြည်ထောင်စုဝန်ကြီးတစ်ဦး နုတ်ထွက်ခြင်းဖြင့် အိန္ဒိယ၏ အာဏာရပါတီ သမိုင်းတလျှောက် ပထမဆုံးအကြိမ် မွတ်ဆလင် လွှတ်တော်အမတ် ကင်းမဲ့သွားသည့်အဖြစ်သို့ ရောက်ရှိသွားကြောင်း အယ်လ်ဂျာဇီးယားက ရေးသားဖော်ပြသည်။

လူနည်းစုရေးရာဝန်ကြီးဖြစ်သည့် မူခါတာအေဘတ်နာကွီ (Mukhtar Abbas Naqvi) သည် လွှတ်တော်အမတ်အဖြစ် သက်တမ်းမကုန်ဆုံး တစ်ရက်အလို ဇူလိုင် ၆ ရက်တွင် နုတ်ထွက်သွားခဲ့သည်။

အသက် ၆၄ နှစ်ရှိပြီဖြစ်သည့် အဆိုပါ လွှတ်တော်အမတ်သည် ဝန်ကြီးချုပ် နရိန္ဒရာမိုဒီ၏ ဟိန္ဒူအမျိုးသားရေးဝါဒီ BJP ပါတီတွင် လွှတ်တော်အမတ် ၄၀၀ နီးပါး ရှိသည့်အနက် တစ်ဦးတည်းသော မွတ်ဆလင်ဝန်ကြီး ဖြစ်သည်။

BJP ပါတီသည် ၂၀၁၄ ခုနှစ် အာဏာရလာစဉ်ကတည်းက လူနည်းစု အသိုင်းအဝိုင်းကို ဖိနှိပ်သည့် စွပ်စွဲချက်များနှင့် ရင်ဆိုင်ခဲ့ ရပြီးနောက် ယခုကဲ့သို့ လွှတ်တော်အမတ်နှင့် မွတ်ဆလင်ဝန်ကြီးဖြစ်သူ မူခါတာအေဘတ်နာကွီ နုတ်ထွက်သွားခဲ့ခြင်း ဖြစ် သည်။

အစ္စလာမ် ဆန့်ကျင်ရေး သဘောထား မှတ်ချက်ပေးနေသည့် အစိုးရတာဝန်ရှိသူတစ်ဦးအပေါ် တကမ္ဘာလုံးက အမြင်စောင်းနေ ချိန်၌ BJP ပါတီသည် အိန္ဒိယ၏ ဒုတိယသမ္မတရာထူးအတွက် နာကွီကို ထည့်သွင်းစဉ်းစားဖွယ်ရာ ရှိသည်။

  မိုဒီနဲ့အတူ တွေ့ရတဲ့ ဒရော့ပသီမာမူ (GETTY IMAGES)

လက်ရှိသမ္မတ အမ်ဗန်ကိယာ့နိုင်ဒူ (M Venkaiah Naidu) ၏ ရာထူးသက်တမ်းသည် လာမည့် ဩဂုတ် ၁၀ ရက်တွင် ကုန်ဆုံး မည်ဖြစ်ပြီး ဒုတိယသမ္မတ ရွေးကောက်ပွဲများကို ဩဂုတ် ၆ ရက်တွင် ကျင်းပပေးရန် စီစဉ်ထားသည်။

ပြီးခဲ့သည့်လတွင် BJP ပါတီသည် သမ္မတရာထူး လျာထားခြင်းအတွက် ဒရော့ပသီမာမူ (Droupadi Murmu) ကို ရွေးကောက် ပွဲ ကိုယ်စားလှယ်လောင်း အမည်စာရင်း တင်သွင်းခဲ့သည်။

အကယ်၍ မာမူ အနိုင်ရခဲ့လျှင် ၎င်းသည် အိန္ဒိယ၏ပထမဆုံး လူမျိုးစုတစ်စုထဲမှ နိုင်ငံရေးသမားအနေဖြင့် တင်မြှောက်ခံရသူ အမျိုးသမီးခေါင်းဆောင် ဖြစ်လာမည်ဟု သိရသည်။

အိန္ဒိယ၏ ဖွဲ့စည်းပုံအခြေခံဥပဒေတွင် ဝန်ကြီးချုပ်နှင့် ၎င်း၏အစိုးရအဖွဲ့က အုပ်ချုပ်ရေးအာဏာကို ဆုတ်ကိုင်ထားပြီး သမ္မတ နှင့် ဒုတိယသမ္မတများအတွက် အခမ်းအနားဆိုင်ရာ ကဏ္ဍကိုသာ ပေးထားသည်။

“ကမ္ဘာ့အကြီးဆုံး နိုင်ငံရေးပါတီ” ဟု အခိုင်အမာ ပြောထားသည့် မိုဒီ၏ BJP တွင် လူထုက တိုက်ရိုက် ရွေးချယ်တင်မြှောက် သော အောက်လွှတ်တော်အမတ် ၃၀၁ ဦးအထိ ရှိသည်။

မွတ်ဆလင်ဝန်ကြီး နာကွီ ယခုနုတ်ထွက်လိုက်ခြင်းဖြင့် လက်ယာယိမ်း BJP ပါတီ၏ အထက်လွှတ်တော်ထဲတွင် မွတ်ဆလင် အမတ် လုံးဝကင်းမဲ့သွားပြီ ဖြစ်သည်။

Source: Aljazeera

CNI International News

ဘရပ်ဆဲလ်၊ ဇူလိုင် ၆

မြောက်အတ္တလန္တိတ်စစ်စာချုပ်အဖွဲ့ (နေတိုး) မဟာမိတ်နိုင်ငံပေါင်း ၃၀ သည် ဆွီဒင်နှင့်ဖင်လန်တို့ အဖွဲ့ဝင်ဖြစ်လာရေး အတွက် ပါဝင်ခွင့်ဆိုင်ရာ သဘောတူညီချက်များကို ဇူလိုင် ၅ ရက်က အသီးသီး လက်မှတ်ရေးထိုးခဲ့ကြကြောင်း အေပီ သတင်းတစ်ပုဒ်၌ တွေ့ရသည်။

အသင်းဖွဲ့ စည်းမျဉ်းဥပဒေဆိုင်ရာ အတည်ပြုချက် ရယူရန်အတွက် အဆိုပါ နှစ်နိုင်ငံ၏ အဖွဲ့ဝင်ဖြစ်ရေး ကမ်းလှမ်းချက်ကို အဖွဲ့ဝင်ဖြစ်ပြီးသား မဟာမိတ် နိုင်ငံအသီးသီး၏ မြို့တော်များထံ ပေးခဲ့ရာတွင် တူရကီအစိုးရနှင့်တော့ နိုင်ငံရေးပြဿနာ ဖြစ်နိုင်ဖွယ်ရှိကြောင်း အေပီက ဆက်လက် ရေးသားထားသည်။

ပြီးခဲ့သည့် ဖေဖော်ဝါရီလတွင် အိမ်နီးချင်း ယူကရိန်းသို့ ကျူးကျော်ခဲ့၍ ရုရှားကို နေတိုးက မဟာဗျူဟာမြောက် အထီးကျန် ဆန်စေခဲ့ရာ၌ ယခုနေတိုး၏ အရွေ့သစ် တစ်ခုအားဖြင့် ရုရှား အထီးကျန်စေရေး ထပ်မံ တိုးမြှင့် လုပ်ဆောင် လိုက်ခြင်းလည်း ဖြစ်သည်။

“ဒါဟာ ဖင်လန်နဲ့ဆွီဒင် တို့နဲ့ပတ်သက်ပြီး ကျနော်တို့ နေတိုးအဖွဲ့အတွက် တကယ့်ကို သမိုင်းအခိုက်အတန့်ပါပဲ” ဟု နေတိုး အထွေထွေအတွင်းရေးမှူး ဂျန့်စ်စတိုလန်ဘတ်ချ်က ပြောကြားခဲ့သည်။

နေတိုးနိုင်ငံများမှ သံတမန်များနှင့် အမြဲတမ်း ကိုယ်စားလှယ် ၃၀ တို့သည် ပြီးခဲ့သည့် သီတင်းပတ်က စပိန်နိုင်ငံ၊ မက်ဒရစ်မြို့ တွင် ကျင်းပသော နေတိုး ထိပ်သီး အစည်းအဝေးတွင် တရားဝင် အတည်ပြု ဆုံးဖြတ်ချက်များ ချမှတ်ခဲ့ကြသည်။

ထိုအစည်းအဝေးသို့ နေတိုး ခေါင်းဆောင်များသည် ရုရှား၏ အိမ်နီးချင်း ဖင်လန်နှင့် စကင်ဒီနေးဗီးယား ကျွန်းဆယ်မှ ဆွီဒင်တို့ ကို ဖိတ်ကြား၍ တက်ရောက်စေခဲ့သည်။

သို့သော် မက်ဒရစ်မြို့ အစည်းအဝေးအတွင်း ဆွီဒင်နှင့်ဖင်လန်၊ တူရကီတို့သည် နားလည်မှု စာချွန်လွှာ လက်မှတ် ရေးထိုးနိုင် ခဲ့ကြသော်လည်း အဖွဲ့ဝင်ဟောင်းဖြစ်သော တူရကီနိုင်ငံတွင် ထိုအဖွဲ့ဝင်သစ် နှစ်နိုင်ငံ(ဆွီဒင်နဲ့ဖင်လန်)အတွက် တူရကီ လွှတ်တော်၏ အတည်ပြု ဆုံးဖြတ်ချက် ရရှိရေးမှာ ပြဿနာရှိနေဆဲ ဖြစ်သည်။

ဆွီဒင်နဲ့ဖင်လန် ကိုယ်စားလှယ်များကို နေတိုးအတွင်းရေးမှူးတို့ကိုတွေ့ရစဉ်(AP)

အကြမ်းဖက်ဟု မိမိတို့ သံသယရှိနေသူများကို လွှဲပြောင်းပေးရေးအတွက် တူရကီ၏ တောင်းဆိုချက်များအား မလိုက်လျောပါ က ဆွီဒင်နှင့်ဖင်လန်တို့ နေတိုးထဲဝင်ရေး လုပ်ငန်းစဉ် နှောင့်နှေးနိုင်ကြောင်း တူရကီသမ္မတ အာဒိုဂန်က သတိပေးခဲ့သည်။

တူရကီ အလိုရှိနေသူများမှာ တရားမဝင် ကာ့ဒ်သူပုန်အဖွဲ့များ (သို့မဟုတ်) တူရကီပြည်တွင်း မအောင်မြင်သော ၂၀၁၆ ခုနှစ် အာဏာသိမ်းမှုဟု စွပ်စွဲထားသော ပြည်ပရောက် ဘာသာရေးဆရာတစ်ဦး၏ ကွန်ရက်နှင့် ချိတ်ဆက်ထားမှုများ ဖြစ်ကြသည်။

သို့ဖြစ်၍ တူရကီ လွှတ်တော်အနေဖြင့် ဆွီဒင်နှင့်ဖင်လန်တို့နှင့် စပ်လျဉ်း၍ သဘောတူညီချက်ကို အတည်ပြုပေးရန် ငြင်းဆို နိုင်ကြောင်း အာဒိုဂန်က ပြောကြားခဲ့ပြီး ဖြစ်သည်။

နေတိုးအဖွဲ့တွင် အဖွဲ့ဝင်နိုင်ငံပေါင်း ၃၀ ထံမှ တရားဝင် သဘောတူခွင့်ပြုချက် ယူရမည်ဖြစ်ပြီး နိုင်ငံကိုယ်စီ၌ တားဆီးပိုင်ခွင့် တစ်ခုစီ ရရှိထား၍ အာဒိုဂန်၏ ပြောကြားချက်သည် ပြင်းထန်သော ခြိမ်းခြောက်မှုလည်း ဖြစ်နေသည်။

နေတိုး အထွေထွေအတွင်းရေးမှူးချုပ် စတိုလန်ဘတ်ချ်ကတော့ ၎င်းအနေဖြင့် စိတ်အပြောင်းအလဲများ ရှိနေခြင်းအတွက် မျှော်လင့်မထားကြောင်း ထုတ်ဖော်ပြောကြားခဲ့သည်။

“လုံခြုံရေးအရ ကိုင်တွယ်ဖြေရှင်းစရာတွေ လိုအပ်တာ ရှိပါတယ်။ ပြီးတော့ နေတိုး ထုံးတမ်းစဉ်လာ အတိုင်းလည်း ကျနော်တို့ ဆောင်ရွက်ခဲ့ပါတယ်။ ဘုံသဘောတူညီချက်ကိုလည်း တွေ့ရပါတယ်” ဟု ၎င်းက ဖြည့်စွက် ပြောကြားခဲ့သည်။

Source: AP

CNI International News

ဝါရှင်တန်၊ ဇူလိုင် ၆

အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ယူကရိန်းစစ်ပွဲကြောင့် ပိတ်ဆို့ခံထားရသည့် ပင်လယ် လမ်းကြောင်း ပြန်ဖွင့်ဖို့ ရုရှားကို G-20 က ဖိအားပေးရန် တိုက်တွန်းခဲ့ပြီး မော်စကို(ရုရှား)၏ စစ်ပွဲ ဆင်နွှဲနေခြင်းကို မထောက်ခံရန် တရုတ် အား ထပ်လောင်း သတိပေးခဲ့ကြောင်း ရိုက်တာက ရေးသားဖော်ပြသည်။

ယူကရိန်း စစ်ရေးပဋိပက္ခကြောင့် ပိတ်ဆို့ထားသော ပင်လယ်လမ်းကြောင်းများ ပြန်ဖွင့်ပေးဖို့ ကုလသမဂ္ဂ ကြိုးပမ်း လျက်ရှိ သည်။

ဘလင်ကင်သည် ယနေ့(ဇူလိုင် ၆ ရက်)တွင် G-20 နိုင်ငံခြားရေးဝန်ကြီးများ၏ အင်ဒိုနီရှားနိုင်ငံ၊ ဘာလီကျွန်း အစည်းအဝေးသို့ ရောက်ရှိလာခဲ့သည်။

၎င်း၏ ခရီးစဉ်အတွင်း ဘလင်ကင်သည် တရုတ်နိုင်ငံခြားရေးဝန်ကြီး ဝမ်ယိနှင့် ယမန်နှစ် အောက်တိုဘာလ နောက်ပိုင်း ပထမဆုံးအကြိမ် တွေ့ဆုံမည် ဖြစ်သော်လည်း ရုရှားနိုင်ငံခြားရေးဝန်ကြီး ဆာဂျေလာဗရော့နှင့် တွေ့ရန် မျှော်မှန်းထားခြင်း မတွေ့ရပေ။

G-20 ညီလာခံ (GETTY IMAGES)

ယခု G-20 ဝန်ကြီးများ အစည်းအဝေးတွင် ဝါရှင်တန်အနေဖြင့် မော်စကိုအပေါ် ယူကရိန်း ကျူးကျော်စစ်နှင့်ပတ်သက်၍ အငြင်းပွားဖွယ်ရာများ ချပြ ဆွေးနွေးလာမည်ဟု နိုင်ငံရေးလေ့လာသူများက ကြိုတင်သုံးသပ်ထားကြသည်။

ဖေဖော်ဝါရီ ၂၄ ရက်တွင် ယူကရိန်းသို့ ကျူးကျော်စစ် စတင်စဉ်ကတည်းက ကမ္ဘာ့စားနပ်ရိက္ခာ ပြတ်လပ်မှုအတွက် ဝါရှင်တန် နှင့် မဟာမိတ်များသည် မော်စကို(ရုရှား)အား အပြစ်တင် ရှုတ်ချခဲ့ကြသည်။ တစ်ချိန်တည်းမှာပင် ကမ္ဘာ့ဈေးကွက်ထဲသို့ အဓိက ကုန်စည်များ တင်ပို့သူဖြစ်သည့် ရုရှားကလည်း အမေရိကန် ဦးဆောင်သော ပိတ်ဆို့အရေးယူမှုများကို တုံ့ပြန်အပြစ် တင်ခဲ့သည်။

ဘလင်ကင်သည် စွမ်းအင်လုံခြုံရေးကိစ္စကို ယခုအစည်းအဝေးတွင် အလေးပေးမည်ဖြစ်ပြီး ယူကရိန်းနှင့်ရုရှားတို့ထံမှ စားသောက်ကုန်နှင့် ဓာတ်မြေဩဇာများ ကမ္ဘာ့ဈေးကွက် ပြန်ရောက်ဖို့ ကုလသမဂ္ဂ (UN) ကြိုးပမ်းနေခြင်းကိုလည်း အားဖြည့် ပေးသွားမည်ဖြစ်ကြောင်း အမေရိကန်စီးပွားရေးဆိုင်ရာ လက်ထောက်နိုင်ငံခြားရေးဝန်ကြီး ရာမင်တာဝေ (Ramin Toloui) က သတင်းထောက်များကို ပြောကြားခဲ့သည်။

“G-20 နိုင်ငံတွေ အနေနဲ့ ရုရှားကို တာဝန်ခံခိုင်းပြီး ဂျုံစပါး တင်ပို့မှုအတွက် ပင်လယ်လမ်းကြောင်းတွေ ပြန်ဖွင့်ဖို့ UN ကြိုးစား နေတာကို ထောက်ခံဖို့အရေး တောင်းဆိုပေးကြဖို့ ရည်ရွယ်ပါတယ်။ G-20 အဆင့်မှာပဲဖြစ်ဖြစ်၊ G-10 တစ်နိုင်ငံချင်းပဲ ဖြစ်ဖြစ် ကျနော်တို့ နိုင်ငံခြားရေးဝန်ကြီး ဘလင်ကင်က အလေးပေး တိုက်တွန်းသွားမယ့် အချက်ပဲ ဖြစ်ပါတယ်” ဟု ၎င်းက ဆက် လက် ပြောကြားခဲ့သည်။

ယူကရိန်းစစ်ပွဲ အပျက်အစီးများ (AFP)

ထို့နောက် သင်္ဘောသွားလာမှုများကို ရုရှား ပိတ်ဆို့ထားသည်ဟု စွပ်စွဲထားသော ယူကရိန်းက ဂျုံစပါးတင်ပို့အတွက် အာမခံ ချက်ရရန် တူရကီ၊ UN တို့နှင့် ယခုသီတင်းပတ်အတွင်း ဆွေးနွေးနေသည်။

ဂျုံစပါးတင်ပို့မှု ပိတ်ဆို့ကြောင်း စွပ်စွဲချက်ကို ရုရှားက ငြင်းပယ်ခဲ့ပြီး ဆိပ်ကမ်းများတွင် ယူကရိန်း၏မိုင်းများ ချထားခြင်း ကြောင့် ပိတ်ဆို့မှုအချို့ မဖယ်ရှားနိုင်သေးကြောင်း ယူကရိန်းဘက်ကို အပြစ်တင်ခဲ့သည်။

လာမည့် ဇူလိုင် ၉ ရက်တွင် တရုတ်နိုင်ငံခြားရေးဝန်ကြီး ဝမ်ယိနှင့် ဘလင်ကင်တို့ တွေ့ဆုံဆွေးနွေးမှုတွင် ယူကရိန်းနှင့် ပတ်သက်၍ ပွင့်ပွင့်လင်းလင်း အမြင်ချင်း ဖလှယ်ကြရန် မျှော်လင့်ထားကြောင်း အရှေ့အာရှဆိုင်ရာ အမေရိကန်ထိပ်တန်း သံတမန် ဒန်နီယယ်ခရစ္စတင်ဘရင့် (Daniel Kritenbrink) က ပြောကြားခဲ့သည်။

“အဲဒီတွေ့ဆုံမှုကျရင် ယူကရိန်းကိစ္စမှာ တရုတ် ဘာလုပ်မယ်၊ ဘာမလုပ်သင့်ဘူးဆိုတာ မျှော်လင့်ချက်တွေ ကျနော်တို့ဘက်က ချပြဖို့ နောက်ထပ် အခွင့်အလမ်း ဖြစ်လာမှာပါ” ၎င်းက ဆက်လက် ပြောကြားခဲ့သည်။

Source: Reuters